༡༡. ཨེ་ཀཱ་ད་ས་མོ པ་རི་ཙྪེ་དོ
ནི་བྦཱ་ན་ནི་དྡེ་སོ
༧༦༨. རཱུ་པཱ་ན་ནྟ་ར་མུ་དྡི་ཊྛཾ, ནི་བྦཱ་ནཾ ཡཾ པ་ནཱ་དི་ཏོ;
ཏ་སྶི་དཱ་ནི ཨ་ནུ་པྤ་ཏྟོ, ཝི་བྷཱ་ཝ་ན་ན་ཡ་ཀྐ་མོ.
༧༦༩. ཏ་སྨཱ་ཧཾ ཏ་སྶ ད་སྶེ་ཏུཾ, དུ་ཀྐ་ར་སྶ ཡ་ཐཱ་བ་ལཾ;
དུ་བྦོ་དྷ་སྶ པ་ཝ་ཀྑཱ་མི, ཝི་བྷཱ་ཝ་ན་མི་ཏོ པ་རཾ.
ཏ་ཏྠ ནི་བྦཱ་ནནྟི བྷ་ཝཱ་བྷ་ཝཾ ཝི་ན་ན་ཏོ ཝཱ་ནཾ ཝུ་ཙྩ་ཏི ཏ་ཎྷཱ, ཝཱ་ན་ཏོ ནི་ཀྑ་ནྟ་ཏྟཱ ནི་བྦཱ་ན་ནྟི ཙ པ་ཝུ་ཙྩ་ཏི ཨ་མ་ཏཾ ཨ་ས་ངྑ་ཏཾ པ་ར་མཾ སུ་ཁཾ. ཝུ་ཏྟཾ ཧེ་ཏཾ ‘‘ཡོ སོ ས་བྦ་ས་ངྑཱ་ར་ས་མ་ཐོ ས་བྦཱུ་པ་དྷི་པ་ཊི་ནི་སྶ་གྒོ ཏ་ཎྷཱ་ཀྑ་ཡོ ཝི་རཱ་གོ ནི་རོ་དྷོ ནི་བྦཱ་ན’’ནྟི.
༧༧༠. ཡ་སྶ ཙཱ་དྷི་ག་མཱ ས་བྦ-ཀི་ལེ་སཱ་ནཾ ཁ་ཡོ བྷ་ཝེ;
ནི་བྦཱ་ན་མི་ཏི ནི་དྡི་ཊྛཾ, ནི་བྦཱ་ན་ཀུ་ས་ལེ་ན ཏཾ.
ཨེ་ཏཾ ཙ ནི་བྦཱ་ནཾ ནཱ་མ ཏ་ཡི་དཾ ས་ནྟི་ལ་ཀྑ་ཎཾ, ཨ་ཙྩུ་ཏི་ར་སཾ, ཨ་སྶཱ་ས་ཀ་ར་ཎ་ར་སཾ ཝཱ, ཨ་ནི་མི་ཏྟ་པ་ཙྩུ་པ་ཊྛཱ་ནཾ, ནི་སྶ་ར་ཎ་པ་ཙྩུ་པ་ཊྛཱ་ནཾ ཝཱ་ཏི ཝེ་དི་ཏ་བྦཾ.
ཨེ་ཏྠཱ་ཧ – ན པ་ར་མ་ཏྠ་ཏོ ནི་བྦཱ་ནཾ ནཱ་མ ཨེ་ཀོ ས་བྷཱ་ཝོ ཨ་ཏྠི, ཏི་ཏྠི་ཡཱ་ནཾ ཨ་ཏྟཱ ཝི་ཡ, ས་ས་ཝི་སཱ་ཎཾ ཝི་ཡ ཙ ཨ་ནུ་པ་ལ་བྦྷ་ནཱི་ཡ་ཏོ་ཏི? ན, པ་ཉྙཱ་ཙ་ཀྑུ་ནཱ ཨུ་པ་པ་རི་ཀྑི་ཡ་མཱ་ནཱ་ནཾ ཧི་ཏ་ག་ཝེ་སཱི་ནཾ ཡ་ཐཱ་ནུ་རཱུ་པཱ་ཡ པ་ཊི་པ་ཏྟི་ཡཱ ཨུ་པ་ལ་བྦྷ་ནཱི་ཡ་ཏོ. ཡཾ ཧི པུ་ཐུ་ཛྫ་ནཱ ནོ་པ་ལ་བྦྷ་ནྟི, ཏཾ ‘‘ན་ཏྠཱི’’ཏི ན ཝ་ཏྟ་བྦཾ. ཨ་ཐཱ་ཡ་སྨ་ཏཱ སཱ་རི་པུ་ཏྟ་ཏྠེ་རེ་ན དྷ་མྨ་སེ་ནཱ་པ་ཏི་ནཱ ‘‘ཀ་ཏ་མཾ ནུ ཁོ, ཨཱ་ཝུ་སོ, ནི་བྦཱ་ན’’ནྟི ནི་བྦཱ་ནཾ པུ་ཊྛེ་ན ‘‘ཡོ ཁོ, ཨཱ་ཝུ་སོ, རཱ་ག་ཀྑ་ཡོ དོ་ས་ཀྑ་ཡོ མོ་ཧ་ཀྑ་ཡོ’’ཏི རཱ་གཱ་དཱི་ནཾ ཁ་ཡོ་ཝ ད་སྶི་ཏོ, ཏ་སྨཱ རཱ་གཱ་དཱི་ནཾ ཁ་ཡ་མ་ཏྟ་མེ་ཝ ནི་བྦཱ་ན་ནྟི ཙེ? ཏཾ ན. ཀ་སྨཱ? ཨ་ར་ཧ་ཏྟ་སྶཱ་པི རཱ་གཱ་དཱི་ནཾ ཁ་ཡ་མ་ཏྟ་པ་ས་ངྒ་དོ་སཱ་པ་ཏྟི་ཏོ. ཀ་ཐཾ? ནི་བྦཱ་ནཾ པུ་ཙྪཱ་ན་ནྟ་ར་མེ་ཝ ‘‘ཀ་ཏ་མཾ ནུ ཁོ, ཨཱ་ཝུ་སོ, ཨ་ར་ཧ་ཏྟ’’ནྟི པུ་ཊྛེ་ན ‘‘ཡོ ཁོ, ཨཱ་ཝུ་སོ, རཱ་ག་ཀྑ་ཡོ དོ་ས་ཀྑ་ཡོ མོ་ཧ་ཀྑ་ཡོ’’ཏི རཱ་གཱ་དཱི་ནཾ ཁ་ཡོ་ཝ ཝུ་ཏྟོ, ཏ་སྨཱ ཏ་ཝ མ་ཏེ་ན ཨ་ར་ཧ་ཏྟ་ཕ་ལ་སྶཱ་པི རཱ་གཱ་དཱི་ནཾ ཁ་ཡ་མ་ཏྟ་ཏཱ བྷ་ཝེ་ཡྻ, ན ཙེ་ཏཾ ཡུ་ཏྟཾ ཨ་ནུ་ཏྟ་ར་སྶ ལོ་ཀུ་ཏྟ་ར་ཕ་ལ་ཙི་ཏྟ་སྶ རཱ་གཱ་ནཾ ཁ་ཡ་མ་ཏྟ་ཏཱ་པ་ཛྫ་ནཾ, ཏ་སྨཱ མཱ ཨེ་ཝཾ བྱ་ཉྫ་ན་ཙྪཱ་ཡཱ་ཡ ཝ་དེ་སི, ཨུ་བྷི་ནྣཾ པ་ན སུ་ཏྟཱ་ནཾ ཨ་ཏྠོ ཨུ་པ་པ་རི་ཀྑི་ཏ་བྦོ.
ཡ་སྶ པ་ན དྷ་མྨ་སྶཱ་དྷི་ག་མེ་ན རཱ་གཱ་དཱི་ནཾ ཁ་ཡོ ཧོ་ཏི, སོ དྷ་མྨོ རཱ་གཱ་དཱི་ནཾ ཁ་ཡ་སྶ ཨུ་པ་ནི་སྶ་ཡ་ཏྟཱ ཨ་ཀྑ་ཡོ་པི ས་མཱ་ནོ ‘‘རཱ་གཱ་དཱི་ནཾ ཁ་ཡོ ནི་བྦཱ་ན’’ནྟི ཁ་ཡོ་པ་ཙཱ་རེ་ན ཝུ་ཏྟོ, ‘‘ཏི་པུ་སཾ ཛ་རོ གུ་ལོ༹ སེ་མྷོ’’ཏི་ཨཱ་དཱི་སུ ཝི་ཡ ཕ་ལཱུ་པ་ཙཱ་རེ་ན ཝུ་ཏྟ་ནྟི ཝེ་དི་ཏ་བྦཾ. ཨ་ར་ཧ་ཏྟཾ པ་ན ཁ་ཡ་ནྟེ ཨུ་པྤ་ནྣ་ཏྟཱ ‘‘ཁ་ཡོ’’ཏི ཝུ་ཏྟཾ. ཡ་དི རཱ་གཱ་དཱི་ནཾ ཁ་ཡ་མ་ཏྟཾ ནི་བྦཱ་ནཾ བྷ་ཝེ་ཡྻ, ས་བྦེ བཱ་ལ་པུ་ཐུ་ཛྫ་ནཱ་པི ས་མ་དྷི་ག་ཏ་ནི་བྦཱ་ནཱ ས་ཙྪི་ཀ་ཏ་ནི་རོ་དྷཱ བྷ་ཝེ་ཡྻུཾ. ཀི་ཉྩ བྷི་ཡྻོ – ནི་བྦཱ་ན་སྶ བ་ཧུ་ཏྟཱ་དི་དོ་སཱ་པ་ཏྟི་ཏོ ཙ. ཨེ་ཝ་ཉྷི ས་ཏི རཱ་གཱ་དི་ཀྑ་ཡཱ་ནཾ བ་ཧུ་བྷཱ་ཝ་ཏོ ནི་བྦཱ་ན་སྶཱ་པི བ་ཧུ་བྷཱ་ཝོ བྷ་ཝེ་ཡྻ, ས་ངྑ་ཏ་ལ་ཀྑ་ཎ་ཉྩ ནི་བྦཱ་ནཾ བྷ་ཝེ་ཡྻ, ས་ངྑ་ཏ་ལ་ཀྑ་ཎ་ཏྟཱ ས་ངྑ་ཏ་པ་རི་ཡཱ་པ་ནྣ་ཉྩ, ས་ངྑ་ཏ་པ་རི་ཡཱ་པ་ནྣ་ཏྟཱ ཨ་ནི་ཙྩཾ དུ་ཀྑཾ ནི་བྦཱ་ནཾ བྷ་ཝེ་ཡྻཱ་ཏི.
ཀི་ཉྩ བྷི་ཡྻོ – ཡ་དི ཁ་ཡོ ནི་བྦཱ་ནཾ བྷ་ཝེ་ཡྻ, གོ་ཏྲ་བྷུ་ཝོ་དཱ་ན་མ་གྒ་ཕ་ལ་ཙི་ཏྟཱ་ནཾ ཀིཾ ནུ ཨཱ་ར་མྨ་ཎཾ ཝ་དེ་སི, ཝ་ད བྷ་དྲ་མུ་ཁཱ་ཏི? རཱ་གཱ་དཱི་ནཾ ཁ་ཡ་མེ་ཝ ཝ་དཱ་མཱི་ཏི. ཀིཾ པ་ན རཱ་གཱ་ད་ཡོ གོ་ཏྲ་བྷུ་ཨཱ་དཱི་ནཾ ཁ་ཎེ ཁཱི་ཡ་ནྟི, ཨུ་དཱ་ཧུ ཁཱི་ཡི་སྶ་ནྟི, ཨ་ཐ ཁཱི་ཎཱ་ཏི? ཀིཾ པ་ནེ་ཏྠ ‘‘ཁཱི་ཎེ་སྭེ་ཝ ཁ་ཡཾ ཝ་དཱ་མཱི’’ཏི. སུ་ཊྛུ ཨུ་པ་དྷཱ་རེ་ཏྭཱ ཝ་ད བྷ་དྲ་མུ་ཁཱ་ཏི, ཡ་དི ཁཱི་ཎེ་སྭེ་ཝ ཁ་ཡཾ ཝ་དེ་སི, ན གོ་ཏྲ་བྷུ་ཙི་ཏྟཱ་དཱི་ནཾ ནི་བྦཱ་ནཱ་ར་མྨ་ཎ་ཏཱ སི་ཛ྄ཛྷ་ཏཱི་ཏི. ཀིཾ ཀཱ་ར་ཎཾ? གོ་ཏྲ་བྷུ་ཀྑ་ཎེ རཱ་གཱ་ད་ཡོ ཁཱི་ཡི་སྶ་ནྟི, ཏ་ཐཱ ཝོ་དཱ་ན་ཀྑ་ཎེ, མ་གྒ་ཀྑ་ཎེ པ་ན ཁཱི་ཡ་ནྟི, ན ཁཱི་ཎཱ, ཕ་ལ་ཀྑ་ཎེ ཁཱི་ཎཱ. ཨེ་ཝཾ ས་ནྟེ བྷ་ཝ་ཏོ མ་ཏེ་ན ཕ་ལ་མེ་ཝ ཁ་ཡཱ་ར་མྨ་ཎཾ, ན ཨི་ཏ་རེ, ཨི་ཏ་རེ་སཾ པ་ན ཀི་མཱ་ར་མྨ་ཎཾ ཝ་དེ་སཱི་ཏི? ཨ་དྡྷཱ སོ ཨཱ་ར་མྨ་ཎཾ ཨ་པ་སྶ་ནྟོ ནི་རུ་ཏྟ་རོ བྷ་ཝི་སྶ་ཏི. ཨ་པི་ཙ ཀི་ལེ་ས་ཀྑ་ཡོ ནཱ་མ ས་པྤུ་རི་སེ་ཧི ཀ་རཱི་ཡ་ཏི, ཡ་ཐཱ་ནུ་རཱུ་པཱ་ཡ པ་ཊི་པ་ཏྟི་ཡཱ ཨུ་པྤཱ་དཱི་ཡ་ཏཱི་ཏི ཨ་ཏྠོ. ནི་བྦཱ་ནཾ པ་ན ན ཀེ་ན་ཙི ཀ་རཱི་ཡ་ཏི ན ཨུ་པྤཱ་དཱི་ཡ་ཏི, ཏ་སྨཱ ནི་བྦཱ་ན་མ་མ་ཏ་མ་ས་ངྑ་ཏཾ. ཏ་མ་ཀ་ཏཾ ཛཱ་ནཱ་ཏཱི་ཏི ཨ་རི་ཡ་སཱ་ཝ་ཀོ ‘‘ཨ་ཀ་ཏ་ཉྙཱུ’’ཏི པ་ཝུ་ཙྩ་ཏི. ཝུ་ཏྟ་ཉྩེ་ཏཾ –
༧༧༡. ‘‘ཨ་ས་དྡྷོ ཨ་ཀ་ཏ་ཉྙཱུ ཙ,
ས་ནྡྷི་ཙྪེ་དོ ཙ ཡོ ན་རོ;
ཧ་ཏཱ་ཝ་ཀཱ་སོ ཝ་ནྟཱ་སོ,
ས ཝེ ཨུ་ཏྟ་མ་པོ་རི་སོ’’ཏི.
ཨ་པི་ཙ ‘‘ནི་སྶ་ར་ཎ’’ནྟི བྷ་ག་ཝ་ཏཱ ཝུ་ཏྟ་ཏྟཱ ཙ. ‘‘ནི་སྶ་ར་ཎ’’ནྟི ཧི ནི་བྦཱ་ན་སྶེ་ཏཾ ནཱ་མཾ. ཡ་ཐཱ་ཧ ‘‘ཏ་ཡོ ཁོ་མེ, བྷི་ཀྑ་ཝེ, དྷ་མྨཱ དུ་པྤ་ཊི་ཝི་ཛ྄ཛྷཱ. ཀ་ཏ་མེ ཏ་ཡོ དྷ་མྨཱ དུ་པྤ་ཊི་ཝི་ཛ྄ཛྷཱ? ཏི་སྶོ ནི་སྶ་ར་ཎ་དྷཱ་ཏུ་ཡོ. ཀཱ་མཱ་ན་མེ་ཏཾ ནི་སྶ་ར་ཎཾ, ཡ་དི་དཾ ནེ་ཀྑ་མྨཾ. རཱུ་པཱ་ན་མེ་ཏཾ ནི་སྶ་ར་ཎཾ, ཡ་དི་དཾ ཨ་རཱུ་པཾ. ཡཾ ཁོ པ་ན ཀི་ཉྩི བྷཱུ་ཏཾ ས་ངྑ་ཏཾ པ་ཊི་ཙྩ་ས་མུ་པྤ་ནྣཾ, ནི་རོ་དྷོ ཏ་སྶ ནི་སྶ་ར་ཎ’’ནྟི ཧི ཝུ་ཏྟཾ. ཨེ་ཝཾ ཝུ་ཏྟ་སྶ ཏ་སྶ ནི་བྦཱ་ན་སྶ ཨ་བྷཱ་ཝ་པ་ཏྟི་དོ་ས་ཏོ པ་ཋ་མ་ཛ྄ཛྷཱ་ནཱ་ཀཱ་སཱ་ན་ཉྩཱ་ཡ་ཏ་ནཱ་ན་མྤི ཨ་བྷཱ་ཝོ བྷ་ཝེ་ཡྻ, ཏ་སྨཱ ཨ་ཡུ་ཏྟཾ ཨ་ཀྑ་ཡ་སྶ ནི་བྦཱ་ན་སྶ ཁ་ཡ་དོ་སཱ་པ་ཛྫ་ན་ནྟི, ན ཏུ ཁ་ཡོ ནི་བྦཱ་ནཾ.
‘‘ཨ་ཏྠི ནི་སྶ་ར་ཎཾ ལོ་ཀེ, པ་ཉྙཱ་ཡ མེ སུ་ཕུ་སི་ཏ’’ནྟི ཙ ‘‘ཨ་ཏྠི, བྷི་ཀྑ་ཝེ, ཨ་ཛཱ་ཏཾ ཨ་བྷཱུ་ཏཾ ཨ་ཀ་ཏཾ ཨ་ས་ངྑ་ཏ’’ནྟི ཙ དྷ་མྨ་སཱ་མི་ནཱ ཏ་ཐཱ་ག་ཏེ་ན ས་མྨཱ་ས་མྦུ་དྡྷེ་ན ཨ་ནེ་ཀེ་སུ སུ་ཏྟ་ནྟེ་སུ པ་ར་མ་ཏྠ་ཝ་སེ་ན ཝུ་ཏྟ་ཏྟཱ ‘‘ཨ་ཏྠི ནི་བྦཱ་ནཾ ནཱ་མ ཨེ་ཀོ དྷ་མྨོ’’ཏི ནི་ཊྛ་མེ་ཏྠ ག་ནྟ་བྦཾ. ཨ་པི་ཙ པ་རི་ཏྟ་ཏྟི་ཀེ ‘‘ཀ་ཏ་མེ དྷ་མྨཱ ཨ་པྤ་མཱ་ཎཱ’’ཏི པ་ད་མུ་དྡྷ་རི་ཏྭཱ – ‘‘ཙ་ཏྟཱ་རོ མ་གྒཱ ཨ་པ་རི་ཡཱ་པ་ནྣཱ ཙ་ཏྟཱ་རི ཙ སཱ་མ་ཉྙ་ཕ་ལཱ་ནི ནི་བྦཱ་ན་ཉྩ, ཨི་མེ དྷ་མྨཱ ཨ་པྤ་མཱ་ཎཱ’’ཏི ཝུ་ཏྟ་ཏྟཱ རཱ་གཱ་དཱི་ནཾ ཁ་ཡ་སྶ ཨ་པྤ་མཱ་ཎ་ཏྟཾ ཀ་ཐཾ ཡུ་ཛྫ་ཏི, ཏ་སྨཱ པ་ར་མ་ཏྠ་ཏོ ཨ་ཏྠི་ཡེ་ཝ ནི་བྦཱ་ནཾ ནཱ་མ ཨེ་ཀོ ས་བྷཱ་ཝོ་ཏི. ཏཾ པ་ན པ་ཀ་ཏི་ཝཱ་དཱི་ནཾ པ་ཀ་ཏི ཝི་ཡ, ཏི་ཏྠི་ཡཱ་ནཾ ཨ་ཏྟཱ ཝི་ཡ ཙ ས་ས་ཝི་སཱ་ཎཾ ཝི་ཡ ཙ ནཱ་ཝི་ཛྫ་མཱ་ནཾ.
ཨ་ཐ པ་ཉྙ་ཏྟི་མ་ཏྟཾ ནི་བྦཱ་ན་ནྟི ཙེ, ཏ་མྤི ཨ་ཡུ་ཏྟཾ. ཀ་སྨཱ? ནི་བྦཱ་ནཱ་ར་མྨ་ཎཱ་ནཾ ཙི་ཏྟ་ཙེ་ཏ་སི་ཀཱ་ནཾ ན་ཝ་ཏྟ་བྦཱ་ར་མྨ་ཎ་ཏྟཱ. ཀ་ཐཾ? པ་རི་ཏྟཱ་ར་མྨ་ཎ་ཏྟི་ཀེ ཙ པ་ན ‘‘ཀ་ཏ་མེ དྷ་མྨཱ ཨ་པྤ་མཱ་ཎཱ་ར་མྨ་ཎཱ’’ཏི པ་ད་མུ་དྡྷ་རི་ཏྭཱ ‘‘ཙ་ཏྟཱ་རོ མ་གྒཱ ཨ་པ་རི་ཡཱ་པ་ནྣཱ ཙ་ཏྟཱ་རི ཙ སཱ་མ་ཉྙ་ཕ་ལཱ་ནི, ཨི་མེ དྷ་མྨཱ ཨ་པྤ་མཱ་ཎཱ་ར་མྨ་ཎཱ’’ཏི ཧི ཝུ་ཏྟཾ. ཡ་དི པ་ནེ་ཏེ་སཾ པ་ཉྙ་ཏྟི་ཨཱ་ར་མྨ་ཎཾ སི་ཡཱ, ཨ་པྤ་མཱ་ཎཱ་ར་མྨ་ཎ་ཏཱ ན ཡུ་ཛྫེ་ཡྻ, ན་ཝ་ཏྟ་བྦཱ་ར་མྨ་ཎ་པ་ཀྑཾ བྷ་ཛེ་ཡྻུཾ. ‘‘ན་ཝ་ཏྟ་བྦཱ་ར་མྨ་ཎཱ པ་ན རཱུ་པཱ་ཝ་ཙ་ར་ཏྟི་ཀ་ཙ་ཏུ་ཀྐ་ཛ྄ཛྷཱ་ནཱ ཀུ་ས་ལ་ཏོ ཙ ཝི་པཱ་ཀ་ཏོ ཙ ཀི་རི་ཡ་ཏོ ཙ, ཙ་ཏུ་ཏྠ་སྶ ཛྷཱ་ན་སྶ ཝི་པཱ་ཀོ, ཨཱ་ཀཱ་སཱ་ན་ཉྩཱ་ཡ་ཏ་ནཾ ཨཱ་ཀི་ཉྩ་ཉྙཱ་ཡ་ཏ་ནཾ ཀུ་ས་ལ་ཏོ ཙ ཝི་པཱ་ཀ་ཏོ ཙ ཀི་རི་ཡ་ཏོ ཙ, ཨི་མེ དྷ་མྨཱ ན་ཝ་ཏྟ་བྦཱ་ར་མྨ་ཎཱ’’ཏི ཧི ཝུ་ཏྟཾ, ཏ་སྨཱ ན པ་ཉྙ་ཏྟི་མ་ཏྟཾ ནི་བྦཱ་ནཾ. ཡ་སྨཱ ཙ པ་ཎྞ་ཏྟི་བྷཱ་ཝོ ནི་བྦཱ་ན་སྶ ན ཡུ་ཛྫ་ཏི, ཏ་སྨཱ མ་གྒ་ཕ་ལཱ་ནཾ ཨཱ་ར་མྨ་ཎ་པ་ཙྩ་ཡ་བྷཱུ་ཏཾ ཨུ་པྤཱ་དཱ་དཱི་ན་མ་བྷཱ་ཝ་ཏོ ནི་ཙྩཾ, རཱུ་པ་ས་བྷཱ་ཝཱ་བྷཱ་ཝ་ཏོ ཨ་རཱུ་པཾ, པ་པ་ཉྩཱ་བྷཱ་ཝ་ཏོ ནི་པྤ་པ་ཉྩཾ ནི་བྦཱ་ནཾ ནཱ་མ ཨ་ཏྠཱི་ཏི ཨུ་པ་ག་ནྟ་བྦ་ནྟི.
༧༧༢. ཨ་ཙྩ་ནྟ་མ་ན་ནྟཾ ས་ནྟཾ, ཨ་མ་ཏཾ ཨ་པ་ལོ་ཀི་ཏཾ;
པ་ཎཱི་ཏཾ ས་ར་ཎཾ ཁེ་མཾ, ཏཱ་ཎཾ ལེ་ཎཾ པ་རཱ་ཡ་ཎཾ.
༧༧༣. སི་ཝ་ཉྩ ནི་པུ་ཎཾ ས་ཙྩཾ, དུ་ཀྑ་ཀྑ་ཡ་མ་ནཱ་ས་ཝཾ;
སུ་དུ་དྡ་སཾ པ་རཾ པཱ་རཾ, ནི་བྦཱ་ན་མ་ནི་ད་སྶ་ནཾ.
༧༧༤. ཏ་ཎྷཱ་ཀྑ་ཡཾ དྷུ་ཝཾ དཱི་པཾ, ཨ་བྱཱ་པ་ཛ྄ཛྷ་མ་ནཱི་ཏི་ཀཾ;
ཨ་ནཱ་ལ་ཡ་མ་རཱུ་པ་ཉྩ, པ་ད་མ་ཙྩུ་ཏ་མ་ཀྑ་རཾ.
༧༧༥. ཝི་རཱ་ག་ཉྩ ནི་རོ་དྷ་ཉྩ, ཝི་མུ་ཏྟི མོ་ཀྑ་མེ་ཝ ཙ;
ཨི་མེ་ཧི པ་ན ནཱ་མེ་ཧི, ནི་བྦཱ་ནཾ ཏུ ཀ་ཐཱི་ཡ་ཏི.
༧༧༦. ཨེ་ཝ་ཉྩ པ་ན ཝི་ཉྙཱ་ཡ, ནི་བྦཱ་ན་མྤི ཙ ཨ་ཙྩུ་ཏཾ;
ཏ་སྶ ཙཱ་དྷི་ག་མཱུ་པཱ་ཡོ, ཀ་ཏྟ་བྦོ ཝི་ཉྙུ་ནཱ ས་དཱ.
༧༧༧. ས་དྡྷཱ་བུ་དྡྷི་ཀ་རཾ ཏ་ཐཱ་ག་ཏ་མ་ཏེ ས་མྨོ་ཧ་ཝི་དྡྷཾ་ས་ནཾ,
པ་ཉྙཱ་ས་མྦྷ་ཝ་ས་མྤ་སཱ་ད་ན་ཀ་རཾ ཛཱ་ནཱ་ཏི ཡོ ཙེ ཨི་མཾ;
ཨ་ཏྠ་བྱ་ཉྫ་ན་སཱ་ལི་ནཾ སུ་མ་དྷུ་རཾ སཱ་ར་ཉྙུ་ཝི་མྷཱ་པ་ནཾ,
ག་མྦྷཱི་རེ ནི་པུ་ཎཱ་བྷི་དྷ་མྨ་པི་ཊ་ཀེ སོ ཡཱ་བྷི་ནི་ཊྛཾ པ་དཾ.
ཨི་ཏི ཨ་བྷི་དྷ་མྨཱ་ཝ་ཏཱ་རེ ནི་བྦཱ་ན་ནི་དྡེ་སོ ནཱ་མ
ཨེ་ཀཱ་ད་ས་མོ པ་རི་ཙྪེ་དོ.