༢༡. ཨེ་ཀ་ཝཱི་ས་ཏི་མོ པ་རི་ཙྪེ་དོ
པ་ཊི་པ་དཱ་ཉཱ་ཎ་ད་སྶ་ན་ཝི་སུ་དྡྷི་ནི་དྡེ་སོ
༡༢༩༨. ཨ་ཊྛ་ཉཱ་ཎ་ཝ་སེ་ནེ་ཝ, སི་ཁཱ་པ་ཀྐཱ ཝི་པ་སྶ་ནཱ;
ན་ཝ་མཾ པ་ཊི་པ་དཱ་ཉཱ་ཎ-ད་སྶ་ནནྟི པ་ཝུ་ཙྩ་ཏི.
༡༢༩༩. ཨ་ཊྛ ཉཱ་ཎཱ་ནི ནཱ་མེ་ཏྠ, ཝེ་དི་ཏ་བྦཱ་ནི ཝི་ཉྙུ་ནཱ;
ཨུ་པ་ཀླེ་ས་ཝི་ནི་མུ་ཏྟཾ, ཉཱ་ཎཾ སུ་ཝི་ས་དཾ པ་ན.
༡༣༠༠. ཨུ་ད་ཡ་བྦ་ཡེ ཙ བྷ་ངྒེ ཙ, བྷ་ཡེ ཨཱ་དཱི་ན་ཝེ ཏ་ཐཱ;
ནི་བྦི་དཱ་པ་སྶ་ནཱ་ཉཱ་ཎཾ, ཉཱ་ཎཾ མུ་ཙྩི་ཏུ་ཀ་མྱ་ཏཱ.
༡༣༠༡. པ་ཊི་ས་ངྑཱ ཙ ས་ངྑཱ་རེ, ཨུ་པེ་ཀྑཱ་ཉཱ་ཎ་མ་ཊྛ་མཾ;
ཨི་མཱ་ནི ཨ་ཊྛ ཉཱ་ཎཱ་ནི, ན་ཝ་མཾ ས་ཙྩཱ་ནུ་ལོ་མ་ཀཾ.
༡༣༠༢. ས་ཙྩཱ་ནུ་ལོ་མ་ཉཱ་ཎ་ནྟི, ཨ་ནུ་ལོ་མཾ པ་ཝུ་ཙྩ་ཏི;
ཏཾ ས་མྤཱ་དེ་ཏུ་ཀཱ་མེ་ན, ཡོ་གཱ་ཝ་ཙ་ར་བྷི་ཀྑུ་ནཱ.
༡༣༠༣. ཨུ་ད་ཡ་བྦ་ཡ་ཉཱ་ཎཾ ཏཾ, ཨཱ་དིཾ ཀ་ཏྭཱ པ་ན་ཊྛ་སུ;
ཨེ་ཏེ་སུ པ་ན ཉཱ་ཎེ་སུ, ཡོ་གོ ཀ་ར་ཎི་ཡོ པ་ན.
༡༣༠༤. ཡ་ཐཱ་ནུ་ཀྐ་མ་ཏོ ཏ་སྶ, ཏེ་སུ ཉཱ་ཎེ་སུ ཨ་ཊྛ་སུ;
ཨ་ནི་ཙྩཱ་དི་ཝ་སེ་ནེ་ཝ, ཡོ་གཾ ཀ་ཏྭཱ ཋི་ཏ་སྶ ཧི.
༡༣༠༥. ཨ་ནི་ཙྩཾ དུ་ཀྑ་མ་ན་ཏྟཱ་ཏི, ས་ངྑཱ་རེ ཨ་ནུ་པ་སྶ་ཏོ;
ཨ་ཊྛ་ནྣཾ པ་ན ཉཱ་ཎཱ་ནཾ, ཝ་སེ་ན པ་ན ཡོ་གི་ནོ.
༡༣༠༦. ཝི་པ་སྶ་ནཱ སི་ཁཱ་པ་ཏྟཱ, ཧོ་ཏི ཝུ་ཊྛཱ་ན་གཱ་མི་ནཱི;
ས་ཙྩཱ་ནུ་ལོ་མ་ཉཱ་ཎནྟི, ཨ་ཡ་མེ་ཝ པ་ཝུ་ཙྩ་ཏི.
༡༣༠༧. ས་ངྑཱ་རུ་པེ་ཀྑཱ་ཉཱ་ཎཾ ཏཾ, ཨཱ་སེ་ཝ་ནྟ་སྶ ཡོ་གི་ནོ;
ཨི་དཱ་ནི ཏ་སྶ མ་གྒོ ཙ, ས་མུ་པྤ་ཛྫི་སྶ་ཏཱི་ཏི ཧི.
༡༣༠༨. ས་ངྑཱ་རུ་པེ་ཀྑཱ ས་ངྑཱ་རེ, ཨ་ནི་ཙྩཱ དུ་ཀྑཱ་ཏི ཝཱ ཏ་ཐཱ;
ས་མྨ་སི་ཏྭཱ བྷ་ཝ་ངྒཾ ཏུ, པུ་ན ཝོ་ཏ་ར་ཏེ་ཝ སཱ.
༡༣༠༩. བྷ་ཝ་ངྒཱ་ན་ནྟ་རཾ ས་ངྑཱ་རུ-པེ་ཀྑཱ་ག་ཏ་ན་ཡེ་ན ཏུ;
ཨ་ནི་ཙྩཱ་དི་ཝ་སེ་ནེ་ཝ, ས་ངྑཱ་རེ པ་ན གོ་ཙ་རཾ.
༡༣༡༠. ཀུ་རུ་མཱ་ནཾ མ་ནོ་དྭཱ་རེ, ཛཱ་ཡ་ཏཱ་ཝ་ཛྫ་ནཾ ཏ་ཏོ;
བྷ་ཝ་ངྒཱ་ཝ་ཊྚ་ནཾ ཀ་ཏྭཱ, ཛཱ་ཏ་སྶཱ་ན་ནྟ་རཾ པ་ན.
༡༣༡༡. ས་ངྑཱ་རེ གོ་ཙ་རཾ ཀ་ཏྭཱ, པ་ཋ་མཾ ཛ་ཝ་ན་མཱ་ན་སཾ;
ཨུ་པྤ་ཛྫ་ཏཱི་ཏི ཏཾ ཙི་ཏྟཾ, པ་རི་ཀ་མྨནྟི ཝུ་ཙྩ་ཏི.
༡༣༡༢. ཏ་ད་ན་ནྟ་ར་མེ་ཝ་ཉྙཾ, ས་ངྑཱ་རཱ་ར་མྨ་ཎཾ པུ་ན;
དུ་ཏི་ཡཾ ཛ་ཝ་ནཾ ཧོ་ཏི, ཨུ་པ་ཙཱ་རནྟི ཏཾ མ་ཏཾ.
༡༣༡༣. ཏ་ད་ན་ནྟ་རཾ ཏཾ ཧོ་ཏི, ཏ་ཐཱ ས་ངྑཱ་ར་གོ་ཙ་རཾ;
ཏ་ཏི་ཡཾ ཛ་ཝ་ན་ཙི་ཏྟཾ, ཨ་ནུ་ལོ་མནྟི ས་ཉྙི་ཏཾ.
༡༣༡༤. པུ་རི་མཱ་ནཾ པ་ན་ཊྛ་ནྣཾ, ཉཱ་ཎཱ་ནཾ ཨ་ནུ་ལོ་མ་ཏོ;
བོ་དྷི་པ་ཀྑི་ཡ་དྷ་མྨཱ་ནཾ, ཨུ་དྡྷ་ཉྩ ཨ་ནུ་ལོ་མ་ཏོ.
༡༣༡༥. ཏེ་ནེ་ཝ ཏཾ ཧི ས་ཙྩཱ་ནུ་ལོ་མ་ཉཱ་ཎཾ པ་ཝུ་ཙྩ་ཏི;
ཨི་དཾ ཧི པ་ན ས་ཙྩཱ་ནུ-ལོ་མ་ཉཱ་ཎཾ མ་ཧེ་སི་ནཱ.
༡༣༡༦. ‘‘ཝུ་ཊྛཱ་ན་གཱ་མི་ནཱི་ཡཱ ཧི, པ་རི་ཡོ་སཱ་ན’’ནྟི བྷཱ་སི་ཏཾ;
ཉེ་ཡྻཾ ས་བྦ་པ་ཀཱ་རེ་ན, པ་རི་ཡོ་སཱ་ན་ནྟི གོ་ཏྲ་བྷུ.
༡༣༡༧. ཨི་ཏི་ནེ་ཀེ་ཧི ནཱ་མེ་ཧི, ཀི་ཏྟི་ཏཱ་ཡཱ མ་ཧེ་སི་ནཱ;
ཝུ་ཊྛཱ་ན་གཱ་མི་ནཱི ས་ནྟཱ, པ་རི་སུ་དྡྷཱ ཝི་པ་སྶ་ནཱ.
༡༣༡༨. ཝུ་ཊྛཱ་ཏུ་ཀཱ་མོ སཾ་སཱ་ར་དུ་ཀྑ་པ་ངྐཱ མ་ཧ་བྦྷ་ཡཱ;
ཀ་རེ་ཡྻ ས་ཏ་ཏཾ ཏ་ཏྠ, ཡོ་གཾ པ་ཎྜི་ཏ་ཛཱ་ཏི་ཀོ.
ཨི་ཏི ཨ་བྷི་དྷ་མྨཱ་ཝ་ཏཱ་རེ པ་ཊི་པ་དཱ་ཉཱ་ཎ་ད་སྶ་ན་ཝི་སུ་དྡྷི་ནི་དྡེ་སོ ནཱ་མ
ཨེ་ཀ་ཝཱི་ས་ཏི་མོ པ་རི་ཙྪེ་དོ.