༩. ན་ཝ་མོ པ་རི་ཙྪེ་དོ
པུ་ཉྙ་ཝི་པཱ་ཀ་པ་ཙྩ་ཡ་ནི་དྡེ་སོ
༥༦༠. བཱ་ཏྟིཾ་ས པཱ་ཀ་ཙི་ཏྟཱ་ནི, ལོ་ཀི་ཀཱ་ནེ་ཝ ཡཱ་ནི ཧི;
ཨེ་ཏེ་སཾ པཱ་ཀ་ཙི་ཏྟཱ་ནཾ, པ་ཊི་ས་ནྡྷི་པ་ཝ་ཏྟི་སུ.
༥༦༡. པུ་ཉྙཱ་པུ་ཉྙཱ་དི་ས་ངྑཱ་རཱ, ཡ་ཐཱ ཡེ་ས་ཉྩ པ་ཙྩ་ཡཱ;
བྷ་ཝཱ་དཱི་སུ ཏ་ཐཱ ཏེ་པི, ཝི་ཉྙཱ་ཏ་བྦཱ ཝི་བྷཱ་ཝི་ནཱ.
༥༦༢. ཏ་ཡོ བྷ་ཝཱ ཙ་ཏ་སྶོ ཙ, ཡོ་ནི་ཡོ ག་ཏི་པ་ཉྩ་ཀཾ;
ཝི་ཉྙཱ་ཎ་ཊྛི་ཏི་ཡོ ས་ཏྟ, ས་ཏྟཱ་ཝཱ་སཱ ན་ཝེ་རི་ཏཱ.
༥༦༣. ཀཱ་མེ པུ་ཉྙཱ་བྷི་ས་ངྑཱ་ར-ས་ཉྙི་ཏཱ ཨ་ཊྛ ཙེ་ཏ་ནཱ;
ན་ཝ་ནྣཾ པཱ་ཀ་ཙི་ཏྟཱ་ནཾ, ཀཱ་མེ སུ་ག་ཏི་ཡཾ པ་ན.
༥༦༤. ནཱ་ནཱ་ཀྑ་ཎི་ཀ་ཀ་མྨཱུ་པ-ནི་སྶ་ཡ་པ་ཙྩ་ཡེ་ཧི ཙ;
དྭེ་དྷཱ ཧི པ་ཙྩ་ཡཱ ཏེ་སཾ, བྷ་ཝ་ནྟི པ་ཊི་ས་ནྡྷི་ཡཾ.
༥༦༥. ཨུ་པེ་ཀྑཱ་ས་ཧི་ཏཱ་ཧེ་ཏུ-མ་ནོ་ཝི་ཉྙཱ་ཎ་དྷཱ་ཏུ་ཡཱ;
ཝི་ནཱ པ་རི་ཏྟ་པཱ་ཀཱ་ནཾ, ཧོ་ནྟི དྭེ་དྷཱ པ་ཝ་ཏྟི་ཡཾ.
༥༦༦. ཏཱ་ཡེ་ཝ ཙེ་ཏ་ནཱ རཱུ་པ-བྷ་ཝེ དྭེ་དྷཱ་ཝ པ་ཙྩ་ཡཱ;
པ་ཉྩ་ནྣཾ པཱ་ཀ་ཙི་ཏྟཱ་ནཾ, བྷ་ཝ་ནྟི ཧི པ་ཝ་ཏྟི་ཡཾ.
༥༦༧. ཨ་ཊྛ་ནྣཾ ཏུ པ་རི་ཏྟཱ་ནཾ, ཀཱ་མེ དུ་གྒ་ཏི་ཡཾ ཏ་ཐཱ;
པ་ཝ་ཏྟེ པ་ཙྩ་ཡཱ ཧོ་ནྟི, ན ཧོ་ནྟི པ་ཊི་ས་ནྡྷི་ཡཾ.
༥༦༨. ཧོ་ནྟི ཝུ་ཏྟ་པྤ་ཀཱ་རཱ་ཝ, ཀཱ་མེ སུ་ག་ཏི་ཡཾ ཏ་ཐཱ;
སོ་ལ༹་ས་ནྣཾ ཝི་པཱ་ཀཱ་ནཾ, པ་ཝ་ཏྟེ པ་ཊི་ས་ནྡྷི་ཡཾ.
༥༦༩. རཱུ་པེ པུ་ཉྙཱ་བྷི་ས་ངྑཱ་རཱ, རཱུ་པཱ་ཝ་ཙ་ར་བྷཱུ་མི་ཡཾ;
པ་ཉྩ་ནྣཾ པཱ་ཀ་ཙི་ཏྟཱ་ནཾ, པ་ཙྩ་ཡཱ པ་ཊི་ས་ནྡྷི་ཡཾ.
༥༧༠. ཧོ་ནྟི་མཱ་པུ་ཉྙ་ས་ངྑཱ་རཱ, ཀཱ་མེ དུ་གྒ་ཏི་ཡཾ དྭི་དྷཱ;
ཝི་ཉྙཱ་ཎ་སྶ པ་ནེ་ཀ་སྶ, པ་ཙྩ་ཡཱ པ་ཊི་ས་ནྡྷི་ཡཾ.
༥༧༡. ཚ་ནྣཾ པ་ན པ་ཝ་ཏྟེ་ཝ, ཧོ་ནྟི ནོ པ་ཊི་ས་ནྡྷི་ཡཾ;
ས་ཏྟ་ནྣ་མྤི བྷ་ཝ་ནྟེ་ཝ, པ་ཝ་ཏྟེ པ་ཊི་ས་ནྡྷི་ཡཾ.
༥༧༢. ཀཱ་མེ སུ་ག་ཏི་ཡཾ ཏེ་སཾ, ས་ཏྟ་ནྣ་མྤི ཏ་ཐེ་ཝ ཙ;
པ་ཝ་ཏྟེ པ་ཙྩ་ཡཱ ཧོ་ནྟི, ན ཧོ་ནྟི པ་ཊི་ས་ནྡྷི་ཡཾ.
༥༧༣. ཝི་ཉྙཱ་ཎཱ་ནཾ ཙ་ཏུ་ནྣ་མྤི, ཏེ་སཾ རཱུ་པ་བྷ་ཝེ ཏ་ཐཱ;
པ་ཝ་ཏྟེ པ་ཙྩ་ཡཱ ཧོ་ནྟི, ན ཧོ་ནྟི པ་ཊི་ས་ནྡྷི་ཡཾ.
༥༧༤. སོ ཙ ཀཱ་མ་བྷ་ཝེ་ནི་ཊྛ-རཱུ་པཱ་དི་ཨུ་པ་ལ་དྡྷི་ཡཾ;
ཨ་ནི་ཊྛ་རཱུ་པཱ་ད་ཡོ པ་ན, བྲ་ཧྨ་ལོ་ཀེ ན ཝི་ཛྫ་རེ.
༥༧༥. ཏ་ཐེ་ཝཱ་ནེ་ཉྫ་ས་ངྑཱ་རོ, ཨ་རཱུ་པཱ་ཝ་ཙ་རབྷཱུ་མི་ཡཾ;
ཙ་ཏུ་ནྣཾ པཱ་ཀ་ཙི་ཏྟཱ་ནཾ, པ་ཝ་ཏྟེ པ་ཊི་ས་ནྡྷི་ཡཾ.
༥༧༦. ཨེ་ཝཾ ཏཱ་ཝ བྷ་ཝེ་སྭེ་ཏེ, པ་ཊི་ས་ནྡྷི་པ་ཝ་ཏྟི་སུ;
ཡ་ཐཱ ཙ པ་ཙྩ་ཡཱ ཧོ་ནྟི, ཏ་ཐཱ ཉེ་ཡྻཱ ཝི་བྷཱ་ཝི་ནཱ.
༥༧༧. ཨེ་སེ་ཝ ཙ ན་ཡོ ཉེ་ཡྻོ, ཡོ་ནི་ཨཱ་དཱི་སུ ཏ་ཏྲི་དཾ;
ཨཱ་དི་ཏོ པ་ན པ་ཊྛཱ་ཡ, མུ་ཁ་མ་ཏྟ་ནི་ད་སྶ་ནཾ.
༥༧༨. ཨ་ཝི་སེ་སེ་ན པུ་ཉྙཱ་བྷི-ས་ངྑཱ་རོ དྭི་བྷ་ཝེ་སུ་པི;
ད་ཏྭཱ་ན པ་ཊི་ས་ནྡྷིཾ ཏུ, ས་བྦ་པཱ་ཀཾ ཛ་ནེ་ཏི སོ.
༥༧༩. ཏ་ཐཱ ཙ་ཏཱུ་སུ ཝི་ཉྙེ་ཡྻོ, ཨ་ཎྜ་ཛཱ་དཱི་སུ ཡོ་ནི་སུ;
བ་ཧུ་དེ་ཝ་མ་ནུ་སྶཱ་ནཾ, ག་ཏཱི་སུ དྭཱི་སུ ཨེ་ཝ ཙ.
༥༨༠. ཏ་ཐཱ ནཱ་ན་ཏྟ་ཀཱ་ཡཱ་དི-ཝི་ཉྙཱ་ཎཱ་ནཾ ཋི་ཏཱི་སུ་པི;
ཏ་ཐཱ ཝུ་ཏྟ་པྤ་ཀཱ་ར་སྨིཾ, ས་ཏྟཱ་ཝཱ་སེ ཙ་ཏུ་བྦི་དྷེ.
༥༨༡. ཨེ་ཝཾ པུ་ཉྙཱ་བྷི་ས་ངྑཱ་རོ, བྷ་ཝཱ་དཱི་སུ ཡ་ཐཱ་ར་ཧཾ;
ཨེ་ཀ་ཝཱི་ས་ཏི་པཱ་ཀཱ་ནཾ, པ་ཙྩ་ཡོ ཧོ་ཏི ཙ དྭི་དྷཱ.
༥༨༢. ཀཱ་མེ ཨ་པུ་ཉྙ་ས་ངྑཱ་རོ, བྷ་ཝེ ཙ་ཏཱུ་སུ ཡོ་ནི་སུ;
ཏཱི་སུ ག་ཏཱི་སུ ཨེ་ཀི་སྶཱ, ཝི་ཉྙཱ་ཎ་ཊྛི་ཏི་ཡཱ་པི ཙ.
༥༨༣. ས་ཏྟཱ་ཝཱ་སེ པ་ནེ་ཀ་སྨིཾ,
ཨུ་ཧོ་ཏི སོ པ་ཙྩ་ཡོ དྭི་དྷཱ;
ས་ཏྟ་ནྣཾ པཱ་ཀ་ཙི་ཏྟཱ་ནཾ,
པ་ཝ་ཏྟེ པ་ཊི་ས་ནྡྷི་ཡཾ.
༥༨༤. ཏ་ཐེ་ཝཱ་ནེ་ཉྫ་ས་ངྑཱ་རོ, ཨེ་ཀཱ་རཱུ་པ་བྷ་ཝེ པུ་ན;
ཨེ་ཀི་སྶཱ ཡོ་ནི་ཡཱ ཙེ་ཝ, ཨེ་ཀི་སྶཱ ག་ཏི་ཡཱ་པི ཙ.
༥༨༥. ཏཱི་སུ ཙི་ཏྟ་ཊྛི་ཏཱི་སྭེ་ཝ, ས་ཏྟཱ་ཝཱ་སེ ཙ་ཏུ་བྦི་དྷེ;
ཙ་ཏུ་ནྣཾ པཱ་ཀ་ཙི་ཏྟཱ་ནཾ, དྭེ་དྷཱ སོ ཧོ་ཏི པ་ཙྩ་ཡོ.
༥༨༦. པ་ཊི་ས་ནྡྷི་པ་ཝ་ཏྟཱི་ནཾ, ཝ་སེ་ནེ་ཝ བྷ་ཝཱ་དི་སུ;
ཝི་ཛཱ་ནི་ཏ་བྦཱ ས་ངྑཱ་རཱ, ཡ་ཐཱ ཡེ་ས་ཉྩ པ་ཙྩ་ཡཱ.
༥༨༧. ན རཱུ་པཱ་རཱུ་པ་དྷ་མྨཱ་ནཾ, ས་ངྐ་ནྟི པ་ན ཝི་ཛྫ་ཏི;
ས་ངྐ་ནྟི་བྷཱ་ཝེ ཨ་ས་ཏི, པ་ཊི་ས་ནྡྷི ཀ་ཐཾ སི་ཡཱ.
༥༨༨. ན་ཏྠི ཙི་ཏྟ་སྶ ས་ངྐ་ནྟི, ཨ་ཏཱི་ཏ་བྷ་ཝ་ཏོ ཨི་དྷ;
ཏ་ཏོ ཧེ་ཏུཾ ཝི་ནཱ ཏ་སྶ, པཱ་ཏུ་བྷཱ་ཝོ ན ཝི་ཛྫ་ཏི.
༥༨༩. སུ་ལ་དྡྷ་པ་ཙྩ་ཡཾ རཱུ་པཱ-རཱུ་པ་མ་ཏྟཾ ཏུ ཛཱ་ཡ་ཏི;
ཨུ་པྤ་ཛྫ་མཱ་ན་མེ་ཝཾ ཏུ, ལ་བྷི་ཏྭཱ པ་ཙྩ་ཡཾ པ་ན.
༥༩༠. བྷ་ཝ་ནྟ་ར་མུ་པེ་ཏཱི་ཏི, ས་མ་ཉྙཱ་ཡ པ་ཝུ་ཙྩ་ཏི;
ན ཙ ས་ཏྟོ ན ཙ ཛཱི་ཝོ, ན ཨ་ཏྟཱ ཝཱ་པི ཝི་ཛྫ་ཏི.
༥༩༡. ཏ་ཡི་དཾ པཱ་ཀ་ཊཾ ཀ་ཏྭཱ, པ་ཊི་ས་ནྡྷི་ཀྐ་མཾ པ་ན;
ད་སྶ་ཡི་སྶཱ་མ་ཧཾ སཱ་དྷུ, ནི་བོ་དྷ་ཐ སུ་དུ་བྦུ་དྷཾ.
༥༩༢. ཨ་ཏཱི་ཏ་སྨིཾ བྷ་ཝེ ཏ་སྶ, ཨཱ་ས་ནྣ་མ་ར་ཎ་སྶ ཧི;
ཧ་རི་ཏཾ ཏཱ་ལ་པ་ཎྞཾ་ཝ, པ་ཀྑི་ཏྟཾ ཨཱ་ཏ་པེ པ་ན.
༥༩༣. སུ་སྶ་མཱ་ནེ ས་རཱི་ར་སྨིཾ, ན་ཊྛེ ཙ་ཀྑུ་ནྡྲི་ཡཱ་དི་ཀེ;
ཧ་ད་ཡ་ཝ་ཏྠུ་མ་ཏྟ་སྨིཾ, ཋི་ཏེ ཀཱ་ཡ་པྤ་སཱ་དི་ཀེ.
༥༩༤. ཝ་ཏྠུ་ས་ནྣི་སྶི་ཏཾ ཙི་ཏྟཾ, ཧོ་ཏི ཏ་སྨིཾ ཁ་ཎེ་པི ཙ;
པུ་བྦཱ་ནུ་སེ་ཝི་ཏཾ ཀ་མྨཾ, པུ་ཉྙཾ ཝཱ་པུ་ཉྙ་མེ་ཝ ཝཱ.
༥༩༥. ཀ་མྨཾ ཀ་མྨ་ནི་མི་ཏྟཾ ཝཱ, ཨཱ་ལ་མྦི་ཏྭཱ པ་ཝ་ཏྟ་ཏི;
ཨེ་ཝཾ པ་ཝ་ཏྟ་མཱ་ནཾ ཏཾ, ཝི་ཉྙཱ་ཎཾ ལ་དྡྷ་པ་ཙྩ་ཡཾ.
༥༩༦. ཨ་ཝི་ཛྫཱ་ཡ པ་ཊི་ཙྪ་ནྣཱ-དཱི་ན་ཝེ ཝི་ས་ཡེ པ་ན;
ཏ་ཎྷཱ ན་མེ་ཏི ས་ངྑཱ་རཱ, ཁི་པ་ནྟི ས་ཧ་ཛཱ པ་ན.
༥༩༧. ན མཱི་ཡ་མཱ་ནཾ ཏ་ཎྷཱ་ཡ, ཏཾ ས་ནྟ་ཏི་ཝ་སཱ པ་ན;
ཨོ་རི་མཱ པ་ན ཏཱི་ར་མྷཱ, ཨཱ་ལ་མྦི་ཏྭཱ་ན ར་ཛྫུ་ཀཾ.
༥༩༨. མཱ་ཏི་ཀཱ་ཏི་ཀྐ་མོ་ཝེ་ཏཾ, པུ་རི་མཾ ཛ་ཧ་ཏི ནི་སྶ་ཡཾ;
ཨ་པ་རཾ ཀ་མྨ་ས་མྦྷཱུ་ཏཾ, ལ་མྦི་ཏྭཱ ཝཱ་པི ནི་སྶ་ཡཾ.
༥༩༩. ཏཾ པ་ནཱ་ར་མྨ་ཎཱ་དཱི་ཧི, པ་ཙྩ་ཡེ་ཧི པ་ཝ་ཏྟ་ཏི;
པུ་རི་མཾ ཙ་ཝ་ནཾ ཨེ་ཏྠ, པ་ཙྪི་མཾ པ་ཊི་ས་ནྡྷི ཏུ.
༦༠༠. ཏ་དེ་ཏཾ ནཱ་པི པུ་རི་མཱ, བྷ་ཝ་ཏོ་པི ཨི་དྷཱ་ག་ཏཾ;
ཀ་མྨཱ་དི་ཉྩ ཝི་ནཱ ཧེ་ཏུཾ, པཱ་ཏུ་བྷཱུ་ཏཾ ན ཙེ་ཝ ཏཾ.
༦༠༡. ཨེ་ཏྠ ཙེ་ཏ་སྶ ཙི་ཏྟ་སྶ, པུ་རི་མཱ བྷ་ཝ་ཏོ པ་ན;
ཨི་དྷཱ་ནཱ་ག་མ་ནེ་ཏཱི་ཏ-བྷ་ཝ་ཧེ་ཏཱུ་ཧི ས་མྦྷ་ཝེ.
༦༠༢. པ་ཊི་གྷོ་ས་དཱི་པ་མུ་དྡཱ་དཱི, བྷ་ཝ་ནྟེ་ཏྠ ནི་ད་སྶ་ནཱ;
ཡ་ཐཱ ཨཱ་ག་ནྟྭཱ ཨ་ཉྙ་ཏྲ, ཧོ་ནྟི ས་དྡཱ་དི་ཧེ་ཏུ་ཀཱ.
༦༠༣. ཨེ་ཝ་མེ་ཝ ཙ ཝི་ཉྙཱ་ཎཾ, ཝེ་དི་ཏ་བྦཾ ཝི་བྷཱ་ཝི་ནཱ;
ས་ནྟཱ་ན་བ་ནྡྷ་ཏོ ན་ཏྠི, ཨེ་ཀ་ཏཱ ཝཱ་པི ནཱ་ན་ཏཱ.
༦༠༤. ས་ཏི ས་ནྟཱ་ན་བ་ནྡྷེ ཏུ, ཨེ་ཀ་ནྟེ་ནེ་ཀ་ཏཱ སི་ཡཱ;
ཁཱི་ར་ཏོ ད་དྷི་ས་མྦྷཱུ་ཏཾ, ན བྷ་ཝེ་ཡྻ ཀ་དཱ་ཙི་པི.
༦༠༥. ཨ་ཐཱ་པི པ་ན ཨེ་ཀ་ནྟ-ནཱ་ན་ཏཱ སཱ བྷ་ཝེ་ཡྻ ཙེ;
ཁཱི་ར་སཱ་མཱི ན་རོ ནེ་ཝ, ད་དྷི་སཱ་མཱི བྷ་ཝེ་ཡྻ སོ.
༦༠༦. ཏ་སྨཱ ཨེ་ཏྠ པ་ནེ་ཀ་ནྟ-ཨེ་ཀ་ཏཱ་ནཱ་ན་ཏཱ་པི ཝཱ;
ན ཙེ་ཝ ཨུ་པ་ག་ནྟ་བྦཱ, ཝི་ཉྙུ་ནཱ ས་མ་ཡ་ཉྙུ་ནཱ.
༦༠༧. ན་ནུ ཨེ་ཝ་མ་ས་ངྐ་ནྟི-པཱ་ཏུ་བྷཱ་ཝེ ཏ་སྶ ས་ཏི;
ཡེ ཨི་མ་སྨིཾ མ་ནུ་སྶ་ཏྟ-བྷཱ་ཝེ ཁ་ནྡྷཱ་བྷི་ས་མྦྷ་ཝཱ.
༦༠༨. ཏེ་སཾ ཨི་དྷ ནི་རུ་དྡྷ་ཏྟཱ, ཀ་མྨ་སྶ ཕ་ལ་ཧེ་ཏུ་ནོ;
པ་ར་ཏྠཱ་ག་མ་ཏོ ཙེ་ཝ, ཨི་དྷ ཏ་སྶ ཀ་ཏ་སྶ ཧི.
༦༠༩. ཨ་ཉྙ་སྶ ཨ་ཉྙ་ཏོ ཙེ་ཝ, ཀ་མྨ་ཏོ ཏཾ ཕ་ལཾ སི་ཡཱ;
ཏ་སྨཱ ན སུ་ནྡ་རཾ ཨེ་ཏཾ, ཝི་དྷཱ་ནཾ ས་བྦ་མེ་ཝ ཙ.
ཨེ་ཏྠཱ་ཧ –
༦༡༠. ས་ནྟཱ་ནེ ཡཾ ཕ་ལཾ ཨེ་ཏཾ, ནཱ་ཉྙ་སྶ ན ཙ ཨ་ཉྙ་ཏོ;
བཱི་ཛཱ་ནཾ ཨ་བྷི་ས་ངྑཱ་རོ, ཨེ་ཏ་སྶ་ཏྠ་སྶ སཱ་དྷ་ཀོ.
༦༡༡. ཨེ་ཀ་སྨིཾ པ་ན ས་ནྟཱ་ནེ, ཝ་ཏྟ་མཱ་ནཾ ཕ་ལཾ པ་ན;
ཨ་ཉྙ་སྶཱ་ཏི་པི ཝཱ ནེ་ཝ, ཨ་ཉྙ་ཏོ ཝཱ ན ཧོ་ཏི ཏཾ.
༦༡༢. བཱི་ཛཱ་ནཾ ཨ་བྷི་ས་ངྑཱ་རཱ, ཨེ་ཏ་སྶ་ཏྠ་སྶ སཱ་དྷ་ཀོ;
བཱི་ཛཱ་ནཾ ཨ་བྷི་ས་ངྑཱ་རེ, ཀ་ཏེ ཏུ མ་དྷུ་ཨཱ་དི་ནཱ.
༦༡༣. ཏ་སྶ བཱི་ཛ་སྶ ས་ནྟཱ་ནེ, པ་ཋ་མཾ ལ་དྡྷ་པ་ཙྩ་ཡོ;
མ་དྷུ་རོ ཕ་ལ་སོ ཏ་སྶ, ཧོ་ཏི ཀཱ་ལ་ནྟ་རེ པ་ན.
༦༡༤. ན ཧི ཏཱ་ནི ཧི བཱི་ཛཱ་ནི, ཨ་བྷི་ས་ངྑ་ར་ཎ་མྤི ཝཱ;
པཱ་པུ་ཎ་ནྟི ཕ་ལ་ཊྛཱ་ནཾ, ཨེ་ཝཾ ཉེ་ཡྻ་མི་ད་མྤི ཙ.
༦༡༥. བཱ་ལ་ཀཱ་ལེ པ་ཡུ་ཏྟེ་ན, ཝི་ཛྫཱ་སི་པྤོ་ས་དྷཱ་དི་ནཱ;
དཱི་པེ་ཏ་བྦོ ཨ་ཡཾ ཝུ་དྡྷ-ཀཱ་ལ་སྨིཾ ཕ་ལ་དཱ་ཡི་ནཱ.
༦༡༦. ཨེ་ཝཾ ས་ནྟེ་པི ཏཾ ཀ་མྨཾ, ཝི་ཛྫ་མཱ་ན་མྤི ཝཱ པ་ན;
ཕ་ལ་སྶ པ་ཙྩ་ཡོ ཧོ་ཏི, ཨ་ཐ ཝཱ་ཝི་ཛྫ་མཱ་ན་ཀཾ.
༦༡༧. ཝི་ཛྫ་མཱ་ནཾ ས་ཙེ ཧོ་ཏི, ཏ་པྤ་ཝ་ཏྟི་ཀྑ་ཎེ པ་ན;
བྷ་ཝི་ཏ་བྦཾ ཝི་པཱ་ཀེ་ན, ས་དྡྷི་མེ་ཝ ཙ ཧེ་ཏུ་ནཱ.
༦༡༨. ཨ་ཐ ཝཱ་ཝི་ཛྫ་མཱ་ནཾ ཏཾ, ནི་རུ་དྡྷཾ པ་ཙྩ་ཡོ བྷ་ཝེ;
པ་ཝ་ཏྟི་ཀྑ་ཎ་ཏོ པུ་བྦེ, པ་ཙྪཱ ནི་ཙྩ་ཕ་ལཾ སི་ཡཱ.
ཝུ་ཙྩ་ཏེ –
༦༡༩. ཀ་ཊ་ཏྟཱ པ་ཙྩ་ཡོ ཀ་མྨཾ, ཏ་སྨཱ ནི་ཙྩ་ཕ་ལཾ ན ཙ;
པཱ་ཊི་བྷོ་གཱ་དི་ཀཾ ཀ་མྨཾ, ཝེ་དི་ཏ་བྦཾ ནི་ད་སྶ་ནཾ.
༦༢༠. ཀ་ཊ་ཏྟཱ་ཡེ་ཝ ཏཾ ཀ་མྨཾ, ཕ་ལ་སྶ པ་ན པ་ཙྩ་ཡོ;
ན ཙ་སྶ ཝི་ཛྫ་མཱ་ན་ཏྟཾ, ཏ་སྶ ཝཱ་ཝི་ཛྫ་མཱ་ན་ཏཱ.
༦༢༡. ཨ་བྷི་དྷ་མྨཱ་ཝ་ཏཱ་རོ་ཡཾ, པ་ར་མ་ཏྠ་པ་ཀཱ་ས་ནོ;
སོ་ཏ་བྦོ པ་ན སོ་ཏཱུ་ནཾ, པཱི་ཏི་བུ་དྡྷི་ཝི་ཝ་ཌྜྷ་ནོ.
ཨི་ཏི ཨ་བྷི་དྷ་མྨཱ་ཝ་ཏཱ་རེ པུ་ཉྙ་ཝི་པཱ་ཀ་པ་ཙྩ་ཡ་ནི་དྡེ་སོ ནཱ་མ
ན་ཝ་མོ པ་རི་ཙྪེ་དོ.