༡༥. པ་ནྣ་ར་ས་མོ པ་རི་ཙྪེ་དོ
ཨ་རཱུ་པཱ་ཝ་ཙ་ར་ས་མཱ་དྷི་བྷཱ་ཝ་ནཱ་ནི་དྡེ་སོ
༩༨༠. རཱུ་པཱ་རཱུ་པ་མ་ཏཱི་ཏེ་ན, རཱུ་པཱ་རཱུ་པཱ་དི་ཝེ་དི་ནཱ;
ཡཱ་ནི ཙཱ་རཱུ་པ་པུ་ཉྙཱ་ནི, ས་རཱུ་པེ་ནཱི་རི་ཏཱ་ནི ཏུ.
༩༨༡. ཏེ་སཾ དཱ་ནི པ་ཝ་ཀྑཱ་མི, བྷཱ་ཝ་ནཱ་ན་ཡ་མུ་ཏྟ་མཾ;
ཡོ་གཱ་ཝ་ཙ་ར་བྷི་ཀྑཱུ་ནཾ, ཧི་ཏ་ཏྠཱ་ཡ ས་མཱ་ས་ཏོ.
༩༨༢. ‘‘རཱུ་པེ ཁོ ཝི་ཛྫ་མཱ་ན་སྨིཾ, ད་ཎྜཱ་དཱ་ནཱ་ད་ཡོ སི་ཡུཾ;
ཨ་ནེ་ཀཱ་པི པ་ནཱ་བཱ་དྷཱ, ཙ་ཀྑུ་རོ་གཱ་ད་ཡོ’’ཨི་ཏི.
༩༨༣. རཱུ་པེ ཨཱ་དཱི་ན་ཝཾ དི་སྭཱ, རཱུ་པེ ནི་བྦི་ནྡ་མཱ་ན་སོ;
ཏ་སྶཱ་ཏི་ཀྐ་མ་ན་ཏྠཱ་ཡ, ཨ་རཱུ་པཾ པ་ཊི་པ་ཛྫ་ཏི.
༩༨༤. ཏ་མྷཱ ཀ་སི་ཎ་རཱུ་པཱ་པི, སོ ནི་བྦི་ཛྫ ཝི་སཱ་ར་དོ;
ཨ་པ་ཀྐ་མི་ཏུ་ཀཱ་མོ ཙ, སཱུ་ཀ་རཱ་བྷི་ཧ་ཏོ་ཝ སཱ.
༩༨༥. ཙ་ཏུ་ཏྠེ པ་ན ཛྷཱ་ན་སྨིཾ, ཧུ་ཏྭཱ ཙི་ཎྞ་ཝ་སཱི ཝ་སཱི;
ཙ་ཏུ་ཏྠ་ཛ྄ཛྷཱ་ན་ཏོ དྷཱི་མཱ, ཝུ་ཊྛཱ་ཡ ཝི་དྷི་ནཱ པུ་ན.
༩༨༦. ཀ་རོ་ཏི པ་ནི་དཾ ཙི་ཏྟཾ, རཱུ་པ་མཱ་ར་མྨ་ཎཾ ཡ་ཏོ;
ཨཱ་ས་ནྣ་སོ་མ་ན་སྶ་ཉྩ, ཐཱུ་ལ་ས་ནྟ་ཝི་མོ་ཀྑ་ཏོ.
༩༨༧. ཨི་ཏི ཨཱ་དཱི་ན་ཝཾ དི་སྭཱ, ཙ་ཏུ་ཏྠེ ཏ་ཏྠ ས་བྦ་སོ;
ནི་ཀ་ནྟིཾ པ་རི་ཡཱ་དཱ་ཡ, པ་ཋ་མཱ་རུ་པྤ་ཉྩ ས་ནྟ་ཏོ.
༩༨༨. ཙ་ཀྐ་ཝཱ་ལ༹་པ་རི་ཡ་ནྟཾ, ཡ་ཏྟ་ཀཾ ཝཱ པ་ནི་ཙྪ་ཏི;
ཏ་ཏྟ་ཀཾ པ་ཏྠ་རི་ཏྭཱ་ན, ཕུ་ཊྛོ་ཀཱ་ས་ཉྩ ཏེ་ན ཏཾ.
༩༨༩. ཨཱ་ཀཱ་སོ ཨི་ཏི ཝཱ་ན་ནྟོ,
ཨཱ་ཀཱ་སོ ཨི་ཏི ཝཱ པུ་ན;
མ་ན་སཱ ཧི ཀ་རོ་ནྟོ་ཝ,
ཨུ་གྒྷཱ་ཊེ་ཏི པ་ཝུ་ཙྩ་ཏི.
༩༩༠. ཨུ་གྒྷཱ་ཊེ་ནྟོ ཧི ཀ་སི་ཎཾ, ན སཾ་ཝེ་ལླེ་ཏི ཏཾ པ་ན;
ན ཙུ་དྡྷ་ར་ཏི སོ ཡོ་གཱི, པཱུ་ཝཾ ཝི་ཡ ཀ་པཱ་ལ་ཏོ.
༩༩༡. ཀེ་ཝ་ལཾ པ་ན ཏཾ ནེ་ཝ, ཨཱ་ཝ་ཛྫ་ཏི ན པེ་ཀྑ་ཏི;
ནཱ་ཝ་ཛྫ་ནྟོ ན་པེ་ཀྑ་ནྟོ, ཨུ་གྒྷཱ་ཊེ་ཏི ཧི ནཱ་མ་སོ.
༩༩༢. ཀ་སི་ཎུ་གྒྷཱ་ཊི་མཱ་ཀཱ་སཾ, ནི་མི་ཏྟཾ པ་ན ཏཾ་ཝ སོ;
ཨཱ་ཀཱ་སོ ཨི་ཏི ཙི་ཏྟེ་ན, ཨཱ་ཝ་ཛྫ་ཏི པུ་ན་པྤུ་ནཾ.
༩༩༣. ཨཱ་ཝ་ཛྫ་ཏོ ཧི ཏ་སྶེ་ཝཾ,
ཀ་རོ་ཏོ ཏ་ཀྐཱ་ཧ་ཏ་མྤི ཙ;
པ་ཉྩ ནཱི་ཝ་ར་ཎཱ ཏ་སྶ,
ཝི་ཀྑ་མྦྷ་ནྟི ཧི ས་བྦ་སོ.
༩༩༤. ཨཱ་སེ་ཝ་ཏི ཙ བྷཱ་ཝེ་ཏི, ཏཾ ནི་མི་ཏྟཾ པུ་ན་པྤུ་ནཾ;
ཀ་རོ་ཏོ པ་ན ཏ་སྶེ་ཝ, ས་ནྟ་ཙི་ཏྟ་སྶ ཡོ་གི་ནོ.
༩༩༥. ཏ་ཏྲཱ་ཀཱ་སེ པ་ནཱ་པྤེ་ཏི, པ་ཋ་མཱ་རུ་པྤ་མཱ་ན་སཾ;
ཨི་དྷཱ་པི པུ་རི་མེ བྷཱ་གེ, ཏཱི་ཎི ཙ་ཏྟཱ་རི ཝཱ པ་ན.
༩༩༦. ཛ་ཝ་ནཱ་ནི ཨུ་པེ་ཀྑཱ་ཡ, ས་མྤ་ཡུ་ཏྟཱ་ནི ཧོ་ནྟི ཧི;
ཙ་ཏུ་ཏྠཾ པ་ཉྩ་མཾ ཝཱ་པི, ཧོ་ཏི ཨཱ་རུ་པྤ་མཱ་ན་སཾ.
༩༩༧. པུ་ན བྷཱ་ཝེ་ཏུ་ཀཱ་མེ་ན, དུ་ཏི་ཡཱ་རུ་པྤ་མཱ་ན་སཾ;
སུ་ཙི་ཎྞ་ཝ་སི་ནཱ ཧུ་ཏྭཱ, པ་ཋ་མཱ་རུ་པྤ་མཱ་ན་སེ.
༩༩༨. ཨཱ་ས་ནྣ་རཱུ་པཱ་ཝ་ཙ་ར-ཛ྄ཛྷཱ་ན་པ་ཙྩ་ཏྠི་ཀ་ནྟི ཙ;
དུ་ཏི་ཡཱ་རུ་པྤ་ཙི་ཏྟཾ་ཝ, ན ཙ ས་ནྟ་མི་ད་ནྟི ཙ.
༩༩༩. ཨེ་ཝ་མཱ་དཱི་ན་ཝཾ དི་སྭཱ, པ་ཋ་མཱ་རུ་པྤ་མཱ་ན་སེ;
ནི་ཀ་ནྟིཾ པ་རི་ཡཱ་དཱ་ཡ, དུ་ཏི་ཡཾ ས་ནྟ་ཏོ པ་ན.
༡༠༠༠. ཏ་མཱ་ཀཱ་སཾ ཕ་རི་ཏྭཱ་ན, པ་ཝ་ཏྟ་མཱ་ན་སཾ པ་ན;
ཏ་ཉྩ ཝི་ཉྙཱ་ཎ་མི་ཙྩེ་ཝཾ, ཀ་ཏྟ་བྦཾ མ་ན་སཱ བ་ཧུཾ.
༡༠༠༡. ཨཱ་ཝ་ཛྫ་ན་ཉྩ ཀ་ཏྟ་བྦཾ, ཏ་ཐཱ ཏ་ཀྐཱ་ཧ་ཏ་མྤི ཙ;
‘‘ཨ་ན་ནྟ’’ནྟི ‘‘ཨ་ན་ནྟ’’ནྟི, ཀཱ་ཏ་བྦཾ མ་ན་སཱ ནི་དྷ.
༡༠༠༢. ཏ་སྨིཾ པ་ན ནི་མི་ཏྟ་སྨིཾ, ཝི་ཙཱ་རེ་ནྟ་སྶ མཱ་ན་སཾ;
ཨུ་པ་ཙཱ་རེ་ན ཏཾ ཙི་ཏྟཾ, ས་མཱ་དྷི་ཡ་ཏི ཡོ་གི་ནོ.
༡༠༠༣. ཨཱ་སེ་ཝ་ཏི ཙ བྷཱ་ཝེ་ཏི, ཏཾ ནི་མི་ཏྟཾ པུ་ན་པྤུ་ནཾ;
ཏ་སྶ ཙེ་ཝཾ ཀ་རོ་ནྟ་སྶ, ས་ཏི་ས་མྤ་ནྣ་ཙེ་ཏ་སོ.
༡༠༠༤. ཨཱ་ཀཱ་སཾ ཕུ་ས་ཝི་ཉྙཱ་ཎེ, དུ་ཏི་ཡཱ་རུ་པྤ་མཱ་ན་སཾ;
ཨ་པྤེ་ཏི ཨ་པྤ་ནཱ ཡ་སྨིཾ, ན་ཡོ ཝུ་ཏྟ་ན་ཡོ་ཝ སོ.
༡༠༠༥. ཨཱ་ཀཱ་སོ་ཡ་མ་ན་ནྟོ་ཏི, ཨེ་ཝ་མཱ་ཀཱ་ས་མེ་ཝ ཏཾ;
ཕ་རི་ཏྭཱ པ་ཝ་ཏྟ་ཝི་ཉྙཱ་ཎཾ, ‘‘ཝི་ཉྙཱ་ཎ་ཉྩ’’ནྟི ཝུ་ཙྩ་ཏི.
༡༠༠༦. མ་ན་ཀྐཱ་ར་ཝ་སེ་ནཱ་པི, ཨ་ན་ནྟཾ པ་རི་དཱི་པི་ཏཾ;
‘‘ཝི་ཉྙཱ་ཎཱ་ན་ནྟ’’མི་ཙྩེ་ཝ, ཝ་ཏྟ་བྦཾ པ་ནི་དཾ སི་ཡཱ.
༡༠༠༧. ཨ་ཐ བྷཱ་ཝེ་ཏུ་ཀཱ་མེ་ན, ཏ་ཏི་ཡཱ་རུ་པྤ་མཱ་ན་སཾ;
སུ་ཙི་ཎྞ་ཝ་སི་ནཱ ཧུ་ཏྭཱ, དུ་ཏི་ཡཱ་རུ་པྤ་མཱ་ན་སེ.
༡༠༠༨. ཨཱ་ས་ནྣ་པ་ཋ་མཱ་རུ་པྤ-ཙི་ཏྟ་པ་ཙྩ་ཏྠི་ཀ་ནྟི ཙ;
ཏ་ཏི་ཡཱ་རུ་པྤ་ཙི་ཏྟཾ་ཝ, ན ཙ ས་ནྟ་མི་ད་ནྟི ཙ.
༡༠༠༩. ཨེ་ཝ་མཱ་དཱི་ན་ཝཾ དི་སྭཱ, དུ་ཏི་ཡཱ་རུ་པྤ་མཱ་ན་སེ;
ནི་ཀ་ནྟིཾ པ་རི་ཡཱ་དཱ་ཡ, ཏ་ཏི་ཡཾ ས་ནྟ་ཏོ པ་ན.
༡༠༡༠. ཨེ་ཝཾ མ་ན་སི ཀ་ཏྭཱ་ན, ཀཱ་ཏ་བྦོ མ་ན་སཱ པུ་ན;
པ་ཋ་མཱ་རུ་པྤ་ཝི་ཉྙཱ་ཎཱ-བྷཱ་ཝོ ཏ་སྶེ་ཝ སུ་ཉྙ་ཏོ.
༡༠༡༡. ཏཾ པ་ནཱ་ཀཱ་ས་ཝི་ཉྙཱ་ཎཾ, ཨ་ཀ་ཏྭཱ མ་ན་སཱ པུ་ན;
‘‘ན་ཏྠི ན་ཏྠཱི’’ཏི ཝཱ་ཏེ་ན, ‘‘སུ་ཉྙཾ སུ་ཉྙ’’ནྟི ཝཱ ཏ་ཏོ.
༡༠༡༢. ཨཱ་ཝ་ཛྫི་ཏ་བྦ་མེ་ཝ་ཉྷི, ཀ་ཏྟ་བྦཾ མ་ན་སཱ་པི ཙ;
ཏ་ཀྐཱ་ཧ་ཏ་ཉྩ ཀཱ་ཏ་བྦཾ, པུ་ན་པྤུ་ནཾ་ཝ དྷཱི་མ་ཏཱ.
༡༠༡༣. ཏ་སྨིཾ ནི་མི་ཏྟེ ཏ་སྶེ་ཝཾ, ཝི་ཙཱ་རེ་ནྟ་སྶ མཱ་ན་སཾ;
ས་ཏི ཏི་ཊྛ་ཏི བྷི་ཡྻོ་པི, ས་མཱ་དྷི་ཡ་ཏི མཱ་ན་སཾ.
༡༠༡༤. ཨཱ་སེ་ཝ་ཏི ཙ བྷཱ་ཝེ་ཏི, ཏཾ ནི་མི་ཏྟཾ པུ་ན་པྤུ་ནཾ;
ཏ་སྶ ཙེ་ཝཾ ཀ་རོ་ནྟ་སྶ, ས་ཏི་ས་མྤ་ནྣ་ཙེ་ཏ་སོ.
༡༠༡༥. ཀ་སི་ཎུ་གྒྷཱ་ཊི་མཱ་ཀཱ་སཾ, ཕ་རི་ཏྭཱ་ན ས་མ་ནྟ་ཏོ;
ཝི་ཉྙཱ་ཎ་སྶ པ་ཝ་ཏྟ་སྶ, ན་ཏྠི་བྷཱ་ཝེ ཨ་བྷཱ་ཝ་ཀེ.
༡༠༡༦. ཏ་ཏི་ཡཱ་རུ་པྤ་ཝི་ཉྙཱ་ཎཾ,
ཏཾ པ་ནཱ་པྤེ་ཏི ཡོ་གི་ནོ;
ཨ་པྤ་ནཱ་ཡ ན་ཡོ་པེ་ཏྠ,
ཧོ་ཏི ཝུ་ཏྟ་ན་ཡོ་ཝ སོ.
༡༠༡༧. ཨཱ་ཀཱ་ས་ག་ཏ་ཝི་ཉྙཱ་ཎཾ, དུ་ཏི་ཡཱ་རུ་པྤ་ཙ་ཀྑུ་ནཱ;
པ་སྶ་ནྟོ ཝི་ཧ་རི་ཏྭཱ་ན, ‘‘ན་ཏྠི ན་ཏྠཱི’’ཏི་ཨཱ་དི་ནཱ.
༡༠༡༨. པ་རི་ཀ་མྨ་མ་ན་ཀྐཱ་རེ, ཏ་སྨིཾ ཨ་ནྟ་ར་ཧི་ཏེ པ་ན;
ཏ་སྶཱ་པ་ག་མ་མ་ཏྟཾ་ཝ, པ་སྶ་ནྟོ ཝ་ས་ཏཱི ཙ སོ.
༡༠༡༩. ས་ནྣི་པཱ་ཏཾ ཡ་ཐཱ ཀོ་ཙི, དི་སྭཱ ས་ངྒྷ་སྶ ཀ་ཏྠ་ཙི;
ག་ཏེ ས་ངྒྷེ ཏུ ཏཾ ཋཱ་ནཾ, སུ་ཉྙ་མེ་ཝཱ་ནུ་པ་སྶ་ཏི.
༡༠༢༠. པུ་ན བྷཱ་ཝེ་ཏུ་ཀཱ་མེ་ན, ཙ་ཏུ་ཏྠཱ་རུ་པྤ་མཱ་ན་སཾ;
སུ་ཙི་ཎྞ་ཝ་སི་ནཱ ཧུ་ཏྭཱ, ཏ་ཏི་ཡཱ་རུ་པྤ་མཱ་ན་སེ.
༡༠༢༡. ཨཱ་ས་ནྣ་དུ་ཏི་ཡཱ་རུ་པྤ-ཙི་ཏྟ་པ་ཙྩ་ཏྠི་ཀ་ནྟི ཙ;
ཙ་ཏུ་ཏྠཱ་རུ་པྤ་ཙི་ཏྟཾ་ཝ, ན ཙ ས་ནྟ་མི་ད་ནྟི ཙ.
༡༠༢༢. ཨེ་ཝ་མཱ་དཱི་ན་ཝཾ དི་སྭཱ, ཏ་ཏི་ཡཱ་རུ་པྤ་མཱ་ན་སེ;
ནི་ཀ་ནྟིཾ པ་རི་ཡཱ་དཱ་ཡ, ཙ་ཏུ་ཏྠཾ ས་ནྟ་ཏོ པ་ན.
༡༠༢༣. ཨེ་ཝཾ མ་ན་སི ཀ་ཏྭཱ་ན, པུ་ན ཏ་ཏྠེ་ཝ དྷཱི་མ་ཏཱ;
ཨ་བྷཱ་ཝཱ་ར་མྨ་ཎཾ ཀ་ཏྭཱ, ས་མྤ་ཝ་ཏྟ་མི་དཾ མ་ནོ.
༡༠༢༤. ‘‘ས་ནྟཾ ས་ནྟ་མི་དཾ ཙི་ཏྟ’’-མི་ཙྩེ་ཝཾ ཏཾ པུ་ན་པྤུ་ནཾ;
ཧོ་ཏི ཨཱ་ཝ་ཛྫི་ཏ་བྦ་ཉྩ, ཀཱ་ཏ་བྦཾ མ་ན་སཱ་པི ཙ.
༡༠༢༥. ཏ་སྨིཾ ནི་མི་ཏྟེ ཏ་སྶེ་ཝཾ, ཝི་ཙཱ་རེ་ནྟ་སྶ མཱ་ན་སཾ;
ས་ཏི ཏི་ཊྛ་ཏི བྷི་ཡྻོ་པི, ས་མཱ་དྷི་ཡ་ཏི མཱ་ན་སཾ.
༡༠༢༦. ཨཱ་སེ་ཝ་ཏི ཙ བྷཱ་ཝེ་ཏི, ཏཾ ནི་མི་ཏྟཾ པུ་ན་པྤུ་ནཾ;
ཏ་སྶ ཙེ་ཝཾ ཀ་རོ་ནྟ་སྶ, ས་ཏི་ས་མྤ་ནྣ་ཙེ་ཏ་སོ.
༡༠༢༧. ཏ་ཏི་ཡཱ་རུ་པྤ་ས་ངྑཱ་ཏ-ཁ་ནྡྷེ་སུ ཙ ཙ་ཏཱུ་སུ་པི;
ཙ་ཏུ་ཏྠཱ་རུ་པྤ་ཝི་ཉྙཱ་ཎཾ, ཏཾ པ་ནཱ་པྤེ་ཏི ཡོ་གི་ནོ.
༡༠༢༨. ཨ་པྤ་ནཱ་ཡ ན་ཡོ་པེ་ཏྠ, ཧེ་ཊྛཱ ཝུ་ཏྟ་ན་ཡཱུ་པ་མོ;
ཨ་པི་ཙེ་ཏྠ ཝི་སེ་སོ་ཡཾ, ཝེ་དི་ཏ་བྦོ ཝི་བྷཱ་ཝི་ནཱ.
༡༠༢༩. ‘‘ཨ་ཧོ ས་ནྟཱ ཝ་ཏཱ་ཡ’’ནྟི, ས་མཱ་པ་ཏྟི པ་དི་སྶ་ཏི;
ཡཱ པ་ནཱ་བྷཱ་ཝ་མ་ཏྟ་མྤི, ཀ་ཏྭཱ ཋ་སྶ་ཏི གོ་ཙ་རཾ.
༡༠༣༠. ས་ནྟཱ་ར་མྨ་ཎ་ཏཱ་ཡེ་ཝ, ‘‘ས་ནྟཱ་ཡ’’ནྟི ཝི་པ་སྶ་ཏི;
ས་ནྟ་ཏོ ཙེ མ་ན་ཀྐཱ་རོ, ཀ་ཐ་ཉྩ ས་མ་ཏི་ཀྐ་མོ.
༡༠༣༡. ཨ་ནཱ་པ་ཛྫི་ཏུ་ཀཱ་མ་ཏྟཱ, ཧོ་ཏེ་ཝ ས་མ་ཏི་ཀྐ་མོ;
‘‘ས་མཱ་པ་ཛྫཱ་མ་ཧ་མེ་ཏ’’-མི་ཙྩཱ་བྷོ་གོ ན ཝི་ཛྫ་ཏི.
༡༠༣༢. ས་ནྟ་ཏོ ཏཾ ཀ་རོ་ནྟོ ཧི, མ་ན་སཱ སུ་ཁུ་མཾ པ་རཾ;
ཨ་ས་ཉྙཾ པ་ན དུ་བྦ་ལྱཾ, པཱ་པུ་ཎཱ་ཏི མ་ཧ་གྒ་ཏཾ.
༡༠༣༣. ནེ་ཝ་ས་ཉྙཱི ཙ ནཱ་ས་ཉྙཱི,
ཡཱ་ཡ ས་ཉྙཱ་ཡ ཧོ་ཏི སོ;
ན ཀེ་ཝ་ལཾ ཏུ ས་ཉྙཱ་ཝ,
ཨེ་དི་སཱི ཨ་ཐ ཁོ པ་ན.
༡༠༣༤. ཨེ་ཝ་མེ་ཝ བྷ་ཝ་ནྟེ་ཏྠ, སུ་ཁུ་མཱ ཝེ་ད་ནཱ་ད་ཡོ;
པ་ཏྟ་མ་ཀྑ་ན་ཏེ་ལེ་ན, མ་གྒ་སྨིཾ ཨུ་ད་ཀེ་ན ཙ.
༡༠༣༥. སཱ་ཝེ་ཏ་བྦོ ཨ་ཡཾ ཨ་ཏྠོ, ཙ་ཏུ་ཏྠཱ་རུ་པྤ་བོ་དྷ་ནེ;
པ་ཊུ་ས་ཉྙཱ་ཡ ཀི་ཙྩ་སྶ, ནེ་ཝ་ཀྐ་ར་ཎ་ཏོ ཨ་ཡཾ.
༡༠༣༦. ‘‘ནེ་ཝ་ས་ཉྙཱ’’ཏི ནི་དྡི་ཊྛཱ, ཙ་ཏུ་ཏྠཱ་རུ་པྤ་ས་མྦྷ་ཝཱ;
པ་ཊུ་ས་ཉྙཱ་ཡ ཀི་ཙྩཾ སཱ, ཀཱ་ཏུཾ ས་ཀྐོ་ཏི ནེ་ཝ ཙ.
༡༠༣༧. ཡ་ཐཱ ད་ཧ་ན་ཀི་ཙྩཾ ཏུ, ཏེ་ཛོ་དྷཱ་ཏུ སུ་ཁོ་ད་ཀེ;
སཱ ས་ངྑཱ་རཱ་ཝ་སེ་ས་ཏྟཱ, སུ་ཁུ་མ་ཏྟེ་ན ཝི་ཛྫ་ཏི;
ཏ་སྨཱ པ་ན ཙ སཱ ས་ཉྙཱ, ‘‘ནཱ་ས་ཉྙཱ’’ཏི པ་ཝུ་ཙྩ་ཏི.
༡༠༣༨. ཨེ་ཏཱ ཧི རཱུ་པ་མཱ་ཀཱ་སཾ,
ཝི་ཉྙཱ་ཎཾ ཏ་ད་བྷཱ་ཝ་ཀཾ;
ཨ་ཏི་ཀྐ་མི་ཏྭཱ ཀ་མ་ཏོ,
ཙ་ཏ་སྶོ ཧོ་ནྟི ཨཱ་ཧ ཙ.
༡༠༣༩. ‘‘ཨཱ་ར་མྨ་ཎཱ་ཏི་ཀྐ་མ་ཏོ, ཙ་ཏ་སྶོ་པི བྷ་ཝ་ནྟི་མཱ;
ཨ་ངྒཱ་ཏི་ཀྐ་མ་མེ་ཏཱ་སཾ, ན ཨི་ཙྪ་ནྟི ཝི་བྷཱ་ཝི་ནོ.
༡༠༤༠. སུ་པ་ཎཱི་ཏ་ཏ་རཱ ཧོ་ནྟི,
པ་ཙྪི་མཱ པ་ཙྪི་མཱ ཨི་དྷ;
ཨུ་པ་མཱ ཏ་ཏྠ ཝི་ཉྙེ་ཡྻཱ,
པཱ་སཱ་ད་ཏ་ལ་སཱ་ཊི་ཀཱ’’ཏི.
༡༠༤༡. ས་ངྑེ་པེ་ན མ་ཡཱ་རུ་པྤ-ས་མཱ་པ་ཏྟི་ན་ཡོ ཨ་ཡཾ;
ད་སྶི་ཏོ ད་སྶི་ཏོ སུ་དྡྷ-ད་སྶི་ནཱ པི་ཡ་ད་སྶི་ནཱ.
༡༠༤༢. རཱུ་པཱ་རཱུ་པ་ཛ྄ཛྷཱ་ན་ས་མཱ་པ་ཏྟི་ཝི་དྷཱ་ནཾ,
ཛཱ་ནཱ་ཏི་མཾ སཱ་ར་ཏ་རཾ ཡོ པ་ན བྷི་ཀྑུ;
རཱུ་པཱ་རཱུ་པ་ཛ྄ཛྷཱ་ན་ས་མཱ་པ་ཏྟཱི་སུ ད་ཀྑོ,
རཱུ་པཱ་རཱུ་པཾ ཡཱ་ཏི བྷ་ཝཾ སོ ཨ་བྷི་བྷུ་ཡྻ.
ཨི་ཏི ཨ་བྷི་དྷ་མྨཱ་ཝ་ཏཱ་རེ ཨ་རཱུ་པཱ་ཝ་ཙ་ར་ས་མཱ་དྷི་བྷཱ་ཝ་ནཱ་ནི་དྡེ་སོ ནཱ་མ
པ་ནྣ་ར་ས་མོ པ་རི་ཙྪེ་དོ.