༥. ཀ་ཐཱ་ཝ་ཏྠུ་མཱ་ཏི་ཀཱ
པུ་གྒ་ལ་ཀ་ཐཱ་ཝ་ཎྞ་ནཱ
ཨི་དཱ་ནི ཀ་ཐཱ་ཝ་ཏྠུ་མཱ་ཏི་ཀཱ་ཡ ཨ་ཏྠ་སཾ་ཝ་ཎྞ་ནཱ་ན་ཡོ ཧོ་ཏི. ཏ་ཏྠ ཨ་ནུ་ཏྟཱ་ན་ཏྠ་ཏོ ཏཱ་ཝ ‘‘པུ་གྒ་ལོ ཨུ་པ་ལ་བྦྷ་ཏི ས་ཙྩི་ཀ་ཊྛ་པ་ར་མ་ཏྠེ་ནཱ’’ཏི ཨ་ཡཾ པུ་ཙྪཱ, ‘‘ཨཱ་མ་ནྟཱ’’ཏི ཨ་ཡཾ པ་ཊི་ཛཱ་ན་ནཱ. ཀ་སྶ པ་ནཱ་ཡཾ པུ་ཙྪཱ, ཀ་སྶ པ་ཊི་ཛཱ་ན་ནཱ་ཏི? ‘‘ཨ་སུ་ཀ་སྶཱ’’ཏི ན ཝ་ཏྟ་བྦཱ. ན ཧི བྷ་ག་ཝཱ པ་ར་ཝཱ་དཱི་ཧི ས་དྡྷིཾ ཝི་གྒཱ་ཧི་ཀ་ཀ་ཐཾ ཀ་ཐེ་ནྟོ ཨི་མཾ མཱ་ཏི་ཀཾ ཋ་པེ་སི, པུ་གྒ་ལ་པ་ཉྙ་ཏྟི་དེ་ས་ནཱ་དིཾ པ་ན ནི་སྶཱ་ཡ ‘‘པ་ར་མ་ཏྠ་ཏོ ཨ་ཏྟཱ ནཱ་མ ཨ་ཏྠཱི’’ཏི་ཨཱ་དི་ནཱ ཨ་ནཱ་ག་ཏེ ཝི་པ་ལླཱ་ས་གཱ་ཧི་བྷི་ཀྑཱུ་ནཾ, པ་ར་ཝཱ་དཱི་ན་ཉྩ ནཱ་ན་པྤ་ཀཱ་ར་དི་ཊྛི་ཊྛཱ་ན་ཝི་སོ་དྷ་ན་ཏྠཾ མོ་གྒ་ལི་པུ་ཏྟ་ཏི་སྶ་ཏྠེ་ར་སྶ ཝཱ་ད་ན་ཡ་ད་སྶ་ན་ཝ་སེ་ན པུ་གྒ་ལ་ཝཱ་ད་མེ་ཏཾ ཨཱ་ར་བྦྷ ཏ་ནྟི་ཝ་སེ་ན མཱ་ཏི་ཀཾ ཋ་པེ་ནྟོ ས་ཀ་ཝཱ་དི་པ་ར་ཝཱ་དཱི་ནཾ པུ་ཙྪཱ་ཝི་ས་ཛྫ་ན་དོ་སཱ་རོ་པ་ན་ནི་གྒ་ཧ་པཱ་པ་ནཱ་དི་ཝ་ཙ་ན་པ་ཊི་ཝ་ཙ་ན་ཝ་སེ་ནེ་ཝ ཋ་པེ་སི, ཏ་སྨཱ ཏ་ད་ཏྠ་སྶ སུ་ཁཱ་ཝ་དྷཱ་ར་ཎ་ཏྠཾ ས་ཀ་ཝཱ་དཱི་པུ་ཙྪཱ པ་ར་ཝཱ་དཱི་པུ་ཙྪཱ ས་ཀ་ཝཱ་དཱི་པ་ཊི་ཉྙཱ པ་ར་ཝཱ་དཱི་པ་ཊི་ཉྙཱ་ཏི ཨེ་ཝཾ ཝི་བྷཱ་གཾ ད་སྶེ་ཏྭཱ ཨ་ཏྠ་ཝ་ཎྞ་ནཾ ཀ་རི་སྶཱ་མ.
‘‘པུ་གྒ་ལོ ཨུ་པ་ལ་བྦྷ་ཏི ས་ཙྩི་ཀ་ཊྛ་པ་ར་མ་ཏྠེ་ནཱ’’ཏི ཨ་ཡཾ ས་ཀ་ཝཱ་དཱི་པུ་ཙྪཱ, ཏཱ་ཡ ཙ ‘‘ཡེ ‘ཨ་ཏྠི པུ་གྒ་ལོ’ཏི ཨེ་ཝཾ་ལ་དྡྷི་ཀཱ པུ་གྒ་ལ་ཝཱ་དི་ནོ, ཏེ ཨེ་ཝཾ པུ་ཙྪི་ཏ་བྦཱ’’ཏི དཱི་པེ་ཏི. ཀེ པ་ན ཏེ པུ་གྒ་ལ་ཝཱ་དི་ནོ་ཏི? སཱ་ས་ནེ ཝ་ཛྫི་པུ་ཏྟ་ཀཱ ཙེ་ཝ ས་མྨི་ཏི་ཡཱ ཙ བ་ཧི་དྡྷཱ བ་ཧཱུ ཨ་ཉྙ་ཏི་ཏྠི་ཡཱ ཙ. ཀ་དཱ པ་ནེ་ཏེ སཱ་ས་ནེ ཨུ་པྤ་ནྣཱ་ཏི? པ་རི་ནི་བྦཱ་ན་ཏོ དུ་ཏི་ཡེ ཝ་སྶ་ས་ཏེ. བྷ་ག་ཝ་ཏི ཀི་ར པ་རི་ནི་བྦུ་ཏེ མ་ཧཱ་ཀ་སྶ་པ་ཏྠེ་རེ་ན ས་མུ་སྶཱ་ཧི་ཏེ་ཧི ཏ་པྤ་མུ་ཁེ་ཧི ཝ་སི་ག་ཎེ་ཧི སུ་བྷ་དྡ་ཝུ་ཌྜྷ་པ་བྦ་ཛི་ཏཱ་དཱི་ནཾ པཱ་པ་བྷི་ཀྑཱུ་ནཾ པ་ཝེ་སོ་ཀཱ་ས་ནི་སེ་དྷ་ན་ཏྠཾ ཨ་ཛཱ་ཏ་ས་ཏྟུ་རཱ་ཛཱ་ནཾ ས་ཧཱ་ཡཾ ལ་བྷི་ཏྭཱ དྷ་མྨ་ཝི་ན་ཡ་ས་རཱི་རཾ ས་ངྒ་ཧཾ ཨཱ་རོ་པེ་ཏྭཱ སཱ་ས་ནེ ཨ་ཙ་ལེ པ་ཝ་ཏྟཱ་པི་ཏེ ཏ་ཏོ ཝ་སྶ་ས་ཏ་སྶ ཨ་ཙྩ་ཡེ་ན ཝེ་སཱ་ལི་ཡཾ ཝ་ཛྫི་པུ་ཏྟ་ཀེ་ཧི དཱི་པི་ཏཱ་ནི ད་ས ཝ་ཏྠཱུ་ནི མ་དྡི་ཏྭཱ ཏེ ཙ བྷི་ཀྑཱུ ནི་གྒ་ཧེ་ཏྭཱ ཡ་ས་ཏྠེ་ར་ས་མུ་སྶཱ་ཧི་ཏེ་ཧི ཝ་སི་ག་ཎེ་ཧི པུ་ན དྷ་མྨ་ཝི་ན་ཡ་ས་ངྒ་ཧེ ཀ་ཏེ ཏེ་ཧི ནི་གྒ་ཧི་ཏཱ ད་ས་ས་ཧ་སྶཱ ཝ་ཛྫི་པུ་ཏྟ་ཀཱ ཀ་ཉྩི དུ་བྦ་ལ་རཱ་ཛཱ་ནཾ བ་ལཾ ལ་བྷི་ཏྭཱ མཱུ་ལ་ས་ངྒ་ཧཾ བྷི་ནྡི་ཏྭཱ ཨ་ཏྟ་ནོ ཨ་ནཱ་ཙཱ་རཱ་ནུ་ཀཱུ་ལ་ཝ་ཙ་ནཾ པ་ཀྑི་པི་ཏྭཱ བུ་དྡྷ་ཝ་ཙ་ན་ཉྩ ཚ་ཌྜེ་ཏྭཱ མ་ཧཱ་ས་ངྒཱི་ཏཱི་ཧི ཝི་སུཾ དྷ་མྨ་ཝི་ན་ཡ་ས་ངྒ་ཧཾ ཀ་ཏྭཱ མ་ཧཱ་ས་ངྒྷི་ཀཱ་ཙ་རི་ཡ་ཀུ་ལཾ ནཱ་མ ཨ་ཀཾ་སུ. པ་རི་སུ་དྡྷ་སཱ་ས་ནཾ པ་ན ཐེ་རེ་ཧི པ་རི་པཱ་ལི་ཏ་ཏྟཱ ‘‘ཐེ་ར་ཝཱ་དོ’’ཏི པ་ཉྙཱ་ཡི, ཨི་མེ་སུ པ་ན དྭཱི་སུ ཝཱ་དེ་སུ མ་ཧཱ་ས་ངྒྷི་ཀ་ཏོ བྷི་ཛྫི་ཏྭཱ ཨེ་ཀ་བྱོ་ཧཱ་རི་ཀཱ, གོ་ཀུ་ལི་ཀཱ ཙ, ཏ་ཏོ པ་ཎྞ་ཏྟི་ཝཱ་དཱ, བ་ཧུ་ལི་ཡཱ, ཙེ་ཏི་ཡ་ཝཱ་དཱ ཙཱ་ཏི པ་ཉྩ ཝཱ་དཱ, མ་ཧཱ་ས་ངྒྷི་ཀེ་ཧི པ་ན ས་དྡྷིཾ ཚ ཨཱ་ཙ་རི་ཡ་ཀུ་ལཱ་ནི ནཱ་མ ཛཱ་ཏཱ་ནི. ཏ་ཐཱ ཐེ་ར་ཝཱ་ད་ཏོ བྷི་ཛྫི་ཏྭཱ མ་ཧི་སཱ་ས་ཀཱ, ཝ་ཛྫི་པུ་ཏྟ་ཀཱ ཙ, ཏ་ཏོ དྷ་མྨུ་ཏྟ་རི་ཡཱ, བྷ་དྲ་ཡཱ་ནི་ཀཱ, ཚ་ནྣཱ་གཱ་རི་ཀཱ, ས་མྨི་ཏི་ཡཱ ཙ, མ་ཧི་སཱ་ས་ཀ་ཏོ དྷ་མྨ་གུ་ཏྟི་ཀཱ, ས་བྦ་ཏྠི་ཀཱ ཙ, ཏ་ཏོ ཀ་སྶ་པི་ཀཱ, ཏ་ཏོ ས་ངྐ་ནྟི་ཀཱ, ཏ་ཏོ སུ་ཏྟ་ཝཱ་དཱ ཙཱ་ཏི ཨི་མེ ཨེ་ཀཱ་ད་ས ཝཱ་དཱ ཛཱ་ཏཱ. ཏེ པུ་རི་མེ་ཧི ཚ་ཧི ས་དྡྷིཾ ས་ཏྟ་ར་ས བྷི་ནྣ་ཝཱ་དཱ དུ་ཏི་ཡེ ཝ་སྶ་ས་ཏེ ཨུ་པྤ་ནྣཱ, ཐེ་ར་ཝཱ་དོ པ་ན ཨེ་ཀོ་ཝ ཨ་ས་མྦྷི་ནྣ་ཀོ, ཏེ་ན ས་དྡྷིཾ སཱ་ས་ནེ ཨ་ཊྛཱ་ར་ས ནི་ཀཱ་ཡཱ ཛཱ་ཏཱ་ཏི ཝེ་དི་ཏ་བྦཱ, ཡེ ‘‘ཨ་ཊྛཱ་ར་སཱ་ཙ་རི་ཡ་ཀུ་ལཱ་ནཱི’’ཏི པ་ཝུ་ཙྩ་ནྟི. ཨི་མེ་སཾ པ་ན ཨ་ཊྛཱ་ར་ས་ནྣཾ ཨཱ་ཙ་རི་ཡ་ཝཱ་དཱ་ནཾ ཝ་སེ་ན ཨཱ་ཡ་ཏིཾ སཱ་ས་ན་སྶ ཨཱ་ལུ་ལ༹་ནཾ ཉ་ཏྭཱ ས་མྨཱ་ས་མྦུ་དྡྷོ དྭི་ནྣཾ ཝ་སྶ་ས་ཏཱ་ནཾ ཨ་ཙྩ་ཡེ་ན སཱ་ས་ནེ པ་ཊི་ལ་དྡྷ་ས་དྡྷེ་ན ཨ་སོ་ཀེ་ན དྷ་མྨ་ར་ཉྙཱ བཱ་ཧི་ར་ཀེ ཨ་ནོ་ལོ་ཀེ་ཏྭཱ སཱ་ས་ནེ ཨེ་ཝ ལཱ་བྷ་ས་ཀྐཱ་རེ པ་ཝ་ཏྟ་ནྟེ ལཱ་བྷ་ས་ཀྐཱ་ར་ཏྠཱ་ཡ སཱ་ས་ན་ཝེ་སཾ ག་ཧེ་ཏྭཱ ས་ཀཱ་ནི ས་ཀཱ་ནི དི་ཊྛི་ག་ཏཱ་ནི ཏ་ཐ་ཏོ དཱི་པེ་ནྟེ་སུ དྭཱ་ས་ཊྛི་དི་ཊྛི་ག་ཏི་ཀེ་སུ ཡ་ཐཱ་ཝུ་ཏྟ་ས་ཏྟ་ར་སཱ་ཙ་རི་ཡ་ཀུ་ལེ་སུ ཙ ས་མ་ཡ་ཀུ་ས་ལ་ཏཱ་ཡ ཝི་ཙི་ནི་ཏྭཱ སེ་ཏ་ཀཱ་ནི ད་ཏྭཱ ཨུ་པྤ་བྦཱ་ཛི་ཏེ་སུ པ་རི་སུ་དྡྷེ མ་ཧཱ་བྷི་ཀྑུ་ས་ངྒྷེ ནི་སཱི་དི་ཏྭཱ མོ་གྒ་ལི་པུ་ཏྟ་ཏི་སྶ་ཏྠེ་ར་སྶ ཡཱ་ནི ཏ་དཱ ཨུ་པྤ་ནྣཱ་ནི ཝ་ཏྠཱུ་ནི, ཡཱ་ནི ཙ ཨཱ་ཡ་ཏིཾ ཨུ་པྤ་ཛྫི་སྶ་ནྟི, ས་བྦཱ་ནི་པི ཏཱ་ནི ཨ་ཏྟ་ནོ ས་ཏྠཱ་རཱ དི་ནྣ་མཱ་ཏི་ཀཱ་མུ་ཁ་མ་ཏྟེ་ན པ་ཊི་བཱ་ཧི་ཏྭཱ སུ་ཏྟ་ས་ཧ་སྶ་པ་ཊི་མ་ཎྜི་ཏཾ པ་ར་པྤ་ཝཱ་ད་མ་ཐ་ནཾ ཨཱ་ཡ་ཏི་ལ་ཀྑ་ཎཾ ཀ་ཐཱ་ཝ་ཏྠུ་པྤ་ཀ་ར་ཎཾ མཱ་ཏི་ཀཱ་ཝི་བྷ་ཛ་ན་ཝ་སེ་ན བྷཱ་སི་ཏྭཱ ཏཾ ཏ་ཏི་ཡ་ས་ངྒཱི་ཏི་ཡཾ ས་ངྒ་ཧཾ ཨཱ་རོ་པེ་ཏྭཱ ཨཱ་ལུ་ལི༹་ཏཾ སཱ་ས་ནཾ པ་གྒ་ཧེ་ཏུཾ ས་མ་ཏྠ་བྷཱ་ཝཾ བྷི་ཀྑུ་ས་ངྒྷེ པ་ཀཱ་ས་ན་ཏྠཾ ཨཱ་ཡ་ཏི་ཝཱ་ད་པྤ་ཊི་བཱ་ཧ་ན་ན་ཡ་ད་སྶ་ན་ཝ་སེ་ན ཨི་མཾ ཀ་ཐཱ་ཝ་ཏྠུ་མཱ་ཏི་ཀཾ ཝ་ཏྭཱ ཐེ་ར་སྶ ཨོ་ཀཱ་སཾ ཋ་པེ་ནྟོ ཏ་སྶཱ ཝི་བྷ་ངྒཾ ན ཨ་ཝོ་ཙཱ་ཏི ཝེ་དི་ཏ་བྦཾ.
ཏ་ཏྠ པུ་གྒ་ལོཏི ཨ་ཏྟཱ ཛཱི་ཝོ ས་ཏྟོ. ཨུ་པ་ལ་བྦྷ་ཏཱིཏི པ་ཉྙཱ་ཡ ཨུ་པ་ག་ནྟྭཱ ལ་བྦྷ་ཏི, ཉཱ་ཡ་ཏཱི་ཏི ཨ་ཏྠོ. ས་ཙྩི་ཀ་ཊྛ་པ་ར་མ་ཏྠེ་ནཱཏི ཨེ་ཏྠ ས་ཙྩི་ཀ་ཊྛོཏི མཱ་ཡཱ་མ་རཱི་ཙི་ཨཱ་ད་ཡོ ཝི་ཡ ཨ་བྷཱུ་ཏཱ་ཀཱ་རེ་ན ཨ་གྒ་ཧེ་ཏ་བྦོ བྷཱུ་ཏ་ཊྛོ. པ་ར་མ་ཏྠོཏི ཨ་ནུ་སྶ་ཝཱ་དི་ཝ་སེ་ན ཨ་གྒ་ཧེ་ཏ་བྦོ ཨུ་ཏྟ་མ་ཏྠོ. ཨུ་བྷ་ཡེ་ནཱ་པི ཡ་ཐཱ རཱུ་པ་ཝེ་ད་ནཱ་ད་ཡོ དྷ་མྨཱ བྷཱུ་ཏེ་ན ས་བྷཱ་ཝེ་ན ཨུ་པ་ལ་བྦྷ་ནྟི, ཨེ་ཝཾ ཏཱ་ཝ ‘‘པུ་གྒ་ལོ ཨུ་པ་ལ་བྦྷ་ཏཱི’’ཏི པུ་ཙྪ་ཏི. པ་ར་ཝཱ་དཱི ‘‘ཨཱ་མ་ནྟཱ’’ཏི པ་ཊི་ཛཱ་ནཱ་ཏི. པ་ཊི་ཛཱ་ན་ན་ཉྷི ཀ་ཏྠ་ཙི ‘‘ཨཱ་མ བྷ་ནྟེ’’ཏི ཨཱ་ག་ཙྪ་ཏི, ཀ་ཏྠ་ཙི ‘‘ཨཱ་མོ’’ཏི ཨཱ་ག་ཙྪ་ཏི, ཨི་དྷ པ་ན ‘‘ཨཱ་མ་ནྟཱ’’ཏི ཨཱ་ག་ཏཾ. ཏ་ཏྲཱ་ཡཾ ཨ་དྷི་པྤཱ་ཡོ – པ་ར་ཝཱ་དཱི ཧི ཡ་སྨཱ བྷ་ག་ཝ་ཏཱ ‘‘ཨ་ཏྠི པུ་གྒ་ལོ ཨ་ཏྟ་ཧི་ཏཱ་ཡ པ་ཊི་པ་ནྣོ’’ཏི་ཨཱ་དི་ནཱ (ཨ. ནི. ༤.༩༥-༩༦) པུ་གྒ་ལོ པ་ཀཱ་སི་ཏོ, བྷ་ག་ཝཱ ཙ ཨ་ཝི་ཏ་ཐ་ཝཱ་དཱི, ཏ་སྨཱ སོ ‘‘ས་ཙྩི་ཀ་ཊྛ་པ་ར་མ་ཏྠེ་ནེ་ཝ ཨ་ཏྠཱི’’ཏི ལ་དྡྷིཾ ག་ཧེ་ཏྭཱ ‘‘ཨཱ་མ་ནྟཱ’’ཏི པ་ཊི་ཛཱ་ནཱ་ཏི.
ཨ་ཐ་སྶ ཏཱ་དི་ས་སྶ ལེ་ས་ཝ་ཙ་ན་སྶ ཚ་ལ་ཝཱ་ད་སྶ ཨོ་ཀཱ་སཾ ཨ་ད་ད་མཱ་ནོ ས་ཀ་ཝཱ་དཱི ‘‘ཡོ ས་ཙྩི་ཀ་ཊྛོ’’ཏི་ཨཱ་དི་མཱ་ཧ. ཏ་ཏྲཱ་ཡཾ ཨ་དྷི་པྤཱ་ཡོ – ཡྭཱ་ཡཾ ཧེ་ཊྛཱ རཱུ་པ་ཝེ་ད་ནཱ་དི་ཀོ དྷ་མྨ་པྤ་བྷེ་དོ ཨཱ་ག་ཏོ, ན ས་མྨུ་ཏི་ས་ཙྩ་ཝ་སེ་ན, ནཱ་པི ཨ་ནུ་སྶ་ཝཱ་དི་ཝ་སེ་ན ག་ཧེ་ཏ་བྦོ, ཨ་ཏྟ་ནོ པ་ན བྷཱུ་ཏ་ཏཱ་ཡ ཨེ་ཝ ས་ཙྩི་ཀ་ཊྛོ, ཨ་ཏྟ་པ་ཙྩ་ཀྑ་ཏཱ་ཡ ཙ པ་ར་མ་ཏྠོ, སོ ཏ་ཐཱ་པ་ཊི་ཉྙཱ་ཏོ པུ་གྒ་ལོ ཏ་ཏོ ཏེ་ན ས་ཙྩི་ཀ་ཊྛ་པ་ར་མ་ཏྠེ་ན ཨཱ་ཀཱ་རེ་ན ཨུ་པ་ལ་བྦྷ་ཏི, ཡ་ཐཱ རུ་པྤ་ནཱ་ནུ་བྷ་ཝ་ནཱ་དི་ནཱ ས་ཀི་ཡེ་ནཱ་ཀཱ་རེ་ན པུ་ན ས་ཙྩི་ཀ་ཊྛ་པ་ར་མ་ཏྠོ ཨུ་པ་ལ་བྦྷ་ཏི, ཀིཾ ཏ་ཝ པུ་གྒ་ལོ་པི ཨེ་ཝཾ ཨུ་པ་ལ་བྦྷ་ཏཱི་ཏི ཝུ་ཏྟཾ ཧོ་ཏི. ན ཧེ་ཝཾ ཝ་ཏྟ་བྦེཏི ཨ་ཝ་ཛཱ་ན་ནཱ པ་ར་ཝཱ་དི་སྶ. སོ ཧི ཏ་ཐཱ་རཱུ་པཾ པུ་གྒ་ལཾ ཨ་ནི་ཙྪ་ནྟོ ཨ་ཝ་ཛཱ་ནཱ་ཏི. ན ཧི ཨ་ཏྟཱ ནཱ་མ ཁ་ནྡྷཱ་དི་ཝི་མུ་ཏྟོ ཀོ་ཙི དི་སྶ་ཏི ཨ་ཉྙ་ཏྲ བྱཱ་མོ་ཧ་མ་ཏྟཱ. ཏ་ཏྲཱ་ཡཾ པ་ད་ཙྪེ་དོ – ན ཧི ཨེ་ཝཾ ཝ་ཏྟ་བྦེ་ཏི. ‘‘ན ཧ ཨེ་ཝ’’ནྟི་པི པ་ཋ་ནྟི, དྭི་ནྣ་མྤི ཨེ་ཝཾ ན ཝ་ཏྟ་བྦོ་ཏི ཨ་ཏྠོ.
ཨཱ་ཛཱ་ནཱ་ཧི ནི་གྒ་ཧནྟི ས་ཀ་ཝཱ་དི་ཝ་ཙ་ནཾ. ཡ་སྨཱ ཏེ པུ་རི་མཱ་ཡ ཝ་ཏྟ་བྦ་པ་ཊི་ཉྙཱ་ཡ པ་ཙྪི་མཱ ན་ཝ་ཏྟ་བྦ་པ་ཊི་ཉྙཱ, པ་ཙྪི་མཱ་ཡ ཙ པུ་རི་མཱ ན ས་ནྡྷཱི་ཡ་ཏི, ཏ་སྨཱ ནི་གྒ་ཧཾ པ་ཏྟོ, ཏཾ ནི་གྒ་ཧཾ དོ་སཾ ཨ་པ་རཱ་དྷཾ ཨཱ་ཛཱ་ནཱ་ཧི, ས་མྤ་ཊི་ཙྪཱ་ཧཱི་ཏི ཨ་ཏྠོ. ཨེ་ཝཾ ནི་གྒ་ཧཾ ཨཱ་ཛཱ་ནཱ་པེ་ཏྭཱ ཨི་དཱ་ནི ཏཾ ཋ་པ་ནཱ་ཡ ཙེ་ཝ ཨ་ནུ་ལོ་མ་པ་ཊི་ལོ་མ་ཏོ པཱ་པ་ནཱ་རོ་པ་ནཱ་ན་ཉྩ ཝ་སེ་ན པཱ་ཀ་ཊཾ ཀ་རོ་ནྟོ ‘‘ཧ་ཉྩི པུ་གྒ་ལོ’’ཏི་ཨཱ་དི་མཱ་ཧ. ཏ་ཏྠ ཧ་ཉྩཱིཏི ཡ་དི, ས་ཙེ པུ་གྒ་ལོ ཨུ་པ་ལ་བྦྷ་ཏཱི་ཏི ཨ་ཏྠོ. ཨ་ཡཾ ཏཱ་ཝ པ་ར་ཝཱ་དཱི་པ་ཀྑ་སྶ ཨ་ནུ་ཝ་ད་ནེ་ན ཋ་པ་ན་ཏོ ནི་གྒ་ཧ་པ་ཏི་ཊྛཱ་པ་ན་ཏོ ནི་གྒ་ཧ་པཱ་པ་ནཱ་རོ་པ་ནཱ་ནཾ ལ་ཀྑ་ཎ་བྷཱུ་ཏཱ ཨ་ནུ་ལོ་མ་ཊྛ་པ་ནཱ ནཱ་མ. ཏེ་ན ཝ་ཏ རེཏི་ཨཱ་དི ཨ་ནུ་ལོ་མ་པ་ཀྑེ ནི་གྒ་ཧ་སྶ པཱ་པི་ཀ་ཏྟཱ ཨ་ནུ་ལོ་མ་པཱ་པ་ནཱ ནཱ་མ. ཏ་ཏྠ ཏེ་ནཱཏི ཀཱ་ར་ཎ་ཝ་ཙ་ནཾ. ཝ་ཏཱཏི ཨོ་ཀ་པྤ་ན་ཝ་ཙ་ནཾ ནི་ཡ་མ་ཝ་ཙ་ནཾ. རེཏི ཨཱ་མ་ནྟ་ན་ཝ་ཙ་ནཾ. ཨི་དཾ ཝུ་ཏྟཾ ཧོ་ཏི – ཏེ་ན ཝ་ཏ རེ ཝ་ཏྟ་བྦེ ཝ་ཏ རེ ཧ་མྦྷོ བྷ་དྲ་མུ་ཁ ཏེ་ན ཀཱ་ར་ཎེ་ན ཝ་ཏྟ་བྦོ ཨེ་ཝཱ་ཏི ཨ་ཏྠོ. ཡཾ ཏ་ཏྠ ཝ་དེ་སཱིཏི་ཨཱ་དི ཨ་ནུ་ལོ་མ་པ་ཀྑེ ནི་གྒ་ཧ་སྶ ཨཱ་རོ་པི་ཏ་ཏྟཱ ཨ་ནུ་ལོ་མ་རོ་པ་ནཱ ནཱ་མ. ཡ་ཉྩ་སྶ པ་རི་ཡོ་སཱ་ནེ ‘‘མི་ཙྪཱ’’ཏི པ་དཾ, ཏ་སྶ པུ་ར་ཏོ ‘‘ཨི་དཾ ཏེ’’ཏི ཨཱ་ཧ་རི་ཏ་བྦཾ. ཨི་དཾ ཏེ མི་ཙྪཱ་ཏི ཨ་ཡ་ཉྷེ་ཏྠ ཨ་ཏྠོ. ཨེ་ཝཾ ཨུ་པ་རི་པི. པ་ར་ཏོ པཱ་ལི༹་ཡ་མྤི ཨེ་ཏཾ ཨཱ་ག་ཏ་མེ་ཝ. ནོ ཙེ པ་ན ཝ་ཏྟ་བྦེཏི་ཨཱ་དི ‘‘ན ཧེ་ཝཾ ཝ་ཏྟ་བྦེ’’ཏི པ་ཊི་ཀྑི་ཏྟ་པ་ཀྑ་སྶ ཨ་ནུ་ཝ་ད་ནེ་ན ཋ་པི་ཏ་ཏྟཱ པ་ཊི་ལོ་མ་ཏོ ནི་གྒ་ཧ་པཱ་པ་ནཱ་རོ་པ་ནཱ་ནཾ ལ་ཀྑ་ཎ་བྷཱུ་ཏཱ པ་ཊི་ལོ་མ་ཊྛ་པ་ནཱ ནཱ་མ. ནོ ཙ ཝ་ཏ རེཏི་ཨཱ་དི པ་ཊི་ལོ་མ་པ་ཀྑེ ནི་གྒ་ཧ་སྶ པཱ་པི་ཏ་ཏྟཱ པ་ཊི་ལོ་མ་པཱ་པ་ནཱ ནཱ་མ. པུ་ན ཡཾ ཏ་ཏྠ ཝ་དེ་སཱིཏི་ཨཱ་དི པ་ཊི་ལོ་མ་པ་ཀྑེ ནི་གྒ་ཧ་སྶ ཨཱ་རོ་པི་ཏ་ཏྟཱ པ་ཊི་ལོ་མ་རོ་པ་ནཱ ནཱ་མ.
ཏ་ཏྲཱ་ཡཾ ཨཱ་དི་ཏོ པ་ཊྛཱ་ཡ ས་ངྑེ་པ་ཏྠོ – ཡ་དི པུ་གྒ་ལོ ཨུ་པ་ལ་བྦྷ་ཏི ས་ཙྩི་ཀ་ཊྛ་པ་ར་མ་ཏྠེ་ན, ཏེ་ན ཝ་ཏ བྷོ སོ ཨུ་པ་ལ་བྦྷ་ཏཱི་ཏི ཝ་ཏྟ་བྦོ. ཡཾ པ་ན ཏ་ཏྠ ཝ་དེ་སི ‘‘ཝ་ཏྟ་བྦོ ཁོ པུ་རི་མ་པ་ཉྷེ ‘ས་ཙྩི་ཀ་ཊྛ་པ་ར་མ་ཏྠེ་ན ཨུ་པ་ལ་བྦྷ་ཏཱི’ཏི ནོ ཙ ཝ་ཏྟ་བྦོ དུ་ཏི་ཡ་པ་ཉྷེ ‘ཏ་ཏོ སོ པུ་གྒ་ལོ ཨུ་པ་ལ་བྦྷ་ཏཱི’’’ཏི, ཨི་དཾ ཏེ མི་ཙྪཱཏི ཨེ་ཝཾ ཏཱ་ཝ ཨ་ནུ་ལོ་མ་ཏོ ཋ་པ་ནཱ་པཱ་པ་ནཱ་རོ་པ་ནཱ ཧོ་ནྟི.
ཨ་ཐ ན ཝ་ཏྟ་བྦོ དུ་ཏི་ཡ་པ་ཉྷེ ‘‘ཏ་ཏོ སོ པུ་གྒ་ལོ ཨུ་པ་ལ་བྦྷ་ཏཱི’’ཏི, པུ་རི་མ་པ་ཉྷེ་པི ན ཝ་ཏྟ་བྦོ་ཝ. ཡཾ པ་ན ཏ་ཏྠ ཝ་དེ་སི ‘‘ཝ་ཏྟ་བྦོ ཁོ པུ་རི་མ་པ་ཉྷེ ‘ས་ཙྩི་ཀ་ཊྛ་པ་ར་མ་ཏྠེ་ན ཨུ་པ་ལ་བྦྷ་ཏཱི’ཏི, ནོ ཙ ཝ་ཏྟ་བྦོ དུ་ཏི་ཡ་པ་ཉྷེ ‘ཏ་ཏོ སོ པུ་གྒ་ལོ ཨུ་པ་ལ་བྦྷ་ཏཱི’’’ཏི, ཨི་དཾ ཏེ མི་ཙྪཱ་ཏི ཨེ་ཝཾ པ་ཊི་ལོ་མ་ཏོ ཋ་པ་ནཱ་པཱ་པ་ནཱ་རོ་པ་ནཱ ཧོ་ནྟི. ཨེ་ཝ་མེ་ཏཾ ནི་གྒ་ཧ་སྶ ཙ ཨ་ནུ་ལོ་མ་ཏོ དྭི་ནྣཾ, པ་ཊི་ལོ་མ་ཏོ དྭི་ནྣ་ནྟི ཙ་ཏུ་ནྣཾ པཱ་པ་ནཱ་རོ་པ་ནཱ་ན་ཉྩ ཝུ་ཏྟ་ཏྟཱ ཨུ་པ་ལ་བྦྷ་ཏཱི་ཏི་ཨཱ་དི་ཀཾ ཨ་ནུ་ལོ་མ་པ་ཉྩ་ཀཾ ནཱ་མ. ཨེ་ཏྠ ཙ ཀི་ཉྩཱ་པི ཨ་ནུ་ལོ་མ་ཏོ པཱ་པ་ནཱ་རོ་པ་ནཱ་ཧི ཨེ་ཀོ, པ་ཊི་ལོ་མ་ཏོ པཱ་པ་ནཱ་རོ་པ་ནཱ་ཧི ཨེ་ཀོ་ཏི དྭེ ནི་གྒ་ཧཱ ཀ་ཏཱ, ཨཱ་ཛཱ་ནཱ་ཧི ནི་གྒ་ཧ་ནྟི ཨེ་ཏ་སྶེ་ཝ པ་ན པ་ཋ་མ་སྶ ནི་གྒ་ཧ་སྶ དྭཱི་ཧཱ་ཀཱ་རེ་ཧི ཨཱ་རོ་པི་ཏ་ཏྟཱ ཨེ་ཀོ་ཝཱ་ཡཾ ནི་གྒ་ཧོ་ཏི ག་ཧེ་ཏ་བྦོ. པ་ཋ་མོ ནི་གྒ་ཧོ.
ཨི་དཱ་ནི པ་ཙྩ་ནཱི་ཀ་ན་ཡོ ཧོ་ཏི. ཏ་ཏྠ པུ་གྒ་ལོ ནུ་པ་ལ་བྦྷ་ཏཱིཏི པུ་ཙྪཱ པ་ར་ཝཱ་དི་སྶ. ས་ཀ་ཝཱ་དཱི ཡ་ཐཱ རཱུ་པ་ཝེ་ད་ནཱ་ད་ཡོ དྷ་མྨཱ ཨུ་པ་ལ་བྦྷ་ནྟི, ཨེ་ཝཾ ཨ་ནུ་པ་ལ་བྦྷ་ནཱི་ཡ་ཏོ ‘‘ཨཱ་མ་ནྟཱ’’ཏི པ་ཊི་ཛཱ་ནཱ་ཏི. པུ་ན ཨི་ཏ་རོ ཨ་ཏྟ་ནཱ ཨ་དྷི་པྤེ་ཏཾ ས་ཙྩི་ཀ་ཊྛཾ་ཡེ་ཝ ས་ནྡྷཱ་ཡ ‘‘ཡོ ས་ཙྩི་ཀ་ཊྛོ’’ཏི་ཨཱ་དི་མཱ་ཧ. ས་མྨུ་ཏི་ས་ཙྩ་པ་ར་མ་ཏྠ་ས་ཙྩཱ་ནི ཝཱ ཨེ་ཀ་ཏོ ཀ་ཏྭཱ་པི པ་ར་ཝཱ་དཱི ཨེ་ཝ་མཱ་ཧ. ས་ཀ་ཝཱ་དཱི པུ་གྒ་ལོ ཧི ཨུ་པཱ་དཱ་ཡ་པ་ཉྙ་ཏྟི་ས་བྦྷཱ་ཝ་ཏོ་པི དྭི་ནྣཾ ས་ཙྩཱ་ནཾ ཨེ་ཀ་ཏོ ཀ་ཏྭཱ པུ་ཙྪི་ཏ་ཏྟཱ་པི ‘‘ན ཧེ་ཝ’’ནྟི པ་ཊི་ཀྑི་པ་ཏི. ཨི་དཱ་ནི ཀི་ཉྩཱ་པི ཏེ་ན པ་ཋ་མཾ པ་ར་མ་ཏྠ་ས་ཙྩ་ཝ་སེ་ན ནུ་པ་ལ་བྦྷ་ནཱི་ཡ་ཏཱ ས་མྤ་ཊི་ཙྪི་ཏཱ, པ་ཙྪཱ པ་ན ས་མྨུ་ཏི་ས་ཙྩ་ཝ་སེ་ན ཝཱ ཝོ་མི་སྶ་ཀ་ཝ་སེ་ན ཝཱ པ་ཊི་ཀྑི་ཏྟཱ. པ་ར་ཝཱ་དཱི པ་ན ‘‘ནུ་པ་ལ་བྦྷ་ཏཱི’’ཏི ཝ་ཙ་ན་སཱ་མ་ཉྙ་མ་ཏྟཾ ཚ་ལ་ཝཱ་དཾ ནི་སྶཱ་ཡ ‘‘ཡཾ ཏ་ཡཱ པ་ཋ་མཾ པ་ཊི་ཉྙཱ་ཏཾ, ཏཾ པ་ཙྪཱ པ་ཊི་ཀྑི་ཏྟ’’ནྟི བྷ་ཎྜ་ན་སྶ པ་ཊི་བྷ་ཎྜ་ནཾ ཝི་ཡ ཨ་ཏྟ་ནོ ཀ་ཏ་སྶ ནི་གྒ་ཧ་ཀ་མྨ་སྶ པ་ཊི་ཀ་མྨཾ ཀ་རོ་ནྟོ ‘‘ཨཱ་ཛཱ་ནཱ་ཧི པ་ཊི་ཀ་མྨ’’ནྟི ཨཱ་ཧ. ཨི་དཱ་ནི ཡ་ཐཱ་སྶ ཨ་ནུ་ལོ་མ་པ་ཉྩ་ཀེ ས་ཀ་ཝཱ་དི་ནཱ ཝཱ་ད་ཊྛ་པ་ནཾ ཀ་ཏྭཱ ཨ་ནུ་ལོ་མ་པ་ཊི་ལོ་མ་ཏོ པཱ་པ་ནཱ་རོ་པ་ནཱ་ཧི པ་ར་ཝཱ་དི་ནི་གྒ་ཧོ པཱ་ཀ་ཊོ ཀ་ཏོ, ཨེ་ཝཾ པ་ཊི་ཀ་མྨཾ པཱ་ཀ་ཊཾ ཀ་རོ་ནྟོ ‘‘ཧ་ཉྩི པུ་གྒ་ལོ’’ཏི་ཨཱ་དི་མཱ་ཧ. ཏཾ ཧེ་ཊྛཱ ཝུ་ཏྟ་ན་ཡེ་ནེ་ཝ ཨ་ཏྠ་ཏོ ཝེ་དི་ཏ་བྦཾ. ཡ་སྨཱ པ་ནེ་ཏྠ ཋ་པ་ནཱ ནཱ་མ པ་ར་ཝཱ་དི་པ་ཀྑ་སྶ ཋ་པ་ན་ཏོ ‘‘ཨ་ཡཾ ཏ་ཝ དོ་སོ’’ཏི ད་སྶེ་ཏུཾ ཋ་པ་ན་མ་ཏྟ་མེ་ཝ ཧོ་ཏི, ན ནི་གྒ་ཧ་སྶ ཝཱ པ་ཊི་ཀ་མྨ་སྶ ཝཱ པཱ་ཀ་ཊཱི་བྷཱ་ཝ་ཀ་ར་ཎཾ, པཱ་པ་ནཱ་རོ་པ་ནཱ་ཧི པ་ན་སྶ པཱ་ཀ་ཊཱི་ཀ་ར་ཎཾ ཧོ་ཏི, ཏ་སྨཱ ཨི་དཾ ཨ་ནུ་ལོ་མ་པ་ཊི་ལོ་མ་ཏོ པཱ་པ་ནཱ་རོ་པ་ནཱ་ནཾ ཝ་སེ་ན ཙ་ཏཱུ་ཧཱ་ཀཱ་རེ་ཧི པ་ཊི་ཀ་མྨ་སྶ ཀ་ཏ་ཏྟཱ པ་ཊི་ཀ་མྨ་ཙ་ཏུ་ཀྐཾ ནཱ་མཱ་ཏི ཨེ་ཀཾ ཙ་ཏུ་ཀྐཾ ཝེ་དི་ཏ་བྦཾ.
ཨེ་ཝཾ པ་ཊི་ཀ་མྨཾ ཀ་ཏྭཱ ཨི་དཱ་ནི ཡྭཱ་སྶ ཨ་ནུ་ལོ་མ་པ་ཉྩ་ཀེ ས་ཀ་ཝཱ་དི་ནཱ ནི་གྒ་ཧོ ཀ་ཏོ, ཏ་སྶ ཏ་མེ་ཝ ཚ་ལ་ཝཱ་དཾ ནི་སྶཱ་ཡ དུ་ཀྐ་ཊ་བྷཱ་ཝཾ ད་སྶེ་ནྟོ ‘‘ཏྭཾ ཙེ པ་ན མ་ཉྙ་སཱི’’ཏི་ཨཱ་དི་མཱ་ཧ. ཏ་ཏྠ ཏྭཾ ཙེ པ་ན མ་ཉྙ་སཱིཏི ཡ་དི ཏྭཾ མ་ཉྙ་སི. ‘‘ཝ་ཏྟ་བྦེ ཁོ’’ཏི ཨི་དཾ པ་ཙྩ་ནཱི་ཀེ ‘‘ཨཱ་མ་ནྟཱ’’ཏི པ་ཊི་ཛཱ་ན་ནཾ ས་ནྡྷཱ་ཡ ཝུ་ཏྟཾ, ‘‘ནོ ཙ ཝ་ཏྟ་བྦེ’’ཏི ཨི་དཾ པ་ན ‘‘ན ཧེ་ཝཱ’’ཏི ཨ་ཝ་ཛཱ་ན་ནཾ ས་ནྡྷཱ་ཡ ཝུ་ཏྟཾ. ཏེ་ན ཏ་ཝ ཏ་ཏྠཱཏི ཏེ་ན ཀཱ་ར་ཎེ་ན ཏྭཾ་ཡེ་ཝ ཏ་སྨིཾ ‘‘ཡོ ནུ་པ་ལ་བྦྷ་ཏཱི’’ཏི པ་ཀྑེ ཧེ་ཝཾ པ་ཊི་ཛཱ་ནནྟི ‘‘ཨཱ་མ་ནྟཱ’’ཏི ཨེ་ཝཾ པ་ཊི་ཛཱ་ན་ནྟོ. ཧེ་ཝཾ ནི་གྒ་ཧེ་ཏ་བྦེཏི པུ་ན ‘‘ན ཧེ་ཝཱ’’ཏི ཨ་ཝ་ཛཱ་ན་ནྟོ ཨེ་ཝཾ ནི་གྒ་ཧེ་ཏ་བྦོ. ཨ་ཐ ཏཾ ནི་གྒ་ཎྷཱ་མཱཏི ཨ་ཐེ་ཝཾ ནི་གྒ་ཎྷ་ནཱ་ར་ཧཾ ཏཾ ནི་གྒ་ཎྷཱ་མ, སུ་ནི་གྒ་ཧི་ཏོ ཙ ཧོ་སཱིཏི ས་ཀེ་ན མ་ཏེ་ན ནི་གྒ་ཧི་ཏ་ཏྟཱ སུ་ནི་གྒ་ཧི་ཏོ ཙ བྷ་ཝ་སི. ཨེ་ཝ་མ་སྶ ནི་གྒ་ཧེ་ཏ་བྦ་བྷཱ་ཝཾ ད་སྶེ་ཏྭཱ ཨི་དཱ་ནི ཏཾ ནི་གྒ་ཎྷ་ནྟོ ‘‘ཧ་ཉྩཱི’’ཏི་ཨཱ་དི་མཱ་ཧ. ཏ་ཏྠ ཋ་པ་ནཱ་པཱ་པ་ནཱ་རོ་པ་ནཱ ཧེ་ཊྛཱ ཝུ་ཏྟ་ན་ཡེ་ནེ་ཝ ཝེ་དི་ཏ་བྦཱ. པ་རི་ཡོ་སཱ་ནེ པ་ན ཨི་དཾ ཏེ མི་ཙྪཱཏི ཨི་དཾ ཏ་ཝ ཝ་ཙ་ནཾ མི་ཙྪཱ ཧོ་ཏཱི་ཏི ཨ་ཏྠོ. ཨི་དཾ ཚ་ལ་ཝཱ་དེ་ན ཙ་ཏཱུ་ཧི ཨཱ་ཀཱ་རེ་ཧི ནི་གྒ་ཧ་སྶ ཀ་ཏ་ཏྟཱ ནི་གྒ་ཧ་ཙ་ཏུ་ཀྐཾ ནཱ་མ.
ཨེ་ཝཾ ནི་གྒ་ཧཾ ཀ་ཏྭཱ་པི ཨི་དཱ་ནི ‘‘ཡ་དི ཨ་ཡཾ མ་ཡཱ ཏ་ཝ མ་ཏེ་ན ཀ་ཏོ ནི་གྒ་ཧོ དུ་ནྣི་གྒ་ཧོ, ཡོ་པི མ་མ ཏ་ཡཱ ཧེ་ཊྛཱ ཨ་ནུ་ལོ་མ་པ་ཉྩ་ཀེ ཀ་ཏོ ནི་གྒ་ཧོ, སོ་པི དུ་ནྣི་གྒ་ཧོ’’ཏི ད་སྶེ་ནྟོ ‘‘ཨེ་སེ ཙེ དུ་ནྣི་གྒ་ཧི་ཏེ’’ཏི་ཨཱ་དི་མཱ་ཧ. ཏ་ཏྠ ཨེ་སེ ཙེ དུ་ནྣི་གྒ་ཧི་ཏེཏི ཨེ་སོ ཙེ ཏ་ཝ ཝཱ་དོ མ་ཡཱ དུ་ནྣི་གྒ་ཧི་ཏོ, ཨ་ཐ ཝཱ ཨེ་སོ ཙེ ཏ་ཝ མ་ཡཱ ཀ་ཏོ ནི་གྒ་ཧོ དུ་ནྣི་གྒ་ཧོ. ཧེ་ཝ་མེ་ཝཾ ཏ་ཏྠ ད་ཀྑཱཏི ཏ་ཏྠཱ་པི ཏ་ཡཱ མ་མ ཧེ་ཊྛཱ ཀ་ཏེ ནི་གྒ་ཧེ ཨེ་ཝ་མེ་ཝཾ པ་སྶ. ཨི་དཱ་ནི ཡྭཱ་སྶ ཧེ་ཊྛཱ ས་ཀ་ཝཱ་དི་ནཱ ནི་གྒ་ཧོ ཀ་ཏོ, ཏཾ ‘‘ཝ་ཏྟ་བྦེ ཁོ’’ཏི་ཨཱ་དི་ཝ་ཙ་ནེ་ན ད་སྶེ་ཏྭཱ པུ་ན ཏཾ ནི་གྒ་ཧཾ ཨ་ནི་གྒ་ཧ་བྷཱ་ཝཾ ཨུ་པ་ནེ་ནྟོ ‘‘ནོ ཙ མ་ཡཾ ཏ་ཡཱ’’ཏི་ཨཱ་དི་མཱ་ཧ. ཏ་ཏྠ ནོ ཙ མ་ཡཾ ཏ་ཡཱ ཏ་ཏྠ ཧེ་ཏཱ་ཡ པ་ཊི་ཉྙཱ་ཡཱཏི་ཨཱ་དཱི་སུ ཨ་ཡ་མ་ཏྠོ – ཡ་སྨཱ སོ ཏ་ཡཱ མ་མ ཀ་ཏོ ནི་གྒ་ཧོ དུ་ནྣི་གྒ་ཧོ, ཏ་སྨཱ མ་ཡཾ ཏ་ཡཱ ཏ་ཏྠ ཨ་ནུ་ལོ་མ་པ་ཉྩ་ཀེ ‘‘ཨཱ་མ་ནྟཱ’’ཏི ཨེ་ཏཱ་ཡ པ་ཊི་ཉྙཱ་ཡ ཨེ་ཝཾ པ་ཊི་ཛཱ་ན་ནྟཱ པུ་ན ‘‘ན ཧེ་ཝཱ’’ཏི པ་ཊི་ཀྑེ་པེ ཀ་ཏེ་པི ‘‘ཨཱ་ཛཱ་ནཱ་ཧི ནི་གྒ་ཧ’’ནྟི ཨེ་ཝཾ ནི་གྒ་ཧེ་ཏ་བྦཱ་ཡེ་ཝ, ཨེ་ཝཾ ཨ་ནི་གྒ་ཧེ་ཏ་བྦ་མྤི མཾ ནི་གྒ་ཎྷཱ་སི, ཨཱི་དི་སེ་ན པ་ན ནི་གྒ་ཧེ་ན དུ་ནྣི་གྒ་ཧི་ཏཱ མ་ཡཾ ཧོ་མ. ཨི་དཱ་ནི ཡཾ ནི་གྒ་ཧཾ ས་ནྡྷཱ་ཡ དུ་ནྣི་གྒ་ཧི་ཏཱ ཙ ཧོ་མཱ་ཏི ཨ་ཝོ་ཙ, ཏཾ ད་སྶེ་ཏུཾ ‘‘ཧ་ཉྩི པུ་གྒ་ལོ…པེ… ཨི་དཾ ཏེ མི་ཙྪཱ’’ཏི ཨཱ་ཧ. ཨེ་ཝ་མི་དཾ ཨ་ནུ་ལོ་མ་པ་ཊི་ལོ་མ་ཏོ ཙ་ཏཱུ་ཧི པཱ་པ་ནཱ་རོ་པ་ནཱ་ཧི ནི་གྒ་ཧ་སྶ ཨུ་པ་ནཱི་ཏ་ཏྟཱ ཨུ་པ་ན་ཡ་ན་ཙ་ཏུ་ཀྐཾ ནཱ་མ ཧོ་ཏི.
ཨི་དཱ་ནི ན ཧེ་ཝཾ ནི་གྒ་ཧེ་ཏ་བྦེ་ཏི་ཨཱ་དི་ཀཾ ནི་གྒ་མ་ན་ཙ་ཏུ་ཀྐཾ ནཱ་མ ཧོ་ཏི. ཏ་ཏྠ ན ཧེ་ཝཾ ནི་གྒ་ཧེ་ཏ་བྦེཏི ཡ་ཐཱ་ཧཾ ཏ་ཡཱ ནི་གྒ་ཧི་ཏོ, ན ཧི ཨེ་ཝཾ ནི་གྒ་ཧེ་ཏ་བྦོ, ཨེ་ཏ་སྶ ཧི ནི་གྒ་ཧ་སྶ དུ་ནྣི་གྒ་ཧ་བྷཱ་ཝོ མ་ཡཱ སཱ་དྷི་ཏོ. ཏེ་ན ཧཱིཏི ཏེ་ན ཀཱ་ར་ཎེ་ན. ཡ་སྨཱ ཨེ་ས ནི་གྒ་ཧོ དུ་ནྣི་གྒ་ཧོ, ཏ་སྨཱ ཡཾ མཾ ནི་གྒ་ཎྷཱ་སི. ཧ་ཉྩི པུ་གྒ་ལོ…པེ… ཨི་དཾ ཏེ མི་ཙྪཱཏི ཨི་དཾ ནི་གྒ་ཎྷ་ནཾ ཏ་ཝ མི་ཙྪཱ་ཏི ཨ་ཏྠོ. ཏེ་ན ཧི ཡེ ཀ་ཏེ ནི་གྒ་ཧེཏི ཡེ་ན ཀཱ་ར་ཎེ་ན ཨི་དཾ མི་ཙྪཱ, ཏེ་ན ཀཱ་ར་ཎེ་ན ཡོ ཏ་ཡཱ ནི་གྒ་ཧོ ཀ་ཏོ, སོ དུ་ཀྐ་ཊོ. ཡཾ མ་ཡཱ པ་ཊི་ཀ་མྨཾ ཀ་ཏཾ, ཏ་དེ་ཝ སུ་ཀ་ཏཾ. ཡཱ་པི ཙེ་སཱ པ་ཊི་ཀ་མྨ་ཙ་ཏུ་ཀྐཱ་དི་ཝ་སེ་ན ཀ་ཐཱ་མ་གྒ་ས་མྤ་ཊི་པཱ་ད་ནཱ ཀ་ཏཱ, སཱ་པི སུ་ཀ་ཏཱ་ཏི. ཏ་དེ་ཝ པུ་གྒ་ལོ ཨུ་པ་ལ་བྦྷ་ཏཱི་ཏི་ཨཱ་དི་ཀ་སྶ ཨ་ནུ་ལོ་མ་པ་ཉྩ་ཀ་སྶ ནུ་པ་ལ་བྦྷ་ཏཱི་ཏི་ཨཱ་དི་ཀཱ་ནཾ པ་ཊི་ཀ་མྨ་ནི་གྒ་ཧོ་པ་ན་ཡ་ན་ནི་གྒ་མ་ན་ཙ་ཏུ་ཀྐཱ་ན་ཉྩ ཝ་སེ་ན ཨ་ནུ་ལོ་མ་པ་ཙྩ་ནཱི་ཀཾ ནཱ་མ ནི་དྡི་ཊྛ་ནྟི ཝེ་དི་ཏ་བྦཾ. ཨེ་ཏྟཱ་ཝ་ཏཱ ས་ཀ་ཝཱ་དི་ནོ པུ་བྦ་པ་ཀྑེ ས་ཏི པ་ར་ཝཱ་དི་ནོ ཝ་ཙ་ན་སཱ་མ་ཉྙ་མ་ཏྟེ་ན ཚ་ལ་ཝཱ་དེ་ན ཛ་ཡོ ཧོ་ཏི.
ཨི་དཱ་ནི ཡ་ཐཱ པ་ར་ཝཱ་དི་ནོ པུ་བྦ་པ་ཀྑེ ས་ཏི ས་ཀ་ཝཱ་དི་ནོ དྷ་མྨེ་ནེ་ཝ ཏ་ཐེ་ན ཛ་ཡོ ཧོ་ཏི, ཏ་ཐཱ ཝཱ་དུ་པྤ་ཏྟིཾ ད་སྶེ་ཏུཾ ‘‘པུ་གྒ་ལོ ནུ་པ་ལ་བྦྷ་ཏཱི’’ཏི པ་ཙྩ་ནཱི་ཀཱ་ནུ་ལོ་མ་པ་ཉྩ་ཀཾ ཨཱ་ར་དྡྷཾ. ཏ་ཏྠ པ་ཙྩ་ནཱི་ཀེ པུ་ཙྪཱ པ་ར་ཝཱ་དི་སྶ, རཱུ་པཱ་དི་བྷེ་དཾ ས་ཙྩི་ཀ་ཊྛ་པ་ར་མ་ཏྠཾ ས་ནྡྷཱ་ཡ པ་ཊི་ཉྙཱ ས་ཀ་ཝཱ་དི་སྶ, སུ་དྡྷ་ས་མྨུ་ཏི་ས་ཙྩཾ ཝཱ པ་ར་མ་ཏྠ་མི་སྶ་ཀཾ ཝཱ ས་མྨུ་ཏི་ས་ཙྩཾ ས་ནྡྷཱ་ཡ ‘‘ཡོ ས་ཙྩི་ཀ་ཊྛོ’’ཏི པུ་ན ཨ་ནུ་ཡོ་གོ པ་ར་ཝཱ་དི་སྶ, ས་མྨུ་ཏི་ཝ་སེ་ན ‘‘པུ་གྒ་ལོ ནུ་པ་ལ་བྦྷ་ཏཱི’’ཏི ན་ཝ་ཏྟ་བྦ་ཏྟཱ མི་སྶ་ཀ་ཝ་སེ་ན ཝཱ ཨ་ནུ་ཡོ་ག་སྶ སཾ་ཀི་ཎྞ་ཏྟཱ ‘‘ན ཧེ་ཝ’’ནྟི པ་ཊི་ཀྑེ་པོ ས་ཀ་ཝཱ་དི་སྶ, པ་ཊི་ཉྙཱ་ཏཾ པ་ཊི་ཀྑི་པ་ཏཱི་ཏི ཝ་ཙ་ན་སཱ་མ་ཉྙ་མ་ཏྟེ་ན ‘‘ཨཱ་ཛཱ་ནཱ་ཧི ནི་གྒ་ཧ’’ནྟི་ཨཱ་དི་ཝ་ཙ་ནཾ པ་ར་ཝཱ་དི་སྶ. ཨེ་ཝ་མ་ཡཾ པུ་གྒ་ལོ ནུ་པ་ལ་བྦྷ་ཏཱི་ཏི དུ་ཏི་ཡ་ཝཱ་དཾ ནི་སྶཱ་ཡ དུ་ཏི་ཡོ ནི་གྒ་ཧོ ཧོ་ཏཱི་ཏི ཝེ་དི་ཏ་བྦོ. ཨེ་ཝཾ ཏེ་ན ཚ་ལེ་ན ནི་གྒ་ཧོ ཨཱ་རོ་པི་ཏོ.
ཨི་དཱ་ནི དྷ་མྨེ་ན ས་མེ་ན པ་ར་ཝཱ་དི་པ་ཊི་ཉྙཱ་ཡ ཨ་ཏྟ་ནོ ཝཱ་དེ ཛ་ཡཾ ད་སྶེ་ཏུཾ ཨ་ནུ་ལོ་མ་ན་ཡེ པུ་ཙྪཱ ས་ཀ་ཝཱ་དི་སྶ, ཨ་ཏྟ་ནོ ལ་དྡྷིཾ ནི་སྶཱ་ཡ པ་ཊི་ཉྙཱ པ་ར་ཝཱ་དི་སྶ, ལ་དྡྷི་ཡཱ ཨོ་ཀཱ་སཾ ཨ་ད་ཏྭཱ པ་ར་མ་ཏྠ་ཝ་སེ་ན པུ་ན ཨ་ནུ་ཡོ་གོ ས་ཀ་ཝཱ་དི་སྶ, པ་ར་མ་ཏྠ་ཝ་སེ་ན པུ་གྒ་ལ་སྶ ཨ་ནུ་པ་ལ་བྦྷ་ན་ཏོ པ་ཊི་ཀྑེ་པོ པ་ར་ཝཱ་དི་སྶ, ཏ་ཏོ པ་རཾ དྷ་མྨེ་ན ས་མེ་ན ཨ་ཏྟ་ནོ ཛ་ཡ་ད་སྶ་ན་ཏྠཾ ‘‘ཨཱ་ཛཱ་ནཱ་ཧི པ་ཊི་ཀ་མྨ’’ནྟི་ཨཱ་དི ས་བྦཾ ས་ཀ་ཝཱ་དི་ཝ་ཙ་ན་མེ་ཝ ཧོ་ཏི. ཏ་ཏྠ ས་བྦེ་སཾ པ་ཊི་ཀ་མྨ་ནི་གྒ་ཧོ་པ་ན་ཡ་ན་ནི་གྒ་མ་ན་ཙ་ཏུ་ཀྐཱ་ནཾ ཧེ་ཊྛཱ ཝུ་ཏྟ་ན་ཡེ་ནེ་ཝ ཨ་ཏྠོ ཝེ་དི་ཏ་བྦོ. ཨེ་ཝ་མི་དཾ ‘‘པུ་གྒ་ལོ ནུ་པ་ལ་བྦྷ་ཏཱི’’ཏི་ཨཱ་དི་ཀ་སྶ པ་ཙྩ་ནཱི་ཀ་པ་ཉྩ་ཀ་སྶ ‘‘ཨུ་པ་ལ་བྦྷ་ཏཱི’’ཏི་ཨཱ་དཱི་ནཾ པ་ཊི་ཀ་མྨ་ནི་གྒ་ཧོ་པ་ན་ཡ་ན་ནི་གྒ་མ་ན་ཙ་ཏུ་ཀྐཱ་ན་ཉྩ ཝ་སེ་ན པ་ཙྩ་ནཱི་ཀཱ་ནུ་ལོ་མ་པ་ཉྩ་ཀཾ ནཱ་མ ནི་དྡི་ཊྛཾ ཧོ་ཏི. ཨེ་ཝ་མེ་ཏཱ་ནི པ་ཋ་མ་ས་ཙྩི་ཀ་ཊྛེ དྭེ པ་ཉྩ་ཀཱ་ནི ནི་དྡི་ཊྛཱ་ནི, ཏ་ཏྠེ་ཏཾ ཝུ་ཙྩ་ཏི –
‘‘ནི་གྒ་ཧོ པ་ར་ཝཱ་དི་སྶ, སུ་དྡྷོ པ་ཋ་མ་པ་ཉྩ་ཀེ;
ཨ་སུ་དྡྷོ པ་ན ཏ་སྶེ་ཝ, པ་ཊི་ཀ་མྨ་ཛ་ཡོ ཏ་ཧིཾ.
‘‘ནི་གྒ་ཧོ ས་ཀ་ཝཱ་དི་སྶ, ཨ་སུ་དྡྷོ དུ་ཏི་ཡ་པ་ཉྩ་ཀེ;
ཝི་སུ་དྡྷོ པ་ན ཏ་སྶེ་ཝ, པ་ཊི་ཀ་མྨ་ཛ་ཡོ ཏ་ཧིཾ.
‘‘ཏ་སྨཱ དྭཱི་སུ་པི ཋཱ་ནེ་སུ, ཛ་ཡོ་ཝ ས་ཀ་ཝཱ་དི་ནོ;
དྷ་མྨེ་ན ཧི ཛ་ཡོ ནཱ་མ, ཨ་དྷ་མྨེ་ན ཀུ་ཏོ ཛ་ཡོ.
‘‘ས་ཙྩི་ཀ་ཊྛེ ཡ་ཐཱ ཙེ་ཏྠ, པ་ཉྩ་ཀ་དྭ་ཡ་མ་ཎྜི་ཏེ;
དྷ་མྨཱ་དྷ་མྨ་ཝ་སེ་ནེ་ཝ, ཝུ་ཏྟོ ཛ་ཡ་པ་རཱ་ཛ་ཡོ.
‘‘ཨི་ཏོ པ་རེ་སུ ས་བྦེ་སུ, ས་ཙྩི་ཀ་ཊྛེ་སུ པ་ཎྜི་ཏོ;
ཨེ་ཝ་མེ་ཝ ཝི་བྷཱ་ཝེ་ཡྻ, ཨུ་བྷོ ཛ་ཡ་པ་རཱ་ཛ་ཡེ’’ཏི. (ཀ་ཐཱ. ཨ་ཊྛ. ༧-༡༠);
པ་ཋ་མོ སུ་དྡྷི་ཀ་ས་ཙྩི་ཀ་ཊྛོ ནི་ཊྛི་ཏོ.
ཨེ་ཝཾ སུ་དྡྷི་ཀ་ས་ཙྩི་ཀ་ཊྛཾ ཝི་ཏྠཱ་རེ་ཏྭཱ ཨི་དཱ་ནི ཏ་མེ་ཝ ཨ་པ་རེ་ཧི་པི ཨོ་ཀཱ་སཱ་དཱི་ཧི ན་ཡེ་ཧི ཝི་ཏྠཱ་རེ་ཏུཾ པུ་ན ‘‘པུ་གྒ་ལོ ཨུ་པ་ལ་བྦྷ་ཏཱི’’ཏི་ཨཱ་དི ཨཱ་ར་དྡྷཾ. ཏ་ཏྠ པུ་ཙྪཱ ས་ཀ་ཝཱ་དི་སྶ, པ་ཊི་ཉྙཱ པ་ར་ཝཱ་དི་སྶ. པུ་ན ས་བྦ་ཏྠཱཏི ས་རཱི་རཾ ས་ནྡྷཱ་ཡ ཨ་ནུ་ཡོ་གོ ས་ཀ་ཝཱ་དི་སྶ, རཱུ་པ་སྨིཾ ཨ་ཏྟཱ་ནཾ ས་མ་ནུ་པ་སྶ་ནཱ་དོ་ས་ཉྩ ‘‘ཨ་ཉྙཾ ཛཱི་ཝཾ ཨ་ཉྙཾ ས་རཱི་ར’’ནྟི ཨཱ་པ་ཛྫ་ན་དོ་ས་ཉྩ དི་སྭཱ པ་ཊི་ཀྑེ་པོ པ་ར་ཝཱ་དི་སྶ. སེ་ས་མེ་ཏྠ ཨ་ནུ་ལོ་མ་པ་ཙྩ་ནཱི་ཀ་པ་ཉྩ་ཀེ ཧེ་ཊྛཱ ཝུ་ཏྟ་ན་ཡེ་ནེ་ཝ ཝེ་དི་ཏ་བྦཾ. པཱ་ཋོ པ་ན སཾ་ཁི་ཏྟོ. ཏ་ཏྠ ཡ་སྨཱ ས་རཱི་རཾ ས་ནྡྷཱ་ཡ ‘‘ས་བྦ་ཏྠ ནུ་པ་ལ་བྦྷ་ཏཱི’’ཏི ཝུ་ཏྟེ ས་རཱི་ར་ཏོ བ་ཧི ཨུ་པ་ལ་བྦྷ་ཏཱི་ཏི ཨཱ་པ་ཛྫ་ཏི, ཏ་སྨཱ པ་ཙྩ་ནཱི་ཀེ པ་ཊི་ཀྑེ་པོ ས་ཀ་ཝཱ་དི་སྶ, པ་ཋ་མཾ ཨ་ནུ་ཛཱ་ནི་ཏྭཱ པ་ཙྪཱ ཨ་ཝ་ཛཱ་ནཱ་ཏཱི་ཏི ཚ་ལ་ཝཱ་ད་སྶ ཝ་སེ་ན པ་ཊི་ཀ་མྨཾ པ་ར་ཝཱ་དི་སྶ, སེ་སཾ པཱ་ཀ་ཊ་མེ་ཝ.
དུ་ཏི་ཡ་ན་ཡེ ས་བྦ་དཱཏི པུ་རི་མ་པ་ཙྪི་མ་ཛཱ་ཏི་ཀཱ་ལ་ཉྩ དྷ་ར་མཱ་ན་པ་རི་ནི་བྦུ་ཏ་ཀཱ་ལ་ཉྩ ས་ནྡྷཱ་ཡ ཨ་ནུ་ཡོ་གོ ས་ཀ་ཝཱ་དི་སྶ, སྭེ་ཝ ཁ་ཏྟི་ཡོ སོ བྲཱ་ཧྨ་ཎོ་ཏི་ཨཱ་དཱི་ནཾ ཨཱ་པ་ཏྟི་དོ་ས་ཉྩ དྷ་ར་མཱ་ན་པ་རི་ནི་བྦུ་ཏཱ་ནཾ ཝི་སེ་སཱ་བྷཱ་ཝ་དོ་ས་ཉྩ དི་སྭཱ པ་ཊི་ཀྑེ་པོ པ་ར་ཝཱ་དི་སྶ. སེ་སཾ པ་ཋ་མ་ན་ཡེ ཝུ་ཏྟ་ས་དི་ས་མེ་ཝ.
ཏ་ཏི་ཡ་ན་ཡེ ས་བྦེ་སཱུཏི ཁ་ནྡྷཱ་ཡ་ཏ་ནཱ་དཱི་ནི ས་ནྡྷཱ་ཡ པུ་ཙྪཱ ས་ཀ་ཝཱ་དི་སྶ, རཱུ་པ་སྨིཾ ཨ་ཏྟཱ, ཙ་ཀྑུ་སྨིཾ ཨ་ཏྟཱ་ཏི་ཨཱ་དི་དོ་ས་བྷ་ཡེ་ན པ་ཊི་ཀྑེ་པོ པ་ར་ཝཱ་དི་སྶ. སེ་སཾ ཏཱ་དི་ས་མེ་ཝཱ་ཏི.
ཨེ་ཝ་མི་མཱ་ནི ཏཱི་ཎི མུ་ཁཱ་ནི ཨ་ནུ་ལོ་མ་པ་ཙྩ་ནཱི་ཀ་པ་ཉྩ་ཀེ ཨ་ནུ་ལོ་མ་མ་ཏྟ་ཝ་སེ་ནེ་ཝ ཏཱ་ཝ པ་ཊི་པཱ་ཊི་ཡཱ བྷཱ་ཛེ་ཏྭཱ པུ་ན པ་ཙྩ་ནཱི་ཀཱ་ནུ་ལོ་མ་པ་ཉྩ་ཀེ པ་ཙྩ་ནཱི་ཀ་མ་ཏྟ་ཝ་སེ་ནེ་ཝ བྷཱ་ཛེ་ཏུཾ ‘‘པུ་གྒ་ལོ ནུ་པ་ལ་བྦྷ་ཏཱི’’ཏི་ཨཱ་དི ཨཱ་ར་དྡྷཾ. ཏ་ཏྠ ཧེ་ཊྛཱ ཝུ་ཏྟ་ན་ཡེ་ན ཨ་ཏྠོ ཝེ་དི་ཏ་བྦོ. ཨེ་ཏྟཱ་ཝ་ཏཱ སུ་དྡྷི་ཀ་སྶ ཙེ་ཝ ཨི་མེ་ས་ཉྩ ཏི་ཎྞ་ནྟི ཙ་ཏུ་ནྣཾ ས་ཙྩི་ཀ་ཊྛཱ་ནཾ ཨེ་ཀེ་ཀ་སྨིཾ ས་ཙྩི་ཀ་ཊྛེ ཨ་ནུ་ལོ་མ་པ་ཙྩ་ནཱི་ཀ་སྶ, པ་ཙྩ་ནཱི་ཀཱ་ནུ་ལོ་མ་སྶ ཙཱ་ཏི དྭི་ནྣཾ དྭི་ནྣཾ པ་ཙྩ་ནཱི་ཀཱ་ནཾ ཝ་སེ་ན ཨ་ཡཾ ཨ་ཊྛ་མུ་ཁཱ ནཱ་མ ཝཱ་ད་ཡུ་ཏྟི ནི་དྡི་ཊྛཱ ཧོ་ཏཱི་ཏི ཝེ་དི་ཏ་བྦཱ. ཡཱ ཨེ་ཀེ་ཀ་སྨིཾ མུ་ཁེ ཨེ་ཀེ་ཀ་སྶ ནི་གྒ་ཧ་སྶ ཝ་སེ་ན ཝུ་ཙྩ་ཏི. ཏ་ཏྠེ་ཏཾ ཝུ་ཙྩ་ཏི –
‘‘ཨེ་ཝཾ ཙ་ཏུ་བྦི་དྷེ པ་ཉྷེ, པ་ཉྩ་ཀ་དྭ་ཡ་བྷེ་ད་ཏོ;
ཨེ་སཱ ཨ་ཊྛ་མུ་ཁཱ ནཱ་མ, ཝཱ་ད་ཡུ་ཏྟི པ་ཀཱ་སི་ཏཱ.
‘‘ཨ་ཊྛེ་ཝ ནི་གྒ་ཧཱ ཏ་ཏྠ, ཙ་ཏྟཱ་རོ ཏེ་སུ དྷ་མྨི་ཀཱ;
ཨ་དྷ་མྨི་ཀཱ ཙ ཙ་ཏྟཱ་རོ, ས་བྦ་ཏྠ ས་ཀ་ཝཱ་དི་ནོ;
ཛ་ཡོ པ་རཱ་ཛ་ཡོ ཙེ་ཝ, ས་བྦ་ཏྠ པ་ར་ཝཱ་དི་ནོ’’ཏི. (ཀ་ཐཱ. ཨ་ཊྛ. ༡༤);
ཨ་ཡཾ ཏཱ་ཝེ་ཏྠ ཨ་ནུ་ཏྟཱ་ན་ཏྠ་ཏོ སཾ་ཝ་ཎྞ་ནཱ.
ཨ་ཏྠ་ཝི་ནི་ཙྪ་ཡོ པ་ནེ་ཏྠཱ་པི མོ་གྒ་ལི་པུ་ཏྟ་ཏི་སྶ་ཏྠེ་རེ་ན ཀ་ཏ་ནི་དྡེ་ས་སྶ ན་ཡ་མུ་ཁ་མ་ཏྟ་ད་སྶ་ན་ཝ་སེ་ནེ་ཝ ཧོ་ཏི. ཐེ་རེ་ན ཧི བྷ་ག་ཝ་ཏཱ ཋ་པི་ཏཱ་ཡ ཨེ་ཏི་སྶཱ མཱ་ཏི་ཀཱ་ཡ པ་དུ་དྡྷཱ་ར་ཝ་སེ་ན ནི་དྡེ་སཾ ཨ་ཀ་ཏྭཱ བྷ་ག་ཝ་ཏཱ དི་ནྣ་ཨ་ཊྛ་མུ་ཁ་ཝཱ་ད་ཡུ་ཏྟི་ན་ཡེ ཋ་ཏྭཱ ཨ་པ་རེ་ཧི པ་རི་ཡཱ་ཡེ་ཧི པུ་གྒ་ལ་ཝཱ་དཾ, ཏ་ད་ཉྙཾ ནཱ་ན་པྤ་ཀཱ་རཾ མི་ཙྪཱ་གཱ་ཧ་ཉྩ ནི་རཱ་ཀ་རོ་ནྟེ་ནེ་ཝ པུ་གྒ་ལ་ཀ་ཐཾ ཨཱ་དིཾ ཀ་ཏྭཱ སཱ་དྷི་ཀ་དྭི་ས་ཏ་ཀ་ཐཱ་ཧི ནི་དྡེ་སོ ཀ་ཏོ.
ཏ་ཏྠ པུ་གྒ་ལ་ཝཱ་ད་ནི་རཱ་ཀ་ར་ཎ་ཏྠཾ ཏཱ་ཝ ཁ་ནྡྷཱ་ཡ་ཏ་ན་དྷཱ་ཏུ་ཨི་ནྡྲི་ཡ་ཝ་སེ་ན ས་ཏྟ་པ་ཉྙཱ་སཱ་ཡ དྷ་མྨེ་སུ ཨེ་ཀེ་ཀེ་ན ས་དྡྷིཾ ‘‘པུ་གྒ་ལོ ཨུ་པ་ལ་བྦྷ་ཏི ས་ཙྩི་ཀ་ཊྛ་པ་ར་མ་ཏྠེ་ན, རཱུ་པ་ཉྩ ཨུ་པ་ལ་བྦྷ་ཏི ས་ཙྩི་ཀ་ཊྛ་པ་ར་མ་ཏྠེ་ན…པེ… པུ་གྒ་ལོ ཨུ་པ་ལ་བྦྷ་ཏི ས་ཙྩི་ཀ་ཊྛ་པ་ར་མ་ཏྠེ་ན, ཝེ་ད་ནཱ་པི ཨུ་པ་ལ་བྦྷ་ཏི ས་ཙྩི་ཀ་ཊྛ་པ་ར་མ་ཏྠེ་ནཱ’’ཏི་ཨཱ་དི་ནཱ ན་ཡེ་ན པུ་གྒ་ལ་སཾ་ས་ནྡ་ན་ཝ་ས་པྤ་ཝ་ཏྟཾ སུ་དྡྷི་ཀ་སཾ་ས་ནྡ་ནཾ, ཡ་ཐཱ རཱུ་པ་ཝེ་ད་ནཱ་ད་ཡོ ས་ཏྟ་པ་ཉྙཱ་ས དྷ་མྨཱ ཨ་ཉྙ་མ་ཉྙཱ ཝི་ས་དི་སཱ ཨུ་པ་ལ་བྦྷ་ནྟི, ཨེ་ཝཾ རཱུ་པཱ་དཱི་ཧི ཝི་ས་དི་སོ པུ་གྒ་ལོ ཨུ་པ་ལ་བྦྷ་ཏཱི་ཏི པུ་ཙྪ་ན་ཝ་ས་པྤ་ཝ་ཏྟཾ ཨོ་པ་མྨ་སཾ་ས་ནྡ་ནཾ, ‘‘རཱུ་པཾ པུ་གྒ་ལོ, རཱུ་པ་སྨིཾ པུ་གྒ་ལོ, ཨ་ཉྙ་ཏྲ རཱུ་པཱ པུ་གྒ་ལོ, པུ་གྒ་ལ་སྨིཾ རཱུ་པ’’ནྟི ཨེ་ཝཾ ཙ་ཏུ་ཀྐ་ན་ཡེ་ན ས་ཏྟ་པ་ཉྙཱ་སཱ་ཡ དྷ་མྨེ་ཧི པུ་ཙྪ་ན་ཝ་ས་པྤ་ཝ་ཏྟཾ ཙ་ཏུ་ཀྐ་ན་ཡ་སཾ་ས་ནྡ་ན་ནྟི ཏི་ཝི་དྷཱ སཾ་ས་ནྡ་ན་ན་ཡཱ ཝུ་ཏྟཱ. ཏ་ཏྠ པུ་གྒ་ལ་སྶ རཱུ་པཱ་དི་ས་བྷཱ་ཝ་ཏྟེ ནི་ཙྩ་ས་སྶ་ཏུ་ཙྪེ་དཱ་དི་པྤ་ས་ངྒ་ཏོ ཡ་ཐཱ་ནུ་རཱུ་པཾ ནི་རཱ་ཀ་ར་ཎཾ ཝེ་དི་ཏ་བྦཾ, ཨ་ཏི་ཝི་ཏྠཱ་ར་བྷ་ཡེ་ནེ་ཏྠ ཨུ་པ་རི ཙེ་ཏཾ ན ཝི་ཏྠཱ་རཱི་ཡ་ཏི.
ཏ་ཏོ ‘‘ཡ་ཐཱ རཱུ་པཱ་ད་ཡོ ས་པྤ་ཙྩ་ཡཱ, ཨ་པྤ་ཙྩ་ཡཱ་ད་ཡོ ཝཱ ཧོ་ནྟི, ཨེ་ཝཾ ཏ་ཝ པུ་གྒ་ལོ་པི ས་པྤ་ཙྩ་ཡ་ཏཱ་དི་ལ་ཀྑ་ཎ་ཡུ་ཏྟོ’’ཏི པུ་ཙྪ་ན་ཝ་ས་པྤ་ཝ་ཏྟཱ ལ་ཀྑ་ཎ་ཡུ་ཏྟི་ཀ་ཐཱ, ‘‘པུ་གྒ་ལོ’’ཏི, ‘‘ཨུ་པ་ལ་བྦྷ་ཏཱི’’ཏི ཙ པ་ད་དྭ་ཡཱ་དི་སོ་དྷ་ན་ཏྠཾ ‘‘ཡོ པུ་གྒ་ལོ, སོ ཨུ་པ་ལ་བྦྷ་ཏི. ཡོ ཝཱ ཨུ་པ་ལ་བྦྷ་ཏི, སོ པུ་གྒ་ལོ’’ཏི་ཨཱ་དི་པུ་ཙྪ་ན་ཝ་ས་པྤ་ཝ་ཏྟཾ ཝ་ཙ་ན་སོ་དྷ་ནཾ, ‘‘རཱུ་པ་དྷཱ་ཏུ་ཡཱ རཱུ་པཱི’’ཏི་ཨཱ་དི ནཱ་མ་པ་ཉྙ་ཏྟི་སོ་དྷ་ན་ཝ་ས་པྤ་ཝ་ཏྟོ པ་ཉྙ་ཏྟཱ་ནུ་ཡོ་གོ ཙ, ‘‘སོ་ཝ པུ་གྒ་ལོ ས་ནྡྷཱ་ཝ་ཏི ཨ་སྨཱ ལོ་ཀཱ པ་རཾ ལོ་ཀཾ, ཨ་ཉྙོ ཝཱ, ན ཨ་ཉྙོ ཝཱ, ནེ་ཝ ཨ་ཉྙོ ནཱ་ན་ཉྙོ ཝཱ’’ཏི་ཨཱ་དི་ནཱ ག་ཏི་པ་རི་ཝ་ཏྟ་ན་མུ་ཁེ་ན ཙུ་ཏི་པ་ཊི་ས་ནྡྷཱ་ནུ་ཡོ་གོ, ‘‘རུ་ཀྑཾ ཨུ་པཱ་དཱ་ཡ ཚཱ་ཡཱ་དཱི་ནཾ ཝི་ཡ ཁ་ནྡྷཱ་དིཾ ཨུ་པཱ་དཱ་ཡ པ་ར་མ་ཏྠ་ཏོ པུ་གྒ་ལ་པ་ཉྙ་ཏྟཱི’’ཏི ཝཱ་དེ ཏ་སྶ ཨ་ནི་ཙྩ་ས་ངྑ་ཏ་ཏཱ་དི་པྤ་ས་ངྒ་དཱི་པ་ཀོ ཨུ་པཱ་དཱ་པ་ཉྙ་ཏྟཱ་ནུ་ཡོ་གོ, ‘‘ཀ་ལྱཱ་ཎ་པཱ་པ་ཀཱ་ནཾ ཀ་མྨཱ་ནཾ ཀཱ་ར་ཀོ པུ་གྒ་ལོ’’ཏི ཝཱ་དེ ཏ་སྶ ཝ་ཊྚ་དུ་ཀྑཱ་ནུ་པ་ཙྪེ་དཱ་དི་པྤ་ས་ངྒ་དཱི་པ་ཀོ པུ་རི་ས་ཀཱ་རཱ་ནུ་ཡོ་གོ ཙ, ‘‘ཡོ ཨི་དྡྷི་ཝི་ཀུ་བྦ་ཀོ, སོ པུ་གྒ་ལོ’’ཏི་ཨཱ་དི་ཝཱ་ད་བྷེ་ད་ཀོ ཨ་བྷི་ཉྙཱ་ནུ་ཡོ་གོ, ‘‘མཱ་ཏཱ་པི་ཏཱ་ད་ཡོ ནཱ་མ ཨ་ཏྠི, ཏེ་ན པུ་གྒ་ལོ ཨ་ཏྠཱི’’ཏི ཝཱ་ད་བྷེ་ད་ཀོ ཉཱ་ཏ་ཀཱ་ནུ་ཡོ་གོ, ‘‘ཨེ་ཝཾ ཁ་ཏྟི་ཡོ’’ཏི་ཨཱ་དི ཛཱ་ཏྱཱ་ནུ་ཡོ་གོ, ‘‘ག་ཧ་ཊྛོ པ་བྦ་ཛི་ཏོ’’ཏི་ཨཱ་དི པ་ཊི་པ་ཏྟཱ་ནུ་ཡོ་གོ, ‘‘དེ་ཝོ མ་ནུ་སྶོ’’ཏི་ཨཱ་དི ཨུ་པ་པ་ཏྟཱ་ནུ་ཡོ་གོ, ‘‘སོ་ཏཱ་པ་ནྣོ’’ཏི་ཨཱ་དི པ་ཊི་ཝེ་དྷཱ་ནུ་ཡོ་གོ, ‘‘ཨ་ཊྛ པུ་རི་ས་པུ་གྒ་ལཱ’’ཏི་ཨཱ་དི ས་ངྒྷཱ་ནུ་ཡོ་གོ, ‘‘པུ་གྒ་ལོ ས་ངྑ་ཏོ’’ཏི་ཨཱ་དི་ཝ་ས་པྤ་ཝ་ཏྟོ ས་ཙྩི་ཀ་ཊྛ་ས་བྷཱ་གཱ་ནུ་ཡོ་གོ, ‘‘སུ་ཁཾ ཝེ་ད་ནཾ ཝེ་དི་ཡ་མཱ་ནོ’’ཏི་ཨཱ་དི ཝེ་ད་ཀཱ་ནུ་ཡོ་གོ, ‘‘ཀཱ་ཡེ ཀཱ་ཡཱ་ནུ་པ་སྶཱི’’ཏི་ཨཱ་དི ཀི་ཙྩཱ་ནུ་ཡོ་གོ, ‘‘ཨ་ཏྠི པུ་གྒ་ལོ ཨ་ཏྟ་ཧི་ཏཱ་ཡ པ་ཊི་པ་ནྣོ’’ཏི་ཨཱ་དི་ནཱ པུ་གྒ་ལ་ས་བྷཱ་ཝ་སཱ་དྷ་ཀ་སུ་ཏྟེ་སུ ས་ནྣི་སྶི་ཏེ་སུ –
ས་བྦེ དྷ་མྨཱ ཨ་ན་ཏྟཱ (མ. ནི. ༡.༣༥༣, ༣༥༦; དྷ. པ. ༢༧༩), དུ་ཀྑ་མེ་ཝ ཨུ་པྤ་ཛྫ་མཱ་ནཾ ཨུ་པྤ་ཛྫ་ཏི (སཾ. ནི. ༢.༡༥).
ཀི་ནྣུ ས་ཏྟོ་ཏི པ་ཙྩེ་སི, མཱ་ར དི་ཊྛི་ག་ཏཾ ནུ ཏེ;
སུ་དྡྷ་ས་ངྑཱ་ར་པུ་ཉྫོ་ཡཾ, ན་ཡི་དྷ ས་ཏྟཱུ་པ་ལ་བྦྷ་ཏི.
དུ་ཀྑ་མེ་ཝ ཧི ས་མྦྷོ་ཏི, དུ་ཀྑཾ ཏི་ཊྛ་ཏི ཝེ་ཏི ཙ;
ནཱ་ཉྙ་ཏྲ དུ་ཀྑཱ ས་མྦྷོ་ཏི, ནཱ་ཉྙཾ དུ་ཀྑཱ ནི་རུ་ཛ྄ཛྷ་ཏི. (སཾ. ནི. ༡.༡༧༡);
ཡ་སྨཱ ཙ ཁོ, ཨཱ་ན་ནྡ, སུ་ཉྙཾ ཨ་ཏྟེ་ན ཝཱ ཨ་ཏྟ་ནི་ཡེ་ན ཝཱ…པེ… ཏ་སྨཱ སུ་ཉྙོ ལོ་ཀོ་ཏི ཝུ་ཙྩ་ཏི (སཾ. ནི. ༤.༨༥).
‘‘ཨ་ཏྟ་ནི ཝཱ, བྷི་ཀྑ་ཝེ, ས་ཏི ཨ་ཏྟ་ནི་ཡཾ མེ་ཏི ཨ་སྶཱ་ཏི…པེ… ཨ་ཏྟ་ནི ཙ བྷི་ཀྑ་ཝེ ཨ་ཏྟ་ནི་ཡེ ཙ ས་ཙྩ་ཏོ ཐེ་ཏ་ཏོ ཨ་ནུ་པ་ལ་བྦྷ་ནི་ཡ་མཱ་ནེ ཡ་མྤི ཏཾ དི་ཊྛི་ཊྛཱ་ནཾ, སོ ལོ་ཀོ, སོ ཨ་ཏྟཱ, སོ པེ་ཙྩ བྷ་ཝི་སྶཱ་མི, ནི་ཙྩོ དྷུ་ཝོ ས་སྶ་ཏོ ཨ་ཝི་པ་རི་ཎཱ་མ་དྷ་མྨོ, ས་སྶ་ཏི་ས་མཾ ཏ་ཐེ་ཝ ཋ་སྶཱ་མཱི་ཏི, ན་ནཱ་ཡཾ, བྷི་ཀྑ་ཝེ, ཀེ་ཝ་ལོ པ་རི་པཱུ་རོ བཱ་ལ་དྷ་མྨོ’’ཏི (མ. ནི. ༡.༢༤༤), ‘‘ཏ་ཏྲ, སེ་ནི་ཡ, ཡྭཱ་ཡཾ ས་ཏྠཱ དི་ཊྛེ ཙེ་ཝ དྷ་མྨེ ཨ་ཏྟཱ་ནཾ ས་ཙྩ་ཏོ ཐེ་ཏ་ཏོ ན པ་ཉྙཱ་པེ་ཏི, ཨ་བྷི་ས་མྤ་རཱ་ཡེ ཙ…པེ… ཨ་ཡཾ ཝུ་ཙྩ་ཏི, སེ་ནི་ཡ, ས་ཏྠཱ ས་མྨཱ་ས་མྦུ་དྡྷོ’’ཏི་ཨཱ་དི་ནཱ པུ་གྒ་ལཱ་བྷཱ་ཝ་དཱི་པ་ཀ་སུ་ཏྟ་ས་ནྡ་སྶ་ན་ཝ་ས་པྤ་ཝ་ཏྟོ སུ་ཏྟ་ས་ནྡ་སྶ་ནཱ་ནུ་ཡོ་གོ ཙཱ་ཏི ཨེ་ཏྟ་ཀེ་ན ཀ་ཐཱ་མ་གྒེ་ན ཝི་ཏྠཱ་ར་ཏོ པ་ཋ་མཱ པུ་གྒ་ལ་ཀ་ཐཱ ཝི་བྷ་ཏྟཱ. ཏ་ཏྠ ‘‘ཨ་ཏྠི པུ་གྒ་ལོ ཨ་ཏྟ་ཧི་ཏཱ་ཡ པ་ཊི་པ་ནྣོ’’ཏི་ཨཱ་དཱི་སུ ཡ་ཐཱ རཱུ་པཱ་ད་ཡོ དྷ་མྨཱ པ་ཙྩ་ཏྟ་ལ་ཀྑ་ཎ་སཱ་མ་ཉྙ་ལ་ཀྑ་ཎ་ཝ་སེ་ན ལ་བྦྷ་ནྟི, ན ཨེ་ཝཾ པུ་གྒ་ལོ, རཱུ་པཱ་དཱི་སུ པ་ན ས་ཏི ལོ་ཀ་ཝོ་ཧཱ་ར་མ་ཏྟེ་ན ‘‘ཨ་ཏྠི པུ་གྒ་ལོ’’ཏི ཝུ་ཙྩ་ཏཱི་ཏི. ཝུ་ཏྟ་མྤི ཙེ་ཏཾ བྷ་ག་ཝ་ཏཱ – ‘‘ཨི་མཱ ཁོ, ཙི་ཏྟ…པེ… ལོ་ཀ་ཝོ་ཧཱ་རཱ ལོ་ཀ་པ་ཉྙ་ཏྟི་ཡོ’’ཏི (དཱི. ནི. ༡.༤༤༠). དྭི་དྷཱ་པི བུ་དྡྷཱ་ནཾ ཀ་ཐཱ ས་མྨུ་ཏི་ཀ་ཐཱ, པ་ར་མ་ཏྠ་ཀ་ཐཱ ཙ. ཏ་ཏྠ ‘‘ས་ཏྟོ པུ་གྒ་ལོ གཱ་མོ པ་བྦ་ཏོ’’ཏི་ཨཱ་དི་ཀཱ ས་མྨུ་ཏི་ཀ་ཐཱ ནཱ་མ, ‘‘ཨ་ནི་ཙྩཾ དུ་ཀྑཾ ཨ་ན་ཏྟཱ ཁ་ནྡྷཱ ཨཱ་ཡ་ཏ་ནཱ་ནཱི’’ཏི་ཨཱ་དི་ཀཱ པ་ར་མ་ཏྠ་ཀ་ཐཱ ནཱ་མ. བུ་དྡྷཱ ཧི ཡེ ཡེ ས་ཏྟཱ ཡ་ཐཱ ཡ་ཐཱ བུ་ཛ྄ཛྷི་ཏྭཱ ཙ་ཏུ་ས་ཙྩ་པ་ཊི་ཝེ་དྷཾ ཀཱ་ཏུཾ ས་ཀྐོ་ནྟི, ཏེ་སཾ ཏེ་སཾ ཏ་ཐཱ ཏ་ཐཱ ས་མྨུ་ཏི་ཝ་སེ་ན ཝཱ པ་ར་མ་ཏྠ་ཝ་སེ་ན ཝཱ ཝོ་མི་སྶ་ཀ་ཝ་སེ་ན ཝཱ དེ་སེ་ཏྭཱ ནཱ་མ་རཱུ་པ་པ་རི་ཙྪེ་ད་ད་སྶ་ན་ཝ་སེ་ནེ་ཝ ཨ་མ་ཏཾ མ་གྒཾ པ་ཀཱ་སེ་ནྟི. ཨ་ཡ་ཉྷི –
དུ་ཝེ ས་ཙྩཱ་ནི ཨ་ཀྑཱ་སི, ས་མྦུ་དྡྷོ ཝ་ད་ཏཾ ཝ་རོ;
ས་མྨུ་ཏིཾ པ་ར་མ་ཏྠ་ཉྩ, ཏ་ཏི་ཡཾ ནུ་པ་ལ་བྦྷ་ཏི.
ཏ་ཏྠ –
ས་ངྐེ་ཏ་ཝ་ཙ་ནཾ ས་ཙྩཾ, ལོ་ཀ་ས་མྨུ་ཏི་ཀཱ་ར་ཎཾ;
པ་ར་མ་ཏྠ་ཝ་ཙ་ནཾ ས་ཙྩཾ, དྷ་མྨཱ་ནཾ ཏ་ཐ་ལ་ཀྑ་ཎཾ.
ཏ་སྨཱ ཝི་ཉྙཱུ ཨ་ཀ་ཏྭཱ་ན, བྱ་ཉྫ་ནེ་བྷི་ནི་ཝེ་ས་ནཾ;
པ་ར་མ་ཏྠེ པ་ཏི་ཊྛཱ་ཡ, པུ་གྒ་ལཱ་དིཾ ཝི་ཝ་ཛྫ་ཡེ.
པ་ཉྙ་ཏྟིཾ ཨ་ན་ཏི་ཀྐ་མྨ, པ་ར་མ་ཏྠོ པ་ཀཱ་སི་ཏོ;
ཝི་ནཱ་ཡ་ཀེ་ན སོ ཡ་སྨཱ, ཏ་སྨཱ ཨ་ཉྙོ་པི པ་ཎྜི་ཏོ;
པ་ར་མ་ཏྠཾ པ་ཀཱ་སེ་ནྟོ, ས་མ་ཉྙཾ ནཱ་ཏི་དྷཱ་ཝ་ཡེ་ཏི. (ཀ་ཐཱ. ཨ་ཊྛ. ༢༣༧);
ཨ་ཡཾ པུ་གྒ་ལ་ཀ་ཐཱ་ན་ཡོ.
པ་རི་ཧཱ་ནི་ཀ་ཐཱ་དི་ཝ་ཎྞ་ནཱ
པུ་གྒ་ལ་ཀ་ཐཱ་ཏོ པ་རཾ ‘‘པ་རི་ཧཱ་ཡ་ཏི ཨ་ར་ཧཱ ཨ་ར་ཧ་ཏྟཱ’’ཏི་ཨཱ་དི་ནཱ ཨ་སེ་ཁཱ, སོ་ཏཱ་པ་ནྣ་ཝ་ཛྫི་ཏ་སེ་ཁཱ ཙ ཨ་གྒ་མ་གྒ་ཕ་ལ་ཏོ པ་རི་ཧཱ་ཡ་ནྟཱི་ཏི པ་ཝ་ཏྟཱ པ་རི་ཧཱ་ནི་ཀ་ཐཱ. པ་བྦ་ཛྫཱ ཝི་ཡ པ་ཊི་ཝེ་དྷ་ས་ངྑཱ་ཏོ བྲ་ཧྨ་ཙ་རི་ཡ་ཝཱ་སོ་པི མ་ནུ་སྶེ་སུ ཨེ་ཝ བྷ་ཝ་ཏི, ན་ཏྠི དེ་ཝེ་སུ བྲ་ཧྨ་ཙ་རི་ཡ་ཝཱ་སོ་ཏི པ་ཝ་ཏྟཱ བྲ་ཧྨ་ཙ་རི་ཡ་ཀ་ཐཱ. དུ་ཀྑ་ད་སྶ་ནེ་ན ཨེ་ཀ་དེ་ས་ཏོ ཀི་ལེ་སཱ པ་ཧཱི་ཡ་ནྟི, ཏ་ཐཱ ས་མུ་ད་ཡ་ད་སྶ་ནཱ་དཱི་ཧཱི་ཏི ཨེ་ཝཾ ནཱ་ནཱ་བྷི་ས་མ་ཡ་ཝ་སེ་ན ཨོ་དྷི་སོ ཀི་ལེ་སཱ པ་ཧཱི་ཡ་ནྟཱི་ཏི པ་ཝ་ཏྟཱ ཨོ་དྷི་སོ་ཀ་ཐཱ. ཛྷཱ་ན་ལཱ་བྷཱི པུ་ཐུ་ཛྫ་ནོ ཀཱ་མ་རཱ་ག་བྱཱ་པཱ་དེ ས་མུ་ཙྪེ་ད་ཝ་སེ་ན ཛ་ཧ་ཏི, སོ ཙ་ཏུ་ས་ཙྩཱ་བྷི་ས་མ་ཡཱ པ་ཋ་མ་མེ་ཝ ཨ་ནཱ་གཱ་མཱི ཧོ་ཏཱི་ཏི པ་ཝ་ཏྟཱ ཛ་ཧ་ཏི་ཀ་ཐཱ. ཨ་ཏཱི་ཏཱ་དི་བྷེ་དཾ ས་བྦཾ ཁ་ནྡྷཱ་དི་ཀཾ ཀཱ་ལ་ཏྟ་ཡེ་པི ཁ་ནྡྷཱ་དི་ས་བྷཱ་ཝེ་ན ཨ་ཏྠཱི་ཏི པ་ཝ་ཏྟཱ ས་བྦ་མ་ཏྠཱི་ཏི་ཀ་ཐཱ. ཨ་ཏཱི་ཏཾ, ཨ་ནཱ་ག་ཏ་ཉྩ ཁ་ནྡྷཱ་དི་ཀཾ ཨ་ཏྠཱི་ཏི པ་ཝ་ཏྟཱ ཨ་ཏཱི་ཏ་ཀྑ་ནྡྷཱ་དི་ཀ་ཐཱ. ཨ་ཏཱི་ཏེ་སུ ཝི་པཱ་ཀ་དྷ་མྨ་དྷ་མྨེ་སུ ཨེ་ཀ་ཙྩཾ ཨ་ཝི་པ་ཀྐ་ཝི་པཱ་ཀ་མེ་ཝ ཨ་ཏྠི, ན ཨི་ཏ་ར་ནྟི པ་ཝ་ཏྟཱ ཨེ་ཀ་ཙྩ་མ་ཏྠཱི་ཏི་ཀ་ཐཱ. ས་བྦེ དྷ་མྨཱ ས་ཏི་པ་ཊྛཱ་ནཱ་ཏི པ་ཝ་ཏྟཱ ས་ཏི་པ་ཊྛཱ་ན་ཀ་ཐཱ. ཨ་ཏཱི་ཏཱ་ནཱ་ག་ཏཱ་དི་ཝ་སེ་ན ན་ཏྠི, ས་ཀ་བྷཱ་ཝེ་ན ཝཱ ཨ་ཏྠི, པ་ར་བྷཱ་ཝེ་ན ན་ཏྠཱི་ཏི པ་ཝ་ཏྟཱ ཧེ་ཝ་ཏྠི་ཀ་ཐཱ. ཏ་ཏྠ ཧེ་ཝ་ཏྠཱིཏི ཨེ་ཝཾ ཨི་མི་ནཱ པ་ཀཱ་རེ་ན ཨ་ཏྠཱི་ཏི ཨ་ཏྠོ.
ཨ་དྷི་མཱ་ནི་ཀཱ་ནཾ, ཀུ་ཧ་ཀཱ་ནཾ ཝཱ ཨ་ར་ཧ་ཏྟ་པ་ཊི་ཉྙཱ་ནཾ སུ་ཀྐ་ཝི་སྶ་ཊྛིཾ དི་སྭཱ མཱ་ར་ཀཱ་ཡི་ཀཱ དེ་ཝ་ཏཱ ཨུ་པ་སཾ་ཧ་ར་ནྟཱི་ཏི པ་ཝ་ཏྟཱ པ་རཱུ་པ་ཧཱ་ར་ཀ་ཐཱ. ཨ་ར་ཧ་ཏོ པ་རེ་སཾ ནཱ་མ་གོ་ཏྟཱ་དཱི་སུ ཨ་ཏྠི ཨ་ཉྙཱ་ཎཾ, ཨ་ཏྠི ཀ་ངྑཱ, པ་རེ་ཧི ཉཱ་པ་ནཱི་ཡ་ཏོ ཨ་ཏྠི པ་ར་ཝི་ཏ་ར་ཎཱ་ཏི ཏི་སྶོ ཀ་ཐཱ. སོ་ཏཱ་པ་ཏྟི་མ་གྒ་ཀྑ་ཎེ དུ་ཀྑ་ནྟི ཝཱ་ཙཱ བྷི་ཛྫ་ཏཱི་ཏི པ་ཝ་ཏྟཱ ཝ་ཙཱི་བྷེ་ད་ཀ་ཐཱ. དུ་ཀྑ་ནྟི ཝཱ་ཙཾ བྷཱ་ས་ནྟོ དུ་ཀྑེ ཉཱ་ཎཾ ཨཱ་ཧ་ར་ཏི, ཏ་ཉྩ ལོ་ཀུ་ཏྟ་ར་ནྟི པ་ཝ་ཏྟཱ དུ་ཀྑཱ་ཧཱ་ར་ཀ་ཐཱ. ས་མཱ་པ་ཏྟི་ཡཾ, བྷ་ཝ་ངྒེ ཙ ཙི་ཏྟཾ ཙི་རཾ ཏི་ཊྛ་ཏཱི་ཏི པ་ཝ་ཏྟཱ ཙི་ཏྟ་ཊྛི་ཏི་ཀ་ཐཱ. ས་བྦེ ས་ངྑཱ་རཱ ནི་པྤ་རི་ཡཱ་ཡེ་ན ཨཱ་དི་ཏྟཱ ཀུ་ཀྐུ་ལ༹་ནི་ར་ཡ་ས་དི་སཱ་ཏི པ་ཝ་ཏྟཱ ཀུ་ཀྐུ་ལ༹་ཀ་ཐཱ. པ་ཙྩེ་ཀཾ ཙ་ཏུ་ས་ཙྩ་ད་སྶ་ན་ཝ་སེ་ན ཨེ་ཀེ་ཀ་སྶ མ་གྒ་སྶ ཙ་ཏུ་ཀྑ་ཏྟུཾ ཨུ་པྤ་ཏྟི་ཝ་སེ་ན སོ་ལ༹་ས་ཧི ཀོ་ཊྛཱ་སེ་ཧི ཨ་ར་ཧ་ཏྟ་པྤ་ཏྟཱི་ཏི པ་ཝ་ཏྟཱ ཨ་ནུ་པུ་བྦཱ་བྷི་ས་མ་ཡ་ཀ་ཐཱ. བུ་དྡྷཱ་ནཾ ཝོ་ཧཱ་ར་ཝ་ཙ་ནཾ ལོ་ཀུ་ཏྟ་ར་ནྟི པ་ཝ་ཏྟཱ ཝོ་ཧཱ་ར་ཀ་ཐཱ. སུ་དྡྷ་ས་ཏྟཱ་ནཾ ཨ་པྤ་ཊི་ས་ངྑཱ་ཡ མ་གྒེ་ན ཝི་ནཱ ཀི་ལེ་ས་ནི་རོ་དྷ་ས་ངྑཱ་ཏོ ཨ་པྤ་ཊི་ས་ངྑཱ་ནི་རོ་དྷོ, པ་ཊི་ས་ངྑཱ་ཡ ཏེ་ན མ་གྒེ་ན ཀི་ལེ་ས་ནི་རོ་དྷོ་ཏི དྭེ ནི་རོ་དྷཱ་ཏི པ་ཝ་ཏྟཱ ནི་རོ་དྷ་ཀ་ཐཱ.
ཏ་ཐཱ་ག་ཏ་བ་ལཾ སཱ་ཝ་ཀ་སཱ་དྷཱ་ར་ཎ་ནྟི པ་ཝ་ཏྟཱ བ་ལ་ཀ་ཐཱ. ཨཱ་ས་ཝ་ཀྑ་ཡ་ཉཱ་ཎ་ཝི་ར་ཧི་ཏཾ ན་ཝ་བ་ལཾ ལོ་ཀུ་ཏྟ་ར་ནྟི པ་ཝ་ཏྟཱ ཨ་རི་ཡ་ནྟི་ཀ་ཐཱ. ས་རཱ་གཾ ཙི་ཏྟཾ ནི་བྦཱ་ནཾ ཨཱ་ར་བྦྷ རཱ་ག་ཏོ ཝི་མུ་ཙྩ་ཏཱི་ཏི པ་ཝ་ཏྟཱ ཝི་མུ་ཏྟི་ཀ་ཐཱ. ཛྷཱ་ནེ་ན ཝི་ཀྑ་མྦྷ་ན་ཝི་མུ་ཏྟི་ཡཱ པ་ཋ་མཾ ཝི་མུ་ཏྟཾ ཙི་ཏྟཾ མ་གྒ་ཀྑ་ཎེ ས་མུ་ཙྪེ་ད་ཝི་མུ་ཏྟི་ཡཱ ཝི་མུ་ཙྩ་མཱ་ནཾ ནཱ་མ ཧོ་ཏཱི་ཏི པ་ཝ་ཏྟཱ ཝི་མུ་ཙྩ་མཱ་ན་ཀ་ཐཱ. ཨ་ཊྛ་མ་ཀ་ས་ངྑཱ་ཏ་སྶ སོ་ཏཱ་པ་ཏྟི་མ་གྒ་ཊྛ་སྶ ཨ་ནུ་ལོ་མ་གོ་ཏྲ་བྷུ་ཀྑ་ཎེ དི་ཊྛི་ཝི་ཙི་ཀི་ཙྪཱ པ་ཧཱི་ཡ་ནྟི ནཱ་མ, མ་གྒ་ཀྑ་ཎེ པ་ཧཱི་ནཱ ནཱ་མཱ་ཏི པ་ཝ་ཏྟཱ ཨ་ཊྛ་མ་ཀ་ཀ་ཐཱ. ཨ་ཊྛ་མ་ཀ་སྶ མ་གྒ་ཀྑ་ཎེ ས་དྡྷི་ནྡྲི་ཡཱ་དཱི་ནི པ་ཊི་ལ་བྷ་ནྟི, ན པ་ཊི་ལ་དྡྷཱ་ནཱི་ཏི པ་ཝ་ཏྟཱ ཨ་ཊྛ་མ་ཀ་སྶ ཨི་ནྡྲི་ཡ་ཀ་ཐཱ. ཙ་ཏུ་ཏྠ་ཛ྄ཛྷཱ་ན་དྷ་མྨུ་པ་ཏྠ་དྡྷཾ མཾ་ས་ཙ་ཀྑུ་མེ་ཝ དི་བྦ་ཙ་ཀྑུ ནཱ་མཱ་ཏི པ་ཝ་ཏྟཱ དི་བྦ་ཙ་ཀྑུ་ཀ་ཐཱ. ཏ་ཐཱ མཾ་ས་སོ་ཏེ དི་བྦ་སོ་ཏ་ཀ་ཐཱ. ཡ་ཐཱ་ཀ་མྨཱུ་པ་ག་ཏ་ཉཱ་ཎ་མེ་ཝ དི་བྦ་ཙ་ཀྑཱུ་ཏི པ་ཝ་ཏྟཱ ཡ་ཐཱ་ཀ་མྨཱུ་པ་ག་ཏ་ཉཱ་ཎ་ཀ་ཐཱ. དེ་ཝ་བྲ་ཧྨཱ་ནཾ པཱ་ཎཱ་ཏི་པཱ་ཏཱ་དི་ཨ་སཾ་ཝ་རཱ་བྷཱ་ཝ་མ་ཏྟེ་ན ས་མྤ་ཏྟ་ཝི་ར་ཏི་ཡཱ ཨ་བྷཱ་ཝེ་པི སཾ་ཝ་རོ ཨ་ཏྠཱི་ཏི པ་ཝ་ཏྟཱ སཾ་ཝ་ར་ཀ་ཐཱ. ཨ་ས་ཉྙཱི་ན་མྤི ཙུ་ཏི་པ་ཊི་ས་ནྡྷི་ཀྑ་ཎེ ས་ཉྙཱ ཨ་ཏྠཱི་ཏི པ་ཝ་ཏྟཱ ཨ་ས་ཉྙ་ཀ་ཐཱ. ནེ་ཝ་ས་ཉྙཱ་ནཱ་ས་ཉྙཱ་ཡ་ཏ་ན་བྷཱུ་མི་ཡཾ ས་ཉྙཱ ན་པྤ་ཝ་ཏྟ་ཏཱི་ཏི པ་ཝ་ཏྟཱ ནེ་ཝ་ས་ཉྙཱ་ནཱ་ས་ཉྙཱ་ཡ་ཏ་ན་ཀ་ཐཱ.
ཨ་ར་ཧཱ གི་ཧཱི ཨ་སྶཱ་ཏི པ་ཝ་ཏྟཱ གི་ཧི་སྶ ཨ་ར་ཧཱ་ཏི་ཀ་ཐཱ. ཨ་ནཱ་གཱ་མི་ནོ སུ་དྡྷཱ་ཝཱ་སེ་སུ པ་ཊི་ས་ནྡྷི་ཙི་ཏྟེ་ན ཨུ་པ་པ་ཏྟི་ཀྑ་ཎེ ཨ་ར་ཧ་ནྟོ ཧོ་ནྟཱི་ཏི པ་ཝ་ཏྟཱ ཨུ་པ་པ་ཏྟི་ཀ་ཐཱ. ཨ་ར་ཧ་ཏོ ལོ་ཀི་ཡ་དྷ་མྨཱ་པི ཨ་ནཱ་ས་ཝཱ་ཏི པ་ཝ་ཏྟཱ ཨ་ནཱ་ས་ཝ་ཀ་ཐཱ. པ་ཙྩུ་པྤ་ནྣ་ཀྑ་ཎེ ས་མ་ངྒི་བྷཱ་ཝ་ས་མ་ནྣཱ་ག་མོ ཙ རཱུ་པཱ་ཝ་ཙ་རཱ་དི་བྷཱུ་མ་ནྟ་ར་པ་ཊི་ལཱ་བྷ་ས་མ་ནྣཱ་ག་མོ ཙཱ་ཏི དྭེ ས་མ་ནྣཱ་ག་མཱ, ཡེ་སཾ པ་ན ཨི་མེ དྭེ ས་མ་ནྣཱ་ག་མེ ཋ་པེ་ཏྭཱ ཨ་ཉྙོ་པི ཧེ་ཏྠ ཨུ་པ་པ་ཏྟི་དྷ་མྨ་ཝ་སེ་ན ཨེ་ཀོ ས་མ་ནྣཱ་ག་མོ ནཱ་མ ཨ་ཏྠི, ཏེ་ན ཨ་ར་ཧཱ ཙ་ཏཱུ་ཧི ཕ་ལེ་ཧི ས་མ་ནྣཱ་ག་ཏོ་ཏི པ་ཝ་ཏྟཱ ས་མ་ནྣཱ་ག་ཏ་ཀ་ཐཱ. ཨི་མི་ནཱ་ཝ ན་ཡེ་ན ཨ་ར་ཧཱ ཚ་ཧི ཨུ་པེ་ཀྑཱ་ཧི ས་མ་ནྣཱ་ག་ཏོ་ཏི པ་ཝ་ཏྟཱ ཨུ་པེ་ཀྑཱ་ས་མ་ནྣཱ་ག་ཏ་ཀ་ཐཱ. མ་གྒ་ཉཱ་ཎ་ས་བྦ་ཉྙུ་ཏ་ཉྙཱ་ཎ་ས་ངྑཱ་ཏ་བོ་དྷི་ཡཱ ས་དཱ ས་ནྣི་ཧི་ཏ་བྷཱ་ཝེ་ན བུ་དྡྷོ་ཏི པ་ཝ་ཏྟཱ བོ་དྷི་ཡཱ བུ་དྡྷོ་ཏི་ཀ་ཐཱ. མ་ཧཱ་པུ་རི་ས་ལ་ཀྑ་ཎ་ཡུ་ཏྟཱ་ཝ བོ་དྷི་ས་ཏྟཱ་ཏི པ་ཝ་ཏྟཱ ལ་ཀྑ་ཎ་ཀ་ཐཱ. བོ་དྷི་ས་ཏྟཱ་ན་མྤི མ་གྒ་ནི་ཡཱ་མོ ཨ་ཏྠཱི་ཏི པ་ཝ་ཏྟཱ ནི་ཡཱ་མོ་ཀྐ་ནྟི་ཀ་ཐཱ. ཙ་ཏུ་ཏྠ་མ་གྒ་ཊྛོ ཏཱི་ཧི ཕ་ལེ་ཧི ས་མ་ནྣཱ་ག་ཏོ་ཏི་ཨཱ་དི་ནཱ པ་ཝ་ཏྟཱ ཨ་པ་རཱ་པི ས་མ་ནྣཱ་ག་ཏ་ཀ་ཐཱ. པ་ཋ་མ་མ་གྒཱ་དཱི་ཧི པ་ཧཱི་ནེ་ཧི ས་དྡྷིཾ ནི་པྤ་རི་ཡཱ་ཡ་ཏོ ཨ་ར་ཧ་ཏྟཾ ས་བྦ་སཾ་ཡོ་ཛ་ན་པྤ་ཧཱ་ན་ནྟི པ་ཝ་ཏྟཱ ས་བྦ་སཾ་ཡོ་ཛ་ན་པ་ཧཱ་ན་ཀ་ཐཱ.
ནི་པྤ་རི་ཡཱ་ཡ་ཏོ ཕ་ལཾ ཝི་མུ་ཏྟི ནཱ་མ, ཝི་པ་སྶ་ནཱ་མ་གྒ་པ་ཙྩ་ཝེ་ཀྑ་ཎ་ཉཱ་ཎཱ་ནི པ་ན པ་རི་ཡཱ་ཡ་ཏོ. ཨེ་ཝཾ པ་ན ཨ་གྒ་ཧེ་ཏྭཱ ཡཾ ཀི་ཉྩི ཀི་ལེ་ས་ཝི་པྤ་ཡུ་ཏྟཾ ཉཱ་ཎཾ ཝི་མུ་ཏྟཱི་ཏི པ་ཝ་ཏྟཱ ཝི་མུ་ཏྟི་ཀ་ཐཱ. བུ་དྡྷཱ་དི་ཨ་སེ་ཁཱ་ར་མྨ་ཎཾ ཨ་སེ་ཁ་ཉཱ་ཎ་ནྟི པ་ཝ་ཏྟཱ ཨ་སེ་ཁ་ཉཱ་ཎ་ཀ་ཐཱ. པ་ཐ་ཝཱི་ཀ་སི་ཎཱ་དི་ས་མཱ་པ་ཏྟི་ཡོ པ་ར་མ་ཏྠ་ཏོ ཨ་ཝི་ཛྫ་མཱ་ནེ པ་ཉྙ་ཏྟཱ་ར་མྨ་ཎེ པ་ཝ་ཏྟ་ཏྟཱ ཝི་པ་རཱི་ཏ་ཉཱ་ཎ་ནྟི པ་ཝ་ཏྟཱ ཝི་པ་རཱི་ཏ་ཀ་ཐཱ. ཏ་ཏྠ ཨ་ནི་ཙྩེ ནི་ཙྩ་ནྟི་ཨཱ་དི་ནཱ ཙ་ཏུ་བྦི་དྷོ ཝི་པ་ལླཱ་སོ ཝེ་དི་ཏ་བྦོ. ས་བྦེ་སཾ པུ་ཐུ་ཛྫ་ནཱ་ནཾ ནི་ཡཱ་མ་ག་མ་ནཱ་ཡ ཉཱ་ཎཾ ཨ་ཏྠཱི་ཏི པ་ཝ་ཏྟཱ ནི་ཡཱ་མ་ཀ་ཐཱ. ས་བྦཾ ཉཱ་ཎཾ པ་ཊི་ས་མྦྷི་དཱ་ཏི པ་ཝ་ཏྟཱ པ་ཊི་ས་མྦྷི་དཱ་ཀ་ཐཱ. ས་མྨུ་ཏི་ཝི་ས་ཡ་མྤི ཉཱ་ཎཾ བྷཱུ་ཏཱ་ར་མྨ་ཎ་མེ་ཝཱ་ཏི པ་ཝ་ཏྟཱ ས་མྨུ་ཏི་ཉཱ་ཎ་ཀ་ཐཱ. ཙེ་ཏོ་པ་རི་ཡ་ཉཱ་ཎཾ ཙི་ཏྟཱ་ར་མྨ་ཎ་མེ་ཝ, ན ཏཾ་ས་མྤ་ཡུ་ཏྟ་རཱ་གཱ་དི་ཙེ་ཏ་སི་ཀཱ་ར་མྨ་ཎ་ནྟི པ་ཝ་ཏྟཱ ཙི་ཏྟཱ་ར་མྨ་ཎ་ཀ་ཐཱ. ས་བྦ་སྨིཾ ཨ་ནཱ་ག་ཏ་དྷ་མྨེ ས་བྦེ་སཾ ཉཱ་ཎཾ ཨ་ཏྠཱི་ཏི པ་ཝ་ཏྟཱ ཨ་ནཱ་ག་ཏ་ཉཱ་ཎ་ཀ་ཐཱ. པ་ཙྩུ་པྤ་ནྣེ ཨ་ཏྟ་ནོ ཉཱ་ཎེ་པི ཉཱ་ཎཾ པ་ཝ་ཏྟ་ཏཱི་ཏི པ་ཝ་ཏྟཱ པ་ཊུ་པྤ་ནྣ་ཉཱ་ཎ་ཀ་ཐཱ. བུ་དྡྷཱ ཝི་ཡ སཱ་ཝ་ཀཱ་པི ཏེ་ན ཏེ་ན ཝེ་ནེ་ཡྻ་ཛ་ནེ་ན པ་ཏྟ་བྦ་ཕ་ལཾ ཉ་ཏྭཱ་ཝ ཏ་ད་ཏྠཱ་ཡ དྷ་མྨཾ དེ་སེ་ནྟཱི་ཏི པ་ཝ་ཏྟཱ ཕ་ལ་ཉཱ་ཎ་ཀ་ཐཱ.
ས་མྨ་ཏྟ་ནི་ཡཱ་མོ ནི་ཡ་མ་ཏོ ནི་ཙྩ་ཊྛེ་ན ཨ་ས་ངྑ་ཏོ་ཏི པ་ཝ་ཏྟཱ ནི་ཡཱ་མ་ཀ་ཐཱ. ‘‘དྷ་མྨ་ཊྛི་ཏ་ཏཱ དྷ་མྨ་ནི་ཡཱ་མ་ཏཱ’’ཏི་ཨཱ་དི་ཝ་ཙ་ན་ཏོ པ་ཊི་ཙྩ་ས་མུ་པྤཱ་དོ ཨ་ས་ངྑ་ཏོ་ཏི པ་ཝ་ཏྟཱ པ་ཊི་ཙྩ་ས་མུ་པྤཱ་ད་ཀ་ཐཱ. ‘‘ས་ཙྩཱ་ནི ཏ་ཐཱ་ནི ཨ་ཝི་ཏ་ཐཱ་ནཱི’’ཏི་ཨཱ་དི་ཝ་ཙ་ན་ཏོ ཙ་ཏུ་ས་ཙྩཱ་ནི ཨ་ས་ངྑ་ཏཱ་ནཱི་ཏི པ་ཝ་ཏྟཱ ས་ཙྩ་ཀ་ཐཱ. ‘‘ཙ་ཏྟཱ་རོ ཨཱ་རུ་པྤཱ ཨཱ་ནེ་ཉྫཱ’’ཏི ཝ་ཙ་ན་ཏོ ཨ་ས་ངྑ་ཏཱ་ཏི པ་ཝ་ཏྟཱ ཨཱ་རུ་པྤ་ཀ་ཐཱ. ནི་རོ་དྷ་ས་མཱ་པ་ཏྟི ཨ་ས་ངྑ་ཏཱ་ཏི པ་ཝ་ཏྟཱ ནི་རོ་དྷ་ས་མཱ་པ་ཏྟི་ཀ་ཐཱ. ཨ་ས་ངྑ་ཏོ ཨཱ་ཀཱ་སོ་ཏི ཨཱ་ཀཱ་ས་ཀ་ཐཱ. ཨཱ་ཀཱ་སོ ས་ནི་ད་སྶ་ནོ་ཏི་ཀ་ཐཱ. པ་ཐ་ཝཱི་དྷཱ་ཏུ ས་ནི་ད་སྶ་ནཱཏི་ཨཱ་དིཾ ཀ་ཏྭཱ ཀཱ་ཡ་ཀ་མྨཾ ས་ནི་ད་སྶ་ནནྟི པ་རི་ཡོ་སཱ་ན་ཀ་ཐཱ.
ན་ཏྠི ཀེ་ཙི དྷ་མྨཱ ཀེ་ཧི་ཙི དྷ་མྨེ་ཧི ས་ངྒ་ཧི་ཏཱ, ཏེ་ན ཨེ་ཀ་ཝི་དྷེ་ན རཱུ་པ་ས་ངྒ་ཧོ་ཏི་ཨཱ་དི ནི་ར་ཏྠ་ཀ་ནྟི པ་ཝ་ཏྟཱ ས་ངྒ་ཧི་ཏ་ཀ་ཐཱ. ཝེ་ད་ནཱ་ད་ཡོ ཨ་རཱུ་པ་དྷ་མྨཱ ཨ་ཉྙ་མ་ཉྙཾ ན ས་མྤ་ཡུ་ཏྟཱ་ཏི པ་ཝ་ཏྟཱ ས་མྤ་ཡུ་ཏྟ་ཀ་ཐཱ. ཙེ་ཏ་སི་ཀཾ ན་ཏྠཱི་ཏི པ་ཝ་ཏྟཱ ཙེ་ཏ་སི་ཀ་ཀ་ཐཱ. ཙེ་ཏ་ནཱ་དྷ་མྨོ་ཝ དཱ་ནཾ, ན དེ་ཡྻ་དྷ་མྨོ་ཏི པ་ཝ་ཏྟཱ དཱ་ན་ཀ་ཐཱ. པ་ཊི་གྒཱ་ཧ་ཀཱ་ནཾ པ་རི་བྷོ་ག་མ་ཡཾ པུ་ཉྙཾ ཨ་ཏྠཱི་ཏི པ་ཝ་ཏྟཱ པ་རི་བྷོ་ག་ཀ་ཐཱ. པེ་ཏཱ ཨི་ཏོ དི་ནྣ་ཙཱི་ཝ་རཱ་དཱི་ཧེ་ཝ ཡཱ་པེ་ནྟཱི་ཏི པ་ཝ་ཏྟཱ ཨི་ཏོ་དི་ནྣ་ཀ་ཐཱ. པ་ཐ་ཝཱི་ཀ་མྨ་ཝི་པཱ་ཀོ་ཏི་ཀ་ཐཱ. ཛ་རཱ་མ་ར་ཎཾ ཝི་པཱ་ཀོ་ཏི་ཀ་ཐཱ. ཀི་ལེ་ས་པྤ་ཧཱ་ན་མ་ཏྟ་མེ་ཝ སཱ་མ་ཉྙ་ཕ་ལཾ, ན ཙི་ཏྟ་ཙེ་ཏ་སི་ཀཱ དྷ་མྨཱ་ཏི པ་ཝ་ཏྟཱ ཨ་རི་ཡ་དྷ་མྨ་ཝི་པཱ་ཀ་ཀ་ཐཱ. ཨ་ཉྙ་མ་ཉྙཱ་དི་པ་ཙྩ་ཡ་ཏཱ་ཡ ཝི་པཱ་ཀོ ཝི་པཱ་ཀ་དྷ་མྨ་དྷ་མྨོ་ཏི་ཀ་ཐཱ.
ཨ་སུ་ར་ཀཱ་ཡེ་ན ས་དྡྷིཾ ཚ ག་ཏི་ཡོ་ཏི པ་ཝ་ཏྟཱ ག་ཏི་ཀ་ཐཱ. མ་ཏ་ས་ཏྟོ མཱ་ཏུ་ཨུ་ཏུ་ས་མ་ཡ་ཉྩ མཱ་ཏཱ་པི་ཏུ་སཾ་ཡོ་ག་ཉྩ ཨོ་ལོ་ཀ་ཡ་མཱ་ནོ ས་ཏྟཱ་ཧཾ, ཨ་ཏི་རེ་ཀ་ས་ཏྟཱ་ཧཾ ཝཱ ཡ་སྨིཾ བྷ་ཝེ ཏི་ཊྛ་ཏི, སོ ཨ་ནྟ་རཱ་བྷ་ཝོ ནཱ་མ ཨ་ཏྠཱི་ཏི པ་ཝ་ཏྟཱ ཨ་ནྟ་རཱ་བྷ་ཝ་ཀ་ཐཱ. རཱུ་པཱ་དི་པ་ཉྩ་ཀཱ་མ་གུ་ཎཱ་ཝ ཀཱ་མ་དྷཱ་ཏུ ནཱ་མ, ན ཏུ ཝ་ཏྠུ་ཀཱ་མ་ཀི་ལེ་ས་ཀཱ་མཱ་ཏི པ་ཝ་ཏྟཱ ཀཱ་མ་གུ་ཎ་ཀ་ཐཱ. པ་ཉྩེ་ཝཱ་ཡ་ཏ་ནཱ་ནི ཀཱ་མཱ་ཏི་ཀ་ཐཱ. རཱུ་པ་དྷ་མྨཱ་ཝ རཱུ་པ་དྷཱ་ཏཱུ་ཏི་ཀ་ཐཱ. ཨ་རཱུ་པ་དྷ་མྨཱ་ཝ ཨ་རཱུ་པ་དྷཱ་ཏཱུ་ཏི་ཀ་ཐཱ. རཱུ་པ་དྷཱ་ཏུ་ཡཱ ས་ཏྟཱ གྷཱ་ནཱ་དཱི་ཧི ས་དྡྷིཾ ས་ལཱ༹་ཡ་ཏ་ནི་ཀཱ་ཏི པ་ཝ་ཏྟཱ རཱུ་པ་དྷཱ་ཏུ་ཡཱ་ཨཱ་ཡ་ཏ་ན་ཀ་ཐཱ. ཨཱ་རུ་པྤེ་པི ཨ་ཏྠི སུ་ཁུ་མ་རཱུ་པ་ནྟི་ཀ་ཐཱ. ཀཱ་ཡ་ཝ་ཙཱི་ཝི་ཉྙ་ཏྟི་ཝ་སེ་ན རཱུ་པཾ ཀ་མྨ་ནྟི་ཀ་ཐཱ. ཙི་ཏྟ་ཝི་པྤ་ཡུ་ཏྟོ ཨ་རཱུ་པ་དྷ་མྨོ་ཝ ཛཱི་ཝི་ཏི་ནྡྲི་ཡཾ, རཱུ་པ་ཛཱི་ཝི་ཏི་ནྡྲི་ཡཾ ན་ཏྠཱི་ཏི པ་ཝ་ཏྟཱ ཛཱི་ཝི་ཏི་ནྡྲི་ཡ་ཀ་ཐཱ. ཨ་རི་ཡུ་པ་ཝཱ་ད་ཀ་མྨེ་ན ཨ་ར་ཧ་ཏྟཱ པ་རི་ཧཱ་ཡ་ཏཱི་ཏི པ་ཝ་ཏྟཱ ཀ་མྨ་ཧེ་ཏུ་ཀ་ཐཱ.
ཨ་ནི་ཙྩཱ་དི་ཝ་སེ་ན ས་ངྑཱ་རེ ཨཱ་དཱི་ན་ཝ་ཏོ ཨ་པ་སྶི་ཏྭཱ ནི་བྦཱ་ནཾ ཨཱ་ནི་སཾ་ས་ཏོ པ་སྶ་ནྟ་སྶ སཾ་ཡོ་ཛ་ན་པྤ་ཧཱ་ནཾ ཧོ་ཏཱི་ཏི པ་ཝ་ཏྟཱ ཨཱ་ནི་སཾ་ས་ད་སྶཱ་ཝི་ཀ་ཐཱ. ནི་བྦཱ་ནཱ་ར་མྨ་ཎ་མྤི སཾ་ཡོ་ཛ་ནཾ ཨ་ཏྠཱི་ཏི པ་ཝ་ཏྟཱ ཨ་མ་ཏཱ་ར་མྨ་ཎ་ཀ་ཐཱ. རཱུ་པཾ སཱ་ར་མྨ་ཎ་ནྟི་ཀ་ཐཱ. ཨ་ནུ་ས་ཡཱ ཨ་ནཱ་ར་མྨ་ཎཱ་ཏི་ཀ་ཐཱ. ཉཱ་ཎཾ ཨ་ནཱ་ར་མྨ་ཎ་ནྟི་ཀ་ཐཱ. ཨ་ཏཱི་ཏཱ་ར་མྨ་ཎ་ཉྩ ཨ་ནཱ་ག་ཏཱ་ར་མྨ་ཎ་ཉྩ ཙི་ཏྟཾ ཨ་ནཱ་ར་མྨ་ཎ་ནྟི་ཀ་ཐཱ་དྭ་ཡཾ. ས་བྦཾ ཙི་ཏྟཾ ཝི་ཏ་ཀྐཱ་ནུ་པ་ཏི་ཏ་ནྟི་ཀ་ཐཱ. ཝི་ཏ་ཀྐ་ཝི་པྥཱ་རོ་ཝ ས་དྡོ, སོ ཙ ན སོ་ཏ་ཝི་ཉྙེ་ཡྻོ་ཏི པ་ཝ་ཏྟཱ ཝི་ཏ་ཀྐ་ཝི་པྥཱ་ར་ས་དྡ་ཀ་ཐཱ. ཝི་ནཱ་པི ཙི་ཏྟེ་ན ཝཱ་ཙཱ པ་ཝ་ཏྟ་ཏཱི་ཏི པ་ཝ་ཏྟཱ ན་ཡ་ཐཱ་ཙི་ཏྟ་སྶ་ཝཱ་ཙཱ་ཏི་ཀ་ཐཱ. ཝི་ནཱ་པི ཙི་ཏྟེ་ན ཀཱ་ཡ་ཀ་མྨཾ པ་ཝ་ཏྟ་ཏཱི་ཏི པ་ཝ་ཏྟཱ ན་ཡ་ཐཱ་ཙི་ཏྟ་སྶ་ཀཱ་ཡ་ཀ་མྨ་ནྟི་ཀ་ཐཱ. ཨ་ཏཱི་ཏེ་ཧི་པི ཛྷཱ་ནེ་ཧི, ཨ་ནཱ་ག་ཏེ་ཧི་པི ཡོ་གི་ནོ ས་མ་ནྣཱ་ག་ཏཱ་ཏི པ་ཝ་ཏྟཱ ཨ་ཏཱི་ཏཱ་ནཱ་ག་ཏ་ས་མ་ནྣཱ་ག་ཏ་ཀ་ཐཱ.
བྷ་ཝ་ངྒ་ཙི་ཏྟེ ཨ་ནི་རུ་དྡྷེ ཨེ་ཝ ཀུ་ས་ལཱ་ཀུ་ས་ལ་ཙི་ཏྟཱ་ནི ཨུ་པྤ་ཛྫ་ནྟི, ཏ་ད་བྷཱ་ཝེ ཙ ས་ནྟ་ཏི་ནི་རོ་དྷོ སི་ཡཱ་ཏི པ་ཝ་ཏྟཱ ནི་རོ་དྷ་ཀ་ཐཱ. ས་ཧ ཝཱ་ཙཱ་ཧི ཝི་ཉྙ་ཏྟི་རཱུ་པཾ མ་གྒོ་ཏི་ཀ་ཐཱ. པ་ཉྩ་ཝི་ཉྙཱ་ཎ་ས་མ་ངྒི་སྶཱ་པི མ་གྒ་བྷཱ་ཝ་ནཱ ཨ་ཏྠཱི་ཏི པ་ཝ་ཏྟཱ པ་ཉྩ་ཝི་ཉྙཱ་ཎ་ས་མ་ངྒི་སྶ་མ་གྒ་ཀ་ཐཱ. པ་ཉྩ་ཝི་ཉྙཱ་ཎཱ ཀུ་ས་ལཱ་པི ཨ་ཀུ་ས་ལཱ་པཱི་ཏི་ཀ་ཐཱ. པ་ཉྩ་ཝི་ཉྙཱ་ཎཱ སཱ་བྷོ་གཱ་ཏི་ཀ་ཐཱ. མ་གྒ་ཀྑ་ཎེ ལོ་ཀི་ཡེ་ན, ལོ་ཀུ་ཏྟ་རེ་ན ཙཱ་ཏི དྭཱི་ཧི སཱི་ལེ་ཧི ཡུ་ཏྟཱ་ཏི་ཀ་ཐཱ. སཱི་ལཾ ཨ་ཙེ་ཏ་སི་ཀ་ནྟི་ཀ་ཐཱ. སཱི་ལཾ ན ཙི་ཏྟཱ་ནུ་པ་རི་ཝ་ཏྟཱི་ཏི་ཀ་ཐཱ. ས་མཱ་དཱ་ན་ཧེ་ཏུ་ཙི་ཏྟ་ཝི་པྤ་ཡུ་ཏྟོ པུ་ཉྙོ་པ་ཙ་ཡོ ཧོ་ཏཱི་ཏི པ་ཝ་ཏྟཱ ས་མཱ་དཱ་ན་ཧེ་ཏུ་ཀ་ཀ་ཐཱ. ཝི་ཉྙ་ཏྟི སཱི་ལ་ནྟི་ཀ་ཐཱ. པཱ་ཎཱ་ཏི་པཱ་ཏཱ་ད་ཡོ ཝི་ནཱ་པི ཝི་ཉྙ་ཏྟིཾ ཧོ་ནྟཱི་ཏི པ་ཝ་ཏྟཱ ཨ་ཝི་ཉྙ་ཏྟི་དུ་སྶཱི་ལྱ་ཀ་ཐཱ.
ཨ་ནུ་ས་ཡཱ ཨ་བྱཱ་ཀ་ཏཱ, ཨ་ཧེ་ཏུ་ཀཱ, ཙི་ཏྟ་ཝི་པྤ་ཡུ་ཏྟཱ་ཏི ཏི་སྶོ་པི ཨ་ནུ་ས་ཡ་ཀ་ཐཱ. ཨ་སེ་ཁ་སྶ ཉཱ་ཎ་ཝི་པྤ་ཡུ་ཏྟ་པྤ་ཝ་ཏྟི་ཡཱ སོ ཉཱ་ཎཱི་ཏི ན་ཝ་ཏྟ་བྦོ་ཏི པ་ཝ་ཏྟཱ ཉཱ་ཎ་ཀ་ཐཱ. ཉཱ་ཎཾ ཙི་ཏྟ་ཝི་པྤ་ཡུ་ཏྟ་ནྟི་ཀ་ཐཱ. མ་གྒ་ཀྑ་ཎེ ཨི་དཾ དུ་ཀྑ་ནྟི ཉཱ་ཎཾ པ་ཝ་ཏྟ་ནྟི པ་ཝ་ཏྟཱ ཨི་དཾ དུ་ཀྑ་ནྟི་ཀ་ཐཱ. བུ་དྡྷཱ ཨི་དྡྷི་བ་ལེ་ན ཨཱ་ཡུ་ཀ་པྤཾ ཝི་ནཱ་པི མ་ཧཱ་ཀ་པྤཾ ཏི་ཊྛ་ནྟཱི་ཏི པ་ཝ་ཏྟཱ ཨི་དྡྷི་བ་ལ་ཀ་ཐཱ. ཙི་ཏྟ་ས་ནྟ་ཏི ས་མཱ་དྷི, ན ཨེ་ཀ་ཙི་ཏྟ་ཀྑ་ཎི་ཀོ་ཏི པ་ཝ་ཏྟཱ ས་མཱ་དྷི་ཀ་ཐཱ. ཨ་ཝི་ཛྫཱ་དི་པ་ཊི་ཙྩ་ས་མུ་པྤཱ་ད་ངྒེ་ཧི ཨ་ཉྙཱ དྷ་མྨ་ཊྛི་ཏ་ཏཱ་ཏི པ་ཝ་ཏྟཱ དྷ་མྨ་ཊྛི་ཏ་ཏཱ་ཀ་ཐཱ. རཱུ་པཱ་དཱི་ཧི ཨ་ཉྙཱ ཨ་ནི་ཙྩ་ཏཱ་ཏི པ་ཝ་ཏྟཱ ཨ་ནི་ཙྩ་ཏཱ་ཀ་ཐཱ.
ཝི་ཉྙ་ཏྟི་ཡོ ཝི་ནཱ་པི ཨི་ནྡྲི་ཡ་སཾ་ཝ་རོ ཀཱ་ཡ་ཝ་ཙཱི་ཀ་མྨ་ནྟི པ་ཝ་ཏྟཱ ཀ་ཐཱ. ས་བྦཾ ཀ་མྨཾ ཝི་པཱ་ཀ་ཛ་ན་ཀ་ནྟི པ་ཝ་ཏྟཱ ཀ་མྨ་ཀ་ཐཱ. ས་དྡོ ཝི་པཱ་ཀོ་ཏི པ་ཝ་ཏྟཱ ཀ་ཐཱ. ས་ལཱ༹་ཡ་ཏ་ནཾ ཝི་པཱ་ཀོ་ཏི པ་ཝ་ཏྟཱ ཀ་ཐཱ. མ་གྒཾ ཝི་ནཱ་པི ས་ཏྟ་ཀྑ་ཏྟུ་པ་ར་མོ་ཏི་ཀ་ཐཱ. ཏ་ཐཱ ཀོ་ལཾ་ཀོ་ལ་ཨེ་ཀ་བཱི་ཛི་ཀ་ཐཱ་སུ་པི. དི་ཊྛི་ས་མྤ་ནྣོ ཛཱི་ཝི་ཏཱ ཝོ་རོ་པེ་ཏཱི་ཏི་ཀ་ཐཱ. དི་ཊྛི་ས་མྤ་ནྣ་སྶ ཨ་པཱ་ཡ་དུ་གྒ་ཏི་ཡཱ ས་དྡྷིཾ རཱུ་པཱ་དི་ཏ་ཎྷཱ་ས་ངྑཱ་ཏ་དུ་གྒ་ཏི་པ་ཧཱི་ནཱ་ཏི པ་ཝ་ཏྟཱ དུ་གྒ་ཏི་ཀ་ཐཱ. ས་ཏྟ་མ་བྷ་ཝི་ཀ་སྶ ཏ་ཎྷཱ་ས་མྦྷ་ཝ་ཏོ དུ་གྒ་ཏི ཨ་པྤ་ཧཱི་ནཱ་ཏི པ་ཝ་ཏྟཱ ས་ཏྟ་མ་བྷ་ཝི་ཀ་ཀ་ཐཱ.
ས་ངྒྷ་བྷེ་དཱ་དི་ཀ་པྤ་ཊྛཾ ཀ་མྨཾ ཀ་ཏྭཱ ཏེ་ན མ་ཧཱ་ཀ་པྤཾ ཨ་སཱི་ཏི་བྷཱ་གཾ ཀ་ཏྭཱ ཏ་ཏོ ཨེ་ཀ་བྷཱ་ག་མ་ཏྟཾ ཀཱ་ལཾ ཨཱ་ཡུ་ཀ་པྤཾ ནི་ར་ཡེ པ་ཙྩ་ནྟཱི་ཏི ཨ་གྒ་ཧེ་ཏྭཱ ས་ཀ་ལཾ མ་ཧཱ་ཀ་པྤཾ པ་ཙྩ་ནྟི, ཝི་ན་སྶ་མཱ་ནེ་པི ཀ་པྤེ ཙ་ཀྐ་ཝཱ་ལ༹་ནྟ་རེ་སུ པ་ཙྩ་ནྟཱི་ཏི པ་ཝ་ཏྟཱ ཀ་པྤ་ཊྛ་ཀ་ཐཱ. ས་ངྒྷ་བྷེ་ད་ཀོ ཨ་པྤ་ནཱ་ཀུ་ས་ལཱ་ནི ཝི་ཡ ཀཱ་མཱ་ཝ་ཙ་ར་ཀུ་ས་ལ་མྤི ན པ་ཊི་ལ་བྷ་ཏཱི་ཏི པ་ཝ་ཏྟཱ ཀུ་ས་ལ་པ་ཊི་ལཱ་བྷ་ཀ་ཐཱ. ཨ་ངྒ་ས་མྤ་ནྣཱ་ཡ ཨཱ་ཎ་ཏྟི་ཡཱ ཨ་བྷཱ་ཝེ་པི མཱ་ཏུ་གྷཱ་ཏཱ་དི་ཨཱ་ན་ནྟ་རི་ཡ་ཀ་མྨ་པ་ཡོ་ཛ་ཀོ མི་ཙྪ་ཏྟ་ནི་ཡ་ཏོ ཨེ་ཝཱ་ཏི པ་ཝ་ཏྟཱ ཨ་ན་ནྟ་རཱ་པ་ཡུ་ཏྟ་ཀ་ཐཱ. ཨ་ནི་ཡ་ཏ་དྷ་མྨེ་སུ་པི ཀེ་ཙི ཀུ་ས་ལ་ས་མྤ་ཡུ་ཏྟཱ་ནི་ཡ་ཏཱ ཨ་ཏྠཱི་ཏི པ་ཝ་ཏྟཱ ནི་ཡ་ཏ་སྶ ནི་ཡཱ་མ་ཀ་ཐཱ. ནཱི་ཝ་ར་ཎེ་ཧི ནི་ཝུ་ཏེ་ན པ་ཊི་ཙྪ་ནྣེ་ནེ་ཝ ཙི་ཏྟེ་ན ནཱི་ཝ་ར་ཎཾ པ་ཛ་ཧ་ནྟཱི་ཏི པ་ཝ་ཏྟཱ ནི་ཝུ་ཏ་ཀ་ཐཱ. ས་མྨུ་ཁཱི་བྷཱུ་ཏཾ སཾ་ཡོ་ཛ་ན་མེ་ཝ ཛ་ཧ་ཏཱི་ཏི པ་ཝ་ཏྟཱ ས་མྨུ་ཁཱི་བྷཱུ་ཏ་ཀ་ཐཱ. ས་མཱ་པ་ནྣོ ཙ ཛྷཱ་ནཱ་ར་མྨ་ཎ་ནི་ཀ་ནྟི་ཡཱ ཛྷཱ་ནཾ ཨ་སྶཱ་དེ་ཏཱི་ཏི པ་ཝ་ཏྟཱ ས་མཱ་པ་ནྣོ ཨ་སྶཱ་དེ་ཏཱི་ཏི་ཀ་ཐཱ. དུ་ཀྑ་ཝེ་ད་ནཱ་ཡ་པི རཱ་ག་སྶཱ་ད་ཝེ་ད་ནཱ ཧོ་ཏཱི་ཏི པ་ཝ་ཏྟཱ ཨ་སྶཱ་ཏ་རཱ་ག་ཀ་ཐཱ. དྷ་མྨ་ཏ་ཎྷཱ ཨ་བྱཱ་ཀ་ཏཱ་ཏི་ཀ་ཐཱ. དྷ་མྨ་ཏ་ཎྷཱ ན དུ་ཀྑ་ས་མུ་ད་ཡོ་ཏི་ཀ་ཐཱ.
ཀུ་ས་ལཾ ཝཱ ཨ་ཀུ་ས་ལ་སྶ, ཨ་ཀུ་ས་ལཾ ཝཱ ཀུ་ས་ལ་སྶ ཨ་ན་ནྟ་རཱ ཨུ་པྤ་ཛྫ་ནྟཱི་ཏི པ་ཝ་ཏྟཱ ཀུ་ས་ལཱ་ཀུ་ས་ལ་པ་ཊི་ས་ནྡ་ཧ་ན་ཀ་ཐཱ. ག་བྦྷ་སེ་ཡྻ་ཀཱ་ན་མྤི བཱི་ཛ་མ་ཏྟཾ ས་ལཱ༹་ཡ་ཏ་ནཾ པ་ཊི་ས་ནྡྷི་ཀྑ་ཎེ ཨུ་པྤ་ཛྫ་ཏཱི་ཏི པ་ཝ་ཏྟཱ ས་ལཱ༹་ཡ་ཏ་ནུ་པྤ་ཏྟི་ཀ་ཐཱ. པ་ཉྩ་ཝི་ཉྙཱ་ཎཱ་ནི ཨ་ཉྙ་མ་ཉྙ་སྶ ཨ་ན་ནྟ་རཱ ཨུ་པྤ་ཛྫ་ནྟཱི་ཏི པ་ཝ་ཏྟཱ ཨ་ན་ནྟ་ར་པ་ཙྩ་ཡ་ཀ་ཐཱ. ས་མྨཱ་ཝཱ་ཙཱ་ཀ་མྨ་ནྟ་ཝི་ཉྙ་ཏྟི་ཡོ ཨ་རི་ཡ་རཱུ་པ་ནྟི་ཀ་ཐཱ. ཀཱ་མ་རཱ་གཱ་དི་ཏོ ཨ་ཉྙོ ཨ་ནུ་ས་ཡོ་ཏི་ཀ་ཐཱ. ཀི་ལེ་ས་པ་རི་ཡུ་ཊྛཱ་ནཾ ཙི་ཏྟ་ཝི་པྤ་ཡུ་ཏྟ་ནྟི་ཀ་ཐཱ. ཡ་ཐཱ ཀཱ་མ་རཱ་གོ ཀཱ་མ་དྷཱ་ཏུ་ཡཾ པ་རི་ཡཱ་པ་ནྣོ, ཨེ་ཝཾ རཱུ་པ་རཱ་ག་ཨ་རཱུ་པ་རཱ་གཱ རཱུ་པཱ་རཱུ་པ་བྷཱུ་མི་ཡཾ པ་རི་ཡཱ་པ་ནྣཱ་ཏི པ་ཝ་ཏྟཱ པ་རི་ཡཱ་པ་ནྣ་ཀ་ཐཱ. དྭ་ཡཾ དི་ཊྛི་ག་ཏཾ ཨ་བྱཱ་ཀ་ཏ་ནྟི་ཀ་ཐཱ. དི་ཊྛི་ག་ཏཾ ཨ་པ་རི་ཡཱ་པ་ནྣ་ནྟི་ཀ་ཐཱ. ཡོ ཡེ་སཾ ཧེ་ཏུ་པ་ཙྩ་ཡོ, སོ པུ་ན ཏེ་སཾ ས་ཧ་ཛཱ་ཏཱ་དི་པ་ཙྩ་ཡོ ན ཧོ་ཏི, ཨེ་ཀ་དྷཱ་ཝ ཨེ་ཀ་སྶ པ་ཙྩ་ཡོ ཧོ་ཏཱི་ཏི པ་ཝ་ཏྟཱ པ་ཙྩ་ཡ་ཏཱ་ཀ་ཐཱ. ཨ་ཝི་ཛྫཱ་ཝ ས་ངྑཱ་རཱ་ནཾ པ་ཙྩ་ཡོ, ན པ་ན ས་ངྑཱ་རཱ ཨ་ཝི་ཛྫཱ་ཡཱ་ཏི པ་ཝ་ཏྟཱ ཨ་ཉྙ་མ་ཉྙ་པ་ཙྩ་ཡ་ཀ་ཐཱ. ཀཱ་ལ་དྡྷཱ་ནཱ ཨི་མེ པ་རི་ནི་པྥ་ནྣེ་ན པ་ཉྙ་ཏྟི་མ་ཏྟཱ་ཏི པ་ཝ་ཏྟཱ ཨ་དྡྷཱ་ཀ་ཐཱ. ཨེ་ཝཾ ཁ་ཎ་ལ་ཡ་མུ་ཧུ་ཏྟ་ཀ་ཐཱ. ཨ་ཉྙ་སྶ ཨཱ་ས་ཝ་སྶ ཨ་བྷཱ་ཝཱ ཨཱ་ས་ཝཱ ཨ་ནཱ་ས་ཝཱ་ཏི པ་ཝ་ཏྟཱ ཨཱ་ས་ཝ་ཀ་ཐཱ. ལོ་ཀུ་ཏྟ་རཱ་ནཾ དྷ་མྨཱ་ནཾ ཛ་རཱ་མ་ར་ཎཾ ལོ་ཀུ་ཏྟ་ར་ནྟི པ་ཝ་ཏྟཱ ཛ་རཱ་མ་ར་ཎ་ཀ་ཐཱ. ནི་རོ་དྷ་ས་མཱ་པ་ཏྟི ལོ་ཀུ་ཏྟ་རཱ་ཏི པ་ཝ་ཏྟཱ ས་ཉྙཱ་ཝེ་ད་ཡི་ཏ་ཀ་ཐཱ. སཱ ལོ་ཀི་ཡཱ་ཏི པ་ཝ་ཏྟཱ དུ་ཏི་ཡ་ས་ཉྙཱ་ཝེ་ད་ཡི་ཏ་ཀ་ཐཱ. ནི་རོ་དྷ་ས་མཱ་པ་ནྣོ་པི ཀཱ་ལཾ ཀ་རེ་ཡྻཱ་ཏི པ་ཝ་ཏྟཱ ཏ་ཏི་ཡ་ས་ཉྙཱ་ཝེ་ད་ཡི་ཏ་ཀ་ཐཱ. ནི་རོ་དྷ་ས་མཱ་པ་ཏྟི ཨ་ས་ཉྙ་ས་ཏྟུ་པི་ཀཱ་ཏི་ཀ་ཐཱ. ཀ་མྨ་ཏོ ཨ་ཉྙོ ཙི་ཏྟ་ཝི་པྤ་ཡུ་ཏྟོ ཀ་མྨཱུ་པ་ཙ་ཡོ་ཏི་ཀ་ཐཱ.
བ་ལ་པྤ་ཏྟཱ བུ་དྡྷཱ་ད་ཡོ ཨི་དྡྷི་བ་ལེ་ན ས་ཏྟཱ་ནཾ ཙི་ཏྟཾ རཱ་གཱ་དི་ཨ་ནུ་པྤ་ཏྟི་ཡཱ ནི་གྒ་ཎྷ་ནྟཱི་ཏི པ་ཝ་ཏྟཱ ནི་གྒ་ཧ་ཀ་ཐཱ. ཨེ་ཝཾ ཀུ་ས་ལུ་པྤ་ཏྟི་ཡཱ པ་ར་ཙི་ཏྟ་པ་གྒ་ཧ་ན་ཀ་ཐཱ. བུ་དྡྷཱ ཨི་དྡྷི་ཡཱ པ་རེ་སཾ སུ་ཁཾ དེ་ནྟཱི་ཏི པ་ཝ་ཏྟཱ སུ་ཁཱ་ནུ་པྤ་དཱ་ན་ཀ་ཐཱ. ‘‘ས་ངྑཱ་རཱ ཨ་ནི་ཙྩཱ’’ཏི མ་ན་སི་ཀ་རོ་ཏོ ཨ་ཏཱི་ཏཱ་དི་བྷེ་ད་བྷི་ནྣེ ས་བྦེ ས་ངྑཱ་རེ ཨཱ་ར་མྨ་ཎ་ཝ་སེ་ན ཨེ་ཀ་ཏོ ཨ་དྷི་ག་ཎྷཱ་ཏཱི་ཏི པ་ཝ་ཏྟཱ ཨ་དྷི་ག་ཡ྄ཧ་མ་ན་སི་ཀཱ་ར་ཀ་ཐཱ. རཱུ་པཾ ཧེ་ཏུ་ཀ་ནྟི་ཀ་ཐཱ. ཨེ་ཝཾ རཱུ་པཾ ས་ཧེ་ཏུ་ཀ་ནྟི་ཀ་ཐཱ. རཱུ་པཾ ཀུ་ས་ལཱ་ཀུ་ས་ལ་ནྟི་ཀ་ཐཱ. རཱུ་པཾ ཝི་པཱ་ཀོ་ཏི་ཀ་ཐཱ, ཡ་ཐཱ ཀཱ་མཱ་ཝ་ཙ་ར་ཀ་མྨེ་ན ཛཱ་ཏཾ རཱུ་པཾ ཀཱ་མཱ་ཝ་ཙ་རཾ, ཨེ་ཝཾ རཱུ་པཱ་ཝ་ཙ་རཱ་རཱུ་པཱ་ཝ་ཙ་ར་ཀ་མྨེ་ཧི ཛཱ་ཏཾ རཱུ་པཾ རཱུ་པཱ་ཝ་ཙ་རཱ་རཱུ་པཱ་ཝ་ཙ་ར་ནྟི་ཀ་ཐཱ. རཱུ་པ་རཱ་གོ རཱུ་པ་དྷཱ་ཏུ་ཡཱ, ཨ་རཱུ་པ་རཱ་གོ ཙ ཨ་རཱུ་པ་དྷཱ་ཏུ་ཡཱ པ་རི་ཡཱ་པ་ནྣོ་ཏི་ཀ་ཐཱ.
ཨ་ཏྠི ཨ་ར་ཧ་ཏོ པུ་ཉྙཱུ་པ་ཙ་ཡོ་ཏི་ཀ་ཐཱ. ན་ཏྠི ཨ་ར་ཧ་ཏོ ཨ་ཀཱ་ལ་མ་ཙྩཱུ་ཏི་ཀ་ཐཱ. ཡཾ ཀི་ཉྩི ཨུ་པྤ་ཛྫ་ཏི, ས་བྦ་མི་དཾ ཀ་མྨ་ཏོ་ཏི་ཀ་ཐཱ. ཨི་ནྡྲི་ཡ་བ་དྡྷ་མེ་ཝ དུ་ཀྑཾ, ན ས་བྦེ ས་ངྑཱ་རཱ་ཏི པ་ཝ་ཏྟཱ ཨི་ནྡྲི་ཡ་བ་དྡྷ་ཀ་ཐཱ. ས་བྦེ ས་ངྑཱ་རཱ དུ་ཀྑཱ ཋ་པེ་ཏྭཱ ཨ་རི་ཡ་མ་གྒ་ནྟི་ཀ་ཐཱ. མ་གྒ་ཕ་ལཱ་ནེ་ཝ ས་ངྒྷོ ནཱ་མ, ན ཙ ཏཱ་ནི ད་ཀྑི་ཎཾ པ་ཊི་གྒ་ཎྷ་ནྟི, ཏ་སྨཱ ན ཝ་ཏྟ་བྦཾ ས་ངྒྷོ ད་ཀྑི་ཎཾ པ་ཊི་གྒ་ཎྷཱ་ཏཱི་ཏི་ཀ་ཐཱ. ཏ་ཐཱ ན ཝ་ཏྟ་བྦཾ ས་ངྒྷོ ད་ཀྑི་ཎཾ ཝི་སོ་དྷེ་ཏཱི་ཏི་ཀ་ཐཱ. ན ཝ་ཏྟ་བྦཾ ས་ངྒྷོ བྷུ་ཉྫ་ཏཱི་ཏི་ཀ་ཐཱ. ན ཝ་ཏྟ་བྦཾ ས་ངྒྷ་སྶ དི་ནྣཾ མ་ཧ་པྥ་ལ་ནྟི་ཀ་ཐཱ. བུ་དྡྷཱ ན ཀི་ཉྩི བྷུ་ཉྫ་ནྟི, ཏ་སྨཱ ན ཝ་ཏྟ་བྦཾ བུ་དྡྷ་སྶ དི་ནྣཾ མ་ཧ་པྥ་ལ་ནྟི་ཀ་ཐཱ. དཱ་ཡ་ཀ་ཏོ དཱ་ནཾ ཝི་སུ་ཛ྄ཛྷ་ཏི, ན པ་ཊི་གྒཱ་ཧ་ཀ་ཏོ་ཏི པ་ཝ་ཏྟཱ ད་ཀྑི་ཎཱ་ཝི་སུ་དྡྷི་ཀ་ཐཱ.
བུ་དྡྷཱ ཏུ་སི་ཏ་ལོ་ཀེ ཨེ་ཝ ནི་བྦ་ཏྟ་ནྟི, ན མ་ནུ་སྶ་ལོ་ཀེ. ཨེ་ཏྠ ཧི ནི་མྨི་ཏ་རཱུ་པ་མ་ཏྟཾ ད་སྶེ་ནྟཱི་ཏི པ་ཝ་ཏྟཱ མ་ནུ་སྶ་ལོ་ཀ་ཀ་ཐཱ. ནི་མྨི་ཏ་རཱུ་པཾ དྷ་མྨཾ དེ་སེ་ཏི, ན བུ་དྡྷོ་ཏི པ་ཝ་ཏྟཱ དྷ་མྨ་དེ་ས་ནཱ་ཀ་ཐཱ. རཱ་གོ་ཝ ཀ་རུ་ཎཱ ནཱ་མ, ཏ་ཏོ ན་ཏྠི བུ་དྡྷཱ་ནཾ ཀ་རུ་ཎཱ་ཏི་ཀ་ཐཱ. བུ་དྡྷཱ་ནཾ ཨུ་ཙྩཱ་ར་པ་སྶཱ་ཝོ ཨ་ཉྙེ ག་ནྡྷ་ཛཱ་ཏེ ཨ་ཏི་ཝི་ཡ ཨ་དྷི་ག་ཎྷཱ་ཏཱི་ཏི པ་ཝ་ཏྟཱ ག་ནྡྷ་ཛཱ་ཏ་ཀ་ཐཱ. བུ་དྡྷཱ ཨེ་ཀེ་ན མ་གྒེ་ན ཙ་ཏྟཱ་རི སཱ་མ་ཉྙ་ཕ་ལཱ་ནི ས་ཙྪི་ཀ་རོ་ནྟཱི་ཏི པ་ཝ་ཏྟཱ ཨེ་ཀ་མ་གྒ་ཀ་ཐཱ. པ་རི་ཀ་མྨཱ་དིཾ ཝི་ནཱ་ཝ པ་ཋ་མཱ་དི་ཛ྄ཛྷཱ་ནཱ དུ་ཏི་ཡཱ་དི་ཛ྄ཛྷཱ་ནཾ ས་ངྐ་མ་ཏཱི་ཏི པ་ཝ་ཏྟཱ ཛྷཱ་ན་ས་ངྐ་ནྟི་ཀ་ཐཱ. པ་ཉྩ་ཀ་ན་ཡེ ཨ་ཝི་ཏ་ཀྐ་ཝི་ཙཱ་ར་མ་ཏྟཾ ཛྷཱ་ནཾ ཝི་སུཾ ཛྷཱ་ནཾ ནཱ་མ ན ཧོ་ཏི, ཛྷཱ་ན་ནྟ་རི་ཀཾ ནཱ་མ ཧོ་ཏཱི་ཏི པ་ཝ་ཏྟཱ ཛྷཱ་ན་ནྟ་རི་ཀ་ཀ་ཐཱ. ས་མཱ་པ་ནྣོ ས་དྡཾ སུ་ཎཱ་ཏཱི་ཏི་ཀ་ཐཱ. ཝི་ཉྙཱ་ཎཾ ཝི་ནཱ པ་སཱ་ད་ཙ་ཀྑུ་ནཱ རཱུ་པཾ པ་སྶ་ཏཱི་ཏི་ཀ་ཐཱ.
ཏེ་ཀཱ་ལི་ཀེ ཀི་ལེ་སེ པ་ཛ་ཧ་ཏཱི་ཏི པ་ཝ་ཏྟཱ ཀི་ལེ་ས་པྤ་ཛ་ཧ་ན་ཀ་ཐཱ. ནི་བྦཱ་ན་ས་ངྑཱ་ཏཱ་པི སུ་ཉྙ་ཏཱ ས་ངྑཱ་ར་ཀྑ་ནྡྷ་པ་རི་ཡཱ་པ་ནྣཱ་ཏི པ་ཝ་ཏྟཱ སུ་ཉྙ་ཏ་ཀ་ཐཱ. ཨ་ས་ངྑ་ཏ་མེ་ཝ སཱ་མ་ཉྙ་ཕ་ལ་ནྟི་ཀ་ཐཱ. ཡེ་སཾ ཀེ་ས་ཉྩི དྷ་མྨཱ་ནཾ པ་ཊི་ལཱ་བྷཱ ཨ་ས་ངྑ་ཏཱ་ཏི པ་ཝ་ཏྟཱ པ་ཏྟི་ཀ་ཐཱ. ས་བྦ་དྷ་མྨཱ་ནཾ ས་བྷཱ་ཝ་ས་ངྑཱ་ཏཱ ཏ་ཐ་ཏཱ ཨ་ས་ངྑ་ཏཱ་ཏི པ་ཝ་ཏྟཱ ཏ་ཐ་ཏཱ་ཀ་ཐཱ. ཨ་ན་ཝ་ཛྫ་ཊྛེ་ན ནི་བྦཱ་ན་མྤི ཀུ་ས་ལ་ནྟི་ཀ་ཐཱ. ཨཱ་ན་ནྟ་རི་ཡཱ་དིཾ ཝི་ནཱ་པི ཨ་ཏྠི པུ་ཐུ་ཛྫ་ན་སྶ ཨ་ཙྩ་ནྟ་ནི་ཡཱ་མ་ཏཱ་ཏི་ཀ་ཐཱ. ལོ་ཀི་ཡ་ས་དྡྷཱ་ད་ཡོ ན ཨི་ནྡྲི་ཡཱ་ནཱི་ཏི པ་ཝ་ཏྟཱ ཨི་ནྡྲི་ཡ་ཀ་ཐཱ.
ཨ་ས་ཉྩི་ཙྩཱ་པི ཨཱ་ན་ནྟ་རི་ཀོ ཧོ་ཏཱི་ཏི པ་ཝ་ཏྟཱ ཨ་ས་ཉྩི་ཙྩ་ཀ་ཐཱ. ན་ཏྠི པུ་ཐུ་ཛྫ་ན་སྶ ཉཱ་ཎ་ནྟི པ་ཝ་ཏྟཱ ཉཱ་ཎ་ཀ་ཐཱ. ནེ་ར་ཡི་ཀཱ་ནཾ ཀ་མྨཱ་ནེ་ཝ ནི་ར་ཡ་པཱ་ལ་རཱུ་པེ་ན ཝ་དྷེ་ནྟི, ན ནི་ར་ཡ་པཱ་ལཱ་ཏི པ་ཝ་ཏྟཱ ནི་ར་ཡ་པཱ་ལ་ཀ་ཐཱ. ཨ་ཏྠི དེ་ཝེ་སུ ཏི་ར་ཙྪཱ་ནཱ་ཏི་ཀ་ཐཱ. ཝི་ར་ཏི་ཏྟ་ཡཾ ཙི་ཏྟ་ཝི་པྤ་ཡུ་ཏྟཾ, པ་ཉྩ་ངྒི་ཀོ་ཝ མ་གྒོ་ཏི པ་ཝ་ཏྟཱ མ་གྒ་ཀ་ཐཱ. པ་ཊི་ཙྩ་ས་མུ་པྤཱ་དེ་སུ ཉཱ་ཎཾ ལོ་ཀུ་ཏྟ་ར་ནྟི པ་ཝ་ཏྟཱ ཉཱ་ཎ་ཀ་ཐཱ.
ཏི་སྶོ ས་ངྒཱི་ཏི་ཡོ ཨཱ་ར་བྦྷ སཱ་ས་ནཾ ན་ཝཾ ཀ་ཏ་ནྟི པ་ཝ་ཏྟཱ སཱ་ས་ན་ཀ་ཐཱ. པུ་ཐུ་ཛྫ་ནོ ཨེ་ཀ་ཀྑ་ཎེ ཏེ་དྷཱ་ཏུ་ཀེ་ཧི དྷ་མྨེ་ཧི ཨ་ཝི་ཝི་ཏྟོ་ཏི པ་ཝ་ཏྟཱ ཨ་ཝི་ཝི་ཏྟ་ཀ་ཐཱ. ཉེ་ཡྻཱ་ཝ་ར་ཎ་ཧེ་ཏུ་ཀཾ ཀི་ཉྩི སཾ་ཡོ་ཛ་ནཾ ཨ་པྤ་ཧཱ་ཡ་པི ཨ་ར་ཧཱ ཧོ་ཏཱི་ཏི པ་ཝ་ཏྟཱ སཾ་ཡོ་ཛ་ན་ཀ་ཐཱ. ‘‘ས་ངྑཱ་རཱ ནི་ཙྩཱ ཧོ་ནྟུ, རུ་ཀྑཱ ནི་ཙྩ་པུ་པྥ་ཕ་ལཱ་དི་ཡུ་ཏྟཱ ཁེ་མི་ནོ ཧོ་ནྟཱུ’’ཏི་ཨཱ་དི་ནཱ ཡ་ཐཱ་དྷི་པྤཱ་ཡཾ ཨི་དྡྷི པ་ཝ་ཏྟ་ཏཱི་ཏི པ་ཝ་ཏྟཱ ཨི་དྡྷི་ཀ་ཐཱ. བུ་དྡྷཱ་ནཾ ས་རཱི་ར་ཨཱ་ཡུ་པ་བྷཱ་ཝེ་མ་ཏྟ་ཏོ ཨ་ཉྙཱ་པི ཝེ་མ་ཏྟ་ཏཱ ཨ་ཏྠཱི་ཏི པ་ཝ་ཏྟཱ བུ་དྡྷ་ཀ་ཐཱ. ཨེ་ཀ་སྨིཾ ཁ་ཎེ ས་བྦ་ལོ་ཀ་དྷཱ་ཏཱུ་སུ ཨ་ནེ་ཀེ བུ་དྡྷཱ ས་ནྟཱི་ཏི པ་ཝ་ཏྟཱ ས་བྦ་དི་སཱ་ཀ་ཐཱ. ས་བྦེ དྷ་མྨཱ ནི་ཡ་ཏཱ་ཏི པ་ཝ་ཏྟཱ དྷ་མྨ་ཀ་ཐཱ. ས་བྦ་ཀ་མྨཱ་ནི ཕ་ལ་དཱ་ནེ ནི་ཡ་ཏཱ་ནཱི་ཏི པ་ཝ་ཏྟཱ ཀ་མྨ་ཀ་ཐཱ.
ཨ་ར་ཧཱ ཨ་ས་བྦ་ཉྙུ་བྷཱ་ཝེ་ན ས་བྦ་ཉྙུ་ཝི་ས་ཡེ ཀི་ཉྩི སཾ་ཡོ་ཛ་ནཾ ཨ་པྤ་ཧཱ་ཡ པ་རི་ནི་བྦཱ་ཏཱི་ཏི པ་ཝ་ཏྟཱ པ་རི་ནི་བྦཱ་ན་ཀ་ཐཱ. ཨ་ར་ཧཱ ཀུ་ས་ལ་ཙི་ཏྟོ པ་རི་ནི་བྦཱ་ཡ་ཏཱི་ཏི པ་ཝ་ཏྟཱ ཀུ་ས་ལ་ཙི་ཏྟ་ཀ་ཐཱ. ཨ་ར་ཧཱ ཨཱ་ནེ་ཉྫེ ས་ཎྛི་ཏོ པ་རི་ནི་བྦཱ་ཡ་ཏཱི་ཏི པ་ཝ་ཏྟཱ ཨཱ་ནེ་ཉྫ་ཀ་ཐཱ. ཨ་ཏྠི ག་བྦྷ་སེ་ཡྻཱ་ཡ དྷ་མྨཱ་བྷི་ས་མ་ཡོ, ཨ་ཏྠི ག་བྦྷ་སེ་ཡྻཱ་ཡ ཨ་ར་ཧ་ཏྟ་པྤ་ཏྟི, སུ་པི་ན་ནྟེ དྷ་མྨཱ་བྷི་ས་མ་ཡོ, ཨ་ར་ཧ་ཏྟ་པྤ་ཏྟི ཙཱ་ཏི པ་ཝ་ཏྟཱ ཏི་སྶོ་པི ཀ་ཐཱ. ས་བྦཾ སུ་པི་ན་ཙི་ཏྟཾ ཨ་བྱཱ་ཀ་ཏ་ནྟི་ཀ་ཐཱ. ཁ་ཎི་ཀ་ཏཱ་ཡ ཙི་ཏྟཱ་ནཾ ན་ཏྠི ཨཱ་སེ་ཝ་ན་པ་ཙྩ་ཡ་ཏཱ་ཏི་ཀ་ཐཱ. ས་བྦེ ས་ངྑ་ཏཱ ཨེ་ཀ་ཙི་ཏྟ་ཀྑ་ཎི་ཀཱ་ཏི པ་ཝ་ཏྟཱ ཁ་ཎི་ཀ་ཀ་ཐཱ.
ཨི་ཏྠི་ཡཱ ས་དྡྷིཾ ཨེ་ཀ་ཏོ ས་མྤ་ཏྟིཾ ཨ་ནུ་བྷ་ཝི་སྶཱ་མཱ་ཏི པཱུ་ཛཱ་དིཾ ཀ་ཏྭཱ ཨེ་ཀཱ་དྷི་པྤཱ་ཡ་པྤ་ཏྟ་སྶ བྷི་ཀྑུ་ནོ མེ་ཐུ་ནོ དྷ་མྨོ པ་ཊི་སེ་ཝི་ཏ་བྦོ་ཏི པ་ཝ་ཏྟཱ ཨེ་ཀཱ་དྷི་པྤཱ་ཡ་ཀ་ཐཱ. པཱ་པ་བྷི་ཀྑཱུ་སུ མེ་ཐུ་ནཾ པ་ཊི་སེ་ཝ་ནྟེ་སུ ཨ་ར་ཧ་ནྟཱ་ནཾ ཝ་ཎྞེ་ན ཨ་མ་ནུ་སྶཱ མེ་ཐུ་ནཾ པ་ཊི་སེ་ཝ་ནྟཱི་ཏི པ་ཝ་ཏྟཱ ཨ་ར་ཧ་ནྟ་ཝ་ཎྞ་ཀ་ཐཱ. ཀེ་ཙི ས་ཏྟཱ ཨ་ཏྟ་ནོ ཨི་སྶ་རི་ཡེ་ན ཀཱ་མ་ཀཱ་རི་ཀཱ་ཝ་སེ་ན ཝི་ནི་པཱ་ཏཾ ག་ཙྪ་ནྟི, ན ཀ་མྨ་ཝ་སེ་ནཱ་ཏི པ་ཝ་ཏྟཱ ཨི་སྶ་རི་ཡ་ཀཱ་མ་ཀཱ་རི་ཀཱ་ཀ་ཐཱ. ན རཱ་གོ རཱ་ག་པ་ཏི་རཱུ་པ་ཀོ་ཏི་ཨཱ་དི པ་ཏི་རཱུ་པ་ཀ་ཐཱ. ཁ་ནྡྷཱ་ཡ་ཏ་ནཱ་ད་ཡོ ཨ་པ་རི་ནི་པྥ་ནྣཱ་ཏི པ་ཝ་ཏྟཱ ཨ་པ་རི་ནི་པྥ་ནྣ་ཀ་ཐཱཏི སཱ་དྷི་ཀ་དྭི་ས་ཏ་ཀ་ཐཱ. པཱ་ལི༹་ཡཾ ཨ་ཊྛ་མུ་ཁ་ཝཱ་ད་ཡུ་ཏྟི་ཝ་སེ་ནེ་ཝ ས་མྨི་ཏི་ཡཱ་དཱི་ནཾ བྷི་ནྣ་ལ་དྡྷི་ཀཱ་ནཾ ལ་དྡྷི་བྷེ་ད་ཝ་སེ་ན ནཱ་ནཱ་པ་ཀཱ་ར་ཏོ ཝི་བྷ་ཏྟཱ, ཏཱ པ་ན ས་བྦ་ཀ་ཐཱ པུ་གྒ་ལ་ཀ་ཐཱ་ཝ. ཏཱ ཏཾ་ཏཾ་ལ་དྡྷི་བྷེ་ད་ཝ་སེ་ན ས་ངྑེ་པ་ཏོ་པི ཝུ་ཙྩ་མཱ་ནཱ ཨ་ཏི་བྷཱ་རི་ཡཾ ག་ནྠཾ ཀ་རོ་ནྟི, ཏ་སྨཱ ན ཝི་ཏྠཱ་རི་ཏཱ. ཏཾ པ་ན ན་ཡཾ ཨི་ཙྪ་ནྟེ་ཧི པཱ་ལི༹་ཨ་ཊྛ་ཀ་ཐཱ་སུ (ཀ་ཐཱ. ༡ ཨཱ་ད་ཡོ; ཀ་ཐཱ. ཨ་ཊྛ. ནི་དཱ་ན་ཀ་ཐཱ) ཨེ་ཝ ཝི་ཏྠཱ་ར་ཏོ ག་ཧེ་ཏ་བྦོ་ཏི ཨ་ཡ་མེ་ཏྠ པཱ་ལི༹་ན་ཡེ་ན ས་དྡྷིཾ ཨ་ཏྠ་ཝི་ནི་ཙྪ་ཡོ.
མོ་ཧ་ཝི་ཙྪེ་ད་ནི་ཡཱ ཨ་བྷི་དྷ་མྨ་མཱ་ཏི་ཀ་ཏྠ་ཝ་ཎྞ་ནཱ་ཡ
ཀ་ཐཱ་ཝ་ཏྠུ་མཱ་ཏི་ཀ་ཏྠ་ཝ་ཎྞ་ནཱ ནི་ཊྛི་ཏཱ.