༡༧. ས་ཏྟ་ར་ས་མོ པ་རི་ཙྪེ་དོ
ཨ་བྷི་ཉྙཱ་ར་མྨ་ཎ་ནི་དྡེ་ས་ཝ་ཎྞ་ནཱ
༡༡༠༤-༥. པ་ཉྩ ཨི་དྡྷི་ཝི་དྷཱ་དཱི་ནཱིཏི –
‘‘ཨི་དྡྷི་ཝི་དྷཾ དི་བྦ་སོ་ཏཾ, པ་ར་ཙི་ཏྟ་ཝི་ཛཱ་ན་ནཱ;
པུ་བྦེ་ནི་ཝཱ་སཱ་ནུ་སྶ་ཏི, དི་བྦ་ཙ་ཀྑཱུ་ཏི པ་ཉྩ་དྷཱ’’ཏི. –
ཨེ་ཝ་མཱ་ག་ཏཱ པ་ཉྩ. ས་ཏྟཱ་བྷི་ཉྙཱ ཨི་མཱ པ་ནཱཏི ཨ་ཏཱི་ཏཾ་ས་ཉཱ་ཎ་སྶ པུ་བྦེ་ནི་ཝཱ་སཱ་ནུ་སྶ་ཏི་ཉཱ་ཎེ, མ་ནོ་མ་ཡ་ཉཱ་ཎ་སྶ ཙ ཨི་དྡྷི་ཝི་དྷ་ཉཱ་ཎེ ཨ་ནྟོ་ག་དྷ་ཏྟཱ ཝུ་ཏྟཾ. ཨ་ཏཱི་ཏཾ་ས་ཉཱ་ཎཾ ནཱ་མ པ་རེ་སཾ པ་ཙྩུ་པྤ་ནྣ་བྷ་ཝེ ཡཱ་ཝ པ་ཊི་ས་ནྡྷི་པ་རི་ཡོ་སཱ་ནཾ པ་ཝ་ཏྟ་ཙི་ཏྟཱ་ར་མྨ་ཎཾ ཉཱ་ཎཾ. མ་ནོ་མ་ཡ་ཉཱ་ཎ་མྤི ནཱ་མ མ་ནོ་མ་ཡ་ཀཱ་ཡཱ་བྷི་ནི་མྨཱ་ནཱ་དི་ཝ་ས་པྤ་ཝ་ཏྟཾ ཨི་དྡྷི་ཝི་དྷ་ཉཱ་ཎཾ.
༡༡༠༦. ཨི་དཱ་ནི ཨི་མེ་སཾ ཨ་བྷི་ཉྙཱ་ཉཱ་ཎཱ་ནཾ ཨཱ་ར་མྨ་ཎ་ཝི་ནི་ཙྪ་ཡེ ཨ་ས་མྨོ་ཧ་ཏྠཾ ཏཾ ད་སྶེ་ཏུ་མཱ་ར་བྷ་ནྟོ ཨཱ་ཧ ‘‘ས་ཏྟ་ནྣ’’ནྟི་ཨཱ་དི. ཙ་ཏྟཱ་རོ ཨཱ་ར་མྨ་ཎ་ཏྟི་ཀཱཏི པ་རི་ཏྟཱ་ར་མྨ་ཎ་ཏྟི་ཀོ མ་གྒཱ་ར་མྨ་ཎ་ཏྟི་ཀོ ཨ་ཏཱི་ཏཱ་ར་མྨ་ཎ་ཏྟི་ཀོ ཨ་ཛ྄ཛྷ་ཏྟཱ་ར་མྨ་ཎ་ཏྟི་ཀོ་ཏི ཨི་མེ ཙ་ཏྟཱ་རོ ཨཱ་ར་མྨ་ཎ་ཏྟི་ཀཱ. ཨེ་ཏྠཱཏི ཨི་དཾ པ་ཙྩཱ་མ་ས་ནཾ ཀིཾ ཏི་ཀཱ་ནཾ, ཨུ་དཱ་ཧུ ཨཱ་ར་མྨ་ཎཱ་ན་ནྟི, ཀི་ཉྩེ་ཏྠ – ཡ་དི ཏི་ཀཱ་ནཾ, ཏ་ད་ཡུ་ཏྟཾ. ན ཧི ཏི་ཀེ་སུ ཨ་བྷི་ཉྙཱ་ཉཱ་ཎཱ་ནི པ་ཝ་ཏྟ་ནྟི. ཨ་ཐ ཨཱ་ར་མྨ་ཎཱ་ནཾ, ཏ་མྤི ཨ་ཡུ་ཏྟཾ. ན ཧི ཨ་ཉྙཾ ཨུ་དྡི་སི་ཏྭཱ ཨ་ཉྙ་སྶ པ་ཙྩཱ་མ་ས་ནཾ ཡུ་ཏྟ་ནྟི. ཡ་ཐཱ ཨི་ཙྪ་སི, ཏ་ཐཱ ཧོ་ཏུ. བྷ་ཝ་ཏུ ཏཱ་ཝ ཏི་ཀཱ་ནཾ, ན་ནུ ཝུ་ཏྟཾ ‘‘ཏི་ཀེ་སུ ཨ་བྷི་ཉྙཱ་ཉཱ་ཎཱ་ནི ན་པྤ་ཝ་ཏྟ་ནྟཱི’’ཏི? ནཱ་ཡཾ ཝི་རོ་དྷོ ཏི་ཀ་ཝོ་ཧཱ་རེ་ན ཨཱ་ར་མྨ་ཎཱ་ནཾ་ཡེ་ཝ ག་ཡ྄ཧ་མཱ་ན་ཏྟཱ. ཨ་ཐ ཝཱ པ་ན ཧོ་ཏུ ཨཱ་ར་མྨ་ཎཱ་ནཾ, ན་ནུ ཝུ་ཏྟཾ ‘‘ཨ་ཉྙཾ ཨུ་དྡི་སི་ཏྭཱ ཨ་ཉྙ་སྶ པ་ཙྩཱ་མ་ས་ནཾ ཨ་ཡུ་ཏྟ’’ནྟི. ཨ་ཡ་མྤི ན དོ་སོ ཡ་ཐཱ་ཝུ་ཏྟ་ཀཱ་ར་ཎེ་ནེ་ཝཱ་ཏི.
༡༡༠༧-༡༠. པ་རི་ཏྟཱ་དཱི་སུ ས་ཏྟ་སཱུཏི ཨ་ས་ཏི་པི ཝ་ཏྠུ་བྷེ་དེ བྷཱུ་མི་ཀཱ་ལ་ས་ནྟཱ་ན་བྷེ་ད་ཝ་སེ་ན བྷི་ནྣེ་སུ པ་རི་ཏྟ་མ་ཧ་གྒ་ཏ་ཨ་ཏཱི་ཏཱ་ནཱ་ག་ཏ་པ་ཙྩུ་པྤ་ནྣ་ཨ་ཛ྄ཛྷ་ཏྟ་བ་ཧི་དྡྷཱ་ར་མྨ་ཎ་ཝ་སེ་ན ས་ཏྟ་སུ པ་རི་ཏྟཱ་དི་ཨཱ་ར་མྨ་ཎ་ཝི་བྷཱ་གེ་སུ. ཨི་དྡྷི་ཝི་དྷ་ཉཱ་ཎ་སྶ མ་གྒཱ་ར་མྨ་ཎ་ཏཱ་ཡ ཨ་བྷཱ་ཝ་ཏོ ཨི་དྷ མ་གྒཱ་ར་མྨ་ཎ་ཏྟི་ཀོ ན ལ་བྦྷ་ཏི. ཀཱ་ཡཾ ཙི་ཏྟ་ས་ནྣི་སྶི་ཏཾ ཀ་ཏྭཱ ཨ་དི་སྶ་མཱ་ནེ་ན ཀཱ་ཡེ་ན ག་ནྟུ་ཀཱ་མོ་ཏི ས་མྦ་ནྡྷོ. ཙི་ཏྟ་ས་ནྣི་སྶི་ཏ་ཀ་ར་ཎ་ཉྩ ཏཾ ཝི་ཡ ཀཱ་ཡ་སྶ ཨ་དི་སྶ་མཱ་ན་སཱི་གྷ་ག་ཏི་ཀ་ཏཱ་ཝ་སེ་ན ཏ་གྒ་ཏི་ཀ་ཏཱ་པཱ་ད་ནཾ. ཡ་ཐཱ ཙི་ཏྟཾ ན དི་སྶ་ཏི སཱི་གྷ་ག་མ་ན་ཉྩ, ཨེ་ཝཾ ཀཱ་ཡ་མྤི ཨ་དི་སྶ་མཱ་ནཾ, སཱི་གྷ་ག་མ་ན་ཉྩ ཀ་ཏྭཱ ཡ་ཐི་ཙྪི་ཏ་ཊྛཱ་ནཾ ག་ནྟུ་ཀཱ་མོ་ཏི ཨ་ཡ་ཉྷེ་ཏྠ ཨ་ཏྠོ. ཙི་ཏྟ་ཝ་སེ་ནཱཏི མ་ཧ་གྒ་ཏ་ཙི་ཏྟ་ཝ་སེ་ན པ་རི་ཎཱ་མེ་ཏཱི་ཏི པཱ་ཋ་སེ་སོ. ཏེ་ནཱ་ཧ ‘‘ཏཾ མ་ཧ་གྒ་ཏེ ཙ ཙི་ཏྟ་སྨིཾ ས་མཱ་རོ་པེ་ཏཱི’’ཏི. པཱ་ད་ཀ་ཛ྄ཛྷཱ་ན་ཉྷི ས་མཱ་པ་ཛྫི་ཏྭཱ ཝུ་ཊྛཱ་ཡ ‘‘ཨ་ཡཾ ཀཱ་ཡོ ཨི་དཾ ཙི་ཏྟཾ ཝི་ཡ ཨ་དི་སྶ་མཱ་ནོ, སཱི་གྷ་ག་མ་ནོ ཙ ཧོ་ཏཱུ’’ཏི པ་རི་ཀ་མྨཾ ཀ་རོ་ཏི, པ་རི་ཀ་མྨཾ པ་ན ཀ་ཏྭཱ པུ་ན ས་མཱ་པ་ཛྫི་ཏྭཱ ཝུ་ཊྛཱ་ཡ ཏ་ཐེ་ཝ པ་རི་ཀ་མྨཾ ཀ་རོ་ནྟོ ཀཱ་ཡཾ ག་ཧེ་ཏྭཱ མ་ཧ་གྒ་ཏེ པཱ་ད་ཀ་ཙི་ཏྟེ ས་མཱ་རོ་པེ་ཏི, ཏ་གྒ་ཏི་ཀཾ ཀ་རོ་ཏི ཝི་ཡ, ཨ་དི་སྶ་མཱ་ནཾ, སཱི་གྷ་ག་མ་ན་ཉྩ ཀ་རོ་ཏི. ཏཾ པ་ན སཱི་གྷ་ག་མ་ན་ཏྠཾ ཨ་བྷཱ་ཝི་ཏི་དྡྷི་པཱ་དཱ་ནཾ ཝི་ཡ ད་ནྡྷཾ ཨ་པྤ་ཝ་ཏྟི་ཏྭཱ ཀ་ཏི་པ་ཡ་ཙི་ཏྟ་ཝཱ་རེ་ཧེ་ཝ ཨི་ཙྪི་ཏ་ཊྛཱ་ན་པྤ་ཏྟི་ཝ་སེ་ན ད་ཊྛ་བྦཾ, ན ཨེ་ཀ་ཙི་ཏྟ་ཀྑ་ཎེ་ནེ་ཝ. ‘‘ནཱ་ཧཾ, བྷི་ཀྑ་ཝེ, ཨ་ཉྙཾ ཨེ་ཀ་དྷ་མྨ་མྤི ས་མ་ནུ་པ་སྶཱ་མི, ཡཾ ཨེ་ཝཾ ལ་ཧུ་པ་རི་ཝ་ཏྟཾ, ཡ་ཐ་ཡི་དཾ, བྷི་ཀྑ་ཝེ, ཙི་ཏྟ’’ནྟི (ཨ. ནི. ༡.༤༨) ཧི ཨེ་ཏྠ ཨ་ཉྙ-གྒ་ཧ་ཎེ་ནེ་ཝ རཱུ་པ་དྷ་མྨཱ་ནཾ ག་ཧི་ཏ་ཏྟཱ ཙི་ཏྟ་ཀྑ་ཎ་ཝ་སེ་ན རཱུ་པ་པྤ་ཝ་ཏྟི ན ཡུ་ཏྟཱ. ཡ་ཏྠ ཡ་ཏྠ ཙ དྷ་མྨཱ ཨུ་པྤ་ཛྫ་ནྟི, ཏ་ཏྠ ཏ་ཏྠེ་ཝ བྷི་ཛྫ་ནྟི ཙ, ན ཙ ཨི་དྡྷི་བ་ལེ་ན དྷ་མྨཱ་ནཾ ཀེ་ན་ཙི ལ་ཀྑ་ཎ་ཉྙ་ཐ་ཏྟཾ ས་ཀྐཱ ཀཱ་ཏུ་ནྟི. ཙི་ཏྟ་ཝ་སེ་ན རཱུ་པ་ཀཱ་ཡཾ པཱ་ད་ཀ་ཛ྄ཛྷཱ་ནེ ས་མཱ་རོ་པེ་ནྟ་སྶ ཀཱ་ཡ་མེ་ཝ ཨཱ་ར་མྨ་ཎ་ནྟི ཨཱ་ཧ ‘‘ཀཱ་ཡཱ་ར་མྨ་ཎ་ཏོ’’ཏི, ཀཱ་ཡེ ཝ་ཎྞཱ་ར་མྨ་ཎ་ཏོ་ཏི ཝུ་ཏྟཾ ཧོ་ཏི. ཀཱ་ཡ་ས་ནྣི་སྶི་ཏཾ ཀ་ཏྭཱ ཙི་ཏྟནྟི ཨེ་ཏྠ ན ཙི་ཏྟཾ ཀཱ་ཡཾ ཝི་ཡ ད་ནྡྷཾ དི་སྶ་མཱ་ནཾ ཀ་རོ་ཏི, ཀི་ནྟུ ད་ནྡྷ་དི་སྶ་མཱ་ན་ག་ཏི་ཀ་ར་ཎ་མ་ཏྟ་མེ་ཝཱ་ཏི ད་ཊྛ་བྦཾ.
༡༡༡༢-༣. ཨ་ནཱ་ག་ཏ་མ་ཏཱི་ཏ་ཉྩ ཀ་རོ་ཏི ཝི་ས་ཡཾ ཡ་དཱཏི མ་ཧཱ་དྷཱ་ཏུ་ནི་དྷཱ་ནེ མ་ཧཱ་ཀ་སྶ་པ་ཏྠེ་རཱ་དཱི་ནཾ ཝི་ཡ ཨ་ནཱ་ག་ཏཾ ཨ་དྷི་ཊྛ་ཧ་ནྟཱ་ནཾ ཨ་ནཱ་ག་ཏཾ ཨཱ་ར་མྨ་ཎཾ ཀ་རོ་ཏི, ཀཱ་ཡ་ཝ་སེ་ན ཙི་ཏྟ་པ་རི་ཎཱ་མ་ན་ཀཱ་ལེ ཏ་དེ་ཝ ཙི་ར་ནི་རུ་དྡྷཾ པཱ་ད་ཀ་ཛ྄ཛྷཱ་ནཾ ཨཱ་ར་མྨ་ཎཾ ཀ་རོ་ནྟཱ་ནཾ ཨ་ཏཱི་ཏཾ ཨཱ་ར་མྨ་ཎཾ ཀ་རོ་ཏི, ཏ་དཱ ཨ་ཏཱི་ཏཱ་ར་མྨ་ཎཾ, ཨ་ནཱ་ག་ཏ་གོ་ཙ་ར་ཉྩ ཧོ་ཏི, པ་ཙྩུ་པྤ་ནྣོ གོ་ཙ་རོ པ་ཙྩུ་པྤ་ནྣ་སྶ རཱུ་པ་ཀཱ་ཡ་སྶ ཨཱ་ར་མྨ་ཎ་ཀ་ར་ཎ་ཏོ. ཧ་ཏྠི་ཨཱ་ད་ཡོ ཨ་བྷི་ནི་མྨི་ན་ནྟ་སྶཱ་པི ཧི ཀི་ཉྩཱ་པི པ་རི་ཀ་མྨཾ ཨ་ནཱ་ག་ཏཱ་ར་མྨ་ཎཾ ཧོ་ཏི, ཨ་དྷི་ཊྛཱ་ན་ཙི་ཏྟཾ པ་ན པ་ཙྩུ་པྤ་ནྣཱ་ར་མྨ་ཎ་མེ་ཝ. ཨུ་པ་ཙཱ་རཱ་ར་མྨ་ཎཾ ཝི་ཡ ཧི པ་ཊི་བྷཱ་ག་ནི་མི་ཏྟཾ ཏེ་ན ས་ཧ པཱ་ཏུ་བྷཱུ་ཏ་མེ་ཝ ཏ་སྶཱ་ར་མྨ་ཎཾ ཧོ་ཏི.
༡༡༡༤-༥. ཀཱ་ཡཾ …པེ… སི་ཡཱཏི ཨ་ཏྟ་ནོ ཀཱ་ཡཾ ཙི་ཏྟ་ཝ་སེ་ན པ་རི་ཎཱ་མ་ན་ཀཱ་ལེ ཨ་ཛ྄ཛྷ་ཏྟ་སྶ ཀཱ་ཡ་སྶ ཨཱ་ར་མྨ་ཎ་ཀ་ར་ཎ་ཏོ, ཨ་ཏྟ་ནོ ཙི་ཏྟཾ ཀཱ་ཡ་ཝ་སེ་ན པ་རི་ཎཱ་མ་ན་ཀཱ་ལེ ཙི་ཏྟ་སྶ ཨཱ་ར་མྨ་ཎ་ཀ་ར་ཎ་ཏོ. ཝཱ-ས་དྡེ་ན ཨ་ཝུ་ཏྟ་ས་མུ་ཙྩ་ཡ་ཏྠེ་ན ག་ཧི་ཏེ ཨ་ཏྟ་ནོ ཀུ་མཱ་ར་ཝ་ཎྞཱ་དི་ཨ་བྷི་ནི་མྨཱ་ན་ཀཱ་ལེ ཀཱ་ཡ་སྶ ཨཱ་ར་མྨ་ཎ་ཀ་ར་ཎ་ཏོ ཙ ཨ་ཛ྄ཛྷ་ཏྟཱ་ར་མྨ་ཎཾ སི་ཡཱ. བ་ཧི་དྡྷཱ རཱུ་པ་ད་སྶ་ནེཏི བ་ཧི་དྡྷཱ ཧ་ཏྠི་ཨ་སྶཱ་དི་རཱུ་པ་ད་སྶ་ན་ཀཱ་ལེ.
༡༡༡༦-༨. པ་ཙྩུ་པྤ་ནྣེ པ་རི་ཏྟེ ཙཱཏི ས་རཱུ་པ་ཝི་བྷཱ་ཝ་ན་མེ་ཏཾ. དི་བྦ་སོ་ཏ་སྶ ཧི པ་ཙྩུ་པྤ་ནྣོ་ཝ ས་དྡོ ཨཱ་ར་མྨ་ཎཾ ཧོ་ཏི, སོ ཙ ས་བྷཱ་ཝ་ཏོ པ་རི་ཏྟོ་ཝ. ཀུ་ཙྪི་ས་དྡ་སྶཱཏི ཀུ་ཙྪི་ཡཾ ཝཱ་ཏ་ས་དྡ་སྶ. ཏ་ཏྠ པཱ་ཎ་ཀ་ས་དྡ་སྶ པ་ན ས་ཝ་ནེ བ་ཧི་དྡྷཱ་ར་མྨ་ཎ་མེ་ཝ. ཝ་སི་ཏཱ་པ་ཏྟ་སྶ ཨ་ཏྟ་ནོ ཝི་ཏ་ཀྐ་ཝི་པྥཱ་ར་ས་དྡ་ས་ཝ་ནེ་པི ཨ་ཛ྄ཛྷ་ཏྟཱ་ར་མྨ་ཎ་ནྟི ཝ་ད་ནྟི, ཏཾ པ་ན ཨེ་ཀཱ་ད་ས་བྷ་ཝ་ངྒ་ཙི་ཏྟ་ཏོ ཨུ་པ་རི བྷ་ཝ་ངྒཾ པ་ཝ་ཏྟི་ཏུ་མ་ད་ཏྭཱ བྷ་ཝ་ངྒ་ཏོ ཝུ་ཊྛཱ་ཡ ཨཱ་ཝ་ཛྫ་ན་ས་མ་ཏྠ་ཏཱ་ཝ་སེ་ན ཝ་སི་ཏཱ་པ་ཏྟ་སྶེ་ཝ ཡུ་ཛྫ་ཏི. ‘‘པ་ར་སྶ ཙ ས་དྡ་སྶཱ’’ཏི ས་མྦ་ནྡྷི་ཏ་བྦཾ. ན ཧི པ་ར་སྶ ཀུ་ཙྪི་ས་དྡ་ས་ཝ་ནེ་ཡེ་ཝ བ་ཧི་དྡྷཱ་ར་མྨ་ཎཾ ཧོ་ཏི, ཨ་ཐ ཁོ པ་ར་སྶ ཙི་ཏྟ་ས་མུ་ཊྛཱ་ན་ས་དྡ་ས་ཝ་ནེ་པཱི་ཏི.
༡༡༡༩-༢༢. པ་རི་ཏྟཱ་དཱི་སཱུཏི པ་རི་ཏྟ་མ་ཧ་གྒ་ཏ་ཨ་པྤ་མཱ་ཎ་མ་གྒ་ཨ་ཏཱི་ཏཱ་ནཱ་ག་ཏ་པ་ཙྩུ་པྤ་ནྣ་བ་ཧི་དྡྷཱ་ར་མྨ་ཎེ་སུ. པ་རི་ཏྟཱ་ནནྟི ཀཱ་མཱ་ཝ་ཙ་ར་ཙི་ཏྟཱ་ནཾ. མ་ཛ྄ཛྷི་མཱ་ནནྟི པ་རི་ཏྟ་ཨ་པྤ་མཱ་ཎཱ་ནཾ མ་ཛ྄ཛྷེ བྷ་ཝ་ཏྟཱ མ་ཛ྄ཛྷི་མ་ས་ངྑཱ་ཏཱ་ནཾ རཱུ་པཱ་རཱུ་པཱ་ཝ་ཙ་ར་ཙི་ཏྟཱ་ནཾ. མ་ཛ྄ཛྷེ་བྷ་ཝ་ཏཱ ཙ དེ་ས་ནཱ་ཝ་སེ་ན, ན ས་བྷཱ་ཝ་ཝ་སེ་ན. ཙེ་ཏོ་པ་རི་ཡ་ཉཱ་ཎཾ པ་ར་སྶ ཙི་ཏྟ་མེ་ཝ ཛཱ་ནཱ་ཏི, ཨ་ཝ་སེ་ས་ཀྑ་ནྡྷ་ཏྟ་ཡཾ པ་ན ན ཛཱ་ནཱ་ཏཱི་ཏི ཨི་མཾ མ་ཧཱ་ཨ་ཊྛ་ཀ་ཐཱ་ཝཱ་དཾ ས་ནྡྷཱ་ཡཱ་ཧ ‘‘མ་གྒ་ཙི་ཏྟ་སྶ ཛཱ་ན་ནེ’’ཏི་ཨཱ་དི. ཨ་ཡ་ཉྷེ་ཏྠ ཨ་དྷི་པྤཱ་ཡོ – ཡ་སྨཱ ཙེ་ཏོ་པ་རི་ཡ་ཉཱ་ཎཾ ཙི་ཏྟ་མེ་ཝ ཛཱ་ནཱ་ཏི, ཏ་སྨཱ ཏཾ མ་གྒཱ་ར་མྨ་ཎཾ ན ཧོ་ཏི, མ་གྒ་ས་མྤ་ཡུ་ཏྟ་ཙི་ཏྟ་ཛཱ་ན་ན་ཏོ པ་ན པ་རི་ཡཱ་ཡེ་ན མ་གྒཱ་ར་མྨ་ཎ་ཏཱ ཨ་ཊྛ་ཀ་ཐཱ་ཡཾ ཨ་ནུ་ཉྙཱ་ཏཱ་ཏི. པ་ཊྛཱ་ནེ པ་ན –
‘‘ཀུ་ས་ལཱ ཁ་ནྡྷཱ ཨི་དྡྷི་ཝི་དྷ་ཉཱ་ཎ་སྶ ཙེ་ཏོ་པ་རི་ཡ་ཉཱ་ཎ་སྶ པུ་བྦེ་ནི་ཝཱ་སཱ་ནུ་སྶ་ཏི་ཉཱ་ཎ་སྶ ཡ་ཐཱ་ཀ་མྨཱུ་པ་ག་ཉཱ་ཎ་སྶ ཨ་ནཱ་ག་ཏཾ་ས་ཉཱ་ཎ་སྶ ཨཱ་ར་མྨ་ཎ་པ་ཙྩ་ཡེ་ན པ་ཙྩ་ཡོ’’ཏི (པ་ཊྛཱ. ༡.༡.༤༠༤) –
ཝུ་ཏྟ་ཏྟཱ ཙ་ཏྟཱ་རོ་པི ཁ་ནྡྷཱ ཙེ་ཏོ་པ་རི་ཡ་ཉཱ་ཎ་སྶ ཨཱ་ར་མྨ་ཎཾ ཧོ་ནྟི, ཏ་སྨཱ ནི་པྤ་རི་ཡཱ་ཡེ་ནེ་ཝ མ་གྒཱ་ར་མྨ་ཎ་ཏཱ ལ་བྦྷ་ཏཱི་ཏི ཨི་ད་མེ་ཏྠ ས་ངྒ་ཧ་ཀཱ་རཱ་ནཾ ས་ནྣི་ཊྛཱ་ནཾ.
༡༡༢༣-༥. ཨ་ཏཱི་ཏ་ས་ཏྟ་དི་ཝ་ས་བྦྷ་ནྟ་རེ, ཨ་ནཱ་ག་ཏ་ས་ཏྟ་དི་ཝ་ས་བྦྷ་ནྟ་རེ་ཡེ་ཝ ཙ པ་ཝ་ཏྟཾ པ་ར་ཙི་ཏྟཾ ཙེ་ཏོ་པ་རི་ཡ་ཉཱ་ཎཾ ཛཱ་ནཱ་ཏི, ཏ་ཏོ པ་ཊྛཱ་ཡ པ་ན པ་ཊི་ས་ནྡྷི་པ་རི་ཡོ་སཱ་ནཾ, ཙུ་ཏི་པ་རི་ཡོ་སཱ་ན་ཉྩ པ་ཝ་ཏྟཾ ཨ་ཏཱི་ཏཾ་ས་ཉཱ་ཎ་སྶ, ཨ་ནཱ་ག་ཏཾ་ས་ཉཱ་ཎ་སྶ ཙ གོ་ཙ་ར་ནྟི ཨ་དྷི་པྤཱ་ཡེ་ནཱ་ཧ ‘‘ཨ་ཏཱི་ཏེ’’ཏི་ཨཱ་དི. ཨ་ཏཱི་ཏ་སྶ, ཨ་ནཱ་ག་ཏ་སྶ ཙ པ་ར་ཙི་ཏྟ་སྶ ཛཱ་ན་ནཾ ས་མྦྷ་ཝ་ཏི, པ་ཙྩུ་པྤ་ནྣ་སྶ པ་ན ན ས་མྦྷ་ཝ་ཏཱི་ཏི པུ་ཙྪ་ཏི ‘‘ཀ་ཐ་ཉྩ པ་ནཱ’’ཏི་ཨཱ་དི. ཨི་ཏ་རོ ཡ་ཏྠ ས་མྦྷ་ཝ་ཏི, ཏཾ ད་སྶེ་ཏུཾ པ་ཙྩུ་པྤ་ནྣཾ ཏཱ་ཝ ཝི་བྷ་ཛི་ཏྭཱ ད་སྶེ་ནྟོ ‘‘པ་ཙྩུ་པྤ་ནྣཾ ཏི་དྷཱ ཝུ་ཏྟ’’ནྟི་ཨཱ་དི་མཱ་ཧ. ཁ་ཎ་ས་ནྟ་ཏི་ཨ་དྡྷ་ཏོཏི ཁ་ཎ་པ་ཙྩུ་པྤ་ནྣཾ ས་ནྟ་ཏི་པ་ཙྩུ་པྤ་ནྣཾ ཨ་དྡྷཱ་པ་ཙྩུ་པྤ་ནྣ་ནྟི ཨེ་ཝཾ ཁ་ཎ་ས་ནྟ་ཏི་ཨ་དྡྷཱ་ཝ་སེ་ན ཏི་དྷཱ ཝུ་ཏྟཾ.
༡༡༢༦. ཏི་ཀྑ་ཎ་ས་མྤ་ཏྟནྟི ཨུ་པྤཱ་ད་ཊྛི་ཏི་བྷ་ངྒ་ཝ་སེ་ན ཁ་ཎ་ཏྟ་ཡ་པ་རི་ཡཱ་པ་ནྣཾ. པ་ཙྩུ་པྤ་ནྣ་ཁ་ཎཱ་དི་ཀནྟི ཁ་ཎ-ས་དྡཱ་དི་ཀཾ པ་ཙྩུ་པྤ་ནྣཾ ཁ་ཎ་པ་ཙྩུ་པྤ་ནྣ་ནྟི ཝུ་ཏྟཾ ཧོ་ཏི. ཨེ་ཀ་དྭེ་ས་ནྟ་ཏི་ཝཱ་ར་པ་རི་ཡཱ་པ་ནྣནྟི ཨེ་ཏྠ ཨ་ནྡྷ་ཀཱ་རེ ནི་སཱི་དི་ཏྭཱ ཨཱ་ལོ་ཀ་ཊྛཱ་ནཾ ག་ཏ་སྶ ན ཙ ཏཱ་ཝ ཨཱ་ར་མྨ་ཎཾ པཱ་ཀ་ཊཾ ཧོ་ཏི, ཡཱ་ཝ པ་ན ཏཾ པཱ་ཀ་ཊཾ ཧོ་ཏི, ཨེ་ཏྠ་ནྟ་རེ པ་ཝ་ཏྟཱ རཱུ་པ་ས་ནྟ་ཏི, ཨ་རཱུ་པ་ས་ནྟ་ཏི ཝཱ ‘‘ཨེ་ཀ་དྭེ་ས་ནྟ་ཏི་ཝཱ་རཱ’’ཏི ཝེ་དི་ཏ་བྦཱ. ‘‘ཨཱ་ལོ་ཀ་ཊྛཱ་ནེ ཝི་ཙ་རི་ཏྭཱ ཨོ་ཝ་ར་ཀཾ པ་ཝི་ཊྛ་སྶཱ་པི ན ཏཱ་ཝ ས་ཧ་སཱ རཱུ་པཾ པཱ་ཀ་ཊཾ ཧོ་ཏི, ཡཱ་ཝ ཏཾ པཱ་ཀ་ཊཾ ཧོ་ཏི, པུ་བྦེ་ཝ ཏ་ཏྠ ནི་སི་ནྣ་སྶ ཝི་ཡ ཨེ་ཏྠ་ནྟ་རེ ཨེ་ཀ་དྭེ་ས་ནྟ་ཏི་ཝཱ་རཱ ཝེ་དི་ཏ་བྦཱ. དཱུ་རེ ཋ་ཏྭཱ པ་ན ར་ཛ་ཀཱ་དཱི་ནཾ ཧ་ཏྠ་ཝི་ཀཱ་རཾ, གྷ་ཎྚི་བྷེ་རཱི་ཨཱ་དི་ཨཱ་ཀོ་ཊ་ན་ཧ་ཏྠ་ཝི་ཀཱ་ར་ཉྩ དི་སྭཱ ན པ་ན ཏཱ་ཝ ས་དྡཾ སུ་ཎཱ་ཏི, ཡཱ་ཝ པ་ན ཏཾ སུ་ཎཱ་ཏི, ཨེ་ཏྠ་ནྟ་རེ ཨེ་ཀ་དྭེ་ས་ནྟ་ཏི་ཝཱ་རཱ ཝེ་དི་ཏ་བྦཱ’’ཏི (ཝི་སུ་དྡྷི. ༢.༤༡༦) ཨེ་ཝཾ ཏཱ་ཝ མ་ཛ྄ཛྷི་མ་བྷཱ་ཎ་ཀ་ཏྠེ་རཱ ཝ་ད་ནྟི.
སཾ་ཡུ་ཏྟ་བྷཱ་ཎ་ཀཱ པ་ན ‘‘རཱུ་པ་ས་ནྟ་ཏི ཨ་རཱུ་པ་ས་ནྟ་ཏཱི་ཏི དྭེ ས་ནྟ་ཏི་ཡོ ཝ་ཏྭཱ ཨུ་ད་ཀཾ ཨ་ཀྐ་མི་ཏྭཱ ག་ཏ་སྶ ཡཱ་ཝ ཏཱི་རེ ཨ་ཀྐ་ནྟ་ཨུ་ད་ཀ་ལེ་ཁཱ ན ཝི་པྤ་སཱི་ད་ཏི, ཨ་དྡྷཱ་ན་ཏོ ཨཱ་ག་ཏ་སྶ ཡཱ་ཝ ཀཱ་ཡེ ཨུ་སུ་མ་བྷཱ་ཝོ ན ཝཱུ་པ་ས་མྨ་ཏི, ཨཱ་ཏ་པཱ ཨཱ་ག་ནྟྭཱ ག་བྦྷཾ པ་ཝི་ཊྛ་སྶ ཡཱ་ཝ ཨ་ནྡྷ་ཀཱ་ར་བྷཱ་ཝོ ན ཝི་ག་ཙྪ་ཏི, ཨ་ནྟོ་ག་བྦྷེ ཀ་མྨ་ཊྛཱ་ནཾ མ་ན་སི་ཀ་ཏྭཱ དི་ཝཱ ཝཱ་ཏ་པཱ་ནཾ ཝི་ཝ་རི་ཏྭཱ ཨོ་ལོ་ཀེ་ནྟ་སྶ ཡཱ་ཝ ཨ་ཀྑཱི་ནཾ ཕ་ནྡ་ན་བྷཱ་ཝོ ན ཝཱུ་པ་ས་མྨ་ཏི, ཨ་ཡཾ རཱུ་པ་ས་ནྟ་ཏི ནཱ་མ. དྭེ ཏ་ཡོ ཛ་ཝ་ན་ཝཱ་རཱ ཨ་རཱུ་པ་ས་ནྟ་ཏི ནཱ་མཱ་ཏི ཝ་ཏྭཱ ཏ་དུ་བྷ་ཡ་མྤི ས་ནྟ་ཏི་པ་ཙྩུ་པྤ་ནྣཾ ནཱ་མཱ’’ཏི (ཝི་སུ་དྡྷི. ༢.༤༡༦) ཨེ་ཝཾ ཨེ་ཀ་མེ་ཝ ས་ནྟ་ཏི་ཝཱ་རཾ ཝ་ད་ནྟི. ཏ་ཏྠ མ་ཛ྄ཛྷི་མ་བྷཱ་ཎ་ཀ་ཝཱ་དེ ཨེ་ཀ་ཙྩ་སྶ སཱི་གྷ་མྤི པཱ་ཀ་ཊཾ ཧོ་ཏཱི་ཏི ཨེ་ཀ་དྭེ་ས་ནྟ་ཏི་ཝཱ་རཱ་ཏི ཨེ་ཀ-གྒ་ཧ་ཎ་མྤི ཀ་ཏཾ. ཨཱ་ཙ་རི་ཡ་དྷ་མྨ་པཱ་ལཏྠེ་རོ པ་ན ‘‘ཨ་ཏི་པ་རི་ཏྟ་ས་བྷཱ་ཝ་ཨུ་ཏུ་ཨཱ་དི་ས་མུ་ཊྛཱ་ནཱ ཝཱ ཨེ་ཀ་དྭེ་ས་ནྟ་ཏི་ཝཱ་རཱ ཝེ་དི་ཏ་བྦཱ’’ཏི་པི (ཝི་སུ་དྡྷི. མ་ཧཱ. ༢.༤༡༦) ཨཱ་ཧ.
༡༡༢༧-༨. ཨེ་ཀ་བྦྷ་ཝ་པ་རི་ཙྪི་ནྣནྟི ཨེ་ཀ་སྨིཾ བྷ་ཝེ པ་ཊི་ས་ནྡྷི་ཙུ་ཏི་ཝ་སེ་ན པ་རི་ཙྪི་ནྣཾ ཨེ་ཀ་བྷ་ཝ་པ་རི་ཡཱ་པ་ནྣཾ དྷ་མྨ་ཛཱ་ཏཾ. ཡཾ ས་ནྡྷཱ་ཡ ཝུ་ཏྟཾ ‘‘ཡོ ཙཱ་ཝུ་སོ མ་ནོ, ཡེ ཙ དྷ་མྨཱ, ཨུ་བྷ་ཡ་མེ་ཏཾ པ་ཙྩུ་པྤ་ནྣཾ, ཏ་སྨིཾ ཙེ པ་ཙྩུ་པྤ་ནྣེ ཚ་ནྡ་རཱ་ག་པ་ཊི་བ་དྡྷཾ ཧོ་ཏི ཝི་ཉྙཱ་ཎ’’ནྟི་ཨཱ་དི, ས་ནྟ་ཏི་པ་ཙྩུ་པྤ་ནྣ་ཉྩེ་ཏྠ ཨ་བྷི་དྷ་མྨ་ཊྛ་ཀ་ཐཱ་སུ ཨཱ་ག་ཏཾ, ཨ་དྡྷཱ་པ་ཙྩུ་པྤ་ནྣཾ སུ་ཏྟེ. ཀེ་ཙཱིཏི ཨ་བྷ་ཡ་གི་རི་ཝཱ་སི་ནོ.
༡༡༢༩-༣༠. ཡ་ཐཱ ཙཱཏི་ཨཱ་དི ཨེ་ཏྠ ཏེ་སཾ ཨོ་པ་མྨ་ད་སྶ་ནཾ. ཨེ་ཀ་པུ་པྥཾ ཨ་ཏྟ་ནོ ཝ་ཎྚེ་ན ཨེ་ཀ་སྶ ཝ་ཎྚཾ ཝི་ཛ྄ཛྷ་ཏཱི་ཏི ས་མྦ་ནྡྷོ. མ་ཧཱ་ཛ་ན་སྶཱ་པི…པེ… ཝི་ཛ྄ཛྷ་ཏཱིཏི ‘‘ཨ་ཏཱི་ཏཾ ཙི་ཏྟཾ, ཨ་ནཱ་ག་ཏཾ ཙི་ཏྟཾ, ཨི་མ་སྶ ཙི་ཏྟཾ, ཨ་སུ་ཀ་སྶ ཙི་ཏྟ’’ནྟི ཨེ་ཝཾ ཝི་བྷཱ་གཾ ཨ་ཀ་ཏྭཱ པ་ར་སྶ ཙི་ཏྟཾ ཛཱ་ནཱ་མི་ཙྩེ་ཝ རཱ་སི་ཝ་སེ་ན མ་ཧཱ་ཛ་ན་སྶ ཙི་ཏྟེ ཨཱ་ཝ་ཛྫི་ཏེ ཨེ་ཀ་སྶ ཙི་ཏྟཾ ཨེ་ཀེ་ན ཙི་ཏྟེ་ན ཨུ་པྤཱ་ད་ཀྑ་ཎེ ཝཱ ཋི་ཏི་ཀྑ་ཎེ ཝཱ བྷ་ངྒ་ཀྑ་ཎེ ཝཱ ཨེ་ཀ་ནྟེ་ན པ་ཊི་ཝི་ཛ྄ཛྷ་ཏཱི་ཏི ཨ་ཏྠོ.
༡༡༣༡-༢. ཏཾ པ་ན ཏེ་སཾ ཝ་ཙ་ནཾ ཨ་ཡུ་ཏྟ་ནྟི ད་སྶེ་ཏུཾ ‘‘ཡེ་ནཱ་ཝ་ཛྫ་ཏཱི’’ཏི་ཨཱ་དི ཝུ་ཏྟཾ. ཝ་སྶ་ས་ཧ་སྶ་མྤི ཧི ཨེ་ཝཾ ཨཱ་ཝ་ཛྫ་ཡ་ཏོ ཨཱ་ཝ་ཛྫ་ན་ཛ་ཝ་ནཱ་ནཾ ཨེ་ཀ་སྨིཾ ཨཱ་ར་མྨ་ཎེ ཋཱ་ནཾ ན་ཏྠི, ཨ་བྷི་ཉྙཱ་ཙི་ཏྟ་ཉྩ ས་ཙེ ཁ་ཎ་པ་ཙྩུ་པྤ་ནྣཾ ཛཱ་ནཱ་ཏི, ཨཱ་ཝ་ཛྫ་ནེ་ན ས་ཧ ཨེ་ཀཱ་ར་མྨ་ཎེ ཝ་ཏྟ་མཱ་ན་མེ་ཝ ཛཱ་ནཱ་ཏི, ནོ ཨ་ཉྙ་ཐཱ, ཏ་སྨཱ ཏེ་སཾ ཨཱ་ཝ་ཛྫ་ན་ཛ་ཝ་ནཱ་ནཾ དྭི་ནྣཾ ས་ཧ ཨེ་ཀ་སྨིཾ ཨཱ་ར་མྨ་ཎེ ཨ་ཊྛཱ་ནཱ་བྷཱ་ཝ་ཏོ ཏཾ ན ཡུ་ཛྫ་ཏི. བྷ་ཝ་ཏུ ཏཱ་ཝ ཀོ ཨེ་ཏྠ དོ་སོ་ཏི ཙེ ཨཱ་ཧ ‘‘ཨཱ་ཝ་ཛྫ་ན་ཛ་ཝ་ནཱ་ན’’ནྟི་ཨཱ་དི. ཏ་ཏྠ མ་གྒ་ཕ་ལ་ཝཱི་ཐི་ཏོ ཨ་ཉྙཾ ཨ་ནི་ཊྛ་ཊྛཱ་ནཾ. མ་གྒ་ཕ་ལ་ཝཱི་ཐི་ཡ་ཉྷི ཨཱ་ཝ་ཛྫ་ནཱ་དཱི་ནཾ ས་ངྑཱ་རཱ་ར་མྨ་ཎ་ཏྟཱ, གོ་ཏྲ་བྷུ་ཨཱ་དཱི་ན་ཉྩ ནི་བྦཱ་ནཱ་ར་མྨ་ཎ་ཏྟཱ ནཱ་ནཱ་ར་མྨ་ཎ་ཏཱ ཨི་ཊྛཱ, ཨ་ཉྙ་ཏྠ པ་ན ཨ་ནི་ཊྛཱ, ཏ་སྨཱ ཨ་ནི་ཊྛེ ཋཱ་ནེ ཛ་ཝ་ནཱ་ཝ་ཛྫ་ནཱ་ནཾ ནཱ་ནཱ་ར་མྨ་ཎ་ཏཱ་པ་ཏྟི་དོ་སོ ཨ་ཡུ་ཏྟོ་ཏི ཏཾ ཏེ་སཾ ཝ་ཙ་ནཾ ཨ་ཡུ་ཏྟ་ནྟི པ་ཀཱ་སི་ཏཾ ཨ་ཊྛ་ཀ་ཐཱ་སཱུ་ཏི ཨ་དྷི་པྤཱ་ཡོ.
༡༡༣༣-༤. ཡ་དི ཨེ་ཝཾ, ཀ་ཐཾ ཙེ་ཏོ་པ་རི་ཡ་ཉཱ་ཎཾ པ་ཙྩུ་པྤ་ནྣཱ་ར་མྨ་ཎཾ ཧོ་ཏཱི་ཏི ཨཱ་ཧ ‘‘ཏ་སྨཱ’’ཏི་ཨཱ་དི. ཡ་སྨཱ ཨེ་ཝཾ ཨ་ཡུ་ཏྟ་ནྟི པ་ཀཱ་སི་ཏཾ, ཏ་སྨཱ. ཛ་ཝ་ན་ཝཱ་ར་ཏོཏི ཨེ་ཀ་ཛ་ཝ་ན་ཝཱ་ར་ཝ་སེ་ན. ཨི་དཾ པ་ན ཁ་ཎ་པ་ཙྩུ་པྤ་ནྣཱ་ན་ནྟ་རཾ ལ་ཧུ་ཀཾ ཀ་ཏྭཱ པ་ཙྩུ་པྤ་ནྣ་ད་སྶ་ན་ཏྠཾ ཝུ་ཏྟཾ, ཡཾ པ་ན ཝ་ཏྟ་མཱ་ན་ཛ་ཝ་ན་ཝཱི་ཐི་ཏོ ཨ་ཏཱི་ཏཱ་ནཱ་ག་ཏ་ཝ་སེ་ན དྭི་ཏི་ཛ་ཝ་ན་ཝཱི་ཐི་པ་རི་མཱ་ཎ་ཀཱ་ལེ པ་ཝ་ཏྟཾ པ་ར་ཙི་ཏྟཾ, ཏཾ ས་བྦ་མྤི ‘‘ས་ནྟ་ཏི་པ་ཙྩུ་པྤ་ནྣཾ ནཱ་མཱ’’ཏི ཨ་ཊྛ་ཀ་ཐཱ་ཡཾ (ཝི་སུ་དྡྷི. ༢.༤༡༦) ཝུ་ཏྟཾ, ཏ་སྨཱ ཛ་ཝ་ན་ཝཱ་ར་ཏོཏི དྭི་ཏི་ཛ་ཝ་ན་ཝཱ་ར་ཝ་སེ་ན དཱི་པེ་ཏ་བྦཾ, ན ས་ཀ་ལེ་ན པ་ཙྩུ་པྤ་ནྣ་དྡྷུ་ནཱ་ཏི ཨ་དྷི་པྤཱ་ཡོ. ནི་དྡི་ཊྛཾ སཾ་ཡུ་ཏྟ་ཊྛ་ཀ་ཐཱ་ཡཾ. ཏ་ཏྲཱ་ཡཾ དཱི་པ་ནཱཏི་ཨཱ་དི ཛ་ཝ་ན་ཝཱ་ར་སྶ ཨ་དྡྷཱ་པ་ཙྩུ་པྤ་ནྣ་བྷཱ་ཝ་དཱི་པ་ན་མུ་ཁེ་ན ཨི་དྡྷི་ཙི་ཏྟ་སྶ པ་ཝ་ཏྟི་ཨཱ་ཀཱ་ར་དཱི་པ་ནཾ.
༡༡༣༩-༤༡. ས་ནྟ་ཏི་པ་ཙྩུ་པྤ་ནྣ་མྤི ཨ་དྡྷཱ་པ་ཙྩུ་པྤ་ནྣེ་ནེ་ཝ ས་ངྒ་ཧེ་ཏྭཱ ཨཱ་ཧ ‘‘ཨ་དྡྷཱ་ཝ་སཱ…པེ… པ་ནཱ’’ཏི. ཨཱ་ན་ནྡཱ་ཙ་རི་ཡོ པ་ནེ་ཏྠ ཨ་བྷི་དྷ་མྨ་མཱ་ཏི་ཀཱ་ཡ ཨཱ་ག་ཏ་སྶ པ་ཙྩུ་པྤ་ནྣ་པ་ད་སྶ ཨ་དྡྷཱ་ས་ནྟ་ཏི་པ་ཙྩུ་པྤ་ནྣ་པ་ད་ཏྠ་ཏཱ ན ཀ་ཏྠ་ཙི པཱ་ལི༹་ཡཾ ཝུ་ཏྟཱ, ཏ་སྨཱ ཙི་ཏྟ་སཱ་མ་ཉྙེ་ན ཙི་ཏྟཾ ཨཱ་ཝ་ཛྫ་ཡ་མཱ་ནཾ ཨ་བྷི་མུ་ཁཱི་བྷཱུ་ཏཾ ཝི་ཛྫ་མཱ་ན་ཙི་ཏྟཾ ཨཱ་ཝ་ཛྫེ་ཏི, པ་རི་ཀ་མྨཱ་ནི ཙ ཏཾ ཏཾ ཝི་ཛྫ་མཱ་ན་ཙི་ཏྟཾ ཙི་ཏྟ་སཱ་མ་ཉྙེ་ནེ་ཝ ཨཱ་ར་མྨ་ཎཾ ཀ་ཏྭཱ ཙི་ཏྟ་ཛཱ་ན་ན་པ་རི་ཀ་མྨཱ་ནི ཧུ་ཏྭཱ པ་ཝ་ཏྟ་ནྟི. ཙེ་ཏོ་པ་རི་ཡ་ཉཱ་ཎཾ པ་ན ཝི་ཛྫ་མཱ་ན་ཙི་ཏྟཾ པ་ཊི་ཝི་ཛ྄ཛྷ་ནྟཾ ཏེ་ན ས་ཧ ཨེ་ཀ་ཀྑ་ཎེ ཨུ་པྤ་ཛྫ་ཏི. ཏ་ཏྠ ཡ་སྨཱ ས་ནྟཱ་ན་གྒ་ཧ་ཎ་ཏོ ཨེ་ཀ་ཏྟ་ཝ་སེ་ན ཨཱ་ཝ་ཛྫ་ནཱ་དཱི་ནི ཙི་ཏྟ་ནྟེ་ཝ པ་ཝ་ཏྟཱ་ནི, ཏ་ཉྩ ཙི་ཏྟ་མེ་ཝ, ཡཾ ཙེ་ཏོ་པ་རི་ཡ་ཉཱ་ཎེ་ན ཝི་བྷཱ་ཝི་ཏཾ, ཏ་སྨཱ ས་མཱ་ནཱ་ཀཱ་ར་པྤ་ཝ་ཏྟི་ཏོ ན ཨ་ནི་ཊྛེ ཋཱ་ནེ ནཱ་ནཱ་ར་མྨ་ཎ་ཏཱ ཧོ་ཏཱི་ཏི ཁ་ཎ་པ་ཙྩུ་པྤ་ནྣ་ཝ་སེ་ནེ་ཝ ཨི་མ་སྶ པ་ཙྩུ་པྤ་ནྣཱ་ར་མྨ་ཎ་ཏཾ ཨི་ཙྪ་ཏི. ཨི་ཏ་རཱ་ནཱིཏི ཨཱ་ཝ་ཛྫ་ན་པ་རི་ཀ་མྨ་ཙི་ཏྟཱ་ནི. ཙ་ཀྑུ་དྭཱ་རེ ཝི་ཉྙཱ་ཎནྟི ཙ་ཀྑུ་ཝི་ཉྙཱ་ཎཾ.
༡༡༤༣-༧. པ་རི་ཏྟཱ་དཱི་སུ ཨ་ཊྛ་སཱུཏི ཙེ་ཏོ་པ་རི་ཡ་ཉཱ་ཎ་སྶ ཝུ་ཏྟེ་སུ པ་ཙྩུ་པྤ་ནྣཱ་ར་མྨ་ཎཾ ཧི་ཏྭཱ ན་ཝ་ཏྟ་བྦཱ་ར་མྨ་ཎ་ཉྩ པ་ཀྑི་པི་ཏྭཱ ཨ་ཊྛ་སུ པ་རི་ཏྟཱ་དཱི་སུ. ཨ་ཏཱི་ཏེ…པེ… ཕ་ལ་མྤི ཝཱཏི ཨེ་ཏྠ ཨ་ཏྟ་ནཱཏི ནི་ད་སྶ་ན་མ་ཏྟཾ. པ་རེ་ཧི་པི བྷཱ་ཝི་ཏ་མ་གྒཾ, ས་ཙྪི་ཀ་ཏ་ཕ་ལ་ཉྩ པུ་བྦེ་ནི་ཝཱ་སཱ་ནུ་སྶ་ཏི་ཉཱ་ཎེ་ན ས་མ་ནུ་སྶ་ར་ཏི. ཝཱ-ས་དྡེ་ན ཝཱ ཨ་ཝུ་ཏྟ་ས་མུ་ཙྩ་ཡ་ཏྠེ་ན ཨ་ཏྟ་ནཱ བྷཱ་ཝི་ཏཾ མ་གྒཾ, ཕ་ལ་མྤི ཝཱ པ་རེ་ཧི བྷཱ་ཝི་ཏཾ མ་གྒཾ, ཕ་ལ་མྤི ཝཱ་ཏི ཨེ་ཝ་མ་ཏྠོ ག་ཧེ་ཏ་བྦོ. ཏ་ཐཱ ཙ ཝུ་ཏྟཾ ཨ་ཊྛ་ཀ་ཐཱ་ཡཾ ‘‘ཨ་ཏྟ་ནཱ, པ་རེ་ཧི བྷཱ་ཝི་ཏ་མ་གྒཾ, ས་ཙྪི་ཀ་ཏ་ཕ་ལ་ཉྩ ཨ་ནུ་སྶ་ར་ཎ་ཀཱ་ལེ’’ཏི (ཝི་སུ་དྡྷི. ༢.༤༡༧). ཨེ་ཝ-ཀཱ་རཾ པ་ན པ་ད་པཱུ་ར་ཎ་མ་ཏྟ་མེ་ཝ. ཕ་ལ་མྤི ཝཱཏི ཨེ་ཏྠ ‘‘བྷཱ་ཝི་ཏ’’ནྟི ན ས་མྦ་ནྡྷི་ཏ་བྦཾ. ན ཧི ཕ་ལཾ བྷཱ་ཝེ་ཏ་བྦཾ ཧོ་ཏི, ཨ་ཐ ཁོ ས་ཙྪི་ཀཱ་ཏ་བྦ་མེ་ཝཱ་ཏི. ས་མ་ནུ་སྶ་ར་ཏོ མ་གྒནྟི ཨེ་ཏྠཱ་པི ‘‘ཨ་ཏྟ་ནཱ, པ་རེ་ཧི ཝཱ བྷཱ་ཝི་ཏ’’ནྟི ས་མྦ་ནྡྷི་ཏ་བྦཾ. ཨེ་ཀ་ནྟ་ཏོཏི ནི་ཡ་མ་ཏོ.
༡༡༤༨-༥༠. ན་ནུ ཙ ཙེ་ཏོ་པ་རི་ཡ་ཉཱ་ཎ་ཡ་ཐཱ་ཀ་མྨཱུ་པ་ག་ཉཱ་ཎཱ་ནི་པི ཨ་ཏཱི་ཏཱ་ར་མྨ་ཎཱ་ནེ་ཝ, ཀིཾ པ་ན ཏེ་སཾ, ཨི་མ་སྶ ཙ ཨཱ་ར་མྨ་ཎེ ནཱ་ནཱ་ཀ་ར་ཎ་ནྟི ཨཱ་ཧ ‘‘ཙེ་ཏོ་པ་རི་ཡ་ཉཱ་ཎ་མྤཱི’’ཏི་ཨཱ་དི. ཀི་ཉྩཱ་པཱིཏི ཨ་ཡཾ ནི་པཱ་ཏ་ས་མུ་དཱ་ཡོ, ཨེ་ཀོ ཝཱ ནི་པཱ་ཏོ ཝི་སེ་སཱ་ན་བྷི་དྷཱ་ན་ནི་མི་ཏྟེ ཨུ་པ་ག་མ་ནེ ད་ཊྛ་བྦོ. ཨ་ཐ ཁོཏི ཝི་སེ་སཱ་བྷི་དྷཱ་ན་ས་མཱ་ར་མྦྷེ. ཙི་ཏྟ་མེ་ཝཱཏི ཨི་དཾ པུ་བྦེ ཝི་ཙཱ་རི་ཏ་མེ་ཝ. ཨ་ཏཱི་ཏེ ཙེ་ཏ་ནཱ་མ་ཏྟནྟི ཨི་ད་མྤི པུ་བྦེ ཝི་ཡ མ་ཧཱ་ཨ་ཊྛ་ཀ་ཐཱ་ཝཱ་དཾ ས་ནྡྷཱ་ཡེ་ཝ ཝུ་ཏྟཾ. ཏ་ཏྠ ཧི ཡ་ཐཱ་ཀ་མྨཱུ་པ་ག་ཉཱ་ཎ་སྶ ཙེ་ཏ་ནཱ་མ་ཏྟ་མེ་ཝ ཨཱ་ར་མྨ་ཎཾ ཧོ་ཏི, ན ཙི་ཏྟཾ, ནཱ་པི ཨི་ཏ་རེ དྷ་མྨཱ, ཡ་ཏོ ཏཾ ཡ་ཐཱ་ཀ་མྨཱུ་པ་ག་ནྟི ཝུ་ཙྩ་ཏཱི་ཏི ཨི་མི་ནཱ ཨ་དྷི་པྤཱ་ཡེ་ན ཡ་ཐཱ་ཀ་མྨཱུ་པ་ག་ཉཱ་ཎཾ ཨ་ཏཱི་ཏ་ཙེ་ཏ་ནཱ་མ་ཏྟ་མེ་ཝ ཨཱ་ར་མྨ་ཎཾ ཀ་རོ་ཏཱི་ཏི ཝུ་ཏྟཾ, ཧེ་ཊྛཱ ད་སྶི་ཏ་པཱ་ལི༹་ཝ་སེ་ན ས་བྦེ ཙ་ཏྟཱ་རོ་པི ཁ་ནྡྷཱ ཡ་ཐཱ་ཀ་མྨཱུ་པ་ག་ཉཱ་ཎ་སྶ ཨཱ་ར་མྨ་ཎ་ནྟི ས་ངྒ་ཧ་ཀཱ་རཱ་ནཾ ས་ནྣི་ཊྛཱ་ནཾ. ན་ཏྠི ཀི་ཉྩི ཨ་གོ་ཙ་རནྟི ཀི་ཉྩི ཁ་ནྡྷཾ ཝཱ ཁ་ནྡྷ་པ་ཊི་བ་དྡྷཾ ནཱ་མ་གོ་ཏྟཱ་དིཾ ཝཱ ཨ་གོ་ཙ་རཾ ནཱ་མ ན་ཏྠི. ཏ་ཉྷི ཨ་ཏཱི་ཏ་ཀྑ་ནྡྷ་ཁ་ནྡྷ་པ་ཊི་བ་དྡྷེ་སུ དྷ་མྨེ་སུ ས་བྦ་ཉྙུ་ཏ་ཉྙཱ་ཎ་ས་མཱ་ན་ག་ཏི་ཀ་མེ་ཝཱ་ཏི ཨ་དྷི་པྤཱ་ཡོ.
༡༡༥༡-༢. ཨ་ཏྟ་ཀྑ་ནྡྷཱ་ནུ་སྶ་ར་ཎེཏི ཨ་ཏྟ་ནོ ཁ་ནྡྷཱ་ནུ་སྶ་ར་ཎ་ཀཱ་ལེ. ས་ར་ཎེ…པེ… གོ་ཙ་རནྟི ‘‘ཨ་ཏཱི་ཏེ ཝི་པ་སྶཱི བྷ་ག་ཝཱ ཨ་ཧོ་སི, ཏ་སྶ མཱ་ཏཱ བ་ནྡྷུ་མ་ཏཱི, པི་ཏཱ བ་ནྡྷུ་མཱ’’ཏི་ཨཱ་དི་ནཱ ན་ཡེ་ན ནཱ་མ་གོ་ཏྟཱ་དིཾ, པ་ཐ་ཝཱི་ནི་མི་ཏྟཱ་དི་ཉྩ ཨ་ནུ་སྶ་ར་ཎ་ཀཱ་ལེ ན་ཝ་ཏྟ་བྦཱ་ར་མྨ་ཎཾ ཧོ་ཏི. ན་ཝ་ཏྟ་བྦ་གོ་ཙ་རནྟི ཧི པ་རི་ཏྟཱ་ར་མྨ་ཎ་ཨ་ཏཱི་ཏཱ་ར་མྨ་ཎ་ཏྟི་ཀ་ཝ་སེ་ན ཝུ་ཏྟཾ, ཨ་ཛ྄ཛྷ་ཏྟཱ་ར་མྨ་ཎ་ཏྟི་ཀ་ཝ་སེ་ན པ་ན ཨཱ་ཀི་ཉྩ་ཉྙཱ་ཡ་ཏ་ན་ཛ྄ཛྷཱ་ན་སྶ ཨཱ་ར་མྨ་ཎ་བྷཱུ་ཏ་དྷ་མྨཱ་ར་མྨ་ཎ་ཀཱ་ལེ ན་ཝ་ཏྟ་བྦཱ་ར་མྨ་ཎཾ ཧོ་ཏི, ཨ་ཝ་སེ་ས་པ་ཉྙ་ཏྟཱ་ར་མྨ་ཎ་ཀཱ་ལེ བ་ཧི་དྡྷཱ་ར་མྨ་ཎཾ ཧོ་ཏི. ནཱ་མ་གོ་ཏྟནྟི ཙེ་ཏྠ ཁ་ནྡྷ་པ་ཊི་བ་དྡྷོ ས་མྨུ་ཏི་སི་དྡྷོ བྱ་ཉྫ་ན་ཏྠོ, ན བྱ་ཉྫ་ནཾ. བྱ་ཉྫ་ན་ཉྷི ས་དྡཱ་ཡ་ཏ་ན་ས་ངྒ་ཧི་ཏ་ཏྟཱ པ་རི་ཏྟཾ ཧོ་ཏི. ཡ་ཐཱ་ཧ ‘‘ནི་རུ་ཏྟི་པ་ཊི་ས་མྦྷི་དཱ པ་རི་ཏྟཱ་ར་མྨ་ཎཱ’’ཏི (ཝི་བྷ. ༧༤༩).
༡༡༥༤. དི་བྦ་སོ་ཏ་ས་མནྟི ཡ་སྨཱ པ་ཙྩུ་པྤ་ནྣཾ, པ་རི་ཏྟ་ཉྩ རཱུ་པཾ ཨཱ་ར་མྨ་ཎཾ ཀ་རོ་ཏི, ཏ་སྨཱ པ་ཙྩུ་པྤ་ནྣཱ་ར་མྨ་ཎཾ, པ་རི་ཏྟཱ་ར་མྨ་ཎ་ཉྩ ཧོ་ཏི, ཨ་ཏྟ་ནོ ཀུ་ཙྪི་ག་ཏ་རཱུ་པ་ད་སྶ་ནེ, པ་ར་སྶ ཧ་ད་ཡ་ནི་སྶི་ཏ་ལོ་ཧི་ཏ་ད་སྶ་ནཱ་དཱི་སུ ཙ ཨ་ཛ྄ཛྷ་ཏྟཱ་ར་མྨ་ཎཾ, བ་ཧི་དྡྷཱ་ར་མྨ་ཎ་ཉྩ ཧོ་ཏི.
༡༡༥༥-༦. པ་རི་ཏྟཱ་དཱི་སུ ཨ་ཊྛ་སཱུཏི པུ་བྦེ་ནི་ཝཱ་སཱ་ནུ་སྶ་ཏི་ཉཱ་ཎ་སྶ ཝུ་ཏྟེ་སུ ཨ་ཏཱི་ཏཱ་ར་མྨ་ཎཾ ཝ་ཛྫེ་ཏྭཱ ཨ་ནཱ་ག་ཏཱ་ར་མྨ་ཎཾ པ་ཀྑི་པི་ཏྭཱ ཨ་ཊྛ་སུ. ནི་བྦ་ཏྟི་སྶ་ཏི…པེ… པ་ཛཱ་ན་ཏོཏི ཨི་མི་ནཱ ནི་བྦ་ཏྟ་ཀྑ་ནྡྷ་ཛཱ་ན་ན་མཱ་ཧ. ཨ་ནཱ་ག་ཏཾ་ས་ཉཱ་ཎ་སྶ ཨ་ནཱ་ག་ཏ་མ་གོ་ཙ་རཾ ན་ཏྠི. ཏ་མྤི ཧི ཨ་ནཱ་ག་ཏ་ཀྑ་ནྡྷ་ཁ་ནྡྷ་པ་ཊི་བ་དྡྷེ་སུ དྷ་མྨེ་སུ ས་བྦ་ཉྙུ་ཏ་ཉྙཱ་ཎ་ས་མཱ་ན་ག་ཏི་ཀ་མེ་ཝ.
༡༡༦༣. ཛཱ་ན་ནེ ནཱ་མ་གོ་ཏྟ་སྶཱཏི ‘‘ཨ་ནཱ་ག་ཏེ མེ་ཏྟེ་ཡྻོ ནཱ་མ ས་མྨཱ་ས་མྦུ་དྡྷོ ཨུ་པྤ་ཛྫི་སྶ་ཏི, ཏ་སྶ སུ་བྲ་ཧྨཱ ནཱ་མ པི་ཏཱ བྷ་ཝི་སྶ་ཏི, བྲ་ཧྨ་ཝ་ཏཱི ནཱ་མ མཱ་ཏཱ’’ཏི་ཨཱ་དི་ནཱ ན་ཡེ་ན ནཱ་མ་གོ་ཏྟཱ་དི་ཛཱ་ན་ན་ཀཱ་ལེ.
༡༡༦༤-༥. པ་རི་ཏྟཱ་དཱི་སུ པ་ཉྩ་སཱུཏི པ་རི་ཏྟ་མ་ཧ་གྒ་ཏ་ཨ་ཏཱི་ཏ་ཨ་ཛ྄ཛྷ་ཏྟ་བ་ཧི་དྡྷཱ་ར་མྨ་ཎ་ཝ་སེ་ན པ་ཉྩ་སུ. ཀཱ་མ་ཀ་མྨ་སྶཱཏི ཀཱ་མཱ་ཝ་ཙ་ར་ཀ་མྨ་སྶ.
༡༡༦༩. ཝི་ཝི་དྷ་ཏྠ་ཝ་ཎྞ་པ་དནྟི ནཱ་ན་པྤ་ཀཱ་ར་ཨ་ཏྠ་པ་དེ་ཧི, བྱ་ཉྫ་ན་པ་དེ་ཧི ཙ ས་མྤ་ནྣཾ. མ་དྷུ་ར་ཏྠ་མ་ཏི་ནཱི་ཧ་རནྟི མ་དྷུ་ར་ཏྠཾ ཨ་ཏི་ནཱི་ཧ་ར་ཉྩཱ་ཏི པ་ད་ཙྪེ་དོ.
ཨི་ཏི ཨ་བྷི་དྷ་མྨ་ཏྠ་ཝི་ཀཱ་སི་ནི་ཡཱ ནཱ་མ
ཨ་བྷི་དྷ་མྨཱ་ཝ་ཏཱ་ར་སཾ་ཝ་ཎྞ་ནཱ་ཡ
ཨ་བྷི་ཉྙཱ་ར་མྨ་ཎ་ནི་དྡེ་ས་ཝ་ཎྞ་ནཱ ནི་ཊྛི་ཏཱ.