༩. ན་ཝ་མོ པ་རི་ཙྪེ་དོ
པུ་ཉྙ་ཝི་པཱ་ཀ་པ་ཙྩ་ཡ་ནི་དྡེ་ས་ཝ་ཎྞ་ནཱ
༥༦༠-༡. ཝ་ཊྚ་ཀ་ཐཱ་ཡ ལོ་ཀུ་ཏྟ་ར་ཝི་པཱ་ཀཱ་ནཾ ཨ་ལ་བྦྷ་ན་ཏོ ‘‘ལོ་ཀི་ཡཱ་ནེ་ཝཱ’’ཏི ཝུ་ཏྟཾ. པུ་ཉྙཱ་པུ་ཉྙཱ་དི་ས་ངྑཱ་རཱཏི པུ་ཉྙཱ་བྷི་ས་ངྑཱ་རོ ཨ་པུ་ཉྙཱ་བྷི་ས་ངྑཱ་རོ ཨཱ་ནེ་ཉྫཱ་བྷི་ས་ངྑཱ་རོ་ཏི ཏ་ཡོ ས་ངྑཱ་རཱ. ཏ་ཏྠ པུ་ནཱ་ཏི ཨ་ཏྟ་ནོ ས་ནྟཱ་ནཾ ཨ་པུ་ཉྙ་ཕ་ལ་ཏོ, དུ་ཀྑ་སཾ་ཀི་ལེ་ས་ཏོ ཙ སོ་དྷེ་ཏི, པུ་ཛྫཾ བྷ་ཝ་ཕ་ལཾ ནི་བྦ་ཏྟེ་ཏཱི་ཏི ཝཱ པུ་ཉྙཾ, ཨ་ཏྟ་ནོ ཕ་ལ་སྶ ཨ་བྷི་ས་ངྑ་ར་ཎ་ཊྛེ་ན ཨ་བྷི་ས་ངྑཱ་རོ ཙཱ་ཏི པུ་ཉྙཱ་བྷི་ས་ངྑཱ་རོ, པུ་ཉྙ་པ་ཊི་པ་ཀྑ་ཏོ ཨ་པུ་ཉྙཾ, ཝུ་ཏྟ་ན་ཡེ་ན ཨ་བྷི་ས་ངྑཱ་རོ ཙཱ་ཏི ཨ་པུ་ཉྙཱ་བྷི་ས་ངྑཱ་རོ. ས་མཱ་དྷི་པ་ཙྩ་ནཱི་ཀཱ་ནཾ ཨ་ཏི་དཱུ་ར་ཏཱ་ཡ ན ཨི་ཉྫ་ཏི ན ཀ་མྤ་ཏཱི་ཏི ཨཱ་ནེ་ཉྫཾ, ཏཾ ཨ་བྷི་ས་ངྑ་རོ་ཏཱི་ཏི ཨཱ་ནེ་ཉྫཱ་བྷི་ས་ངྑཱ་རོ. ཏ་ཏྠ དཱ་ན་སཱི་ལཱ་དི་ཝ་སེ་ན པ་ཝ་ཏྟཱ ཨ་ཊྛ ཀཱ་མཱ་ཝ་ཙ་ར་ཀུ་ས་ལ་ཙེ་ཏ་ནཱ, བྷཱ་ཝ་ནཱ་ཝ་སེ་ནེ་ཝ པ་ཝ་ཏྟཱ རཱུ་པཱ་ཝ་ཙ་ར་ཀུ་ས་ལ་ཙེ་ཏ་ནཱ ཙཱ་ཏི ཏེ་ར་ས ཙེ་ཏ་ནཱ པུ་ཉྙཱ་བྷི་ས་ངྑཱ་རོ ནཱ་མ. པཱ་ཎཱ་ཏི་པཱ་ཏཱ་དི་ཝ་སེ་ན པ་ཝ་ཏྟཱ དྭཱ་ད་ས ཨ་ཀུ་ས་ལ་ཙེ་ཏ་ནཱ ཨ་པུ་ཉྙཱ་བྷི་ས་ངྑཱ་རོ ནཱ་མ. བྷཱ་ཝ་ནཱ་ཝ་སེ་ནེ་ཝ པ་ཝ་ཏྟཱ ཙ་ཏ་སྶོ ཨ་རཱུ་པཱ་ཝ་ཙ་ར་ཀུ་ས་ལ་ཙེ་ཏ་ནཱ ཨཱ་ནེ་ཉྫཱ་བྷི་ས་ངྑཱ་རོ ནཱ་མ. བྷ་ཝཱ་དཱི་སུ ཡ་ཐཱ པ་ཙྩ་ཡཱ, ཏ་ཐཱ ཡེ་ས་ཉྩ ཝི་པཱ་ཀཱ་ནཾ པ་ཙྩ་ཡཱ, ཏེ་པི ཝི་ཉྙཱ་ཏ་བྦཱ་ཏི ས་མྦ་ནྡྷོ. ཀེ་ཙི པ་ན ‘‘ཏེ་པཱིཏི ས་ངྑཱ་རཱ་ནཾ ག་ཧ་ཎ’’ནྟི ཝ་ད་ནྟི, ཏཾ ན ཡུ་ཏྟཾ, ཨེ་ཝཾ ས་ཏི ‘‘ཡེ་ས’’ནྟི ཨ་ནི་ཡ་མ་ནི་དྡེ་ས་སྶ ནི་ཡ་མ་ཀ་ཝ་ཙ་ནཱ་བྷཱ་ཝ་ཏོ.
༥༦༢. ཀ་ཏ་མེ པ་ན ཏེ བྷ་ཝཱ་ད་ཡོ་ཏི ཨཱ་ཧ ‘‘ཏ་ཡོ བྷ་ཝཱ’’ཏི་ཨཱ་དི. ཏ་ཏྠ ཀཱ་མ་རཱུ་པཱ་རཱུ་པ་ཝ་སེ་ན ཏ་ཡོ བྷ་ཝཱ. ས་ཉྙཱི་བྷ་ཝ་ཨ་ས་ཉྙཱི་བྷ་ཝ་ནེ་ཝ་ས་ཉྙཱི་ནཱ་ས་ཉྙཱི་བྷ་ཝ་ཝ་སེ་ན, པ་ན ཨེ་ཀ་ཝོ་ཀཱ་ར་བྷ་ཝ་ཙ་ཏུ་ཝོ་ཀཱ་ར་བྷ་ཝ་པ་ཉྩ་ཝོ་ཀཱ་ར་བྷ་ཝ་ཝ་སེ་ན ཙ ཏ་ཡོ བྷ་ཝཱ ཨེ་ཏྠེ་ཝ ས་མོ་དྷཱ་ནཾ ག་ཙྪ་ནྟི. ཙ་ཏ་སྶོ ཡོ་ནི་ཡོཏི ཨ་ཎྜ་ཛ་ཛ་ལཱ་བུ་ཛ་སཾ་སེ་ད་ཛ་ཨོ་པ་པཱ་ཏི་ཀ་ཝ་སེ་ན ཙ་ཏྟཱ་རོ ས་ཏྟ་ནི་ཀཱ་ཡཱ. ཏ་ཏྠ བཱི་ཛ་ཀ་པཱ་ལེ ནི་བྦ་ཏྟོ ས་ཏྟ་ནི་ཀཱ་ཡོ ཨ་ཎྜ་ཛ་ཡོ་ནི ནཱ་མ. མཱ་ཏུ་ག་བྦྷེ ཛ་ལཱ་བུ་ཛེ ནི་བྦ་ཏྟ་ས་ཏྟ་ནི་ཀཱ་ཡོ ཛ་ལཱ་བུ་ཛ་ཡོ་ནི ནཱ་མ. པ་དུ་མ་ག་བྦྷ་མཱ་ནུ་ས་ཀ་ག་བྦྷ་མ་ལཱ་དི་སཾ་སེ་དཱུ་པ་ནི་སྶ་ཡེ་ན ཨུ་པྤ་ཛྫ་ན་ཀ་ས་ཏྟ་ནི་ཀཱ་ཡོ སཾ་སེ་ད་ཛ་ཡོ་ནི ནཱ་མ. ཀུ་ཏོ་ཙི ཨ་ནུ་པྤ་ཛྫི་ཏྭཱ ཀེ་ཝ་ལཾ ཏ་ཏྠ ཏ་ཏྠ པ་རི་པུ་ཎྞ་ངྒ་པ་ཙྩ་ངྒོ ཧུ་ཏྭཱ ཨུ་པྤ་ཛྫ་ན་ཀ་ས་ཏྟ་ནི་ཀཱ་ཡོ ཨོ་པ་པཱ་ཏི་ཀ་ཡོ་ནི ནཱ་མ. ག་ཏི་པ་ཉྩ་ཀཾ ཧེ་ཊྛཱ ཝི་བྷཱ་ཝི་ཏ་མེ་ཝ. པ་ཊི་ས་ནྡྷི་ཝི་ཉྙཱ་ཎ་སྶ ཝ་ཏྠུ་བྷཱུ་ཏཱ ཙ ཝི་ཉྙཱ་ཎ་ཀྑ་ནྡྷཱ ཚ ཝི་ཉྙཱ་ཎ་ཊྛི་ཏི་ཡོ ནཱ་མ. ཏཱ པ་ན ནཱ་ན་ཏྟ་ཀཱ་ཡཱ་དི་ཝ་སེ་ན ས་ཏྟ་ཝི་དྷཱ་ཏི ཨཱ་ཧ ‘‘ཝི་ཉྙཱ་ཎ་ཊྛི་ཏི་ཡོ ས་ཏྟཱ’’ཏི. ཝུ་ཏྟ་ཉྷེ་ཏཾ –
‘‘ས་ཏྟི་མཱ, བྷི་ཀྑ་ཝེ, ཝི་ཉྙཱ་ཎ་ཊྛི་ཏི་ཡོ. ཀ་ཏ་མཱ ས་ཏྟ? ས་ནྟི, བྷི་ཀྑ་ཝེ, ས་ཏྟཱ ནཱ་ན་ཏྟ་ཀཱ་ཡཱ ནཱ་ན་ཏྟ་ས་ཉྙི་ནོ. སེ་ཡྻ་ཐཱ་པི མ་ནུ་སྶཱ ཨེ་ཀ་ཙྩེ ཙ དེ་ཝཱ ཨེ་ཀ་ཙྩེ ཙ ཝི་ནི་པཱ་ཏི་ཀཱ, ཨ་ཡཾ པ་ཋ་མཱ ཝི་ཉྙཱ་ཎ་ཊྛི་ཏི. ས་ནྟི, བྷི་ཀྑ་ཝེ, ས་ཏྟཱ ནཱ་ན་ཏྟ་ཀཱ་ཡཱ ཨེ་ཀ་ཏྟ་ས་ཉྙི་ནོ. སེ་ཡྻ་ཐཱ་པི དེ་ཝཱ བྲ་ཧྨ་ཀཱ་ཡི་ཀཱ པ་ཋ་མཱ་བྷི་ནི་བྦ་ཏྟཱ, ཨ་ཡཾ དུ་ཏི་ཡཱ ཝི་ཉྙཱ་ཎ་ཊྛི་ཏི. ས་ནྟི, བྷི་ཀྑ་ཝེ, ས་ཏྟཱ ཨེ་ཀ་ཏྟ་ཀཱ་ཡཱ ནཱ་ན་ཏྟ་ས་ཉྙི་ནོ. སེ་ཡྻ་ཐཱ་པི དེ་ཝཱ ཨཱ་བྷ་སྶ་རཱ, ཨ་ཡཾ ཏ་ཏི་ཡཱ ཝི་ཉྙཱ་ཎ་ཊྛི་ཏི. ས་ནྟི, བྷི་ཀྑ་ཝེ, ས་ཏྟཱ ཨེ་ཀ་ཏྟ་ཀཱ་ཡཱ ཨེ་ཀ་ཏྟ་ས་ཉྙི་ནོ. སེ་ཡྻ་ཐཱ་པི དེ་ཝཱ སུ་བྷ་ཀི་ཎྷཱ, ཨ་ཡཾ ཙ་ཏུ་ཏྠཱི ཝི་ཉྙཱ་ཎ་ཊྛི་ཏི. ས་ནྟི, བྷི་ཀྑ་ཝེ, ས་ཏྟཱ ས་བྦ་སོ རཱུ་པ་ས་ཉྙཱ་ནཾ ས་མ་ཏི་ཀྐ་མཱ པ་ཊི་གྷ་ས་ཉྙཱ་ནཾ ཨ་ཏྠ་ངྒ་མཱ ནཱ་ན་ཏྟ་ས་ཉྙཱ་ནཾ ཨ་མ་ན་སི་ཀཱ་རཱ ‘ཨ་ན་ནྟོ ཨཱ་ཀཱ་སོ’ཏི ཨཱ་ཀཱ་སཱ་ན་ཉྩཱ་ཡ་ཏ་ནཱུ་པ་གཱ, ཨ་ཡཾ པ་ཉྩ་མཱི ཝི་ཉྙཱ་ཎ་ཊྛི་ཏི. ས་ནྟི, བྷི་ཀྑ་ཝེ, ས་ཏྟཱ ས་བྦ་སོ ཨཱ་ཀཱ་སཱ་ན་ཉྩཱ་ཡ་ཏ་ནཾ ས་མ་ཏི་ཀྐ་མྨ ‘ཨ་ན་ནྟཾ ཝི་ཉྙཱ་ཎ’ནྟི ཝི་ཉྙཱ་ཎ་ཉྩཱ་ཡ་ཏ་ནཱུ་པ་གཱ, ཨ་ཡཾ ཚ་ཊྛཱི ཝི་ཉྙཱ་ཎ་ཊྛི་ཏི. ས་ནྟི, བྷི་ཀྑ་ཝེ, ས་ཏྟཱ ས་བྦ་སོ ཝི་ཉྙཱ་ཎ་ཉྩཱ་ཡ་ཏ་ནཾ ས་མ་ཏི་ཀྐ་མྨ ‘ན་ཏྠི ཀི་ཉྩཱི’ཏི ཨཱ་ཀི་ཉྩ་ཉྙཱ་ཡ་ཏ་ནཱུ་པ་གཱ, ཨ་ཡཾ ས་ཏྟ་མཱི ཝི་ཉྙཱ་ཎ་ཊྛི་ཏཱི’’ཏི (དཱི. ནི. ༣.༣༣༢; ཨ. ནི. ༧.༤༤).
ཨེ་ཏྠ ཧི ཨ་པ་རི་མཱ་ཎ་ཙ་ཀྐ་ཝཱ་ལ༹་ཝཱ་སི་ནོ མ་ནུ་སྶཱ ཀཱ་མཱ་ཝ་ཙ་ར་དེ་ཝཱ པུ་ན་བྦ་སུ་མཱ་ཏུ་པི་ཡ་ངྐ་ར་མཱ་ཏཱ་ད་ཡོ ཝི་ནི་པཱ་ཏི་ཀཱ་སུ་རཱ ཙ ཀུ་ས་ལ་ཝི་པཱ་ཀ་པ་ཊི་ས་ནྡྷི་ཀཱ ཝེ་མཱ་ནི་ཀ་པེ་ཏཱ ཙེ་ཏི ཨི་མེ དཱི་གྷ་ར་སྶ་ཀི་ས་ཐཱུ་ལ་ཀཱ་ལ༹་ཨོ་དཱ་ཏཱ་དི་ཝ་ཎྞ་ས་ཎྛཱ་ན་ཝ་སེ་ན རཱུ་པ་ཀཱ་ཡ་སྶ, ཨ་ཧེ་ཏུ་དུ་ཧེ་ཏུ་ཏི་ཧེ་ཏུ་ཝ་སེ་ན པ་ཊི་ས་ནྡྷི་ས་ཉྙཱ་ཡ ཙ ནཱ་ནཱ་བྷཱ་ཝ་ཏོ ནཱ་ན་ཏྟ་ཀཱ་ཡ་ནཱ་ན་ཏྟ་ས་ཉྙི་ནོ ནཱ་མ, ཨ་ཡཾ པ་ཋ་མཱ ཝི་ཉྙཱ་ཎ་ཊྛི་ཏི. པ་ཋ་མ་ཛ྄ཛྷཱ་ན་ཏ་ལ་ཝཱ་སི་ནོ པ་ན ཏ་ཡོ དེ་ཝཱ ཨུ་པ་རཱུ་པ་རི་ཝཱ་སཱི་ནཾ ཝ་ཎྞཱ་དི་ཀ་མ་པེ་ཀྑི་ཏྭཱ ཨ་ཏྟ་ནོ ཝ་ཎྞཱ་དཱི་ནཾ ནི་ཧཱི་ན་ཏཱ་ཡ རཱུ་པ་ཀཱ་ཡ་སྶ ནཱ་ནཱ་བྷཱ་ཝ་ཏོ, པ་ཋ་མ་ཛ྄ཛྷཱ་ན་ཝི་པཱ་ཀ་ཝི་ཉྙཱ་ཎ་ཝ་སེ་ན ས་མཱ་ན་ས་ཉྙི་ཏཱ་ཡ ཙ ནཱ་ན་ཏྟ་ཀཱ་ཡ་ཨེ་ཀ་ཏྟ་ས་ཉྙི་ནོ ནཱ་མ, ཨ་ཡཾ དུ་ཏི་ཡཱ ཝི་ཉྙཱ་ཎ་ཊྛི་ཏི, ཙ་ཏུ་རཱ་པཱ་ཡ་ཝཱ་སི་ནོ་པི ཝ་ཎྞ་ས་ཎྛཱ་ན་ཝ་སེ་ན རཱུ་པ་ཀཱ་ཡ་སྶ ནཱ་ནཱ་ས་བྷཱ་ཝ་ཏྟཱ, ཨ་ཀུ་ས་ལ་ཝི་པཱ་ཀ་ས་ཉྙཱ་ཝ་སེ་ན ས་ཉྙཱ་ཡ ཨེ་ཀ་ས་བྷཱ་ཝ་ཏྟཱ ཙ དུ་ཏི་ཡ་ཝི་ཉྙཱ་ཎ་ཊྛི་ཏི་ཡཾ་ཡེ་ཝ ས་མོ་དྷཱ་ནཾ ག་ཙྪ་ནྟཱི་ཏི ཝེ་དི་ཏ་བྦཾ. དུ་ཏི་ཡ་ཛ྄ཛྷཱ་ན་ཏ་ལ་ཝཱ་སི་ནོ ཏ་ཡོ དེ་ཝཱ ཝ་ཎྞ་ས་ཎྛཱ་ནཱ་དི་ཝ་སེ་ན ས་མཱ་ན་ཏྟཱ རཱུ་པ་ཀཱ་ཡ་སྶ ཝི་སེ་སཱ་བྷཱ་ཝ་ཏོ པ་ཉྩ་ཀ་ན་ཡེ དུ་ཏི་ཡ་ཏ་ཏི་ཡ་ཛ྄ཛྷཱ་ན་ས་ཉྙཱ་ཝ་སེ་ན པ་ཊི་ས་ནྡྷི་ས་ཉྙཱ་ཡ ནཱ་ནཱ་བྷཱ་ཝ་ཏོ ཨེ་ཀ་ཏྟ་ཀཱ་ཡ་ནཱ་ན་ཏྟ་ས་ཉྙི་ནོ ནཱ་མ, ཨ་ཡཾ ཏ་ཏི་ཡཱ ཝི་ཉྙཱ་ཎ་ཊྛི་ཏི. ཏ་ཏི་ཡ་ཛ྄ཛྷཱ་ན་ཏ་ལ་ཝཱ་སི་ནོ པ་ན ཏ་ཡོ དེ་ཝཱ རཱུ་པ་ཀཱ་ཡ་ཝ་སེ་ན ས་མཱ་ན་ཏྟཱ, པ་ཉྩ་ཀ་ན་ཡེ ཙ་ཏུ་ཏྠ་ཛ྄ཛྷཱ་ན་ཝི་པཱ་ཀ་ས་ཉྙཱ་ཝ་སེ་ན པ་ཊི་ས་ནྡྷི་ས་ཉྙཱ་ཡ ཙ ཨེ་ཀ་ཏྟཱ ཨེ་ཀ་ཏྟ་ཀཱ་ཡ་ཨེ་ཀ་ཏྟ་ས་ཉྙི་ནོ ནཱ་མ, ཨ་ཡཾ ཙ་ཏུ་ཏྠཱི ཝི་ཉྙཱ་ཎ་ཊྛི་ཏི. ཝེ་ཧ་པྥ་ལ་ཝཱ་སི་ནོ ཙེ་ཝ པ་ཉྩ སུ་དྡྷཱ་ཝཱ་ས་ཝཱ་སི་ནོ ཙ ཝ་ཎྞ་ས་ཎྛཱ་ན་ཝ་སེ་ན རཱུ་པ་ཀཱ་ཡ་སྶ, པ་ཉྩ་མ་ཛ྄ཛྷཱ་ན་ཝི་པཱ་ཀ་ས་ཉྙཱ་ཝ་སེ་ན པ་ཊི་ས་ནྡྷི་ས་ཉྙཱ་ཡ ཙ ས་མཱ་ན་ཏྟཱ ཙ་ཏུ་ཏྠ་ཝི་ཉྙཱ་ཎ་ཊྛི་ཏི་མེ་ཝ བྷ་ཛ་ནྟི. ཨཱ་ཀཱ་སཱ་ན་ཉྩཱ་ཡ་ཏ་ནཱ་ད་ཡོ ཏི་སྶོ ཝི་ཉྙཱ་ཎ་ཊྛི་ཏི་ཡོ པཱ་ལི༹་ཝ་སེ་ནེ་ཝ པཱ་ཀ་ཊཱ. ཨ་ས་ཉྙ་ས་ཏྟཱ པ་ན ཝི་ཉྙཱ་ཎཱ་བྷཱ་ཝེ་ན ནེ་ཝ་ས་ཉྙཱ་ནཱ་ས་ཉྙཱ་ཡ་ཏ་ན་ཝཱ་སི་ནོ ཙ ས་ཉྙཱ་ཡ ཝི་ཡ ཝི་ཉྙཱ་ཎ་སྶ སུ་ཁུ་མ་བྷཱ་ཝེ་ནེ་ཝ ཝི་ཉྙཱ་ཎ་ཊྛི་ཏཱི་སུ ན ག་ཧི་ཏཱ, ས་ཏྟཱ་ནཾ ནི་ཝཱ་ས་ཏཱ་ཡ པ་ན ‘‘ས་ཏྟཱ་ཝཱ་སཱ’’ཏི ཝུ་ཙྩ་ནྟི. ཨེ་ཝ་ཉྩ ཀ་ཏྭཱ ཏེ་ཧི ས་ཏྟ ཝི་ཉྙཱ་ཎ་ཊྛི་ཏི་ཡོ ས་མོ་དྷཱ་ནེ་ཏྭཱ ན་ཝ ས་ཏྟཱ་ཝཱ་སཱ ཝུ་ཏྟཱ.
༥༦༣-༤. ཨི་དཱ་ནི ཨེ་ཝཾ ཝུ་ཏྟེ་སུ བྷ་ཝཱ་དཱི་སུ དྭ་ཏྟིཾ་ས་ཝི་པཱ་ཀཱ་ནཾ ཏི་ཎྞཾ ཨ་བྷི་ས་ངྑཱ་རཱ་ནཾ པ་ཙྩ་ཡ་བྷཱ་ཝཾ ད་སྶེ་ཏུཾ ‘‘ཀཱ་མེ པུ་ཉྙཱ་བྷི་ས་ངྑཱ་ར་ས་ཉྙི་ཏཱ’’ཏི་ཨཱ་དི ཨཱ་ར་དྡྷཾ. ན་ཝ་ནྣཾ པཱ་ཀ་ཙི་ཏྟཱ་ནནྟི ས་ཧེ་ཏུ་ཀཱ་ཧེ་ཏུ་ཀ་ཝ་སེ་ན ན་ཝ་ནྣཾ སུ་ག་ཏི་པ་ཊི་ས་ནྡྷི་ཝི་པཱ་ཀ་ཙི་ཏྟཱ་ནཾ. ནཱ་ན་ཀྑ་ཎི་ཀ…པེ… པ་ཙྩ་ཡེ་ཧི ཙཱཏི ཀུ་ས་ལཱ་ཀུ་ས་ལ་ཀ་མྨ་སྶ ཨ་ཏཱི་ཏ་སྶེ་ཝ ཨ་ཏྟ་ནཱ ཛ་ནེ་ཏ་བྦ་ཝི་པཱ་ཀཱ་ནཾ པ་ཙྩ་ཡ་བྷཱ་ཝ་ཏོ ནཱ་ན་ཀྑ་ཎི་ཀ་ཀ་མྨ་པ་ཙྩ་ཡེ་ན, ཏེ་ས་མེ་ཝ བ་ལ་ཝ་ཀཱ་ར་ཎ་བྷཱ་ཝ་ཏོ ཨུ་པ་ནི་སྶ་ཡ་པ་ཙྩ་ཡེ་ན ཙ. ཝུ་ཏྟ་ཉྷི ཏ་སྶ ཨུ་པ་ནི་སྶ་ཡ་ཏྟཾ ‘‘ཀུ་ས་ལཱ་ཀུ་ས་ལཾ ཀ་མྨཾ ཝི་པཱ་ཀ་སྶ ཨུ་པ་ནི་སྶ་ཡ་པ་ཙྩ་ཡེ་ན པ་ཙྩ་ཡོ’’ཏི (པ་ཊྛཱ. ༡.༡.༤༢༣). ས་བྦ་ཏྠ ཨུ་པ་ནི་སྶ་ཡ་བྷཱ་ཝོ བ་ལ་ཝ་ཀ་མྨ་ཝ་སེ་ན ཡོ་ཛེ་ཏ་བྦོ. དུ་བྦ་ལ་ཉྷི ཀ་མྨཾ ཨུ་པ་ནི་སྶ་ཡོ ན ཧོ་ཏཱི་ཏི པ་ཊྛཱ་ན་ཝ་ཎྞ་ནཱ་ཡཾ ད་སྶི་ཏ་མེ་ཏཾ.
༥༦༦-༨. པ་ཉྩ་ནྣནྟི ཀུ་ས་ལ་ཝི་པཱ་ཀ་ཙ་ཀྑུ་སོ་ཏ་ཝི་ཉྙཱ་ཎ་ས་མྤ་ཊི་ཙྪ་ན་ས་ནྟཱི་ར་ཎ་དྭ་ཡ་ཝ་སེ་ན པ་ཉྩ་ནྣཾ. དུ་གྒ་ཏི་ཡཾ ཀུ་ས་ལ་ཝི་པཱ་ཀ་པ་ཊི་ས་ནྡྷི་ཡཱ ཨ་བྷཱ་ཝ་ཏོ ཨཱ་ཧ ‘‘ན ཧོ་ནྟི པ་ཊི་ས་ནྡྷི་ཡ’’ནྟི. ཨེ་ཝཾ པ་ཊི་ས་ནྡྷི་པ་ཝ་ཏྟཱི་ནཾ ཨ་ས་ངྐ་ར་ཝ་སེ་ན པ་ཙྩ་ཡ་ཝི་དྷིཾ ད་སྶེ་ཏྭཱ ཨི་དཱ་ནི ས་མོ་དྷཱ་ནེ་ཏྭཱ ད་སྶེ་ཏུཾ ‘‘ཧོ་ནྟཱི’’ཏི་ཨཱ་དི ཝུ་ཏྟཾ. སོ་ལ༹་ས་ནྣཾ པ་ཝ་ཏྟེ, པ་ཊི་ས་ནྡྷི་ཡཾ ན་ཝ་ནྣ་ནྟི ཡ་ཐཱ་ལཱ་བྷ་ཝ་སེ་ན ཡོ་ཛེ་ཏ་བྦཾ.
༥༦༩-༧༤. རཱུ་པེ པུ་ཉྙཱ་བྷི་ས་ངྑཱ་རཱཏི ཨ་བྷི་ཉྙཱ་ཝ་ཛྫི་ཏཱ པ་ཉྩ རཱུ་པཱ་ཝ་ཙ་ར་པུ་ཉྙཱ་བྷི་ས་ངྑཱ་རཱ. ཀ་སྨཱ པ་ན ཨ་བྷི་ཉྙཱ་ཡ པ་རི་ཝ་ཛྫ་ན་ནྟི? ཝི་པཱ་ཀ་དཱ་ནཱ་བྷཱ་ཝ་ཏོ, ཏ་ཉྩ ཁོ པ་ན་སྶཱ ཝི་པཱ་ཀ་སྶ ཨ་ས་མྦྷ་ཝ་ཏོ, ན པ་ན ཝི་པཱ་ཀུ་པྤཱ་ད་ན་ས་བྷཱ་ཝཱ་བྷཱ་ཝ་ཏོ. ཡ་དི ཧི ཨ་བྷི་ཉྙཱ་ཙེ་ཏ་ནཱ ཝི་པཱ་ཀཾ ཨུ་པྤཱ་དེ་ཡྻ, ཨ་ཉྙ་བྷཱུ་མི་ཀ་ཀ་མྨ་སྶ ཨ་ཉྙ་བྷཱུ་མི་ཀ་ཝི་པཱ་ཀུ་པྤཱ་ད་ནཱ་ཡོ་ག་ཏོ ས་བྷཱུ་མི་ཀ་མེ་ཝ ཨུ་པྤཱ་དེ་ཡྻ. ཏཾ པ་ན ཀིཾ ན་ཝ་ཏྟ་བྦཱ་ར་མྨ་ཎཾ ཝཱ ཨུ་པྤཱ་དེ་ཡྻ པ་རི་ཏྟཱ་དི་ཨཱ་ར་མྨ་ཎཾ ཝཱ? ཀི་ཉྩེ་ཏྠ – ཡ་དི ཏཱ་ཝ ན་ཝ་ཏྟ་བྦཱ་ར་མྨ་ཎཾ ཨུ་པྤཱ་དེ་ཏི, ཏཾ ན ཡུ་ཏྟཾ རཱུ་པཱ་ཝ་ཙ་ར་ཝི་པཱ་ཀཱ་ནཾ ཨེ་ཀ་ནྟེ་ན ཀ་མྨ་ས་མཱ་ནཱ་ར་མྨ་ཎ་ཏཱ་ཡ ད་སྶི་ཏ་ཏྟཱ, ཨ་བྷི་ཉྙཱ་ཙེ་ཏ་ནཱ་ཡ ཙ ས་ཡཾ པ་རི་ཏྟཱ་དི་ཨཱ་ར་མྨ་ཎ་ཏྟཱ. ཨ་ཐ པ་རི་ཏྟཱ་དི་ཨཱ་ར་མྨ་ཎཾ ཨུ་པྤཱ་དེ་ཏི, ཏ་མྤི ན ཡུ་ཛྫ་ཏི རཱུ་པཱ་ཝ་ཙ་ར་ཝི་པཱ་ཀཱ་ནཾ ཨེ་ཀ་ནྟེ་ནེ་ཝ ན་ཝ་ཏྟ་བྦཱ་ར་མྨ་ཎ་བྷཱ་ཝ་ཏོ. ཏ་ཐཱ ཧི ཝུ་ཏྟཾ ཙི་ཏྟུ་པྤཱ་ད་ཀ་ཎྜེ –
‘‘རཱུ་པཱ་ཝ་ཙ་ར་ཏི་ཀ་ཙ་ཏུ་ཀྐ་ཛ྄ཛྷཱ་ནཱ ཀུ་ས་ལ་ཏོ ཙ ཝི་པཱ་ཀ་ཏོ ཙ ཀི་རི་ཡ་ཏོ ཙ ཙ་ཏུ་ཏྠ་སྶ ཛྷཱ་ན་སྶ ཝི་པཱ་ཀོ ཨཱ་ཀཱ་སཱ་ན་ཉྩཱ་ཡ་ཏ་ནཾ ཨཱ་ཀི་ཉྩ་ཉྙཱ་ཡ་ཏ་ནཾ. ཨི་མེ དྷ་མྨཱ ན་ཝ་ཏྟ་བྦཱ ‘པ་རི་ཏྟཱ་ར་མྨ་ཎཱ’ཏི་པི ‘མ་ཧ་གྒ་ཏཱ་ར་མྨ་ཎཱ’ཏི་པི ‘ཨ་པྤ་མཱ་ཎཱ་ར་མྨ་ཎཱ’ཏི་པཱི’’ཏི (དྷ. ས. ༡༤༢༢).
ཨ་པི་ཙ ས་མཱ་དྷི་ཝི་ཛྫཱ་ས་མྦྷཱ་ར་བྷཱུ་ཏཱ ཨ་བྷི་ཉྙཱ ས་མཱ་དྷི་སྶ ཨཱ་ནི་སཾ་ས་མ་ཏྟཾ ས་མཱ་དྷི་ཕ་ལ་ས་དི་སཱ. ཏ་སྶ ཏ་སྶ ཧི ཨ་དྷི་ཊྛཱ་ན་ཝི་ཀུ་བྦ་ན་དི་བྦ་ས་དྡ་ས་ཝ་ནཱ་དི་ཀ་སྶ ཡ་ཐི་ཙྪི་ཏ་སྶ ཀི་ཙྩ་སྶ ནི་པྥཱ་ད་ན་མ་ཏྟ་ཕ་ལཱ ཨ་བྷི་ཉྙཱ་ཙེ་ཏ་ནཱ. ཏེ་ནཱ་ཧ ‘‘སོ ཨེ་ཝཾ ས་མཱ་ཧི་ཏེ ཙི་ཏྟེ’’ཏི་ཨཱ་དི (པཱ་རཱ. ༡༢-༡༣) ཏ་སྨཱ ས་མཱ་དྷི་སྶ ཕ་ལ་ས་དི་སཱ ཨ་བྷི་ཉྙཱ་ཙེ་ཏ་ནཱ ན ཙ ཕ་ལཾ དེ་ཏི, དཱ་ན་སཱི་ལཱ་ནི་སཾ་ས་བྷཱུ་ཏོ ཏ་སྨིཾ བྷ་ཝེ པ་ཙྩ་ཡ་ལཱ་བྷོ ཝི་ཡ ན་ཏྠི ཏ་སྶ ཝི་པཱ་ཀུ་པྤཱ་ད་ན་ནྟི. ཀེ་ཙི པ་ན ‘‘ས་མཱ་ན་བྷཱུ་མི་ཀ་ཏོ ཨཱ་སེ་ཝ་ན་ལཱ་བྷེ་ན བ་ལ་ཝ་ནྟཱ་ནི ཛྷཱ་ནཱ་ནི ཝི་པཱ་ཀཾ ཨུ་པྤཱ་དེ་ནྟི ས་མཱ་པ་ཏྟི་བྷཱ་ཝ་ཏོ, ཨ་བྷི་ཉྙཱ པ་ན ས་ཏི་པི ཛྷཱ་ན་བྷཱ་ཝེ ཏ་ད་བྷཱ་ཝ་ཏོ ཏ་སྨིཾ ཏ་སྨིཾ ཨཱ་ར་མྨ་ཎེ ཨཱ་ག་ནྟུ་ཀཱ་ཡེ་ཝཱ་ཏི དུ་བྦ་ལཱ, ཏ་སྨཱ ཝི་པཱ་ཀཾ ན དེ་ཏཱི’’ཏི ཝ་ད་ནྟི. ཨེ་ཝ་ཉྩ ཀ་ཏྭཱ ཝུ་ཏྟཾ ཨ་ནུ་རུ་དྡྷཱ་ཙ་རི་ཡེ་ན –
‘‘ས་མཱ་ནཱ་སེ་ཝ་ནེ ལ་དྡྷེ, ཝི་ཛྫ་མཱ་ནེ མ་ཧ་བྦ་ལེ;
ཨ་ལ་དྡྷཱ ཏཱ་དི་སཾ ཧེ་ཏུཾ, ཨ་བྷི་ཉྙཱ ན ཝི་པ་ཙྩ་ཏཱི’’ཏི. (ནཱ་མ. པ་རི. ༤༧༤);
ཏ་ཡི་ད་མ་ཀཱ་ར་ཎཾ, པ་རི་ཏྟ་ཛྷཱ་ན་སྶ ཨ་ཝི་སེ་སེ་ན བྲ་ཧྨ་པཱ་རི་ས་ཛྫཱ་དཱི་སུ ཝི་པཱ་ཀ་དཱ་ན་ཝ་ཙ་ན་ཏོ. ན ཧི པ་རི་ཏྟཾ ལ་དྡྷཱ་སེ་ཝ་ན་མེ་ཝ ཏ་ཏྠ ཝི་པཱ་ཀཾ དེ་ཏཱི་ཏི ཨ་ཊྛ་ཀ་ཐཱ་ཡཾ ཝུ་ཏྟཾ, ཏ་སྨཱ ས་མཱ་ནཱ་སེ་ཝ་ནེ ལ་དྡྷེ་ཡེ་ཝ ཛྷཱ་ན་སྶ ཝི་པཱ་ཀ་དཱ་ནཾ ན ས་ཀྐཱ ཝ་ཏྟུཾ. ཨ་པི་ཙ པུ་ན་པྤུ་ནཾ པ་རི་ཀ་མྨ་ཝ་སེ་ན ཨ་བྷི་ཉྙཱ་ཡ་པི ཝ་སི་བྷཱ་ཝ་ས་བྦྷཱ་ཝཱ ཏ་སྶཱ་པི ཙ བ་ལ་ཝ་བྷཱ་ཝོ ཨ་ཏྠེ་ཝཱ་ཏི ཝི་པཱ་ཀཾ ཨུ་པྤཱ་དེ་ཡྻ.
པ་ཉྩ་ནྣཾ པཱ་ཀ་ཙི་ཏྟཱ་ནནྟི པ་ཉྩ་ནྣཾ རཱུ་པཱ་ཝ་ཙ་ར་ཝི་པཱ་ཀ་ཙི་ཏྟཱ་ནཾ. མཱ་པུ་ཉྙ་ས་ངྑཱ་རཱཏི ཨ་པུ་ཉྙཱ་བྷི་ས་ངྑཱ་རཱ. ‘‘ཨི་མེ ཨ་པུ་ཉྙ་ས་ངྑཱ་རཱ’’ཏི ཝཱ པ་ད་ཙྪེ་དོ. ཨེ་ཀ་སྶཱཏི ཨེ་ཀ་སྶ ཨ་ཀུ་ས་ལ་ཝི་པཱ་ཀ་ས་ནྟཱི་ར་ཎ་སྶ. ཚ་ནྣནྟི ས་ནྟཱི་ར་ཎ་ཝ་ཛྫཱ་ནཾ ཚ་ནྣཾ ཨ་ཀུ་ས་ལ་ཝི་པཱ་ཀཱ་ནཾ. པ་ཝ་ཏྟེ པ་ཙྩ་ཡཱ ཧོ་ནྟི ཨ་ནི་ཊྛ་རཱུ་པཱ་དི་ཨཱ་པཱ་ཐཱ་ག་ཏེ་ཏི ཨ་དྷི་པྤཱ་ཡོ. སུ་ག་ཏི་ཡཾ ཨ་ཀུ་ས་ལ་ཝི་པཱ་ཀ་པ་ཊི་ས་ནྡྷི་ཡཱ ཨ་བྷཱ་ཝ་ཏོ ཨཱ་ཧ ‘‘ན ཧོ་ནྟི པ་ཊི་ས་ནྡྷི་ཡ’’ནྟི. ཙ་ཏུ་ནྣནྟི ཨ་ཀུ་ས་ལ་ཝི་པཱ་ཀ་ཙ་ཀྑུ་སོ་ཏ་ཝི་ཉྙཱ་ཎ་ས་མྤ་ཊི་ཙྪ་ན་ས་ནྟཱི་ར་ཎ་ཝ་སེ་ན ཙ་ཏུ་ནྣཾ. ཏཱ་ནི པ་ན ཨེ་ཀ་ནྟ་ཏོ ཨ་ནི་ཊྛཱ་ར་མྨ་ཎཱ་ནི. རཱུ་པ་བྷ་ཝེ ཙ ཀ་ཐཾ ཨ་ནི་ཊྛཱ་ར་མྨ་ཎ་ས་མཱ་ཡོ་གོ་ཏི ཨཱ་ཧ ‘‘སོ ཙཱ’’ཏི་ཨཱ་དི. སོཏི སོ པ་ཙྩ་ཡ་བྷཱ་ཝོ. ‘‘ཀཱ་མ་བྷ་ཝེ’’ཏི ཨི་དཾ ཨ་ནི་ཊྛ་རཱུ་པཱ་དཱི་ནཾ ཝི་སེ་ས་ནཾ, ན པ་ན ‘‘ཨུ་པ་ལ་དྡྷི་ཡ’’ནྟི ཨི་མ་སྶ. ཏེ་ནཱ་ཧ ‘‘ཨ་ནི་ཊྛ…པེ… ན ཝི་ཛྫ་རེ’’ཏི. ཀེ་ཙི པ་ན ‘‘ཨུ་པ་ལ་དྡྷི་ཡ་ནྟི ཨི་མ་སྶེ་ཝ ཝི་སེ་ས་ན་བྷཱ་ཝེ་ན ག་ཧེ་ཏྭཱ བྲ་ཧྨཱུ་ནཾ ཀཱ་མ་བྷ་ཝཾ ཨཱ་ག་ཏ་ཀྑ་ཎེ རཱུ་པཱ་དི་ཨུ་པ་ལ་དྡྷི་ཡ’’ནྟི ཝ་ད་ནྟི. ཨ་ནི་ཊྛ…པེ… ན ཝི་ཛྫ་རེ ཨེ་ཀ་ནྟ་སུ་ཁ་ཝ་ཏྠུ་བྷཱུ་ཏེ ཏ་ཏྠ ཝོ་ཀི་ཎྞ་སུ་ཁ་དུ་ཀྑ་ཀཱ་ར་ཎ་སྶ ཨ་བྷཱ་ཝ་ཏོ.
༥༧༦. ‘‘ཨེ་ཝཾ ཏཱ་ཝཱ’’ཏི་ཨཱ་དི ཡ་ཐཱ་ཝུ་ཏྟ་སྶེ་ཝ་ཏྠ་སྶ ཨ་པྤ་ནཾ. ཡ་ཐཱ ཙཱཏི ཙ-ས་དྡེ་ན ‘‘ཡེ་ས་ཉྩཱ’’ཏི ས་ངྒ་ཎྷཱ་ཏི. ཏ་ཐཱཏི ཨེ་ཏྠཱ་པི ‘‘ཏེ’’ཏི ས་ངྒ་ཎྷི་ཏ་བྦཾ.
༥༧༧-༨༡. ཡ་ཏྠ ཝི་ཏྠཱ་ར་པྤ་ཀཱ་ས་ནཾ ཀ་ཏཾ, ཏ་ཏོ བྷ་ཝ་ཏོ པ་ཊྛཱ་ཡ མུ་ཁ་མ་ཏྟ་པྤ་ཀཱ་ས་ནཾ ཀཱ་ཏུ་ཀཱ་མོ ཨཱ་ཧ ‘‘ཏ་ཏྲི་ད’’ནྟི་ཨཱ་དི. ཏ་ཏྲཱཏི ཏེ་སུ བྷ་ཝཱ་དཱི་སུ. ཨི་དནྟི ནི་ད་སྶི་ཏ་བྦ་བྷཱ་ཝེ་ན ཨཱ་ས་ནྣ་པ་ཙྩ་ཀྑ་མཱ་ཧ. ཨཱ་དི་ཏོ པ་ན པ་ཊྛཱ་ཡཱཏི བྷ་ཝ་ཏོ པ་ཊྛཱ་ཡ. ཨ་ཝི་སེ་སེ་ནཱཏི ཀཱ་མཱ་ཝ་ཙ་ར་རཱུ་པཱ་ཝ་ཙ་ར་ཝ་སེ་ན ཝི་སེ་སཱ་བྷཱ་ཝེ་ན ཏེ་ར་ས པུ་ཉྙཱ་བྷི་ས་ངྑཱ་རཱ. དྭི་བྷ་ཝེ་སཱུཏི ཀཱ་མ་རཱུ་པ་བྷ་ཝེ་སུ. ཀེ་ས་ཉྩི མ་ནུ་སྶཱ་ནཾ, བྷུ་མྨ་དེ་ཝཱ་ན་ཉྩ ཨ་ཎྜ་ཛ་ཛ་ལཱ་བུ་ཛཱ་ན་མྤི ས་མྦྷ་ཝ་ཏོ ཏ་ད་པེ་ཀྑཱ་ཡ ‘‘ཙ་ཏཱུ་སུ…པེ… ཡོ་ནི་སཱུ’’ཏི ཝུ་ཏྟཾ. ནཱ་ན་ཏྟ…པེ… ཋི་ཏཱི་སུ་པཱིཏི ཨ་ལུ་ཏྟ་ས་མཱ་ས་ཝ་སེ་ན ཝུ་ཏྟཾ, ནཱ་ན་ཏྟ་ཀཱ་ཡ་ནཱ་ན་ཏྟ་ས་ཉྙཱ་དཱི་སུ ཙ་ཏཱུ་སུ ཝི་ཉྙཱ་ཎ་ཊྛི་ཏཱི་སཱུ་ཏི ཨ་ཏྠོ. ཝུ་ཏྟ་པྤ་ཀཱ་ར་སྨིནྟི ནཱ་ན་ཏྟ་ཀཱ་ཡཱ་དི་ཀེ, པུ་ཉྙཱ་བྷི་ས་ངྑཱ་ར་སྶ བྷ་ཝཱ་དཱི་སུ ཨེ་ཀ་ཝཱི་ས་ཏི་ཝི་པཱ་ཀཱ་ནཾ ཨེ་ཀཱ་ཝ་ཏྠཱ་ཡ པ་ཙྩ་ཡོ ཨ་ཧུ་ཏྭཱ དུ་གྒ་ཏི་པ་རི་ཡཱ་པ་ནྣེ་སུ བྷ་ཝ་ཡོ་ནི་ག་ཏི་ཝི་ཉྙཱ་ཎ་ཊྛི་ཏི་ས་ཏྟཱ་ཝཱ་སེ་སུ པ་ཊི་ས་ནྡྷིཾ ཨ་ད་ཏྭཱ པ་ཝ་ཏྟེ་ཡེ་ཝ ཨ་ཊྛ་ནྣཾ ཝི་པཱ་ཀཱ་ནཾ པ་ཙྩ་ཡ་བྷཱ་ཝ་ཏོ, ཀཱ་མཱ་ཝ་ཙ་ར་སུ་ག་ཏི་པ་རི་ཡཱ་པ་ནྣེ་སུ པ་ཊི་ས་ནྡྷིཾ ད་ཏྭཱ པ་ཝ་ཏྟེ སོ་ལ༹་ས་ནྣཾ ཝི་པཱ་ཀཱ་ནཾ པ་ཙྩ་ཡ་བྷཱ་ཝ་ཏོ, རཱུ་པཱ་ཝ་ཙ་ར་བྷཱུ་མི་པ་རི་ཡཱ་པ་ནྣེ་སུ པ་ཊི་ས་ནྡྷིཾ ད་ཏྭཱ པ་ཝ་ཏྟེ ད་ས་ནྣཾ ཝི་པཱ་ཀཱ་ནཾ པ་ཙྩ་ཡ་བྷཱ་ཝ་ཏོ ཝུ་ཏྟཾ ‘‘ཡ་ཐཱ་ར་ཧ’’ནྟི.
༥༨༢-༣. ཀཱ་མེ བྷ་ཝེ, རཱུ་པེ བྷ་ཝེ་ཏི ས་མྦ་ནྡྷོ. ཏཱི་སུ ག་ཏཱི་སཱུཏི དེ་ཝ་མ་ནུ་སྶ་ཝ་ཛྫེ་སུ ཏཱི་སུ ག་ཏཱི་སུ. ཨེ་ཀི་སྶཱཏི ནཱ་ན་ཏྟ་ཀཱ་ཡ་ཨེ་ཀ་ཏྟ་ས་ཉྙཱི་ས་ངྑཱ་ཏཱ་ཡ ཨེ་ཀི་སྶཱ ཝི་ཉྙཱ་ཎ་ཊྛི་ཏི་ཡཱ. ཨེ་ཀ་སྨིནྟི ནཱ་ན་ཏྟ་ཀཱ་ཡ་ཨེ་ཀ་ཏྟ་ས་ཉྙཱི་ས་ངྑཱ་ཏེ་ཡེ་ཝ ཨེ་ཀ་སྨིཾ ས་ཏྟཱ་ཝཱ་སེ.
༥༨༤-༦. ཨེ་ཀཱ་རཱུ་པ་བྷ་ཝེཏི ཨེ་ཀ་སྨིཾ ཨ་རཱུ་པ་བྷ་ཝེ. ཨེ་ཀི་སྶཱ ཡོ་ནི་ཡཱཏི ཨེ་ཀི་སྶཱ་ཡེ་ཝ ཨོ་པ་པཱ་ཏི་ཀ་ཡོ་ནི་ཡཱ. ཏཱི་སུ ཙི་ཏྟ་ཊྛི་ཏཱི་སཱུཏི ཨཱ་ཀཱ་སཱ་ན་ཉྩཱ་ཡ་ཏ་ནཱ་དཱི་སུ ཏཱི་སུ ཝི་ཉྙཱ་ཎ་ཊྛི་ཏཱི་སུ. ས་ཏྟཱ་ཝཱ་སེ ཙ་ཏུ་བྦི་དྷེཏི ཨཱ་ཀཱ་སཱ་ན་ཉྩཱ་ཡ་ཏ་ནཱ་དི་ཀེ་ཡེ་ཝ ཙ་ཏུ་བྦི་དྷེ ས་ཏྟཱ་ཝཱ་སེ. ཝི་ཛཱ་ནི་ཏ་བྦཱ…པེ… པ་ཙྩ་ཡཱཏི ས་ངྑཱ་རཱ ཡ་ཐཱ པ་ཙྩ་ཡཱ ཡེ་ས་ཉྩ པ་ཙྩ་ཡཱ, ཏ་ཐཱ ཏེ་པི ཝི་ཉྙཱ་ཏ་བྦཱ་ཏི ཨ་ཏྠོ.
༥༨༧-༩༠. ན་ནུ ཙ ས་ངྑཱ་རཱ་ནཾ པ་ཊི་ས་ནྡྷི་པ་ཝ་ཏྟཱི་སུ་པི ཝི་པཱ་ཀཱ་ནཾ པ་ཙྩ་ཡ་བྷཱ་ཝོ ཝུ་ཏྟོ. ཏ་ཏྠ པ་ཊི་ས་ནྡྷི་ཡེ་ཝ ཏཱ་ཝ ན ས་ཀྐཱ ཝི་ཉྙཱ་ཏུཾ. ཡ་དི ཧི པུ་རི་མ་བྷ་ཝ་ཏོ པ་ཊི་ས་ནྡྷི་ཝི་ཉྙཱ་ཎཾ ཨི་དྷཱ་ག་ཙྪ་ཏཱི་ཏི ཝུ་ཙྩེ་ཡྻ, ཏཾ ན ཡུ་ཏྟཾ, རཱུ་པཱ་རཱུ་པ་དྷ་མྨཱ་ནཾ ཀེ་ས་གྒ་མ་ཏྟ་མྤི དེ་ས་ནྟ་ར་ས་ངྐ་མ་ནཱ་བྷཱ་ཝ་ཏོ. ཨ་ཐ ཨ་ཏཱི་ཏ་བྷ་ཝ་ནི་བྦ་ཏྟ་ས་ངྑཱ་ར་ཏོ ན ནི་བྦ་ཏྟ་ཏི, ཏ་མྤི ན ཡུ་ཛྫ་ཏི ཨ་ཧེ་ཏུ་ཀ་དོ་སཱ་པ་ཏྟི་ཏོ་ཏི ཨི་མི་ནཱ ཨ་དྷི་པྤཱ་ཡེ་ན ཙོ་དེ་ནྟོ ཨཱ་ཧ ‘‘ན རཱུ་པཱ་རཱུ་པ་དྷ་མྨཱ་ན’’ནྟི་ཨཱ་དི. ཨཱ་ཙ་རི་ཡོ ཏ་སྶཱ་དྷི་པྤཱ་ཡཾ ས་མྤ་ཊི་ཙྪི་ཏྭཱ ཏཾ ས་ཉྙཱ་པེ་ཏུ་ཀཱ་མོ ཨཱ་ཧ ‘‘ན་ཏྠི ཙི་ཏྟ་སྶཱ’’ཏི་ཨཱ་དི. ཏ་ཏོ ཧེ་ཏུཾ ཝི་ནཱཏི ཏ་ཏྠ ཧེ་ཏུཾ ཝི་ནཱ, ཨ་ཏཱི་ཏ་བྷ་ཝ་ནི་བྦ་ཏྟ་ཀ་མྨ་ས་ངྑཱ་ར་ནི་ཀ་ནྟི་ཨཱ་ར་མྨ་ཎཾ ཝི་ནཱ་ཏི ཨ་ཏྠོ. སུ་ལ་དྡྷ་པ་ཙྩ་ཡནྟི ཨ་ཝི་ཛྫཱ་དི་ས་ཧ་ཀཱ་རཱི་ཀཱ་ར་ཎ་ས་ཧི་ཏ་སྶ ས་ངྑཱ་ར་སྶ ཝ་སེ་ན སུ་ཊྛུ ཨ་ཝེ་ཀ་ལླ་ཏོ པ་ཊི་ལ་དྡྷ་པ་ཙྩ་ཡཾ. རཱུ་པཱ་རཱུ་པ་མ་ཏྟནྟི བཱ་ཧི་ར་ཀ་པ་རི་ཀ་པྤི་ཏ་སྶ ཨ་དྷི་ཏི་ཊྛ་ན་ཀ་སྶ ས་ཏྟ་ཛཱི་ཝཱ་དི་ནོ ཨ་བྷཱ་ཝ་ཏོ རཱུ་པཱ་རཱུ་པ་དྷ་མྨ་མ་ཏྟཾ. ཏེ་ནཱ་ཧ ‘‘ན ཙ ས་ཏྟོ’’ཏི་ཨཱ་དི. བྷ་ཝ་ནྟ་ར…པེ… པ་ཝུ་ཙྩ་ཏཱིཏི ཝོ་ཧཱ་ར་མ་ཏྟེ་ན བྷ་ཝ་ནྟ་ར་མུ་པེ་ཏཱི་ཏི པ་ཝུ་ཙྩ་ཏི. ཨ་ཏྠ་ཏོ པ་ན པ་ཙྩ་ཡ་སཱ་མ་གྒི་ཡཱ བྷ་ཝ་ནྟ་ར་བྷཱ་ཝེ་ན ཨུ་པྤ་ཛྫ་ན་མ་ཏྟ་ནྟི ཨ་དྷི་པྤཱ་ཡོ.
༥༩༡. ཨི་དཱ་ནི ཏཾ པ་ཊི་ས་ནྡྷི་ཀྐ་མཾ པཱ་ཀ་ཊཱ་ཡ མ་ནུ་སྶ་པ་ཊི་ས་ནྡྷི་ཡཱ ཝ་སེ་ན པ་ཀཱ་སེ་ཏུཾ ས་མཱ་ར་བྷ་ནྟོ ཨཱ་ཧ ‘‘ཏ་ཡི་ད’’ནྟི་ཨཱ་དི. སུ་དུ་བྦུ་དྷནྟི ཨ་ཏི་དུ་བྦི་ཛཱ་ནི་ཡཾ. ཏེ་ནཱ་ཧུ པོ་རཱ་ཎཱ –
‘‘ས་ཙྩཾ ས་ཏྟོ པ་ཊི་ས་ནྡྷི, པ་ཙྩ་ཡཱ་ཀཱ་ར་མེ་ཝ ཙ;
དུ་དྡ་སཱ ཙ་ཏུ་རོ དྷ་མྨཱ, དེ་སེ་ཏུ་ཉྩ སུ་དུ་ཀྐ་རཱ’’ཏི.
༥༩༢-༣. ཨཱ་ས་ནྣ་མ་ར་ཎ་སྶཱཏི པ་རཱུ་པ་ཀྐ་མེ་ན ཝཱ ཨཱ་ཡུ་ཀྑ་ཡཱ་དི་ཝ་སེ་ན ཝཱ ས་མཱ་ས་ནྣ་མ་ར་ཎ་སྶ. སུ་སྶ་མཱ་ནེཏི ཨ་ནུ་ཀྐ་མེ་ན ཨུ་པ་སུ་སྶ་མཱ་ནེ. ག་བྦྷ་སེ་ཡྻ་ཀ་སྶ ཨཱ་ཡ་ཏ་ནཱ་ནཾ ཨ་ནུ་པུ་བྦུ་པྤ་ཏྟི ཝི་ཡ ནི་རོ་དྷོ་པི ཨ་ནུ་པུ་བྦ་ཏོ ཧོ་ཏཱི་ཏི ཝུ་ཏྟཾ ‘‘ན་ཊྛེ ཙ་ཀྑུ་ནྡྲི་ཡཱ་དི་ཀེ’’ཏི. ཀེ་ཙི པ་ན ‘‘ནཱ་ནཱ་ཀ་མྨ་ས་མུ་ཊྛི་ཏེ་སུ ཙ་ཀྑུ་ནྡྲི་ཡཱ་དཱི་སུ ན་ཊྛེ་སཱུ’’ཏི ཝ་ད་ནྟི. ‘‘ཧ་ད་ཡ…པེ… ཀེ’’ཏི ཨི་མི་ནཱ སེ་ས་ཀཱ་ཡེ ཀཱ་ཡི་ནྡྲི་ཡ་སྶ ནི་རུ་དྡྷ་བྷཱ་ཝོ ཝུ་ཏྟོ་ཏི ཨེ་ཀ་ཀ་མྨ་ས་མུ་ཊྛི་ཏ་མྤི ན་སྶ་ཏེ་ཝཱ་ཏི ཨ་པ་རེ. ཨཱ་ན་ནྡཱ་ཙ་རི་ཡོ པ་ན ‘‘ཡ་མ་ཀེ’’ ཡ་སྶ ཙ་ཀྑཱ་ཡ་ཏ་ནཾ ནི་རུ་ཛ྄ཛྷ་ཏི, ཏ་སྶ མ་ནཱ་ཡ་ཏ་ནཾ ནི་རུ་ཛ྄ཛྷ་ཏཱི་ཏི. ཨཱ་མ་ནྟཱ. ཡ་སྶ ཝཱ པ་ན མ་ནཱ་ཡ་ཏ་ནཾ ནི་རུ་ཛ྄ཛྷ་ཏི, ཏ་སྶ ཙ་ཀྑཱ་ཡ་ཏ་ནཾ ནི་རུ་ཛ྄ཛྷ་ཏཱི་ཏི. ས་ཙི་ཏྟ་ཀཱ་ནཾ ཨ་ཙ་ཀྑུ་ཀཱ་ནཾ ཙ་ཝ་ནྟཱ་ནཾ ཏེ་སཾ མ་ནཱ་ཡ་ཏ་ནཾ ནི་རུ་ཛ྄ཛྷ་ཏི, ནོ ཙ ཏེ་སཾ ཙ་ཀྑཱ་ཡ་ཏ་ནཾ ནི་རུ་ཛ྄ཛྷ་ཏི. ས་ཙ་ཀྑུ་ཀཱ་ནཾ ཙ་ཝ་ནྟཱ་ནཾ ཏེ་སཾ མ་ནཱ་ཡ་ཏ་ན་ཉྩ ནི་རུ་ཛ྄ཛྷ་ཏི, ཙ་ཀྑཱ་ཡ་ཏ་ན་ཉྩ ནི་རུ་ཛ྄ཛྷ་ཏཱི’ཏི་ཨཱ་དི་ནཱ (ཡ་མ. ༡.ཨཱ་ཡ་ཏ་ན་ཡ་མ་ཀ.༡༢༠) ཙ་ཀྑཱ་ཡ་ཏ་ནཱ་དཱི་ནཾ ཙུ་ཏི་ཙི་ཏྟེ་ན ས་ཧ ནི་རོ་དྷོ ཝུ་ཏྟོ་ཏི ཙ་ཀྑུ་ནྡྲི་ཡཱ་དཱི་ནི ཙུ་ཏི་ཏོ པུ་བྦེ ན ན་སྶ་ནྟི. ཨ་ཏི་མ་ནྡ་བྷཱ་ཝཱུ་པ་ག་མ་ནཾ པ་ན ས་ནྡྷཱ་ཡ ཨ་ཊྛ་ཀ་ཐཱ་ཡ ‘ནི་རུ་དྡྷེ་སུ ཨི་ནྡྲི་ཡེ་སཱུ’ཏི ཝུ་ཏྟཾ, ན ཨ་ན་ཝ་སེ་ས་ནི་རོ་དྷཾ ས་ནྡྷཱ་ཡ. པ་ཉྩ་དྭཱ་རི་ཀ་ཛ་ཝ་ནཱ་ན་ནྟ་ར་མྤི ཙུ་ཏི ཨ་ཊྛ་ཀ་ཐཱ་ཡཾ ད་སྶི་ཏཱ’’ཏི ཝ་ད་ཏི. ཧ་ད་ཡ་ཝ་ཏྠུ་མ་ཏྟ་སྨིནྟི ཧ་ད་ཡ་ཝ་ཏྠུ་པ་དེ་ས་མ་ཏྟེ. ན ཧི ཧ་ད་ཡ་ཝ་ཏྠུཾ ནི་སྶཱ་ཡ ཀཱ་ཡི་ནྡྲི་ཡཾ པ་ཝ་ཏྟ་ཏི.
༥༩༤-༧. ཝ་ཏྠུ་ས་ནྣི་སྶི་ཏནྟི སེ་སི་ནྡྲི་ཡཱ་ནཾ ནི་རུ་དྡྷ་ཏྟཱ ཝི་ཉྙཱ་ཎ་སྶ ནི་སྶ་ཡ་བྷཱ་ཝཱུ་པ་ག་མ་ན་སཱ་མ་ཏྠི་ཡཱ་ཡོ་གེ་ན མ་ནྡ་བྷཱ་ཝ་ཏོ ཝཱ ཧ་ད་ཡ་ཝ་ཏྠུ་མ་ཏྟ་ས་ནྣི་སྶི་ཏཾ. ཙི་ཏྟནྟི ཏ་དཱ ཀ་མྨ་ཀ་མྨ་ནི་མི་ཏྟཱ་དཱི་ནི ཨཱ་ར་བྦྷ པ་ཝ་ཏྟ་ཛ་ཝ་ན་ཝི་ཉྙཱ་ཎཾ. ཏཾ པ་ན སུ་ག་ཏི་ཡཾ ནི་བྦ་ཏྟ་མཱ་ན་སྶ ཀུ་ས་ལཾ ཧོ་ཏི, དུ་གྒ་ཏི་ཡཾ ནི་བྦ་ཏྟ་མཱ་ན་སྶ ཨ་ཀུ་ས་ལཾ. ཏེ་ནཱ་ཧ བྷ་ག་ཝཱ –
‘‘ནི་མི་ཏྟ་སྶཱ་ད་ག་དྷི་ཏཾ ཝཱ, བྷི་ཀྑ་ཝེ, ཝི་ཉྙཱ་ཎཾ ཏི་ཊྛ་མཱ་ནཾ ཏི་ཊྛ་ཏི ཨ་ནུ་བྱ་ཉྫ་ན་སྶཱ་ད་ག་དྷི་ཏཾ ཝཱ, ཏ་སྨིཾ ཙེ ས་མ་ཡེ ཀཱ་ལཾ ཀ་རོ་ཏི, ཋཱ་ན་མེ་ཏཾ ཝི་ཛྫ་ཏི, ཡཾ དྭི་ནྣཾ ག་ཏཱི་ནཾ ཨ་ཉྙ་ཏ་རཾ ག་ཏིཾ ཨུ་པ་པ་ཛྫེ་ཡྻ ནི་ར་ཡཾ ཝཱ ཏི་ར་ཙྪཱ་ན་ཡོ་ནིཾ ཝཱ’’ཏི་ཨཱ་དི (སཾ. ནི. ༤.༢༣༥).
ཡ་དི ཨེ་ཝཾ –
‘‘ག་ཏི་ས་མྤ་ཏྟི་ཡཱ ཉཱ་ཎ་ས་མྤ་ཡུ་ཏྟེ ཀ་ཏ་མེ་སཾ ཨ་ཊྛ་ནྣཾ ཧེ་ཏཱུ་ནཾ པ་ཙྩ་ཡཱ ཨུ་པ་པ་ཏྟི ཧོ་ཏི, ཀུ་ས་ལ་སྶ ཀ་མྨ་སྶ ཛ་ཝ་ན་ཀྑ་ཎེ ཏ་ཡོ ཧེ་ཏཱུ ཀུ་ས་ལཱ ཏ་སྨིཾ ཁ་ཎེ ཛཱ་ཏ་ཙེ་ཏ་ནཱ་ཡ ས་ཧ་ཛཱ་ཏ་པ་ཙྩ་ཡཱ ཧོ་ནྟི, ཏེ་ན ཝུ་ཙྩ་ཏི ཀུ་ས་ལ་མཱུ་ལ་པ་ཙྩ་ཡཱ་པི ས་ངྑཱ་རཱ. ནི་ཀ་ནྟི་ཀྑ་ཎེ དྭེ ཧེ་ཏཱུ ཨ་ཀུ་ས་ལཱ ཏ་སྨིཾ ཁ་ཎེ ཛཱ་ཏ་ཙེ་ཏ་ནཱ་ཡ ས་ཧ་ཛཱ་ཏ་པ་ཙྩ་ཡཱ ཧོ་ནྟི, ཏེ་ན ཝུ་ཙྩ་ཏི ཨ་ཀུ་ས་ལ་མཱུ་ལ་པ་ཙྩ་ཡཱ་པི ས་ངྑཱ་རཱ. པ་ཊི་ས་ནྡྷི་ཀྑ་ཎེ ཏ་ཡོ ཧེ་ཏཱུ ཨ་བྱཱ་ཀ་ཏཱ ཏ་སྨིཾ ཁ་ཎེ ཛཱ་ཏ་ཙེ་ཏ་ནཱ་ཡ ས་ཧ་ཛཱ་ཏ་པ་ཙྩ་ཡཱ ཧོ་ནྟི, ཏེ་ན ཝུ་ཙྩ་ཏི ནཱ་མ་རཱུ་པ་པ་ཙྩ་ཡཱ་པི ཝི་ཉྙཱ་ཎཾ, ཝི་ཉྙཱ་ཎ་པ་ཙྩ་ཡཱ་པི ནཱ་མ་རཱུ་པ’’ནྟི (པ་ཊི. མ. ༡.༢༣༢) –
ནི་ཀ་ནྟི་ཀྑ་ཎེ ཧེ་ཏུ་དྭ་ཡ་པ་ཙྩ་ཡཱ་པི སུ་ག་ཏི་པ་ཊི་ས་ནྡྷི་ཀ་སྶ ཀ་ཐཾ ད་སྶི་ཏཱ་ཏི? ན་ཡི་དཾ མ་ར་ཎཱ་ས་ནྣ་ཛ་ཝ་ན་ས་མྤ་ཡུ་ཏྟ་ཧེ་ཏུ་ཡོ ས་ནྡྷཱ་ཡ ཝུ་ཏྟཾ, ཨ་ཐ ཁོ ཀ་ཏ་ཀ་མྨ་སྶ ཏཾ ཀ་མྨཾ ཨཱ་ར་བྦྷ ཨ་སྶཱ་ད་ཝ་སེ་ན པ་ཝ་ཏྟ་ཛ་ཝ་ན་ས་མྤ་ཡུ་ཏྟ་ཧེ་ཏུ་ཡོ ས་ནྡྷཱ་ཡ. ཀ་ཏཱུ་པ་ཙི་ཏ་མྤི ཧི ཀ་མྨཾ ཏ་ཎྷཱ་ཡ ཨ་སྶཱ་དི་ཏཾ ཝི་པཱ་ཀཱ་བྷི་ནི་པྥཱ་ད་ནེ ས་མ་ཏྠ་ནྟི. ཀེ་ཙི པ་ན ‘‘ཀ་མྨ་ཀ་ར་ཎ་ཀཱ་ལེ ཨ་པྤ་ཧཱི་ནཱ་ཝ་ཏྠཱ་ཡ ས་ནྟཱ་ནེ ཨ་ནུ་ས་ཡི་ཏ་ཧེ་ཏུ་ཡོ ས་ནྡྷཱ་ཡ ནི་ཀ་ནྟི་ཀྑ་ཎེ དྭེ ཧེ་ཏུ་ཡོ་ཏི ཝུ་ཏྟ’’ནྟི ཝ་ད་ནྟི, ཏཾ ན ཡུ་ཛྫ་ཏི, ཏེ་སཾ ས་ཧ་ཛཱ་ཏ་པ་ཙྩ་ཡ་ཏྟཱ་ཡོ་ག་ཏོ. པུ་བྦཱ་ནུ་སེ་ཝི་ཏཾ པུ་ཉྙཾ ཝཱ ཨ་པུ་ཉྙ་མེ་ཝ ཝཱ ཀ་མྨཾ, ཀ་མྨ་ནི་མི་ཏྟཾ ཝཱ ཨཱ་ལ་མྦི་ཏྭཱ ཙི་ཏྟཾ པ་ཝ་ཏྟ་ཏཱི་ཏི ས་མྦ་ནྡྷོ. པུ་བྦཱ་ནུ་སེ་ཝི་ཏནྟི པུ་བྦེ ཨཱ་སེ་ཝི་ཏཾ. ‘‘ཀ་ཏ་ཏྟཱ ཨུ་པ་ཙི་ཏ་ཏྟཱ’’ཏི ཧི ཝུ་ཏྟཾ. ཏ་ཎྷཱ་ཡ ཨ་ནུ་སེ་ཝི་ཏ་བྷཱ་ཝཾ ས་ནྡྷཱ་ཡ ཝཱ ‘‘པུ་བྦཱ་ནུ་སེ་ཝི་ཏ’’ནྟི ཝུ་ཏྟཾ. ‘‘ཨ་ནུ་པུ་བྦ་སེ་ཝི་ཏ’’ནྟི་པི པཱ་ཋཾ ཝ་ད་ནྟི, པ་ཊི་ས་ནྡྷི་ཝ་སེ་ན པུ་བྦེ ཨཱ་སེ་ཝི་ཏཾ, པུ་བྦེ དི་ནྣ་པ་ཊི་ས་ནྡྷི་ཀ་ནྟི ཨ་ཏྠོ. དི་ནྣ་པ་ཊི་ས་ནྡྷི་ཀ་མྤི པ་ན ཨ་པ་ར་ཛཱ་ཏཱི་སུ པ་ཝ་ཏྟི་ཝི་པཱ་ཀཾ ན ནི་བྦ་ཏྟེ་ཏཱི་ཏི ན་ཏྠི. པུ་ཉྙཱ་པུ་ཉྙ་གྒ་ཧ་ཎེ་ན ཡ་ཐཱ་ཀ་མྨཾ སུ་ག་ཏི་དུ་གྒ་ཏི་པ་ཊི་ས་ནྡྷཱི་ནཾ ཨཱ་ར་མྨ་ཎཾ ད་སྶེ་ཏི. ཀ་མྨཾ ཀ་མྨ་ནི་མི་ཏྟཾ ཝཱཏི ཝཱ-ས་དྡེ་ན ག་ཏི་ནི་མི་ཏྟཾ ས་ངྒ་ཎྷཱ་ཏི. ཏ་ཏྠ ཀ་མྨཾ, ག་ཏི་ནི་མི་ཏྟ་ཉྩ མ་ནོ་དྭཱ་རེ་ཡེ་ཝ ཨཱ་པཱ་ཐ་མཱ་ག་ཙྪ་ཏི, ཀ་མྨ་ནི་མི་ཏྟཾ པ་ན པ་ཉྩ་དྭཱ་རེ་པི. ཨེ་ཝ་ཉྩ ཀ་ཏྭཱ པ་ཉྩ་དྭཱ་ར་གྒ་ཧི་ཏེ་པི ཨཱ་ར་མྨ་ཎེ པ་ཊི་ས་ནྡྷི ཧོ་ཏི. ཨ་པ་རེ པ་ན ག་ཏི་ནི་མི་ཏྟ་མྤི ཚ་དྭཱ་རེ་སུ ལ་བྦྷ་ཏཱི་ཏི ཝ་ཎྞེ་ནྟི. ཨེ་ཝ་ཉྩ ཀ་ཏྭཱ ཝུ་ཏྟཾ ས་ཙྩ་ས་ངྑེ་པེ –
‘‘པ་ཉྩ་དྭཱ་རེ སི་ཡཱ ས་ནྡྷི, ཝི་ནཱ ཀ་མྨཾ དྭི་གོ་ཙ་རེ’’ཏི. (ས. ས. ༡༧༣).
ཨ་ཊྛ་ཀ་ཐཱ་ཡཾ པ་ན ‘‘ག་ཏི་ནི་མི་ཏྟཾ མ་ནོ་དྭཱ་རེ ཨཱ་པཱ་ཐ་མཱ་ག་ཙྪ་ཏཱི’’ཏི ཝུ་ཏྟ་ཏྟཱ, ཏ་དཱ་ར་མྨ་ཎཱ་ཡ ཙ པ་ཉྩ་དྭཱ་རི་ཀ་པ་ཊི་ས་ནྡྷི་ཡཱ ཨ་ད་སྶི་ཏ་ཏྟཱ, མཱུ་ལ་ཊཱི་ཀཱདཱི་སུ ཙ ‘‘ཀ་མྨ་བ་ལེ་ན ཨུ་པ་ཊྛཱ་པི་ཏཾ ཝ་ཎྞཱ་ཡ་ཏ་ནཾ སུ་པི་ནཾ པ་སྶ་ནྟ་སྶ ཝི་ཡ, དི་བྦ་ཙ་ཀྑུ་ཀ་སྶ ཝི་ཡ ཙ མ་ནོ་དྭཱ་རེ ཨེ་ཝ གོ་ཙ་ར་བྷཱ་ཝཾ ག་ཙྪ་ཏཱི’’ཏི ནི་ཡ་མེ་ཏྭཱ ཝུ་ཏྟ་ཏྟཱ ཏེ་སཾ ཝ་ཙ་ནཾ ན ས་མྤ་ཊི་ཙྪ་ནྟི ཨཱ་ཙ་རི་ཡཱ. ཀ་མྨ་ནི་མི་ཏྟ་ཉྩ པ་ནེ་ཏྠ པ་ཙྩུ་པྤ་ནྣཾ པ་ཉྩ་དྭཱ་རེ ཨཱ་པཱ་ཐ་མཱ་ག་ཙྪ་ནྟཾ ཙུ་ཏི་ཀཱ་ལཱ་ས་ནྣེ ཀ་ཏ་ཀ་མྨ་སྶ ཨཱ་ར་མྨ་ཎ་ས་ནྟཱ་ནེ ཨུ་པྤ་ནྣཾ ཏཾ་ས་དི་ས་ནྟི ད་ཊྛ་བྦཾ, ཨི་ཏ་ར་ཐཱ ཏ་དེ་ཝ པ་ཊི་ས་ནྡྷི་ཡཱ ཨཱ་ར་མྨ་ཎུ་པ་ཊྛཱ་པ་ཀཾ ཏ་དེ་ཝ པ་ཊི་ས་ནྡྷི་ཛ་ན་ཀཾ བྷ་ཝེ་ཡྻ, ན ཙ པ་ཊི་ས་ནྡྷི་ཡཱ ཨུ་པ་ཙཱ་ར་བྷཱུ་ཏཱ་ནི ཝི་ཡ, ‘‘ཨེ་ཏ་སྨིཾ ཏ་ཡཱ པ་ཝ་ཏྟི་ཏ་བྦ’’ནྟི པ་ཊི་ས་ནྡྷི་ཡཱ ཨཱ་ར་མྨ་ཎཾ ཨ་ནུ་པྤ་དེ་ནྟཱ་ནི ཝི་ཡ ཙ པ་ཝ་ཏྟཱ་ནི ཙུ་ཏི་ཨཱ་ས་ནྣ་ཛ་ཝ་ནཱ་ནི པ་ཊི་ས་ནྡྷི་ཛ་ན་ཀཱ་ནི བྷ་ཝེ་ཡྻུཾ. ‘‘ཀ་ཏ་ཏྟཱ ཨུ་པ་ཙི་ཏ་ཏྟཱ’’ཏི ཧི ཝུ་ཏྟཾ. ཏ་དཱ ཙ པ་ཊི་ས་ནྡྷི་ཡཱ ཨེ་ཀ་ཝཱི་ཐི་ཡཾ ཝི་ཡ པ་ཝ་ཏྟ་མཱ་ནཱ་ནི ཀ་ཐཾ ཀ་ཏཱུ་པ་ཙི་ཏཱ་ནི སི་ཡུཾ, ཨ་སྶཱ་ད་ན་བྷཱུ་ཏཱ་ཡ ཏ་ཎྷཱ་ཡ ཨ་པ་རཱ་མ་ཊྛཱ་ནི ཀ་ཐཾ པ་ཊི་ས་ནྡྷི་ནི་བྦ་ཏྟ་ཀཱ་ནི, ན ཙ ལོ་ཀི་ཡཱ་ནི ལོ་ཀུ་ཏྟ་རཱ་ནི ཝི་ཡ ས་མཱ་ན་ཝཱི་ཐི་ཕ་ལཱ་ནི ཧོ་ནྟཱི་ཏི. ཏཾ ཝི་ཉྙཱ་ཎནྟི ཏཾ ཛ་ཝ་ན་ཝི་ཉྙཱ་ཎཾ. ཨེ་ཀ་ཏྟ་ན་ཡེ་ན པ་ཊི་ས་ནྡྷི་ཝི་ཉྙཱ་ཎ་ཉྩ ས་ནྡྷཱ་ཡ ཝུ་ཏྟཾ. ཙུ་ཏི་པ་ཊི་ས་ནྡྷི་ཏ་དཱ་ས་ནྣ་ཝི་ཉྙཱ་ཎཱ་ན་ཉྷི ས་ནྟ་ཏི་ཝ་སེ་ན ཝི་ཉྙཱ་ཎ་ནྟི ཨུ་པ་ནཱི་ཏེ་ཀ་ཏྟཾ ཨི་དྷ ཏཾ ཝི་ཉྙཱ་ཎ་ནྟི ཨ་དྷི་པྤེ་ཏཾ.
ཨ་ཝི་ཛྫཱ་ཡ པ་ཊི་ཙྪ་ནྣཱ་དཱི་ན་ཝེཏི ཨ་ནུ་ས་ཡ་ཝ་སེ་ན པ་ཝ་ཏྟཱ་ཡ བྷ་ཝ་ཏ་ཎྷཱ་ཡ, ཙི་ཏྟ་ས་མྤ་ཡུ་ཏྟཱ་ཡ ཝཱ ཨ་ཝི་ཛྫཱ་ཡ ཚཱ་དི་ཏ་དུ་ཀྑཱ་དཱི་ན་ཝེ. ཏ་ཐཱ་བྷཱུ་ཏེ པ་ན ཀ་མྨཱ་དི་ཝི་ས་ཡེ པ་ཊི་ས་ནྡྷི་ཝི་ཉྙཱ་ཎ་སྶ ཨཱ་ར་མྨ་ཎ་བྷཱ་ཝེ་ན ཨུ་པྤ་ཏྟི་ཊྛཱ་ན་བྷཱུ་ཏེ. ཏ་ཎྷཱ་ཡ ཨ་པྤ་ཧཱི་ན་ཏྟཱ ཨེ་ཝ པུ་རི་མུ་པྤ་ནྣཱ་ཡ ཙ ས་ནྟ་ཏི་ཡཱ ཏ་ཐཱ་པ་རི་ཎ་ཏ་ཏྟཱ པ་ཊི་ས་ནྡྷི་ཊྛཱ་ནཱ་བྷི་མུ་ཁཾ ཝི་ཉྙཱ་ཎཾ ནི་ནྣ་པོ་ཎ་པ་བྦྷཱ་རཾ ཧུ་ཏྭཱ པ་ཝ་ཏྟ་ཏཱི་ཏི ཨཱ་ཧ ‘‘ཏ་ཎྷཱ ན་མེ་ཏཱི’’ཏི. ས་ཧ་ཛཱ པ་ན ས་ངྑཱ་རཱཏི ཙུ་ཏི་ཨཱ་ས་ནྣ་ཛ་ཝ་ན་ཝི་ཉྙཱ་ཎ་ས་ཧ་ཛཱ་ཏ་ཙེ་ཏ་ནཱ, ས་བྦེ་པི ཝཱ ཕ་སྶཱ་ད་ཡོ. ཁི་པ་ནྟཱིཏི ཁི་པ་ནྟཱ ཝི་ཡ ཏ་སྨིཾ ཝི་ས་ཡེ པ་ཊི་ས་ནྡྷི་ཝ་སེ་ན ཝི་ཉྙཱ་ཎ་པ་ཏི་ཊྛཱ་ན་སྶ ཧེ་ཏུ་བྷཱ་ཝེ་ན པ་ཝ་ཏྟ་ནྟི. ཏནྟི ཏཾ ཝི་ཉྙཱ་ཎཾ. ‘‘ས་ནྟ་ཏི་ཝ་སཱ’’ཏི ཝ་ད་ནྟོ ཏ་དེ་ཝ ཝི་ཉྙཱ་ཎཾ ས་ནྡྷཱ་ཝ་ཏི སཾ་ས་ར་ཏི, ན ཨ་ཉྙ་ནྟི ཨི་མ་ཉྩ མི་ཙྪཱ་ཝཱ་དཾ པ་ཊི་ཀྑི་པ་ཏི. ས་ཏི ཧི ནཱ་ན་ཏྟ་ན་ཡེ ས་ནྟ་ཏི་ཝ་སེ་ན ཨེ་ཀ་ཏྟ་ན་ཡོ ཧོ་ཏཱི་ཏི.
༥༩༩. ཨཱ་ར་མྨ་ཎཱ་དཱི་ཧི…པེ… པ་ཝ་ཏྟ་ཏཱིཏི ཨཱ་ར་མྨ་ཎ་ནི་སྶ་ཡ་པ་ཙྩ་ཡཱ་དཱི་ཧི པ་ཝ་ཏྟ་ཏི. ཀ་ཐཾ? ཨཱ་ས་ནྣ་མ་ར་ཎ་སྶ ཧི ཀ་མྨ་བ་ལེ་ན མ་ནོ་དྭཱ་རེ ཨུ་པ་ཊྛཱ་པི་ཏཾ ཨ་ཝི་ཛྫཱ་ཡ པ་ཊི་ཙྪ་ནྣཱ་དཱི་ན་ཝཾ ཀ་མྨཱ་དི་ཝི་ས་ཡཾ ཨཱ་ར་བྦྷ མ་ནོ་དྭཱ་རཱ་ཝ་ཛྫ་ནཾ ཨུ་པྤ་ཛྫ་ཏི, ཏ་ཏོ མ་ར་ཎཱ་ས་ནྣ་ཝཱི་ཐི་ཡཱ ཝ་ཏྠུ་དུ་བྦ་ལ་བྷཱ་ཝེ་ན མ་ནྡ་པྤ་ཝ་ཏྟི་ཡཱ ཙ་ཏྟཱ་རི, པ་ཉྩ ཝཱ ཛ་ཝ་ནཱ་ནི པ་ཝ་ཏྟ་ནྟི, ཏ་ད་ན་ནྟ་རཾ ཏ་དཱ་ར་མྨ་ཎེ ས་ཏི, ཨ་ས་ཏི ཝཱ བྷ་ཝ་ངྒ་ཝི་ས་ཡ་མཱ་ལ་མྦི་ཏྭཱ ཙུ་ཏི་ཙི་ཏྟཾ ཨུ་པྤ་ཛྫ་ཏི. བྷ་ཝ་ངྒཱ་ན་ནྟ་ར་མྤི ཙུ་ཏི ཧོ་ཏཱི་ཏི ཝ་ད་ནྟི. ཙུ་ཏི་ཙི་ཏྟེ པ་ན ནི་རུ་དྡྷེ ཏ་དེ་ཝ ཨཱ་པཱ་ཐ་ག་ཏཾ ཀ་མྨ་ཀ་མྨ་ནི་མི་ཏྟཱ་དིཾ ཨཱ་ར་བྦྷ ཨ་ནུ་པ་ཙྪི་ནྣ་ཀི་ལེ་ས་བ་ལ་ཝ་ནི་མི་ཏྟཾ ས་ཧ་ཛཱ་ཏ་ས་ངྑཱ་རེ་ཧི ཀ་མྨཱ་དི་ཨཱ་ར་མྨ་ཎེ ཁི་པི་ཡ་མཱ་ནཾ ཨོ་རི་མ་ཏཱི་ར་རུ་ཀྑ་ཝི་ནི་བ་ནྡྷཾ ར་ཛྫུཾ ཨཱ་ལ་མྦི་ཏྭཱ མཱ་ཏི་ཀཱ་ཏི་ཀྐཱ་མ་ཀོ ཝི་ཡ པུ་རི་མ་ཉྩ ནི་སྶ་ཡཾ ཛ་ཧ་ཏི, ཨ་པ་ར་ཉྩ ཀ་མྨ་ས་མུ་ཊྛི་ཏཾ ནི་སྶ་ཡཾ ཨ་སྶཱ་ད་ཡ་མཱ་ནཾ ཝཱ ཨ་ན་སྶཱ་ད་ཡ་མཱ་ནཾ ཝཱ ཨཱ་ར་མྨ་ཎཱ་དཱི་ཧི པ་ཙྩ་ཡེ་ཧི པ་ཝ་ཏྟ་ཏི. ཨེ་ཏྠ ཙ ཨོ་རི་མ་ཏཱི་རཾ ཝི་ཡ པུ་རི་མ་བྷ་ཝོ ད་ཊྛ་བྦོ, ཏ་ཏྠ ཋི་ཏ་རུ་ཀྑོ ཝི་ཡ པུ་རི་མ་བྷ་ཝེ པ་ཝ་ཏྟ་མཱ་ན་ཀྑ་ནྡྷཱ, ར་ཛྫུ ཝི་ཡ ཀ་མྨཱ་དི་ཨཱ་ར་མྨ་ཎཾ. ཀེ་ཙི པ་ན ‘‘ར་ཛྫུ ཝི་ཡ ཧ་ད་ཡ་ཝ་ཏྠཱུ’’ཏི ཝ་ད་ནྟི, ‘‘ར་ཛྫུ ཝི་ཡ ཏ་ཎྷཱ’’ཏི་པི ཨ་པ་རེ. པུ་རི་སོ ཝི་ཡ ཝི་ཉྙཱ་ཎཾ, ཏ་སྶ ར་ཛྫུ་གྒ་ཧ་ཎཾ ཝི་ཡ ཏ་ཎྷཱ་ཡ ཨཱ་ར་མྨ་ཎཱ་བྷི་མུ་ཁ་ན་མ་ནཾ, པ་ཡོ་གོ ཝི་ཡ ཁི་པ་ན་ཀ་ས་ངྑཱ་རཱ, མཱ་ཏི་ཀཱ ཝི་ཡ ཙུ་ཏི་ཙི་ཏྟཾ, པ་ར་ཏཱི་རཾ ཝི་ཡ པ་ར་ལོ་ཀོ.
༦༠༠. ཡ་ཐཱ པུ་རི་སོ པ་ར་ཏཱི་རེ པ་ཏི་ཊྛ་ཧ་མཱ་ནོ པ་ར་ཏཱི་ར་རུ་ཀྑ་ཝི་ནི་བ་ནྡྷཾ ཀི་ཉྩི ཨ་སྶཱ་ད་ཡ་མཱ་ནོ ཝཱ ཨ་ན་སྶཱ་ད་ཡ་མཱ་ནོ ཝཱ ཀེ་ཝ་ལཾ པ་ཐ་ཝི་ཡཾ ས་ཀ་བ་ལ་པྤ་ཡོ་གེ་ཧེ་ཝ པ་ཏི་ཊྛཱ་ཏི, ཨེ་ཝ་མི་ད་མྤི བྷ་ཝ་ནྟ་ར་ཏྟ་བྷཱ་ཝ་ཝི་ནི་བ་ནྡྷ་ཧ་ད་ཡ་ཝ་ཏྠུ་ས་ངྑཱ་ཏཾ ནི་སྶ་ཡཾ པ་ཉྩ་ཝོ་ཀཱ་ར་བྷ་ཝེ ཨ་སྶཱ་ད་ཡ་མཱ་ནཾ ཝཱ ཙ་ཏུ་ཝོ་ཀཱ་ར་བྷ་ཝེ ཨ་ན་སྶཱ་ད་ཡ་མཱ་ནཾ ཝཱ ཀེ་ཝ་ལཾ ཨཱ་ར་མྨ་ཎ་ནི་སྶ་ཡ་ས་མྤ་ཡུ་ཏྟ་དྷ་མྨེ་ཧེ་ཝ པ་ཝ་ཏྟ་ཏཱི་ཏི ཏཾ ཝི་ཉྙཱ་ཎཾ ནཱ་པི ཨི་དྷཱ་ག་ཏཾ ཨི་མ་སྨིཾ་ཡེ་ཝ བྷ་ཝེ ནི་བྦ་ཏྟ་ཏྟཱ. ཀ་མྨཱ་དིནྟི ཨ་ཏཱི་ཏ་བྷ་ཝ་ནི་བྦ་ཏྟ་ཀ་མྨཱ་དིཾ. ཨཱ་དི-ས་དྡེ་ན ཁི་པ་ན་ཀ་ས་ངྑཱ་རཱ་ནཾ, ན་མ་ན་ཝ་སེ་ན པ་ཝ་ཏྟ་ཏ་ཎྷཱ་ཡ, ཀ་མྨཱ་དི་ཝི་ས་ཡཱ་ཡ ཨཱ་དཱི་ན་ཝ་པ་ཊི་ཙྪཱ་དི་ཀཱ་ཡ ཙ ཨ་ཝི་ཛྫཱ་ཡ, ད་ལ༹ྷ་གྒཱ་ཧཱ་དི་ཀ་རཱ་ནཾ ཨུ་པཱ་དཱ་ནཱ་དཱི་ན་ཉྩ ག་ཧ་ཎཾ ད་ཊྛ་བྦཾ. ཏ་ཏྠ ཀ་མྨཾ ནཱ་མ ཨུ་པ་པ་ཛྫ་ཝེ་ད་ནཱི་ཡ་བྷཱུ་ཏཾ, ཨ་པ་རཱ་པ་རི་ཡ་ཝེ་ད་ནཱི་ཡ་བྷཱུ་ཏཾ ཝཱ པ་ཊི་ས་ནྡྷི་ནི་བྦ་ཏྟ་ཀ་ཀ་མྨཾ. ཁི་པ་ན་ཀ་ས་ངྑཱ་རཱ ནཱ་མ ཙུ་ཏི་ཨཱ་ས་ནྣ་ཛ་ཝ་ན་ས་ཧ་ཛཱ་ཏ་ས་ངྑཱ་རཱ, པ་ཊི་ས་ནྡྷི་ཛ་ན་ཀ་ཀ་མྨ་ས་ཧ་ག་ཏ་ས་ངྑཱ་རཱ ཝཱ, ཏ་ཏོ པུ་རི་མ་ཛ་ཝ་ན་ས་ཧ་ག་ཏ་ས་ངྑཱ་རཱ་ཏི ཝཱ ཀེ་ཙི. ན་མ་ན་ཝ་སེ་ན པ་ཝ་ཏྟ་ཏ་ཎྷཱ ནཱ་མ ཨ་ནུ་ས་ཡཱ་ཝ་ཏྠཱ་ཡ པ་ཝ་ཏྟ་ཏ་ཎྷཱ. ཨེ་ས ན་ཡོ ཨཱ་དཱི་ན་ཝ་པ་ཊི་ཙྪཱ་ད་ཀ་ཨ་ཝི་ཛྫཱ་ཡ་པི. ཀ་མྨཱ་དི་ཝི་ས་ཡཱ པུ་བྦེ ཝུ་ཏྟཱ་ཡེ་ཝ. ད་ལ༹ྷ་གྒཱ་ཧ་ཀ་ར་ཨུ་པཱ་དཱ་ནཱ ནཱ་མ མ་ཎྜཱུ་ཀཾ པ་ནྣ་གོ ཝི་ཡ ཨུ་པ་པ་ཏྟི་བྷ་ཝ་སྶ ད་ལ༹ྷ་གྒ་ཧ་ཎ་ཝ་སེ་ན པ་ཝ་ཏྟཱ ཀཱ་མུ་པཱ་དཱ་ནཱ་ད་ཡོ.
༦༠༡-༥. ས་དྡ་པ་ཊི་གྷོ་སཱ་དཱི་ནཾ ས་ཏི་པི པ་ཙྩ་ཡ་པ་ཙྩ་ཡུ་པྤ་ནྣ་བྷཱ་ཝེ ས་ནྟཱ་ན་བ་ནྡྷོ ན པཱ་ཀ་ཊོ་ཏི ཏེ་སཾ ཨེ་ཀ་ཏྟ་ནཱ་ན་ཏྟ་བྷཱ་ཝཾ ཨ་ནཱ་མ་སི་ཏྭཱ ཨ་ནཱ་ག་ཏ་མ་ཏཱི་ཏ་ཧེ་ཏུ་ས་མུ་པྤཱ་ད་མེ་ཝ ད་སྶེ་ནྟོ ‘‘ཨེ་ཏྠ ཙཱ’’ཏི་ཨཱ་དི་མཱ་ཧ. ཨེ་ཏྠཱཏི ཨི་མ་སྨིཾ ཙུ་ཏི་པ་ཊི་ས་ནྡྷཱ་དྷི་ཀཱ་རེ. པ་ཊི་གྷོ་ས་དཱི་པ་མུ་དྡཱ་དཱིཏི ཨཱ་དི-ས་དྡེ་ན ཨཱ་དཱ་ས་ཏ་ལ་ག་ཏ་མུ་ཁ་ནི་མི་ཏྟཱ་དཱི་ནཾ ག་ཧ་ཎཾ. ཨ་ཉྙ་ཏྠ ཨ་ག་ནྟྭཱཏི ས་དྡཱ་དི་པ་ཙྩ་ཡ་དེ་སཾ ཨ་ནུ་པ་ག་ནྟྭཱ. ཨི་དཾ ཝུ་ཏྟཾ ཧོ་ཏི – ཡ་ཐཱ ས་དྡཱ་དཱི་ནཾ ཨུ་པྤ་ཏྟི་པ་དེ་སཾ ཨ་ནུ་པ་ག་ནྟྭཱ པ་ཊི་གྷོ་སོ ས་དྡ་ཧེ་ཏུ་ཀོ, པ་དཱི་པོ པ་དཱི་པ་ནྟ་རཱ་དི་ཧེ་ཏུ་ཀོ, མུ་དྡཱ ལ་ཉྪ་ན་ཧེ་ཏུ་ཀོ, མུ་ཁ་ནི་མི་ཏྟཱ་དི་ཀཾ ཨཱ་དཱ་སཱ་དི་ཨ་བྷི་མུ་ཁཱ་དི་ཧེ་ཏུ་ཀཾ ཧོ་ཏི ཏ་ཏོ པུ་བྦེ ཨ་བྷཱ་ཝཱ, ཨེ་ཝ་མི་ད་མྤི པ་ཊི་ས་ནྡྷི་ཝི་ཉྙཱ་ཎཾ ན ཧེ་ཏུ་དེ་སཾ ག་ནྟྭཱ ཏཾ་ཧེ་ཏུ་ཀཾ ཧོ་ཏི ཏ་ཏོ པུ་བྦེ ཨ་བྷཱ་ཝཱ, ཏ་སྨཱ ན ཨི་དཾ ཧེ་ཏུ་དེ་ས་ཏོ པུ་རི་མ་བྷ་ཝ་ཏོ ཨི་དྷཱ་ག་ཏཾ པ་ཊི་གྷོ་སཱ་ད་ཡོ ཝི་ཡ ས་དྡཱ་དི་དེ་ས་ཏོ, ནཱ་པི ཏ་ཏོ ཧེ་ཏུཾ ཝི་ནཱ ཨུ་པྤ་ནྣཾ ས་དྡཱ་དཱི་ཧི ཝི་ནཱ པ་ཊི་གྷོ་སཱ་ད་ཡོ ཝི་ཡཱ་ཏི. ཨ་ཐ ཝཱ ཨ་ཉྙ་ཏྲ ཨ་ག་ནྟྭཱཏི པུ་བྦེ པ་ཙྩ་ཡ་པ་དེ་སེ ས་ནྣི་ཧི་ཏཱ ཧུ་ཏྭཱ ཏ་ཏོ ཨ་ཉྙ་ཏྲ ག་ནྟྭཱ ཏ་པྤ་ཙྩ་ཡཱ ན ཧོ་ནྟི ཨུ་པྤ་ཏྟི་ཏོ པུ་བྦེ ཨ་བྷཱ་ཝཱ, ནཱ་པི ས་དྡཱ་དི་པ་ཙྩ་ཡཱ ན ཧོ་ནྟི, ཨེ་ཝཾ ཨི་ད་མྤཱི་ཏི ཝུ་ཏྟ་ན་ཡེ་ན ཡོ་ཛེ་ཏ་བྦཾ. ས་ནྟཱ་ན་བ་ནྡྷ་ཏོ ན་ཏྠཱིཏི ས་ནྟཱ་ན་པྤ་བ་ནྡྷ་ཏོ ན་ཏྠི ཨེ་ཀ་ཏཱ ས་ནྟཱ་ནེ་ཀ་ཏྟེ་པི ཨ་ཉྙ་སྶེ་ཝ ཝི་ཉྙཱ་ཎ་སྶ པཱ་ཏུ་བྷ་ཝ་ན་ཏོ, ནཱ་པི ནཱ་ན་ཏཱ ཨ་པུ་བྦཱ་ནཾ ཨ་པུ་བྦཱ་ནཾ ཨུ་པྤཱ་དེ་པི པ་ཋ་མུ་པྤ་ནྣཾ དྷ་མྨཾ ཝི་ནཱ པ་ཙྪི་མ་སྶ ཨ་ནུ་པྤ་ཛྫ་ན་ཏོ, པ་དཱི་པ་སྶ ཝི་ཡ ནཱ་ན་ཏཱ ན སི་ཡཱ. ཁ་ཎི་ཀཱ་པི ཧི པ་དཱི་པ་ཛཱ་ལཱ ས་ནྟཱ་ནེ་ཀ་ཏྟཾ ཨུ་པཱ་དཱ་ཡ སཱ ཨེ་ཝཱ་ཏི ཝུ་ཙྩ་ཏི, ཨ་ཏྟ་ཀི་ཙྩ་ཉྩ སཱ་དྷེ་ཏི. ‘‘ས་ཏི ས་ནྟཱ་ན་བ་ནྡྷེ’’ཏི་ཨཱ་དི་ནཱ ས་ནྟཱ་ན་བ་ནྡྷེ ཨེ་ཀ་ནྟཾ ཨེ་ཀ་ཏྟཱ་ཡ ཙ ནཱ་ན་ཏྟཱ་ཡ ཙ ཨ་གྒ་ཧེ་ཏ་བྦ་ཏཾ, ག་ཧ་ཎེ ཙ དོ་སཾ ད་སྶེ་ཏི. ཨི་དཾ ཝུ་ཏྟཾ ཧོ་ཏི – ས་ནྟཱ་ན་བ་ནྡྷེ ས་ཏི ཡ་དི ཨེ་ཀ་ནྟེ་ན ཨེ་ཀ་ཏཱ སི་ཡཱ, ཁཱི་ར་ད་དྷཱི་ན་མྤི ཨ་ན་ཉྙ་བྷཱ་ཝ་ཏོ, ཨ་ཏྟ་ཏོ་ཡེ་ཝ ཙ ས་ཡཾ ཨ་ནུ་པྤ་ཛྫ་ན་ཏོ ཁཱི་ར་ཏོ ད་དྷི་ས་མྦྷཱུ་ཏཾ ན བྷ་ཝེ་ཡྻ. ཨ་ཐཱ་པི ས་ནྟཱ་ན་བ་ནྡྷེ ས་ཏི ཨེ་ཀ་ནྟཾ ནཱ་ན་ཏཱ བྷ་ཝེ་ཡྻ, ཁཱི་ར་ད་དྷཱི་ན་མྤི ནཱ་ན་ཏྟཱ, ཨ་ཉྙ་སྶ ཙ སཱ་མི་བྷཱ་ཝ་མ་ཏྟེ་ན ཨ་པ་ར་སྶ སཱ་མི་བྷཱ་ཝཱ་ཡོ་ག་ཏོ ཁཱི་ར་སཱ་མི ན་རོ ད་དྷི་སཱ་མི ན བྷ་ཝེ་ཡྻ, ན ཙ པ་ནེ་ཝཾ ལོ་ཀེ དི་སྶ་ཏཱི་ཏི.
༦༠༦. ཏ་སྨཱཏི ཡ་སྨཱ ཨེ་ཝཾ ལོ་ཀ་ཝོ་ཧཱ་ར་པ་རི་ཙྪེ་དོ ཧོ་ཏི, ཏ་སྨཱ ཨེ་ཀ་ནྟཾ ཨེ་ཀ་ཏཱ, ནཱ་ན་ཏཱ་པི ཝཱ ན ཙེ་ཝ ཨུ་པ་ག་ནྟ་བྦཱ. ཨེ་ཀ་ཏྟེ པ་ན ཨ་དྷི་པྤེ་ཏེ དྷ་མྨ་ཏོ ཨ་གྒ་ཧེ་ཏྭཱ ས་ནྟཱ་ན་ཏོ་ཝ ག་ཧེ་ཏ་བྦཾ, ནཱ་ན་ཏྟེ ཨ་དྷི་པྤེ་ཏེ ས་ནྟཱ་ན་ཝ་སེ་ན ཨ་གྒ་ཧེ་ཏྭཱ དྷ་མྨ་ཏོ་ཝ ག་ཧེ་ཏ་བྦ་ནྟི ཨ་དྷི་པྤཱ་ཡོ. ཏེ་ནཱ་ཧུ པོ་རཱ་ཎཱ –
‘‘དི་ཊྛ་ས་ནྟཱ་ན་བ་ནྡྷ་སྨིཾ, ཨེ་ཀ་ཉྙ་ཏྟ་ཝི་ཙཱ་ར་ཎེ;
ས་བྷཱ་གུ་པྤ་ཏྟི་ཡེ་ཀ་ཏྟ-མ་ཉྙ་ཏྟཾ ཁ་ཎ་བྷེ་ད་ཏོ’’ཏི.
ཨེ་ཏྠ ཙ ཨེ་ཀ་ནྟཾ ཨེ་ཀ་ཏཱ་པ་ཊི་སེ་དྷེ་ན ‘‘ས་ཡཾ་ཀ་ཏཾ སུ་ཁ་དུ་ཀྑ’’ནྟི ཨི་མཾ དི་ཊྛིཾ ནི་ཝཱ་རེ་ཏི, ཨེ་ཀ་ནྟཾ ནཱ་ན་ཏཱ་པ་ཊི་སེ་དྷེ་ན ‘‘པ་རཾ་ཀ་ཏཾ སུ་ཁ་དུ་ཀྑ’’ནྟི.
༦༠༧-༩. ན་ནུ ན སུ་ནྡ་རཾ, ན་ནུ སི་ཡཱ་ཏི ཝཱ ས་མྦ་ནྡྷོ. ཨ་ས་ངྐ་ནྟི་པཱ་ཏུ་བྷཱ་ཝེཏི ས་ངྐ་ནྟི་པཱ་ཏུ་བྷཱ་ཝ་ར་ཧི་ཏེ, ཨ་ས་ངྐ་ནྟི་ཝ་སེ་ན ཝཱ པཱ་ཏུ་བྷཱ་ཝེ, ཨ་ས་ངྐ་མི་ཏྭཱ་ཝ པཱ་ཏུ་བྷཱ་ཝེ་ཏི ཨ་ཏྠོ. ཁ་ནྡྷཱ་བྷི་ས་མྦྷ་ཝཱཏི ཨ་བྷི་ས་མྦྷཱུ་ཏ་ཀྑ་ནྡྷཱ, ཨ་ཐ ཝཱ ཨ་བྷི་ས་མྦྷ་ཝ་ཏི ཀ་མྨཾ ཨེ་ཏེ་སཱུ་ཏི ཨ་བྷི་ས་མྦྷ་ཝཱ, ཁ་ནྡྷཱ, ཨེ་ཝཾ ཨ་བྷི་ས་མྦྷ་ཝཱ ཀ་མྨཱ་དྷི་ཊྛཱ་ན་བྷཱུ་ཏཱ ཁ་ནྡྷཱ་ཏི ཨ་ཏྠོ. ཨི་དྷ ནི་རུ་དྡྷ་ཏྟཱཏི ཕ་ལཱ་དྷི་ཊྛཱ་ན་བྷཱུ་ཏཾ པ་ར་ལོ་ཀཾ ཨ་ག་ནྟྭཱ ཨི་དྷེ་ཝ ནི་རུ་དྡྷ་ཏྟཱ. པ་ར་ཏྠཱ་ག་མ་ཏོཏི པ་ར་ལོ་ཀཾ ཨ་ག་མ་ན་ཏོ. ཏ་སྶཱཏི ཀ་མྨ་སྶ. ཨ་ཉྙ་སྶཱཏི ཡེ་ན ཏཾ ཀ་མྨཾ ཀ་ཏཾ, ཏ་ཏོ ཨ་ཉྙ་སྶ. ཨ་ཉྙ་ཏོཏི ཡཾ ཏཾ ཀ་མྨཾ ནི་བྦ་ཏྟཾ, ཏ་ཏོ ཨ་ཉྙ་ཏོ. ཨེ་ཏཾ ཝི་དྷཱ་ནནྟི ཨི་དྷ་ལོ་ཀ་ཏོ པ་ར་ལོ་ཀཾ ག་ནྟྭཱ ན་ཏྠི, ཏ་ཏྠ ‘‘ཨ་ཉྙེ་ཝ ཁ་ནྡྷཱ ནི་བྦ་ཏྟ་ནྟཱི’’ཏི ཨི་དཾ ས་བྦཾ ཡ་ཐཱ་ཝུ་ཏྟ་ཝི་དྷཱ་ནཾ.
༦༡༡-༤. ‘‘ས་ནྟཱ་ནེ…པེ… སཱ་དྷ་ཀོ’’ཏི ས་ངྑེ་པ་ཏོ ཝུ་ཏྟ་མ་ཏྠཾ པ་ཀཱ་སེ་ཏུཾ ‘‘ཨེ་ཀ་སྨིཾ པ་ནཱ’’ཏི་ཨཱ་དི ཝུ་ཏྟཾ. ཨེ་ཀ་སྨིཾ ས་ནྟཱ་ནེཏི ཡ་སྨིཾ དྷ་མྨ་པུ་ཉྫེ ཀ་མྨཾ ནི་བྦ་ཏྟཾ, ཏ་སྶེ་ཝ ས་ནྟཱ་ནེ་ཏི ཨ་ཏྠོ. ཨ་ཉྙ་སྶཱ་ཏི་པི ཝཱ…པེ… ཧོ་ཏི. ཏ་ཏྠ ཨེ་ཀ་ནྟཾ ཨེ་ཀ་ཏྟ་ནཱ་ན་ཏྟཱ་ནཾ པ་ཊི་སི་དྡྷ་ཏྟཱ་ཏི ཨ་དྷི་པྤཱ་ཡོ. ཨེ་ཏ་སྶ་ཏྠ་སྶཱཏི ཧེ་ཏུ་ཕ་ལཱ་ནཾ ཨ་ཏྠ་ཏོ ཨ་ཉྙ་ཏྟེ་པི ཏེ་ནེ་ཝ ཧེ་ཏུ་ཕ་ལ་བྷཱ་ཝེ་ན ས་མྦ་ནྡྷ་ཏྟཱ ཏཾ ཕ་ལཾ ཨ་ཉྙ་སྶ, ཨ་ཉྙ་ཏོ་ཏི ཝཱ ན ཝ་ཏྟ་བྦ་ནྟི ཨེ་ཏ་སྶ ཨ་ཏྠ་སྶ. བཱི་ཛཱ་ནནྟི ཨ་མྦ་མཱ་ཏུ་ལུ་ངྒ་བཱི་ཛཱ་ནཾ. ཨ་བྷི་ས་ངྑཱ་རོཏི མ་དྷུ་ཨཱ་དི་པ་རི་བྷཱ་ཝ་ནཾ. མ་དྷུ་ཨཱ་དི་ནཱཏི མ་དྷུ་ཙ་ཏུ་མ་དྷུ་ར་ཨ་ལ་ཏྟ་ཀ་ར་སཱ་དི་ནཱ. ཏ་སྶཱཏི ཏ་སྶ པ་རི་བྷཱ་ཝི་ཏ་བཱི་ཛ་སྶ. པ་ཋ་མཾ ལ་དྡྷ་པ་ཙྩ་ཡོཏི མ་དྷུ་ར་བྷཱ་ཝཱུ་པ་ག་མ་ན་ཏོ པ་ཋ་མ་མེ་ཝ ལ་དྡྷ་པ་ཙྩ་ཡོ. ཀཱ་ལ་ནྟ་རེཏི ཕ་ལ་ཀཱ་ལེ. ཨེ་ཝཾ ཉེ་ཡྻ་མི་ད་མྤི ཙཱཏི ཡ་ཐཱ ཨེ་ཏཾ, ཨེ་ཝཾ ཨི་ད་མྤི ཉཱ་ཏ་བྦཾ. ཨི་དཾ ཝུ་ཏྟཾ ཧོ་ཏི – ཡ་ཐཱ ཧི ཨ་མྦ་བཱི་ཛཱ་དཱི་སུ མ་དྷུ་ནཱ, ཙ་ཏུ་མ་དྷུ་རེ་ན ཝཱ ཡོ་ཛེ་ཏྭཱ རོ་པི་ཏེ་སུ ཕ་ལ་ར་སོ མ་དྷུ་རོ ཧོ་ཏི, མཱ་ཏུ་ལུ་ངྒ་བཱི་ཛེ ཙ ཨ་ལ་ཏྟ་ཀ་ར་སེ་ན ར་ཛི་ཏྭཱ རོ་པི་ཏེ ཨ་མྦི་ལ་བྷ་ཎྜོ ར་ཏྟོ ཧོ་ཏི, ན ཙ ཏཾ བཱི་ཛཾ ཨ་བྷི་ས་ངྑ་ར་ཎཾ ཝཱ ཕ་ལ་ཊྛཱ་ནཾ པཱ་པུ་ཎཱ་ཏི, ཨེ་ཝཾ ས་ནྟེ་པི ཀཱ་ལ་ནྟ་རེ ཕ་ལ་ཝི་སེ་སོ ན ཨ་ཉྙ་བཱི་ཛ་ས་ནྟཱ་ནེ ཧོ་ཏི, ན ཙ ཨ་ཉྙ་སྨིཾ བཱི་ཛེ ཨ་བྷི་ས་ངྑཱ་ར་པ་ཙྩ་ཡ་ཏོ ཧོ་ཏི, ཨེ་ཝ་མེ་ཝ ཡེ ཨི་དྷ ལོ་ཀེ ནི་བྦ་ཏྟ་ཀྑ་ནྡྷཱ, ཏེ་སུ ནི་པྥ་ནྣཾ ཀ་མྨཾ ཝཱ པ་ར་ལོ་ཀཾ ན ག་ཙྪ་ནྟི. ཨེ་ཝ་མྤི ཀཱ་ལ་ནྟ་རེ ཝི་པཱ་ཀ་ཀྑ་ནྡྷཱ ཨ་ཉྙ་སྨིཾ ས་ནྟཱ་ནེ ན ནི་བྦ་ཏྟ་ནྟི, ན ཙ ཨ་ཉྙ་ཀ་མྨ་པ་ཙྩ་ཡ་ཏོ ཧོ་ནྟཱི་ཏི.
ཨེ་ཏྠ ཧི ཨ་བྷི་ས་ངྑ་ཏཾ བཱི་ཛཾ ཝི་ཡ ཀ་མྨཾ ཝཱ ས་ཏྟོ, ཨ་བྷི་ས་ངྑཱ་རོ ཝི་ཡ ཀ་མྨཾ, བཱི་ཛ་སྶ ཨ་ངྐུ་རཱ་དི་པྤ་བ་ནྡྷོ ཝི་ཡ ས་ཏྟ་སྶ པ་ཊི་ས་ནྡྷི་ཝི་ཉྙཱ་ཎཱ་དི་པྤ་བ་ནྡྷོ. ཏ་ཏྠུ་པྤ་ནྣ་སྶ མ་དྷུ་ར་ར་ས་སྶ ཨ་མྦི་ལ་བྷ་ཎྜེ ར་ཏྟ་སྶ ཙ ཏ་སྶེ་ཝ བཱི་ཛ་སྶ ཏ་ཏོ ཨེ་ཝ ཙ ཨ་བྷི་ས་ངྑཱ་ར་ཏོ བྷཱ་ཝོ ཝི་ཡ ཀ་མྨ་ཀཱ་ར་ཀ་སྶེ་ཝ ས་ཏྟ་སྶ ཏ་ཏོ ཨེ་ཝ ཙ ཨ་བྷི་ས་ངྑ་ར་ཎ་ཏོ བྷཱ་ཝོ ཝེ་དི་ཏ་བྦོ.
༦༡༥. བཱ་ལ་ཀཱ་ལེ…པེ… ཕ་ལ་དཱ་ཡི་ནཱཏི བཱ་ལ་ས་རཱི་རེ ཀ་ཏཾ ཝི་ཛྫཱ་པ་རི་ཡཱ་པུ་ཎ་ནཾ, སི་པྤ་སི་ཀྑ་ནཾ, ཨོ་ས་དྷཱུ་པ་ཡོ་གོ ཙ ན ཝུ་ཌྜྷ་ས་རཱི་རཾ ག་ཙྪ་ཏི, ཨ་ཐ ཙ ཏ་ནྣི་མི་ཏྟཾ ཝི་ཛྫཱ་པཱ་ཊ་ཝཾ, སི་པྤ་ཛཱ་ན་ནཾ, ཨ་ནཱ་མ་ཡ་ཏཱ་དི ཙ ཝུ་ཌྜྷ་ས་རཱི་རེ ཧོ་ནྟི, ན ཙ ཏཱ་ནི ཨ་ཉྙ་སྶ ཧོ་ནྟི ཏཾ་ས་ནྟ་ཏི་པ་རི་ཡཱ་པ་ནྣེ ཨེ་ཝ ས་དི་སེ ཨུ་པྤ་ཛྫ་ན་ཏོ. ན ཙ ཡ་ཐཱ པ་ཡུ་ཏྟེ་ན ཝི་ཛྫཱ་པ་རི་ཡཱ་པུ་ཎ་ནཱ་དི་ནཱ ཝི་ནཱ ཏཱ་ནི ཨ་ཉྙ་ཏོ ཧོ་ནྟི ཏ་ད་བྷཱ་ཝེ ཨ་བྷཱ་ཝ་ཏོ, ཨེ་ཝཾ ཨི་དྷཱ་པི ས་ནྟཱ་ནེ ཡཾ ཕ་ལཾ, ཨེ་ཏཾ ནཱ་ཉྙ་སྶ, ན ཙ ཨ་ཉྙ་ཏོ་ཏི ཡོ་ཛེ་ཏ་བྦཾ. ཨེ་ཏེ་ན ཙ ས་ངྑཱ་རཱ་བྷཱ་ཝེ ཕ་ལཱ་བྷཱ་ཝ་མེ་ཝ ད་སྶེ་ཏི, ན ཨ་ཉྙ་པ་ཙྩ་ཡ་ནི་ཝཱ་ར་ཎཾ ཀ་རོ་ཏི.
༦༡༦-༨. ཨེ་ཝཾ ས་ནྟེ་པཱིཏི ཨ་ས་ངྐ་ནྟི་པཱ་ཏུ་བྷཱ་ཝེ. ཏ་ཏྠ ཙ ཡ་ཐཱ་ཝུ་ཏྟ་དོ་ས་པ་རི་ཧ་ར་ཎེ ས་ཏི སི་དྡྷེ་པཱི་ཏི ཨ་ཏྠོ. ཝི་ཛྫ་མཱ་ནནྟི པ་དཱི་པ་སྶ ཝ་ཊྚི་ཀཱ་སྣེ་ཧོ ཝི་ཡ ཝི་ཛྫ་མཱ་ནཾ ཨ་ནི་རུ་དྡྷ་ནྟི ཨ་ཏྠོ. ཨ་ཝི་ཛྫ་མཱ་ནནྟི ཝ་ཊྚ་དུ་ཀྑཱ་བྷཱ་ཝ་སྶ ཨ་ར་ཧ་ཏོ ཙུ་ཏི་ཙི་ཏྟཾ ཝི་ཡ ཨ་ཝི་ཛྫ་མཱ་ནཾ ནི་རུ་དྡྷ་ནྟི ཨ་ཏྠོ. ཏ་པྤ་ཝ་ཏྟི་ཀྑ་ཎེཏི ཀ་མྨ་སྶ པ་ཝ་ཏྟ་མཱ་ན་ཀྑ་ཎེ་ཡེ་ཝ. ཏེ་ནཱ་ཧ ‘‘ས་དྡྷི་མེ་ཝ ཙ ཧེ་ཏུ་ནཱ’’ཏི. ཨ་ཝི་ཛྫ་མཱ་ནནྟི པ་ཝ་ཏྟི་ཀྑ་ཎ་ཏོ པུ་བྦེ ཝི་ཛྫ་མཱ་ན་ཏཾ ཨ་ས་མྤ་ཏྟཾ. ནི་རུ་དྡྷནྟི ཁ་ཎ་ཏྟ་ཡཾ པ་ཏྭཱ ནི་རུ་དྡྷཾ. ཏེ་ནཱ་ཧ –
‘‘པ་ཝ་ཏྟི་ཀྑ་ཎ་ཏོ པུ་བྦེ, པ་ཙྪཱ ནི་ཙྩ་ཕ་ལཾ སི་ཡཱ’’ཏི.
པུ་བྦེཏི ཀ་མྨཱ་ཡཱུ་ཧ་ན་ཏོ པུ་བྦེ. ཨ་ཝི་ཛྫ་མཱ་ན་ཏཱ་སཱ་མ་ཉྙེ་ན ཧེ་ཏཾ ཝུ་ཏྟཾ. པ་ཙྪཱཏི ཝི་པཱ་ཀ་པྤ་ཝ་ཏྟི་ཏོ པ་ཙྪཱ ཙ.
༦༡༩-༢༠. ཀ་ཊ་ཏྟཱ་པ་ཙྩ་ཡོཏི ཀ་ཊ་ཏྟཱ ཨེ་ཝ པ་ཙྩ་ཡོ, ན ཝི་ཛྫ་མཱ་ན་ཏཱ་ཡ ཨ་ཝི་ཛྫ་མཱ་ན་ཏཱ་ཡ ཝཱ་ཏི ཨ་ཏྠོ. ཏེ་ནཱ་ཧ ‘‘ཀཱ་མཱ་ཝ་ཙ་ར་སྶ ཀུ་ས་ལ་སྶ ཀ་མྨ་སྶ ཀ་ཏ་ཏྟཱ ཨུ་པ་ཙི་ཏ་ཏྟཱ ཝི་པཱ་ཀཾ ཙ་ཀྑུ་ཝི་ཉྙཱ་ཎཾ ཨུ་པྤ་ནྣཾ ཧོ་ཏཱི’’ཏི་ཨཱ་དི (དྷ. ས. ༤༣༡). ཡ་དི ཨེ་ཝཾ ཨ་ར་ཧ་ཏཱ ཀ་ཏ་ཀ་མྨ་མྤི ཀ་ཊ་ཏྟཱ་པ་ཙྩ་ཡོ སི་ཡཱ་ཏི? ན་ཡི་ད་མེ་ཝཾ. ཡ་ཐཱ ཧི ཨ་ཙྪི་ནྣ་མཱུ་ལ་སྨིཾ རུ་ཀྑེ པུ་པྥི་ཏཾ བཱི་ཛ་ས་མ་ཏྠ་མྤི ཀུ་སུ་མཾ མཱུ་ལེ ཚི་ནྣ་མ་ཏྟེ ཕ་ལ་དཱ་ཡ་ཀཾ ན ཧོ་ཏི, ཨེ་ཝཾ ཨ་ར་ཧ་ཏོ་པི ཀི་ལེ་ས་མཱུ་ལ་སྶ ཨ་བྦོ་ཙྪི་ནྣ་ཀཱ་ལེ ས་ནྟཱ་ནེ པ་ཝ་ཏྟ་མྤི ཀ་མྨཾ ཀི་ལེ་ས་མཱུ་ལ་ཙྪི་ནྣ་མ་ཏྟེ་ཡེ་ཝ ཕ་ལ་དཱ་ནེ ཨ་ས་མ་ཏྠ་བྷཱ་ཝཾ ཨཱ་པ་ནྣ་ནྟི. ཏེ་ནཱ་ཧུ པོ་རཱ་ཎཱ –
‘‘བཱ་ལ་ཛ་ན་ཛ྄ཛྷཱ་རུ་ལ༹ྷོ,
ཛཱ་ཏི་ར་ཐོ ཀ་མྨ་ཀི་ལེ་ས་ཙ་ཀྐོ་ཡཾ;
ཀི་ལེ་ས་ཙ་ཀྐ་ཝི་དྷ་མ་ནོ,
ན ཡཱ་ཏི ཀ་མྨེ་ཀ་ཙ་ཀྐེ་པཱི’’ཏི.
ཀ་ཊ་ཏྟཱ ཙེ པ་ཙྩ་ཡོ, ནི་ཙྩ་ཕ་ལ་དཱ་ཡ་ཀོ ཝི་བ་ནྡྷོ་ཏི ཨཱ་ཧ ‘‘པཱ་ཊི་བྷོ་གཱ་དི་ཀ’’ནྟི་ཨཱ་དི. པཱ་ཊི་བྷོ་གཱ་དི་ཀནྟི མཱུ་ལ་བྷཱ་ཝཱུ་པ་ག་མ་ནཱ་དི་ཀཾ. ཨཱ་དི-གྒ་ཧ་ཎེ་ན ‘‘པ་ཙྪཱ མཱུ་ལཾ ད་སྶཱ་མཱི’’ཏི བྷ་ཎྜ་གྒ་ཧ་ཎཾ, ཨི་ཎ་གྒ་ཧ་ཎ་ཉྩ ས་ངྒ་ཎྷཱ་ཏི. ཨ་ཡཾ པ་ནེ་ཏྠ ཨ་དྷི་པྤཱ་ཡོ – པཱ་ཊི་བྷོ་ག་ཀི་རི་ཡཱ་དཱི་ནཾ ཝི་ཛྫ་མཱ་ན་ཏཱ, ཨ་ཝི་ཛྫ་མཱ་ན་ཏཱ ཝཱ ནི་ཡྻཱ་ཏ་ནེ, པ་ཊི་བྷ་ཎྜ་དཱ་ནེ, ཨི་ཎ་དཱ་ནེ ཙ པ་ཙྩ་ཡོ ན ཧོ་ཏི, ཨ་ཐ ཁོ ཀ་ར་ཎ་མ་ཏྟཾ, ན ཙ ཏཾ ནི་ཡྻཱ་ཏ་ནཱ་དཱི་ནཾ ནི་ཙྩ་མེ་ཝ པ་ཙྩ་ཡོ ཧོ་ཏི ནི་ཡྻཱ་ཏ་ནཱ་དི་མྷི ཀ་ཏེ པ་ཙྩ་ཡ་ཏྟཱ་བྷཱ་ཝ་ཏོ, ཨེ་ཝ་མེ་ཝ ཝི་པཱ་ཀུ་པྤཱ་ད་ནེ་པི ཀ་མྨ་སྶ ཝི་ཛྫ་མཱ་ན་ཏཱ, ཨ་ཝི་ཛྫ་མཱ་ན་ཏཱ ཝཱ པ་ཙྩ་ཡོ ན ཧོ་ཏི, ཨ་ཐ ཁོ ཀ་ར་ཎ་མ་ཏྟ་མེ་ཝ, ཀ་ར་ཎ་མ་ཏྟེ ཙ ས་ཏི ཝི་པ་ཀྐ་ཝི་པཱ་ཀཱ་ནཾ པ་ཙྩ་ཡོ ན ཧོ་ཏཱི་ཏི.
༦༢༡. པ་ར་མ་སྶ ཨུ་ཏྟ་མ་སྶ ཨ་ཏྠ་སྶ པ་ཀཱ་ས་ན་ཏོ པ་ར་མ་ཏྠ་པྤ་ཀཱ་ས་ནོ. པཱི་ཏི་བུ་དྡྷི་ཝི་ཝ་ཌྜྷ་ནོཏི པཱི་ཏི་ཡཱ, ཉཱ་ཎ་སྶ ཙ, པཱི་ཏི་ས་ཧ་ག་ཏ་སྶ ཝཱ ཉཱ་ཎ་སྶ ཝི་ཝ་ཌྜྷ་ནོ.
ཨི་ཏི ཨ་བྷི་དྷ་མྨ་ཏྠ་ཝི་ཀཱ་སི་ནི་ཡཱ ནཱ་མ
ཨ་བྷི་དྷ་མྨཱ་ཝ་ཏཱ་ར་སཾ་ཝ་ཎྞ་ནཱ་ཡ
པུ་ཉྙ་ཝི་པཱ་ཀ་པ་ཙྩ་ཡ་ནི་དྡེ་ས་ཝ་ཎྞ་ནཱ ནི་ཊྛི་ཏཱ.