༤. ཙ་ཏུ་ཏྠོ པ་རི་ཙྪེ་དོ
པ་ཀི་ཎྞ་ཀ་ཝི་བྷཱ་གོ
༢༡༡. ཨི་ཏོ པ་རཾ ཀི་ཙྩ་ཏོ ཙ, དྭཱ་རཱ་ལ་མྦ་ཎ་ཝ་ཏྠུ་ཏོ;
བྷཱུ་མི་པུ་གྒ་ལ་ཏོ ཋཱ་ནཱ, ཛ་ན་ཀཱ ཙ ཡ་ཐཱ་ར་ཧཾ.
༢༡༢. ས་ངྒ་ཧོ ཙ པ་ཝ་ཏྟི ཙ, པ་ཊི་ས་ནྡྷི་པ་ཝ་ཏྟི་སུ;
ཙི་ཏྟུ་པྤཱ་ད་ཝ་སེ་ནེ་ཝ, སཾ་ཁི་པི་ཏྭཱ་ན ནི་ཡྻ་ཏེ.
༢༡༣. རཱུ་པཱ་རཱུ་པ་མ་ཧཱ་པཱ་ཀཱ, མུ་པེ་ཀྑཱ་ཏཱི་ར་ཎ་དྭ་ཡཾ;
ཙུ་ཏི་ས་ནྡྷི་བྷ་ཝ་ངྒཱ་ནི, ཙི་ཏྟཱ་ནེ་ཀཱུ་ན་ཝཱི་ས་ཏི.
༢༡༤. ཨཱ་ཝ་ཛྫ་ནཾ ཏུ ཡུ་ག་ལ༹ཾ, ད་སྶ་ནཾ ས་ཝ་ནཾ ཏ་ཐཱ;
གྷཱ་ཡ་ནཾ སཱ་ཡ་ན་ཉྩེ་ཝ, ཕུ་ས་ནཾ ས་མྤ་ཊི་ཙྪ་ནཾ.
༢༡༥. ཏཱི་ཎི ཏཱི་ར་ཎ་ཙི་ཏྟཱ་ནི, ཨེ་ཀཾ ཝོ་ཊྛ་བྦ་ནཾ མ་ཏཾ;
པ་ཉྩ་དྭཱ་རེ མ་ནོ་དྭཱ་རེ, ཏ་དཱ་ཝ་ཛྫ་ན་ནཱ་མ་ཀཾ.
༢༡༦. པ་ཉྩ་པ་ཉྙཱ་ས ཛ་ཝ་ན་ཀི་ཙྩཱ་ནཱི་ཏི ཝི་ནི་དྡི་སེ;
ཀྲི་ཡཱ ཙཱ་ཝ་ཛྫ་ནཾ ཧི་ཏྭཱ, ཀུ་ས་ལཱ་ཀུ་ས་ལ་པྥ་ལཾ.
༢༡༧. ཏ་དཱ་ལ་མྦ་ཎ་ཙི་ཏྟཱ་ནི, བྷ་ཝ་ནྟེ་ཀཱ་ད་སེ་ཝ ཧི;
མ་ཧཱ་ཝི་པཱ་ཀ་ཙི་ཏྟཱ་ནི, ཨ་ཊྛ ས་ནྟཱི་ར་ཎ་ཏྟ་ཡཾ.
༢༡༨. པ་ཉྩ་ཀི་ཙྩ་ནྟི བྷཱ་ས་ནྟི, ཨུ་པེ་ཀྑཱ་ཏཱི་ར་ཎ་དྭ་ཡཾ;
ཙ་ཏུ་ཀི་ཙྩཱ མ་ཧཱ་པཱ་ཀཱ, ཏི་ཀ་ཀི་ཙྩཱ མ་ཧ་གྒ་ཏཱ.
༢༡༩. དུ་ཀི་ཙྩ་མི་ཏི ཝོ་ཊྛ་བྦཾ, སུ་ཁ་ཏཱི་ར་ཎ་མཱི་རི་ཏཾ;
པ་ཉྩ་ཝི་ཉྙཱ་ཎ་ཛ་ཝ་ན་མ་ནོ་དྷཱ་ཏུ་ཏྟི་ཀཾ པ་ན.
༢༢༠. ཨེ་ཀ་ཀི་ཙྩཱ་ཏི བྷཱ་ས་ནྟི, ཨ་ཊྛ་ས་ཊྛི ཝི་བྷཱ་ཝི་ནོ;
ཨི་ཙྩེ་ཝཾ ཀི་ཙྩ་བྷེ་དེ་ན, ཙི་ཏྟུ་པྤཱ་དཱ ཝ་ཝ་ཏྠི་ཏཱ.
༢༢༡. ཙ་ཀྑུ་སོ་ཏ་གྷཱ་ན་ཛི་ཝ྄ཧཱ-ཀཱ་ཡ་དྷཱ་ཏུ ཡ་ཐཱ་ཀྐ་མཾ;
པ་ཉྩ་དྭཱ་རཱ བྷ་ཝ་ངྒཾ ཏུ, མ་ནོ་དྭཱ་རཾ པ་ཝུ་ཙྩ་ཏི.
༢༢༢. གྷཱ་ནཱ་ད་ཡོ ཏ་ཡོ རཱུ་པེ, པ་ཉྩ ཙ་ཀྑཱ་ད་ཡོ ཏ་ཐཱ;
ཨ་རཱུ་པེ ན་ཏྠུ་བྷ་ཡ་ཏྠ, ཏ་དཱ་ལ་མྦ་ཎ་མཱ་ན་སཾ.
༢༢༣. ཚ དྭཱ་རཱ ཝཱི་ཐི་ཙི་ཏྟཱ་ནི, ས་ཏྟ ཀཱ་མཱི་སུ རཱུ་པི་སུ;
དྭཱ་ར་ཏྟ་ཡཾ ཚ ཙི་ཏྟཱ་ནི, མ་ནོ་དྭཱ་ར་མ་རཱུ་པི་སུ.
༢༢༤. པ་ཊི་ས་ནྡྷཱ་དི་བྷཱུ་ཏཱ ཧི, ཨ་ཝ་སཱ་ནེ ཙུ་ཏི་ཊྛི་ཏཱ;
མ་ཛ྄ཛྷེ བྷ་ཝ་ངྒཾ ཚེ་ཏྭཱ་ན, པ་ཙྩེ་ཀཾ ཝཱི་ཐི ཛཱ་ཡ་ཏི.
༢༢༥. རཱུ་པཱ་དཱ་ར་མྨ་ཎེ ཙ་ཀྑུ-པ་སཱ་དཱ་དི་མྷི གྷ་ཊྚི་ཏེ;
ཨཱ་ཝ་ཛྫ་ནཱ་ད་ཡོ ཧོ་ནྟི, བྷ་ཝ་ངྒ་དྭི་ཙ་ལཱ པ་རཾ.
༢༢༦. པ་རི་ཎཱ་མེ བྷ་ཝ་ངྒ་སྶ, ཨཱ་ལ་མྦེ ག་ཧ་ཎཱ་ར་ཧེ;
ཏ་ཐཱ ཝཱི་ཐི མ་ནོ་དྭཱ་རེ, ཡ་ཐཱ་ས་མྦྷ་ཝ་ཏོ བྷ་ཝེ.
༢༢༧. ཨཱ་ཝ་ཛྫཱ པ་ཉྩ་ཝི་ཉྙཱ་ཎཾ, ས་མྤ་ཊི་ཙྪ་ན་ཏཱི་ར་ཎཾ;
ཝོ་ཊྛ་བྦ་ཀཱ་མ་ཛ་ཝ་ནཾ, ཏ་དཱ་ལ་མྦ་ཎ་མཱ་ན་སཾ.
༢༢༨. ས་ཏྟེ་ཝཾ ཝཱི་ཐི་ཙི་ཏྟཱ་ནི, ཙི་ཏྟུ་པྤཱ་དཱ ཙ་ཏུ་དྡ་ས;
ཙ་ཏུ་པ་ཉྙཱ་ས ཝི་ཏྠཱ་རཱ, པ་ཉྩ་དྭཱ་རེ ཡ་ཐཱ་ར་ཧཾ.
༢༢༩. ཨུ་པྤཱ་ད་ཊྛི་ཏི་བྷ་ངྒཱ་ནཾ, ཝ་སཱ ཙི་ཏྟ་ཀྑ་ཎཾ ཏ་ཡཾ;
རཱུ་པཱ་ནཾ ཋི་ཏི ཨེ་ཀཱུ་ན-པ་ཉྙཱ་ས་ཉྩ དུ་ཀེ དུ་ཀཾ.
༢༣༠. པ་རི་ཏྟེ་ཏི་པ་རི་ཏྟེ ཙ, མ་ཧ་ནྟེ་ཏི་མ་ཧ་ནྟ་ཀེ;
ཝོ་ཊྛ་བྦ་མོ་གྷ་ཛ་ཝ་ནཾ, ཏ་དཱ་ལ་མྦ་ནྟི ཏཾ ཀ་མཱ.
༢༣༡. ཨཱ་ཝ་ཛྫ་ན་ཉྩ ཛ་ཝ་ནཾ, མ་ནོ་དྭཱ་རེ ཏུ གོ་ཙ་རེ;
ཝི་བྷཱུ་ཏེ ཏུ ཏ་དཱ་ལ་མྦཾ, ཝི་ཏྠཱ་རཱ ས་ཏྟ་ས་ཊྛི ཏེ.
༢༣༢. ཀཱ་མེ ཛ་ཝ་ན་ས་ཏྟཱ་ལ-མྦ་ཎཱ་ནཾ ནི་ཡ་མེ ས་ཏི;
ཝི་བྷཱུ་ཏེ་ཏི་མ་ཧ་ནྟེ ཙ, ཏ་དཱ་ལ་མྦ་ཎ་མཱི་རི་ཏཾ.
༢༣༣. པ་ཉྩ་དྭཱ་རེ མ་ནོ་དྷཱ་ཏུ, པ་ཙྩེ་ཀ་མྷི ཡ་ཐཱ་ཀྐ་མཾ;
པ་ཉྩ་ཝི་ཉྙཱ་ཎ་ཡུ་ག་ལ༹ཾ, པ་ཙྩེ་ཀཾ ཏུ པ་ཀཱ་སི་ཏཾ.
༢༣༤. མ་ནོ་དྭཱ་རེ ཏུ ཛ་ཝ་ནཾ, མ་ཧ་གྒ་ཏ་མ་ནུ་ཏྟ་རཾ;
སུ་ཁ་ཏཱི་ར་ཎ་ཝོ་ཊྛ་བྦཾ, པ་རི་ཏྟ་ཛ་ཝ་ནཾ ཚ་སུ.
༢༣༥. མ་ཧཱ་ཝི་པཱ་ཀ་ཙི་ཏྟཱ་ནི, ཨུ་པེ་ཀྑཱ་ཏཱི་ར་ཎ་དྭ་ཡཾ;
ཚ་སུ དྭཱ་རེ་སུ ཛཱ་ཡ་ནྟི, ཝཱི་ཐི་མུ་ཏྟཱ་ནི ཙེ་ཀ་དཱ.
༢༣༦. ས་ཏྟ་ཏི ཝཱི་ཐི་ཙི་ཏྟཱ་ནི, ཝི་པཱ་ཀཱ ཏུ མ་ཧ་གྒ་ཏཱ;
ན་ཝ ཝཱི་ཐི་ཝི་མུ་ཏྟཱ ཙ, དུ་ཝི་དྷཱ་པི ད་སཱི་རི་ཏཱ.
༢༣༧. ཨི་ཙྩེ་ཝཾ དྭཱ་ར་བྷེ་དེ་ན, ཝི་བྷཱ་ཝེ་ཏྭཱ ཏ་ཏོ པ་རཾ;
ཉེ་ཡྻཱ གོ་ཙ་ར་བྷེ་དེ་ན, ཙི་ཏྟུ་པྤཱ་དཱ ཡ་ཐཱ་ར་ཧཾ.
༢༣༨. རཱུ་པ་ས་དྡ་ག་ནྡྷ་ར་ས་ཕོ་ཊྛ་བྦཱ པ་ཉྩ གོ་ཙ་རཱ;
སེ་ས་ཉྩ རཱུ་པ་པ་ཉྙ་ཏྟི་ནཱ་མ་ཉྩ དྷ་མྨ་གོ་ཙ་རཾ.
༢༣༩. པ་ཉྩ་དྭཱ་རེ ཝ་ཏྟ་མཱ་ནཾ, པ་ཉྩཱ་ལ་མྦཾ ཡ་ཐཱ་ཀྐ་མཾ;
ཚཱ་ལ་མྦ་ཎཾ མ་ནོ་དྭཱ་རེ, ཨ་ཏཱི་ཏཱ་ནཱ་ག་ཏ་མྤི ཙ.
༢༤༠. པ་ཉྙ་ཏྟཱ་ཏཱི་ཏ་ཝ་ཏྟ་ནྟཾ, ཚ་དྭཱ་ར་གྒ་ཧི་ཏཾ པ་ན;
ཚ་ལཱ༹་ར་མྨ་ཎ་ས་ངྑཱ་ཏཾ, ཡེ་བྷུ་ཡྻེ་ན བྷ་ཝ་ནྟ་རེ.
༢༤༡. ནི་མི་ཏྟ་ག་ཏི་ཀ་མྨཱ་ནཾ, ཀ་མྨ་མེ་ཝཱ་ཐ གོ་ཙ་རཾ;
པ་ཊི་ས་ནྡྷི་བྷ་ཝ་ངྒཱ་ནཾ, ཙུ་ཏི་ཡཱ་ཝ ཡ་ཐཱ་ར་ཧཾ.
༢༤༢. པ་ཉྩཱ་ལ་མྦེ མ་ནོ་དྷཱ་ཏུ, པ་ཙྩེ་ཀ་མྷི ཡ་ཐཱ་ཀྐ་མཾ;
པ་ཉྩ་ཝི་ཉྙཱ་ཎ་ཡུ་ག་ལ༹ཾ, པ་ཙྩེ་ཀཾ ཏུ པ་ཀཱ་སི་ཏཾ.
༢༤༣. ཀཱ་མ་པཱ་ཀཱ་ནི སེ་སཱ་ནི, ཧ་ས་ན་ཉྩ པ་རི་ཏྟ་ཀེ;
ཉཱ་ཎ་ཧཱི་ནཱ་ནི་པུ་ཉྙཱ་ནི, ཛ་ཝ་ནཱ་ནི ཨ་ནི་མྨ་ལེ.
༢༤༤. ཏི་ཧེ་ཏུ་ཀཱ་མ་པུ་ཉྙཱ་ནི, པུ་ཉྙཱ་བྷི་ཉྙཱ ཙ ལོ་ཀི་ཡཱ;
ས་བྦཱ་ལ་མྦེ པ་ཝ་ཏྟ་ནྟི, ཨ་གྒ་མ་གྒ་ཕ་ལཾ ཝི་ནཱ.
༢༤༥. ཀྲི་ཡཱ་བྷི་ཉྙཱ ཙ ཝོ་ཊྛ་བྦཾ, ཀྲི་ཡཱ ཀཱ་མེ ཏི་ཧེ་ཏུ་ཀཱ;
ས་བྦཱ་ལ་མྦེ པ་ཝ་ཏྟ་ནྟི, ནི་བྦཱ་ནེ ནི་མྨ་ལཱ སི་ཡུཾ.
༢༤༦. དུ་ཏི་ཡ་ཉྩ ཙ་ཏུ་ཏྠ་ཉྩ, ཨཱ་རུ་པྤེ་སུ མ་ཧ་གྒ་ཏེ;
མ་ཧ་གྒ་ཏ་ཉྙེ ཝོ་ཧཱ་རེ, ཨ་ཡམཱ་ལ་མྦ་ཎེ ན་ཡོ.
༢༤༧. ཙ་ཀྑུ་སོ་ཏ་གྷཱ་ན་ཛི་ཝ྄ཧཱ-ཀཱ་ཡ་ཧ་ད་ཡ་ཝ་ཏྠུ་ནཱ;
ཀཱ་མ་ལོ་ཀེ ཚ་ཝ་ཏྠཱུ་ནི, ནི་སྶི་ཏཱ ས་ཏྟ དྷཱ་ཏུ་ཡོ.
༢༤༨. པ་ཉྩ་ཝི་ཉྙཱ་ཎ་དྷཱ་ཏཱུ ཙ, ཏཱ་སཾ པུ་བྦཱ་པ་ར་ཏྟ་ཡཾ;
མ་ནོ་དྷཱ་ཏུ ཏ་ཏོ སེ་སཱ, མ་ནོ་ཝི་ཉྙཱ་ཎ་དྷཱ་ཏུ ཙ.
༢༤༩. ཙ་ཏ་སྶོ དྷཱ་ཏུ་ཡོ རཱུ་པེ, ཏཱི་ཎི ཝ་ཏྠཱུ་ནི ནི་སྶི་ཏཱ;
ཨ་རཱུ་པེ ཏུ ཨ་ནི་སྶཱ་ཡ, དྷཱ་ཏྭེ་ཀཱ་ཝ པ་ཝ་ཏྟ་ཏི.
༢༥༠. པ་ཉྩ་པྤ་སཱ་དེ ནི་སྶཱ་ཡ, པ་ཙྩེ་ཀཾ ཏུ ཡ་ཐཱ་ཀྐ་མཾ;
པ་ཉྩ་ཝི་ཉྙཱ་ཎ་ཡུ་ག་ལ༹ཾ, བྷ་ཝ་ཏཱི་ཏི པ་ཀཱ་སི་ཏཾ.
༢༥༡. ཀཱ་མ་པཱ་ཀཱ་ནི སེ་སཱ་ནི, མ་གྒཱ་ཝ་ཛྫ་ན་མཱ་དི་ཏོ;
ཧ་ས་ནཾ པ་ཊི་གྷཱ་རཱུ་པཱ-ཝ་ཙ་རཾ ཝ་ཏྠུ་ནི་སྶི་ཏཾ.
༢༥༢. དྭེ་ཙ་ཏྟཱ་ལཱི་ས ནི་སྶཱ་ཡ, ཨ་ནི་སྶཱ་ཡ ཙ ཛཱ་ཡ་རེ;
ཨ་ནི་སྶཱ་ཡ ཝི་པཱ་ཀཱ་ནི, ཨཱ་རུ་པྤེ་ཏི ས་མཱི་རི་ཏཾ.
༢༥༣. ཨི་ཙྩེ་ཝཾ ཝ་ཏྠུ་བྷེ་དེ་ན, ཙི་ཏྟུ་པྤཱ་དཱ པ་ཀཱ་སི་ཏཱ;
ཏ་ཏོ པ་རཾ ཝི་བྷཱ་ཝེ་ཡྻ, བྷཱུ་མི་བྷེ་དེ་ན པ་ཎྜི་ཏོ.
༢༥༤. ནི་ར་ཡེ པེ་ཏ་ལོ་ཀེ ཙ, ཏི་ར་ཙྪཱ་ནཱ་སུ་རེ ཏ་ཐཱ;
པཱ་པ་ཀ་མྨོ་པ་པ་ཛྫ་ནྟི, པཱ་པ་པཱ་ཀཱ་ཡ ས་ནྡྷི་ཡཱ.
༢༥༥. བྷཱུ་མི་སྶི་ཏེ་སུ དེ་ཝེ་སུ, མ་ནུ་སྶེ་སུ་པི ཧཱི་ན་ཀཱ;
ཨ་ཧེ་ཏུ་ཀཱ་ཡ ཛཱ་ཡ་ནྟི, པུ་ཉྙ་པཱ་ཀཱ་ཡ ས་ནྡྷི་ཡཱ.
༢༥༦. ཙཱ་ཏུ་མ་ཧཱ་རཱ་ཛི་ཀཱ ཙ, ཏཱ་ཝ་ཏིཾ་སཱ ཙ ཡཱ་མ་ཀཱ;
ཏུ་སི་ཏཱ ཙེ་ཝ ནི་མྨཱ་ན་ར་ཏི་ནོ ཝ་ས་ཝ་ཏྟི་ནོ.
༢༥༧. ཨི་ཙྩེ་ཝཾ ཚ་སུ དེ་ཝེ་སུ, མ་ནུ་སྶེ་སུ ཙ ཛཱ་ཡ་རེ;
མ་ཧཱ་ཝི་པཱ་ཀ་ས་ནྡྷཱི་ཧི, ཀཱ་མ་པུ་ཉྙ་ཀ་ཏཱ ཛ་ནཱ.
༢༥༨. བྲ་ཧྨཱ་ནཾ པཱ་རི་ས་ཛྫཱ ཙ, ཏ་ཐཱ བྲ་ཧྨ་པུ་རོ་ཧི་ཏཱ;
མ་ཧཱ་བྲ་ཧྨཱ ཙ ཛཱ་ཡ་ནྟི, པ་ཋ་མ་ཛ྄ཛྷཱ་ན་ས་ནྡྷི་ཡཱ.
༢༥༩. པ་རི་ཏྟཱ ཨ་པྤ་མཱ་ཎཱ་བྷཱ, ཛཱ་ཡ་ནྟཱ་བྷ་སྶ་རཱ ཏ་ཐཱ;
དུ་ཏི་ཡ་ཛ྄ཛྷཱ་ན་པཱ་ཀཱ་ཡ, ཏ་ཏི་ཡཱ་ཡ ཙ ས་ནྡྷི་ཡཱ.
༢༦༠. པ་རི་ཏྟ་སུ་བྷ་པྤ་མཱ་ཎ་སུ་བྷཱ ཙ སུ་བྷ་ཀི་ཎྷ་ཀཱ;
ཙ་ཏུ་ཏྠཱ་ཡ ཏུ ཛཱ་ཡ་ནྟི, ཏ་ཏི་ཡ་ཛ྄ཛྷཱ་ན་བྷཱུ་མི་ཀཱ.
༢༦༡. ཝེ་ཧ་པྥ་ལཱ ཨ་ས་ཉྙཱི ཙ, སུ་དྡྷཱ་ཝཱ་སཱ་ཏི ས་ཏྟ་སུ;
པ་ཉྩ་མཱ་ཡ ཙ ཛཱ་ཡ་ནྟི, ཨ་ས་ཉྙཱི་ཙི་ཏྟ་ཝ་ཛྫི་ཏཱ.
༢༦༢. ཨ་ཝི་ཧཱ ཙ ཨ་ཏ་པྤཱ ཙ, སུ་ད་སྶཱ ཙ སུ་ད་སྶི་ནོ;
ཨ་ཀ་ནི་ཊྛཱ་ཏི པ་ཉྩེ་ཏེ, སུ་དྡྷཱ་ཝཱ་སཱ པ་ཀཱ་སི་ཏཱ.
༢༦༣. ཨཱ་ཀཱ་སཱ་ན་ཉྩཱ་ཡ་ཏ་ན་པཱ་ཀཱ་དཱི་ཧི ཡ་ཐཱ་ཀྐ་མཾ;
ཨཱ་ཀཱ་སཱ་ན་ཉྩཱ་ཡ་ཏ་ན་བྷཱུ་མི་ཀཱ་དཱི་སུ ཛཱ་ཡ་རེ.
༢༦༤. ཙུ་ཏི་ས་ནྡྷི་བྷ་ཝ་ངྒཱ་ནཾ, ཝ་སཱ པཱ་ཀཱ མ་ཧ་གྒ་ཏཱ;
ཀཱ་མེ ས་ཧེ་ཏུ་ཀཱ པཱ་ཀཱ, ཏ་དཱ་ལ་མྦ་ཎ་ཏོ་པི ཙ.
༢༦༥. ཡ་ཐཱ་ཝུ་ཏྟ་ནི་ཡཱ་མེ་ན, བྷཱུ་མཱི་སྭེ་ཀཱ་ཝ ཛཱ་ཡ་རེ;
ཙི་ཏྟུ་པྤཱ་དེ་སུ ས་བྦ་ཏྠ, ན ཏྭེ་ཝཱ་ས་ཉྙི་ནོ མ་ཏཱ.
༢༦༦. གྷཱ་ན་ཛི་ཝ྄ཧཱ་ཀཱ་ཡ་དྷཱ་ཏུ-ནི་སྶི་ཏཾ མཱ་ན་སཾ ཏ་ཐཱ;
པ་ཊི་གྷ་དྭ་ཡ་མི་ཙྩེ་ཝ་མ་ཊྛ ཧོ་ནྟེ་ཝ ཀཱ་མི་སུ.
༢༦༧. ཙ་ཀྑུ་སོ་ཏ་ཉྩ ཝི་ཉྙཱ་ཎཾ, མ་ནོ་དྷཱ་ཏུ ཙ ཏཱི་ར་ཎཾ;
ཀཱ་མ་རཱུ་པེ་སུ ཛཱ་ཡ་ནྟི, ཡ་ཐཱ་ས་མྦྷ་ཝ་ཏོ ད་ས.
༢༦༨. ཝོ་ཊྛ་བྦ་ཀཱ་མ་པུ་ཉྙཱ་ནི, ཝི་པྤ་ཡུ་ཏྟཱ་ནི དི་ཊྛི་ཡཱ;
ཨུ་དྡྷ་ཙྩ་ས་ཧི་ཏ་ཉྩེ་ཏི, ས་བྦ་ཏྠེ་ཏཱ་ནི ཙུ་དྡ་ས.
༢༦༩. ཀ་ངྑི་ཏཾ དི་ཊྛི་ཡུ་ཏྟཱ་ནི, སུ་དྡྷཱ་ཝཱ་ས་ཝི་ཝ་ཛྫི་ཏེ;
སི་ཏ་ཉྩ རཱུ་པ་ཛ་ཝ་ན-མཱ་རུ་པྤཱ་པཱ་ཡ་ཝ་ཛྫི་ཏེ.
༢༧༠. ཀཱ་མ་ཀྲི་ཡཱ ས་ཧེ་ཏཱུ ཙ, ཨུ་དྡྷཾ ལོ་ཀུ་ཏྟ་ར་ཏྟ་ཡཾ;
ཙ་ཏུ་ཏྠཱ་རུ་པྤ་ཛ་ཝ་ནཾ, ས་བྦ་ཏྠཱ་པཱ་ཡ་ཝ་ཛྫི་ཏེ.
༢༧༡. སེ་ས་མཱ་རུ་པྤ་ཛ་ཝ་ནཾ, ཧི་ཏྭཱ་པཱ་ཡཾ ཡ་ཐཱ་ཀྐ་མཾ;
ཨུ་དྡྷ་མཱ་རུ་པྤ་བྷཱུ་མི་ཉྩ, ཛཱ་ཡ་ཏཱི་ཏི ཝི་བྷཱ་ཝ་ཡེ.
༢༧༢. སོ་ཏཱ་པ་ཏྟི་ཕ་ལཱ་དཱི་ནི, ཙ་ཏྟཱ་རཱ་ནུ་ཏྟ་རཱ་ནི ཏུ;
སུ་དྡྷཱ་ཝཱ་ས་མ་པཱ་ཡ་ཉྩ, ཧི་ཏྭཱ ས་བྦ་ཏྠ ཛཱ་ཡ་རེ.
༢༧༣. སུ་དྡྷཱ་ཝཱ་ས་མ་པཱ་ཡ་ཉྩ, ཧི་ཏྭཱ་རཱུ་པ་ཉྩ ས་བྦ་ཐཱ;
པ་ཋ་མཱ་ནུ་ཏྟ་རོ མ་གྒོ, སེ་ས་ཊྛཱ་ནེ་སུ ཛཱ་ཡ་ཏི.
༢༧༤. ས་ཏྟ་ཏིཾ་ས ཨ་པཱ་ཡེ་སུ, ཀཱ་མེ་སཱི་ཏི པ་ཀཱ་སི་ཏཱ;
པ་ཉྩ་པ་ཉྙཱ་ས སུ་དྡྷེ་སུ, རཱུ་པེ་སྭེ་ཀཱུ་ན་ས་ཏྟ་ཏི.
༢༧༥. ཚ་ཙ་ཏྟཱ་ལཱི་ས ཨཱ་རུ་པྤེ, ཨུ་པྤ་ཛྫ་ནྟི ཡ་ཐཱ་ར་ཧཾ;
ཨི་ཙྩེ་ཝཾ བྷཱུ་མི་བྷེ་དེ་ན, ཙི་ཏྟུ་པྤཱ་དཱ པ་ཀཱ་སི་ཏཱ.
༢༧༦. ཏི་ཧེ་ཏུ་ས་ཏྟེ ས་བྦཱ་ནི, དྭི་ཧེ་ཏུ་ཀཱ་ཧེ་ཏུ་ཀེ པ་ན;
པ་རི་ཏྟཱ་ནི ཝི་ཝ་ཛྫེ་ཏྭཱ, ཉཱ་ཎ་པཱ་ཀ་ཀྲི་ཡཱ་ཛ་ཝེ.
༢༧༧. པུ་ཐུ་ཛྫ་ནཱ་ནཾ ས་མྦྷོ་ནྟི, དི་ཊྛི་ཡུ་ཏྟ་ཉྩ ཀ་ངྑི་ཏཾ;
སོ་ཏཱ་པ་ནྣཱ་དི་ཏི་ཎྞ་མྤི, ཕ་ལཾ ཧོ་ཏི ཡ་ཐཱ་ས་ཀཾ.
༢༧༨. ཝཱི་ཏ་རཱ་ག་སྶ ཛ་ཝ་ནཾ, ཀྲི་ཡཱ ཙ་ནྟི་མ་ནུ་ཏྟ་རཾ;
པུ་ཐུ་ཛྫ་ནཱ་དི་ཏི་ཎྞ་མྤི, པ་ཊི་གྷཾ ས་མུ་དཱི་རི་ཏཾ.
༢༧༩. ཛ་ཝཱ པུ་ཐུ་ཛྫ་ནཱ་དཱི་ནཾ, ཙ་ཏུ་ནྣཾ སེ་ས སཱ་ས་ཝཱ;
སཱ་ས་ཝཱ་ཝ་ཛྫ་པཱ་ཀཱ་ནི, པ་ཉྩ་ནྣ་མ་པི དཱི་པ་ཡེ.
༢༨༠. པུ་ཐུ་ཛྫ་ནེ་སུ ཏེ་ས་ཊྛི, སོ་ཏཱ་པ་ནྣཱ་དི་ཀ་དྭ་ཡེ;
ཨེ་ཀཱུ་ན་ས་ཊྛི ཙི་ཏྟཱ་ནི, ཨ་ནཱ་གཱ་མི་ཀ་པུ་གྒ་ལེ.
༢༨༡. ས་ཏྟ་པ་ཉྙཱ་ས ཛཱ་ཡ་ནྟི, ཏེ་པ་ཉྙཱ་ས ཨ་ནཱ་ས་ཝེ;
མ་གྒ་ཊྛེ་སུ ས་ཀོ མ་གྒོ, པུ་གྒ་ལེ་སུ ཨ་ཡཾ ན་ཡོ.
༢༨༢. ཏི་ཧེ་ཏུ་ཀཱ་མ་ཙུ་ཏི་ཡཱ, ས་བྦཱ་པི པ་ཊི་ས་ནྡྷི་ཡོ;
དྭི་ཧེ་ཏཱ་ཧེ་ཏུ་ཙུ་ཏི་ཡཱ, ཀཱ་མཱ་ཝ་ཙ་ར་ས་ནྡྷི་ཡོ.
༢༨༣. རཱུ་པཱ་ཝ་ཙ་ར་ཙུ་ཏི་ཡཱ, ས་ཧེ་ཏུ་པ་ཊི་ས་ནྡྷི་ཡོ;
ཨཱ་རུ་པྤཱ་རུ་པྤ་ཙུ་ཏི་ཡཱ, ཧེ་ཊྛི་མཱ་རུ་པྤ་ཝ་ཛྫི་ཏཱ.
༢༨༤. པ་ཊི་ས་ནྡྷི ཏ་ཐཱ ཀཱ་མེ, ཏི་ཧེ་ཏུ་པ་ཊི་ས་ནྡྷི་ཡོ;
བྷ་ཝ་ནྟཱི་ཏི ཙ མེ་དྷཱ་ཝཱི, ཙུ་ཏི་ས་ནྡྷི་ན་ཡཾ ན་ཡེ.