༡༩. ཨེ་ཀཱུ་ན་ཝཱི་ས་ཏི་མོ པ་རི་ཙྪེ་དོ
ཀ་ངྑཱ་ཝི་ཏ་ར་ཎ་ཝི་སུ་དྡྷི་ནི་དྡེ་སོ
༡༢༢༧. ཨེ་ཏ་སྶ ནཱ་མ་རཱུ་པ་སྶ, ཛཱ་ནི་ཏྭཱ ཧེ་ཏུ་པ་ཙྩ་ཡེ;
ཀ་ངྑཱ ཏཱི་སུ པ་ན་དྡྷཱ་སུ, ཝི་ཏ་རི་ཏྭཱ ཋི་ཏཾ པ་ན.
༡༢༢༨. ཀ་ངྑཱ་ཝི་ཏ་ར་ཎཾ ནཱ་མ, ཉཱ་ཎཾ ཏཾ ས་མུ་དཱི་རི་ཏཾ;
ཏཾ ས་མྤཱ་དེ་ཏུ་ཀཱ་མེ་ན, ཨ་ཏྠ་ཀཱ་མེ་ན བྷི་ཀྑུ་ནཱ.
༡༢༢༩. ནཱ་མ་རཱུ་པ་སྶ ཀོ ཧེ་ཏུ, ཀོ་ནུ ཝཱ པ་ཙྩ་ཡོ བྷ་ཝེ;
ཨཱ་ཝ་ཛྫི་ཏྭཱ ཏ་མི་ཙྩེ་ཝཾ, རཱུ་པ་ཀཱ་ཡ་སྶ ཏཱ་ཝ་དེ.
༡༢༣༠. ཀེ་སཱ ལོ་མཱ ན་ཁཱ ད་ནྟཱ, ཏ་ཙོ མཾ་སཾ ན་ཧཱ་རུ ཙ;
ཨ་ཊྛི་མི་ཉྫ་ཉྩ ཝ་ཀྐ་ཉྩ, ཧ་ད་ཡཾ ཡ་ཀ་ན་མྤི ཙ.
༡༢༣༡. ཨི་ཙྩེ་ཝ་མཱ་དི་བཱ་ཏྟིཾ་ས-ཀོ་ཊྛཱ་ས་པ་ཙྩ་ཡ་སྶ ཧི;
པ་རི་གྒ་ཎྷ་ཏི ཀཱ་ཡ་སྶ, མ་ན་སཱ ཧེ་ཏུ་པ་ཙྩ་ཡེ.
༡༢༣༢. ཨ་ཝི་ཛྫཱ ཏ་ཎྷུ་པཱ་དཱ་ནཾ, ཀ་མྨཾ ཧེ་ཏུ ཙ་ཏུ་བྦི་དྷོ;
ཨེ་ཏ་སྶ རཱུ་པ་ཀཱ་ཡ་སྶ, ཨཱ་ཧཱ་རོ པ་ཙྩ་ཡོ མ་ཏོ.
༡༢༣༣. ཛ་ན་ཀོ ཧེ་ཏུ ཨ་ཀྑཱ་ཏོ,
པ་ཙྩ་ཡོ ཨ་ནུ་པཱ་ལ་ཀོ;
ཧེ་ཏྭ་ངྐུ་ར་སྶ བཱི་ཛཾ ཏུ,
པ་ཙྩ་ཡཱ པ་ཐ་ཝཱ་ད་ཡོ.
༡༢༣༤. ཨི་ཏི་མེ པ་ཉྩ དྷ་མྨཱ ཧི, ཧེ་ཏུ་པ་ཙྩ་ཡ་ཏཾ ག་ཏཱ;
ཨ་ཝི་ཛྫཱ་ད་ཡོ ཏ་ཡོ ཏ་ཏྠ, མཱ་ཏཱ་ཝ ཨུ་པ་ནི་སྶ་ཡཱ.
༡༢༣༥. ཛ་ན་ཀཾ པ་ན ཀ་མྨཾ ཏུ, པུ་ཏྟ་སྶ ཧི པི་ཏཱ ཝི་ཡ;
དྷཱ་ཏཱི ཝི་ཡ ཀུ་མཱ་ར་སྶ, ཨཱ་ཧཱ་རོ དྷཱ་ར་ཀོ བྷ་ཝེ.
༡༢༣༦. ཨི་ཙྩེ་ཝཾ རཱུ་པ་ཀཱ་ཡ་སྶ, སོ པ་ཙྩ་ཡ་པ་རི་གྒ་ཧཾ;
ཀ་ཏྭཱ པུ་ན་པི ‘‘ཙ་ཀྑུ་ཉྩ, རཱུ་པ་མཱ་ལོ་ཀ་མེ་ཝ ཙ.
༡༢༣༧. པ་ཊི་ཙྩ ཙ་ཀྑུ་ཝི་ཉྙཱ་ཎཾ, ཧོ་ཏི’’ཨི་ཙྩེ་ཝ་མཱ་དི་ནཱ;
ན་ཡེ་ན ནཱ་མ་ཀཱ་ཡ་སྶ, པ་ཙྩ་ཡཾ པ་རི་ག་ཎྷ་ཏི.
༡༢༣༨. སོ ཨེ་ཝཾ ནཱ་མ་རཱུ་པ་སྶ, ཝུ་ཏྟིཾ དི་སྭཱ་ན པ་ཙྩ་ཡཱ;
ཡ་ཐཱ ཨེ་ཏ་ར་ཧི་དཾ ཏུ, ཨ་ཏཱི་ཏེ་པི ཏ་ཐེ་ཝི་དཾ.
༡༢༣༩. པ་ཙྩ་ཡཱ ཙ པ་ཝ་ཏྟི་ཏྠ, ཏ་ཐེ་ཝཱ་ནཱ་ག་ཏེ་པི ཙ;
པ་ཝ་ཏྟི་སྶ་ཏི ཨ་དྡྷཱ་སུ, ཏཱི་སྭེ་ཝཾ ཨ་ནུ་པ་སྶ་ཏི.
༡༢༤༠. ཏ་སྶེ་ཝཾ པ་སྶ་ཏོ ཡཱ སཱ, པུ་བྦ་ནྟེ པ་ཉྩ་དྷཱ ཏ་ཐཱ;
ཨ་པ་ར་ནྟེ སི་ཡཱ ཀ་ངྑཱ, པ་ཉྩ་དྷཱ ས་མུ་དཱི་རི་ཏཱ.
༡༢༤༡. པ་ཙྩུ་པྤ་ནྣེ་པི ཨ་དྡྷཱ་ནེ, ཚ་བྦི་དྷཱ པ་རི་ཀི་ཏྟི་ཏཱ;
ས་བྦཱ ཙཱ་ན་ཝ་སེ་སཱ་ཝ, ཡོ་གི་ནོ སཱ པ་ཧི་ཡྻ་ཏི.
༡༢༤༢. ཨེ་ཀོ ཀ་མྨ་ཝི་པཱ་ཀཱ་ནཾ, ཝ་སེ་ནཱ་པི ཙ པ་ཎྜི་ཏོ;
ཨེ་ཏ་སྶ ནཱ་མ་རཱུ་པ་སྶ, པ་ཙྩ་ཡཾ པ་རི་ག་ཎྷ་ཏི.
༡༢༤༣. ཀ་མྨཾ ཙ་ཏུ་བྦི་དྷཾ དི་ཊྛ-དྷ་མྨ་ཝེ་ད་ནི་ཡཾ ཏ་ཐཱ;
ཨུ་པ་པ་ཛྫཱ་པ་རཱ་པ་རི་ཡཱ-ཧོ་སི་ཀ་མྨ་ཝ་སཱ པ་ན.
ཏ་ཏྠ ཨེ་ཀ་ཛ་ཝ་ན་ཝཱི་ཐི་ཡཾ ས་ཏྟ་སུ ཙི་ཏྟེ་སུ ཀུ་ས་ལཱ ཝཱ ཨ་ཀུ་ས་ལཱ ཝཱ པ་ཋ་མ་ཛ་ཝ་ན་ཙེ་ཏ་ནཱ དི་ཊྛ་དྷ་མྨ་ཝེ་ད་ནཱི་ཡ་ཀ་མྨཾ ནཱ་མ. ཏཾ ཨི་མ་སྨིཾ་ཡེ་ཝ ཨ་ཏྟ་བྷཱ་ཝེ ཝི་པཱ་ཀཾ དེ་ཏི, ཏ་ཐཱ ཨ་ས་ཀྐོ་ནྟཾ པ་ན ‘‘ཨ་ཧོ་སི་ཀ་མྨཾ ནཱ་ཧོ་སི ཀ་མྨ་ཝི་པཱ་ཀོ, ན བྷ་ཝི་སྶ་ཏི ཀ་མྨ་ཝི་པཱ་ཀོ, ན་ཏྠི ཀ་མྨ་ཝི་པཱ་ཀོ’’ཏི ཨི་མ་སྶ ཏི་ཀ་སྶ ཝ་སེ་ན ཨ་ཧོ་སི་ཀ་མྨཾ ནཱ་མ ཧོ་ཏི. ཨ་ཏྠ་སཱ་དྷི་ཀཱ པ་ན ས་ཏྟ་མ་ཛ་ཝ་ན་ཙེ་ཏ་ནཱ ཨུ་པ་པ་ཛྫ་ཝེ་ད་ནཱི་ཡ་ཀ་མྨཾ ནཱ་མ. ཏ་མ་ན་ནྟ་རེ ཨ་ཏྟ་བྷཱ་ཝེ ཝི་པཱ་ཀཾ དེ་ཏི, ཏ་ཐཱ ཨ་ས་ཀྐོ་ནྟཾ ཝུ་ཏྟ་ན་ཡེ་ན ཨ་ཧོ་སི་ཀ་མྨཾ ནཱ་མ ཧོ་ཏི. ཨུ་བྷི་ནྣ་མ་ནྟ་རེ པ་ཉྩ་ཛ་ཝ་ན་ཙེ་ཏ་ནཱ ཨ་པ་རཱ་པ་རི་ཡ་ཝེ་ད་ནཱི་ཡ་ཀ་མྨཾ ནཱ་མ. ཏ་མ་ནཱ་ག་ཏེ ཡ་དཱ ཨོ་ཀཱ་སཾ ལ་བྷ་ཏི, ཏ་དཱ ཝི་པཱ་ཀཾ དེ་ཏི, ས་ཏི སཾ་སཱ་ར་པྤ་ཝ་ཏྟི་ཡཱ ཨ་ཧོ་སི་ཀ་མྨཾ ནཱ་མ ན ཧོ་ཏི.
༡༢༤༤. ཨ་པ་རཾ ཙ་ཏུ་བྦི་དྷཾ ཀ་མྨཾ, ག་རུ་ཀཾ བ་ཧུ་ལ་མྤི ཙ;
ཨཱ་ས་ནྣ་ཉྩ ཀ་ཊ་ཏྟཱ ཙ, ཀ་མྨ་ནྟི ས་མུ་དཱི་རི་ཏཾ.
༡༢༤༥. ཨ་ཉྙཾ ཙ་ཏུ་བྦི་དྷཾ ཀ་མྨཾ, ཛ་ན་ཀཾ ཨུ་པ་ཐ་མྦྷ་ཀཾ;
ཏ་ཐཱུ་པ་པཱི་ལ༹་ཀཾ ཀ་མྨ-མུ་པ་གྷཱ་ཏ་ཀ་མེ་ཝ ཙ.
ཏ་ཏྠ ཛ་ན་ཀཾ ནཱ་མ ཀུ་ས་ལཾ ཝཱ ཨ་ཀུ་ས་ལཾ ཝཱ ཀ་མྨཾ པ་ཊི་ས་ནྡྷི་ཡ་མྤི པ་ཝ་ཏྟེ་པི རཱུ་པཱ་རཱུ་པ་ཝི་པཱ་ཀ་ཀྑ་ནྡྷེ ཛ་ནེ་ཏི. ཨུ་པ་ཏྠ་མྦྷ་ཀཾ པ་ན ཝི་པཱ་ཀཾ ཛ་ནེ་ཏུཾ ན ས་ཀྐོ་ཏི, ཨ་ཉྙེ་ན ཀ་མྨེ་ན དི་ནྣཱ་ཡ པ་ཊི་ས་ནྡྷི་ཡཱ ཛ་ནི་ཏེ ཝི་པཱ་ཀེ ཨུ་པྤ་ཛྫ་ན་ཀ་སུ་ཁ་དུ་ཀྑཾ ཨུ་པ་ཏྠ་མྦྷེ་ཏི, ཨ་དྡྷཱ་ནཾ པ་ཝ་ཏྟེ་ཏི. ཨུ་པ་པཱི་ལ༹་ཀཾ པ་ན ཨ་ཉྙེ་ན ཀ་མྨེ་ན དི་ནྣཱ་ཡ པ་ཊི་ས་ནྡྷི་ཡཱ ཛ་ནི་ཏེ ཝི་པཱ་ཀེ ཨུ་པྤ་ཛྫ་ན་ཀ་སུ་ཁ་དུ་ཀྑཾ པཱི་ལེ༹་ཏི བཱ་དྷ་ཏི, ཨ་དྡྷཱ་ནཾ པ་ཝ་ཏྟི་ཏུཾ ན དེ་ཏི. ཨུ་པ་གྷཱ་ཏ་ཀཾ པ་ན ས་ཡཾ ཀུ་ས་ལ་མྤི ཨ་ཀུ་ས་ལ་མྤི ས་མཱ་ནཾ ཨ་ཉྙཾ དུ་བྦ་ལ་ཀ་མྨཾ གྷཱ་ཏེ་ཏྭཱ ཏ་སྶ ཝི་པཱ་ཀཾ པ་ཊི་བཱ་ཧི་ཏྭཱ ཨ་ཏྟ་ནོ ཝི་པཱ་ཀ་སྶ ཨོ་ཀཱ་སཾ ཀ་རོ་ཏི. ཨེ་ཝཾ པ་ན ཀ་མྨེ་ན ཨོ་ཀཱ་སེ ཀ་ཏེ ཏཾ་ཝི་པཱ་ཀ་མུ་པྤ་ནྣཾ ནཱ་མ ཧོ་ཏི. ཨི་ཏི ཨི་མཾ དྭཱ་ད་ས་ཝི་དྷཾ ཀ་མྨཾ ཀ་མྨ་ཝ་ཊྚེ པ་ཀྑི་པི་ཏྭཱ ཨེ་ཝ་མེ་ཀོ ཀ་མྨ་ཝི་པཱ་ཀ་ཝ་སེ་ན ནཱ་མ་རཱུ་པ་སྶ པ་ཙྩ་ཡ་པ་རི་གྒ་ཧཾ ཀ་རོ་ཏི.
ཨི་ཏི ཨེ་ཝཾ ཀ་མྨ་ཝི་པཱ་ཀ་ཝ་ཊྚ་ཝ་སེ་ན ནཱ་མ་རཱུ་པ་སྶ པ་ཝ་ཏྟིཾ དི་སྭཱ ‘‘ཡ་ཐཱ ཨི་དཾ ཨེ་ཏ་ར་ཧི, ཨེ་ཝ་མ་ཏཱི་ཏེ་པི ཨ་དྡྷཱ་ནེ ཀ་མྨ་ཝི་པཱ་ཀ་ཝ་སེ་ན པ་ཙྩ་ཡ་ཏོ པ་ཝ་ཏྟི་ཏྠ, ཨ་ནཱ་ག་ཏེ་པི པ་ཝ་ཏྟི་སྶ་ཏཱི’’ཏི ཨི་ཏི ཀ་མྨ་ཉྩེ་ཝ ཝི་པཱ་ཀོ ཙཱ་ཏི ཀ་མྨ་ཝི་པཱ་ཀ་ཝ་སེ་ན ལོ་ཀོ པ་ཝ་ཏྟ་ཏཱི་ཏི ཏཾ ས་མ་ནུ་པ་སྶ་ཏི. ཏ་སྶེ་ཝཾ ས་མ་ནུ་པ་སྶ་ཏོ ས་བྦཱ སོ་ལ༹་ས་ཝི་དྷཱ ཀ་ངྑཱ པ་ཧི་ཡྻ་ཏི.
༡༢༤༦. ཧེ་ཏུ་ཕ་ལ་སྶ ས་མྦ་ནྡྷ་ཝ་སེ་ནེ་ཝ པ་ཝ་ཏྟ་ཏི;
ཀེ་ཝ་ལཾ ནཱ་མ་རཱུ་པ་ནྟི, ས་མྨཱ ས་མ་ནུ་པ་སྶ་ཏི.
༡༢༤༧. ཨེ་ཝཾ ཀཱ་ར་ཎ་ཏོ ཨུ་དྡྷཾ, ཀཱ་ར་ཎཾ ན ཙ པ་སྶ་ཏི;
པཱ་ཀ་པ་ཝ་ཏྟི་ཏོ ཨུ་དྡྷཾ, ན པཱ་ཀ་པ་ཊི་ཝེ་ད་ཀཾ.
ཏེ་ནཱ་ཧུ པོ་རཱ་ཎཱ –
༡༢༤༨. ‘‘ཀ་མྨ་སྶ ཀཱ་ར་ཀོ ན་ཏྠི, ཝི་པཱ་ཀ་སྶ ཙ ཝེ་ད་ཀོ;
སུ་དྡྷ་དྷ་མྨཱ པ་ཝ་ཏྟ་ནྟི, ཨེ་ཝེ་ཏཾ ས་མྨ་ད་སྶ་ནཾ.
༡༢༤༩. ཨེ་ཝཾ ཀ་མྨེ ཝི་པཱ་ཀེ ཙ, ཝ་ཏྟ་མཱ་ནེ ས་ཧེ་ཏུ་ཀེ;
བཱི་ཛ་རུ་ཀྑཱ་དི་ཀཱ་ནཾ་ཝ, པུ་བྦཱ ཀོ་ཊི ན ནཱ་ཡ་ཏི.
༡༢༥༠. ཨ་ནཱ་ག་ཏེ་པི སཾ་སཱ་རེ, ཨ་པྤ་ཝ་ཏྟི ན དི་སྶ་ཏི;
ཨེ་ཏ་མ་ཏྠ་མ་ན་ཉྙཱ་ཡ, ཏི་ཏྠི་ཡཱ ཨ་ས་ཡཾ་ཝ་སཱི.
༡༢༥༡. ས་ཏྟ་ས་ཉྙཾ ག་ཧེ་ཏྭཱ་ན, ས་སྶ་ཏུ་ཙྪེ་ད་ད་སྶི་ནོ;
དྭཱ་ས་ཊྛི་དི་ཊྛིཾ ག་ཎྷ་ནྟི, ཨ་ཉྙ་མ་ཉྙ་ཝི་རོ་དྷི་ནོ.
༡༢༥༢. དི་ཊྛི་བ་ནྡྷ་ན་བ་དྡྷཱ ཏེ, ཏ་ཎྷཱ་སོ་ཏེ་ན ཝུ་ཡ྄ཧ་རེ;
ཏ་ཎྷཱ་སོ་ཏེ་ན ཝུ་ཡ྄ཧ་ནྟཱ, ན ཏེ དུ་ཀྑཱ པ་མུ་ཙྩ་རེ.
༡༢༥༣. ཨེ་ཝ་མེ་ཏཾ ཨ་བྷི་ཉྙཱ་ཡ, བྷི་ཀྑུ བུ་དྡྷ་སྶ སཱ་ཝ་ཀོ;
ག་མྦྷཱི་རཾ ནི་པུ་ཎཾ སུ་ཉྙཾ, པ་ཙྩ་ཡཾ པ་ཊི་ཝི་ཛ྄ཛྷ་ཏི.
༡༢༥༤. ཀ་མྨཾ ན་ཏྠི ཝི་པཱ་ཀ་མྷི, པཱ་ཀོ ཀ་མྨེ ན ཝི་ཛྫ་ཏི;
ཨ་ཉྙ་མ་ཉྙཾ ཨུ་བྷོ སུ་ཉྙཱ, ན ཙ ཀ་མྨཾ ཝི་ནཱ ཕ་ལཾ.
༡༢༥༥. ཡ་ཐཱ ན སཱུ་རི་ཡེ ཨ་གྒི, ན མ་ཎི་མྷི ན གོ་མ་ཡེ;
ན ཏེ་སཾ བ་ཧི སོ ཨ་ཏྠི, ས་མྦྷཱ་རེ་ཧི ཙ ཛཱ་ཡ་ཏི.
༡༢༥༦. ཏ་ཐཱ ན ཨ་ནྟོ ཀ་མྨ་སྶ, ཝི་པཱ་ཀོ ཨུ་པ་ལ་བྦྷ་ཏི;
བ་ཧི་དྡྷཱ་པི ན ཀ་མྨ་སྶ, ན ཀ་མྨཾ ཏ་ཏྠ ཝི་ཛྫ་ཏི.
༡༢༥༧. ཕ་ལེ་ན སུ་ཉྙཾ ཏཾ ཀ་མྨཾ, ཕ་ལཾ ཀ་མྨེ ན ཝི་ཛྫ་ཏི;
ཀ་མྨ་ཉྩ ཁོ ཨུ་པཱ་དཱ་ཡ, ཏ་ཏོ ནི་བྦ་ཏྟ་ཏེ ཕ་ལཾ.
༡༢༥༨. ན ཧེ་ཏྠ དེ་ཝོ བྲ་ཧྨཱ ཝཱ,
སཾ་སཱ་ར་སྶ་ཏྠི ཀཱ་ར་ཀོ;
སུ་དྡྷ་དྷ་མྨཱ པ་ཝ་ཏྟ་ནྟི,
ཧེ་ཏུ་ས་མྦྷཱ་ར་པ་ཙྩ་ཡཱ’’ཏི.
༡༢༥༩. ཨེ་ཝཾ ནཱ་ན་པྤ་ཀཱ་རེ་ཧི, ནཱ་མ་རཱུ་པ་སྶ པ་ཙྩ་ཡཾ;
པ་རི་གྒ་ཧེ་ཏྭཱ ཨ་དྡྷཱ་སུ, ཏ་རི་ཏྭཱ ཀ་ངྑ་མུ་ཊྛི་ཏཾ.
༡༢༦༠. ཀ་ངྑཱ་ཝི་ཏ་ར་ཎཾ ནཱ་མ, ཉཱ་ཎཾ ཏཾ ས་མུ་དཱི་རི་ཏཾ;
དྷ་མྨ་ཊྛི་ཏི ཡ་ཐཱ་བྷཱུ་ཏཾ, ཏཾ ས་མྨཱ་ད་སྶ་ན་ནྟི་པི.
༡༢༦༡. ཨི་མི་ནཱ པ་ན ཉཱ་ཎེ་ན,
སཾ་ཡུ་ཏྟོ བུ་དྡྷ་སཱ་ས་ནེ;
ཧོ་ཏི ལ་དྡྷ་པ་ཏི་ཊྛོ་ཝ,
སོ་ཏཱ་པ་ནྣོ ཧི ཙཱུ་ལ༹་ཀོ.
༡༢༦༢. ཏ་སྨཱ ས་པ་ཉྙོ པ་ན ཨ་ཏྠ་ཀཱ་མོ,
ཡོ ནཱ་མ་རཱུ་པ་སྶ ཧེ་ཏུ་པ་ཙྩ་ཡཱ་ནི;
པ་རི་གྒ་ཧཾ སཱ་དྷུ ཀ་རོ་ཏི དྷཱི་རོ,
ཁི་པྤཾ ས ནི་བྦཱ་ན་པུ་རཾ ཨུ་པེ་ཏི.
ཨི་ཏི ཨ་བྷི་དྷ་མྨཱ་ཝ་ཏཱ་རེ ཀ་ངྑཱ་ཝི་ཏ་ར་ཎ་ཝི་སུ་དྡྷི་ནི་དྡེ་སོ ནཱ་མ
ཨེ་ཀཱུ་ན་ཝཱི་ས་ཏི་མོ པ་རི་ཙྪེ་དོ.