༡༦. སོ་ལ༹་ས་མོ པ་རི་ཙྪེ་དོ
ཨ་བྷི་ཉྙཱ་ནི་དྡེ་སོ
༡༠༤༣. ཨི་ཏོ པ་རཾ ཀ་རི་སྶཱ་མི, པ་ཉྙཱ་སུ་དྡྷི་ཀ་རཾ པ་རཾ;
པ་ཉྩ་ནྣ་མྤི ཨ་བྷི་ཉྙཱ་ནཾ, མུ་ཁ་མ་ཏྟ་ནི་ད་སྶ་ནཾ.
༡༠༤༤. རཱུ་པཱ་རཱུ་པ་ས་མཱ་པ་ཏྟཱི,
ནི་བྦ་ཏྟེ་ཏྭཱ པ་ན་ཊྛ་པི;
ལོ་ཀི་ཀཱ་པི ཨ་བྷི་ཉྙཱ་ཡོ,
བྷཱ་ཝེ་ཏ་བྦཱ ཝི་བྷཱ་ཝི་ནཱ.
༡༠༤༥. ཙ་ཏུ་ཏྠ་ཛ྄ཛྷཱ་ན་མ་ཏྟེ་པི, སུ་ཙི་ཎྞ་ཝ་སི་ནཱ ས་ཏཱ;
ཨ་ནུ་ཡོ་ག་མ་བྷི་ཉྙཱ་སུ, ཀཱ་ཏུཾ ཝ་ཏྟ་ཏི ཡོ་གི་ནོ.
༡༠༤༦. ཨ་བྷི་ཉྙཱ ནཱ་མ བྷི་ཀྑཱུ་ནཾ, སཱ་བྷི་ཉྙཱ་ནཾ ཨ་ནུ་ཏྟ་རོ;
ཨ་ལ་ངྐཱ་རོ ཧི ཏཱ་ཎ་ནྟི, ས་ཏྠ་ནྟི ཙ པ་ཝུ་ཙྩ་ཏི.
༡༠༤༧. ནི་བྦ་ཏྟི་ཏཱ་སྭ་བྷི་ཉྙཱ་སུ, ཡོ་གཱ་ཝ་ཙ་ར་བྷི་ཀྑུ་ནཱ;
ས་མཱ་དྷི་བྷཱ་ཝ་ནཱ ཧི་སྶ, ཏ་དཱ ནི་ཊྛ་ངྒ་ཏཱ སི་ཡཱ.
༡༠༤༨. དི་བྦཱ་ནི ཙ་ཀྑུ་སོ་ཏཱ་ནི, ཨི་དྡྷི་ཙི་ཏྟ་ཝི་ཛཱ་ན་ནཾ;
པུ་བྦེ་ནི་ཝཱ་ས་ཉཱ་ཎ་ནྟི, པ་ཉྩཱ་བྷི་ཉྙཱ ཨི་མཱ སི་ཡུཾ.
༡༠༤༩. ཀ་སི་ཎཱ་ནུ་ལོ་མ་ཏཱ་དཱི་ཧི, ཙ་ཏུ་དྡ་ས་ན་ཡེ་ཧི ཙ;
ད་མེ་ཏ་བྦ་མ་བྷི་ཉྙཱ་ཡོ, པ་ཏྟུ་ཀཱ་མེ་ན མཱ་ན་སཾ.
༡༠༥༠. ད་ནྟེ ས་མཱ་ཧི་ཏེ སུ་དྡྷེ, པ་རི་ཡོ་དཱ་ཏེ ཨ་ན་ངྒ་ཎེ;
ནུ་པ་ཀླེ་སེ མུ་དུ་བྷཱུ་ཏེ, ཀ་མྨ་ནཱི་ཡེ ཋི་ཏཱ་ཙ་ལེ.
༡༠༥༡. ཨི་ཏི ཨ་ཊྛ་ངྒ་ས་མྤ་ནྣེ, ཙི་ཏྟེ ཨི་དྡྷི་ཝི་དྷཱ་ཡ ཙ;
ཨ་བྷི་ནཱི་ཧ་ར་ཏི ཙེ ཙི་ཏྟཾ, སི་ཛ྄ཛྷ་ཏི་དྡྷི་ཝི་ཀུ་བྦ་ནཾ.
༡༠༥༢. ཨ་བྷི་ཉྙཱ་པཱ་ད་ཀ་ཛ྄ཛྷཱ་ནཾ, ས་མཱ་པ་ཛྫ ཏ་ཏོ པ་ན;
ཝུ་ཊྛཱ་ཡ ཧི ས་ཏཾ ཝཱ་པི, ས་ཧ་སྶཾ ཝཱ ཡ་དི་ཙྪ་ཏི.
༡༠༥༣. ‘‘ས་ཏཾ ཧོ་མི ས་ཏཾ ཧོ་མཱི’’-ཙྩེ་ཝཾ ཀ་ཏྭཱ་ན མཱ་ན་སཾ;
ཨ་བྷི་ཉྙཱ་པཱ་ད་ཀ་ཛ྄ཛྷཱ་ནཾ, ས་མཱ་པ་ཛྫ ཏ་ཏོ པ་ན.
༡༠༥༤. ཝུ་ཊྛཱ་ཡ པུ་ན་དྷི་ཊྛཱ་ཏི,
ས་ཧཱ་དྷི་ཊྛཱ་ན་ཙེ་ཏ་སཱ;
ས་ཏཾ ཧོ་ཏི ཧི སོ ཡོ་གཱི,
ས་ཧ་སྶཱ་དཱི་སྭ་ཡཾ ན་ཡོ.
༡༠༥༥. པཱ་ད་ཀ་ཛ྄ཛྷཱ་ན་ཙི་ཏྟཾ ཏུ, ནི་མི་ཏྟཱ་ར་མྨ་ཎཾ སི་ཡཱ;
པ་རི་ཀ་མྨ་མ་ནཱ་ནེ་ཏྠ, ས་ཏཱ་ར་མྨ་ཎི་ཀཱ་ནི ཏུ.
༡༠༥༦. ཏ་དཱ་དྷི་ཊྛཱ་ན་ཙི་ཏྟ་མྤི, ས་ཏཱ་ར་མྨ་ཎ་མེ་ཝ ཏཾ;
པུ་བྦེ ཝུ་ཏྟ་པྤ་ནཱ་ཙི་ཏྟཾ, ཝི་ཡ གོ་ཏྲ་བྷུ་ན་ནྟ་རཾ.
༡༠༥༧. ཏ་མེ་ཀཾ ཛཱ་ཡ་ཏེ ཏ་ཏྠ, ཙ་ཏུ་ཏྠ་ཛ྄ཛྷཱ་ནི་ཀཾ མ་ནོ;
པ་རི་ཀ་མྨ་ཝི་སེ་སོ་ཝ, སེ་སཾ པུ་བྦ་ས་མཾ ཨི་དྷ.
ཨི་དྡྷི་ཝི་དྷ་ཉཱ་ཎཾ.
༡༠༥༨. དི་བྦ་སོ་ཏ་མི་དཾ ཏ་ཏྠ, བྷཱ་ཝེ་ཏ་བྦཾ ཀ་ཐཾ སི་ཡཱ;
ཨ་བྷི་ཉྙཱ་པཱ་ད་ཀ་ཛ྄ཛྷཱ་ནཾ, ས་མཱ་པ་ཛྫ ཏ་ཏོ པུ་ན.
༡༠༥༩. ཝུ་ཊྛཱ་ཡ པ་རི་ཀ་མྨེ་ན, ཀཱ་མཱ་ཝ་ཙ་ར་ཙེ་ཏ་སཱ;
ས་དྡོ ཨཱ་ཝ་ཛྫི་ཏ་བྦོ་ཝ, མ་ཧ་ནྟོ སུ་ཁུ་མོ་པི ཙ.
༡༠༦༠. ཏ་སྶེ་ཝཾ པ་ན ས་དྡ་སྶ, ནི་མི་ཏྟཾ མ་ན་སི ཀུ་བྦ་ཏོ;
དི་བྦ་སོ་ཏ་མི་དཱ་ནི་སྶ, ཨུ་པྤ་ཛྫི་སྶ་ཏི ཏཾ ཨི་ཏི.
༡༠༦༡. ས་དྡེ་སྭ་ཉྙ་ཏ་རཾ ས་དྡཾ, ཀ་ཏྭཱ ཨཱ་ར་མྨ་ཎཾ ཏ་ཏོ;
ཨུ་པྤ་ཛྫི་ཏྭཱ ནི་རུ་དྡྷེ ཏུ, མ་ནོ་དྭཱ་རཱ་ཝ་ཛྫ་ནེ པུ་ན.
༡༠༦༢. ཛ་ཝ་ནཱ་ནི ཧི ཛཱ་ཡ་ནྟེ, ཏ་སྶ ཙ་ཏྟཱ་རི པ་ཉྩ ཝཱ;
པུ་རི་མཱ་ནེ་ཏྠ ཙི་ཏྟེ་སུ, ཏཱི་ཎི ཙ་ཏྟཱ་རི ཝཱ པ་ན.
༡༠༦༣. པ་རི་ཀ་མྨོ་པ་ཙཱ་རཱ་ནུ-ལོ་མ་གོ་ཏྲ་བྷུ་ནཱ་མ་ཀཱ;
ཙ་ཏུ་ཏྠཾ པ་ཉྩ་མཾ ཝཱ་པི, ཨ་པྤ་ནཱ་ཙི་ཏྟ་མཱི་རི་ཏཾ.
༡༠༦༤. ས་ཧ་ཛཱ་ཏཾ ཏུ ཡཾ ཉཱ་ཎཾ, ཨ་པྤ་ནཱ་མཱ་ན་སེ་ན ཧི;
ཏཾ ཉཱ་ཎཾ དི་བྦ་སོ་ཏ་ནྟི, ཝ་ད་ནྟི སུ་ཏ་ཀོ་ཝི་དཱ.
༡༠༦༥. ཐཱ་མ་ཛཱ་ཏཾ ཀ་རོ་ནྟེ་ན, ཏཾ ཉཱ་ཎཾ ཏེ་ན ཡོ་གི་ནཱ;
‘‘ཨེ་ཏྠ་ནྟ་ར་ག་ཏཾ ས་དྡཾ, སུ་ཎཱ་མཱི’’ཏི ཙ ཙེ་ཏ་སཱ.
༡༠༦༦. ཨ་ངྒུ་ལཾ དྭ་ངྒུ་ལཾ བྷི་ཡྻོ,
ཝི་ད་ཏྠི ར་ཏ་ནཾ ཏ་ཐཱ;
གཱ་མོ དེ་སོ ཏ་ཏོ ཡཱ་ཝ,
ཙ་ཀྐ་ཝཱ་ལཱ༹ ཏ་ཏོ པ་རཾ.
༡༠༦༧. ཨི་ཙྩེ་ཝཾ ཏུ པ་རི་ཙྪི་ཛྫ, ཝ་ཌྜྷེ་ཏ་བྦཾ ཡ་ཐཱ་ཀྐ་མཾ;
ཨེ་སོ ཨ་དྷི་ག་ཏཱ་བྷི་ཉྙོ, པཱ་ད་ཀཱ་ར་མྨ་ཎེ་ན ཏུ.
༡༠༦༨. ཕུ་ཊྛོ་ཀཱ་ས་ག་ཏེ ས་དྡེ, ས་བྦེ པ་ན སུ་ཎཱ་ཏི སོ;
སུ་ཎ་ནྟོ པཱ་ཊི་ཡེ་ཀྐ་མྤི, ས་ལླ་ཀྑེ་ཏུཾ པ་ཧོ་ཏི སོ.
དི་བྦ་སོ་ཏ་ཉཱ་ཎཾ.
༡༠༦༩. ཀ་ཐཾ པ་ནུ་པྤཱ་དེ་ཏ་བྦཾ, ཙེ་ཏོ་པ་རི་ཡ་མཱ་ན་སཾ;
དི་བྦ་ཙ་ཀྑུ་ཝ་སེ་ནེ་ཝ, ཨི་དཾ ཉཱ་ཎཾ པ་ནི་ཛ྄ཛྷ་ཏི.
༡༠༧༠. ཨཱ་ལོ་ཀཾ པ་ན ཝ་ཌྜྷེ་ཏྭཱ, ཏ་སྨཱ དི་བྦེ་ན ཙ་ཀྑུ་ནཱ;
ཧ་ད་ཡཾ པ་ན ནི་སྶཱ་ཡ, ཝ་ཏྟ་མཱ་ནཾ ཏུ ལོ་ཧི་ཏཾ.
༡༠༧༡. དི་སྭཱ པ་ར་སྶ ཝི་ཉྙེ་ཡྻཾ,
ཧོ་ཏི ཙི་ཏྟཾ ཏུ བྷི་ཀྑུ་ནཱ;
སོ་མ་ན་སྶ་ཡུ་ཏེ ཙི་ཏྟེ,
ལོ་ཧི་ཏཾ ལོ་ཧི་ཏཾ སི་ཡཱ.
༡༠༧༢. དོ་མ་ན་སྶ་ཡུ་ཏེ ཙི་ཏྟེ, ཝ་ཏྟ་མཱ་ནེ ཏུ ཀཱ་ལ༹་ཀཾ;
ཨུ་པེ་ཀྑཱ་ས་ཧི་ཏེ ཙི་ཏྟེ, ཏི་ལ་ཏེ་ལཱུ་པ་མཾ སི་ཡཱ.
༡༠༧༣. ཏ་སྨཱ པ་ར་སྶ ས་ཏྟ་སྶ, དི་སྭཱ ཧ་ད་ཡ་ལོ་ཧི་ཏཾ;
ཙེ་ཏོ་པ་རི་ཡ་ཉཱ་ཎཾ ཏཾ, ཀཱ་ཏ་བྦཾ ཐཱ་མ་ཏཾ ག་ཏཾ.
༡༠༧༤. ཨེ་ཝཾ ཐཱ་མ་ག་ཏེ ཏ་སྨིཾ, ཡ་ཐཱ་ནུ་ཀྐ་མ་ཏོ པ་ན;
ཙི་ཏྟ་མེ་ཝ ཝི་ཛཱ་ནཱ་ཏི, ཝི་ནཱ ལོ་ཧི་ཏ་ད་སྶ་ནཾ.
༡༠༧༥. ཀཱ་མཱ་ཝ་ཙ་ར་ཙི་ཏྟ་ཉྩ, རཱུ་པཱ་རཱུ་པེ་སུ མཱ་ན་སཾ;
ས་བྦ་མེ་ཝ ཝི་ཛཱ་ནཱ་ཏི, ས་རཱ་གཱ་དི་པྤ་བྷེ་ད་ཀཾ.
ཙེ་ཏོ་པ་རི་ཡ་ཉཱ་ཎཾ.
༡༠༧༦. པུ་བྦེ་ནི་ཝཱ་ས་ཉཱ་ཎེ་ན, ཀ་ཏྟ་བྦཱ ཏ་ད་ནུ་སྶ་ཏི;
ཏཾ ས་མྤཱ་དེ་ཏུ་ཀཱ་མེ་ན, ཨཱ་དི་ཀ་མྨི་ཀ་བྷི་ཀྑུ་ནཱ;
ཛྷཱ་ནཱ་ནི པ་ན ཙ་ཏྟཱ་རི, ས་མཱ་པ་ཛྫཱ་ནུ་པུ་བྦ་ཏོ.
༡༠༧༧. ཨ་བྷི་ཉྙཱ་པཱ་ད་ཀ་ཛ྄ཛྷཱ་ནཱ, ཝུ་ཊྛཱ་ཡ ཧི ཏ་ཏོ པུ་ན;
བྷི་ཀྑུ་ནཱ ཝ་ཛྫི་ཏ་བྦཱ་ཝ, ནི་ས་ཛྫཱ ས་བྦ་པ་ཙྪི་མཱ.
༡༠༧༨. ཏ་ཏོ པ་བྷུ་ཏི ས་བྦ་མྤི, པ་ཊི་ལོ་མ་ཀྐ་མཱ པ་ན;
ས་བྦ་མཱ་ཝ་ཛྫི་ཏ་བྦཾ ཏཾ, དི་ཝ་སེ ར་ཏྟི་ཡཾ ཀ་ཏཾ.
༡༠༧༩. པ་ཊི་ལོ་མ་ཀྐ་མེ་ནེ་ཝ, དུ་ཏི་ཡེ ཏ་ཏི་ཡེ་པི ཙ;
དི་ཝ་སེ པ་ཀྑ་མཱ་སེ་སུ, ཏ་ཐཱ སཾ་ཝ་ཙྪ་རེ་སུ་པི.
༡༠༨༠. ཡཱ་ཝ ཨ་སྨིཾ བྷ་ཝེ ས་ནྡྷི, ཏཱ་ཝ ཏེ་ན ཙ བྷི་ཀྑུ་ནཱ;
ཀ་ཏ་མཱ་ཝ་ཛྫི་ཏ་བྦཾ ཏཾ, པུ་རི་མ་སྨིཾ བྷ་ཝེ་པི ཙ.
༡༠༨༡. ཙུ་ཏི་ཀྑ་ཎེ་པི ནི་བྦ་ཏྟཾ, ནཱ་མ་རཱུ་པ་ཉྩ སཱ་དྷུ་ཀཾ;
ཨེ་ཝ་མཱ་ཝ་ཛྫི་ཏེ ཏ་སྨིཾ, ནཱ་མ་རཱུ་པེ ཡ་དཱ པ་ན.
༡༠༨༢. ཏ་དེ་ཝཱ་ར་མྨ་ཎཾ ཀ་ཏྭཱ, ནཱ་མ་རཱུ་པཾ ཙུ་ཏི་ཀྑ་ཎེ;
མ་ནོ་དྭཱ་རེ མ་ན་ཀྐཱ་རོ, ཨུ་པྤ་ཛྫ་ཏི ཏ་དཱ པ་ན.
༡༠༨༣. ཨཱ་ཝ་ཛྫ་ནེ ནི་རུ་དྡྷ་སྨིཾ, ཏ་དེ་ཝཱ་ར་མྨ་ཎཾ པ་ན;
ཀ་ཏྭཱ ཛ་ཝ་ན་ཙི་ཏྟཱ་ནི, ཧོ་ནྟི ཙ་ཏྟཱ་རི པ་ཉྩ ཝཱ;
པུ་བྦེ ཝུ་ཏྟ་ན་ཡེ་ནེ་ཝ, སེ་སཾ ཉེ་ཡྻཾ ཝི་བྷཱ་ཝི་ནཱ.
༡༠༨༤. པ་རི་ཀ་མྨཱ་དི་ནཱ་མཱ་ནི, པུ་རི་མཱ་ནི བྷ་ཝ་ནྟི ཏུ;
པ་ཙྪི་མཾ ཨ་པྤ་ནཱ་ཙི་ཏྟཾ, རཱུ་པཱ་ཝ་ཙ་རི་ཀཾ བྷ་ཝེ.
༡༠༨༥. ཏེ་ན ཙི་ཏྟེ་ན ཡཾ ཉཱ་ཎཾ, སཾ་ཡུ་ཏྟཾ ཏེ་ན ཡཱ པ་ན;
སཾ་ཡུ་ཏྟཱ ས་ཏི སཱ པུ་བྦེ-ནི་ཝཱ་སཱ་ནུ་སྶ་ཏཱི་རི་ཏཱ.
པུ་བྦེ་ནི་ཝཱ་སཱ་ནུ་སྶ་ཏི་ཉཱ་ཎཾ.
༡༠༨༦. རཱུ་པཾ པ་སྶི་ཏུ་ཀཱ་མེ་ན, བྷི་ཀྑུ་ནཱ དི་བྦ་ཙ་ཀྑུ་ནཱ;
ཀ་སི་ཎཱ་ར་མྨ་ཎཾ ཛྷཱ་ནཾ, ཨ་བྷི་ཉྙཱ་པཱ་ད་ཀཾ པ་ན.
༡༠༨༧. ཨ་བྷི་ནཱི་ཧཱ་ར་ཀྑ་མཾ ཀ་ཏྭཱ, ཏེ་ཛོ་ཀ་སི་ཎ་མེ་ཝ ཝཱ;
ཨོ་དཱ་ཏ་ཀ་སི་ཎཾ ཝཱ་པི, ཨཱ་ལོ་ཀ་ཀ་སི་ཎ་མྤི ཝཱ.
༡༠༨༨. ཨི་མེ་སུ ཀ་ཏ་པུ་ཉྙེ་ཧི, ཀ་སི་ཎེ་སུ ཙ ཏཱི་སུ་པི;
ཨཱ་ལོ་ཀ་ཀ་སི་ཎཾ ཨེ་ཏྠ, སེ་ཊྛ་ནྟི པ་རི་དཱི་པི་ཏཾ.
༡༠༨༩. ཏ་སྨཱ ཏ་མི་ཏ་རཾ ཝཱ་པི, ཨུ་པྤཱ་དེ་ཏྭཱ ཡ་ཐཱ་ཀྐ་མཾ;
ཨུ་པ་ཙཱ་ར་བྷཱུ་མི་ཡཾ་ཡེ་ཝ, ཋ་ཏྭཱ ཏཾ པ་ན པ་ཎྜི་ཏོ.
༡༠༩༠. ཝ་ཌྜྷེ་ཏྭཱ་ན ཋ་པེ་ཏ་བྦཾ, ན ཨུ་པྤཱ་དེ་ཡྻ ཨ་པྤ་ནཾ;
ཨུ་པྤཱ་དེ་ཏི ས་ཙེ ཧོ་ཏི, པཱ་ད་ཀ་ཛ྄ཛྷཱ་ན་ནི་སྶི་ཏཾ.
༡༠༩༡. ཛྷཱ་ན་སྶ ཝ་ཌྜྷི་ཏ་སྶ་ནྟོ-ག་ཏཾ རཱུ་པཾ ཏུ ཡོ་གི་ནཱ;
པ་སྶི་ཏ་བྦཾ བྷ་ཝེ རཱུ་པཾ, པ་སྶ་ཏོ པ་ན ཏ་སྶ ཏཾ.
༡༠༩༢. པ་རི་ཀ་མྨ་སྶ ཝཱ་རོ ཧི, ཨ་ཏི་ཀྐ་མ་ཏི ཏཱ་ཝ་དེ;
ཨཱ་ལོ་ཀོ་པི ཏ་ཏོ ཏ་སྶ, ཁི་པྤ་མ་ནྟ་ར་དྷཱ་ཡ་ཏི.
༡༠༩༣. ཏ་སྨིཾ ཨ་ནྟ་ར་ཧི་ཏེ རཱུ་པ-ག་ཏ་མྤི ཙ ན དི་སྶ་ཏི;
ཏེ་ནཱ་ཐ པཱ་ད་ཀ་ཛ྄ཛྷཱ་ནཾ, པ་ཝི་སི་ཏྭཱ ཏ་ཏོ པུ་ན.
༡༠༩༤. ཝུ་ཊྛཱ་ཡ པ་ན ཨཱ་ལོ་ཀོ, ཕ་རི་ཏ་བྦོ་ཝ བྷི་ཀྑུ་ནཱ;
ཨེ་ཝཾ ཨ་ནུ་ཀྐ་མེ་ནེ་ཝ, ཨཱ་ལོ་ཀོ ཐཱ་མ་ཝཱ སི་ཡཱ.
༡༠༩༥. ‘‘ཨཱ་ལོ་ཀོ ཨེ་ཏྠ ཧོ་ཏཱུ’’ཏི,
ཡ་ཏྟ་ཀཾ ཋཱ་ན་མེ་ཝ སོ;
པ་རི་ཙྪི་ནྡ་ཏི ཏ་ཏྠེ་ཝ,
ཨཱ་ལོ་ཀོ པ་ན ཏི་ཊྛ་ཏི.
༡༠༩༦. དི་ཝ་ས་མྤི ནི་སཱི་དི་ཏྭཱ, པ་སྶ་ཏོ ཧོ་ཏི ད་སྶ་ནཾ;
ཏི་ཎུ་ཀྐཱ་ཡ ག་ཏོ མ་གྒཾ, པུ་རི་སེ་ཏྠ ནི་ད་སྶ་ནཾ.
༡༠༩༧. ཨུ་པྤཱ་ད་ན་ཀྐ་མོ་པི་སྶ, ཏ་ཏྲཱ་ཡཾ དི་བྦ་ཙ་ཀྑུ་ནོ;
ཝུ་ཏྟ་པྤ་ཀཱ་ར་རཱུ་པཾ ཏཾ, ཀ་ཏྭཱ ཨཱ་ར་མྨ་ཎཾ པ་ན.
༡༠༩༨. མ་ནོ་དྭཱ་རེ མ་ན་ཀྐཱ་རེ, ཛཱ་ཏེ ཡཱ་ནི ཏ་དེ་ཝ ཙ;
རཱུ་པཾ ཨཱ་ར་མྨ་ཎཾ ཀ་ཏྭཱ, ཛཱ་ཡ་ནྟི ཛ་ཝ་ནཱ་ནི ཧི.
༡༠༩༩. ཀཱ་མཱ་ཝ་ཙ་ར་ཙི་ཏྟཱ་ནི, ཏཱ་ནི ཙ་ཏྟཱ་རི པ་ཉྩ ཝཱ;
ཧེ་ཊྛཱ ཝུ་ཏྟ་ན་ཡེ་ནེ་ཝ, སེ་སཾ ཉེ་ཡྻཾ ཝི་བྷཱ་ཝི་ནཱ.
༡༡༠༠. ཨ་ཏྠ་སཱ་དྷ་ཀ་ཙི་ཏྟཾ ཏཾ, ཙ་ཏུ་ཏྠ་ཛ྄ཛྷཱ་ནི་ཀཾ མ་ཏཾ;
ཏཾ་ཙི་ཏྟ་སཾ་ཡུ་ཏཾ ཉཱ་ཎཾ, དི་བྦ་ཙ་ཀྑུ་ནྟི ཝུ་ཙྩ་ཏི.
༡༡༠༡. ཨ་ནཱ་ག་ཏཾ་ས་ཉཱ་ཎ་སྶ, ཡ་ཐཱ་ཀ་མྨུ་པ་ག་སྶ ཙ;
པ་རི་ཀ་མྨཾ ཝི་སུཾ ན་ཏྠི, ཨི་ཛ྄ཛྷ་ནྟི དི་བྦ་ཙ་ཀྑུ་ནཱ.
༡༡༠༢. ཙུ་ཏཱུ་པ་པཱ་ཏ་ཉཱ་ཎ་མྤི, དི་བྦ་ཙ་ཀྑུ་ནྟི ཝཱ པ་ན;
ཨ་ཏྠ་ཏོ ཨེ་ཀ་མེ་ཝེ་དཾ, བྱ་ཉྫ་ནེ པ་ན ནཱ་ན་ཏཱ.
དི་བྦ་ཙ་ཀྑུ་ཉཱ་ཎཾ.
༡༡༠༣. ཡོ་དྷ སུ་ཎཱ་ཏི ཀ་རོ་ཏི ཙ ཙི་ཏྟེ,
ག་ནྠ་མི་མཾ པ་ར་མཾ པ་ན བྷི་ཀྑུ;
སོ ཨ་བྷི་དྷ་མྨ་མ་ཧ་ཎྞ་ཝ་པཱ་རཾ,
ཡཱ་ཏི ཨ་ནེ་ན ཏ་རེ་ན ཏ་རི་ཏྭཱ.
ཨི་ཏི ཨ་བྷི་དྷ་མྨཱ་ཝ་ཏཱ་རེ ཨ་བྷི་ཉྙཱ་ནི་དྡེ་སོ ནཱ་མ
སོ་ལ༹་ས་མོ པ་རི་ཙྪེ་དོ.