༡༢. དྭཱ་ད་ས་མོ པ་རི་ཙྪེ་དོ

པ་ཉྙ་ཏྟི་ནི་དྡེ་སོ

ཨེ་ཏྠཱ་ཧ – ‘‘ཀིཾ ཨེ་ཏྟ་ཀ་མེ་ཝ ཉེ་ཡྻཾ, ཨུ་དཱ་ཧུ ཨ་ཉྙ་མྤི ཨ་ཏྠཱི’’ཏི? ཨ་ཏྠི པ་ཉྙ་ཏྟི ནཱ་མཱ་ཏི. སཱ པ་ནེ་སཱ པ་ཉྙ་པེ་ཏ་བྦ་ཏོ, པ་ཉྙཱ་པ་ན་ཏོ ཙ ‘‘པ་ཉྙ་ཏྟཱི’’ཏི ཝུ་ཙྩ་ཏི. ཏེ་ནེ་ཝཱ་ཧ – ‘‘ཡཱ ཏེ་སཾ ཏེ་སཾ དྷ་མྨཱ་ནཾ ས་ངྑཱ ས་མ་ཉྙཱ པ་ཉྙ་ཏྟི ཝོ་ཧཱ་རོ ནཱ་མཾ ནཱ་མ་ཀ་མྨཾ ནཱ་མ་དྷེ་ཡྻཾ ནི་རུ་ཏྟི བྱ་ཉྫ་ནཾ ཨ་བྷི་ལཱ་པོ’’ཏི. ཏ་ཏྠ ས་ངྑཱ་ཡ་ཏཱི་ཏི ས་ངྑཱ, ཀ་ཐཱི་ཡ་ཏཱི་ཏི ཨ་ཏྠོ. ཀི་ནྟི ཀ་ཐཱི་ཡ་ཏི? ‘‘ཨ་ཧ’’ནྟི ‘‘མ་མ’’ནྟི ‘‘པ་རོ’’ཏི ‘‘པ་ར་སྶཱ’’ཏི ‘‘མ་ཉྩོ’’ཏི ‘‘པཱི་ཋ’’ནྟི ཨ་ནེ་ཀེ་ཧི ཨཱ་ཀཱ་རེ་ཧི ཀ་ཐཱི་ཡ་ཏཱི་ཏི ས་ངྑཱ. ས་མ་ཉྙཱ་ཡ་ཏཱི་ཏི ས་མ་ཉྙཱ. པ་ཉྙཱ་པཱི་ཡ་ཏཱི་ཏི པ་ཉྙ་ཏྟི. ཝོ་ཧ་རཱི་ཡ་ཏཱི་ཏི ཝོ་ཧཱ་རོ. ཀི་ནྟི ཝོ་ཧ་རཱི་ཡ་ཏི? ‘‘ཨ་ཧ’’ནྟི ‘‘མ་མ’’ནྟི ‘‘པ་རོ’’ཏི ‘‘པ་ར་སྶཱ’’ཏི ‘‘མ་ཉྩོ’’ཏི ‘‘པཱི་ཋ’’ནྟི. ཨེ་ཝཾ ཏཱ་ཝ པ་ཉྙ་པེ་ཏ་བྦ་ཏོ པ་ཉྙ་ཏྟཱིཏི ཝུ་ཏྟཱ. ‘‘ཨ་ཧ’’ནྟི ཧི རཱུ་པཱ་ད་ཡོ དྷ་མྨེ ཨུ་པཱ་དཱ་ཡ པ་ཊི་ཙྩ ཀཱ་ར་ཎཾ ཀ་ཏྭཱ ཡ་ཐཱ ཏེ རཱུ་པཱ་ད་ཡོ དྷ་མྨཱ ཨུ་པྤཱ་ད་ཝ་ཡ་ཝ་ནྟོ, ན ཨེ་ཝཾ་ཝི་དྷཱ, ཀེ་ཝ་ལཾ ལོ་ཀ་ས་ངྐེ་ཏེ་ན སི་དྡྷཱ ཡཱ ཨ་ཡཾ ‘‘ཨ་ཧ’’ནྟི ཀ་ཐཱི་ཡ་ཏི ཙེ་ཝ པ་ཉྙཱ་པཱི་ཡ་ཏི ཙ, ཨེ་སཱ པ་ཉྙ་ཏྟཱི་ཏི ཨ་ཏྠོ.

ཨི་དཱ་ནི པ་ཉྙཱ་པ་ན་ཏོ པ་ཉྙ་ཏྟིཾ པ་ཀཱ་སེ་ཏུཾ ‘‘ནཱ་མཾ ནཱ་མ་ཀ་མྨ’’ནྟི་ཨཱ་དི་མཱ་ཧ. ཏ་ཏྠ ནཱ་མནྟི ཏཾ ཏཾ དྷ་མྨཾ ‘‘ཨེ་ས ཨི་ཏྠ་ནྣཱ་མོ ནཱ་མཱ’’ཏི པ་ཉྙ་པེ་ཏི, ཏ་སྨཱ ཏཾ པ་ཉྙ་ཏྟཱི་ཏི པ་ཝུ་ཙྩ་ཏི. ནཱ་མ་ཀ་མྨནྟི་ཨཱ་དཱི་ནི ཏ་སྶཱ ཨེ་ཝ ཝེ་ཝ་ཙ་ནཱ་ནི. ཨ་ཡཾ པ་ཉྙཱ་པ་ན་ཏོ པ་ཉྙ་ཏྟི ནཱ་མ.

སཱ པ་ནེ་སཱ ཏ་ཛྫཱ་པ་ཉྙ་ཏྟི ཨུ་པཱ་དཱ་པ་ཉྙ་ཏྟི ཨུ་པ་ནི་དྷཱ་པ་ཉྙ་ཏྟཱི་ཏི ཏི་ཝི་དྷཱ ཧོ་ཏི. ཏ་ཏྠ ཏ་ཛྫཱ་པ་ཉྙ་ཏྟི ནཱ་མ ཙ་ཀྑུ་སོ་ཏ་རཱུ་པ་ས་དྡ་པ་ཐ་ཝཱི་ཏེ་ཛོ་ཝཱ་ཡོ་ཏི་ཨཱ་དི་ན་ཡ་པྤ་ཝ་ཏྟཱ. ཨུ་པཱ་དཱ་པ་ཉྙ་ཏྟི པ་ན ས་མཱུ་ཧཱ་ས་མཱུ་ཧ་ཝ་སེ་ན དུ་ཝི་དྷཱ ཧོ་ཏི. ཏ་ཏྠ ས་མཱུ་ཧ་པ་ཉྙ་ཏྟི ནཱ་མ རཱུ་པཱ་རཱུ་པ་དྷ་མྨེ་སུ ཨེ་ཀ་སྶ ཝཱ བ་ཧཱུ་ནཾ ཝཱ ནཱ་མཾ ག་ཧེ་ཏྭཱ ས་མཱུ་ཧ་མེ་ཝོ་པཱ་དཱ་ཡ ཝུ་ཙྩ་ཏི. ཀ་ཐཾ? ཨ་ཙྪ་ཏ་ར་ཙྪ་གྷ་ཊ་པ་ཊཱ་དི་པྤ་བྷེ་དཱ. ཨ་ཡཾ ས་མཱུ་ཧ་པ་ཉྙ་ཏྟི ནཱ་མ. ཨ་ས་མཱུ་ཧ་པ་ཉྙ་ཏྟི པ་ན དི་སཱ་ཀཱ་ས་ཀཱ་ལ་ནི་མི་ཏྟཱ་བྷཱ་ཝ་ནི་རོ་དྷཱ་དི་བྷེ་དཱ.

ཡ་དཱ པ་ན སཱ ཝི་ཛྫ་མཱ་ནཾ པ་ར་མ་ཏྠཾ ཛོ་ཏ་ཡ་ཏི, ཏ་དཱ ‘‘ཝི་ཛྫ་མཱ་ན་པ་ཉྙ་ཏྟཱི’’ཏི པ་ཝུ་ཙྩ་ཏི. ཡ་དཱ ཨ་ཝི་ཛྫ་མཱ་ནཾ ས་མཱུ་ཧཱ་ས་མཱུ་ཧ་བྷེ་དཾ ནཱ་མ་མ་ཏྟཾ ཛོ་ཏ་ཡ་ཏི, ཏ་དཱ ‘‘ཨ་ཝི་ཛྫ་མཱ་ན་པ་ཉྙ་ཏྟཱི’’ཏི པ་ཝུ་ཙྩ་ཏི. དུ་ཝི་དྷཱ་པི པ་ནེ་སཱ སོ་ཏ་དྭཱ་ར་ཛ་ཝ་ནཱ་ན་ནྟ་རཾ ག་ཧི་ཏ་པུ་བྦ་ས་ངྐེ་ཏ་མ་ནོ་དྭཱ་ར་ཛ་ཝ་ན་ཝི་ཉྙཱ་ཎེ་ན ཝི་ཉྙཱ་ཡ་ཏི. ཡཱ་ཡ ག་ཧི་ཏ་པུ་བྦ་ས་ངྐེ་ཏེ་ན མ་ནོ་དྭཱ་ར་ཛ་ཝ་ན་ཝི་ཉྙཱ་ཎེ་ན པ་ཉྙཱ་པཱི་ཡ་ཏི. ཡཾ ས་ནྡྷཱ་ཡ ‘‘ཝི་ཛྫ་མཱ་ན་པ་ཉྙ་ཏྟི, ཨ་ཝི་ཛྫ་མཱ་ན་པ་ཉྙ་ཏྟི, ཝི་ཛྫ་མཱ་ནེ་ན ཨ་ཝི་ཛྫ་མཱ་ན་པ་ཉྙ་ཏྟི, ཨ་ཝི་ཛྫ་མཱ་ནེ་ན ཝི་ཛྫ་མཱ་ན་པ་ཉྙ་ཏྟི, ཝི་ཛྫ་མཱ་ནེ་ན ཝི་ཛྫ་མཱ་ན་པ་ཉྙ་ཏྟི, ཨ་ཝི་ཛྫ་མཱ་ནེ་ན ཨ་ཝི་ཛྫ་མཱ་ན་པ་ཉྙ་ཏྟཱི’’ཏི ཚ་ཀྐ་ན་ཡོ ཝུ་ཏྟོ. ཏ་ཏྠ པ་ར་མ་ཏྠ་ཏོ ཝི་ཛྫ་མཱ་ནཱ་ནཾ རཱུ་པཱ་དཱི་ནཾ པ་ཉྙཱ་པ་ནཱ ཝི་ཛྫ་མཱ་ན་པ་ཉྙ་ཏྟི. ཏ་ཐཱ ཨ་ཝི་ཛྫ་མཱ་ནཱ་ན་མི་ཏྠི་པུ་རི་སཱ་དཱི་ནཾ པ་ཉྙཱ་པ་ནཱ ཨ་ཝི་ཛྫ་མཱ་ན་པ་ཉྙ་ཏྟི. ཋ་པེ་ཏྭཱ པ་ན ཝ་ཙ་ན་ཏྠཾ ཀེ་ན་ཙི ཨཱ་ཀཱ་རེ་ན ཨ་ནུ་པ་ལ་བྦྷ་མཱ་ནཱ་ནཾ པ་ཉྩ་མ་ས་ཙྩཱ་དཱི་ནཾ, ཏི་ཏྠི་ཡ་པ་རི་ཀ་པྤི་ཏཱ་ནཾ ཝཱ པ་ཀ་ཏི་པུ་རི་སཱ་དཱི་ནཾ པ་ཉྙཱ་པ་ནཱ་པི ཨ་ཝི་ཛྫ་མཱ་ན་པ་ཉྙ་ཏྟི་ཡེ་ཝ. ‘‘ཏེ་ཝི་ཛྫོ, ཚ་ལ༹་བྷི་ཉྙོ’’ཏི ཨེ་ཝ་མཱ་དི་ན་ཡ་པྤ་ཝ་ཏྟཱ ཝི་ཛྫ་མཱ་ནེ་ན ཨ་ཝི་ཛྫ་མཱ་ན་པ་ཉྙ་ཏྟི. ‘‘ཨི་ཏྠི་ས་དྡོ, པུ་རི་ས་ས་དྡོ’’ཏི ཨེ་ཝ་མཱ་དི་ཀཱ ཨ་ཝི་ཛྫ་མཱ་ནེ་ན ཝི་ཛྫ་མཱ་ན་པ་ཉྙ་ཏྟི. ‘‘ཙ་ཀྑུ་ཝི་ཉྙཱ་ཎཾ, སོ་ཏ་ཝི་ཉྙཱ་ཎ’’ནྟི ཨེ་ཝ་མཱ་དི་ཀཱ ཝི་ཛྫ་མཱ་ནེ་ན ཝི་ཛྫ་མཱ་ན་པ་ཉྙ་ཏྟི. ‘‘ཁ་ཏྟི་ཡ་ཀུ་མཱ་རོ, བྲཱ་ཧྨ་ཎ་ཀུ་མཱ་རོ, བྷི་ཀྑུ་ཀུ་མཱ་རོ’’ཏི ཨེ་ཝ་མཱ་དི་ཀཱ ཨ་ཝི་ཛྫ་མཱ་ནེ་ན ཨ་ཝི་ཛྫ་མཱ་ན་པ་ཉྙ་ཏྟཱིཏི ཨེ་ཝཾ ཝུ་ཏྟཱ ཚ པ་ཉྙ་ཏྟི་ཡོ་པི ཨེ་ཏྠེ་ཝ ས་ངྒ་ཧཾ ག་ཙྪ་ནྟི. ཨ་ཡཾ ཨུ་པཱ་དཱ་པ་ཉྙ་ཏྟི ནཱ་མ.

ཨུ་པ་ནི་དྷཱ་པ་ཉྙ་ཏྟིཔི ཨེ་ཏི་སྶཱ ཨེ་ཝ པ་བྷེ་དཱ, སཱ པ་ན ‘‘དཱི་གྷཾ ཨུ་པ་ནི་དྷཱ་ཡ ར་སྶོ, ར་སྶཾ ཨུ་པ་ནི་དྷཱ་ཡ དཱི་གྷོ’’ཏི་ཨཱ་དི་ན་ཡ་པྤ་ཝ་ཏྟཱ ‘‘ཀ་པ་ཎཾ མཱ་ནུ་ས་ཀཾ ར་ཛྫཾ དི་བྦ་སུ་ཁཾ ཨུ་པ་ནི་དྷཱ་ཡཱ’’ཏི ཨེ་ཝ་མཱ་དི་ཀཱ ཙ, ཏ་སྨཱ པ་ཉྙ་པེ་ཏ་བྦ་ཏོ ཙ པ་ཉྙཱ་པ་ན་ཏོ ཙ པ་ཉྙ་ཏྟཱི་ཏི ཝེ་དི་ཏ་བྦཱ. ས་མ་ཉྙཱ ས་མ་ཏྟཱ.

༧༧༨. པ་ར་མ་ཏྠ་ཏོ ཙ པ་ཉྙ་ཏྟི, ཏ་ཏི་ཡཱ ཀོ་ཊི ན ཝི་ཛྫ་ཏི;

དྭཱི་སུ ཋཱ་ནེ་སུ ཀུ་ས་ལོ, པ་ར་ཝཱ་དེ་སུ ན ཀ་མྤ་ཏི.

ཨི་ཏི ཨ་བྷི་དྷ་མྨཱ་ཝ་ཏཱ་རེ པ་ཉྙ་ཏྟི་ནི་དྡེ་སོ ནཱ་མ

དྭཱ་ད་ས་མོ པ་རི་ཙྪེ་དོ.