༡. པ་ཋ་མོ པ་རི་ཙྪེ་དོ
ཙི་ཏྟ་ནི་དྡེ་སོ
༨. ཙི་ཏྟཾ ཙེ་ཏ་སི་ཀཾ རཱུ་པཾ, ནི་བྦཱ་ན་ནྟི ནི་རུ་ཏྟ་རོ;
ཙ་ཏུ་དྷཱ དེ་ས་ཡཱི དྷ་མྨེ, ཙ་ཏུ་ས་ཙྩ་པྤ་ཀཱ་ས་ནོ.
ཏ་ཏྠ ཙི་ཏྟནྟི ཝི་ས་ཡ་ཝི་ཛཱ་ན་ནཾ ཙི་ཏྟཾ, ཏ་སྶ པ་ན ཀོ ཝ་ཙ་ན་ཏྠོ? ཝུ་ཙྩ་ཏེ – ས་བྦ་ས་ངྒཱ་ཧ་ཀ་ཝ་སེ་ན པ་ན ཙི་ནྟེ་ཏཱི་ཏི ཙི་ཏྟཾ, ཨ་ཏྟ་ས་ནྟཱ་ནཾ ཝཱ ཙི་ནོ་ཏཱི་ཏི་པི ཙི་ཏྟཾ.
༩. ཝི་ཙི་ཏྟ་ཀ་ར་ཎཱ ཙི་ཏྟཾ, ཨ་ཏྟ་ནོ ཙི་ཏྟ་ཏཱ་ཡ ཝཱ;
པ་ཉྙ་ཏྟི་ཡ་མྤི ཝི་ཉྙཱ་ཎེ, ཝི་ཙི་ཏྟེ ཙི་ཏྟ་ཀ་མྨ་ཀེ;
ཙི་ཏྟ་ས་མྨུ་ཏི ད་ཊྛ་བྦཱ, ཝི་ཉྙཱ་ཎེ ཨི་དྷ ཝི་ཉྙུ་ནཱ.
ཏཾ པ་ན སཱ་ར་མྨ་ཎ་ཏོ ཨེ་ཀ་ཝི་དྷཾ, ས་ཝི་པཱ་ཀཱ་ཝི་པཱ་ཀ་ཏོ དུ་ཝི་དྷཾ. ཏ་ཏྠ ས་ཝི་པཱ་ཀཾ ནཱ་མ ཀུ་ས་ལཱ་ཀུ་ས་ལཾ, ཨ་ཝི་པཱ་ཀཾ ཨ་བྱཱ་ཀ་ཏཾ. ཀུ་ས་ལཱ་ཀུ་ས་ལཱ་བྱཱ་ཀ་ཏ་ཛཱ་ཏི་བྷེ་ད་ཏོ ཏི་ཝི་དྷཾ.
ཏ་ཏྠ ཀུ་ས་ལནྟི པ་ནེ་ཏ་སྶ ཀོ ཝ་ཙ་ན་ཏྠོ?
༡༠. ཀུ་ཙྪི་ཏཱ་ནཾ ས་ལ་ན་ཏོ, ཀུ་སཱ་ནཾ ལ་ཝ་ནེ་ན ཝཱ;
ཀུ་སེ་ན ལཱ་ཏ་བྦ་ཏྟཱ ཝཱ, ཀུ་ས་ལ་ནྟི པ་ཝུ་ཙྩ་ཏི.
༡༡. ཚེ་ཀེ ཀུ་ས་ལ་ས་དྡོ་ཡཾ, ཨཱ་རོ་གྱེ ཨ་ན་ཝ་ཛྫ་ཀེ;
དི་ཊྛོ ཨི་ཊྛ་ཝི་པཱ་ཀེ་པི, ཨ་ན་ཝ་ཛྫཱ་དི་ཀེ ཨི་དྷ.
ཏ་སྨཱ ཨ་ན་ཝ་ཛྫ་ཨི་ཊྛ་ཝི་པཱ་ཀ་ལ་ཀྑ་ཎཾ ཀུ་ས་ལཾ, ཨ་ཀུ་ས་ལ་ཝི་དྡྷཾ་ས་ན་ར་སཾ, ཝོ་དཱ་ན་པ་ཙྩུ་པ་ཊྛཱ་ནཾ. ཝ་ཛྫ་པ་ཊི་པ་ཀྑ་ཏྟཱ ཨ་ན་ཝ་ཛྫ་ལ་ཀྑ་ཎཾ ཝཱ ཀུ་ས་ལཾ, ཝོ་དཱ་ན་བྷཱ་ཝ་ར་སཾ, ཨི་ཊྛ་ཝི་པཱ་ཀ་པ་ཙྩུ་པ་ཊྛཱ་ནཾ, ཡོ་ནི་སོ་མ་ན་སི་ཀཱ་ར་པ་ད་ཊྛཱ་ནཾ. སཱ་ཝ་ཛྫཱ་ནི་ཊྛ་ཝི་པཱ་ཀ་ལ་ཀྑ་ཎ་མ་ཀུ་ས་ལཾ. ཏ་དུ་བྷ་ཡ་ཝི་པ་རཱི་ཏ་ལ་ཀྑ་ཎ་མ་བྱཱ་ཀ་ཏཾ, ཨ་ཝི་པཱ་ཀཱ་ར་ཧཾ ཝཱ.
ཏ་ཏྠ ཀུ་ས་ལ་ཙི་ཏྟཾ ཨེ་ཀ་ཝཱི་ས་ཏི་ཝི་དྷཾ ཧོ་ཏི, ཏ་དི་དཾ བྷཱུ་མི་ཏོ ཙ་ཏུ་བྦི་དྷཾ ཧོ་ཏི – ཀཱ་མཱ་ཝ་ཙ་རཾ, རཱུ་པཱ་ཝ་ཙ་རཾ, ཨ་རཱུ་པཱ་ཝ་ཙ་རཾ, ལོ་ཀུ་ཏྟ་ར་ཉྩེ་ཏི.
ཏ་ཏྠ ཀཱ་མཱ་ཝ་ཙ་ར་ཀུ་ས་ལ་ཙི་ཏྟཾ བྷཱུ་མི་ཏོ ཨེ་ཀ་ཝི་དྷཾ, ས་ཝ་ཏྠུ་ཀཱ་ཝ་ཏྠུ་ཀ་བྷེ་ད་ཏོ དུ་ཝི་དྷཾ, ཧཱི་ན་མ་ཛ྄ཛྷི་མ་པ་ཎཱི་ཏ་བྷེ་ད་ཏོ ཏི་ཝི་དྷཾ, སོ་མ་ན་སྶུ་པེ་ཀྑཱ་ཉཱ་ཎ་པྤ་ཡོ་ག་བྷེ་ད་ཏོ ཨ་ཊྛ་ཝི་དྷཾ ཧོ་ཏི. སེ་ཡྻ་ཐི་དཾ – སོ་མ་ན་སྶ་ས་ཧ་ག་ཏཾ ཉཱ་ཎ་ས་མྤ་ཡུ་ཏྟཾ ཨ་ས་ངྑཱ་རི་ཀ་མེ་ཀཾ, ས་ས་ངྑཱ་རི་ཀ་མེ་ཀཾ, སོ་མ་ན་སྶ་ས་ཧ་ག་ཏཾ ཉཱ་ཎ་ཝི་པྤ་ཡུ་ཏྟཾ ཨ་ས་ངྑཱ་རི་ཀ་མེ་ཀཾ, ས་ས་ངྑཱ་རི་ཀ་མེ་ཀཾ, ཨུ་པེ་ཀྑཱ་ས་ཧ་ག་ཏཾ ཉཱ་ཎ་ས་མྤ་ཡུ་ཏྟཾ ཨ་ས་ངྑཱ་རི་ཀ་མེ་ཀཾ, ས་ས་ངྑཱ་རི་ཀ་མེ་ཀཾ, ཨུ་པེ་ཀྑཱ་ས་ཧ་ག་ཏཾ ཉཱ་ཎ་ཝི་པྤ་ཡུ་ཏྟཾ ཨ་ས་ངྑཱ་རི་ཀ་མེ་ཀཾ, ས་ས་ངྑཱ་རི་ཀ་མེ་ཀ་ནྟི ཨི་དཾ ཨ་ཊྛ་ཝི་དྷ་མྤི ཀཱ་མཱ་ཝ་ཙ་ར་ཀུ་ས་ལ་ཙི་ཏྟཾ ནཱ་མ.
༡༢. ཨུ་དྡཱ་ན་ཏོ དུ་ཝེ ཀཱ་མཱ, ཀླེ་ས་ཝ་ཏྠུ་ཝ་སཱ པ་ན;
ཀི་ལེ་སོ ཚ་ནྡ་རཱ་གོ་ཝ, ཝ་ཏྠུ ཏེ་བྷཱུ་མ་ཝ་ཊྚ་ཀཾ.
༡༣. ཀི་ལེ་ས་ཀཱ་མོ ཀཱ་མེ་ཏི, ཝ་ཏྠུ ཀཱ་མཱི་ཡ་ཏཱི་ཏི ཙ;
སི་ཛ྄ཛྷ་ཏི དུ་ཝི་དྷོ་པེ་ས, ཀཱ་མོ ཝོ ཀཱ་ར་ཀ་དྭ་ཡེ.
༡༤. ཡ་སྨིཾ པ་ན པ་དེ་སེ སོ, ཀཱ་མོ་ཡཾ དུ་ཝི་དྷོ་པི ཙ;
ས་མྤ་ཏྟཱི་ནཾ ཝ་སེ་ནཱ་ཝ-ཙ་ར་ཏཱི་ཏི ཙ སོ པ་ན.
༡༥. པ་དེ་སོ ཙ་ཏུ་པཱ་ཡཱ་ནཾ, ཚ་ནྣཾ དེ་ཝཱ་ན་མེ་ཝ ཙ;
མ་ནུ་སྶཱ་ནཾ ཝ་སེ་ནེ་ཝ, ཨེ་ཀཱ་ད་ས་ཝི་དྷོ པ་ན.
༡༦. ཀཱ་མོ་ཝ་ཙ་ར་ཏཱི་ཏེ་ཏྠ, ཀཱ་མཱ་ཝ་ཙ་ར་ས་ཉྙི་ཏོ;
ཨ་སྶཱ་བྷི་ལ་ཀྑི་ཏ་ཏྟཱ ཧི, ས་ས་ཏྠཱ་ཝ་ཙ་རོ ཝི་ཡ.
༡༧. སྭཱ་ཡཾ རཱུ་པ་བྷ་ཝོ རཱུ་པཾ, ཨེ་ཝཾ ཀཱ་མོ་ཏི ས་ཉྙི་ཏོ;
ཨུ་ཏྟ་ར་སྶ པ་ད་སྶེ་ཝ, ལོ་པཾ ཀ་ཏྭཱ ཨུ་དཱི་རི་ཏོ.
༡༨. ཏ་སྨིཾ ཀཱ་མེ ཨི་དཾ ཙི་ཏྟཾ, ས་དཱ་ཝ་ཙ་ར་ཏཱི་ཏི ཙ;
ཀཱ་མཱ་ཝ་ཙ་ར་མི་ཙྩེ་ཝཾ, ཀ་ཐི་ཏཾ ཀཱ་མ་གྷཱ་ཏི་ནཱ.
༡༩. པ་ཊི་ས་ནྡྷིཾ བྷ་ཝེ ཀཱ་མེ, ཨ་ཝ་ཙཱ་ར་ཡ་ཏཱི་ཏི ཝཱ;
ཀཱ་མཱ་ཝ་ཙ་ར་མི་ཙྩེ་ཝཾ, པ་རི་ཡཱ་པ་ནྣ་ནྟི ཏ་ཏྲ ཝཱ.
༢༠. ཨི་དཾ ཨ་ཊྛ་ཝི་དྷཾ ཙི་ཏྟཾ, ཀཱ་མཱ་ཝ་ཙ་ར་ས་ཉྙི་ཏཾ;
ད་ས་པུ་ཉྙ་ཀྲི་ཡ་ཝ་ཏྠུ-ཝ་སེ་ནེ་ཝ པ་ཝ་ཏྟ་ཏི.
༢༡. དཱ་ནཾ སཱི་ལཾ བྷཱ་ཝ་ནཱ པ་ཏྟི་དཱ་ནཾ,
ཝེ་ཡྻཱ་ཝ་ཙྩཾ དེ་ས་ནཱ ཙཱ་ནུ་མོ་དོ;
དི་ཊྛི་ཛྫུ་ཏྟཾ སཾ་སུ་ཏི་ཙྩཱ་པ་ཙཱ་ཡོ,
ཉེ་ཡྻོ ཨེ་ཝཾ པུ་ཉྙ་ཝ་ཏྠུ་པྤ་བྷེ་དོ.
༢༢. ག་ཙྪ་ནྟི ས་ངྒ་ཧཾ དཱ་ནེ, པ་ཏྟི་དཱ་ནཱ་ནུ་མོ་ད་ནཱ;
ཏ་ཐཱ སཱི་ལ་མ་ཡེ པུ་ཉྙེ, ཝེ་ཡྻཱ་ཝ་ཙྩཱ་པ་ཙཱ་ཡ་ནཱ.
༢༣. དེ་ས་ནཱ ས་ཝ་ནཾ དི་ཊྛི-ཨུ་ཛུ་ཀཱ བྷཱ་ཝ་ནཱ་མ་ཡེ;
པུ་ན ཏཱི་ཎེ་ཝ ས་མྦྷོ་ནྟི, ད་ས པུ་ཉྙ་ཀྲི་ཡཱ་པི ཙ.
༢༤. ས་བྦཱ་ནུ་སྶ་ཏི་པུ་ཉྙ་ཉྩ, པ་སཾ་སཱ ས་ར་ཎ་ཏྟ་ཡཾ;
ཡ་ནྟི དི་ཊྛི་ཛུ་ཀ་མྨ་སྨིཾ, ས་ངྒ་ཧཾ ན་ཏྠི སཾ་ས་ཡོ.
༢༥. པུ་རི་མཱ མུ་ཉྩ་ནཱ ཙེ་ཝ, པ་རཱ ཏི་སྶོ་པི ཙེ་ཏ་ནཱ;
ཧོ་ཏི དཱ་ན་མ་ཡཾ པུ་ཉྙཾ, ཨེ་ཝཾ སེ་སེ་སུ དཱི་པ་ཡེ.
ཨི་དཱ་ནི ཨ་སྶ པ་ན་ཊྛ་ཝི་དྷ་སྶཱ་པི ཀཱ་མཱ་ཝ་ཙ་ར་ཀུ་ས་ལ་ཙི་ཏྟ་སྶ ཨ་ཡ་མུ་པྤ་ཏྟི་ཀྐ་མོ ཝེ་དི་ཏ་བྦོ. ཡ་དཱ ཧི ཡོ དེ་ཡྻ་དྷ་མྨ་པྤ་ཊི་གྒཱ་ཧ་ཀཱ་དི་ས་མྤ་ཏྟིཾ, ཨ་ཉྙཾ ཝཱ སོ་མ་ན་སྶ་ཧེ་ཏུཾ ཨཱ་ག་མྨ ཧ་ཊྛ་པ་ཧ་ཊྛོ ‘‘ཨ་ཏྠི དི་ནྣ’’ནྟི ཨཱ་དི་ན་ཡ་པྤ་ཝ་ཏྟཾ ས་མྨཱ་དི་ཊྛིཾ པུ་ར་ཀྑ་ཏྭཱ པ་རེ་ཧི ཨ་ནུ་སྶཱ་ཧི་ཏོ དཱ་ནཱ་དཱི་ནི པུ་ཉྙཱ་ནི ཀ་རོ་ཏི, ཏ་དཱ་སྶ སོ་མ་ན་སྶ་ས་ཧ་ག་ཏཾ ཉཱ་ཎ་ས་མྤ་ཡུ་ཏྟཾ ཨ་ས་ངྑཱ་རི་ཀཾ པ་ཋ་མཾ མ་ཧཱ་ཀུ་ས་ལ་ཙི་ཏྟཾ ཨུ་པྤ་ཛྫ་ཏི. ཡ་དཱ པ་ན ཝུ་ཏྟ་ན་ཡེ་ནེ་ཝ ཧ་ཊྛ་པ་ཧ་ཊྛོ ས་མྨཱ་དི་ཊྛིཾ པུ་ར་ཀྑ་ཏྭཱ པ་རེ་ཧི ཨུ་སྶཱ་ཧི་ཏོ ཀ་རོ་ཏི, ཏ་དཱ་སྶ ཏ་མེ་ཝ ཙི་ཏྟཾ ས་ས་ངྑཱ་རི་ཀཾ ཧོ་ཏི. ཨི་མ་སྨིཾ པ་ན་ཏྠེ ས་ངྑཱ་རོཏི ཨ་ཏྟ་ནོ ཝཱ པ་ར་སྶ ཝཱ པ་ཝ་ཏྟ་སྶ པུ་བྦ་པྤ་ཡོ་ག་སྶཱ་དྷི་ཝ་ཙ་ནཾ. ཡ་དཱ པ་ན ཉཱ་ཏི་ཛ་ན་སྶ པ་ཊི་པ་ཏྟི་ད་སྶ་ནེ་ན ཛཱ་ཏ་པ་རི་ཙ་ཡཱ བཱ་ལ་ཀཱ བྷི་ཀྑཱུ དི་སྭཱ སོ་མ་ན་སྶ་ཛཱ་ཏཱ ས་ཧ་སཱ ཡཾ ཀི་ཉྩི ཧ་ཏྠ་ག་ཏཾ ད་ད་ནྟི ཝཱ ཝ་ནྡ་ནྟི ཝཱ, ཏ་དཱ ཏེ་སཾ ཏ་ཏི་ཡ་ཙི་ཏྟ་མུ་པྤ་ཛྫ་ཏི. ཡ་དཱ པ་ན ཏེ ‘‘དེ་ཐ ཝ་ནྡ་ཐ, ཨ་ཡྻེ’’ཏི ཝ་ད་ནྟི, ཨེ་ཝཾ ཉཱ་ཏི་ཛ་ནེ་ན ཨུ་སྶཱ་ཧི་ཏཱ ཧུ་ཏྭཱ ཧ་ཏྠ་ག་ཏཾ ད་ད་ནྟི ཝཱ ཝ་ནྡ་ནྟི ཝཱ, ཏ་དཱ ཏེ་སཾ ཙ་ཏུ་ཏྠ་ཙི་ཏྟ་མུ་པྤ་ཛྫ་ཏི. ཡ་དཱ པ་ན དེ་ཡྻ་དྷ་མྨ་པྤ་ཊི་གྒཱ་ཧ་ཀཱ་དཱི་ནཾ ཨ་ས་མྤ་ཏྟིཾ ཝཱ ཨ་ཉྙེ་སཾ ཝཱ སོ་མ་ན་སྶ་ཧེ་ཏཱུ་ནཾ ཨ་བྷཱ་ཝཾ ཨཱ་ག་མྨ ཙ་ཏཱུ་སུ་པི ཝི་ཀ་པྤེ་སུ སོ་མ་ན་སྶ་ར་ཧི་ཏཱ ཧོ་ནྟི, ཏ་དཱ སེ་སཱ་ནི ཙ་ཏྟཱ་རི ཨུ་པེ་ཀྑཱ་ས་ཧ་ག་ཏཱ་ནི ཨུ་པྤ་ཛྫ་ནྟི. ཨེ་ཝཾ སོ་མ་ན་སྶུ་པེ་ཀྑཱ་ཉཱ་ཎ་པྤ་ཡོ་ག་བྷེ་ད་ཏོ ཨ་ཊྛ་ཝི་དྷཾ ཀཱ་མཱ་ཝ་ཙ་ར་ཀུ་ས་ལ་ཙི་ཏྟཾ ཝེ་དི་ཏ་བྦཾ.
༢༦. ད་ས་པུ་ཉྙ་ཀྲི་ཡཱ་དཱི་ནཾ, ཝ་སེ་ན ཙ བ་ཧཱུ་ནི་པི;
ཨེ་ཏཱ་ནི པ་ན ཙི་ཏྟཱ་ནི, བྷ་ཝ་ནྟཱི་ཏི པ་ཀཱ་ས་ཡེ.
༢༧. ས་ཏྟ་ར་ས ས་ཧ་སྶཱ་ནི, དྭེ ས་ཏཱ་ནི ཨ་སཱི་ཏི ཙ;
ཀཱ་མཱ་ཝ་ཙ་ར་པུ་ཉྙཱ་ནི, བྷ་ཝ་ནྟཱི་ཏི ཝི་ནི་དྡི་སེ.
ཏཾ པ་ན ཡ་ཐཱ་ནུ་རཱུ་པཾ ཀཱ་མཱ་ཝ་ཙ་ར་སུ་ག་ཏི་ཡཾ བྷ་ཝ་བྷོ་ག་ས་མྤ་ཏྟིཾ ཨ་བྷི་ནི་པྥཱ་དེ་ཏི.
ཨི་ཏ་རེ་སུ པ་ན རཱུ་པཱ་ཝ་ཙ་ར་ཀུ་ས་ལ་ཙི་ཏྟཾ ས་ཝ་ཏྠུ་ཀ་ཏོ ཨེ་ཀ་ཝི་དྷཾ, དྭཱི་སུ བྷ་ཝེ་སུ ཨུ་པྤ་ཛྫ་ན་ཏོ དུ་ཝི་དྷཾ, ཧཱི་ན་མ་ཛ྄ཛྷི་མ་པ་ཎཱི་ཏ་བྷེ་ད་ཏོ ཏི་ཝི་དྷཾ, པ་ཊི་པ་དཱ་དི་བྷེ་ད་ཏོ ཙ་ཏུ་བྦི་དྷཾ, ཛྷཱ་ན་ངྒ་ཡོ་ག་བྷེ་ད་ཏོ པ་ཉྩ་ཝི་དྷཾ. སེ་ཡྻ་ཐི་དཾ – ཀཱ་མ་ཙྪ་ནྡ་བྱཱ་པཱ་ད་ཐི་ན་མི་དྡྷ་ཨུ་དྡྷ་ཙྩ་ཀུ་ཀྐུ་ཙྩ་ཝི་ཙི་ཀི་ཙྪཱ་ཝི་པྤ་ཧཱི་ནཾ ཝི་ཏ་ཀྐ་ཝི་ཙཱ་ར་པཱི་ཏི་སུ་ཁ་ཙི་ཏྟེ་ཀ་གྒ་ཏཱ་ས་མྤ་ཡུ་ཏྟཾ པ་ཋ་མཾ, ཝི་ཏ་ཀྐ་ཝི་པྤ་ཧཱི་ནཾ ཝི་ཙཱ་ར་པཱི་ཏི་སུ་ཁ་ཙི་ཏྟེ་ཀ་གྒ་ཏཱ་ས་མྤ་ཡུ་ཏྟཾ དུ་ཏི་ཡཾ, ཝི་ཏ་ཀྐ་ཝི་ཙཱ་ར་ཝི་པྤ་ཧཱི་ནཾ པཱི་ཏི་སུ་ཁ་ཙི་ཏྟེ་ཀ་གྒ་ཏཱ་ས་མྤ་ཡུ་ཏྟཾ ཏ་ཏི་ཡཾ, ཝི་ཏ་ཀྐ་ཝི་ཙཱ་ར་པཱི་ཏི་ཝི་པྤ་ཧཱི་ནཾ སུ་ཁ་ཙི་ཏྟེ་ཀ་གྒ་ཏཱ་ས་མྤ་ཡུ་ཏྟཾ ཙ་ཏུ་ཏྠཾ, ཝི་ཏ་ཀྐ་ཝི་ཙཱ་ར་པཱི་ཏི་སུ་ཁ་ཝི་པྤ་ཧཱི་ནཾ ཨུ་པེ་ཀྑཱ་ཙི་ཏྟེ་ཀ་གྒ་ཏཱ་ས་མྤ་ཡུ་ཏྟཾ པ་ཉྩ་མ་ནྟི ཨི་དཾ པ་ཉྩ་ཝི་དྷཾ རཱུ་པཱ་ཝ་ཙ་ར་ཀུ་ས་ལ་ཙི་ཏྟཾ ནཱ་མ.
ཏཾ པ་ན ཡ་ཐཱ་ས་མྦྷ་ཝཾ པ་ཐ་ཝཱི་ཀ་སི་ཎཱ་དཱི་སུ ཨཱ་ར་མྨ་ཎེ་སུ པ་ཝ་ཏྟི་ཝ་སེ་ན ཨ་ནེ་ཀ་ཝི་དྷཾ ཧོ་ཏི. ས་བྦཾ པ་ནེ་ཏཾ རཱུ་པཱ་ཝ་ཙ་ར་བྷཱ་ཝ་ནཱ་པུ་ཉྙ་ཝ་ས་པྤ་ཝ་ཏྟཾ ཡ་ཐཱ་ནུ་རཱུ་པཾ རཱུ་པཱ་ཝ་ཙ་རཱུ་པ་པ་ཏྟི་ནི་པྥཱ་ད་ཀཾ ཧོ་ཏི. ཨེ་ཝཾ ཏཱ་ཝ རཱུ་པཱ་ཝ་ཙ་ར་ཀུ་ས་ལཾ ཝེ་དི་ཏ་བྦཾ.
སེ་སེ་སུ པ་ན དྭཱི་སུ ཨ་རཱུ་པཱ་ཝ་ཙ་ར་ཀུ་ས་ལ་ཙི་ཏྟཾ ཏཱ་ཝ ཨུ་པེ་ཀྑཱ་ཝེ་ད་ནཱ་ཡོ་ག་བྷེ་ད་ཏོ ཨེ་ཀ་ཝི་དྷཾ, ས་ཝ་ཏྠུ་ཀཱ་ཝ་ཏྠུ་ཀ་བྷེ་ད་ཏོ དུ་ཝི་དྷཾ, ཧཱི་ན་མ་ཛ྄ཛྷི་མ་པ་ཎཱི་ཏ་བྷེ་ད་ཏོ ཏི་ཝི་དྷཾ, ཨཱ་ར་མྨ་ཎ་བྷེ་ད་ཏོ ཙ་ཏུ་བྦི་དྷཾ. ཀ་སི་ཎུ་གྒྷཱ་ཊི་མཱ་ཀཱ་སཾ, ཏ་ཏྠ པ་ཝ་ཏྟ་ཝི་ཉྙཱ་ཎཾ, ཏ་སྶ ཨ་པ་ག་མོ, ཨཱ་ཀི་ཉྩ་ཉྙཱ་ཡ་ཏ་ན་ནྟི ཨི་ད་མ་སྶ ཙ་ཏུ་བྦི་དྷ་མཱ་ར་མྨ་ཎཾ. ཡ་ཐཱ་པ་ཊི་པཱ་ཊི་ཡཱ ཨེ་ཏ་སྶཱ་ར་མྨ་ཎ་སྶ བྷེ་ད་ཏོ ཙ་ཏུ་བྦི་དྷཾ ཧོ་ཏི. སེ་ཡྻ་ཐི་དཾ – ས་བྦ་སོ རཱུ་པ་ས་ཉྙཱ་ནཾ ས་མ་ཏི་ཀྐ་མཱ པ་ཊི་གྷ་ས་ཉྙཱ་ནཾ ཨ་ཏྠ་ངྒ་མཱ ནཱ་ན་ཏྟ་ས་ཉྙཱ་ནཾ ཨ་མ་ན་སི་ཀཱ་རཱ ཨཱ་ཀཱ་སཱ་ན་ཉྩཱ་ཡ་ཏ་ན་ས་ཉྙཱ་ས་ཧ་ག་ཏཾ, ཝི་ཉྙཱ་ཎ་ཉྩཱ་ཡ་ཏ་ན་ས་ཉྙཱ་ས་ཧ་ག་ཏཾ, ཨཱ་ཀི་ཉྩ་ཉྙཱ་ཡ་ཏ་ན་ས་ཉྙཱ་ས་ཧ་ག་ཏཾ, ནེ་ཝ་ས་ཉྙཱ་ནཱ་ས་ཉྙཱ་ཡ་ཏ་ན་ས་ཉྙཱ་ས་ཧ་ག་ཏ་ནྟི ཨི་དཾ ཙ་ཏུ་བྦི་དྷཾ ཨ་རཱུ་པཱ་ཝ་ཙ་ར་ཀུ་ས་ལ་ཙི་ཏྟཾ ནཱ་མ. ས་བྦཾ པ་ནེ་ཏཾ ཨ་རཱུ་པཱ་ཝ་ཙ་ར་བྷཱ་ཝ་ནཱ་པུ་ཉྙ་ཝ་ས་པྤ་ཝ་ཏྟཾ ཡ་ཐཱ་ནུ་རཱུ་པཾ ཨ་རཱུ་པཱུ་པ་པ་ཏྟི་ནི་པྥཱ་ད་ཀཾ ཧོ་ཏི. ཨེ་ཝཾ ཨ་རཱུ་པཱ་ཝ་ཙ་ར་ཀུ་ས་ལ་ཙི་ཏྟཾ ཝེ་དི་ཏ་བྦཾ.
ཨི་ཏ་རཾ པ་ན ལོ་ཀུ་ཏྟ་ར་ཀུ་ས་ལ་ཙི་ཏྟཾ ནི་བྦཱ་ནཱ་ར་མྨ་ཎ་ཏོ ཨེ་ཀ་ཝི་དྷཾ, ནི་ཡ་ཏཱ་ནི་ཡ་ཏ་ཝ་ཏྠུ་ཀ་བྷེ་ད་ཏོ དུ་ཝི་དྷཾ, ཏཱི་ཧི ཝི་མོ་ཀྑ་མུ་ཁེ་ཧི པ་ཏྟ་བྦ་ཏོ ཏི་ཝི་དྷཾ, ཙ་ཏུ་མ་གྒ་ཡོ་ག་བྷེ་ད་ཏོ ཙ་ཏུ་བྦི་དྷཾ. སེ་ཡྻ་ཐི་དཾ – ས་ཀྐཱ་ཡ་དི་ཊྛི་ཝི་ཙི་ཀི་ཙྪཱ་སཱི་ལ་བྦ་ཏ་པ་རཱ་མཱ་ས་ས་ཉྙོ་ཛ་ན་པྤ་ཧཱ་ན་ཀ་རཾ སོ་ཏཱ་པ་ཏྟི་མ་གྒ་ཙི་ཏྟཾ, རཱ་ག་དོ་ས་མོ་ཧཱ་ནཾ ཏ་ནུ་ཏྟ་ཀ་རཾ ས་ཀ་དཱ་གཱ་མི་མ་གྒ་ཙི་ཏྟཾ, ཀཱ་མ་རཱ་ག་བྱཱ་པཱ་དཱ་ནཾ ནི་ར་ཝ་སེ་ས་པྤ་ཧཱ་ན་ཀ་རཾ ཨ་ནཱ་གཱ་མི་མ་གྒ་ཙི་ཏྟཾ, རཱུ་པ་རཱ་ག་ཨ་རཱུ་པ་རཱ་ག་མཱ་ན་ཨུ་དྡྷ་ཙྩ་ཨ་ཝི་ཛྫཱ་པ་ཧཱ་ན་ཀ་རཾ ཨ་ར་ཧ་ཏྟ་མ་གྒ་ཙི་ཏྟ་ནྟི ཨི་དཾ ཙ་ཏུ་བྦི་དྷཾ ལོ་ཀུ་ཏྟ་ར་ཀུ་ས་ལ་ཙི་ཏྟཾ ནཱ་མ. ཨེ་ཀེ་ཀཾ པ་ནེ་ཏྠ ཛྷཱ་ན་ངྒ་ཡོ་ག་བྷེ་ད་ཏོ པ་ཉྩ་ཝི་དྷཾ ཧོ་ཏི, ཏ་སྨཱ ཝཱི་ས་ཏི་ཝི་དྷཾ ཧོ་ཏི. ས་བྦཾ པ་ནེ་ཏཾ ལོ་ཀུ་ཏྟ་ར་བྷཱ་ཝ་ནཱ་པུ་ཉྙ་ཝ་ས་པྤ་ཝ་ཏྟཾ མ་གྒཱ་ནུ་རཱུ་པ་ཕ་ལ་པྤ་ཝ་ཏྟི་ཡཱ ཙ་ཏྟཱ་རོ ཨ་རི་ཡ་པུ་གྒ་ལེ ཨ་བྷི་ནི་པྥཱ་དེ་ཏི. ཨེ་ཝཾ ལོ་ཀུ་ཏྟ་ར་ཀུ་ས་ལཾ ཝེ་དི་ཏ་བྦཾ.
༢༨. ཀཱ་མེ ཨ་ཊྛེ་ཝ རཱུ་པེ ཙ, པ་ཉྩ ཙ་ཏྟཱ་རི་རཱུ་པི་སུ;
ཙ་ཏྟཱ་རཱ་ནུ་ཏྟ་རཱ་ནེ་ཝཾ, ཀུ་ས་ལཱ་ནེ་ཀ་ཝཱི་ས་ཏི.
༢༩. ཀུ་ས་ལཱ་ཀུ་ས་ལཱ་པ་ག་ཏེ་ན ས་ཏཱ,
ཀུ་ས་ལེ ཀུ་ས་ལེ་ན ཙ ཡཾ ཀུ་ས་ལཾ;
ཙ་ཏུ་བྷཱུ་མི་ག་ཏཾ མུ་ནི་ནཱ ཝ་སི་ནཱ,
ལ་པི་ཏཾ ལ་པི་ཏཾ ས་ཀ་ལ་མྤི མ་ཡཱ.
ཨ་ཀུ་ས་ལཾ པ་ན བྷཱུ་མི་ཏོ ཨེ་ཀ་ཝི་དྷཾ ཀཱ་མཱ་ཝ་ཙ་ར་མེ་ཝ, ནི་ཡ་ཏཱ་ནི་ཡ་ཏ་ཝ་ཏྠུ་ཝ་སེ་ན ཙ ཨེ་ཀ་ཧེ་ཏུ་ཀ་དུ་ཧེ་ཏུ་ཀ་ཝ་སེ་ན ཙ པ་ཊི་ས་ནྡྷི་ཛ་ན་ཀཱ་ཛ་ན་ཀ་ཝ་སེ་ན ཙ དུ་ཝི་དྷཾ, ཏཱི་ཧི ཝེ་ད་ནཱ་ཧི ཡོ་ག་ཏོ ཙ ལོ་བྷ་མཱུ་ལཾ དོ་ས་མཱུ་ལཾ མོ་ཧ་མཱུ་ལ་ནྟི མཱུ་ལ་ཏོ ཙ ཏི་ཝི་དྷཾ ཧོ་ཏི. ཏ་ཏྠ ལོ་བྷ་མཱུ་ལཾ པ་ན སོ་མ་ན་སྶུ་པེ་ཀྑཱ་དི་ཊྛི་པྤ་ཡོ་ག་བྷེ་ད་ཏོ ཨ་ཊྛ་ཝི་དྷཾ ཧོ་ཏི. སེ་ཡྻ་ཐི་དཾ – སོ་མ་ན་སྶ་ས་ཧ་ག་ཏཾ དི་ཊྛི་ག་ཏ་ས་མྤ་ཡུ་ཏྟཾ ཨ་ས་ངྑཱ་རི་ཀ་མེ་ཀཾ, ས་ས་ངྑཱ་རི་ཀ་མེ་ཀཾ, སོ་མ་ན་སྶ་ས་ཧ་ག་ཏཾ དི་ཊྛི་ག་ཏ་ཝི་པྤ་ཡུ་ཏྟཾ ཨ་ས་ངྑཱ་རི་ཀ་མེ་ཀཾ, ས་ས་ངྑཱ་རི་ཀ་མེ་ཀཾ, ཨུ་པེ་ཀྑཱ་ས་ཧ་ག་ཏཾ དི་ཊྛི་ག་ཏ་ས་མྤ་ཡུ་ཏྟཾ ཨ་ས་ངྑཱ་རི་ཀ་མེ་ཀཾ, ས་ས་ངྑཱ་རི་ཀ་མེ་ཀཾ, ཨུ་པེ་ཀྑཱ་ས་ཧ་ག་ཏཾ དི་ཊྛི་ག་ཏ་ཝི་པྤ་ཡུ་ཏྟཾ ཨ་ས་ངྑཱ་རི་ཀ་མེ་ཀཾ, ས་ས་ངྑཱ་རི་ཀ་མེ་ཀ་ནྟི.
ཡ་དཱ ཧི ‘‘ན་ཏྠི ཀཱ་མེ་སུ ཨཱ་དཱི་ན་ཝོ’’ཏི་ཨཱ་དི་ནཱ ན་ཡེ་ན མི་ཙྪཱ་དི་ཊྛིཾ པུ་ར་ཀྑ་ཏྭཱ ཀེ་ཝ་ལཾ ཧ་ཊྛ་ཏུ་ཊྛོ ཀཱ་མེ ཝཱ པ་རི་བྷུ་ཉྫ་ཏི, དི་ཊྛ་མ་ངྒ་ལཱ་དཱི་ནི ཝཱ སཱ་ར་ཏོ པ་ཙྩེ་ཏི ས་བྷཱ་ཝ་ཏི་ཀྑེ་ནེ་ཝ ཨ་ནུ་སྶཱ་ཧི་ཏེ་ན ཙི་ཏྟེ་ན, ཏ་དཱ་སྶ པ་ཋ་མཾ ཨ་ཀུ་ས་ལ་ཙི་ཏྟཾ ཨུ་པྤ་ཛྫ་ཏི. ཡ་དཱ པ་ན མ་ནྡེ་ན ས་མུ་སྶཱ་ཧི་ཏེ་ན, ཏ་དཱ དུ་ཏི་ཡཾ. ཡ་དཱ མི་ཙྪཱ་དི་ཊྛིཾ ཨ་པུ་ར་ཀྑ་ཏྭཱ ཀེ་ཝ་ལཾ ཧ་ཊྛ་ཏུ་ཊྛོ མེ་ཐུ་ནཾ དྷ་མྨཾ ཝཱ པ་རི་བྷུ་ཉྫ་ཏི, པ་ར་ས་མྤ་ཏྟིཾ ཝཱ ཨ་བྷི་ཛ྄ཛྷཱ་ཡ་ཏི, པ་ར་སྶ བྷ་ཎྜཾ ཝཱ ཧ་ར་ཏི ས་བྷཱ་ཝ་ཏི་ཀྑེ་ནེ་ཝ ཨ་ནུ་སྶཱ་ཧི་ཏེ་ན ཙི་ཏྟེ་ན, ཏ་དཱ ཏ་ཏི་ཡཾ. ཡ་དཱ མ་ནྡེ་ན ས་མུ་སྶཱ་ཧི་ཏེ་ན, ཏ་དཱ ཙ་ཏུ་ཏྠཾ ཨུ་པྤ་ཛྫ་ཏི. ཡ་དཱ པ་ན ཀཱ་མཱ་ནཾ ཝཱ ཨ་ས་མྤ་ཏྟིཾ ཨཱ་ག་མྨ ཨ་ཉྙེ་སཾ ཝཱ སོ་མ་ན་སྶ་ཧེ་ཏཱུ་ནཾ ཨ་བྷཱ་ཝེ་ན ཙ་ཏཱུ་སུ་པི ཝི་ཀ་པྤེ་སུ སོ་མ་ན་སྶ་ར་ཧི་ཏཱ ཧོ་ནྟི, ཏ་དཱ སེ་སཱ་ནི ཙ་ཏྟཱ་རི ཨུ་པེ་ཀྑཱ་ས་ཧ་ག་ཏཱ་ནི ཨུ་པྤ་ཛྫ་ནྟཱི་ཏི. ཨེ་ཝཾ སོ་མ་ན་སྶུ་པེ་ཀྑཱ་དི་ཊྛི་པྤ་ཡོ་ག་བྷེ་ད་ཏོ ཨ་ཊྛ་ཝི་དྷཾ ལོ་བྷ་མཱུ་ལཾ ཝེ་དི་ཏ་བྦཾ.
དོ་ས་མཱུ་ལཾ པ་ན ཨེ་ཀ་ནྟ་ས་ཝ་ཏྠུ་ཀ་ཏོ ཨེ་ཀ་ཝི་དྷཾ, ཨ་ས་ངྑཱ་ར་ས་ས་ངྑཱ་ར་བྷེ་ད་ཏོ དུ་ཝི་དྷཾ དོ་མ་ན་སྶ་ས་ཧ་ག་ཏཾ པ་ཊི་གྷ་ས་མྤ་ཡུ་ཏྟཾ ཨ་ས་ངྑཱ་རཾ, ས་ས་ངྑཱ་ར་ནྟི. ཨ་སྶ པ་ན པཱ་ཎཱ་ཏི་པཱ་ཏཱ་དཱི་སུ ཏི་ཀྑ་མ་ནྡ་པྤ་ཝ་ཏྟི་ཀཱ་ལེ ཨུ་པྤ་ཏྟི ཝེ་དི་ཏ་བྦཱ.
མོ་ཧ་མཱུ་ལ་མྤི ཝི་ཙི་ཀི་ཙྪུ་དྡྷ་ཙྩ་ཡོ་ག་ཏོ དུ་ཝི་དྷཾ ཧོ་ཏི ཨུ་པེ་ཀྑཱ་ས་ཧ་ག་ཏཾ ཝི་ཙི་ཀི་ཙྪཱ་ས་མྤ་ཡུ་ཏྟཾ, ཨུ་པེ་ཀྑཱ་ས་ཧ་ག་ཏཾ ཨུ་དྡྷ་ཙྩ་ས་མྤ་ཡུ་ཏྟ་ནྟི. ཏ་སྶ ཨ་ས་ནྣི་ཊྛཱ་ན་ཝི་ཀྑེ་པ་ཀཱ་ལེ་སུ པ་ཝ་ཏྟི ཝེ་དི་ཏ་བྦཱ་ཏི.
ཨེ་ཝཾ ཏཱ་ཝ དྭཱ་ད་ས་ཝི་དྷཾ ཨ་ཀུ་ས་ལ་ཙི་ཏྟཾ ཝེ་དི་ཏ་བྦཾ, ས་བྦཾ པ་ནེ་ཏཾ ཡ་ཐཱ་ནུ་རཱུ་པཾ ཨ་པཱ་ཡེ་སུ ཨུ་པ་པ་ཏྟི་ཡཱ, སུ་ག་ཏི་ཡ་མྤི དུ་ཀྑ་ཝི་སེ་ས་སྶ ཨ་བྷི་ནི་པྥཱ་ད་ཀཾ ཧོ་ཏི.
༣༠. ལོ་བྷ་མཱུ་ལ་ཝ་སེ་ན་ཊྛ, དོ་ས་མཱུ་ལ་ཝ་སཱ དུ་ཝེ;
མོ་ཧ་མཱུ་ལ་ཝ་སེ་ན དྭེ, ཨེ་ཝཾ དྭཱ་ད་ས་དྷཱ སི་ཡུཾ.
༣༡. པཱ་པཱ་པཱ་པེ་སྭ་པཱ་པེ་ན, ཡཾ ཝུ་ཏྟཾ པཱ་པ་མཱ་ན་སཾ;
པཱ་པཱ་པཱ་པ་པྤ་ཧཱི་ནེ་ན, ཏཾ མ་ཡཱ ས་མུ་དཱ་ཧ་ཊཾ.
ཨི་ཏ་རཾ པ་ན ཨ་བྱཱ་ཀ་ཏ་མ་ཝི་པཱ་ཀཱ་ར་ཧ་ཏོ ཨེ་ཀ་ཝི་དྷཾ ཧོ་ཏི, ཛཱ་ཏི་བྷེ་ད་ཏོ དུ་ཝི་དྷཾ ཝི་པཱ་ཀ་ཙི་ཏྟཾ ཀི་རི་ཡ་ཙི་ཏྟ་ནྟི. ཏ་ཏྠ ཝི་པཱ་ཀ་ཙི་ཏྟཾ བྷཱུ་མི་བྷེ་ད་ཏོ ཙ་ཏུ་བྦི་དྷཾ ཀཱ་མཱ་ཝ་ཙ་རཾ རཱུ་པཱ་ཝ་ཙ་རཾ ཨ་རཱུ་པཱ་ཝ་ཙ་རཾ ལོ་ཀུ་ཏྟ་ར་ནྟི. ཏ་ཏྠ ཀཱ་མཱ་ཝ་ཙ་རཾ དུ་ཝི་དྷཾ ཀུ་ས་ལ་ཝི་པཱ་ཀཾ ཨ་ཀུ་ས་ལ་ཝི་པཱ་ཀ་ནྟི. ཀུ་ས་ལ་ཝི་པཱ་ཀཾ དུ་ཝི་དྷཾ ས་ཧེ་ཏུ་ཀ་མ་ཧེ་ཏུ་ཀ་ཉྩེ་ཏི.
ཏ་ཏྠ ས་ཧེ་ཏུ་ཀ་ཝི་པཱ་ཀ་ཙི་ཏྟཾ ས་ཀ་ཀུ་ས་ལཾ ཝི་ཡ སོ་མ་ན་སྶུ་པེ་ཀྑཱ་ཉཱ་ཎ་པྤ་ཡོ་ག་བྷེ་ད་ཏོ ཨ་ཊྛ་ཝི་དྷཾ. སེ་ཡྻ་ཐི་དཾ – སོ་མ་ན་སྶ་ས་ཧ་ག་ཏཾ ཉཱ་ཎ་ས་མྤ་ཡུ་ཏྟཾ ཨ་ས་ངྑཱ་རཾ, ས་ས་ངྑཱ་རཾ, སོ་མ་ན་སྶ་ས་ཧ་ག་ཏཾ ཉཱ་ཎ་ཝི་པྤ་ཡུ་ཏྟཾ ཨ་ས་ངྑཱ་རཾ, ས་ས་ངྑཱ་རཾ, ཨུ་པེ་ཀྑཱ་ས་ཧ་ག་ཏཾ ཉཱ་ཎ་ས་མྤ་ཡུ་ཏྟཾ ཨ་ས་ངྑཱ་རཾ, ས་ས་ངྑཱ་རཾ, ཨུ་པེ་ཀྑཱ་ས་ཧ་ག་ཏཾ ཉཱ་ཎ་ཝི་པྤ་ཡུ་ཏྟཾ ཨ་ས་ངྑཱ་རཾ, ས་ས་ངྑཱ་ར་ནྟི ཨི་དཾ ཨ་ཊྛ་ཝི་དྷཾ ས་ཧེ་ཏུ་ཀ་ཝི་པཱ་ཀཾ ནཱ་མ.
ཡ་ཐཱ པ་ན་སྶ ཀུ་ས་ལཾ དཱ་ནཱ་དི་ཝ་སེ་ན ཚ་སུ ཨཱ་ར་མྨ་ཎེ་སུ པ་ཝ་ཏྟ་ཏི, ན ཨི་དཾ ཏ་ཐཱ. ཨི་དཾ ཧི པ་ཊི་ས་ནྡྷི་བྷ་ཝ་ངྒ་ཙུ་ཏི་ཏ་དཱ་ར་མྨ་ཎ་ཝ་སེ་ན པ་རི་ཏྟ་དྷ་མྨ་པ་རི་ཡཱ་པ་ནྣེ་སུ་ཡེ་ཝ ཚ་སུ ཨཱ་ར་མྨ་ཎེ་སུ པ་ཝ་ཏྟ་ཏི. ས་མྤ་ཡུ་ཏྟ་དྷ་མྨཱ་ན་ཉྩ ཝི་སེ་སེ ཨ་ས་ཏི་པི ཨཱ་དཱ་ས་ཏ་ལཱ་དཱི་སུ མུ་ཁ་ནི་མི་ཏྟཾ ཝི་ཡ ནི་རུ་སྶཱ་ཧཾ ཝི་པཱ་ཀཾ, མུ་ཁཾ ཝི་ཡ ས་ཨུ་སྶཱ་ཧཾ ཀུ་ས་ལ་ནྟི ཝེ་དི་ཏ་བྦཾ. ཨི་མེ་སཾ པ་ན ཝི་པ་ཙྩ་ན་ཊྛཱ་ནཾ ཝེ་དི་ཏ་བྦཾ. ཨི་མཱ་ནི ཧི པ་ཊི་ས་ནྡྷི་བྷ་ཝ་ངྒ་ཙུ་ཏི་ཏ་དཱ་ར་མྨ་ཎཱ་ནི ཧུ་ཏྭཱ ཝི་པ་ཙྩ་ནྟི.
༣༢. ཀཱ་མཱ་ཝ་ཙ་ར་དེ་ཝཱ་ནཾ, མ་ནུ་སྶཱ་ནཾ ཨི་མེ པ་ན;
དུ་ཧེ་ཏུ་ཀ་ཏི་ཧེ་ཏཱུ་ནཾ, བྷ་ཝ་ནྟི པ་ཊི་ས་ནྡྷི་ཡོ.
༣༣. ཏ་ཏོ པ་ཝ་ཏྟི་ཡཾ ཧུ་ཏྭཱ, བྷ་ཝ་ངྒཾ ཡཱ་ཝ་ཏཱ་ཡུ་ཀཾ;
བ་ལ་ཝཱ་ར་མྨ་ཎེ ཧུ་ཏྭཱ, ཏ་དཱ་ར་མྨ་ཎ་མེ་ཝ ཙ.
༣༤. ཏ་ཏོ མ་ར་ཎ་ཀཱ་ལ་སྨིཾ, ཙུ་ཏི ཧུ་ཏྭཱ པ་ཝ་ཏྟ་རེ;
ཨེ་ཝཾ ཙ་ཏཱུ་སུ ཋཱ་ནེ་སུ, ཝི་པ་ཙྩ་ནྟཱི་ཏི ནི་དྡི་སེ.
༣༥. ས་བྷཱུ་མི་ཀུ་ས་ལེ་ཧེ་ཝ, མ་ཧཱ་པཱ་ཀཱ ས་མཱ ཝི་ནཱ;
ཀ་མྨ་དྭཱ་ར་ཉྩ ཀ་མྨ་ཉྩ, པུ་ཉྙཱ་ནཾ ཀྲི་ཡ་ཝ་ཏྠུ་ཀཾ.
༣༦. ཨ་ཝི་ཉྙ་ཏྟི་ཛ་ན་ཏྟཱ ཧི, ཨ་ཝི་པཱ་ཀ་ས་བྷཱ་ཝ་ཏོ;
ཨ་པྤ་ཝ་ཏྟ་ན་ཏོ ཙེ་ཝ, པཱ་ཀཱ པུ་ཉྙེ་ཧི ནོ ས་མཱ.
༣༧. པ་རི་ཏྟཱ་ར་མྨ་ཎ་ཏྟཱ ཧི, ཏེ་ས་མེ་ཀ་ནྟ་ཏོ པ་ན;
ཀ་རུ་ཎཱ་མུ་དི་ཏཱ ཏེ་སུ, ན ཛཱ་ཡ་ནྟི ཀ་དཱ་ཙི་པི.
༣༨. ཏ་ཐཱ ཝི་ར་ཏི་ཡོ ཏི་སྶོ, ན པ་ནེ་ཏེ་སུ ཛཱ་ཡ་རེ;
པ་ཉྩ སི་ཀྑཱ་པ་དཱ ཝུ་ཏྟཱ, ཀུ་ས་ལཱ་ཏི ཧི ས་ཏྠུ་ནཱ.
༣༩. ཏ་ཐཱ་དྷི་པ་ཏི་ནོ་པེ་ཏྠ, ན ས་ནྟཱི་ཏི ཝི་ནི་དྡི་སེ;
ཚ་ནྡཱ་དཱི་ནི དྷུ་རཾ ཀ་ཏྭཱ, ཨ་ནུ་པྤ་ཛྫ་ན་ཏོ པ་ན.
༤༠. ཨ་ས་ངྑཱ་ར་ས་ས་ངྑཱ་ར-ཝི་དྷཱ་ནཾ པ་ན པུ་ཉྙ་ཏོ;
ཉེ་ཡྻཾ པ་ཙྩ་ཡ་ཏོ ཙེ་ཝ, ཝི་པཱ་ཀེ་སུ ཙ ཝི་ཉྙུ་ནཱ.
༤༡. ཧཱི་ནཱ་དཱི་ནཾ ཝི་པཱ་ཀ་ཏྟཱ, པུ་ཉྙཱ་ནཾ པུ་ཉྙ་ཝཱ་དི་ནཱ;
ཧཱི་ནཱ་ད་ཡོ བྷ་ཝ་ནྟཱི་ཏི, ཝི་པཱ་ཀཱ པ་རི་དཱི་པི་ཏཱ.
༤༢. ཨི་དཾ ཨ་ཊྛ་ཝི་དྷཾ ཙི་ཏྟཾ, ཨེ་ཀ་ནྟེ་ན ས་ཝ་ཏྠུ་ཀཾ;
ཛཱ་ཡ་ཏེ ཀཱ་མ་ལོ་ཀ་སྨིཾ, ན པ་ན་ཉྙ་ཏྠ ཛཱ་ཡ་ཏེ.
ཨེ་ཝཾ ཏཱ་ཝ ས་ཧེ་ཏུ་ཀ་ཝི་པཱ་ཀ་ཙི་ཏྟཾ ཝེ་དི་ཏ་བྦཾ.
ཨ་ཧེ་ཏུ་ཀ་ཝི་པཱ་ཀ་ཙི་ཏྟཾ པ་ན ཨ་ལོ་བྷཱ་དི་ཧེ་ཏུ་ཝི་ར་ཧི་ཏཾ ཨུ་པེ་ཀྑཱ་ས་ཧ་ག་ཏཾ ཙ་ཀྑུ་ཝི་ཉྙཱ་ཎཾ, ཨུ་པེ་ཀྑཱ་ས་ཧ་ག་ཏཾ སོ་ཏ་ཝི་ཉྙཱ་ཎཾ, ཨུ་པེ་ཀྑཱ་ས་ཧ་ག་ཏཾ གྷཱ་ན་ཝི་ཉྙཱ་ཎཾ, ཨུ་པེ་ཀྑཱ་ས་ཧ་ག་ཏཾ ཛི་ཝ྄ཧཱ་ཝི་ཉྙཱ་ཎཾ, སུ་ཁ་ས་ཧ་ག་ཏཾ ཀཱ་ཡ་ཝི་ཉྙཱ་ཎཾ, ཨུ་པེ་ཀྑཱ་ས་ཧ་ག་ཏཾ ཨ་ཧེ་ཏུ་ཀ་མ་ནོ་དྷཱ་ཏུ་ས་མྤ་ཊི་ཙྪ་ནཾ, སོ་མ་ན་སྶ་ས་ཧ་ག་ཏཾ ཨ་ཧེ་ཏུ་ཀ་མ་ནོ་ཝི་ཉྙཱ་ཎ་དྷཱ་ཏུ་ས་ནྟཱི་ར་ཎཾ, ཨུ་པེ་ཀྑཱ་ས་ཧ་ག་ཏཾ ཨ་ཧེ་ཏུ་ཀ་མ་ནོ་ཝི་ཉྙཱ་ཎ་དྷཱ་ཏུ་ས་ནྟཱི་ར་ཎ་ནྟི ཨི་དཾ པ་ན ཨ་ཊྛ་ཝི་དྷཾ ཨ་ཧེ་ཏུ་ཀ་ཝི་པཱ་ཀ་ཙི་ཏྟཾ ནཱ་མ.
ཨི་དཾ པ་ན ཨ་ཊྛ་ཝི་དྷཾ ནི་ཡ་ཏ་ཝ་ཏྠུ་ཀ་ཏོ ཨེ་ཀ་ཝི་དྷཾ, ནི་ཡ་ཏཱ་ནི་ཡ་ཏཱ་ར་མྨ་ཎ་ཏོ དུ་ཝི་དྷཾ. ཏ་ཏྠ ཝི་ཉྙཱ་ཎ་པ་ཉྩ་ཀཾ ནི་ཡ་ཏཱ་ར་མྨ་ཎཾ, སེ་ས་ཏྟ་ཡཾ ཨ་ནི་ཡ་ཏཱ་ར་མྨ་ཎཾ. སུ་ཁ་སོ་མ་ན་སྶུ་པེ་ཀྑཱ་ཝེ་ད་ནཱ་ཡོ་ག་ཏོ ཏི་ཝི་དྷཾ. ཏ་ཏྠ སུ་ཁ་ས་ཧ་ག་ཏཾ ཀཱ་ཡ་ཝི་ཉྙཱ་ཎཾ, དྭི་ཊྛཱ་ནི་ཀཾ ས་ནྟཱི་ར་ཎཾ སོ་མ་ན་སྶུ་པེ་ཀྑཱ་ཡུ་ཏྟཾ, སེ་ས་མུ་པེ་ཀྑཱ་ཡུ་ཏྟ་ནྟི.
དི་ཊྛཱ་ར་མྨ་ཎ་སུ་ཏཱ་ར་མྨ་ཎ་མུ་ཏཱ་ར་མྨ་ཎ་དི་ཊྛ་སུ་ཏ་མུ་ཏཱ་ར་མྨ་ཎ་དི་ཊྛ-སུ་ཏ་མུ་ཏ་ཝི་ཉྙཱ་ཏཱ་ར་མྨ་ཎ་ཝ་སེ་ན པ་ཉྩ་ཝི་དྷཾ. ཏ་ཏྠ དི་ཊྛཱ་ར་མྨ་ཎཾ ཙ་ཀྑུ་ཝི་ཉྙཱ་ཎཾ, སུ་ཏཱ་ར་མྨ་ཎཾ སོ་ཏ་ཝི་ཉྙཱ་ཎཾ, མུ་ཏཱ་ར་མྨ་ཎཾ གྷཱ་ན་ཛི་ཝ྄ཧཱ་ཀཱ་ཡ་ཝི་ཉྙཱ་ཎ་ཏྟ་ཡཾ, དི་ཊྛ་སུ་ཏ་མུ་ཏཱ་ར་མྨ་ཎཾ མ་ནོ་དྷཱ་ཏུ་ས་མྤ་ཊི་ཙྪ་ནཾ, དི་ཊྛ་སུ་ཏ་མུ་ཏ་ཝི་ཉྙཱ་ཏཱ་ར་མྨ་ཎཾ སེ་ས་མ་ནོ་ཝི་ཉྙཱ་ཎ་དྷཱ་ཏུ་དྭ་ཡ་ནྟི.
ཝ་ཏྠུ་ཏོ ཚ་བྦི་དྷཾ. ཀ་ཐཾ? ཙ་ཀྑུ་ཝི་ཉྙཱ་ཎ་སྶ ཙ་ཀྑུ་མེ་ཝ ཝ་ཏྠུ, ཏ་ཐཱ སོ་ཏ་གྷཱ་ན་ཛི་ཝ྄ཧཱ་ཀཱ་ཡ་ཝི་ཉྙཱ་ཎཱ་ནཾ སོ་ཏ་གྷཱ་ན་ཛི་ཝ྄ཧཱ་ཀཱ་ཡ་ཝ་ཏྠུ, ཨ་ཝ་སེ་ས་ཏྟ་ཡ་སྶ ཧ་ད་ཡ་ཝ་ཏྠུ་མེ་ཝཱ་ཏི.
ཨཱ་ར་མྨ་ཎ་ཏོ ས་ཏྟ་ཝི་དྷཾ ཧོ་ཏི. ཀ་ཐཾ? རཱུ་པཱ་ར་མྨ་ཎ་མེ་ཝ ཙ་ཀྑུ་ཝི་ཉྙཱ་ཎཾ, ཏ་ཐཱ ས་དྡ་ག་ནྡྷ་ར་ས་ཕོ་ཊྛ་བྦཱ་ར་མྨ་ཎཱ་ནི པ་ཊི་པཱ་ཊི་ཡཱ སོ་ཏ་གྷཱ་ན་ཛི་ཝ྄ཧཱ་ཀཱ་ཡ་ཝི་ཉྙཱ་ཎཱ་ནི, རཱུ་པཱ་དི་པ་ཉྩཱ་ར་མྨ་ཎཱ མ་ནོ་དྷཱ་ཏུ, སེ་ས་མ་ནོ་ཝི་ཉྙཱ་ཎ་དྷཱ་ཏུ་དྭ་ཡཾ ཚ་ལཱ༹་ར་མྨ་ཎ་ནྟི.
ཏཾ ས་བྦཾ པ་ན ཨ་ཧེ་ཏུ་ཀ་ཝི་པཱ་ཀ་ཙི་ཏྟཾ ཀི་ཙྩ་ཏོ ཨ་ཊྛ་ཝི་དྷཾ ཧོ་ཏི. ཀ་ཐཾ? ད་སྶ་ན་ཀི་ཙྩཾ ཙ་ཀྑུ་ཝི་ཉྙཱ་ཎཾ, ས་ཝ་ན་གྷཱ་ཡ་ན་སཱ་ཡ་ན་ཕུ་ས་ན་ས་མྤ་ཊི་ཙྪ་ན་ས་ནྟཱི་ར་ཎ་ཏ་དཱ་ར་མྨ་ཎ་ཀི་ཙྩཱ་ནི ཨ་ཝ་སེ་སཱ་ནི.
ཏ་ཏྠ ཙ་ཀྑུ་ཏོ པ་ཝ་ཏྟཾ ཝི་ཉྙཱ་ཎཾ, ཙ་ཀྑུ་མྷི ས་ནྣི་སྶི་ཏཾ ཝི་ཉྙཱ་ཎ་ནྟི ཝཱ ཙ་ཀྑུ་ཝི་ཉྙཱ་ཎཾ, ཏ་ཐཱ སོ་ཏ་ཝི་ཉྙཱ་ཎཱ་དཱི་ནི. ཏ་ཏྠ ཙ་ཀྑུ་ས་ནྣི་སྶི་ཏ་རཱུ་པ་ཝི་ཛཱ་ན་ན་ལ་ཀྑ་ཎཾ ཙ་ཀྑུ་ཝི་ཉྙཱ་ཎཾ, རཱུ་པ་མ་ཏྟཱ་ར་མྨ་ཎ་ར་སཾ, རཱུ་པཱ་བྷི་མུ་ཁ་བྷཱ་ཝ་པ་ཙྩུ་པ་ཊྛཱ་ནཾ, རཱུ་པཱ་ར་མྨ་ཎཱ་ཡ ཀི་རི་ཡཱ་མ་ནོ་དྷཱ་ཏུ་ཡཱ ཨ་པ་ག་མ་པ་ད་ཊྛཱ་ནཾ. ཏ་ཐཱ སོ་ཏ་གྷཱ་ན་ཛི་ཝ྄ཧཱ་ཀཱ་ཡ་ཝི་ཉྙཱ་ཎཱ་ནི སོ་ཏཱ་དི་ས་ནྣི་སྶི་ཏ་ས་དྡཱ་དི་ཝི་ཛཱ་ན་ན་ལ་ཀྑ་ཎཱ་ནི, ས་དྡཱ་དི་མ་ཏྟཱ་ར་མྨ་ཎ་ར་སཱ་ནི, ས་དྡཱ་དཱི་སུ ཨ་བྷི་མུ་ཁ་བྷཱ་ཝ་པ་ཙྩུ་པ་ཊྛཱ་ནཱ་ནི, ས་དྡཱ་དི་ཨཱ་ར་མྨ་ཎཱ་ནཾ ཀི་རི་ཡཱ་མ་ནོ་དྷཱ་ཏཱུ་ནཾ ཨ་པ་ག་མ་པ་ད་ཊྛཱ་ནཱ་ནི. མ་ནོ་དྷཱ་ཏུ་ས་མྤ་ཊི་ཙྪ་ནཾ པ་ན ཙ་ཀྑུ་ཝི་ཉྙཱ་ཎཱ་དཱི་ནཾ ཨ་ན་ནྟ་རཱ རཱུ་པཱ་དི་ཝི་ཛཱ་ན་ན་ལ་ཀྑ་ཎཾ, རཱུ་པཱ་དི་ས་མྤ་ཊི་ཙྪ་ན་ར་སཾ, ཏ་ཐཱ་བྷཱ་ཝ་པ་ཙྩུ་པ་ཊྛཱ་ནཾ, ཙ་ཀྑུ་ཝི་ཉྙཱ་ཎཱ་དཱི་ནཾ ཨ་པ་ག་མ་པ་ད་ཊྛཱ་ནཾ.
སེ་སཱ པ་ན དྭེ ཨ་ཧེ་ཏུ་ཀ་མ་ནོ་ཝི་ཉྙཱ་ཎ་དྷཱ་ཏུ་ཡོ ཚ་ལཱ༹་ར་མྨ་ཎ་ཝི་ཛཱ་ན་ན་ལ་ཀྑ་ཎཱ, ས་ནྟཱི་ར་ཎཱ་དི་ར་སཱ, ཏ་ཐཱ་བྷཱ་ཝ་པ་ཙྩུ་པ་ཊྛཱ་ནཱ, ཧ་ད་ཡ་ཝ་ཏྠུ་པ་ད་ཊྛཱ་ནཱ་ཏི ཝེ་དི་ཏ་བྦཱ. ཏ་ཏྠ པ་ཋ་མཱ ཨེ་ཀ་ནྟ་མི་ཊྛཱ་ར་མྨ་ཎེ པ་ཝ་ཏྟི་ས་བྦྷཱ་ཝ་ཏོ སོ་མ་ན་སྶ་ཡུ་ཏྟཱ་ཝ ཧུ་ཏྭཱ པ་ཉྩ་དྭཱ་རེ ས་ནྟཱི་ར་ཎ་ཀི་ཙྩཾ སཱ་དྷ་ཡ་མཱ་ནཱ པ་ཉྩ་སུ དྭཱ་རེ་སུ ཋ་ཏྭཱ ཝི་པ་ཙྩ་ཏི, ཚ་སུ པ་ན དྭཱ་རེ་སུ བ་ལ་ཝཱ་ར་མྨ་ཎེ ཏ་དཱ་ར་མྨ་ཎཾ ཧུ་ཏྭཱ ཝི་པ་ཙྩ་ཏི. དུ་ཏི་ཡཱ པ་ན ཨི་ཊྛ་མ་ཛ྄ཛྷ་ཏྟཱ་ར་མྨ་ཎེ པ་ཝ་ཏྟི་ས་བྦྷཱ་ཝ་ཏོ ཨུ་པེ་ཀྑཱ་ས་ཧ་ག་ཏཱ ཧུ་ཏྭཱ ས་ནྟཱི་ར་ཎ་ཏ་དཱ་ར་མྨ་ཎ་པ་ཊི་ས་ནྡྷི་བྷ་ཝ་ངྒ་ཙུ་ཏི་ཝ་སེ་ན པ་ཝ་ཏྟ་ན་ཏོ པ་ཉྩ་སུ ཋཱ་ནེ་སུ ཝི་པ་ཙྩ་ཏི. ཀ་ཐཾ? མ་ནུ་སྶ་ལོ་ཀེ ཏཱ་ཝ ཛ་ཙྩ་ནྡྷ་ཛ་ཙྩ་བ་དྷི་ར་ཛ་ཙྩ་ཛ་ལ༹་ཛ་ཙྩུ་མྨ་ཏྟ་ཀ་པ་ཎྜ་ཀ་ཨུ་བྷ་ཏོ་བྱ་ཉྫ་ན་ན་པུཾ་ས་ཀཱ་དཱི་ནཾ པ་ཊི་ས་ནྡྷི་གྒ་ཧ་ཎ་ཀཱ་ལེ པ་ཊི་ས་ནྡྷི ཧུ་ཏྭཱ ཝི་པ་ཙྩ་ཏི. པ་ཊི་ས་ནྡྷི་ཡཱ ཝཱི་ཏི་ཝ་ཏྟཱ་ཡ པ་ཝ་ཏྟི་ཡཾ ཡཱ་ཝ་ཏཱ་ཡུ་ཀཾ བྷ་ཝ་ངྒཾ ཧུ་ཏྭཱ ཝི་པ་ཙྩ་ཏི. ཨི་ཊྛ་མ་ཛ྄ཛྷ་ཏྟེ པ་ཉྩཱ་ར་མྨ་ཎ་ཝཱི་ཐི་ཡཱ ས་ནྟཱི་ར་ཎཾ ཧུ་ཏྭཱ, བ་ལ་ཝཱ་ར་མྨ་ཎེ ཚ་དྭཱ་རེ ཏ་དཱ་ར་མྨ་ཎཾ ཧུ་ཏྭཱ, མ་ར་ཎ་ཀཱ་ལེ ཙུ་ཏི ཧུ་ཏྭཱ་ཏི ཨི་མེ་སུ པ་ན པ་ཉྩ་སུ ཋཱ་ནེ་སུ ཝི་པ་ཙྩ་ཏཱི་ཏི. ཨེ་ཝཾ ཏཱ་ཝ ཨ་ཧེ་ཏུ་ཀ་ཝི་པཱ་ཀ་ཙི་ཏྟཱ་ནི ཝེ་དི་ཏ་བྦཱ་ནི.
༤༣. ཀཱ་མཱ་ཝ་ཙ་ར་པུ་ཉྙ་སྶ, ཝི་པཱ་ཀཱ ཧོ་ནྟི སོ་ལ༹་ས;
ཏཾ ཏི་ཧེ་ཏུ་ཀ་པུ་ཉྙ་སྶ, ཝ་སེ་ན པ་རི་དཱི་པ་ཡེ.
ཨི་དཱ་ནི རཱུ་པཱ་ཝ་ཙ་ར་ཝི་པཱ་ཀ་ཙི་ཏྟཱ་ནི ཝུ་ཙྩ་ནྟི. ཏཱ་ནི ནི་ཡ་ཏ་ཝ་ཏྠུ་ཀ་ཏོ ཨེ་ཀ་ཝི་དྷཱ་ནི, ཛྷཱ་ན་ངྒ་ཡོ་ག་བྷེ་ད་ཏོ པ་ཉྩ་ཝི་དྷཱ་ནི. ཀ་ཐཾ? ཝི་ཏ་ཀྐ་ཝི་ཙཱ་ར་པཱི་ཏི་སུ་ཁ་ཙི་ཏྟེ་ཀ་གྒ་ཏཱ་ས་མྤ་ཡུ་ཏྟཾ པ་ཋ་མཾ, ཝི་ཙཱ་ར་པཱི་ཏི་སུ་ཁ་ཙི་ཏྟེ་ཀ་གྒ་ཏཱ་ས་མྤ་ཡུ་ཏྟཾ དུ་ཏི་ཡཾ, པཱི་ཏི་སུ་ཁ་ཙི་ཏྟེ་ཀ་གྒ་ཏཱ་ས་མྤ་ཡུ་ཏྟཾ ཏ་ཏི་ཡཾ, སུ་ཁ་ཙི་ཏྟེ་ཀ་གྒ་ཏཱ་ས་མྤ་ཡུ་ཏྟཾ ཙ་ཏུ་ཏྠཾ, ཨུ་པེ་ཀྑཱ་ཙི་ཏྟེ་ཀ་གྒ་ཏཱ་ས་མྤ་ཡུ་ཏྟཾ པ་ཉྩ་མ་ནྟི ཨི་མཱ་ནི པ་ཉྩ་པི རཱུ་པཱ་ཝ་ཙ་ར་ཝི་པཱ་ཀ་ཙི་ཏྟཱ་ནི ཨུ་པ་པ་ཏྟི་ཡཾ པ་ཊི་ས་ནྡྷི་བྷ་ཝ་ངྒ་ཙུ་ཏི་ཝ་སེ་ན པ་ཝ་ཏྟ་ནྟི.
ཨི་དཱ་ནི ཨ་རཱུ་པཱ་ཝ་ཙ་ར་ཝི་པཱ་ཀ་ཙི་ཏྟཱ་ནི ཝུ་ཙྩ་ནྟི. ཏཱ་ནི ས་ཀ་ཀུ་ས་ལཱ་ནི ཝི་ཡ ཨཱ་ར་མྨ་ཎ་བྷེ་ད་ཏོ ཙ་ཏུ་བྦི་དྷཱ་ནི ཧོ་ནྟི. ཀ་ཐཾ? ཨཱ་ཀཱ་སཱ་ན་ཉྩཱ་ཡ་ཏ་ན་ས་ཉྙཱ་ས་ཧ་ག་ཏཾ, ཝི་ཉྙཱ་ཎ་ཉྩཱ་ཡ་ཏ་ན་ས་ཉྙཱ་ས་ཧ་ག་ཏཾ, ཨཱ་ཀི་ཉྩ་ཉྙཱ་ཡ་ཏ་ན་ས་ཉྙཱ་ས་ཧ་ག་ཏཾ, ནེ་ཝ་ས་ཉྙཱ་ནཱ་ས་ཉྙཱ་ཡ་ཏ་ན་ས་ཉྙཱ་ས་ཧ་ག་ཏ་ནྟི ཨི་མཱ་ནི ཙ་ཏྟཱ་རི ཨ་རཱུ་པཱ་ཝ་ཙ་ར་ཝི་པཱ་ཀ་ཙི་ཏྟཱ་ནི.
༤༤. ཀུ་ས་ལཱ་ནུ་ག་ཏཾ ཀ་ཏྭཱ, བྷཱ་ཛི་ཏཾ ཀིཾ མ་ཧ་གྒ་ཏཾ;
ཀཱ་མཱ་ཝ་ཙ་ར་པུ་ཉྙཾ་ཝ, ནཱ་ས་མཱ་ན་ཕ་ལཾ ཡ་ཏོ.
༤༥. ཨ་ཏྟ་ནོ ཀུ་ས་ལེ་ཧེ་ཝ, ས་མཱ་ནཾ ས་བྦ་ཐཱ ཨི་དཾ;
ག་ཛཱ་དཱི་ནཾ ཡ་ཐཱ ཚཱ་ཡཱ, ག་ཛཱ་དི་ས་དི་སཱ ཏ་ཐཱ.
༤༦. ཀཱ་མཱ་ཝ་ཙ་ར་པུ་ཉྙཾ་ཝ, ནཱ་པ་རཱ་པ་རི་ཡ་ཝེ་ད་ནཾ;
ཛྷཱ་ནཱ ཨ་པ་རི་ཧཱི་ན་སྶ, ས་ཏྟ་སྶ བྷ་ཝ་གཱ་མི་ནོ.
༤༧. ཀུ་ས་ལཱ་ན་ནྟ་རཾ་ཡེ་ཝ, ཕ་ལཾ ཨུ་པྤ་ཛྫ་ཏཱི་ཏི ཙ;
ཉཱ་པ་ན་ཏྠཾ པ་ནེ་ཏ་སྶ, ཀུ་ས་ལཱ་ནུ་ག་ཏཾ ཀ་ཏཾ.
༤༨. པ་ཊི་པྤ་དཱ་ཀྐ་མོ ཙེ་ཝ, ཧཱི་ནཱ་དཱི་ན་ཉྩ བྷེ་ད་ཏོ;
ཛྷཱ་ནཱ་ག་མ་ན་ཏོ ཙེ་ཏྠ, ཝེ་དི་ཏ་བྦོ ཝི་བྷཱ་ཝི་ནཱ.
༤༩. ཨ་བྷཱ་ཝོ་དྷི་པ་ཏཱི་ན་ཉྩ, ཨ་ཡ་མེ་ཝ ཝི་སེ་ས་ཀོ;
སེ་སཾ ས་བྦཾ ཙ སེ་སེ་ན, ཀུ་ས་ལེ་ན ས་མཾ མ་ཏཾ. –
ཨེ་ཝཾ རཱུ་པཱ་ཝ་ཙ་རཱ་རཱུ་པཱ་ཝ་ཙ་ར་ཝི་པཱ་ཀཱ ཝེ་དི་ཏ་བྦཱ.
ཨི་དཱ་ནི ལོ་ཀུ་ཏྟ་ར་ཝི་པཱ་ཀ་ཙི་ཏྟཱ་ནི ཧོ་ནྟི. ཏཱ་ནི ཙ་ཏུ་མ་གྒ་ཡུ་ཏྟ་ཙི་ཏྟ་ཕ་ལ་ཏྟཱ ཙ་ཏུ་བྦི་དྷཱ་ནི ཧོ་ནྟི. ཀ་ཐཾ? སོ་ཏཱ་པ་ཏྟི་མ་གྒ་ཕ་ལ་ཙི་ཏྟཾ, ས་ཀ་དཱ་གཱ་མི་མ་གྒ་ཕ་ལ་ཙི་ཏྟཾ, ཨ་ནཱ་གཱ་མི་མ་གྒ་ཕ་ལ་ཙི་ཏྟཾ, ཨ་ར་ཧ་ཏྟ་མ་གྒ་ཕ་ལ་ཙི་ཏྟ་ནྟི. ཨེ་ཝཾ པ་ནེ་ཏྠ ཨེ་ཀེ་ཀཾ ཛྷཱ་ན་ངྒ་ཡོ་ག་བྷེ་ད་ཏོ པ་ཉྩ་ཝི་དྷཾ, པུ་ན མ་གྒ་ཝཱི་ཐི་ཕ་ལ་ས་མཱ་པ་ཏྟི་ཝ་སེ་ན པ་ཝ་ཏྟི་ཏོ དུ་ཝི་དྷཾ. ཨེ་ཝཾ ལོ་ཀུ་ཏྟ་ར་ཀུ་ས་ལ་ཝི་པཱ་ཀ་ཙི་ཏྟཱ་ནི ཝེ་དི་ཏ་བྦཱ་ནི.
༥༠. སུ་ཉྙ་ཏཾ ཨ་ནི་མི་ཏྟ་ནྟི, ཏ་ཐཱ་པ་ཎི་ཧི་ཏ་ནྟི་པི;
ཨེ་ཏཱ་ནི ཏཱི་ཎི ནཱ་མཱ་ནི, མ་གྒ་སྶཱ་ན་ནྟ་རེ ཕ་ལེ.
༥༡. ལ་བྦྷ་ནྟི པ་ར་བྷཱ་ག་སྨིཾ, ཝ་ལ༹་ཉྫ་ན་ཕ་ལེ་སུ ན;
ཝི་པ་སྶ་ནཱ་ཝ་སེ་ནེ་ཝ, ཏཱ་ནི ནཱ་མཱ་ནི ལ་བྦྷ་རེ.
༥༢. ཧོ་ནྟི སཱ་དྷི་པ་ཏཱི་ནེ་ཝ, ལོ་ཀུ་ཏྟ་ར་ཕ་ལཱ་ནི ཏུ;
ཝི་པཱ་ཀེ་དྷི་པ་ཏཱི ན་ཏྠི, ཋ་པེ་ཏྭཱ ཏུ ཨ་ནཱ་ས་ཝེ.
༥༣. ཨ་ཏྟ་ནོ མ་གྒ་བྷཱ་ཝེ་ན, མ་གྒོ ‘‘མ་གྒོ’’ཏི ཝུ་ཙྩ་ཏི;
ཕ་ལཾ མ་གྒ་མུ་པཱ་དཱ་ཡ, མ་གྒོ ནཱ་མཱ་ཏི ཝུ་ཙྩ་ཏི. –
ཨེ་ཝཾ ལོ་ཀུ་ཏྟ་ར་ཝི་པཱ་ཀཱ ཝེ་དི་ཏ་བྦཱ.
ཨི་དཱ་ནི ས་ཏྟཱ་ཀུ་ས་ལ་ཝི་པཱ་ཀཱ་ནི ཝུ་ཙྩ་ནྟི. ཨ་ཀུ་ས་ལ་ཝི་པཱ་ཀཾ ཨུ་པེ་ཀྑཱ་ས་ཧ་ག་ཏཾ ཙ་ཀྑུ་ཝི་ཉྙཱ་ཎཾ, ཨུ་པེ་ཀྑཱ་ས་ཧ་ག་ཏཾ སོ་ཏ་ཝི་ཉྙཱ་ཎཾ, ཨུ་པེ་ཀྑཱ་ས་ཧ་ག་ཏཾ གྷཱ་ན་ཝི་ཉྙཱ་ཎཾ, ཨུ་པེ་ཀྑཱ་ས་ཧ་ག་ཏཾ ཛི་ཝ྄ཧཱ་ཝི་ཉྙཱ་ཎཾ, དུ་ཀྑ་ས་ཧ་ག་ཏཾ ཀཱ་ཡ་ཝི་ཉྙཱ་ཎཾ, ཨུ་པེ་ཀྑཱ་ས་ཧ་ག་ཏཾ ཨ་ཧེ་ཏུ་ཀ་མ་ནོ་དྷཱ་ཏུ་ས་མྤ་ཊི་ཙྪ་ནཾ, ཨུ་པེ་ཀྑཱ་ས་ཧ་ག་ཏཾ ཨ་ཧེ་ཏུ་ཀ་མ་ནོ་ཝི་ཉྙཱ་ཎ་དྷཱ་ཏུ་ས་ནྟཱི་ར་ཎ་ནྟི ཨི་མཱ་ནི ས་ཏྟ ཨ་ཀུ་ས་ལ་ཝི་པཱ་ཀ་ཙི་ཏྟཱ་ནི.
ཨེ་ཏྠ པ་ན ཨུ་པེ་ཀྑཱ་ས་ཧ་ག་ཏཱ་ཧེ་ཏུ་ཀ་མ་ནོ་ཝི་ཉྙཱ་ཎ་དྷཱ་ཏུ ཨེ་ཀཱ་ད་ས་ཝི་དྷེ་ནཱ་པི ཨ་ཀུ་ས་ལ་ཙི་ཏྟེ་ན ཀ་མྨེ ཨཱ་ཡཱུ་ཧི་ཏེ ཀ་མྨ་ཀ་མྨ་ནི་མི་ཏྟ་ག་ཏི་ནི་མི་ཏྟེ་སུ ཨ་ཉྙ་ཏ་རཾ ཨཱ་ར་མྨ་ཎཾ ཀ་ཏྭཱ ཙ་ཏཱུ་སུ ཨ་པཱ་ཡེ་སུ པ་ཊི་ས་ནྡྷི ཧུ་ཏྭཱ ཝི་པ་ཙྩ་ཏི, པ་ཊི་ས་ནྡྷི་ཡཱ ཝཱི་ཏི་ཝ་ཏྟཱ་ཡ དུ་ཏི་ཡ་ཙི་ཏྟ་ཝཱ་རཾ ཏ་ཏོ པ་ཊྛཱ་ཡ ཡཱ་ཝ་ཏཱ་ཡུ་ཀཾ བྷ་ཝ་ངྒཾ ཧུ་ཏྭཱ, ཨ་ནི་ཊྛ་མ་ཛ྄ཛྷ་ཏྟཱ་ར་མྨ་ཎཱ་ཡ པ་ཉྩ་ཝི་ཉྙཱ་ཎ་ཝཱི་ཐི་ཡཱ ས་ནྟཱི་ར་ཎཾ ཧུ་ཏྭཱ, བ་ལ་ཝཱ་ར་མྨ་ཎེ ཚ་སུ དྭཱ་རེ་སུ ཏ་དཱ་ར་མྨ་ཎཾ ཧུ་ཏྭཱ, མ་ར་ཎ་ཀཱ་ལེ ཙུ་ཏི ཧུ་ཏྭཱ ཝི་པ་ཙྩ་ཏི. ཨེ་ཝཾ པ་ཉྩ་སུ ཋཱ་ནེ་སུ ཝི་པ་ཙྩ་ཏི. ཀེ་ཝ་ལཾ ཧི ཏཱ་ནི ཀུ་ས་ལ་ཝི་པཱ་ཀཱ་ཧེ་ཏུ་ཀ་ཙི་ཏྟཱ་ནི ཀུ་ས་ལ་ཀ་མྨ་པ་ཙྩ་ཡཱ་ནི, ཨི་མཱ་ནི ཨ་ཀུ་ས་ལ་ཀ་མྨ་པ་ཙྩ་ཡཱ་ནི. ཨ་ཡ་མི་མེ་སཾ, ཏེ་ས་ཉྩ ཝི་སེ་སོ.
༥༤. ཨ་ནི་ཊྛཱ་ནི་ཊྛ་མ་ཛ྄ཛྷ་ཏྟ་གོ་ཙ་རེ ཝ་ཏྟ་རེ ཨི་མེ;
སུ་ཁཱ་དི་ཏྟ་ཡ་ཡུ་ཏྟཱ ཏེ, དུ་ཀྑུ་པེ་ཀྑཱ་ཡུ་ཏཱ ཨི་མེ.
ཨེ་ཝཾ ཀཱ་མཱ་ཝ་ཙ་ར་ཀུ་ས་ལ་ཝི་པཱ་ཀ་ས་ཧེ་ཏུ་ཀ་མ་ཊྛ་ཝི་དྷཾ, ཨ་ཧེ་ཏུ་ཀ་མ་ཊྛ་ཝི་དྷཾ, ཛྷཱ་ན་ངྒ་ཡོ་ག་བྷེ་ད་ཏོ རཱུ་པཱ་ཝ་ཙ་ར་ཝི་པཱ་ཀཾ པ་ཉྩ་ཝི་དྷཾ, ཨཱ་ར་མྨ་ཎ་བྷེ་ད་ཏོ ཨ་རཱུ་པཱ་ཝ་ཙ་ར་ཝི་པཱ་ཀཾ ཙ་ཏུ་བྦི་དྷཾ, མ་གྒ་ས་མྤ་ཡུ་ཏྟ་ཙི་ཏྟ་ཕ་ལ་བྷེ་ད་ཏོ ལོ་ཀུ་ཏྟ་ར་ཝི་པཱ་ཀཾ ཙ་ཏུ་བྦི་དྷཾ, ཙ་ཀྑུ་ཝི་ཉྙཱ་ཎཱ་དི་བྷེ་ད་ཏོ ཨ་ཀུ་ས་ལ་ཝི་པཱ་ཀཾ ས་ཏྟ་ཝི་དྷ་ནྟི ཚ་ཏྟིཾ་ས་ཝི་དྷཾ ཝི་པཱ་ཀ་ཙི་ཏྟཾ ཝེ་དི་ཏ་བྦཾ.
༥༥. ཨེ་ཝཾ ཚ་ཏྟིཾ་ས་དྷཱ པཱ་ཀཾ, པཱ་ཀ་སཱ་ས་ན་པཱུ་ཛི་ཏོ;
ས་ཝི་པཱ་ཀཱ་ཝི་པཱ་ཀེ་སུ, ཀུ་ས་ལོ སུ་ག་ཏོ་བྲ་ཝི.
ཀི་རི་ཡཱ་བྱཱ་ཀ་ཏ་ཙི་ཏྟཾ པ་ན ཨ་ཝི་པཱ་ཀ་ཏོ ཨེ་ཀ་ཝི་དྷཾ, པ་རི་ཏྟ་མ་ཧ་གྒ་ཏ་ཏོ དུ་ཝི་དྷཾ, ཀཱ་མཱ་ཝ་ཙ་ར་རཱུ་པཱ་ཝ་ཙ་ར་ཨ་རཱུ་པཱ་ཝ་ཙ་ར་བྷཱུ་མི་བྷེ་ད་ཏོ ཏི་ཝི་དྷཾ. ཏ་ཏྠ ཀཱ་མཱ་ཝ་ཙ་རཾ དུ་ཝི་དྷཾ ས་ཧེ་ཏུ་ཀ་མ་ཧེ་ཏུ་ཀ་ནྟི. ཏ་ཏྠ ས་ཧེ་ཏུ་ཀཾ ཨེ་ཀ་ཝི་དྷཾ ཨ་ར་ཧ་ཏོ ཨེ་ཝ ཨུ་པྤ་ཛྫ་ན་ཏོ. སོ་མ་ན་སྶུ་པེ་ཀྑཱ་ཉཱ་ཎ་པྤ་ཡོ་ག་བྷེ་ད་ཏོ ཀཱ་མཱ་ཝ་ཙ་ར་ཀུ་ས་ལཾ ཝི་ཡ ཨ་ཊྛ་ཝི་དྷཾ ཧོ་ཏི. སེ་ཡྻ་ཐི་དཾ – སོ་མ་ན་སྶ་ས་ཧ་ག་ཏཾ ཉཱ་ཎ་ས་མྤ་ཡུ་ཏྟཾ ཨ་ས་ངྑཱ་རི་ཀཾ, ས་ས་ངྑཱ་རི་ཀཾ, སོ་མ་ན་སྶ་ས་ཧ་ག་ཏཾ ཉཱ་ཎ་ཝི་པྤ་ཡུ་ཏྟཾ ཨ་ས་ངྑཱ་རི་ཀཾ, ས་ས་ངྑཱ་རི་ཀཾ, ཨུ་པེ་ཀྑཱ་ས་ཧ་ག་ཏཾ ཉཱ་ཎ་ས་མྤ་ཡུ་ཏྟཾ ཨ་ས་ངྑཱ་རི་ཀཾ, ས་ས་ངྑཱ་རི་ཀཾ, ཨུ་པེ་ཀྑཱ་ས་ཧ་ག་ཏཾ ཉཱ་ཎ་ཝི་པྤ་ཡུ་ཏྟཾ ཨ་ས་ངྑཱ་རི་ཀཾ, ས་ས་ངྑཱ་རི་ཀ་ནྟི ཨི་མཱ་ནི ཨ་ཊྛ ས་ཧེ་ཏུ་ཀ་ཀི་རི་ཡ་ཙི་ཏྟཱ་ནི. ཨེ་ཏཱ་ནི པ་ན ཡ་ཐཱ་ནུ་རཱུ་པཾ དཱ་ནཱ་དི་ཝ་སེ་ན ཁཱི་ཎཱ་ས་ཝཱ་ནཾ་ཡེ་ཝ པ་ཝ་ཏྟ་ནྟི. ཨེ་ཝཾ ས་ཧེ་ཏུ་ཀ་ཀི་རི་ཡ་ཙི་ཏྟཱ་ནི ཝེ་དི་ཏ་བྦཱ་ནི.
ཨ་ཧེ་ཏུ་ཀ་ཀི་རི་ཡ་ཙི་ཏྟཾ པ་ན ཏི་ཝི་དྷཾ ཀི་རི་ཡཱ་ཧེ་ཏུ་ཀ་མ་ནོ་དྷཱ་ཏུ་ཨུ་པེ་ཀྑཱ་ས་ཧ་ག་ཏཱ་ཝ་ཛྫ་ན་ཙི་ཏྟཾ, ཀི་རི་ཡཱ་ཧེ་ཏུ་ཀ་མ་ནོ་ཝི་ཉྙཱ་ཎ་དྷཱ་ཏུ་སོ་མ་ན་སྶ་ས་ཧ་ག་ཏཾ ཧ་སི་ཏུ་པྤཱ་ད་ཙི་ཏྟཾ, ཀི་རི་ཡཱ་ཧེ་ཏུ་ཀ་མ་ནོ་ཝི་ཉྙཱ་ཎ་དྷཱ་ཏུ་ཨུ་པེ་ཀྑཱ་ས་ཧ་ག་ཏཾ ཝོ་ཊྛ་བྦ་ན་ཙི་ཏྟ་ནྟི.
ཏ་ཏྠ ཀི་རི་ཡཱ་ཧེ་ཏུ་ཀ་མ་ནོ་དྷཱ་ཏུ ཨུ་པེ་ཀྑཱ་ས་ཧ་ག་ཏཱ ཧ་ད་ཡ་ཝ་ཏྠུཾ ནི་སྶཱ་ཡ ཙ་ཀྑུ་དྭཱ་རེ ཨི་ཊྛ་ཨི་ཊྛ་མ་ཛ྄ཛྷ་ཏྟ་ཨ་ནི་ཊྛ་ཨ་ནི་ཊྛ་མ་ཛ྄ཛྷ་ཏྟེ་སུ རཱུ་པཱ་ར་མྨ་ཎེ་སུ ཡེ་ན ཀེ་ན་ཙི པ་སཱ་དེ གྷ་ཊྚི་ཏེ ཏཾ ཏཾ ཨཱ་ར་མྨ་ཎཾ ག་ཧེ་ཏྭཱ ཨཱ་ཝ་ཛྫ་ན་ཝ་སེ་ན ཙ་ཀྑུ་ཝི་ཉྙཱ་ཎ་སྶ པུ་རེ་ཙཱ་རཱི ཧུ་ཏྭཱ བྷ་ཝ་ངྒཾ ཨཱ་ཝ་ཊྚ་ཡ་མཱ་ནཱ ཨུ་པྤ་ཛྫ་ཏི. སོ་ཏ་དྭཱ་རཱ་དཱི་སུ་པི ཨེ་སེ་ཝ ན་ཡོ. ཨི་ཏ་རཱ པ་ན དྭེ ཨ་ཧེ་ཏུ་ཀ་མ་ནོ་ཝི་ཉྙཱ་ཎ་དྷཱ་ཏུ་ཡོ སཱ་དྷཱ་ར་ཎཱ་སཱ་དྷཱ་ར་ཎཱ་ཏི དུ་ཝི་དྷཱ ཧོ་ནྟི. ཏ་ཏྠ ཨ་སཱ་དྷཱ་ར་ཎཱ པ་ན ཀི་རི་ཡཱ་ཧེ་ཏུ་ཀ་མ་ནོ་ཝི་ཉྙཱ་ཎ་དྷཱ་ཏུ སོ་མ་ན་སྶ་ས་ཧ་ག་ཏཱ ཁཱི་ཎཱ་ས་ཝ་སྶེ་ཝ ཚ་སུ དྭཱ་རེ་སུ ཚ་སུ ཨ་ནུ་ལཱ༹་རེ་སུ ཨཱ་ར་མྨ་ཎེ་སུ ཧ་སི་ཏུ་པྤཱ་ད་ཀི་ཙྩཱ ནི་ཡ་ཏ་ཝ་ཏྠུ་ཀཱ ཨུ་པྤ་ཛྫ་ཏི. སཱ་དྷཱ་ར་ཎཱ པ་ན ཨ་ཧེ་ཏུ་ཀ་མ་ནོ་ཝི་ཉྙཱ་ཎ་དྷཱ་ཏུ ཨུ་པེ་ཀྑཱ་ས་ཧ་ག་ཏཱ ཚ་ལཱ༹་ར་མྨ་ཎ་ཝི་ཛཱ་ན་ན་ལ་ཀྑ་ཎཱ, ཏ་ཐཱ་བྷཱ་ཝ་པ་ཙྩུ་པ་ཊྛཱ་ནཱ, སཱ ཏཱི་སུ བྷ་ཝེ་སུ ས་བྦེ་སཾ ས་ཙི་ཏྟ་ཀ་ས་ཏྟཱ་ནཾ སཱ་དྷཱ་ར་ཎཱ, ན ཀ་སྶ་ཙི པ་ན ས་ཙི་ཏྟ་ཀ་སྶ ན ཨུ་པྤ་ཛྫ་ཏི ནཱ་མ. ཨུ་པྤ་ཛྫ་མཱ་ནཱ པ་ནཱ་ཡཾ པ་ཉྩ་དྭཱ་ར་མ་ནོ་དྭཱ་རེ་སུ ཝོ་ཊྛ་བྦ་ནཱ་ཝ་ཛྫ་ན་ཀི་ཙྩཱ ཨུ་པྤ་ཛྫ་ཏི. ཚ ཨ་སཱ་དྷཱ་ར་ཎ་ཉཱ་ཎཱ་ནི་པི ཨེ་ཏཱ་ཡ ག་ཧི་ཏཱ་ར་མྨ་ཎ་མེ་ཝ ག་ཎྷ་ནྟི. ས་བྦཱ་ར་མྨ་ཎ་ག་ཧ་ཎ་ས་མ་ཏྠ་ཏཱ་ཡ ས་བྦ་ཉྙུ་ཏ་ཉྙཱ་ཎ་ག་ཏི་ཀཱ་ཏི ཝེ་དི་ཏ་བྦཱ. ཨི་མཱ་ནི ཏཱི་ཎི ཨ་ཧེ་ཏུ་ཀ་ཀི་རི་ཡ་ཙི་ཏྟཱ་ནི.
ཨི་དྷ ཋ་ཏྭཱ ཧ་ས་ན་ཙི་ཏྟཱ་ནི པ་རི་གྒ་ཎྷི་ཏ་བྦཱ་ནི. ཏེ་ར་ས ཧ་ས་ན་ཙི་ཏྟཱ་ནི. ཀུ་ས་ལ་ཏོ ཙ་ཏཱུ་ཧི སོ་མ་ན་སྶ་ས་ཧ་ག་ཏེ་ཧི, ཨ་ཀུ་ས་ལ་ཏོ ཙ་ཏཱུ་ཧཱི་ཏི ཨི་མེ་ཧི ཨ་ཊྛ་ཧི ཙི་ཏྟེ་ཧི པུ་ཐུ་ཛྫ་ནཱ ཧ་ས་ནྟི, སེ་ཁཱ པ་ན ཀུ་ས་ལ་ཏོ ཙ་ཏཱུ་ཧི, ཨ་ཀུ་ས་ལ་ཏོ དྭཱི་ཧི དི་ཊྛི་ག་ཏ་ཝི་པྤ་ཡུ་ཏྟ་སོ་མ་ན་སྶ་ས་ཧ་ག་ཏེ་ཧཱི་ཏི ཚ་ཧི ཧ་ས་ནྟི, ཁཱི་ཎཱ་ས་ཝཱ ཀི་རི་ཡ་ཏོ པ་ཉྩ་ཧི སོ་མ་ན་སྶ་ས་ཧ་ག་ཏེ་ཧི ཧ་ས་ནྟཱི་ཏི.
༥༦. སོ་མ་ན་སྶ་ཡུ་ཏཱ་ན་ཊྛ, ཀུ་ས་ལཱ་ཀུ་ས་ལཱ་ནི ཙ;
ཀྲི་ཡ་ཏོ པ་ན པ་ཉྩེ་ཝཾ, ཧཱ་ས་ཙི་ཏྟཱ་ནི ཏེ་ར་ས.
༥༧. པུ་ཐུ་ཛྫ་ནཱ ཧ་ས་ནྟེ་ཏྠ, ཙི་ཏྟེ་ཧི པ་ན ཨ་ཊྛ་ཧི;
ཚ་ཧི སེ་ཁཱ ཨ་སེ་ཁཱ ཙ, ཧ་ས་ནྟི པ་ན པ་ཉྩ་ཧི.
ཨི་དཱ་ནི རཱུ་པཱ་ཝ་ཙ་ར་ཀི་རི་ཡ་ཙི་ཏྟཱ་ནི ཧོ་ནྟི. ཝི་ཏ་ཀྐ་ཝི་ཙཱ་ར་པཱི་ཏི་སུ་ཁ་ཙི་ཏྟེ་ཀ་གྒ་ཏཱ་ས་མྤ་ཡུ་ཏྟཾ པ་ཋ་མཾ, ཝི་ཙཱ་ར་པཱི་ཏི་སུ་ཁ་ཙི་ཏྟེ་ཀ་གྒ་ཏཱ་ས་མྤ་ཡུ་ཏྟཾ དུ་ཏི་ཡཾ, པཱི་ཏི་སུ་ཁ་ཙི་ཏྟེ་ཀ་གྒ་ཏཱ་ས་མྤ་ཡུ་ཏྟཾ ཏ་ཏི་ཡཾ, སུ་ཁ་ཙི་ཏྟེ་ཀ་གྒ་ཏཱ་ས་མྤ་ཡུ་ཏྟཾ ཙ་ཏུ་ཏྠཾ, ཨུ་པེ་ཀྑཱ་ཙི་ཏྟེ་ཀ་གྒ་ཏཱ་ས་མྤ་ཡུ་ཏྟཾ པ་ཉྩ་མ་ནྟི ཨི་མཱ་ནི པ་ཉྩ རཱུ་པཱ་ཝ་ཙ་ར་ཀི་རི་ཡ་ཙི་ཏྟཱ་ནི.
ཨི་དཱ་ནི ཨ་རཱུ་པཱ་ཝ་ཙ་ར་ཀི་རི་ཡ་ཙི་ཏྟཱ་ནི ཝུ་ཙྩ་ནྟི. ཨཱ་ཀཱ་སཱ་ན་ཉྩཱ་ཡ་ཏ་ན་ས་ཉྙཱ་ས་ཧ་ག་ཏཾ, ཝི་ཉྙཱ་ཎ་ཉྩཱ་ཡ་ཏ་ན་ས་ཉྙཱ་ས་ཧ་ག་ཏཾ, ཨཱ་ཀི་ཉྩ་ཉྙཱ་ཡ་ཏ་ན་ས་ཉྙཱ་ས་ཧ་ག་ཏཾ, ནེ་ཝ་ས་ཉྙཱ་ནཱ་ས་ཉྙཱ་ཡ་ཏ་ན་ས་ཉྙཱ་ས་ཧ་ག་ཏ་ནྟི ཨི་མཱ་ནི ཙ་ཏྟཱ་རི ཨ་རཱུ་པཱ་ཝ་ཙ་ར་ཀི་རི་ཡ་ཙི་ཏྟཱ་ནི. ཨི་མཱ་ནི པ་ན རཱུ་པཱ་རཱུ་པ་ཀི་རི་ཡ་ཙི་ཏྟཱ་ནི ས་ཀ་ས་ཀ་བྷཱུ་མི་ཀུ་ས་ལ་ས་དི་སཱ་ནི. ཀེ་ཝ་ལཾ པ་ནེ་ཏཱ་ནི ཀི་རི་ཡ་ཙི་ཏྟཱ་ནི ཁཱི་ཎཱ་ས་ཝཱ་ནཾ་ཡེ་ཝ ཨུ་པྤ་ཛྫ་ནྟི, ཀུ་ས་ལཱ་ནི པ་ན སེ་ཁ་པུ་ཐུ་ཛྫ་ནཱ་ནཾ. ཨི་མཱ་ནི ཙ ཁཱི་ཎཱ་ས་ཝཱ་ནཾ བྷཱ་ཝ་ནཱ་ཀཱ་ར་ཝ་ས་པྤ་ཝ་ཏྟཱ་ནི, ཏཱ་ནི པ་ན སེ་ཁ་པུ་ཐུ་ཛྫ་ནཱ་ནཾ བྷཱ་ཝ་ནཱ་པུ་ཉྙ་ཝ་ས་པྤ་ཝ་ཏྟཱ་ནཱི་ཏི ཨ་ཡ་མེ་ཝ ཨི་མེ་སཾ, ཏེ་ས་ཉྩ ཝི་སེ་སོ.