༢༠. ཝཱི་ས་ཏི་མོ པ་རི་ཙྪེ་དོ
མ་གྒཱ་མ་གྒ་ཉཱ་ཎ་ད་སྶ་ན་ཝི་སུ་དྡྷི་ནི་དྡེ་སོ
༡༢༦༣. ཀ་ལཱ་པ་ས་མྨ་ས་ནེ་ནེ་ཝ,
ཡོ་གོ ཀ་ར་ཎི་ཡོ སི་ཡཱ;
མ་གྒཱ་མ་གྒེ ཏུ ཉཱ་ཎཾ ཏ-
མ་དྷི་ག་ནྟུཾ པ་ནི་ཙྪ་ཏཱ.
༡༢༦༤. པ་ཙྩུ་པྤ་ནྣ་སྶ དྷ་མྨ་སྶ, ནི་བྦ་ཏྟི ཨུ་ད་ཡོ མ་ཏོ;
ཝ་ཡོ ཝི་པ་རི་ཎཱ་མོ་ཏི, ཏ་སྶེ་ཝ ས་མུ་དཱི་རི་ཏཱ.
༡༢༦༥. ཨ་ནུ་པ་སྶ་ནཱ་པི ཉཱ་ཎ་ནྟི, ཝ་ར་ཉཱ་ཎེ་ན དེ་སི་ཏཾ;
སོ པ་ནེ་ཝཾ པ་ཛཱ་ནཱ་ཏི, ཡོ་གཱ་ཝ་ཙ་ར་མཱ་ཎ་ཝོ.
༡༢༦༦. ཨི་མ་སྶ ནཱ་མ་རཱུ་པ་སྶ, པུ་བྦེ ཨུ་པྤ་ཏྟི་ཏོ པ་ན;
ནི་ཙ་ཡོ རཱ་སི ཝཱ ན་ཏྠི, ཏ་ཐཱ ཨུ་པྤ་ཛྫ་ཏོ་པི ཙ.
༡༢༦༧. རཱ་སི་ཏོ ནི་ཙ་ཡཱ ཝཱ་པི, ན་ཏྠི ཨཱ་ག་མ་ན་ནྟི ཙ;
ཏ་ཐཱ ནི་རུ་ཛ྄ཛྷ་མཱ་ན་སྶ, ན དི་སཱ་ག་མ་ན་ནྟི ཙ.
༡༢༦༨. ནི་རུ་དྡྷ་སྶཱ་པི ཨེ་ཀ་སྨིཾ, ཋཱ་ནེ ན་ཏྠི ཙ་ཡོ་ཏི ཙ;
ཨེ་ཏྠ ཝཱི་ཎཱུ་པ་མཱ ཝུ་ཏྟཱ, ཨེ་ཏ་སྶ་ཏྠ་སྶ དཱི་པ་ནེ.
༡༢༦༩. ཨུ་ད་བྦ་ཡ་མ་ན་ཀྐཱ་ར་མེ་ཝཾ ས་ངྑེ་པ་ཏོ པ་ན;
ཀ་ཏྭཱ ཏ་སྶེ་ཝ ཉཱ་ཎ་སྶ, ཝི་བྷ་ངྒ་སྶ ཝ་སེ་ན ཏུ.
༡༢༧༠. ‘‘ཨ་ཝི་ཛྫཱ་ས་མུ་ད་ཡཱ རཱུ་པ་ས་མུ་ད་ཡོ’’ཏི ཧི ཨཱ་དི་ནཱ;
ན་ཡེ་ནེ་ཀེ་ཀ་ཁ་ནྡྷ་སྶ, ཨུ་ད་ཡ་བྦ་ཡ་ད་སྶ་ནེ.
༡༢༧༡. ད་ས ད་སཱ་ཏི ཀ་ཏྭཱ་ན, ཝུ་ཏྟཱ པ་ཉྙཱ་ས་ལ་ཀྑ་ཎཱ;
ཏེ་སཾ པ་ན ཝ་སེ་ནཱ་པི, དྷ་མྨེ ས་མ་ནུ་པ་སྶ་ཏི.
༡༢༧༢. ཨེ་ཝཾ རཱུ་པུ་ད་ཡོ ཧོ་ཏི, ཨེ་ཝ་མ་སྶ ཝ་ཡོ ཨི་ཏི;
ཨུ་དེ་ཏི ཨེ་ཝཾ རཱུ་པ་མྤི, ཨེ་ཝཾ རཱུ་པཾ ཏུ ཝེ་ཏི ཙ.
༡༢༧༣. ཨེ་ཝཾ པ་ཙྩ་ཡ་ཏོ་པེ་ཏྠ, ཁ་ཎ་ཏོ ཨུ་ད་ཡ་བྦ་ཡཾ;
པ་སྶ་ཏོ ས་བྦ་དྷ་མྨཱ ཙ, པཱ་ཀ་ཊཱ ཧོ་ནྟི ཏ་སྶ ཏེ.
༡༢༧༤. ཨུ་ད་ཀེ ད་ཎྜ་རཱ་ཛཱི་ཝ, ཨཱ་ར་གྒེ་རི་ཝ སཱ་ས་པོ;
ཝི་ཛྫུ་པྤཱ་དཱ་ཝ དྷ་མྨཱ ཏེ, པ་རི་ཏྟ་ཊྛཱ་ཡི་ནོ སི་ཡུཾ.
༡༢༧༥. ཀ་ད་ལཱི་སུ་པི་ནཱ་ལཱ་ཏ་ཙ་ཀྐ་མཱ་ཡུ་པ་མཱ ཨི་མེ;
ཨ་སཱ་རཱ པ་ན ནི་སྶཱ་རཱ, ཧུ་ཏྭཱ ཁཱ་ཡ་ནྟི ཡོ་གི་ནོ.
༡༢༧༦. ཨེ་ཝ་མེ་ཏྟཱ་ཝ་ཏཱ ཏེ་ན, ཨུ་ད་ཡ་བྦ་ཡ་ད་སྶ་ནཾ;
ལ་ཀྑ་ཎཱ་ནི ཙ པ་ཉྙཱ་ས, པ་ཊི་ཝི་ཛ྄ཛྷ ཋི་ཏཾ པ་ན.
༡༢༧༧. ཉཱ་ཎཾ ཨ་དྷི་ག་ཏཾ ཧོ་ཏི, ཏ་རུ་ཎཾ པ་ཋ་མཾ པ་ན;
ཡ་སྶ ཙཱ་དྷི་ག་མཱ ཡོ་གཱི, ཧོ་ཏཱ་ར་དྡྷ་ཝི་པ་སྶ་ཀོ.
༡༢༧༨. ཝི་པ་སྶ་ནཱ་ཡ ཧེ་ཏཱ་ཡ,
ཀ་རུ་ཎཱ་ཡཱ་ཐ ཡོ་གི་ནོ;
ཝི་པ་སྶ་ཀ་སྶ ཛཱ་ཡ་ནྟེ,
ཨུ་པ་ཀླེ་སཱ ད་སེ་ཝི་མེ.
༡༢༧༩. ཨོ་བྷཱ་སོ པཱི་ཏི པ་སྶ་དྡྷི, ཉཱ་ཎཾ ས་དྡྷཱ ས་ཏཱི སུ་ཁཾ;
ཨུ་པེ་ཀྑཱ ཝཱི་རི་ཡཾ ནི་ཀ་ནྟཱི་ཏི, ཨུ་པ་ཀླེ་སཱ ད་སེ་ཝི་མེ.
༡༢༨༠. ས་མྤ་ཏྟ་པ་ཊི་ཝེ་དྷ་སྶ, སོ་ཏཱ་པ་ནྣཱ་དི་ནོ་པི ཙ;
ཏ་ཐཱ ཝི་པྤ་ཊི་པ་ནྣ་སྶ, ཨུ་པ་ཀླེ་སཱ ན ཛཱ་ཡ་རེ.
༡༢༨༡. ས་མྨཱ་ཝ པ་ཊི་པ་ནྣ་སྶ, ཡུ་ཏྟ་ཡོ་ག་སྶ བྷི་ཀྑུ་ནོ;
ས་དཱ ཝི་པ་སྶ་ཀ་སྶེ་ཝ, ཨུ་པྤ་ཛྫ་ནྟི ཀི་ར་སྶུ ཏེ.
༡༢༨༢. ཝི་པ་སྶ་ནཱ་ཡ ཨོ་བྷཱ་སོ, ཨོ་བྷཱ་སོཏི པ་ཝུ་ཙྩ་ཏི;
ཏ་སྨིཾ པ་ན ས་མུ་པྤ་ནྣེ, ཡོ་གཱ་ཝ་ཙ་ར་བྷི་ཀྑུ སོ.
༡༢༨༣. མ་གྒ་པྤ་ཏྟོ ཕ་ལ་པྤ་ཏྟོ, ཨ་ཧ་མ་སྨཱི་ཏི ག་ཎྷ་ཏི;
ཨ་མ་གྒཾ་ཡེ་ཝ མ་གྒོ་ཏི, ཏ་སྶེ་ཝཾ པ་ན ག་ཎྷ་ཏོ.
༡༢༨༤. ཨེ་ཝཾ ཝི་པ་སྶ་ནཱ་ཝཱི་ཐི,
ཨོ་ཀྐ་ནྟཱ ནཱ་མ ཧོ་ཏི སཱ;
ཨོ་བྷཱ་ས་མེ་ཝ སོ བྷི་ཀྑུ,
ཨ་སྶཱ་དེ་ནྟོ ནི་སཱི་ད་ཏི.
༡༢༨༥. པཱི་ཏི ཝི་པྤ་སྶ་ནཱ་པཱི་ཏི, ཏ་སྶ ཏ་སྨིཾ ཁ་ཎེ པ་ན;
ཏ་དཱ པ་ཉྩ་ཝི་དྷཱ པཱི་ཏི, ཛཱ་ཡ་ནྟེ ཁུ་དྡི་ཀཱ་དི་ཀཱ.
༡༢༨༦. ཝི་པ་སྶ་ནཱ་ཡ པ་སྶ་དྡྷི, པ་སྶ་དྡྷཱིཏི པ་ཝུ་ཙྩ་ཏི;
ཡོ་གི་ནོ ཀཱ་ཡ་ཙི་ཏྟཱ་ནི, པ་སྶ་དྡྷཱ་ནེ་ཝ ཧོ་ནྟི ཧི.
༡༢༨༧. ལ་ཧཱུ་ནི ཙ མུ་དཱུ་ནེ་ཝ, ཀ་མྨ་ཉྙཱ་ནེ་ཝ ཧོ་ནྟི ཧི;
པ་སྶ་དྡྷཱ་དཱི་ཧི སོ བྷི་ཀྑུ, ཨ་ནུ་གྒ་ཧི་ཏ་མཱ་ན་སོ.
༡༢༨༨. ཨ་མཱ་ནུ་སིཾ ར་ཏིཾ ནཱ་མ,
ཨ་ནུ་བྷོ་ཏི ཨ་ནུ་ཏྟ་རཾ;
ཡཾ ས་ནྡྷཱ་ཡ ཙ གཱ་ཐཱ་ཡོ,
བྷཱ་སི་ཏཱ ཧི མ་ཧེ་སི་ནཱ.
༡༢༨༩. ‘‘སུ་ཉྙཱ་གཱ་རཾ པ་ཝི་ཊྛ་སྶ, ས་ནྟ་ཙི་ཏྟ་སྶ བྷི་ཀྑུ་ནོ;
ཨ་མཱ་ནུ་སཱི ར་ཏི ཧོ་ཏི, ས་མྨཱ དྷ་མྨཾ ཝི་པ་སྶ་ཏོ.
༡༢༩༠. ‘‘ཡ་ཏོ ཡ་ཏོ ས་མྨ་ས་ཏི, ཁ་ནྡྷཱ་ནཾ ཨུ་ད་ཡ་བྦ་ཡཾ;
ལ་བྷ་ཏཱི པཱི་ཏི་པཱ་མོ་ཛྫཾ, ཨ་མ་ཏཾ ཏཾ ཝི་ཛཱ་ན་ཏ’’ནྟི.
༡༢༩༡. ཉཱ་ཎཱ་ད་ཡོ ཨུ་པ་ཀླེ་སཱ, ཉེ་ཡྻཱ ཝུ་ཏྟ་ན་ཡེ་ནི་དྷ;
ཨེ་ཏེ ད་ས ཨུ་པ་ཀླེ་སཱ, ཝ་ཛྫ་ནཱི་ཡཱ་ཝ ཡོ་གི་ནཱ.
༡༢༩༢. ཨེ་ཏྠོ་བྷཱ་སཱ་ད་ཡོ དྷ་མྨཱ,
ཨུ་པ་ཀླེ་ས་སྶ ཝ་ཏྠུ་ཏོ;
ཨུ་པ་ཀླེ་སཱ་ཏི ནི་དྡི་ཊྛཱ,
ཨུ་པ་ཀླེ་ས་ནི་ཀ་ནྟི ཏུ.
༡༢༩༣. ཏཾ ཏ་མཱ་ཝ་ཛྫ་མཱ་ན་སྶ, བྷཱ་ཝ་ནཱ པ་རི་ཧཱ་ཡ་ཏི;
ཨ་ས་ཏྟེ ས་ཏྟ་ས་ཉྙཱི ཙ, ཧོ་ཏི ཨ་པྤ་སྶུ་ཏོ ན་རོ.
༡༢༩༤. ས་བྦོ་བྷཱ་སཱ་ད་ཡོ དྷ་མྨེ, ན མ་གྒོ་ཏི ཝི་ཙཱ་ར་ཡཾ;
མ་གྒོ ཝི་པ་སྶ་ནཱ་ཉཱ་ཎཾ, ཨི་ཙྩེ་ཝཾ པ་ན པ་ཎྜི་ཏོ.
༡༢༩༥. ཝ་ཝ་ཏྠ་པེ་ཏི མ་གྒ་ཉྩ, ཨ་མ་གྒ་ཉྩེ་ཝ ཙེ་ཏ་སཱ;
ཏ་སྶ ཙེ་ཝཾ ཨ་ཡཾ མ་གྒོ, ནཱ་ཡཾ མ་གྒོ་ཏི ཡོ་གི་ནོ.
༡༢༩༦. མ་གྒཱ་མ་གྒ་ཉྩ ཝི་ཉྙཱ་ཡ, ཋི་ཏ་ཉཱ་ཎ་མི་དཾ པ་ན;
མ་གྒཱ་མ་གྒེ་སུ་ཉཱ་ཎནྟི, བྷཱུ་རི་ཉཱ་ཎེ་ན དེ་སི་ཏཾ.
༡༢༩༧. མ་གྒཱ་མ་གྒ་ཉཱ་ཎ་ད་སྶ་ནེ་སུ ཀོ་ཝི་དཱ,
སཱ་རཱ་སཱ་ར་ཝེ་དི་ནོ ས་མཱ་ཧི་ཏཱ་ཧི་ཏཱ;
མ་གྒཱ་མ་གྒ་ཉཱ་ཎ་ད་སྶ་ན་ནྟི ཏཾ ཨི་དཾ,
བུ་དྡྷཱ བུ་དྡྷ་སཱ་ཝ་ཀཱ ཝ་ད་ནྟི ཝཱ་དི་ནོ.
ཨི་ཏི ཨ་བྷི་དྷ་མྨཱ་ཝ་ཏཱ་རེ མ་གྒཱ་མ་གྒ་ཉཱ་ཎ་ད་སྶ་ན་ཝི་སུ་དྡྷི་ནི་དྡེ་སོ
ནཱ་མ ཝཱི་ས་ཏི་མོ པ་རི་ཙྪེ་དོ.