༢༣. ཏེ་ཝཱི་ས་ཏི་མོ པ་རི་ཙྪེ་དོ
ཀི་ལེ་ས་པྤ་ཧཱ་ན་ཀ་ཐཱ
༡༣༧༥. ཨེ་ཏེ་སུ ཡེ་ན ཡེ དྷ་མྨཱ, པ་ཧཱ་ཏ་བྦཱ བྷ་ཝ་ནྟི ཧི;
ཏེ་སཾ དཱ་ནི ཀ་རི་སྶཱ་མི, པ་ཀཱ་ས་ན་མི་ཏོ པ་རཾ.
ཨི་མེ་སུ པ་ན ཙ་ཏཱུ་སུ མ་གྒ་ཉཱ་ཎེ་སུ ཡེ དྷ་མྨཱ ཡེ་ན ཉཱ་ཎེ་ན པ་ཧཱ་ཏ་བྦཱ, ཏེ་སཾ པ་ཧཱ་ན་མེ་ཝཾ ཝེ་དི་ཏ་བྦཾ. ཨེ་ཏཱ་ནི ཧི ཡ་ཐཱ་ཡོ་གཾ སཾ་ཡོ་ཛ་ན་ཀི་ལེ་ས་མི་ཙྪ་ཏྟ་ལོ་ཀ་དྷ་མྨ་མ་ཙྪ་རི་ཡ་ཝི་པ་ལླཱ་ས་ག་ནྠཱ་ག་ཏི་ཨཱ་ས་ཝ- ཨོ་གྷ་ཡོ་ག་ནཱི་ཝ་ར་ཎ་པ་རཱ་མཱ་ས་ཨུ་པཱ་དཱ་ནཱ་ནུ་ས་ཡ་མ་ལ་ཨ་ཀུ་ས་ལ་ཀ་མྨ་པ་ཐ- ཨ་ཀུ་ས་ལ་ཙི་ཏྟུ་པྤཱ་ད་ས་ངྑཱ་ཏཱ་ནཾ པ་ཧཱ་ན་ཀ་རཱ་ནི.
ཏ་ཏྠ སཾ་ཡོ་ཛ་ནཱ་ནཱིཏི ད་ས སཾ་ཡོ་ཛ་ནཱ་ནི. སེ་ཡྻ་ཐི་དཾ – རཱུ་པ་རཱ་གཱ་རཱུ་པ་རཱ་ག་མཱ་ན་ཨུ་དྡྷ་ཙྩཱ་ཝི་ཛྫཱ་ཏི ཨི་མེ པ་ཉྩ ཨུ་དྡྷཾ་བྷཱ་གི་ཡ་སཾ་ཡོ་ཛ་ནཱ་ནི ནཱ་མ. ས་ཀྐཱ་ཡ་དི་ཊྛི ཝི་ཙི་ཀི་ཙྪཱ སཱི་ལ་བྦ་ཏ་པ་རཱ་མཱ་སོ ཀཱ་མ་རཱ་གོ པ་ཊི་གྷོ་ཏི ཨི་མེ པ་ཉྩ ཨ་དྷོ་བྷཱ་གི་ཡ་སཾ་ཡོ་ཛ་ནཱ་ནི ནཱ་མ.
ཀི་ལེ་སཱཏི ད་ས ཀི་ལེ་སཱ. སེ་ཡྻ་ཐི་དཾ – ལོ་བྷོ དོ་སོ མོ་ཧོ མཱ་ནོ དི་ཊྛི ཝི་ཙི་ཀི་ཙྪཱ ཐི་ནཾ ཨུ་དྡྷ་ཙྩཾ ཨ་ཧི་རི་ཀཾ ཨ་ནོ་ཏྟ་པྤ་ནྟི.
མི་ཙྪ་ཏྟཱཏི ད་ས མི་ཙྪ་ཏྟཱ. སེ་ཡྻ་ཐི་དཾ – མི་ཙྪཱ་དི་ཊྛི མི་ཙྪཱ་ས་ངྐ་པྤོ མི་ཙྪཱ་ཝཱ་ཙཱ མི་ཙྪཱ་ཀ་མྨ་ནྟོ མི་ཙྪཱ་ཨཱ་ཛཱི་ཝོ མི་ཙྪཱ་ཝཱ་ཡཱ་མོ མི་ཙྪཱ་ས་ཏི མི་ཙྪཱ་ས་མཱ་དྷི མི་ཙྪཱ་ཉཱ་ཎཾ མི་ཙྪཱ་ཝི་མུ་ཏྟཱི་ཏི.
ལོ་ཀ་དྷ་མྨཱཏི ཨ་ཊྛ ལོ་ཀ་དྷ་མྨཱ ལཱ་བྷོ ཨ་ལཱ་བྷོ ཡ་སོ ཨ་ཡ་སོ ནི་ནྡཱ པ་སཾ་སཱ སུ་ཁཾ དུ་ཀྑ་ནྟི. ཨི་དྷ པ་ན ཀཱ་ར་ཎཱུ་པ་ཙཱ་རེ་ན ལཱ་བྷཱ་དི་ཝ་ཏྠུ་ཀ་སྶ ཨ་ནུ་ན་ཡ་སྶ, ཨ་ལཱ་བྷཱ་དི་ཝ་ཏྠུ་ཀ་སྶ པ་ཊི་གྷ་སྶ ཙེ་ཏཾ ལོ་ཀ་དྷ་མྨ་ག་ཧ་ཎེ་ན ག་ཧ་ཎཾ ཀ་ཏ་ནྟི ཝེ་དི་ཏ་བྦཾ.
མ་ཙྪ་རི་ཡཱ་ནཱིཏི པ་ཉྩ མ་ཙྪ་རི་ཡཱ་ནི ཨཱ་ཝཱ་ས་མ་ཙྪ་རི་ཡཾ ཀུ་ལ་མ་ཙྪ་རི་ཡཾ ལཱ་བྷ་མ་ཙྪ་རི་ཡཾ དྷ་མྨ་མ་ཙྪ་རི་ཡཾ ཝ་ཎྞ་མ་ཙྪ་རི་ཡ་ནྟི. ཨི་མཱ་ནི ཨཱ་ཝཱ་སཱ་དཱི་སུ ཨ་ཉྙེ་སཾ སཱ་དྷཱ་ར་ཎ་བྷཱ་ཝཾ ཨ་ས་ཧ་ནཱ་ཀཱ་རེ་ན པ་ཝ་ཏྟཱ་ནི མ་ཙྪ་རི་ཡཱ་ནི.
ཝི་པ་ལླཱ་སཱཏི ཨ་ནི་ཙྩ་དུ་ཀྑ་ཨ་ན་ཏྟ་ཨ་སུ་བྷེ་སུ་ཡེ་ཝ ཝ་ཏྠཱུ་སུ ‘‘ནི་ཙྩཾ སུ་ཁཾ ཨ་ཏྟཱ སུ་བྷ’’ནྟི ཨེ་ཝཾ པ་ཝ་ཏྟཱ ས་ཉྙཱ་ཝི་པ་ལླཱ་སོ ཙི་ཏྟ་ཝི་པ་ལླཱ་སོ དི་ཊྛི་ཝི་པ་ལླཱ་སོ་ཏི ཨི་མེ ཏ་ཡོ ཝི་པ་ལླཱ་སཱ.
ག་ནྠཱཏི ཙ་ཏྟཱ་རོ ག་ནྠཱ ཨ་བྷི་ཛ྄ཛྷཱ་ཀཱ་ཡ་ག་ནྠོ, བྱཱ་པཱ་དོ, སཱི་ལ་བྦ་ཏ་པ་རཱ་མཱ་སོ, ཨི་དཾ་ས་ཙྩཱ་བྷི་ནི་ཝེ་སོ ཀཱ་ཡ་ག་ནྠོ་ཏི.
ཨ་ག་ཏཱིཏི ཚ་ནྡ་དོ་ས་མོ་ཧ་བྷ་ཡཱ་ནི. ཨཱ་ས་ཝཱཏི ཙ་ཏྟཱ་རོ ཨཱ་ས་ཝཱ – ཀཱ་མ་རཱ་ག་བྷ་ཝ་རཱ་ག་མི་ཙྪཱ་དི་ཊྛི་ཨ་ཝི་ཛྫཱ་ས་ཝོ་ཏི. ཨོ་གྷ་ཡོ་གཱ་ནཱིཏི་པི ཏེ་ས་མེ་ཝཱ་དྷི་ཝ་ཙ་ནཾ. ནཱི་ཝ་ར་ཎཱ་ནཱིཏི ཀཱ་མ་ཙྪ་ནྡཱ་ད་ཡོ. པ་རཱ་མཱ་སོཏི མི་ཙྪཱ་དི་ཊྛི་ཡཱ ཨ་དྷི་ཝ་ཙ་ནཾ.
ཨུ་པཱ་དཱ་ནཱཏི ཙ་ཏྟཱ་རི ཨུ་པཱ་དཱ་ནཱ་ནི ཀཱ་མུ་པཱ་དཱ་ནཱ་དཱི་ནཱི་ཏི. ཨ་ནུ་ས་ཡཱཏི ས་ཏྟ ཨ་ནུ་ས་ཡཱ ཀཱ་མ་རཱ་གཱ་ནུ་ས་ཡོ པ་ཊི་གྷ་མཱ་ན་དི་ཊྛི་ཝི་ཙི་ཀི་ཙྪཱ་བྷ་ཝ་རཱ་གཱ་ཝི་ཛྫཱ་ནུ་ས་ཡོ་ཏི. མ་ལཱཏི ཏ་ཡོ མ་ལཱ – ལོ་བྷོ དོ་སོ མོ་ཧོ་ཏི.
ཨ་ཀུ་ས་ལ་ཀ་མྨ་པ་ཐཱཏི ད་ས ཨ་ཀུ་ས་ལ་ཀ་མྨ་པ་ཐཱ. སེ་ཡྻ་ཐི་དཾ – པཱ་ཎཱ་ཏི་པཱ་ཏོ ཨ་དི་ནྣཱ་དཱ་ནཾ ཀཱ་མེ་སུ་མི་ཙྪཱ་ཙཱ་རོ མུ་སཱ་ཝཱ་དོ པི་སུ་ཎ་ཝཱ་ཙཱ ཕ་རུ་ས་ཝཱ་ཙཱ ས་མྥ་པྤ་ལཱ་པོ ཨ་བྷི་ཛ྄ཛྷཱ བྱཱ་པཱ་དོ མི་ཙྪཱ་དི་ཊྛཱི་ཏི ད་ས.
ཨ་ཀུ་ས་ལ་ཙི་ཏྟུ་པྤཱ་དཱཏི ལོ་བྷ་མཱུ་ལཱ་ནི ཨ་ཊྛ, དོ་ས་མཱུ་ལཱ་ནི དྭེ, མོ་ཧ་མཱུ་ལཱ་ནི དྭེ་ཏི ཨི་མེ དྭཱ་ད་སཱ་ཏི.
ཨེ་ཏེ་སཾ སཾ་ཡོ་ཛ་ནཱ་དཱི་ནཾ ཨེ་ཏཱ་ནི ཡ་ཐཱ་ས་མྦྷ་ཝཾ པ་ཧཱ་ན་ཀ་རཱ་ནི. ཀ་ཐཾ? སཾ་ཡོ་ཛ་ནེ་སུ ཏཱ་ཝ ས་ཀྐཱ་ཡ་དི་ཊྛི་ཝི་ཙི་ཀི་ཙྪཱ་སཱི་ལ་བྦ་ཏ་པ་རཱ་མཱ་སཱ ཨ་པཱ་ཡ་ག་མ་ནཱི་ཡཱ ཀཱ་མ་རཱ་ག་པ་ཊི་གྷཱ་ཏི ཨེ་ཏེ པ་ཋ་མ་མ་གྒ་ཉཱ་ཎ་ཝ་ཛ྄ཛྷཱ, སེ་སཱ ཀཱ་མ་རཱ་ག་པ་ཊི་གྷཱ ཨོ་ལཱ༹་རི་ཀཱ དུ་ཏི་ཡ་མ་གྒ་ཉཱ་ཎ་ཝ་ཛ྄ཛྷཱ, སུ་ཁུ་མཱ ཏ་ཏི་ཡ་མ་གྒ་ཉཱ་ཎ་ཝ་ཛ྄ཛྷཱ, རཱུ་པ་རཱ་གཱ་ད་ཡོ པ་ཉྩ་པི ཙ་ཏུ་ཏྠ་མ་གྒ་ཉཱ་ཎ་ཝ་ཛ྄ཛྷཱ ཨེ་ཝ.
ཀི་ལེ་སེ་སུ དི་ཊྛི་ཝི་ཙི་ཀི་ཙྪཱ པ་ཋ་མ་མ་གྒ་ཉཱ་ཎ་ཝ་ཛ྄ཛྷཱ, དོ་སོ ཏ་ཏི་ཡ་མ་གྒ་ཉཱ་ཎ་ཝ་ཛ྄ཛྷོ, ལོ་བྷ་མོ་ཧ་མཱ་ན་ཐི་ན་ཨུ་དྡྷ་ཙྩ་ཨ་ཧི་རི་ཀཱ་ནོ་ཏྟ་པྤཱ་ནི ཙ་ཏུ་ཏྠ་མ་གྒ་ཉཱ་ཎ་ཝ་ཛ྄ཛྷཱ་ནི.
མི་ཙྪ་ཏྟེ་སུ མི་ཙྪཱ་དི་ཊྛི མུ་སཱ་ཝཱ་དོ མི་ཙྪཱ་ཀ་མྨ་ནྟོ མི་ཙྪཱ་ཨཱ་ཛཱི་ཝོ་ཏི ཨི་མེ པ་ཋ་མ་མ་གྒ་ཉཱ་ཎ་ཝ་ཛ྄ཛྷཱ, མི་ཙྪཱ་ས་ངྐ་པྤོ པི་སུ་ཎ་ཝཱ་ཙཱ ཕ་རུ་ས་ཝཱ་ཙཱ་ཏི ཨི་མེ ཏ་ཏི་ཡ་མ་གྒ་ཉཱ་ཎ་ཝ་ཛ྄ཛྷཱ, ཙེ་ཏ་ནཱ་ཡེ་ཝ ཙེ་ཏྠ མི་ཙྪཱ་ཝཱ་ཙཱ་ཏི ཝེ་དི་ཏ་བྦཱ, ས་མྥ་པྤ་ལཱ་པ་མི་ཙྪཱ་ཝཱ་ཡཱ་མ་ས་ཏི་ས་མཱ་དྷི་ཝི་མུ་ཏྟི་ཉཱ་ཎཱ་ནི ཙ་ཏུ་ཏྠ་མ་གྒ་ཉཱ་ཎ་ཝ་ཛ྄ཛྷཱ་ནི.
ལོ་ཀ་དྷ་མྨེ་སུ པ་ཊི་གྷོ ཏ་ཏི་ཡ་མ་གྒ་ཉཱ་ཎ་ཝ་ཛ྄ཛྷོ, ཨ་ནུ་ན་ཡོ ཙ་ཏུ་ཏྠ་མ་གྒ་ཉཱ་ཎ་ཝ་ཛ྄ཛྷོ, ཡ་སེ པ་སཾ་སཱ་ཡ ཙ ཨ་ནུ་ན་ཡོ ཙ་ཏུ་ཏྠ་མ་གྒ་ཉཱ་ཎ་ཝ་ཛ྄ཛྷོ་ཏི ཨེ་ཀེ.
མ་ཙྪ་རི་ཡཱ་ནི པ་ཋ་མ་མ་གྒ་ཉཱ་ཎ་ཝ་ཛ྄ཛྷཱ་ནི ཨེ་ཝ.
ཝི་པ་ལླཱ་སེ་སུ པ་ན ཨ་ནི་ཙྩེ ནི་ཙྩཾ, ཨ་ན་ཏྟ་ནི ཨ་ཏྟཱ་ཏི ཙ ས་ཉྙཱ་ཙི་ཏྟ་དི་ཊྛི་ཝི་པ་ལླཱ་སཱ, དུ་ཀྑེ སུ་ཁཾ, ཨ་སུ་བྷེ སུ་བྷ་ནྟི དི་ཊྛི་ཝི་པ་ལླཱ་སོ ཙཱ་ཏི ཨི་མེ པ་ཋ་མ་མ་གྒ་ཉཱ་ཎ་ཝ་ཛ྄ཛྷཱ, ཨ་སུ་བྷེ སུ་བྷ་ནྟི ས་ཉྙཱ་ཙི་ཏྟ་ཝི་པ་ལླཱ་སཱ ཏ་ཏི་ཡ་མ་གྒ་ཉཱ་ཎ་ཝ་ཛ྄ཛྷཱ, དུ་ཀྑེ སུ་ཁ་ནྟི ཙ་ཏུ་ཏྠ་མ་གྒ་ཉཱ་ཎ་ཝ་ཛ྄ཛྷཱ.
ག་ནྠེ་སུ སཱི་ལ་བྦ་ཏ་པ་རཱ་མཱ་ས་ཨི་དཾ་ས་ཙྩཱ་བྷི་ནི་ཝེ་ས་ཀཱ་ཡ་ག་ནྠཱ པ་ཋ་མ་མ་གྒ་ཉཱ་ཎ་ཝ་ཛ྄ཛྷཱ, བྱཱ་པཱ་ད་ཀཱ་ཡ་ག་ནྠོ ཏ་ཏི་ཡ་མ་གྒ་ཉཱ་ཎ་ཝ་ཛ྄ཛྷོ, ཨ་བྷི་ཛ྄ཛྷཱ་ཀཱ་ཡ་ག་ནྠོ ཙ་ཏུ་ཏྠ་མ་གྒ་ཉཱ་ཎ་ཝ་ཛ྄ཛྷོ་ཝ.
ཨ་ག་ཏི་ཡོ པ་ཋ་མ་མ་གྒ་ཉཱ་ཎ་ཝ་ཛ྄ཛྷཱ.
ཨཱ་ས་ཝེ་སུ དི་ཊྛཱ་ས་ཝོ པ་ཋ་མ་ཉཱ་ཎ་ཝ་ཛ྄ཛྷོ, ཀཱ་མཱ་ས་ཝོ ཏ་ཏི་ཡ་ཉཱ་ཎ་ཝ་ཛ྄ཛྷོ, ཨི་ཏ་རེ དྭེ ཙ་ཏུ་ཏྠ་ཉཱ་ཎ་ཝ་ཛ྄ཛྷཱ. ཨོ་གྷ་ཡོ་གེ་སུཔི ཨེ་སེ་ཝ ན་ཡོ.
ནཱི་ཝ་ར་ཎེ་སུ ཝི་ཙི་ཀི་ཙྪཱ་ནཱི་ཝ་ར་ཎཾ པ་ཋ་མ་ཉཱ་ཎ་ཝ་ཛ྄ཛྷཾ, ཀཱ་མ་ཙྪ་ནྡོ བྱཱ་པཱ་དོ ཀུ་ཀྐུ་ཙྩ་ནྟི ཏཱི་ཎི ཏ་ཏི་ཡ་ཉཱ་ཎ་ཝ་ཛ྄ཛྷཱ་ནི, ཐི་ན་མི་དྡྷ་ཨུ་དྡྷ་ཙྩཱ་ནི ཙ་ཏུ་ཏྠ་ཉཱ་ཎ་ཝ་ཛ྄ཛྷཱ་ནི.
པ་རཱ་མཱ་སོ པ་ཋ་མ་ཉཱ་ཎ་ཝ་ཛ྄ཛྷོ.
ཨུ་པཱ་དཱ་ནེ་སུ ས་བྦེ་ས་མྤི ལོ་ཀི་ཡ་དྷ་མྨཱ་ནཾ ཝ་ཏྠུ་ཀཱ་མ་ཝ་སེ་ན ‘‘ཀཱ་མཱ’’ཏི ཨཱ་ག་ཏ་ཏྟཱ རཱུ་པཱ་རཱུ་པེ་སུ རཱ་གོ་པི ཀཱ་མུ་པཱ་དཱ་ནེ པ་ཏ་ཏི, ཏ་སྨཱ ཏ་ཉྩ ཀཱ་མུ་པཱ་དཱ་ནཾ ཙ་ཏུ་ཏྠ་ཉཱ་ཎ་ཝ་ཛ྄ཛྷཾ, སེ་སཱ་ནི པ་ཋ་མ་ཉཱ་ཎ་ཝ་ཛ྄ཛྷཱ་ནི.
ཨ་ནུ་ས་ཡེ་སུ དི་ཊྛི་ཝི་ཙི་ཀི་ཙྪཱ་ནུ་ས་ཡཱ པ་ཋ་མ་ཉཱ་ཎ་ཝ་ཛ྄ཛྷཱ, ཀཱ་མ་རཱ་ག་པ་ཊི་གྷཱ་ནུ་ས་ཡཱ ཏ་ཏི་ཡ་ཉཱ་ཎ་ཝ་ཛ྄ཛྷཱ, མཱ་ན་བྷ་ཝ་རཱ་གཱ་ཝི་ཛྫཱ་ནུ་ས་ཡཱ ཙ་ཏུ་ཏྠ་ཉཱ་ཎ་ཝ་ཛ྄ཛྷཱ.
མ་ལེ་སུ དོ་ས་མ་ལཾ ཏ་ཏི་ཡ་ཉཱ་ཎ་ཝ་ཛ྄ཛྷཾ, ཨི་ཏ་རཱ་ནི ཙ་ཏུ་ཏྠ་ཉཱ་ཎ་ཝ་ཛ྄ཛྷཱ་ནེ་ཝ.
ཨ་ཀུ་ས་ལ་ཀ་མྨ་པ་ཐེ་སུ པཱ་ཎཱ་ཏི་པཱ་ཏོ ཨ་དི་ནྣཱ་དཱ་ནཾ མི་ཙྪཱ་ཙཱ་རོ མུ་སཱ་ཝཱ་དོ མི་ཙྪཱ་དི་ཊྛཱི་ཏི ཨི་མེ པ་ཋ་མ་ཉཱ་ཎ་ཝ་ཛ྄ཛྷཱ, པི་སུ་ཎ་ཝཱ་ཙཱ ཕ་རུ་ས་ཝཱ་ཙཱ བྱཱ་པཱ་དོ་ཏི ཏ་ཏི་ཡ་ཉཱ་ཎ་ཝ་ཛ྄ཛྷཱ, ས་མྥ་པྤ་ལཱ་པོ ཨ་བྷི་ཛ྄ཛྷཱ ཙ་ཏུ་ཏྠ་ཉཱ་ཎ་ཝ་ཛ྄ཛྷཱ་ཝ.
ཨ་ཀུ་ས་ལ་ཙི་ཏྟུ་པྤཱ་དེ་སུ ཙ་ཏྟཱ་རོ དི་ཊྛི་ག་ཏ་ཙི་ཏྟུ་པྤཱ་དཱ, ཝི་ཙི་ཀི་ཙྪཱ་ས་མྤ་ཡུ་ཏྟོ ཙཱ་ཏི པ་ཉྩ པ་ཋ་མ་ཉཱ་ཎ་ཝ་ཛ྄ཛྷཱ, དྭེ པ་ཊི་གྷ་ས་མྤ་ཡུ་ཏྟཱ ཏ་ཏི་ཡ་ཉཱ་ཎ་ཝ་ཛ྄ཛྷཱ, སེ་སཱ ཙ་ཏུ་ཏྠ་ཉཱ་ཎ་ཝ་ཛ྄ཛྷཱ་ཏི.
ཡ་ཉྩ ཡེ་ན ཝ་ཛ྄ཛྷཾ, ཏཾ ཏེ་ན པ་ཧཱ་ཏ་བྦཾ ནཱ་མ. ཏེ་ན ཝུ་ཏྟཾ ‘‘ཨེ་ཏེ་སཾ སཾ་ཡོ་ཛ་ནཱ་དཱི་ནཾ དྷ་མྨཱ་ནཾ ཨེ་ཏཱ་ནི ཡ་ཐཱ་ཡོ་གཾ པ་ཧཱ་ན་ཀ་རཱ་ནཱི’’ཏི.
༡༣༧༦. ཨེ་ཏེ་སུ ཉཱ་ཎེ་སུ ཙ ཡེ་ན ཡེ་ན,
ཡོ ཡོ ཧི དྷ་མྨོ ས་མུ་པེ་ཏི གྷཱ་ཏཾ;
སོ སོ ཨ་སེ་སེ་ན ཙ ཏེ་ན ཏེ་ན,
ས་ནྡ་སྶི་ཏོ སཱ་དྷུ མ་ཡཱ པ་ནེ་ཝཾ.
ཀི་ལེ་ས་པ་ཧཱ་ན་ཀྐ་མ་ཀ་ཐཱ་ཡཾ.
༡༣༧༧. པ་རི་ཉྙཱ་དཱི་ནི ཀི་ཙྩཱ་ནི, ཡཱ་ནི ཝུ་ཏྟཱ་ནི ས་ཏྠུ་ནཱ;
ས་ཙྩཱ་བྷི་ས་མ་ཡེ ཏཱ་ནི, པ་ཝ་ཀྑཱ་མི ཨི་ཏོ པ་རཾ.
༡༣༧༨. ཨེ་ཀེ་ཀ་སྶ པ་ནེ་ཏེ་སུ,
ཉཱ་ཎ་སྶེ་ཀ་ཀྑ་ཎེ སི་ཡཱ;
པ་རི་ཉྙཱ ཙ པ་ཧཱ་ན་ཉྩ,
ས་ཙྪི་ཀི་རི་ཡཱ ཙ བྷཱ་ཝ་ནཱ.
༡༣༧༩. པ་རི་ཉྙཱ་དཱི་ནི ཨེ་ཏཱ་ནི, ཀི་ཙྩཱ་ནེ་ཀ་ཀྑ་ཎེ པ་ན;
ཡ་ཐཱ་ས་བྷཱ་ཝ་ཏོ ཏཱ་ནི, ཛཱ་ནི་ཏ་བྦཱ་ནི ཝི་ཉྙུ་ནཱ.
༡༣༨༠. པ་དཱི་པོ ཧི ཡ་ཐཱ ལོ་ཀེ, ཨ་པུ་བྦཱ་ཙ་རི་མཾ ཨི་དྷ;
ཙ་ཏྟཱ་རི པ་ན ཀི་ཙྩཱ་ནི, ཀ་རོ་ཏེ་ཀ་ཀྑ་ཎེ པ་ན.
༡༣༨༡. ཨཱ་ལོ་ཀ་ཉྩ ཝི་དཾ་སེ་ཏི, ནཱ་སེ་ཏི ཏི་མི་ར་མྤི ཙ;
པ་རི་ཡཱ་དི་ཡ་ཏི ཏེ་ལ་ཉྩ, ཝ་ཊྚིཾ ཛྷཱ་པེ་ཏི ཨེ་ཀ་ཏོ.
༡༣༨༢. ཨེ་ཝཾ ཏཾ མ་གྒ་ཉཱ་ཎ་མྤི, ཨ་པུ་བྦཱ་ཙ་རི་མཾ པ་ན;
ཙ་ཏྟཱ་རི་པི ཙ ཀི་ཙྩཱ་ནི, ཀ་རོ་ཏེ་ཀ་ཀྑ་ཎེ པ་ན.
༡༣༨༣. པ་རི་ཉྙཱ་བྷི་ས་མ་ཡེ་ནེ་ཝ, དུ་ཀྑཾ ཨ་བྷི་ས་མེ་ཏི སོ;
པ་ཧཱ་ནཱ་བྷི་ས་མ་ཡེ་ནེ་ཝ, ཏ་ཐཱ ས་མུ་ད་ཡ་མྤི ཙ.
༡༣༨༤. བྷཱ་ཝ་ནཱ་ཝི་དྷི་ནཱ་ཡེ་ཝ, མ་གྒཾ ཨ་བྷི་ས་མེ་ཏི ཏཾ;
ཨཱ་ར་མྨ་ཎ་ཀྲི་ཡཱ་ཡེ་ཝ, ནི་རོ་དྷཾ ས་ཙྪི་ཀ་རོ་ཏི སོ.
ཝུ་ཏྟ་མྤི ཙེ་ཏཾ ‘‘མ་གྒ་ས་མ་ངྒི་སྶ ཉཱ་ཎཾ དུ་ཀྑེ་པེ་ཏཾ ཉཱ་ཎཾ, དུ་ཀྑ་ས་མུ་ད་ཡེ་པེ་ཏཾ ཉཱ་ཎཾ, དུ་ཀྑ་ནི་རོ་དྷེ་པེ་ཏཾ ཉཱ་ཎཾ, དུ་ཀྑ་ནི་རོ་དྷ་གཱ་མི་ནི་ཡཱ པ་ཊི་པ་དཱ་ཡ་པེ་ཏཾ ཉཱ་ཎ’’ནྟི. ཏ་ཏྠ ཡ་ཐཱ པ་དཱི་པོ ཝ་ཊྚིཾ ཛྷཱ་པེ་ཏི, ཨེ་ཝཾ མ་གྒ་ཉཱ་ཎཾ དུ་ཀྑཾ པ་རི་ཛཱ་ནཱ་ཏི. ཡ་ཐཱ ཨ་ནྡྷ་ཀཱ་རཾ ནཱ་སེ་ཏི, ཨེ་ཝཾ ས་མུ་ད་ཡཾ པ་ཛ་ཧ་ཏི. ཡ་ཐཱ ཨཱ་ལོ་ཀཾ ཝི་དཾ་སེ་ཏི, ཨེ་ཝཾ ས་ཧ་ཛཱ་ཏཱ་དི་པ་ཙྩ་ཡ་ཏཱ་ཡ ས་མྨཱ་ས་ངྐ་པྤཱ་དི་མ་གྒཾ བྷཱ་ཝེ་ཏི. ཡ་ཐཱ ཏེ་ལཾ པ་རི་ཡཱ་དི་ཡ་ཏི, ཨེ་ཝཾ ཀི་ལེ་ས་པ་རི་ཡཱ་དཱ་ནེ་ན ནི་རོ་དྷཾ ས་ཙྪི་ཀ་རོ་ཏཱི་ཏི ཝེ་དི་ཏ་བྦཾ.
༡༣༨༥. ཨུ་གྒ་ཙྪ་ནྟོ ཡ་ཐཱ་དི་ཙྩོ, ཨ་པུ་བྦཱ་ཙ་རི་མཾ པ་ན;
ཙ་ཏྟཱ་རི པ་ན ཀི་ཙྩཱ་ནི, ཀ་རོ་ཏེ་ཀ་ཀྑ་ཎེ ཨི་དྷ.
༡༣༨༦. ཨོ་བྷཱ་སེ་ཏི ཙ རཱུ་པཱ་ནི, ནཱ་སེ་ཏི ཏི་མི་ར་མྤི ཙ;
ཨཱ་ལོ་ཀ་ཉྩ ཝི་དཾ་སེ་ཏི, སཱི་ཏ་ཉྩ པ་ཊི་ཧ་ཉྙ་ཏི.
༡༣༨༧. ཡ་ཐཱ ཙ མ་ཧ་ཏཱི ནཱ་ཝཱ, ཨ་པུ་བྦཱ་ཙ་རི་མཾ པ་ན;
ཙ་ཏྟཱ་རི པ་ན ཀི་ཙྩཱ་ནི, ཀ་རོ་ཏེ་ཀ་ཀྑ་ཎེ པ་ན.
༡༣༨༨. ཛ་ཧ་ཏཱི ཨོ་རི་མཾ ཏཱི་རཾ, སོ་ཏཾ ཚི་ནྡ་ཏི སཱ པ་ན;
ཏ་ཐཱ ཝ་ཧ་ཏི བྷ་ཎྜ་ཉྩ, ཏཱི་ར་མ་པྤེ་ཏི པཱ་རི་མཾ.
༡༣༨༩. ནཱ་ཝཱ་ཡོ་རི་མ་ཏཱི་ར་སྶ, ཡ་ཐཱ པ་ཛ་ཧ་ནཾ པ་ན;
ཏ་ཐེ་ཝ མ་གྒ་ཉཱ་ཎ་སྶ, དུ་ཀྑ་སྶ པ་རི་ཛཱ་ན་ནཾ.
༡༣༩༠. ཡ་ཐཱ ཚི་ནྡ་ཏི ཏཾ སོ་ཏཾ, ཏ་ཎྷཾ ཛ་ཧ་ཏི ཏཾ ཏ་ཐཱ;
ཡ་ཐཱ ཝ་ཧ་ཏི ཏཾ བྷ་ཎྜཾ, ས་ཧ་ཛཱ་ཏཱ་དི་ནཱ པ་ན.
༡༣༩༡. ཏ་ཐེ་ཝ པ་ཙྩ་ཡ་ཏྟེ་ན, མ་གྒཾ བྷཱ་ཝེ་ཏི ནཱ་མ སོ;
ཡ་ཐཱ པཱ་རཾ པ་ན ཨེ་ཝཾ, ནི་རོ་དྷཱ་ར་མྨ་ཎཾ བྷ་ཝེ.
༡༣༩༢. ལོ་ཀུ་ཏྟ་རེ་ན ནི་དྡི་ཊྛཱ, ཡཱ ལོ་ཀུ་ཏྟ་ར་བྷཱ་ཝ་ནཱ;
སཱ ས་ངྑེ་པ་ན་ཡེ་ནེ་ཝཾ, མ་ཡཱ སཱ་དྷུ པ་ཀཱ་སི་ཏཱ.
༡༣༩༣. ཀོ ཧི ནཱ་མ ན་རོ ལོ་ཀེ,
ལོ་ཀུ་ཏྟ་ར་སུ་ཁཱ་ཝ་ཧཾ;
བྷཱ་ཝ་ནཾ པ་ན པ་ཉྙཱ་ཡ,
ན ཙ བྷཱ་ཝེ་ཡྻ པ་ཎྜི་ཏོ.
༡༣༩༤. ཨི་མཾ ཝི་དི་ཏྭཱ ཧི་ཏ་བྷཱ་ཝ་ནཾ ཝ་ནཾ,
ཨུ་པེ་ཏི ཡོ ཝེ སུ་ཁ་སཾ་ཧི་ཏཾ ཧི་ཏཾ;
ཝི་དྷཱུ་ཡ ཙི་ཏྟ་སྶ ཨ་ནུ་ཏྟ་མཾ ཏ་མཾ,
ཨུ་པེ་ཏི ཙཱ་ཝི་གྒ་ཧ་ཀ་མྤ་དཾ པ་དཾ.
ཨི་ཏི ཨ་བྷི་དྷ་མྨཱ་ཝ་ཏཱ་རེ ཉཱ་ཎ་ད་སྶ་ན་ཝི་སུ་དྡྷི་ནི་དྡེ་སོ ནཱ་མ
ཏེ་ཝཱི་ས་ཏི་མོ པ་རི་ཙྪེ་དོ.