༢. དུ་ཏི་ཡོ པ་རི་ཙྪེ་དོ
ལ་ཀྑ་ཎ་ར་སུ་པ་ཊྛཱ་ན་ཝི་བྷཱ་གོ
༦༧. ས་བྷཱ་ཝོ ལ་ཀྑ་ཎཾ ནཱ་མ, ཀི་ཙྩ་ས་མྤ་ཛྫ་ནཱ ར་སོ;
ག་ཡ྄ཧཱ་ཀཱ་རོ ཨུ་པ་ཊྛཱ་ནཾ, པ་ད་ཊྛཱ་ནཾ ཏུ པ་ཙྩ་ཡོ.
༦༨. ཨ་ཏྟུ་པ་ལ་དྡྷི་ས་ངྑཱ་ཏཱ, ས་མྤ་ཏྟཱ ཙ པ་ན་ཏྠ་ཏོ;
ལ་ཀྑ་ཎ་ར་སུ་པ་ཊྛཱ་ནཱ, ཝོ་ཧཱ་རཱ་བྷོ་ག་བྷེ་དི་ཏཱ.
༦༩. ཏེ་པ་ཉྙཱ་ས་ས་བྷཱ་ཝེ་སུ, ཏ་སྨཱ བྷེ་དཾ ཡ་ཐཱ་ར་ཧཾ;
ལ་ཀྑ་ཎཱ་དི་པྤ་ཀཱ་རེ་ཧི, པ་ཝ་ཀྑཱ་མི ཨི་ཏོ པ་རཾ.
༧༠. ཙི་ནྟེ་ཏཱི་ཏི བྷ་ཝེ ཙི་ཏྟཾ, ཙི་ནྟ་ན་མ་ཏྟ་མེ་ཝ ཝཱ;
ས་མྤ་ཡུ་ཏྟཱ་ཐ ཝཱ ཏེ་ན, ཙི་ནྟེ་ནྟཱི་ཏི ཙ གོ་ཙ་རཾ.
༧༡. ཕུ་ས་ཏཱི་ཏི བྷ་ཝེ ཕ་སྶོ, ཕུ་ས་ནཾ ཝཱ་ཐ ཀེ་ཝ་ལཾ;
ས་མྤ་ཡུ་ཏྟཱ་ཐ ཝཱ ཏེ་ན, ཕུ་ས་ནྟཱི་ཏི ཙ གོ་ཙ་རཾ.
༧༢. ཨེ་ཝཾ ཀ་ཏྟ་རི བྷཱ་ཝེ ཙ, ཀ་ར་ཎེ ཙ ཡ་ཐཱ་ར་ཧཾ;
ཏེ་པ་ཉྙཱ་ས་ས་བྷཱ་ཝེ་སུ, ས་དྡ་ནི་བྦ་ཙ་ནཾ ན་ཡེ.
༧༣. ཨཱ་ལ་མྦ་ཎ་མ་ནཾ ཙི་ཏྟཾ, ཏཾ་ཝི་ཛཱ་ན་ན་ལ་ཀྑ་ཎཾ;
ས་ཧ་ཛཱ་དྷི་ཊྛཱ་ན་ར་སཾ, ཙི་ནྟཱ་ཀ་པྤོ་ཏི ག་ཡ྄ཧ་ཏི.
༧༤. ཨཱ་ལ་མྦ་ཎ་ས་མོ་དྷཱ་ནོ,
ཕ་སྶོ ཕུ་ས་ན་ལ་ཀྑ་ཎོ;
ས་ངྒྷ་ཊྚ་ན་ར་སོ ཏ་ཏྠ,
ས་ནྣི་པཱ་ཏོ་ཏི ག་ཡ྄ཧ་ཏི.
༧༥. ཝེ་ད་ནཱ་ལ་མྦ་ཎ་ར་སཱ, སཱ ཝེ་ད་ཡི་ཏ་ལ་ཀྑ་ཎཱ;
གོ་ཙ་རཱ་ནུ་བྷ་ཝ་ར་སཱ, ཨ་ནུ་བྷུ་ཏྟཱི་ཏི ག་ཡ྄ཧ་ཏི.
༧༦. ཨཱ་ཀཱ་ར་ག་ཧ་ཎཾ ས་ཉྙཱ, སཱ ས་ཉྫཱ་ན་ན་ལ་ཀྑ་ཎཱ;
ནི་མི་ཏྟུ་པྤཱ་ད་ན་ར་སཱ, ཨུ་པ་ལ་ཀྑཱ་ཏི ག་ཡ྄ཧ་ཏི.
༧༧. ཙེ་ཏ་ནཱ ཙི་ཏྟ་ཝི་པྥཱ་རཱ, སཱ་ཡཾ བྱཱ་པཱ་ར་ལ་ཀྑ་ཎཱ;
ཀ་མྨ་ནྟཱ་ཡཱུ་ཧ་ན་ར་སཱ, སཾ་ཝི་དྷཱ་ན་ནྟི ག་ཡ྄ཧ་ཏི.
༧༨. ཨེ་ཀ་གྒ་ཏཱ ཨ་ཝི་ཀྑེ་པོ, སཱ་ཝི་སཱ་ཧཱ་ར་ལ་ཀྑ་ཎཱ;
ས་མྤི་ཎྜ་ན་ར་སཱ ཙི་ཏྟཾ, ས་མོ་དྷཱ་ན་ནྟི ག་ཡ྄ཧ་ཏི.
༧༩. ཡཱ་པ་ནཾ ས་ཧ་ཛཱ་ཏཱ་ན-མ་ནུ་པཱ་ལ་ན་ལ་ཀྑ་ཎཾ;
ཛཱི་ཝི་ཏཾ ཛཱི་ཝ་ན་ར་སཾ, ཨཱ་ཡུ་བ་ནྡྷོ་ཏི ག་ཡ྄ཧ་ཏི.
༨༠. སཱ་ར་ཎཱ མ་ན་སཱི་ཀཱ་རོ, ས་མ་ནྣཱ་ཧཱ་ར་ལ་ཀྑ་ཎོ;
སཾ་ཡོ་ཛ་ན་ར་སོ ཙི་ཏྟ-པ་ཊི་པ་ཏྟཱི་ཏི ག་ཡ྄ཧ་ཏི.
༨༡. ས་ངྐ་པྤ་ན་ལ་ཀྑ་ཎོ ཏ་ཀྐོ, ས་ཧ་ཛཱ་བྷི་ནི་རོ་པ་ནོ;
ཨཱ་ལ་མྦཱ་ཧ་ན་ན་ར་སོ, ས་ནྣི་རུ་ཛ྄ཛྷོ་ཏི ག་ཡ྄ཧ་ཏི.
༨༢. ཝི་ཙཱ་རོ ཨ་ནུ་ས་ནྡྷཱ་ནོ, ཨ་ནུ་མ་ཛྫ་ན་ལ་ཀྑ་ཎོ;
ཙི་ཏྟཱ་ནུ་ཡོ་ཛ་ན་ར་སོ, ཨ་ནུ་པེ་ཀྑཱ་ཏི ག་ཡ྄ཧ་ཏི.
༨༣. ཨ་དྷི་མོ་ཀྑོ ཨ་སཾ་ས་པྤོ, སུ་ས་ནྣི་ཊྛཱ་ན་ལ་ཀྑ་ཎོ;
ནི་ཙྩ་ལཱ་པཱ་ད་ན་ར་སོ, ད་ལ༹ྷ་ཝུ་ཏྟཱི་ཏི ག་ཡ྄ཧ་ཏི.
༨༤. ཝཱི་རི་ཡཾ པ་ན ཝཱ་ཡཱ་མོ, མ་ཧུ་སྶཱ་ཧ་ན་ལ་ཀྑ་ཎོ;
ཀི་ཙྩཱ་སཾ་སཱི་ད་ན་ར་སོ, ཨུ་པ་ཏྠ་མྦྷོ་ཏི ག་ཡ྄ཧ་ཏི.
༨༥. ཨཱ་ལ་མྦ་ཏྠི་ཀ་ཏཱ ཚ་ནྡོ, ཀ་ཏྟུ་ཀཱ་མ་ཏ་ལ་ཀྑ་ཎོ;
ཨཱ་ལ་མྦ་ཎེ་ས་ན་ར་སོ, ཧ་ཏྠཱ་དཱ་ན་ནྟི ག་ཡ྄ཧ་ཏི.
༨༦. ས་ཧ་ཛཱ་ཏཱ་ནུ་ཕ་ར་ཎཱ, ས་མྤི་ཡཱ་ཡ་ན་ལ་ཀྑ་ཎཱ;
ས་མྤཱི་ན་ན་ར་སཱ པཱི་ཏི, པཱ་མོ་ཛྫ་མི་ཏི ག་ཡ྄ཧ་ཏི.
༨༧. ཙེ་ཏོ་ས་དྡ་ཧ་ནཾ ས་དྡྷཱ, བྷཱུ་ཏོ་ཀ་པྤ་ན་ལ་ཀྑ་ཎཱ;
ཧི་ཏ་པ་ཀྑ་ནྡ་ན་ར་སཱ, ཨ་དྷི་མུ་ཏྟཱི་ཏི ག་ཡ྄ཧ་ཏི.
༨༨. ཨ་ས་མྨོ་སཱ ས་བྷཱ་ཝེ་སུ, ས་ཏི དྷཱ་ར་ཎ་ལ་ཀྑ་ཎཱ;
དྷ་མྨཱ་པི་ལཱ་པ་ན་ར་སཱ, ཨ་པྤ་མཱ་དོ་ཏི ག་ཡ྄ཧ་ཏི.
༨༩. ཧི་རཱི ཛེ་གུ་ཙྪཱ པཱ་པེ་སུ, སཱ ཧ་རཱ་ཡ་ན་ལ་ཀྑ་ཎཱ;
ཧཱི་ལ༹་སཾ་ཀོ་ཙ་ན་ར་སཱ, པཱ་པ་ལ་ཛྫཱ་ཏི ག་ཡ྄ཧ་ཏི.
༩༠. པཱ་པ་སཱ་ར་ཛྫ་མོ་ཏྟ་པྤཾ, ཨུ་བྦེ་གུ་ཏྟཱ་ས་ལ་ཀྑ་ཎཾ;
བྷ་ཡ་ས་ངྐོ་ཙ་ན་ར་སཾ, ཨ་ཝི་སྶཱ་སོ་ཏི ག་ཡ྄ཧ་ཏི.
༩༡. ཨ་ལོ་བྷོ ཨ་ན་བྷི་ས་ངྒོ, ཨ་པ་རི་གྒ་ཧ་ལ་ཀྑ་ཎོ;
མུ་ཏྟ་པྤ་ཝ་ཏྟ་ན་ར་སོ, ཨ་སཾ་ས་གྒོ་ཏི ག་ཡ྄ཧ་ཏི.
༩༢. ཨ་དོ་སོ ཙི་ཏྟ་སཱ་ཁ་ལྱཾ, ཨ་བྱཱ་པ་ཛྫ་ན་ལ་ཀྑ་ཎོ;
ས་ཎྷ་པྤ་ཝ་ཏྟ་ན་ར་སོ, སོ་མྨ་བྷཱ་ཝོ་ཏི ག་ཡ྄ཧ་ཏི.
༩༣. ཨ་མོ་ཧོ ཁ་ལི་ཏཱ་བྷཱ་ཝོ, པ་ཊི་ཝི་ཛ྄ཛྷ་ན་ལ་ཀྑ་ཎོ;
ཝི་ས་ཡོ་བྷཱ་ས་ན་ར་སོ, པ་ཊི་བོ་དྷོ་ཏི ག་ཡ྄ཧ་ཏི.
༩༤. ཏ་ཏྲ་མ་ཛ྄ཛྷ་ཏྟ་ཏོ་པེ་ཀྑཱ, ས་མཱི་ཀ་ར་ཎ་ལ་ཀྑ་ཎཱ;
ཨ་པ་ཀྑ་པཱ་ཏ་ན་ར་སཱ, ས་མ་ཝཱ་ཧོ་ཏི ག་ཡ྄ཧ་ཏི.
༩༥. པ་སྶ་དྡྷི ཀཱ་ཡ་ཙི་ཏྟཱ་ནཾ, ད་ར་ཐཱ་བྷཱ་ཝ་ལ་ཀྑ་ཎཱ;
ཨ་པ་རི་པྥ་ནྡ་ན་ར་སཱ, སཱི་ཏི་བྷཱ་ཝོ་ཏི ག་ཡ྄ཧ་ཏི.
༩༦. ལ་ཧུ་ཏཱ ཀཱ་ཡ་ཙི་ཏྟཱ་ནཾ, ཨ་ད་ནྡྷཱ་ཀཱ་ར་ལ་ཀྑ་ཎཱ;
ཨ་ཝི་ཏྠཱ་ར་ར་སཱ ས་ལླ་ཧུ་ཀ་ཝུ་ཏྟཱི་ཏི ག་ཡ྄ཧ་ཏི.
༩༧. མུ་དུ་ཏཱ ཀཱ་ཡ་ཙི་ཏྟཱ་ནཾ, ཀ་ཀྑ་ལཱ༹་བྷཱ་ཝ་ལ་ཀྑ་ཎཱ;
ཀི་ཙྩཱ་ཝི་རོ་དྷ་ན་ར་སཱ, ཨ་ནུ་ཀུ་ལྱ་ནྟི ག་ཡ྄ཧ་ཏི.
༩༨. ཀ་མྨ་ཉྙ་ཏཱ ཨུ་བྷི་ནྣ་མྤི, ཨ་ལཾ་ཀི་ཙྩ་སྶ ལ་ཀྑ་ཎཱ;
པ་ཝ་ཏྟི་ས་མྤ་ཏྟི་ར་སཱ, ཡོ་ག་བྷཱ་ཝོ་ཏི ག་ཡ྄ཧ་ཏི.
༩༩. ཏ་ཐཱ པཱ་གུ་ཉྙ་ཏཱ དྭི་ནྣཾ, ཝི་ས་དཱ་ཀཱ་ར་ལ་ཀྑ་ཎཱ;
སུ་ཁ་པྤ་ཝ་ཏྟ་ན་ར་སཱ, སེ་རི་བྷཱ་ཝོ་ཏི ག་ཡ྄ཧ་ཏི.
༡༠༠. ཨུ་ཛུ་ཏཱ ཀཱ་ཡ་ཙི་ཏྟཱ་ནཾ, ཀུ་ཊི་ལཱ་བྷཱ་ཝ་ལ་ཀྑ་ཎཱ;
ཛི་མྷ་ནི་མྨ་ད་ན་ར་སཱ, ཨུ་ཛུ་ཝུ་ཏྟཱི་ཏི ག་ཡ྄ཧ་ཏི.
༡༠༡. ས་མྨཱ་ཝཱ་ཙཱ ཝ་ཙཱི་སུ་དྡྷི, ཝཱ་ཙཱ་སཾ་ཡ་མ་ལ་ཀྑ་ཎཱ;
མི་ཙྪཱ་ཝཱ་ཙོ་ར་མ་ར་སཱ, ཝ་ཙཱི་ཝེ་ལཱ་ཏི ག་ཡ྄ཧ་ཏི.
༡༠༢. ས་མྨཱ་ཀ་མྨཾ ཀྲི་ཡཱ་སུ་དྡྷཾ, ས་མྨཱ་ཀ་ར་ཎ་ལ་ཀྑ་ཎཾ;
མི་ཙྪཱ་ཀ་མྨོ་ར་མ་ར་སཾ, ཀྲི་ཡཱ་ཝེ་ལཱ་ཏི ག་ཡ྄ཧ་ཏི.
༡༠༣. ས་མྨཱ་ཛཱི་ཝོ ཝི་སུ་དྡྷེ་ཊྛི, ཨ་ལླི་ཊྛཱ་ཛཱི་ཝ་ལ་ཀྑ་ཎོ;
མི་ཙྪཱ་ཛཱི་ཝོ་ར་མ་ར་སོ, ས་མྨཱ་ཝུ་ཏྟཱི་ཏི ག་ཡ྄ཧ་ཏི.
༡༠༤. ཀ་རུ་ཎཱ དཱི་ན་ས་ཏྟེ་སུ, དུ་ཀྑཱ་པ་ན་ཡ་ལ་ཀྑ་ཎཱ;
སོ་ཏྠི་ཏཱ་པ་ཏྠ་ན་ར་སཱ, ཨ་ནུ་ཀ་མྤཱ་ཏི ག་ཡ྄ཧ་ཏི.
༡༠༥. སུ་ཁ་ཊྛི་ཏེ་སུ མུ་དི་ཏཱ, ཨ་ནུ་མོ་ད་ན་ལ་ཀྑ་ཎཱ;
ཙེ་ཏོ་ཝི་ཀཱ་ས་ན་ར་སཱ, ཨ་ཝི་རོ་དྷོ་ཏི ག་ཡ྄ཧ་ཏི.
༡༠༦. ཙེ་ཏོ་སཱ་ར་ཛྫ་ནཱ ལོ་བྷོ, ཨ་པ་རི་ཙྩཱ་ག་ལ་ཀྑ་ཎོ;
ཨཱ་ལ་མྦ་གི་ཛ྄ཛྷ་ན་ར་སོ, ཨ་བྷི་ལ་གྒོ་ཏི ག་ཡ྄ཧ་ཏི.
༡༠༧. ཙེ་ཏོ་བྱཱ་པ་ཛྫ་ནཾ དོ་སོ, ས་མྤ་དུ་སྶ་ན་ལ་ཀྑ་ཎོ;
ཨཱ་ལ་མྦ་ཎ་གྷཱ་ཏ་ར་སོ, ཙ་ཎྜི་ཀྐ་མི་ཏི ག་ཡ྄ཧ་ཏི.
༡༠༨. ཙེ་ཏོ་ས་མྨུ་ཡ྄ཧ་ནཾ མོ་ཧོ,
སོ ས་མྨུ་ཡ྄ཧ་ན་ལ་ཀྑ་ཎོ;
ས་བྷཱ་ཝ་ཙྪཱ་ད་ན་ར་སོ,
ཨ་ནྡྷ་བྷཱ་ཝོ་ཏི ག་ཡ྄ཧ་ཏི.
༡༠༩. པཱ་པཱ་ཛི་གུ་ཙྪཱ་ཧི་རི་ཀཾ, ནི་ལླ་ཛྫཱ་ཀཱ་ར་ལ་ཀྑ་ཎཾ;
པཱ་པོ་པ་ལཱ་པ་ན་ར་སཾ, མ་ལ་གྒཱ་ཧོ་ཏི ག་ཡ྄ཧ་ཏི.
༡༡༠. ཨ་སཱ་ར་ཛྫ་ན་མ་ནོ་ཏྟ་པྤ་མ་ནུ་ཏྟཱ་ས་ན་ལ་ཀྑ་ཎཾ;
པཱ་པ་པ་ཀྑ་ནྡ་ན་ར་སཾ, པཱ་ག་བྦྷ་མི་ཏི ག་ཡ྄ཧ་ཏི.
༡༡༡. དི་ཊྛི ད་ལ༹ྷ་ཝི་པ་ལླཱ་སོ, སཱ པ་རཱ་མཱ་ས་ལ་ཀྑ་ཎཱ;
ཏུ་ཙྪཱ་བྷི་ནི་ཝེ་ས་ན་ར་སཱ, མི་ཙྪཱ་གཱ་ཧོ་ཏི ག་ཡ྄ཧ་ཏི.
༡༡༢. ‘‘ཨ་ཧ་སྨཱི’’ཏི མ་ཉྙ་མཱ་ནོ, སོ ས་མུ་ནྣ་ཏི་ལ་ཀྑ་ཎོ;
ཀེ་ཏུ་ས་མྤ་གྒ་ཧ་ར་སོ, ཨ་ཧཾ་ཀཱ་རོ་ཏི ག་ཡ྄ཧ་ཏི.
༡༡༣. པ་ར་ས་མྤ་ཏྟཱི་སུ ཨི་སྶཱ, ཨ་ཀྑ་མཱ་ཀཱ་ར་ལ་ཀྑ་ཎཱ;
ཙེ་ཏོ་ཝི་ཀུ་ཙ་ན་ར་སཱ, ཝི་མུ་ཁ་ཏྟ་ནྟི ག་ཡ྄ཧ་ཏི.
༡༡༤. པ་རི་གྒ་ཧེ་སུ མ་ཙྪེ་རཾ, ས་ནྣི་གཱུ་ཧ་ན་ལ་ཀྑ་ཎཾ;
སཱ་མ་ཉྙཱ་ས་ཧ་ན་ར་སཾ, ཝེ་ཝི་ཙྪ་མི་ཏི ག་ཡ྄ཧ་ཏི.
༡༡༥. ཙེ་ཏོ་པ་ཧ་ན་ནཾ ཐཱི་ནཾ, ཏཾ སཾ་སཱི་ད་ན་ལ་ཀྑ་ཎཾ;
ཨུ་སྶཱ་ཧ་བྷ་ཉྫ་ན་ར་སཾ, སཾ་ཁི་ཏྟ་ཏྟ་ནྟི ག་ཡ྄ཧ་ཏི.
༡༡༦. ཝི་གྷཱ་ཏོ ས་ཧ་ཛཱ་ཏཱ་ནཾ, མི་དྡྷཾ མོ་ཧ་ན་ལ་ཀྑ་ཎཾ;
ས་ཏྟི་སཾ་བྷ་ཉྫ་ན་ར་སཾ, ཨཱ་ཏུ་ར་ཏྟ་ནྟི ག་ཡ྄ཧ་ཏི.
༡༡༧. ཨུ་དྡྷ་ཙྩཾ ཙི་ཏྟ་ཝི་ཀྑེ་པོ, ཨ་ཝཱུ་པ་ས་མ་ལ་ཀྑ་ཎཾ;
ཙེ་ཏོ་ན་ཝ་ཊྛཱ་ན་ར་སཾ, བྷ་ནྟ་ཏྟ་མི་ཏི ག་ཡ྄ཧ་ཏི.
༡༡༨. ཝི་པྤ་ཊི་སཱ་རོ ཀུ་ཀྐུ་ཙྩ་མ་ནུ་སོ་ཙ་ན་ལ་ཀྑ་ཎཾ;
ཨ་ཏྟཱ་ནུ་སོ་ཙ་ན་ར་སཾ, པ་ཙྪཱ་ཏཱ་པོ་ཏི ག་ཡ྄ཧ་ཏི.
༡༡༩. ཀ་ངྑཱ་ཡ་ནཱ ཝི་ཙི་ཀི་ཙྪཱ, ཨ་ས་ནྣི་ཊྛཱ་ན་ལ་ཀྑ་ཎཱ;
ཨ་ནེ་ཀ་གཱ་ཧ་ན་ར་སཱ, ཨ་པྤ་ཏི་ཊྛཱ་ཏི ག་ཡ྄ཧ་ཏི.
༡༢༠. ཨི་ཙྩེ་ཝཾ ལ་ཀྑ་ཎཱ་དཱི་ཧི, ཝི་བྷཱ་ཝེ་ཡྻ ཝི་ཙ་ཀྑ་ཎོ;
ཏེ་པ་ཉྙཱ་ས་ས་བྷཱ་ཝེ་སུ, ས་བྷཱ་ཝཱ་ཀཱ་ར་ལ་ཀྑ་ཎཾ.
༡༢༡. ལ་ཀྑ་ཎ་ཏྠ་ཀུ་ས་ལཱ ས་ལ་ཀྑ་ཎེ,
ལ་ཀྑ་ཎ་ཏྠ་པ་ར་མེ་པི ཀེ་ཝ་ལཾ;
ལ་ཀྑ་ཎུ་གྒ་ཧ་སུ་ཁཱ་ཡ ཝ་ཎྞ་ཡུཾ,
ལ་ཀྑ་ཎཱ་དི་མུ་ཁ་ཏོ ས་ལ་ཀྑ་ཎཾ.
༡༢༢. ཨ་ཏྠཾ ཏ་མེ་ཝ་མ་ནུ་ག་མྨ མ་ཡེ་ཏྠ ཝུ་ཏྟ-
མ་ཏྠཱ་ན་མ་ཏྠ་ན་ཡ་ན་ཏྠ་མ་ནེ་ཀ་དྷཱ་པི;
པ་ཏྠེ་ཡྻ མེ་ཏྠ ཝ་ཙ་ན་ཏྠ་ན་ཡེ་ཧི ཉཱ་ཎ-
མ་ཏྠེ་སུ བུ་དྡྷ་ཝ་ཙ་ན་ཏྠ་ན་ཡ་ཏྠི་ཀེ་ཧི.
ཨི་ཏི ནཱ་མ་རཱུ་པ་པ་རི་ཙྪེ་དེ ལ་ཀྑ་ཎ་ར་སུ་པ་ཊྛཱ་ན་ཝི་བྷཱ་གོ ནཱ་མ
དུ་ཏི་ཡོ པ་རི་ཙྪེ་དོ.