ཨ་བྷི་དྷ་མྨ་དུ་ཀ་མཱ་ཏི་ཀ་ཏྠ་ཝ་ཎྞ་ནཱ
དུ་ཀ་མཱ་ཏི་ཀཱ་ཡ པ་ན ཧེ་ཊྛཱ ཨ་ནཱ་ག་ཏ་པ་ད་ཏྠ་ཝ་ཎྞ་ནཾ་ཡེ་ཝ ཀ་རི་སྶཱ་མ. ཧེ་ཏུ་གོ་ཙྪ་ཀེ ཏཱ་ཝ ཧེ་ཏཱུ དྷ་མྨཱ་ཏི ཨེ་ཏྠ ཧེ་ཏུ་ཧེ་ཏུ པ་ཙྩ་ཡ་ཧེ་ཏུ ཨུ་ཏྟ་མ་ཧེ་ཏུ སཱ་དྷཱ་ར་ཎ་ཧེ་ཏཱུ་ཏི ཙ་ཏུ་བྦི་དྷཱ ཧེ་ཏཱུ. ཏ་ཏྠ ཨ་ལོ་བྷཱ་ད་ཡོ ཚ དྷ་མྨཱ ཧེ་ཏུ་ཧེ་ཏཱུ ནཱ་མ, ཨུ་པཱ་དཱ་རཱུ་པཱ་དཱི་ནཾ མ་ཧཱ་བྷཱུ་ཏཱ་ད་ཡོ པ་ཙྩ་ཡ་ཧེ་ཏཱུ ནཱ་མ, ཝི་པཱ་ཀུ་པྤ་ཏྟི་ཡཾ ཀུ་ས་ལཱ་ཀུ་ས་ལཾ, ཨི་ཊྛཱ་ནི་ཊྛཱ་ར་མྨ་ཎ་ཉྩ ཨུ་ཏྟ་མ་ཧེ་ཏཱུ ནཱ་མ, ས་ངྑཱ་རཱ་དཱི་ནཾ ཨ་ཝི་ཛྫཱ་ད་ཡོ སཱ་དྷཱ་ར་ཎ་ཧེ་ཏཱུ ནཱ་མ. ཨི་དྷ པ་ན ཧེ་ཏུ་ཧེ་ཏུ ཨ་དྷི་པྤེ་ཏོ. ཧེ་ཏཱུ དྷ་མྨཱཏི མཱུ་ལ་ཊྛེ་ན ཧེ་ཏུ་ས་ངྑཱ་ཏཱ དྷ་མྨཱ, ‘‘ཧེ་ཏུ་དྷ་མྨཱ’’ཏི་པི པཱ་ཋོ, སོ་ཡེ་ཝ་ཏྠོ. ན ཧེ་ཏཱུཏི ཏེ་ས་ཉྙེ་ཝ པ་ཊི་ཀྑེ་པ་ཝ་ཙ་ནཾ.
ཏ་ཏྠ ཨ་ལོ་བྷོ ཨ་དོ་སོ ཨ་མོ་ཧོ་ཏི ཀུ་ས་ལཱ་བྱཱ་ཀ་ཏཱ ཏ་ཡོ, ལོ་བྷོ དོ་སོ མོ་ཧོ་ཏི ཨ་ཀུ་ས་ལཱ ཏ་ཡོ ཙཱ་ཏི ཨི་མེ ཚ དྷ་མྨཱ ཧེ་ཏཱུ ནཱ་མ. ཨི་མེ ཋ་པེ་ཏྭཱ ཨ་ཝ་སེ་སཱ ཙེ་ཏ་སི་ཀཱ, ས་བྦཱ་ནི ཙ ཙི་ཏྟཱ་ནི, རཱུ་པ་ནི་བྦཱ་ནཱ་ནི ཙཱ་ཏི ཨི་མེ དྷ་མྨཱ ན ཧེ་ཏཱུ ནཱ་མ, ཨི་ད་ཉྩ ནི་པྤ་དེ་ས་དུ་ཀ་ནྟི ཝེ་དི་ཏ་བྦཾ. ཧེ་ཏུ་དུ་ཀཾ པ་ཋ་མཾ.
ས་མྤ་ཡོ་ག་ཏོ པ་ཝ་ཏྟེ་ན ས་ཧ ཧེ་ཏུ་ནཱ་ཏི ས་ཧེ་ཏུ་ཀཱ. ཏ་ཐེ་ཝ པ་ཝ་ཏྟོ ན་ཏྠི ཨེ་ཏེ་སཾ ཧེ་ཏཱུ་ཏི ཨ་ཧེ་ཏུ་ཀཱ.
ཏ་ཏྠ ཨ་ཧེ་ཏུ་ཀ་ཙི་ཏྟ་ཝ་ཛྫི་ཏཱ་ནི ཨེ་ཀ་ས་ཏྟ་ཏི ཙི་ཏྟཱ་ནི ས་ཧེ་ཏུ་ཀཱ ནཱ་མ. ཏེ་སུ དྭེ མོ་ཧ་མཱུ་ལཱ་ནི མོ་ཧེ་ནེ་ཝ ས་ཧེ་ཏུ་ཀཱ་ནི, ཨ་ཊྛ ལོ་བྷ་མཱུ་ལཱ་ནི ལོ་བྷ་མོ་ཧེ་ཧི དྭཱི་ཧི, དྭེ དོ་ས་མཱུ་ལཱ་ནི དོ་ས་མོ་ཧེ་ཧི, དྭཱ་ད་ས ཉཱ་ཎ་ཝི་པྤ་ཡུ་ཏྟ་ཀུ་ས་ལཱ་བྱཱ་ཀ་ཏཱ་ནི ཨ་ལོ་བྷཱ་དོ་སེ་ཧི, སེ་སཱ་ནི ས་ཏྟ་ཙ་ཏྟཱ་ལཱི་ས ཨ་ལོ་བྷཱ་དཱི་ཧི ཏཱི་ཧི་པི ས་ཧེ་ཏུ་ཀཱ་ནཱི་ཏི, མོ་ཧ་མཱུ་ལེ་སུ པ་ན མོ་ཧོ, དྭི་པ་ཉྩ་ཝི་ཉྙཱ་ཎཾ, མ་ནོ་དྷཱ་ཏུ, ས་ནྟཱི་ར་ཎ་ཏྟ་ཡཾ, ཝོ་ཊྛ་བྦ་ནཾ, ཧ་སི་ཏུ་པྤཱ་ད་ཀཱ་ནི ཨ་ཊྛཱ་ར་ས ཙི་ཏྟཱ་ནི, རཱུ་པ་ནི་བྦཱ་ནཱ་ནི ཙཱ་ཏི ཨི་མེ དྷ་མྨཱ ཨ་ཧེ་ཏུ་ཀཱ ནཱ་མ. ཙེ་ཏ་སི་ཀེ་སུ པ་ན ལོ་བྷ་དོ་སཱ, ཝི་ཙི་ཀི་ཙྪཱ ཙ མོ་ཧེ་ནེ་ཝ ས་ཧེ་ཏུ་ཀཱ, དི་ཊྛི་མཱ་ནོ ལོ་བྷ་མོ་ཧེ་ཧི དྭཱི་ཧི, ཨི་སྶཱ་མ་ཙྪ་རི་ཡ་ཀུ་ཀྐུ་ཙྩཱ་ནི དོ་ས་མོ་ཧེ་ཧི, མོ་ཧོ པ་ན སི་ཡཱ ལོ་བྷེ་ན, སི་ཡཱ དོ་སེ་ནཱ་ཏི དྭཱི་ཧི ས་ཧེ་ཏུ་ཀོ་པི མོ་ཧ་མཱུ་ལེ་སུ ཨ་ཧེ་ཏུ་ཀོ་པི, ཐི་ན་མི་དྡྷཱ་ནི སི་ཡཱ ལོ་བྷ་མོ་ཧེ་ཧི, སི་ཡཱ དོ་ས་མོ་ཧེ་ཧཱི་ཏི ཏཱི་ཧི་པི ས་ཧེ་ཏུ་ཀཱ་ནི, ཨ་ཧི་རི་ཀཱ་ནོ་ཏྟ་པྤ་ཨུ་དྡྷ་ཙྩཱ་ནི ཏ་ཐཱ ཙ ཀེ་ཝ་ལ་མོ་ཧེ་ན ཙ, ཨ་མོ་ཧོ པ་ན ཨ་ལོ་བྷཱ་དོ་སེ་ཧེ་ཝ དྭཱི་ཧི, ཨ་ལོ་བྷོ སི་ཡཱ ཨ་དོ་སཱ་མོ་ཧེ་ཧི, སི་ཡཱ ཨ་དོ་སེ་ནཱ་ཏི དྭཱི་ཧི, ཨ་དོ་སོ སི་ཡཱ ཨ་ལོ་བྷཱ་མོ་ཧེ་ཧི, སི་ཡཱ ཨ་ལོ་བྷེ་ནཱ་ཏི དྭཱི་ཧི, སེ་སཱ པ་ན དྭཱ་ཝཱི་ས་ཏི ཀུ་ས་ལཱ་བྱཱ་ཀ་ཏཱ སི་ཡཱ ཏཱི་ཧི, སི་ཡཱ དྭཱི་ཧི་པི ཧེ་ཏཱུ་ཧི ས་ཧེ་ཏུ་ཀཱ, ཚ་ནྡོ པ་ན ཡ་ཐཱ་ཡོ་གཾ ཏཱི་ཧི, པཱི་ཏི་དོ་ས་ཝ་ཛྫི་ཏེ་ཧི པ་ཉྩ་ཧི སི་ཡཱ ས་ཧེ་ཏུ་ཀཱ་པི ཨ་ཧེ་ཏུ་ཀཱ་པི, སེ་སཱ ཨེ་ཀཱ་ད་ས ཏི་ཛཱ་ཏི་ཀཱ ཚ་ཧི ཧེ་ཏཱུ་ཧི ས་ཧེ་ཏུ་ཀཱ་པི ཨ་ཧེ་ཏུ་ཀཱ་པི, ཝེ་ད་ནཱ ཙེ་ཏྠ དོ་མ་ན་སྶ་བྷཱུ་ཏཱ དྭི་ཧེ་ཏུ་ཀཱ་ཝ, སོ་མ་ན་སྶ་ཨུ་པེ་ཀྑཱ ཡ་ཐཱ་ཡོ་གཾ དོ་ས་ཝ་ཛྫི་ཏེ་ཧི པ་ཉྩ་ཧི ས་ཧེ་ཏུ་ཀཱ་པི ཨ་ཧེ་ཏུ་ཀཱ་པི, སུ་ཁ་དུ་ཀྑ་བྷཱུ་ཏཱ ཨ་ཧེ་ཏུ་ཀཱ་ཝ, ཨི་ད་ཉྩ ནི་པྤ་དེ་ས་དུ་ཀ་ནྟི. དུ་ཏི་ཡཾ.
ཨེ་ཀུ་པྤཱ་དཱ་དི་ཏཱ་ཡ ཧེ་ཏུ་ནཱ ས་མྤ་ཡུ་ཏྟཱ་ཏི ཧེ་ཏུ་ས་མྤ་ཡུ་ཏྟཱ. ཧེ་ཏུ་ནཱ ཝི་པྤ་ཡུ་ཏྟཱ་ཏི ཧེ་ཏུ་ཝི་པྤ་ཡུ་ཏྟཱ. ཨ་ཡཾ ཧེ་ཏུ་ས་མྤ་ཡུ་ཏྟ་དུ་ཀོ ཨ་ན་ནྟ་རེ ཝུ་ཏྟ་ས་ཧེ་ཏུ་ཀ་དུ་ཀེ་ན ཨ་ཏྠ་ཏོ ནི་ནྣཱ་ནཱ་ཀ་ར་ཎོ. ས་ཧེ་ཏུ་ཀ་དུ་ཀོ ཨེ་ཝ ཧི བྷ་ག་ཝ་ཏཱ དེ་ས་ནཱ་ཝི་ལཱ་སེ་ན, ཏ་ཐཱ བུ་ཛ྄ཛྷ་ན་ཀ་པུ་གྒ་ལཱ་ནཾ ཝཱ ཨ་ཛ྄ཛྷཱ་ས་ཡ་ཝ་སེ་ན ཧེ་ཏུ་ས་མྤ་ཡུ་ཏྟ་དུ་ཀ་བྷཱ་ཝེ་ནཱ་པི ཝུ་ཏྟོ. ཨེ་ཝཾ ཨུ་པ་རི་པི ས་མཱ་ན་ཏྠ་དུ་ཀཱ་ནཾ ཝ་ཙ་ནེ ཀཱ་ར་ཎཾ ཝེ་དི་ཏ་བྦཾ. ཏ་ཏི་ཡཾ.
ཙ་ཏུ་ཏྠཱ་ད་ཡོ པ་ན ཡ་སྨཱ པ་ཋ་མ་དུ་ཀ་དུ་ཏི་ཡ་ཏ་ཏི་ཡ་དུ་ཀེ་སུ པ་ཋ་མ་པ་དེ་ན ཡོ་ཛེ་ཏྭཱ དྭེ དུ་ཀཱ, པ་ཋ་མ་དུ་ཀེ ཙ པ་ཙྪི་མ་པ་དཾ དུ་ཏི་ཡ་དུ་ཀེ་ན ཡོ་ཛེ་ཏྭཱ ཨེ་ཀཾ དུ་ཀ་ནྟི ཏ་ཡོ དུ་ཀཱ དེ་སི་ཏཱ, ཏ་སྨཱ ཏེ་སཾ པ་ད་ཏྠོ ཝུ་ཏྟ་ན་ཡོ་ཝ.
ཏ་ཏྠ ཙ ཡ་ཐེ་ཝ ‘‘ཧེ་ཏཱུ ཙེ་ཝ དྷ་མྨཱ ས་ཧེ་ཏུ་ཀཱ ཙ, ས་ཧེ་ཏུ་ཀཱ ཙེ་ཝ དྷ་མྨཱ ན ཙ ཧེ་ཏཱུ’’ཏི ཨ་ཡཾ དུ་ཀོ ས་མྦྷ་ཝ་ཏི, ཏ་ཐཱ ‘‘ཧེ་ཏཱུ ཙེ་ཝ དྷ་མྨཱ ཨ་ཧེ་ཏུ་ཀཱ ཙ, ཨ་ཧེ་ཏུ་ཀཱ ཙེ་ཝ དྷ་མྨཱ ན ཙ ཧེ་ཏཱུ’’ཏི ཨ་ཡ་མྤི ས་མྦྷ་ཝ་ཏི. ཨི་མི་ནཱ ན་ཡེ་ན ཧེ་ཏུ་ས་མྤ་ཡུ་ཏྟ་དུ་ཀེ་ན ཡོ་ཛ་ནཱ་ཡ་པི ཨེ་ཀོ ལ་བྦྷ་ཏི. ཡ་ཐཱ ཙ ‘‘ན ཧེ་ཏཱུ ཁོ པ་ན དྷ་མྨཱ ས་ཧེ་ཏུ་ཀཱ་པི, ཨ་ཧེ་ཏུ་ཀཱ་པཱི’’ཏི ཨ་ཡཾ ལ་བྦྷ་ཏི, ཏ་ཐཱ ‘‘ཧེ་ཏཱུ ཁོ པ་ན དྷ་མྨཱ ས་ཧེ་ཏུ་ཀཱ་པི, ཨ་ཧེ་ཏུ་ཀཱ་པཱི’’ཏི ཨ་ཡ་མྤི. ཡ་ཐཱ ཙེ་ཏྠ ས་ཧེ་ཏུ་ཀ་དུ་ཀེ དྭེ དུ་ཀཱ, ཨེ་ཝཾ ཧེ་ཏུ་ས་མྤ་ཡུ་ཏྟ་དུ་ཀེ་པི ‘‘ན ཧེ་ཏཱུ ཁོ པ་ན དྷ་མྨཱ ཧེ་ཏུ་ས་མྤ་ཡུ་ཏྟཱ་པི, ཧེ་ཏུ་ཝི་པྤ་ཡུ་ཏྟཱ་པཱི’’ཏི ཙ ‘‘ཧེ་ཏཱུ ཁོ པ་ན དྷ་མྨཱ ཧེ་ཏུ་ས་མྤ་ཡུ་ཏྟཱ་པི, ཧེ་ཏུ་ཝི་པྤ་ཡུ་ཏྟཱ་པཱི’’ཏི ཙ དྭེ དུ་ཀཱ ལ་བྦྷ་ནྟཱི་ཏི ཨ་པ་རེ་པི པ་ཉྩ དུ་ཀཱ ཧེ་ཏུ་གོ་ཙྪ་ཀེ ཡོ་ཛེ་ཏུཾ ས་ཀྐཱ. ཏེ པ་ན བྷ་ག་ཝ་ཏཱ ཝུ་ཏྟཱ་ནུ་སཱ་རེ་ནེ་ཝ ས་ཀྐཱ ཉཱ་ཏུ་ནྟི ཚ་སུ ཨེ་ཝ ས་ངྒ་ཧི་ཏཱ་ཏི ཝེ་དི་ཏ་བྦཱ. ཏ་ཏྠ ཡེ ཏཱ་ཝ ཨེ་ཀ་སྨིཾ ཙི་ཏྟེ དྭེ ཏ་ཡོ ཧེ་ཏཱུ ཨེ་ཀ་ཏོ ཨུ་པྤ་ཛྫ་ནྟི, ཏེ ཧེ་ཏཱུ ཙེ་ཝ ཨ་ཉྙོ་ཉྙཱ་པེ་ཀྑཱ་ཡ ས་ཧེ་ཏུ་ཀཱ ཙ ནཱ་མ. ས་ཧེ་ཏུ་ཀ་ཙི་ཏྟེ་སུ པ་ན ཧེ་ཏུཾ ཋ་པེ་ཏྭཱ སེ་སཱ ཙི་ཏྟ་ཙེ་ཏ་སི་ཀཱ དྷ་མྨཱ ས་ཧེ་ཏུ་ཀཱ ཙེ་ཝ ན ཙ ཧེ་ཏཱུ ནཱ་མ. ཨི་མ་སྨིཾ དུ་ཀེ ས་བྦེ ཨ་ཧེ་ཏུ་ཀ་དྷ་མྨཱ ན ཝ་ཏྟ་བྦཱ. ཙེ་ཏ་སི་ཀེ་སུ པ་ན ཧེ་ཏུ་ཝ་ཛྫི་ཏཱ ཨ་ཀུ་ས་ལཱ ཙེ་ཝ ཀུ་ས་ལཱ་བྱཱ་ཀ་ཏཱ ཙ, ཚ་ནྡོ ཙ ས་ཧེ་ཏུ་ཀོ ཙེ་ཝ ན ཧེ་ཏུ ཨེ་ཝ, སེ་སཱ ཏི་ཛཱ་ཏི་ཀཱ, ཏ་ཐཱ ན་ཝ་ཏྟ་བྦཱ ཙ, མོ་ཧོ པ་ན ཧེ་ཏུ ཙེ་ཝ ས་ཧེ་ཏུ་ཀོ ཙ ན་ཝ་ཏྟ་བྦོ ཙ. ཙ་ཏུ་ཏྠཾ.
ཨ་ན་ནྟ་ར་དུ་ཀོ་པི ཨི་མི་ནཱ དུ་ཀེ་ན ས་བྦ་ཐཱ་པི ས་དི་སོ་ཝཱ་ཏི. པ་ཉྩ་མཾ.
ས་ཧེ་ཏུ་ཀ་ཙི་ཏྟེ་སུ ཧེ་ཏུ་ཝ་ཛྫི་ཏཱ ཙི་ཏྟ་ཙེ་ཏ་སི་ཀཱ དྷ་མྨཱ ན་ཧེ་ཏཱུ ས་ཧེ་ཏཱུ ནཱ་མ, ཨ་ཧེ་ཏུ་ཀ་ཙི་ཏྟ་རཱུ་པ་ནི་བྦཱ་ནཱ་ནི ན་ཧེ་ཏཱུ ཨ་ཧེ་ཏུ་ཀཱ ནཱ་མ. ཨི་མ་སྨིཾ པ་ན དུ་ཀེ ཚ ཧེ་ཏཱུ ན ཝ་ཏྟ་བྦཱ. སེ་སཾ སུ་ཝི་ཉྙེ་ཡྻ་མེ་ཝཱ་ཏི. ཚ་ཊྛཾ.
ཧེ་ཏུ་གོ་ཙྪ་ཀཾ ནི་ཊྛི་ཏཾ.
ས་ཏྟ་སུ ཙཱུ་ལ༹་ནྟ་ར་དུ་ཀེ་སུ ཨ་ཏྟ་ནོ ནི་པྥཱ་ད་ཀེ་ན ས་ཧ པ་ཙྩ་ཡེ་ནཱ་ཏི ས་པྤ་ཙྩ་ཡཱ, ཙི་ཏྟ་ཙེ་ཏ་སི་ཀ་རཱུ་པཱ་ནི. ན་ཏྠི ཨེ་ཏེ་སཾ ཨུ་པྤཱ་དེ ཝཱ ཋི་ཏི་ཡཾ ཝཱ པ་ཙྩ་ཡོ ཨ་ཧུ་ཏྭཱ བྷ་ཝ་ན་སྶེ་ཝཱ་བྷཱ་ཝཱ་ཏི ཨ་པྤ་ཙྩ་ཡཱ, ནི་བྦཱ་ན་མེ་ཝ. དེ་ས་ནཱ་ཡ པ་ནེ་ཏྠ པ་ར་མ་ཏཱ་ཡ སོ་ཏ་པ་ཏི་ཏ་ཝ་སེ་ན བ་ཧུ་ཝ་ཙ་ན་ནི་དྡེ་སོ ཀ་ཏོ. ཨེ་ཝཾ ས་ནི་ད་སྶ་ནཱ་དཱི་སུ་པི. ཨི་ད་ཉྩ ཨི་ཏོ པ་རཱ་ནི ཚ ཙ ནི་པྤ་དེ་ས་དུ་ཀཱ་ནཱི་ཏི ཝེ་དི་ཏ་བྦཱ་ནི. ཏ་ཏོ པ་ར་ཉྩ ཡ་ཏྠ ‘‘ཨི་མེ ན ཝ་ཏྟ་བྦཱ’’ཏི ན ཝ་ཀྑཱ་མ, ཏཾ ནི་པྤ་དེ་ས་ནྟི ག་ཧེ་ཏ་བྦཾ. ས་པྤ་ཙྩ་ཡ་དུ་ཀཾ.
པ་ཙྩ་ཡེ་ཧི ས་མཱ་ག་ནྟྭཱ ཀ་ཏཱ་ཏི ས་ངྑ་ཏཱ. ན ས་ངྑ་ཏཱ་ཏི ཨ་ས་ངྑ་ཏཱ. ཨི་ད་ཉྩ ས་བྦ་ཐཱ ས་པྤ་ཙྩ་ཡ་དུ་ཀ་ས་དི་ས་མེ་ཝ. ས་པྤ་ཙྩ་ཡ་ས་ངྑ་ཏ་ཨུ་བྷ་ཡ་དུ་ཀཾ ས་བྦ་ཐཱ ས་དི་ས་མེ་ཝ. ས་ངྑ་ཏ་དུ་ཀཾ.
རཱུ་པཱ་ཡ་ཏ་ནཾ ས་ནི་ད་སྶ་ནཾ ནཱ་མ. སེ་ས་རཱུ་པ་ཙི་ཏྟ་ཙེ་ཏ་སི་ཀ་ནི་བྦཱ་ནཱ་ནི ཨ་ནི་ད་སྶ་ནཱ ནཱ་མ. ས་ནི་ད་སྶ་ན་དུ་ཀཾ.
པ་སཱ་ད་ཝི་ས་ཡ་རཱུ་པཱ་ནི དྭཱ་ད་ས ས་པྤ་ཊི་གྷཱ ནཱ་མ. སེ་ས་རཱུ་པ་ཙི་ཏྟ་ཙེ་ཏ་སི་ཀ་ནི་བྦཱ་ནཱ་ནི ཨ་པྤ་ཊི་གྷཱ ནཱ་མ. ས་པྤ་ཊི་གྷ་དུ་ཀཾ.
ཨ་ཝི་ནི་བྦྷོ་ག་ཝ་སེ་ན རཱུ་པཾ ཨེ་ཏེ་སཾ ཨ་ཏྠཱི་ཏི རཱུ་པི་ནོ, རུ་པྤ་ན་ལ་ཀྑ་ཎཾ ཝཱ རཱུ་པཾ, ཏཾ ཨེ་ཏེ་སཾ ཨ་ཏྠཱི་ཏི རཱུ་པི་ནོ, བྷཱུ་ཏོ་པཱ་དཱ་ཡ་རཱུ་པ་མེ་ཝ. ན རཱུ་པི་ནོ ཨ་རཱུ་པི་ནོ, ཙི་ཏྟ་ཙེ་ཏ་སི་ཀ་ནི་བྦཱ་ནཱ་ནི. རཱུ་པི་དུ་ཀཾ.
ལོ་ཀོ ཝུ་ཙྩ་ཏི ལུ་ཛྫ་ན་པ་ལུ་ཛྫ་ན་ཊྛེ་ན ཝ་ཊྚཾ, ཏ་སྨིཾ པ་རི་ཡཱ་པ་ནྣ་བྷཱ་ཝེ་ན ལོ་ཀེ ནི་ཡུ་ཏྟཱ་ཏི ལོ་ཀི་ཡཱ, པ་ཉྩུ་པཱ་དཱ་ན་ཀྑ་ནྡྷཱ. ཏ་ཏོ ལོ་ཀ་ཏོ ཏ་ཏྠ ཨ་པ་རི་ཡཱ་པ་ནྣ་བྷཱ་ཝེ་ན ཨུ་ཏྟི་ཎྞཱ་ཏི ལོ་ཀུ་ཏྟ་རཱ, ཨ་རི་ཡ་མ་གྒ་ཕ་ལ་ནི་བྦཱ་ནཱ་ནི. ཙེ་ཏ་སི་ཀེ་སུ པ་ནེ་ཏྠ ཡཾ ཝ་ཏྟ་བྦཾ, ཏཾ ཨ་སེ་ཁ་ཏྟི་ཀེ ཝུ་ཏྟ་ན་ཡེ་ན ཝེ་དི་ཏ་བྦཾ. ལོ་ཀི་ཡ་དུ་ཀཾ.
ཀེ་ན་ཙི ཝི་ཉྙེ་ཡྻཱཏི ཙ་ཀྑུ་ཝི་ཉྙཱ་ཎཱ་དཱི་སུ ཀེ་ན་ཙི ཨེ་ཀེ་ན ཙ་ཀྑུ་ཝི་ཉྙཱ་ཎེ་ན ཝཱ སོ་ཏ་ཝི་ཉྙཱ་ཎཱ་དི་ནཱ ཝཱ ཝི་ཛཱ་ནི་ཏ་བྦཱ. ཀེ་ན་ཙི ན ཝི་ཉྙེ་ཡྻཱཏི ཏེ་ནེ་ཝ ཙ་ཀྑུ་ཝི་ཉྙཱ་ཎེ་ན ཝཱ སོ་ཏ་ཝི་ཉྙཱ་ཎཱ་དི་ནཱ ཝཱ ན ཀེ་ན་ཙི ཝི་ཛཱ་ནི་ཏ་བྦཱ་ནི. ཨེ་ཝཾ ཧི ས་ཏི དྭི་ནྣ་མྤི པ་དཱ་ནཾ ཨ་ཏྠ་ནཱ་ན་ཏྟ་ཏོ དུ་ཀོ ཧོ་ཏི. པ་ད་བྷཱ་ཛ་ནཱི་ཡ་སྨི་མྤི ‘‘ཡེ ཏེ དྷ་མྨཱ ཙ་ཀྑུ་ཝི་ཉྙེ་ཡྻཱ, ན ཏེ དྷ་མྨཱ སོ་ཏ་ཝི་ཉྙེ་ཡྻཱ’’ཏི (དྷ. ས. ༡༡༠༡) ཨེ་ཏྟ་ཀཾ ཨེ་ཀ་དུ་ཀ་ནྟི ཨ་གྒ་ཧེ་ཏྭཱ ‘‘ཡེ ཏེ དྷ་མྨཱ ཙ་ཀྑུ་ཝི་ཉྙེ་ཡྻཱ, ན ཏེ དྷ་མྨཱ སོ་ཏ་ཝི་ཉྙེ་ཡྻཱ, ཡེ ཝཱ པ་ན ཏེ དྷ་མྨཱ སོ་ཏ་ཝི་ཉྙེ་ཡྻཱ, ན ཏེ དྷ་མྨཱ ཙ་ཀྑུ་ཝི་ཉྙེ་ཡྻཱ’’ཏི (དྷ. ས. ༡༡༠༡) ཨ་ཡ་མེ་ཀོ དུ་ཀོ་ཏི ཝེ་དི་ཏ་བྦོ. ཏ་སྶ པ་ན རཱུ་པཾ ཙ་ཀྑུ་ཝི་ཉྙེ་ཡྻཾ, ས་དྡོ ན ཙ་ཀྑུ་ཝི་ཉྙེ་ཡྻོ་ཏི ཨ་ཡ་མ་ཏྠོ. ཨེ་ཝཾ སེ་སེ་སུ་པི དུ་ཀ་པ་རི་ཙྪེ་དོ ཉཱ་ཏ་བྦོ. ཏ་ཏྠ རཱུ་པཱ་ཡ་ཏ་ནཾ ཙ་ཀྑུ་ནཱ ཝཱ ཙ་ཀྑུ་ཝི་ཉྙཱ་ཎེ་ན ཝཱ ཝི་ཉྙེ་ཡྻཾ ནཱ་མ. སེ་ས་རཱུ་པཱ་རཱུ་པ་དྷ་མྨཱ ཏེ་ནེ་ཝ ཙ་ཀྑུ་ནཱ ཝཱ ཙ་ཀྑུ་ཝི་ཉྙཱ་ཎེ་ན ཝཱ ཀེ་ན་ཙི ན་ཝི་ཉྙེ་ཡྻཱ. ཨེ་ཝཾ སོ་ཏ་གྷཱ་ན་ཛི་ཝ྄ཧཱ་ཀཱ་ཡ་ཏ་བྦི་ཉྙཱ་ཎ་མཱུ་ལི་ཀཱ་སུ་པི ཙ་ཏཱུ་སུ ཡོ་ཛ་ནཱ་སུ ཝི་བྷཱ་གོ ཡ་ཐཱ་ནུ་རཱུ་པཾ ཉཱ་ཏ་བྦོ. རཱུ་པཱ་ད་ཡོ པ་ན པ་ཉྩ་ཝི་ས་ཡཱ མ་ནོ་དྷཱ་ཏུ་ཏྟ་ཡེ་ན ཀེ་ན་ཙི ཝི་ཉྙེ་ཡྻཱ. སེ་ས་རཱུ་པཱ་རཱུ་པ་དྷ་མྨཱ ཏེ་ནེ་ཝ མ་ནོ་དྷཱ་ཏུ་ཏྟ་ཡེ་ན ཀེ་ན་ཙི ན་ཝི་ཉྙེ་ཡྻཱ. ཀི་ཉྩཱ་པི སཱ་མ་ཉྙ་ཏོ མ་ནོ་ཝི་ཉྙཱ་ཎེ་ན ཨ་ཝི་ཉྙེ་ཡྻ་སྶ ཨ་བྷཱ་ཝ་ཏོ པཱ་ལི༹་ཡཾ མ་ནོ་ཝི་ཉྙཱ་ཎ་ཝི་ཉྙེ་ཡྻ་ཝ་སེ་ན དུ་ཀོ ན ཝུ་ཏྟོ, ཏ་ཐཱ་པི ཝི་སེ་ས་ཏོ ཝ་ཏྟ་བྦོ་ཝ. ཏ་ཐཱ ཧི ཚ་བྦི་དྷཱ་པི ཀཱ་མཱ་ཝ་ཙ་ར་དྷ་མྨཱ ཀཱ་མཱ་ཝ་ཙ་ར་ཝི་པཱ་ཀཱ་དི་ནཱ མ་ནོ་ཝི་ཉྙཱ་ཎེ་ན ཀེ་ན་ཙི ཝི་ཉྙེ་ཡྻཱ, རཱུ་པཱ་རཱུ་པཱ་ཝ་ཙ་ར་ལོ་ཀུ་ཏྟ་ར་པ་ཉྙ་ཏྟི་ཡོ ཏེ་ནེ་ཝ ཀེ་ན་ཙི ན་ཝི་ཉྙེ་ཡྻཱ. ཏ་ཐཱ ཀཱ་མ་རཱུ་པཱ་རཱུ་པཱ་ཝ་ཙ་ར་པ་ཉྙ་ཏྟི་ཡོ ཨ་ཀུ་ས་ལཱ་དི་ནཱ ཀེ་ན་ཙི ཝི་ཉྙེ་ཡྻཱ, ལོ་ཀུ་ཏྟ་རཱ ཏེ་ནེ་ཝ ཀེ་ན་ཙི ན་ཝི་ཉྙེ་ཡྻཱ. ཏ་ཐཱ ནི་བྦཱ་ནཾ ལོ་ཀུ་ཏྟ་རེ་ན ཀེ་ན་ཙི ཝི་ཉྙེ་ཡྻཾ, སེ་ས་ལོ་ཀི་ཡ་ལོ་ཀུ་ཏྟ་རཱ ཏེ་ནེ་ཝ ཀེ་ན་ཙི ན་ཝི་ཉྙེ་ཡྻཱ་ཏི ཨི་མི་ནཱ ན་ཡེ་ན རཱུ་པཱ་རཱུ་པཱ་ཝ་ཙ་རཱ་དི་བྷེ་དེ་ན མ་ནོ་ཝི་ཉྙཱ་ཎེ་ན ཀེ་ན་ཙི ཝི་ཉྙེ་ཡྻཱ་ཝི་ཉྙེ་ཡྻ་དྷ་མྨཱ ཡ་ཐཱ་ཡོ་གཾ ཡོ་ཛེ་ཏ་བྦཱ. ཨེ་ཝཾ ས་བྦེ དྷ་མྨཱ ཀེ་ན་ཙི ཝི་ཉྙེ་ཡྻཱ, ཀེ་ན་ཙི ན ཝི་ཉྙེ་ཡྻཱ ནཱ་མ. ཨི་མ་སྨི་ཉྩ དུ་ཀེ པ་ཉྙ་ཏྟི་ཡོ་པི ལ་བྦྷ་ནྟཱི་ཏི ཝེ་དི་ཏ་བྦཱ་ཏི. ཀེ་ན་ཙི་ཝི་ཉྙེ་ཡྻ་དུ་ཀཾ.
ཙཱུ་ལ༹་ནྟ་ར་དུ་ཀཱ ནི་ཊྛི་ཏཱ.
ཨཱ་ས་ཝ་གོ་ཙྪ་ཀེ ཨཱ་ས་མ་ནྟ་ཏོ ས་ཝ་ནྟཱི་ཏི ཨཱ་ས་ཝཱ, ཙ་ཀྑུ་ཏོ་པི…པེ… མ་ན་ཏོ་པི ས་ཝ་ནྟི, པ་ཝ་ཏྟ་ནྟཱི་ཏི ཝུ་ཏྟཾ ཧོ་ཏི. དྷ་མྨ་ཏོ ཡཱ་ཝ་གོ་ཏྲ་བྷུཾ, ཨོ་ཀཱ་ས་ཏོ ཡཱ་ཝ་བྷ་ཝ་གྒཱ ས་ཝ་ནྟཱི་ཏི ཝཱ ཨཱ་ས་ཝཱ, ཨེ་ཏེ དྷ་མྨེ, ཨེ་ཏ་ཉྩ ཨོ་ཀཱ་སཾ ཨ་ནྟོ་ཀ་རི་ཏྭཱ པ་ཝ་ཏྟ་ནྟཱི་ཏི ཨ་ཏྠོ. ཨ་ནྟོ་ཀ་ར་ཎ་ཏྠོ ཧི ཨ་ཡཾ ཨཱ-ཀཱ་རོ. ཙི་ར་པཱ་རི་ཝཱ་སི་ཡ་ཊྛེ་ན མ་དི་རཱ་དི་ཨཱ་ས་ཝཱ ཝི་ཡཱ་ཏི་པི ཨཱ་ས་ཝཱ. ཡ་དི ཙ ཙི་ར་པཱ་རི་ཝཱ་སི་ཡ་ཊྛེ་ན ཨཱ་ས་ཝཱ, ཨེ་ཏེ ཨེ་ཝ བྷ་ཝི་ཏུཾ ཨ་ར་ཧ་ནྟི. ཨ་ནཱ་དི་ཏྟཱ ཨཱ་ཡ་ཏཾ ཝཱ སཾ་སཱ་ར་དུ་ཀྑཾ ས་ཝ་ནྟི པ་ས་ཝ་ནྟཱི་ཏི་པི ཨཱ་ས་ཝཱ. ཏ་ཏོ ཨ་ཉྙེ ནོ ཨཱ་ས་ཝཱ ནཱ་མ.
ཏ་ཏྠ ཀཱ་མཱ་ས་ཝོ བྷ་ཝཱ་ས་ཝོ དི་ཊྛཱ་ས་ཝོ ཨ་ཝི་ཛྫཱ་ས་ཝོ་ཏི ཨི་མེ ཙ་ཏྟཱ་རོ ཨཱ་ས་ཝཱ ནཱ་མ. ཏ་ཏྠ ཨ་ཊྛ་སུ ལོ་བྷ་ས་ཧ་ག་ཏ་ཙི་ཏྟེ་སུ ཨུ་པྤ་ནྣོ ས་བྦོ་པི ལོ་བྷོ ཀཱ་མཱ་ས་ཝོ ནཱ་མ. ཨ་ཊྛ་སཱ་ལི་ནི་ཡཾ པ་ན ‘‘པ་ཉྩ་ཀཱ་མ་གུ་ཎི་ཀོ རཱ་གོ ཀཱ་མཱ་ས་ཝོ’’ཏི (དྷ. ས. ཨ་ཊྛ. ༡༡༠༢) ཙ, ‘‘དི་ཊྛི་ས་ཧ་ཛཱ་ཏོ རཱ་གོ ཀཱ་མཱ་ས་ཝོ ན ཧོ་ཏི, དི་ཊྛི་རཱ་གོ ནཱ་མ ཧོ་ཏཱི’’ཏི (དྷ. ས. ཨ་ཊྛ. ༡༡༠༥) ཙ, ‘‘ཡོ བྲ་ཧྨཱ་ནཾ ཝི་མཱ་ན་ཀ་པྤ་རུ་ཀྑཱ་བྷ་ར་ཎེ་སུ ཚ་ནྡ་རཱ་གོ ཨུ་པྤ་ཛྫ་ཏི, སོ ཀཱ་མཱ་ས་ཝོ ན ཧོ་ཏི པ་ཉྩ་ཀཱ་མ་གུ་ཎི་ཀ་སྶ རཱ་ག་སྶ ཨི་དྷེ་ཝ པ་ཧཱི་ན་ཏྟཱ’’ཏི ཙ ཝུ་ཏྟཾ. པཱ་ལི༹་ཡཾ པ་ན ‘‘ཀཱ་མཱ་ས་ཝོ ཨ་ཊྛ་སུ ལོ་བྷ་ས་ཧ་ག་ཏེ་སུ ཙི་ཏྟུ་པྤཱ་དེ་སུ ཨུ་པྤ་ཛྫ་ཏཱི’’ཏི (དྷ. ས. ༡༤༦༥) ཙ, ‘‘ཀཱ་མཱ་ས་ཝཾ པ་ཊི་ཙྩ དི་ཊྛཱ་ས་ཝོ ཨ་ཝི་ཛྫཱ་ས་ཝོ’’ཏི (པ་ཊྛཱ. ༣.༣.༡) ཙ ཝུ་ཏྟ་ཏྟཱ བྷ་ཝཱ་ས་ཝཾ ཋ་པེ་ཏྭཱ ཨ་ཝ་སེ་སོ ས་བྦོ་པི ལོ་བྷོ ཀཱ་མཱ་ས་ཝོ་ཏི པ་ཉྙཱ་ཡ་ཏི དི་ཊྛི་ས་མྤ་ཡུ་ཏྟ་རཱ་ག་སྶ, བྲ་ཧྨཱ་ནཾ ཝ་ཏྠཱ་བྷ་ར་ཎཱ་དཱི་སུ རཱ་ག་སྶ ཙ བྷ་ཝཱ་ས་ཝ་ཏྟཱ་བྷཱ་ཝཱ. དི་ཊྛི་ཝི་པྤ་ཡུ་ཏྟ་རཱ་གོ ཨེ་ཝ ཧི རཱུ་པཱ་རཱུ་པ་བྷ་ཝ་པ་ཏྠ་ནཱ་ཝ་སེ་ན པ་ཝ་ཏྟི་ཡཾ བྷ་ཝཱ་ས་ཝོ ཧོ་ཏི ‘‘རཱུ་པ་དྷཱ་ཏུ་ཡཱ ཨ་རཱུ་པ་དྷཱ་ཏུ་ཡཱ ཨེ་ཏྠ བྷ་ཝ་རཱ་གཱ་ནུ་ས་ཡོ ཨ་ནུ་སེ་ཏཱི’’ཏི་ཨཱ་དི་ཝ་ཙ་ན་ཏོ (ཡ་མ. ༢.ཨ་ནུ་ས་ཡ་ཡ་མ་ཀ.༢), ན ཙ ཀཱ་མཱ་ས་ཝ་བྷ་ཝཱ་ས་ཝ་ཝི་ནི་མུ་ཏྟོ ལོ་བྷོ ཨ་ཏྠི. ཡ་དི སི་ཡཱ, ‘‘ལོ་བྷོ སི་ཡཱ ཨཱ་ས་ཝོ, སི་ཡཱ ནོ ཨཱ་ས་ཝོ’’ཏི པཱ་ལི༹་ཡཾ ཝ་ཏྟ་བྦོ བྷ་ཝེ་ཡྻ, ‘‘དི་ཊྛི་ཝི་པྤ་ཡུ་ཏྟ་ལོ་བྷེ་ན ས་མྤ་ཡུ་ཏྟོ ཨ་ཝི་ཛྫཱ་ས་ཝོ སི་ཡཱ ཨཱ་ས་ཝ་ས་མྤ་ཡུ་ཏྟོ, སི་ཡཱ ཨཱ་ས་ཝ་ཝི་པྤ་ཡུ་ཏྟོ’’ཏི ཙ ཝ་ཏྟ་བྦོ སི་ཡཱ. པ་ད་བྷཱ་ཛ་ནཱི་ཡེ ཙ ཀཱ་མཱ་ས་ཝ་ནི་དྡེ་སེ ཨཱ་ག་ཏ་སྶ ‘‘ཀཱ་མེ་སུ ཀཱ་མ་ཙྪ་ནྡོ’’ཏི (དྷ. ས. ༡༡༠༣) ཨི་མ་སྶ པ་ད་སྶ ཨ་ཊྛ་སཱ་ལི་ནི་ཡཾ ‘‘པ་ཉྩ་ཀཱ་མ་གུ་ཎེ་སུ ཀཱ་མ་ཙྪ་ནྡོ’’ཏི (དྷ. ས. ཨ. ༡༡༠༣) ཨ་ཏྠོ ཝུ་ཏྟོ, ཏ་སྶ པ་ན པ་ད་སྶ ཝ་ཏྠུ་ཀཱ་མེ་སུ ཀི་ལེ་ས་ཀཱ་མོ་ཏི་པི ཨ་ཏྠ་ཡོ་ཛ་ནཱ ས་ཀྐཱ ཀཱ་ཏུཾ ཏེ་བྷུ་མ་ཀ་སྶ དྷ་མྨ་སྶ ཝ་ཏྠུ་ཀཱ་མ་ཏྟཱ, ཏ་ཏྠ ས་བྦ་ཏྠ རཱ་ག་སྶ ཙ ཀི་ལེ་ས་ཀཱ་མ་ཏྟཱ. ཝུ་ཏྟཾ ཧེ་ཏཾ དྷ་མྨ་སེ་ནཱ་པ་ཏི་ནཱ མ་ཧཱ་ནི་དྡེ་སེ –
‘‘ཀ་ཏ་མེ ཝ་ཏྠུ་ཀཱ་མཱ? མ་ནཱ་པི་ཀཱ རཱུ་པཱ…པེ… ས་བྦེ་པི ཀཱ་མཱ་ཝ་ཙ་རཱ དྷ་མྨཱ, ས་བྦེ་པི རཱུ་པཱ་ཝ་ཙ་རཱ དྷ་མྨཱ, ས་བྦེ་པི ཨ་རཱུ་པཱ་ཝ་ཙ་རཱ དྷ་མྨཱ…པེ… ཨི་མེ ཝུ་ཙྩ་ནྟི ཝ་ཏྠུ་ཀཱ་མཱ.
‘‘ཀ་ཏ་མེ ཀི་ལེ་ས་ཀཱ་མཱ? ཚ་ནྡོ ཀཱ་མོ རཱ་གོ ཀཱ་མོ…པེ… ཡོ ཀཱ་མེ་སུ ཀཱ་མ་ཙྪ་ནྡོ ཀཱ་མ་རཱ་གོ ཀཱ་མ་ན་ནྡཱི ཀཱ་མ་ཏ་ཎྷཱ ཀཱ་མ་སྣེ་ཧོ ཀཱ་མ་པ་རི་ལཱ༹་ཧོ ཀཱ་མ་མུ་ཙྪཱ ཀཱ་མ་ཛ྄ཛྷོ་སཱ་ནཾ ཀཱ་མོ་གྷོ ཀཱ་མ་ཡོ་གོ ཀཱ་མུ་པཱ་དཱ་ནཾ ཀཱ་མ་ཙྪ་ནྡ་ནཱི་ཝ་ར་ཎཾ…པེ… ཨི་མེ ཝུ་ཙྩ་ནྟི ཀི་ལེ་ས་ཀཱ་མཱ’’ཏི (མ་ཧཱ་ནི. ༡).
ཨ་པི་ཙེ་ཏྠ ‘‘ཀཱ་མོ་གྷོ ཀཱ་མ་ཡོ་གོ’’ཏི་ཨཱ་དི་ནཱ ཀི་ལེ་ས་ཀཱ་མ་སྶ ཀཱ་མོ་གྷཱ་དི་བྷཱ་ཝཾ ཝ་ད་ཏཱ དྷ་མྨ་སེ་ནཱ་པ་ཏི་ནཱ ཝ་ཏྠུ་ཀཱ་མ་ཏྟ་ཝི་ས་ཡ་སྶ རཱ་ག་སྶ ཨཱ་ས་ཝཱ་དི་བྷཱ་ཝོ ཨ་ནུ་ཉྙཱ་ཏོ, ན པ་ཉྩ་ཀ་ཨཱ་མ་གུ་ཎི་ཀ་སྶེ་ཝ རཱ་ག་སྶ. ན ཙ ཨོ་གྷཱ་ས་ཝེ་སུ ཀོ་ཙི ཝི་སེ་སོ ཨ་ཏྠི. ཨ་ཊྛ་སཱ་ལི་ནི་ཡ་མྤི ཧི ཨུ་པཱ་དཱ་ན་གོ་ཙྪ་ཀ་སྶ པ་ད་བྷཱ་ཛ་ནཱི་ཡེ ‘‘ཀཱ་མེ་སུ ཀཱ་མ་ཙྪ་ནྡོ’’ཏི (དྷ. ས. ༡༢༢༠) ཨི་མ་སྶ ‘‘ཝ་ཏྠུ་ཀཱ་མེ་སུ ཀཱ་མ་ཙྪ་ནྡོ’’ཏི (དྷ. ས. ཨ. ༡༢༢༠) ཨ་ཡ་མེ་ཝ་ཏྠོ ཝུ་ཏྟོ. ཏ་ཏོ ཨ་ཉྙེ་སུ ཧེ་ཏུ་ག་ནྠ་ཀི་ལེ་ས་གོ་ཙྪ་ཀེ་སུ ལོ་བྷ་སྶེ་ཝ ཨ་ན་ཝ་སེ་ས་པ་རི་ཡཱ་དཱ་ནཾ ཝུ་ཏྟཾ, ན ཨི་ཏ་ར་གོ་ཙྪ་ཀེ་སུ. ཏེ་སུ ཙ ལོ་བྷ་སྶ པཱ་ལི༹་ཨ་ནུ་སཱ་ར་ཏོ ཨོ་ལོ་ཀི་ཡ་མཱ་ནེ ཀི་ལེ་ས་ཀཱ་མ་མ་ཏྟ་ཀོ. ཨ་ན་ཝ་སེ་ས་ལོ་བྷ་པ་རི་ཡཱ་དཱ་ནཾ པ་ཉྙཱ་ཡ་ཏི. ཝཱི་མཾ་སི་ཏྭཱ ག་ཧེ་ཏ་བྦཾ.
ཙ་ཏཱུ་སུ པ་ན དི་ཊྛི་ག་ཏ་ཝི་པྤ་ཡུ་ཏྟ་ཙི་ཏྟེ་སུ ཨུ་པྤ་ནྣོ རཱུ་པཱ་རཱུ་པ་བྷ་ཝེ་སུ ཚ་ནྡ་རཱ་ག་བྷཱ་ཝེ་ན, ཀཱ་མ་ཛ྄ཛྷོ་སཱ་ན་ནི་ཀ་ནྟི་བྷཱ་ཝེ་ན ཙ པ་ཝ་ཏྟོ ལོ་བྷོ བྷ་ཝཱ་ས་ཝོ ནཱ་མ. ཨ་ཊྛ་སཱ་ལི་ནི་ཡཾ པ་ན ‘‘ས་སྶ་ཏ་དི་ཊྛི་ས་ཧ་ཛཱ་ཏོ རཱ་གོ བྷ་ཝཱ་ས་ཝོ’’ཏི (དྷ. ས. ཨ་ཊྛ. ༡༡༠༢) ཝུ་ཏྟཾ. པཱ་ལི༹་ཡཾ པ་ན ‘‘བྷ་ཝཱ་ས་ཝོ ཙ་ཏཱུ་སུ དི་ཊྛི་ག་ཏ་ཝི་པྤ་ཡུ་ཏྟ་ལོ་བྷ་ས་ཧ་ག་ཏེ་སཱུ’’ཏི (དྷ. ས. ༡༤༦༥) ནི་ཡ་མི་ཏ་ཏྟཱ ན ས་ཀྐཱ ག་ཧེ་ཏུཾ, ཨ་དྷི་པྤཱ་ཡོ པ་ན ག་ཝེ་སི་ཏ་བྦོ. དྭཱ་ས་ཊྛི་པ་བྷེ་དཱ ས་བྦཱ་པི དི་ཊྛི དི་ཊྛཱ་ས་ཝོ ནཱ་མ. ཨ་ཊྛ་ཝ་ཏྠུ་ཀོ ས་བྦོ་པི མོ་ཧོ ཨ་ཝི་ཛྫཱ་ས་ཝོ ནཱ་མ. ཏེ་སུ དི་ཊྛཱ་ས་ཝོ པ་ཋ་མེ་ན མ་གྒེ་ན པ་ཧཱི་ཡ་ཏི, ཀཱ་མཱ་ས་ཝོ ཙ་ཏཱུ་ཧི་པཱི་ཏི ཝ་ཏྟུཾ ཡུ་ཏྟཾ, ‘‘ཏ་ཏི་ཡེ་ནཱ’’ཏི པ་ན ཝུ་ཏྟཾ. བྷ་ཝཱ་ས་ཝོ, ཨ་ཝི་ཛྫཱ་ས་ཝོ ཙ ཙ་ཏུ་ཏྠེ་ན པ་ཧཱི་ཡ་ཏི. ཨི་མེ་ས་ཉྩ ཀཱ་མཱ་ས་ཝ་བྷ་ཝཱ་ས་ཝཱ་ནཾ ལོ་བྷ་ས་བྷཱ་ཝ་ཏྟཱ ས་བྷཱ་ཝ་ཏོ ཏ་ཡོ དྷ་མྨཱ ཝི་བྷཱ་ག་ཏོ ཙ་ཏྟཱ་རོ ཨཱ་ས་ཝཱ ནཱ་མ ཛཱ་ཏཱ. ཨི་མེ ཋ་པེ་ཏྭཱ སེ་སཱ ལོ་ཀི་ཡ་ལོ་ཀུ་ཏྟ་རཱ ས་བྦེ དྷ་མྨཱ ནོ ཨཱ་ས་ཝཱ ནཱ་མ. ཨཱ་ས་ཝ་དུ་ཀཾ པ་ཋ་མཾ.
ཨ་ཏྟཱ་ནཾ ཨཱ་ར་མྨ་ཎཾ ཀ་ཏྭཱ པ་ཝ་ཏྟེ་ཧི ས་ཧ ཨཱ་ས་ཝེ་ཧཱི་ཏི སཱ་ས་ཝཱ, ས་བྦེ ལོ་ཀི་ཡ་དྷ་མྨཱ. ཨེ་ཝཾ པ་ཝ་ཏྟ་མཱ་ནཱ ན་ཏྠི ཨེ་ཏེ་སཾ ཨཱ་ས་ཝཱ་ཏི ཨ་ནཱ་ས་ཝཱ, ན་ཝ ལོ་ཀུ་ཏྟ་ར་དྷ་མྨཱ་ཝ. ཙེ་ཏ་སི་ཀཱ པ་ནེ་ཏྠ ལོ་ཀི་ཡ་དུ་ཀེ ཝུ་ཏྟ་ས་དི་སཱ་ཝ. སཱ་ས་ཝ་དུ་ཀཾ དུ་ཏི་ཡཾ.
ཏ་ཏི་ཡཱ་དཱི་ནཾ ཙ་ཏུ་ནྣཾ དུ་ཀཱ་ནཾ པ་ད་ཏྠོ ཝུ་ཏྟ་ན་ཡོ་ཝ. སེ་ས་མེ་ཏྠ ཧེ་ཏུ་གོ་ཙྪ་ཀེ ཝུ་ཏྟ་ན་ཡེ་ན ཝེ་དི་ཏ་བྦཾ. ཨ་ཡཾ པ་ན ཝི་སེ་སོ – ཡ་ཐཱ ཏ་ཏྠ ‘‘ན ཧེ་ཏཱུ ཁོ པ་ན དྷ་མྨཱ ས་ཧེ་ཏུ་ཀཱ་པི, ཨ་ཧེ་ཏུ་ཀཱ་པཱི’’ཏི ཨ་ཡཾ ཨོ་སཱ་ན་དུ་ཀོ པ་ཋ་མ་དུ་ཀེ དུ་ཏི་ཡ་པ་དཾ དུ་ཏི་ཡ་དུ་ཀེ་ན ཡོ་ཛེ་ཏྭཱ ཝུ་ཏྟོ, ཨེ་ཝ་མི་དྷ ‘‘ནོ ཨཱ་ས་ཝཱ ཁོ པ་ན དྷ་མྨཱ སཱ་ས་ཝཱ་པི, ཨ་ནཱ་ས་ཝཱ་པཱི’’ཏི ན ཝུ་ཏྟོ. ཨ་ཡ་ཉྩ ཏ་ཏྠ ཏ་ཏྠ ཝུ་ཏྟ་ན་ཡེ་ན ཨི་ཧ ས་ངྒ་ཧི་ཏོ་ཏི ཝེ་དི་ཏ་བྦོ. ཡ་ཐཱ ཙེ་ཏྠ, ཨེ་ཝཾ ས་ཉྙོ་ཛ་ན་གོ་ཙྪ་ཀཱ་དཱི་སུ་པི ཡ་ཐཱ་ནུ་རཱུ་པཾ ཉཱ་ཏ་བྦཾ.
ཏ་ཏྠ དྭཱ་ད་ས ཨ་ཀུ་ས་ལ་ཙི་ཏྟུ་པྤཱ་དཱ ཨཱ་ས་ཝ་ས་མྤ་ཡུ་ཏྟཱ ནཱ་མ. དོ་ས་མོ་ཧ་མཱུ་ལ་ཙི་ཏྟེ་སུ མོ་ཧོ, ཀུ་ས་ལཱ་བྱཱ་ཀ་ཏ་ཙི་ཏྟ་རཱུ་པ་ནི་བྦཱ་ནཱ་ནི ཙ ཨཱ་ས་ཝ་ཝི་པྤ་ཡུ་ཏྟཱ ནཱ་མ. ཙེ་ཏ་སི་ཀེ་སུ པ་ན མོ་ཧཾ ཋ་པེ་ཏྭཱ སེ་སཱ ཨ་ཀུ་ས་ལཱ ཨཱ་ས་ཝ་ས་མྤ་ཡུ་ཏྟཱ་ཝ, མོ་ཧོ པ་ན ཏི་ཛཱ་ཏི་ཀོ ཙ དྭི་དྷཱ་པི ཧོ་ཏི, སེ་སཱ ཨཱ་ས་ཝ་ཝི་པྤ་ཡུ་ཏྟཱ ཨེ་ཝཱ་ཏི. ཏ་ཏི་ཡཾ.
ཙ་ཏྟཱ་རོ ཨཱ་ས་ཝཱ ཨཱ་ས་ཝཱ ཙེ་ཝ སཱ་ས་ཝཱ ཙ ནཱ་མ. ཏ་ད་ཝ་སེ་སཱ ལོ་ཀི་ཡ་དྷ་མྨཱ སཱ་ས་ཝཱ ཙེ་ཝ ནོ ཙ ཨཱ་ས་ཝཱ ནཱ་མ. ཨི་དྷ པ་ན ལོ་ཀུ་ཏྟ་རཱ ན ཝ་ཏྟ་བྦཱ. ཙེ་ཏ་སི་ཀེ་སུ པ་ན ཨཱ་ས་ཝཱ་ཏི ཝུ་ཏྟེ་ཧི སེ་སཱ ཨ་ཀུ་ས་ལཱ, ཀ་རུ་ཎཱ་མུ་དི་ཏཱ ཙ སཱ་ས་ཝཱ ཙེ་ཝ ནོ ཙ ཨཱ་ས་ཝཱ ཨེ་ཝ, སེ་སཱ ཏ་ཐཱ ཙ ན ཝ་ཏྟ་བྦཱ ཙ. ཙ་ཏུ་ཏྠཾ.
ཡེ པ་ན ལོ་བྷ་མཱུ་ལེ་སུ ལོ་བྷ་མོ་ཧཱ, ལོ་བྷ་དི་ཊྛི་མོ་ཧོ ཙཱ་ཏི དྭེ ཏ་ཡོ ཨེ་ཀ་ཏོ ཀ་ཏྭཱ ཨུ་པྤ་ཛྫ་ནྟི, ཏེ ཨཱ་ས་ཝཱ ཙེ་ཝ ཨཱ་ས་ཝ་ས་མྤ་ཡུ་ཏྟཱ ཙ ནཱ་མ. དྭཱ་ད་ས ཨ་ཀུ་ས་ལ་ཙི་ཏྟཱ་ནི ཙེ་ཝ ཨཱ་ས་ཝ་ཝ་ཛྫི་ཏཱ ཏཾ་ས་མྤ་ཡུ་ཏྟཱ ཙ ཨཱ་ས་ཝ་ས་མྤ་ཡུ་ཏྟཱ ཙེ་ཝ ནོ ཙ ཨཱ་ས་ཝཱ ནཱ་མ. ཨི་དྷ པ་ན ཨཱ་ས་ཝ་ཝི་པྤ་ཡུ་ཏྟཱ ན ཝ་ཏྟ་བྦཱ. ཙེ་ཏ་སི་ཀེ་སུ པ་ན ཨཱ་ས་ཝ་ཝ་ཛྫི་ཏཱ ཨ་ཀུ་ས་ལཱ ཨཱ་ས་ཝ་ས་མྤ་ཡུ་ཏྟཱ ཙེ་ཝ ནོ ཙ ཨཱ་ས་ཝཱ ཨེ་ཝ, མོ་ཧོ སི་ཡཱ ཨཱ་ས་ཝོ ཙེ་ཝ ཨཱ་ས་ཝ་ས་མྤ་ཡུ་ཏྟོ ཙ, སི་ཡཱ ན ཝ་ཏྟ་བྦོ, ཏི་ཛཱ་ཏི་ཀཱ སི་ཡཱ ཨཱ་ས་ཝ་ས་མྤ་ཡུ་ཏྟཱ ཙེ་ཝ ནོ ཙ ཨཱ་ས་ཝཱ, སི་ཡཱ ན ཝ་ཏྟ་བྦཱ, ཀུ་ས་ལཱ་བྱཱ་ཀ་ཏཱ ན ཝ་ཏྟ་བྦཱ་ཝ. སེ་སཾ སུ་ཝི་ཉྙེ་ཡྻ་མེ་ཝ. པ་ཉྩ་མཾ.
ལོ་ཀུ་ཏྟ་ར་ཝ་ཛྫི་ཏཱ ཨཱ་ས་ཝ་ཝི་པྤ་ཡུ་ཏྟཱ སཱ་ས་ཝཱ ནཱ་མ. ལོ་ཀུ་ཏྟ་རཱ ཨཱ་ས་ཝ་ཝི་པྤ་ཡུ་ཏྟཱ ཨ་ནཱ་ས་ཝཱ ནཱ་མ. ཨི་དྷ པ་ན ཨཱ་ས་ཝ་ས་མྤ་ཡུ་ཏྟཱ ན ཝ་ཏྟ་བྦཱ་ཝ. ཙེ་ཏ་སི་ཀེ་སུ པ་ན ཀ་རུ་ཎཱ་མུ་དི་ཏཱ ཨཱ་ས་ཝ་ཝི་པྤ་ཡུ་ཏྟཱ སཱ་ས་ཝཱ ཨེ་ཝ, མོ་ཧོ ཏ་ཐཱ ཙ ན ཝ་ཏྟ་བྦོ ཙ, སེ་ས་ཀུ་ས་ལཱ་བྱཱ་ཀ་ཏཱ དྭི་དྷཱ་པི ཧོ་ནྟི, ཏི་ཛཱ་ཏི་ཀཱ དྭི་དྷཱ་པི ན ཝ་ཏྟ་བྦཱ་ཝ, མོ་ཧ་ཝ་ཛྫི་ཏཱ པ་ན ཨ་ཀུ་ས་ལཱ ན ཝ་ཏྟ་བྦཱ་ཝ. ཚ་ཊྛཾ.
ཨཱ་ས་ཝ་གོ་ཙྪ་ཀཾ ནི་ཊྛི་ཏཾ.
སཾ་ཡོ་ཛ་ན་གོ་ཙྪ་ཀེ ཡ་སྶ སཾ་ཝི་ཛྫ་ནྟི, ཏཾ པུ་གྒ་ལཾ ཝ་ཊྚ་སྨིཾ སཾ་ཡོ་ཛེ་ནྟི བ་ནྡྷ་ནྟཱི་ཏི སཾ་ཡོ་ཛ་ནཱ. ཏ་ཏོ ཨ་ཉྙེ ནོ སཾ་ཡོ་ཛ་ནཱ.
ཏ་ཏྠ ཀཱ་མ་རཱ་ག་སཾ་ཡོ་ཛ་ནཾ བྷ་ཝ་རཱ་ག་པ་ཊི་གྷ་མཱ་ན་དི་ཊྛི་ཝི་ཙི་ཀི་ཙྪཱ་སཱི་ལ་བྦ་ཏ་པ་རཱ་མཱ་ས་ཨི་སྶཱ་མ་ཙྪ་རི་ཡ་ཨ་ཝི་ཛྫཱ་སཾ་ཡོ་ཛ་ན་ནྟི ཨི་མེ ད་ས དྷ་མྨཱ སཾ་ཡོ་ཛ་ནཱ ནཱ་མ. ཏེ་སུ ཀཱ་མ་བྷ་ཝ་དི་ཊྛི་ཨ་ཝི་ཛྫཱ་སཾ་ཡོ་ཛ་ནཱ་ནི ཨཱ་ས་ཝ་གོ་ཙྪ་ཀེ ཝུ་ཏྟ་ན་ཡཱ་ནེ་ཝ. ‘‘ཨ་ན་ཏྠཾ མེ ཨ་ཙ་རི, ཙ་ར་ཏི, ཙ་རི་སྶ་ཏི, པི་ཡ་སྶ མེ ཨ་ན་ཏྠཾ ཨ་ཙ་རི, ཙ་ར་ཏི, ཙ་རི་སྶ་ཏི, ཨ་པྤི་ཡ་སྶ མེ ཨ་ཏྠཾ ཨ་ཙ་རི, ཙ་ར་ཏི, ཙ་རི་སྶ་ཏཱི’’ཏི (དྷ. ས. ༡༠༦༦) ཨེ་ཝཾ ཝུ་ཏྟེ་ཧི ན་ཝ་ཧི ཨཱ་ཀཱ་རེ་ཧི ས་ཏྟེ་སུ, ཨ་ཊྛཱ་ན་ཀོ་པ་ཝ་སེ་ན ས་ངྑཱ་རེ་སུ ཙ ཨུ་པྤ་ཛྫ་མཱ་ནོ ས་བྦོ་པི དོ་སོ པ་ཊི་གྷ་སཾ་ཡོ་ཛ་ནཾ ནཱ་མ.
‘‘སེ་ཡྻོ་ཧ་མ་སྨི, ས་དི་སོ་ཧ་མ་སྨི, ཧཱི་ནོ་ཧ་མ་སྨཱི’’ཏི ཨེ་ཝཾ ཏཱི་ཧི ཨཱ་ཀཱ་རེ་ཧི པ་ཝ་ཏྟོ ས་བྦོ མཱ་ནོ མཱ་ན་སཾ་ཡོ་ཛ་ནཾ ནཱ་མ. ཏ་ཏྠ སེ་ཡྻ་སྶེ་ཝ ས་ཏོ པུ་གྒ་ལ་སྶ ‘‘སེ་ཡྻོ་ཧ་མ་སྨི, ས་དི་སོ, ཧཱི་ནོ’’ཏི ཙ ཏི་དྷཱ མཱ་ནོ ཨུ་པྤ་ཛྫ་ཏི, ཏ་ཐཱ ས་དི་ས་ཧཱི་ནཱ་ན་མྤི. ཏ་ཏྠ སེ་ཡྻ་སྶ སེ་ཡྻ་མཱ་ནོ་ཝ ཡཱ་ཐཱ་ཝ་མཱ་ནོ. ཏ་ཐཱ ས་དི་ས་སྶ ས་དི་ས་མཱ་ནོ, ཧཱི་ན་སྶ ཧཱི་ན་མཱ་ནོ ཙ. ཏི་ཎྞ་མྤི ཨི་ཏ་རེ དྭེ དྭེ མཱ་ནཱ ཨ་ཡཱ་ཐཱ་ཝ་མཱ་ནཱ་ཏི ཉཱ་ཏ་བྦཱ.
ས་ཏྠུ་དྷ་མྨ་ས་ངྒྷ་སི་ཀྑཱ་སུ, པུ་བྦ་ནྟཱ་པ་ར་ནྟ་ཏ་དུ་བྷ་ཡ་པ་ཊི་ཙྩ་ས་མུ་པྤ་ནྣེ་སུ ཙ ཀ་ངྑ་ཏཱ་ཝ་སེ་ན པ་ཝ་ཏྟཱ ས་བྦཱ་པི ཝི་ཙི་ཀི་ཙྪཱ ཝི་ཙི་ཀི་ཙྪཱ་སཾ་ཡོ་ཛ་ནཾ ནཱ་མ.
གོ་སཱི་ལ་གོ་ཝ་ཏཱ་དཱི་ཧི སུ་དྡྷཱི་ཏི ག་ཧ་ཎཱ་ཀཱ་ར་པྤ་ཝ་ཏྟཱ དི་ཊྛི ཨེ་ཝ སཱི་ལ་བྦ་ཏ་པ་རཱ་མཱ་ས་སཾ་ཡོ་ཛ་ནཾ ནཱ་མ.
ཏ་ད་ཝ་སེ་སཱ དི་ཊྛི དི་ཊྛི་སཾ་ཡོ་ཛ་ན་ནྟི ག་ཧེ་ཏ་བྦཾ.
པ་ར་ལཱ་བྷ་ས་ཀྐཱ་ར་ག་རུ་ཀཱ་ར་མཱ་ན་ན་ཝ་ནྡ་ན་པཱུ་ཛ་ནཱ་དཱི་སུ ཨ་ས་ཧ་ནཱ་ཀཱ་རེ་ན པ་ཝ་ཏྟཱ ཨི་སྶཱ ཨི་སྶཱ་སཾ་ཡོ་ཛ་ནཾ ནཱ་མ. ཨཱ་ཝཱ་ས་མ་ཙྪ་རི་ཡཾ ཀུ་ལ་ལཱ་བྷ་ཝ་ཎྞ་དྷ་མྨ་མ་ཙྪ་རི་ཡ་ནྟི པ་ཉྩ་ཝི་དྷཾ མ་ཙྪ་རི་ཡཾ མ་ཙྪ་རི་ཡ་སཾ་ཡོ་ཛ་ནཾ ནཱ་མ. ས་ཀ་ལཱ་རཱ་མེ་པི ཧི པ་རི་ཝེ་ཎོ་ཝ་ར་ཀཱ་དཱི་སུ ཝཱ ཝ་ས་ནྟོ ཏ་ཏྠ ཨ་ཉྙ་སྶ ཝ་ཏྟ་ས་མྤ་ནྣ་སྶ པེ་ས་ལ་སྶ བྷི་ཀྑུ་ནོ ཨཱ་ག་མ་ནཾ ན ཨི་ཙྪ་ཏི, ཨཱ་ག་ཏ་སྶཱ་པི ཁི་པྤཾ ག་མ་ན་ཉྙེ་ཝ ཨི་ཙྪ་ཏི, ཨི་དཾ ཨཱ་ཝཱ་ས་མ་ཙྪ་རི་ཡཾ ནཱ་མ. བྷ་ཎྜ་ན་ཀཱ་ར་ཀཱ་དཱི་ནཾ པ་ན ཏ་ཏྠ ཝཱ་སཾ ཨ་ནི་ཙྪ་ཏོ ཨཱ་ཝཱ་ས་མ་ཙྪ་རི་ཡཾ ནཱ་མ ན ཧོ་ཏི.
ཨ་ཏྟ་ནོ པ་ན ཨུ་པ་ཊྛཱ་ཀ་ཀུ་ལེ ཝཱ ཉཱ་ཏི་ཀུ་ལེ ཝཱ ཨ་ཉྙ་སྶ པེ་ས་ལ་སྶ ཨུ་པ་ས་ངྐ་མ་ནཾ ཨ་ནི་ཙྪ་ཏོ ཀུ་ལ་མ་ཙྪ་རི་ཡཾ ཧོ་ཏི, པཱ་པ་པུ་གྒ་ལ་སྶ ཨ་ནི་ཙྪ་ཏོ པ་ན ན ཧོ་ཏི. སོ ཧི ཏེ་སཾ པ་སཱ་ད་བྷེ་དཱ་ཡ པ་ཊི་པ་ཛྫ་ཏཱི་ཏི.
ཨ་ཏྟ་ནཱ ལ་བྷ་ན་ཊྛཱ་ནེ ཙ་ཏུ་པ་ཙྩ་ཡཾ ལ་བྷ་ནྟེ སཱི་ལ་ཝ་ནྟེ དི་སྭཱ ‘‘མཱ ལ་བྷ་ནྟཱུ’’ཏི ཙི་ནྟེ་ནྟ་སྶ ལཱ་བྷ་མ་ཙྪ་རི་ཡཾ ཧོ་ཏི. ཡོ པ་ན ས་དྡྷཱ་དེ་ཡྻཾ ཝི་ནི་པཱ་ཏེ་ཏི, པཱུ་ཏི་བྷཱ་ཝ་མྤི ག་ཙྪ་ནྟཾ ཨ་ཉྙ་སྶ ན དེ་ཏི, ཏཾ ལ་བྷ་ནྟཾ དི་སྭཱ ‘‘ས་ཙེ ཨི་མཾ ཨ་ཉྙོ སཱི་ལ་ཝཱ ལ་བྷེ་ཡྻ, པ་རི་བྷོ་གཾ ག་ཙྪེ་ཡྻཱ’’ཏི ཙི་ནྟེ་ནྟ་སྶ མ་ཙྪ་རི་ཡཾ ནཱ་མ ན་ཏྠི.
ཝ་ཎྞོ ནཱ་མ ཨ་ཏྟ་ནཱ ས་དི་སོ ས་རཱི་ར་ཝ་ཎྞོ་པི གུ་ཎ་ཝ་ཎྞོ་པི. ཏ་ཏྠ ‘‘རཱུ་པ་ཝཱ པཱ་སཱ་དི་ཀོ’’ཏི པ་ར་སྶ ས་རཱི་ར་ཝ་ཎྞཾ, ‘‘སཱི་ལ་ཝཱ, དྷུ་ཏ་ཝཱ’’ཏི་ཨཱ་དི་ནཱ གུ་ཎ་ཝ་ཎྞ་ཉྩ ཨ་ཏྟ་ནོ ཝ་ཎྞ་བྷ་ཎ་ན་ཊྛཱ་ནེ ཝུ་ཙྩ་མཱ་ནཾ ཨ་ས་ཧ་ནྟ་སྶ དུ་ཝི་དྷཾ ཝ་ཎྞ་མ་ཙྪ་རི་ཡཾ ནཱ་མ ཧོ་ཏི, ཨ་པེ་ས་ལཾ པ་ན ཝི་པ་ནྣཾ པ་སཾ་སི་ཏྭཱ པ་རི་སཱ་སུ ཨུ་པ་ཏྠ་མྦྷེ་ནྟཾ དི་སྭཱ པཱ་པ་ག་ར་ཧི་ཏཱ་ཡ ཨ་ས་ཧ་ནྟ་སྶ ན ཧོ་ཏི.
དྷ་མྨོ་ཏི པ་རི་ཡ་ཏྟི་ཡེ་ཝ, ན པ་ཊི་ཝེ་དྷོ ཨ་རི་ཡཱ་ནཾ ཏ་ཏྠ མ་ཙྪ་རི་ཡཱ་བྷཱ་ཝཱ. པ་རི་ཡ་ཏྟིཾ པ་ན གུ་ལ༹ྷ་ག་ནྠཾ ཨ་ཉྙེ་སཾ ཨ་ཀ་ཐེ་ཏུ་ཀཱ་མ་སྶ དྷ་མྨ་མ་ཙྪ་རི་ཡཾ ནཱ་མ ཧོ་ཏི, དྷ་མྨཱ་ནུ་གྒ་ཧེ་ན པ་ན ལོ་ལ་སྶ, ཀཱ་ལེ་ན ས་མ་ཎོ, ཀཱ་ལེ་ན ནི་ག་ཎྛཱ་དི ཙ ཧུ་ཏྭཱ ཝི་ཙ་ར་ནྟ་སྶ པ་ཝེ་ཎི་ཨཱ་ག་ཏཾ ཏ་ནྟིཾ ‘‘ས་ཎྷ་སུ་ཁུ་མཾ དྷ་མྨ་ནྟ་རཾ བྷི་ནྡི་ཏྭཱ ཨཱ་ལུ་ལི༹་སྶ་ཏི, ཨ་མྷཱ་ཀཾ ས་མ་ཡཾ བྷི་ནྡི་སྶ་ཏཱི’’ཏི ཙ ན དེ་ནྟ་སྶ, པུ་གྒ་ལཱ་ནུ་གྒ་ཧེ་ན ཝཱ པ་ཀ་ཏི་ཡཱ ས་ཋ་སྶ མཱ་ཡཱ་ཝི་ནོ ‘‘ས་ཎྷ་སུ་ཁུ་མ་དྷ་མྨཾ ཨུ་གྒ་ཎྷི་ཏྭཱ ཨ་ཉྙཾ བྱཱ་ཀ་རི་ཏྭཱ ན་སྶི་སྶ་ཏཱི’’ཏི ན དེ་ནྟ་སྶ ཙ དྷ་མྨ་མ་ཙྪ་རི་ཡཾ ན ཧོ་ཏི. ཡ་ཐཱ ཙ བྷི་ཀྑཱུ་ནཾ, ཨེ་ཝཾ ག་ཧ་ཊྛཱ་ན་མྤི པ་ཉྩ་ཝི་དྷཾ མ་ཙྪ་རི་ཡཾ ཡ་ཐཱ་ནུ་རཱུ་པཾ ཉཱ་ཏ་བྦཾ. ས་ངྑེ་པ་ཏོ པ་ན ག་ཧ་ཊྛ་པ་བྦ་ཛི་ཏཱ་ནཾ ཨ་ཏྟ་ས་མྤ་ཏྟི་ནི་གཱུ་ཧ་ན་ལ་ཀྑ་ཎཾ མ་ཙྪ་རི་ཡཾ ནཱ་མཱ་ཏི ག་ཧེ་ཏ་བྦཾ.
ཨི་མེ་སུ ཙ སཾ་ཡོ་ཛ་ནེ་སུ དི་ཊྛི་ཝི་ཙི་ཀི་ཙྪཱ་སཱི་ལ་བྦ་ཏ་པ་རཱ་མཱ་ས་ཨི་སྶཱ་མ་ཙྪ་རི་ཡཱ་ནི སོ་ཏཱ་པ་ཏྟི་མ་གྒེ་ན པ་ཧཱི་ཡ་ནྟི, པ་ཊི་གྷོ ཨ་ནཱ་གཱ་མི་མ་གྒེ་ན, ཀཱ་མ་རཱ་གོ ཙ་ཏཱུ་ཧི་པཱི་ཏི ཝ་ཏྟ་བྦཾ, ‘‘ཏ་ཏི་ཡེ་ནཱ’’ཏི པ་ན ཝུ་ཏྟཾ. མཱ་ན་བྷ་ཝ་རཱ་ག་ཨ་ཝི་ཛྫཱ ཨ་ར་ཧ་ཏྟ་མ་གྒེ་ན. ཏ་ཏྠ ཙ ཨ་ཡཱ་ཐཱ་ཝ་མཱ་ནོ པ་ཋ་མ་མ་གྒེ་ན པ་ཧཱི་ཡ་ཏཱི་ཏི ད་ཊྛ་བྦོ, ཨི་མེ་སཾ ཀཱ་མ་རཱ་ག་བྷ་ཝ་རཱ་གཱ་ནཾ ལོ་བྷ་ས་བྷཱ་ཝ་ཏྟཱ དི་ཊྛི་སཱི་ལ་བྦ་ཏ་པ་རཱ་མཱ་སཱ་ནཾ མི་ཙྪཱ་དི་ཊྛི་ས་བྷཱ་ཝ་ཏྟཱ ས་བྷཱ་ཝ་ཏོ ཨ་ཊྛེ་ཝ དྷ་མྨཱ ད་ས སཾ་ཡོ་ཛ་ནཱ ནཱ་མ ཛཱ་ཏཱ. ཨི་མེ ད་ས ཋ་པེ་ཏྭཱ སེ་སཱ ལོ་ཀི་ཡ་ལོ་ཀུ་ཏྟ་ར་དྷ་མྨཱ ནོ སཾ་ཡོ་ཛ་ནཱ ནཱ་མ. སེ་སཾ ཨཱ་ས་ཝ་དུ་ཀ་ས་དི་སཾ. སཾ་ཡོ་ཛ་ན་དུ་ཀཾ པ་ཋ་མཾ.
ཨཱ་ར་མྨ་ཎ་བྷཱ་ཝཾ ཨུ་པ་ག་ནྟྭཱ སཾ་ཡོ་ཛ་ན་སཾ་ཝ་ཌྜྷ་ནེ་ན སཾ་ཡོ་ཛ་ནཱ་ནཾ ཧི་ཏཱ་ཏི སཾ་ཡོ་ཛ་ནི་ཡཱ, སཱ་ས་ཝ་དྷ་མྨཱ ཨེ་ཝ. ཏ་ཐཱ ནཱི་ཝ་ར་ཎི་ཡཱ་ཏི ཨེ་ཏྠཱ་པི. ན སཾ་ཡོ་ཛ་ནི་ཡཱ ཨ་སཾ་ཡོ་ཛ་ནི་ཡཱ, ཨ་ནཱ་ས་ཝཱ. སེ་སཾ སཱ་ས་ཝ་དུ་ཀ་ས་དི་ས་མེ་ཝ. དུ་ཏི་ཡཾ.
ཏ་ཏི་ཡཱ་ད་ཡོ་པི ཨཱ་ས་ཝ་གོ་ཙྪ་ཀེ ཏ་ཏི་ཡཱ་དི་ས་དི་སཱ ཨེ་ཝ, ཝི་སེ་ས་མ་ཏྟ་མེ་ཝེ་ཏྠ ཝ་ཀྑཱ་མ. ཏ་ཏྠ ཧི དྭཱ་ད་སཱ་ཀུ་ས་ལ་ཙི་ཏྟཱ་ནི སཾ་ཡོ་ཛ་ན་ས་མྤ་ཡུ་ཏྟཱ ནཱ་མ, ཨུ་དྡྷ་ཙྩ་ས་ཧ་ག་ཏོ མོ་ཧོ, སེ་ས་ཙི་ཏྟ་རཱུ་པ་ནི་བྦཱ་ནཱ་ནི སཾ་ཡོ་ཛ་ན་ཝི་པྤ་ཡུ་ཏྟཱ ནཱ་མ. སེ་སཾ ས་མ་མེ་ཝ. ཏ་ཏི་ཡཾ.
ད་ས སཾ་ཡོ་ཛ་ནཱ་ནི སཾ་ཡོ་ཛ་ནཱ ཙེ་ཝ སཾ་ཡོ་ཛ་ནི་ཡཱ ཙ ནཱ་མ. ཏ་ད་ཝ་སེ་ས་ལོ་ཀི་ཡ་དྷ་མྨཱ སཾ་ཡོ་ཛ་ནི་ཡཱ ཙེ་ཝ ནོ ཙ སཾ་ཡོ་ཛ་ནཱ ནཱ་མ. སེ་སཾ སུ་ཝི་ཉྙེ་ཡྻ་མེ་ཝ. ཙ་ཏུ་ཏྠཾ.
ཡེ པ་ན ཨུ་དྡྷ་ཙྩ་ཝི་ར་ཧི་ཏེ་སུ ཨེ་ཀཱ་ད་ས་སུ ཨ་ཀུ་ས་ལ་ཙི་ཏྟེ་སུ ཝི་ཙི་ཀི་ཙྪཱ་མོ་ཧཱ དོ་ས་མོ་ཧཱ དོ་ས་ཨི་སྶཱ་མོ་ཧཱ དོ་ས་མ་ཙྪ་རི་ཡ་མོ་ཧཱ ལོ་བྷ་མཱ་ན་མོ་ཧཱ ལོ་བྷ་དི་ཊྛི་མོ་ཧཱ ཙཱ་ཏི དྭེ ཏ་ཡོ ཨེ་ཀ་ཏོ ཨུ་པྤ་ཛྫ་ནྟི, ཏེ སཾ་ཡོ་ཛ་ནཱ ཙེ་ཝ སཾ་ཡོ་ཛ་ན་ས་མྤ་ཡུ་ཏྟཱ ཙ ནཱ་མ. དྭཱ་ད་སཱ་ཀུ་ས་ལ་ཙི་ཏྟཱ་ནི ཙེ་ཝ སཾ་ཡོ་ཛ་ན་ཝ་ཛྫི་ཏ་ཏཾ་ས་མྤ་ཡུ་ཏྟཱ ཙ སཾ་ཡོ་ཛ་ན་ས་མྤ་ཡུ་ཏྟཱ ཙེ་ཝ ནོ ཙ སཾ་ཡོ་ཛ་ནཱ ནཱ་མ. སེ་ས་མི་དྷ ཨ་ན་ནྟ་ར་དུ་ཀ་ཉྩ ཨཱ་ས་ཝ་གོ་ཙྪ་ཀེ པ་ཉྩ་མ་ཚ་ཊྛ་དུ་ཀ་ས་དི་ས་མེ་ཝ. ཀེ་ཝ་ལཾ ཨཱ་ས་ཝ་པ་ད་ཊྛཱ་ནེ སཾ་ཡོ་ཛ་ན་པ་ད་མེ་ཝ ཝི་སེ་སོ. པ་ཉྩ་མ་ཚ་ཊྛ་དུ་ཀཱ་ནི.
སཾ་ཡོ་ཛ་ན་གོ་ཙྪ་ཀཾ ནི་ཊྛི་ཏཾ.
ག་ནྠ་གོ་ཙྪ་ཀེ ཡ་སྶ སཾ་ཝི་ཛྫ་ནྟི, ཏཾ ཙུ་ཏི་པ་ཊི་ས་ནྡྷི་ཝ་སེ་ན ཝ་ཊྚ་སྨིཾ ག་ནྠེ་ནྟི གྷ་ཊེ་ནྟཱི་ཏི ག་ནྠཱ. ཏ་ཏོ ཨ་ཉྙེ ནོ ག་ནྠཱ.
ཏ་ཏྠ ཨ་བྷི་ཛ྄ཛྷཱ་ཀཱ་ཡ་ག་ནྠོ, བྱཱ་པཱ་དོ, སཱི་ལ་བྦ་ཏ་པ་རཱ་མཱ་སོ, ཨི་དཾ་ས་ཙྩཱ་བྷི་ནི་ཝེ་སོ ཀཱ་ཡ་ག་ནྠོ་ཏི ཨི་མེ ཙ་ཏྟཱ་རོ དྷ་མྨཱ ག་ནྠཱ ནཱ་མ. ཏ་ཏྠ ཨ་བྷི་ཛ྄ཛྷཱ ཨེ་ཝ ནཱ་མ་ཀཱ་ཡཾ ཝུ་ཏྟ་ན་ཡེ་ན ག་ནྠེ་ཏཱི་ཏི ཨ་བྷི་ཛ྄ཛྷཱ་ཀཱ་ཡ་ག་ནྠོ. ཨེ་ཝཾ སེ་སེ་སུ་པི. ས་བྦ་ཉྙུ་བྷཱ་སི་ཏ་མྤི པ་ཊི་ཀྑི་པི་ཏྭཱ ‘‘ས་སྶ་ཏོ ལོ་ཀོ, ཨི་ད་མེ་ཝ ས་ཙྩཾ, མོ་གྷ་མ་ཉྙ’’ནྟི ཨི་མི་ནཱ ཨཱ་ཀཱ་རེ་ན ཨ་བྷི་ནི་ཝི་ས་ན་ཏོ སཱི་ལ་བྦ་ཏ་པ་རཱ་མཱ་ས་ཝི་ར་ཧི་ཏཱ ས་བྦཱ་པི དི་ཊྛི ཨི་དཾ་ས་ཙྩཱ་བྷི་ནི་ཝེ་སོ ནཱ་མ. སེ་སཱ ཝུ་ཏྟ་ཏྠཱ་ཝ. ཨི་མེ་སུ ཙ པ་ཙྪི་མཱ དྭེ ག་ནྠཱ པ་ཋ་མེ་ན མ་གྒེ་ན པ་ཧཱི་ཡ་ནྟི, བྱཱ་པཱ་དོ ཏ་ཏི་ཡེ་ན, ཨ་བྷི་ཛ྄ཛྷཱ ཙ་ཏཱུ་ཧི་པི. ཨི་མེ ཙ ས་བྷཱ་ཝ་ཏོ ཏ་ཡོ དྷ་མྨཱ ཙ་ཏྟཱ་རོ ག་ནྠཱ ནཱ་མ ཛཱ་ཏཱ. ཨི་མེ པ་ན ཋ་པེ་ཏྭཱ སེ་སཱ ས་བྦེ དྷ་མྨཱ ནོ ག་ནྠཱ ནཱ་མ. ག་ནྠ་དུ་ཀཾ པ་ཋ་མཾ.
ཨཱ་ར་མྨ་ཎ་ཀ་ར་ཎ་ཝ་སེ་ན ག་ནྠེ་ཧི ག་ནྠི་ཏ་བྦཱ་ཏི ག་ནྠ་ནི་ཡཱ. ན ག་ནྠ་ནི་ཡཱ ཨ་ག་ནྠ་ནི་ཡཱ. སེ་སཾ སཱ་ས་ཝ་དུ་ཀ་ས་དི་ས་མེ་ཝ. དུ་ཏི་ཡཾ.
མོ་ཧ་མཱུ་ལ་ཝ་ཛྫི་ཏཱ་ནི ད་ས ཨ་ཀུ་ས་ལ་ཙི་ཏྟཱ་ནི, དི་ཊྛི་ཝི་པྤ་ཡུ་ཏྟ་ཙི་ཏྟེ་སུ ལོ་བྷཾ, དོ་ས་མཱུ་ལེ་སུ ཙ དོ་སཾ ཋ་པེ་ཏྭཱ ཏཾ་ས་མྤ་ཡུ་ཏྟཱ ཙ ག་ནྠ་ས་མྤ་ཡུ་ཏྟཱ ནཱ་མ. ཡ་ཐཱ་ཝུ་ཏྟོ ལོ་བྷོ, དོ་སོ, མོ་ཧ་མཱུ་ལཱ་ནི, ཀུ་ས་ལཱ་བྱཱ་ཀ་ཏཱ་ནི ཙི་ཏྟཱ་ནི, རཱུ་པ་ནི་བྦཱ་ནཱ་ནི ཙ ག་ནྠ་ཝི་པྤ་ཡུ་ཏྟཱ ནཱ་མ. ཙེ་ཏ་སི་ཀེ་སུ པ་ན དི་ཊྛི་མཱ་ན་ཨི་སྶཱ་མ་ཙྪ་རི་ཡ་ཀུ་ཀྐུ་ཙྩ་ཐི་ན་མི་དྡྷཱ་ནི ག་ནྠ་ས་མྤ་ཡུ་ཏྟཱ ཨེ་ཝ. དོ་ས་ཝི་ཙི་ཀི་ཙྪཱ, ཀུ་ས་ལཱ་བྱཱ་ཀ་ཏཱ ཙ ག་ནྠ་ཝི་པྤ་ཡུ་ཏྟཱ ཨེ་ཝ, སེ་སཱ དྭི་དྷཱ་པི ཧོ་ནྟི. ཏ་ཏི་ཡཾ.
ཙ་ཏྟཱ་རོ ག་ནྠཱ ག་ནྠཱ ཙེ་ཝ ག་ནྠ་ནི་ཡཱ ཙ ནཱ་མ. ཏ་ད་ཝ་སེ་སཱ ལོ་ཀི་ཡཱ ག་ནྠ་ནི་ཡཱ ཙེ་ཝ ནོ ཙ ག་ནྠཱ ནཱ་མ. ཏ་ཐཱ ཙེ་ཏ་སི་ཀེ་སུ ག་ནྠ་ཝ་ཛྫི་ཏཱ ཨ་ཀུ་ས་ལཱ, ཨ་པྤ་མ་ཉྙཱ ཙ, སེ་སཱ ཙེ་ཏ་སི་ཀཱ པ་ན ཏ་ཐཱ ཙ ན ཝ་ཏྟ་བྦཱ ཙ, ཨི་དྷ པ་ན ལོ་ཀུ་ཏྟ་རཱ ན ཝ་ཏྟ་བྦཱ. ཙ་ཏུ་ཏྠཾ.
དི་ཊྛི ག་ནྠཱ་ཙེ་ཝ ག་ནྠ་ས་མྤ་ཡུ་ཏྟཱ ཙ ནཱ་མ. ལོ་བྷོ ཏ་ཐཱ ཙ ན ཝ་ཏྟ་བྦོ ཙ, ག་ནྠ་ས་མྤ་ཡུ་ཏྟེ་སུ ག་ནྠེ ཋ་པེ་ཏྭཱ སེ་སཱ ག་ནྠ་ས་མྤ་ཡུ་ཏྟཱ ཙེ་ཝ ནོ ཙ ག་ནྠཱ ནཱ་མ. ཨི་དྷ པ་ན ག་ནྠ་ཝི་པྤ་ཡུ་ཏྟཱ ན ཝ་ཏྟ་བྦཱ. ཙེ་ཏ་སི་ཀེ་སུ པ་ན མཱ་ན་ཨི་སྶཱ་མ་ཙྪ་རི་ཡ་ཀུ་ཀྐུ་ཙྩ་ཐི་ན་མི་དྡྷཱ་ནི ག་ནྠ་ས་མྤ་ཡུ་ཏྟཱ ཙེ་ཝ ནོ ཙ ག་ནྠཱ ཨེ་ཝ, མོ་ཧཱ་ཧི་རི་ཀཱ་ནོ་ཏྟ་པྤ་ཨུ་དྡྷ་ཙྩཱ་ནི ཏི་ཛཱ་ཏི་ཀཱ ཙ སི་ཡཱ, ཏ་ཐཱ ན་ཝ་ཏྟ་བྦཱ ཙ, སེ་སཱ ན ཝ་ཏྟ་བྦཱ. སེ་སཾ སུ་ཝི་ཉྙེ་ཡྻ་མེ་ཝ. པ་ཉྩ་མཾ.
ལོ་ཀུ་ཏྟ་ར་ཝ་ཛྫི་ཏཱ ག་ནྠ་ཝི་པྤ་ཡུ་ཏྟཱ ག་ནྠ་ནི་ཡཱ ནཱ་མ. ལོ་ཀུ་ཏྟ་རཱ པ་ན ག་ནྠ་ཝི་པྤ་ཡུ་ཏྟཱ ཨ་ག་ནྠ་ནི་ཡཱ ནཱ་མ. ཨི་དྷ པ་ན ག་ནྠ་ས་མྤ་ཡུ་ཏྟཱ ན ཝ་ཏྟ་བྦཱ. ཙེ་ཏ་སི་ཀེ་སུ པ་ན དོ་སོ ཝི་ཙི་ཀི་ཙྪཱ ཀ་རུ་ཎཱ མུ་དི་ཏཱ ག་ནྠ་ཝི་པྤ་ཡུ་ཏྟཱ ག་ནྠ་ནི་ཡཱ ཨེ་ཝ, མོ་ཧཱ་ཧི་རི་ཀཱ་ནོ་ཏྟ་པྤ་ཨུ་དྡྷ་ཙྩ་ལོ་བྷཱ ཏ་ཐཱ ན ཝ་ཏྟ་བྦཱ ཙ, སེ་སཱ ཀུ་ས་ལཱ་བྱཱ་ཀ་ཏཱ དྭི་དྷཱ་པི ཧོ་ནྟི, ཏི་ཛཱ་ཏི་ཀཱ པ་ན དྭི་དྷཱ་པི ན ཝ་ཏྟ་བྦཱ ཙ, སེ་སཱ ཨ་ཀུ་ས་ལཱ་པི ན ཝ་ཏྟ་བྦཱ ཙ. ཚ་ཊྛཾ.
ག་ནྠ་གོ་ཙྪ་ཀཾ ནི་ཊྛི་ཏཾ.
ཨོ་གྷ་ཡོ་ག་གོ་ཙྪ་ཀཱ་ནི ས་བྦ་ཐཱ ཨཱ་ས་ཝ་གོ་ཙྪ་ཀ་ས་དི་སཱ་ནི. པ་ད་ཏྠ་མ་ཏྟ་མེ་ཝ, ཧེ་ཏྠ ནཱ་མ་མ་ཏྟ་ཉྩ ཝི་སེ་སོ. ཏ་ཏྠ ཡ་སྶ སཾ་ཝི་ཛྫ་ནྟི, ཏཾ ཝ་ཊྚ་སྨིཾ ཨོ་ཧ་ན་ནྟི ཨོ་སཱི་དཱ་པེ་ནྟཱི་ཏི ཨོ་གྷཱ. ཨཱ་ར་མྨ་ཎཾ ཀ་ཏྭཱ ཨ་ཏི་ཀྐ་མ་ནཱི་ཡ་ཏོ ཨོ་གྷེ་ཧི ཨ་ཏི་ཀྐ་མི་ཏ་བྦཱ་ཏི ཨོ་གྷ་ནི་ཡཱ. ཏ་ཐཱ ཡོ་ག་ནི་ཡཱཏི ཨེ་ཏྠཱ་པི. ཝ་ཊྚ་སྨིཾ ཡོ་ཛེ་ནྟཱི་ཏི ཡོ་གཱ. སེ་སཾ ཏཱ་དི་ས་མེ་ཝ.
ཨོ་གྷ་ཡོ་ག་གོ་ཙྪ་ཀཱ་ནི ནི་ཊྛི་ཏཱ་ནི.
ནཱི་ཝ་ར་ཎ་གོ་ཙྪ་ཀེ ཙི་ཏྟཾ ནཱི་ཝ་ར་ནྟི པ་རི་ཡོ་ན་ནྡྷ་ནྟཱི་ཏི ནཱི་ཝ་ར་ཎཱ. ཏ་ཏྠ ཀཱ་མ་ཙྪ་ནྡ་ནཱི་ཝ་ར་ཎཾ བྱཱ་པཱ་ད་ནཱི་ཝ་ར་ཎཾ ཐི་ན་མི་དྡྷ་ནཱི་ཝ་ར་ཎཾ ཨུ་དྡྷ་ཙྩ་ཀུ་ཀྐུ་ཙྩ་ནཱི་ཝ་ར་ཎཾ ཝི་ཙི་ཀི་ཙྪཱ་ནཱི་ཝ་ར་ཎཾ ཨ་ཝི་ཛྫཱ་ནཱི་ཝ་ར་ཎ་ནྟི ཨི་མེ ཚ ནཱི་ཝ་ར་ཎཱ ནཱ་མ. ཏ་ཏྠ ཐི་ན་ནྟི ས་པྤི་པི་ཎྜོ ཝི་ཡ ཨ་ཝི་པྥཱ་རི་ཀ་ཏཱ་ཡ ཙི་ཏྟ་སྶ གྷ་ན་བྷཱ་ཝོ, ཐ་དྡྷ་ཏཱ་ཏི ཨ་ཏྠོ. མེ་དྷ་ཏཱི་ཏི མི་དྡྷཾ, ཨ་ཀ་མྨ་ཉྙ་བྷཱ་ཝོ, པ་ཙ་ལཱ་ཡི་ཀ་བྷཱ་ཝ་ཀ་རོ་ཏི ཨ་ཏྠོ. ཨི་ད་ཉྩ སེ་ཁ་པུ་ཐུ་ཛྫ་ནཱ་ནཾ ནི་དྡཱ་ཡ པུ་བྦ་བྷཱ་གེ, ཨ་པ་ར་བྷཱ་གེ ཙ པ་ཙ་ལཱ་ཡ་ན་ཧེ་ཏུ་ཀཾ ཨུ་པྤ་ཛྫ་ཏི, ན ནི་དྡོ་ཀྐ་མ་ན་ཀཱ་ལེ. ཁཱི་ཎཱ་ས་ཝཱ་ན་མྤི ཧི ཀ་ར་ཛ་ཀཱ་ཡ་སྶ དུ་བྦ་ལ་བྷཱ་ཝེ་ན ཨ་ས་མྨི་སྶ་བྷ་ཝ་ངྒ་ས་ནྟ་ཏི་ཝ་སེ་ན ནི་དྡོ་ཀྐ་མ་ནཾ ཧོ་ཏི, ཏཾ པ་ན ཏེ་སཾ ཐི་ན་མི་དྡྷ་ཧེ་ཏུ་ཀཾ ན ཧོ་ཏི, ཨི་ཏ་རེ་ས་མེ་ཝ ཧོ་ཏི.
ཀེ་ཙི པ་ན རཱུ་པ་མེ་ཝ ‘‘མི་དྡྷ’’ནྟི ཝ་ད་ནྟི, ཏཾ ན ཡུ་ཏྟཾ, ‘‘ཐི་ན་མི་དྡྷ་ནཱི་ཝ་ར་ཎཾ ཨ་ཝི་ཛྫཱ་ནཱི་ཝ་ར་ཎེ་ན ནཱི་ཝ་ར་ཎ་ཉྩེ་ཝ ནཱི་ཝ་ར་ཎ་ས་མྤ་ཡུ་ཏྟ་ཉྩཱ’’ཏི ཨ་རཱུ་པ་དྷ་མྨེ་ཧི ས་མྤ་ཡོ་ག་ཝ་ཙ་ན་ཏོ ཨ་རཱུ་པ་མེ་ཝ. ཨ་ཀུ་ས་ལ་ཉྩ ‘‘ཐི་ན་མི་དྡྷ་ནཱི་ཝ་ར་ཎ་སྶ པ་ཧཱི་ན་ཏྟཱ’’ཏི་ཨཱ་དི་པ་ཧཱ་ན་ཝ་ཙ་ན་ཏོ. ཨ་ཀུ་ས་ལཱ ཨེ་ཝ ཧི པ་ཧཱ་ཏ་བྦཱ, ཏ་སྨཱ ཨཱ་རུ་པྤེ་པི ཙེ་ཏཾ ཨུ་པྤ་ཛྫ་ཏི. ‘‘ནཱི་ཝ་ར་ཎཾ དྷ་མྨཾ པ་ཊི་ཙྩ ནཱི་ཝ་ར་ཎོ དྷ་མྨོ ཨུ་པྤ་ཛྫ་ཏི ན པུ་རེ་ཛཱ་ཏ་པ་ཙྩ་ཡཱ’’ཏི (པ་ཊྛཱ. ༣.༨.༨) ཨེ་ཏ་སྶ ཝི་བྷ་ངྒེ ‘‘ཨཱ་རུ་པྤེ ཀཱ་མ་ཙྪ་ནྡ་ནཱི་ཝ་ར་ཎཾ པ་ཊི་ཙྩ ཐི་ན་མི་དྡྷ་ཨུ་དྡྷ་ཙྩ་ཨ་ཝི་ཛྫཱ་ནཱི་ཝ་ར་ཎ’’ནྟི (པ་ཊྛཱ. ༣.༨.༨) ས་བྦཾ ཝི་ཏྠཱ་རེ་ཏ་བྦཾ. ‘‘སོ་པྤཾ པ་ཙ་ལཱ་ཡི་ཀཱ’’ཏི (དྷ. ས. ༡༡༦༣) པ་ད་བྷཱ་ཛ་ནཱི་ཡེ པ་ན་སྶ ཕ་ལཱུ་པ་ཙཱ་རེ་ན ཝུ་ཏྟ་ནྟི ཝེ་དི་ཏ་བྦཾ. ཐི་ནཾ མི་དྡྷ་ཉྩཱ་ཏི ཨི་དཾ དྭ་ཡཾ ནཱི་ཝ་ར་ཎ་ཊྛཱ་ནེ ཨེ་ཀ་ནཱི་ཝ་ར་ཎཾ ཝུ་ཏྟཾ, ཏ་ཐཱ ཨུ་དྡྷ་ཙྩ་ཀུ་ཀྐུ་ཙྩ་ཉྩཱ་ཏི ཨི་དཾ དྭ་ཡཾ. ཏ་ཏྠ ཀུ་ཀྐུ་ཙྩ་ནྟི ‘‘ཨ་ཀ་ཏཾ ཝ་ཏ མེ ཀ་ལྱཱ་ཎཾ, ཀ་ཏཾ པཱ་པ’’ནྟི་ཨཱ་དི་ནཱ ཨུ་པྤ་ཛྫ་མཱ་ནོ ཝི་པྤ་ཊི་སཱ་རོ. ཏེ་ནེ་ཝ་སྶ པ་ད་བྷཱ་ཛ་ནཱི་ཡེ ‘‘ཙེ་ཏ་སོ ཝི་པྤ་ཊི་སཱ་རོ མ་ནོ་ཝི་ལེ་ཁོ’’ཏི ཙ ཝུ་ཏྟཾ. ‘‘ཨ་ཀ་པྤི་ཡེ ཀ་པྤི་ཡ་ས་ཉྙི་ཏཱ’’ཏི་ཨཱ་དི པ་ན ཀུ་ཀྐུ་ཙྩ་མཱུ་ལ་ད་སྶ་ན་ཏྠཾ. ཨེ་ཝཾ་ས་ཉྙི་ཏཱ་ཡ ཧི ཀ་ཏེ ཝཱི་ཏི་ཀྐ་མེ པ་ཙྪཱ ‘‘དུ་ཊྛུ མ་ཡཱ ཀ་ཏ’’ནྟི སུ་དི་ནྣཱ་དཱི་ནཾ ཝི་ཡ ཝི་པྤ་ཊི་སཱ་རོ ཨུ་པྤ་ཛྫ་ཏི. ཡཾ པ་ན ཝི་ན་ཡེ ‘‘ཨ་ཐ ཁོ ཨཱ་ཡ་སྨཱ སཱ་རི་པུ་ཏྟོ…པེ… ཀུ་ཀྐུ་ཙྩཱ་ཡ་ནྟོ ན པ་ཊི་གྒ་ཧེ་སཱི’’ཏི (པཱ་ཙི. ༢༠༤) ཀུ་ཀྐུ་ཙྩཾ ཨཱ་ག་ཏཾ, ཏཾ ནཱི་ཝ་ར་ཎ་ཀུ་ཀྐུ་ཙྩཾ. ན ཧི ཨ་ར་ཧ་ཏོ ནཱི་ཝ་ར་ཎཾ ཨ་ཏྠི, ནཱི་ཝ་ར་ཎ་ཝ་ཏི་རཱུ་པ་ཀཾ པ་ན ‘‘ཀ་པྤ་ཏི, ན ཀ་པྤ་ཏཱི’’ཏི ཝཱི་མཾ་ས་ན་ས་ངྑཱ་ཏཾ ཝི་ན་ཡ་ཀུ་ཀྐུ་ཙྩཾ ནཱ་མེ་ཏ་ནྟི ཝེ་དི་ཏ་བྦཾ. སེ་ས་ནཱི་ཝ་ར་ཎཱ་ནི ཝུ་ཏྟ་ཏྠཱ་ནི ཨེ་ཝ. ཨི་མེ་སུ ཙ ཀུ་ཀྐུ་ཙྩ་ཝི་ཙི་ཀི་ཙྪཱ པ་ཋ་མེ་ན མ་གྒེ་ན པ་ཧཱི་ཡ་ནྟི, བྱཱ་པཱ་དོ ཏ་ཏི་ཡེ་ན, ཐི་ན་མི་དྡྷུ་དྡྷ་ཙྩཱ་ཝི་ཛྫཱ ཙ་ཏུ་ཏྠེ་ན, ཀཱ་མ་ཙྪ་ནྡོ ཙ་ཏཱུ་ཧི་པཱི་ཏི ཝ་ཏྟ་བྦཾ, ‘‘ཏ་ཏི་ཡེ་ནཱ’’ཏི པ་ན ཝུ་ཏྟཾ. ཨི་མེ ཙ ས་བྷཱ་ཝ་ཏོ ཨ་ཊྛ དྷ་མྨཱ ཚ ནཱི་ཝ་ར་ཎཱ ནཱ་མ ཛཱ་ཏཱ, ཨི་མེ པ་ན ཋ་པེ་ཏྭཱ སེ་སཱ ནོ ནཱི་ཝ་ར་ཎཱ ནཱ་མ. ནཱི་ཝ་ར་ཎ་དུ་ཀཾ པ་ཋ་མཾ.
དུ་ཏི་ཡཾ སཱ་ས་ཝ་དུ་ཀ་ས་དི་ས་མེ་ཝ. དྭཱ་ད་ས ཨ་ཀུ་ས་ལ་ཙི་ཏྟཱ་ནི ནཱི་ཝ་ར་ཎ་ས་མྤ་ཡུ་ཏྟཱ ནཱ་མ. སེ་ས་ཙི་ཏྟ་རཱུ་པ་ནི་བྦཱ་ནཱ་ནི ནཱི་ཝ་ར་ཎ་ཝི་པྤ་ཡུ་ཏྟཱ ནཱ་མ. ཙེ་ཏ་སི་ཀེ་སུ ཨ་ཀུ་ས་ལཱ ནཱི་ཝ་ར་ཎ་ས་མྤ་ཡུ་ཏྟཱ་ཝ, ཀུ་ས་ལཱ་བྱཱ་ཀ་ཏཱ ནཱི་ཝ་ར་ཎ་ཝི་པྤ་ཡུ་ཏྟཱ་ཝ, སེ་སཱ དྭི་དྷཱ་པི ཧོ་ནྟི. ཏ་ཏི་ཡཾ.
ཚ ནཱི་ཝ་ར་ཎཱ ནཱི་ཝ་ར་ཎཱ ཙེ་ཝ ནཱི་ཝ་ར་ཎི་ཡཱ ཙ ནཱ་མ. སེ་སཱ ལོ་ཀི་ཡཱ ནཱི་ཝ་ར་ཎི་ཡཱ ཙེ་ཝ ནོ ཙ ནཱི་ཝ་ར་ཎཱ ནཱ་མ. ལོ་ཀུ་ཏྟ་རཱ ན ཝ་ཏྟ་བྦཱ. སེ་སཾ ཨཱ་ས་ཝ་གོ་ཙྪ་ཀེ ཙ་ཏུ་ཏྠ་ས་དི་ས་མེ་ཝ. ཙ་ཏུ་ཏྠཾ.
ཚ ནཱི་ཝ་ར་ཎཱ ནཱི་ཝ་ར་ཎཱ ཙེ་ཝ ནཱི་ཝ་ར་ཎ་ས་མྤ་ཡུ་ཏྟཱ ཙ ནཱ་མ. ཏ་ད་ཉྙེ ནཱི་ཝ་ར་ཎ་ས་མྤ་ཡུ་ཏྟཱ པ་ན ནཱི་ཝ་ར་ཎ་ས་མྤ་ཡུ་ཏྟཱ ཙེ་ཝ ནོ ཙ ནཱི་ཝ་ར་ཎཱ ནཱ་མ. ཏ་ཐཱ ཙེ་ཏ་སི་ཀེ་སུ ནཱི་ཝ་ར་ཎ་ཝི་ར་ཧི་ཏཱ ཨ་ཀུ་ས་ལཱ, ཏི་ཛཱ་ཏི་ཀཱ པ་ན ཏ་ཐཱ ཙ ན ཝ་ཏྟ་བྦཱ ཙ, ཀུ་ས་ལཱ་བྱཱ་ཀ་ཏཱ ན ཝ་ཏྟ་བྦཱ་ཝ. ཨི་དྷ པ་ན ནཱི་ཝ་ར་ཎ་ཝི་པྤ་ཡུ་ཏྟཱ ས་བྦེ ན ཝ་ཏྟ་བྦཱ. པ་ཉྩ་མཾ.
ལོ་ཀུ་ཏྟ་ར་ཝ་ཛྫི་ཏཱ ནཱི་ཝ་ར་ཎ་ཝི་པྤ་ཡུ་ཏྟཱ ནཱི་ཝ་ར་ཎི་ཡཱ ནཱ་མ. ལོ་ཀུ་ཏྟ་རཱ ནཱི་ཝ་ར་ཎ་ཝི་པྤ་ཡུ་ཏྟཱ ཨ་ནཱི་ཝ་ར་ཎི་ཡཱ ནཱ་མ. ཨི་དྷ པ་ན ནཱི་ཝ་ར་ཎ་ས་མྤ་ཡུ་ཏྟཱ ན ཝ་ཏྟ་བྦཱ. ཙེ་ཏ་སི་ཀེ་སུ པ་ན ཀ་རུ་ཎཱ་མུ་དི་ཏཱ ནཱི་ཝ་ར་ཎ་ཝི་པྤ་ཡུ་ཏྟཱ ནཱི་ཝ་ར་ཎི་ཡཱ་ཝ, ཀུ་ས་ལཱ་བྱཱ་ཀ་ཏཱ དྭི་དྷཱ་པི ཧོ་ནྟི, ཏི་ཛཱ་ཏི་ཀཱ ཏ་ཐཱ ཙ ན ཝ་ཏྟ་བྦཱ ཙ, ཨ་ཀུ་ས་ལཱ པ་ན ན ཝ་ཏྟ་བྦཱ་ཝ. ཚ་ཊྛཾ.
ནཱི་ཝ་ར་ཎ་གོ་ཙྪ་ཀཾ ནི་ཊྛི་ཏཾ.
པ་རཱ་མཱ་ས་གོ་ཙྪ་ཀེ དྷ་མྨཱ་ནཾ ཡ་ཐཱ་བྷཱུ་ཏཾ ཨ་ནི་ཙྩཱ་དི་ཨཱ་ཀཱ་རཾ ཨ་ཏི་ཀྐ་མི་ཏྭཱ ‘‘ནི་ཙྩ’’ནྟི་ཨཱ་དི་ཝ་སེ་ན པ་ཝ་ཏྟ་མཱ་ནཱ པ་ར་ཏོ ཨཱ་མ་ས་ནྟཱི་ཏི པ་རཱ་མཱ་སཱ. མི་ཙྪཱ་དི་ཊྛི. བ་ཧུ་ཝ་ཙ་ན་ནི་དྡེ་སེ ཀཱ་ར་ཎཾ ཝུ་ཏྟ་མེ་ཝ. ཏ་ད་ཉྙེ ས་བྦེ དྷ་མྨཱ ནོ པ་རཱ་མཱ་སཱ ནཱ་མ. པ་རཱ་མཱ་ས་དུ་ཀཾ པ་ཋ་མཾ.
པ་རཱ་མཱ་སེ་ཧི ཨཱ་ར་མྨ་ཎ་ཀ་ར་ཎ་ཝ་སེ་ན པ་རཱ་མ་ཊྛ་ཏྟཱ པ་རཱ་མ་ཊྛཱ. སེ་སཾ ཨཱ་ས་ཝ་དུ་ཀ་ས་དི་ས་མེ་ཝ. དུ་ཏི་ཡཾ.
དི་ཊྛི་ས་མྤ་ཡུ་ཏྟ་ཙི་ཏྟེ་སུ དི་ཊྛི་ཝི་ར་ཧི་ཏཱ དྷ་མྨཱ པ་རཱ་མཱ་ས་ས་མྤ་ཡུ་ཏྟཱ ནཱ་མ. སེ་ས་ཙི་ཏྟ་རཱུ་པ་ནི་བྦཱ་ནཱ་ནི པ་རཱ་མཱ་ས་ཝི་པྤ་ཡུ་ཏྟཱ ནཱ་མ. ཨི་དྷ པ་ན དི་ཊྛི ན ཝ་ཏྟ་བྦཱ, སེ་ས་ཙེ་ཏ་སི་ཀེ་སུ པ་ན མཱ་ན་དོ་ས་ཨི་སྶཱ་མ་ཙྪ་རི་ཡ་ཀུ་ཀྐུ་ཙྩ་ཝི་ཙི་ཀི་ཙྪཱ, ཀུ་ས་ལཱ་བྱཱ་ཀ་ཏཱ ཙ པ་རཱ་མཱ་ས་ཝི་པྤ་ཡུ་ཏྟཱ ཨེ་ཝ, སེ་སཱ དྭི་དྷཱ་པི ཧོ་ནྟི. ཏ་ཏི་ཡཾ.
དི་ཊྛི ཨེ་ཝ པ་རཱ་མཱ་སཱ ཙེ་ཝ པ་རཱ་མ་ཊྛཱ ཙ ནཱ་མ. སེ་ས་ལོ་ཀི་ཡཱ པ་རཱ་མ་ཊྛཱ ཙེ་ཝ ནོ ཙ པ་རཱ་མཱ་སཱ ནཱ་མ. ཨི་དྷ པ་ན ལོ་ཀུ་ཏྟ་རཱ ན ཝ་ཏྟ་བྦཱ. སེ་སཾ སུ་ཝི་ཉྙེ་ཡྻ་མེ་ཝ. ཙ་ཏུ་ཏྠཾ.
ཨི་མ་སྨིཾ པ་ན གོ་ཙྪ་ཀེ ‘‘པ་རཱ་མཱ་སཱ ཙེ་ཝ དྷ་མྨཱ པ་རཱ་མཱ་ས་ས་མྤ་ཡུ་ཏྟཱ ཙཱ’’ཏི ཨ་ཡཾ དུ་ཀོ ན ལ་བྦྷ་ཏི. ན ཧི དི་ཊྛི དི་ཊྛི་ཡཱ ས་མྤ་ཡུ་ཛྫ་ཏི. པ་ཙྪི་མ་དུ་ཀེ ལོ་ཀུ་ཏྟ་ར་ཝ་ཛྫི་ཏཱ པ་རཱ་མཱ་ས་ཝི་པྤ་ཡུ་ཏྟཱ པ་རཱ་མ་ཊྛཱ ནཱ་མ. ལོ་ཀུ་ཏྟ་རཱ པ་རཱ་མཱ་ས་ཝི་པྤ་ཡུ་ཏྟཱ ཨ་པ་རཱ་མ་ཊྛཱ ནཱ་མ. ཨི་དྷ པ་ན པ་རཱ་མཱ་སོ, ཏཾ་ས་མྤ་ཡུ་ཏྟཱ ཙ ན ཝ་ཏྟ་བྦཱ. སེ་སཾ ཝུ་ཏྟ་ན་ཡ་མེ་ཝ.
པ་རཱ་མཱ་ས་གོ་ཙྪ་ཀཾ ནི་ཊྛི་ཏཾ.
མ་ཧ་ནྟ་ར་དུ་ཀེ་སུ ཨཱ་ར་མྨ་ཎཾ ཨ་གྒ་ཧེ་ཏྭཱ ཨ་པྤ་ཝ་ཏྟི་ཏོ ས་ཧ ཨཱ་ར་མྨ་ཎེ་ནཱ་ཏི སཱ་ར་མྨ་ཎཱ, ཙི་ཏྟ་ཙེ་ཏ་སི་ཀཱ. ན་ཏྠི ཨཱ་ར་མྨ་ཎ་མེ་ཏེ་ས་ནྟི ཨ་ནཱ་ར་མྨ་ཎཱ, རཱུ་པ་ནི་བྦཱ་ནཱ་ནི. སཱ་ར་མྨ་ཎ་དུ་ཀཾ.
ཙི་ནྟ་ན་ཊྛེ་ན ཙི་ཏྟཾ, ཙི་ཏྟ་ཏཱ་ཡ ཝཱ ཙི་ཏྟཾ. ཏཾ ཧི ཝ་ཏྠུ་དྭཱ་རཱ་ར་མྨ་ཎ་ཀི་ཙྩཱ་དི་བྷེ་ད་ཏོ, ཨ་ཏཱི་ཏཱ་དི་བྷེ་ད་ཏོ ཙ ཨ་ཏྟ་ནོ ཝི་ཙི་ཏྟ་ཏཱ་ཡ ཙི་ཏྟ་ནྟི ཝུ་ཙྩ་ཏི ཙི་ཏྟ་ཀ་ར་ཎ་ཏཱ་ཡ ཝཱ. ལོ་ཀ་སྨིཾ ཧི ཙི་ཏྟ་ཀ་མྨ་ཏོ ཨུ་ཏྟ་རི་ཏ་རཾ ཙི་ཏྟཾ ནཱ་མ ན་ཏྠི, ཏ་སྨི་མྤི ཙ་ར་ཎཾ ནཱ་མ ཙི་ཏྟཾ ཨ་ཏི་ཙི་ཏྟཾ ཧོ་ཏི. ཡཾ ཝཱ པ་ན་ཉྙ་མྤི ལོ་ཀེ སི་པྤ་ཛཱ་ཏཾ, ས་བྦཾ ཏཾ ཙི་ཏྟེ་ནེ་ཝ ཀ་རཱི་ཡ་ཏི. ཨེ་ཝཾ ཏ་སྶ ཏ་སྶ ཙི་ཏྟ་སྶ ནི་པྥཱ་ད་ཀཾ ཙི་ཏྟ་མྤི ཏ་ཐེ་ཝ ཙི་ཏྟཾ ཧོ་ཏི. ཡ་ཐཱ ཙི་ནྟི་ཏ་སྶ ཝཱ ཨ་ན་ཝ་སེ་ས་སྶ ཨ་ནི་པྥ་ཛྫ་ན་ཏོ ཏ་ཏོ་པི ཙི་ཏྟ་མེ་ཝ ཙི་ཏྟ་ཏ་རཾ, ཏ་ཐཱ ཡ་དེ་ཏཾ དེ་ཝ་མ་ནུ་སྶ་ནི་ར་ཡ་ཏི་ར་ཙྪཱ་ན་བྷེ་དཱ་སུ ག་ཏཱི་སུ ཀུ་ས་ལཱ་ཀུ་ས་ལ་ཀ་མྨ་ནཱ་ན་ཏྟཾ, ཏེ་ན ཏཱ་སུ ག་ཏཱི་སུ ཨ་པ་ད་དྭི་པ་དཱ་དི་ཨུ་ཙྩ་ཏྟ་ནཱི་ཙ་ཏྟཱ་དི་ནཱ་ན་ཏྟཾ, ཏ་སྨིཾ ཏ་སྨིཾ ཨ་ཏྟ་བྷཱ་ཝེ དཱི་གྷ་ར་སྶ་ཐཱུ་ལཱ་ཐཱུ་ལ་སུ་ཝ་ཎྞ་དུ་བྦ་ཎྞཱ་དི་ལཱ་བྷཱ་ལཱ་བྷཱ་དི ཙཱ་ཏི ཨེ་ཝ་མཱ་དི ཨ་ཛ྄ཛྷ་ཏྟཾ ཙི་ཏྟཾ, བ་ཧི་དྡྷཱ ཙ པ་ཐ་ཝཱི་པ་བྦ་ཏ་ཏི་ཎ་རུ་ཀྑ་ལ་ཏཱ་དི་དེ་ཝ་བྲ་ཧྨ་ཝི་མཱ་ན་ཀ་པྤ་རུ་ཀྑཱ་དི་བྷཱུ་ཏཾ ཀ་མྨ་པ་ཙྩ་ཡཾ ཙི་ཏྟཾ, ཏ་མྤི ཙི་ཏྟེ་ནེ་ཝ ཀ་ཏཾ, ཏ་ཏོ ཙི་ཏྟ་མེ་ཝ ཙི་ཏྟ་ཏ་རཾ ཙི་ནྟི་ཏ་ནི་ཡཱ་མེ་ན ས་བྦཱ་ཀཱ་ར་སྶ ཨ་ས་མྦྷ་ཝ་ཏོ. ཨེ་ཝཾ ཙི་ནྟ་ན་ཊྛེ་ན, ཙི་ཏྟ་ཝི་ཙི་ཏྟ་ཊྛེ་ན, ཙི་ཏྟ་ཀ་ར་ཎ་ཊྛེ་ན ཙ ‘‘ཙི་ཏྟ’’ནྟི ཝི་ཉྙཱ་ཎཾ ཝེ་དི་ཏ་བྦཾ, ཏ་དེ་ཝ ཝི་ཉྙཱ་ཎཾ ཙི་ཏྟཾ ནཱ་མ. ཙེ་ཏ་སི་ཀ་རཱུ་པ་ནི་བྦཱ་ནཱ་ནི ནོ ཙི་ཏྟཱ ནཱ་མ. ཙི་ཏྟ་དུ་ཀཾ.
ཨ་ཝི་པྤ་ཡོ་ག་ཝ་སེ་ན ཙེ་ཏ་སི ནི་ཡུ་ཏྟཱ ཙེ་ཏ་སི་ཀཱ, ཕ་སྶཱ་ད་ཡོ དྭི་པ་ཉྙཱ་ས དྷ་མྨཱ. ཙི་ཏྟ་རཱུ་པ་ནི་བྦཱ་ནཱ་ནི ཨ་ཙེ་ཏ་སི་ཀཱ ནཱ་མ. ཙེ་ཏ་སི་ཀ་དུ་ཀཾ.
ཙེ་ཏ་སི་ཀཱ ཨེ་ཝ ཙི་ཏྟ་ས་མྤ་ཡུ་ཏྟཱ ནཱ་མ. རཱུ་པ་ནི་བྦཱ་ནཱ་ནི ཙི་ཏྟ་ཝི་པྤ་ཡུ་ཏྟཱ ནཱ་མ, ཨི་དྷ པ་ན ཙི་ཏྟཾ ན ཝ་ཏྟ་བྦཾ. ཙི་ཏྟ་ས་མྤ་ཡུ་ཏྟ་དུ་ཀཾ.
ནི་ར་ནྟ་ར་བྷཱ་ཝཱུ་པ་ག་མ་ན་ཏཱ་ཡ ཨུ་པྤཱ་ད་ཏོ ཡཱ་ཝ བྷ་ངྒཱ་ཙི་ཏྟེ་ན སཾ་ས་ཊྛཱ་ཏི ཙི་ཏྟ་སཾ་ས་ཊྛཱ. ཨེ་ཀ་ཏོ ཝ་ཏྟ་མཱ་ནཱ་པི ནི་ར་ནྟ་ར་བྷཱ་ཝཾ ཨ་ནུ་པ་ག་མ་ན་ཏཱ་ཡ ཙི་ཏྟེ་ན ཝི་སཾ་ས་ཊྛཱ་ཏི ཙི་ཏྟ་ཝི་སཾ་ས་ཊྛཱ. སེ་སཾ ཨ་ན་ནྟ་ར་དུ་ཀ་ས་དི་ས་མེ་ཝ. ཙི་ཏྟ་སཾ་ས་ཊྛ་དུ་ཀཾ.
ས་མུ་ཊྛ་ཧ་ནྟི ཨེ་ཏེ་ནཱ་ཏི ས་མུ་ཊྛཱ་ནཾ, ཙི་ཏྟཾ ས་མུ་ཊྛཱ་ནཾ ཨེ་ཏེ་ས་ནྟི ཙི་ཏྟ་ས་མུ་ཊྛཱ་ནཱ, ཙེ་ཏ་སི་ཀཱ་ནི ཙེ་ཝ ཙི་ཏྟ་ཛ་རཱུ་པ་ཀ་ལཱ་པཱ ཙ. ཙི་ཏྟཾ, པ་ན ཨ་ཙི་ཏྟ་ཛ་རཱུ་པ་ཀ་ལཱ་པཱ, ནི་བྦཱ་ན་ཉྩ ནོ ཙི་ཏྟ་ས་མུ་ཊྛཱ་ནཱ ནཱ་མ. ཙི་ཏྟ་ས་མུ་ཊྛཱ་ན་དུ་ཀཾ.
ས་ཧ བྷ་ཝ་ནྟཱི་ཏི ས་ཧ་བྷུ་ནོ, ཙི་ཏྟེ་ན ས་ཧ་བྷུ་ནོ ཙི་ཏྟ་ས་ཧ་བྷུ་ནོ, ཙེ་ཏ་སི་ཀཱ་ནི ཙེ་ཝ ཀཱ་ཡ་ཝ་ཙཱི་ཝི་ཉྙ་ཏྟི་ཡོ ཙ. ཙི་ཏྟཾ, པ་ན ཝི་ཉྙ་ཏྟི་ཝ་ཛྫི་ཏ་རཱུ་པ་ནི་བྦཱ་ནཱ་ནི ཙ ནོ ཙི་ཏྟ་ས་ཧ་བྷུ་ནོ ནཱ་མ. ཙི་ཏྟ་ས་ཧ་བྷུ་དུ་ཀཾ.
ཨ་ནུ་པ་རི་ཝ་ཏྟ་ནྟཱི་ཏི ཨ་ནུ་པ་རི་ཝ་ཏྟི་ནོ, ཀིཾ ཨ་ནུ་པ་རི་ཝ་ཏྟ་ནྟི? ཙི་ཏྟཾ, ཙི་ཏྟ་སྶ ཨ་ནུ་པ་རི་ཝ་ཏྟི་ནོ ཙི་ཏྟཱ་ནུ་པ་རི་ཝ་ཏྟི་ནོ. སེ་སཾ ཨ་ན་ནྟ་ར་དུ་ཀ་ས་དི་ས་མེ་ཝ. ཙི་ཏྟཱ་ནུ་པ་རི་ཝ་ཏྟི་དུ་ཀཾ.
ཨི་ཏོ པ་རེ པ་ན ཏ་ཡོ དུ་ཀཱ ཙེ་ཏ་སི་ཀ་དུ་ཀ་ས་དི་སཱ་ཝ, ཀེ་ཝ་ལཾ པ་ད་ཏྠ་མ་ཏྟ་མེ་ཝ ཝི་སེ་སོ. ཏ་ཏྠ ཙི་ཏྟ་སཾ་ས་ཊྛཱ ཙ ཏེ ཙི་ཏྟ་ས་མུ་ཊྛཱ་ནཱ ཨེ་ཝ ཙཱ་ཏི ཙི་ཏྟ་སཾ་ས་ཊྛ་ས་མུ་ཊྛཱ་ནཱ. ཙི་ཏྟ་སཾ་ས་ཊྛཱ ཙ ཏེ ཙི་ཏྟ་ས་མུ་ཊྛཱ་ནཱ ཙ ཙི་ཏྟ་ས་ཧ་བྷུ་ནོ ཨེ་ཝ ཙཱ་ཏི ཙི་ཏྟ་སཾ་ས་ཊྛ་ས་མུ་ཊྛཱ་ན་ས་ཧ་བྷུ་ནོ, ཙི་ཏྟ་སཾ་ས་ཊྛཱ ཙ ཏེ ཙི་ཏྟ་ས་མུ་ཊྛཱ་ནཱ ཙ ཙི་ཏྟཱ་ནུ་པ་རི་ཝ་ཏྟི་ནོ ཨེ་ཝ ཙཱ་ཏི ཙི་ཏྟ་སཾ་ས་ཊྛ་ས་མུ་ཊྛཱ་ནཱ་ནུ་པ་རི་ཝ་ཏྟི་ནོ. སེ་སཾ སུ་ཝི་ཉྙེ་ཡྻ་མེ་ཝ.
ཏ་ད་ན་ནྟ་རེ པ་ན ཨ་ཛ྄ཛྷ་ཏྟི་ཀ་དུ་ཀེ ཨ་ཛ྄ཛྷ་ཏྟ་ཛ྄ཛྷ་ཏྟཾ ཨ་ཛ྄ཛྷ་ཏྟ་ཏྟི་ཀེ ཝུ་ཏྟ་ཝ་སེ་ན ཨ་ཛ྄ཛྷ་ཏྟཱ་ཝ ཨ་ཛ྄ཛྷ་ཏྟི་ཀཱ. པ་སཱ་ད་རཱུ་པ་ཙི་ཏྟ་ས་ངྑཱ་ཏཱ་ནི ཚ ཨ་ཛ྄ཛྷ་ཏྟི་ཀཱ་ནི ཨཱ་ཡ་ཏ་ནཱ་ནི. ཏ་ཏོ བ་ཧི་བྷཱུ་ཏཱ བཱ་ཧི་རཱ. སེ་ས་རཱུ་པ་ཙེ་ཏ་སི་ཀ་ནི་བྦཱ་ན་པ་ཉྙ་ཏྟི་ས་ངྑཱ་ཏཱ་ནི ཚ བཱ་ཧི་རཱ་ཡ་ཏ་ནཱ་ནི, ཨི་དྷ པ་ན པ་ཉྙ་ཏྟི་ཡོ་པི ལ་བྦྷ་ནྟི. ཨ་ཛ྄ཛྷ་ཏྟི་ཀ་དུ་ཀཾ.
ཨུ་པཱ་དི་ཡ་ནྟེ་ཝ བྷཱུ་ཏཱ་ནི, ན བྷཱུ་ཏཱ ཝི་ཡ ཨུ་པཱ་དི་ཡ་ནྟཱི་ཏི ཨུ་པཱ་དཱ, ཙ་ཏུ་ཝཱི་ས་ཏི ཨུ་པཱ་དཱ་རཱུ་པཱ་ནི ཨེ་ཝ. ན ཨུ་པཱ་དི་ཡ་ནྟཱི་ཏི ནོ ཨུ་པཱ་དཱ, ཙ་ཏུ་མ་ཧཱ་བྷཱུ་ཏ་ཙི་ཏྟ་ཙེ་ཏ་སི་ཀ་ནི་བྦཱ་ནཱ་ནི. ཨུ་པཱ་དཱ་དུ་ཀཾ.
དྭ་ཏྟིཾ་ས ལོ་ཀི་ཡ་ཝི་པཱ་ཀ་ཙི་ཏྟཱ་ནི, ཀ་མྨ་ཛ་རཱུ་པ་ཉྩ ཨུ་པཱ་དི་ནྣཱ ནཱ་མ. སེ་ས་ལོ་ཀི་ཡ་ལོ་ཀུ་ཏྟ་རཱ་ནི, ནི་བྦཱ་ན་ཉྩ ཨ་ནུ་པཱ་དི་ནྣཱ ནཱ་མ. སེ་སཾ ཨུ་པཱ་དི་ནྣུ་པཱ་དཱ་ནི་ཡ་ཏྟི་ཀེ ཝུ་ཏྟཱ་ནུ་སཱ་རེ་ན ཉཱ་ཏ་བྦཾ. ཨུ་པཱ་དི་ནྣ་དུ་ཀཾ.
མ་ཧ་ནྟ་ར་དུ་ཀཱ ནི་ཊྛི་ཏཱ.
ཨུ་པཱ་དཱ་ན་གོ་ཙྪ་ཀེ་བྷུ་སཾ ཨཱ་དི་ཡ་ནྟཱི་ཏི ཨུ་པཱ་དཱ་ནཱ, ད་ལ༹ྷ་གྒཱ་ཧཾ ག་ཎྷ་ནྟཱི་ཏི ཨ་ཏྠོ. ད་ལ༹ྷ་ཏྠོ ཧི ཨེ་ཏྠ ཨུ་པ-ས་དྡོ ‘‘ཨུ་པཱ་ཡཱ་སོ’’ཏི་ཨཱ་དཱི་སུ ཝི་ཡ. ཏ་ཏོ ཨ་ཉྙེ ནོ ཨུ་པཱ་དཱ་ནཱ. ཏ་ཏྠ ཀཱ་མུ་པཱ་དཱ་ནཾ དི་ཊྛུ་པཱ་དཱ་ནཾ སཱི་ལ་བྦ་ཏུ་པཱ་དཱ་ནཾ ཨ་ཏྟ་ཝཱ་དུ་པཱ་དཱ་ན་ནྟི ཨི་མེ ཨུ་པཱ་དཱ་ནཱ ནཱ་མ. ཏ་ཏྠ ཝ་ཏྠུ་ཀཱ་མེ་སུ ཨུ་པྤ་ནྣོ ཀི་ལེ་ས་ཀཱ་མོ་ཝ ཝུ་ཏྟ་ན་ཡེ་ན ཨུ་པཱ་དཱ་ན་ནྟི ཀཱ་མུ་པཱ་དཱ་ནཾ. ཨེ་ཝཾ སེ་སེ་སུ་པི. ཏ་ཏྠ ཝཱི་ས་ཏི་ཝ་ཏྠུ་ཀཱ ས་ཀྐཱ་ཡ་དི་ཊྛི ཨ་ཏྟ་ཝཱ་དུ་པཱ་དཱ་ནཾ ནཱ་མ. སེ་སཱ་ནི པུ་བྦེ ཝུ་ཏྟཱ་ནེ་ཝ. པ་ཙྪི་མཱ་ནི པ་ནེ་ཏྠ ཏཱི་ཎི ཨུ་པཱ་དཱ་ནཱ་ནི ཏ་ཐཱ་པ་ཝ་ཏྟ་དི་ཊྛི ཨེ་ཝ. ཏཱ་ནི ཙ པ་ཋ་མེ་ན མ་གྒེ་ན པ་ཧཱི་ཡ་ནྟི, ཀཱ་མུ་པཱ་དཱ་ནཾ ཙ་ཏཱུ་ཧི་པི. ཨི་མེ ཙ ས་བྷཱ་ཝ་ཏོ དྭེ དྷ་མྨཱ ཝི་བྷཱ་ག་ཏོ ཙ་ཏུ་རུ་པཱ་དཱ་ནཱ ནཱ་མ ཛཱ་ཏཱ. ཨི་མེ པ་ན ཋ་པེ་ཏྭཱ སེ་སཱ ས་བྦེ དྷ་མྨཱ ནོ ཨུ་པཱ་དཱ་ནཱ ནཱ་མ. ཨུ་པཱ་དཱ་ན་དུ་ཀཾ པ་ཋ་མཾ.
ཨུ་པཱ་དཱ་ནི་ཡ་དུ་ཀོ སཾ་ཡོ་ཛ་ནི་ཡ་དུ་ཀ་ས་དི་སོ་ཝ. དུ་ཏི་ཡཾ.
ཨ་ཊྛ་ལོ་བྷ་ས་ཧ་ག་ཏ་ཙི་ཏྟཱ་ནི, ཏཾ་ས་མྤ་ཡུ་ཏྟེ་སུ དི་ཊྛི་ཝི་པྤ་ཡུ་ཏྟ་ལོ་བྷཾ ཋ་པེ་ཏྭཱ སེ་སཱ ཙ ཨུ་པཱ་དཱ་ན་ས་མྤ་ཡུ་ཏྟཱ ནཱ་མ. དི་ཊྛི་ཝི་པྤ་ཡུ་ཏྟ་ལོ་བྷ་དོ་ས་མོ་ཧ་མཱུ་ལཱ་ནི, ཀུ་ས་ལཱ་བྱཱ་ཀ་ཏཱ་ནི ཙ ཙི་ཏྟཱ་ནི, རཱུ་པ་ནི་བྦཱ་ནཱ་ནི ཙ ཨུ་པཱ་དཱ་ན་ཝི་པྤ་ཡུ་ཏྟཱ ནཱ་མ. ཙེ་ཏ་སི་ཀེ་སུ པ་ན དི་ཊྛི་མཱ་ནཱ ཨུ་པཱ་དཱ་ན་ས་མྤ་ཡུ་ཏྟཱ་ཝ, དོ་ས་ཨི་སྶཱ་མ་ཙྪ་རི་ཡ་ཀུ་ཀྐུ་ཙྩ་ཝི་ཙི་ཀི་ཙྪཱ, ཀུ་ས་ལཱ་བྱཱ་ཀ་ཏཱ ཙ ཨུ་པཱ་དཱ་ན་ཝི་པྤ་ཡུ་ཏྟཱ ཨེ་ཝ. སེ་སཱ དུ་ཝི་དྷཱ་པི ཧོ་ནྟི. ཏ་ཏི་ཡཾ.
ཙ་ཏྟཱ་རི ཨུ་པཱ་དཱ་ནཱ་ནི ཨུ་པཱ་དཱ་ནཱ ཙེ་ཝ ཨུ་པཱ་དཱ་ནི་ཡཱ ཙ ནཱ་མ. ཏ་ད་ཝ་སེ་སཱ ལོ་ཀི་ཡཱ ཨུ་པཱ་དཱ་ནི་ཡཱ ཙེ་ཝ ནོ་ཙ ཨུ་པཱ་དཱ་ནཱ ནཱ་མ. ཨི་དྷ པ་ན ལོ་ཀུ་ཏྟ་རཱ ན ཝ་ཏྟ་བྦཱ. སེ་སཾ ཝུ་ཏྟ་ན་ཡ་མེ་ཝ. ཙ་ཏུ་ཏྠཾ.
པ་ཉྩ་མ་ཚ་ཊྛ་དུ་ཀཱ པཱ་ཋ་ཏོ ག་ནྠ་གོ་ཙྪ་ཀེ པ་ཉྩ་མ་ཚ་ཊྛ་དུ་ཀ་ས་དི་སཱ་ཝ, ཀེ་ཝ་ལཾ པ་ཉྩ་མ་དུ་ཀེ ‘‘ཙེ་ཏ་སི་ཀེ་སུ མཱ་ནོ ཨུ་པཱ་དཱ་ན་ས་མྤ་ཡུ་ཏྟོ ཙེ་ཝ ནོ ཙ ཨུ་པཱ་དཱ་ནོ ཨེ་ཝ, མོ་ཧཱ་ཧི་རི་ཀཱ་ནོ་ཏྟ་པྤ་ཨུ་དྡྷ་ཙྩ་ཐི་ན་མི་དྡྷཱ་ནི ཏི་ཛཱ་ཏི་ཀཱ་ནི ཏ་ཐཱ ཙ ན ཝ་ཏྟ་བྦཱ ཙཱ’’ཏི ཨི་ད་ཉྩ, ཚ་ཊྛ་དུ་ཀེ ‘‘ཙེ་ཏ་སི་ཀེ་སུ དོ་ས་ཨི་སྶཱ་མ་ཙྪ་རི་ཡ་ཀུ་ཀྐུ་ཙྩ་ཝི་ཙི་ཀི་ཙྪཱ ཨ་པྤ་མ་ཉྙཱ ཨུ་པཱ་དཱ་ན་ཝི་པྤ་ཡུ་ཏྟཱ ཨུ་པཱ་དཱ་ནི་ཡཱ ཨེ་ཝ, མོ་ཧཱ་ཧི་རི་ཀཱ་ནོ་ཏྟ་པྤ་ཨུ་དྡྷ་ཙྩ་ལོ་བྷ་ཐི་ན་མི་དྡྷཱ་ནི ཏ་ཐཱ ཙ ན ཝ་ཏྟ་བྦཱ་ནི ཙཱ’’ཏི ཨེ་ཏྟ་ཀ་མེ་ཝ པཱ་ཋ་ཏོ ཝི་སེ་སོ, ཨ་ཏྠ་ཏོ པ་ན ནཱ་མ་མ་ཏྟ་ཀོ་ཝ ཝི་སེ་སོ. སེ་སོ སུ་ཝི་ཉྙེ་ཡྻོ་ཝ. པ་ཉྩ་མ་ཚ་ཊྛཱ་ནི.
ཨུ་པཱ་དཱ་ན་གོ་ཙྪ་ཀཾ ནི་ཊྛི་ཏཾ.
ཀི་ལེ་ས་གོ་ཙྪ་ཀེ སཾ་ཀི་ལི་ཊྛ་ཏྟི་ཀེ ཝུ་ཏྟ་ན་ཡེ་ན པ་ད་ཏྠོ ཝེ་དི་ཏ་བྦོ. ལོ་བྷོ དོ་སོ མོ་ཧོ མཱ་ནོ དི་ཊྛི ཝི་ཙི་ཀི་ཙྪཱ ཐི་ནཾ ཨུ་དྡྷ་ཙྩཾ ཨ་ཧི་རི་ཀཾ ཨ་ནོ་ཏྟ་པྤ་ནྟི ཨི་མེ ད་ས དྷ་མྨཱ ཀི་ལེ་སཱ ནཱ་མ. ཨི་མེ ཙ ཝུ་ཏྟ་ཏྠཱ ཨེ་ཝ, ཨི་དྷ པ་ན ལོ་བྷོ, ཧེ་ཏུ་ག་ནྠ་ནཱི་ཝ་ར་ཎ་ཨུ་པཱ་དཱ་ན་གོ་ཙྪ་ཀེ་སུ ལོ་བྷོ ཙ ནི་པྤ་དེ་ས་ཏོ ཙ་ཏུ་མ་གྒ་ཝ་ཛ྄ཛྷོ་པི ཨེ་ཀེ་ནེ་ཝ ཀོ་ཊྛཱ་སེ་ན ཋི་ཏོ, སེ་ས་གོ་ཙྪ་ཀེ་སུ སོ ས་བྦོ་པི ལོ་བྷོ ‘‘ཀཱ་མཱ་ས་ཝོ བྷ་ཝཱ་ས་ཝོ’’ཏི་ཨཱ་དི་ནཱ དྭེ དྭེ ཀོ་ཊྛཱ་སཱ ཧུ་ཏྭཱ ཋི་ཏོ, ཨི་མི་ནཱ པ་ན ཨ་ཊྛ་ཀ་ཐཱ་ཝ་ཙ་ནེ་ནཱ་པི བྷ་ཝཱ་ས་ཝཱ་དི་བྱ་ཏི་རི་ཏྟོ ས་བྦོ ཙ་ཏུ་མ་གྒ་ཝ་ཛ྄ཛྷོ་པི རཱ་གོ ཀཱ་མཱ་ས་ཝཱ་དཱི་སུ ས་ངྒ་ཧི་ཏོ. ཀཱ་མ་ཙྪ་ནྡ་ནཱི་ཝ་ར་ཎཾ པ་ན བྷ་ཝ་རཱ་གོ་པི ན པ་ཉྩ་ཀཱ་མ་གུ་ཎི་ཀ་རཱ་ག་མ་ཏྟོ་ཝཱ་ཏི པ་ཉྙཱ་ཡ་ཏི, ‘‘ཨཱ་རུ་པྤེ ཀཱ་མ་ཙྪ་ནྡ་ནཱི་ཝ་ར་ཎཾ པ་ཊི་ཙྩ ཐི་ན་མི་དྡྷ་ནཱི་ཝ་ར་ཎ’’ནྟི་ཨཱ་དི་པཱ་ལི༹་ཏོ (པ་ཊྛཱ. ༣.༨.༨) ཙེ་ཏཾ ད་ཊྛ་བྦཾ པ་ཉྩ་ཀཱ་མ་གུ་ཎི་ཀ་རཱ་ག་སྶ རཱུ་པཱ་རཱུ་པ་བྷཱུ་མཱི་སུ ཨ་ནུ་པྤ་ཛྫ་ན་ཏོ. ཨི་མེ་སུ ཙ ཀི་ལེ་སེ་སུ དི་ཊྛི་ཝི་ཙི་ཀི་ཙྪཱ པ་ཋ་མེ་ན མ་གྒེ་ན པ་ཧཱི་ཡ་ནྟི, དོ་སོ ཏ་ཏི་ཡེ་ན, ལོ་བྷཱ་ད་ཡོ ཙ་ཏཱུ་ཧི་པི. ཨི་མེ པ་ན ད་ས དྷ་མྨེ ཋ་པེ་ཏྭཱ སེ་སཱ ནོ ཀི་ལེ་སཱ ནཱ་མ. ཀི་ལེ་ས་དུ་ཀཾ པ་ཋ་མཾ.
སཾ་ཀི་ལེ་སི་ཀ་དུ་ཀོ སཱ་ས་ཝ་དུ་ཀ་ས་དི་སོ་ཝ. དུ་ཏི་ཡཾ.
སཾ་ཀི་ལི་ཊྛ་དུ་ཀོ, ཀི་ལེ་ས་ས་མྤ་ཡུ་ཏྟ་དུ་ཀོ ཙཱ་ཏི དྭེ་པི ས་མཱ་ན་ཏྠཱ་ཝ. ཏེ ཙ ནཱི་ཝ་ར་ཎ་གོ་ཙྪ་ཀེ ཏ་ཏི་ཡ་དུ་ཀ་ས་དི་སཱ་ཝ. ཏ་ཏི་ཡ་ཙ་ཏུ་ཏྠཱ་ནི.
ད་ས ཀི་ལེ་སཱ ཀི་ལེ་སཱ ཙེ་ཝ སཾ་ཀི་ལེ་སི་ཀཱ ཙ ནཱ་མ. སེ་སཱ ལོ་ཀི་ཡ་དྷ་མྨཱ སཾ་ཀི་ལེ་སི་ཀཱ ཙེ་ཝ ནོ ཙ ཀི་ལེ་སཱ ནཱ་མ. ཨི་དྷ པ་ན ལོ་ཀུ་ཏྟ་རཱ ན ཝ་ཏྟ་བྦཱ. སེ་སཾ ནཱི་ཝ་ར་ཎ་གོ་ཙྪ་ཀེ ཙ་ཏུ་ཏྠ་དུ་ཀ་ས་དི་ས་མེ་ཝ. པ་ཉྩ་མཾ.
ཚ་ཊྛ་ས་ཏྟ་མ་དུ་ཀཱ་ནི་པི ཨ་ཉྙ་མ་ཉྙཾ ས་མཱ་ན་ཏྠཱ་ནེ་ཝ. ཏཱ་ནི ཚ་ཊྛ་ས་ཏྟ་མཱ་ནི ནཱི་ཝ་ར་ཎ་གོ་ཙྪ་ཀེ ཡ་ཐཱ་ཀྐ་མཾ པཱ་ཋ་ཏོ པ་ཉྩ་མ་ཚ་ཊྛ་དུ་ཀ་ས་དི་སཱ་ནི, ཨ་ཏྠ་ཏོ པ་ན ནཱ་མ་མ་ཏྟ་ཀོ་ཝ ཝི་སེ་སོ. སེ་སོ སུ་ཝི་ཉྙེ་ཡྻོ. ཚ་ཊྛ་ས་ཏྟ་མ་ཨ་ཊྛ་མཱ་ནི.
ཀི་ལེ་ས་གོ་ཙྪ་ཀཾ ནི་ཊྛི་ཏཾ.
པི་ཊྛི་དུ་ཀེ་སུ ཨཱ་དི་ཏོ ཙ་ཏྟཱ་རོ དུ་ཀཱ ད་སྶ་ནེ་ན་པ་ཧཱ་ཏ་བྦ་ཏྟི་ཀེ, ད་སྶ་ནེ་ན་པ་ཧཱ་ཏ་བྦ་ཧེ་ཏུ་ཀེ ཙ ཝུ་ཏྟ་ན་ཡེ་ན ཝེ་དི་ཏ་བྦཱ. ཀེ་ཝ་ལཾ པ་ན ཏ་ཏྠ པ་ཋ་མ་ཏྟི་ཀེ ཝུ་ཏྟེ་སུ ད་སྶ་ནེ་ན་པ་ཧཱ་ཏ་བྦེ དྷ་མྨེ ཋ་པེ་ཏྭཱ སེ་སཱ ཨི་དྷ པ་ཋ་མ་དུ་ཀ་སྶ དུ་ཏི་ཡ་པ་དེ ད་སྶ་ནེ་ན་པ་ཧཱ་ཏ་བྦེ་སུ པ་ཝི་ས་ནྟི, བྷཱ་ཝ་ནཱ་ཡ་པ་ཧཱ་ཏ་བྦེ ཋ་པེ་ཏྭཱ སེ་སཱ ཨི་དྷ དུ་ཏི་ཡ་དུ་ཀེ ན་བྷཱ་ཝ་ནཱ་ཡ་པ་ཧཱ་ཏ་བྦེ་སུ པ་ཝི་ས་ནྟི. ཏ་ཏྠ ཙ དུ་ཏི་ཡ་ཏྟི་ཀེ ཝུ་ཏྟེ་སུ ད་སྶ་ནེ་ན་པ་ཧཱ་ཏ་བྦ་ཧེ་ཏུ་ཀེ ཋ་པེ་ཏྭཱ སེ་སཱ ཨི་དྷ ཏ་ཏི་ཡ་དུ་ཀེ ན་ད་སྶ་ནེ་ན་པ་ཧཱ་ཏ་བྦ་ཧེ་ཏུ་ཀེ, བྷཱ་ཝ་ནཱ་ཡ་པ་ཧཱ་ཏ་བྦ་ཧེ་ཏུ་ཀེ ཙ ཋ་པེ་ཏྭཱ སེ་སཱ ཨི་དྷ ཙ་ཏུ་ཏྠ་དུ་ཀེ ན་བྷཱ་ཝ་ནཱ་ཡ་པ་ཧཱ་ཏ་བྦ་ཧེ་ཏུ་ཀེ་སུ པ་ཝི་ས་ནྟི.
པ་ད་ཏྠོ ཙ ད་སྶ་ནེ་ན པ་ཧཱ་ཏ་བྦོ ཧེ་ཏུ ཨེ་ཏེ་སཾ ཨ་ཏྠཱི་ཏི ད་སྶ་ནེ་ན་པ་ཧཱ་ཏ་བྦ་ཧེ་ཏུ་ཀཱ. ཨེ་ཝཾ བྷཱ་ཝ་ནཱ་ཡ་པ་ཧཱ་ཏ་བྦ་ཧེ་ཏུ་ཀཱ་ཏི ཨེ་ཏྠཱ་པི ཨ་ཏྠོ ཝེ་དི་ཏ་བྦོ. ཨེ་ཝཾ ཧི ས་ཏི ཨ་ཧེ་ཏུ་ཀཱ་ནཾ ཨ་གྒ་ཧ་ཎཾ སི་ཡཱ་ཏི ཨེ་ཏྟ་ཀ་མེ་ཝ ཝི་སེ་སོ. ཏི་ཀ་དྭ་ཡ་མེ་ཝ ཧི བྷ་ག་ཝཱ དེ་ས་ནཱ་ཝི་ལཱ་སེ་ན ཙ་ཏྟཱ་རོ དུ་ཀེ ཀ་ཏྭཱ དེ་སེ་སི. སེ་སཾ ཏཱ་དི་ས་མེ་ཝ. ཙ་ཏྟཱ་རོ དུ་ཀཱ ནི་ཊྛི་ཏཱ.
པ་ཉྩ་པ་ཉྙཱ་ས་ས་ཝི་ཏ་ཀྐ་ཙི་ཏྟེ་སུ ཝི་ཏ་ཀྐ་ཝི་ར་ཧི་ཏཱ ཙི་ཏྟ་ཙེ་ཏ་སི་ཀཱ དྷ་མྨཱ ས་ཝི་ཏ་ཀྐཱ ནཱ་མ. ཝི་ཏ་ཀྐོ, པ་ན སེ་ས་ཙི་ཏྟ་རཱུ་པ་ནི་བྦཱ་ནཱ་ནི ཙ ཨ་ཝི་ཏ་ཀྐཱ ནཱ་མ. པ་ཉྩ་མཾ.
ཚ་ས་ཊྛི་ཡཱ ས་ཝི་ཙཱ་ར་ཙི་ཏྟེ་སུ ཝི་ཙཱ་ར་ཝི་ར་ཧི་ཏཱ དྷ་མྨཱ ས་ཝི་ཙཱ་རཱ ནཱ་མ. ཝི་ཙཱ་རོ, པ་ན སེ་ས་ཙི་ཏྟ་རཱུ་པ་ནི་བྦཱ་ནཱ་ནི ཙ ཨ་ཝི་ཙཱ་རཱ ནཱ་མ. སེ་སཾ ཨི་དྷ, ཨ་ན་ནྟ་རེ ཝུ་ཏྟ་དུ་ཀེ ཙ ཝི་ཏ་ཀྐ་ཏྟི་ཀེ ཝུ་ཏྟཱ་ནུ་སཱ་རེ་ན ཉཱ་ཏ་བྦཾ. ཚ་ཊྛཾ.
ཨི་ཏོ པ་རེ་སུ ས་པྤཱི་ཏི་ཀ་དུ་ཀོ, པཱི་ཏི་ས་ཧ་ག་ཏ་དུ་ཀོ ཙ ས་མཱ་ན་ཏྠཱ་ཝ, ཏེ ཙ སུ་ཁ་ས་ཧ་ག་ཏ་ཨུ་པེ་ཀྑཱ་ས་ཧ་ག་ཏ་དུ་ཀཱ ཙཱ་ཏི ཙ་ཏྟཱ་རོ་པི དུ་ཀཱ པཱི་ཏི་ཏྟི་ཀེ ཝུ་ཏྟ་ན་ཡཱ་ཝ. ཀེ་ཝ་ལཾ པ་ནེ་ཏེ་སཾ དུ་ཀཱ་ནཾ པ་ཋ་མཾ པ་དཾ ཏ་ཏྠ པ་ཝི་ས་ཏི, པཱི་ཏི་ཏྟི་ཀེ ཨི་ཏ་རཱི་ཏ་ར་པ་ད་དྭ་ཡ་ས་ངྒ་ཧི་ཏཱ, ཨ་ས་ངྒ་ཧི་ཏཱ ཙ ས་བྦེ ཨ་ཏྠཱ ཧེ་ཊྛཱ ཝུ་ཏྟ་ན་ཡེ་ནེ་ཏྠ དུ་ཀཱ་ནཾ དུ་ཏི་ཡ་པ་དེ་སུ ཨ་ཏྠ་ཏོ ས་ངྒ་ཧི་ཏཱ, ཨི་མེ ཙ ནི་པྤ་དེ་ས་དུ་ཀཱ་ཏི ཨ་ཡ་མེ་ཝ ཝི་སེ་སོ. ས་ཏྟ་མ་ཨ་ཊྛ་མ་ན་ཝ་མ་ད་ས་མཱ.
ཏ་ད་ན་ནྟ་རེ་སུ ཀཱ་མཱ་ཝ་ཙ་རཱཏི ཨེ་ཏྠ ‘‘ཧེ་ཊྛ་ཏོ ཨ་ཝཱི་ཙི་ནི་ར་ཡཾ པ་རི་ཡ་ནྟཾ ཀ་རི་ཏྭཱ ཨུ་པ་རི་ཏོ པ་ར་ནི་མྨི་ཏ་ཝ་ས་ཝ་ཏྟཱི དེ་ཝེ ཨ་ནྟོ ཀ་རི་ཏྭཱ ཡཾ ཏ་སྨིཾ ཨ་ནྟ་རེ ཨེ་ཏྠཱ་ཝ་ཙ་རཱ ཨེ་ཏྠ པ་རི་ཡཱ་པ་ནྣཱ’’ཏི ཨེ་ཝཾ (དྷ. ས. ༡༢༨༧) པཱ་ལི༹་ཡཾ པ་རི་ཙྪི་ནྣཱ་ནཾ ཙ་ཏུ་ནྣཾ ཨ་པཱ་ཡཱ་ནཾ, མ་ནུ་སྶཱ་ནཾ, ཚ་ནྣཾ དེ་ཝ་ལོ་ཀཱ་ན་ཉྩ ཝ་སེ་ན ཨོ་ཀཱ་ས་ཏོ ཨེ་ཀཱ་ད་ས་ཝི་དྷོ ཀཱ་མ་བྷ་ཝོ ‘‘ཀཱ་མོ’’ཏི ཝུ་ཙྩ་ཏི ཨུ་ཏྟ་ར་པ་ད་ལོ་པེ་ན ཡ་ཐཱ ‘‘རཱུ་པཱུ་པ་པ་ཏྟི་ཡཱ’’ཏི་ཨཱ་དཱི་སུ རཱུ་པ་བྷ་ཝོ ‘‘རཱུ་པ’’ནྟི. ཏ་སྨིཾ ཀཱ་མེ ཨ་ཝ་ཙ་ར་ནྟི པ་ཝ་ཏྟ་ནྟཱི་ཏི ཀཱ་མཱ་ཝ་ཙ་རཱ. ཡེ་བྷུ་ཡྻ་ཏོ ཙེ་ཏཾ ཝུ་ཏྟཾ རཱུ་པཱ་རཱུ་པེ་སུ ཙེ་ཏེ་ས་ཉྩ ཨི་དྷ པ་ཝ་ཏྟི་ཏོ ‘‘ཐ་ལ་ཙ་རཱ’’ཏི་ཨཱ་དཱི་སུ ཝི་ཡ. ཀཱ་མ་བྷ་ཝ་ས་ངྑཱ་ཏེ ཝཱ ཀཱ་མེ པ་ཊི་ས་ནྡྷིཾ ཨ་ཝ་ཙཱ་རེ་ནྟཱི་ཏི་པི ཀཱ་མཱ་ཝ་ཙ་རཱ, ཀུ་ས་ལཱ་ཀུ་ས་ལཱ་ནི. ཨུ་དྡྷ་ཙྩ་ས་ཧ་ག་ཏ་ཙི་ཏྟཾ པ་ན ཨ་བྱཱ་ཀ་ཏ་ཙི་ཏྟ་ས་དི་སཾ. ཏ་དཱ་ཡ་ཏྟ་ཏཱ་ཡ, ཨཱ་ར་མྨ་ཎ་ཀ་ར་ཎ་ཝ་སེ་ན ཝཱ ཀི་ལེ་ས་ཀཱ་མོ ཨེ་ཏྠ ཨ་ཝ་ཙ་ར་ཏཱི་ཏི་པི ཀཱ་མཱ་ཝ་ཙ་རཾ. ཀཱ་མ་ཉྩེ་ས རཱུ་པཱ་རཱུ་པཱ་ཝ་ཙ་ར་དྷ་མྨེ་སུ་པི ཨ་ཝ་ཙ་ར་ཏི, རུ་ལ༹ྷི་ཏོ པ་ན ‘‘ཝ་ད་ཏཱི་ཏི ཝ་ཙྪོ’’ཏི་ཨཱ་དཱི་སུ ཝི་ཡ ཨི་མེ ཨེ་ཝ ‘‘ཀཱ་མཱ་ཝ་ཙ་རཱ’’ཏི ཝུ་ཙྩ་ནྟི. ཨ་པི་ཙ ཀཱ་མ་ཏ་ཎྷཱ རཱུ་པ་ཏ་ཎྷཱ ཨ་རཱུ་པ་ཏ་ཎྷཱ་ཏི ཨེ་ཏྠ ཝུ་ཏྟ་ཀཱ་མ་ཏ་ཎྷཱ་ས་ངྑཱ་ཏོ ཀཱ་མོ ཨེ་ཏྠ ཨ་ཝ་ཙ་ར་ཏཱི་ཏི་པི ཀཱ་མཱ་ཝ་ཙ་རཱ. ཨེ་ཝཾ བྲ་ཧྨཱ་ནཾ ཝི་མཱ་ནཱ་བྷ་ར་ཎཱ་དཱི་སུ ཚ་ནྡ་རཱ་ག་སྶཱ་པི ཀཱ་མ་ཏ་ཎྷཱ་བྷཱ་ཝོ སི་དྡྷོ, རཱུ་པ་ཏ་ཎྷཱ་ཝི་ས་ཡཱ་ན་མྤི ཙ བྲ་ཧྨཱ་ནཾ ཀ་མྨ་ཛ་རཱུ་པཱ་དཱི་ནཾ ཀཱ་མ་ཏ་ཎྷཱ་ཡ་པི ཝི་ས་ཡ་ཏཱ་ཡ ཀཱ་མཱ་ཝ་ཙ་ར་ཏཱ སི་དྡྷཱ ཧོ་ཏི. ན རཱུ་པཱ་རཱུ་པཱ་ཝ་ཙ་རཱ་ནཾ ཏ་ད་བྷཱ་ཝ་ཏོ ཏ་ད་ཉྙེ ན ཀཱ་མཱ་ཝ་ཙ་རཱ. ཨི་མི་ནཱ ན་ཡེ་ན རཱུ་པཱ་ཝ་ཙ་རཱ་དི་དུ་ཀཱ་ན་མྤི པ་ད་ཏྠོ ཡ་ཐཱ་ར་ཧཾ ཉཱ་ཏ་བྦོ. ཏ་ཏྠ ཙ་ཏུ་པ་ཉྙཱ་ས ཀཱ་མཱ་ཝ་ཙ་ར་ཙི་ཏྟཱ་ནི, ས་བྦ་ཉྩ རཱུ་པཾ ཀཱ་མཱ་ཝ་ཙ་རཱ ནཱ་མ. སེ་ས་ཙི་ཏྟ་ནི་བྦཱ་ནཱ་ནི ན ཀཱ་མཱ་ཝ་ཙ་རཱ ནཱ་མ. ཙེ་ཏ་སི་ཀེ་སུ ཝ་ཏྟ་བྦཾ པ་རི་ཡཱ་པ་ནྣ་དུ་ཀེ ཨེ་ཝ ཨཱ་ཝི བྷ་ཝི་སྶ་ཏི. ཨེ་ཀཱ་ད་ས་མཾ.
པ་ནྣ་ར་ས རཱུ་པཱ་ཝ་ཙ་ར་ཙི་ཏྟཱ་ནི རཱུ་པཱ་ཝ་ཙ་རཱ ནཱ་མ. སེ་ས་ཙི་ཏྟ་རཱུ་པ་ནི་བྦཱ་ནཱ་ནི ན རཱུ་པཱ་ཝ་ཙ་རཱ ནཱ་མ. དྭཱ་ད་ས་མཾ.
དྭཱ་ད་ས ཨ་རཱུ་པཱ་ཝ་ཙ་ར་ཙི་ཏྟཱ་ནི ཨ་རཱུ་པཱ་ཝ་ཙ་རཱ ནཱ་མ. སེ་ས་ཙི་ཏྟ་རཱུ་པ་ནི་བྦཱ་ནཱ་ནི ན ཨ་རཱུ་པཱ་ཝ་ཙ་རཱ ནཱ་མ. ཏེ་ར་ས་མཾ.
ཏེ་བྷཱུ་མ་ཀ་ཝ་ཊྚེ པ་རི་ཡཱ་པ་ནྣཱ ཨ་ནྟོ་ག་དྷཱ་ཏི པ་རི་ཡཱ་པ་ནྣཱ, ལོ་ཀི་ཡ་དྷ་མྨཱ་ཝ. ཏ་ཏྠ ན པ་རི་ཡཱ་པ་ནྣཱ་ཏི ཨ་པ་རི་ཡཱ་པ་ནྣཱ, ལོ་ཀུ་ཏྟ་རཱ. ཙེ་ཏ་སི་ཀེ་སུ པ་ན ཀཱ་མཱ་ཝ་ཙ་རཱ་དི་དུ་ཀཱ་ནཾ ཙ་ཏུ་ནྣ་མྤི སཱ་དྷཱ་ར་ཎོ ཝི་ནི་ཙྪ་ཡོ ཨེ་ཝཾ ཝེ་དི་ཏ་བྦོ – ཨ་ཀུ་ས་ལ་ཙེ་ཏ་སི་ཀཱ ཀཱ་མཱ་ཝ་ཙ་རཱ་ཝ, ཨ་པྤ་མ་ཉྙཱ ཀཱ་མ་རཱུ་པཱ་ཝ་ཙ་རཱ, ཝི་ར་ཏི་ཡོ པ་ན ཀཱ་མཱ་ཝ་ཙ་ར་པ་རི་ཡཱ་པ་ནྣཱ, ཝི་ཏ་ཀྐ་ཝི་ཙཱ་ར་པཱི་ཏི་ཡོ པ་ན ཀཱ་མ་རཱུ་པཱ་ཝ་ཙ་ར་པ་རི་ཡཱ་པ་ནྣཱ, སེ་སཱ ཙ་ཏུ་བྷཱུ་མ་ཀཱ་ཏི. ཙུ་དྡ་ས་མཾ.
ཝ་ཊྚ་མཱུ་ལཾ ཚི་ནྡ་ནྟཱ ནི་བྦཱ་ནཾ ཨཱ་ར་མྨ་ཎཾ ཀ་ཏྭཱ ཝ་ཊྚ་ཏོ ནཱི་ཡ་ནྟཱི་ཏི ནི་ཡྻཱ་ནི་ཀཱ, ཙ་ཏྟཱ་རི ལོ་ཀུ་ཏྟ་ར་མ་གྒ་ཙི་ཏྟཱ་ནི. ཨི་མི་ནཱ ལ་ཀྑ་ཎེ་ན ན ནི་ཡྻ་ནྟཱི་ཏི ཨ་ནི་ཡྻཱ་ནི་ཀཱ, སེ་ས་ཙི་ཏྟ་རཱུ་པ་ནི་བྦཱ་ནཱ་ནི. སེ་སཾ སུ་ཝི་ཉྙེ་ཡྻ་མེ་ཝ. པ་ཉྩ་ད་ས་མཾ.
ཙུ་ཏི་ཡཱ ཝཱ ཨ་ཏྟ་ནོ ཝཱ པ་ཝ་ཏྟི་ཡཱ ཨ་ན་ནྟ་རཾ ཕ་ལ་དཱ་ནེ ནི་ཡ་ཏ་ཏྟཱ ནི་ཡ་ཏཱ, མི་ཙྪ་ཏྟ་ནི་ཡ་ཏཱ, ས་མྨ་ཏྟ་ནི་ཡ་ཏཱ ཙ. ཏ་ཐཱ ཨ་ནི་ཡ་ཏ་ཏྟཱ ཨ་ནི་ཡ་ཏཱ, སེ་ས་དྷ་མྨཱ. སེ་སཾ ཝུ་ཏྟ་ན་ཡ་མེ་ཝ. སོ་ལ༹་ས་མཾ.
ཨ་ཉྙེ དྷ་མྨེ ཨུ་ཏྟ་ར་ནྟི ཨ་ཏི་ཀྐ་མ་ནྟཱི་ཏི ཨུ་ཏྟ་རཱ, ཨ་ཏྟཱ་ནཾ ཨུ་ཏྟ་རི་ཏུཾ ས་མ་ཏྠེ་ཧི ས་ཧ ཨུ་ཏྟ་རེ་ཧཱི་ཏི ས་ཨུ་ཏྟ་རཱ, ལོ་ཀི་ཡཱ་ཝ. ན་ཏྠི ཨེ་ཏེ་སཾ ཨུ་ཏྟ་རཱ་ཏི ཨ་ནུ་ཏྟ་རཱ, ལོ་ཀུ་ཏྟ་རཱ. ས་ཏྟ་ར་ས་མཾ.
ར་ཎ་ནྟི ཀ་ནྡ་ནྟི ཨེ་ཏེ་ཧཱི་ཏི ར་ཎཱ, ཡེ་ཧི ཨ་བྷི་བྷཱུ་ཏཱ ས་ཏྟཱ ནཱ་ན་པྤ་ཀཱ་ར་ཏོ པ་རི་དེ་ཝ་ནྟི, ཏེ་སཾ ཨ་ཀུ་ས་ལ་མཱུ་ལཱ་ནཾ ཨེ་ཏཾ ཨ་དྷི་ཝ་ཙ་ནཾ, ཏེ་ཧི ས་མྤ་ཡོ་ག་ཝ་སེ་ན, པ་ཧཱ་ནེ་ཀ་ཊྛ་ཏཱ་ཝ་སེ་ན ཙ ས་ཧ ར་ཎེ་ཧཱི་ཏི ས་ར་ཎཱ. ཨེ་ཏེ་ནཱ་ཀཱ་རེ་ན ན་ཏྠི ཨེ་ཏེ་སཾ ར་ཎཱ་ཏི ཨ་ར་ཎཱ.
ཏ་ཏྠ དྭཱ་ད་ས ཨ་ཀུ་ས་ལ་ཙི་ཏྟཱ་ནི ས་ར་ཎཱ ནཱ་མ. ས་ར་ཎ་དྷ་མྨེ་སུ ཙེ་ཏྠ ལོ་བྷ་དོ་ས་མོ་ཧཱ ར་ཎཱ ཙེ་ཝ ས་ར་ཎཱ ཙ, ཏེ་སུ ལོ་བྷ་དོ་སཱ མོ་ཧེ་ནེ་ཝ ས་མྤ་ཡོ་ག་ཏོ ས་ར་ཎཱ, ཏ་ཐཱ ཝི་ཙི་ཀི་ཙྪུ་དྡྷ་ཙྩ་ས་ཧ་ག་ཏ་ཙི་ཏྟཾ, ཏཾ་ས་མྤ་ཡུ་ཏྟཱ ཙ. མོ་ཧོ པ་ན ཏེ་སུ ས་མྤ་ཡོ་ག་ཏོ ས་ར་ཎོ, དི་ཊྛི་ས་མྤ་ཡུ་ཏྟ་རཱ་གེ་ན, པ་ན བྷ་ཝ་རཱ་གེ་ན ཙ ར་ཎ་བྷཱུ་ཏེ་ན པ་ཧཱ་ནེ་ཀ་ཊྛ་ཏཱ་ཝ་སེ་ནེ་ཝ ས་ར་ཎོ. ལོ་བྷ་དོ་ས་མོ་ཧ་མཱུ་ལ་ས་མྤ་ཡུ་ཏྟེ་སུ པ་ན མོ་ཧོ ལོ་བྷེ་ན ཙེ་ཝ དོ་སེ་ན ཙ, སེ་སཱ ལོ་བྷ་མོ་ཧེ་ན ཙེ་ཝ དོ་ས་མོ་ཧེ་ན ཙ ས་མྤ་ཡོ་ག་ཏོ ས་ར་ཎཱ་ཏི ཝེ་དི་ཏ་བྦཱ. ས་བྦཱ་ནི ཀུ་ས་ལཱ་བྱཱ་ཀ་ཏ་ཙི་ཏྟཱ་ནི, རཱུ་པ་ནི་བྦཱ་ནཱ་ནི ཙ ཨ་ར་ཎཱ ནཱ་མ. ཙེ་ཏ་སི་ཀེ་སུ པ་ན ཨ་ཀུ་ས་ལཱ ས་ར་ཎཱ་ཝ, ཀུ་ས་ལཱ་བྱཱ་ཀ་ཏཱ ཨ་ར་ཎཱ་ཝ, ཏི་ཛཱ་ཏི་ཀཱ པ་ན དྭི་དྷཱ་པི ཧོ་ནྟཱི་ཏི. ཨ་ཊྛཱ་ར་ས་མཾ.
པི་ཊྛི་དུ་ཀཱ ནི་ཊྛི་ཏཱ.
ཨ་བྷི་དྷ་མྨ་དུ་ཀ་མཱ་ཏི་ཀ་ཏྠ་ཝ་ཎྞ་ནཱ ནི་ཊྛི་ཏཱ.