༡༨. ཨ་ཊྛཱ་ར་ས་མོ པ་རི་ཙྪེ་དོ
དི་ཊྛི་ཝི་སུ་དྡྷི་ནི་དྡེ་སོ
༡༡༧༠. ས་མཱ་དྷིཾ པ་ན སཱ་བྷི་ཉྙཾ, བྷཱ་ཝེ་ཏྭཱ ཏ་ད་ན་ནྟ་རཾ;
བྷཱ་ཝེ་ཏ་བྦཱ ཡ་ཏོ པ་ཉྙཱ, བྷི་ཀྑུ་ནཱ ཏེ་ན དྷཱི་མ་ཏཱ.
༡༡༧༡. ཏ་ཏོ་ཧཾ དཱ་ནི ཝ་ཀྑཱ་མི, པ་ཉྙཱ་བྷཱ་ཝ་ན་མུ་ཏྟ་མཾ;
ས་མཱ་སེ་ནེ་ཝ བྷི་ཀྑཱུ་ནཾ, པ་རཾ པཱི་ཏི་སུ་ཁཱ་ཝ་ཧཾ.
༡༡༧༢. ཀཱ པ་ཉྙཱ པ་ན ཀོ ཙ་ཏྠོ,
ཀི་མ་སྶཱ ལ་ཀྑ་ཎཱ་དི་ཀཾ;
ཀ་ཏི་དྷཱ སཱ ཀ་ཐཾ ཏེ་ན,
བྷཱ་ཝེ་ཏ་བྦཱ་ཏི ཝུ་ཙྩ་ཏེ. –
༡༡༧༣. པ་ཉྙཱ ཝི་པ་སྶ་ནཱ་པ་ཉྙཱ, པུ་ཉྙ་ཙི་ཏྟ་ས་མཱ་ཡུ་ཏཱ;
པ་ཛཱ་ནཱ་ཏཱི་ཏི པ་ཉྙཱ སཱ, ཛཱ་ན་ནཱ ཝཱ པ་ཀཱ་ར་ཏོ.
༡༡༧༤. ས་ཉྙཱ་ཝི་ཉྙཱ་ཎ་པ་ཉྙཱ་ནཾ, ཀོ ཝི་སེ་སོ ཀི་མ་ནྟ་རཾ;
ས་ཉྙཱ་ཝི་ཉྙཱ་ཎ་པ་ཉྙཱ་ནཾ, ཛཱ་ན་ན་ཏྟེ ས་མེ་པི ཙ.
༡༡༧༥. ཡཱ ས་ཉྫཱ་ན་ན་མ་ཏྟཾ་ཝ, ས་ཉྙཱ ནཱི་ལཱ་དི་ཏོ པ་ན;
ལ་ཀྑ་ཎ་པྤ་ཊི་ཝེ་དྷཾ ཏུ, ཀཱ་ཏུཾ ས་ཀྐོ་ཏི ནེ་ཝ སཱ.
༡༡༧༦. ཝི་ཉྙཱ་ཎཾ པ་ན ཛཱ་ནཱ་ཏི, ནཱི་ལ་པཱི་ཏཱ་དི་གོ་ཙ་རཾ;
ས་ཀྐོ་ཏི་པི ཨ་ནི་ཙྩཱ་དི་ལ་ཀྑ་ཎཾ པ་ཊི་ཝི་ཛ྄ཛྷི་ཏུཾ.
༡༡༧༧. ཨུ་སྶ་ཀྐི་ཏྭཱ ན ས་ཀྐོ་ཏི, མ་གྒཾ པཱ་པེ་ཏུ་མེ་ཝ ཏཾ;
པ་ཉྙཱ ཝུ་ཏྟ་ན་ཡཾ ཀཱ་ཏུཾ, ས་ཀྐོ་ཏི ཏི་ཝི་དྷ་མྤི ཏཾ.
༡༡༧༨. ཨི་མེ་སཾ པ་ན ཏི་ཎྞ་མྤི, ཝི་སེ་སོ ས་མུ་དཱི་རི་ཏོ;
ས་བྦེ་སཾ པ་ན དྷ་མྨཱ་ནཾ, ས་བྷཱ་ཝ་པ་ཊི་ཝེ་དྷ་ནཾ.
༡༡༧༩. ལ་ཀྑ་ཎཾ པ་ན པ་ཉྙཱ་ཡ, ལ་ཀྑ་ཎ་ཉྙཱུ་ཧི དཱི་པི་ཏཾ;
ས་མྨོ་ཧ་ན་ནྡྷ་ཀཱ་ར་སྶ, ཝི་དྡྷཾ་ས་ན་ར་སཱ མ་ཏཱ.
༡༡༨༠. ཨ་ས་མྨོ་ཧ་པ་ཙྩུ་པ་ཊྛཱ་ནཱ, ས་མཱ་དྷཱ་ས་ནྣ་ཀཱ་ར་ཎཱ;
ཨེ་ཝ་མེ་ཏྠ ཙ ཝི་ཉྙེ་ཡྻཱ, པ་ཉྙཱ་ཡ ལ་ཀྑ་ཎཱ་དི་ཀཱ.
ཀ་ཏི་དྷཱཏི ཨེ་ཏྠ –
༡༡༨༡. ལ་ཀྑ་ཎེ་ནེཀ་དྷཱ ཝུ་ཏྟཱ,
ལོ་ཀི་ཀཱ་ལོ་ཀི་ཀཱ དྭི་དྷཱ;
ལོ་ཀི་ཡེ་ནེ་ཏྠ མ་གྒེ་ན,
ཡུ་ཏྟཱ སཱ ལོ་ཀི་ཀཱ སི་ཡཱ.
༡༡༨༢. ལོ་ཀུ་ཏྟ་རེ་ན མ་གྒེ་ན, ཡུ་ཏྟཱ ལོ་ཀུ་ཏྟ་རཱ མ་ཏཱ;
ཏི་ཝི་དྷཱཔི སི་ཡཱ པ་ཉྙཱ, ཙི་ནྟཱ་སུ་ཏ་མ་ཡཱ་དི་ཏོ.
༡༡༨༣. ཏ་ཏྠ་ཏྟ་ནོ་ཝ ཙི་ནྟཱ་ཡ, ནི་པྥ་ནྣ་ཏྟཱ་ཏི ཏ་སྶ སཱ;
ཧོ་ཏི ཙི་ནྟཱ་མ་ཡཱ པ་ཉྙཱ, བྷཱུ་རི་པ་ཉྙེ་ན དེ་སི་ཏཱ.
༡༡༨༤. པ་ར་ཏོ པ་ན སུ་ཏྭཱ་ན, ལ་དྡྷཱ པ་ཉྙཱ ཨ་ཡཾ ཨི་དྷ;
སུ་ཏེ་ནེ་ཝ ཙ ནི་པྥ་ནྣཱ, པ་ཉྙཱ སུ་ཏ་མ་ཡཱ མ་ཏཱ.
༡༡༨༥. ཡ་ཐཱ ཝཱ་པི ཏ་ཐཱ ཙེ་ཏྠ, བྷཱ་ཝ་ནཱ་ཡ ཝ་སེ་ན ཏུ;
ནི་པྥ་ནྣཱ ཨ་པྤ་ནཱ་པ་ཏྟཱ, པ་ཉྙཱ སཱ བྷཱ་ཝ་ནཱ་མ་ཡཱ.
༡༡༨༦. པ་ཊི་ས་མྦྷི་དཱ་ཙ་ཏུ་ཀྐ་སྶ, ཝ་སེ་ན ཙ་ཏུ་དྷཱ སི་ཡཱ;
ཨ་ཏྠ་དྷ་མྨ་ནི་རུ་ཏྟཱི་སུ, ཉཱ་ཎཾ ཉཱ་ཎེ་སུ ཏཱི་སུ་པི.
༡༡༨༧. ཡཾ ཀི་ཉྩི པ་ཙྩ་ཡུ་པྤ་ནྣཾ, ཝི་པཱ་ཀཱ ཙ ཀྲི་ཡཱ ཏ་ཐཱ;
ནི་བྦཱ་ནཾ བྷཱ་སི་ཏ་ཏྠོ ཙ, པ་ཉྩེ་ཏེ ཨ་ཏྠ་ས་ཉྙི་ཏཱ.
༡༡༨༨. ཕ་ལ་ནི་བྦ་ཏྟ་ཀོ ཧེ་ཏུ, ཨ་རི་ཡ་མ་གྒོ ཙ བྷཱ་སི་ཏཾ;
ཀུ་ས་ལཱ་ཀུ་ས་ལ་ཉྩེ་ཏི, པ་ཉྩེ་ཏེ དྷ་མྨ་ས་ཉྙི་ཏཱ.
༡༡༨༩. ཏ་སྨིཾ ཨ་ཏྠེ ཙ དྷ་མྨེ ཙ, ཡཱ ས་བྷཱ་ཝ་ནི་རུ་ཏྟི ཏུ;
ནི་རུ་ཏྟཱི་ཏི ཙ ནི་དྡི་ཊྛཱ, ནི་རུ་ཏྟི་ཀུ་ས་ལེ་ན སཱ.
༡༡༩༠. ཉཱ་ཎཾ ཨཱ་ར་མྨ་ཎཾ ཀ་ཏྭཱ, ཏི་ཝི་དྷཾ པ་ཙྩ་ཝེ་ཀྑ་ཏོ;
ཏེ་སུ ཉཱ་ཎེ་སུ ཡཾ ཉཱ་ཎཾ, པ་ཊི་བྷཱ་ན་ནྟི ཏཾ མ་ཏཾ.
༡༡༩༡. པ་རི་ཡ་ཏྟི་པ་རི་པུ་ཙྪཱ་ཧི, ས་ཝ་ནཱ་དྷི་ག་མེ་ཧི ཙ;
པུ་བྦ་ཡོ་གེ་ན ག་ཙྪ་ནྟི, པ་བྷེ་དཾ པ་ཊི་ས་མྦྷི་དཱ.
ཀ་ཐཾ བྷཱ་ཝེ་ཏ་བྦཱཏི ཨེ་ཏྠ –
༡༡༩༢. ཁ་ནྡྷཱ་དཱི་སུ ཧི དྷ་མྨེ་སུ, བྷཱུ་མི་བྷཱུ་ཏེ་སུ ཡོ་གི་ནཱ;
ཨུ་གྒ་ཧཱ་དི་ཝ་སེ་ནེ་ཏྠ, ཀ་ཏྭཱ པ་རི་ཙ་ཡཾ པ་ན.
༡༡༩༣. སཱི་ལཾ ཙི་ཏྟ་ཝི་སུ་དྡྷིཉྩ, ས་མྤཱ་དེ་ཏྭཱ ཏ་ཏོ པ་རཾ;
དི་ཊྛི་སུ་དྡྷཱ་ད་ཡོ པ་ཉྩ, ས་མྤཱ་དེ་ནྟེ་ན སུ་དྡྷི་ཡཱ.
༡༡༩༤. ཏཱ་ཡ པ་ཉྙཱ་ཡ ཡུ་ཏྟེ་ན, བྷཱི་ཏེ་ན ཛ་ན་ནཱ་དི་ཏོ;
བྷཱ་ཝེ་ཏ་བྦཱ བྷ་ཝཱ་བྷཱ་ཝཾ, པ་ཏྠ་ཡ་ནྟེ་ན བྷི་ཀྑུ་ནཱ.
༡༡༩༥. རཱུ་པ་ཉྩ ཝེ་ད་ནཱ ས་ཉྙཱ, ས་ངྑཱ་རཱ ཙེ་ཝ ས་བྦ་སོ;
ཝི་ཉྙཱ་ཎ་ཉྩེ་ཏི པ་ཉྩེ་ཏེ, ཁ་ནྡྷཱ ས་མྦུ་དྡྷ་དེ་སི་ཏཱ.
༡༡༩༦. ཏ་ཏྠ ཡཾ ཀི་ཉྩི རཱུ་པཾ ཏཾ, ཨ་ཏཱི་ཏཱ་ནཱ་ག་ཏཱ་དི་ཀཾ;
ཨ་ཛ྄ཛྷ་ཏྟཾ ཝཱ བ་ཧི་དྡྷཱ ཝཱ, སུ་ཁུ་མོ་ལཱ༹་རི་ཀ་མྤི ཝཱ.
༡༡༩༧. ཧཱི་ནཾ ཝཱ་པི པ་ཎཱི་ཏཾ ཝཱ, ཡཾ དཱུ་རེ ཡ་ཉྩ ས་ནྟི་ཀེ;
ས་བྦཾ ཏ་མེ་ཀ་ཏོ ཀ་ཏྭཱ, རཱུ་པ་ཀྑ་ནྡྷོཏི ཝུ་ཙྩ་ཏི.
༡༡༩༨. ཨི་ཏ་རེ་སུ་པི ཡཾ ཀི་ཉྩི, ཏཾ ཝེ་ད་ཡི་ཏ་ལ་ཀྑ་ཎཾ;
ས་བྦཾ ཏ་མེ་ཀ་ཏོ ཀ་ཏྭཱ, ཝེ་ད་ནཱ་ཀྑ་ནྡྷ་ཏཱ ཀ་ཏཱ.
༡༡༩༩. ཙི་ཏྟ་ཛཾ པ་ན ཡཾ ཀི་ཉྩི, ཏཾ ས་ཉྫཱ་ན་ན་ལ་ཀྑ་ཎཾ;
ས་བྦཾ ཏ་མེ་ཀ་ཏོ ཀ་ཏྭཱ, ས་ཉྙཱ་ཀྑ་ནྡྷོཏི ཝུ་ཙྩ་ཏི.
༡༢༠༠. ཡཾ ཀི་ཉྩི ཙི་ཏྟ་ས་མྦྷཱུ་ཏཾ, ཨ་བྷི་ས་ངྑཱ་ར་ལ་ཀྑ་ཎཾ;
ས་བྦཾ ཏ་མེ་ཀ་ཏོ ཀ་ཏྭཱ, ས་ངྑཱ་ར་ཀྑ་ནྡྷ་ཏཱ ཀ་ཏཱ.
༡༢༠༡. ཏ་ཏྠ ཙི་ཏྟཾ ཏུ ཡཾ ཀི་ཉྩི, ཏཾ ཝི་ཛཱ་ན་ན་ལ་ཀྑ་ཎཾ;
ས་བྦཾ ཏ་མེ་ཀ་ཏོ ཀ་ཏྭཱ, ཝི་ཉྙཱ་ཎ་ཀྑ་ནྡྷ་ཏཱ ཀ་ཏཱ.
༡༢༠༢. ཙ་ཏྟཱ་རོ ཙ མ་ཧཱ་བྷཱུ་ཏཱ, ཨུ་པཱ་དཱ ཙ་ཏུ་ཝཱི་ས་ཏི;
ཨ་ཊྛ་ཝཱི་ས་ཏི་དྷཱ ཙེ་ཏཾ, རཱུ་པཾ རཱུ་པ་ནྟི ག་ཎྷ་ཏི.
༡༢༠༣. ཨེ་ཀཱ་སཱི་ཏི་ཡཱ ཙི་ཏྟེ་ན, སཾ་ཡུ་ཏྟཱ ཝེ་ད་ནཱ་ད་ཡོ;
ཝེ་ད་ནཱ་ས་ཉྙཱ་ས་ངྑཱ་ར-ཝི་ཉྙཱ་ཎ་ཀྑ་ནྡྷ་ས་ཉྙི་ཏཱ.
༡༢༠༤. ཙ་ཏྟཱ་རོ་རཱུ་པི་ནོ ཁ་ནྡྷེ, ནཱ་མ་ནྟི པ་རི་ག་ཎྷ་ཏི;
རཱུ་པ་ཀྑ་ནྡྷོ བྷ་ཝེ རཱུ་པཾ, ནཱ་མ་ཀྑ་ནྡྷཱ ཨ་རཱུ་པི་ནོ.
༡༢༠༥. རུ་པྤ་ན་ལ་ཀྑ་ཎཾ རཱུ་པཾ, ནཱ་མཾ ན་མ་ན་ལ་ཀྑ་ཎཾ;
ཨི་ཏི ས་ངྑེ་པ་ཏོ ནཱ་མ-རཱུ་པཾ སོ པ་རི་ག་ཎྷ་ཏི.
༡༢༠༦. ཕཱ་ལེ་ནྟོ ཝི་ཡ ཏཱ་ལ་སྶ, ཀ་ནྡཾ ཏུ ཡ་མ་ཀཾ དྭི་དྷཱ;
ཝ་ཝ་ཏྠ་པེ་ཏི ནཱ་མ་ཉྩ, རཱུ་པ་ཉྩཱ་ཏི དྭི་དྷཱ པ་ན.
༡༢༠༧. ནཱ་མ་ཏོ རཱུ་པ་ཏོ ཨ་ཉྙོ,
ས་ཏྟོ ཝཱ པུ་གྒ་ལོ་པི ཝཱ;
ཨ་ཏྟཱ ཝཱ ཀོ་ཙི ན་ཏྠཱི་ཏི,
ནི་ཊྛཾ ག་ཙྪ་ཏི ས་བྦ་དཱ.
༡༢༠༨. ཨེ་ཝཾ ཝ་ཝ་ཏྠ་པེ་ཏྭཱ སོ, ནཱ་མ་རཱུ་པཾ ས་བྷཱ་ཝ་ཏོ;
ས་ཏྟ་ས་མྨོ་ཧ་གྷཱ་ཏ་ཏྠཾ, བ་ཧུ་སུ་ཏྟ་ཝ་སེ་ནི་དྷ.
༡༢༠༩. ནཱ་མ་རཱུ་པ་མ་ཏྟ་ཉྙེ་ཝ, ན་ཏྠི ཀོ་ཙི་དྷ པུ་གྒ་ལོ;
ཨེ་ཝ་མེ་ཏྠ པ་ཎྜི་ཏོ པོ་སོ, ཝ་ཝ་ཏྠ་པེ་ཏི ཏཾ པ་ན.
ཝུ་ཏྟཾ ཧེ་ཏཾ –
༡༢༡༠. ‘‘ཡ་ཐཱ་པི ཨ་ངྒ་ས་མྦྷཱ་རཱ,
ཧོ་ཏི ས་དྡོ ར་ཐོ ཨི་ཏི;
ཨེ་ཝཾ ཁ་ནྡྷེ་སུ ས་ནྟེ་སུ,
ཧོ་ཏི ས་ཏྟོ་ཏི ས་མྨུ་ཏཱི’’ཏི.
༡༢༡༡. ཡ་ཐཱ་པི དཱ་རུ་ཡ་ནྟ་མྤི, ནི་ཛྫཱི་ཝ་ཉྩ ནི་རཱི་ཧ་ཀཾ;
དཱ་རུ་ར་ཛྫུ་ས་མཱ་ཡོ་གེ, ཏཾ ག་ཙྪ་ཏི་པི ཏི་ཊྛ་ཏི.
༡༢༡༢. ཏ་ཐེ་དཾ ནཱ་མ་རཱུ་པ་མྤི, ནི་ཛྫཱི་ཝ་ཉྩ ནི་རཱི་ཧ་ཀཾ;
ཨ་ཉྙ་མ་ཉྙ་ས་མཱ་ཡོ་གེ, ཏཾ ག་ཙྪ་ཏི་པི ཏི་ཊྛ་ཏི.
ཏེ་ནཱ་ཧུ པོ་རཱ་ཎཱ –
༡༢༡༣. ‘‘ནཱ་མ་ཉྩ རཱུ་པ་ཉྩ ཨི་དྷ་ཏྠི ས་ཙྩ་ཏོ,
ན ཧེ་ཏྠ ས་ཏྟོ མ་ནུ་ཛོ ཙ ཝི་ཛྫ་ཏི;
སུ་ཉྙཾ ཨི་དཾ ཡ་ནྟ་མི་ཝཱ་བྷི་ས་ངྑ་ཏཾ,
དུ་ཀྑ་སྶ པུ་ཉྫོ ཏི་ཎ་ཀ་ཊྛ་སཱ་དི་སོ’’ཏི.
༡༢༡༤. ཨ་ཉྙ་མ་ཉྙཱུ་པ་ནི་སྶཱ་ཡ, ད་ཎྜ་ཀེ་སུ ཋི་ཏེ་སུ ཧི;
ཨེ་ཀ་སྨིཾ པ་ཏ་མཱ་ནེ ཏུ, ཏ་ཐེ་ཝ པ་ཏ་ཏཱི་ཏ་རོ.
ཏེ་ནཱ་ཧུ པོ་རཱ་ཎཱ –
༡༢༡༥. ‘‘ཡ་མ་ཀཾ ནཱ་མ་རཱུ་པ་ཉྩ, ཨུ་བྷོ ཨ་ཉྙོ་ཉྙ་ནི་སྶི་ཏཱ;
ཨེ་ཀ་སྨིཾ བྷི་ཛྫ་མཱ་ན་སྨིཾ, ཨུ་བྷོ བྷི་ཛྫ་ནྟི པ་ཙྩ་ཡཱ’’ཏི.
༡༢༡༦. ཨུ་ཏི་ནྣཾ ནཱ་མ་རཱུ་པཱ་ནཾ, ནཱ་མཾ ནི་ཏྟེ་ཛ་མེ་ཏྠ ཏཾ;
ས་ཀེ་ནེ་ཝ ཧི ཏེ་ཛེ་ན, ན ས་ཀྐོ་ཏི པ་ཝ་ཏྟི་ཏུཾ.
༡༢༡༧. ན བྱཱ་ཧ་ར་ཏི ནོ སེ་ཏི, ན ཏི་ཊྛ་ཏི ན ག་ཙྪ་ཏི;
ན བྷེ་དེ་ཏི ན ཙོ་རེ་ཏི, ན བྷུ་ཉྫ་ཏི ན ཁཱ་ད་ཏི.
༡༢༡༨. ཏ་ཐཱ རཱུ་པ་མྤི ནི་ཏྟེ་ཛཾ, ཝི་ནཱ ནཱ་མ་ཉྩ ས་བྦ་ཐཱ;
ས་ཀེ་ནེ་ཝ ཧི ཏེ་ཛེ་ན, ན ས་ཀྐོ་ཏི པ་ཝ་ཏྟི་ཏུཾ.
༡༢༡༩. བྷུ་ཉྫཱ་མཱི་ཏི པི་ཝཱ་མཱི་ཏི, ཁཱ་དཱ་མཱི་ཏི ཏ་ཐེ་ཝ ཙ;
རོ་དཱ་མཱི་ཏི ཧ་སཱ་མཱི་ཏི, རཱུ་པ་སྶེ་ཏཾ ན ཝི་ཛྫ་ཏི.
༡༢༢༠. ནཱ་མཾ ནི་སྶཱ་ཡ རཱུ་པཾ ཏུ, རཱུ་པཾ ནི་སྶཱ་ཡ ནཱ་མ་ཀཾ;
པ་ཝ་ཏྟ་ཏི ས་དཱ ས་བྦཾ, པ་ཉྩ་ཝོ་ཀཱ་ར་བྷཱུ་མི་ཡཾ.
༡༢༢༡. ཨི་མ་སྶ པ་ན ཨ་ཏྠ་སྶ, ཨཱ་ཝི་བྷཱ་ཝ་ཏྠ་མེ་ཝ ཙ;
ཛ་ཙྩ་ནྡྷ་པཱི་ཋ་ས་པྤཱི་ནཾ, ཝ་ཏྟ་བྦཱ ཨུ་པ་མཱ ཨི་དྷ.
༡༢༢༢. ཡ་ཐཱ ཧི ནཱ་ཝཾ ནི་སྶཱ་ཡ, མ་ནུ་སྶཱ ཡ་ནྟི ཨ་ཎྞ་ཝེ;
ཨེ་ཝཾ རཱུ་པ་མྤི ནི་སྶཱ་ཡ, ནཱ་མ་ཀཱ་ཡོ པ་ཝ་ཏྟ་ཏི.
༡༢༢༣. ཡ་ཐཱ མ་ནུ་སྶེ ནི་སྶཱ་ཡ, ནཱ་ཝཱ ག་ཙྪ་ཏི ཨ་ཎྞ་ཝེ;
ཨེ་ཝཾ ནཱ་མ་མྤི ནི་སྶཱ་ཡ, རཱུ་པ་ཀཱ་ཡོ པ་ཝ་ཏྟ་ཏི.
༡༢༢༤. ས་ཏྟ་ས་ཉྙཾ ཝི་ནོ་དེ་ཏྭཱ, ནཱ་མ་རཱུ་པ་སྶ ས་བྦ་ཐཱ;
ཡཱ་ཐཱ་ཝ་ད་སྶ་ནཾ ཨེ་ཏཾ, ‘‘དི་ཊྛི་སུ་དྡྷཱི’’ཏི ཝུ་ཙྩ་ཏི.
༡༢༢༥. པ་རི་མུ་ཙྩི་ཏུ་ཀཱ་མོ ཙ, དུ་ཀྑ་ཏོ ཛཱ་ཏི་ཨཱ་དི་ཏོ;
ཨ་ནྟ་དྭ་ཡཾ ཝི་ཝ་ཛྫེ་ཏྭཱ, བྷཱ་ཝ་ཡེ པ་ན པ་ཎྜི་ཏོ.
༡༢༢༦. དི་ཊྛི་ཝི་སུ་དྡྷི་མི་མཾ པ་རི་སུ་དྡྷཾ,
སུ་ཊྛུ་ཏ་རཾ ཏུ ཀ་རོ་ཏི ན་རོ ཡོ;
དི་ཊྛི་ག་ཏཱ་ནི མ་ལཱ་ནི ཨ་སེ་སཾ,
ནཱ་ས་མུ་པེ་ནྟི ཧི ཏ་སྶ ན་ར་སྶ.
ཨི་ཏི ཨ་བྷི་དྷ་མྨཱ་ཝ་ཏཱ་རེ དི་ཊྛི་ཝི་སུ་དྡྷི་ནི་དྡེ་སོ ནཱ་མ
ཨ་ཊྛཱ་ར་ས་མོ པ་རི་ཙྪེ་དོ.