༡. པ་ཋ་མོ པ་རི་ཙྪེ་དོ
ནཱ་མ་ཏྟ་ཡ་ཝི་བྷཱ་གོ
༣. ཏ་ཏྠ ཙི་ཏྟཾ ཙེ་ཏ་སི་ཀཾ, ནི་བྦཱ་ན་ནྟི མ་ཏཾ ཏི་དྷཱ;
ནཱ་མཾ རཱུ་པཾ ཏུ དུ་ཝི་དྷཾ, བྷཱུ་ཏོ་པཱ་དཱ་ཡ་བྷེ་ད་ཏོ.
༤. ཀཱ་མ་བྷཱུ་མཱ་དི་བྷེ་དེ་ན, ཏ་ཏྠ ཙི་ཏྟཾ ཙ་ཏུ་བྦི་དྷཾ;
ཙེ་ཏོ་ཡུ་ཏྟཱ དྭི་པ་ཉྙཱ་ས, དྷ་མྨཱ ཙེ་ཏ་སི་ཀཱ མ་ཏཱ.
༥. ཙ་ཀྑུ་སོ་ཏ་གྷཱ་ན་ཛི་ཝ྄ཧཱ-ཀཱ་ཡ་ཝི་ཉྙཱ་ཎ་དྷཱ་ཏུ་ཡོ;
ས་མྤ་ཊི་ཙྪ་ན་ཙི་ཏྟ་ཉྩ, ཏ་ཐཱ ས་ནྟཱི་ར་ཎ་དྭ་ཡཾ.
༦. སོ་མ་ན་སྶ་ས་ཧ་ག་ཏཾ, ཨུ་པེ་ཀྑཱ་ས་ཧི་ཏ་ནྟི ཙ;
ཨི་ཙྩཱ་ཧེ་ཏུ་ཀ་ཙི་ཏྟཱ་ནི, པུ་ཉྙ་པཱ་ཀཱ་ནི ཨ་ཊྛ་དྷཱ.
༧. སོ་མ་ན་སྶ་ཡུ་ཏཾ ཏ་ཏྠ, ཧི་ཏྭཱ ས་ནྟཱི་ར་ཎཾ ཏ་ཐཱ;
ས་ཏྟཱ་ཀུ་ས་ལ་པཱ་ཀཱ་ནི, ཏཱ་ནེ་ཝཱ་ཏི ཝི་ནི་དྡི་སེ.
༨. པ་ཉྩ་དྭཱ་ར་མ་ནོ་དྭཱ་རཱ་ཝ་ཛྫ་ནཾ ཧ་ས་ན་ནྟི ཙ;
ཀྲི་ཡ་ཙི་ཏྟ་མུ་དཱི་རི་ཏཾ, ཏི་ཝི་དྷ་མྤི ཨ་ཧེ་ཏུ་ཀཾ.
༩. ཨེ་ཝཾ ཨ་ཊྛཱ་ར་ས་ཝི་དྷཾ, མཱ་ན་སཾ ཧོ་ཏི་ཧེ་ཏུ་ཀཾ;
མཱུ་ལ་བྷེ་དེ་ནཱ་ཀུ་ས་ལཾ, ཙི་ཏྟཾ ཏུ ཏི་ཝི་དྷཾ མ་ཏཾ.
༡༠. སོ་མ་ན་སྶ་ས་ཧ་ག་ཏཾ, ཨུ་པེ་ཀྑཱ་ས་ཧི་ཏཾ ཏ་ཐཱ;
དི་ཊྛི་ག་ཏ་ས་མྤ་ཡུ་ཏྟཾ, ཝི་པྤ་ཡུ་ཏྟ་ནྟི བྷེ་དི་ཏཾ.
༡༡. ཨ་ས་ངྑཱ་རཾ ས་ས་ངྑཱ་ར་མི་ཏི བྷི་ནྣཾ པ་ན་ཊྛ་དྷཱ;
ལོ་བྷ་མཱུ་ལཾ པ་ཀཱ་སེ་ནྟི, ཏ་ཏྠཱ་ཀུ་ས་ལ་མཱ་ན་སཾ.
༡༢. དོ་མ་ན་སྶ་ས་ཧ་ག་ཏཾ, པ་ཊི་གྷེ་ན ས་མཱ་ཡུ་ཏཾ;
དོ་ས་མཱུ་ལ་མ་ས་ངྑཱ་རཾ, ས་ས་ངྑཱ་ར་ནྟི་པི དྭི་དྷཱ.
༡༣. ཝི་ཙི་ཀི་ཙྪཱ་ས་ཧ་ག་ཏཾ, ཨུ་དྡྷ་ཙྩ་ས་ཧི་ཏ་ནྟི ཙ;
མོ་ཧ་མཱུ་ལ་ཉྩ དུ་ཝི་དྷཾ, ཨུ་པེ་ཀྑཱ་ཡ ས་མཱ་ཡུ་ཏཾ.
༡༤. དྭཱ་ད་སཱ་ཀུ་ས་ལཱ་ནེ་ཝཾ, ཙི་ཏྟཱ་ནཱི་ཏི ཝི་བྷཱ་ཝ་ཡེ;
ཧི་ཏྭཱ་ཧེ་ཏུ་ཀ་པཱ་པཱ་ནི, སོ་བྷ་ནཱ་ནི ཏ་ཏོ པ་རཾ.
༡༥. སོ་མ་ན་སྶ་ས་ཧ་ག་ཏཾ, ཨུ་པེ་ཀྑཱ་ས་ཧི་ཏཾ ཏ་ཐཱ;
དྭི་དྷཱ ཉཱ་ཎེ་ན སཾ་ཡུ་ཏྟཾ, ཝི་པྤ་ཡུ་ཏྟ་ནྟི བྷེ་དི་ཏཾ.
༡༦. ཨ་ས་ངྑཱ་རཾ ས་ས་ངྑཱ་ར་མི་ཏི བྷི་ནྣཾ པ་ན་ཊྛ་དྷཱ;
ས་ཧེ་ཏུ་ཀཱ་མཱ་ཝ་ཙ་ར-པུ་ཉྙ་པཱ་ཀ་ཀྲི་ཡཱ བྷ་ཝེ.
༡༧. ཀཱ་མེ ཏེ་ཝཱི་ས པཱ་ཀཱ་ནི, པུ་ཉྙཱ་པུ་ཉྙཱ་ནི ཝཱི་ས་ཏི;
ཨེ་ཀཱ་ད་ས ཀྲི་ཡཱ ཙེ་ཏི, ཙ་ཏུ་པ་ཉྙཱ་ས ས་བྦ་ཐཱ.
༡༨. ཏ་ཀྐ་ཙཱ་ར་པཱི་ཏི་སུ་ཁེ་ཀ་གྒ་ཏཱ་ས་ཧི་ཏཾ པ་ན;
པ་ཋ་མ་ཛ྄ཛྷཱ་ན་ཀུ་ས་ལཾ, ཝི་པཱ་ཀ་ཉྩ ཀྲི་ཡཱ ཏ་ཐཱ.
༡༩. དུ་ཏི་ཡཾ ཏ་ཀྐ་ཏོ ཧཱི་ནཾ, ཏ་ཏི་ཡཾ ཏུ ཝི་ཙཱ་ར་ཏོ;
ཙ་ཏུ་ཏྠཾ པཱི་ཏི་ཏོ ཧཱི་ནཾ, ཨུ་པེ་ཀྑེ་ཀ་གྒ་ཏཱ་ཡུ་ཏཾ.
༢༠. པ་ཉྩ་མཾ པ་ཉྩ་ད་ས་དྷཱ, རཱུ་པཱ་ཝ་ཙ་ར་མཱི་རི་ཏཾ;
པ་ཉྩ་མ་ཛ྄ཛྷཱ་ན་མེ་ཝེ་ཀ་མ་རཱུ་པཱ་ཝ་ཙ་རཾ པ་ན.
༢༡. ཨཱ་ཀཱ་སཱ་ན་ཉྩཱ་ཡ་ཏ་ནཾ, པུ་ཉྙ་པཱ་ཀ་ཀྲི་ཡཱ ཏ་ཐཱ;
ཝི་ཉྙཱ་ཎ་ཉྩཱ་ཡ་ཏ་ན་ཉྩ, ཨཱ་ཀི་ཉྩ་ཉྙཱ་ཡ་ཏ་ན་ཀཾ;
ནེ་ཝ་ས་ཉྙཱ་ནཱ་ས་ཉྙཱ་ཡ་ཏ་ནཾ དྭཱ་ད་ས་དྷཱ བྷ་ཝེ.
༢༢. སོ་ཏཱ་པ་ཏྟི་མ་གྒ་ཙི་ཏྟཾ, ཕ་ལ་ཙི་ཏྟཾ ཏ་ཐཱ་པ་རཾ;
ས་ཀ་དཱ་གཱ་མཱ་ནཱ་གཱ་མི, ཨ་ར་ཧ་ཏྟ་ནྟི ཨ་ཊྛ་དྷཱ.
༢༣. ཛྷཱ་ན་ངྒ་ཡོ་ག་བྷེ་དེ་ན, ཀ་ཏྭེ་ཀེ་ཀཾ ཏུ པ་ཉྩ་དྷཱ;
ཝི་ཏྠཱ་རཱ་ནུ་ཏྟ་རཾ ཙི་ཏྟཾ, ཙ་ཏྟཱ་ལཱི་ས་ཝི་དྷཾ བྷ་ཝེ.
༢༤. རཱུ་པཱ་ཝ་ཙ་ར་ཙི་ཏྟཱ་ནི, ག་ཡ྄ཧ་ནྟཱ་ནུ་ཏྟ་རཱ་ནི ཙ;
པ་ཋ་མཱ་དི་ཛ྄ཛྷཱ་ན་བྷེ་དེ, ཨཱ་རུ་པྤ་ཉྩཱ་པི པ་ཉྩ་མེ.
༢༥. དྭཱ་ད་སཱ་ཀུ་ས་ལཱ་ནེ་ཝཾ, ཀུ་ས་ལཱ་ནེ་ཀ་ཝཱི་ས་ཏི;
ཚ་ཏྟིཾ་སེ་ཝ ཝི་པཱ་ཀཱ་ནི, ཀྲི་ཡ་ཙི་ཏྟཱ་ནི ཝཱི་ས་ཏི.
༢༦. ཨེ་ཀ་ཝཱི་ས་ས་ཏཾ ཝཱ་ཐ, ཨེ་ཀཱུ་ན་ན་ཝུ་ཏཱི་ཝི་དྷཾ;
ཙི་ཏྟཾ ཏཾ་ས་མྤ་ཡོ་གེ་ན, བྷི་ནྣཱ ཙེ་ཏ་སི་ཀཱ ཏ་ཐཱ.
༢༧. ཕ་སྶོ ཙ ཝེ་ད་ནཱ ས་ཉྙཱ, ཙེ་ཏ་ནེ་ཀ་གྒ་ཏཱ ཏ་ཐཱ;
ཛཱི་ཝི་ཏཾ མ་ན་སཱི་ཀཱ་རོ, ས་བྦ་སཱ་དྷཱ་ར་ཎཱ མ་ཏཱ.
༢༨. ཏ་ཀྐ་ཙཱ་རཱ་དྷི་མོ་ཀྑཱ ཙ, ཝཱི་རི་ཡཾ ཚ་ནྡ་པཱི་ཏི་ཡོ;
པ་ཀི་ཎྞ་ཀཱ ཚ ཨ་ཀྑཱ་ཏཱ, ཏེ་ར་ས་ཉྙ་ས་མཱ་ན་ཏཱ.
༢༩. པ་ཀི་ཎྞ་ཀཱ ན ཝི་ཉྙཱ་ཎེ, ཝི་ཏ་ཀྐོ དུ་ཏི་ཡཱ་དི་སུ;
ཝི་ཙཱ་རོ ཏ་ཏི་ཡཱ་དི་མྷི, ཨ་དྷི་མོ་ཀྑོ ཏུ ཀ་ངྑི་ཏེ.
༣༠. ས་ནྟཱི་ར་ཎ་མ་ནོ་དྷཱ་ཏུ་ཏྟི་ཀེ་སུ ཝཱི་རི་ཡཾ ཏ་ཐཱ;
ཙ་ཏུ་ཏྠ་སུ་ཁི་ཏེ པཱི་ཏི, ཚ་ནྡོ་ཧེ་ཏུ་མྷི མོ་མུ་ཧེ.
༣༡. ཚ་ས་ཊྛི པ་ཉྩ་པ་ཉྙཱ་ས, ཨེ་ཀཱ་ད་ས ཙ སོ་ལ༹་ས;
ས་ཏྟ་ཏི ཝཱི་ས་ཏི ཙེ་ཝ, ཏཱ་ནི ཙི་ཏྟཱ་ནི དཱི་པ་ཡེ.
༣༢. མོ་ཧཱ་ཧི་རི་ཀཱ་ནོ་ཏྟ་པྤ-མུ་དྡྷ་ཙྩཾ ས་བྦ་པཱ་པ་ཛཾ;
ཨི་སྶཱ་མ་ཙྪེ་ར་ཀུ་ཀྐུ་ཙྩ་དོ་སཱ ཏུ པ་ཊི་གྷེ ཏ་ཐཱ.
༣༣. ལོ་བྷོ ལོ་བྷེ ཏུ དི་ཊྛི ཙ, དི་ཊྛི་ཡུ་ཏྟེ ཝི་ཡུ་ཏྟ་ཀེ;
མཱ་ནོ ཙ ཐི་ན་མི་དྡྷཾ ཏུ, ས་ས་ངྑཱ་རེ་སུ པ་ཉྩ་སུ.
༣༤. ཀ་ངྑི་ཏེ ཝི་ཙི་ཀི་ཙྪཱ་ཏི, ཙུ་དྡ་སཱ་ཀུ་ས་ལཱ་ནི་མེ;
དྭཱ་ད་སཱ་ཀུ་ས་ལེ་སྭེ་ཝ, ནི་ཡ་མེ་ན ཝ་ཝ་ཏྠི་ཏཱ.
༣༥. ས་དྡྷཱ ས་ཏི ཧི་རོ་ཏྟ་པྤཾ, ཨ་ལོ་བྷཱ་དོ་ས་མ་ཛ྄ཛྷ་ཏཱ;
ཀཱ་ཡ་ཙི་ཏྟཱ་ནཾ པ་སྶ་དྡྷི, ལ་ཧུ་ཏཱ མུ་དུ་ཏཱ ཏ་ཐཱ.
༣༦. ཀ་མྨ་ཉྙ་ཏཱ ཙ པཱ་གུ་ཉྙ་ཨུ་ཛུ་ཏཱ་ཏི ཡུ་གཱ ཚ ཙ;
ཨེ་ཀཱུ་ན་ཝཱི་ས་ཏི དྷ་མྨཱ, ཨ་ཉྙ་མ་ཉྙཱ་ཝི་ཡོ་གི་ནོ;
ཨེ་ཀཱུ་ན་ས་ཊྛི་ཙི་ཏྟེ་སུ, སོ་བྷ་ནེ་སུ པ་ཝ་ཏྟི་ཏཱ.
༣༧. ས་མྨཱ་ཝཱ་ཙཱ ཙ ཀ་མྨ་ནྟཱ་ཛཱི་ཝཱ་ཏི ཝི་ར་ཏཱི ཨི་མཱ;
ལོ་ཀུ་ཏྟ་རེ ས་དཱ ས་བྦཱ, ས་ཧ ཀཱ་མ་སུ་བྷེ ཝི་སུཾ.
༣༨. ཀ་རུ་ཎཱ་མུ་དི་ཏཱ ནཱ་ནཱ, རཱུ་པེ པ་ཉྩ་མ་ཝ་ཛྫི་ཏེ;
ཀ་དཱ་ཙི ཀཱ་མེ ཀུ་ས་ལེ, ཀྲི་ཡ་ཙི་ཏྟེ ས་ཧེ་ཏུ་ཀེ.
༣༩. ཏི་ཧེ་ཏུ་ཀེ་སུ ཙི་ཏྟེ་སུ, པ་ཉྙཱ ས་བྦ་ཏྠ ལ་བྦྷ་ཏི;
ཨེ་ཏེ ས་དྡྷཱ་ད་ཡོ དྷ་མྨཱ, པ་ཉྩ་ཝཱི་ས་ཏི སོ་བྷ་ནཱ.
༤༠. ཨི་སྶཱ་མ་ཙྪེ་ར་ཀུ་ཀྐུ་ཙྩ་ཝི་ར་ཏཱི་ཀ་རུ་ཎཱ་ད་ཡོ;
ནཱ་ནཱ ཀ་དཱ་ཙི མཱ་ནོ ཙ, ཐི་ན་མི་དྡྷཾ ཏ་ཐཱ ས་ཧ.
༤༡. ས་ཏྟ ས་བྦ་ཏྠ ཛཱ་ཡ་ནྟི, ཚ ཏུ དྷ་མྨཱ ཡ་ཐཱ་ར་ཧཾ;
ཙུ་དྡ་སཱ་ཀུ་ས་ལེ་སྭེ་ཝ, སོ་བྷ་ནེ་སྭེ་ཝ སོ་བྷ་ནཱ.
༤༢. དྭེ་པ་ཉྙཱ་ས པ་ནི་ཙྩེ་ཝཾ, དྷ་མྨེ ས་ངྒ་ཡ྄ཧ མཱ་ན་སེ;
ལ་བྦྷ་མཱ་ནེ ཝི་བྷཱ་ཝེ་ཡྻ, པ་ཙྩེ་ཀ་མྤི ཝི་ཙ་ཀྑ་ཎོ.
༤༣. སོ་བྷ་ན་ཉྙ་ས་མཱ་ནཱ ཙ, པ་ཋ་མེ ཝི་ར་ཏཱི ཝི་ནཱ;
དུ་ཏི་ཡཱ་དཱི་སུ ཏ་ཀྐ་ཉྩ, ཝི་ཙཱ་རཾ ཏ་ཏི་ཡཱ་དི་སུ.
༤༤. ཙ་ཏུ་ཏྠཱ་དཱི་སུ པཱི་ཏི་ཉྩ, ཀ་རུ་ཎཱ་དི་ཉྩ པ་ཉྩ་མེ;
ཧི་ཏྭཱ ནེ་ཝ ཝི་ཡོ་ཛེ་ཡྻ, ས་ངྑི་པི་ཏྭཱ་ན པ་ཉྩ་དྷཱ.
༤༥. པ་ཉྩ་ཏིཾ་ས ཙ་ཏུ་ཏྟིཾ་ས, ཏེ་ཏྟིཾ་ས ཙ ཡ་ཐཱ་ཀྐ་མཾ;
དྭ་ཏྟིཾ་ས ཏིཾ་ས ཨེ་ཝཱ་ཐ, ཛཱ་ཡ་ནྟཱི་ཏི མ་ཧ་གྒ་ཏེ.
༤༦. ག་ཧེ་ཏྭཱ ཝི་ར་ཏཱི ས་བྦཱ, ཧི་ཏྭཱ་ན ཀ་རུ་ཎཱ་ད་ཡོ;
པ་ཋ་མེ དུ་ཏི་ཡཱ་དི་མྷི, ཝི་ཏ་ཀྐཱ་དིཾ ཝི་ནཱ ཏ་ཐཱ.
༤༧. པ་ཉྩ་དྷཱ་ཝ ག་ཎེ་ཡྻེ་ཝཾ, ཚ་ཏྟིཾ་སཱ ཙ ཡ་ཐཱ་ཀྐ་མཾ;
པ་ཉྩ་ཏིཾ་ས ཙ་ཏུ་ཏྟིཾ་ས, ཏེ་ཏྟིཾ་ས་དྭ་ཡ་མུ་ཏྟ་རེ.
༤༨. སོ་བྷ་ན་ཉྙ་ས་མཱ་ནཱ ཙ, ཀཱ་མེ་སུ ཀུ་ས་ལེ ཀྲི་ཡེ;
ཧི་ཏྭཱ ཝི་ར་ཏི་ཡོ པཱ་ཀེ, ཝི་ར་ཏཱི་ཀ་རུ་ཎཱ་ད་ཡོ.
༤༩. ཉཱ་ཎ་ཡུ་ཏྟེ སོ་མ་ན་སྶེ, ཝི་ཡུ་ཏྟེ ཉཱ་ཎ་ཝ་ཛྫི་ཏཱ;
ཨུ་པེ་ཀྑ་ཀེ པཱི་ཏི་ཧཱི་ནཱ, ཝི་པྤ་ཡུ་ཏྟེ དྭ་ཡཾ ཝི་ནཱ.
༥༠. ཙ་ཏུ་དྷཱ ཏི་ཝི་དྷེ་སྭེ་ཝཾ, ཝི་ག་ཎེ་ཡྻ དྭ་ཡཾ དྭ་ཡཾ;
ན ས་ནྟུ་པེ་ཀྑཱ་ས་ཧི་ཏེ, ཀ་རུ་ཎཱ་དཱི་ཏི ཀེ་ཙ་ན.
༥༡. ཨ་ཊྛ་ཏིཾ་ས ས་ཏྟ་ཏིཾ་ས་དྭ་ཡཾ ཚ་ཏྟིཾ་ས་ཀཾ སུ་བྷེ;
པ་ཉྩ་ཏིཾ་ས ཙ་ཏུ་ཏྟིཾ་ས་དྭ་ཡཾ ཏེ་ཏྟིཾ་ས་ཀཾ ཀྲི་ཡེ.
༥༢. ཏེ་ཏྟིཾ་ས པཱ་ཀེ དྭ་ཏྟིཾ་ས་དྭ་ཡེ་ཀ་ཏིཾ་ས་ཀཾ བྷ་ཝེ;
ས་ཧེ་ཏུ་ཀཱ་མཱ་ཝ་ཙ་ར་པུ་ཉྙ་པཱ་ཀ་ཀྲི་ཡཱ་མ་ནེ.
༥༣. མོ་ཧཱ་ད་ཡོ ས་མཱ་ནཱ ཙ, པ་ཋ་མེ ལོ་བྷ་དི་ཊྛི་ཡཱ;
ཏ་ཏི་ཡེ ལོ་བྷ་མཱ་ནེ་ན, ཛཱ་ཡ་ནྟེ་ཀཱུ་ན་ཝཱི་ས་ཏི.
༥༤. ཨ་ཊྛཱ་ར་ས པཱི་ཏི་ཧཱི་ནཱ, པ་ཉྩ་མེ ས་ཏྟ་མེ ཏ་ཐཱ;
ན་ཝ་མེ དོ་ས་ཀུ་ཀྐུ་ཙྩ་མ་ཙྪ་རི་སྶཱ་ཧི ཝཱི་ས་ཏི.
༥༥. པ་ཋ་མཱ་དཱི་སུ ཝུ་ཏྟཱ་ཝ, དུ་ཏི་ཡཱ་དཱི་སུ ཛཱ་ཡ་རེ;
ཐི་ན་མི་དྡྷེ་ནེ་ཀ་ཝཱི་ས, ཝཱི་ས དྭེ་ཝཱི་ས་ཏི་ཀྐ་མཱ.
༥༦. ཚ་ནྡ་པཱི་ཏིཾ ཝི་ནུ་དྡྷ་ཙྩེ, ཀ་ངྑི་ཏེ ནི་ཙྪ་ཡཾ ཝི་ནཱ;
པ་ཉྩ་ད་སེ་ཝ ཀ་ངྑཱ་ཡ, ཨ་སུ་བྷེ་སུ ཝི་བྷཱ་ཝ་ཡེ.
༥༧. སི་ཏེ ས་མཱ་ནཱ ནི་ཙྪ་ནྡཱ, དྭཱ་ད་སེ་ཀཱ་ད་སེ་ཝ ཏུ;
པཱི་ཏིཾ ཧི་ཏྭཱ་ན ཝོ་ཊྛ་བྦེ, ཝཱི་རི་ཡཾ སུ་ཁ་ཏཱི་ར་ཎེ.
༥༨. དྭ་ཡཾ ཧི་ཏྭཱ མ་ནོ་དྷཱ་ཏུ, ཨུ་པེ་ཀྑཱ་ཏཱི་ར་ཎེ ད་ས;
ས་ཏྟ སཱ་དྷཱ་ར་ཎཱ ཨེ་ཝ, པ་ཉྩ་ཝི་ཉྙཱ་ཎ་ས་མྦྷ་ཝཱ.
༥༩. ཨི་ཏི ཙེ་ཏ་སི ས་མྦྷཱུ་ཏཱ,
དྭེ་པ་ཉྙཱ་ས ཡ་ཐཱ་ར་ཧཾ;
ཉེ་ཡྻཱ ཙེ་ཏ་སི་ཀཱ དྷ་མྨཱ,
ཙེ་ཏོ་བྷེ་ད་པྤ་བྷེ་དི་ནོ.
༦༠. སུ་ཉྙ་ཏ་ཉྩཱ་ནི་མི་ཏྟ་ཉྩ, ཏ་ཐཱ་པ་ཎི་ཧི་ཏ་ནྟི ཙ;
ཏི་ཝི་དྷཱ་ཀཱ་ར་མཱི་རེ་ནྟི, ནི་བྦཱ་ན་མ་མ་ཏཾ བུ་དྷཱ.
༦༡. ཡཾ ཨཱ་ར་བྦྷ པ་ཝ་ཏྟ་ནྟཾ, ཏ་ཏྠཱ་ནུ་ཏྟ་ར་མཱ་ན་སཾ;
སུ་ཉྙ་ཏཱ་དི་ཝི་མོ་ཀྑོ་ཏི, ནཱ་མ་མཱ་ལ་མྦ་ཏོ ལ་བྷེ.
༦༢. སོ་པཱ་དི་སེ་ས་ནི་བྦཱ་ན་དྷཱ་ཏུ ཙེ་ཝ ཏ་ཐཱ་པ་རཱ;
ཨ་ནུ་པཱ་དི་སེ་སཱ ཙཱ་ཏི, དུ་ཝི་དྷཱ པ་རི་ཡཱ་ཡ་ཏོ.
༦༣. ཏ་དེ་ཏཾ ཝཱ་ན་ནི་ཀྑ་ནྟ་མ་ཙྩ་ནྟཾ ས་ནྟི་ལ་ཀྑ་ཎཾ;
ཨ་སྶཱ་ས་ཀ་ར་ཎ་ར་སཾ, ཁེ་མ་བྷཱ་ཝེ་ན ག་ཡ྄ཧ་ཏི.
༦༤. ཏཾ ནཱ་མེ་ཏཱི་ཏི ནི་བྦཱ་ནཾ, ན་མ་ནྟཱི་ཏི ཏ་ཏོ་པ་རེ;
ཏེ་པ་ཉྙཱ་སཱ་ཏི ནཱ་མཱ་ནི, ཙ་ཏུ་པ་ཉྙཱ་ས ས་བྦ་ཐཱ.
༦༥. ཙི་ཏྟ་ཙེ་ཏ་སི་ཀ་ཡོ་ཛ་ནཱ་ན་ཡཾ,
ཙི་ཏྟ་མུ་ཏྟ་མ་མི་དཾ པ་ཀཱ་སི་ཏཾ;
སཱ་དྷུ ཙེ་ཏ་སི ནི་དྷཱ་ཡ པ་ཎྜི་ཏཱ,
སཱ་དྷུ སཱ་ས་ན་དྷ་རཱ བྷ་ཝ་ནྟི ཏེ.
༦༦. བུ་དྡྷ་པྤ་ཝ་ཏྟ་མ་ཝ་གཱ་ཧི་ཏ་བོ་དྷི་ཉཱ་ཎ-
མི་ཙྩཱ་བྷི་དྷ་མྨ་མ་ཝ་གཱ་ཧི་ཏ་ས་བྦ་དྷ་མྨཾ;
ཨོ་ག་ཡ྄ཧ ནཱ་མ་ག་ཏ་རཱ་སི་མ་སེ་ས་ཡི་ཏྭཱ,
ས་ངྒ་ཡ྄ཧ ས་བྦ་མི་དྷ ཡོ་ཛི་ཏ་མཱ་ད་རེ་ན.
ཨི་ཏི ནཱ་མ་རཱུ་པ་པ་རི་ཙྪེ་དེ ནཱ་མ་ཏྟ་ཡ་ཝི་བྷཱ་གོ ནཱ་མ
པ་ཋ་མོ པ་རི་ཙྪེ་དོ.