༢༡. ཨེ་ཀ་ཝཱི་ས་ཏི་མོ པ་རི་ཙྪེ་དོ

པ་ཊི་པ་དཱ་ཉཱ་ཎ་ད་སྶ་ན་ཝི་སུ་དྡྷི་ནི་དྡེ་ས་ཝ་ཎྞ་ནཱ

༡༢༩༨. ཨ་ཊྛ་ཉཱ་ཎ་ཝ་སེ་ནེ་ཝཱཏི ཨུ་ད་ཡ་བྦ་ཡ་ཉཱ་ཎཱ་དཱི་ནཾ ཨ་ཊྛ་ནྣཾ ཉཱ་ཎཱ་ནཾ ཝ་སེ་ན. ཝི་པ་སྶ་ནཱ་ཙཱ་ར་སྶ མ་ཏྠ་ཀ་པྤ་ཏྟི་ཡཱ ས་ངྑཱ་རུ་པེ་ཀྑཱ་ཉཱ་ཎཾ སི་ཁཱ་པ་ཏྟཱ ཝི་པ་སྶ་ནཱ. སི་ཁཱ་པ་ཏྟི པ་ན་སྶཱ ཨུ་ད་ཡ་བྦ་ཡ་ཉཱ་ཎཱ་དཱི་ནཾ ཨ་ཊྛ་ཉཱ་ཎཱ་ནཾ ཝ་སེ་ནཱ་ཏི ཨཱ་ཧ ‘‘ཨ་ཊྛ་ཉཱ་ཎ་ཝ་སེ་ནཱ’’ཏི. ན་ཝ་མནྟི ས་ཙྩཱ་ནུ་ལོ་མི་ཀ་ཉཱ་ཎཾ. ཨི་ཏི ཨུ་ད་ཡ་བྦ་ཡཱ་དཱི་ནི ཨ་ཊྛ, ཨི་ད་ཉྩ ན་ཝ་མ་ཉཱ་ཎཾ པ་ཊི་པ་དཱ་ཉཱ་ཎ་ད་སྶ་ན་ནྟི པ་ཝུ་ཙྩ་ཏི. པ་ཊི་པ་ཛྫ་ཏི ཨེ་ཏཱ་ཡ ཨ་རི་ཡ་མ་གྒོ་ཏི པ་ཊི་པ་དཱ, ཨུ་ད་ཡ་བྦ་ཡཱ་དཱི་ནཾ ཛཱ་ན་ན་ཊྛེ་ན, པ་ཙྩ་ཀྑ་ཏོ ད་སྶ་ན་ཊྛེ་ན ཉཱ་ཎ་ད་སྶ་ནཉྩཱ་ཏི ཀ་ཏྭཱ.

༡༢༩༩. ཏཱ་ནི པ་ན ཉཱ་ཎཱ་ནི ས་རཱུ་པ་ཏོ ད་སྶེ་ཏུཾ ‘‘ཨ་ཊྛ ཉཱ་ཎཱ་ནཱི’’ཏི་ཨཱ་དི ཝུ་ཏྟཾ. ཏ་ཏྠ ཨུ་ད་ཡ་བྦ་ཡཱ་ནུ་པ་སྶ་ནཱ་ཉཱ་ཎཾ ཀི་ཉྩཱ་པི ཏཱི་ར་ཎ་པ་རི་ཉྙཱ་ཡ པ་ཏི་ཊྛཾ, ཏ་ཐཱ་པི ཡ་ཐཱ་ཝུ་ཏྟ་ཊྛེ་ན པ་ཊི་པ་དཱ་ཉཱ་ཎ་ད་སྶ་ན་མྤི ཧོ་ཏི་ཡེ་ཝཱ་ཏི ཏ་མྤི ཨི་དྷ ཝུ་ཏྟཾ. ཨི་ཏ་ར་ཏྠ པ་ན ཨུ་པྤ་ནྣ་མ་ཏྟཾ ཨ་པྤ་གུ་ཎཾ ས་ནྡྷཱ་ཡ ཝུ་ཏྟཾ. ཨ་པྤ་གུ་ཎ་ཉྷི ནི་ཙྩ་ས་ཉྙཱ་དི་པ་ཧཱ་ན་སི་དྡྷི་ཡཱ པ་ཧཱ་ན་པ་རི་ཉྙཱ་ཡ ཨ་དྷི་ཊྛཱ་ན་བྷཱུ་ཏཾ. ཡ་ཏོ ཏ་ད་དྷི་ག་མེ་ན ཨ་ཊྛཱ་ར་ས་སུ མ་ཧཱ་ཝི་པ་སྶ་ནཱ་སུ ཨེ་ཀ་ཙྩཱ ཨ་དྷི་ག་ཏཱ་ཝ ཧོ་ནྟི. ན ཧི ཨུ་ད་ཡ་བྦ་ཡཱ་ནཾ པ་ཙྩ་ཀྑ་ཏོ པ་ཊི་ཝེ་དྷེ་ན ཝི་ནཱ སཱ་མ་ཉྙཱ་ཀཱ་རཱ་ནཾ ཏཱི་ར་ཎ་མ་ཏྟེ་ན སཱ་ཏི་ས་ཡཾ པ་ཊི་པ་ཀྑ་པྤ་ཧཱ་ནཾ ས་མྦྷ་ཝ་ཏི. ཨ་ས་ཏི ཙ པ་ཊི་པ་ཀྑ་པྤ་ཧཱ་ནེ ཀུ་ཏོ ཉཱ་ཎཱ་དཱི་ནཾ ཝ་ཛི་ར་མི་ཝ ཨ་ཝི་ཧ་ཏ་ཝེ་ག་ཏཱ ཏི་ཁི་ཎ་ཝི་ས་དཱ་དི་ཏཱ ཝཱ, ཏ་སྨཱ པ་གུ་ཎ་བྷཱ་ཝ་པྤ་ཏྟཾ ཨུ་ད་ཡ་བྦ་ཡ་ཉཱ་ཎཾ པ་ཧཱ་ན་པ་རི་ཉྙཱ་པ་ཀྑི་ཡ་མེ་ཝ ད་ཊྛ་བྦཾ.

༡༣༠༠-༢. བྷ་ངྒེཏི ས་ངྑཱ་རཱ་ནཾ བྷ་ངྒེ. ཡ་ཐཱ་བྷཱུ་ཏ་ད་སྶཱ་ཝཱི བྷཱ་ཡ་ཏི ཨེ་ཏ་སྨཱ་ཏི བྷ་ཡཾ, ཏེ་བྷཱུ་མ་ཀ་དྷ་མྨཱ, ཏེ་སུ བྷ་ཡ་ཏོ ཨུ་པ་ཏི་ཊྛ་ནྟེ་སུ བྷཱ་ཡི་ཏ་བྦཱ་ཀཱ་ར་གྒཱ་ཧི་ཉཱ་ཎཾ བྷ་ཡེ་ཉཱ་ཎཾ. ཏ་ཐཱ ཧེ་ཏཾ ‘‘བྷ་ཡ་ཏུ་པ་ཊྛཱ་ན་ཉཱ་ཎ’’ནྟི ཝུ་ཙྩ་ཏི. མུ་ཙྩི་ཏུཾ ཨི་ཙྪ་ཏཱི་ཏི མུ་ཙྩི་ཏུ་ཀ་མྱཾ, ཙི་ཏྟཾ, པུ་གྒ་ལོ ཝཱ, ཏ་སྶ བྷཱ་ཝོ མུ་ཙྩི་ཏུ་ཀ་མྱ་ཏཱ, ཏཾ པ་ན ཉཱ་ཎ་མེ་ཝཱ་ཏི ཨཱ་ཧ ‘‘ཉཱ་ཎཾ མུ་ཙྩི་ཏུ་ཀ་མྱ་ཏཱ’’ཏི. པུ་ན པ་ཊི་ས་ངྑཱ་ནཱ་ཀཱ་རེ་ན པ་ཝ་ཏྟཾ ཉཱ་ཎཾ པ་ཊི་ས་ངྑཱ་ནུ་པ་སྶ་ནཱ་ཉཱ་ཎཾ. ནི་ར་པེ་ཀྑ་ཏཱ་ཡ ས་ངྑཱ་རཱ་ནཾ ཨུ་པེ་ཀྑ་ན་ཝ་སེ་ན པ་ཝ་ཏྟཾ ཉཱ་ཎཾ ས་ངྑཱ་རུ་པེ་ཀྑཱ་ཉཱ་ཎཾ. གཱ་ཐཱ་བ་ནྡྷ་ཏྠཾ པ་ན ཝི་ས་ནྡྷི་ནི་དྡེ་སོ. ཨོ་ལཱ༹་རི་ཀོ་ལཱ༹་རི་ཀ་སྶ ས་ཙྩ་པ་ཊི་ཙྪཱ་ད་ཀ་ཏ་མ་སྶ ཝི་ག་མ་ནེ་ན ས་ཙྩ་པ་ཊི་ཝེ་དྷཱ་ནུ་ཀཱུ་ལ་ཏྟཱ ས་ཙྩཱ་ནུ་ལོ་མི་ཀཾ. ཏཾ པ་ན ཨི་ད་ནྟི ཨཱ་ཧ ‘‘ས་ཙྩཱ་ནུ་ལོ་མ་ཉཱ་ཎ་ནྟི, ཨ་ནུ་ལོ་མཾ པ་ཝུ་ཙྩ་ཏཱི’’ཏི.

༡༣༠༣. ན་ནུ ཙ ཨུ་ད་ཡ་བྦ་ཡ་ཉཱ་ཎ་སྶ པ་གེ་ཝ སི་དྡྷ་ཏྟཱ ཀི་མ་ཏྠཾ པུ་ན ཏ་ཏྠཱ་པི ཨ་བྷི་ཡོ་གོ་ཏི ཙེ? ཨ་ནི་ཙྩཱ་དི་ལ་ཀྑ་ཎ་ས་ལླ་ཀྑ་ཎ་ཏྠཾ. ཨུ་ད་ཡ་བྦ་ཡ་ཉཱ་ཎ་ཉྷི ཧེ་ཊྛཱ ད་ས་ཧི ཨུ་པ་ཀྐི་ལེ་སེ་ཧི ཨུ་པ་ཀྐི་ལི་ཊྛཾ ཧུ་ཏྭཱ ཡཱ་ཐཱ་ཝ་ས་ར་ས་ཏོ ཏི་ལ་ཀྑ་ཎཾ ས་ལླ་ཀྑེ་ཏུཾ ནཱ་ས་ཀྑི, ཨུ་པ་ཀྐི་ལེ་ས་ཝི་ནི་མུ་ཏྟཾ པ་ན ས་ཀྐོ་ཏི, ཏ་སྨཱ ལ་ཀྑ་ཎ་ས་ལླ་ཀྑ་ཎ་ཏྠཾ པུ་ན ཏ་ཏྠེ་ཝ ཡོ་གོ ཀཱ་ཏ་བྦོ. ལ་ཀྑ་ཎཱ་ནི ཙ་སྶ ཨུ་ད་ཡ་བྦ་ཡཱ་དཱི་ནཾ ཨ་མ་ན་སི་ཀཱ་རཱ, ས་ནྟ་ཏི་ཨི་རི་ཡཱ་པ་ཐ་གྷ་ན་ཚ་ནྣ་ཏཱ་ཡ ཙ ནོ་པ་ཊྛ་ཧ་ནྟི, ཏ་སྨཱ ཨུ་ད་ཡ་བྦ་ཡཾ མ་ན་སི ཀ་ཏྭཱ ས་ནྟ་ཏིཾ ཨུ་གྒྷཱ་ཊེ་ཏྭཱ ཨ་ནི་ཙྩ་ལ་ཀྑ་ཎཾ, ཨ་བྷི་ཎྷ་པཱི་ལ༹་ནཾ པ་རི་གྒ་ཧེ་ཏྭཱ ཨི་རི་ཡཱ་པ་ཐཾ ཨུ་གྒྷཱ་ཊེ་ཏྭཱ དུ་ཀྑ་ལ་ཀྑ་ཎཾ, དྷཱ་ཏུ་ཡོ ཝི་ནི་བྦྷུ་ཛི་ཏྭཱ གྷ་ན་ཝི་ནི་བྦྷོ་གཾ ཀ་ཏྭཱ ཨ་ན་ཏྟ་ལ་ཀྑ་ཎ་ཉྩ ས་ལླ་ཀྑེ་ཏྭཱ ‘‘ཨ་ནི་ཙྩཱ དུ་ཀྑཱ ཨ་ན་ཏྟཱ’’ཏི ས་ངྑཱ་རཱ པུ་ན་པྤུ་ནཾ ས་མྨ་སི་ཏ་བྦཱ. ཏ་སྶེ་ཝཾ ཏུ་ལ་ཡ་ཏོ ཏཱི་ར་ཡ་ཏོ ཡ་དཱ ས་ངྑཱ་ར་ག་ཏཾ ཨ་ཏྟ་ནོ ལ་ཧུ་ཨུ་པ་ཊྛཱ་ནེ་ན, ཉཱ་ཎ་སྶ ཙ ཏི་ཀྑ་ཏཱ་ཡ ཏི་རོ་ཧི་ཏུ་པྤཱ་དཱ་དི་བྷེ་དཾ བྷི་ཛྫ་མཱ་ན་མེ་ཝ ཨུ་པ་ཊྛཱ་ཏི, བྷ་ངྒེ་ཡེ་ཝ ཏ་སྶ ཉཱ་ཎཾ ས་ནྟི་ཊྛ་ཏི, ཏ་དཱ བྷ་ངྒཱ་ནུ་པ་སྶ་ནཱ ནཱ་མ ཝི་པ་སྶ་ནཱ་ཉཱ་ཎཾ ཨ་དྷི་ག་ཏཾ ཧོ་ཏི. ཏ་སྶ ཏ་དེ་ཝ ས་ངྑཱ་ར་ནི་རོ་དྷཱ་ར་མྨ་ཎ་བྷ་ངྒཱ་ནུ་པ་སྶ་ནཾ ཨཱ་སེ་ཝ་ནྟ་སྶ ཡ་དཱ ས་བྦ་བྷ་ཝ་ཡོ་ནི་ག་ཏི་ཊྛི་ཏི་ནི་ཝཱ་སེ་སུ ས་ངྑཱ་རཱ བྷི་ཛྫ་ན་ས་བྷཱ་ཝ་ཏཱ་ཡ ཡ་ཀྑ་ར་ཀྑ་སཱ་ད་ཡོ ཝི་ཡ མ་ཧཱ་བྷ་ཡཾ ཧུ་ཏྭཱ ཨུ་པ་ཊྛ་ཧ་ནྟི, ཏ་དཱ་སྶ བྷ་ཡ་ཏུ་པ་ཊྛཱ་ན་ཉཱ་ཎཾ ཨ་དྷི་ག་ཏཾ ཧོ་ཏི. ཀིཾ པ་ནི་དཾ ཉཱ་ཎཾ བྷཱ་ཡ་ཏཱི་ཏི? ན བྷཱ་ཡ་ཏི. ཏ་ཉྷི ‘‘ཨ་ཏཱི་ཏཱ ས་ངྑཱ་རཱ ནི་རུ་དྡྷཱ, པ་ཙྩུ་པྤ་ནྣཱ ནི་རུ་ཛ྄ཛྷ་ནྟི, ཨ་ནཱ་ག་ཏཱ ནི་རུ་ཛ྄ཛྷི་སྶ་ནྟཱི’’ཏི ཏཱི་ར་ཎ་མ་ཏྟ་མེ་ཝ ཧོ་ཏི, བྱ་ས་ནཱ་པ་ནྣཱ་ནཾ པ་ན ས་བྦ་ས་ངྑཱ་རཱ་ནཾ བྷ་ཡ་ཏོ ཨུ་པ་ཊྛི་ཏཱ་ནཾ ག་ཧ་ཎེ་ན བྷ་ཡ་ཏུ་པ་ཊྛཱ་ན་ཉཱ་ཎ་ནྟི ཝུ་ཙྩ་ཏཱི་ཏི.

ཏ་སྶ ཏཾ བྷ་ཡ་ཏུ་པ་ཊྛཱ་ན་ཉཱ་ཎཾ ཨཱ་སེ་ཝ་ནྟ་སྶ ཡ་དཱ ས་བྦ་བྷ་ཝ་ག་ཏེ་སུ ས་ངྑཱ་རེ་སུ ཏཱ་ཎཾ ཝཱ ལེ་ཎཾ ཝཱ པ་རཱ་ཡ་ཎཾ ཝཱ ན པ་ཉྙཱ་ཡ་ཏི, ཨུ་ཀྑི་ཏྟཱ་སི་ཀོ ཝི་ཡ པ་ཙྩཱ་མི་ཏྟོ སཱ་དཱི་ན་ཝཱ ཨེ་ཝ ས་ངྑཱ་རཱ ཨུ་པ་ཊྛ་ཧ་ནྟི, ཏ་སྶ ས་ངྑཱ་རཱ་ནཾ ཨཱ་དཱི་ན་ཝ་མེ་ཝ པ་སྶ་ནྟ་སྶ ཨཱ་དཱི་ན་ཝ་ཉཱ་ཎཾ ནཱ་མ ཨུ་པྤ་ནྣཾ ཧོ་ཏི. ཏ་སྶེ་ཝཾ ས་བྦ་ས་ངྑཱ་རེ ཨཱ་དཱི་ན་ཝ་ཏོ པ་སྶ་ནྟ་སྶ ཡ་དཱ ཏི་བྷ་ཝ་པ་རི་ཡཱ་པ་ནྣེ་སུ ནི་བྦེ་དོ ཨུ་པྤ་ཛྫ་ཏི, ཨུ་ཀྐ་ཎྛཱ ས་ཎྛ་ཧ་ནྟི, ས་བྦ་ས་ངྑཱ་ར་ཝི་སཾ་ཡུ་ཏྟེ ས་ནྟི་པ་དེ ཨ་བྷི་ར་ཏིཾ པ་ཊི་ལ་བྷ་ཏི, ཏ་དཱ་སྶ ནི་བྦི་དཱ་ནུ་པ་སྶ་ནཾ ནཱ་མ ཉཱ་ཎཾ ཨུ་པྤ་ནྣཾ ཧོ་ཏི. ཏ་སྶ ཡ་དཱ ཨི་མི་ནཱ ནི་བྦི་དཱ་ཉཱ་ཎེ་ན ས་བྦ་ས་ངྑཱ་རེ་སུ ནི་བྦི་ནྡ་ནྟ་སྶ ཨེ་ཀ་ས་ངྑཱ་རེ་པི ཙི་ཏྟཾ ན ས་ཛྫ་ཏི, ས་བྦ་སྨཱ ས་ངྑཱ་ར་ཏོ ས་པྤ་མུ་ཁ་ག་ཏ་སྶ ཝི་ཡ མ་ཎྜཱུ་ཀ་སྶ མུ་ཙྩི་ཏུ་ཀཱ་མ་ཏཱ ཨུ་པྤ་ཛྫ་ཏི, ཏ་དཱ མུ་ཙྩི་ཏུ་ཀ་མྱ་ཏཱ་ཉཱ་ཎཾ ནཱ་མ ཨུ་པྤ་ནྣཾ ཧོ་ཏི. ཏ་སྶེ་ཝཾ ས་བྦ་ས་ངྑཱ་རེ་ཧི མུ་ཙྩི་ཏུ་ཀཱ་མ་སྶ ནི་ཙྩ་སུ་ཁ་སུ་བྷ་ཨ་ཏྟཱ་ཀཱ་རེ་ན པ་ན ཨུ་པ་ཊྛི་ཏུཾ ཨ་ས་མ་ཏྠ་ཏཾ པཱ་པེ་ཏྭཱ མུ་ཙྩ་ན་སྶ ཨུ་པཱ་ཡ་ས་མྤཱ་ད་ན་ཏྠཾ ཨ་ནི་ཙྩ་ནྟི་ཀ་ཏཱ་དཱི་ཧི ཨ་ནི་ཙྩ་ལ་ཀྑ་ཎཾ, ཨ་བྷི་ཎྷ་པ་ཊི་པཱི་ལ༹་ན་ཏཱ་དཱི་ཧི དུ་ཀྑ་ལ་ཀྑ་ཎཾ, ཨ་ཛ་ཉྙ་ཀ་ཏཱ་དཱི་ཧི པ་ཊི་ཀྐཱུ་ལ་ཏཾ, ཏུ་ཙྪ་ཏཱ་དཱི་ཧི ཨ་ན་ཏྟ་ལ་ཀྑ་ཎ་ཉྩ ཨཱ་རོ་པེ་ཏྭཱ ས་བྦ་ས་ངྑཱ་ར་ག་ཏཾ པ་རི་གྒ་ཎྷ་ནྟ་སྶ པ་ཊི་ས་ངྑཱ་ནུ་པ་སྶ་ནཱ་ཉཱ་ཎཾ ནཱ་མ ཨུ་པྤ་ནྣཾ ཧོ་ཏི. ཏེ་ན པ་ནེ་ཝཾ པ་རི་གྒ་ཧི་ཏ་ས་ངྑཱ་རེ་ན ཡཱ སཱ ‘‘སུ་ཉྙ་མི་དཾ ཨ་ཏྟེ་ན ཝཱ ཨ་ཏྟ་ནི་ཡེ་ན ཝཱ’’ཏི་ཨཱ་དི་ནཱ དྭི་ཀོ་ཊི་ཀཱ་དི་བྷེ་དཱ སུ་ཉྙ་ཏཱ ཝུ་ཏྟཱ, སཱ པ་རི་གྒ་ཧེ་ཏ་བྦཱ. ཏ་སྶེ་ཝཾ སུ་ཉྙ་ཏོ དི་སྭཱ ཏི་ལ་ཀྑ་ཎཾ ཨཱ་རོ་པེ་ཏྭཱ ས་མྨ་ས་ནྟ་སྶ ཡ་དཱ བྷ་ཡ་ཉྩ ན་ནྡི་ཉྩ ཝི་པྤ་ཧཱ་ཡ ཝི་སྶ་ཊྛ་བྷ་རི་ཡ་སྶ ཝི་ཡ ས་ངྑཱ་ར་ག་ཏེ་སུ ཨུ་པེ་ཀྑཱ ས་ནྟི་ཊྛ་ཏི, ཏཱི་སུ བྷ་ཝེ་སུ ཙི་ཏྟཾ ན ས་མྤ་སཱ་རི་ཡ་ཏི, ཏ་དཱ་སྶ ས་ངྑཱ་རུ་པེ་ཀྑཱ་ཉཱ་ཎཾ ནཱ་མ ཨུ་པྤ་ནྣཾ ཧོ་ཏི. ཏཾ པ་ནེ་ཏཾ ཡཱ་ཝ ནི་བྦཱ་ནཾ ན པ་སྶ་ཏི, ཏཱ་ཝ དི་སཱ་ཀཱ་ཀོ ཝི་ཡ ཀཱུ་པ་ཀ་ཡ་ཊྛིཾ པུ་ན་པྤུ་ནཾ ས་ངྑཱ་ར་མེ་ཝ ཨ་ན་བྷི་མ་ཏ་མྤི ནི་སྶཱ་ཡ ས་ངྑཱ་ར་ཝི་ཙི་ན་ནེ་པི མ་ཛ྄ཛྷ་ཏྟ་མེ་ཝ ཧུ་ཏྭཱ ཏི་ཊྛ་ཏི. ཏེ་ན ཝུ་ཏྟཾ ‘‘ཨེ་ཏེ་སུ པ་ན ཉཱ་ཎེ་སཱུ’’ཏི་ཨཱ་དི.

༡༣༠༦. ཝི་པ་སྶ་ནཱ…པེ… ཝུ་ཊྛཱ་ན་གཱ་མི་ནཱིཏི སི་ཁཾ ཨུ་ཏྟ་མ་བྷཱ་ཝཾ པ་ཏྟ་ཏྟཱ སི་ཁཱ་པ་ཏྟཱ. ཝུ་ཊྛཱ་ནཾ ག་ཙྪ་ཏཱི་ཏི ཝུ་ཊྛཱ་ན་གཱ་མི་ནཱི. ‘‘ཝུ་ཊྛཱ་ན’’ནྟི ཧི བ་ཧི་དྡྷཱ ནི་མི་ཏྟ་བྷཱུ་ཏཱ ཨ་བྷི་ནི་ཝི་ཊྛ་ཝ་ཏྠུ་ཏོ ཙེ་ཝ ཨ་ཛ྄ཛྷ་ཏྟ་པྤ་ཝ་ཏྟ་ཏོ ཙ ཝུ་ཊྛ་ཧ་ན་ཏོ མ་གྒོ ཝུ་ཙྩ་ཏི, ཏཾ ག་ཙྪ་ཏཱི་ཏི ཝུ་ཊྛཱ་ན་གཱ་མི་ནཱི, མ་གྒེ་ན ས་དྡྷིཾ གྷ་ཊཱི་ཡ་ཏཱི་ཏི ཨ་ཏྠོ.

༡༣༠༧. ཏནྟི ཡཾ སི་ཁཱ་པ་ཏྟཱ ཝི་པ་སྶ་ནཱ ས་ཙྩཱ་ནུ་ལོ་མ་ཉཱ་ཎ་ནྟི ཙ ཝུ་ཙྩ་ཏི, ཏཾ ས་ངྑཱ་རུ་པེ་ཀྑཱ་ཉཱ་ཎཾ. ཨཱ་སེ་ཝ་ནྟ་སྶཱཏི པུ་ན་པྤུ་ནཾ ས་མྨ་ས་ན་ཝ་སེ་ན སེ་ཝ་ནྟ་སྶ བྷཱ་ཝེ་ནྟ་སྶ བ་ཧུ་ལཱི་ཀ་རོ་ནྟ་སྶ. ཏ་སྶ ཧི ཨ་དྷི་མོ་ཀྑ་ས་དྡྷཱ བྷཱ་ཝ་ནཱ་ཝ་སེ་ན བ་ལ་ཝ་ཏ་རཱ ནི་བྦ་ཏྟི་སྶ་ཏི, ཝཱི་རི་ཡཾ སུ་པ་གྒ་ཧི་ཏཾ པ་ཊི་པ་ཀྑ་ཝི་དྷ་མ་ན་ས་མ་ཏྠཾ ཧོ་ཏི, ཨཱ་ར་མྨ་ཎཱ་བྷི་མུ་ཁ་བྷཱ་ཝེ་ན ས་ཏི སུ་པ་ཏི་ཊྛི་ཏཱ ཧོ་ཏི, པ་སྶ་དྡྷི་སུ་ཁཱ་ནཾ སཱ་ཏི་ས་ཡ་ཏཱ་ཡ ཙི་ཏྟཾ སུ་ས་མཱ་ཧི་ཏཾ, ཏ་ཏོ་ཝ ཨ་ནུ་ལོ་མ་ཉཱ་ཎུ་པྤ་ཏྟི་ཡཱ པ་ཙྩ་ཡོ བྷ་ཝི་ཏུཾ ས་མ་ཏྠཱ ཏི་ཀྑ་ཏ་མཱ ས་ངྑཱ་རུ་པེ་ཀྑཱ ཨུ་པྤ་ཛྫ་ཏི.

༡༣༠༨-༡༢. ཨ་ནི་ཙྩཱ…པེ… ཝོ་ཏ་ར་ཏེ་ཝ སཱཏི ཨ་ནི་ཙྩཱ་དཱི་སུ ཨེ་ཀེ་ན ཨཱ་ཀཱ་རེ་ན ས་མྨ་ས་ནྟཱི ས་ཏྟ་ཀྑ་ཏྟུཾ པ་ཝ་ཏྟི་ཏྭཱ བྷི་ཛྫ་ནྟཱི བྷ་ཝ་ངྒཾ ཨོ་ཏི་ཎྞཱ ནཱ་མ ཧོ་ཏི, ཏ་ཏོ པ་རཾ བྷ་ཝ་ངྒ་ཝཱ་རོ་ཏི ཀ་ཏྭཱ. ས་ངྑཱ་རུ་པེ་ཀྑཱ་ཀ་ཏ་ན་ཡེ་ནཱཏི ཨ་ནི་ཙྩཱ་དི་ནཱ ཨཱ་ར་མྨ་ཎ་ཀ་ར་ཎ་ཝ་སེ་ནེ་ཝ ས་ངྑཱ་རུ་པེ་ཀྑཱ་ཡ ཀ་ཏ་ན་ཡེ་ན, ན ས་མྨ་སི་ཏ་ན་ཡེ་ན. ཏེ་ནཱ་ཧ ‘‘ཨ་ནི་ཙྩཱ་དི…པེ… ཀུ་རུ་མཱ་ན’’ནྟི. བྷ་ཝ་ངྒཱ་ཝ་ཊྚ་ནཾ ཀ་ཏྭཱཏི བྷ་ཝ་ངྒ་སྶ ནི་ཝ་ཏྟ་ནཾ ཀ་ཏྭཱ ཙི་ཏྟ་སྶ བྷ་ཝ་ངྒ་ཝ་སེ་ན པ་ཝ་ཏྟི་ཏུཾ ཨ་ད་ཏྭཱ. པ་རི་ཀ་མྨནྟི མ་གྒ་སྶ པ་རི་ཀ་མྨ་ཏྟཱ པ་ཊི་ས་ངྑཱ་ར་ཀ་ཏྟཱ. ཨུ་པ་ཙཱ་རནྟི མ་གྒ་སྶ ཨཱ་ས་ནྣ་ཏྟཱ, ས་མཱི་པ་ཙཱ་རི་ཏྟཱ ཝཱ.

༡༣༡༣-༦. ཨ་ནུ་ལོ་མ་ཏྟཾ ས་ཡ་མེ་ཝ ཝ་ད་ཏི ‘‘པུ་རི་མཱ་ན’’ནྟི་ཨཱ་དི་ནཱ. ཨི་ད་ཉྷི ཨ་ནི་ཙྩ་ལ་ཀྑ་ཎཱ་དི་ཝ་སེ་ན ས་ངྑཱ་རེ ཨཱ་ར་བྦྷ པ་ཝ་ཏྟ་ཏྟཱ, ‘‘ཨུ་ད་ཡ་བྦ་ཡ་ཝ་ནྟཱ་ནཾ་ཡེ་ཝ ཝ་ཏ དྷ་མྨཱ་ནཾ ཨུ་ད་ཡ་བྦ་ཡ་ཉཱ་ཎཾ ཨུ་པྤཱ་ད་ཝ་ཡེ ཨ་དྡ་སཱ’’ཏི ཙ ‘‘བྷ་ངྒ་ཝ་ནྟཱ་ནཾ་ཡེ་ཝ ཝ་ཏ བྷ་ངྒཱ་ནུ་པ་སྶ་ནཾ བྷ་ངྒ་མ་དྡ་སཱ’’ཏི ཙ ‘‘ས་བྷ་ཡཾ་ཡེ་ཝ ཝ་ཏ བྷ་ཡ་ཏུ་པ་ཊྛཱ་ན་སྶ བྷ་ཡ་ཏོ ཨུ་པ་ཊྛི་ཏ’’ནྟི ཙ ‘‘སཱ་དཱི་ན་ཝེ་ཡེ་ཝ ཝ་ཏ ཨཱ་དཱི་ན་ཝཱ་ནུ་པ་སྶ་ནཾ ཨཱ་དཱི་ན་ཝ་མ་དྡ་སཱ’’ཏི ཙ ‘‘ནི་བྦི་ནྡི་ཏ་བྦེ་ཡེ་ཝ ཝ་ཏ ནི་བྦི་དཱ་ཉཱ་ཎཾ ནི་བྦི་ནྡ’’ནྟི ཙ ‘‘མུ་ཙྩི་ཏ་བྦ་མྷི་ཡེ་ཝ ཝ་ཏ མུ་ཙྩི་ཏུ་ཀ་མྱ་ཏཱ་ཉཱ་ཎཾ མུ་ཙྩི་ཏུ་ཀཱ་མཾ ཛཱ་ཏ’’ནྟི ཙ ‘‘པ་ཊི་ས་ངྑཱ་ཏ་བྦ་མེ་ཝ ཝ་ཏ པ་ཊི་ས་ངྑཱ་ཉཱ་ཎེ་ན པ་ཊི་ས་ངྑཱ་ཏ’’ནྟི ཙ ‘‘ཨུ་པེ་ཀྑི་ཏ་བྦཾ་ཡེ་ཝ ཝ་ཏ ས་ངྑཱ་རུ་པེ་ཀྑཱ་ཡ ཨུ་པེ་ཀྑི་ཏ’’ནྟི ཙ ཨ་ཏྠ་ཏོ ཝ་ད་མཱ་ནཾ ཝི་ཡ ཨི་མེ་ས་ཉྩ ཨ་ཊྛ་ནྣཾ ཉཱ་ཎཱ་ནཾ ཀ་ཏ་ཀི་ཙྩ་ཏཱ་ཡ ཨ་ནུ་ལོ་མེ་ཏི ས་བྦཱ་སཾ་ཡེ་ཝ ཝི་པ་སྶ་ནཱ་ནཾ ལ་ཀྑ་ཎ་ཏྟ་ཡ་ས་མྨ་ས་ན་ཀི་ཙྩ་ཏྟཱ, ཏ་ཐཱ ཨུ་པ་རི ཙ ཨ་རི་ཡ་མ་གྒེ ས་ཏྟ་ཏིཾ་སཱ་ཡ བོ་དྷི་པ་ཀྑི་ཡ་དྷ་མྨཱ་ནཾ ཏཱ་ཡ པ་ཊི་པ་དཱ་ཡ པ་ཏྟ་བྦ་ཏཱ་ཡ. ན ཧི ཨ་ནུ་ལོ་མ་ཉཱ་ཎེ ཐཱུ་ལ་ཐཱུ་ལ་ས་ཙྩ་པ་ཊི་ཙྪཱ་ད་ཀ་སཾ་ཀི་ལེ་ས་ཝི་ཀྑ་མྦྷ་ན་ཝ་སེ་ན ཨ་པྤ་ཝ་ཏྟ་ནྟེ གོ་ཏྲ་བྷུ་ཉཱ་ཎཾ ཨུ་པྤ་ཛྫ་ཏི, གོ་ཏྲ་བྷུ་ཉཱ་ཎེ ཙ ཨ་ནུ་པྤ་ནྣེ མ་གྒ་ཉཱ་ཎཾ ན ཨུ་པྤ་ཛྫ་ཏི, ཏ་སྨཱ པུ་རི་མ་པ་ཙྪི་མཱ་ནཾ བྷཱ་གཱ་ནཾ ཨ་ནུ་ལོ་མ་ཏྟཱ ‘‘ཨ་ནུ་ལོ་མ་ནྟི ས་ཉྙི་ཏ’’ནྟི. ཏེ་ནེ་ཝཱཏི ཧེ་ཊྛི་མ་ཉཱ་ཎཱ་ནཾ ཨ་ནུ་ལོ་མ་མུ་ཁེ་ན, ཨུ་པ་རི བོ་དྷི་པ་ཀྑི་ཡཱ་ནཾ ཨ་ནུ་ལོ་མ་ན་ཏོ ཙ. ས་ཙྩཱ་ནུ་ལོ་མ་ཉཱ་ཎ་ནྟི པ་ཝུ་ཙྩ་ཏི མ་གྒ་ས་ཙྩ་སྶ ཨ་ནུ་ལོ་མི་ཀ་ཏྟཱ. ཝུ་ཊྛཱ་ན་གཱ་མི་ནི་ཡཱཏི ས་ངྑཱ་རཱ་ར་མྨ་ཎཱ་ཡ ཝུ་ཊྛཱ་ན་གཱ་མི་ནི་ཡཱ ཝི་པ་སྶ་ནཱ་ཡ. པ་རི་ཡོ་སཱ་ནནྟི པུ་རི་མཱ ཀོ་ཊི. ས་ངྑཱ་རཱ་ར་མྨ་ཎ་ཝི་པ་སྶ་ནཱ་སུ ཧི ཨ་ཡཾ ཝི་སེ་ས་ཏོ ཝུ་ཊྛཱ་ན་གཱ་མི་ནི་ཝི་པ་སྶ་ནཱ་ཏི. ཨ་ས་ངྑ་ཏཱ་ར་མྨ་ཎཾ པ་ན ས་བྦེ་ན ས་བྦཾ ཨ་རི་ཡ་མ་གྒ་ས་ངྑཱ་ཏཾ ཝུ་ཊྛཱ་ནཾ ག་ཙྪ་ཏི ཨུ་པེ་ཏཱི་ཏི. ཏ་ཏོ་པི ཧི ཝི་སེ་ས་ཏོ ‘‘ཝུ་ཊྛཱ་ན་གཱ་མི་ནི་ཝི་པ་སྶ་ནཱ’’ཏི ཝ་ཏྟ་བྦ་ཏཾ ལ་བྷ་ཏཱི་ཏི ཨཱ་ཧ ‘‘ཉེ་ཡྻཾ ས་བྦ་པྤ་ཀཱ་རེ་ནཱ’’ཏི་ཨཱ་དི.

༡༣༡༧-༨. ཀི་ཏྟི་ཏཱཏི ཐོ་མི་ཏཱ, ཨ་རི་ཡ་མ་གྒཱ་དྷི་ཊྛཱ་ན་ཏཱ་ཡ མ་ཧ་ནྟཱ་ནཾ སཱི་ལ་ཀྑ་ནྡྷཱ་དཱི་ནཾ ཨེ་ས་ན་ཏོ ག་ཝེ་ས་ན་ཏོ མ་ཧེ་སི་ནཱ ས་མྨཱ་ས་མྦུ་དྡྷེ་ན. ས་ནྟ་ཀི་ལེ་ས་ཏཱ་ཡ ས་ནྟཱ. ཡོ་གནྟི བྷཱ་ཝ་ནཾ, བྷཱ་ཝ་ནཱ་བྷི་ཡོ་གཾ ཝཱ.

ཨི་ཏི ཨ་བྷི་དྷ་མྨ་ཏྠ་ཝི་ཀཱ་སི་ནི་ཡཱ ནཱ་མ

ཨ་བྷི་དྷ་མྨཱ་ཝ་ཏཱ་ར་སཾ་ཝ་ཎྞ་ནཱ་ཡ

པ་ཊི་པ་དཱ་ཉཱ་ཎ་ད་སྶ་ན་ཝི་སུ་དྡྷི་ནི་དྡེ་ས་ཝ་ཎྞ་ནཱ ནི་ཊྛི་ཏཱ.