༦. ཚ་ཊྛོ པ་རི་ཙྪེ་དོ
ཨཱ་ར་མྨ་ཎ་ཝི་བྷཱ་ག་ནི་དྡེ་ས་ཝ་ཎྞ་ནཱ
༢༩༡-༣. ཨེ་ཏེ་སནྟི ཡ་ཐཱ་ཝུ་ཏྟ་པྤ་བྷེ་དཱ་ནཾ. ན་ནུ ཙ ‘‘ཙི་ཏྟཾ ཙེ་ཏ་སི་ཀ’’ནྟི་ཨཱ་དི་ནཱ ཙི་ཏྟཱ་དཱི་ནི་ཡེ་ཝ ཨུ་དྡི་ཊྛཱ་ནཱི་ཏི ཏཱ་ནེ་ཝ ནི་དྡི་སི་ཏ་བྦཱ་ནི, ཨཱ་ར་མྨ་ཎཾ པ་ན ཨ་པྤ་ཀ་ཏཾ, ཏཾ ཀ་སྨཱ ཨི་དྷ ཝུ་ཙྩ་ཏཱི་ཏི ཙོ་ད་ནཾ མ་ན་སི ཀ་རི་ཏྭཱ ཨཱ་ཧ ‘‘ཏེ་ན ཝི་ནཱ ན་ཏྠི ཧི ས་མྦྷ་ཝོ’’ཏི. ཡ་སྨཱ ཨཱ་ར་མྨ་ཎེ་ན ཝི་ནཱ ཙི་ཏྟ་ས་མྦྷ་ཝོ ན་ཏྠི, ན ཧི ཨ་ནཱ་ར་མྨ་ཎཾ ཙི་ཏྟཾ ནཱ་མ ཨ་ཏྠི, ཏ་སྨཱ ‘‘ཏ་ཡི་དཾ ཙི་ཏྟཾ ཀཾ ཨཱ་ར་བྦྷ ཨུ་པྤ་ཛྫ་ཏཱི’’ཏི ཨཱ་ས་ངྐཱ་ནི་ཝཱ་ར་ཎ་ཏྠཾ ཨི་ཏོ པ་རཾ ཨཱ་ར་མྨ་ཎཾ ད་སྶ་ཡི་སྶཱ་མཱི་ཏི ཨ་ཏྠོ. ཀ་ཏི་ཝི་དྷཾ པ་ན ཏཾ ཨཱ་ར་མྨ་ཎཾ, ཀིཾ ས་རཱུ་པ་ཉྩཱ་ཏི ཨཱ་ཧ ‘‘རཱུ་པཾ ས་དྡ’’ནྟི་ཨཱ་དི. ཝ་ཙ་ན་ཏྠཾ པ་ན ནེ་སཾ ས་ཡ་མེ་ཝ ཝ་ཀྑ་ཏི. ཚ་ལཱ༹་ར་མྨ་ཎ་ཀོ་ཝི་དཱཏི ཚ་ནྣཾ ཨཱ་ར་མྨ་ཎཱ་ནཾ བྱཱ་ཀ་ར་ཎ་ཀུ་ས་ལཱ བུ་དྡྷཱ་ད་ཡོ.
བྷཱུ་ཏེཏི ཙ་ཏྟཱ་རོ མ་ཧཱ་བྷཱུ་ཏེ. ཨུ་པཱ་དཱ་ཡཱཏི ནི་སྶཱ་ཡ. ཙ་ཏུ་ས་མུ་ཊྛི་ཏོཏི ཀ་མྨཱ་དཱི་ཧི ཙ་ཏཱུ་ཧི པ་ཙྩ་ཡེ་ཧི ས་མུ་ཊྛི་ཏོ. ནི་ད་སྶི་ཏ་བྦཾ ནི་ད་སྶ་ནཾ. ཀིཾ ཏཾ? ད་ཊྛ་བྦ་བྷཱ་ཝོ ཙ་ཀྑུ་ཝི་ཉྙཱ་ཎ་སྶ གོ་ཙ་ར་བྷཱ་ཝོ, ས་ཧ ནི་ད་སྶ་ནེ་ནཱ་ཏི ས་ནི་ད་སྶ་ནོ. པ་ཊི་ཧ་ཉྙ་ཏི, པ་ཊི་ཧ་ན་ན་ནྟི ཝཱ པ་ཊི་གྷོ, ཡེ་ན བྱཱ་པཱ་རཱ་དི་ཝི་ཀཱ་ར་པ་ཙྩ་ཡ་ནྟ་ར་ས་ཧི་ཏེ་སུ ཙ་ཀྑཱ་དཱི་ནཾ ནི་སྶ་ཡེ་སུ ཝི་ཀཱ་རུ་པྤ་ཏྟི, སོ ས་ཡཾ ནི་སྶ་ཡ་ཝ་སེ་ན ཙ ས་མྤ་ཏྟཱ་ནཾ, ཨ་ས་མྤ་ཏྟཱ་ན་ཉྩ པ་ཊི་མུ་ཁ་བྷཱ་ཝོ ཨ་ཉྙ་མ་ཉྙ་པ་ཏ་ནཾ པ་ཊི་གྷོ་ཏི ཨ་ཏྠོ. ཏ་ཏྠ ས་ཡཾ ས་མྤ་ཏྟིཾ ཕོ་ཊྛ་བྦ་སྶ ནི་སྶ་ཡ་ཝ་སེ་ན ས་མྤ་ཏྟི ག་ནྡྷ་ར་ས་གྷཱ་ན་ཛི་ཝ྄ཧཱ་ཀཱ་ཡཱ་ནཾ. ཨི་ཏ་རེ་སཾ ཨུ་བྷ་ཡ་ཐཱ་པི ཨ་ས་མྤ་ཏྟི, ཏ་སྨཱ ཨི་དྷ ཨ་ས་མྤ་ཏྟཱ་ནཾ པ་ཊི་མུ་ཁ་བྷཱ་ཝོ ‘‘པ་ཊི་གྷོ’’ཏི ཝུ་ཙྩ་ཏི. ས་ཧ པ་ཊི་གྷེ་ནཱ་ཏི ས་པྤ་ཊི་གྷོ, ས་ནི་ད་སྶ་ནོ ཙ སོ ས་པྤ་ཊི་གྷོ ཙཱ་ཏི ས་ནི་ད་སྶ་ན་ས་པྤ་ཊི་གྷོ. ཨེ་ཏྠཱ་ཧ – ཡ་སྶ ད་ཊྛ་བྦ་བྷཱ་ཝོ ཨ་ཏྠི, སོ ས་ནི་ད་སྶ་ནོ, ཙ་ཀྑུ་ཝི་ཉྙཱ་ཎ་གོ་ཙ་ར་བྷཱ་ཝོ་ཝ ད་ཊྛ་བྦ་བྷཱ་ཝོ. ཏ་སྶ ཙ རཱུ་པཱ་ཡ་ཏ་ན་ཏོ ཨ་ན་ཉྙ་ཏྟཱ ཀ་ཐཾ ས་ཧ ནི་ད་སྶ་ནེ་ན ས་ནི་ད་སྶ་ནོ་ཏི ཡུ་ཛྫ་ཏཱི་ཏི? ཝུ་ཙྩ་ཏེ – ཨ་ན་ཉྙ་ཏྟེ་པི ཏ་སྶ ཨ་ཉྙེ་ཧི དྷ་མྨེ་ཧི རཱུ་པཱ་ཡ་ཏ་ནཾ ཝི་སེ་སེ་ཏུཾ ཨ་ཉྙཾ ཝི་ཡ ཀ་ཏྭཱ ཝུ་ཏྟཾ ‘‘ས་ཧ ནི་ད་སྶ་ནེ་ན ས་ནི་ད་སྶ་ན’’ནྟི. དྷ་མྨ་ས་བྷཱ་ཝ་སཱ་མ་ཉྙེ་ན ཧི ཨེ་ཀཱི་བྷཱུ་ཏེ་སུ དྷ་མྨེ་སུ ཡོ ནཱ་ན་ཏྟ་ཀ་རོ ཝི་སེ་སོ, སོ ཨ་ཉྙཾ ཝི་ཡ ཀ་ཏྭཱ ཨུ་པ་ཙཱ་རི་ཏུཾ ཡུ་ཏྟོ. ཨེ་ཝ་ཉྷི ཨ་ཏྠ་ཝི་སེ་སཱ་ཝ་བོ་དྷོ ཧོ་ཏི. རཱུ་པཱ་ར་མྨ་ཎ་ས་ཉྙི་ཏོཏི ཨ་ཡཾ ཨེ་ཝ་རཱུ་པོ ཝ་ཎྞོ རཱུ་པཱ་ར་མྨ་ཎ་ནྟི ས་ཉྙི་ཏོ. ཨི་དཾ ཝུ་ཏྟཾ ཧོ་ཏི – ཙ་ཏྟཱ་རོ མ་ཧཱ་བྷཱུ་ཏེ ཨུ་པཱ་དཱ་ཡ ཏེ ཨ་མུ་ཉྩི་ཏྭཱ པ་ཝ་ཏྟ་མཱ་ནོ ཀ་མྨ་ས་མུ་ཊྛཱ་ནོ ཙི་ཏྟ་ས་མུ་ཊྛཱ་ནོ ཨུ་ཏུ་ས་མུ་ཊྛཱ་ནོ ཨཱ་ཧཱ་ར་ས་མུ་ཊྛཱ་ནོ ཙ ནཱི་ལཱ་དི་ཝ་སེ་ན དི་སྶ་མཱ་ནོ ཨི་ནྡྲི་ཡེ་ཧི གྷ་ཊྚེ་ནྟོ ཙ ཝ་ཎྞོ རཱུ་པཱ་ར་མྨ་ཎཾ ནཱ་མཱ་ཏི.
༢༩༤-༧. ཙི་ཏྟ་ཉྩ ཨུ་ཏུ ཙ ཙི་ཏྟོ་ཏུ, ཏེ་ཧི ས་མྦྷ་ཝ་ཏི, ཏེ ཝཱ ས་མྦྷ་ཝཱ པ་ཙྩ་ཡཱ ཨི་མ་སྶཱ་ཏི ཙི་ཏྟོ་ཏུ་ས་མྦྷ་ཝོ. ས་ཧ ཝི་ཉྙ་ཏྟི་ས་མུ་ཊྛཱ་པ་ཀ་ཝི་ཉྙཱ་ཎེ་ན པ་ཝ་ཏྟོ ས་དྡོ ས་ཝི་ཉྙཱ་ཎ་ཀ་ས་དྡོ, ས་ཝི་ཉྙཱ་ཎ་ཀ་ས་དྡོ པ་ན ན ཀེ་ཝ་ལཾ ས་ཝི་ཉྙཱ་ཎ་ཀ་ས་ནྟཱ་ན་པྤ་ཝ་ཏྟོ་ཝ ཀུ་ཙྪི་ས་དྡཱ་དི་ཝ་སེ་ན ཏ་སྶ ཨུ་ཏུ་ས་མུ་ཊྛི་ཏ་སྶཱ་པི ས་མྦྷ་ཝ་ཏོ.
དྷ་རཱི་ཡ་ཏཱིཏི ཀ་ལཱ་པ་པ་ར་མྤ་རཱ་ཡ ས་ནྡྷཱ་རཱི་ཡ་ཏི. སཱུ་ཙ་ན་ཏོཏི ཨ་ཏྟ་ནོ ཝ་ཏྠུ་སྶ སུ་པཱ་ཀ་ཊ་ཀ་ར་ཎ་ཏོ. ག་ནྡྷོ ཧི ‘‘ཨི་དཾ སུ་ག་ནྡྷཾ, ཨི་དཾ དུ་གྒ་ནྡྷ’’ནྟི པ་ཀཱ་སེ་ཏི, པ་ཊི་ཙྪ་ནྣ་པུ་པྥ་ཕ་ལཱ་དཱི་ནི ‘‘ཨི་ད་མེ་ཏྠ ཨ་ཏྠཱི’’ཏི པེ་སུ་ཉྙཾ ཀ་རོ་ནྟཾ ཝི་ཡ ཧོ་ཏཱི་ཏི.
ར་ས་མཱ་ནཱཏི ཨ་སྶཱ་ད་ཝ་སེ་ན ཏུ་སྶ་མཱ་ནཱ. ར་ས་ནྟཱིཏི ཨ་ས་ནྟི, ཨ་ནུ་བྷ་ཝ་ནྟཱི་ཏི ཨ་ཏྠོ. ཨེ་ཏྠ ར-ཀཱ་རོ པ་ད་ས་ནྡྷི་ཀ་རོ. ཨེ་ཝ་ཉྷི ‘‘ར་ས་མཱ་ནཱ ནཾ ཨ་ས་ནྟཱི་ཏི ར་སོ’’ཏི ནི་རུ་ཏྟི་ན་ཡོ སུ་ནྡ་རོ ཧོ་ཏི. ཨི་ཏ་ར་ཐཱ ‘‘ར་ས་ནྟི ཨ་སྶཱ་དེ་ནྟཱི’’ཏི ཝུ་ཙྩ་མཱ་ནེ ‘‘ར་ས་མཱ་ནཱ’’ཏི ཨི་དཾ ནི་ར་ཏྠ་ཀ་མེ་ཝ སི་ཡཱ. ཨ་ཐ ཝཱ ‘‘ར་ས་མཱ་ནཱ’’ཏི ཨི་ཏོ ར-ཀཱ་རཾ, ‘‘ར་ས་ནྟཱི’’ཏི ཨི་ཏོ ས-ཀཱ་ར་ཉྩ ག་ཧེ་ཏྭཱ ‘‘ར་སོ’’ཏི ནི་རུ་ཏྟི་ན་ཡོ ད་ཊྛ་བྦོ.
༢༩༨. ཕུ་སཱི་ཡ་ཏཱིཏི གྷ་ཊྚཱི་ཡ་ཏི. ཀིཾ ཏཾ ཕོ་ཊྛ་བྦཾ ནཱ་མཱ་ཏི ཨཱ་ཧ ‘‘པ་ཐ་ཝཱི་ཏེ་ཛ་ཝཱ་ཡ་ཝོ’’ཏི. ཨི་མི་ནཱ དྷཱ་ཏུ་ཏྟ་ཡ་མེ་ཝ ཀཱ་ཡ་ཝི་ཉྙཱ་ཎ་ཝི་ཉྙེ་ཡྻ་བྷཱ་ཝ་ས་ངྑཱ་ཏ་ཕོ་ཊྛ་བྦཾ ནཱ་མ, ན ཨ་ཉྙ་ནྟི ད་སྶེ་ཏི. ཀ་སྨཱ པ་ནེ་ཏྠ ཨཱ་པོ་དྷཱ་ཏུ ན ག་ཧི་ཏཱ, ན་ནུ སཱི་ཏ་ཏཱ ཕུ་སི་ཏྭཱ ག་ཡ྄ཧ་ཏི, སཱ ཙ ཨཱ་པོ་དྷཱ་ཏུ ཨེ་ཝཱ་ཏི? ས་ཙྩཾ ག་ཡ྄ཧ་ཏི, ན པ་ན ཨཱ་པོ་དྷཱ་ཏུ, ཀི་ཉྩ་ར་ཧི ཏེ་ཛོ་དྷཱ་ཏུ ཨེ་ཝ. མ་ནྡེ ཧི ཨུ་ཎྷ་བྷཱ་ཝེ སཱི་ཏ་ཝུ་དྡྷི, ན སཱི་ཏ་ཏཱ ནཱ་མ ཀོ་ཙི གུ་ཎོ ཨ་ཏྠི. ཀེ་ཝ་ལཾ པ་ན ཨུ་ཎྷ་བྷཱ་ཝ་སྶ མ་ནྡ་ཏཱ་ཡ སཱི་ཏ་ཏཱ་བྷི་མཱ་ནོ. ཀ་ཐཾ པ་ནེ་ཏཾ ཝི་ཉྙཱ་ཏ་བྦ་ནྟི ཙེ? སཱི་ཏ་ཝུ་དྡྷི་ཡཱ ཨ་ན་ཝ་ཊྛི་ཏ་བྷཱ་ཝ་ཏོ པཱ་རཱ་པཱ་རེ ཝི་ཡ. ཏ་ཐཱ ཧི གྷ་མྨ་ཀཱ་ལེ ཨཱ་ཏ་པེ ཋ་ཏྭཱ ཚཱ་ཡཾ པ་ཝི་ཊྛཱ་ནཾ སཱི་ཏ་ཝུ་དྡྷི ཧོ་ཏི, ཏ་ཏྠེ་ཝ པ་ཐ་ཝཱི་ག་བྦྷ་ཏོ ཨུ་ཊྛི་ཏཱ་ནཾ ཨུ་ཎྷ་ཝུ་དྡྷི ཙ. ཀི་ཉྩ་ར་ཧི ཧི་མ་པཱ་ཏ་ས་མ་ཡཱ་དཱི་སུ སཱི་ཏ་སྶ པ་རི་པཱ་ཙ་ཀ་ཏྟ་ད་སྶ་ན་ཏོ ཙ ཏེ་ཛོ་དྷཱ་ཏུ ཨེ་ཝ སཱི་ཏ་ཏཱ་ཏི ད་ཊྛ་བྦཾ. ཡ་དི ཙ སཱི་ཏ་ཏཱ ཨཱ་པོ་དྷཱ་ཏུ སི་ཡཱ, ཨེ་ཀ་སྨིཾ ཀ་ལཱ་པེ ཨུ་ཎྷ་བྷཱ་ཝེ་ན ས་དྡྷིཾ ཨུ་པ་ལ་བྦྷེ་ཡྻ དྭི་ནྣཾ དྷཱ་ཏཱུ་ནཾ ཨ་ཝི་ནི་བྦྷོ་ག་པྤ་ཝ་ཏྟི་ཏོ, ན ཙ པ་ནེ་ཝཾ ཨུ་པ་ལ་བྦྷ་ཏི, ཏ་སྨཱ ཉཱ་ཡ་ཏི ‘‘ན ཨཱ་པོ་དྷཱ་ཏུ སཱི་ཏ་ཏཱ’’ཏི. ཨི་དཾ ཙ་ཏུ་མ་ཧཱ་བྷཱུ་ཏཱ་ནཾ ཨ་ཝི་ནི་བྦྷོ་ག་ཝུ་ཏྟི་ཏཾ ཨི་ཙྪ་ནྟཱ་ནཾ ཨུ་ཏྟ་རཾ, ཨ་ནི་ཙྪ་ནྟཱ་ན་མྤི པ་ན ཙ་ཏུ་ནྣཾ མ་ཧཱ་བྷཱུ་ཏཱ་ནཾ ཨེ་ཀ་སྨིཾ ཀ་ལཱ་པེ ཀི་ཙྩ་ད་སྶ་ནེ་ན ས་བྷཱ་ག་ཝུ་ཏྟི་ཏཱ་ཡ སཱ་དྷི་ཏཱ་ཡ ཨི་ད་མེ་ཝ ཨུ་ཏྟ་རཾ. ཀེ་ཙི པ་ན ‘‘ཝཱ་ཡོ་དྷཱ་ཏུ སཱི་ཏ་ཏཱ’’ཏི ཝ་ད་ནྟི, ཏེ་ས་མྤི ཨི་ད་མེ་ཝ ཨུ་ཏྟ་རཾ. ཡ་དི ཝཱ་ཡོ་དྷཱ་ཏུ སཱི་ཏ་ཏཱ སི་ཡཱ, ཨེ་ཀ་སྨིཾ ཀ་ལཱ་པེ ཨུ་ཎྷ་བྷཱ་ཝེ་ན ས་དྡྷིཾ ཨུ་པ་ལ་བྦྷེ་ཡྻ, ན ཙ པ་ནེ་ཝཾ ཨུ་པ་ལ་བྦྷ་ཏི, ཏ་སྨཱ ཝི་ཉྙཱ་ཡ་ཏི ‘‘ན ཝཱ་ཡོ་དྷཱ་ཏུ སཱི་ཏ་ཏཱ’’ཏི. ཡེ པ་ན ཝ་ད་ནྟི ‘‘དྲ་ཝ་ཏཱ ཨཱ་པོ་དྷཱ་ཏུ, སཱ ཙ ཕུ་སི་ཏྭཱ ག་ཡ྄ཧ་ཏཱི’’ཏི, ཏེ ཝ་ཏྟ་བྦཱ ‘‘དྲ་ཝ་བྷཱ་ཝོ་པི ནཱ་མ ཕུ་སཱི་ཡ་ཏཱི་ཏི ཨི་དཾ ཨཱ་ཡ་སྨ་ནྟཱ་ནཾ ཨ་དྷི་མཱ་ན་མ་ཏྟཾ ས་ཎྛཱ་ནེ ཝི་ཡཱ’’ཏི. ཝུ་ཏྟ་ཉྷེ་ཏཾ པོ་རཱ་ཎེ་ཧི –
‘‘དྲ་ཝ་བྷཱ་ས་ཧ་ཝུ་ཏྟཱི་ནི, ཏཱི་ཎི བྷཱུ་ཏཱ་ནི ས་མྥུ་སཾ;
དྲ་ཝ་ཏཾ ས་མྥུ་སཱ་མཱི་ཏི, ལོ་ཀོ་ཡ་མ་བྷི་མ་ཉྙ་ཏི.
‘‘བྷཱུ་ཏེ ཕུ་སི་ཏྭཱ ས་ཎྛཱ་ནཾ, མ་ན་སཱ ག་ཡ྄ཧ་ཏེ ཡ་ཐཱ;
པ་ཙྩ་ཀྑ་ཏོ ཕུ་སཱ་མཱི་ཏི, ཉཱ་ཏ་བྦཱ དྲ་ཝ་ཏཱ ཏ་ཐཱ’’ཏི.
༢༩༩. ས་བྦཾ ནཱ་མནྟི ས་བྦཾ ཙི་ཏྟ་ཙེ་ཏ་སི་ཀ་ནི་བྦཱ་ན་ས་མྨ་ཏཾ ནཱ་མཾ. ཙི་ཏྟ་ཙེ་ཏ་སི་ཀ་ཉྷི ཨཱ་ར་མྨ་ཎཾ པ་ཏི ན་མ་ན་ཏོ ནཱ་མཾ. ནི་བྦཱ་ནཾ པ་ན ཙི་ཏྟ་ཙེ་ཏ་སི་ཀ་སྶ ཨ་ཏྟཱ་ནཾ པ་ཏི ནཱ་མ་ན་ཏོ ནཱ་མཾ. རཱུ་པནྟི ནི་པྥ་ནྣ་རཱུ་པཾ. ཀིཾ ཨ་ཝི་སེ་སེ་ནཱ་ཏི ཙེ, ནོ་ཏི ཨཱ་ཧ ‘‘ཧི་ཏྭཱ རཱུ་པཱ་དི་པ་ཉྩ་ཀ’’ནྟི. ལ་ཀྑ་ཎཱ་ནཱིཏི ཨ་ནི་ཙྩཱ་དི་ལ་ཀྑ་ཎཱ་ནི. པ་ཉྙ་ཏྟཱིཏི ནཱ་མུ་པཱ་དཱ་ཡ་ཝ་སེ་ན དུ་ཝི་དྷཱ པ་ཉྙ་ཏྟི.
༣༠༠. ཨི་མཱ་ནི པ་ན ཚ་བྦི་དྷཱ་ནི ཨཱ་ར་མྨ་ཎཱ་ནི ས་བྦཱ་ནི ས་བྦ་ཏྠ ལ་བྦྷ་ནྟི, ཨུ་དཱ་ཧུ ཀ་ཏྠ་ཙི ཀཱ་ནི་ཙཱི་ཏི ཨཱ་ཧ ‘‘ཚ་ལཱ༹་ར་མྨ་ཎཱ་ནཱི’’ཏི་ཨཱ་དི. ཏཱི་ཎི རཱུ་པེཏི རཱུ་པཱ་ཝ་ཙ་ར་བྷཱུ་མི་ཡཾ རཱུ་པ་ས་དྡ་དྷ་མྨ་ཝ་སེ་ན ཏཱི་ཎི ཨཱ་ར་མྨ་ཎཱ་ནི ལ་བྦྷ་ནྟི. གྷཱ་ནཱ་དི་ཏྟ་ཡ་སྶ པ་ན ཏ་ཏྠ ཨ་བྷཱ་ཝ་ཏོ ག་ནྡྷཱ་ར་མྨ་ཎཱ་དཱི་ནི དྷ་མྨཱ་ར་མྨ་ཎ་ཏོ ཝི་སུཾ ན ལ་བྦྷ་ནྟི. ཨ་རཱུ་པ་བྷ་ཝེ པ་ན ས་བྦ་སོ རཱུ་པཱ་ནཾ ཨ་བྷཱ་ཝ་ཏོ ཨེ་ཀཾ དྷ་མྨཱ་ར་མྨ་ཎ་མེ་ཝ ལ་བྦྷ་ཏི, ན ཨ་ཉྙ་ནྟི ཨཱ་ཧ ‘‘ཨ་རཱུ་པེ དྷ་མྨཱ་ར་མྨ་ཎ་མེ་ཀ་ཀ’’ནྟི. ན་ནུ ཙ ཨ་རཱུ་པ་བྷ་ཝ་ཏོ ཙ་ཝི་ཏྭཱ ཀཱ་མ་བྷ་ཝེ ནི་བྦ་ཏྟ་ནྟཱ་ནཾ ཨ་རཱུ་པ་བྷ་ཝེ་ཡེ་ཝ ག་ཏི་ནི་མི་ཏྟ་ཝ་སེ་ན རཱུ་པཱ་ར་མྨ་ཎཾ ཨུ་པ་ཊྛཱ་ཏཱི་ཏི? ས་ཙྩཾ ཨུ་པ་ཊྛཱ་ཏི, ཏཾ པ་ན ཀཱ་མ་བྷ་ཝེ་ཡེ་ཝ ཨཱ་ར་མྨ་ཎཾ. ཨུ་པ་པ་ཛྫི་ཏ་བྦ་བྷ་ཝ་སྨི་ཉྷི ཝ་ཎྞོ ག་ཏི་ནི་མི་ཏྟ་ཝ་སེ་ན ཨུ་པ་ཊྛཱ་ཏི.
༣༠༡-༢. ཨེ་ཝཾ ཚ ཨཱ་ར་མྨ་ཎཱ་ནི ས་རཱུ་པ་ཏོ, པ་ཝ་ཏྟི་པྤ་བྷེ་ད་ཏོ ཙ ད་སྶེ་ཏྭཱ ཨི་དཱ་ནི ཏེ་སུ ཨ་བྷ་ཡ་གི་རི་ཝཱ་སཱི་ནཾ ཀི་ཉྩི ཝི་པྤ་ཊི་པ་ཏྟིཾ ད་སྶེ་ཏྭཱ ཏཾ པ་ཊི་ཀྑི་པི་ཏུཾ ‘‘ཁ་ཎ་ཝ་ཏྠུ་པ་རི་ཏྟ་ཏྟཱ’’ཏི་ཨཱ་དི ཝུ་ཏྟཾ. ཏ་ཏྠ ཁ་ཎ་ཝ་ཏྠུ་པ་རི་ཏྟ་ཏྟཱཏི ཁ་ཎ་སྶ ཙེ་ཝ ཝ་ཏྠུ་ནོ ཙ པ་རི་ཏྟ་ཏྟཱ. ཡེ རཱུ་པཱ་ད་ཡོ་ཏི ས་མྦ་ནྡྷོ. ཡེ་སནྟི ཡེ་སཾ ཨཱ་ཙ་རི་ཡཱ་ནཾ ལ་དྡྷི. ཡེ་སནྟི ཝཱ དྷ་མྨཱ་ར་མྨ་ཎེ་ན ས་ཧ ས་མྦ་ནྡྷཱི་བྷཱ་ཝ་ཏོ, ཝུ་ཏྟཾ ཝ་ཝ་ཏྠཱ་པ་ཀ་ཏྟཱ ཙ. ཏེ ཧི དྷ་མྨཱ་ར་མྨ་ཎཾ ཝ་ཝ་ཏྠཱ་པེ་ནྟོ ཨ་ཏྟ་ནཱ ས་ཧ ཏཾ ས་མྦ་ནྡྷེ་ནྟི, ཏ་སྨཱ དྷ་མྨཱ་ར་མྨ་ཎེ་ན ས་ཧ ས་མྦ་ནྡྷཱི་བྷཱ་ཝཱ་པེ་ཀྑཱ་ཡ ‘‘ཡེ་ས’’ནྟི སཱ་མི་ཝ་ཙ་ན་ནྟི. ཨི་མི་ནཱ པ་ན ཨི་དཾ ཝུ་ཏྟཾ ཧོ་ཏི – ཡེ རཱུ་པཱ་ད་ཡོ པ་ཉྩ ཨཱ་ར་མྨ་ཎཱ ས་ནྟ་ཏྟ་ཨ་ཡོ་གུ་ལེ༹ པ་ཏི་ཏ་ཛ་ལ་བི་ནྡུ ཝི་ཡ པ་རི་ཏྟ་ཀྑ་ཎི་ཀཱ, དི་བྦ་ཙ་ཀྑུ་ནཱ ཨ་ས་ཀྐུ་ཎེ་ཡྻ་གྒ་ཧ་ཎཱ པ་ར་མཱ་ཎུ ཝི་ཡ པ་རི་ཏྟ་ཝ་ཏྠུ་ཀཱ, ཏ་ཏོ ཙ ས་ཀ་ས་ཀ་ཝི་ཉྙཱ་ཎཱ་ནཾ ཨཱ་པཱ་ཐཾ ན ག་ཙྪ་ནྟི, ཀེ་ཝ་ལཾ པ་ན མ་ནོ་ཝི་ཉྙཱ་ཎ་སྶེ་ཝ གོ་ཙ་རཱ, ཏེ དྷ་མྨཱ་ར་མྨ་ཎཾ ནཱ་མཱ་ཏི ཡེ་སཾ ལ་དྡྷི, ཏེ ཡེ་སཾ ཝཱ དྷ་མྨཱ་ར་མྨ་ཎཾ ནཱ་མཱ་ཏི. ཨེ་ཏེ་ནེ་ཝ ཙ ཨ་ཏཱི་ཏཱ་ནཱ་ག་ཏ་བྷཱ་ཝེ་ན ཨ་ཏི་དཱུ་ར་ཨ་ཙྩཱ་ས་ནྣ་བྷཱ་ཝེ་ན, ཀུ་ཊྚཱ་དི་ཨ་ནྟ་རི་ཏཱ་བྷཱ་ཝེ་ན ཙ ཨཱ་པཱ་ཐཾ ཨ་ནཱ་ག་ཙྪ་ནྟཱ་ན་མྤི རཱུ་པཱ་དཱི་ནཾ ས་ངྒ་ཧོ ཀ་ཏོ ཧོ་ཏཱི་ཏི. ཨེ་ཝཾ་ལ་དྡྷི་ཀཱ པ་ན ཏེ –
‘‘ཨི་མེ་སཾ ཁོ, ཨཱ་ཝུ་སོ, པ་ཉྩ་ནྣཾ ཨི་ནྡྲི་ཡཱ་ནཾ ནཱ་ནཱ་ཝི་ས་ཡཱ་ནཾ ནཱ་ནཱ་གོ་ཙ་རཱ་ནཾ ན ཨ་ཉྙ་མ་ཉྙ་སྶ གོ་ཙ་ར་ཝི་ས་ཡཾ པ་ཙྩ་ནུ་བྷོ་ནྟཱ་ནཾ མ་ནོ པ་ཊི་སྶ་ར་ཎཾ, མ་ནོ ཙ ནེ་སཾ གོ་ཙ་ར་ཝི་ས་ཡཾ པ་ཙྩ་ནུ་བྷོ་ཏཱི’’ཏི (མ. ནི. ༡.༤༥༥) –
ཨི་དཾ སུ་ཏྟཾ ཨཱ་ཧ་རི་ཏྭཱ པ་ཊི་ཀྑི་པི་ཏ་བྦཱ་ཏི ད་སྶེ་ནྟོ ཨཱ་ཧ ‘‘ཏེ པ་ཊི་ཀྑི་པི་ཏ་བྦཱ་ཝཱ’’ཏི་ཨཱ་དི. ཏ་ཏྠ པ་ཊི་ཀྑི་པི་ཏ་བྦཱ་ཝཱཏི ན ཨ་ནུ་ཝ་ཏྟི་ཏ་བྦཱ. ཨ་ཉྙ་མ་ཉྙ…པེ… བྷོ་ནྟཱ་ནནྟི ཙ་ཀྑུ་ནྡྲི་ཡཾ སོ་ཏི་ནྡྲི་ཡ་སྶ གོ་ཙ་རཾ ན པ་ཙྩ་ནུ་བྷོ་ཏི, ཏ་ཐཱ ‘‘སོ་ཏི་ནྡྲི་ཡཾ ཙ་ཀྑུ་ནྡྲི་ཡ་སྶཱ’’ཏི་ཨཱ་དི་ནཱ ཨ་ཉྙ་མ་ཉྙ་སྶ ཨཱ་ར་མྨ་ཎཾ ནེ་ཝ པ་ཙྩ་ནུ་བྷོ་ནྟཱ་ནཾ ནཱ་ནུ་བྷ་ཝ་ནྟཱ་ནཾ ན ག་ཎྷ་ནྟཱ་ནཾ. ཏེ་སནྟི ཏེ་སཾ པ་ཉྩ་ནྣཾ ཨི་ནྡྲི་ཡཱ་ནཾ.
༣༠༣. ཏ་ཉྩ གོ་ཙ་རཾ མ་ནོ པ་ཙྩ་ནུ་བྷོ་ཏཱི་ཏི ས་མྦ་ནྡྷོ. ཏཾ རཱུ་པཱ་དི་པ་ཉྩ་ཝི་དྷཾ ཨཱ་ར་མྨ་ཎཾ ཙ-ས་དྡེ་ན དྷ་མྨཱ་ར་མྨ་ཎ་ཉྩ མ་ནོ པ་ཙྩ་ནུ་བྷོ་ཏི, ཙི་ཏྟཾ ཨཱ་ར་མྨ་ཎཾ ཀ་རོ་ཏཱི་ཏི ཨ་ཏྠོ. ཨ་ཡཾ པ་ནེ་ཏྠ ཨ་དྷི་པྤཱ་ཡོ – ཡ་དི ཙ་ཀྑཱ་དཱི་ན་མཱ་པཱ་ཐ་ག་ཏཱ་ནི ཝི་ནཱ ཨ་ཝ་སེ་སཱ དྷ་མྨཱ་ར་མྨ་ཎཱ ཧོ་ནྟི, ཏ་དཱ ཏཾ་ཝི་ས་ཡཾ ཙི་ཏྟཾ པ་ཉྩི་ནྡྲི་ཡཱ་ནཾ ཝི་ས་ཡཾ པ་ཙྩ་ནུ་བྷོ་ནྟཾ ནཱ་མ ན ཧོ་ཏི, ཨ་ཏྟ་ནོ་ཡེ་ཝ པ་ན ཝི་ས་ཡཾ པ་ཙྩ་ནུ་བྷོ་ནྟཾ ནཱ་མ ཧོ་ཏི. ཨེ་ཝ་ཉྩ ས་ཏི མ་ནོ་ཝ ཏེ་སཾ གོ་ཙ་ར་ཝི་ས་ཡཾ པ་ཙྩ་ནུ་བྷོ་ཏཱི་ཏི དུ་པྤ་རི་ཧཱ་རི་ཡཾ བྷ་ཝེ་ཡྻ, ན ཙ ཏཾ སུ་ཏྟ་ཝ་ཙ་ནཾ ས་ཀྐཱ ཨ་ཏི་ཀྐ་མེ་ཏུཾ, ཏ་སྨཱ ཝུ་ཏྟ་ན་ཡེ་ན ཙ་ཀྑཱ་དཱི་ནཾ ཨ་ནཱ་པཱ་ཐ་ག་ཏཱ་པི མ་ནོ་གོ་ཙ་རཱ རཱུ་པཱ་ད་ཡོ རཱུ་པཱ་དི་ཨཱ་ར་མྨ་ཎཱ་ནེ་ཝ ཧོ་ནྟི, ན དྷ་མྨཱ་ར་མྨ་ཎཱ་ཏི. ཡ་དི རཱུ་པཱ་ར་མྨ་ཎཾ ཙི་ཏྟཾ ཨ་ཏྟ་ནོ ཝི་ས་ཡཾ ནཱ་ནུ་བྷོ་ཏི, པ་ར་ཝི་ས་ཡ་མེ་ཝ ཨ་ནུ་བྷོ་ཏི, ཀ་ཐཾ ད་སྶ་ནཱ་དི་ཀི་ཙྩཾ ན ཀ་རོ་ཏི? ཏཾ་ཏཾ་ཀི་ཙྩཱ་ནཾ ནི་སྶ་ཡ་བྷཱུ་ཏ་སྶ ཝ་ཏྠུ་ནོ ཨ་ནི་སྶི་ཏ་ཏྟཱ. ཀ་ཐ་ཉྩ་ར་ཧི པ་ཉྩི་ནྡྲི་ཡཱ་ནཾ ཝི་ས་ཡཾ པ་ཙྩ་ནུ་བྷོ་ཏི ནཱ་མ? ད་སྶ་ནཱ་དི་ཀི་ཙྩ་སྶ ཨ་ཀ་ར་ཎེ་པི ཙ་ཀྑུ་ཝི་ཉྙཱ་ཎཱ་དཱི་ཧི དི་ཊྛཱ་དི་ཨཱ་ཀཱ་ར་སྶེ་ཝ ག་ཧ་ཎ་ཏོ པ་ཉྩི་ནྡྲི་ཡཱ་ནཾ ཝི་ས་ཡཾ པ་ཙྩ་ནུ་བྷོ་ཏི ནཱ་མ. ཡ་དི ཧི ཙ་ཀྑུ་ཝི་ཉྙཱ་ཎཱ་དཱི་ཧི དི་ཊྛཱ་དི་ཨཱ་ཀཱ་རཾ ན ག་ཎྷཱ་ཏི, རཱུ་པཱ་དཱི་ནཾ ནཱི་ལ་ཏྟཱ་དི་ཝ་སེ་ན ཛཱ་ན་ནཾ མ་ནོ་ཝི་ཉྙཱ་ཎ་མེ་ཝ ཀ་རོ་ཏི, ན པ་ཉྩ་ཝི་ཉྙཱ་ཎཱ་ནཱི་ཏི ཏ་ཐཱ ཛཱ་ན་ན་མེ་ཝ ན ཧོ་ཏི. ཏ་སྶ པ་ན ཨ་ཏྠི་ཏཱ་ཡེ་ཝེ་ཏཾ ཝི་ཉྙཱ་ཏ་བྦཾ – ཨ་ནཱ་པཱ་ཐ་ག་ཏ་རཱུ་པཱ་དཱ་ར་མྨ་ཎཾ ཙི་ཏྟཾ ཨ་ཏྟ་ནོ ཝི་ས་ཡཾ ན པ་ཙྩ་ནུ་བྷོ་ཏི ནཱ་མ. ཨ་ཐ ཁོ པ་ཉྩི་ནྡྲི་ཡཱ་ནཾ ཝི་ས་ཡ་མེ་ཝ པ་ཙྩ་ནུ་བྷོ་ཏཱི་ཏི. ཨ་ཐ སི་ཡཱ, ན མ་ཡཾ ཙི་ཏྟ་སྶ པ་ཉྩི་ནྡྲི་ཡ་ཝི་ས་ཡཱ་ནུ་བྷ་ཝ་ནཾ པ་ཊི་ཀྑི་པཱ་མ, ཏ་སྶ པ་ན ཨ་ནུ་བྷ་ཝ་ནཾ ད་སྶ་ནཱ་དི་ཀི་ཙྩ་ཝི་ར་ཧེ་ན དྷ་མྨཱ་ར་མྨ་ཎ་ཝ་སེ་ནེ་ཝཱ་ཏི ཙེ? ཏ་མྤི ན, སུ་ཏྟེ ཏ་ཐཱ ཨཱ་ག་ཏ་ཊྛཱ་ན་སྶ ཨ་བྷཱ་ཝ་ཏོ. ཡ་དི ཧི ཙི་ཏྟཾ ད་སྶ་ནཱ་དི་ཀི་ཙྩ་ཝི་ར་ཧེ་ན པ་ཉྩི་ནྡྲི་ཡ་ཝི་ས་ཡཾ དྷ་མྨཱ་ར་མྨ་ཎ་ཝ་སེ་ནེ་ཝ པ་ཙྩ་ནུ་བྷོ་ཏི, པ་ཉྩི་ནྡྲི་ཡཱ་ནཾ ཝི་ས་ཡཾ པ་ཙྩ་ནུ་བྷ་ཝ་མཱ་ནཱ མ་ནོ་དྷཱ་ཏུ་མ་ནོ་ཝི་ཉྙཱ་ཎ་དྷཱ་ཏུ་པི དྷ་མྨཱ་ར་མྨ་ཎཱ་ཡེ་ཝ སི་ཡཱ, ཨེ་ཝ་ཉྩ ས་ཏི ‘‘དྷ་མྨཱ་ཡ་ཏ་ནཾ མ་ནོ་དྷཱ་ཏུ་ཡཱ ཙ མ་ནོ་ཝི་ཉྙཱ་ཎ་དྷཱ་ཏུ་ཡཱ ཙ ཏཾ་ས་མྤ་ཡུ་ཏྟ་ཀཱ་ན་ཉྩ དྷ་མྨཱ་ནཾ ཨཱ་ར་མྨ་ཎ་པ་ཙྩ་ཡེ་ན པ་ཙྩ་ཡོ’’ཏི པ་ཊྛཱ་ནེ ཝ་ཏྟ་བྦཾ སི་ཡཱ, ཏ་ཐཱ པ་ན ཨ་ཝ་ཏྭཱ –
‘‘རཱུ་པཱ་ཡ་ཏ་ནཾ ས་དྡཱ་ཡ་ཏ་ནཾ ག་ནྡྷཱ་ཡ་ཏ་ནཾ ར་སཱ་ཡ་ཏ་ནཾ ཕོ་ཊྛ་བྦཱ་ཡ་ཏ་ནཾ མ་ནོ་དྷཱ་ཏུ་ཡཱ ཏཾ་ས་མྤ་ཡུ་ཏྟ་ཀཱ་ན་ཉྩ དྷ་མྨཱ་ནཾ ཨཱ་ར་མྨ་ཎ་པ་ཙྩ་ཡེ་ན པ་ཙྩ་ཡོ’’ཏི (པ་ཊྛཱ. ༡.༡.༢),
‘‘རཱུ་པཱ་ཡ་ཏ་ནཾ…པེ… དྷ་མྨཱ་ཡ་ཏ་ནཾ མ་ནོ་ཝི་ཉྙཱ་ཎ་དྷཱ་ཏུ་ཡཱ ཏཾ་ས་མྤ་ཡུ་ཏྟ་ཀཱ་ན་ཉྩ དྷ་མྨཱ་ནཾ ཨཱ་ར་མྨ་ཎ་པ་ཙྩ་ཡེ་ན པ་ཙྩ་ཡོ’’ཏི ཙ (པ་ཊྛཱ. ༡.༡.༢) –
ཝུ་ཏྟ་ཏྟཱ པ་ཉྩི་ནྡྲི་ཡཱ་ནཾ ཝི་ས་ཡཾ པ་ཙྩ་ནུ་བྷོ་ནྟཱི མ་ནོ་དྷཱ་ཏུ་མ་ནོ་ཝི་ཉྙཱ་ཎ་དྷཱ་ཏུ ཏཾ་པ་ཉྩི་ནྡྲི་ཡཱ་ནཾ ཝི་ས་ཡ་ཝ་སེ་ན པ་ཙྩ་ནུ་བྷོ་ཏི, ན དྷ་མྨཱ་ཡ་ཏ་ན་ཝ་སེ་ནཱ་ཏི ནི་ཊྛ་མེ་ཏྠ ག་ནྟ་བྦཾ.
༣༠༤-༥. ཨེ་ཝཾ ཨེ་ཀེ་ནཱ་ཀཱ་རེ་ན པ་ཊི་ཀྑེ་པ་ཝི་དྷིཾ ད་སྶེ་ཏྭཱ པུ་ན ཨ་པ་རེ་ན་པི ཀཱ་ར་ཎེ་ན ད་སྶེ་ནྟོ ཨཱ་ཧ ‘‘དི་བྦ་ཙ་ཀྑཱ་དཱི’’ཏི་ཨཱ་དི. ཨཱ་དི-གྒ་ཧ་ཎེ་ན དི་བྦ་སོ་ཏ་ཉཱ་ཎ་གྒ་ཧ་ཎཾ. ཨི་ཏི་པི ན ཡུ་ཛྫ་ཏཱིཏི ན ཀེ་ཝ་ལཾ པུ་བྦེ ཝུ་ཏྟེ་ནེ་ཝ ཀཱ་ར་ཎེ་ན, ཨ་ཐ ཁོ ཨི་མི་ནཱ་པི ཀཱ་ར་ཎེ་ན ན ཡུ་ཛྫ་ཏཱི་ཏི ཝུ་ཏྟཾ ཧོ་ཏི. ཡ་དི་པི ཙ་ཀྑཱ་དཱི་ནཾ ཨ་ནཱ་པཱ་ཐ་ག་ཏ་རཱུ་པཱ་དཱི་ནི དྷ་མྨཱ་ར་མྨ་ཎཱ ནཱ་མ ཧོ་ནྟི, ཏ་དཱ དི་བྦ་ཙ་ཀྑཱ་དཱི་ནི རཱུ་པཱ་དི་ཨཱ་ར་མྨ་ཎཱ་ནི ན སི་ཡུཾ ཏེ་སཾ པ་སཱ་ད་ཝི་ས་ཡཱ་ནཾ རཱུ་པ་ས་དྡཱ་ནཾ པ་རི་གྒ་ཎྷ་ན་ཏོ, ཨེ་ཝ་ཉྩ ས་ཏི སུ་ཏྟེ་སུ དི་བྦ་ཙ་ཀྑུ་དི་བྦ་སོ་ཏཱ་ནཾ དྷ་མྨཱ་ར་མྨ་ཎ་ཏཱ་ཝ ཝ་ཏྟ་བྦཱ, ན རཱུ་པཱ་དི་ཨཱ་ར་མྨ་ཎ་ཏཱ, ཝུ་ཏྟཱ ཙ སཱ, ཏ་སྨཱ ཙ་ཀྑཱ་དཱི་ནཾ ཨ་ཝི་ས་ཡཱ རཱུ་པཱ་ད་ཡོ རཱུ་པཱ་དཱ་ར་མྨ་ཎཱ་ནེ་ཝ, ན དྷ་མྨཱ་ར་མྨ་ཎཱ་ཏི. ཏེ་ནེ་ཝ ཙ དྷ་མྨ་ས་ངྒ་ཧེཔི –
‘‘ཡ་སྨིཾ ས་མ་ཡེ ཀཱ་མཱ་ཝ་ཙ་རཾ ཀུ་ས་ལཾ ཙི་ཏྟཾ ཨུ་པྤ་ནྣཾ ཧོ་ཏི སོ་མ་ན་སྶ་ས་ཧ་ག་ཏཾ ཉཱ་ཎ་ས་མྤ་ཡུ་ཏྟཾ རཱུ་པཱ་ར་མྨ་ཎཾ ཝཱ ས་དྡཱ་ར་མྨ་ཎཾ ཝཱ ག་ནྡྷཱ་ར་མྨ་ཎཾ ཝཱ ར་སཱ་ར་མྨ་ཎཾ ཝཱ ཕོ་ཊྛ་བྦཱ་ར་མྨ་ཎཾ ཝཱ དྷ་མྨཱ་ར་མྨ་ཎཾ ཝཱ, ཡཾ ཡཾ ཝཱ པ་ནཱ་ར་བྦྷ, ཏ་སྨིཾ ས་མ་ཡེ ཕ་སྶོ ཧོ་ཏི…པེ… ཨ་ཝི་ཀྑེ་པོ ཧོ་ཏཱི’’ཏི (དྷ. ས. ༡) –
ཝུ་ཏྟཾ. ཀི་ཉྩ ཨ་ནཱ་པཱ་ཐ་ག་ཏཱ་ནཾ དྷ་མྨཱ་ར་མྨ་ཎ་ཏྟེ ས་བྦ་ཉྙུ་ཏ་ཉྙཱ་ཎཾ རཱུ་པཱ་དི་ཨཱ་ར་མྨ་ཎཾ ན ཧོ་ཏཱི་ཏི ཨཱ་པ་ཛྫ་ཏཱི་ཏི. ཨེ་ཝཾ ས་ཏཱིཏི ཡ་དི ཀ་དཱ་ཙི རཱུ་པཱ་དི་ཨཱ་ར་མྨ་ཎཾ ཧུ་ཏྭཱ ཀ་དཱ་ཙི དྷ་མྨཱ་ར་མྨ་ཎཾ ཧོ་ཏི, ཀ་དཱ་ཙི དྷ་མྨཱ་ར་མྨ་ཎཾ ཧུ་ཏྭཱ ཀ་དཱ་ཙི རཱུ་པཱ་དི་ཨཱ་ར་མྨ་ཎཾ ཧོ་ཏི, ཏ་དཱ ཏེ་སཾ རཱུ་པཱ་དི་ཨཱ་ར་མྨ་ཎཱ་ནཾ ནི་ཡ་མོ་པི ཀ་ཐཾ བྷ་ཝེ ‘‘ཨི་དཾ རཱུ་པཱ་དི་ཨཱ་ར་མྨ་ཎཾ, ཨི་དཾ དྷ་མྨཱ་ར་མྨ་ཎ’’ནྟི ནི་ཡ་མོ ན བྷ་ཝེ་ཡྻ, ཨཱ་ར་མྨ་ཎ་ས་ངྐ་རོ བྷ་ཝེ་ཡྻཱ་ཏི ཨ་ཏྠོ.
༣༠༦. ཨེ་ཝཾ ཚ་བྦི་དྷཾ ཨཱ་ར་མྨ་ཎཾ ད་སྶེ་ཏྭཱ ཨི་དཱ་ནི་སྶ ཨ་ན་ནྟ་ར་བྷེ་དཾ པ་རི་ཏྟཱ་ར་མྨ་ཎཱ་དི་ཏྟི་ཀ་ཝ་སེ་ན ད་སྶེ་ནྟོ ཨཱ་ཧ ‘‘ས་བྦཾ ཨཱ་ར་མྨ་ཎ’’ནྟི་ཨཱ་དི. ཚ་བྦི་དྷཾ པ་རི་ཏྟ་ཏྟི་ཀཱ་དི་ཀཾ ཏཾ ཨེ་ཏཾ ས་བྦཾ ཨཱ་ར་མྨ་ཎ་ནྟི ས་མྦ་ནྡྷོ. པ་རི་ཏྟ་ཏྟི་ཀཱ་དཱི་ནནྟི པ་རི་ཏྟཱ་ར་མྨ་ཎ་ཏྟི་ཀཱ་དཱི་ནཾ. པ་རི་ཏྟཱ་ར་མྨ་ཎ་ཏྟི་ཀོ ཧི ཨི་དྷ ‘‘པ་རི་ཏྟ་ཏྟི་ཀོ’’ཏི ཝུ་ཏྟོ མ་ཛ྄ཛྷ་པ་ད་ལོ་པ་ཝ་སེ་ན. ཨཱ་དི-གྒ་ཧ་ཎེ་ན མ་གྒཱ་ར་མྨ་ཎ་ཏྟི་ཀོ ཨ་ཏཱི་ཏཱ་ར་མྨ་ཎ་ཏྟི་ཀོ ཨ་ཛ྄ཛྷ་ཏྟཱ་ར་མྨ་ཎ་ཏྟི་ཀོ་ཏི ཨི་མེ་སཾ ཏི་ཎྞཾ ཏི་ཀཱ་ནཾ ས་ངྒ་ཧོ. ཏ་ཏྠ ‘‘པ་རི་ཏྟཱ་ར་མྨ་ཎཱ དྷ་མྨཱ, མ་ཧ་གྒ་ཏཱ་ར་མྨ་ཎཱ དྷ་མྨཱ, ཨ་པྤ་མཱ་ཎཱ་ར་མྨ་ཎཱ དྷ་མྨཱ’’ཏི ཨེ་ཝ་མཱ་ག་ཏོ པ་རི་ཏྟཱ་ར་མྨ་ཎ་ཏྟི་ཀོ. ཨཱ་དི་པ་ད་ཝ་སེ་ན ‘‘མ་གྒཱ་ར་མྨ་ཎཱ དྷ་མྨཱ, མ་གྒ་ཧེ་ཏུ་ཀཱ དྷ་མྨཱ, མ་གྒཱ་དྷི་པ་ཏི་ནོ དྷ་མྨཱ’’ཏི ཨེ་ཝ་མཱ་ག་ཏོ མ་གྒཱ་ར་མྨ་ཎ་ཏྟི་ཀོ. ‘‘ཨ་ཏཱི་ཏཱ་ར་མྨ་ཎཱ དྷ་མྨཱ, ཨ་ནཱ་ག་ཏཱ་ར་མྨ་ཎཱ དྷ་མྨཱ, པ་ཙྩུ་པྤ་ནྣཱ་ར་མྨ་ཎཱ དྷ་མྨཱ’’ཏི ཨེ་ཝ་མཱ་ག་ཏོ ཨ་ཏཱི་ཏཱ་ར་མྨ་ཎ་ཏྟི་ཀོ. ‘‘ཨ་ཛ྄ཛྷ་ཏྟཱ་ར་མྨ་ཎཱ དྷ་མྨཱ, བ་ཧི་དྡྷཱ་ར་མྨ་ཎཱ དྷ་མྨཱ, ཨ་ཛ྄ཛྷ་ཏྟ་བ་ཧི་དྡྷཱ་ར་མྨ་ཎཱ དྷ་མྨཱ’’ཏི ཨེ་ཝ་མཱ་ག་ཏོ ཨ་ཛ྄ཛྷ་ཏྟཱ་ར་མྨ་ཎ་ཏྟི་ཀོ་ཏི ཝེ་དི་ཏ་བྦཾ.
༣༠༧-༩. ཀྲི་ཡཱ་ཧེ་ཏུ་དྭ་ཡནྟི ཨ་ཧེ་ཏུ་ཀ་ཀི་རི་ཡ་དྭ་ཡཾ ཧ་སི་ཏུ་པྤཱ་ད་མ་ནོ་དྷཱ་ཏུ ཨི་ཏ་ར་སྶ མ་ཧ་གྒ་ཏཱ་དི་ཨཱ་ར་མྨ་ཎ་ཏཱ་ཝ་སེ་ནཱ་པི ཝ་ཀྑ་མཱ་ན་ཏྟཱ. ‘‘ཨི་ཊྛཱ་དི་བྷེ་དཱ’’ཏི་ཨཱ་དི པ་རི་ཏྟཱ་ར་མྨ་ཎ་བྷཱ་ཝ་ཝི་བྷཱ་ཝ་ནཾ. ཨི་ཊྛཱ་དི་བྷེ་དཱཏི ཨི་ཊྛ་ཨི་ཊྛ་མ་ཛ྄ཛྷ་ཏྟ་ཨ་ནི་ཊྛ་ཨ་ནི་ཊྛ་མ་ཛ྄ཛྷ་ཏྟ་བྷེ་དཱ. པ་ཊི་པཱ་ཊི་ཡཱཏི ‘‘རཱུ་པཾ ཙ་ཀྑུ་ཝི་ཉྙཱ་ཎ་སྶ, ས་དྡོ སོ་ཏ་ཝི་ཉྙཱ་ཎ་སྶཱ’’ཏི་ཨཱ་དི་ནཱ ཨ་ནུ་ཀྐ་མ་ཏོ. རཱུ་པཱ་དི…པེ… ཏྟ་ཡ་སྶ ཏཱུཏི ཀི་རི་ཡཱ་མ་ནོ་དྷཱ་ཏུ་ཡཱ ཙེ་ཝ ཀུ་ས་ལཱ་ཀུ་ས་ལ་ཝི་པཱ་ཀ་ཝི་བྷཱ་ག་ཝ་སེ་ན དྭི་ནྣཾ མ་ནོ་དྷཱ་ཏཱུ་ན་ཉྩ ས་བྦཾ རཱུ་པཱ་དི་པ་ཉྩ་ཀ་གོ་ཙ་རཾ. ཏཱ ཧི ཧ་ད་ཡ་ཝ་ཏྠུཾ ནི་སྶཱ་ཡ ཙ་ཀྑུ་ཝི་ཉྙཱ་ཎཱ་དཱི་ནཾ པུ་རི་མ་པ་ཙྪི་མཱ ཧུ་ཏྭཱ ནི་ཡ་ཏཱ རཱུ་པཱ་དཱི་ནེ་ཝ ཨཱ་ར་བྦྷ པ་ཝ་ཏྟ་ནྟི.
༣༡༡. ཀཱ་མ་དྷཱ་ཏུ་ཡནྟི ཀཱ་མ་བྷ་ཝེ. ཏ་ཏྠ ཧི ནེ་སཾ ས་བྦེ་སཾ ཝ་ཏྠཱ་ར་མྨ་ཎཱ་ནི ཨུ་པ་ལ་བྦྷ་ནྟི. ཙ་ཏྟཱ་རཱིཏི ཏེ་སྭེ་ཝ ཀི་རི་ཡཱ་མ་ནོ་དྷཱ་ཏུ, ཀུ་ས་ལ་ཝི་པཱ་ཀ་ཙ་ཀྑུ་སོ་ཏ་ཝི་ཉྙཱ་ཎཱ་ནི, ཏ་ཐཱ ས་མྤ་ཊི་ཙྪ་ན་ནྟི ཨི་མཱ་ནི ཙ་ཏྟཱ་རི ཙི་ཏྟཱ་ནི. སེ་སཱ་ནི པ་ན ཝ་ཏྠཱ་ར་མྨ་ཎཱ་བྷཱ་ཝེ་ན ཏ་ཏྠ ནུ་པྤ་ཛྫ་ནྟི. ནེ་ཝ ཀི་ཉྩཱིཏི ཝ་ཏྠཱ་ར་མྨ་ཎཱ་ནཾ ས་བྦ་སོ ཨ་བྷཱ་ཝ་ཏོ ཨེ་ཏེ་སུ ཀི་ཉྩི ན ཛཱ་ཡ་ཏི.
༣༡༢-༣. ‘‘མ་ཧཱ་པཱ་ཀཱ་ན’’ནྟི་ཨཱ་དི པ་ཋ་མ་པ་རི་ཙྪེ་དེ ཝུ་ཏྟ་ཏྠ་མེ་ཝ. པ་ཊུ་པྤ་ནྣཱཏི པ་ཙྩུ་པྤ་ནྣཱ.
༣༡༤. ཨེ་ཝཾ པ་རི་ཏྟཱ་ར་མྨ་ཎེ ད་སྶེ་ཏྭཱ ཨི་དཱ་ནི མ་ཧ་གྒ་ཏཱ་ར་མྨ་ཎེ ཨ་པྤ་མཱ་ཎཱ་ར་མྨ་ཎེ ཙ ད་སྶེ་ཏུཾ ‘‘དུ་ཏི་ཡཱ་རུ་པྤ་ཙི་ཏྟ་ཉྩཱ’’ཏི་ཨཱ་དི ཝུ་ཏྟཾ. ཏ་ཏྠ དུ་ཏི་ཡཱ་རུ་པྤ་ཙི་ཏྟཾ པ་ཋ་མཱ་རུ་པྤཱ་ར་མྨ་ཎ་ཏོ, ཙ་ཏུ་ཏྠཱ་རུ་པྤཾ ཏ་ཏི་ཡཱ་རུ་པྤཱ་ར་མྨ་ཎ་ཏོ མ་ཧ་གྒ་ཏཱ་ར་མྨ་ཎཾ. ཚ་བྦི་དྷནྟི ཀུ་ས་ལ་ཝི་པཱ་ཀ་ཀི་རི་ཡཱ་ཝ་སེ་ན པ་ཙྩེ་ཀཾ ཏི་ཝི་དྷ་ཏཱ་ཡ ཚ་པྤ་ཀཱ་རཾ.
༣༡༦-༢༠. ཉཱ་ཎཾ པ་རི་ཧཱི་ནཾ ཨེ་ཏེ་སཾ, ཉཱ་ཎ་ཏོ པ་རི་ཧཱི་ནཱ་ཏི ཝཱ ཉཱ་ཎ་ཧཱི་ནཱ. པ་རི་ཏྟཱ་ར་མྨ་ཎཱ…པེ… ཧོ་ནྟི ཏེཏི ཨ་ཊྛ ཉཱ་ཎ་ཝི་པྤ་ཡུ་ཏྟ་ཙི་ཏྟུ་པྤཱ་དཱ སེ་ཁ་པུ་ཐུ་ཛྫ་ན་ཁཱི་ཎཱ་ས་ཝཱ་ནཾ ཀ་དཱ་ཙི ནི་རུ་སྶུ་ཀྐ་བྷཱ་ཝེ་ན ཨཱ་ད་རཱ་ཀ་ར་ཎ་ཝ་སེ་ན ཨ་ཀ་མྨ་ཉྙ་ས་རཱི་ར་ཏཱ་ཨ་ཉྙ་ཝི་ཧི་ཏ་ཏཱ་ཧི ཝཱ ཨ་ས་ཀྐ་ཙྩ་དཱ་ན་པ་ཙྩ་ཝེ་ཀྑ་ཎ་དྷ་མྨ་སྶ་ཝ་ནཱ་དཱི་སུ ཨ་ཏི་པ་གུ་ཎ་ཝི་པ་སྶ་ནཱ་ཡ ཙ ཀཱ་མཱ་ཝ་ཙ་ར་དྷ་མྨེ ཨཱ་ར་བྦྷ པ་ཝ་ཏྟི་ཀཱ་ལེ པ་རི་ཏྟཱ་ར་མྨ་ཎཱ. ཨ་ཏི་པ་གུ་ཎཱ་ནཾ པ་ཋ་མ་ཛ྄ཛྷཱ་ནཱ་དཱི་ནཾ པ་ཙྩ་ཝེ་ཀྑ་ཎ་ཀཱ་ལེ མ་ཧ་གྒ་ཏཱ་ར་མྨ་ཎཱ. ཀ་སི་ཎ་ནི་མི་ཏྟཱ་དི་པ་ཉྙ་ཏྟི་པ་ཙྩ་ཝེ་ཀྑ་ཎ་ཀཱ་ལེ པ་རི་ཏྟཱ་ར་མྨ་ཎཱ་དི་ཝ་སེ་ན ན་ཝ་ཏྟ་བྦཱ. ཨ་ཀུ་ས་ལེ་སུ ཙ་ཏྟཱ་རོ དི་ཊྛི་ས་མྤ་ཡུ་ཏྟ་ཙི་ཏྟུ་པྤཱ་དཱ ཙ་ཏུ་པ་ཉྙཱ་ས་ཀཱ་མཱ་ཝ་ཙ་ར་དྷ་མྨཱ་ནཾ, རཱུ་པ་སྶ ཙ ‘‘ཨ་ཏྟཱ ས་ཏྟོ’’ཏི པ་རཱ་མ་ས་ན་ཨ་སྶཱ་ད་ནཱ་བྷི་ན་ནྡ་ན་ཀཱ་ལེ པ་རི་ཏྟཱ་ར་མྨ་ཎཱ. ཏེ་ནེ་ཝཱ་ཀཱ་རེ་ན ས་ཏྟ་ཝཱི་ས་ཏི་མ་ཧ་གྒ་ཏ་དྷ་མྨེ ཨཱ་ར་བྦྷ པ་ཝ་ཏྟ་ཀཱ་ལེ མ་ཧ་གྒ་ཏཱ་ར་མྨ་ཎཱ. པ་ཎྞ་ཏྟི་དྷ་མྨེ ཨཱ་ར་བྦྷ པ་ཝ་ཏྟ་ན་ཀཱ་ལེ སི་ཡཱ ན་ཝ་ཏྟ་བྦཱ པ་རི་ཏྟཱ་ར་མྨ་ཎཱ་དི་ཝ་སེ་ན. དི་ཊྛི་ཝི་པྤ་ཡུ་ཏྟཱ་ནི ཏེ་ཡེ་ཝ དྷ་མྨེ ཨཱ་ར་བྦྷ ཝི་ནཱ པ་རཱ་མཱ་སེ་ན ཨ་སྶཱ་ད་ནཱ་བྷི་ན་ནྡ་ན་ཝ་སེ་ན པ་ཝ་ཏྟི་ཡཾ, པ་ཊི་གྷ་ས་མྤ་ཡུ་ཏྟཱ་ནི དོ་མ་ན་སྶ་ཝ་སེ་ན པ་ཝ་ཏྟི་ཡཾ, ཝི་ཙི་ཀི་ཙྪཱ་ས་མྤ་ཡུ་ཏྟཾ དྭེ་ལ༹ྷ་ཀ་བྷཱ་ཝེ་ན, ཨུ་དྡྷ་ཙྩ་ས་ཧ་ག་ཏཾ ཝི་ཀྑི་པ་ན་ཝ་སེ་ན, ཨ་ཝཱུ་པ་ས་མ་ཝ་སེ་ན ཙ པ་ཝ་ཏྟི་ཡཾ པ་རི་ཏྟ་མ་ཧ་གྒ་ཏ་ན་ཝ་ཏྟ་བྦཱ་ར་མྨ་ཎཱ་ཏི ཝེ་དི་ཏ་བྦཱ. ཀྲི་ཡ་ཏོ་པི ཙ ཏ་ཐཱཏི ཀི་རི་ཡ་ཙི་ཏྟ་ཏོ་པི ཉཱ་ཎ་ས་མྤ་ཡུ་ཏྟཱ ཙ་ཏྟཱ་རོ་ཏི ཨ་ཏྠོ. ཀྲི་ཡཱ་ཝོ་ཊྛ་བྦ་ནནྟི ས་རཱུ་པ་ཀ་ཐ་ན་མེ་ཏཾ, ན པ་ན ཀུ་ས་ལཱ་ཀུ་ས་ལ་ཝི་པཱ་ཀ་ཝོ་ཊྛ་བྦ་ན་སྶ ཝི་ཛྫ་མཱ་ན་ཏྟཱ.
ཏི་ཝི་དྷོ ཧོ་ཏི གོ་ཙ་རོཏི པ་རི་ཏྟ་མ་ཧ་གྒ་ཏ་ཨ་པྤ་མཱ་ཎ་ཝ་སེ་ན ཏི་ཝི་དྷོ་པི གོ་ཙ་རོ ཧོ་ཏི. ཀ་ཐཾ? ཀུ་ས་ལ་ཀི་རི་ཡཱ་ཝ་སེ་ན ཨ་ཊྛ ཉཱ་ཎ་ས་མྤ་ཡུ་ཏྟ་ཙི་ཏྟུ་པྤཱ་དཱ སེ་ཁ་པུ་ཐུ་ཛྫ་ན་ཁཱི་ཎཱ་ས་ཝཱ་ནཾ ས་ཀྐ་ཙྩ་དཱ་ན་པ་ཙྩ་ཝེ་ཀྑ་ཎ་དྷ་མྨ་སྶ་ཝ་ན་ཝི་པ་སྶ་ནཱ་དཱི་སུ ཀཱ་མཱ་ཝ་ཙ་ར་དྷ་མྨེ ཨཱ་ར་བྦྷ པ་ཝ་ཏྟ་ཀཱ་ལེ ཀཱ་མཱ་ཝ་ཙ་རཱ་ར་མྨ་ཎི་ཀ་ཨ་བྷི་ཉྙཱ་ཡ པ་རི་ཀ་མྨཱ་ནུ་ལོ་མ་ཀཱ་ལེ ཙ པ་རི་ཏྟཱ་ར་མྨ་ཎཱ. པ་ཋ་མ་ཛ྄ཛྷཱ་ནཱ་དི་པ་ཙྩ་ཝེ་ཀྑ་ཎ་ཀཱ་ལེ མ་ཧ་གྒ་ཏཱ་ར་མྨ་ཎ་ཛྷཱ་ནཱ་དཱི་ནཾ པ་རི་ཀ་མྨ་ཀཱ་ལེ མ་ཧ་གྒ་ཏ་དྷ་མྨེ ཨཱ་ར་བྦྷ ས་མྨ་ས་ན་ཀཱ་ལེ ཙ མ་ཧ་གྒ་ཏཱ་ར་མྨ་ཎཱ ཧོ་ནྟི. ཡ་ཐཱ་ལཱ་བྷཾ གོ་ཏྲ་བྷུ་ཝོ་དཱ་ན་ཀཱ་ལེ པ་ན ལོ་ཀུ་ཏྟ་རཾ དྷ་མྨཾ པ་ཙྩ་ཝེ་ཀྑ་ཎ་ཀཱ་ལེ ཙ ནི་བྦཱ་ནཱ་ར་མྨ་ཎཱ་བྷི་ཉྙཱ་ཡ པ་རི་ཀ་མྨ་ཀཱ་ལེ ཙ ཨ་པྤ་མཱ་ཎཱ་ར་མྨ་ཎཱ. པ་ཎྞ་ཏྟི་པ་ཙྩ་ཝེ་ཀྑ་ཎ་ཀཱ་ལེ པ་ཎྞ་ཏྟཱ་ར་མྨ་ཎི་ཀ་ཛྷཱ་ནཱ་བྷི་ཉྙཱ་ནཾ པ་རི་ཀ་མྨ་ཀཱ་ལེ ཙ ན་ཝ་ཏྟ་བྦཱ. ཨ་བྷི་ཉྙཱ་དྭ་ཡ་སྶ པ་རི་ཏྟཱ་དི་ཨཱ་ར་མྨ་ཎ་ཏཾ ས་ཏྟ་ར་ས་མ་པ་རི་ཙྪེ་དེ ཝ་ཀྑ་ཏི. ཀི་རི་ཡཱ་ཝོ་ཊྛ་བྦ་ན་མྤི ཡ་ཐཱ་ཝུ་ཏྟ་དྷ་མྨཱ་ནཾ ཏཾ་ཏཾ་ཨཱ་ར་མྨ་ཎེ པ་ཝ་ཏྟ་མཱ་ནཱ་ནཾ པུ་རེ་ཙ་རཾ ཧུ་ཏྭཱ ཏཾ ཏ་དེ་ཝ ཨཱ་ཝ་ཛྫ་ནྟཾ པ་ཝ་ཏྟ་ཏཱི་ཏི པ་རི་ཏྟཱ་དི་ཨཱ་ར་མྨ་ཎཾ. པ་ཉྩ་དྭཱ་རེ ཝོ་ཊྛ་བྦ་ན་ཝ་སེ་ན པ་ཝ་ཏྟི་ཡཾ པ་རི་ཏྟཱ་ར་མྨ་ཎ་མེ་ཝ.
ཝུ་ཏྟཱ་ཝ་སེ་སཱ་ནཱིཏི ཡ་ཐཱ་ཝུ་ཏྟེ་ཧི ཨ་ཝ་སི་ཊྛཱ་ནི པ་ནྣ་ར་ས རཱུ་པཱ་ཝ་ཙ་རཱ་ནི པ་ཋ་མ་ཏ་ཏི་ཡཱ་ནི, ཚ ཨ་རཱུ་པཱ་ཝ་ཙ་ར་ཀུ་ས་ལ་ཝི་པཱ་ཀ་ཀི་རི་ཡ་ཙི་ཏྟཱ་ནཱི་ཏི ཨེ་ཀ་ཝཱི་ས་ཏི ཙི་ཏྟཱ་ནི. ན་ཝ་ཏྟ་བྦཱ་ར་མྨ་ཎཱ་ནཱིཏི པ་རི་ཏྟཱ་དི་ཝ་སེ་ན ན་ཝ་ཏྟ་བྦ་སྶ ཀ་སི་ཎཱ་དི་ནི་མི་ཏྟ་ས་ཏྟ་པ་ཉྙ་ཏྟི་ཨཱ་ཀཱ་ས་ཝི་ཉྙཱ་ཎཱ་བྷཱ་ཝ་སྶ ཨཱ་ར་མྨ་ཎ་ཀ་ར་ཎ་ཏོ ན་ཝ་ཏྟ་བྦཱ་ར་མྨ་ཎཱ་ནི.
པ་རི་ཏྟཱ་ར་མྨ་ཎ་ཏྟི་ཀཾ ས་མ་ཏྟཾ.
༣༢༡-༢. ཨེ་ཝཾ པ་རི་ཏྟཱ་ར་མྨ་ཎ་ཏྟི་ཀ་ཝ་སེ་ན ཝི་ས་ཡཱི་ཝི་བྷཱ་གཾ ད་སྶེ་ཏྭཱ ཨི་དཱ་ནི ཡ་སྨཱ ཨ་པྤ་མཱ་ཎཱ་ར་མྨ་ཎ་ནི་དྡེ་སེ་ནེ་ཝ མ་གྒཱ་ར་མྨ་ཎ་ཏྟི་ཀ་ས་ངྒ་ཧི་ཏོ་པི ཝི་ས་ཡཱི་ཝི་བྷཱ་གོ ནི་དྡི་ཊྛོ ཧོ་ཏི, ཏ་སྨཱ ཏཾ པ་ཧཱ་ཡ ཨ་ཏཱི་ཏཱ་ར་མྨ་ཎ་ཏྟི་ཀ་ཝ་སེ་ན ད་སྶེ་ཏུཾ ‘‘དུ་ཏི་ཡཱ་རུ་པྤ་ཙི་ཏྟ་ཉྩཱ’’ཏི་ཨཱ་དི ཝུ་ཏྟཾ. ཏ་ཏྠ དུ་ཏི་ཡཱ་རུ་པྤ་ཙི་ཏྟཾ ཨ་ཏཱི་ཏ་སྶ པ་ཋ་མཱ་རུ་པྤ་ཝི་ཉྙཱ་ཎ་སྶ ཨཱ་ར་མྨ་ཎ་ཀ་ར་ཎ་ཏོ, ཙ་ཏུ་ཏྠཱ་རུ་པྤཾ ཏ་ཏི་ཡཱ་རུ་པྤ་སྶ ཨཱ་ར་མྨ་ཎ་ཀ་ར་ཎ་ཏོ ཨེ་ཀ་ནྟ་ཨ་ཏཱི་ཏཱ་ར་མྨ་ཎཾ. པ་ཙྩུ་པྤ་ནྣཱ་ཝ གོ་ཙ་རཱཏི རཱུ་པཱ་དི་མྷི དྷ་ར་མཱ་ནེ་ཡེ་ཝ པ་ཉྩ་དྭཱ་རི་ཀ་ཙི་ཏྟཱ་ནཾ ཨུ་པྤ་ཛྫ་ན་ཏོ. ཨ་ནཱ་ག་ཏཱ་ར་མྨ་ཎཾ པ་ན ནི་ཡ་ཏཾ ཀི་ཉྩི ན་ཏྠི ཨ་ནཱ་ག་ཏཾ་ས་ཉཱ་ཎ་སྶ་པི པ་ཉྩ་མ་ཛ྄ཛྷཱ་ན་ཏོ ཨ་བྷི་ནྣ་ཏྟཱ.
༣༢༤-༦. སི་ཡཱ…པེ… ནཱ་ག་ཏ་གོ་ཙ་རཱཏི ཨ་ཊྛ ཏཱ་ཝ མ་ཧཱ་ཝི་པཱ་ཀཱ དེ་ཝ་མ་ནུ་སྶཱ་ནཾ པ་ཊི་ས་ནྡྷི་གྒ་ཧ་ཎ་ཀཱ་ལེ ཀ་མྨཾ ཝཱ ཀ་མྨ་ནི་མི་ཏྟཾ ཝཱ ཨཱ་ར་བྦྷ པ་ཝ་ཏྟི་ཡཾ ཨ་ཏཱི་ཏཱ་ར་མྨ་ཎཱ. བྷ་ཝ་ངྒ་ཙུ་ཏི་ཀཱ་ལེ་པི ཨེ་སེ་ཝ ན་ཡོ. ག་ཏི་ནི་མི་ཏྟཾ པ་ན ཀ་དཱ་ཙི ཀ་མྨ་ནི་མི་ཏྟ་ཉྩ ཨཱ་ར་བྦྷ པ་ཊི་ས་ནྡྷི་གྒ་ཧ་ཎ་ཀཱ་ལེ, ཏ་ད་ན་ནྟ་རཾ བྷ་ཝ་ངྒ་ཀཱ་ལེ ཙ པ་ཙྩུ་པྤ་ནྣཱ་ར་མྨ་ཎཱ, ཏ་ཐཱ པ་ཉྩ་དྭཱ་རེ ཏ་དཱ་ར་མྨ་ཎ་ཝ་སེ་ན པ་ཝ་ཏྟི་ཡཾ. མ་ནོ་དྭཱ་རེ པ་ན ཨ་ཏཱི་ཏཱ་ནཱ་ག་ཏ་པ་ཙྩུ་པྤ་ནྣཱ་ར་མྨ་ཎཱ་ནཾ ཛ་ཝ་ནཱ་ནཾ ཨཱ་ར་མྨ་ཎཾ ག་ཧེ་ཏྭཱ པ་ཝ་ཏྟི་ཡཾ ཨ་ཏཱི་ཏཱ་ནཱ་ག་ཏ་པ་ཙྩུ་པྤ་ནྣཱ་ར་མྨ་ཎཱ. ཀུ་ས་ལཱ་ཀུ་ས་ལ་ཝི་པཱ་ཀཱ་ཧེ་ཏུ་ཀ་ཨུ་པེ་ཀྑཱ་ས་ཧ་ག་ཏ་མ་ནོ་ཝི་ཉྙཱ་ཎ་དྷཱ་ཏུ་དྭ་ཡེ་པི ཨེ་སེ་ཝ ན་ཡོ. ཀེ་ཝ་ལ་ཉྷི ཏཱ ཡ་ཐཱ་ཀྐ་མཾ མ་ནུ་སྶེ་སུ ཛ་ཙྩ་ནྡྷཱ་དཱི་ནཾ, ཨ་པཱ་ཡེ་སུ ཙ ས་བྦེ་སཾ པ་ཊི་ས་ནྡྷི ཧོ་ནྟི. པ་ཉྩ་དྭཱ་རེ ཙ ས་ནྟཱི་ར་ཎ་ཀཱ་ལེ པ་ཙྩུ་པྤ་ནྣཱ་ར་མྨ་ཎཱ་ཝ ཧོ་ནྟཱི་ཏི ཨ་ཡ་མེ་ཏེ་སཾ ཝི་སེ་སོ. སོ་མ་ན་སྶ་ས་ཧ་ག་ཏཱ པ་ན པ་ཉྩ་དྭཱ་རེ ས་ནྟཱི་ར་ཎ་ཝ་སེ་ན, ཏ་དཱ་ར་མྨ་ཎ་ཝ་སེ་ན ཙ པ་ཝ་ཏྟི་ཀཱ་ལེ པ་ཙྩུ་པྤ་ནྣཱ་ར་མྨ་ཎཱ, མ་ནོ་དྭཱ་རེ ཙ ཏ་དཱ་ར་མྨ་ཎ་ཀཱ་ལེ ཨ་ཏཱི་ཏཱ་ནཱ་ག་ཏ་པ་ཙྩུ་པྤ་ནྣཱ་ར་མྨ་ཎཱ་ཏི ཝེ་དི་ཏ་བྦཱ. ཧ་སི་ཏུ་པྤཱ་ད་ཙི་ཏྟཾ པ་ན ཁཱི་ཎཱ་ས་ཝཱ་ནཾ པ་ཉྩ་དྭཱ་རེ ཧ་ཊྛ་པ་ཧ་ཊྛཱ་ཀཱ་རཾ ཀུ་རུ་མཱ་ནཱ་ནཾ པ་ཙྩུ་པྤ་ནྣཱ་ར་མྨ་ཎཾ ཧོ་ཏི, མ་ནོ་དྭཱ་རེ ཨ་ཏཱི་ཏཱ་དི་བྷེ་དེ དྷ་མྨེ ཨཱ་ར་བྦྷ ཧ་སི་ཏུ་པྤཱ་ད་ཝ་སེ་ན པ་ཝ་ཏྟི་ཡཾ ཨ་ཏཱི་ཏཱ་ནཱ་ག་ཏ་པ་ཙྩུ་པྤ་ནྣཱ་ར་མྨ་ཎཾ. ‘‘ཀུ་ས་ལཱ་ཀུ་ས་ལཱ’’ཏི་ཨཱ་དཱི་སུ ཀུ་ས་ལེ་སུ ཏཱ་ཝ ཙ་ཏྟཱ་རོ ཉཱ་ཎ་ས་མྤ་ཡུ་ཏྟ་ཙི་ཏྟུ་པྤཱ་དཱ སེ་ཁ་པུ་ཐུ་ཛྫ་ནཱ་ནཾ, ཨ་ཏཱི་ཏཱ་དི་བྷེ་དཱ་ནི ཁ་ནྡྷ་དྷཱ་ཏུ་ཨཱ་ཡ་ཏ་ནཱ་ནི ས་མྨ་ས་ན་ཀཱ་ལེ, པ་ཙྩ་ཝེ་ཀྑ་ཎ་ཀཱ་ལེ, ཨ་ཏཱི་ཏཱ་དི་ཨཱ་ར་མྨ་ཎི་ཀ་ཨ་བྷི་ཉྙཱ་ནཾ པ་རི་ཀ་མྨ་ཀཱ་ལེ ཙ ཨ་ཏཱི་ཏཱ་ནཱ་ག་ཏ་པ་ཙྩུ་པྤ་ནྣཱ་ར་མྨ་ཎཱ. པ་ཉྙ་ཏྟི་ནི་བྦཱ་ན་པ་ཙྩ་ཝེ་ཀྑ་ཎ་ཀཱ་ལེ, གོ་ཏྲ་བྷུ་ཝོ་དཱ་ན་ཀཱ་ལེ, པ་ཉྙ་ཏྟི་ནི་བྦཱ་ནཱ་ར་མྨ་ཎི་ཀ་ཨ་བྷི་ཉྙཱ་ནཾ པ་རི་ཀ་མྨཱ་དི་ཀཱ་ལེ ཙ ན་ཝ་ཏྟ་བྦཱ་ར་མྨ་ཎཱ. པ་ཉྙ་ཏྟི་ནི་བྦཱ་ནཱ་ནི ཧི ཨི་དྷ ཨ་ཏཱི་ཏཱ་དི་ཀཱ་ལ་ཝ་སེ་ན ན་ཝ་ཏྟ་བྦཱ་ནཱི་ཏི ཏ་དཱ་ར་མྨ་ཎཱ་ནི ཨ་ཏཱི་ཏཱ་ར་མྨ་ཎཱ་དི་ཝ་སེ་ན ན་ཝ་ཏྟ་བྦཱ་ནི. ཏེ་ནཱ་ཧ ‘‘ས་ནྟ་པ་ཉྙ་ཏྟི་ཀཱ་ལེ་པཱི’’ཏི, ཡ་ཐཱ་ས་མྦྷ་ཝཾ ས་ནྟ་སྶ ནི་བྦཱ་ན་སྶ, པ་ཉྙ་ཏྟི་ཡཱ ཙ ཨཱ་ར་མྨ་ཎ་ཀ་ར་ཎ་ཀཱ་ལེ་ཏི ཨ་ཏྠོ. པོ་ཏྠ་ཀེ་སུ པ་ན ‘‘ས་ནྟེ པ་ཉྙ་ཏྟི་ཀཱ་ལེ་སཱུ’’ཏི ལི་ཁ་ནྟི, སོ ཨ་པཱ་ཋོ. ཏ་སྶ པ་ན ཨ་པཱ་ཋ་བྷཱ་ཝཾ ཨ་ཛཱ་ན་ནྟཱ ཨ་ཏྠ་ཧཱ་ནི་མྤི ཨ་ས་ལླ་ཀྑེ་ཏྭཱ ཝ་ཙ་ན་ཝི་པ་ལླཱ་ས་ཝ་སེ་ན པ་ཉྙ་ཏྟི་ཀཱ་ལ་སྨིཾ ས་ཏཱི་ཏི ཨ་ཏྠཾ ལི་ཁ་ནྟི. ཉཱ་ཎ་ཝི་པྤ་ཡུ་ཏྟཱ་ནི་པི ཝུ་ཏྟ་ན་ཡེ་ནེ་ཝ ཝེ་དི་ཏ་བྦཱ་ནི. ཀེ་ཝ་ལ་ཉྷི ཏེ་སཾ མ་གྒ་ཕ་ལ་ནི་བྦཱ་ན་པ་ཙྩ་ཝེ་ཀྑ་ཎཱ་ནི ན་ཏྠི. ཉཱ་ཎ་ཝི་ར་ཧེ་ན ལོ་ཀུ་ཏྟ་ར་དྷ་མྨཱ་ར་མྨ་ཎེ ཨ་ས་མ་ཏྠ་བྷཱ་ཝ་ཏོ་ཏི ཨ་ཡ་མེ་ཝ ཝི་སེ་སོ.
ཨ་ཀུ་ས་ལེ་སུ ཙ་ཏྟཱ་རོ དི་ཊྛི་ས་མྤ་ཡུ་ཏྟ་ཙི་ཏྟུ་པྤཱ་དཱ ཨ་ཏཱི་ཏཱ་དི་བྷེ་དཱ་ནཾ ཏེ་བྷཱུ་མ་ཀ་དྷ་མྨཱ་ནཾ ཨ་སྶཱ་ད་ནཱ་བྷི་ན་ནྡ་ན་པ་རཱ་མ་ས་ན་ཀཱ་ལེ ཨ་ཏཱི་ཏཱ་དི་ཨཱ་ར་མྨ་ཎཱ. ཏ་ཐེ་ཝ པ་ཉྙ་ཏྟིཾ ཨཱ་ར་བྦྷ པ་ཝ་ཏྟི་ཀཱ་ལེ ན་ཝ་ཏྟ་བྦཱ་ར་མྨ་ཎཱ. དི་ཊྛི་ཝི་པྤ་ཡུ་ཏྟེ་སུ་པི ཨེ་སེ་ཝ ན་ཡོ. ཀེ་ཝ་ལ་ཉྷི ཏ་ཏྠ པ་རཱ་མཱ་ས་གྒ་ཧ་ཎཾ ན་ཏྠི. དྭེ པ་ཊི་གྷ་ས་མྤ་ཡུ་ཏྟ་ཙི་ཏྟུ་པྤཱ་དཱ ཨ་ཏཱི་ཏཱ་དི་བྷེ་དེ དྷ་མྨེ ཨཱ་ར་བྦྷ དུ་སྶ་ན་ཀཱ་ལེ ཨ་ཏཱི་ཏཱ་དི་ཨཱ་ར་མྨ་ཎཱ, པ་ཎྞ་ཏྟིཾ ཨཱ་ར་བྦྷ དུ་སྶ་ན་ཀཱ་ལེ ན་ཝ་ཏྟ་བྦཱ་ར་མྨ་ཎཱ. ཝི་ཙི་ཀི་ཙྪུ་དྡྷ་ཙྩ་ས་མྤ་ཡུ་ཏྟཱ ཏེ་སུ དྷ་མྨེ་སུ ཨ་ནི་ཊྛ་ངྒ་ཏ་བྷཱ་ཝེ་ན ཙ ཨ་ཝཱུ་པ་ས་མ་ཝི་ཀྑེ་པ་ཝ་སེ་ན ཙ པ་ཝ་ཏྟི་ཡཾ ཨ་ཏཱི་ཏཱ་ནཱ་ག་ཏ་པ་ཙྩུ་པྤ་ནྣ་ན་ཝ་ཏྟ་བྦཱ་ར་མྨ་ཎཱ. ཀི་རི་ཡཱ་སུ ཨ་ཊྛ ས་ཧེ་ཏུ་ཀ་ཙི་ཏྟུ་པྤཱ་དཱ ཀུ་ས་ལ་ཙི་ཏྟུ་པྤཱ་ད་ག་ཏི་ཀཱ ཨེ་ཝ. ཏ་ཏྠ ཧི ཉཱ་ཎ་ས་མྤ་ཡུ་ཏྟཱ ཀུ་ས་ལེ་སུ ཉཱ་ཎ་ས་མྤ་ཡུ་ཏྟེ་ཧི, ཉཱ་ཎ་ཝི་པྤ་ཡུ་ཏྟཱ ཉཱ་ཎ་ཝི་པྤ་ཡུ་ཏྟེ་ཧི ས་མཱ་ནཱ. ཀེ་ཝ་ལཾ པ་ན ཏེ སེ་ཁ་པུ་ཐུ་ཛྫ་ནཱ་ནཾ ཨུ་པྤ་ཛྫ་ནྟི, ཨི་མེ ཁཱི་ཎཱ་ས་ཝཱ་ན་ནྟི ཨ་ཡ་མེ་ཝེ་ཏྠ ཝི་སེ་སོ. ཀི་རི་ཡཱ་ཧེ་ཏུ་ཀ་མ་ནོ་ཝི་ཉྙཱ་ཎ་དྷཱ་ཏུ པ་ན ཨུ་པེ་ཀྑཱ་ས་ཧ་ག་ཏཱ པ་ཉྩ་དྭཱ་རེ ཝོ་ཊྛ་བྦ་ན་ཝ་སེ་ན པ་ཝ་ཏྟི་ཡཾ པ་ཙྩུ་པྤ་ནྣཱ་ར་མྨ་ཎཱ, མ་ནོ་དྭཱ་རེ ཨ་ཏཱི་ཏཱ་ནཱ་ག་ཏ་པ་ཙྩུ་པྤ་ནྣཱ་ར་མྨ་ཎཱ་ན་ཉྩེ་ཝ པ་ཉྙ་ཏྟི་ནི་བྦཱ་ནཱ་ར་མྨ་ཎཱ་ན་ཉྩ ཛ་ཝ་ནཱ་ནཾ པུ་རེ་ཙཱ་རི་ཀ་ཀཱ་ལེ ཨ་ཏཱི་ཏཱ་ནཱ་ག་ཏ་པ་ཙྩུ་པྤ་ནྣ་ན་ཝ་ཏྟ་བྦཱ་ར་མྨ་ཎཱ. ཨ་བྷི་ཉྙཱ་དྭ་ཡ་སྶ ཨ་ཏཱི་ཏཱ་དི་ཨཱ་ར་མྨ་ཎ་ཏཾ ཝ་ཀྑ་ཏི. ན་ཝ་ཏྟ་བྦཱ…པེ… ཨཱ་དི་ནཱཏི ཀ་སི་ཎ་ནི་མི་ཏྟཱ་དི་པ་ཉྙ་ཏྟཱ་ར་མྨ་ཎ་ཏྟཱ ཨ་ཏཱི་ཏཱ་ར་མྨ་ཎཱ་དི་ནཱ ན་ཝ་ཏྟ་བྦཱ.
༣༢༧. ཀྲི་ཡཱ པ་ཉྩཱཏི ཉཱ་ཎ་ས་མྤ་ཡུ་ཏྟཱ ཙ་ཏ་སྶོ, ཨ་ཧེ་ཏུ་ཀ་མ་ནོ་ཝི་ཉྙཱ་ཎ་དྷཱ་ཏུ ཨུ་པེ་ཀྑཱ་ས་ཧ་ག་ཏཱ་ཏི ཨི་མཱ པ་ཉྩ ཀི་རི་ཡཱ. རཱུ་པ་ཏོ པ་ཉྩ་མཱི ཀྲི་ཡཱཏི རཱུ་པཱ་ཝ་ཙ་ར་པ་ཉྩ་མ་ཛ྄ཛྷཱ་ན་ས་ངྑཱ་ཏཱ ཀི་རི་ཡཱ་བྷི་ཉྙཱ ཙ. ན་ཏྠི ཀི་ཉྩི ཨ་གོ་ཙ་རནྟི ཨ་ཏཱི་ཏཱ་དི་བྷེ་དེ་སུ, ཀཱ་ལ་ཝི་མུ་ཏྟེ་སུ ཙ ཨ་གོ་ཙ་རཾ ནཱ་མ ཀི་ཉྩི ན་ཏྠི, ས་བྦ་མེ་ཝ ནེ་སཾ གོ་ཙ་རཾ ཧོ་ཏཱི་ཏི ཨ་ཏྠོ.
ཨ་ཏཱི་ཏཱ་ར་མྨ་ཎ་ཏྟི་ཀཾ.
ཝུ་ཏྟ་ན་ཡཱ་ནུ་སཱ་རེ་ནེ་ཝ ཨ་ཛ྄ཛྷ་ཏྟཱ་ར་མྨ་ཎ་ཏྟི་ཀ་ས་ངྒ་ཧི་ཏོ་པི ཝི་ས་ཡཱི་ཝི་བྷཱ་གོ ས་ཀྐཱ ཝི་ཉྙཱ་ཏུ་ནྟི སོ ཝི་སུཾ ན ཨུ་དྡྷ་ཊོ. ས་རཱུ་པ་ཏོ པ་ནེ་ས ཨེ་ཝཾ ཝེ་དི་ཏ་བྦོ – ཝི་ཉྙཱ་ཎ་ཉྩཱ་ཡ་ཏ་ནཾ ནེ་ཝ་ས་ཉྙཱ་ནཱ་ས་ཉྙཱ་ཡ་ཏ་ན་ནྟི ཨི་མེ ཏཱ་ཝ ཀུ་ས་ལ་ཝི་པཱ་ཀ་ཀི་རི་ཡཱ་ཝ་སེ་ན ཚ ཙི་ཏྟུ་པྤཱ་དཱ ཨ་ཏྟ་ནོ ས་ནྟཱ་ན་ས་མྦ་ནྡྷཾ ཧེ་ཊྛི་མཾ ས་མཱ་པ་ཏྟིཾ ཨཱ་ར་བྦྷ པ་ཝ་ཏྟ་ན་ཏོ ཨ་ཛ྄ཛྷ་ཏྟཱ་ར་མྨ་ཎཱ. རཱུ་པཱ་ཝ་ཙ་ར་ཙ་ཏུ་ཀྐ་ཛ྄ཛྷཱ་ནཱ་ནི, པ་ཋ་མ་ཏ་ཏི་ཡཱ་རཱུ་པྤཱ་ནི, ལོ་ཀུ་ཏྟ་ར་ཀུ་ས་ལ་ཝི་པཱ་ཀཱ་ནི ཙ ནི་ཡ་ཀ་ཛ྄ཛྷ་ཏྟ་ཏོ བ་ཧི་བྷཱ་ཝེ་ན བ་ཧི་དྡྷཱ་བྷཱུ་ཏཱ་ནི པ་ཐ་ཝཱི་ཀ་སི་ཎཱ་དཱི་ནི ཨཱ་ར་བྦྷ པ་ཝ་ཏྟི་ཏོ བ་ཧི་དྡྷཱ་ར་མྨ་ཎཱ་ནི. ས་བྦེ་ཝ ཀཱ་མཱ་ཝ་ཙ་ར་ཀུ་ས་ལཱ་ཀུ་ས་ལཱ་བྱཱ་ཀ་ཏཱ དྷ་མྨཱ རཱུ་པཱ་ཝ་ཙ་ར་པ་ཉྩ་མ་ཛ྄ཛྷཱ་ན་ཉྩ ཨ་ཛ྄ཛྷ་ཏྟ་བ་ཧི་དྡྷཱ་ར་མྨ་ཎཱ་ནི. ཏ་ཏྠ ཀཱ་མཱ་ཝ་ཙ་ར་ཀུ་ས་ལ་ཏོ ཙ་ཏྟཱ་རོ ཉཱ་ཎ་ས་མྤ་ཡུ་ཏྟ་ཙི་ཏྟུ་པྤཱ་དཱ ཨ་ཏྟ་ནོ ཁ་ནྡྷཱ་དཱི་ནི པ་ཙྩ་ཝེ་ཀྑ་ནྟ་སྶ ཨ་ཛ྄ཛྷ་ཏྟཱ་ར་མྨ་ཎཱ, པ་རེ་སཾ ཁ་ནྡྷཱ་དི་པ་ཙྩ་ཝེ་ཀྑ་ཎེ, པ་ཎྞ་ཏྟི་ནི་བྦཱ་ན་པ་ཙྩ་ཝེ་ཀྑ་ཎེ ཙ བ་ཧི་དྡྷཱ་ར་མྨ་ཎཱ, ཏ་དུ་བྷ་ཡ་ཝ་སེ་ན ཨ་ཛ྄ཛྷ་ཏྟ་བ་ཧི་དྡྷཱ་ར་མྨ་ཎཱ. ཉཱ་ཎ་ཝི་པྤ་ཡུ་ཏྟེ་སུ་པི ཨེ་སེ་ཝ ན་ཡོ. ཀེ་ཝ་ལ་ཉྷི ཏེ་སཾ ནི་བྦཱ་ན་པ་ཙྩ་ཝེ་ཀྑ་ཎཱ ན་ཏྠི. ཨ་ཀུ་ས་ལཱ་པི ཨ་ཏྟ་ནོ ཁ་ནྡྷཱ་དཱི་ནཾ ཨ་སྶཱ་ད་ནཱ་བྷི་ན་ནྡ་ན་པ་རཱ་མཱ་སཱ་དི་ཀཱ་ལེ ཨ་ཛ྄ཛྷ་ཏྟཱ་ར་མྨ་ཎཱ, པ་ར་སྶ ཁ་ནྡྷཱ་དཱི་སུ ཙེ་ཝ ཨ་ནི་ནྡྲི་ཡ་བ་དྡྷ་རཱུ་པ་ཀ་སི་ཎཱ་དཱི་སུ ཙ ཏ་ཐེ་ཝ པ་ཝ་ཏྟི་ཀཱ་ལེ བ་ཧི་དྡྷཱ་ར་མྨ་ཎཱ, ཏ་དུ་བྷ་ཡ་ཝ་སེ་ན ཨ་ཛ྄ཛྷ་ཏྟ་བ་ཧི་དྡྷཱ་ར་མྨ་ཎཱ. དྭེ་པ་ཉྩ་ཝི་ཉྙཱ་ཎཱ་ནི, ཏི་སྶོ ཙ མ་ནོ་དྷཱ་ཏུ་ཡོ་ཏི ཨི་མེ ཏེ་ར་ས ཙི་ཏྟུ་པྤཱ་དཱ ཨ་ཏྟ་ནོ རཱུ་པཱ་དཱི་ནི ཨཱ་ར་བྦྷ པ་ཝ་ཏྟི་ཡཾ ཨ་ཛ྄ཛྷ་ཏྟཱ་ར་མྨ་ཎཱ, པ་ར་སྶ རཱུ་པཱ་དཱི་སུ པ་ཝ་ཏྟཱ བ་ཧི་དྡྷཱ་ར་མྨ་ཎཱ, ཏ་དུ་བྷ་ཡ་ཝ་སེ་ན ཨ་ཛ྄ཛྷ་ཏྟ་བ་ཧི་དྡྷཱ་ར་མྨ་ཎཱ, སོ་མ་ན་སྶ་ས་ཧ་ག་ཏཾ ས་ནྟཱི་ར་ཎཾ པ་ཉྩ་དྭཱ་རེ ས་ནྟཱི་ར་ཎ་ཏ་དཱ་ར་མྨ་ཎ་ཝ་སེ་ན ཨ་ཏྟ་ནོ པ་ཉྩ་རཱུ་པཱ་དི་དྷ་མྨེ མ་ནོ་དྭཱ་རེ ཏ་དཱ་ར་མྨ་ཎ་ཝ་སེ་ན ཨ་ཉྙེ་པི ཨ་ཛ྄ཛྷ་ཏྟི་ཀེ ཀཱ་མཱ་ཝ་ཙ་ར་དྷ་མྨེ ཨཱ་ར་བྦྷ པ་ཝ་ཏྟི་ཡཾ ཨ་ཛ྄ཛྷ་ཏྟཱ་ར་མྨ་ཎཱ, པ་རེ་སཾ དྷ་མྨེ་སུ པ་ཝ་ཏྟ་མཱ་ནཱ བ་ཧི་དྡྷཱ་ར་མྨ་ཎཱ, ཏ་དུ་བྷ་ཡ་ཝ་སེ་ན ཨ་ཛ྄ཛྷ་ཏྟ་བ་ཧི་དྡྷཱ་ར་མྨ་ཎཱ. ཨུ་པེ་ཀྑཱ་ས་ཧ་ག་ཏ་ས་ནྟཱི་ར་ཎ་དྭ་ཡེ་པི ཨེ་སེ་ཝ ན་ཡོ.
ཀེ་ཝ་ལཾ པ་ན ཏཾ སུ་ག་ཏི་དུ་གྒ་ཏཱི་སུ པ་ཊི་ས་ནྡྷི་བྷ་ཝ་ངྒ་ཙུ་ཏི་ཝ་སེ་ནཱ་པི ཨ་ཛ྄ཛྷ་ཏྟཱ་དི་བྷེ་དེ་སུ ཀ་མྨཱ་དཱི་སུ པ་ཝ་ཏྟ་ཏི. ཨ་ཊྛ མ་ཧཱ་ཝི་པཱ་ཀཱ་ནི པ་ཊི་ས་ནྡྷི་བྷ་ཝ་ངྒ་ཙུ་ཏི་ཏ་དཱ་ར་མྨ་ཎ་ཝ་སེ་ན ཨ་ཛ྄ཛྷ་ཏྟཱ་དི་བྷེ་དེ་སུ དྷ་མྨེ་སུ པ་ཝ་ཏྟ་ན་ཏོ ཨ་ཛ྄ཛྷ་ཏྟཱ་དི་ཨཱ་ལ་མྦ་ཎཱ་ནི. ཧ་སི་ཏུ་པྤཱ་ད་མྤི ཨ་ཏྟ་ནོ རཱུ་པཱ་དཱི་ནི ཨཱ་ར་བྦྷ པ་ཧ་ཊྛཱ་ཀཱ་ར་ཀ་ར་ཎ་ཝ་སེ་ན པ་ཝ་ཏྟི་ཡཾ ཨ་ཛ྄ཛྷ་ཏྟཱ་ར་མྨ་ཎཾ, པ་ར་སྶ རཱུ་པཱ་དཱི་སུ པ་ཝ་ཏྟཾ བ་ཧི་དྡྷཱ་ར་མྨ་ཎཾ. མ་ནོ་དྭཱ་རེ་པི ཨ་ཏྟ་ནོ ཀ་ཏ་ཀི་རི་ཡ་པ་ཙྩ་ཝེ་ཀྑ་ཎེ་ན ཧ་སི་ཏུ་པྤཱ་ད་ནེ ཨ་ཛ྄ཛྷ་ཏྟཱ་ར་མྨ་ཎཾ, པ་རེ་སཾ ཀ་ཏ་ཀི་རི་ཡ་པ་ཙྩ་ཝེ་ཀྑ་ཎེ་ན བ་ཧི་དྡྷཱ་ར་མྨ་ཎཾ, ཏ་དུ་བྷ་ཡ་ཝ་སེ་ན ཨ་ཛ྄ཛྷ་ཏྟ་བ་ཧི་དྡྷཱ་ར་མྨ་ཎཾ. མ་ནོ་དྭཱ་རཱ་ཝ་ཛྫ་ནཾ པ་ན མ་ནོ་དྭཱ་རེ ཨཱ་ཝ་ཛྫ་ན་ཝ་སེ་ན, པ་ཉྩ་དྭཱ་རེ ཙ ཝོ་ཊྛ་བྦ་ན་ཝ་སེ་ན པ་ཝ་ཏྟི་ཡཾ ཨ་ཛ྄ཛྷ་ཏྟཱ་དི་ཨཱ་ར་མྨ་ཎཾ. ཨ་ཊྛ མ་ཧཱ་ཀི་རི་ཡཱ ཀུ་ས་ལ་ག་ཏི་ཀཱ་ཡེ་ཝ. ཀེ་ཝ་ལ་ཉྷི ཏཱ ཁཱི་ཎཱ་ས་ཝཱ་ནཾ ཨུ་པྤ་ཛྫ་ནྟི, ཀུ་ས་ལཱ་ནི སེ་ཁ་པུ་ཐུ་ཛྫ་ནཱ་ན་ནྟི ཨེ་ཏྟ་ཀ་མེ་ཝ ནཱ་ན་ཏྟཾ. རཱུ་པཱ་ཝ་ཙ་ར་པ་ཉྩ་མ་ཛ྄ཛྷཱ་ན་སྶ ཨ་ཛ྄ཛྷ་ཏྟཱ་དི་ཨཱ་ར་མྨ་ཎ་ཏཾ ཝ་ཀྑ་ཏི.
༣༢༩. ‘‘ཕ་ལཾ, མ་གྒ’’ནྟི ཙ སཱ་མ་ཉྙེ་ན པུ་ཙྪི་ཏ་ཏྟཱ ཨཱ་ཧ ‘‘ཙ་ཏྟཱ་རོ…པེ… པུ་ཉྙ་ཏོ’’ཏི.
༣༣༢-༤. ཨ་ར་ཧ་ཏྟ་མ་གྒ་ཕ་ལཱ་ནི པ་ན ཏེ ཛཱ་ནི་ཏུཾ ན ས་ཀྐོ་ནྟི, ཏ་ཐཱ ཀུ་ས་ལཱ་བྷི་ཉྙཱ ཙ. ཏེ་ནཱ་ཧ ‘‘ས་བྦེ་སུ པ་ནཱ’’ཏི་ཨཱ་དི. ཝོ་ཊྛ་བྦ་ན་སྶ ཨཱ་ཝ་ཛྫ་ན་ཀི་ཙྩ་ས་མ་ཡཾ ས་ནྡྷཱ་ཡ གཱ་ཐཱ་བ་ནྡྷ་སུ་ཁ་ཏྠཾ ‘‘ཝོ་ཊྛ་བྦ་ན་མྤི ཙཱ’’ཏི ཝུ་ཏྟཾ. ‘‘ཙ་ཏྟཱ་རོ…པེ… པུ་ཉྙ་ཏོ’’ཏི ཨི་དཾ ཉཱ་ཎ་ས་མྤ་ཡུ་ཏྟ་སྶཱ་པི སེ་ཁ་པུ་ཐུ་ཛྫ་ན་ས་ནྟཱ་ན་པྤ་ཝ་ཏྟ་སྶ ཨ་གྒ་མ་གྒ་ཕ་ལ་ཛཱ་ན་ནེ ཨ་ས་མ་ཏྠ་ཏཱ་ཡ ནི་ད་སྶ་ན་མ་ཏྟཾ. ཀུ་ས་ལཱ་བྷི་ཉྙཱ་ཙི་ཏྟ་མྤི པ་ན ཏཾ གོ་ཙ་རཾ ཀཱ་ཏུ་མ་ས་མ་ཏྠ་མེ་ཝ. ཨེ་ཝ་ཉྩ ཀ་ཏྭཱ ཧེ་ཊྛཱ ‘‘ཀྲི་ཡཱ་བྷི་ཉྙཱ མ་ནོ་དྷཱ་ཏཱུ’’ཏི ཝུ་ཏྟཾ.
༣༣༥-༨. ཀ་སྨཱཏི ཀཱ་ར་ཎ་པུ་ཙྪཱ. ‘‘ཨ་ར་ཧ་ཏོ’’ཏི་ཨཱ་དི ཝི་སྶ་ཛྫ་ནཾ. ཧི-ས་དྡོ ‘‘ཡ་སྨཱ’’ཏི ཨི་མ་སྶ ཨ་ཏྠེ. ཡ་སྨཱ པུ་ཐུ་ཛྫ་ནཱ ཝཱ སེ་ཁཱ ཝཱ ཨ་ར་ཧ་ཏོ མ་གྒ་ཙི་ཏྟཾ, ཕ་ལ་མཱ་ན་ས་ཉྩ ཛཱ་ནི་ཏུཾ ན ས་ཀྐོ་ནྟི, ཏ་སྨཱ་ཏི ཨ་ཏྠོ. ཨ་ཡ་ཉྩ ནེ་སཾ ཨ་ས་མ་ཏྠ་ཏཱ ཨ་ན་དྷི་ག་ཏ་ཏྟཱ ཨ་ན་དྷི་ག་ཏེ ཙ ཝི་ས་ཡེ ས་བྦེ་ས་མྤི མོ་ཧོ ཨ་ཏྠེ་ཝཱ་ཏི ད་སྶེ་ཏུཾ ‘‘པུ་ཐུ་ཛྫ་ནོ ན ཛཱ་ནཱ་ཏཱི’’ཏི་ཨཱ་དི ཝུ་ཏྟཾ. སོ་ཏཱ་པ་ནྣ་སྶ མཱ་ན་སནྟི སོ་ཏཱ་པ་ནྣ་སྶ པཱ་ཊི་པུ་གྒ་ལི་ཀཾ མ་གྒ་ཕ་ལ་ས་ངྑཱ་ཏ་ལོ་ཀུ་ཏྟ་ར་མཱ་ན་སཾ. ཨེ་ཝཾ ‘‘ས་ཀ་དཱ་གཱ་མི་སྶ མཱ་ན་ས’’ནྟི་ཨཱ་དཱི་སུ་པི. ལོ་ཀི་ཡ་མཱ་ན་སཾ པ་ན ཨ་ར་ཧ་ནྟ་སྶཱ་པི ཛཱ་ནཱ་ཏི. ཏ་ཐཱ ཧི ཝུ་ཏྟཾ ‘‘ཨ་ཐ ཁོ མཱ་རོ པཱ་པི་མཱ བྷ་ག་ཝ་ཏོ ཙེ་ཏ་སཱ ཙེ་ཏོ་པ་རི་ཝི་ཏ་ཀྐ་མ་ཉྙཱ་ཡཱ’’ཏི. ཝུ་ཏྟ་མེ་ཝ་ཏྠཾ ས་ངྑི་པི་ཏྭཱ ད་སྶེ་ནྟོ ཨཱ་ཧ ‘‘ཧེ་ཊྛི་མོ ཧེ་ཊྛི་མོ’’ཏི་ཨཱ་དི. ཡ་ཐེ་ཝ ཧེ་ཊྛི་མོ ཧེ་ཊྛི་མོ པུ་གྒ་ལོ ཨུ་པ་རཱུ་པ་རི ཙི་ཏྟཾ ན ཛཱ་ནཱ་ཏི, ཨེ་ཝཾ ཨུ་པ་རི་མོ ཨུ་པ་རི་མོ་པི ཧེ་ཊྛི་མ་སྶ ཧེ་ཊྛི་མ་སྶ ཙི་ཏྟཾ ན ཛཱ་ནཱ་ཏཱི་ཏི ཙེ? ནོ ན ཛཱ་ནཱ་ཏི, སོ པ་ན ཨ་ཏྟ་ནཱ ཨ་དྷི་ག་ཏ་ཝི་ས་ཡ་ཏྟཱ ཛཱ་ནཱ་ཏི་ཡེ་ཝཱ་ཏི ད་སྶེ་ནྟོ ཨཱ་ཧ ‘‘ཨུ་པ་རཱུ་པ་རཱི’’ཏི་ཨཱ་དི. ཡ་ཐཱ ‘‘ཨུ་པ་རཱུ་པ་རཱི’’ཏི ཝུ་ཏྟཾ, ཨེ་ཝཾ ‘‘ཧེ་ཊྛི་མ་སྶ ཧེ་ཊྛི་མ་སྶཱ’’ཏི ཝ་ཏྟ་བྦེ ཨེ་ཀཾ ཧེ་ཊྛི་མ-ས་དྡཾ ཙ-ས་དྡེ་ན ས་ངྒ་ཧེ་ཏྭཱ ‘‘ཧེ་ཊྛི་མ་སྶ ཙ མཱ་ན་ས’’ནྟི ཝུ་ཏྟཾ.
༣༣༩-༤༡. ཨེ་ཝ་མྤི ཝི་ས་ཡཱི་པ་དྷཱ་ན་ཝ་སེ་ན ཝི་བྷཱ་གཾ ད་སྶེ་ཏྭཱ ཨི་དཱ་ནི ཝི་ས་ཡ་པྤ་དྷཱ་ན་ཝ་སེ་ན ད་སྶེ་ཏུཾ ‘‘ཡོ དྷ་མྨོ’’ཏི་ཨཱ་དི ཝུ་ཏྟཾ. ཀུ་ས་ལ་མེ་ཝ ཨཱ་ར་མྨ་ཎ་ནྟི ཀུ་ས་ལཱ་ར་མྨ་ཎཾ. ཀཱ་མེཏི པ་དཾ ཨུ་བྷ་ཡ་ཏྠ ས་མྦ་ནྡྷི་ཏ་བྦཾ ‘‘ཀཱ་མེ ཀུ་ས་ལཱ་ར་མྨ་ཎཾ ཀཱ་མེ ཀུ་ས་ལཱ་ཀུ་ས་ལ་སྶཱ’’ཏི. ཀི་ཉྩཱ་པི ཧི ཨ་ཀུ་ས་ལ་སྶ ཨེ་ཀ་ནྟ་ཀཱ་མཱ་ཝ་ཙ་ར་ཏྟཱ ན ཨེ་ཏ་སྶ ཝི་སེ་སི་ཏ་བྦ་ཏཱ ཨ་ཏྠི, ཀུ་ས་ལཾ པ་ན ཝི་སེ་སི་ཏ་བྦ་མེ་ཝཱ་ཏི ཏཾ ཨ་པེ་ཀྑཱ་ཡ ‘‘ཀཱ་མེ’’ཏི ཨུ་པ་རི་པ་དེ་ན ས་མྦ་ནྡྷི་ཏ་བྦ་མེ་ཝ. ཨ་ཐ ཝཱ ཨ་ཀུ་ས་ལ་ས་ཧ་ཙ་རི་ཡ་ཏོ ཀུ་ས་ལ་མྤི ཀཱ་མཱ་ཝ་ཙ་ར་མེ་ཝ ག་ཡ྄ཧ་ཏཱི་ཏི ‘‘ཀཱ་མེ’’ཏི ཨི་དཾ པུ་རི་མ་པ་ད་སྶེ་ཝ ཝི་སེ་ས་ནཾ ད་ཊྛ་བྦཾ.
ཀཱ་མཱ་ཝ་ཙ་ར་པཱ་ཀ་སྶཱཏི པ་ཉྩ་ཝི་ཉྙཱ་ཎ་ས་མྤ་ཊི་ཙྪ་ནཱ་ནཾ ཨེ་ཀ་ནྟེ་ན རཱུ་པ་ཀྑ་ནྡྷཱ་ར་མྨ་ཎ་ཏྟཱ ཏ་ད་ཝ་སེ་ས་སྶ ཨེ་ཀཱ་ད་ས་ཝི་དྷ་སྶ ཀཱ་མཱ་ཝ་ཙ་ར་ཝི་པཱ་ཀ་སྶ. ཀཱ་མ་ཀྲི་ཡ་སྶཱཏི ཝུ་ཏྟ་ན་ཡེ་ནེ་ཝ མ་ནོ་དྷཱ་ཏུ་ཝ་ཛྫི་ཏ་སྶ ད་ས་ཝི་དྷ་ཀཱ་མཱ་ཝ་ཙ་ར་ཀི་རི་ཡ་ཙི་ཏྟ་སྶ. ཨེ་ཏེ་སཾ…པེ… ཨཱ་ར་མྨ་ཎཾ སི་ཡཱཏི ཨེ་ཏྠ ཀུ་ས་ལ་སྶ ཏཱ་ཝ ཨ་ཏྟ་ནཱ ཀ་ཏ་སྶ དཱ་ནཱ་དི་ཀཱ་མཱ་ཝ་ཙ་ར་ཀུ་ས་ལ་སྶ པ་ས་ནྣ་ཙི་ཏྟེ་ན ཨ་ནུ་སྶ་ར་ཎ་ཀཱ་ལེ, ཏ་ཐེ་ཝ པ་རེ་ཧི ཀ་ཏ་སྶ ཨ་ནུ་མོ་ད་ན་ཀཱ་ལེ, ཏ་སྶེ་ཝ དུ་ཝི་དྷ་སྶཱ་པི ཨ་ནི་ཙྩ་ཏཱ་དི་ཝ་སེ་ན པ་ཙྩ་ཝེ་ཀྑ་ཎ་ཀཱ་ལེ, ཙེ་ཏོ་པ་རི་ཡ་ཉཱ་ཎཱ་དཱི་ནཾ པ་རི་ཏྟ་ཀུ་ས་ལཱ་ར་མྨ་ཎི་ཀ་ཨ་བྷི་ཉྙཱ་ནཾ པ་རི་ཀ་མྨཱ་དི་ཀཱ་ལེ ཙ ཨཱ་ར་མྨ་ཎཾ ཧོ་ཏི. ཨ་ཀུ་ས་ལེ་སུ ཙ ཙ་ཏུ་ནྣཾ དི་ཊྛི་ག་ཏ་ས་མྤ་ཡུ་ཏྟཱ་ནཾ ཀཱ་མཱ་ཝ་ཙ་ར་ཀུ་ས་ལཾ ཨཱ་ར་བྦྷ ཨ་སྶཱ་ད་ནཱ་བྷི་ན་ནྡ་ན་པ་རཱ་མ་ས་ན་ཀཱ་ལེ, དི་ཊྛི་ཝི་པྤ་ཡུ་ཏྟཱ་ནཾ ཀེ་ཝ་ལཾ ཨ་སྶཱ་ད་ནཱ་དི་ཀཱ་ལེ ཙ དྭི་ནྣཾ པ་ཊི་གྷ་ས་མྤ་ཡུ་ཏྟཱ་ནཾ ཨ་ཏྟ་ནཱ, པ་རེ་ཧི ཙ ཀ་ཏ་ཀུ་ས་ལ་མཱ་ར་བྦྷ ཝི་པྤ་ཊི་སཱ་ར་དུ་སྶ་ན་ཀཱ་ལེ, ཝི་ཙི་ཀི་ཙྪཱ་ཙི་ཏྟ་སྶ ཨ་ས་ནྣི་ཊྛཱ་ན་ཀཱ་ལེ, ཨུ་དྡྷ་ཙྩ་ས་ཧ་ག་ཏ་སྶ ཨ་ཝཱུ་པ་ས་མ་ཝི་ཀྑེ་པ་ཀཱ་ལེ ཙ ཨཱ་ར་མྨ་ཎཾ ཧོ་ཏི. ཨ་བྷི་ཉྙཱ་ཙི་ཏྟ་དྭ་ཡེ ཀུ་ས་ལ་སྶ སེ་ཁ་པུ་ཐུ་ཛྫ་ནཱ་ནཾ ཨ་ཏྟ་ནཱ, པ་རེ་ཧི ཝཱ ཀ་ཏ་ཀུ་ས་ལ་སྶ ཨ་ནུ་སྶ་ར་ཎ་ཀཱ་ལེ, པ་ར་ཙི་ཏྟ་ཝི་ཛཱ་ན་ན་ཀཱ་ལེ, ‘‘ཨི་མི་ནཱ པུ་ཉྙ་ཀ་མྨེ་ན མ་ནུ་སྶེ་སུ, ཀཱ་མཱ་ཝ་ཙ་ར་དེ་ཝེ་སུ ཙ ནི་བྦ་ཏྟ་ཏཱི’’ཏི ཛཱ་ན་ན་ཀཱ་ལེ, ‘‘ཨ་ནཱ་ག་ཏེ དཱ་ནཱ་དཱི་ནི པུ་ཉྙཱ་ནི ཀ་རོ་མི, ཀ་རི་སྶ་ཏཱི’’ཏི ཛཱ་ན་ན་ཀཱ་ལེ ཙ ཀི་རི་ཡ་ཙི་ཏྟ་སྶཱ་པི ཁཱི་ཎཱ་ས་ཝཱ་ནཾ ཨ་ཏྟ་ནཱ, པ་རེ་ཧི ཝཱ ཀ་ཏ་ཀ་མྨཱ་ནུ་སྶ་ར་ཎ་ཀཱ་ལཱ་དཱི་སུ ཨཱ་ར་མྨ་ཎཾ ཧོ་ཏི. ཀཱ་མཱ་ཝ་ཙ་ར་ཝི་པཱ་ཀེ་སུ ན་ཝ་ནྣཾ སུ་ག་ཏི་པ་ཊི་ས་ནྡྷཱི་ནཾ ཀ་མྨ་ཀ་མྨ་ནི་མི་ཏྟཱ་ར་མྨ་ཎི་ཀ་པ་ཊི་ས་ནྡྷི་ཀཱ་ལེ, ས་བྦེ་ས་མྤི ཏ་དཱ་ར་མྨ་ཎཱ་ནཾ ཀཱ་མཱ་ཝ་ཙ་ར་ཀུ་ས་ལཱ་ར་མྨ་ཎི་ཀ་ཛ་ཝ་ནཱ་ན་ནྟ་རཾ ཏ་དཱ་ར་མྨ་ཎ་ཀཱ་ལེ ཙ ཨཱ་ར་མྨ་ཎཾ ཧོ་ཏཱི་ཏི. ད་ས་ཝི་དྷ་ཀཱ་མཱ་ཝ་ཙ་ར་ཀི་རི་ཡཱ་སུ ཙ ཨ་ཊྛ་ནྣཾ མ་ཧཱ་ཀི་རི་ཡ་ཙི་ཏྟཱ་ནཾ ཁཱི་ཎཱ་ས་ཝཱ་ནཾ ཀཱ་མཱ་ཝ་ཙ་ར་ཀུ་ས་ལ་པ་ཙྩ་ཝེ་ཀྑ་ཎ་ས་མྨ་ས་ན་ཀཱ་ལེ, པ་རི་ཏྟཱ་ར་མྨ་ཎི་ཀ་ཀི་རི་ཡཱ་བྷི་ཉྙཱ་ནཾ པ་རི་ཀ་མྨཱ་དི་ཀཱ་ལེ, ཧ་སི་ཏུ་པྤཱ་ད་སྶ དཱ་ནཱ་དིཾ པ་ཙྩ་ཝེ་ཀྑི་ཏྭཱ ཏུ་སྶ་ན་ཀཱ་ལེ, མ་ནོ་དྭཱ་རཱ་ཝ་ཛྫ་ན་སྶ པ་ན ཀཱ་མཱ་ཝ་ཙ་ར་ཀུ་ས་ལཱ་ར་མྨ་ཎི་ཀ་ཛ་ཝ་ནཱ་ནཾ པུ་རེ་ཙཱ་རི་ཀ་ཀཱ་ལེ ཙ ཨཱ་ར་མྨ་ཎཾ ཧོ་ཏཱི་ཏི ཨེ་ཝཾ ཀཱ་མཱ་ཝ་ཙ་ར་ཀུ་ས་ལཾ ཚ་ནྣཾ རཱ་སཱི་ནཾ ཨཱ་ར་མྨ་ཎཾ ཧོ་ཏི.
༣༤༢. ཏ་ཏོཏི ཡ་ཐཱ་ཝུ་ཏྟ་རཱ་སི་ཏོ. ཏེ་ནཱ་ཧ ‘‘པ་ཉྩ་ནྣཾ པ་ན རཱ་སཱི་ན’’ནྟི. ཨེ་ཏྠ ཙ ཀི་རི་ཡ་ཙི་ཏྟེ་སུ ཧ་སི་ཏུ་པྤཱ་དོ ན ས་མྦྷ་ཝ་ཏི ཨེ་ཀ་ནྟ་པ་རི་ཏྟཱ་ར་མྨ་ཎ་ཏྟཱ. ཏ་ཏྠ ཀཱ་མཱ་ཝ་ཙ་ར་ཀུ་ས་ལ་སྶ ཏཱ་ཝ སེ་ཁ་པུ་ཐུ་ཛྫ་ནཱ་ནཾ ཛྷཱ་ན་པ་ཙྩ་ཝེ་ཀྑ་ཎ་ས་མྨ་ས་ན་ཀཱ་ལེ, རཱུ་པཱ་ཝ་ཙ་ར་ཀུ་ས་ལཱ་ར་མྨ་ཎི་ཀ་ཨ་བྷི་ཉྙཱ་ནཾ པ་རི་ཀ་མྨཱ་དི་ཀཱ་ལེ, ཨ་ཀུ་ས་ལ་སྶ ཝུ་ཏྟ་ན་ཡེ་ན པ་རཱ་མ་ས་ནཱ་དི་ཀཱ་ལེ, ཨ་བྷི་ཉྙཱ་སུ ཀུ་ས་ལཱ་བྷི་ཉྙཱ་ཡ སེ་ཁ་པུ་ཐུ་ཛྫ་ནཱ་ནཾ ཨ་ཏྟ་ནཱ, པ་རེ་ཧི ཝཱ ཨ་ཏཱི་ཏ་བྷ་ཝེ ཨུ་པྤཱ་དི་ཏ་ཛྷཱ་ནཱ་ནུ་སྶ་ར་ཎ་ཀཱ་ལེ, པ་རེ་སཾ རཱུ་པཱ་ཝ་ཙ་ར་ཙི་ཏྟ་པ་རི་ཙྪི་ནྡ་ན་ཀཱ་ལེ, ‘‘ཨི་མི་ནཱ ཀ་མྨེ་ན ཨི་མ་སྨིཾ བྲ་ཧྨ་ལོ་ཀེ ནི་བྦ་ཏྟི་སྶ་ཏཱི’’ཏི ཛཱ་ན་ན་ཀཱ་ལེ ཙ ‘‘ཨ་ནཱ་ག་ཏེ ཛྷཱ་ནཾ བྷཱ་ཝེ་སྶ་ཏཱི’’ཏི ཝཱ ཛཱ་ན་ན་ཀཱ་ལེ, ཀི་རི་ཡཱ་བྷི་ཉྙཱ་ཡ ཙ ཁཱི་ཎཱ་ས་ཝཱ་ནཾ ཡ་ཐཱ་ཝུ་ཏྟ་ཝ་སེ་ན པ་ཝ་ཏྟི་ཀཱ་ལེ ཙ ན་ཝ་ཝི་དྷ་སྶ པ་ན ཀི་རི་ཡ་ཙི་ཏྟ་སྶ ཁཱི་ཎཱ་ས་ཝཱ་ནཾ ཧེ་ཊྛཱ ཝུ་ཏྟ་ན་ཡེ་ན རཱུ་པཱ་ཝ་ཙ་ར་ཀུ་ས་ལ་པ་ཙྩ་ཝེ་ཀྑ་ཎ་ཀཱ་ལེ་ཏི ཨེ་ཝཾ རཱུ་པཱ་ཝ་ཙ་ར་ཀུ་ས་ལཾ པ་ཉྩ་ནྣཾ རཱ་སཱི་ནཾ ཨཱ་ར་མྨ་ཎཾ ཧོ་ཏི.
༣༤༣-༧. ཨཱ་རུ་པྤ་ཀུ་ས་ལ་ཉྩཱ་པི ཨཱ་ར་མྨ་ཎ་པ་ཙྩ་ཡོ ཧོ་ཏཱི་ཏི ས་མྦ་ནྡྷོ. ཏེ་བྷཱུ་མ་ཀ་ཀུ་ས་ལ་སྶཱཏི ས་བྦ་སྶ ཀཱ་མཱ་ཝ་ཙ་ར་ཀུ་ས་ལ་སྶ, རཱུ་པཱ་ཝ་ཙ་ར་ཀུ་ས་ལེ་སུ ཀུ་ས་ལཱ་བྷི་ཉྙཱ་ཡ, ཨ་རཱུ་པཱ་ཝ་ཙ་ར་ཀུ་ས་ལེ་སུ དུ་ཏི་ཡ་ཙ་ཏུ་ཏྠ་ཀུ་ས་ལ་སྶ ཙཱ་ཏི ཨི་མ་སྶ ཏེ་བྷཱུ་མ་ཀ་ཀུ་ས་ལ་སྶ. ཨེ་ས ན་ཡོ ‘‘ཏེ་བྷཱུ་མ་ཀ་ཀྲི་ཡ་སྶཱ’’ཏི ཨེ་ཏྠཱ་པི. ‘‘ཙ་ཏུ་ཏྠ་དཱུ་ན’’ནྟི ཝཱ ‘‘ཙ་ཏུ་ཏྠ་དུ་ཏི་ཡཱ་ན’’ནྟི ཝཱ ཝ་ཏྟ་བྦེ གཱ་ཐཱ་བ་ནྡྷ་ཝ་སེ་ན ཝི་བྷ་ཏྟི་ཡཱ, ས་ཝི་བྷ་ཏྟི་སྶ ཝཱ ཏི་ཡ-ས་དྡ་སྶ ལོ་པཾ ཀ་ཏྭཱ ‘‘ཙ་ཏུ་ཏྠ་དཱུ’’ཏི ཝུ་ཏྟཾ. ཨི་མེ་སཾ…པེ… པ་ཙྩ་ཡོཏི ཀཱ་མཱ་ཝ་ཙ་ར་ཀུ་ས་ལ་སྶ, ཏཱ་ཝ ཨ་བྷི་ཉྙཱ་ཀུ་ས་ལ་སྶ ཙ རཱུ་པཱ་ཝ་ཙ་རཱ་ར་མྨ་ཎེ་སུ ཝུ་ཏྟ་ན་ཡེ་ན དུ་ཏི་ཡ་ཙ་ཏུ་ཏྠཱ་རུ་པྤ་སྶ པ་ཋ་མ་ཏ་ཏི་ཡ་ཝ་སེ་ནཱ་ཏི ཨེ་ཝཾ ཏེ་བྷཱུ་མ་ཀ་ཀུ་ས་ལ་སྶ ཏ་ཐཱ སེ་ཁ་པུ་ཐུ་ཛྫ་ན་ཀཱ་ལེ ཨ་ཏྟ་ནོ ས་ནྟཱ་ན་ག་ཏ་སྶ, པ་ར་ས་ནྟཱ་ན་ག་ཏ་སྶ ཝཱ ཨཱ་རུ་པྤ་ཀུ་ས་ལ་སྶ པ་ཛཱ་ན་ན་ཀཱ་ལེ ཀཱ་མཱ་ཝ་ཙ་ར་རཱུ་པཱ་ཝ་ཙ་ར་ཀི་རི་ཡ་ཙི་ཏྟ་སྶ སེ་ཁ་པུ་ཐུ་ཛྫ་ན་ཀཱ་ལེ་ཡེ་ཝ ཨ་ཏྟ་ནཱ ནི་བྦ་ཏྟི་ཏཾ པ་ཋ་མ་ཏ་ཏི་ཡཱ་རུ་པྤཾ ཨཱ་ར་བྦྷ ཁཱི་ཎཱ་ས་ཝ་ཀཱ་ལེ དུ་ཏི་ཡ་ཙ་ཏུ་ཏྠཱ་རུ་པྤ་ནི་བྦ་ཏྟ་ནེ ཨ་རཱུ་པ་ཀི་རི་ཡ་ཙི་ཏྟ་སྶཱ་ཏི ཨེ་ཝཾ ཏེ་བྷཱུ་མ་ཀ་ཀི་རི་ཡ་སྶ ཧེ་ཊྛཱ ཝུ་ཏྟ་ན་ཡེ་ནེ་ཝ ཨ་ཀུ་ས་ལ་སྶ, ཙ་ཏུ་ཏྠ་དུ་ཏི་ཡཱ་ན་ཉྩ ཨ་རཱུ་པཱ་ཝ་ཙ་ར་ཝི་པཱ་ཀཱ་ན་ནྟི ཨེ་ཝ་མེ་ཏེ་སཾ ཨ་ཊྛ་ནྣཾ རཱ་སཱི་ནཾ ཨ་རཱུ་པ་ཀུ་ས་ལ་མཱ་ར་མྨ་ཎཾ ཧོ་ཏི.
པ་རི་ཙྪི་ཛྫ གཱ་ཧི་ཀཱ་ཡ ཏ་ཎྷཱ་ཡ ཨཱ་པ་ནྣ་ནྟི པ་རི་ཡཱ་པ་ནྣཾ, ཏེ་བྷཱུ་མ་ཀ་དྷ་མྨ་ཛཱ་ཏཾ, ན པ་རི་ཡཱ་པ་ནྣ་ནྟི ཨ་པ་རི་ཡཱ་པ་ནྣཾ, ཏ་དེ་ཝ པུ་ཉྙ་ཉྩཱ་ཏི ཨ་པ་རི་ཡཱ་པ་ནྣ་པུ་ཉྙཾ. ཀཱ་མཱ་ཝ་ཙ་ར་ཏོ་པི ཀུ་ས་ལ་སྶ ཀི་རི་ཡ་སྶཱ་ཏི ས་མྦ་ནྡྷོ. རཱུ་པ་ཏོཏི རཱུ་པཱ་ཝ་ཙ་ར་ཏོ. ཙ་ཏུ་ནྣཾ…པེ… ས་དཱཏི སེ་ཁཱ་ནཾ མ་གྒ་པ་ཙྩ་ཝེ་ཀྑ་ཎ་ཀཱ་ལེ མ་གྒཱ་ར་མྨ་ཎི་ཀ་ཀུ་ས་ལཱ་བྷི་ཉྙཱ་ཡ པ་རི་ཀ་མྨཱ་དི་ཀཱ་ལེ ཉཱ་ཎ་ས་མྤ་ཡུ་ཏྟ་ཀུ་ས་ལ་སྶ, ཁཱི་ཎཱ་ས་ཝཱ་ནཾ མ་གྒ་པ་ཙྩ་ཝེ་ཀྑ་ཎ་ཀཱ་ལེ མ་གྒཱ་ར་མྨ་ཎི་ཀ་ཀི་རི་ཡཱ་བྷི་ཉྙཱ་ཡ ཙ པ་རི་ཀ་མྨ་ཀཱ་ལེ ཉཱ་ཎ་ས་མྤ་ཡུ་ཏྟ་ཀི་རི་ཡ་ཙི་ཏྟ་སྶ, ཏེ་སཾ ཏེ་སཾ ཛ་ཝ་ནཱ་ནཾ པུ་རེ་ཙ་ར་ཝ་སེ་ན པ་ཝ་ཏྟི་ཀཱ་ལེ མ་ནོ་དྭཱ་རཱ་ཝ་ཛྫ་ན་སྶ, སེ་ཁཱ་ནཾ ཨ་ཏྟ་ནོ, པ་རེ་སཾ ཝཱ མ་གྒ་ཛཱ་ན་ན་ཀཱ་ལེ ཨ་བྷི་ཉྙཱ་དྭ་ཡ་སྶཱ་ཏི ཨེ་ཝ་མེ་ཏེ་སཾ ཙ་ཏུ་ནྣཾ རཱ་སཱི་ནཾ ཨ་པ་རི་ཡཱ་པ་ནྣ་ཀུ་ས་ལ་མཱ་ར་མྨ་ཎཾ ཧོ་ཏི.
ཏ་ཐེ་ཝཱ་ཀུ་ས་ལཾ…པེ… ཨཱི་རི་ཏནྟི སེ་ཁཱ་ནཾ པ་ཧཱི་ནཱ་ཝ་སི་ཊྛ་ཀི་ལེ་ས་པ་ཙྩ་ཝེ་ཀྑ་ཎ་ཀཱ་ལེ, སེ་ཁ་པུ་ཐུ་ཛྫ་ནཱ་ནཾ ཨ་ཏྟ་ནོ, པ་རེ་སཾ ཝཱ ས་ནྟཱ་ན་པྤ་ཝ་ཏྟཱ་ཀུ་ས་ལ་ས་མྨ་ས་ན་ཀཱ་ལེ, ཨ་ཀུ་ས་ལཱ་ར་མྨ་ཎི་ཀ་ཀུ་ས་ལཱ་བྷི་ཉྙཱ་ཡ པ་རི་ཀ་མྨཱ་དི་ཀཱ་ལེ ཀཱ་མཱ་ཝ་ཙ་ར་ཀུ་ས་ལ་སྶ, ཨ་ཏྟ་ནོ, པ་རེ་སཾ ཝཱ པ་ཝ་ཏྟ་ཨ་ཀུ་ས་ལཱ་ནུ་སྶ་ར་ཎཱ་དཱི་སུ རཱུ་པཱ་ཝ་ཙ་ར་ཀུ་ས་ལ་སྶ, ཁཱི་ཎཱ་ས་ཝཱ་ནཾ པ་ཧཱི་ན་ཀི་ལེ་ས་པ་ཙྩ་ཝེ་ཀྑ་ཎ་ཨ་ཉྙ་ས་ནྟཱ་ན་ག་ཏ་ཨ་ཀུ་ས་ལ་ས་མྨ་ས་ནཱ་དི་ཀཱ་ལེ, པ་ཧཱི་ན་ཀི་ལེ་ས་པ་ཙྩ་ཝེ་ཀྑ་ཎེ་ན ཏུ་སྶ་ན་ཀཱ་ལེ, ས་བྦེ་ས་མྤི ཏཾ་ཏཾ་ཛ་ཝ་ནཱ་ནཾ པུ་རེ་ཙ་ར་ཀཱ་ལེ ཙ ཀཱ་མཱ་ཝ་ཙ་ར་ཀི་རི་ཡ་ཙི་ཏྟ་སྶ, ཀུ་ས་ལཱ་བྷི་ཉྙཱ་ཡ ཝུ་ཏྟ་ན་ཡེ་ན རཱུ་པཱ་ཝ་ཙ་ར་ཀི་རི་ཡ་ཙི་ཏྟ་སྶ, པ་རཱ་མཱ་ས་ཨ་སྶཱ་ད་ནཱ་བྷི་ན་ནྡ་ནཱ་དི་ཝ་སེ་ན པ་ཝ་ཏྟི་ཡཾ ཨ་ཀུ་ས་ལ་སྶ, ཨུ་དྡྷ་ཙྩ་ར་ཧི་ཏ་ཀ་མྨཱ་ར་མྨ་ཎ་ཝ་སེ་ན ཨ་ཀུ་ས་ལ་ཝི་པཱ་ཀ་ས་ནྟཱི་ར་ཎ་སྶ, ཀཱ་མཱ་ཝ་ཙ་ར་ཛ་ཝ་ནཱ་ནཾ ཨ་ནུ་སྶ་ར་ཎ་ཀཱ་ལེ ས་བྦ་མྤི ཨེ་ཀཱ་ད་ས་ཏ་དཱ་ར་མྨ་ཎ་ཝི་པཱ་ཀ་སྶཱ་ཏི ཨེ་ཝཾ ཀཱ་མཱ་ཝ་ཙ་ར་ཝི་པཱ་ཀཱ་ན་ནྟི ཨེ་ཝ་མེ་ཏེ་སཾ ཚ་ནྣཾ རཱ་སཱི་ནཾ ཨ་ཀུ་ས་ལ་མཱ་ར་མྨ་ཎཾ ཧོ་ཏི.
༣༤༨-༥༦. ཝི་པཱ་ཀཱ་ར་མྨ་ཎཾ…པེ… པ་ཙྩ་ཡོཏི སེ་ཁ་པུ་ཐུ་ཛྫ་ནཱ་ནཾ ཝི་པཱ་ཀ་ས་མྨ་ས་ནཱ་དི་ཀཱ་ལེ ཀཱ་མཱ་ཝ་ཙ་ར་ཀུ་ས་ལ་སྶ, ཝི་པཱ་ཀ་ཀྑ་ནྡྷཱ་ནུ་སྶ་ར་ཎཱ་དཱི་སུ རཱུ་པཱ་ཝ་ཙ་ར་ཀུ་ས་ལ་སྶ, ཝུ་ཏྟ་ན་ཡེ་ནེ་ཝ ཁཱི་ཎཱ་ས་ཝཱ་ནཾ ཝི་པཱ་ཀ་ས་མྨ་ས་ནཱ་དི་ཀཱ་ལེ, པུ་ཐུ་ཛྫ་ན་ཀཱ་ལེ ཨ་ནི་ཊྛ་ཝི་པཱ་ཀཱ་བྷཱ་ཝཾ ཨཱ་ར་བྦྷ ཏུ་སྶ་ན་ཀཱ་ལེ, ཡ་ཐཱ་ཝུ་ཏྟ་ཛ་ཝ་ནཱ་ནཾ པུ་རེ་ཙ་ར་ཀཱ་ལེ ཀཱ་མཱ་ཝ་ཙ་ར་ཀི་རི་ཡ་ཙི་ཏྟ་སྶ, ཀུ་ས་ལེ་སུ ཝུ་ཏྟ་ན་ཡེ་ནེ་ཝ རཱུ་པཱ་ཝ་ཙ་ར་ཀི་རི་ཡ་ཙི་ཏྟ་སྶ, ཝི་པཱ་ཀཾ ཨཱ་ར་བྦྷ ཏ་དཱ་ར་མྨ་ཎ་པྤ་ཝ་ཏྟི་ཡཾ ཝི་པཱ་ཀཱ་ར་མྨ་ཎི་ཀ་ཀ་མྨུ་ནཱ པ་ཊི་ས་ནྡྷིཾ ག་ཎྷ་ནྟ་སྶ ཀ་མྨ་ནི་མི་ཏྟ་ཝ་སེ་ན པ་ཝ་ཏྟི་ཡ་ཉྩ ཀཱ་མཱ་ཝ་ཙ་ར་ཝི་པཱ་ཀ་སྶ, ཨ་སྶཱ་ད་ནཱ་བྷི་ན་ནྡ་ན་པ་རཱ་མཱ་སཱ་དི་ཝ་སེ་ན པ་ཝ་ཏྟི་ཡཾ ཨ་ཀུ་ས་ལ་སྶཱ་ཏི ཨེ་ཝ་མེ་ཏེ་སཾ ཚ་ནྣཾ རཱ་སཱི་ནཾ ཀཱ་མཱ་ཝ་ཙ་ར་ཝི་པཱ་ཀ་མཱ་ར་མྨ་ཎ་པ་ཙྩ་ཡོ ཧོ་ཏཱི་ཏི. རཱུ་པཱ་ཝ་ཙ་ར་ཝི་པཱ་ཀཱ་ར་མྨ་ཎེ་པི ཨི་མི་ནཱ་ཝ ན་ཡེ་ན ཡོ་ཛ་ནཱ ཀཱ་ཏ་བྦཱ. ཀེ་ཝ་ལ་ཉྷི ཏཾ ཀཱ་མཱ་ཝ་ཙ་ར་ཝི་པཱ་ཀཱ་ནཾ ཀི་རི་ཡ་ཙི་ཏྟེ་སུ ཙ ཧ་སི་ཏུ་པྤཱ་ད་སྶཱ་ར་མྨ་ཎཾ ན ཧོ་ཏཱི་ཏི ཨ་ཡ་མེ་ཏྠ ཝི་སེ་སོ. ལོ་ཀུ་ཏྟ་ར་ཝི་པཱ་ཀ་སྶ ཀཱ་མཱ་ཝ་ཙ་ར་ཀུ་ས་ལ་ཀི་རི་ཡཱ་ན་མཱ་ར་མྨ་ཎ་ཀྐ་མོ ཨ་པྤ་མཱ་ཎཱ་ར་མྨ་ཎ་ནི་དྡེ་སེ ཝུ་ཏྟ་ན་ཡེ་ན ཝེ་དི་ཏ་བྦོ.
ཀཱ་མཱ་ཝ་ཙ་ར་ཀི་རི་ཡ་ཙི་ཏྟ་སྶ ཀཱ་མཱ་ཝ་ཙ་ར་ཀུ་ས་ལཱ་དཱི་ནཾ ཚ་ནྣཾ རཱ་སཱི་ན་མཱ་ར་མྨ་ཎ་ཀྐ་མོ ཀུ་ས་ལཱ་ར་མྨ་ཎེ ཝུ་ཏྟ་ས་དི་སོ་ཝ. ཀེ་ཝ་ལ་ཉྷི ཨེ་ཏྠ ཡ་དེ་ཏཾ ཁཱི་ཎཱ་ས་ཝ་ས་ནྟཱ་ན་སྶེ་ཝ ནི་ཡ་ཏཾ ན་ཝ་ཝི་དྷཾ ཀི་རི་ཡ་ཙི་ཏྟཾ, ཏཾ པ་ར་ས་ནྟཱ་ན་པྤ་ཝ་ཏྟ་ཀུ་ས་ལཱ་ཀུ་ས་ལ་སྶ, ས་ས་ནྟཱ་ནེ་ཝ སེ་ཁ་པུ་ཐུ་ཛྫ་ན་ཀཱ་ལེ ཨ་ནཱ་ག་ཏཱ་ར་མྨ་ཎི་ཀ་ཨ་བྷི་ཉྙཱ་ཡ པ་རི་ཀ་མྨཱ་དི་ཝ་ས་པྤ་ཝ་ཏྟ་ཀུ་ས་ལ་སྶ ཨཱ་ར་མྨ་ཎཾ ཧོ་ཏི. ཝི་པཱ་ཀེ་སུ ཙ པ་ཊི་ས་ནྡྷི་བྷ་ཝ་ངྒ་ཙུ་ཏི་ས་ངྑཱ་ཏཱ་ནཾ ཝི་པཱ་ཀཱ་ནཾ ཀ་མྨཱ་ར་མྨ་ཎ་ཝ་སེ་ན ཨཱ་ར་མྨ་ཎཾ ན ཧོ་ཏཱི་ཏི ཨ་ཡ་མེ་ཝ ཝི་སེ་སོ.
རཱུ་པཱ་ཝ་ཙ་ར་ཀི་རི་ཡ་ཙི་ཏྟ་སྶ པ་ཉྩ་ནྣཾ རཱ་སཱི་ནཾ ཨཱ་ར་མྨ་ཎ་ཀྐ་མོ ཀུ་ས་ལཱ་ར་མྨ་ཎེ ཝུ་ཏྟ་ས་དི་སོ་ཝ. ཝི་སེ་སོ་པི ཀཱ་མཱ་ཝ་ཙ་ར་ཀི་རི་ཡཱ་ར་མྨ་ཎེ ཝུ་ཏྟ་ན་ཡེ་ནེ་ཝ ཝེ་དི་ཏ་བྦོ. ཨཱ་རུ་པྤ་ཀི་རི་ཡ་ཙི་ཏྟ་སྶཱ་པི ཏེ་སཾ པ་ཉྩ་ནྣཾ རཱ་སཱི་ནཾ གོ་ཙ་ར་བྷཱ་ཝོ ཝུ་ཏྟ་ས་དི་སོ་ཝ. ཨཱ་རུ་པྤ་ཀི་རི་ཡ་སྶ པ་ན པ་ཋ་མ་ཏ་ཏི་ཡཾ དུ་ཏི་ཡ་ཙ་ཏུ་ཏྠ་སྶེ་ཝ གོ་ཙ་རོ ཧོ་ཏི.
༣༥༧-༨. ཨེ་ཝཾ རཱུ་པ་ནི་བྦཱ་ན་ཝ་ཛྫི་ཏ་མཱ་ར་མྨ་ཎཾ ད་སྶེ་ཏྭཱ ཨི་དཱ་ནི རཱུ་པཱ་ར་མྨ་ཎཾ, ནི་བྦཱ་ནཱ་ར་མྨ་ཎ་ཉྩ ད་སྶེ་ཏུཾ ‘‘རཱུ་པཾ ཙ་ཏུ་ས་མུ་ཊྛཱ་ན’’ནྟི་ཨཱ་དི ཨཱ་ར་དྡྷཾ. རཱུ་པནྟི ཨ་ཊྛ་ཝཱི་ས་ཏི་ཝི་དྷོ བྷཱུ་ཏོ་པཱ་དཱ་ཡ་བྷེ་ད་བྷི་ནྣོ རཱུ་པ་ཀྑ་ནྡྷོ. ཀི་ཉྩཱ་པི ན ས་བྦ་མེ་ཝ རཱུ་པཾ པ་ཙྩེ་ཀཾ ཙ་ཏུ་ས་མུ་ཊྛཱ་ནཾ, ས་མུ་དི་ཏོ པ་ན རཱུ་པ་ཀྑ་ནྡྷོ ཙ་ཏཱུ་ཧི ཨེ་ཝ ས་མུ་ཊྛཱ་ནེ་ཧི ས་མུ་ཊྛཱ་ཏཱི་ཏི ཀ་ཏྭཱ ཝུ་ཏྟཾ ‘‘ཙ་ཏུ་ས་མུ་ཊྛཱ་ན’’ནྟི. ཀཱ་མ་པཱ་ཀ་ཀི་རི་ཡ་སྶཱཏི ཀཱ་མཱ་ཝ་ཙ་ར་ཝི་པཱ་ཀ་སྶ, ཀཱ་མཱ་ཝ་ཙ་ར་ཀི་རི་ཡ་ཙི་ཏྟ་སྶ ཙ, ཏ་ཏྠ ཙ ཀཱ་མཱ་ཝ་ཙ་ར་ཀུ་ས་ལ་སྶ ཏཱ་ཝ ཝ་ཎྞ་དཱ་ནཱ་དི་པུ་ཉྙ་ཀི་རི་ཡ་ཀཱ་ལེ, ཝ་ཎྞཱ་དཱི་ནཾ ཨ་ནི་ཙྩཱ་དི་ཝ་སེ་ན ས་མྨ་ས་ན་ཀཱ་ལེ, ཨ་བྷི་ཉྙཱ་ཡ པ་རི་ཀ་མྨཱ་དི་ཀཱ་ལེ, ཨ་ཀུ་ས་ལ་སྶ ཨ་སྶཱ་ད་ནཱ་བྷི་ན་ནྡ་ན་པ་རཱ་མཱ་སཱ་དི་ཀཱ་ལེ, ཨ་བྷི་ཉྙཱ་དྭ་ཡ་སྶ ཨི་དྡྷི་ཝི་དྷ་བྷཱུ་ཏ་སྶ སུ་ཝ་ཎྞ་དུ་བྦ་ཎྞཱ་དི་རཱུ་པ་ནི་མྨཱ་ན་ཀཱ་ལེ, པུ་བྦེ་ནི་ཝཱ་སཱ་ནུ་སྶ་ཏི་བྷཱུ་ཏ་སྶ ‘‘པུ་རི་མ་བྷ་ཝེ ཨེ་ཝཾ་ཝ་ཎྞོ ཨ་ཧོ་སི’’ནྟི་ཨཱ་དི་ནཱ ཨ་ནུ་སྶ་ར་ཎ་ཀཱ་ལེ, དི་བྦ་ཙ་ཀྑུ་བྷཱུ་ཏ་སྶ ཙ་ཝ་མཱ་ན་ཨུ་པ་པ་ཛྫ་མཱ་ན་ས་ཏྟཱ་ནཾ ཝ་ཎྞ་ད་སྶ་ན་ཀཱ་ལེ, དི་བྦ་སོ་ཏ་བྷཱུ་ཏ་སྶ ས་དྡ་ས་ཝ་ན་ཀཱ་ལེ, ཨ་ནཱ་ག་ཏཾ་ས་ཉཱ་ཎ་བྷཱུ་ཏ་སྶ ‘‘ཨ་ནཱ་ག་ཏེ ཨེ་ཝཾ་ཝ་ཎྞོ བྷ་ཝི་སྶཱ་མཱི’’ཏི་ཨཱ་དི་ནཱ ཛཱ་ན་ན་ཀཱ་ལེ, ཀཱ་མཱ་ཝ་ཙ་ར་ཝི་པཱ་ཀེ་སུ དྭི་པ་ཉྩ་ཝི་ཉྙཱ་ཎ་ས་མྤ་ཊི་ཙྪ་ན་དྭ་ཡ་སྶ ཡ་ཐཱ་ཡོ་གཾ རཱུ་པཱ་དི་ཝི་ཛཱ་ན་ན་ཀཱ་ལེ, སུ་ཁ་ས་ནྟཱི་ར་ཎ་སྶ ས་ནྟཱི་ར་ཎ་ཏ་དཱ་ར་མྨ་ཎ་ཀཱ་ལེ, ཨུ་པེ་ཀྑཱ་ས་ནྟཱི་ར་ཎ་དྭ་ཡ་སྶ ས་ནྟཱི་ར་ཎ་ཏ་དཱ་ར་མྨ་ཎ་ཀ་མྨ་ནི་མི་ཏྟ་ག་ཏི་ནི་མི་ཏྟཱ་ར་མྨ་ཎ་ཀཱ་ལེ, ས་ཧེ་ཏུ་ཀ་ཝི་པཱ་ཀ་སྶ ཀ་མྨ་ནི་མི་ཏྟ་ག་ཏི་ནི་མི་ཏྟཱ་ར་མྨ་ཎ་ཀཱ་ལེ, ཏ་དཱ་ར་མྨ་ཎ་ཀཱ་ལེ ཙ, ཀཱ་མཱ་ཝ་ཙ་ར་ཀི་རི་ཡཱ་སུ པ་ན ཀུ་ས་ལེ ཝུ་ཏྟ་ན་ཡཱ་ནུ་སཱ་རེ་ན ཨ་ཊྛ་མ་ཧཱ་ཀི་རི་ཡ་ཙི་ཏྟ་སྶ, ‘‘ཨེ་ཝ་རཱུ་པཾ ཝ་ཎྞཱ་དི་མ་དཱ་སི’’ནྟི ཏུ་སྶ་ན་ཀཱ་ལེ ཧ་སི་ཏུ་པྤཱ་ད་སྶ, པ་ཉྩ་དྭཱ་ར་མ་ནོ་དྭཱ་རེ་སུ ཝོ་ཊྛ་བྦ་ནཱ་ཝ་ཛྫ་ན་ཀཱ་ལེ མ་ནོ་དྭཱ་རཱ་ཝ་ཛྫ་ན་སྶ, པ་ཉྩ་དྭཱ་རེ ཨཱ་ཝ་ཛྫ་ན་ཀཱ་ལེ པ་ཉྩ་དྭཱ་རཱ་ཝ་ཛྫ་ན་སྶ ཙ ཨཱ་ར་མྨ་ཎཾ ཧོ་ཏཱི་ཏི ཨེ་ཝཾ ཙ་ཏུ་ས་མུ་ཊྛཱ་ནི་ཀཾ རཱུ་པཾ ཚ་ནྣཾ རཱ་སཱི་ན་མཱ་ར་མྨ་ཎཾ ཧོ་ཏི.
༣༥༩-༦༠. ནི་བྦཱ་ནཾ པ་ན གོ་ཏྲ་བྷུ་ཝོ་དཱ་ན་ཀཱ་ལེ, ནི་བྦཱ་ནཱ་ར་མྨ་ཎི་ཀ་ཨ་བྷི་ཉྙཱ་ཡ པ་རི་ཀ་མྨཱ་དི་ཀཱ་ལེ ཙ ཀཱ་མཱ་ཝ་ཙ་ར་ཏི་ཧེ་ཏུ་ཀ་ཀུ་ས་ལ་སྶ, ཨ་ཏཱི་ཏ་བྷ་ཝེ ས་ཙྪི་ཀ་ཏ་ནི་རོ་དྷཱ་ནུ་སྶ་ར་ཎ་ཀ་ཨཱ་ལཱ་དཱི་སུ རཱུ་པཱ་ཝ་ཙ་ར་ཀུ་ས་ལ་སྶ, ཝུ་ཏྟ་ན་ཡེ་ནེ་ཝ ཀཱ་མ་རཱུ་པཱ་ཝ་ཙ་ར་ཀི་རི་ཡ་ཙི་ཏྟ་སྶ, མ་གྒ་ཊྛཱ་ནཾ ཏ་ད་ན་ནྟ་ར་ཕ་ལ་ཝ་ལ༹་ཉྫ་ན་ཕ་ལ་ཀཱ་ལེ་སུ ཨ་པ་རི་ཡཱ་པ་ནྣ་ཀུ་ས་ལ་ཝི་པཱ་ཀ་སྶ ཙཱ་ཏི ཨེ་ཝཾ ཚ་ནྣཾ རཱ་སཱི་ནཾ ཨཱ་ར་མྨ་ཎཾ ཧོ་ཏཱི་ཏི ད་སྶེ་ཏུཾ ‘‘ནི་བྦཱ་ནཱ་ར་མྨ་ཎ’’ནྟི་ཨཱ་དི ཝུ་ཏྟཾ. ཨུ་བྷ་ཡ་སྶཱཏི ཀཱ་མཱ་ཝ་ཙ་ར་རཱུ་པཱ་ཝ་ཙ་ར་ཝ་སེ་ན དུ་ཝི་དྷ་སྶ.
༣༦༡-༢. ནཱ་ན་པྤ་ཀཱ་ར་ཀནྟི དྭཱ་ད་ས་མ་པ་རི་ཙྪེ་དེ ཝ་ཀྑ་མཱ་ན་ན་ཡེ་ན ནཱ་ནཱ་ཝི་དྷ་པྤ་ཀཱ་རཾ. ན་ཝ་ནྣཾ…པེ… པ་ཙྩ་ཡོཏི ཀཱ་མཱ་ཝ་ཙ་ར་ཀུ་ས་ལ་སྶ, ཨ་ཀུ་ས་ལ་སྶ, ཧ་སི་ཏུ་པྤཱ་ད་མ་ནོ་དྷཱ་ཏུ་ཝ་ཛྫི་ཏ་ཀཱ་མཱ་ཝ་ཙ་ར་ཀི་རི་ཡ་ཙི་ཏྟཱ་ན་ཉྩེ་ཝ དྭི་ནྣཾ ཨ་བྷི་ཉྙཱ་ཙི་ཏྟཱ་ན་ཉྩ ས་བྦཱ་པི པ་ཉྙ་ཏྟི, རཱུ་པཱ་ཝ་ཙ་ར་ཀུ་ས་ལ་ཝི་པཱ་ཀ་ཀི་རི་ཡཱ་ནཾ ཀ་སི་ཎ་ནི་མི་ཏྟཱ་དི་ཀཱ, པ་ཋ་མཱ་རུ་པྤ་ཀུ་ས་ལ་ཝི་པཱ་ཀ་ཀི་རི་ཡཱ་ནཾ ཨཱ་ཀཱ་ས་པ་ཉྙ་ཏྟི, ཏ་ཏི་ཡཱ་རུ་པྤ་ཀུ་ས་ལཱ་དཱི་ནཾ ཏི་ཎྞཾ ཨ་བྷཱ་ཝ་པ་ཉྙ་ཏྟཱི་ཏི ཨེ་ཝཾ པ་ཉྙ་ཏྟི ན་ཝ་ནྣཾ རཱ་སཱི་ནཾ ཨཱ་ར་མྨ་ཎ་པ་ཙྩ་ཡོ ཧོ་ཏཱི་ཏི.
༣༦༣-༥. ཨེ་ཝཾ ཡོ དྷ་མྨོ ཡ་སྶ དྷ་མྨ་སྶ ཨཱ་ར་མྨ་ཎཾ ཧོ་ཏི, ཏཾ ཨེ་ཀེ་ཀུ་དྡྷཱ་ར་ཝ་སེ་ན ད་སྶེ་ཏྭཱ ཨི་དཱ་ནི ས་བྦེ ཙ་ཏུ་བྷཱུ་མ་ཀ་ཙི་ཏྟུ་པྤཱ་དེ ཚ་ཧི ཨཱ་ར་མྨ་ཎེ་ཧི ཡོ་ཛེ་ཏྭཱ ད་སྶེ་ཏུཾ ‘‘རཱུ་པཱ་ར་མྨ་ཎི་ཀཱ དྭེ’’ཏི་ཨཱ་དི གཱ་ཐཱ་ཏྟ་ཡཾ ཝུ་ཏྟཾ. ཏཾ ཧེ་ཊྛཱ ཝུ་ཏྟ་ཏྠ་མེ་ཝ.
༣༦༦-༩. ‘‘པ་ཋ་མཱ་རུ་པྤ་ཀུ་ས་ལ’’ནྟི་ཨཱ་དི པ་ན ཧེ་ཊྛཱ ཝུ་ཏྟ་ན་ཡ་མྤི ཨ་རཱུ་པཱ་ཝ་ཙ་རཱ་ར་མྨ་ཎེ་སུ ཨ་རཱུ་པཱ་ཝ་ཙ་ར་དྷ་མྨཱ་ནཾ སེ་ཁཱ་སེ་ཁ་ཝ་སེ་ན ནཱ་ན་པྤ་ཀཱ་ར་ཏོ པ་ཝ་ཏྟི་ཨཱ་ཀཱ་རཾ པ་ཀཱ་སེ་ཏུཾ ཝུ་ཏྟཾ. ཀུ་ས་ལ་སྶཱཏི སེ་ཁ་པུ་ཐུ་ཛྫ་ནཱ་ནཾ དུ་ཏི་ཡཱ་རུ་པྤ་ཀུ་ས་ལ་སྶ. ཝི་པཱ་ཀ་སྶ པ་ན ཁཱི་ཎཱ་ས་ཝཱ་ནཾ པ་ཝ་ཏྟ་མཱ་ན་སྶཱ་པི ཨཱ་ར་མྨ་ཎཾ ཧོ་ཏི ཏ་སྶ པུ་རི་མ་བྷ་ཝེ ཀ་མྨ་ནི་མི་ཏྟཱ་ར་མྨ་ཎ་ཏྟཱ. ཨ་རཱུ་པ་བྷ་ཝེ ཨ་ཏི་ས་ནྟ་བྷཱ་ཝེ་ན པ་ཝ་ཏྟ་མཱ་ནཾ བྷ་ཝ་ངྒ་ཙི་ཏྟཾ ན བྷཱ་ཝ་ནཱ་ཡ པ་རི་སུ་དྡྷཾ ཨུ་པ་ཊྛཱ་ཏཱི་ཏི ཨཱ་ཧ ‘‘པ་ཋ་མཱ་རུ་པྤ་པཱ་ཀོ’’ཏི་ཨཱ་དི. པ་ཋ་མཾ ཏུ ཀི་རི་ཡ་ཙི་ཏྟཾ པུ་ཉྙ་སྶ དུ་ཏི་ཡཱ་རུ་པྤ་ཙེ་ཏ་སོ ཨཱ་ར་མྨ་ཎཾ ན ཧོ་ཏི, ཝི་པཱ་ཀ་སྶ དུ་ཏི་ཡཱ་རུ་པྤ་ཙེ་ཏ་སོ ཨཱ་ར་མྨ་ཎཾ ན ཧོ་ཏཱི་ཏི ས་མྦ་ནྡྷོ. ཏ་ཏྠ ཁཱི་ཎཱ་ས་ཝ་ཀཱ་ལེ ཀ་སྶ་ཙི ཀུ་ས་ལ་སྶ ཨ་བྷཱ་ཝ་ཏོ ‘‘ན པུ་ཉྙ་སྶཱ’’ཏི ཝུ་ཏྟཾ. ཨཱ་ཀཱ་སཱ་ན་ཉྩཱ་ཡ་ཏ་ན་ཀི་རི་ཡཱ་ས་མ་ངྒི་སྶ ཝི་ཉྙཱ་ཎ་ཉྩཱ་ཡ་ཏ་ན་ཝི་པཱ་ཀ་ཙི་ཏྟཾ ན པ་ཝ་ཏྟ་ཏཱི་ཏི ‘‘ན པཱ་ཀ་སྶཱ’’ཏི ཝུ་ཏྟཾ. ཁཱི་ཎཱ་ས་ཝ་སྶ དི་ཊྛ་དྷ་མྨ་སུ་ཁ་ཝི་ཧཱ་ར་ཏྠཾ, ནི་རོ་དྷ་ས་མཱ་པ་ཛྫ་ན་ཏྠ་ཉྩ ས་མཱ་པ་ཏྟི་ཡོ ས་མཱ་པ་ཛྫ་ནྟ་སྶ པ་ཋ་མཱ་རུ་པྤ་ཀི་རི་ཡ་ཙི་ཏྟཾ དུ་ཏི་ཡ་སྶ ཨཱ་ར་མྨ་ཎཾ ཧོ་ཏཱི་ཏི ཨཱ་ཧ ‘‘པ་ཋ་མཾ ཏུ ཀྲི་ཡཱ་ཙི་ཏྟ’’ནྟི་ཨཱ་དི.
༣༧༠-༣. ‘‘དྭི་དྷཱ’’ཏི ཙ ཝ་ཏྭཱ ཏ་མེ་ཝ དུ་ཝི་དྷ་ཏཾ, ཏི་ཝི་དྷ་ཏ་ཉྩ ད་སྶེ་ཏུཾ ‘‘ཀུ་ས་ལཾ ཀུ་ས་ལ་སྶཱ’’ཏི, ‘‘ཀྲི་ཡ་སྶཱ་པི ཀྲི་ཡཱ ཧོ་ཏཱི’’ཏི ཙ ཨཱ་དི ཝུ་ཏྟཾ. ཏཾ ཝུ་ཏྟ་ན་ཡ་མེ་ཝ. ཨེ་ཝ་མེ་ཝ …པེ… སི་ཡཱཏི པ་ཋ་མཱ་རུ་པྤ་ཙི་ཏྟེ ཝུ་ཏྟ་ན་ཡེ་ན སེ་ཁ་པུ་ཐུ་ཛྫ་ནཱ་ནཾ དྭི་དྷཱ, ཁཱི་ཎཱ་ས་ཝཱ་ན་ཉྩ ཏི་དྷཱ ཨཱ་ར་མྨ་ཎཾ བྷ་ཝ་ཏཱི་ཏི ཨ་ཏྠོ.
༣༧༤-༥. ཡཾ ཡཾ གོ་ཙ་རཾ ཨཱ་ར་བྦྷཱཏི རཱུ་པཱ་རཱུ་པ་ནི་བྦཱ་ན་པ་ཉྙ་ཏྟཱི་སུ ཡཾ ཡཾ གོ་ཙ་རཾ ཨཱ་ར་བྦྷ. ཡེ ཡེཏི ཨ་རཱུ་པ་དྷ་མྨཱ. ཡོ ན་རོཏི ཡོ ག་ཧ་ཊྛོ, པ་བྦ་ཛི་ཏོ ཝཱ མཱ་ཎ་ཝོ. ཀི་རཱཏི ཨ་ནུ་མ་ཏི་ཡཾ. ཏ་སྶ ‘‘ཨུ་ཏྟ་ར་ཏེ་ཝཱ’’ཏི ཨི་མི་ནཱ ས་མྦ་ནྡྷོ. པཱ་རནྟི ཨ་ཝ་སཱ་ནཾ. ཏཾ ཨི་མ་སྶ པ་ར་མ་ནི་པུ་ཎ་ག་མྦྷཱི་ར་ན་ཡ་ས་མ་ངྒི་ཏཱ་ཡ ཡཱ་ཐཱ་ཝ་ཏོ ཨོ་ཏ་ར་ནྟེ་ཧི ཨ་ཀ་སི་རེ་ན ཏ་རི་ཏུཾ ཨ་ས་ཀྐུ་ཎེ་ཡྻ་ཏྟཱ དུ་པྤཱ་པུ་ཎེ་ཡྻ་ནྟི ཀ་ཏྭཱ ཨཱ་ཧ ‘‘དུ་ཏྟ་ར’’ནྟི. ཨུ་ཏྟ་རནྟི ཨུ་ཏྟ་མཾ. ཨ་བྷི་དྷ་མྨཱ་ཝ་ཏཱ་ར་སྶ ཧི ཨུ་ཏྟ་མ་ཏཱ་ཡ ཏ་དེ་ཀ་དེ་ས་བྷཱུ་ཏ་པཱ་ར་མྤི ཨུ་ཏྟ་མ་མེ་ཝ ཧོ་ཏི. སོཏི སོ ས་མུ་ཏྟི་ཎྞཱ་བྷི་དྷ་མྨཱ་ཝ་ཏཱ་ར་པཱ་རོ ན་རོ. ཨུ་ཏྟ་ར་ཏེ་ཝ, ན པ་ན ན ས་ཀྐོ་ཏི ཏཾ ཨུ་ཏྟ་རི་ཏུ་ནྟི ཨ་ཏྠོ.
ཨི་ཏི ཨ་བྷི་དྷ་མྨ་ཏྠ་ཝི་ཀཱ་སི་ནི་ཡཱ ནཱ་མ
ཨ་བྷི་དྷ་མྨཱ་ཝ་ཏཱ་ར་སཾ་ཝ་ཎྞ་ནཱ་ཡ
ཨཱ་ར་མྨ་ཎ་ཝི་བྷཱ་ག་ནི་དྡེ་ས་ཝ་ཎྞ་ནཱ ནི་ཊྛི་ཏཱ.