༡༧. ས་ཏྟ་ར་ས་མོ པ་རི་ཙྪེ་དོ
ཨ་བྷི་ཉྙཱ་ར་མྨ་ཎ་ནི་དྡེ་སོ
༡༡༠༤. ཨ་ནཱ་ག་ཏཾ་ས་ཉཱ་ཎ་ཉྩ, ཡ་ཐཱ་ཀ་མྨུ་པ་ག་མྤི ཙ;
པ་ཉྩ ཨི་དྡྷི་ཝི་དྷཱ་དཱི་ནི, ས་ཏྟཱ་བྷི་ཉྙཱ ཨི་མཱ པ་ན.
༡༡༠༥. ཨེ་ཏཱ་སཾ པ་ན ས་ཏྟ་ནྣཾ, ཨ་བྷི་ཉྙཱ་ན་མི་ཏོ པ་རཾ;
པ་ཝ་ཀྑཱ་མི ས་མཱ་སེ་ན, ཨཱ་ར་མྨ་ཎ་ཝི་ནི་ཙྪ་ཡཾ.
༡༡༠༦. ཨཱ་ར་མྨ་ཎ་ཏྟི་ཀཱ ཝུ་ཏྟཱ, ཡེ ཙ་ཏྟཱ་རོ མ་ཧེ་སི་ནཱ;
ས་ཏྟ་ནྣ་མེ་ཏྠ ཉཱ་ཎཱ་ནཾ, ས་མྤ་ཝ་ཏྟིཾ སུ་ཎཱ་ཐ མེ.
༡༡༠༧. ཏ་ཏྠ ཨི་དྡྷི་ཝི་དྷ་ཉཱ་ཎཾ, པ་རི་ཏྟཱ་དཱི་སུ ས་ཏྟ་སུ;
ཨཱ་ར་མྨ་ཎ་ཝི་བྷཱ་གེ་སུ, པ་ཝ་ཏྟ་ཏི ཀ་ཐཾ པ་ན.
༡༡༠༨. ཀཱ་ཡེ་ནཱ་དི་སྶ་མཱ་ནེ་ན, ག་ནྟུ་ཀཱ་མོ ཡ་དཱ་བྷ་ཝེ;
ཙི་ཏྟ་ས་ནྣི་སྶི་ཏཾ ཀ་ཏྭཱ, ཀཱ་ཡཾ ཙི་ཏྟ་ཝ་སེ་ན ཏཾ.
༡༡༠༩. མ་ཧ་གྒ་ཏེ ཙ ཙི་ཏྟ་སྨིཾ, ས་མཱ་རོ་པེ་ཏི སོ ཏ་དཱ;
ཀཱ་ཡཱ་ར་མྨ་ཎ་ཏོ ཉཱ་ཎཾ, པ་རི་ཏྟཱ་ར་མྨ་ཎཾ སི་ཡཱ.
༡༡༡༠. དི་སྶ་མཱ་ནེ་ན ཀཱ་ཡེ་ན, ག་ནྟུ་ཀཱ་མོ ཡ་དཱ བྷ་ཝེ;
ཀཱ་ཡ་ས་ནྣི་སྶི་ཏཾ ཀ་ཏྭཱ, ཙི་ཏྟཾ ཀཱ་ཡ་ཝ་སེ་ན ཏཾ.
༡༡༡༡. པཱ་ད་ཀ་ཛ྄ཛྷཱ་ན་ཙི་ཏྟཾ ཏཾ, ཀཱ་ཡེ རོ་པེ་ཏི སོ ཏ་དཱ;
ཛྷཱ་ནཱ་ར་མྨ་ཎ་ཏོ ཉཱ་ཎཾ, ཏཾ མ་ཧ་གྒ་ཏ་གོ་ཙ་རཾ.
༡༡༡༢. ཨ་ནཱ་ག་ཏ་མ་ཏཱི་ཏ་ཉྩ, ཀ་རོ་ཏི ཝི་ས་ཡཾ ཡ་དཱ;
ཨ་ཏཱི་ཏཱ་ར་མྨ་ཎཾ ཧོ་ཏི, ཏ་དཱ་ནཱ་ག་ཏ་གོ་ཙ་རཾ.
༡༡༡༣. ཀཱ་ཡེ་ན དི་སྶ་མཱ་ནེ་ན, ག་མ་ནེ པ་ན བྷི་ཀྑུ་ནོ;
པ་ཙྩུ་པྤ་ནྣོ བྷ་ཝེ ཏ་སྶ, གོ་ཙ་རོ་ཏི ཝི་ནི་དྡི་སེ.
༡༡༡༤. ཀཱ་ཡཾ ཙི་ཏྟ་ཝ་སེ་ནཱ་པི, ཙི་ཏྟཾ ཀཱ་ཡ་ཝ་སེ་ན ཝཱ;
པ་རི་ཎཱ་མ་ན་ཀཱ་ལ་སྨིཾ, ཨ་ཛ྄ཛྷ་ཏྟཱ་ར་མྨ་ཎཾ སི་ཡཱ.
༡༡༡༥. བ་ཧི་དྡྷཱ་ར་མྨ་ཎཾ ཧོ་ཏི, བ་ཧི་དྡྷཱ་རཱུ་པ་ད་སྶ་ནེ;
ཨེ་ཝ་མི་དྡྷི་ཝི་དྷཾ ཉཱ་ཎཾ, ས་མྤ་ཝ་ཏྟ་ཏི ས་ཏྟ་སུ.
༡༡༡༦. པ་ཙྩུ་པྤ་ནྣེ པ་རི་ཏྟེ ཙ, བ་ཧི་དྡྷ་ཛ྄ཛྷ་ཏྟི་ཀེ་སུ་པི;
ཙ་ཏཱུ་སྭེ་ཏེ་སུ དྷ་མྨེ་སུ, དི་བྦ་སོ་ཏཾ པ་ཝ་ཏྟ་ཏི.
༡༡༡༧. པ་ཙྩུ་པྤ་ནྣོ པ་རི་ཏྟོ ཙ, ས་དྡོ ཨཱ་ར་མྨ་ཎཾ ཡ་ཏོ;
པ་རི་ཏྟཱ་ར་མྨ་ཎཾ པ་ཙྩུ-པྤ་ནྣཱ་ར་མྨ་ཎ་ཏཾ ག་ཏཾ.
༡༡༡༨. ཨ་ཏྟ་ནོ ཀུ་ཙྪི་ས་དྡ་སྶ, ས་ཝ་ནེ་པི པ་ར་སྶ ཙ;
ཨ་ཛ྄ཛྷ་ཏྟཱ་ར་མྨ་ཎ་ཉྩེ་ཝ, བ་ཧི་དྡྷཱ་ར་མྨ་ཎ་མྤི ཙ.
༡༡༡༩. ཙེ་ཏོ་པ་རི་ཡ་ཉཱ་ཎ་མྤི, པ་རི་ཏྟཱ་དཱི་སུ ཨ་ཊྛ་སུ;
ཨཱ་ར་མྨ་ཎ་ཝི་བྷཱ་གེ་སུ, པ་ཝ་ཏྟ་ཏི ཀ་ཐཾ པ་ན.
༡༡༢༠. པ་རི་ཏྟཱ་ར་མྨ་ཎཾ ཧོ་ཏི, པ་རི་ཏྟཱ་ནཾ པ་ཛཱ་ན་ནེ;
ཛཱ་ན་ནེ མ་ཛ྄ཛྷི་མཱ་ནཾ ཏུ, ཏཾ མ་ཧ་གྒ་ཏ་གོ་ཙ་རཾ.
༡༡༢༡. ཛཱ་ན་ནེ པ་ན མ་གྒ་སྶ, ཕ་ལ་སྶཱ་པི པ་ཛཱ་ན་ནེ;
ཏ་དཱ པ་ན་སྶ ཉཱ་ཎ་སྶ, ཨ་པྤ་མཱ་ཎོ་ཝ གོ་ཙ་རོ.
༡༡༢༢. ཏཾ མ་གྒཱ་ར་མྨ་ཎཾ ཧོ་ཏི, མ་གྒ་ཙི་ཏྟ་སྶ ཛཱ་ན་ནེ;
པ་རི་ཡཱ་ཡེ་ནེ་ཝེ་ཏ་སྶ, མ་གྒཱ་ར་མྨ་ཎ་ཏཱ མ་ཏཱ.
༡༡༢༣. ཨ་ཏཱི་ཏེ ས་ཏྟ་དི་ཝ་ས-བྦྷ་ནྟ་རེ ཙ ཡ་དཱ པ་ན;
ཨ་ནཱ་ག་ཏེ ཏ་ཐཱ ས་ཏྟ-དི་ཝ་ས་བྦྷ་ནྟ་རེ་པི ཙ.
༡༡༢༤. པ་རེ་སཾ པ་ན ཙི་ཏྟ་སྶ, ཛཱ་ན་ནེ ས་མུ་དཱི་རི་ཏཾ;
ཨ་ཏཱི་ཏཱ་ར་མྨ་ཎ་ཉྩེ་ཝ, ཏ་དཱ་ནཱ་ག་ཏ་གོ་ཙ་རཾ.
༡༡༢༥. ཀ་ཐ་ཉྩ པ་ན ཏཾ པ་ཙྩུ་པྤ་ནྣ་གོ་ཙ་ར་ཏཾ ག་ཏཾ;
པ་ཙྩུ་པྤ་ནྣཾ ཏི་དྷཱ ཝུ་ཏྟཾ, ཁ་ཎ་ས་ནྟ་ཏི་ཨ་དྡྷ་ཏོ.
༡༡༢༦. ཏ་ཏྠ ཏི་ཀྑ་ཎ་ས་མྤ་ཏྟཾ, པ་ཙྩུ་པྤ་ནྣ་ཁ་ཎཱ་དི་ཀཾ;
ཨེ་ཀ་དྭེ་ས་ནྟ་ཏི་ཝཱ་ར་པ་རི་ཡཱ་པ་ནྣ་མི་དཾ པ་ན.
༡༡༢༧. ས་ནྟ་ཏི་པ་ཙྩུ་པྤ་ནྣ་ནྟི, ཨཱ་ཧུ ས་ནྟ་ཏི་ཀོ་ཝི་དཱ;
ཨེ་ཀ་བྦྷ་ཝ་པ་རི་ཙྪི་ནྣཾ, པ་ཙྩུ་པྤ་ནྣ་ནྟི པ་ཙྪི་མཾ.
༡༡༢༨. ཁ་ཎཱ་དི་ཀ་ཏྟ་ཡཾ པ་ཙྩུ-པྤ་ནྣཾ ཏ་མཱ་ཧུ ཀེ་ཙི་དྷ;
ཙེ་ཏོ་པ་རི་ཡ་ཉཱ་ཎ་སྶ, ཧོ་ཏི ཨཱ་ར་མྨ་ཎཾ ཨི་ཏི.
༡༡༢༩. ཡ་ཐཱ ཙ པུ་པྥ་མུ་ཊྛི་མྷི, ཨུ་ཀྑི་ཏྟེ ག་ག་ནེ པ་ན;
ཨ་ཝ་སྶཾ ཨེ་ཀ་མེ་ཀ་སྶ, ཝ་ཎྚཾ ཝ་ཎྚེ་ན ཝི་ཛ྄ཛྷ་ཏི.
༡༡༣༠. ཨེ་ཝཾ མ་ཧཱ་ཛ་ན་སྶཱ་པི, ཙི་ཏྟེ ཨཱ་ཝ་ཛྫི་ཏེ པ་ན;
ཨེ་ཀ་སྶ ཙི་ཏྟ་མེ་ཀེ་ན, ཨ་ཝ་སྶཾ པ་ན ཝི་ཛ྄ཛྷ་ཏི.
༡༡༣༡. ཡེ་ནཱ་ཝ་ཛྫ་ཏི ཙི་ཏྟེ་ན, ཡེ་ན ཛཱ་ནཱ་ཏི ཙེ་ཏ་སཱ;
ཏེ་སཾ དྭི་ནྣཾ ས་ཧ་ཊྛཱ་ནཱ-བྷཱ་ཝ་ཏོ ཏཾ ན ཡུ་ཛྫ་ཏི.
༡༡༣༢. ཛ་ཝ་ནཱ་ཝ་ཛྫ་ནཱ་ནཾ ཏུ, ནཱ་ནཱ་ར་མྨ་ཎ་པ་ཏྟི་ཏོ;
ཨ་ནི་ཊྛེ པ་ན ཧི ཋཱ་ནེ, ཨ་ཡུ་ཏྟ་ནྟི པ་ཀཱ་སི་ཏཾ.
༡༡༣༣. ཏ་སྨཱ ས་ནྟ་ཏི་ཨ་དྡྷཱ་ན-པ་ཙྩུ་པྤ་ནྣཱ་ན་མེ་ཝ ཏུ;
ཝ་སེ་ན པ་ཙྩུ་པྤ་ནྣཾ ཏཾ, ཧོ་ཏི ཨཱ་ར་མྨ་ཎཾ ཨི་དཾ.
༡༡༣༤. པ་ཙྩུ་པྤ་ནྣ་མྤི ཨ་དྡྷཱ་ཁྱཾ, ཨི་དཾ ཛ་ཝ་ན་ཝཱ་ར་ཏོ;
དཱི་པེ་ཏ་བྦ་ནྟི ནི་དྡི་ཊྛཾ, ཏ་ཏྲཱ་ཡཾ དཱི་པ་ནཱ་ན་ཡོ.
༡༡༣༥. ཡ་དཱ པ་ར་སྶ ཙི་ཏྟ་ཉྷི, ཉཱ་ཏུ་མཱ་ཝ་ཛྫ་ཏི་དྡྷི་མཱ;
ཨཱ་ཝ་ཛྫ་ན་མ་ནོ ཏ་སྶ, པ་ཙྩུ་པྤ་ནྣ་ཁ་ཎ་ཝ྄ཧ་ཡཾ.
༡༡༣༦. ཨཱ་ར་མྨ་ཎཾ ཏ་དཱ ཀ་ཏྭཱ, ཏེ་ན ས་དྡྷིཾ ནི་རུ་ཛ྄ཛྷ་ཏི;
ཛ་ཝ་ནཱ་ནི ཧི ཛཱ་ཡ་ནྟེ, ཏ་སྶ ཙ་ཏྟཱ་རི པ་ཉྩ ཝཱ.
༡༡༣༧. ཨེ་ཏེ་སཾ པ་ཙྪི་མཾ ཙི་ཏྟཾ, ཨི་དྡྷི་ཙི་ཏྟ་མུ་དཱི་རི་ཏཾ;
ཀཱ་མཱ་ཝ་ཙ་ར་ཙི་ཏྟཱ་ནི, སེ་སཱ་ནཱི་ཏི ཝི་ནི་དྡི་སེ.
༡༡༣༨. ཨེ་ཏེ་སཾ པ་ན ས་བྦེ་སཾ, ནི་རུ་དྡྷཾ ཏུ ཏ་དེ་ཝ ཙ;
ཙི་ཏྟཾ ཨཱ་ར་མྨ་ཎཾ ཧོ་ཏི, ཏ་སྨཱ ས་བྦཱ་ནི ཏཱ་ནི་པི.
༡༡༣༩. ཨེ་ཀཱ་ར་མྨ་ཎ་ཏཾ ཡ་ནྟི, ན ནཱ་ནཱ་ར་མྨ་ཎཱ་ནི ཧི;
ཨ་དྡྷཱ་ཝ་སཱ བྷ་ཝེ པ་ཙྩུ-པྤ་ནྣཱ་ར་མྨ་ཎ་ཏོ པ་ན.
༡༡༤༠. ཨེ་ཀཱ་ར་མྨ་ཎ་བྷཱ་ཝེ་པི, ཨི་དྡྷི་མཱ་ན་ས་མེ་ཝ ཙ;
པ་ར་སྶ ཙི་ཏྟཾ ཛཱ་ནཱ་ཏི, ནེ་ཏ་རཱ་ནི ཡ་ཐཱ པ་ན.
༡༡༤༡. ཙ་ཀྑུ་དྭཱ་རེ ཏུ ཝི་ཉྙཱ་ཎཾ, རཱུ་པཾ པ་སྶ་ཏི ནེ་ཏ་རཾ;
ཨེ་ཝ་མེ་ཝ ཙ ཏཾ ཨི་དྡྷི-ཙི་ཏྟ་མེ་ཝ ཙ ཛཱ་ནཱ་ཏི.
༡༡༤༢. པ་ར་ཙི་ཏྟཱ་ར་མྨ་ཎ་ཏྟཱ, བ་ཧི་དྡྷཱ་ར་མྨ་ཎཾ སི་ཡཱ;
ཙེ་ཏོ་པ་རི་ཡ་ཉཱ་ཎ་མྤི, ཨ་ཊྛ་སྭེ་ཝ པ་ཝ་ཏྟ་ཏི.
༡༡༤༣. པུ་བྦེ་ནི་ཝཱ་ས་ཉཱ་ཎམྤི, པ་རི་ཏྟཱ་དཱི་སུ ཨ་ཊྛ་སུ;
ཨཱ་ར་མྨ་ཎ་ཝི་བྷཱ་གེ་སུ, པ་ཝ་ཏྟ་ཏི ཀ་ཐཾ པ་ན.
༡༡༤༤. ཀཱ་མཱ་ཝ་ཙ་ར་ཁ་ནྡྷཱ་ནཾ, ས་མ་ནུ་སྶ་ར་ཎེ པ་ན;
པ་རི་ཏྟཱ་ར་མྨ་ཎཾ་ཡེ་ཝ, ཧོ་ཏཱི་ཏི པ་རི་དཱི་པ་ཡེ.
༡༡༤༥. རཱུ་པཱ་ཝ་ཙ་རི་ཀཱ་རུ་པྤ་ཁ་ནྡྷཱ་ནུ་སྶ་ར་ཎེ པ་ན;
བྷ་ཝ་ཏཱི་ཏི ཧི ཉཱ་ཏ་བྦཾ, ཏཾ མ་ཧ་གྒ་ཏ་གོ་ཙ་རཾ.
༡༡༤༦. ཨ་ཏཱི་ཏེ ཨ་ཏྟ་ནཱ མ་གྒཾ, བྷཱ་ཝི་ཏཾ ཏུ ཕ་ལ་མྤི ཝཱ;
ས་མ་ནུ་སྶ་ར་ཏོ ཨེ་ཝ-པྤ་མཱ་ཎཱ་ར་མྨ་ཎཾ སི་ཡཱ.
༡༡༤༧. ས་མ་ནུ་སྶ་ར་ཏོ མ་གྒཾ, མ་གྒཱ་ར་མྨ་ཎ་མེ་ཝ ཏཾ;
ཨ་ཏཱི་ཏཱ་ར་མྨ་ཎཾ་ཡེ་ཝ, ཧོ་ཏི ཨེ་ཀ་ནྟ་ཏོ ཨི་དཾ.
༡༡༤༨. ཙེ་ཏོ་པ་རི་ཡ་ཉཱ་ཎ་མྤི, ཡ་ཐཱ་ཀ་མྨུ་པ་ག་མྤི ཙ;
ཨ་ཏཱི་ཏཱ་ར་མྨ་ཎཱ ཧོ་ནྟི, ཀི་ཉྩཱ་པི ཨ་ཐ ཁོ པ་ན.
༡༡༤༩. ཙེ་ཏོ་པ་རི་ཡ་ཉཱ་ཎ་སྶ, ས་ཏྟ་དྡི་ཝ་ས་བྦྷ་ནྟ་རཾ;
ཨ་ཏཱི་ཏཾ ཙི་ཏྟ་མེ་ཝ་སྶ, ཨཱ་ར་མྨ་ཎ་མུ་དཱི་རི་ཏཾ.
༡༡༥༠. ཨ་ཏཱི་ཏེ ཙེ་ཏ་ནཱ་མ་ཏྟཾ, ཡ་ཐཱ་ཀ་མྨུ་པ་ག་སྶ་པི;
པུ་བྦེ་ནི་ཝཱ་ས་ཉཱ་ཎ་སྶ, ན་ཏྠི ཀི་ཉྩི ཨ་གོ་ཙ་རཾ.
༡༡༥༡. ཨ་ཛ྄ཛྷ་ཏྟཱ་ར་མྨ་ཎཾ ཨ་ཏྟ-ཁ་ནྡྷཱ་ནུ་སྶ་ར་ཎེ སི་ཡཱ;
བ་ཧི་དྡྷཱ་ར་མྨ་ཎཾ ཨ་ཉྙ-ཁ་ནྡྷཱ་ནུ་སྶ་ར་ཎེ བྷ་ཝེ.
༡༡༥༢. ས་ར་ཎེ ནཱ་མ་གོ་ཏྟ་སྶ, ཏཾ ན་ཝ་ཏྟ་བྦ་གོ་ཙ་རཾ;
པུ་བྦེ་ནི་ཝཱ་ས་ཉཱ་ཎ་མྤི, ཨ་ཊྛ་སྭེ་ཝ པ་ཝ་ཏྟ་ཏི.
༡༡༥༣. པ་ཙྩུ་པྤ་ནྣེ པ་རི་ཏྟེ ཙ, བ་ཧི་དྡྷ་ཛ྄ཛྷ་ཏྟི་ཀེ་སུ་པི;
ཙ་ཏཱུ་སྭེ་ཏེ་སུ དྷ་མྨེ་སུ, དི་བྦ་ཙ་ཀྑུ པ་ཝ་ཏྟ་ཏི.
༡༡༥༤. དི་བྦ་སོ་ཏས་མཾ དི་བྦ-ཙ་ཀྑུཨཱ་ར་མྨ་ཎ་ཀྐ་མེ;
རཱུ་པཾ ས་དྡོ་ཏི དྭི་ནྣཾ ཏུ, ཨ་ཡ་མེ་ཝ ཝི་སེ་ས་ཏཱ.
༡༡༥༥. ཨ་ནཱ་ག་ཏཾ་ས་ཉཱ་ཎམྤི, པ་རི་ཏྟཱ་དཱི་སུ ཨ་ཊྛ་སུ;
ཨཱ་ར་མྨ་ཎ་ཝི་བྷཱ་གེ་སུ, པ་ཝ་ཏྟ་ཏི ཀ་ཐཾ པ་ན.
༡༡༥༦. ནི་བྦ་ཏྟི་སྶ་ཏི ཡཾ ཀཱ་མཱ-ཝ་ཙ་རེ་ཏི པ་ཛཱ་ན་ཏོ;
པ་རི་ཏྟཱ་ར་མྨ་ཎཾ ཧོ་ཏི, རཱུ་པཱ་རཱུ་པེ་སྭ་ནཱ་ག་ཏེ.
༡༡༥༧. ནི་བྦ་ཏྟི་སྶ་ཏི ཡ་ཉྩཱ་པི, སི་ཡཱ མ་ཧ་གྒ་ཏ་གོ་ཙ་རཾ;
བྷཱ་ཝེ་སྶ་ཏི ཨ་ཡཾ མ་གྒཾ, ཕ་ལཾ ས་ཙྪི་ཀ་རི་སྶ་ཏི.
༡༡༥༨. ཨེ་ཝཾ པ་ཛཱ་ན་ནེ ཨ་པྤ-མཱ་ཎཱ་ར་མྨ་ཎ་ཏཾ བྷ་ཝེ;
མ་གྒཾ བྷཱ་ཝེ་སྶ་ཏི་ཙྩེ་ཝ, ཛཱ་ན་ནེ མ་གྒ་གོ་ཙ་རཾ.
༡༡༥༩. ཨེ་ཀ་ནྟེ་ན ཨི་དཾ ཉཱ་ཎཾ, ཧོ་ཏཱ་ནཱ་ག་ཏ་གོ་ཙ་རཾ;
ཙེ་ཏོ་པ་རི་ཡཾ ཏུ ཀི་ཉྩཱ་པི, ཧོ་ཏཱ་ནཱ་ག་ཏ་གོ་ཙ་རཾ.
༡༡༦༠. ཨ་ཐ ཁོ པ་ན ཏཾ ས་ཏྟ-དི་ཝ་ས་བྦྷ་ནྟ་རཾ པ་ན;
ཙི་ཏྟ་མེ་ཝ ཙ ཛཱ་ནཱ་ཏི, ན ཧི ཏཾ ཨ་ཉྙ་གོ་ཙ་རཾ.
༡༡༦༡. ཨ་ནཱ་ག་ཏཾ་ས་ཉཱ་ཎ་སྶ, ཨ་ནཱ་ག་ཏཾ་ས་གོ་ཙ་རཾ;
‘‘ཨ་ཧཾ དེ་ཝོ བྷ་ཝི་སྶཱ་མི’’-ཙྩེ་ཝ་མ་ཛ྄ཛྷ་ཏྟ་གོ་ཙ་རཾ.
༡༡༦༢. ‘‘ཏི་སྶོ ཕུ་སྶོ ཨ་མུ་ཏྲཱ་ཡཾ,
ནི་བྦ་ཏྟི་སྶ་ཏི་ནཱ་ག་ཏེ’’;
ཨི་ཙྩེ་ཝཾ ཛཱ་ན་ནེ ཏ་སྶ,
བ་ཧི་དྡྷཱ་ར་མྨ་ཎཾ སི་ཡཱ.
༡༡༦༣. ཛཱ་ན་ནེ ནཱ་མ་གོ་ཏྟ་སྶ, ཡ་སྶ ཀ་སྶ་ཙི་ནཱ་ག་ཏེ;
པུ་བྦེ་ནི་ཝཱ་ས་ཉཱ་ཎཾ་ཝ, ཏཾ ན་ཝ་ཏྟ་བྦ་གོ་ཙ་རཾ.
༡༡༦༤. ཡ་ཐཱ་ཀ་མྨུ་པ་ག་ཉཱ་ཎཾ, པ་རི་ཏྟཱ་དཱི་སུ པ་ཉྩ་སུ;
ཨཱ་ར་མྨ་ཎ་ཝི་བྷཱ་གེ་སུ, པ་ཝ་ཏྟ་ཏི ཀ་ཐཾ པ་ན.
༡༡༦༥. ཛཱ་ན་ནེ ཀཱ་མ་ཀ་མྨ་སྶ, པ་རི་ཏྟཱ་ར་མྨ་ཎཾ སི་ཡཱ;
ཏ་ཐཱ མ་ཧ་གྒ་ཏ་ཀ་མྨ་སྶ, ཏཾ མ་ཧ་གྒ་ཏ་གོ་ཙ་རཾ.
༡༡༦༦. ཨ་ཏཱི་ཏ་མེ་ཝ ཛཱ་ནཱ་ཏི, ཏ་སྨཱ ཙཱ་ཏཱི་ཏ་གོ་ཙ་རཾ;
ཨ་ཛ྄ཛྷ་ཏྟཱ་ར་མྨ་ཎཾ ཧོ་ཏི, ཨ་ཏྟ་ནོ ཀ་མྨ་ཛཱ་ན་ནེ.
༡༡༦༧. བ་ཧི་དྡྷཱ་ར་མྨ་ཎཾ ཧོ་ཏི, པ་ར་ཀ་མྨ་པ་ཛཱ་ན་ནེ;
ཨེ་ཝཾ པ་ཝ་ཏྟི ཉཱ་ཏ་བྦཱ, ཡ་ཐཱ་ཀ་མྨུ་པ་ག་སྶ་པི.
༡༡༦༨. ས་ཏྟ་ནྣ་མྤི ཨ་བྷི་ཉྙཱ་ནཾ, ཝུ་ཏྟོ ཨཱ་ར་མྨ་ཎ་ཀྐ་མོ;
ཨེ་ཏྠ ཝུ་ཏྟ་ན་ཡེ་ནེ་ཝ, ཝེ་དི་ཏ་བྦོ ཝི་བྷཱ་ཝི་ནཱ.
༡༡༦༩. ཝི་ཝི་དྷ་ཏྠ་ཝ་ཎྞ་པ་དེ་ཧི ས་མྤ་ནྣཾ,
མ་དྷུ་ར་ཏྠ་མ་ཏི་ནཱི་ཧ་རཾ ག་ནྠཾ;
སོ་ཏུ་ཛ་ན་སྶ ཧ་ད་ཡ་པཱི་ཏི་ཀ་རཾ,
སུ་ཎེ་ཡྻ ཀོ་ཙི མ་ནུ་ཛོ ས་ཙེ་ཏ་ནོ.
ཨི་ཏི ཨ་བྷི་དྷ་མྨཱ་ཝ་ཏཱ་རེ ཨ་བྷི་ཉྙཱ་ར་མྨ་ཎ་ནི་དྡེ་སོ ནཱ་མ
ས་ཏྟ་ར་ས་མོ པ་རི་ཙྪེ་དོ.