༢༢. བཱ་ཝཱི་ས་ཏི་མོ པ་རི་ཙྪེ་དོ
ཉཱ་ཎ་ད་སྶ་ན་ཝི་སུ་དྡྷི་ནི་དྡེ་སོ
༡༣༡༩. ཨི་ཏོ པ་རཾ ཏུ བྷི་ཀྑུ་སྶ, ཧོ་ཏི གོ་ཏྲ་བྷུ་མཱ་ན་སཾ;
ཨཱ་ཝ་ཛྫ་ནི་ཡ་ཋཱ་ན་ཏྟཱ, མ་གྒ་ཙི་ཏྟ་སྶ ཏཾ པ་ན.
༡༣༢༠. ན ཙ་པྤ་ཊི་པ་དཱ་ཉཱ་ཎ-ད་སྶ་ནཾ ཝཱ ཏ་ཐེ་ཝ ཙ;
ཉཱ་ཎ་ད་སྶ་ན་སུ་དྡྷིཾ ཝཱ, བྷ་ཛ་ཏེ ན ཀུ་དཱ་ཙ་ནཾ.
༡༣༢༡. ཨུ་བྷི་ནྣ་མ་ནྟ་རཱ ཨེ་ཏཾ, ཨ་བྦོ་ཧཱ་རི་ཀ་མེ་ཝ ཏཾ;
ཝི་པ་སྶ་ནཱ་ཡ སོ་ཏ་སྨིཾ, པ་ཏི་ཏ་ཏྟཱ ཝི་པ་སྶ་ནཱ.
༡༣༢༢. པོ་ཐུ་ཛྫ་ནི་ཀ་གོ་ཏྟཾ ཝཱ, ཨ་བྷི་བྷུ་ཡྻ པ་ཝ་ཏྟི་ཏོ;
གོ་ཏྟཾ ཝུ་ཙྩ་ཏི ནི་བྦཱ་ནཾ, ཏ་ཏོ བྷ་ཝ་ཏི གོ་ཏྲ་བྷུ.
༡༣༢༣. ཉཱ་ཎཾ ཙ་ཏཱུ་སུ མ་གྒེ་སུ, ཉཱ་ཎ་ད་སྶ་ན་སུ་དྡྷི་ཀཾ;
ཏ་ཏྠ ཏཾ པ་ཋ་མཾ མ་གྒཾ, ས་མྤཱ་དེ་ཏུཾ པ་ནི་ཙྪ་ཏཱ.
༡༣༢༤. ཨ་ཉྙཾ ཀི་ཉྩི་པི ཀཱ་ཏ་བྦཾ, བྷི་ཀྑུ་ནཱ ཏེ་ན ན་ཏྠི ཏཾ;
ཡ་ཉྷི ཏེ་ན ཙ ཀཱ་ཏ་བྦཾ, སི་ཡཱ ཏཾ ཀ་ཏ་མེ་ཝ ཏུ.
༡༣༢༥. ཨ་ནུ་ལོ་མཱ་ཝ་སཱ་ན་ཉྷི, སཱུ་རཾ ཏི་ཀྑཾ ཝི་པ་སྶ་ནཾ;
ཨུ་པྤཱ་དེ་ནྟེ་ན ཏཾ ས་བྦཾ, ཀ་ཏ་མེ་ཝ ཙ ཡོ་གི་ནཱ.
༡༣༢༦. ཏ་སྶཱ་ནུ་ལོ་མ་ཉཱ་ཎ་སྶ, ཨ་ནྟེ ཏུ ཨ་ནི་མི་ཏྟ་ཀཾ;
ཝི་ས་ངྑཱ་རཾ ནི་རོ་དྷ་ཉྩ, ནི་བྦཱ་ནཾ ཨ་མ་ཏཾ པ་དཾ.
༡༣༢༧. གོ་ཙ་རཾ ཀུ་རུ་མཱ་ནཾ ཏཾ, ནི་བྦཱ་ནཱ་ར་མྨ་ཎེ པ་ན;
པ་ཋ་མཱ་ཝ་ཛྫ་ན་ཉྩེ་ཝ, པ་ཋ་མཱ་བྷོ་ག་ཏཱ་པི ཙ.
༡༣༢༨. མ་གྒ་སྶཱ་ན་ནྟ་རཱ་དཱི་ཧི, པ་ཙྩ་ཡེ་ཧི པ་ན་ཙྪ་ཧི;
ཏ་སྶ པ་ཙྩ་ཡ་བྷཱ་ཝ་ཉྩ, སཱ་དྷ་ཡ་ནྟཾ ཏ་ཏོ པ་ན.
༡༣༢༩. ཝི་པ་སྶ་ནཱ་ཡ མུ་དྡྷ་ཉྷི, སི་ཁཱ་པ་ཏྟཱ་ཡ ཏཱ་ཡ ཏཾ;
ཨུ་པྤ་ཛྫ་ཏི ཨ་ནཱ་ཝ་ཏྟཾ-ར་མྨ་ཎཾ ཏ་སྶ གོ་ཏྲ་བྷུ.
༡༣༣༠. ཨེ་ཀེ་ནཱ་ཝ་ཛྫ་ནེ་ནེ་ཝ, ཨེ་ཀི་སྶཱ་ཡེ་ཝ ཝཱི་ཐི་ཡཱ;
ནཱ་ནཱ་ར་མྨ་ཎ་ཏཱ ཙཱ་ནུ-ལོ་མ་གོ་ཏྲ་བྷུ་ཙེ་ཏ་སཾ.
༡༣༣༡. ཋ་ཏྭཱ ཨཱ་ཝ་ཛྫ་ན་ཊྛཱ་ནེ, ཏ་མ་ནཱ་ཝ་ཛྫ་ན་མྤི ཙ;
མ་གྒ་སྶ པ་ན ཏཾ ས་ཉྙཾ, ད་ཏྭཱ ཝི་ཡ ནི་རུ་ཛ྄ཛྷ་ཏི.
༡༣༣༢. མ་གྒོ་པི ཏེ་ན ཏཾ དི་ནྣཾ, ཨ་མུ་ཉྩི་ཏྭཱ་ཝ ས་ཉྷི་ཏཾ;
ཏཾ ཉཱ་ཎ་མ་ནུ་བ་ནྡྷ་ནྟོ, ཛཱ་ཡ་ཏེ ཏ་ད་ན་ནྟ་རཾ.
༡༣༣༣. ཀ་དཱ་ཙི་པི ཨ་ནི་བྦི་དྡྷ་པུ་བྦཾ མ་གྒོ པ་ནེ་ས ཧི;
ལོ་བྷཾ དོ་ས་ཉྩ མོ་ཧ་ཉྩ, ཝི་དྡྷཾ་ས་ནྟོ་ཝ ཛཱ་ཡ་ཏི.
༡༣༣༤. ན ཀེ་ཝ་ལ་མ་ཡཾ མ་གྒོ, དོ་ས་ནཱ་ས་ན་མེ་ཝ ཙ;
ཀ་རོ་ཏི ཨ་ཐ ཁོ་པཱ་ཡ་དྭཱ་རཱ་ནི་པི པི་དྷེ་ཏི ཙ.
༡༣༣༥. ཨ་ནཱ་མ་ཏ་གྒ་སཾ་སཱ་ར་ཝ་ཊྚ་དུ་ཀྑ་མ་ཧོ་ད་དྷིཾ;
ཨ་པཱ་ར་མ་ཏི་གྷོ་ར་ཉྩ, སོ་སེ་ཏི ཙ ཨ་སེ་ས་ཏོ.
༡༣༣༦. མི་ཙྪཱ་མ་གྒཾ པ་ན་ཊྛ་ངྒཾ, ཛཱ་ཡ་མཱ་ནོ ཙ ཨུ་ཛ྄ཛྷ་ཏི;
ས་བྦ་ཝེ་ར་བྷ་ཡཱ་ནེ་ཏྠ, ནི་ཙྩཾ ཝཱུ་པ་ས་མེ་ཏི ཙ.
༡༣༣༧. བུ་དྡྷ་སྶོ་ར་ས་པུ་ཏྟ་ཏྟཾ, ཨུ་པ་ནེ་ཏི ན་ཡཾ པ་ན;
ཨཱ་ནི་སཾ་སེ ཨ་ནེ་ཀེ་པི, པ་ཝ་ཏྟ་ཡ་ཏི ཡོ་གི་ནོ.
༡༣༣༨. དཱ་ཡ་ཀེ་ནཱ་ནི་སཾ་སཱ་ནཾ, ཨ་ནེ་ཀེ་ས་མ་ནེ་ན ཙ;
ཨཱ་དི་མ་གྒེ་ན སཾ་ཡུ་ཏྟཾ, ཉཱ་ཎ་ནྟི ཉཱ་ཎ་ད་སྶ་ནཾ.
པ་ཋ་མ་མ་གྒ་ཉཱ་ཎཾ.
༡༣༣༩. ཏ་སྶེ་ཝཱ་ན་ནྟ་རཾ ཏ་སྶ, ཝི་པཱ་ཀཱ དྭེ་པི ཏཱི་ཎི ཝཱ;
ཕ་ལ་ཙི་ཏྟཱ་ནི ཛཱ་ཡ་ནྟེ, ན ཛཱ་ཡ་ནྟེ ཏ་ཏོ པ་རཾ.
༡༣༤༠. ཀེ་ཙི ཨེ་ཀ་ཉྩ དྭེ ཏཱི་ཎི, ཙ་ཏྟཱ་རཱི་ཏི ཝ་ད་ནྟི ཏུ;
ན པ་ནེ་ཏཾ ག་ཧེ་ཏ་བྦཾ, ཨ་ཛཱ་ནི་ཏྭཱ ཝ་ད་ནྟི ཏེ.
༡༣༤༡. ཨེ་ཀ་སྶཱ་སེ་ཝ་ནཾ ན་ཏྠི, ཏ་སྨཱ དྭེ ཨ་ནུ་ལོ་མ་ཀཱ;
ཏེ་ཧི ཨཱ་སེ་ཝ་ནཾ ལ་དྡྷཱ, ཏ་ཏི་ཡཾ ཧོ་ཏི གོ་ཏྲ་བྷུ.
༡༣༤༢. ཙ་ཏུ་ཏྠཾ མ་གྒ་ཙི་ཏྟཾ ཏུ,
ཏ་སྨཱ ཏཱི་ཎི ཕ་ལཱ་ནི ཧི;
ཨ་ནུ་ལོ་མཱ ཏ་ཡོ ཧོ་ནྟི,
ཙ་ཏུ་ཏྠཾ ཧོ་ཏི གོ་ཏྲ་བྷུ.
༡༣༤༣. པ་ཉྩ་མཾ མ་གྒ་ཙི་ཏྟ་ཉྩ, ཕ་ལཱ་ནི དྭེ ཏ་ཏོ པ་ན;
ས་ཏྟ་ཙི་ཏྟ་པ་ར་མཱ་ཝ, ཨེ་ཀཱ་ཝ་ཛྫ་ན་ཝཱི་ཐི ཧི.
༡༣༤༤. ཨེ་ཏྟཱ་ཝ་ཏཱ པ་ནེ་སོ ཧི, སོ་ཏཱ་པ་ནྣོཏི ཝུ་ཙྩ་ཏི;
ཕ་ལ་སྶ པ་རི་ཡོ་སཱ་ནེ, བྷ་ཝ་ངྒོ་ཏྟ་ར་ཎཾ སི་ཡཱ.
༡༣༤༥. ཏ་ཏོ བྷ་ཝ་ངྒཾ ཚི་ནྡི་ཏྭཱ, མ་གྒ་པེ་ཀྑ་ན་ཧེ་ཏུ་ཀཾ;
ཨུ་པྤ་ཛྫ་ཏི མ་ནོ་དྭཱ་རེ, ཨཱ་ཝ་ཛྫ་ན་མ་ནོ པ་ན.
༡༣༤༦. ཏ་སྨིཾ ནི་རུ་དྡྷེ མ་གྒ་སྶ, པ་ཙྩ་ཝེ་ཀྑ་ཎ་ས་ཉྙི་ཏཱ;
ཛ་ཝ་ནཱ་ནི ཧི ཛཱ་ཡ་ནྟེ, ས་ཏྟེ་ཝ པ་ཊི་པཱ་ཊི་ཡཱ.
༡༣༤༧. ཨེ་སེ་ཝ ཙ ན་ཡོ ཉེ་ཡྻོ, ཕ་ལཱ་དཱི་ན་མྤི པེ་ཀྑ་ནེ;
པ་ཙྩ་ཝེ་ཀྑ་ཎ་ཉཱ་ཎཱ་ནི, བྷ་ཝ་ནྟེ་ཀཱུ་ན་ཝཱི་ས་ཏི.
༡༣༤༨. མ་གྒོ ཕ་ལཾ པ་ཧཱི་ནཱ ཙ, ཀི་ལེ་སཱ ཨ་ཝ་སི་ཊྛ་ཀཱ;
ནི་བྦཱ་ན་ཉྩེ་ཏི པ་ཉྩེ་ཏེ, པ་ཙྩ་ཝེ་ཀྑ་ཎ་བྷཱུ་མི་ཡོ.
༡༣༤༩. ཨེ་ཝཾ སོ པ་ཙྩ་ཝེ་ཀྑི་ཏྭཱ, སོ་ཏཱ་པ་ནྣོ་པ་པ་ཏྟི་ཡཱ;
ཡོ་ག་མཱ་ར་བྷ་ཏེ དྷཱི་རོ, དུ་ཏི་ཡཱ་ཡ ཙ བྷཱུ་མི་ཡཱ.
༡༣༥༠. ཁ་ནྡྷ་པ་ཉྩ་ཀ་ས་ངྑཱ་ཏཾ, ཏཾ ས་ངྑཱ་ར་ག་ཏཾ པུ་ན;
ཨ་ནི་ཙྩཾ དུ་ཀྑ་མ་ན་ཏྟཱ་ཏི, ཉཱ་ཎེ་ན པ་རི་མ་ཛྫ་ཏི.
༡༣༥༡. ཏ་ཏོ ཝི་པ་སྶ་ནཱ་ཝཱི་ཐི-མོ་གཱ་ཧ་ཏི ཙ ཏཱ་ཝ་དེ;
ཏ་སྶེ་ཝཾ པ་ཊི་པ་ནྣ་སྶ, ཧེ་ཊྛཱ ཝུ་ཏྟ་ན་ཡེ་ན ཏུ.
༡༣༥༢. ཏ་ཏོ ས་ངྑཱ་རུ་པེ་ཀྑཱ་ཡ, ཨ་ཝ་སཱ་ནེ ཏ་ཐེ་ཝ ཙ;
ཨེ་ཀཱ་ཝ་ཛྫ་ན་ཝཱ་ར་སྨིཾ, གོ་ཏྲ་བྷུ་སྶ ཨ་ན་ནྟ་རཾ.
༡༣༥༣. བྱཱ་པཱ་ད་ཀཱ་མ་རཱ་གཱ་ནཾ, ཏ་ནུ་བྷཱ་ཝཾ ཏུ སཱ་དྷ་ཡཾ;
ས་ཀ་དཱ་གཱ་མི་མ་གྒོཡཾ, ཛཱ་ཡ་ཏེ དུ་ཏི་ཡོ པ་ན.
དུ་ཏི་ཡ་མ་གྒ་ཉཱ་ཎཾ.
༡༣༥༤. ཨི་མ་སྶཱ་པི ཙ ཉཱ་ཎ་སྶ, ཧེ་ཊྛཱ ཝུ་ཏྟ་ན་ཡེ་ནི་དྷ;
ཕ་ལ་ཙི་ཏྟཱ་ནི ཉེ་ཡྻཱ་ནི, ཝི་ཉྙུ་ནཱ དྭེ་པི ཏཱི་ཎི ཝཱ.
༡༣༥༥. ཨེ་ཏྟཱ་ཝ་ཏཱ པ་ནེ་སོ ཧི, ས་ཀ་དཱ་གཱ་མི ནཱ་མ་ཡཾ;
ས་ཀི་དེ་ཝ ཨི་མཾ ལོ་ཀཾ, ཨཱ་ག་ནྟྭཱ་ནྟ་ཀ་རོ བྷ་ཝེ.
༡༣༥༦. ཧེ་ཊྛཱ ཝུ་ཏྟ་ན་ཡེ་ནེ་ཝ, པ་ཉྩ་དྷཱ པ་ཙྩ་ཝེ་ཀྑ་ཎཾ;
ཨེ་ཝཾ སོ པ་ཙྩ་ཝེ་ཀྑི་ཏྭཱ, ས་ཀ་དཱ་གཱ་མི་པ་ཏྟི་ཡཱ.
༡༣༥༧. ཡོ་ག་མཱ་ར་བྷ་ཏེ དྷཱི་རོ, ཏ་ཏི་ཡཱ་ཡ ཙ བྷཱུ་མི་ཡཱ;
བྱཱ་པཱ་ད་ཀཱ་མ་རཱ་གཱ་ནཾ, པ་ཧཱ་ནཱ་ཡ ཙ པ་ཎྜི་ཏོ.
༡༣༥༨. ཁ་ནྡྷ་པ་ཉྩ་ཀ་ས་ངྑཱ་ཏཾ, ཏཾ ས་ངྑཱ་ར་ག་ཏཾ པ་ན;
ཨ་ནི་ཙྩཾ དུ་ཀྑ་མ་ན་ཏྟཱ་ཏི, ཉཱ་ཎེ་ན པ་རི་མ་ཛྫ་ཏི.
༡༣༥༩. ཏ་ཏོ ཝི་པ་སྶ་ནཱ་ཝཱི་ཐི-མོ་གཱ་ཧ་ཏི ཙ ཏཱ་ཝ་དེ;
ཏ་སྶེ་ཝཾ པ་ཊི་པ་ནྣ་སྶ, ཧེ་ཊྛཱ ཝུ་ཏྟ་ན་ཡེ་ན ཏུ.
༡༣༦༠. ཏ་ཏོ ས་ངྑཱ་རུ་པེ་ཀྑཱ་ཡ, ཨ་ཝ་སཱ་ནེ ཏ་ཐེ་ཝ ཙ;
ཨེ་ཀཱ་ཝ་ཛྫ་ན་ཝཱི་ཐི་མྷི, གོ་ཏྲ་བྷུ་སྶ ཨ་ན་ནྟ་རཾ.
༡༣༦༡. བྱཱ་པཱ་ད་ཀཱ་མ་རཱ་གཱ་ནཾ, མཱུ་ལ་གྷཱ་ཏཾ ཏུ སཱ་དྷ་ཡཾ;
ཏ་སྶཱནཱ་གཱ་མི་མ་གྒོཡཾ, ཛཱ་ཡ་ཏེ ཏ་ཏི་ཡོ པ་ན.
ཏ་ཏི་ཡ་མ་གྒ་ཉཱ་ཎཾ.
༡༣༦༢. ཨི་མ་སྶཱ་པི ཙ ཉཱ་ཎ་སྶ, ཧེ་ཊྛཱ ཝུ་ཏྟ་ན་ཡེ་ནི་དྷ;
པ་ཝ་ཏྟི ཕ་ལ་ཙི་ཏྟཱ་ནཾ, ཝེ་དི་ཏ་བྦཱ ཝི་བྷཱ་ཝི་ནཱ.
༡༣༦༣. ཨེ་ཏྟཱ་ཝ་ཏཱ པ་ནེ་སོ་པི, ཧོ་ཏིནཱ་གཱ་མི ནཱ་མ་ཡཾ;
ཏ་ཏྠེ་ཝ པ་རི་ནི་བྦཱ་ཡཱི, ཨ་ནཱ་ཝ་ཏྟི་ས་བྷཱ་ཝ་ཏོ.
༡༣༦༤. ཧེ་ཊྛཱ ཝུ་ཏྟ་ན་ཡེ་ནེ་ཝ, པ་ཉྩ་དྷཱ པ་ཙྩ་ཝེ་ཀྑ་ཎཾ;
ཨེ་ཝཾ སོ པ་ཙྩ་ཝེ་ཀྑི་ཏྭཱ, ཨ་ནཱ་གཱ་མིརི་ཡ་སཱ་ཝ་ཀོ.
༡༣༦༥. ཡོ་ག་མཱ་ར་བྷ་ཏེ དྷཱི་རོ, ཙ་ཏུ་ཏྠཱ་ཡ ཙ བྷཱུ་མི་ཡཱ;
པ་ཏྟི་ཡཱ་རཱུ་པ་རཱ་གཱ་དི-པ་ཧཱ་ནཱ་ཡ ཙ པ་ཎྜི་ཏོ.
༡༣༦༦. ཏ་ཐེ་ཝ ས་ངྑཱ་ར་ག་ཏཾ, ཨ་ནི་ཙྩཱ་དི་ཝ་སེ་ན སོ;
པ་རི་ཝ་ཏྟ་ཏི ཉཱ་ཎེ་ན, ཏ་ཐེ་ཝ པ་རི་མ་ཛྫ་ཏི.
༡༣༦༧. ཏ་ཏོ ཝི་པ་སྶ་ནཱ་ཝཱི་ཐི-མོ་གཱ་ཧ་ཏི ཙ ཏཱ་ཝ་དེ;
ཏ་སྶེ་ཝཾ པ་ཊི་པ་ནྣ་སྶ, ཧེ་ཊྛཱ ཝུ་ཏྟ་ན་ཡེ་ན ཏུ.
༡༣༦༨. ཏ་ཏོ ས་ངྑཱ་རུ་པེ་ཀྑཱ་ཡ, ཨ་ཝ་སཱ་ནེ ཏ་ཐེ་ཝ ཙ;
ཨེ་ཀཱ་ཝ་ཛྫ་ན་ཝཱ་ར་སྨིཾ, གོ་ཏྲ་བྷུ་སྶ ཨ་ན་ནྟ་རཾ.
༡༣༦༩. ཏ་སྶཱར་ཧ་ཏྟ་མ་གྒོཡཾ,
ཛཱ་ཡ་ཏེ ཏུ ཏ་ཏོ པ་རཾ;
རཱུ་པ་རཱ་གཱ་དི་དོ་སཱ་ནཾ,
ཝི་དྡྷཾ་སཱ་ཡ ཀ་རོ པ་ན.
ཙ་ཏུ་ཏྠ་མ་གྒ་ཉཱ་ཎཾ.
༡༣༧༠. ཨི་མ་སྶཱ་པི ཙ ཉཱ་ཎ་སྶ, ཧེ་ཊྛཱ ཝུ་ཏྟ་ན་ཡེ་ནི་དྷ;
པ་ཝ་ཏྟི ཕ་ལ་ཙི་ཏྟཱ་ནཾ, ཝེ་དི་ཏ་བྦཱ ཝི་བྷཱ་ཝི་ནཱ.
༡༣༧༡. ཨེ་ཏྟཱ་ཝ་ཏཱ པ་ནེ་སོ ཧི,
ཨ་ར་ཧཱ ནཱ་མ ཨ་ཊྛ་མོ;
ཨ་རི་ཡོ པུ་གྒ་ལོ ཧོ་ཏི,
མ་ཧཱ་ཁཱི་ཎཱ་ས་ཝོ ཨ་ཡཾ.
༡༣༧༢. ཨ་ནུ་པྤ་ཏྟ་ས་ད་ཏྠོ ཙ,
ཁཱི་ཎ་སཾ་ཡོ་ཛ་ནོ མུ་ནི;
ས་དེ་ཝ་ཀ་སྶ ལོ་ཀ་སྶ,
ད་ཀྑི་ཎེ་ཡྻོ ཨ་ནུ་ཏྟ་རོ.
༡༣༧༣. ཨེ་ཏྟཱ་ཝ་ཏཱ ཙ་ཏ་སྶོ་པི, ཉཱ་ཎ་ད་སྶ་ན་སུ་དྡྷི་ཡོ;
ཧི་ཏ་ཏྠཱ་ཡ ཙ བྷི་ཀྑཱུ་ནཾ, ས་ངྑེ་པེ་ནེ་ཝ ད་སྶི་ཏཱ.
༡༣༧༤. ས་དྡྷེ་ན ས་མྨཱ པ་ན བྷཱ་ཝ་ནཱི་ཡཱ,
ཨ་རི་ཡཱ་ཡ པ་ཉྙཱ་ཡ ཙ བྷཱ་ཝ་ནཱ་ཡ;
ཝི་སུ་དྡྷི་ཀཱ་མེ་ན ཏ་པོ་དྷ་ནེ་ན,
བྷ་ཝ་ཀྑ་ཡཾ པ་ཏྠ་ཡ་ཏཱ བུ་དྷེ་ན.
ཨི་ཏི ཨ་བྷི་དྷ་མྨཱ་ཝ་ཏཱ་རེ ཉཱ་ཎ་ད་སྶ་ན་ཝི་སུ་དྡྷི་ནི་དྡེ་སོ ནཱ་མ
བཱ་ཝཱི་ས་ཏི་མོ པ་རི་ཙྪེ་དོ.