༡༣. ཏེ་ར་ས་མོ པ་རི་ཙྪེ་དོ

ཀཱ་ར་ཀ་པ་ཊི་ཝེ་དྷ་ཝ་ཎྞ་ནཱ

ནི་དྡི་ཊྛཱཏི ཨུ་དྡེ་ས་ནི་དྡེ་སཱ་དི་ཝ་སེ་ན ད་སྶི་ཏཱ. ཀུ་ས་ལཱ་ད་ཡོཏི ཀུ་ས་ལཱ་ཀུ་ས་ལཱ. ཨེ་ཏེ་སཾ པ་ན ན ནི་དྡི་ཊྛོ་ཏི ས་མྦ་ནྡྷོ. པུ་བྦེ ‘‘ཀཱ་ར་ཀོ’’ཏི ཝ་ཙ་ནཾ ཝི་ཡ ‘‘ཝེ་ད་ཀོ’’ཏི ཨ་ཝུ་ཏྟེ་པི ‘‘ཨ་ཏྟཱ ཀཱ་ར་ཀོ ཝེ་ད་ཀོ’’ཏི ཨ་ཏྟ་ནོ ལ་དྡྷི་ཏཱ་ཡ ‘‘ཏ་སྶ ཧི ཀཱ་ར་ཀ་སྶ ཝེ་ད་ཀ་སྶཱ’’ཏི ཝུ་ཏྟཾ. ཀུ་ས་ལཱ་ཀུ་ས་ལཱ་ན་མ་བྷཱ་ཝོ་པི སི་ཡཱ, ཨི་ཏ་ར་ཐཱ ཨ་ཧེ་ཏུ་ཀ་དོ་སཱ་པ་ཏྟི་ཏོ་ཏི ཨ་དྷི་པྤཱ་ཡོ. ཏེ་སཾ ཀུ་ས་ལཱ་ཀུ་ས་ལཱ་ནཾ ཨཱ་ཡ་ཏྟཱ ཝུ་ཏྟི ཨེ་ཏེ་ས་ནྟི ཏ་དཱ་ཡ་ཏྟ་ཝུ་ཏྟི་ནོ. ཏེ་སནྟི ཀུ་ས་ལཱ་ཀུ་ས་ལཱ་དཱི་ནཾ. ཏ་སྨཱཏི ཀཱ་ར་ཀཱ་བྷཱ་ཝེ ཀུ་ས་ལཱ་ཀུ་ས་ལཱ་ནཾ, ཏ་བྦི་པཱ་ཀཱ་ན་ཉྩ ཨ་བྷཱ་ཝ་ཏོ. ནི་ར་ཏྠི་ཀཱཏི དེ་སེ་ཏྭཱ་པི བོ་དྷེ་ཏ་བྦཱ་བྷཱ་ཝ་ཏོ ནི་ར་ཏྠི་ཀཱ. ‘‘ནཱ་ཡཾ ནི་ར་ཏྠི་ཀཱ’’ཏི ཝ་ཏྭཱ་པི ‘‘སཱ་ཏྠི་ཀཱ’’ཏི ཝ་ཙ་ནཾ པ་ན པ་ར་སྶ ད་ལ༹ྷ་གྒཱ་ཧ་ཏྠཾ. ལོ་ཀེ་པི ཧི ཨེ་ཝཾ ཝོ་ཧཱ་རཾ ཝོ་ཧ་ར་ནྟི, ཨེ་ཝ་མེ་ཝ བྷ་ཝ་ཏི, ནཱ་ཉྙ་ཐཱ་ཏི་ཨཱ་དི. ཏ་ཏྠཱཏི ཀཱ་ར་ཀཱ་བྷཱ་ཝེ་པི ཨ་ཏྟཱ ཨ་ཏྠཱི་ཏི ག་ཧ་ཎེ. ཨ་ནུ་རོ་དྷོཏི ཨ་ནུ་ཀཱུ་ལ་པ་ཀྑ་པཱ་ཏོ་ཏི ཨ་ཏྠོ. ཨི་དྷཱཏི ཀཱ་ར་ཀཱ་བྷཱ་ཝེ་པི ཀུ་ས་ལཱ་ད་ཡོ ཨ་ཏྠཱི་ཏི ག་ཧ་ཎེ. ཝི་རོ་དྷོཏི པ་ཊི་གྷོ.

ཨེ་ཝཾ ཀཱ་ར་ཀཱ་བྷཱ་ཝེ་པི ཀུ་ས་ལཱ་དཱི་ནཾ ས་བྦྷཱ་ཝཾ ཡུ་ཏྟི་ཏོ སཱ་དྷེ་ཏྭཱ ཨི་དཱ་ནི ལོ་ཀ་སི་དྡྷེ་ན ནི་ད་སྶ་ནེ་ན སཱ་དྷེ་ཏུཾ ‘‘ཨ་ཐཱ་པཱི’’ཏི་ཨཱ་དི ཝུ་ཏྟཾ. ཨ་ཐཱ་པཱིཏི ཀཱ་ར་ཀཱ་བྷཱ་ཝེ་པི. པ་ཐ་ཝི-གྒ་ཧ་ཎེ་ན པ་ཐ་ཝོ་ཛཾ ད་སྶེ་ཏི. ཏ་ཐཱ ཨཱ་པ-གྒ་ཧ་ཎེ་ན ཨཱ་པོ་ཛཾ. ཏེ་ཛོཏི སཱི་ཏུ་ཎྷ་ཝ་སེ་ན དུ་ཝི་དྷཱ ཏེ་ཛོ་དྷཱ་ཏུ. ཨུ་ཏཱུཏི ཧེ་མ་ནྟཱ་དི་ཨུ་ཏུ. ཨཱ་དི-གྒ་ཧ་ཎེ་ན བཱི་ཛཱ་དི་ཀེ ས་ངྒ་ཎྷཱ་ཏི. ཛ་ན་ཀ་པ་ཙྩ་ཡོ ཧེ་ཏུ, ཨ་ནུ་པཱ་ལ་ན་ཀ་པ་ཙྩ་ཡོ པ་ཙྩ་ཡོ ནཱ་མཱ་ཏི ཨཱ་ཧ ‘‘ཧེ་ཏུ་པ་ཙྩ་ཡ་སཱ་མ་གྒི་ཡཱ’’ཏི. ‘‘ཕ་ལ་ནི་བྦ་ཏྟ་ཀོ ཧེ་ཏུ, པ་ཙྩ་ཡོ ཨ་ནུ་པཱ་ལ་ན་ཀོ’’ཏི ཧི ཝུ་ཏྟཾ.

ཨེ་ཝཾ ཀཱ་ར་ཀཱ་བྷཱ་ཝེ་པི ཀུ་ས་ལཱ་ཀུ་ས་ལ་པྤ་ཝ་ཏྟིཾ སཱ་དྷེ་ཏྭཱ ཨི་དཱ་ནི པ་ར་པ་རི་ཀ་པྤི་ཏཾ ཨ་ཏྟཱ་ན་མེ་ཝ ཏཱ་ཝ པ་ཊི་ཀྑི་པི་ཏུཾ ‘‘ཨ་ཐཱ་པི ཙེ་ཏྠཱ’’ཏི་ཨཱ་དི ཨཱ་ར་དྡྷཾ. ཀཱ་མཾ པ་ཉྙཱ་པ་རི་བཱ་ཧི་ར་དི་ཊྛི་ཡཱ ཨེ་ཝ ཨ་ཏྟཱ པ་རི་ཀ་པྤཱི་ཡ་ཏི, པ་རོ པ་ན ‘‘པ་ཉྙཱ་ཡ པ་རི་ཀ་པྤེ་མཱི’’ཏི མ་ཉྙ་ཏཱི་ཏི ཏ་སྶ ལ་དྡྷི་ཝ་སེ་ན ‘‘པ་ཉྙཱ་ཡ པ་རི་ཀ་པྤི་ཏོ’’ཏི ཝུ་ཏྟཾ. ཏཾ ཨུ་པ་པ་རི་ཀྑི་སྶཱ་མ ཏཱ་ཝཱཏི ཏི་ཊྛ་ཏུ ཏཱ་ཝ ཙེ་སཱ ཀཱ་ར་ཀཱ་བྷཱ་ཝེ་པི ཀུ་ས་ལཱ་དཱི་ནཾ བྷཱ་ཝཱ་བྷཱ་ཝ་ཝི་ཙཱ་ར་ཎཱ པ་ཋ་མཾ ཏ་མེ་ཝ ཨ་ཏྟཱ་ནཾ ཨུ་པ་པ་རི་ཀྑི་སྶཱ་མཱ་ཏི ཨ་ཏྠོ. དོ་ས་མེ་ཏྠ ཝ་ཏྟུ་ཀཱ་མོ པུ་ཙྪ་ཏཱི་ཏི ཨ་དྷི་པྤཱ་ཡེ་ན པ་ཊི་ཉྙཾ ཨ་ད་ཏྭཱ་ཝ པུ་ཙྪ་ནྟོ ཨཱ་ཧ ‘‘ཀི་ཉྩེ་ཏྠཱ’’ཏི. ས་ཙེ་ཏ་ནོ ཝཱ ཨུ་དཱ་ཧུ ཨ་ཙེ་ཏ་ནོ ཝཱཏི ཨེ་ཏྠ ཀོ དོ་སོ་ཏི ཨ་ཏྠོ. ཨི་ཏ་རོ ཨུ་བྷ་ཡ་ཐཱ་པི དོ་སོ་ཡེ་ཝ. ཡ་ཉྷི ཨ་ཙེ་ཏ་ནཾ ཨ་ཏྟཱ་ནཾ, ན ཏཾ ཀཱ་ར་ཀཾ, ཝེ་ད་ཀ་ཉྩ, ཡ་ཐཱ ཏཾ པཱ་ཀཱ་ར་ཏ་རུ་ཨཱ་ད་ཡོ. ‘‘ཨ་ཙེ་ཏ་ནོ་ཝཱ་ཡཾ ཨ་ཏྟཱ’’ཏི ཨ་ནུ་མཱ་ནེ་ན ཀཱ་ར་ཀ་ཝེ་ད་ཀ་ཏྟཱ་བྷཱ་ཝ་སི་དྡྷི་ཏོ་ཏི ད་སྶེ་ཏུཾ ‘‘ཡ་དི ཨ་ཙེ་ཏ་ནོ’’ཏི་ཨཱ་དི ཝུ་ཏྟཾ. ཨ་ན་ཉྙོཏི ཨ་ཝི་ནི་བྦྷོ་ག་ཝ་སེ་ན ཨ་ན་ཉྙོ. ཨི་ཏ་ར་ཐཱ ‘‘ས་ཙེ་ཏ་ནོ’’ཏི ཝ་ཙ་ན་མེ་ཝ ན ཨུ་པ་པ་ཛྫེ་ཡྻ. ས་ཧ་བྷཱ་ཝཱི ནཱ་མ ཨ་ཉྙོ ན ཧོ་ཏཱི་ཏི. ཨ་ཏྟ་ནོ་པི ནཱ་སོ སི་ཡཱཏི ཨ་ཝི་ནི་བྦྷོ་ག་ཝུ་ཏྟི་རཱུ་པེ་སུ ཨེ་ཀ་སྶ ནཱ་སེ ཨི་ཏ་ར་སྶཱ་པི ཝི་ནཱ་སོ ཝི་ཡ. ཙེ་ཏ་ནཱ་ཡ་པི ནཱ་སོ ན བྷ་ཝ་ཏི ཨ་ཝི་ནི་བྦྷོ་ག་རཱུ་པེ་སུ ཨེ་ཀ་སྶ ཨ་ཝི་ནཱ་སེ ཨི་ཏ་ར་སྶཱ་པི ཨ་ཝི་ནཱ་སོ ཝི་ཡཱ་ཏི ཨ་དྷི་པྤཱ་ཡོ.

‘‘ཙེ་ཏ་ནཱ་ཡ ཨ་ན་ཉྙ་ཏྟཱ’’ཏི ཀཱ་ར་ཎཾ ཝ་ཏྭཱ ཏ་མེ་ཝ ས་མ་ཏྠེ་ཏུཾ ‘‘ཙེ་ཏ་ན་ཏྟཱ་ན’’ནྟི་ཨཱ་དི ཝུ་ཏྟཾ. ‘‘ཨ་ཏྟ་ནོ ཨ་ནཱ་སེ ས་ཏི ཙེ་ཏ་ནཱ་ཡ་པི ཝི་ནཱ་སོ ན བྷ་ཝ་ཏཱི’’ཏི སུ་ཏྭཱ་པི པ་ར་སྶ ནི་རུ་ཏྟ་ར་བྷཱ་ཝོ, ཙེ་ཏ་ནཱ་ཡ ནཱ་སེ ཝི་སེ་ས་ཀཱ་ར་ཎཱ་བྷཱ་ཝ་ཏོ་ཏི ཨ་དྷི་པྤཱ་ཡེ་ནཱ་ཧ ‘‘ཨ་ཐ ཙེ་ཏ་ནཱ་ཡ་ཡེ་ཝཱ’’ཏི་ཨཱ་དི. ཨ་ཏྟཱ་ཝ ན་སྶ་ཏུ, ཏི་ཊྛ་ཏུ ཙེ་ཏ་ནཱ. ཀོ ཧི ཝི་སེ་ས་ཀཱ་ར་ཎཱ་བྷཱ་ཝེ ཨ་ཏྟ་ནི ཨ་ནུ་རོ་དྷོ, ཙེ་ཏ་ནཱ་ཡ ཝི་རོ་དྷོ་ཏི ཨ་དྷི་པྤཱ་ཡོ. པ་ཊི་ཉྙཱ ཧཱི་ནཱཏི པུ་བྦེ དི་ནྣ་པ་ཊི་ཉྙཱ པ་རི་ཧཱི་ནཱ. ཨ་ཐ ན བྷ་ཝ་ཏི, ‘‘པ་ཊི་ཉྙཱ ཧཱི་ནཱ’’ཏི ཡ་དི ཨ་ཏྟ་ནོ ཝི་ནཱ་སེ ཙེ་ཏ་ནཱ་ཡ ཨ་ཝི་ནཱ་སོ ན བྷ་ཝ་ཏི. ཙེ་ཏ་ན་ཏྟཱ་ནཾ ཨ་ན་ཉྙ་བྷཱ་ཝེ་ན ཙེ་ཏ་ནཱ་ཡ ནཱ་སེ ཨ་ཏྟ་ནོ་པི ཝི་ནཱ་ས་པྤ་ས་ངྒ་ཏོ ཨ་ཏྟཱ ན ན་སྶ་ཏཱི་ཏི ཏ་ཝ པ་ཊི་ཉྙཱ ཧཱི་ནཱ. ཝུ་ཏྟ་པྤ་ཀཱ་ར་ཏོ ཝི་པ་རཱི་ཏཾ ཝཱཏི ཡ་ཐཱ་ཝུ་ཏྟ་པྤ་ཀཱ་ར་ཏོ ཝི་པ་རཱི་ཏཾ. ཙེ་ཏ་ནཱ་ཡ ཝི་ནཱ་སེ་པི ཨ་ཏྟཱ ན ན་སྶ་ཏི, ཨ་ཏྟ་ནོ པ་ན ཨ་ཝི་ནཱ་སེ་པི ཙེ་ཏ་ནཱ ན་སྶ་ཏཱི་ཏི ཨེ་ཝཾ ཝཱ ཏ་ཝ ཨ་དྷི་པྤཱ་ཡོ སི་ཡཱ་ཏི ཨ་ཏྠོ. ཨ་ཏྟཱ ན་སྶ་ཏུ, ཙེ་ཏ་ནཱ ཏི་ཊྛ་ཏུ ཨ་ཉྙ་བྷཱ་ཝེ ཨུ་བྷི་ནྣཾ ས་མཱ་ན་ཡོ་ག་ཀྑ་མ་ཏཱ་ཡ བྷ་ཝི་ཏ་བྦ་ཏོ་ཏི ཨ་དྷི་པྤཱ་ཡོ. པ་ཊི་ཉྙཱ་ཧཱི་ནོ བྷ་ཝ་སཱིཏི ཙེ་ཏ་ནཱ་ཡེ་ཝ ན་སྶ་ཏི, ཨ་ཏྟཱ ན ན་སྶ་ཏི པ་ཊི་ཉྙཱ་ཡ ཧཱི་ནོ བྷ་ཝ་སི.

ཨི་དྷཱཏི ཨ་ཉྙ་ཏྠ པ་ཀྑེ. ལ་ཀྑ་ཎ་ཀ་ཏནྟི ཨ་ཉྙ་མ་ཉྙ་ཝི་ས་དི་སེ་ཧི བྷི་ནྣ་ལ་ཀྑ་ཎེ་ཧི ཀ་ཏཾ. དེ་ས་ནྟ་ར་ཀ་ཏནྟི བྷི་ནྣ་དེ་ས་ཀ་ཏཾ. ཛཱ་ཏོ ཝེ་དཱི་ཡ་ཏི ཉཱ་ཡ་ཏཱི་ཏི ཛཱ་ཏ་ཝེ་དོ, ཨ་གྒི་སྶེ་ཏཾ ཨ་དྷི་ཝ་ཙ་ནཾ. ཌ་ཡ྄ཧ་མཱ་ནེཏི ཨུ་དྡྷ་ནེ པ་ཀྑི་པི་ཏྭཱ པ་ཙྩ་མཱ་ནེ. ཨེ་ཀོ པ་ཝ་ཏྟི་པ་དེ་སོ ཨི་མེ་ས་ནྟི ཨེ་ཀ་དེ་སཱ, ཏེ་སཾ བྷཱ་ཝོ་ཏི ཨེ་ཀ་དེ་ས་ཏྟཾ.

ཨ་ཝི་ནི་བྦྷོ་ག་ཏོཏི ལ་ཀྑ་ཎ་ཏོ བྷེ་དེ་པི ཋཱ་ན་ཝ་སེ་ན ཨ་ཝི་ནི་བྦྷུ་ཛྫ་ན་ཏོ ཨ་ཝི་སཾ་ས་ཊྛ་ཏྟཱ ‘‘ཨེ་ཀ་དེ་ས་ཏྟེ’’ཏི་ཨི་མ་སྶེ་ཝ ཝེ་ཝ་ཙ་ན་ཝ་སེ་ན ‘‘ཨ་ཝི་ནི་བྦྷོ་ག་བྷཱ་ཝེ་པཱི’’ཏི ཝུ་ཏྟཾ. ཏཾ ཨ་ཡུ་ཏྟནྟི ཏཾ ‘‘ཨུ་བྷི་ནྣཾ ཨེ་ཀ་དེ་ས་ཏཱ ན་ཏྠཱི’’ཏི ཨི་མི་ནཱ ས་ཧ ན ཡུ་ཛྫ་ཏི. པ་ཊི་ཉྙཱ ཧཱི་ནཱ་ཏི ཡ་དི པུ་བྦ་པ་ཊི་ཉྙཱ པ་མཱ་ཎཾ, ཨ་ཡཾ པ་ཊི་ཉྙཱ ཧཱི་ནཱ. ཡ་དི ཝཱ པ་ན ཨ་ཡཾ པ་མཱ་ཎཾ, ཨི་ཏ་རཱ ཧཱི་ནཱ་ཏི ཨ་ཏྠོ. ཨ་ཐ ཝཱ ཙེ་ཏ་ནཱ་ཡ ཨ་ཏྟ་ནོ པ་དེ་ས་ཝ་སེ་ན ནཱ་ན་ཏྟེ ཨ་ཏྟ་ནོ ཨ་ཙེ་ཏ་ན་ཏྟ་བྷཱ་ཝ་པྤ་ཏྟི་ཏོ ‘‘ས་ཙེ་ཏ་ནོ ཨ་ཏྟཱ’’ཏི ཧེ་ཊྛཱ ཏ་ཡཱ དི་ནྣ་པ་ཊི་ཉྙཱ པ་རི་ཧཱི་ནཱ་ཏི ཨེ་ཝ་མེ་ཏྠ ཨ་ཏྠོ ད་ཊྛ་བྦོ.

ཨ་ཙེ་ཏ་ནོ ཨ་ཏྟཱཏི ཨ་ཏྟཱ ཨ་ཙེ་ཏ་ནོ་ཏི ཀ་ཏྭཱ. པུ་བྦེ ཝུ་ཏྟ་དོ་ས་ཏོཏི ‘‘ཡ་དི ཨ་ཙེ་ཏ་ནོ སི་ཡཱ’’ཏི་ཨཱ་དི་ནཱ ཨཱ་དི་ཏོ ཝུ་ཏྟ་དོ་ས་ཏོ. ཏ་སྨཱཏི ཡ་སྨཱ ཨེ་ཝཾ ཨུ་པ་པ་རི་ཀྑི་ཡ་མཱ་ནེ ཝི་མ་དྡ་ན་ས་ཧོ ཧོ་ཏི, ཏ་སྨཱ.

༧༧༩. ཡ་དི ཨེ་ཝནྟི ཡ་དི པ་ར་མ་ཏྠ་ཏོ ཀུ་ས་ལཱ་ཀུ་ས་ལཱ་ནཾ ཀཱ་ར་ཀོ, ཏ་བྦི་པཱ་ཀཱ་ན་ཉྩ ཝེ་ད་ཀོ ན་ཏྠི, ཨེ་ཝཾ ས་ནྟེ ཨ་ཐ ཀ་སྨཱ བྷ་ག་ཝ་ཏཱ ཝུ་ཏྟ་ནྟི ས་མྦ་ནྡྷོ.

ས་ནྡྷཱ་ཝ་ཏཱིཏི སཾ་ས་ར་ཏི. ཨ་ཏྟ་ནཱ ཀ་ཏ་ཀུ་ས་ལཱ་ཀུ་ས་ལ་ཀ་མྨ་པ་ཙྩ་ཡ་ཏྟཱ ཝི་པཱ་ཀ་བྷཱུ་ཏཾ སུ་ཁ་དུ་ཀྑ་མྤི ཨ་ཏྟ་ནཱ ཀ་ཏ་མེ་ཝ ནཱ་མ ཧོ་ཏཱི་ཏི ཝུ་ཏྟཾ ‘‘སུ་ཁ་དུ་ཀྑཾ ས་ཡཾ་ཀ་ཏ’’ནྟི.

༧༨༠. སཾ་སཱ་ར་མཱ་པ་ནྣོཏི –

‘‘ཁ་ནྡྷཱ་ན་ཉྩ པ་ཊི་པཱ་ཊི, དྷཱ་ཏུ་ཨཱ་ཡ་ཏ་ནཱ་ན ཙ;

ཨ་བྦོ་ཙྪི་ནྣཾ ཝ་ཏྟ་མཱ་ནཱ, ‘སཾ་སཱ་རོ’ཏི པ་ཝུ་ཙྩ་ཏཱི’’ཏི. (དྷ. ས. ཨ་ཊྛ. ནི་དཱ་ན་ཀ་ཐཱ; ཝི་སུ་དྡྷི. ༢.༦༡༩) –

ཨེ་ཝཾ ཝུ་ཏྟ་ཁ་ནྡྷ་པ་ཊི་པཱ་ཊི་ཨཱ་དི་ཝ་ས་པྤ་ཝ་ཏྟཾ སཾ་སཱ་རཾ པུ་ན་པྤུ་ནཾ པ་ཝ་ཏྟི་ཝ་སེ་ན པ་ཊི་པ་ནྣོ. དུ་ཀྑ་མ་སྶ མ་ཧ་བྦྷ་ཡནྟི ཨ་སྶ སཾ་སཱ་རཱ་པ་ནྣ་སྶ ས་ཏྟ་སྶ ཛཱ་ཏི་ཨཱ་དི་དུ་ཀྑཾ མ་ཧ་བྦྷ་ཡཾ མ་ཧཱ་བྷ་ཡ་སཾ་ཝ་ཏྟ་ན་ཀ་ནྟི ཨ་ཏྠོ. ཨོ་པ་པཱ་ཏི་ཀོཏི ཨུ་པྤ་ཛྫ་མཱ་ནོ.

༧༨༡. བྷཱ་རཱ ཧ་ཝེ པ་ཉྩ་ཀྑ་ནྡྷཱཏི རཱུ་པཱ་ད་ཡོ པ་ཉྩ་ཀྑ་ནྡྷཱ བྷཱ་ར་བྷཱུ་ཏཱ, སཱི་སེ ནི་ཀྑི་ཏྟ་བྷཱ་ར་ས་དི་སཱ་ཏི ཝུ་ཏྟཾ ཧོ་ཏི. བྷཱ་ར་ཧཱ་རོ ཙ པུ་གྒ་ལོ ཏ་སྶ པ་ཉྩ་ཀྑ་ནྡྷ་བྷཱ་ར་སྶ ཧཱ་ར་ཀོ. བྷཱ་རཱ་དཱ་ནནྟི པ་ཊི་ས་ནྡྷི་ཝ་སེ་ན པ་ཉྩ་ཀྑ་ནྡྷ་བྷཱ་ར་གྒ་ཧ་ཎཾ. བྷཱ་ར་ནི་ཀྑེ་པ་ནནྟི པུ་ན ཨ་གྒ་ཧེ་ཏ་བྦ་ཏཱ་པཱ་ད་ནེ་ན ཨ་ནུ་པཱ་དཱ་པ་རི་ནི་བྦཱ་ན་ཝ་སེ་ན བྷཱ་ར་སྶ ནི་ཀྑི་པ་ནཾ.

༧༨༢. ཡནྟི ཀུ་ས་ལཱ་ཀུ་ས་ལ་ཀ་མྨཾ. ས་ཀནྟི ཨཱ་ཡ་ཏྟཾ.

༧༨༣. ཨེ་ཀ་སྶ པུ་གྒ་ལ་སྶཱ་ཏི ས་མྦ་ནྡྷོ. ཨེ་ཀེ་ན ཀ་པྤེ་ནཱཏི ཨེ་ཀ་སྨིཾ ཀ་པྤེ.

༧༨༤. ཨ་སྶ་དྡྷོཏི་ཨཱ་དི ཧེ་ཊྛཱ ཝུ་ཏྟ་ཏྠཾ.

‘‘ཏ་ཉྩ ཁོ ས་མྨུ་ཏི་ཝ་སེ་ན, ན པ་ར་མ་ཏྠ་ཏོ’’ཏི ཝ་ཏྭཱ ཏ་དེ་ཝ པ་ཏི་ཊྛཱ་པེ་ཏུཾ ‘‘ན་ནུ བྷ་ག་ཝ་ཏཱ’’ཏི་ཨཱ་དི ཝུ་ཏྟཾ. ‘‘ཀིཾ ནུ ས་ཏྟོ’’ཏི གཱ་ཐཱ ཝ་ཛི་རཱ་ཡ ཐེ་རི་ཡཱ ཝུ་ཏྟཱ་པི བྷ་ག་ཝ་ཏོ ཨ་དྷི་པྤཱ་ཡ་ཝ་སེ་ནེ་ཝ ཝུ་ཏྟ་ཏྟཱ བྷ་ག་ཝ་ཏཱ ཝུ་ཏྟཱ ནཱ་མ ཧོ་ཏཱི་ཏི ཀ་ཏྭཱ ཝུ་ཏྟཾ ‘‘བྷ་ག་ཝ་ཏཱ ཨི་ད་མྤི ཝུ་ཏྟ’’ནྟི.

༧༨༥. ཀིཾ ནུ ས་ཏྟོ་ཏི པ་ཙྩེ་སཱིཏི རཱུ་པ་ཝེ་ད་ནཱ་དཱི་སུ ཀིཾ ནཱ་མ ས་ཏྟོ པུ་གྒ་ལོ་ཏི ག་ཎྷཱ་སི.

༧༨༦. ཨ་ངྒ་ས་མྦྷཱ་རཱཏི ཙ་ཀྐཱ་དི་ཨ་ཝ་ཡ་ཝ་ས་མྦྷཱ་རེ་སུ, ཙ་ཀྐཱ་དི་ཨ་ཝ་ཡ་ཝཱ་ནཾ ས་མོ་དྷཱ་ནེ་ཝཱ་ཏི ཨ་ཏྠོ. ས་དྡོཏི ཝོ་ཧཱ་རོ.

ཏ་སྨཱཏི ཡ་སྨཱ ཨེ་ཝཾ པ་ར་མ་ཏྠ་ཏོ ས་ཏྟ་སྶ ཨ་བྷཱ་ཝོ བྷ་ག་ཝ་ཏཱ ཝུ་ཏྟོ, ཏ་སྨཱ. ན ཝ་ཙ་ན་མ་ཏྟ་མེ་ཝ ཨཱ་ལ་མྦི་ཏ་བྦཾ ཨ་དྷི་པྤཱ་ཡཾ པ་ཧཱ་ཡཱ་ཏི ཨ་ཏྠོ. ད་ལ༹ྷ་མཱུ་ལ༹ྷོ་ཝ ཧུ་ཏྭཱ ག་ཎྷཱ་ཏཱི་ཏི ད་ལ༹ྷ་མཱུ་ལ༹ྷ་གྒཱ་ཧཱི, ཀཱ་ར་ཎེ ད་སྶི་ཏེ་པི ཨ་པ་རི་ཙྩ་ཛ་ན་ཝ་སེ་ན ག་ཧ་ཎཾ ད་ལ༹ྷ་གྒ་ཧ་ཎཾ. ཀཱ་ར་ཎ་སྶེ་ཝ ད་ཊྛུ་མ་ས་མ་ཏྠ་ཏཱ་ཝ་སེ་ན ག་ཧ་ཎཾ མཱུ་ལ༹ྷ་གྒ་ཧ་ཎཾ. ཏཱ་དི་སེ་ན ན བྷ་ཝི་ཏ་བྦ་ནྟི ཨཱ་ཧ ‘‘ན ཙ…པེ… བྷ་ཝི་ཏ་བྦ’’ནྟི. སུ་ཏྟ་པ་དཱ་ནནྟི ནེ་ཡྻ་ཏྠ་ནཱི་ཏ་ཏྠ་ཝ་སེ་ན ཨུ་བྷ་ཡ་ཐཱ ཋི་ཏཱ་ནཾ སུ་ཏྟ་ནྟཱ་ནཾ.

དྭེ ས་ཙྩཱ་ནི ཝུ་ཏྟཱ་ནི ཏ་ཐཱ ཏ་ཐཱ ཝི་ནེ་ཏ་བྦཱ་ནཾ པུ་གྒ་ལཱ་ནཾ ཝ་སེ་ནཱ་ཏི ཨ་དྷི་པྤཱ་ཡོ. ཡེ་ས་ཉྷི ས་མྨུ་ཏི་དེ་ས་ནཱ་ཡ ཝི་སེ་སཱ་དྷི་ག་མོ ཧོ་ཏི, ཏེ་སཾ ས་མྨུ་ཏི་ས་ཙྩ་ཝ་སེ་ན དེ་སེ་ཏི. ཡེ་ས་ཉྩ པ་ར་མ་ཏྠ་དེ་ས་ནཱ་ཡ, ཏེ་སཾ པ་ར་མ་ཏྠ་ཝ་སེ་ན དེ་སེ་ཏི. དེ་ས་བྷཱ་སཱ་ཀུ་ས་ལོ ཝི་ཡ ཨཱ་ཙ་རི་ཡོ ཏཾ་ཏཾ་དེ་ས་ཝཱ་སི་མཱ་ཎ་ཝཱ་ནཾ ཏཱ་ཡ ཏཱ་ཡ བྷཱ་སཱ་ཡ. ས་མྨུ་ཏི་ས་ཙྩཾ པ་ར་མ་ཏྠ་ས་ཙྩ་ཉྩཱཏི ཨེ་ཏྠ ‘‘པུ་གྒ་ལོ ས་ཏྟོ ཨི་ཏྠཱི པུ་རི་སོ ཁ་ཏྟི་ཡོ བྲཱ་ཧྨ་ཎོ དེ་ཝོ’’ཏི་ཨེ་ཝ་མཱ་དི པ་ར་མ་ཏྠ་ཏོ ཨ་ཝི་ཛྫ་མཱ་ན་མྤི ལོ་ཀེ ཀ་ཏ་ས་ངྐེ་ཏ་ཝ་སེ་ན ཏ་ཐ་ཏྟཱ ས་མྨུ་ཏི་ས་ཙྩཾ. ཁ་ནྡྷ་དྷཱ་ཏུ་ཨཱ་ཡ་ཏ་ནཱ་ནི ས་ཏི་པ་ཊྛཱ་ནཱ་ཏི་ཨེ་ཝ་མཱ་དི པ་ར་མ་ཏྠ་ཝ་སེ་ནེ་ཝ ཏ་ཐ་ཏྠཱ པ་ར་མ་ཏྠ་ས་ཙྩཾ. ཏེ་ནཱ་ཧུ ཨ་ཊྛ་ཀ་ཐཱ་ཙ་རི་ཡཱ –

‘‘ས་ངྐེ་ཏ་ཝ་ཙ་ནཾ ས་ཙྩཾ, ལོ་ཀ་ས་མྨུ་ཏི་ཀཱ་ར་ཎཾ;

པ་ར་མ་ཏྠ་ཝ་ཙ་ནཾ ས་ཙྩཾ, དྷ་མྨཱ་ནཾ བྷཱུ་ཏ་ཀཱ་ར་ཎཾ. (དཱི. ནི. ཨ་ཊྛ. ༡.༤༣༩-༤༤༣);

‘‘ཏ་སྨཱ ཝོ་ཧཱ་ར་ཀུ་ས་ལ་སྶ, ལོ་ཀ་ནཱ་ཐ་སྶ ས་ཏྠུ་ནོ;

ས་མྨུ་ཏིཾ ཝོ་ཧ་ར་ནྟ་སྶ, མུ་སཱ་ཝཱ་དོ ན ཛཱ་ཡ་ཏཱི’’ཏི.

༧༨༧-༨. ཡོ སོ ཨི་མཾ ག་ནྠཾ ཨ་ཙྩ་ནྟཾ ས་ཏ་ཏ་མྤི ཙི་ནྟེ་ཏི, ཏ་སྶ ཏ་ཏོ སི་དྡྷཱ པ་ར་མཱ པ་ཉྙཱ ཝེ་པུ་ལླ་བྷཱ་ཝཾ ག་ཙྪ་ཏི. ཨ་དྷིཾ ཙི་ཏྟ་ས་ནྟཱ་པཾ ནཱི་ཧ་ར་ཏི ཨ་པ་ནེ་ཏཱི་ཏི ཨ་དྷི་ནཱི་ཧ་རཾ. ཝི་མ་ཏི་ཡཱ ཝི་ཙི་ཀི་ཙྪཱ་ཡ, མོ་ཧ་སྶ ཝཱ ཝི་ནཱ་སཾ ཀ་རོ་ཏི ཨུ་པ་ནི་སྶ་ཡ་བྷཱ་ཝ་ཏོ་ཏི ཝི་མ་ཏི་ཝི་ནཱ་ས་ཀ་རཾ. ཨ་ཏྠ་བྱ་ཉྫ་ན་ས་མྤ་དཱ་ཡ མ་ན་ཝ་ཌྜྷ་ན་ཏོ པི་ཡ་ཀ་རཾ. ཝི་ཀ་ས་ཏཱིཏི དི་བྦ་ཏི. ཨི་དྷཱཏི ཨི་མ་སྨིཾ སཱ་ས་ནེ, ཨ་བྷི་དྷ་མྨེ ཝཱ.

ཨི་ཏི ཨ་བྷི་དྷ་མྨ་ཏྠ་ཝི་ཀཱ་སི་ནི་ཡཱ ནཱ་མ

ཨ་བྷི་དྷ་མྨཱ་ཝ་ཏཱ་ར་སཾ་ཝ་ཎྞ་ནཱ་ཡ

ཀཱ་ར་ཀ་པ་ཊི་ཝེ་དྷ་ཝ་ཎྞ་ནཱ ནི་ཊྛི་ཏཱ.