༢༣. ཏེ་ཝཱི་ས་ཏི་མོ པ་རི་ཙྪེ་དོ
ཀི་ལེ་ས་པྤ་ཧཱ་ན་ཀ་ཐཱ་ཝ་ཎྞ་ནཱ
༡༣༧༥. ཨི་དཱ་ནི ཨི་མི་སྶཱ་ཡེ་ཝ ཙ་ཏུ་ཏྠ་ཉཱ་ཎཱ་ཡ ཉཱ་ཎ་ད་སྶ་ན་ཝི་སུ་དྡྷི་ཡཱ ཨཱ་ནུ་བྷཱ་ཝ་ཝི་ཛཱ་ན་ན་ཏྠཾ ཡེ་ན ཡེ དྷ་མྨཱ པ་ཧཱ་ཏ་བྦཱ, ཏེ་སཾ པ་ཧཱ་ན་ཉྩ ཨ་བྷི་ས་མ་ཡ་ཀཱ་ལེ པ་རི་ཉྙཱ་དི་ཀི་ཙྩཱ་ནི ཙ ད་སྶེ་ཏུཾ ‘‘ཨེ་ཏེ་སུ ཡེ་ན ཡེ དྷ་མྨཱ’’ཏི་ཨཱ་དི ཨཱ་ར་དྡྷཾ. ཡེ དྷ་མྨཱཏི ཡེ སཾ་ཀི་ལེ་ས་དྷ་མྨཱ. སཾ་ཡོ་ཛ་ནཱདཱི་སུ ཁ་ནྡྷེ་ཧི ཁ་ནྡྷཱ་ནཾ, ཕ་ལེ་ན ཀ་མྨ་སྶ, དུ་ཀྑེ་ན ཝཱ ས་ཏྟཱ་ནཾ སཾ་ཡོ་ཛ་ན་ཊྛེ་ན བ་ནྡྷ་ན་ཊྛེ་ན སཾ་ཡོ་ཛ་ནཱ་ནི. ས་མྤ་ཡུ་ཏྟ་དྷ་མྨཱ་ནཾ ཝི་བཱ་དྷ་ན་ཊྛེ་ན, ཨུ་པ་ཏཱ་པ་ན་ཊྛེ་ན, སཾ་ཀི་ལི་ཊྛ་ཏཱ་ཡ ཙ ཀི་ལེ་སཱ. ཨ་བྷི་ནི་ཝེ་སཱ་དི་ཝ་སེ་ན མི་ཙྪཱ་ཝི་པ་རཱི་ཏཾ པ་ཝ་ཏྟ་ན་ཏོ མི་ཙྪཱ་ས་བྷཱ་ཝཱ་ཏི མི་ཙྪ་ཏྟཱ. ལོ་ཀེ དྷ་མྨཱ, ལོ་ཀ་པ་རི་ཡཱ་པ་ནྣཱ དྷ་མྨཱ, ལོ་ཀ་པྤ་ཝ་ཏྟི་ཡཾ ས་ཏི ཨ་ནུ་པ་ར་མ་དྷ་མྨ་ཏྟཱ ཝཱ་ཏི ལོ་ཀ་དྷ་མྨཱ. མ་ཙྪེ་ར་སྶ བྷཱ་ཝོ, ཀ་མྨཾ ཝཱ་ཏི མ་ཙྪ་རི་ཡཾ. ཝི་པ་རཱི་ཏ་ཊྛེ་ན ཝི་པ་ལླཱ་སཱ. ནཱ་མ་ཀཱ་ཡ་སྶ ཙ རཱུ་པ་ཀཱ་ཡ་སྶ ཙ ག་ནྠ་ན་ཏོ ག་ནྠཱ. ཨ་རི་ཡེ་ཧི ཨ་ག་ནྟ་བྦཱ, ཨ་ཡུ་ཏྟཱ ག་ཏཱི་ཏི ཝཱ ཨ་ག་ཏི. ཨཱ་ས་ཝ་ནྟཱི་ཏི ཨཱ་ས་ཝཱ, ཨཱ་བྷ་ཝ་གྒ་ཏོ ས་བྦ་མོ་ཀཱ་ས་ལོ་ཀཾ, ཨཱ་གོ་ཏྲ་བྷུ་ཏོ ས་བྦེ དྷ་མྨེ བྱཱ་པེ་ཏྭཱ པ་ཝ་ཏྟ་ནྟཱི་ཏི ཨ་ཏྠོ, ཨཱ་ས་ཝ་ནྟི སཾ་སཱ་ར་དུ་ཀྑ་ནྟི ཝཱ ཨཱ་ས་ཝཱ, ཙ་ཀྑཱ་དཱི་ཧི ཝཱ སཾ་ཝ་རཱ་སཾ་ཝ་ར་དྭཱ་རེ་ཧི ས་ཏྟ་ས་ནྟཱ་ནེ ཨཱ་ས་ཝ་ནྟི ཝ་ཎ་ཏོ ཡཱུ་སཱ་ནི ས་ནྡ་ནྟི ཝི་ཡཱ་ཏི ཨཱ་ས་ཝཱ, ཨཱ་ས་ཝ་ནྟི ཝཱ ཨེ་ཏེ་ཧི ཙི་ཏྟཱ་ནི ཝི་ས་ཡེ་སཱུ་ཏི ཨཱ་ས་ཝཱ. སཾ་སཱ་ར་མ་ཧཱ་སཱ་ག་ར་པྤ་ཏྟི་ཧ་ན་ན་ཏོ ཨོ་གྷཱ ཝི་ཡཱ་ཏི ཨོ་གྷཱ. ཧེ་ཊྛཱ ཝུ་ཏྟ་ན་ཡེ་ན ཡོ་ཛ་ན་ཏོ ཡོ་གཱ. ནི་ཝཱ་རེ་ནྟི ལོ་ཀི་ཡ་ལོ་ཀུ་ཏྟ་ར་གུ་ཎ་ཝི་སེ་སཱ་དྷི་ག་མ་ནྟི ནཱི་ཝ་ར་ཎཱ་ནི. ཨ་ནི་ཙྩཱ་དི་དྷ་མྨ་ས་བྷཱ་ཝཾ ཨ་ཏི་ཀྐ་མྨ པ་ར་ཏོ ཨ་ས་བྷཱ་ཝ་ཏོ ཨཱ་མ་ས་ནྟཱི་ཏི པ་རཱ་མཱ་སཱ. མ་ཎྜཱུ་ཀཾ པ་ནྣ་གོ ཝི་ཡ ཨཱ་ར་མྨ་ཎཾ བྷུ་སཾ ཨཱ་དི་ཡ་ནྟཱི་ཏི ཨུ་པཱ་དཱ་ནཱ་ནི. ཨ་པྤ་ཧཱི་ན་བྷཱ་ཝེ་ན ས་ཏྟ་ས་ནྟཱ་ནེ ཨ་ནུ་སེ་ནྟི མཱུ་སི་ཀ་ཝི་སཾ ཝི་ཡ ཨ་ནུ་རཱུ་པ་ཀཱ་ར་ཎཾ ལ་བྷི་ཏྭཱ ཨུ་པྤ་ཛྫ་ནྟཱི་ཏི ཨ་ནུ་ས་ཡཱ. ཙི་ཏྟ་སྶ མ་ལཱི་ན་བྷཱ་ཝ་ཀ་ར་ཎ་ཊྛེ་ན མ་ལཱ. ཨ་ཀུ་ས་ལ་ཀ་མྨཱ་ནི ཙ ཏཱ་ནི དུ་གྒ་ཏཱི་ནཾ པ་ཐཱ ཙཱ་ཏི ཨ་ཀུ་ས་ལ་ཀ་མྨ་པ་ཐཱ. ཨི་དྷ པ་ན ཀ་མྨ་པ་ཐ་བྷཱ་ཝཾ ཨ་པྤ་ཏྟཱ་ནཾ ཏཾ་ས་བྷཱ་ཝ་ཏོ ག་ཧ་ཎཾ ད་ཊྛ་བྦཾ. ཙི་ཏྟཾ ཨུ་པྤ་ཛྫ་ཏི ཨེ་ཏྠཱ་ཏི ཙི་ཏྟུ་པྤཱ་དོ, ཙེ་ཏ་སི་ཀ་རཱ་སི, ཨ་ཀུ་ས་ལོ ཙ སོ ཙི་ཏྟུ་པྤཱ་དོ ཙཱ་ཏི ཨ་ཀུ་ས་ལ་ཙི་ཏྟུ་པྤཱ་དོ.
ཀཱ་མ་བྷ་ཝ་ཏོ ཨུ་པ་རི་ཀོ་ཊྛཱ་ས་བྷཱ་ཝ་ཏོ ཏ་ཏི་ཡ་མ་གྒ་པྤ་ཏྟི་ཡཱ ཨུ་དྡྷཾ བྷ་ཛི་ཏ་བྦ་ཏོ, སེ་ཝི་ཏ་བྦ་ཏོ ཙཱ་ཏི ཨུ་དྡྷ་མྦྷཱ་གཱ, རཱུ་པཱ་རཱུ་པ་བྷ་ཝཱ, ཏེ་སཾ ཧི་ཏཱ་ནི ཏ་ཏྠུ་པྤ་ཛྫ་ན་ཁ་ནྡྷཱ་དི་ཡོ་ཛ་ན་ཏོ་ཏི ཨུ་དྡྷ་མྦྷཱ་གི་ཡཱ་ནི, ཏཱ་ནི་ཡེ་ཝ སཾ་ཡོ་ཛ་ནཱ་ནཱི་ཏི ཨུ་དྡྷ་མྦྷཱ་གི་ཡ་སཾ་ཡོ་ཛ་ནཱ་ནི. རཱུ་པཱ་རཱུ་པ་བྷ་ཝ་ཏོ ཧེ་ཊྛི་མ་ཀོ་ཊྛཱ་ས་བྷཱ་ཝ་ཏོ ཏ་ཏྠུ་པྤཱ་ད་ཀི་ལེ་སཱ་ནཾ ཨ་པྤ་ཧཱི་ན་བྷཱ་ཝེ་ན ཏ་ཏི་ཡ་མ་གྒ་པྤ་ཏྟི་ཡཱ ཧེ་ཊྛཱ བྷ་ཛི་ཏ་བྦ་ཏོ ཝཱ ཨ་དྷོ་བྷཱ་གཱ, ཀཱ་མ་བྷ་ཝཱ, ཏེ་སཾ ཧི་ཏཱ་ནི སཾ་ཡོ་ཛ་ནཱ་ནཱི་ཏི ཨ་དྷོ་བྷཱ་གི་ཡ་སཾ་ཡོ་ཛ་ནཱ་ནཱིཏི.
ཨི་མེ་སུ པ་ན ད་ས་སུ རཱུ་པ་བྷ་ཝ་སཾ་ཡོ་ཛ་ནཾ, ཨ་རཱུ་པ་བྷ་ཝ་སཾ་ཡོ་ཛ་ནཾ, ཀཱ་མ་བྷ་ཝ་སཾ་ཡོ་ཛ་ན་ཉྩ ཨ་ཏྠ་ཏོ ལོ་བྷོ་ཝ, ས་ཀྐཱ་ཡ་དི་ཊྛི་སཱི་ལ་བྦ་ཏ་པ་རཱ་མཱ་སཱ་པི དི་ཊྛི་ཡེ་ཝ, ཏ་སྨཱ དྷ་མྨ་ཏོ ས་ཏྟ སཾ་ཡོ་ཛ་ནཱ་ནི.
མི་ཙྪཱ་ས་ངྐ་པྤོ མི་ཙྪཱ་ཝཱ་ཡཱ་མོ མི་ཙྪཱ་ས་མཱ་དྷཱི་ཏི ཏ་ཐཱ པ་ཝ་ཏྟཱ་ནཾ ཝི་ཏ་ཀྐ་ཝཱི་རི་ཡ་ས་མཱ་དྷཱི་ན་མ་དྷི་ཝ་ཙ་ནཾ. མི་ཙྪཱ་ཝཱ་ཙཱ་ད་ཡོ ཏ་ཡོ ཏ་ཐཱ པ་ཝ་ཏྟཱ ཙེ་ཏ་ནཱ. མི་ཙྪཱ་ས་ཏི པ་ན ཙི་ཏྟུ་པྤཱ་དོ. མི་ཙྪཱ་ཉཱ་ཎཾ ཏ་ཐཱ པ་ཝ་ཏྟོ མོ་ཧོ. མི་ཙྪཱ་ཝི་མུ་ཏྟི ལོ་ཀ་ཐཱུ་པི་ཀཱ་དཱི་སུ མོ་ཀྑོ་ཏི པ་ཝ་ཏྟ་མི་ཙྪཱ་གཱ་ཧོ.
ཀཱ་ར་ཎཱུ་པ་ཙཱ་རེ་ནཱཏི ལཱ་བྷ་ཧེ་ཏུ་ཀོ ལཱ་བྷོ, ཨ་ལཱ་བྷ་ཧེ་ཏུ་ཀོ ཨ་ལཱ་བྷོ་ཏི་ཨཱ་དི་ནཱ ཀཱ་རི་ཡ་སྶ ཀཱ་ར་ཎ་ཝ་སེ་ན ཨུ་པ་ཙ་ར་ཎེ་ན. ལོ་ཀ་དྷ་མྨ་གྒ་ཧ་ཎནྟི ལོ་ཀ་དྷ་མྨ་གྒ་ཧ་ཎེ་ན ག་ཧ་ཎཾ.
ཨཱ་ཝཱ་སེ མ་ཙྪ་རི་ཡཾ, ཨཱ་ཝཱ་ས་ཧེ་ཏུ་ཀཾ ཝཱ མ་ཙྪ་རི་ཡ་ནྟི ཨཱ་ཝཱ་ས་མ་ཙྪ་རི་ཡཾ. ཨེ་ཝཾ ཀུ་ལ་མ་ཙྪ་རི་ཡཱདཱི་ནི་པི. ཏ་ཏྠ ཨཱ་ཝཱ་སོཏི ཝི་ཧཱ་རཱ་དི. ཀུ་ལནྟི ཨུ་པ་ཊྛཱ་ཀ་ཀུ་ལཾ, ཉཱ་ཏི་ཀུ་ལ་ཉྩ. ལཱ་བྷོཏི པ་ཙྩ་ཡ་ལཱ་བྷོ་ཡེ་ཝ. ཝ་ཎྞོཏི ས་རཱི་ར་ཝ་ཎྞོ ཙ གུ་ཎ་ཝ་ཎྞོ ཙ. དྷ་མྨོཏི ཨཱ་ག་མོ, ཨ་དྷི་ག་མོ ཙ.
‘‘ཏ་ཡོ’’ཏི ཝ་ཏྠུཾ ཨ་བྷི་ནྡི་ཏྭཱ ཝུ་ཏྟཾ, བྷི་ནྡི་ཏྭཱ ཙ པ་ན ཝུ་ཙྩ་མཱ་ནེ དྭཱ་ད་ས ཧོ་ནྟི.
ཨ་བྷི་ས་ཛྫ་ནཱུ་པ་ན་ཡ྄ཧ་ན་ཝ་སེ་ན པ་ཝ་ཏྟ་ན་ཏོ ཨ་བྷི་ཛ྄ཛྷཱ་བྱཱ་པཱ་དཱ་ནཾ ཀཱ་ཡ་ག་ནྠ་ཏཱ ད་ཊྛ་བྦཱ. ‘‘ཨི་ད་མེ་ཝ ས་ཙྩཾ མོ་གྷ་མ་ཉྙ’’ནྟི ཨེ་ཝཾ ཨ་ཝ་ཏྠུ་མྷི པ་ཝ་ཏྟོ ཨ་བྷི་ནི་ཝེ་སོ ཨི་དཾ་ས་ཙྩཱ་བྷི་ནི་ཝེ་སོ. སཱི་ལ་བྦ་ཏ་པ་རཱ་མཱ་ས་ཨི་དཾ་ས་ཙྩཱ་བྷི་ནི་ཝེ་ས་ཀཱ་ཡ་ག་ནྠཱ ཙེ་ཏྠ ཨ་ཏྠ་ཏོ དི་ཊྛི་ཡེ་ཝ, ཏ་སྨཱ དྷ་མྨ་ཏོ ཏ་ཡོ ཀཱ་ཡ་ག་ནྠཱ.
‘‘ཚ་ནྡ་དོ་ས་མོ་ཧ་བྷ་ཡཱ་ནཱི’’ཏི ཨ་ག་ཏི་ཀཱ་ར་ཎ་ཏྟཱ ཝུ་ཏྟཾ, ཚ་ནྡཱ་དཱི་ཧི པ་ན ཨ་ཀ་ཏྟ་བྦ་ཀ་ར་ཎཾ, ཀ་ཏྟ་བྦཱ་ཀ་ར་ཎ་ཉྩ ཨ་ག་ཏི ནཱ་མ.
ཨཱ་ས་ཝེ་སུ ཀཱ་མ་རཱ་ག་བྷ་ཝ་རཱ་གཱ ཨ་ཏྠ་ཏོ ལོ་བྷོ་ཏི དྷ་མྨ་ཏོ ཏ་ཡོ ཨཱ་ས་ཝཱ.
ཏེ་ས་མེ་ཝཱཏི ཀཱ་མ་རཱ་གཱ་དཱི་ན་མེ་ཝ. ཏེ ཧི ཨོ་གྷོ ཝི་ཡ ཨ་ཏྟ་ནི པ་ཏི་ཏེ ཨ་པཱ་ཡ་ས་མུ་དྡཾ པཱ་པེ་ནྟི, སཾ་སཱ་ར་དུ་ཀྑ་ཏོ ཙ སཱི་སཾ ཨུ་ཀྑི་པི་ཏུཾ ན དེ་ནྟི, ཁ་ནྡྷཱ་དཱི་ནི ཙ ཁ་ནྡྷཱ་དཱི་ཧི ཡོ་ཛེ་ནྟི.
ཀཱ་མུ་པཱ་དཱ་ནཱ་དཱི་ནཱིཏི ཀཱ་མུ་པཱ་དཱ་ན་དི་ཊྛུ་པཱ་དཱ་ན་སཱི་ལ་བྦ་ཏུ་པཱ་དཱ་ན་ཨ་ཏྟ་ཝཱ་དུ་པཱ་དཱ་ནཱ་ནི. དི་ཊྛུ་པཱ་དཱ་ནཱ་དཱི་ནི ཙེ་ཏྠ ཏ་ཐཱ པ་ཝ་ཏྟཱ དི་ཊྛི་ཡེ་ཝ, ཀཱ་མུ་པཱ་དཱ་ནཾ ལོ་བྷོ་ཏི དྷ་མྨ་ཏོ དྭེ ཨུ་པཱ་དཱ་ནཱ་ནི.
ས་ཏྟཱ་ནུ་ས་ཡཱཏི ཨེ་ཏྠ ཡ་དི ཨ་པྤ་ཧཱི་ན་ཊྛེ་ན ས་ཏྟ་ས་ནྟཱ་ནེ ཨ་ནུ་སེ་ནྟཱི་ཏི ཨ་ནུ་ས་ཡཱ. ཀ་སྨཱ ས་ཏྟེ་ཝ ཝུ་ཏྟཱ, ན་ནུ ཨ་ཉྙེ་ས་མྤི ཀི་ལེ་སཱ་ནཾ ཨ་པྤ་ཧཱི་ན་བྷཱ་ཝོ ཝི་ཛྫ་ཏཱི་ཏི? ན མ་ཡཾ ཨ་པྤ་ཧཱི་ན་མ་ཏྟེ་ན ཨ་ནུ་ས་ཡཾ ཝ་དཱ་མ, ཀི་ནྟུ ཨ་པྤ་ཧཱི་ན་བྷཱ་ཝེ་ན ཐཱ་མ་ག་ཏ་ཀི་ལེ་སཱ ཨ་ནུ་ས་ཡཱ་ཏི, ཐཱ་མ་ག་མ་ན་ཉྩ ནེ་སཾ ཨ་ཉྙེ་ཧི ཨ་སཱ་དྷཱ་ར་ཎོ ས་བྷཱ་ཝོ ད་ཊྛ་བྦོ. ཏ་ཐཱ ཧི དྷ་མྨ་ས་བྷཱ་ཝ་ཝེ་དི་ནཱ ཏ་ཐཱ་ག་ཏེ་ན ཨི་མེ་ཡེ་ཝ ཨ་ནུ་ས་ཡཱ ཝུ་ཏྟཱ, ཀཱ་མ་རཱ་གོ་ཡེ་ཝ ཨ་ནུ་ས་ཡོ ཀཱ་མ་རཱ་གཱ་ནུ་ས་ཡོ. ཨེ་ཝཾ སེ་སེ་སུ་པི. ཨ་པ་རེ པ་ན ‘‘ཀཱ་མ་རཱ་ག་སྶ ཨ་ནུ་ས་ཡོ’’ཏི་ཨཱ་དི་ནི་བྦ་ཙ་ནཾ ཝ་ཏྭཱ ཀཱ་མ་རཱ་གཱ་དཱི་ནཾ བཱི་ཛ་བྷཱུ་ཏཱ ཨ་ཏྟ་བྷཱ་ཝ་སྶ ཀི་ལེ་ས་ས་མྦྷཱུ་ཏཱ ཀི་ལེ་སུ་པྤཱ་ད་ན་ས་ཏྟི ཨ་ནུ་ས་ཡཱ་ཏི ཝ་ཎྞེ་ནྟི, ཏེ་སཾ མ་ཏ་པ་ཊི་ཀྑེ་པོ ཨི་དྷ པ་པ་ཉྩཱ་ཝ་ཧ་ཏྟཱ ཨ་ནཱ་ཧ་ཊོ.
པཱ་ཎ་སྶ ཨ་ཏི་པཱ་ཏོ པཱ་ཎཱ་ཏི་པཱ་ཏོ, པཱ་ཎོཏི ཝོ་ཧཱ་ར་ཏོ ས་ཏྟོ, པ་ར་མ་ཏྠ་ཏོ ཛཱི་ཝི་ཏི་ནྡྲི་ཡཾ. ཏ་སྨིཾ པཱ་ཎེ པཱ་ཎ་ས་ཉྙི་ནོ ཛཱི་ཝི་ཏི་ནྡྲི་ཡུ་པ་ཙྪེ་ད་ཀ་པྤ་ཡོ་ག་ས་མུ་ཊྛཱ་པི་ཀཱ ཝ་དྷ་ཀ་ཙེ་ཏ་ནཱ པཱ་ཎཱ་ཏི་པཱ་ཏོ. པ་ར་བྷ་ཎྜེ ཏ་ཐཱ་ས་ཉྙི་ནོ ཏ་དཱ་དཱ་ཡ་ཀ་པྤ་ཡོ་ག་ས་མུ་ཊྛཱ་པི་ཀཱ ཐེ་ཡྻ་ཙེ་ཏ་ནཱ ཨ་དི་ནྣཱ་དཱ་ནཾ. ཨ་ས་དྡྷ་མྨ་ཀཱ་མ་ཏཱ་ཡ ཀཱ་ཡ་དྭཱ་ར་པྤ་ཝ་ཏྟཱ ཨ་ག་ནྟ་བྦ་ཊྛཱ་ན་ཝཱི་ཏི་ཀྐ་མ་ཙེ་ཏ་ནཱ ཀཱ་མེ་སུ་མི་ཙྪཱ་ཙཱ་རོ. ཨ་བྷཱུ་ཏཾ ཝ་ཏྠུཾ བྷཱུ་ཏ་ཏོ པ་རཾ ཝི་ཉྙཱ་པེ་ཏུ་ཀཱ་མ་སྶ ཏ་ཐཱ ཝི་ཉྙཱ་པ་ན་པྤ་ཡོ་ག་ས་མུ་ཊྛཱ་པི་ཀཱ ཙེ་ཏ་ནཱ མུ་སཱ་ཝཱ་དོ. སོ པ་ན པ་ར་སྶ ཨ་ཏྠ་བྷེ་ད་ཀ་རོ་ཝ ཀ་མྨ་པ་ཐོ, ཨི་ཏ་རོ ཀ་མྨ་མེ་ཝ. སཾ་ཀི་ལི་ཊྛ་ཙི་ཏྟ་སྶ པ་ར་བྷེ་ད་ན་ཀཱ་མ་ཏཱ་ཡ, ཨ་ཏྟ་པི་ཡ་ཀ་མྱ་ཏཱ་ཡ ཝཱ པ་ར་བྷེ་ད་ཀ་པྤ་ཡོ་ག་ས་མུ་ཊྛཱ་པི་ཀཱ ཙེ་ཏ་ནཱ པི་སུ་ཎ་ཝཱ་ཙཱ. སཱ་པི དྭཱི་སུ བྷི་ནྣེ་སུ་ཡེ་ཝ ཀ་མྨ་པ་ཐོ. པ་ར་མ་མྨ་ཙྪེ་ད་ཀ་པྤ་ཡོ་ག་ས་མུ་ཊྛཱ་པི་ཀཱ ཨེ་ཀ་ནྟ་ཕ་རུ་ས་ཙེ་ཏ་ནཱ ཕ་རུ་ས་ཝཱ་ཙཱ. ཨ་ན་ཏྠ་ཝི་ཉྙཱ་པ་ན་པྤ་ཡོ་ག་ས་མུ་ཊྛཱ་པི་ཀཱ སཾ་ཀི་ལི་ཊྛ་ཙེ་ཏ་ནཱ ས་མྥ་པྤ་ལཱ་པོ ནཱ་མ. སོ པ་ན པ་རེ་ཧི ག་ཧི་ཏེ་ཡེ་ཝ ཀ་མྨ་པ་ཐོ ཧོ་ཏི. ‘‘ཨ་ཧོ ཝ་ཏེ་དཾ མ་མ ཧོ་ཏཱུ’’ཏི ཨེ་ཝཾ པ་ར་བྷ་ཎྜཱ་བྷི་ཛ྄ཛྷཱ་ཡ་ན་ལ་ཀྑ་ཎཱ ཨ་བྷི་ཛ྄ཛྷཱ. ‘‘ཨ་ཧོ ཝ་ཏཱ་ཡཾ ས་ཏྟོ ཝི་ན་སྶེ་ཡྻཱ’’ཏི ཨེ་ཝཾ མ་ནོ་པ་དོ་ས་ལ་ཀྑ་ཎོ བྱཱ་པཱ་དོ. ‘‘ན་ཏྠི དི་ནྣ’’ནྟི་ཨཱ་དི་ནཱ ན་ཡེ་ན ཝི་པ་རཱི་ཏ་ད་སྶ་ན་ལ་ཀྑ་ཎཱ མི་ཙྪཱ་དི་ཊྛི. ཨེ་ཏྠ ཙ ན་ཏྠི་ཀ་ཨ་ཧེ་ཏུ་ཀ་ཨ་ཀི་རི་ཡ་དི་ཊྛཱི་ཧི་ཡེ་ཝ ཀ་མྨ་པ་ཐ་བྷེ་དོ.
ཨི་མེ་སུ ཙ པཱ་ཎཱ་ཏི་པཱ་ཏཱ་དི ཏི་ཝི་དྷཾ ཀཱ་ཡ་ཀ་མྨ་མེ་ཝ. ཏཾ ཀཱ་ཡ་ཝ་ཙཱི་དྭཱ་རེ་སུ་ཡེ་ཝ ཨུ་པྤ་ཛྫ་ཏི, ན མ་ནོ་དྭཱ་རེ. ཏ་ཐཱ མུ་སཱ་ཝཱ་དཱ་དི ཙ་ཏུ་བྦི་དྷཾ ཝ་ཙཱི་ཀ་མྨ་མེ་ཝ. ཨ་བྷི་ཛ྄ཛྷཱ་དི་ཀཾ པ་ན ཏི་ཝི་དྷཾ མ་ནོ་ཀ་མྨ་མེ་ཝ. ཏཾ ཏཱི་སུ་པི དྭཱ་རེ་སུ པ་ཝ་ཏྟ་ཏི. དྭཱ་ར་ནྟ་རེ་སུ་པི པ་ཝ་ཏྟ་མཱ་ན་སྶ ས་ཀ་ས་ཀ་ནཱ་མཱ་པ་རི་ཙྩཱ་གོ ཝུ་ཏྟོ་ཡེ་ཝ. དྷ་མྨ་ཏོ ཙེ་ཏྠ ཨཱ་དི་ཏོ ས་ཏྟ ཙེ་ཏ་ནཱ་ས་བྷཱ་ཝཱ, ཨི་ཏ་རེ ཏ་ཡོ ཙེ་ཏ་ནཱ་ས་མྤ་ཡུ་ཏྟཱ་ཏི ད་ཊྛ་བྦཱ. མ་ཧཱ་སཱ་ཝ་ཛྫ་ཨ་པྤ་སཱ་ཝ་ཛྫ་པྤ་ཡོ་གཱ་དི་བྷེ་དོ པ་ན ཏ་ཏྠ ཏ་ཏྠ ཝུ་ཏྟ་ན་ཡེ་ན ཝེ་དི་ཏ་བྦོ.
ཨེ་ཏཱ་ནཱིཏི ཨི་མཱ་ནི མ་གྒ་ཉཱ་ཎཱ་ནི. ཡ་ཐཱ་ས་མྦྷ་ཝནྟི ཏཾ་ཏཾ་མ་གྒཱ་ནུ་རཱུ་པཾ.
ཨ་པཱ་ཡཾ ག་ཙྪ་ནྟི ཨེ་ཏེ་ཧཱི་ཏི ཨ་པཱ་ཡ་ག་མ་ནཱི་ཡཱ. སེ་སཱཏི ན ཨ་པཱ་ཡ་ག་མ་ནཱི་ཡཱ. ཨོ་ལཱ༹་རི་ཀཱཏི ཏ་ཏི་ཡ་མ་གྒེ་ན པ་ཧཱ་ཏ་བྦཱ་ཝ་ཏྠཾ ཨུ་པཱ་དཱ་ཡ ཨོ་ལཱ༹་རི་ཀཱ. ཏེ་ནཱ་ཧ ‘‘སུ་ཁུ་མཱ ཏ་ཏི་ཡ་མ་གྒ་ཉཱ་ཎ་ཝ་ཛ྄ཛྷཱ’’ཏི. སུ་ཁུ་མཱ ཀཱ་མ་རཱ་ག་པ་ཊི་གྷཱ་ཏི ས་མྦ་ནྡྷོ. ཙ་ཏུ་ཏྠ་མ་གྒ་ཉཱ་ཎ་ཝ་ཛ྄ཛྷཱ ཨེ་ཝཱཏི ཨ་ཝ་དྷཱ་ར་ཎེ་ན པ་ཋ་མ་མ་གྒཱ་དི་ཝ་ཛ྄ཛྷ་ཏཾ ནི་ཝ་ཏྟེ་ཏི. ན ཧི རཱུ་པ་རཱ་གཱ་དཱི་ནཾ ཨ་པཱ་ཡ་གཱ་མི་ནི་ཡཱ་ཝ་ཏྠཱ་པི ཨ་ཏྠི, ཡ་ཏོ ཏེ པ་ཋ་མ་ཉཱ་ཎ་ཝ་ཛ྄ཛྷཱ་པི སི་ཡུ་ནྟི.
ཡ་ཏྠ ཡ་ཏྠ པ་ན ཨེ་ཝ-ས་དྡེ་ན ཨ་ཝ་དྷཱ་ར་ཎཾ ཨ་ཀ་ཏྭཱ ཡཾ ཡཾ དུ་ཏི་ཡ་ཉཱ་ཎ་ཝ་ཛ྄ཛྷ་ནྟི ཝཱ ཏ་ཏི་ཡ་ཉཱ་ཎ་ཝ་ཛ྄ཛྷ་ནྟི ཝཱ ཙ་ཏུ་ཏྠ་ཉཱ་ཎ་ཝ་ཛ྄ཛྷ་ནྟི ཝཱ ཝ་ཀྑ་ཏི, ཏ་ཏྠ ཏ་ཏྠ སོ སོ པུ་རི་མ་ཉཱ་ཎེ་ཧི ཧ་ཏཱ་པཱ་ཡ་ག་མ་ནཱི་ཡཱ་དི་བྷཱ་ཝོ་ཝ ཧུ་ཏྭཱ ཨུ་པ་རི་ཉཱ་ཎ་ཝ་ཛ྄ཛྷོ ཧོ་ཏཱི་ཏི ཝེ་དི་ཏ་བྦོ. ཏེ་ན ལོ་བྷ…པེ… ཙ་ཏུ་ཏྠ་ཉཱ་ཎ་ཝ་ཛ྄ཛྷཱ་ནཱིཏི ཨེ་ཏྠ ལོ་བྷཱ་ད་ཡོ ཧེ་ཊྛི་མ་མ་གྒ་ཝ་ཛ྄ཛྷཱ་པི ཧོ་ནྟེ་ཝ.
ཡ་སེཏི པ་རི་ཝཱ་རེ.
དུ་ཀྑེ སུ་ཁནྟི ས་ཉྙཱ་ཙི་ཏྟ་ཝི་པ་ལླཱ་སཱ་ཏི ས་མྦ་ནྡྷོ.
ཨ་ག་ཏི་ཡོ པ་ཋ་མ་མ་གྒ་ཉཱ་ཎ་ཝ་ཛ྄ཛྷཱཏི ཀི་ཉྩཱ་པི ཚ་ནྡཱ་ད་ཡོ ཏ་ཎྷཱ་དི་ས་བྷཱ་ཝཱ ཨུ་པ་རི་མ་གྒ་ཝ་ཛ྄ཛྷཱ, ཏ་ཐཱ་པི ཏ་མྨཱུ་ལ་ཀ་སྶ ཨ་ཀ་ཏྟ་བྦ་ཀ་ར་ཎ་སྶ, ཀ་ཏྟ་བྦཱ་ཀ་ར་ཎ་སྶ ཙ ཨ་པཱ་ཡ་ག་མ་ནཱི་ཡ་ཏཱ་ཡ པ་ཋ་མ་མ་གྒ་ཉཱ་ཎ་ཝ་ཛ྄ཛྷཱ.
ཀ་ཏཱ་ཀ་ཏ་ཀུ་ས་ལཱ་ཀུ་ས་ལ་ཝི་ས་ཡཾ ཡཾ ཝི་པྤ་ཊི་སཱ་ར་བྷཱུ་ཏཾ ཀུ་ཀྐུ་ཙྩཾ, ཏཾ ཨི་དྷ ཏ་ཏི་ཡ་ཉཱ་ཎ་ཝ་ཛ྄ཛྷཾ ཝུ་ཏྟཾ. ཡཾ པ་ན ‘‘ཀུ་ཀྐུ་ཙྩ་པ་ཀ་ཏ་ཏཱ་ཡ ཨཱ་པ་ཏྟིཾ ཨཱ་པ་ཛྫ་ཏཱི’’ཏི ཝུ་ཏྟཾ ཀུ་ཀྐུ་ཙྩཾ, ཏཾ ས་ནྡྷཱ་ཡ ‘‘ཀུ་ཀྐུ་ཙྩ་ཝི་ཙི་ཀི་ཙྪཱ སོ་ཏཱ་པ་ཏྟི་མ་གྒེ་ན པ་ཧཱི་ཡ་ནྟཱི’’ཏི (དྷ. ས. ཨ་ཊྛ. ༡༡༧༦) དྷ་མྨ་ས་ངྒ་ཎཱི་ཨ་ཊྛ་ཀ་ཐཱ་ཡཾ ཝུ་ཏྟཾ, ཏ་སྨཱ དྭི་ནྣཾ ཝ་ཙ་ནཱ་ནཾ ཨ་ཡཾ ཨ་དྷི་པྤཱ་ཡོ ཝེ་དི་ཏ་བྦོ. ཨ་ཉྙེ་སུ་པི ཨེ་དི་སེ་སུ ཋཱ་ནེ་སུ ཨ་དྷི་པྤཱ་ཡོ་ཝ པ་རི་ཡེ་སི་ཏ་བྦོ, ན ཝི་རོ་དྷ་ཏོ པ་ཙྩེ་ཏ་བྦཾ. ཨོ་ལཱ༹་རི་ཀཱ་ན་ཝ་སེ་ས་པྤ་ཧཱ་ནཾ ཝཱ ས་ནྡྷཱ་ཡ ཀུ་ཀྐུ་ཙྩ་སྶ པ་ཋ་མ་ཏ་ཏི་ཡ་ཉཱ་ཎ་ཝ་ཛ྄ཛྷ་ཏཱ ཝུ་ཏྟཱ. ཡཾ པ་ན ཨ་ར་ཧ་ཏོ ཨུ་པྤ་ཛྫ་མཱ་ནཾ ‘‘བྷ་ག་ཝ་ཏཱ པ་ཊི་ཀྑི་ཏྟཾ ཨ་ནུ་ཝ་སི་ཏྭཱ ཨ་ནུ་ཝ་སི་ཏྭཱ ཨཱ་ཝ་ས་ཐ་པི་ཎྜཾ བྷུ་ཉྫི་ཏུ་ནྟི ཀུ་ཀྐུ་ཙྩཱ་ཡ་ནྟོ ན པ་ཊི་གྒ་ཧེ་སཱི’’ཏི (པཱ་ཙི. ༢༠༤) ཨཱ་ག་ཏཾ ཀུ་ཀྐུ་ཙྩཾ, ན ཏཾ ནཱི་ཝ་ར་ཎཾ. ན ཧི ནཱི་ཝ་ར་ཎཾ ཨ་ར་ཧ་ཏོ ཨུ་པྤ་ཛྫ་ཏི, ནཱི་ཝ་ར་ཎ་པ་ཏི་རཱུ་པ་ཀཾ པ་ན ཀ་པྤ་ཏཱི་ཏི ཝཱི་མཾ་ས་ན་བྷཱུ་ཏཾ ཝི་ན་ཡ་ཀུ་ཀྐུ་ཙྩཾ ནཱ་མ, ཏཾ ཏ་ཐཱ་པ་ཝ་ཏྟ་ཙི་ཏྟུ་པྤཱ་དོ་ཝ.
ཀཱ་མ་རཱ་ག་པ་ཊི་གྷཱ་ནུ་ས་ཡཱ ཨ་ནུ་ས་ཧ་ག་ཏཱ ཏ་ཏི་ཡ་ཉཱ་ཎ་ཝ་ཛ྄ཛྷཱ, ཨོ་ལཱ༹་རི་ཀཱ་ནཾ པ་ན དུ་ཏི་ཡ་ཉཱ་ཎ་ཝ་ཛ྄ཛྷ་ཏཱ ཧེ་ཊྛཱ ཝུ་ཏྟ་ན་ཡཱ་ཝ.
ཨ་ཀུ་ས་ལ་ཙི་ཏྟུ་པྤཱ་ད-གྒ་ཧ་ཎེ་ན ཙེ་ཏྠ མ་ཀྑ་པ་ལཱ་ས་མཱ་ཡཱ་སཱ་ཋེ་ཡྻ་ཐ་མྦྷ་སཱ་ར་མྦྷཱ་དཱི་ནཾ ས་ངྒ་ཧོ ཀ་ཏོ་ཏི ད་ཊྛ་བྦཾ.
༡༣༧༦. ཏེ་ན ཏེ་ནཱཏི ཏེ་ན ཏེ་ན གྷཱ་ཏ་ཀེ་ན ས་དྡྷིཾ. ཀིཾ པ་ནེ་ཏཱ་ནི ཨེ་ཏེ དྷ་མྨེ གྷཱ་ཏེ་ནྟཱ་ནི ཨ་ཏཱི་ཏཱ་ནཱ་ག་ཏེ གྷཱ་ཏེ་ནྟི, ཨུ་དཱ་ཧུ པ་ཙྩུ་པྤ་ནྣེ་ཏི. ཀིཾ པ་ནེ་ཏྠ, ཡ་དི ཏཱ་ཝ ཨ་ཏཱི་ཏཱ་ནཱ་ག་ཏེ, ཨ་ཕ་ལོ ཝཱ་ཡཱ་མོ ཨཱ་པ་ཛྫ་ཏི. ཀ་སྨཱ? པ་ཧཱ་ཏ་བྦཱ་ནཾ ཏ་དཱ ན་ཏྠི་ཏཱ་ཡ. ཨ་ཐ པ་ཙྩུ་པྤ་ནྣེ, ཏ་ཐཱ་པི ཨ་ཕ་ལོ ཝཱ་ཡཱ་མེ་ན ས་དྡྷིཾ པ་ཧཱ་ཏ་བྦཱ་ནཾ ཨ་ཏྠི་ཏཱ་ཡ. ཨ་ཐཱ་པི ཀ་ཐ་ཉྩི པ་ཧཱ་ནཾ སི་ཡཱ, སཾ་ཀི་ལེ་སི་ཀཱ མ་གྒ་བྷཱ་ཝ་ནཱ ཨཱ་པ་ཛྫ་ཏི པ་ཧཱ་ཏ་བྦ་པྤ་ཧཱ་ཡ་ཀཱ་ནཾ ས་ཧཱ་ཝ་ཊྛཱ་ན་ཏོ? ས་ཙྩ་མེ་ཏཾ, ཡེ པ་ན མ་གྒེ་ན ཨ་ས་མུ་གྒྷཱ་ཊི་ཏ་ཏྟཱ ཀཱ་ར་ཎ་ལཱ་བྷེ ས་ཏི ཨ་ཝ་སྶཾ ཨུ་པྤ་ཛྫ་ནཱ་ར་ཧཱ ཀི་ལེ་སཱ, ཏེ ཨ་ཏྟ་ནོ ཨུ་པྤ་ཏྟི་ཡཱ ཨ་ནུ་པྤ་ཏྟི་དྷ་མྨ་ཏཾ ཨཱ་པཱ་དེ་ནྟཱ་ནི ཨེ་ཏཱ་ནི ཏེ ཨ་ནཱ་ག་ཏེ གྷཱ་ཏེ་ནྟི ནཱ་མ.
༡༣༧༧-༨༢. པ་རི་ཉྙཱ་དཱི་ནི ཀི་ཙྩཱ་ནཱིཏི པ་རི་ཉྙཱ་པ་ཧཱ་ན་ས་ཙྪི་ཀི་རི་ཡཱ་བྷཱ་ཝ་ནཱ་ཝ་སེ་ན ཙ་ཏྟཱ་རི ཀི་ཙྩཱ་ནི. ཝུ་ཏྟཱ་ནཱིཏི ‘‘དུ་ཀྑཾ པ་རི་ཉྙེ་ཡྻ’’ནྟི་ཨཱ་དི་ནཱ (སཾ. ནི. ༥.༡༠༩༩), ‘‘ཡོ, བྷི་ཀྑ་ཝེ, དུ་ཀྑཾ པ་སྶ་ཏཱི’’ཏི་ཨཱ་དི་ནཱ (སཾ. ནི. ༥.༡༡༠༠) ཙ ཝུ་ཏྟཱ་ནི. ས་ཙྩཱ་བྷི་ས་མ་ཡེཏི ཙ་ཏུ་ནྣཾ ཨ་རི་ཡ་ས་ཙྩཱ་ནཾ པ་ཊི་ཝི་ཛ྄ཛྷ་ན་ཀྑ་ཎེ.
ཡ་ཐཱ་ས་བྷཱ་ཝ་ཏོཏི ཨ་ཝི་པ་རཱི་ཏ་ས་བྷཱ་ཝེ་ན. ‘‘ཛཱ་ནི་ཏ་བྦཱ་ནཱི’’ཏི ཝ་ཏྭཱ ཀ་ཐཾ པ་ནེ་ཏཾ ཛཱ་ནི་ཏ་བྦཾ, ཀ་ཐཾ ནཱ་མ ཨེ་ཀེ་ཀ་སྶ ཉཱ་ཎ་སྶ ཨེ་ཀ་ཀྑ་ཎེ ཙ་ཏྟཱ་རི ཀི་ཙྩཱ་ནི ས་མྦྷ་ཝ་ནྟི. ན ཧི ཏཱ་དི་སཾ ཀི་ཉྩི ལོ་ཀེ དི་ཊྛཾ ཨ་ཏྠི, ན ཙ ཝ་ཙ་ནཾ ལ་བྦྷ་ཏཱི་ཏི ཙོ་ད་ནཾ མ་ན་སི ནི་དྷཱ་ཡ ཏེ་སཾ ཛཱ་ན་ན་ཝི་དྷིཾ ཨུ་པ་མཱ་ཝ་སེ་ན ཏཱ་ཝ ད་སྶེ་ཏུཾ ‘‘པ་དཱི་པོ ཧཱི’’ཏི་ཨཱ་དི ཝུ་ཏྟཾ. ཝི་དཾ་སེ་ཏཱིཏི ད་སྶེ་ཏི. པ་རི་ཡཱ་དི་ཡ་ཏཱིཏི ཁེ་པེ་ཏི.
༡༣༨༣-༤. པ་རི་ཉྙཱ་བྷི་ས་མ་ཡེ་ནཱཏི ཨ་ན་ཝ་སེ་ས་ཏོ པ་རི་ཙྪི་ཛྫ ཛཱ་ན་ན་ས་ངྑཱ་ཏེ་ན པ་ཊི་ཝི་ཛ྄ཛྷ་ནེ་ན. ཨ་བྷི་ས་མེ་ཏཱིཏི ཨ་ས་མྨོ་ཧ་ཝ་སེ་ན པ་ཊི་ཝི་ཛ྄ཛྷ་ཏི. པ་ཧཱ་ནཱ་བྷི་ས་མ་ཡེ་ནེ་ཝཱཏི ས་མུ་ཙྪེ་ད་པྤ་ཧཱ་ན་ས་ངྑཱ་ཏེ་ན པ་ཊི་ཝི་ཛ྄ཛྷ་ནེ་ན ཨ་ས་མྨོ་ཧ་ཏོ་ཝ ཨ་བྷི་ས་མེ་ཏི. བྷཱ་ཝ་ནཱ་ཝི་དྷི་ནཱཏི ས་ཧ་ཛཱ་ཏཱ་དི་པ་ཙྩ་ཡ་ཏཱ་ཝ་སེ་ན བྷཱ་ཝ་ནཱ་བྷི་ས་མ་ཡ་ཝི་དྷི་ནཱ. མ་གྒ་ཉཱ་ཎ་ཉྷི ས་མྨཱ་ས་ངྐ་པྤཱ་དི་ཝ་སེ་ན མ་གྒ་པུ་བྦ་བྷཱ་ག་བྷཱ་ཝ་ནཱ་ས་མྦྷཱུ་ཏེ་ན ཨ་རི་ཡ་མ་གྒ་བྷཱ་ཝ་ནཱ་ས་ངྑཱ་ཏེ་ན པ་ཊི་ཝི་ཛ྄ཛྷ་ནེ་ན ཨ་བྷི་ས་མེ་ཏཱི་ཏི ཨ་ཊྛ་ངྒི་ཀཾ མ་གྒཾ ཨ་ས་མྨོ་ཧ་ཏོ པ་ཊི་ཝི་ཛ྄ཛྷ་ཏི. ཏ་ཉྷི ས་མྤ་ཡུ་ཏྟ་དྷ་མྨེ་སུ ས་མྨོ་ཧཾ ཝི་དྡྷཾ་སེ་ནྟཾ ཨ་ཏྟ་ནི་པི ས་མྨོ་ཧཾ ཝི་དྡྷཾ་སེ་ཏི་ཡེ་ཝ. ནི་རོ་དྷནྟི ནི་བྦཱ་ནཾ. ས་ཙྪི་ཀ་རོ་ཏཱིཏི པ་ཙྩ་ཀྑ་ཀ་ར་ཎ་ཝ་སེ་ན པ་ཊི་ཝི་ཛ྄ཛྷ་ཏི. ‘‘ནི་རོ་དྷཾ ས་ཙྪི་ཀ་རོ་ཏཱི’’ཏི ནི་རོ་དྷ་ས་ཙྩ་མེ་ཀཾ ཨཱ་ར་མྨ་ཎ་པ་ཊི་ཝེ་དྷེ་ན ཙ་ཏྟཱ་རི་པི ས་ཙྩཱ་ནི ཨ་ས་མྨོ་ཧ་པ་ཊི་ཝེ་དྷེ་ན མ་གྒ་ཉཱ་ཎཾ པ་ཊི་ཝི་ཛ྄ཛྷ་ཏི.
ཨེ་ཝཾ ཡུ་ཏྟི་ཝ་སེ་ན ཝི་བྷཱ་ཝི་ཏཾ ཨེ་ཀ་པ་ཊི་ཝེ་དྷཾ ཨཱ་ག་མེ་ན་པི སཱ་དྷེ་ཏུཾ ‘‘ཝུ་ཏྟ་མྤི ཙེ་ཏ’’ནྟི་ཨཱ་དི ཝུ་ཏྟཾ. མ་གྒ་ས་མ་ངྒི་སྶ ཉཱ་ཎནྟི ཧི ‘‘ཡོ ནུ ཁོ, ཨཱ་ཝུ་སོ, དུ་ཀྑཾ པ་སྶ་ཏི, དུ་ཀྑ་ས་མུ་ད་ཡ་མྤི སོ པ་སྶ་ཏི, དུ་ཀྑ་ནི་རོ་དྷ་མྤི, དུ་ཀྑ་ནི་རོ་དྷ་གཱ་མི་ནི་པ་ཊི་པ་ད་མྤི སོ པ་སྶ་ཏཱི’’ཏི (སཾ. ནི. ༥.༡༡༠༠) ཨེ་ཀ་ས་ཙྩ་ད་སྶ་ན་ས་མ་ངྒི་ནོ ཨ་ཉྙ་ས་ཙྩ་ད་སྶ་ན་ས་མ་ངྒི་བྷཱ་ཝ་ཝི་ཙཱ་ར་ཎཱ་ཡཾ ཏ་མ་ཏྠཾ སཱ་དྷེ་ཏུཾ ཨཱ་ཡ་སྨ་ཏཱ ག་ཝ་མྤ་ཏི་ཏྠེ་རེ་ན ཝུ་ཏྟཾ. ཨ་ཉྙ་ཐཱ ཀ་མཱ་བྷི་ས་མ་ཡེ ས་ཏི པུ་རི་མ་དི་ཊྛ་སྶ པུ་ན ཨ་ད་སྶ་ན་ཏོ ས་མུ་ད་ཡཱ་དི་པ་སྶ་ཏོ དུ་ཀྑཱ་དི་ད་སྶ་ནཾ པུ་ན ཨ་ཝ་ཏྟ་བྦཾ སི་ཡཱ. ཨི་དཱ་ནི པ་ནེ་ཏྠ ཨུ་པ་མཱ་སཾ་ས་ནྡ་ནཾ ཀ་རོ་ནྟོ ཨཱ་ཧ ‘‘པ་དཱི་པོ’’ཏི་ཨཱ་དི. ནི་སྶ་ཡཱ་བྷཱ་ཝ་ཧེ་ཏུ་ཏཱ་ཡ དུ་ཀྑ་པ་རི་ཉྙཱ་ཡ ཝ་ཊྚི་ཛ྄ཛྷཱ་པ་ན་ས་དི་ས་ཏཱ, པ་ཊི་པ་ཀྑ་ཝི་དྡྷཾ་ས་ན་ཏཱ་ཡ ས་མུ་ད་ཡ་པྤ་ཧཱ་ན་སྶ ཨ་ནྡྷ་ཀཱ་ར་ཝི་ནཱ་ས་ན་ས་དི་ས་ཏཱ, ཉཱ་ཎཱ་ལོ་ཀ་པ་རི་བྲཱུ་ཧ་ན་ཏཱ་ཡ མ་གྒ་བྷཱ་ཝ་ནཱ་ཡ ཨཱ་ལོ་ཀ་ཝི་དཾ་ས་ན་ས་དི་ས་ཏཱ, ཏེ་ན ཏེ་ན མ་གྒེ་ན ཡ་ཐཱ ཡ་ཐཱ ནི་རོ་དྷ་སྶ ས་ཙྪི་ཀི་རི་ཡཱ, ཏ་ཐཱ ཏ་ཐཱ ཀི་ལེ་ས་སྣེ་ཧ་པ་རི་ཡཱ་དཱ་ནཾ ཧོ་ཏཱི་ཏི ནི་རོ་དྷ་ས་ཙྪི་ཀི་རི་ཡཱ་ཡ སྣེ་ཧ་པ་རི་ཡཱ་དཱ་ན་ས་དི་ས་ཏཱ ཀཱ་ར་ཎཱུ་པ་ཙཱ་རེ་ན ཝུ་ཏྟཱ.
༡༣༨༥-༦. ཨ་པ་རཱ་ཡ་པི ཨུ་པ་མཱ་ཡ ཏ་མ་ཏྠཾ ད་སྶེ་ནྟོ ཨཱ་ཧ ‘‘ཨུ་གྒ་ཙྪ་ནྟོ’’ཏི་ཨཱ་དི. ཨོ་བྷཱ་སེ་ཏཱིཏི པ་ཀཱ་སེ་ཏི. པ་ཊི་ཧ་ཉྙ་ཏཱིཏི པ་ཊི་པྤ་སྶ་མྦྷེ་ཏི. ཨེ་ཏྠཱ་པི ཡ་ཐཱ སཱུ་རི་ཡོ རཱུ་པ་ག་ཏཱ་ནི ཨོ་བྷཱ་སེ་ཏི, ཨེ་ཝཾ མ་གྒ་ཉཱ་ཎཾ དུ་ཀྑཾ པ་རི་ཛཱ་ནཱ་ཏི. ཡ་ཐཱ ཨ་ནྡྷ་ཀཱ་རཾ ཝི་ནཱ་སེ་ཏི, ཨེ་ཝཾ ས་མུ་ད་ཡཾ པ་ཛ་ཧ་ཏི. ཡ་ཐཱ ཨཱ་ལོ་ཀཾ ད་སྶེ་ཏི, ཨེ་ཝཾ ས་ཧ་ཛཱ་ཏཱ་དི་པ་ཙྩ་ཡ་ཏཱ་ཡ མ་གྒཾ བྷཱ་ཝེ་ཏི. ཡ་ཐཱ སཱི་ཏཾ པ་ཊི་པྤ་སྶ་མྦྷེ་ཏི, ཨེ་ཝཾ ས་བྦ་ཀི་ལེ་ས་ད་ར་ཐ་པ་རི་ལཱ༹་ཧ་པ་ཊི་པྤ་སྶ་དྡྷི་བྷཱུ་ཏཾ ནི་རོ་དྷཾ ས་ཙྪི་ཀ་རོ་ཏཱི་ཏི ཨུ་པ་མཱ་སཾ་ས་ནྡ་ནཾ ད་ཊྛ་བྦཾ.
༡༣༨༨. ཨ་པྤེ་ཏཱིཏི པ་པྤོ་ཏི. དུ་ཀྑ་པ་རི་ཉྙཱ་ཡ ས་ཀྐཱ་ཡ་ཏཱི་ར་ས་མ་ཏི་ཀྐ་མ་བྷཱ་ཝ་ཏོ ཨོ་རི་མ་ཏཱི་ར་པྤ་ཛ་ཧ་ན་ས་དི་ས་ཏཱ, མ་གྒ་བྷཱ་ཝ་ནཱ་ཡ ས་ཏྟ་ཏིཾ་ས་བོ་དྷི་པ་ཀྑི་ཡ་དྷ་མྨ་ཝ་ཧ་ན་ཏཱ་ཡ བྷ་ཎྜ་ཝ་ཧ་ན་ས་དི་ས་ཏཱ, ཨེ་ཏྟཱ་ཝ་ཏཱ པ་ཉྙཱ་བྷཱ་ཝ་ནཱ་ཡ ནཱ་ནཱ་ཀི་ལེ་ས་ཝི་དྡྷཾ་ས་ན་ཝ་ས་པྤ་ཝ་ཏྟོ ཨཱ་ནི་སཾ་སོ ད་སྶི་ཏོ ཧོ་ཏཱི་ཏི.
ཨ་རི་ཡ་ཕ་ལ་ས་མཱ་པ་ཏྟི་ནི་རོ་དྷ་ས་མཱ་པ་ཏྟི་ཡོ་པི པ་ན་སྶཱ ཨཱ་ནི་སཾ་སཱ་ཏི ད་ཊྛ་བྦཾ. ཏཱ པ་ན ས་ངྑེ་པ་ཏོ ཨེ་ཝཾ ད་ཊྛ་བྦཱ – ‘‘ཨ་རི་ཡ་ཕ་ལ་ས་མཱ་པ་ཏྟཱི’’ཏི ཧི ཙ་ཏུ་ནྣ་མྤི ཕ་ལ་ཊྛཱ་ནཾ ཨ་ཏྟ་ནོ ཨ་ཏྟ་ནོ ཨ་རི་ཡ་ཕ་ལ་སྶ དི་ཊྛ་དྷ་མྨ་སུ་ཁ་ཝི་ཧཱ་ར་ཏྠཾ ནི་རོ་དྷེ ཨ་པྤ་ནཱ. ཙ་ཏྟཱ་རོ་པི ཧི ཨ་རི་ཡ་པུ་གྒ་ལཱ ས་ཀཾ ས་ཀཾ ཕ་ལ་ས་མཱ་པ་ཏྟིཾ ས་མཱ་པ་ཛྫ་ནྟི. ཀེ་ཙི པ་ན ‘‘ཨ་ནཱ་གཱ་མི་ཨ་ར་ཧ་ནྟོ་ཝ ས་མཱ་པ་ཛྫ་ནྟི ས་མཱ་དྷི་སྨིཾ པ་རི་པཱུ་ར་ཀཱ་རི་ཏཱ་ཡཱ’’ཏི ཝ་ད་ནྟི, ཏཾ ཨ་ཀཱ་ར་ཎཾ ཨ་ཏྟ་ནཱ པ་ཊི་ལ་དྡྷ་ས་མཱ་པ་ཏྟི་ས་མཱ་པ་ཛྫ་ནེ ས་མཱ་དྷི་སྨིཾ པ་རི་པཱུ་ར་ཀཱ་རི་ཏཱ་ཡ ཀཱ་ཏ་བྦཱ་བྷཱ་ཝ་ཏོ. ས་བྦ་སོ ཨ་ས་མུ་ཙྪི་ནྣ་ཀི་ལེ་ས་སྶ ཧི པུ་ཐུ་ཛྫ་ན་སྶཱ་པི ཨ་ཏྟ་ནཱ པ་ཊི་ལ་དྡྷ་ལོ་ཀི་ཡ་ས་མཱ་པ་ཏྟི་ས་མཱ་པ་ཛྫ་ནཾ ལ་བྦྷ་ཏི, ཀི་མ་ངྒཾ པ་ན ས་མུ་ཙྪི་ནྣེ་ཀ་ཙྩ་ཀི་ལེ་སཱ་ནཾ ཨ་རི་ཡཱ་ནཾ. ཨུ་པ་རི་མཱ པ་ན ཧེ་ཊྛི་མཾ པུ་བྦེ པ་ཊི་ལ་དྡྷ་མྤི ན ས་མཱ་པ་ཛྫ་ནྟི པུ་གྒ་ལ་ནྟ་ར་བྷཱ་ཝཾ ཨུ་པ་ག་ཏ་ཏྟཱ. ས་མུ་གྒྷཱ་ཊི་ཏ་ཀ་མྨ་ཀི་ལེ་ས་ནི་རོ་དྷ་ནེ་ན ཧི པུ་ཐུ་ཛྫ་ནེ་ཧི ཝི་ཡ སོ་ཏཱ་པ་ནྣ་སྶ, སོ་ཏཱ་པ་ནྣཱ་དཱི་ཧི ས་ཀ་དཱ་གཱ་མི་ཨཱ་དཱི་ནཾ པུ་གྒ་ལ་ནྟ་ར་བྷཱ་ཝཱུ་པ་ག་མ་ནཾ ཨ་ཏྠི, ཨ་ན་ནྟ་ར་ཕ་ལ་ཏྟཱ ཙ ལོ་ཀུ་ཏྟ་ར་ཀུ་ས་ལཱ་ནཾ ཧེ་ཊྛི་མ་ཏོ ཨུ་པ་རི་མོ བྷ་ཝ་ནྟ་ར་ག་ཏོ ཝི་ཡ ཧོ་ཏཱི་ཏི ཏ་སྶ ཏ་སྶ ཨ་རི་ཡ་སྶ ཏཾ ཏཾ ཕ་ལཾ བྷ་ཝ་ངྒ་ས་དི་སཾ ཧོ་ཏི, ཏ་སྨཱ པུ་གྒ་ལ་ནྟ་ར་བྷཱ་ཝཱུ་པ་ག་མ་ནེ་ན པ་ཊི་པྤ་སྶ་དྡྷ་ཏྟཱ ན་ཏྠི ཨུ་པ་རི་མ་སྶ ཧེ་ཊྛི་མ་ཕ་ལ་ས་མཱ་པ་ཏྟི་ཡཱ ས་མཱ་པ་ཛྫ་ནཾ, ཧེ་ཊྛི་མོ པ་ན ཨུ་པ་རི་མཾ ན ས་མཱ་པ་ཛྫ་ཏི ཨ་ན་དྷི་ག་ཏ་ཏྟཱ་ཏི ཙ་ཏྟཱ་རོ་པི པུ་གྒ་ལཱ ས་ཀ་ས་ཀ་ཕ་ལ་མེ་ཝ ས་མཱ་པ་ཛྫ་ནྟི. ཏཾ པ་ན ས་མཱ་པ་ཛྫི་ཏུ་ཀཱ་མེ་ན ཨ་རི་ཡ་སཱ་ཝ་ཀེ་ན ར་ཧོ་ག་ཏེ་ན པ་ཊི་ས་ལླཱི་ནེ་ན ཨུ་ད་ཡ་བྦ་ཡཱ་དི་ཝ་སེ་ན ས་ངྑཱ་རཱ ཝི་པ་སྶི་ཏ་བྦཱ. ཏ་སྶ པ་ཝ་ཏྟཱ་ནུ་པུ་བྦ་ཝི་པ་སྶ་ན་སྶ ས་ངྑཱ་རཱ་ར་མྨ་ཎ་གོ་ཏྲ་བྷུ་ཉཱ་ཎཱ་ན་ནྟ་རཾ ཕ་ལ་ས་མཱ་པ་ཏྟི་ཝ་སེ་ན ནི་རོ་དྷེ ཙི་ཏྟཾ ཨ་པྤེ་ཏི. ཕ་ལ་ས་མཱ་པ་ཏྟི་ནི་ནྣ་ཙི་ཏྟ་ཏཱ་ཡ ཙེ་ཏྠ སེ་ཁ་སྶ ཕ་ལ་མེ་ཝ ཨུ་པྤ་ཛྫ་ཏི, ན མ་གྒོ. ཨ་ཉྙོ ཨེ་ཝ ཧི ཝི་པ་སྶ་ནཱ་ཙཱ་རོ ཨ་རི་ཡ་མ་གྒཱ་ཝ་ཧོ, ཨ་ཉྙོ ཕ་ལ་ས་མཱ་པ་ཏྟི་ཨཱ་ཝ་ཧོ.
ཏ་ཐཱ ཧི ཨ་རི་ཡ་མ་གྒ་ཝཱི་ཐི་ཡཾ ཨ་ནུ་ལོ་མ་ཉཱ་ཎཱ་ནི ཨ་ནི་བྦི་དྡྷ་པུ་བྦཱ་ནཾ ཐཱུ་ལ་ཐཱུ་ལ་ལོ་བྷ་ཀྑ་ནྡྷཱ་དཱི་ནཾ སཱ་ཏི་ས་ཡཾ པ་དཱ་ལ་ནེ་ན ལོ་ཀི་ཡ་ཉཱ་ཎེ་སུ ཨུ་ཀྐཾ་ས་པཱ་ར་མི་པྤ་ཏྟཱ་ནི མ་གྒཱ་ནུ་ཀཱུ་ལཱ་ནི ཧུ་ཏྭཱ ཨུ་པྤ་ཛྫ་ནྟི, ཕ་ལ་ས་མཱ་པ་ཏྟི་ཝཱི་ཐི་ཡཾ པ་ན ཏཱ་ནི ཏེ་ན ཏེ་ན མ་གྒེ་ན ཏེ་སཾ ཏེ་སཾ ཀི་ལེ་སཱ་ནཾ ས་མུ་ཙྪི་ནྣ་ཏྟཱ ཀི་ལེ་ས་ཝི་ཀྑ་མྦྷ་ནེ ནི་རུ་སྶུ་ཀྐཱ་ནི ཀེ་ཝ་ལཾ ཨ་རི་ཡཱ་ནཾ ཕ་ལ་ས་མཱ་པ་ཏྟི་སུ་ཁ་ས་མ་ངྒི་བྷཱ་ཝ་སྶ པ་རི་ཀ་མྨ་པྤ་ཏྟཱ་ནི ཧུ་ཏྭཱ ཨུ་པྤ་ཛྫ་ནྟཱི་ཏི ན ཏེ་སཾ ཀུ་ཏོ་ཙི ཝུ་ཊྛཱ་ན་ས་མྦྷ་ཝོ. ཡ་ཏོ ནེ་སཾ པ་ཙྪི་མོ ས་ངྑཱ་ར་ནི་མི་ཏྟ་ཏོ ཝུ་ཊྛ་ཧི་ཏྭཱ མ་གྒ་སྶ ཨ་ན་ནྟ་ར་པ་ཙྩ་ཡོ བྷ་ཝེ་ཡྻ, ཏེ་ནེ་ཝ ཙ ཕ་ལ་ས་མཱ་པ་ཏྟི་ཡཱ ཨ་ན་ནྟ་ར་པ་ཙྩ་ཡ་བྷཱུ་ཏཾ ཉཱ་ཎཾ ས་ངྑཱ་རཱ་ར་མྨ་ཎ་མེ་ཝ ཧོ་ཏི, ན ནི་བྦཱ་ནཱ་ར་མྨ་ཎ་ནྟི ཝེ་དི་ཏ་བྦཾ. པུ་བྦཱ་བྷི་ས་ངྑཱ་ར་ཝ་སེ་ན ཙ་སྶཱ པ་བ་ནྡྷ་ཝ་སེ་ན པ་ཝ་ཏྟི་པ་རི་ཙྪི་ནྣ་ཀཱ་ལཱ་པ་ག་མེ བྷ་ཝ་ངྒ་ཝ་སེ་ན ཏ་ཏོ ཝུ་ཊྛཱ་ན་ཉྩ ཝེ་དི་ཏ་བྦཾ.
ནི་རོ་དྷ་ས་མཱ་པ་ཏྟི པ་ན ཏ་ཏི་ཡ་ཙ་ཏུ་ཏྠ་ཕ་ལ་ཊྛཱ་ནཾ ཨ་ནུ་པུ་བྦ་ནི་རོ་དྷ་ཝ་སེ་ན ཙི་ཏྟ་ཙེ་ཏ་སི་ཀཱ་ནཾ དྷ་མྨཱ་ནཾ ཨ་པྤ་ཝ་ཏྟི. ཨ་ནཱ་གཱ་མི་ཨ་ར་ཧ་ནྟོ་ཡེ་ཝ ཧི ཀཱ་མ་ཙྪ་ནྡཱ་དི་ས་མུ་ཙྪི་ནྡ་ནེ་ན ས་མཱ་དྷི་སྨིཾ པ་རི་པཱུ་ར་ཀཱ་རི་ཏཱ་ཡ ས་མ་ཐ་ཕ་ལ་ས་མ་ནྣཱ་ག་ཏ་ཏྟཱ ནི་རོ་དྷཾ ས་མཱ་པ་ཛྫ་ནྟི. ཏ་ཐཱ ཧེ་ཏཾ ས་མ་ཐ་ཝི་པ་སྶ་ནཱ་ནཾ ཡུ་ག་ན་ནྡྷ་བྷཱ་ཝ་པྤ་ཝ་ཏྟ་ན་ཝ་སེ་ན དྭཱི་ཧི བ་ལེ་ཧི ས་མ་ནྣཱ་ག་ཏ་སྶེ་ཝ ས་མྦྷ་ཝ་ཏི, ཏ་སྨཱ ཏཾ ས་མཱ་པ་ཛྫི་ཏུ་ཀཱ་མེ་ན ཨ་ནཱ་གཱ་མི་ནཱ, ཁཱི་ཎཱ་ས་ཝེ་ན ཝཱ ཨ་ཊྛ་ས་མཱ་པ་ཏྟི་ལཱ་བྷི་ནཱ ར་ཧོ་ག་ཏེ་ན པ་ཊི་ས་ལླཱི་ནེ་ན པ་ཋ་མ་ཛ྄ཛྷཱ་ནཾ ས་མཱ་པ་ཛྫི་ཏྭཱ ཝུ་ཊྛཱ་ཡ ཏ་ཏྠ ས་ངྑཱ་རཱ ཨ་ནི་ཙྩ་ཏོ དུ་ཀྑ་ཏོ ཨ་ན་ཏྟ་ཏོ ཝི་པ་སྶི་ཏ་བྦཱ, ཏ་ཏོ དུ་ཏི་ཡཾ ཏ་ཏི་ཡཾ ཙ་ཏུ་ཏྠཾ ཨཱ་ཀཱ་སཱ་ན་ཉྩཱ་ཡ་ཏ་ནཾ ཝི་ཉྙཱ་ཎ་ཉྩཱ་ཡ་ཏ་ནཾ ས་མཱ་པ་ཛྫི་ཏྭཱ ཝུ་ཊྛཱ་ཡ ཏ་ཐེ་ཝ ཏ་ཏྠ ས་ངྑཱ་རཱ ས་མྨ་སི་ཏ་བྦཱ, ཨ་ཐ ཨཱ་ཀི་ཉྩ་ཉྙཱ་ཡ་ཏ་ནཾ ས་མཱ་པ་ཛྫི་ཏྭཱ ཝུ་ཊྛཱ་ཡ ནཱ་ནཱ་བ་དྡྷཱ་ཝི་ཀོ་པ་ནཾ ས་ངྒྷ་པ་ཊི་མཱ་ན་ནཾ ས་ཏྠུ་པ་ཀྐོ་ས་ནཾ ཨ་དྡྷཱ་ན་པ་རི་ཙྪེ་དོ་ཏི ཙ་ཏུ་བྦི་དྷཾ པུ་བྦ་ཀི་ཙྩཾ ཀཱ་ཏ་བྦཾ.
ཏ་ཏྠ ས་རཱི་ར་ཏོ ཝི་སཾ་ཡུ་ཏྟཱ མ་ཉྩ་པཱི་ཋཱ་ད་ཡོ ས་ཏྟཱ་ཧ་བྦྷ་ནྟ་རེ ཡ་ཐཱ ན ན་སྶ་ནྟི, ཏ་ཐཱ ཨ་དྷི་ཊྛཱ་ནཾ ནཱ་ནཱ་བ་དྡྷཱ་ཝི་ཀོ་པ་ནཾ. ས་རཱི་ར་སཾ་ཡུ་ཏྟེ ཝི་སུཾ ཨ་དྷི་ཊྛཱ་ན་ཀི་ཙྩཾ ན་ཏྠི. ས་ངྒྷོ པ་ན ཉ་ཏྟི་ཀ་མྨཱ་དཱི་སུ ཀི་ཉྩི་དེ་ཝ ཀ་མྨཾ ཀ་ཏྟུ་ཀཱ་མོ ‘‘ཡཱ་ཝ མཾ ན པ་ཀྐོ་ས་ཏི, ཏཱ་ཝ་དེ་ཝ ཝུ་ཊྛ་ཧི་སྶཱ་མཱི’’ཏི པུ་བྦཱ་བྷོ་ག་ཀ་ར་ཎཾ ས་ངྒྷ་པ་ཊི་མཱ་ན་ནཾ. ས་ཏྠཱ ཙ ‘‘སི་ཀྑཱ་པ་ད་པ་ཉྙཱ་པ་ནཱ་དཱི་སུ ཡཱ་ཝ མཾ ན པ་ཀྐོ་ས་ཏི, ཏཱ་ཝ་དེ་ཝ ཝུ་ཊྛ་ཧི་སྶཱ་མཱི’’ཏི པུ་བྦཱ་བྷོ་ག་ཀ་ར་ཎཾ ས་ཏྠུ་པ་ཀྐོ་ས་ནཾ. ས་ཏྟཱ་ཧ་བྦྷ་ནྟ་རེ ཨ་ཏྟ་ནོ ཨཱ་ཡུ་ས་ངྑཱ་ར་སྶ པ་ཝ་ཏྟ་ན་ས་མ་ཏྠ་ཏཱ་ཝ་ལོ་ཀ་ནཾ ཨ་དྡྷཱ་ན་པ་རི་ཙྪེ་དོ. ཨེ་ཝཾ ཀ་ཏ་པུ་བྦ་ཀི་ཙྩེ་ན ནེ་ཝ་ས་ཉྙཱ་ནཱ་ས་ཉྙཱ་ཡ་ཏ་ནཾ ས་མཱ་པ་ཛྫི་ཏ་བྦཾ. ཨ་ཐེ་ཀཾ ཝཱ དྭེ ཝཱ ཙི་ཏྟ་ཝཱ་རེ ཨ་ཏི་ཀྐ་མི་ཏྭཱ ཨ་ཙི་ཏྟ་ཀོ ཧོ་ཏི, ནི་རོ་དྷཾ ཕུ་ས་ཏི, ཏ་ཏོ ཡ་ཐཱ་པ་རི་ཙྪེ་དཾ ཏ་ཏི་ཡ་ཙ་ཏུ་ཏྠ་ཕ་ལཱ་ནཾ ཨ་ཉྙ་ཏ་རེ་ན ནི་རོ་དྷཱ ཝུ་ཊྛ་ཧི་སྶ་ཏཱི་ཏི. ཨེ་ཝ་མ་ཡཾ དུ་ཝི་དྷཱ ས་མཱ་པ་ཏྟི ལོ་ཀུ་ཏྟ་ར་པ་ཉྙཱ་ཡ ཨཱ་ནི་སཾ་སོ.
༡༣༩༢-༤. ས་དེ་ཝ་ཀ་ལོ་ཀ་ཏོ ཨུ་ཏྟི་ཎྞེ་ན, ཨུ་ཏྟ་རི་ཏ་རེ་ན ཝཱ་ཏི ལོ་ཀུ་ཏྟ་རེ་ན ས་མྨཱ་ས་མྦུ་དྡྷེ་ན. པ་ཉྙཱ་ཡ བྷཱ་ཝ་ན་ནྟི ས་མྦ་ནྡྷོ. ཧི་ཏ་བྷཱ་ཝ་ནནྟི ཨི་དྷ་ལོ་ཀ་པ་ར་ལོ་ཀ་ཧི་ཏ་ཝི་བྷཱ་ཝ་ནཾ ཨི་མཾ པ་ཉྙཱ་བྷཱ་ཝ་ནཾ. སུ་ཁ་སཾ་ཧི་ཏནྟི སི་ནི་དྡྷ་ཙྪཱ་ཡུ་ད་ཀ་ཝ་ནྟ་ཏཱ་དི་ནཱ སུ་ཁ་ས་ཧི་ཏཾ. ཧི་ཏནྟི ཡོ་ག་ཀ་མྨ་སྶ ཧི་ཏཾ. ཨུ་ཏྟ་མནྟི ཨུ་གྒ་ཏ་ཏ་མཾ, ཨ་ཙྩུ་གྒ་ཏཾ བ་ལ་ཝ་ནྟ་མྤཱི་ཏི ཨ་དྷི་པྤཱ་ཡོ. ཨ་ཝི་གྒ་ཧ་ཀ་མྤ་དནྟི ཝི་གྒ་ཧ་ཉྩ ཀ་མྤ་ཉྩ ན དེ་ཏཱི་ཏི ཨ་ཝི་གྒ་ཧ་ཀ་མྤ་ད་ནྟི ཨ་ཏྠོ.
ཨི་ཏི ཨ་བྷི་དྷ་མྨ་ཏྠ་ཝི་ཀཱ་སི་ནི་ཡཱ ནཱ་མ
ཨ་བྷི་དྷ་མྨཱ་ཝ་ཏཱ་ར་སཾ་ཝ་ཎྞ་ནཱ་ཡ
ཀི་ལེ་ས་པྤ་ཧཱ་ན་ཀ་ཐཱ་ཝ་ཎྞ་ནཱ ནི་ཊྛི་ཏཱ.