༢༤. ཙ་ཏུ་ཝཱི་ས་ཏི་མོ པ་རི་ཙྪེ་དོ
པ་ཙྩ་ཡ་ནི་དྡེ་ས་ཝ་ཎྞ་ནཱ
༡༣༩༥. ཨི་དཱ་ནི ནེ་སཾ པ་ཙྩ་ཡ་ཝི་དྷིཾ ད་སྶེ་ཏུཾ ‘‘ཡེ་ས’’ནྟི་ཨཱ་དི ཨཱ་ར་དྡྷཾ.
པ་ཊི་ཙྩ ཨེ་ནཾ ཕ་ལ་མེ་ཏི པ་ཝ་ཏྟ་ཏི, ཏི་ཊྛ་ཏི, ཨུ་པྤ་ཛྫ་ཏི ཝཱ་ཏི པ་ཙྩ་ཡོ, ཧི་ནོ་ཏི པ་ཏི་ཊྛཱ་ཏི ཨེ་ཏྠཱ་ཏི ཧེ་ཏུ, ཨ་ནེ་ཀ་ཏྠ་ཏྟཱ དྷཱ་ཏུ་ས་དྡཱ་ནཾ ཧི-ས་དྡོ མཱུ་ལ-ས་དྡོ ཝི་ཡ པ་ཏི་ཊྛ་ཏྠོ ཝེ་དི་ཏ་བྦོ, ཧི་ནོ་ཏི ཝཱ ཨེ་ཏེ་ན ཀ་མྨ་ནི་དཱ་ན་བྷཱུ་ཏེ་ན ཨུ་དྡྷཾ ཨོ་ཛཾ ཨ་ཏི་ཧ་ར་ནྟེ་ན མཱུ་ལེ་ན ཝི་ཡ པཱ་ད་པོ ཏ་པྤ་ཙྩ་ཡཾ ཕ་ལཾ ག་ཙྪ་ཏི ཝི་རུ་ལ༹ྷིཾ ཨཱ་པ་ཛྫ་ཏཱི་ཏི ཧེ་ཏུ, ཧེ་ཏུ ཙ སོ མཱུ་ལ་ཊྛེ་ན, པ་ཙྩ་ཡོ ཙ ཨུ་པ་ཀཱ་ར་ཀ་ཊྛེ་ནཱ་ཏི ཧེ་ཏུ་པ་ཙྩ་ཡོ, ཧེ་ཏུ ཧུ་ཏྭཱ པ་ཙྩ་ཡོ ཧེ་ཏུ་བྷཱ་ཝེ་ན པ་ཙྩ་ཡོ་ཏི ཨ་ཏྠོ.
ཨེ་ཝཾ ཨཱ་ར་མྨ་ཎ་པ་ཙྩ་ཡཱ་དཱི་སུ ད་ཊྛ་བྦཾ. སྭཱ་ཡཾ པ་ཊི་ས་ནྡྷི་ཡཾ ཀ་མྨ་ས་མུ་ཊྛཱ་ནཱ་ནཾ, པ་ཝ་ཏྟི་ཡཾ ཙི་ཏྟ་ས་མུ་ཊྛཱ་ནཱ་ནཾ རཱུ་པཱ་ནཾ, ཨུ་བྷ་ཡ་ཏྠ ས་ཧ་ཛཱ་ཏ་ནཱ་མ་དྷ་མྨཱ་ན་ཉྩ པ་ཙྩ་ཡོ. ས་བྦ་ལོ་ཀི་ཡ་ལོ་ཀུ་ཏྟ་རནྟི ཨི་མི་ནཱ པ་ཉྙ་ཏྟི་ཡཱ་པི ལོ་ཀེ ཝི་དི་ཏ་བྷཱ་ཝེ་ན ལོ་ཀི་ཡ་པ་དེ་ན ས་ངྒ་ཧི་ཏ་ཏྟཱ རཱུ་པཱ་དི་བྷེ་དེ་སུ ཚ་བྦི་དྷེ་སུ ས་ངྑ་ཏཱ་ས་ངྑ་ཏ་པ་ཉྙ་ཏྟི་དྷ་མྨེ་སུ ན ཀོ་ཙི དྷ་མྨོ ཨཱ་ར་མྨ་ཎ་པ་ཙྩ་ཡོ ན ཧོ་ཏཱི་ཏི ད་སྶེ་ཏི. ཏེ་ནེ་ཝ ‘‘ཡཾ ཡཾ དྷ་མྨཾ ཨཱ་ར་བྦྷཱ’’ཏི ཨ་ནི་ཡ་ཏོ ཀ་ཏོ་ཏི. ན་ནུ ཙ ‘‘ཡཾ ཡཾ དྷ་མྨ’’ནྟི (པ་ཊྛཱ. ༡.༡.༢-༣) ཝུ་ཏྟ་ཏྟཱ པ་ཉྙ་ཏྟི་ཡཱ ག་ཧ་ཎཾ ན ཧོ་ཏཱི་ཏི? ནཱ་ཡཾ དོ་སོ དྷ་མྨ་ས་དྡ་སྶ ཉེ་ཡྻ་ཝ་ཙ་ན་ཏྟཱ. ཨཱ་ར་བྦྷཱཏི ཨཱ་ལ་མྦི་ཏྭཱ, ག་ཧེ་ཏྭཱ་ཏི ཨ་ཏྠོ. ཨུ་པྤ་ཛྫ་ནྟཱིཏི ཨི་དཾ ནི་ད་སྶ་ན་མ་ཏྟཾ. ཏེ པ་ན ཏཾ ཨཱ་ར་བྦྷ ཨུ་པྤ་ཛྫ་ནྟི ཙེ་ཝ ཏི་ཊྛ་ནྟི ཙ. ཡ་ཐཱ ཧི དུ་བྦ་ལོ པུ་རི་སོ ད་ཎྜཾ ཝཱ ར་ཛྫུཾ ཝཱ ཨཱ་ལ་མྦི་ཏྭཱ ཨུ་ཊྛ་ཧ་ཏི ཙེ་ཝ ཏི་ཊྛ་ཏི ཙ, ཨེ་ཝཾ ཙི་ཏྟ་ཙེ་ཏ་སི་ཀཱ དྷ་མྨཱ རཱུ་པཱ་དི་ཨཱ་ར་མྨ་ཎཾ ཨཱ་ལ་མྦི་ཏྭཱ ཨུ་པྤ་ཛྫ་ནྟི ཙེ་ཝ ཏི་ཊྛ་ནྟི ཙཱ་ཏི.
ཛེ་ཊྛ་ཀ་ཊྛེ་ན ཨུ་པ་ཀཱ་ར་ཀོ དྷ་མྨོ ཨ་དྷི་པ་ཏི་པ་ཙྩ་ཡོ. ཛེ་ཊྛ་ཀ་ཊྛེ་ནཱཏི ཙ པ་མུ་ཁ་བྷཱ་ཝེ་ན. ཨ་ཏྟཱ་དྷཱི་ནཱ་ན་ཉྷི པ་ཏི་བྷཱུ་ཏོ དྷ་མྨོ ཨ་དྷི་པ་ཏཱི་ཏི སོ ཏེ་སཾ པ་མུ་ཁ་བྷཱ་ཝེ་ན པ་ཝ་ཏྟ་ཏི. ‘‘ཚ་ནྡཱ་དྷི་པ་ཏི ཚ་ནྡ་ས་མྤ་ཡུ་ཏྟ་ཀཱ་ནཾ དྷ་མྨཱ་ནཾ ཏཾ་ས་མུ་ཊྛཱ་ནཱ་ན་ཉྩ རཱུ་པཱ་ནཾ ཨ་དྷི་པ་ཏི་པ་ཙྩ་ཡེ་ན པ་ཙྩ་ཡོ’’ཏི་ཨཱ་དི་ཝ་ཙ་ན་ཏོ ཚ་ནྡཱ་ད་ཡོ ཙ་ཏྟཱ་རོ དྷ་མྨཱ ས་ཧ་ཛཱ་ཏ་ནཱ་མ་རཱུ་པཱ་ནཾ ས་ཧ་ཛཱ་ཏཱ་དྷི་པ་ཏཱི་ཏི ད་སྶེ་ནྟོ ཨཱ་ཧ ‘‘ཏ་ཏྠ ས་ཧ་ཛཱ་ཏཱ་དྷི་པ་ཏཱི’’ཏི་ཨཱ་དི. ‘‘ཚ་ནྡ་ཝ་ཏོ ཀིཾ ནཱ་མ ཀ་མྨཾ ན སི་ཛ྄ཛྷ་ཏཱི’’ཏི་ཨཱ་དི་ཀཾ པུ་རི་མཱ་བྷི་ས་ངྑཱ་རཱུ་པ་ནི་སྶ་ཡཾ ལ་བྷི་ཏྭཱ ཨུ་པྤ་ཛྫ་མཱ་ནེ ཙི་ཏྟུ་པྤཱ་དེ ཚ་ནྡཱ་ད་ཡོ དྷུ་ར་བྷཱུ་ཏཱ ཛེ་ཊྛ་ཀ་བྷཱུ་ཏཱ ས་མྤ་ཡུ་ཏྟ་དྷ་མྨེ, ཏཾ་ས་མུ་ཊྛཱ་ན་རཱུ་པེ ཙ སཱ་དྷ་ཡ་མཱ་ནཱ ཝ་སེ ཝ་ཏྟ་ཡ་མཱ་ནཱ ཧུ་ཏྭཱ པ་ཝ་ཏྟ་ནྟི, ཏེ ཙ ཏེ་སཾ ཝ་སེ་ན ཝ་ཏྟ་ནྟི ཧཱི་ནཱ་དི་བྷཱ་ཝེ་ན ཏ་ད་ནུ་ཝ་ཏྟ་ན་ཏོ. ཏེ་ན ཏེ ཨ་དྷི་པ་ཏི་པ་ཙྩ་ཡཱ ཧོ་ནྟི, ནོ ཙ ཁོ ཨེ་ཀ་ཏོ. ཡ་དཱ ཧི ཚ་ནྡཾ དྷུ་རཾ ཚ་ནྡཾ ཛེ་ཊྛ་ཀཾ ཀ་ཏྭཱ ཙི་ཏྟཾ པ་ཝ་ཏྟ་ཏི, ཏ་དཱ ཚ་ནྡོ་ཝ ཨ་དྷི་པ་ཏི, ན ཨི་ཏ་རེ. ཨེ་ས ན་ཡོ སེ་སེ་སུ་པི. ཨ་དྷི་པ་ཏི་བྷཱ་ཝོ་པི ཧི ནེ་སཾ ཨ་ཏྟ་ནོ པ་ཝ་ཏྟི་ནི་ཝཱ་ར་ཀེ ཨ་བྷི་བྷུ་ཡྻ པ་ཝ་ཏྟ་ན་ཏོ ཧོ་ཏི. ཨ་ཝ་སེ་སནྟི ཡ་ཐཱ་ཝུ་ཏྟཱ་ནཾ ཏེ་སཾ ག་རུ་ཀཱ་ཏ་བྦ་ཏཱ་བྷཱ་ཝ་ཏོ, ག་རུ་ཀ་ཏ་སྶེ་ཝ ཙ ཨཱ་ར་མྨ་ཎཱ་དྷི་པ་ཏི་བྷཱ་ཝ་ཝ་ཙ་ན་ཏོ. ཝུ་ཏྟ་ཉྷེ་ཏཾ ‘‘ཡཾ ཡཾ དྷ་མྨཾ ག་རུཾ ཀ་ཏྭཱ ཡེ ཡེ དྷ་མྨཱ ཨུ་པྤ་ཛྫ་ནྟི ཙི་ཏྟ་ཙེ་ཏ་སི་ཀཱ དྷ་མྨཱ, ཏེ ཏེ དྷ་མྨཱ ཏེ་སཾ ཏེ་སཾ དྷ་མྨཱ་ནཾ ཨ་དྷི་པ་ཏི་པ་ཙྩ་ཡེ་ན པ་ཙྩ་ཡོ’’ཏི (པ་ཊྛཱ. ༡.༡.༣). ཏ་ཏྠ ག་རུཾ ཀ་ཏྭཱཏི ག་རུ་ཀཱ་ར་ཙི་ཏྟཱི་ཀཱ་ར་ཝ་སེ་ན ཝཱ ཨ་སྶཱ་ད་ན་ཝ་སེ་ན ཝཱ ག་རུཾ བྷཱ་རི་ཀཾ ལ་དྡྷ་བྦཾ ཨ་ན་ཝ་ཉྙཱ་ཏཾ ཀ་ཏྭཱ. ག་རུ་ཀཱ་ཏ་བྦ་ཉྷི ཨཱ་ར་མྨ་ཎཾ ཏ་ནྣི་ནྣ་པོ་ཎ་པ་བྦྷཱ་རཱ་ནཾ ཨ་སྶཱ་ད་ན་པ་ཙྩ་ཝེ་ཀྑ་ཎ་མ་གྒ་ཕ་ལཱ་ནཾ ཨ་ཏྟ་ནོ ཝ་སེ ཝ་ཏྟ་ཡ་མཱ་ནཾ ཝི་ཡ པ་ཙྩ་ཡོ ཧོ་ཏི, ཏ་སྨཱ ཨ་ཡཾ ཨ་ཏྟཱ་དྷཱི་ནཱ་ནཾ པ་ཏི་བྷཱ་ཝེ་ན ཨུ་པ་ཀཱ་ར་ཀ་ཏྟཱ ཨ་དྷི་པ་ཏི་པ་ཙྩ་ཡོ ད་ཊྛ་བྦོ.
ཨ་ནྟ་ར་ཡ་ཏཱི་ཏི ཨ་ནྟ་རཾ, བྱ་ཝ་དྷཱ་ཡ་ཀ་ནྟི ཨ་ཏྠོ, ནཱ་སྶ ཨ་ནྟ་རཾ ཝི་ཛྫ་ཏཱི་ཏི ཨ་ན་ནྟ་རོ, སོ་ཡེ་ཝ པ་ཙྩ་ཡོ་ཏི ཨ་ན་ནྟ་ར་པ་ཙྩ་ཡོ, ཨ་ན་ནྟ་ར་བྷཱ་ཝེ་ན ཨུ་པ་ཀཱ་ར་ཀོ དྷ་མྨོ་ཏི ཨ་དྷི་པྤཱ་ཡོ. ཨ་ན་ནྟ་ར་ནི་རུ་དྡྷཱཏི ཨ་ཏྟ་ནོ ནི་རོ་དྷཱ་ན་ནྟ་རཾ ཨ་ནུ་རཱུ་པ་ཙི་ཏྟུ་པྤཱ་ད་སྶ ཨུ་པྤ་ཏྟི་པ་ཙྩ་ཡ་བྷཱ་ཝེ་ན ཏ་སྶ ཨུ་པྤ་ཏྟི་ཡཱ པུ་རི་མ་བྷཱ་གེ ཨ་ན་ནྟ་རཾ ཧུ་ཏྭཱ ནི་རུ་དྡྷཱ, རཱུ་པ་དྷ་མྨཱ པ་ན ཨ་ན་ནྟ་ར་པ་ཙྩ་ཡཱ ན་ཏྠི.
ས་མ་ན་ནྟ་ར་བྷཱ་ཝེ་ན ཨུ་པ་ཀཱ་ར་ཀོ དྷ་མྨོ ས་མ་ན་ནྟ་ར་པ་ཙྩ་ཡོ, ཏ་ཐཱ ས་མ་ན་ནྟ་ར་པ་ཙྩ་ཡོ་པཱི་ཏི ཋ་པེ་ཏྭཱ ཨུ་པ་ས་གྒ་མ་ཏྟཾ ན ཨེ་ཏྠ ཀོ་ཙི ཝི་སེ་སོ. ཡོ ཧི ཨ་ན་ནྟ་ར་པ་ཙྩ་ཡོ, སོ་ཝ ས་མ་ན་ནྟ་ར་པ་ཙྩ་ཡོ་ཏི. པུ་རི་མ་པ་ཙྪི་མཱ་ན་ཉྷི ཨ་ན་ནྟ་རུ་པྤཱ་ད་བྷཱ་ཝ་ཏོ ནི་ར་ནྟ་རུ་པྤཱ་ད་ན་ས་མ་ཏྠ་ཏཱ ཨ་ན་ནྟ་ར་པ་ཙྩ་ཡ་ཏཱ, རཱུ་པ་ཀ་ལཱ་པཱ་ནཾ ཝི་ཡ ས་ཎྛཱ་ནཱ་བྷཱ་ཝ་ཏོ པ་ཙྩ་ཡ་པ་ཙྩ་ཡུ་པྤ་ནྣཱ་ནཾ ས་ཧ་ཊྛཱ་ནཱ་བྷཱ་ཝ་ཏོ ཙ ‘‘ཨི་ད་མི་ཏོ ཨུ་དྡྷཾ ཧེ་ཊྛཱ ཏི་རི་ཡ’’ནྟི ཝི་བྷཱ་གཱ་བྷཱ་ཝཱ ཨ་ཏྟ་ནོ ཨེ་ཀ་ཏྟ་མི་ཝ ཨུ་པ་ནེ་ཏྭཱ སུ་ཊྛུ ཨ་ན་ནྟ་ར་བྷཱ་ཝེ་ན ཨུ་པྤཱ་དེ་ཏུཾ ས་མ་ཏྠ་ཏཱ ས་མ་ན་ནྟ་ར་པ་ཙྩ་ཡ་ཏཱ, ཏ་སྨཱ དྷ་མྨ་ཏོ ཨ་ཝི་སེ་སེ་པི ཝི་ནེ་ཡྻ་ཝ་སེ་ན བྱ་ཉྫ་ན་ཏྠ་མ་ཏྟ་ཏོ ཝི་སེ་སཾ ག་ཧེ་ཏྭཱ ཏེ་སཾ ཝི་སུཾ དེ་ས་ནཱ ཀ་ཏཱ. ཡ་མྤི ‘‘ཨ་ཏྠཱ་ན་ནྟ་ར་ཏཱ་ཡ ཨ་ན་ནྟ་ར་པ་ཙྩ་ཡོ, ཀཱ་ལཱ་ན་ནྟ་ར་ཏཱ་ཡ ས་མ་ན་ནྟ་ར་པ་ཙྩ་ཡོ’’ཏི ཨཱ་ཙ་རི་ཡཱ་ནཾ མ་ཏཾ, ཏཾ ‘‘ནི་རོ་དྷཱ ཝུ་ཊྛ་ཧ་ནྟ་སྶ ནེ་ཝ་ས་ཉྙཱ་ནཱ་ས་ཉྙཱ་ཡ་ཏ་ནཾ ཀུ་ས་ལཾ ཕ་ལ་ས་མཱ་པ་ཏྟི་ཡཱ ས་མ་ན་ནྟ་ར་པ་ཙྩ་ཡེ་ན པ་ཙྩ་ཡོ’’ཏི་ཨཱ་དཱི་ཧི (པ་ཊྛཱ. ༡.༡.༤༡༨) ཝི་རུ་ཛ྄ཛྷ་ཏཱི་ཏི་ཨཱ་དི་ནཱ པ་ཊི་ཀྑི་ཏྟཾ.
ཨུ་པྤ་ཛྫ་མཱ་ནོ་ཝ ས་ཧུ་པྤཱ་ད་ན་ཝ་སེ་ན ཨུ་པ་ཀཱ་ར་ཀོ དྷ་མྨོ ས་ཧ་ཛཱ་ཏ་པ་ཙྩ་ཡོ པ་ཀཱ་ས་སྶ པ་དཱི་པོ ཝི་ཡ, སོ པ་ནཱ་ཡཾ ‘‘ཙི་ཏྟ་ཙེ་ཏ་སི་ཀཱ དྷ་མྨཱ ཨ་ཉྙ་མ་ཉྙཾ, ས་ཧ་ཛཱ་ཏ་རཱུ་པཱ་ན་ཉྩ, མ་ཧཱ་བྷཱུ་ཏཱ ཨ་ཉྙ་མ་ཉྙཾ, ཨུ་པཱ་དཱ་རཱུ་པཱ་ན་ཉྩ, པ་ཊི་ས་ནྡྷི་ཀྑ་ཎེ ཝ་ཏྠུ་ཝི་པཱ་ཀཱ ཨ་ཉྙ་མ་ཉྙ’’ནྟི ཙ ཏི་ཝི་དྷོ ཧོ་ཏི, ཏ་སྨཱ ཝུ་ཏྟཾ ‘‘ཙི་ཏྟ་ཙེ་ཏ་སི་ཀཱ’’ཏི་ཨཱ་དི. ཡ་མྤི ཧི པཱ་ལི༹་ཡཾ ཨ་རཱུ་པ་ཀྑ་ནྡྷཱ་དི་ཝ་སེ་ན་སྶ ཚ་བྦི་དྷ་ཏཾ ཝུ་ཏྟཾ, ཏ་མྤི ཨེ་ཏྠེ་ཝ ས་ངྒ་ཧི་ཏཾ. ཡོ པ་ནེ་ཏྠ སེ་ས་རཱུ་པ་དྷ་མྨཱ་ནཾ, ཨུ་བྷ་ཡ་ཏྠ ཝ་ཏྠུ་ནོ ཙ པ་ཝ་ཏྟི་ཡཱ ཨ་རཱུ་པ་དྷ་མྨཱ་ནཾ, ཨུ་པཱ་དཱ་རཱུ་པཱ་ན་ཉྩ ཨ་ཉྙ་མ་ཉྙཾ མ་ཧཱ་བྷཱུ་ཏཱ་ནཾ ས་ཧ་ཛཱ་ཏ་པ་ཙྩ་ཡ་ཏྟཱ་བྷཱ་ཝོ, སོ པ་ཙྩ་ཡ་བྷཱ་ཝ་སཱ་མ་ཏྠི་ཡ་ཝི་སེ་སཱ་ཡོ་ག་ཏོ་ཏི ད་ཊྛ་བྦཾ.
ཨ་ཉྙ་མ་ཉྙཾ ཨུ་པྤཱ་ད་ནུ་པ་ཏྠ་མྦྷ་ན་བྷཱ་ཝེ་ན ཨ་ཏྟ་ནོ ཨུ་པ་ཀཱ་ར་ཀ་སྶ ཨུ་པ་ཀཱ་ར་ཀོ དྷ་མྨོ ཨ་ཉྙ་མ་ཉྙ་པ་ཙྩ་ཡོ. ཨ་ཉྙ་མ་ཉྙུ་པ་ཏྠ་མྦྷ་ཀ་ཏི་ད་ཎྜ་ཀཾ ཝི་ཡ ཨུ་པ་ཀཱ་ར་ཀ་ཏཱ ཙ ཨ་ཉྙ་མ་ཉྙ་ཏཱ་ཝ་སེ་ནེ་ཝ ད་ཊྛ་བྦཱ, ན ས་ཧ་ཛཱ་ཏཱ་དི་ཝ་སེ་ན. ས་ཧ་ཛཱ་ཏཱ་དི་པ་ཙྩ་ཡོ ཧོ་ནྟོ་ཡེ་ཝ ཧི ཀོ་ཙི ཀ་སྶ་ཙི ཨ་ཉྙ་མ་ཉྙ་པ་ཙྩ་ཡོ ན ཧོ་ཏི ཙི་ཏྟ་ཙེ་ཏ་སི་ཀཱ་ནཾ ཙི་ཏྟ་ཛ་རཱུ་པེ ས་ཏི, མ་ཧཱ་བྷཱུ་ཏཱ་ནཾ ཨུ་པཱ་དཱ་རཱུ་པེ ས་ཏི ཨ་ཉྙ་མ་ཉྙ་པ་ཙྩ་ཡ་ཏྟཱ་བྷཱ་ཝ་ཏོ. ཡ་ཐཱ་ཧ ‘‘ཙ་ཏྟཱ་རོ ཁ་ནྡྷཱ ཨ་རཱུ་པི་ནོ ཨ་ཉྙ་མ་ཉྙ་པ་ཙྩ་ཡེ་ན པ་ཙྩ་ཡོ, ཙ་ཏྟཱ་རོ མ་ཧཱ་བྷཱུ་ཏཱ…པེ… ཨོ་ཀྐ་ནྟི་ཀྑ་ཎེ ནཱ་མ་རཱུ་པཾ ཨ་ཉྙ་མ་ཉྙ་པ་ཙྩ་ཡེ་ན པ་ཙྩ་ཡོ’’ཏི (པ་ཊྛཱ. ༡.༡.༧). ཨཱ་ཙ་རི་ཡེ་ན པ་ན པ་ཙྩ་ཡུ་པྤ་ནྣ་དྷ་མྨེ ཨ་པ་རཱ་མ་སི་ཏྭཱ ཝུ་ཙྩ་མཱ་ན་ཏྟཱ ཨ་ཝི་སེ་སེ་ན ཝུ་ཏྟཾ ‘‘ཏ་ཐཱ ཨ་ཉྙ་མ་ཉྙ་པ་ཙྩ་ཡོ’’ཏི.
ཏ་རུ་ཨཱ་དཱི་ནཾ པ་ཐ་ཝཱི ཝི་ཡ ཨ་དྷི་ཊྛཱ་ནཱ་ཀཱ་རེ་ན, ཙི་ཏྟ་ཀ་མྨཱ་དཱི་ནཾ པ་ཊཱ་ད་ཡོ ཝི་ཡ ཙ ནི་སྶ་ཡཱ་ཀཱ་རེ་ན ཨུ་པ་ཀཱ་ར་ཀོ དྷ་མྨོ ནི་སྶ་ཡ་པ་ཙྩ་ཡོ. ཝ་ཏྠུ་རཱུ་པཱ་ནཱིཏི ས་ཏྟ་ནྣཾ ཝི་ཉྙཱ་ཎ་དྷཱ་ཏཱུ་ནཾ ཨ་དྷི་ཊྛཱ་ནཱ་ཀཱ་རེ་ན ནི་སྶ་ཡ་པ་ཙྩ་ཡ་བྷཱུ་ཏཱ་ནི ཝ་ཏྠུ་རཱུ་པཱ་ནི. མ་ཧཱ་བྷཱུ་ཏཱ ཙི་ཏྟ་ཙེ་ཏ་སི་ཀཱ ཙཱཏི ཨ་ཉྙ་མ་ཉྙཾ, ཨུ་པཱ་དཱ་རཱུ་པཱ་ན་ཉྩ ཏ་ཐེ་ཝ ནི་སྶ་ཡ་བྷཱུ་ཏཱ་ནི མ་ཧཱ་བྷཱུ་ཏཱ་ནི ཨ་ཉྙ་མ་ཉྙཾ, ས་ཧ་ཛཱ་ཏ་རཱུ་པཱ་ན་ཉྩ ནི་སྶ་ཡཱ་ཀཱ་རེ་ན པ་ཙྩ་ཡཱ་ནི ཙི་ཏྟ་ཙེ་ཏ་སི་ཀཱ་ནི, ཏ་ད་དྷཱི་ན་ཝུ་ཏྟི་ཏཱ་ཡ ཨ་ཏྟ་ནོ ཕ་ལེ་ན ནི་སྶི་ཏོ ན པ་ཊི་ཀྑི་ཏྟོ་ཏི ནི་སྶ་ཡོ.
ཡ་ཐཱ པ་ན བྷུ་སོ ཨཱ་ཡཱ་སོ ཨུ་པཱ་ཡཱ་སོ, ཨེ་ཝཾ བྷུ་སོ ནི་སྶ་ཡོ ཨུ་པ་ནི་སྶ་ཡོ, བ་ལ་ཝ་ཀཱ་ར་ཎ་ནྟི ཨ་ཏྠོ, ཏ་སྨཱ བ་ལ་ཝ་ཀཱ་ར་ཎ་བྷཱ་ཝེ་ན ཨུ་པ་ཀཱ་ར་ཀོ དྷ་མྨོ ཨུ་པ་ནི་སྶ་ཡ་པ་ཙྩ་ཡོ་ཏི ཝེ་དི་ཏ་བྦོ. སོ ཨཱ་ར་མྨ་ཎཱུ་པ་ནི་སྶ་ཡོ ཨ་ན་ནྟ་རཱུ་པ་ནི་སྶ་ཡོ པ་ཀ་ཏཱུ་པ་ནི་སྶ་ཡོ་ཏི ཏི་ཝི་དྷོ་ཏི ཨཱ་ཧ ‘‘ཨཱ་ར་མྨ་ཎཱ’’ཏི་ཨཱ་དི. ཏ་ཏྠ –
‘‘དཱ་ནཾ ད་ཏྭཱ སཱི་ལཾ ས་མཱ་དི་ཡི་ཏྭཱ ཨུ་པོ་ས་ཐ་ཀ་མྨཾ ཀ་ཏྭཱ ཏཾ ག་རུཾ ཀ་ཏྭཱ པ་ཙྩ་ཝེ་ཀྑ་ཏི, པུ་བྦེ སུ་ཙི་ཎྞཱ་ནི ག་རུཾ ཀ་ཏྭཱ པ་ཙྩ་ཝེ་ཀྑ་ཏི, ཛྷཱ་ནཱ ཝུ་ཊྛ་ཧི་ཏྭཱ ཛྷཱ་ནཾ ག་རུཾ ཀ་ཏྭཱ པ་ཙྩ་ཝེ་ཀྑ་ཏི, སེ་ཁཱ གོ་ཏྲ་བྷུཾ ག་རུཾ ཀ་ཏྭཱ པ་ཙྩ་ཝེ་ཀྑ་ནྟི, ཝོ་དཱ་ནཾ ག་རུཾ ཀ་ཏྭཱ པ་ཙྩ་ཝེ་ཀྑ་ནྟི, སེ་ཁཱ མ་གྒཱ ཝུ་ཊྛ་ཧི་ཏྭཱ མ་གྒཾ ག་རུཾ ཀ་ཏྭཱ པ་ཙྩ་ཝེ་ཀྑ་ནྟཱི’’ཏི (པ་ཊྛཱ. ༡.༡.༤༢༣) –
ཨེ་ཝ་མཱ་དི་ནཱ ན་ཡེ་ན ཨཱ་ར་མྨ་ཎཱུ་པ་ནི་སྶ་ཡོ ཏཱ་ཝ ཨཱ་ར་མྨ་ཎཱ་དྷི་པ་ཏི་ནཱ ས་དྡྷིཾ ནཱ་ན་ཏྟཾ ཨ་ཀ་ཏྭཱ་ཝ ཝི་བྷ་ཏྟོ. ཏེ་ནཱ་ཧ ‘‘ཨཱ་ར་མྨ་ཎཱུ་པ་ནི་སྶ་ཡོ ཨཱ་ར་མྨ་ཎཱ་དྷི་པ་ཏི་ཡེ་ཝཱ’’ཏི. ཀི་ཉྩཱ་པི ནཱ་ན་ཏྟཾ ཨ་ཀ་ཏྭཱ ཝི་བྷ་ཏྟོ, ཏ་ཐཱ་པི ཨ་ཡཾ ཏེ་སཾ ཝི་སེ་སོ – ཡཾ ཨཱ་ར་མྨ་ཎཾ ག་རུཾ ཀ་ཏྭཱ ཙི་ཏྟ་ཙེ་ཏ་སི་ཀཱ ཨུ་པྤ་ཛྫ་ནྟི, ཏཾ ནི་ཡ་མ་ཏོ ཏེ་སཾ ཨཱ་ར་མྨ་ཎེ་སུ བ་ལ་ཝཱ་ར་མྨ་ཎཾ ཧོ་ཏི. ཨི་ཏི ག་རུ་ཀཱ་ཏ་བྦ་མ་ཏྟ་ཊྛེ་ན ཨཱ་ར་མྨ་ཎཱ་དྷི་པ་ཏི, བ་ལ་ཝ་ཀཱ་ར་ཎ་ཊྛེ་ན ཨཱ་ར་མྨ་ཎཱུ་པ་ནི་སྶ་ཡོ་ཏི ཙ ཨེ་ཝ་མེ་ཏེ་སཾ ནཱ་ན་ཏྟཾ ཝེ་དི་ཏ་བྦཾ.
ཨ་ན་ནྟ་རཱུ་པ་ནི་སྶ་ཡོ་པི ‘‘པུ་རི་མཱ པུ་རི་མཱ ཀུ་ས་ལཱ ཁ་ནྡྷཱ པ་ཙྪི་མཱ་ནཾ པ་ཙྪི་མཱ་ནཾ ཀུ་ས་ལཱ་ནཾ ཁ་ནྡྷཱ་ནཾ ཨུ་པ་ནི་སྶ་ཡ་པ་ཙྩ་ཡེ་ན པ་ཙྩ་ཡོ’’ཏི་ཨཱ་དི་ནཱ (པ་ཊྛཱ. ༡.༡.༤༢༣) ན་ཡེ་ན ཨ་ན་ནྟ་ར་པ་ཙྩ་ཡེ་ན ས་དྡྷིཾ ནཱ་ན་ཏྟཾ ཨ་ཀ་ཏྭཱ་ཝ ཝི་བྷ་ཏྟོ་ཏི ཨཱ་ཧ ‘‘ཨ་ན་ནྟ་རཱུ་པ་ནི་སྶ་ཡོ པ་ན ཨ་ན་ནྟ་ར་པ་ཙྩ་ཡོ་ཝཱ’’ཏི. ཨེ་ཝཾ ས་ནྟེ་པི ཨ་ཏྟ་ནོ ཨ་ན་ནྟ་རཱ ཨ་ནུ་རཱུ་པ་ཙི་ཏྟུ་པྤཱ་ད་ཝ་སེ་ན ཨ་ན་ནྟ་ར་པ་ཙྩ་ཡོ, བ་ལ་ཝ་ཀཱ་ར་ཎ་ཝ་སེ་ན ཨ་ན་ནྟ་རཱུ་པ་ནི་སྶ་ཡ་པ་ཙྩ་ཡོ་ཏི ཨེ་ཝ་མེ་ཏེ་སཾ ནཱ་ན་ཏྟཾ ཝེ་དི་ཏ་བྦཾ.
པ་ཀ་ཏི་ཡཱ ཨེ་ཝ པ་ཙྩ་ཡ་ནྟ་ར་ར་ཧི་ཏེ་ན ཨ་ཏྟ་ནོ ས་བྷཱ་ཝེ་ནེ་ཝ ཨུ་པ་ནི་སྶ་ཡོ པ་ཀ་ཏཱུ་པ་ནི་སྶ་ཡོ, ཨཱ་ར་མྨ་ཎ་ཨ་ན་ནྟ་རེ་ཧི ཨ་མི་སྶོ་ཝ པུ་ཐ་གེ་ཝ ཀོ་ཙི ཨུ་པ་ནི་སྶ་ཡོ་ཏི ཝུ་ཏྟཾ ཧོ་ཏི. ཨ་ཐ ཝཱ པ་ཀ་ཏོ ཨུ་པ་ནི་སྶ་ཡོ པ་ཀ་ཏཱུ་པ་ནི་སྶ་ཡོ. པ་ཀ་ཏོཏི ཙེ་ཏྠ པ-ཀཱ་རོ ཨུ་པ་ས་གྒོ, སོ ཨ་ཏྟ་ནོ ཕ་ལ་སྶ ཨུ་པྤཱ་ད་ན་ས་མ་ཏྠ་བྷཱ་ཝེ་ན ས་ནྟཱ་ནེ ནི་པྥཱ་དི་ཏ་བྷཱ་ཝཾ, ཨུ་པ་སེ་ཝི་ཏ་བྷཱ་ཝ་ཉྩ དཱི་པེ་ཏི, ཏ་སྨཱ ཨ་ཏྟ་ནོ ས་ནྟཱ་ནེ ནི་པྥ་ནྣོ ཝཱ ཀཱ་ཡི་ཀ་སུ་ཁ་དུ་ཀྑ་ས་དྡྷཱ་སཱི་ལཱ་དི ཨུ་པ་སེ་ཝི་ཏོ ཝཱ ཨུ་ཏུ་བྷོ་ཛ་ནཱ་དི པ་ཀ་ཏཱུ་པ་ནི་སྶ་ཡོ་ཏི ཨ་ཏྠོ. ཨུ་པ་སེ་ཝ་ན་ཉྩེ་ཏྠ དུ་ཝི་དྷཾ ཨུ་པ་ཡོ་གོ་པ་སེ་ཝ་ནཾ ཨཱ་ར་མྨ་ཎཱུ་པ་སེ་ཝ་ན་ཉྩ. ཨེ་ཝ་ཉྩ ཀ་ཏྭཱ ཨ་ནཱ་ག་ཏ་སྶཱ་པི ཨུ་པ་ནི་སྶ་ཡ་པ་ཙྩ་ཡ་ཏཱ ལ་དྡྷཱ ཧོ་ཏི. ཀཱ་ཡི་ཀ་སུ་ཁ…པེ… ཡོ ཙཱཏི ཨེ་ཏྠ ཀཱ་ཡི་ཀ་སུ་ཁ་དུ་ཀྑཱ་ནི རཱ་ག་ས་དྡྷཱ་དཱི་ནཾ, ཨུ་ཏུ་བྷོ་ཛ་ནཱ་ད་ཡོ ཙི་ཏྟ་ས་མཱ་དྷཱ་ནཱ་དཱི་ནཾ, ས་དྡྷཱ་སཱི་ལཱ་ད་ཡོ ས་དྡྷཱ་སཱི་ལཱ་དཱི་ན་ཉྩ ཨུ་པ་ནི་སྶ་ཡཱ ཧོ་ནྟི. ཨཱ་དི-ས་དྡེ་ན ཡཾ ཡཾ ཨུ་པ་ནི་སྶཱ་ཡ ཡ་སྶ ཡ་སྶ ས་མྦྷ་ཝོ, ཏཾ ཏཾ ཏ་སྶ ཏ་སྶ ཨུ་པ་ནི་སྶ་ཡ་པ་ཙྩ་ཡ་བྷཱུ་ཏཾ ས་ངྒ་ཎྷཱ་ཏི. པ་ཙྩ་ཡ་མ་ཧཱ་པ་དེ་སོ ཧེ་ས, ཡ་དི་དཾ ཨུ་པ་ནི་སྶ་ཡ་པ་ཙྩ་ཡོ་ཏི.
པ་ཙྩ་ཡུ་པྤ་ནྣ་ཏོ པ་ཋ་མ་ཏ་རཾ ཨུ་པྤ་ཛྫི་ཏྭཱ ཝ་ཏྟ་མཱ་ན་བྷཱ་ཝེ་ན ཨུ་པ་ཀཱ་ར་ཀོ དྷ་མྨོ པུ་རེ་ཛཱ་ཏ་པ་ཙྩ་ཡོ. སོ ཙ རཱུ་པ་དྷ་མྨོ་ཝ ས་མཱ་ནོ ཨ་རཱུ་པ་དྷ་མྨ་སྶེ་ཝ ཧོ་ཏི. ཏེ་ནཱ་ཧ ‘‘ཝ་ཏྠུ་པུ་རེ་ཛཱ་ཏོ ནཱ་མཱ’’ཏི་ཨཱ་དི. ཡ་ཐཱ ཙེ་ཏྠ ‘‘ཝ་ཏྠུ་རཱུ་པཱ་ནཱི’’ཏི ཧ་ད་ཡ་ཝ་ཏྠུ་ནོ་པི ག་ཧ་ཎཾ, ཨེ་ཝཾ ‘‘རཱུ་པཱ་དཱི་ནཱི’’ཏི་ཨཱ་དི-གྒ་ཧ་ཎེ་ན དྷ་མྨཱ་ར་མྨ་ཎ་སྶཱ་པི ག་ཧ་ཎཾ ད་ཊྛ་བྦཾ. ན་ནུ ཙ པ་ཉྩཱ་ར་མྨ་ཎཱ་ནེ་ཝ ཨཱ་ར་མྨ་ཎ་པུ་རེ་ཛཱ་ཏ་བྷཱ་ཝེ་ན ཨཱ་ག་ཏཱ་ནཱི་ཏི? ས་ཙྩཾ ཨཱ་ག་ཏཱ་ནི, པ་ཉྷཱ་ཝཱ་རེ པ་ན ‘‘སེ་ཁཱ ཝཱ པུ་ཐུ་ཛྫ་ནཱ ཝཱ ཙ་ཀྑུཾ ཨ་ནི་ཙྩ་ཏོ དུ་ཀྑ་ཏོ ཨ་ན་ཏྟ་ཏོ ཝི་པ་སྶ་ནྟཱི’’ཏི་ཨཱ་དི་ནཱ (པ་ཊྛཱ. ༡.༡.༤༢༤) ཨ་ཝི་སེ་སེ་ན པ་ཙྩུ་པྤ་ནྣ་ཙ་ཀྑཱ་དཱི་ན་མྤི ག་ཧི་ཏ་ཏྟཱ དྷ་མྨཱ་ར་མྨ་ཎ་སྶ ཨཱ་ར་མྨ་ཎ་པུ་རེ་ཛཱ་ཏ་བྷཱ་ཝོ ན ས་ཀྐཱ པ་ཊི་བཱ་ཧི་ཏུཾ. ཨ་ཏྠ་ཏོ་པི ཧེ་ཏཾ སི་དྡྷཾ ‘‘ཡཾ ཡཾ པ་ཙྩུ་པྤ་ནྣཾ ཨཱ་ར་མྨ་ཎཾ ག་ཧེ་ཏྭཱ མ་ནོ་དྭཱ་རེ ཙི་ཏྟཾ པ་ཝ་ཏྟ་ཏི, ཏཾ ཏ་སྶ ཨཱ་ར་མྨ་ཎ་པུ་རེ་ཛཱ་ཏཾ ཧོ་ཏཱི’’ཏི. ཨེ་ཏྠ ཙ ནི་སྶ་ཡཱ་ར་མྨ་ཎཱ་ཀཱ་རཱ་དཱི་ཧི ཝི་སི་ཊྛཱ པུ་རེ་ཛཱ་ཏ་བྷཱ་ཝེ་ན ཝི་ནཱ ཨུ་པ་ཀཱ་ར་བྷཱ་ཝཾ ཨ་ག་ཙྪ་ནྟཱ་ནཾ ཝ་ཏྠཱ་ར་མྨ་ཎཱ་ནཾ པུ་རེ་ཛཱ་ཏཱ་ཀཱ་རེ་ན ཨུ་པ་ཀཱ་ར་ཀ་ཏཱ པུ་རེ་ཛཱ་ཏ་པ་ཙྩ་ཡ་ཏཱ་ཏི ཨ་ཡ་མ་སྶ ནི་སྶ་ཡཱ་ར་མྨ་ཎ་པ་ཙྩ་ཡ་ཏཱ་ཧི ཝི་སེ་སོ.
གི་ཛ྄ཛྷ་པོ་ཏ་ཀ་ས་རཱི་རཱ་ནཾ ཨཱ་ཧཱ་རཱ་སཱ ཙེ་ཏ་ནཱ ཝི་ཡ པུ་རེ་ཛཱ་ཏཱ་ནཾ རཱུ་པཱ་ནཾ ཨུ་པ་ཏྠ་མྦྷ་ཀ་བྷཱ་ཝེ་ན ཨུ་པ་ཀཱ་ར་ཀོ དྷ་མྨོ པ་ཙྪཱ་ཛཱ་ཏ་པ་ཙྩ་ཡོ. མ་ནོ་ས་ཉྩེ་ཏ་ནཱ་ཧཱ་ར་ཝ་སེ་ན ཧི པ་ཙྪཱ་ཛཱ་ཏ་ཙི་ཏྟ་ཙེ་ཏ་སི་ཀེ་ཧི ཝི་ནཱ ས་ནྟཱ་ན་ཊྛི་ཏི་ཧེ་ཏུ་བྷཱ་ཝཾ ཨ་ག་ཙྪ་ནྟཱ་ནཾ པ་ཙྪཱ་ཛཱ་ཏཱ་ཀཱ་རེ་ན ཙི་ཏྟ་ཙེ་ཏ་སི་ཀཱ་ནཾ ཨུ་པ་ཀཱ་ར་ཀ་ཏཱ ཝི་པྤ་ཡུ་ཏྟཱ་ཀཱ་རཱ་དཱི་ཧི ཝི་སི་ཊྛཱ པ་ཙྪཱ་ཛཱ་ཏ་པ་ཙྩ་ཡ་ཏཱ་ཏི ཨེ་ཝཾ ས་བྦ་པ་ཙྩ་ཡཱ་ནཾ པ་ཙྩ་ཡ་ནྟ་རཱ་ཀཱ་ར་ཝི་སི་ཊྛཱ ཨུ་པ་ཀཱ་ར་ཀ་ཏཱ ད་ཊྛ་བྦཱ. སོ པ་ན ‘‘པ་ཙྪཱ་ཛཱ་ཏཱ ཙི་ཏྟ་ཙེ་ཏ་སི་ཀཱ དྷ་མྨཱ པུ་རེ་ཛཱ་ཏ་སྶ ཨི་མ་སྶ ཀཱ་ཡ་སྶ པ་ཙྪཱ་ཛཱ་ཏ་པ་ཙྩ་ཡེ་ན པ་ཙྩ་ཡོ’’ཏི (པ་ཊྛཱ. ༡.༡.༡༡) ཨཱ་ག་ཏ་ཏྟཱ ཨེ་ཀ་ཝི་དྷོ་ཏི ཨཱ་ཧ ‘‘ཙི་ཏྟ་ཙེ་ཏ་སི་ཀཱ་ཝཱ’’ཏི.
པུ་རི་མ་པུ་རི་མ་པ་རི་ཙི་ཏ་ག་ནྠོ ཝི་ཡ ཨུ་ཏྟ་རུ་ཏྟ་ར་སྶ ག་ནྠ་སྶ ཀུ་ས་ལཱ་དི་བྷཱ་ཝེ་ན ཨ་ཏྟ་ས་དི་ས་པ་གུ་ཎ་བ་ལ་ཝ་བྷཱ་ཝ་ཝི་སི་ཊྛཾ ཨ་ཏྟ་ས་ཛཱ་ཏི་ཡ་ཏཱ་གཱ་ཧ་ཀཾ ཨཱ་སེ་ཝ་ནཾ, ཏེ་ན པ་ཙྩ་ཡཱ ས་ཛཱ་ཏི་ཡ་དྷ་མྨཱ་ཝ ཨཱ་སེ་ཝ་ན་པ་ཙྩ་ཡོ. བྷི་ནྣ་ཛཱ་ཏི་ཀཱ ཧི བྷི་ནྣ་ཛཱ་ཏི་ཀཱ་ནཾ ཨཱ་སེ་ཝ་ན་གུ་ཎེ་ན པ་གུ་ཎ་བ་ལ་ཝ་བྷཱ་ཝ་ཝི་སི་ཊྛཾ ཀུ་ས་ལཱ་དི་བྷཱ་ཝ་ས་ངྑཱ་ཏཾ ཨ་ཏྟ་ནོ ག་ཏིཾ གཱ་ཧཱ་པེ་ཏུཾ ན ས་ཀྐོ་ནྟི, ན ཙ ས་ཡཾ ཏ་ཏོ ག་ཎྷ་ནྟི. ཏེ པ་ན ཨ་ན་ནྟ་རཱ་ཏཱི་ཏཱ་ནི ལོ་ཀི་ཡ་ཀུ་ས་ལཱ་ཀུ་ས་ལཱ་ནི ཙེ་ཝ ཨ་ནཱ་ཝ་ཛྫ་ན་ཀི་རི་ཡཱ་ཛ་ཝ་ནཱ་ནི ཙཱ་ཏི ཨཱ་ཧ ‘‘ཋ་པེ་ཏྭཱ ཨཱ་ཝ་ཛྫ་ན་དྭ་ཡ’’ནྟི་ཨཱ་དི. ‘‘ན མ་གྒ་པ་ཙྩ་ཡཱ ཨཱ་སེ་ཝ་ནེ ཨེ་ཀ’’ནྟི (པ་ཊྛཱ. ༡.༡.༢༢༡) ཝ་ཙ་ན་ཏོ ཨ་ཧེ་ཏུ་ཀ་ཀི་རི་ཡཱ་སུ ཧ་སི་ཏུ་པྤཱ་ད་སྶེ་ཝ ཨཱ་སེ་ཝ་ན་བྷཱ་ཝེ་ན, ཨཱ་ཝ་ཛྫ་ན་དྭ་ཡཾ ཨཱ་སེ་ཝ་ན་པ་ཙྩ་ཡོ ན ཧོ་ཏི, ལོ་ཀུ་ཏྟ་ར་མྤི ཀུ་ས་ལཾ བྷི་ནྣ་ཛཱ་ཏི་ཀ་སྶེ་ཝ ཕ་ལ་སྶ པུ་རེ་ཙ་ར་ཏྟཱ ན ཏེ་ན, ཨཱ་སེ་ཝ་ན་གུ་ཎཾ ག་ཎྷཱ་པེ་ཏི, ཝི་པཱ་ཀཱ་བྱཱ་ཀ་ཏ་མྤི ཀ་མྨ་ཝ་སེ་ན. ཝི་པཱ་ཀ་བྷཱ་ཝ་པྤ་ཏྟཾ ཀ་མྨ་པ་རི་ཎཱ་མི་ཏཾ ཀ་མྨ་ཝེ་ག་ཀྑི་ཏྟཾ པ་ཏི་ཏཾ ཝི་ཡ ཧུ་ཏྭཱ པ་ཝ་ཏྟ་མཱ་ནཾ ཨ་ཏྟ་ནོ ས་བྷཱ་ཝཾ གཱ་ཧེ་ཏྭཱ པ་རི་བྷཱ་ཝེ་ཏྭཱ ནེ་ཝ ཨ་ཉྙ་ཝི་པཱ་ཀཾ པ་ཝ་ཏྟེ་ཏི, ན ཙ པུ་རི་མ་ཝི་པཱ་ཀཱ་ནུ་བྷཱ་ཝཾ ག་ཧེ་ཏྭཱ ཨུ་པྤ་ཛྫ་ཏི. ལོ་ཀུ་ཏྟ་ར་ཝི་པཱ་ཀ་མྤི ཧི ཀི་ཉྩཱ་པི ཛ་ཝ་ན་ཝ་སེ་ན ཨུ་པྤ་ཛྫ་ཏི, ཨཱ་སེ་ཝ་ན་གུ་ཎཾ པ་ན ག་ཎྷཱ་ཏི, ན ཙ ཨ་ཉྙཾ གཱ་ཧཱ་པེ་ཏི. ཡ་མྤི ‘‘ཨཱ་སེ་ཝ་ན་ཝི་ནི་མུ་ཏྟཾ ཛ་ཝ་ནཾ ན་ཏྠཱི’’ཏི ཨཱ་ཙ་རི་ཡ་དྷ་མྨ་པཱ་ལཏྠེ་རེ་ན ཝུ་ཏྟཾ, ཏ་མྤི ‘‘ཡེ་བྷུ་ཡྻ་ཝ་སེ་ན ཝུ་ཏྟ’’ནྟི ཝི་ཉྙཱ་ཡ་ཏི, ཨི་ཏ་ར་ཐཱ པ་ན ཨཱ་ཙ་རི་ཡ་སྶ ཨ་ས་མ་པེ་ཀྑི་ཏཱ་ཝི་དྷཱ་ཡ་ཀ་ཏྟ་པྤ་ས་ངྒ་ཏོ. ཏ་ཐཱ ཧི ཝུ་ཏྟཾ པ་ཊྛཱ་ན་ཊྛ་ཀ་ཐཱ་ཡཾ ‘‘ལོ་ཀུ་ཏྟ་རོ པ་ན ཨཱ་སེ་ཝ་ན་པ་ཙྩ་ཡོ ནཱ་མ ན་ཏྠཱི’’ཏི (པ་ཊྛཱ. ཨ་ཊྛ. ༡.༡༢). མ་གྒོ པ་ན གོ་ཏྲ་བྷུ་ཏོ ཨཱ་སེ་ཝ་ནཾ ན ག་ཎྷཱ་ཏཱི་ཏི ན་ཏྠི བྷཱུ་མི་ཨཱ་དི་ཝ་སེ་ན ནཱ་ནཱ་ཛཱ་ཏི་ཀ་ཏཱ་ཡ ཨ་ན་དྷི་པྤེ་ཏ་ཏྟཱ. ཏ་ཐཱ ཧི ཝུ་ཏྟཾ པ་ཊྛཱ་ནེ ‘‘གོ་ཏྲ་བྷུ མ་གྒ་སྶ ཨཱ་སེ་ཝ་ན་པ་ཙྩ་ཡེ་ན པ་ཙྩ་ཡོ, ཝོ་དཱ་ནཾ མ་གྒ་སྶ ཨཱ་སེ་ཝ་ན་པ་ཙྩ་ཡེ་ན པ་ཙྩ་ཡོ’’ཏི (པ་ཊྛཱ. ༡.༡.༤༢༦).
ཙི་ཏྟ་པྤ་ཡོ་ག་ས་ངྑཱ་ཏ་ཨཱ་ཡཱུ་ཧ་ན་ཀི་རི་ཡཱ་བྷཱ་ཝེ་ན ས་ཧ་ཛཱ་ཏཱ་ནཾ, ནཱ་ན་ཀྑ་ཎི་ཀཱ་ན་ཉྩ ཨུ་པ་ཀཱ་ར་ཀོ དྷ་མྨོ ཀ་མྨ་པ་ཙྩ་ཡོ. ཀ་མྨ་ནྟི ཧི ཙེ་ཏ་ནཱ ཝུ་ཙྩ་ཏི, སཱ ཙ ཨཱ་ཡཱུ་ཧ་ན་བྱཱ་པཱ་རཱ. པ་ཙྩ་ཡུ་པྤ་ནྣེ་ན ས་ཧ ཨུ་པྤ་ནྣཱ ས་ཧ་ཛཱ་ཏཱ, པ་ཙྩ་ཡུ་པྤ་ནྣ་ཏོ ནཱ་ན་ཀྑ་ཎེ བྷ་ཝཱ ནཱ་ན་ཀྑ་ཎི་ཀཱ. ས་ཧ་ཛཱ་ཏཱ ལོ་ཀི་ཡ་ལོ་ཀུ་ཏྟ་རཱ ཙེ་ཏ་ནཱ་ཏི ས་མྦ་ནྡྷོ. སཱ ས་ཧ་ཛཱ་ཏ་ནཱ་མཱ་ནཾ, ཏཾ་ས་མུ་ཊྛཱ་ནཱ་ན་ཉྩ རཱུ་པཱ་ནཾ པ་ཙྩ་ཡོ, ཨི་ཏ་རཱ པ་ན ཝི་པཱ་ཀ་ཀ་ཊ་ཏྟཱ་རཱུ་པཱ་ན་ནྟི ད་ཊྛ་བྦཾ. སཱ་ས་ཝ་ཀུ་ས་ལཱ་ཀུ་ས་ལ་ཙེ་ཏ་ནཱཏི ཨ་ཏྟ་ནོ ཨུ་པྤཱ་ད་ཝི་སི་ཊྛེ ས་ནྟཱ་ནེ སེ་ས་པ་ཙྩ་ཡ་ས་མཱ་ག་མེ པ་ཝ་ཏྟ་མཱ་ནཱ་ནཾ ཝི་པཱ་ཀ་ཀ་ཊ་ཏྟཱ་རཱུ་པཱ་ནཾ ས་ནྟཱ་ན་ཝི་སེ་ས་ན་ཀི་རི་ཡཱ་བྷཱ་ཝེ་ན ཨུ་པ་ཀཱ་རི་ཀཱ ཀཱ་མ་རཱུ་པཱ་རཱུ་པ་ཀུ་ས་ལ་ཙེ་ཏ་ནཱ, ཨ་ཀུ་ས་ལ་ཙེ་ཏ་ནཱ ཙ. ཏ་སྶཱ ཧི ཏ་ཐཱ ཀི་རི་ཡཱ་བྷཱ་ཝེ་ན པ་ཝ་ཏྟ་ཏྟཱ ཏེ་སཾ པ་ཝ་ཏྟི, ན ཨ་ཉྙ་ཐཱ. ཨི་ཏ་རཱ པ་ན ས་ཧ་ཛཱ་ཏཱ་ནཾ ཨཱ་ཡཱུ་ཧ་ན་ཀི་རི་ཡཱ་བྷཱ་ཝེ་ན པ་ཝ་ཏྟ་མཱ་ནཱ ཨུ་པ་ཀཱ་རི་ཀཱ་ཏི ཝ་ཏྟ་བྦཾ. ཨ་ཝ་དྷཱ་ར་ཎེ་ན པ་ནེ་ཏྠ ཙེ་ཏ་ནཱ་ས་མྤ་ཡུ་ཏྟཾ ཨ་བྷི་ཛ྄ཛྷཱ་དི་ཀ་མྨཾ པ་ཊི་ཀྑི་པ་ཏི ས་ཏི་པི ཝི་པཱ་ཀ་དྷ་མྨ་ས་བྷཱ་ཝེ ཙེ་ཏ་ནཱ་ཝ་ཛྫཱ་ནཾ ཨ་ཏཾ་ས་བྷཱ་ཝ་ཏྟཱ. ཨ་ནཱ་ས་ཝ…པེ… པ་ཙྩ་ཡོཏི ཨི་མི་ནཱ ལོ་ཀི་ཡ་ཀུ་ས་ལ་ཙེ་ཏ་ནཱ་ཡ ཝི་སེ་ས་མ་ཏྟཾ ད་སྶེ་ཏི, ན ནཱ་ན་ཀྑ་ཎི་ཀ་ཀ་མྨ་པ་ཙྩ་ཡ་ཏཱ་བྷཱ་ཝཾ. ཨེ་ཝ་ཉྩ ཀ་ཏྭཱ ཝུ་ཏྟཾ ཨ་ཊྛ་ཀ་ཐཱ་ཡཾ ‘‘ཨ་རཱུ་པཱ་ཝ་ཙ་ར་ཙེ་ཏ་ནཱ, པ་ན ལོ་ཀུ་ཏྟ་ར་ཙེ་ཏ་ནཱ ཙ ཨུ་པྤ་ཛྫི་ཏྭཱ ནི་རུ་དྡྷཱ ཨ་ཏྟ་ནོ ཨ་ཏྟ་ནོ ཝི་པཱ་ཀ་ཀྑ་ནྡྷཱ་ནཾ ནཱ་ན་ཀྑ་ཎི་ཀ་ཀ་མྨ་པ་ཙྩ་ཡེ་ན པ་ཙྩ་ཡོ’’ཏི.
ཨ་ཏྟ་ནོ ནི་རུ་སྶཱ་ཧ་ས་ནྟ་བྷཱ་ཝེ་ན ས་ཧ་ཛཱ་ཏ་ནཱ་མ་རཱུ་པཱ་ནཾ ནི་རུ་སྶཱ་ཧ་ས་ནྟ་བྷཱ་ཝཱ་ཡ ཨུ་པ་ཀཱ་ར་ཀཱ ཨ་རཱུ་པ་དྷ་མྨཱ་ཝ ཝི་པཱ་ཀ་པ་ཙྩ་ཡོ. ཏེ་ནཱ་ཧ ‘‘ཝི་པཱ་ཀ་ཙི་ཏྟ་ཙེ་ཏ་སི་ཀཱ’’ཏི. ཏེ ཧི པ་ཡོ་གེ་ན ཨ་སཱ་དྷེ་ཏ་བྦ་ཏཱ་ཡ ཀ་མྨ་སྶ ཀ་ཏ་ཏྟཱ ནི་པྥ་ཛྫ་ན་མ་ཏྟ་ཏོ ནི་རུ་སྶཱ་ཧ་ས་ནྟ་བྷཱ་ཝཱ ཧོ་ནྟི, ན ཀི་ལེ་ས་ཝཱུ་པ་ས་མ་ས་ནྟ་བྷཱ་ཝཱ. ནི་རུ་སྶཱ་ཧ་ས་ནྟ་བྷཱ་ཝ་ཏོ ཨེ་ཝ ཧི བྷ་ཝ་ངྒཱ་ད་ཡོ དུ་ཝི་ཉྙེ་ཡྻཱ. པ་ཉྩ་དྭཱ་རེ་པི ཧི ཛ་ཝ་ན་པྤ་ཝ་ཏྟི་ཡཱ་ཝ རཱུ་པཱ་དཱི་ནཾ ག་ཧི་ཏ་ཏཱ ཝི་ཉྙཱ་ཡ་ཏི. ཨ་བྷི་ནི་པཱ་ཏ་ས་མྤ་ཊི་ཙྪ་ན་ས་ནྟཱི་ར་ཎ་མ་ཏྟཱ པ་ན ཝི་པཱ་ཀཱ དུ་ཝི་ཉྙེ་ཡྻཱ ཨེ་ཝ.
རཱུ་པཱ་རཱུ་པཱ་ནཾ ཨུ་པ་ཏྠ་མྦྷ་ཀ་ཊྛེ་ན ཨུ་པ་ཀཱ་རོ ཨཱ་ཧཱ་ར་པ་ཙྩ་ཡོ. ས་ཏི་པི ཧི ཛ་ན་ཀ་བྷཱ་ཝེ ཨུ་པ་ཏྠ་མྦྷ་ཀ་ཏྟ་མེ་ཝ ཨཱ་ཧཱ་ར་སྶ པ་དྷཱ་ན་ཀི་ཙྩཾ, ཛ་ན་ཡ་ནྟོ་པི ཙ ཨཱ་ཧཱ་རོ ཨ་ཝི་ཙྪེ་ད་ཝ་སེ་ན ཨུ་པ་ཏྠ་མྦྷེ་ནྟོ་ཝ ཛ་ནེ་ཏཱི་ཏི ཨུ་པ་ཏྠ་མྦྷ་ན་བྷཱ་ཝོ་ཝ ཨཱ་ཧཱ་ར་བྷཱ་ཝོ་ཏི. ཏ་ཏྠ ཀ་བ་ལཱི༹་ཀཱ་རོ ཨཱ་ཧཱ་རོ རཱུ་པ་ཀཱ་ཡ་སྶེ་ཝ ཨུ་པ་ཏྠ་མྦྷ་ཀོ, སེ་སཱ ཏ་ཡོ རཱུ་པཱ་རཱུ་པ་ཀཱ་ཡ་སྶ. ན ཀེ་ཝ་ལ་ཉྷི ཏེ ནཱ་མ་དྷ་མྨཱ་ན་མེ་ཝ ཨ་ཝི་ཙྪེ་ད་ཧེ་ཏུ་ཀཱ, ཨ་ཐ ཁོ པ་ཊི་ས་ནྡྷི་ཡཾ ཀ་ཊ་ཏྟཱ་རཱུ་པཱ་ནཾ, པ་ཝ་ཏྟེ ཙི་ཏྟ་ཛ་རཱུ་པཱ་ན་མྤི.
ཏེ་སུ ཏེ་སུ ཀི་ཙྩེ་སུ པ་ཙྩ་ཡུ་པྤ་ནྣ་དྷ་མྨེ་ཧི ཨ་ཏྟཱ་ནཾ ཨ་ནུ་ཝ་ཏྟཱ་པ་ན་ཀ་ས་ངྑཱ་ཏ་ཨཱ་དྷི་པ་ཙྩ་ཊྛེ་ན པ་ཙྩ་ཡོ ཨི་ནྡྲི་ཡ་པ་ཙྩ་ཡོ. ཨ་དྷི་པ་ཏི་པ་ཙྩ་ཡ་དྷ་མྨཱ་ན་ཉྷི པ་ཝ་ཏྟི་ཝི་ནི་ཝཱ་ར་ཀེ ཨ་བྷི་བྷ་ཝི་ཏྭཱ པ་ཝ་ཏྟ་ནེ་ན ག་རུ་བྷཱ་ཝོ ཨ་དྷི་པ་ཏི་ཡ་ཊྛོ, ཨི་ནྡྲི་ཡཱ་ནཾ པ་ན ད་སྶ་ནཱ་དི་ཀི་ཙྩེ་སུ ཙ་ཀྑུ་ཝི་ཉྙཱ་ཎཱ་དཱི་ཧི, ཛཱི་ཝ་ནེ ཀ་མྨ་ཛ་རཱུ་པེ་ཧི, ཨ་རཱུ་པ་དྷ་མྨེ་ཧི ཙ ཛཱི་ཝ་ནྟེ་ཧི སུ་ཁི་ཏཱ་དི་བྷཱ་ཝེ་སུ སུ་ཁི་ཏཱ་དཱི་ཧི ཨ་དྷི་མོ་ཀྑ་པ་གྒ་ཧ་ཨུ་པ་ཊྛཱ་ནཱ་ཝི་ཀྑེ་པ་པྤ་ཛཱ་ན་ནེ་སུ ‘‘ཨ་ན་ཉྙཱ་ཏཾ ཉ་སྶཱ་མཱི’’ཏི པ་ཝ་ཏྟི་ཡཾ ཨཱ་ཛཱ་ན་ནེ, ཨ་ཉྙཱ་ཏཱ་ཝི་བྷཱ་ཝེ ཙ ས་དྡྷཱ་དི་ས་ཧ་ཛཱ་ཏེ་ཧཱི་ཏི ཨེ་ཝཾ ཏཾ་ཏཾ་ཀི་ཙྩེ་སུ ཙ་ཀྑཱ་དི་པ་ཙྩ་ཡེ་ཧི དྷ་མྨེ་ཧི ཙ་ཀྑཱ་དཱི་ནཾ ཨ་ནུ་ཝ་ཏྟ་ནི་ཡ་ཏཱ་མ་ཏྟཾ ཨི་ནྡྲི་ཡཱ་ནཾ ཨཱ་དྷི་པ་ཙྩ་ཊྛོ་ཏི ཨ་ཡ་མེ་ཝ ཏེ་སཾ ཝི་སེ་སོ. རཱུ་པ་ས་ཏྟ་ཀ-གྒ་ཧ་ཎེ་ན ཙ་ཀྑཱ་དཱི་ནི པ་ཉྩ, ཨི་ཏྠི་པུ་རི་སི་ནྡྲི་ཡ་དྭ་ཡ་ཉྩ ད་སྶེ་ཏི. ཛཱི་ཝི་ཏི་ནྡྲི་ཡཾ པ་ན ཨ་རཱུ་པ་ཛཱི་ཝི་ཏི་ནྡྲི་ཡེ་ན ས་དྡྷིཾ ཨེ་ཀ་ཏོ ཀ་ཏྭཱ ཛཱི་ཝི་ཏ-གྒ་ཧ་ཎེ་ན ག་ཧི་ཏཾ. ཨེ་ཝ་ཉྷི དྭཱ་ཝཱི་ས་ཏི ཨི་ནྡྲི་ཡཱ་ནི ཧོ་ནྟི. ‘‘ཨ་ནཱ་དི་མ་ཏི སཾ་སཱ་རེ ཨ་ན་ཉྙཱ་ཏཾ ཨ་ས་ཙྪི་ཀ་ཏཾ ཙ་ཏུ་ས་ཙྩ་དྷ་མྨཾ, ནི་བྦཱ་ན་མེ་ཝ ཝཱ ཉ་སྶཱ་མཱི’’ཏི པ་ཝ་ཏྟ་སྶ ཨི་ནྡྲི་ཡཾ ཨ་ན་ཉྙཱ་ཏ་ཉྙ་སྶཱ་མཱི་ཏི་ནྡྲི་ཡཾ, པ་ཋ་མ་མ་གྒ་ཉཱ་ཎཾ. ཨཱ་ཛཱ་ན་ཏོ པ་ཋ་མ་མ་གྒེ་ན དི་ཊྛ་མ་རི་ཡཱ་དཾ ཨ་ན་ཏི་ཀྐ་མི་ཏྭཱ ཛཱ་ན་ཏོ ཨི་ནྡྲི་ཡཾ ཨ་ཉྙི་ནྡྲི་ཡཾ, སོ་ཏཱ་པ་ཏྟི་ཕ་ལ་ཏོ ཡཱ་ཝ ཨ་ར་ཧ་ཏྟ་མ་གྒཱ ཚ་སུ ཉཱ་ཎཾ, ཨ་ཉྙཱ་ཏཱ་ཝི་ནོ ཙ་ཏཱུ་སུ ས་ཙྩེ་སུ པ་རི་ནི་ཊྛི་ཏ་ཀི་ཙྩ་སྶ ཨི་ནྡྲི་ཡཾ ཨ་ཉྙཱ་ཏཱ་ཝི་ནྡྲི་ཡཾ, ཨ་ར་ཧ་ཏྟ་ཕ་ལ་ཉཱ་ཎཾ. པ་ཋ་མཾ པ་རི་ཡཱ་ཡ་ཏོ ཨི་ནྡྲི་ཡ་ཏྟཾ ས་ནྡྷཱ་ཡ རཱུ་པ་ས་ཏྟ་ཀ-གྒ་ཧ་ཎེ་ན ག་ཧེ་ཏྭཱ་པི པུ་ན ཀ་ཐ་ཉྩི ཨུ་པ་ཀཱ་ར་ཀ་ཏྟཱ་བྷཱ་ཝ་ཏོ ཨི་ཏྠི་པུ་རི་སི་ནྡྲི་ཡཱ་ནཾ ཨེ་ཏྠ ཨ་གྒ་ཧ་ཎཾ ད་སྶེ་ཏུཾ ‘‘ཏེ་སཱུ’’ཏི་ཨཱ་དི ཝུ་ཏྟཾ. ཏཱ་ནི ཧི ཡེ་བྷུ་ཡྻེ་ན ལི་ངྒཱ་དཱི་ཧི ཨ་ནུ་ཝ་ཏྟི་ཡ་མཱ་ནཱ་ནི་པི པ་ཙྩ་ཡ་བྷཱ་ཝ་ཏོ ནཱ་ནུ་ཝ་ཏྟཱི་ཡ་ནྟཱི་ཏི ཝུ་ཏྟོ་ཝཱ་ཡ་མ་ཏྠོ.
ཨཱ་ར་མྨ་ཎཱུ་པ་ནི་ཛ྄ཛྷཱ་ན་ལ་ཀྑ་ཎཱུ་པ་ནི་ཛ྄ཛྷཱ་ན་ཝ་སེ་ན ཨུ་པ་ག་ནྟྭཱ ཨཱ་ར་མྨ་ཎ་ནི་ཛ྄ཛྷཱ་ནཾ ཛྷཱ་ན་པ་ཙྩ་ཡ་ཏཱ, སོ ཙ ཝི་ཏ་ཀྐཱ་དཱི་ན་མེ་ཝ ཨཱ་ཝེ་ཎི་ཀོ ས་བྷཱ་ཝོ་ཏི ཨཱ་ཧ ‘‘ཛྷཱ་ན་པ་ཙྩ་ཡོ’’ཏི་ཨཱ་དི. ཏེ པ་ན པ་ཊི་ས་ནྡྷི་ཡཾ ཀ་ཊ་ཏྟཱ་རཱུ་པཱ་ནཾ, པ་ཝ་ཏྟེ ཙི་ཏྟ་ཛ་རཱུ་པཱ་ནཾ, ཨུ་བྷ་ཡ་ཏྠ ནཱ་མ་དྷ་མྨཱ་ན་ཉྩ པ་ཙྩ་ཡཱ་ཏི ད་ཊྛ་བྦཾ.
སུ་ག་ཏི་ཏོ, དུ་གྒ་ཏི་ཏོ, ཀུ་ས་ལ་ཏོ, ཨ་ཀུ་ས་ལ་ཏོ ཝཱ ནི་ཡྻཱ་ན་ཊྛེ་ན ས་ཧ་ཛཱ་ཏཱ་ནཾ ཨུ་པ་ཀཱ་ར་ཀ་ཏཱ མ་གྒ་པ་ཙྩ་ཡ་ཏཱ, སཱ ཙ ས་མྨཱ་དི་ཊྛཱ་དཱི་ན་ནྟི ཨཱ་ཧ ‘‘མ་གྒ་པ་ཙྩ་ཡོ’’ཏི་ཨཱ་དི. ས་ངྐ་པྤ-གྒ་ཧ་ཎེ་ན ས་མྨཱ་ས་ངྐ་པྤཾ, མི་ཙྪཱ་ས་ངྐ་པྤ་ཉྩ ད་སྶེ་ཏི. ཨེ་ཝཾ སེ་སེ་སུ་པི. མི་ཙྪཱ་ས་ངྐ་པྤཱ་ད་ཡོ ཧི ཨ་པཱ་ཡ་མ་གྒ་ངྒཱ, མི་ཙྪཱ་ས་ཏི་མི་ཙྪཱ་ཝཱ་ཙཱ་ད་ཡོ ཙེ་ཏྠ ཏ་ཐཱ་པ་ཝ་ཏྟ་ཙི་ཏྟུ་པྤཱ་དཱ, ཙེ་ཏ་ནཱ ཙ, ཨ་ཡ་མྤི ཛྷཱ་ན་པ་ཙྩ་ཡེ ཝུ་ཏྟཱ་ན་མེ་ཝ པ་ཙྩ་ཡུ་པྤ་ནྣཱ་ནཾ པ་ཙྩ་ཡོ་ཏི ད་ཊྛ་བྦཾ.
པ་ར་མ་ཏྠེ་ན བྷི་ནྣཱ་ན་མྤི ཨེ་ཀཱི་བྷཱ་ཝ་ག་ཏཱ་ནཾ ཝི་ཡ ཨེ་ཀུ་པྤཱ་དཱ་དི་བྷཱ་ཝ་ས་ངྑཱ་ཏ་ས་མྤ་ཡོ་ག་ལ་ཀྑ་ཎེ་ན ཨུ་པ་ཀཱ་ར་ཀ་ཏཱ ས་མྤ་ཡུ་ཏྟ་པ་ཙྩ་ཡ་ཏཱ, སཱ ཙ ནཱ་མ་དྷ་མྨཱ་ན་མེ་ཝ, ན རཱུ་པ་དྷ་མྨཱ་ན་ནྟི ཨཱ་ཧ ‘‘ས་མྤ་ཡུ་ཏྟ་པ་ཙྩ་ཡོ’’ཏི་ཨཱ་དི.
ཨ་ཉྙ་མ་ཉྙ་ས་མྦ་ནྡྷ་ཏཱ་ཡ ཡུ་ཏྟཱ་ན་མྤི ས་མཱ་ནཱ་ནཾ ཝི་པྤ་ཡུ་ཏྟ་བྷཱ་ཝེ་ན ཝི་སཾ་ས་ཊྛ་ཏཱ་ཡ ནཱ་ན་ཏྟཱུ་པ་ག་མ་ནེ་ན ཨུ་པ་ཀཱ་ར་ཀ་ཏཱ ཝི་པྤ་ཡུ་ཏྟ་པ་ཙྩ་ཡ་ཏཱ, སཱ ཙ ཝ་ཏྠཱུ་ནཾ, ཙི་ཏྟ་ཙེ་ཏ་སི་ཀཱ་ན་མེ་ཝ ཝཱ་ཏི ཨཱ་ཧ ‘‘ཝི་པྤ་ཡུ་ཏྟ་པ་ཙྩ་ཡོ’’ཏི་ཨཱ་དི. ཚ ཝ་ཏྠཱུ་ནི ཧི ས་ཏྟ་ནྣཾ ཝི་ཉྙཱ་ཎཱ་ནཾ ཡ་ཐཱ་ར་ཧཾ པ་ཊི་ས་ནྡྷི་ཡཾ, པ་ཝ་ཏྟེ, ཙི་ཏྟ་ཙེ་ཏ་སི་ཀཱ པ་ཊི་ས་ནྡྷི་ཡཾ ཀ་ཊ་ཏྟཱ་རཱུ་པཱ་ནཾ, པ་ཝ་ཏྟི་ཡཾ ཙི་ཏྟ་ས་མུ་ཊྛཱ་ནཱ་ན་ཉྩ ཝི་པྤ་ཡུ་ཏྟ་པ་ཙྩ་ཡོ. ཝ་ཏྠུ་པུ་རེ་ཛཱ་ཏཱ་ནཱིཏི ཨི་དཾ ཙ་ཀྑཱ་དི་ཝ་ཏྠུ་ཝ་སེ་ནེ་ཝ ཝུ་ཏྟཾ, ཧ་ད་ཡ་ཝ་ཏྠུ པ་ན པ་ཊི་ས་ནྡྷི་ཡ་མྤི པ་ཙྩ་ཡ་བྷཱ་ཝ་ཏོ ས་ཧ་ཛཱ་ཏ་མྤི ལ་བྦྷ་ཏི. ཝུ་ཏྟ་མྤི ཧེ་ཏཾ ཨ་བྱཱ་ཀ་ཏ་པ་ད་སྶ ས་ཧ་ཛཱ་ཏ་ཝི་བྷ་ངྒེ ‘‘པ་ཊི་ས་ནྡྷི་ཀྑ་ཎེ ཝི་པཱ་ཀཱ་བྱཱ་ཀ་ཏཱ ཁ་ནྡྷཱ ཀ་ཊ་ཏྟཱ་རཱུ་པཱ་ནཾ, ཁ་ནྡྷཱ ཝ་ཏྠུ་སྶ, ཝ་ཏྠུ ཁ་ནྡྷཱ་ནཾ ཝི་པྤ་ཡུ་ཏྟ་པ་ཙྩ་ཡེ་ན པ་ཙྩ་ཡོ’’ཏི. ཏ་ཐཱ པ་ཙྪཱ་ཛཱ་ཏཱ ཙི་ཏྟ་ཙེ་ཏ་སི་ཀཱཏི ཙ ཙ་ཀྑུ་ཝི་ཉྙཱ་ཎཱ་དི་ཝ་སེ་ནེ་ཝ ཝུ་ཏྟཾ, ‘‘ས་ཧ་ཛཱ་ཏཱ ཀུ་ས་ལཱ ཁ་ནྡྷཱ ཙི་ཏྟ་ས་མུ་ཊྛཱ་ནཱ་ནཾ རཱུ་པཱ་ནཾ ཝི་པྤ་ཡུ་ཏྟ་པ་ཙྩ་ཡེ་ན པ་ཙྩ་ཡོ’’ཏི་ཨཱ་དི་ཝ་ཙ་ན་ཏོ (པ་ཊྛཱ. ༡.༡.༤༣༤) པ་ན ས་ཧ་ཛཱ་ཏཱ་པི ལ་བྦྷ་ནྟི. ཨེ་ཝ་ཉྩ ཀ་ཏྭཱ ཝུ་ཏྟཾ ཨ་ཊྛ་ཀ་ཐཱ་ཡཾ ‘‘ཝི་པྤ་ཡུ་ཏྟ་པ་ཙྩ་ཡོ ས་ཧ་ཛཱ་ཏ་པུ་རེ་ཛཱ་ཏ་པ་ཙྪཱ་ཛཱ་ཏ་ཝ་སེ་ན ཏི་ཝི་དྷོ’’ཏི. ཨ་ཡཾ པ་ན རཱུ་པ་དྷ་མྨོ ས་མཱ་ནོ རཱུ་པ་དྷ་མྨ་སྶ པ་ཙྩ་ཡོ ན ཧོ་ཏི ས་མྤ་ཡོ་གཱ་ས་ངྐཱ་ཡ ཨ་བྷཱ་ཝ་ཏོ.
ཡེ་ས་ཉྷི ནཱ་མཱ་ནཾ ཙ་ཀྑཱ་དཱི་ནཾ ཨ་བྦྷ་ནྟ་ར་ཏོ ནི་ཀྑ་མ་ནྟཱ་ནཾ ཝི་ཡ པ་ཝ་ཏྟི, རཱུ་པཱ་ན་ཉྩ ནཱ་མ་ས་ནྣི་སྶ་ཡེ་ནེ་ཝ ཨུ་པྤ་ཛྫ་མཱ་ནཱ་ནཾ ས་མྤ་ཡོ་གཱ་ས་ངྐཱ ཧོ་ཏི, ཏེ་ས་མེ་ཝ ཝི་པྤ་ཡུ་ཏྟ་པ་ཙྩ་ཡ་ཏཱ ཝུ་ཏྟཱ. རཱུ་པཱ་ནཾ པ་ན རཱུ་པེ་ཧི སཱ་ས་ངྐཱ ན་ཏྠི, ཝ་ཏྠུ་ས་ནྣི་སྶ་ཡེ་ནེ་ཝ ཙ ཛཱ་ཡ་ནྟཱ་ནཾ ནཱ་མཱ་ནཾ ཝི་ས་ཡ་མ་ཏྟཾ ཨཱ་ར་མྨ་ཎ་ནྟི ཏེ་ནཱ་པི ཏེ་སཾ ས་མྤ་ཡོ་གཱ་ས་ངྐཱ ན་ཏྠི. པ་ཙྩུ་པྤ་ནྣ་ས་བྷཱ་ཝེ་ན ཨ་ཏྠི་བྷཱ་ཝེ་ན ཏཱ་དི་ས་སྶེ་ཝ དྷ་མྨ་སྶ ཨུ་པ་ཏྠ་མྦྷ་ཀ་ཏྟེ་ན ཨུ་པ་ཀཱ་ར་ཀ་ཏཱ ཨ་ཏྠི་པ་ཙྩ་ཡ་ཏཱ. ས་ཏི་པི ཧི ཛ་ན་ཀ་ཏྟེ ཋི་ཏི་ཡཾ་ཡེ་ཝ སཱ་ཏི་ས་ཡོ ཨ་ཏྠི་པ་ཙྩ་ཡཱ་ནཾ བྱཱ་པཱ་རོ་ཏི ཨུ་པ་ཏྠ་མྦྷ་ཀ་ཏཱ ཏེ་སཾ ག་ཧི་ཏཱ, ཏེ ཙ རཱུ་པ་ཛཱི་ཝི་ཏི་ནྡྲི་ཡཱ་དཱི་ནེ་ཝཱ་ཏི ཨཱ་ཧ ‘‘ཨ་ཏྠི་པ་ཙྩ་ཡོ’’ཏི་ཨཱ་དི. རཱུ་པ་ཛཱི་ཝི་ཏི་ནྡྲི་ཡ་ཉྷི ཀ་ཊ་ཏྟཱ་རཱུ་པཱ་ནཾ, ཀ་བ་ལཱི༹་ཀཱ་རཱ་ཧཱ་རོ ཨི་མ་སྶ ཀཱ་ཡ་སྶ, ཨཱ་ར་མྨ་ཎ་པུ་རེ་ཛཱ་ཏཱ་ནི ཙི་ཏྟ་ཙེ་ཏ་སི་ཀཱ་ནཾ ནི་སྶ་ཡ་པ་ཙྩ་ཡེ ཝུ་ཏྟ་དྷ་མྨཱ, ཏ་ཏྠེ་ཝ ཝུ་ཏྟ་པ་ཙྩ་ཡུ་པྤ་ནྣ་ཉྩ ཨ་ཏྠི་པ་ཙྩ་ཡོ. ནི་སྶ་ཡ་པ་ཙྩ་ཡེ ཝུ་ཏྟ་དྷ་མྨཱཏི ཙ ཝ་ཏྠུ་རཱུ་པ་མ་ཧཱ་བྷཱུ་ཏ་ཙི་ཏྟ་ཙེ་ཏ་སི་ཀཱ་ནཾ དྷ་མྨ་སཱ་མ་ཉྙེ་ནེ་ཝ ག་ཧ་ཎཾ, ན ནི་སྶ་ཡ་པ་ཙྩ་ཡ་བྷཱ་ཝཱི་ནཾ་ཡེ་ཝ. པ་ཙྪཱ་ཛཱ་ཏཱ་ན་མྤི ཙི་ཏྟ་ཙེ་ཏ་སི་ཀཱ་ནཾ པུ་རེ་ཛཱ་ཏ་སྶ ཀཱ་ཡ་སྶ པ་ཉྷཱ་ཝཱ་རེ པ་ཙྩ་ཡ་བྷཱ་ཝེ་ན ནི་དྡི་ཊྛ་ཏྟཱ. ཨེ་ཏྠ ཙ ཨ་ཏྠི་བྷཱ་ཝཱ་བྷཱ་ཝེ་ན ཨ་ནུ་པ་ཀཱ་ར་ཀཱ་ན་མེ་ཝ ཨ་ཏྠི་བྷཱ་ཝེ་ན ཨུ་པ་ཀཱ་ར་ཀ་ཏཱ་ཡ ཨ་ཏྠི་པ་ཙྩ་ཡ་ཏཱ་བྷཱ་ཝ་ཏོ ན་ཏྠི ནི་བྦཱ་ན་སྶ ས་བྦ་དཱ བྷཱ་ཝི་ནོ ཨ་ཏྠི་པ་ཙྩ་ཡ་ཏཱ, ཨུ་པྤཱ་དཱ་དི་ཡུ་ཏྟཱ་ནཾ ཝཱ ན་ཏྠི་བྷཱ་ཝོ་པ་ཀཱ་ར་ཏཱ་ཝི་རུ་དྡྷོ ཨུ་པ་ཀཱ་ར་ཀ་བྷཱ་ཝོ ཨ་ཏྠི་པ་ཙྩ་ཡ་ཏཱ་ཏི ན ཏ་སྶ ཏ་པྤ་ཙྩ་ཡ་ཏྟ་པྤ་ས་ངྒོ.
ན་ཏྠི་པ་ཙྩ་ཡོཏི་ཨཱ་དཱི་སུ ཨ་ན་ནྟ་ར་ཏཱ་མ་ཏྟེ་ན, ཙི་ཏྟ་ནི་ཡཱ་མ་ཀ་བྷཱ་ཝེ་ན ཝཱ ཨུ་པ་ཀཱ་ར་ཀ་ཏཱ ཨ་ན་ནྟ་ར་པ་ཙྩ་ཡ་ཏཱ. ཨེ་ཀ་སྨིཾ ཕ་སྶཱ་དི་དྷ་མྨ་ས་མུ་དཱ་ཡེ པ་ཝ་ཏྟ་མཱ་ནེ དུ་ཏི་ཡ་སྶ ཨ་བྷཱ་ཝ་ཏོ ཨ་ཏྟ་ནོ ཋི་ཏི་ཡཱ ཨོ་ཀཱ་ས་མ་ལ་བྷ་ནྟཱ་ནཾ ཨ་ན་ནྟ་རཾ ཨུ་པྤ་ཛྫ་མཱ་ན་ཀ་ཙི་ཏྟ་ཙེ་ཏ་སི་ཀཱ་ནཾ ཨོ་ཀཱ་ས་དཱ་ན་ཝ་སེ་ན ཨུ་པ་ཀཱ་ར་ཀ་ཏཱ ན་ཏྠི་པ་ཙྩ་ཡ་ཏཱ. ཨ་ཏྟ་ནོ ས་བྷཱ་ཝཱ་ཝི་ག་མེ་ན ཨ་པྤ་ཝ་ཏྟ་མཱ་ནཱ་ནཾ ཝི་ག་ཏ་བྷཱ་ཝེ་ན ཨུ་པ་ཀཱ་ར་ཀ་ཏཱ ཝི་ག་ཏ་པ་ཙྩ་ཡ་ཏཱ. ཨ་ཏྠ་ཏོ པ་ན དྭི་ནྣ་མྤི ཨ་ན་ནྟ་ར་པ་ཙྩ་ཡ་བྷཱ་ཝཱི་དྷ་མྨ་ཏྟཱ ཨ་ཝི་སེ་སོ ཝུ་ཏྟོ. ས་བྷཱ་ཝ་ཏཱ་མ་ཏྟེ་ན ཨུ་པ་ཀཱ་ར་ཀ་ཏཱ ཨ་ཏྠི་པ་ཙྩ་ཡ་ཏཱ, ནི་རོ་དྷཱ་ནུ་པ་ག་མ་ན་ཝ་སེ་ན ཨུ་པ་ཀཱ་ར་ཀ་ཏཱ ཨ་ཝི་ག་ཏ་པ་ཙྩ་ཡ་ཏཱ་ཏི པ་ཙྩ་ཡ་ཝི་སེ་སོ ཏེ་སཾ དྷ་མྨཱ་ཝི་སེ་སེ་པི ཝེ་དི་ཏ་བྦོ. དྷ་མྨཱ་ན་ཉྷི ས་མ་ཏྠ་ཏཱ་ཝི་སེ་སཾ ས་བྦཱ་ཀཱ་རེ་ན ཉ་ཏྭཱ བྷ་ག་ཝ་ཏཱ ཙ་ཏུ་ཝཱི་ས་ཏི་པ་ཙྩ་ཡཱ དེ་སི་ཏཱ་ཏི བྷ་ག་ཝ་ཏི ས་དྡྷཱ་ཡ ‘‘ཨེ་ཝཾ ཝི་སེ་སཱ ཨེ་ཏེ དྷ་མྨཱ’’ཏི སུ་ཏ་མ་ཡ་ཉཱ་ཎཾ ཨུ་པྤཱ་དེ་ཏྭཱ ཙི་ནྟཱ་བྷཱ་ཝ་ནཱ་མ་ཡ་ཉཱ་ཎེ་ཧི ཏ་ད་བྷི་ས་མ་ཡཱ་ཡ ཡོ་གོ ཀ་ར་ཎཱི་ཡོ. ཨ་ཝི་སེ་སེ་པི དྷ་མྨ་སཱ་མ་ཏྠི་ཡ་སྶ ཏ་ཐཱ ཏ་ཐཱ ཝི་ནེ་ཏ་བྦ་པུ་གྒ་ལཱ་ནཾ ཝ་སེ་ན ཧེ་ཊྛཱ ཝུ་ཏྟོ་པི པ་ཙྩ་ཡོ པུ་ན པ་ཀཱ་ར་ནྟ་རེ་ན ཝུ་ཙྩ་ཏི ཡ་ཐཱ ཨ་ཧེ་ཏུ་ཀ་དུ་ཀཾ ཝ་ཏྭཱ་པི ཧེ་ཏུ་ཝི་པྤ་ཡུ་ཏྟ་དུ་ཀཾ ཝི་ཡཱ་ཏི ད་ཊྛ་བྦཾ.
ཡ་སྨཱ མ་ཧཱ་བྷཱུ་ཏཱ ཨ་ཉྙ་མ་ཉྙཾ, ཨུ་པཱ་དཱ་རཱུ་པཱ་ན་ཉྩ ས་ཧ་ཛཱ་ཏ་པ་ཙྩ་ཡཱ, མ་ཧཱ་བྷཱུ་ཏཱ ཨ་ཉྙ་མ་ཉྙཾ ཨ་ཉྙ་མ་ཉྙ་ནི་སྶ་ཡ་པ་ཙྩ་ཡཱ, ཨུ་པཱ་དཱ་རཱུ་པཱ་ནཾ ནི་སྶ་ཡ་པ་ཙྩ་ཡཱ་ཝ, ཀ་བ་ལཱི༹་ཀཱ་རོ ཨཱ་ཧཱ་རོ ཨི་མ་སྶ ཀཱ་ཡ་སྶ ཨཱ་ཧཱ་ར་པ་ཙྩ་ཡོ, མ་ཧཱ་བྷཱུ་ཏཱ ཨ་ཉྙ་མ་ཉྙཾ, ཨུ་པཱ་དཱ་རཱུ་པཱ་ན་ཉྩ ཛཱི་ཝི་ཏི་ནྡྲི་ཡཾ ཀ་ཊ་ཏྟཱ་རཱུ་པཱ་ན་ཉྩ ཨ་ཏྠི་ཨ་ཝི་ག་ཏ་ཨི་ནྡྲི་ཡ་པ་ཙྩ་ཡཱ, ཏ་སྨཱ ཝུ་ཏྟཾ ‘‘རཱུ་པཾ རཱུ་པ་སྶ…པེ… ས་ཏྟ་དྷཱ པ་ཙྩ་ཡོ ཧོ་ཏཱི’’ཏི.
རཱུ་པཾ ཨ་རཱུ་པ་སྶཱཏི་ཨཱ་དཱི་སུ་པི ཧེ་ཊྛཱ ཝུ་ཏྟ་པ་ཙྩ་ཡུ་པྤ་ནྣ་དྷ་མྨེ སུ་ཊྛུ ཨུ་པ་ལ་ཀྑེ་ཏྭཱ པ་ཙྩ་ཡོ ཡོ་ཛེ་ཏ་བྦོ. རཱུ་པཾ རཱུ་པཱ་རཱུ་པ་སྶཱ་ཏི ན་ཏྠཱིཏི ཨི་དཾ ས་ཧ་ཛཱ་ཏ་པ་ཙྩ་ཡ་བྷཱུ་ཏ་མྤི རཱུ་པཾ རཱུ་པཱ་རཱུ་པ་དྭ་ཡ་སྶ པ་ཙྩ་ཡ་བྷཱ་ཝེ་ན ཨ་ནཱ་ག་ཏ་ནྟི ཀ་ཏྭཱ ཝུ་ཏྟཾ.
ས་བྦེ་སཾ པ་ཙྩ་ཡཱ་ནཾ ཨཱ་ར་མྨ་ཎ་པ་ཙྩ་ཡེ ཨུ་པ་ནི་སྶ་ཡ་པ་ཙྩ་ཡེ, ས་ཧ་ཛཱ་ཏ་ནཱ་ན་ཀྑ་ཎི་ཀ་ཙེ་ཏ་ནཱ་ཡ ཀ་མྨ་པ་ཙྩ་ཡེ, ས་ཧ་ཛཱ་ཏ་པུ་རེ་ཛཱ་ཏ་པ་ཙྪཱ་ཛཱ་ཏཱ་དི་བྷེ་ད་སྶ ཨ་ཏྠི་པ་ཙྩ་ཡེ ཙ ས་མོ་དྷཱ་ན་ཏོ ས་བྦེ་པི པ་ཙྩ་ཡཱ ས་ངྑེ་པ་ཏོ ཙ་ཏུ་བྦི་དྷཱ་ཡེ་ཝཱ་ཏི ད་སྶེ་ནྟོ ཨཱ་ཧ ‘‘ས་བྦེ པ་ནི་མེ’’ཏི་ཨཱ་དི.
ཨི་ཏི ཨ་བྷི་དྷ་མྨ་ཏྠ་ཝི་ཀཱ་སི་ནི་ཡཱ ནཱ་མ
ཨ་བྷི་དྷ་མྨཱ་ཝ་ཏཱ་ར་སཾ་ཝ་ཎྞ་ནཱ་ཡ
པ་ཙྩ་ཡ་ནི་དྡེ་ས་ཝ་ཎྞ་ནཱ ནི་ཊྛི་ཏཱ.
ནི་ག་མ་ན་ཀ་ཐཱ་ཝ་ཎྞ་ནཱ
༡༤༠༠-༢. ས་བྦ་དྷ་མྨེ་སུ ཨ་པྤ་ཊི་ཧ་ཏ་ག་ཏི་ཏཱ་ཡ སུ་ནྡ་རཱ མ་ཏི ཨི་མ་སྶཱ་ཏི སུ་མ་ཏི, ཏ་སྶ སུ་མ་ཏི་སྶ བྷ་ག་ཝ་ཏོ མ་ཏི་ཝི་ཙཱ་རཾ ཉཱ་ཎ་ཙཱ་རཾ བོ་དྷེ་ཏཱི་ཏི སུ་མ་ཏི་མ་ཏི་ཝི་ཙཱ་ར་བོ་དྷ་ནོ. ཝི་རུ་དྡྷཱ མ་ཏི ཡེ་སཾ ཏེ ཝི་མ་ཏི་ནོ, ཝི་རུ་དྡྷཱ མ་ཏཱི་ཏི ཙ ཝི་རུ་དྡྷ་ད་སྶ་ན་ནྟི ཨ་ཏྠོ. ཏེ་སཾ ཝི་མོ་ཧཾ ཝི་ནཱ་སེ་ཏཱི་ཏི ཝི་མ་ཏི་ཝི་མོ་ཧ་ཝི་ནཱ་ས་ནོ. ཡ་ཏོ ཡ་སྨཱ ནཱ་མ་ཏོ སུ་མ་ཏི་ནཱ བྷི་ཀྑུ་ནཱ མཱ་ན་ཏོ བ་ཧུ་མཱ་ནེ་ན ཨཱ་ཡཱ་ཙི་ཏ་ས་མྨཱ་ན་ཏོ ཨཱ་ཡཱ་ཙི་ཏོ ཧུ་ཏྭཱ ས་མྨཱ ཨ་ཝ་ན་ཏོ ས་དཱ་ཡེ་ཝ མ་ཏོ ཨ་ཡཾ, ཏ་ཏོ ཏ་སྨཱ མ་ཡཱ ར་ཙི་ཏོ ཨ་བྷི་དྷ་མྨཱ་ཝ་ཏཱ་རོ. ཏ་ཐཱ ཧི བྷཱ་ཝ་ནཱ སཱ་དྷཱུ་ནཾ ས་མྦྷཱ་ཝ་ནཱ ཧི་ཏ་ཝི་བྷཱ་ཝ་ནཱ ཧི་ཏ་པྤ་ཀཱ་ས་ན་ཏོ ས་དཱ ཏོ་ས་དཱ་ཏི ཡོ་ཛ་ནཱ.
༡༤༠༣-༡༤. ཨ་ཡུ་ཏྟཾ ཝཱ ཝི་རུ་དྡྷཾ ཝཱཏི ཨེ་ཏྠ ‘‘ཨ་ཊྛ་ཀ་ཐཱ་ཡ ཝི་མུ་ཁ་བྷཱུ་ཏཾ ཨ་ཡུ་ཏྟཾ ནཱ་མ, པཱ་ལི༹་ཡཱ ཝི་མུ་ཁ་བྷཱུ་ཏཾ ཝི་རུ་དྡྷ’’ནྟི ཝ་ད་ནྟི. བྱ་པྤ་ཐཱ་ནནྟི ཙ ཝཱ་ཙ་ནཱ་མ་གྒཱ་ན་ནྟི ཨ་ཏྠོ. ཏི་ཝི་དྷཱཏི ཨེ་ཀོ བྱ་པྤ་ཐོ ས་དྡ་ས་མྤ་ནྣོ, ན ཨ་ཏྠ་ས་མྤ་ནྣོ, ཨེ་ཀོ ཨ་ཏྠ་ས་མྤ་ནྣོ, ན ས་དྡ་ས་མྤ་ནྣོ, ཨེ་ཀོ ཨུ་བྷ་ཡ་ས་མྤ་ནྣོ་ཏི ཏི་པྤ་ཀཱ་རཱ་ཏི ཨ་ཏྠོ. ཧི་ཏ་མེ་ཝ ཨ་ཏྠོ་ཏི ཧི་ཏ་ཏྠོ, ཏཾ ཨ་ཏྟ་ནོ ཀཱ་མེ་ཏཱི་ཏི ཧི་ཏ་ཏྠ་ཀཱ་མོ. ཨ་སཾ་ཀི་ཎྞ་ཀུ་ལཱ་ཀུ་ལེ་ཧི ཨ་ས་མྦྷི་ནྣ་ཀུ་ལེ་ཧི སཾ་ཀི་ཎྞེ. ཀེ་ལཱ་སོ་ཡེ་ཝ སི་ཁ་རོ་ཏི ཀེ་ལཱ་ས་སི་ཁ་རོ, སོ ཧི ཧི་མ་ཝ་ཏོ ཙ་ཏུ་རཱ་སཱི་ཏི་ཡཱ ཀཱུ་ཊ་ས་ཧ་སྶཱ་ནཾ པཱ་མོ་ཀྑོ ར་ཛ་ཏ་མ་ཡོ མ་ཧཱ་སི་ཁ་རོ. ཏ་དཱ་ཀཱ་རེ་ཧི ས་བྦ་སེ་ཏེ་ཧི པཱ་སཱ་དེ་ཧི པ་ཊི་མ་ཎྜི་ཏ་ཏྟཱ ཀེ་ལཱ་ས…པེ… མ་ཎྜི་ཏོ. ཀ་ཎྷ་དཱ་སེ་ནཱཏི ཨེ་ཝཾ་ནཱ་མ་ཀེ་ན ཨུ་པཱ་ས་ཀེ་ན. པཱ་ཙཱི་ན་པཱ་སཱ་དེཏི པཱ་ཙཱི་ན་དི་སཱ་བྷཱ་ག་ས་ནྣི་སྶི་ཏེ པཱ་སཱ་དེ. ཨ་ཡནྟི ཨ་ཡ་མ་བྷི་དྷ་མྨཱ་ཝ་ཏཱ་རོ.
ནི་ཊྛི་ཏཱ་ཡཾ ཨ་བྷི་དྷ་མྨ་ཏྠ་ཝི་ཀཱ་སི་ནཱི ནཱ་མ
ཨ་བྷི་དྷ་མྨཱ་ཝ་ཏཱ་ར་སཾ་ཝ་ཎྞ་ནཱ.
ནི་ག་མ་ན་ཀ་ཐཱ
༡. ར་མྨེ པུ་ལ་ཏྠི་ན་ག་རེ ན་ག་རཱ་དྷི་རཱ་ཛེ,
ར་ཉྙཱ པ་ར་ཀྐ་མ་བྷུ་ཛེ་ན མ་ཧཱ་བྷུ་ཛེ་ན;
ཀཱ་རཱ་པི་ཏེ ཝ་ས་ཏི ཛེ་ཏ་ཝ་ནེ ཝི་ཧཱ་རེ,
ཡོ ར་མྨ་ཧ་མྨི་ཡ་ཝ་རཱུ་པ་ཝ་ནཱ་བྷི་རཱ་མེ.
༢. ས་མྤ་ནྣ་སཱི་ལ་ད་མ་སཾ་ཡ་མ་ཏོ་སི་ཏེ་ཧི,
ས་མྨཱ་ནི་ཏོ ཝ་སི་ག་ཎེ་ཧི གུ་ཎཱ་ཀ་རེ་ཧི;
པ་ཏྟོ མུ་ནི་ནྡ་ཝ་ཙ་ནཱ་དི་སུ ནེ་ཀ་ག་ནྠ-
ཛཱ་ཏེ་སུ ཙཱ་ཙ་རི་ཡ་ཏཾ མ་ཧི་ཏཾ ཝི་དཱུ་ཧི.
༣. ཉཱ་ཎཱ་ནུ་བྷཱ་ཝ་མི་ཧ ཡ་སྶ ཙ སཱུ་ཙ་ཡ་ནྟཱི,
སཾ་ཝ་ཎྞ་ནཱ ཙ ཝི་ན་ཡ་ཊྛ་ཀ་ཐཱ་དི་ཀཱ་ནཾ;
སཱ་ར་ཏྠ་དཱི་པ་ནི་མུ་ཁཱ མ་དྷུ་ར་ཏྠ་སཱ་ར-
ས་ནྡཱི་པ་ནེ་ན སུ་ཛ་ནཾ པ་རི་ཏོ་ས་ཡ་ནྟཱི.
༤. ཏ་སྶཱ་ནུ་ཀ་མྤ་མ་ཝ་ལ་མྦི་ཡ སཱ་རི་པུ་ཏྟ-
ཏྠེ་ར་སྶ ཐཱ་མ་ག་ཏ་སཱ་ར་གུ་ཎཱ་ཀ་ར་སྶ;
ཡོ སཱ་ས་ནེ ཛི་ན་ཝ་ར་སྶ ར་ཏིཾ ཨུ་ལཱ༹་རཾ,
པ་པྤོ་ཏི ན་ནྡི་པ་རི་ཝེ་ཎ་ནི་ཝཱ་ས་ཝཱ་སཱི.
༥. ས སཱ་དྷ་ཡཾ སོ་ཏུ་ཧི་ཏཾ ཨ་ན་པྤ་ཀཾ,
སུ་མ་ངྒ་ལོདཱི་རི་ཏ་ནཱ་མ་ཝི་སྶུ་ཏོ;
ཨ་ཀཱབྷི་དྷ་མྨ་ཏྠ་ཝི་ཀཱ་སི་ནིཾ ཨི་མཾ,
པ་ཀཱ་ས་ཡ་ནྟིཾ མ་དྷུ་ར་ཏྠ་ས་མྤ་ད་ནྟི.
ཨ་བྷི་དྷ་མྨཱ་ཝ་ཏཱ་ར་ཊཱི་ཀཱ ས་མ་ཏྟཱ.