༨. དུ་ཏི་ཡ་ཨཱ་ན་ནྡ་སུ་ཏྟཾ

༨༤༠. ཨེ་ཀ་མ་ནྟཾ ནི་སི་ནྣཾ ཁོ ཨཱ་ཡ་སྨ་ནྟཾ ཨཱ་ན་ནྡཾ བྷ་ག་ཝཱ ཨེ་ཏ་ད་ཝོ་ཙ – ‘‘ཀ་ཏ་མཱ ནུ ཁོ, ཨཱ་ན་ནྡ, ཨི་དྡྷི, ཀ་ཏ་མོ ཨི་དྡྷི་པཱ་དོ, ཀ་ཏ་མཱ ཨི་དྡྷི་པཱ་ད་བྷཱ་ཝ་ནཱ, ཀ་ཏ་མཱ ཨི་དྡྷི་པཱ་ད་བྷཱ་ཝ་ནཱ་གཱ་མི་ནཱི པ་ཊི་པ་དཱ’’ཏི? བྷ་ག་ཝཾ་མཱུ་ལ་ཀཱ ནོ, བྷ་ནྟེ, དྷ་མྨཱ བྷ་ག་ཝཾ་ནེ་ཏྟི་ཀཱ…པེ….

‘‘ཨི་དྷཱ་ན་ནྡ, བྷི་ཀྑུ ཨ་ནེ་ཀ་ཝི་ཧི་ཏཾ ཨི་དྡྷི་ཝི་དྷཾ པ་ཙྩ་ནུ་བྷོ་ཏི – ཨེ་ཀོ་པི ཧུ་ཏྭཱ བ་ཧུ་དྷཱ ཧོ་ཏི…པེ… ཡཱ་ཝ བྲ་ཧྨ་ལོ་ཀཱ་པི ཀཱ་ཡེ་ན ཝ་སཾ ཝ་ཏྟེ་ཏི – ཨ་ཡཾ ཝུ་ཙྩ་ཏཱ་ན་ནྡ, ཨི་དྡྷི.

‘‘ཀ་ཏ་མོ ཙཱ་ན་ནྡ, ཨི་དྡྷི་པཱ་དོ? ཡོ, ཨཱ་ན་ནྡ, མ་གྒོ ཡཱ པ་ཊི་པ་དཱ ཨི་དྡྷི་ལཱ་བྷཱ་ཡ ཨི་དྡྷི་པ་ཊི་ལཱ་བྷཱ་ཡ སཾ་ཝ་ཏྟ་ཏི – ཨ་ཡཾ ཝུ་ཙྩ་ཏཱ་ན་ནྡ, ཨི་དྡྷི་པཱ་དོ.

‘‘ཀ་ཏ་མཱ ཙཱ་ན་ནྡ, ཨི་དྡྷི་པཱ་ད་བྷཱ་ཝ་ནཱ? ཨི་དྷཱ་ན་ནྡ, བྷི་ཀྑུ ཚ་ནྡ་ས་མཱ་དྷི་པྤ་དྷཱ་ན་ས་ངྑཱ་ར་ས་མ་ནྣཱ་ག་ཏཾ ཨི་དྡྷི་པཱ་དཾ བྷཱ་ཝེ་ཏི, ཝཱི་རི་ཡ་ས་མཱ་དྷི…པེ… ཙི་ཏྟ་ས་མཱ་དྷི…པེ… ཝཱི་མཾ་སཱ་ས་མཱ་དྷི་པྤ་དྷཱ་ན་ས་ངྑཱ་ར་ས་མ་ནྣཱ་ག་ཏཾ ཨི་དྡྷི་པཱ་དཾ བྷཱ་ཝེ་ཏི – ཨ་ཡཾ ཝུ་ཙྩ་ཏཱ་ན་ནྡ, ཨི་དྡྷི་པཱ་ད་བྷཱ་ཝ་ནཱ.

‘‘ཀ་ཏ་མཱ ཙཱ་ན་ནྡ, ཨི་དྡྷི་པཱ་ད་བྷཱ་ཝ་ནཱ་གཱ་མི་ནཱི པ་ཊི་པ་དཱ? ཨ་ཡ་མེ་ཝ ཨ་རི་ཡོ ཨ་ཊྛ་ངྒི་ཀོ མ་གྒོ, སེ་ཡྻ་ཐི་དཾ – ས་མྨཱ་དི་ཊྛི…པེ… ས་མྨཱ་ས་མཱ་དྷི – ཨ་ཡཾ ཝུ་ཙྩ་ཏཱ་ན་ནྡ, ཨི་དྡྷི་པཱ་ད་བྷཱ་ཝ་ནཱ་གཱ་མི་ནཱི པ་ཊི་པ་དཱ’’ཏི. ཨ་ཊྛ་མཾ.