༡༤. ཙུ་དྡ་ས་མོ པ་རི་ཙྪེ་དོ
རཱུ་པཱ་ཝ་ཙ་ར་ས་མཱ་དྷི་བྷཱ་ཝ་ནཱ་ནི་དྡེ་སོ
༧༨༩. བྷཱ་ཝ་ནཱ་ན་ཡ་མ་ཧཾ ཧི་ཏཱ་ན་ཡཾ,
མཱ་ན་ཡ་ཉྩ སུ་ག་ཏཾ སུ་ཁཱ་ན་ཡཾ;
བྱཱ་ཀ་རོ་མི པ་ར་མཾ ཨི་ཏོ པ་རཾ,
ཏཾ སུ་ཎཱ་ཐ མ་དྷུ་ར་ཏྠ་ཝ་ཎྞ་ནཾ.
༧༩༠. ཨུ་ཏྟ་རཾ ཏུ མ་ནུ་སྶཱ་ནཾ, དྷ་མྨ་ཏོ ཉཱ་ཎ་ད་སྶ་ནཾ;
པ་ཏྟུ་ཀཱ་མེ་ན ཀཱ་ཏ་བྦཾ, ཨཱ་དི་ཏོ སཱི་ལ་སོ་དྷ་ནཾ.
༧༩༡. ས་ངྐ་སྶ་ར་ས་མཱ་ཙཱ་རེ, དུ་སྶཱི་ལེ སཱི་ལ་ཝ་ཛྫི་ཏེ;
ན་ཏྠི ཛྷཱ་ནཾ ཀུ་ཏོ མ་གྒོ, ཏ་སྨཱ སཱི་ལཾ ཝི་སོ་དྷ་ཡེ.
༧༩༢. སཱི་ལཾ ཙཱ་རི་ཏྟ་ཝཱ་རི་ཏྟ་ཝ་སེ་ན དུ་ཝི་དྷཾ མ་ཏཾ;
ཏཾ པ་ནཱ་ཙྪི་དྡ་མ་ཀྑ་ཎྜ་མ་ཀ་མྨཱ་ས་མ་ནི་ནྡི་ཏཾ.
༧༩༣. ཀ་ཏྟ་བྦཾ ཨ་ཏྠ་ཀཱ་མེ་ན, ཝི་ཝེ་ཀ་སུ་ཁ་མི་ཙྪ་ཏཱ;
སཱི་ལ་ཉྩ ནཱ་མ བྷི་ཀྑཱུ་ནཾ, ཨ་ལ་ངྐཱ་རོ ཨ་ནུ་ཏྟ་རོ.
༧༩༤. ར་ཏ་ནཾ ས་ར་ཎཾ ཁེ་མཾ, ཏཱ་ཎཾ ལེ་ཎཾ པ་རཱ་ཡ་ཎཾ;
ཙི་ནྟཱ་མ་ཎི པ་ཎཱི་ཏོ ཙ, སཱི་ལཾ ཡཱ་ན་མ་ནུ་ཏྟ་རཾ.
༧༩༥. སཱི་ཏ་ལཾ ས་ལི་ལཾ སཱི་ལཾ, ཀི་ལེ་ས་མ་ལ་དྷོ་ཝ་ནཾ;
གུ་ཎཱ་ནཾ མཱུ་ལ་བྷཱུ་ཏ་ཉྩ, དོ་སཱ་ནཾ བ་ལ་གྷཱ་ཏི ཙ.
༧༩༦. ཏི་དི་ཝཱ་རོ་ཧ་ཎ་ཉྩེ་ཏཾ, སོ་པཱ་ནཾ པ་ར་མུ་ཏྟ་མཾ;
མ་གྒོ ཁེ་མོ ཙ ནི་བྦཱ་ན་ན་ག་ར་སྶ པ་ཝེ་ས་ནེ.
༧༩༧. ཏ་སྨཱ སུ་པ་རི་སུ་དྡྷཾ ཏཾ, སཱི་ལཾ དུ་ཝི་དྷ་ལ་ཀྑ་ཎཾ;
ཀ་ཏྟ་བྦཾ ཨ་ཏྠ་ཀཱ་མེ་ན, པི་ཡ་སཱི་ལེ་ན བྷི་ཀྑུ་ནཱ.
༧༩༨. ཀཱ་ཏ་བྦོ པ་ན སཱི་ལ་སྨིཾ, པ་རི་སུ་དྡྷེ ཋི་ཏེ་ནི་དྷ;
པ་ལི་བོ་དྷ་སྶུ་པ་ཙྪེ་དོ, པ་ལི་བོ་དྷཱ ད་སཱ་ཧུ ཙ.
༧༩༩. ‘‘ཨཱ་ཝཱ་སོ ཙ ཀུ་ལཾ ལཱ་བྷོ,
ག་ཎོ ཀ་མྨ་ཉྩ པ་ཉྩ་མཾ;
ཨ་དྡྷཱ་ནཾ ཉཱ་ཏི ཨཱ་བཱ་དྷོ,
ག་ནྠོ ཨི་དྡྷཱི་ཏི ཏེ ད་སཱ’’ཏི.
༨༠༠. པ་ལི་བོ་དྷ་སྶུ་པ་ཙྪེ་དཾ, ཀ་ཏྭཱ ད་ས་ཝི་དྷ་སྶ་པི;
ཨུ་པ་ས་ངྐ་མི་ཏ་བྦོ སོ, ཀ་མྨ་ཊྛཱ་ན་སྶ དཱ་ཡ་ཀོ.
༨༠༡. པི་ཡོ ག་རུ བྷཱ་ཝ་ནཱི་ཡོ, ཝ་ཏྟཱ ཙ ཝ་ཙ་ན་ཀྑ་མོ;
ག་མྦྷཱི་ར་ཉྩ ཀ་ཐཾ ཀ་ཏྟཱ, ནོ ཙ་ཊྛཱ་ནེ ནི་ཡོ་ཛ་ཀོ.
༨༠༢. ཨེ་ཝ་མཱ་དི་གུ་ཎོ་པེ་ཏ་མུ་པ་ག་ནྟྭཱ ཧི་ཏེ་སི་ནཾ;
ཀ་ལྱཱ་ཎ་མི་ཏྟཾ ཀཱ་ལེ་ན, ཀ་མྨ་ཊྛཱ་ན་སྶ དཱ་ཡ་ཀཾ.
༨༠༣. ཀ་མྨ་ཊྛཱ་ནཾ ག་ཧེ་ཏ་བྦཾ, ཝ་ཏྟཾ ཀ་ཏྭཱ པ་ན་སྶ ཏུ;
ཏེ་ནཱ་པི ཙ་རི་ཏཾ ཉ་ཏྭཱ, དཱ་ཏ་བྦཾ ཏ་སྶ བྷི་ཀྑུ་ནོ.
༨༠༤. ཙ་རི་ཏཾ པ་ནི་དཾ རཱ་ག་དོ་ས་མོ་ཧ་ཝ་སེ་ན ཙ;
ས་དྡྷཱ་བུ་དྡྷི་ཝི་ཏ་ཀྐཱ་ནཾ, ཝ་སེ་ན ཚ་བྦི་དྷཾ མ་ཏཾ.
༨༠༥. ཝོ་མི་སྶ་ཀ་ན་ཡཱ ཏེ་སཾ, ཙ་ཏུ་ས་ཊྛི བྷ་ཝ་ནྟི ཏེ;
ཏེ་ཧི ཨ་ཏྠོ ན ཙ་ཏྠཱི་ཏི, ན མ་ཡཱ ཨི་དྷ ད་སྶི་ཏཱ.
༨༠༦. ཨ་སུ་བྷཱ ཙ ད་སེ་ཝེ་ཏྠ, ཏ་ཐཱ ཀཱ་ཡ་ག་ཏཱ་ས་ཏི;
ཨེ་ཀཱ་ད་ས ཨི་མེ རཱ་ག-ཙ་རི་ཏ་སྶཱ་ནུ་ཀཱུ་ལ་ཏཱ.
༨༠༧. ཙ་ཏ་སྶོ ཨ་པྤ་མ་ཉྙཱ་ཡོ, ས་ཝ་ཎྞ་ཀ་སི་ཎཱ ཨི་མེ;
ཨ་ཊྛེ་ཝ ཙ ས་དཱ དོ་ས-ཙ་རི་ཏ་སྶཱ་ནུ་ཀཱུ་ལ་ཏཱ.
༨༠༨. ཏཾ མོ་ཧ་ཙ་རི་ཏ་སྶེ་ཏྠ, ཝི་ཏ་ཀྐ་ཙ་རི་ཏ་སྶ ཙ;
ཨ་ནུ་ཀཱུ་ལ་ནྟི ནི་དྡི་ཊྛཾ, ཨཱ་ནཱ་པཱ་ནཾ པ་ནེ་ཀ་ཀཾ.
༨༠༩. པུ་རི་མཱ་ནུ་སྶ་ཏི་ཚ་ཀྐཾ, ས་དྡྷཱ་ཙ་རི་ཏ་དེ་ཧི་ནོ;
མ་ར་ཎཱུ་པ་ས་མཱ་ཡུ་ཏྟཱ, ས་ཏི་མཱ་ཧཱ་ར་ནི་སྶི་ཏཱ.
༨༡༠. ས་ཉྙཱ དྷཱ་ཏུ་ཝ་ཝ་ཏྠཱ་ནཾ, བུ་དྡྷི་པྤ་ཀ་ཏི་ཛ་ནྟུ་ནོ;
ཨི་མེ པ་ན ཙ ཙ་ཏྟཱ་རོ, ཨ་ནུ་ཀཱུ་ལཱ་ཏི དཱི་པི་ཏཱ.
༨༡༡. ཙ་ཏྟཱ་རོ་པི ཙ ཨཱ་རུ་པྤཱ, སེ་སཱ་ནི ཀ་སི་ཎཱ་ནི ཙ;
ཨ་ནུ་ཀཱུ་ལཱ ཨི་མེ ས་བྦ-ཙ་རི་ཏཱ་ན་ནྟི ཝ་ཎྞི་ཏཱ.
༨༡༢. ཨི་དཾ ས་བྦཾ པ་ནེ་ཀ་ནྟ-ཝི་པ་ཙྩ་ནཱི་ཀ་བྷཱ་ཝ་ཏོ;
ཨ་ཏི་ས་པྤཱ་ཡ་ཏོ ཝུ་ཏྟ-མི་ཏི ཉེ་ཡྻཾ ཝི་བྷཱ་ཝི་ནཱ.
༨༡༣. ཀ་མྨ་ཊྛཱ་ནཱ་ནི ས་བྦཱ་ནི, ཙ་ཏྟཱ་ལཱི་སཱ་ཏི ནི་དྡི་སེ;
ཀ་སི་ཎཱ་ནི ད་ས ཙེ་ཝ, ཨ་སུ་བྷཱ་ནུ་སྶ་ཏཱི ད་ས.
༨༡༤. ཙ་ཏ་སྶོ ཨ་པྤ་མ་ཉྙཱ་ཡོ, ཙ་ཏྟཱ་རོ ཙ ཨ་རཱུ་པི་ནོ;
ཙ་ཏུ་དྷཱ་ཏུ་ཝ་ཝ་ཏྠཱ་ནཾ, ས་ཉྙཱ ཙཱ་ཧཱ་ར་ཏཱ ཨི་ཏི.
༨༡༥. ཀ་མྨ་ཊྛཱ་ནེ་སུ ཨེ་ཏེ་སུ, ཨུ་པ་ཙཱ་ར་ཝ་ཧཱ ཀ་ཏི;
ཨཱ་ནཱ་པཱ་ན་ས་ཏིཾ ཀཱ་ཡ-ག་ཏཾ ཧི་ཏྭཱ པ་ན་ཊྛ་པི.
༨༡༦. སེ་སཱ་ནུ་སྶ་ཏི་ཡོ ས་ཉྙཱ, ཝ་ཝ་ཏྠཱ་ན་ནྟི ཏེ་ར་ས;
ཨུ་པ་ཙཱ་ར་ཝ་ཧཱ ཝུ་ཏྟཱ, སེ་སཱ ཏེ ཨ་པྤ་ནཱ་ཝ་ཧཱ.
༨༡༧. ཨ་པྤ་ནཱ་ཡཱ་ཝ་ཧེ་སྭེ་ཏྠ, ཀ་སི་ཎཱ་ནི ད་སཱ་པི ཙ;
ཨཱ་ནཱ་པཱ་ན་ས་ཏཱི ཙེ་ཝ, ཙ་ཏུ་ཀྐ་ཛ྄ཛྷཱ་ནི་ཀཱ ཨི་མེ.
༨༡༨. ཨ་སུ་བྷཱ་ནི ད་ས ཙེ་ཏྠ, ཏ་ཐཱ ཀཱ་ཡ་ག་ཏཱ་ས་ཏི;
ཨེ་ཀཱ་ད་ས ཨི་མེ དྷ་མྨཱ, པ་ཋ་མ་ཛ྄ཛྷཱ་ནི་ཀཱ སི་ཡུཾ.
༨༡༩. ཨཱ་དི་བྲ་ཧྨ་ཝི་ཧཱ་རཱ་ཏི, ཏི་ཀ་ཛ྄ཛྷཱ་ན་ཝ་ཧཱ ཏ་ཡོ;
ཙ་ཏུ་ཏྠཱ་པི ཙ ཨཱ་རུ་པྤཱ, ཙ་ཏུ་ཏྠ་ཛ྄ཛྷཱ་ནི་ཀཱ མ་ཏཱ.
༨༢༠. ཝ་སེ་ནཱ་ར་མྨ་ཎ་ངྒཱ་ནཾ, དུ་ཝི་དྷོ ས་མ་ཏི་ཀྐ་མོ;
གོ་ཙ་རཱ་ཏི་ཀྐ་མཱ་རཱུ་པེ, རཱུ་པེ ཛྷཱ་ན་ངྒ་ཏི་ཀྐ་མོ.
༨༢༡. ད་སེ་ཝ ཀ་སི་ཎཱ་ནེ་ཏྠ, ཝ་ཌྜྷེ་ཏ་བྦཱ་ནི ཧོ་ནྟི ཧི;
ན ཙ ཝ་ཌྜྷ་ནི་ཡཱ སེ་སཱ, བྷ་ཝ་ནྟི ཨ་སུ་བྷཱ་ད་ཡོ.
༨༢༢. ད་སེ་ཝ ཀ་སི་ཎཱ་ནེ་ཏྠ, ཨ་སུ་བྷཱ་ནི ད་སཱ་པི ཙ;
ཨཱ་ནཱ་པཱ་ན་ས་ཏཱི ཙེ་ཝ, ཏ་ཐཱ ཀཱ་ཡ་ག་ཏཱ་ས་ཏི.
༨༢༣. པ་ཊི་བྷཱ་ག་ནི་མི་ཏྟཱ་ནི, ཧོ་ནྟི ཨཱ་ར་མྨ་ཎཱ་ནི ཧི;
སེ་སཱ་ནེ་ཝ པ་ཊི་བྷཱ་ག-ནི་མི་ཏྟཱ་ར་མྨ་ཎཱ སི་ཡུཾ.
༨༢༤. ཨ་སུ་བྷཱ་ནི ད་སཱ་ཧཱ་ར-ས་ཉྙཱ ཀཱ་ཡ་ག་ཏཱ་ས་ཏི;
དེ་ཝེ་སུ ན་པྤ་ཝ་ཏྟ་ནྟི, དྭཱ་ད་སེ་ཏཱ་ནི ས་བྦ་དཱ.
༨༢༥. ཏཱ་ནི དྭཱ་ད་ས ཙེ་ཏཱ་ནི, ཨཱ་ནཱ་པཱ་ན་ས་ཏཱི་པི ཙ;
ཏེ་ར་སེ་ཝ པ་ནེ་ཏཱ་ནི, བྲ་ཧྨ་ལོ་ཀེ ན ཝི་ཛྫ་རེ.
༨༢༦. ཋ་པེ་ཏྭཱ ཙ་ཏུ་རཱ་རཱུ་པེ, ན་ཏྠི ཀི་ཉྩི ཨ་རཱུ་པི་སུ;
མ་ནུ་སྶ་ལོ་ཀེ ས་བྦཱ་ནི, པ་ཝ་ཏྟ་ནྟི ན སཾ་ས་ཡོ.
༨༢༧. ཙ་ཏུ་ཏྠཾ ཀ་སི་ཎཾ ཧི་ཏྭཱ, ཀ་སི་ཎཱ ཨ་སུ་བྷཱ་ནི ཙ;
དི་ཊྛེ་ནེ་ཝ ག་ཧེ་ཏ་བྦཱ, ཨི་མེ ཨེ་ཀཱུ་ན་ཝཱི་ས་ཏི.
༨༢༨. ས་ཏི་ཡ་མྤི ཙ ཀཱ་ཡ་མྷི, དི་ཊྛེ་ན ཏ་ཙ་པ་ཉྩ་ཀཾ;
སེ་ས་མེ་ཏྠ སུ་ཏེ་ནེ་ཝ, ག་ཧེ་ཏ་བྦ་ནྟི དཱི་པི་ཏཾ.
༨༢༩. ཨཱ་ནཱ་པཱ་ན་ས་ཏཱི ཨེ་ཏྠ, ཕུ་ཊྛེ་ན པ་རི་དཱི་པི་ཏཱ;
ཝཱ་ཡོ་ཀ་སི་ཎ་མེ་ཝེ་ཏྠ, དི་ཊྛ་ཕུ་ཊྛེ་ན ག་ཡ྄ཧ་ཏི.
༨༣༠. སུ་ཏེ་ནེ་ཝ ག་ཧེ་ཏ་བྦཱ, སེ་སཱ ཨ་ཊྛཱ་ར་སཱ་པི ཙ;
ཨུ་པེ་ཀྑཱ ཨ་པྤ་མ་ཉྙཱ ཙ, ཨ་རཱུ་པཱ ཙེ་ཝ པ་ཉྩི་མེ.
༨༣༡. ཨཱ་དི་ཏོ་ཝ ག་ཧེ་ཏ་བྦཱ, ན ཧོ་ནྟཱི་ཏི པ་ཀཱ་སི་ཏཱ;
པ་ཉྩ་ཏིཾ་སཱ་ཝ་སེ་སཱ་ནི, ག་ཧེ་ཏ་བྦཱ་ནི ཨཱ་དི་ཏོ.
༨༣༢. ཀ་མྨ་ཊྛཱ་ནེ་སུ ཧེ་ཏེ་སུ, ཨཱ་ཀཱ་ས་ཀ་སི་ཎཾ ཝི་ནཱ;
ཀ་སི་ཎཱ ན་ཝ ཧོ་ནྟེ ཙ, ཨ་རཱུ་པཱ་ནཾ ཏུ པ་ཙྩ་ཡཱ.
༨༣༣. ད་སཱ་པི ཀ་སི་ཎཱ ཧོ་ནྟི, ཨ་བྷི་ཉྙཱ་ནཾ ཏུ པ་ཙྩ་ཡཱ;
ཏ་ཡོ བྲ་ཧྨ་ཝི་ཧཱ་རཱ་པི, ཙ་ཏུ་ཀྐ་སྶ བྷ་ཝ་ནྟི ཏུ.
༨༣༤. ཧེ་ཊྛི་མཾ ཧེ་ཊྛི་མཱ་རུ་པྤཾ, ཨུ་པ་རཱུ་པ་རི་མ་སྶ ཧི;
ཏ་ཐཱ ཙ་ཏུ་ཏྠ་མཱ་རུ་པྤཾ, ནི་རོ་དྷ་སྶཱ་ཏི དཱི་པི་ཏཾ.
༨༣༥. ས་བྦཱ་ནི ཙ པ་ནེ་ཏཱ་ནི, ཙ་ཏྟཱ་ལཱི་ས་ཝི་དྷཱ་ནི ཏུ;
ཝི་པ་སྶ་ནཱ་བྷ་ཝ་ས་མྤ་ཏྟི-སུ་ཁཱ་ནཾ པ་ཙྩ་ཡཱ སི་ཡུཾ.
༨༣༦. ཀ་མྨ་ཊྛཱ་ནཾ ག་ཧེ་ཏྭཱ་ན, ཨཱ་ཙ་རི་ཡ་སྶ ས་ནྟི་ཀེ;
ཝ་ས་ནྟ་སྶ ཀ་ཐེ་ཏ་བྦཾ, ཨཱ་ག་ཏ་སྶཱ་ག་ཏ་ཀྑ་ཎེ.
༨༣༧. ཨུ་གྒ་ཧེ་ཏྭཱ པ་ན་ཉྙ་ཏྲ, ག་ནྟུ་ཀཱ་མ་སྶ བྷི་ཀྑུ་ནོ;
ནཱ་ཏི་ས་ངྑེ་པ་ཝི་ཏྠཱ་རཾ, ཀ་ཐེ་ཏ་བྦཾ ཏུ ཏེ་ན་པི.
༨༣༨. ཀ་མྨ་ཊྛཱ་ནཾ ག་ཧེ་ཏྭཱ་ན, ས་མྨ་ཊྛཱ་ནཾ མ་ནོ་བྷུ་ནོ;
ཨ་ཊྛཱ་ར་ས་ཧི དོ་སེ་ཧི, ནི་ཙྩཾ པ་ན ཝི་ཝ་ཛྫི་ཏེ.
༨༣༩. ཨ་ནུ་རཱུ་པེ ཝི་ཧཱ་ར་སྨིཾ, ཝི་ཧཱ་ཏ་བྦཾ ཏུ གཱ་མ་ཏོ;
ནཱ་ཏི་དཱུ་རེ ན་ཙྩཱ་ས་ནྣེ, སི་ཝེ པ་ཉྩ་ངྒ་སཾ་ཡུ་ཏེ.
༨༤༠. ཁུ་དྡ་ཀོ པ་ལི་བོ་དྷོ་པི, ཚི་ནྡི་ཏ་བྦོ པ་ན་ཏྠི ཙེ;
དཱི་གྷཱ ཀེ་སཱ ན་ཁཱ ལོ་མཱ, ཚི་ནྡི་ཏ་བྦཱ ཝི་བྷཱ་ཝི་ནཱ.
༨༤༡. ཙཱི་ཝ་རཾ ར་ཛི་ཏ་བྦཾ ཏཾ, ཀི་ལི་ཊྛཾ ཏུ ས་ཙེ སི་ཡཱ;
ས་ཙེ པ་ཏྟེ མ་ལཾ ཧོ་ཏི, པ་ཙི་ཏ་བྦོ་ཝ སུ་ཊྛུ སོ.
༨༤༢. ཨ་ཙྪི་ནྣ་པ་ལི་བོ་དྷེ་ན, པ་ཙྪཱ ཏེ་ན ཙ བྷི་ཀྑུ་ནཱ;
པ་ཝི་ཝི་ཏྟེ པ་ནོ་ཀཱ་སེ, ཝ་ས་ནྟེ་ན ཡ་ཐཱ་སུ་ཁཾ.
༨༤༣. ཝ་ཛྫེ་ཏྭཱ མ་ཏྟི་ཀཾ ནཱི་ལཾ, པཱི་ཏཾ སེ་ཏ་ཉྩ ལོ་ཧི་ཏཾ;
ས་ཎྷཱ་ཡཱ་རུ་ཎ་ཝ་ཎྞཱ་ཡ, མ་ཏྟི་ཀཱ་ཡ མ་ནོ་ར་མཾ.
༨༤༤. ཀ་ཏྟ་བྦཾ ཀ་སི་ཎ་ཛ྄ཛྷཱ་ནཾ, པ་ཏྟུ་ཀཱ་མེ་ན དྷཱི་མ་ཏཱ;
སེ་ནཱ་ས་ནེ ཝི་ཝི་ཏྟ་སྨིཾ, བ་ཧི་དྡྷཱ ཝཱ་པི ཏཱ་དི་སེ.
༨༤༥. པ་ཊི་ཙྪ་ནྣེ པ་ན་ཊྛཱ་ནེ, པ་བྦྷཱ་རེ ཝཱ གུ་ཧ་ནྟ་རེ;
སཾ་ཧཱ་རི་མཾ ཝཱ ཀཱ་ཏ་བྦཾ, ཏཾ ཏ་ཏྲ་ཊྛ་ཀ་མེ་ཝ ཝཱ.
༨༤༦. སཾ་ཧཱ་རི་མཾ ཀ་རོ་ནྟེ་ན, ད་ཎྜ་ཀེ་སུ ཙ་ཏཱུ་སྭ་པི;
ཙ་མྨཾ ཝཱ ཀ་ཊ་སཱ་རཾ ཝཱ, དུ་སྶ་པ་ཏྟ་མྤི ཝཱ ཏ་ཐཱ.
༨༤༧. བ་ནྡྷི་ཏྭཱ ཏ་ཐཱ ཀཱ་ཏ་བྦཾ, མ་ཏྟི་ཀཱ་ཡ པ་མཱ་ཎ་ཏོ;
བྷཱུ་མི་ཡཾ པ་ཏྠ་རི་ཏྭཱ ཙ, ཨོ་ལོ་ཀེ་ཏ་བྦ་མེ་ཝ ཏཾ.
༨༤༨. ཏ་ཏྲ་ཊྛཾ བྷཱུ་མི་ཡཾ ཝ་ཊྚཾ, ཨཱ་ཀོ་ཊི་ཏྭཱ་ན ཁཱ་ཎུ་ཀེ;
ཝ་ལླཱི་ཧི ཏཾ ཝི་ན་ནྡྷི་ཏྭཱ, ཀཱ་ཏ་བྦཾ ཀ་ཎྞི་ཀཾ ས་མཾ.
༨༤༩. ཝི་ཏྠཱ་ར་ཏོ པ་མཱ་ཎེ་ན, ཝི་ད་ཏྠི་ཙ་ཏུ་ར་ངྒུ་ལཾ;
ཝ་ཊྚཾ ཝ་ཏྟ་ཏི ཏཾ ཀཱ་ཏུཾ, ཝི་ཝ་ཊྚཾ པ་ན མི་ཙྪ་ཏཱ.
༨༥༠. བྷེ་རཱི་ཏ་ལ་ས་མཾ སཱ་དྷུ, ཀ་ཏྭཱ ཀ་སི་ཎ་མ་ཎྜ་ལཾ;
ས་མྨ་ཛྫི་ཏྭཱ་ན ཏཾ ཋཱ་ནཾ, ནྷ་ཏྭཱ ཨཱ་ག་མྨ པ་ཎྜི་ཏོ.
༨༥༡. ཧ་ཏྠ་པཱ་ས་པ་མཱ་ཎ་སྨིཾ, ཏ་མྷཱ ཀ་སི་ཎ་མ་ཎྜ་ལཱ;
པ་དེ་སེ ཏུ སུ་པ་ཉྙ་ཏྟེ, ཨཱ་ས་ན་སྨིཾ སུ་ཨ་ཏྠ་ཏེ.
༨༥༢. ཨུ་ཙྩེ ཏ་ཏྠ ནི་སཱི་དི་ཏྭཱ, ཝི་ད་ཏྠི་ཙ་ཏུ་ར་ངྒུ་ལེ;
ཨུ་ཛུ་ཀཱ་ཡཾ པ་ཎི་དྷཱ་ཡ, ཀ་ཏྭཱ པ་རི་མུ་ཁཾ ས་ཏིཾ.
༨༥༣. ཀཱ་མེ་སྭཱ་དཱི་ན་ཝཾ དི་སྭཱ, ནེ་ཀྑ་མྨཾ ད་ཊྛུ ཁེ་མ་ཏོ;
པ་ར་མཾ པཱི་ཏི་པཱ་མོ་ཛྫཾ, ཛ་ནེ་ཏྭཱ ར་ཏ་ན་ཏྟ་ཡེ.
༨༥༤. ‘‘བྷཱ་གཱི ཨ་སྶ་མ་ཧཾ ཨ་དྡྷཱ, ཨི་མཱ་ཡ པ་ཊི་པ་ཏྟི་ཡཱ;
པ་ཝི་ཝེ་ཀ་སུ་ཁ་སྶཱ’’ཏི, ཀ་ཏྭཱ ཨུ་སྶཱ་ཧ་མུ་ཏྟ་མཾ.
༨༥༥. ཨཱ་ཀཱ་རེ་ན ས་མེ་ནེ་ཝ, ཨུ་མྨཱི་ལི་ཏྭཱ་ན ལོ་ཙ་ནཾ;
ནི་མི་ཏྟཾ ག་ཎྷ་ཏཱ སཱ་དྷུ, བྷཱ་ཝེ་ཏ་བྦཾ པུ་ན་པྤུ་ནཾ.
༨༥༦. ན ཝ་ཎྞོ པེ་ཀྑི་ཏ་བྦོ སོ, ད་ཊྛ་བྦཾ ན ཙ ལ་ཀྑ་ཎཾ;
ཝ་ཎྞཾ པ་ན ཨ་མུ་ཉྩི་ཏྭཱ, ཨུ་སྶ་ད་སྶ ཝ་སེ་ན ཧི.
༨༥༧. ཙི་ཏྟཾ པ་ཎྞ་ཏྟི་དྷ་མྨ་སྨིཾ, ཋ་པེ་ཏྭེ་ཀ་གྒ་མཱ་ན་སོ;
‘‘པ་ཐ་ཝཱི པ་ཐ་ཝི’’ཙྩེ་ཝཾ, ཝ་ཏྭཱ བྷཱ་ཝེ་ཡྻ པ་ཎྜི་ཏོ.
༨༥༨. པ་ཐ་ཝཱི མེ་ད་ནཱི བྷཱུ་མི, ཝ་སུ་དྷཱ ཙ ཝ་སུ་ནྡྷ་རཱ;
ཨེ་ཝཾ པ་ཐ་ཝི་ནཱ་མེ་སུ, ཨེ་ཀཾ ཝ་ཏྟུ་མྤི ཝ་ཊྚ་ཏི.
༨༥༩. ཨུ་མྨཱི་ལི་ཏྭཱ ནི་མཱི་ལི་ཏྭཱ, ཨཱ་ཝ་ཛྫེ་ཡྻ པུ་ན་པྤུ་ནཾ;
ཡཱ་ཝུ་གྒ་ཧ་ནི་མི་ཏྟཾ ཏུ, ནུ་པྤ་ཛྫ་ཏི ཙ ཏཱ་ཝ སོ.
༨༦༠. ཨེ་ཝཾ བྷཱ་ཝ་ཡ་ཏོ ཏ་སྶ, པུ་ན ཨེ་ཀ་གྒ་ཙེ་ཏ་སོ;
ཡ་དཱ པ་ན ནི་མཱི་ལེ་ཏྭཱ, ཨཱ་ཝ་ཛྫ་ནྟ་སྶ ཡོ་གི་ནོ.