༣. ཨ་ཡོ་གུ་ལ༹་ཝ་གྒོ

༡. མ་གྒ་སུ་ཏྟཾ

༨༣༣. སཱ་ཝ་ཏྠི་ནི་དཱ་ནཾ. ‘‘པུ་བྦེ་ཝ མེ, བྷི་ཀྑ་ཝེ, ས་མྦོ་དྷཱ ཨ་ན་བྷི་ས་མྦུ་དྡྷ་སྶ བོ་དྷི་ས་ཏྟ་སྶེ་ཝ ས་ཏོ ཨེ་ཏ་ད་ཧོ་སི – ‘ཀོ ནུ ཁོ མ་གྒོ, ཀཱ པ་ཊི་པ་དཱ ཨི་དྡྷི་པཱ་ད་བྷཱ་ཝ་ནཱ་ཡཱ’ཏི? ཏ་སྶ མ་ཡ྄ཧཾ, བྷི་ཀྑ་ཝེ, ཨེ་ཏ་ད་ཧོ་སི – ‘ཨི་དྷ བྷི་ཀྑུ ཚ་ནྡ་ས་མཱ་དྷི་པྤ་དྷཱ་ན་ས་ངྑཱ་ར་ས་མ་ནྣཱ་ག་ཏཾ ཨི་དྡྷི་པཱ་དཾ བྷཱ་ཝེ་ཏི – ཨི་ཏི མེ ཚ་ནྡོ ན ཙ ཨ་ཏི་ལཱི་ནོ བྷ་ཝི་སྶ་ཏི, ན ཙ ཨ་ཏི་པྤ་གྒ་ཧི་ཏོ བྷ་ཝི་སྶ་ཏི, ན ཙ ཨ་ཛ྄ཛྷ་ཏྟཾ སཾ་ཁི་ཏྟོ བྷ་ཝི་སྶ་ཏི, ན ཙ བ་ཧི་དྡྷཱ ཝི་ཀྑི་ཏྟོ བྷ་ཝི་སྶ་ཏི. པ་ཙྪཱ་པུ་རེ་ས་ཉྙཱི ཙ ཝི་ཧ་ར་ཏི – ཡ་ཐཱ པུ་རེ ཏ་ཐཱ པ་ཙྪཱ, ཡ་ཐཱ པ་ཙྪཱ ཏ་ཐཱ པུ་རེ; ཡ་ཐཱ ཨ་དྷོ ཏ་ཐཱ ཨུ་དྡྷཾ, ཡ་ཐཱ ཨུ་དྡྷཾ ཏ་ཐཱ ཨ་དྷོ; ཡ་ཐཱ དི་ཝཱ ཏ་ཐཱ ར་ཏྟིཾ, ཡ་ཐཱ ར་ཏྟིཾ ཏ་ཐཱ དི་ཝཱ. ཨི་ཏི ཝི་ཝ་ཊེ་ན ཙེ་ཏ་སཱ ཨ་པ་རི་ཡོ་ན་དྡྷེ་ན ས་པྤ་བྷཱ་སཾ ཙི་ཏྟཾ བྷཱ་ཝེ་ཏི. ཝཱི་རི་ཡ་ས་མཱ་དྷི…པེ… ཙི་ཏྟ་ས་མཱ་དྷི…པེ… ཝཱི་མཾ་སཱ་ས་མཱ་དྷི་པྤ་དྷཱ་ན་ས་ངྑཱ་ར་ས་མ་ནྣཱ་ག་ཏཾ ཨི་དྡྷི་པཱ་དཾ བྷཱ་ཝེ་ཏི – ཨི་ཏི མེ ཝཱི་མཾ་སཱ ན ཙ ཨ་ཏི་ལཱི་ནཱ བྷ་ཝི་སྶ་ཏི, ན ཙ ཨ་ཏི་པྤ་གྒ་ཧི་ཏཱ བྷ་ཝི་སྶ་ཏི, ན ཙ ཨ་ཛ྄ཛྷ་ཏྟཾ སཾ་ཁི་ཏྟཱ བྷ་ཝི་སྶ་ཏི, ན ཙ བ་ཧི་དྡྷཱ ཝི་ཀྑི་ཏྟཱ བྷ་ཝི་སྶ་ཏི. པ་ཙྪཱ་པུ་རེ་ས་ཉྙཱི ཙ ཝི་ཧ་ར་ཏི – ཡ་ཐཱ པུ་རེ ཏ་ཐཱ པ་ཙྪཱ, ཡ་ཐཱ པ་ཙྪཱ ཏ་ཐཱ པུ་རེ; ཡ་ཐཱ ཨ་དྷོ ཏ་ཐཱ ཨུ་དྡྷཾ, ཡ་ཐཱ ཨུ་དྡྷཾ ཏ་ཐཱ ཨ་དྷོ; ཡ་ཐཱ དི་ཝཱ ཏ་ཐཱ ར་ཏྟིཾ ཡ་ཐཱ ར་ཏྟིཾ ཏ་ཐཱ དི་ཝཱ’ – ཨི་ཏི ཝི་ཝ་ཊེ་ན ཙེ་ཏ་སཱ ཨ་པ་རི་ཡོ་ན་དྡྷེ་ན ས་པྤ་བྷཱ་སཾ ཙི་ཏྟཾ བྷཱ་ཝེ་ཏི.

‘‘ཨེ་ཝཾ བྷཱ་ཝི་ཏེ་སུ ཁོ, བྷི་ཀྑ་ཝེ, བྷི་ཀྑུ ཙ་ཏཱུ་སུ ཨི་དྡྷི་པཱ་དེ་སུ ཨེ་ཝཾ བ་ཧུ་ལཱི་ཀ་ཏེ་སུ ཨ་ནེ་ཀ་ཝི་ཧི་ཏཾ ཨི་དྡྷི་ཝི་དྷཾ པ་ཙྩ་ནུ་བྷོ་ཏི – ཨེ་ཀོ་པི ཧུ་ཏྭཱ བ་ཧུ་དྷཱ ཧོ་ཏི, བ་ཧུ་དྷཱ་པི ཧུ་ཏྭཱ ཨེ་ཀོ ཧོ་ཏི…པེ… ཡཱ་ཝ བྲ་ཧྨ་ལོ་ཀཱ་པི ཀཱ་ཡེ་ན ཝ་སཾ ཝ་ཏྟེ་ཏི. ཨེ་ཝཾ བྷཱ་ཝི་ཏེ་སུ ཁོ, བྷི་ཀྑ་ཝེ, བྷི་ཀྑུ ཙ་ཏཱུ་སུ ཨི་དྡྷི་པཱ་དེ་སུ ཨེ་ཝཾ བ་ཧུ་ལཱི་ཀ་ཏེ་སུ, ཨཱ་ས་ཝཱ་ནཾ ཁ་ཡཱ ཨ་ནཱ་ས་ཝཾ ཙེ་ཏོ་ཝི་མུ་ཏྟིཾ པ་ཉྙཱ་ཝི་མུ་ཏྟིཾ དི་ཊྛེ་ཝ དྷ་མྨེ ས་ཡཾ ཨ་བྷི་ཉྙཱ ས་ཙྪི་ཀ་ཏྭཱ ཨུ་པ་ས་མྤ་ཛྫ ཝི་ཧ་ར་ཏཱི’’ཏི. པ་ཋ་མཾ.

(ཚ་པི ཨ་བྷི་ཉྙཱ་ཡོ ཝི་ཏྠཱ་རེ་ཏ་བྦཱ).

༢. ཨ་ཡོ་གུ་ལ༹་སུ་ཏྟཾ

༨༣༤. སཱ་ཝ་ཏྠི་ནི་དཱ་ནཾ. ཨ་ཐ ཁོ ཨཱ་ཡ་སྨཱ ཨཱ་ན་ནྡོ ཡེ་ན བྷ་ག་ཝཱ ཏེ་ནུ་པ་ས་ངྐ་མི; ཨུ་པ་ས་ངྐ་མི་ཏྭཱ བྷ་ག་ཝ་ནྟཾ ཨ་བྷི་ཝཱ་དེ་ཏྭཱ ཨེ་ཀ་མ་ནྟཾ ནི་སཱི་དི. ཨེ་ཀ་མ་ནྟཾ ནི་སི་ནྣོ ཁོ ཨཱ་ཡ་སྨཱ ཨཱ་ན་ནྡོ བྷ་ག་ཝ་ནྟཾ ཨེ་ཏ་ད་ཝོ་ཙ – ‘‘ཨ་བྷི་ཛཱ་ནཱ་ཏི ནུ ཁོ, བྷ་ནྟེ, བྷ་ག་ཝཱ ཨི་དྡྷི་ཡཱ མ་ནོ་མ་ཡེ་ན ཀཱ་ཡེ་ན བྲ་ཧྨ་ལོ་ཀཾ ཨུ་པ་ས་ངྐ་མི་ཏཱ’’ཏི? ‘‘ཨ་བྷི་ཛཱ་ནཱ་མི ཁྭཱ་ཧཾ, ཨཱ་ན་ནྡ, ཨི་དྡྷི་ཡཱ མ་ནོ་མ་ཡེ་ན ཀཱ་ཡེ་ན བྲ་ཧྨ་ལོ་ཀཾ ཨུ་པ་ས་ངྐ་མི་ཏཱ’’ཏི. ‘‘ཨ་བྷི་ཛཱ་ནཱ་ཏི པ་ན, བྷ་ནྟེ, བྷ་ག་ཝཱ ཨི་མི་ནཱ ཙཱ་ཏུ་མ་ཧཱ་བྷཱུ་ཏི་ཀེ་ན ཀཱ་ཡེ་ན ཨི་དྡྷི་ཡཱ བྲ་ཧྨ་ལོ་ཀཾ ཨུ་པ་ས་ངྐ་མི་ཏཱ’’ཏི? ‘‘ཨ་བྷི་ཛཱ་ནཱ་མི ཁྭཱ་ཧཾ, ཨཱ་ན་ནྡ, ཨི་མི་ནཱ ཙཱ་ཏུ་མ་ཧཱ་བྷཱུ་ཏི་ཀེ་ན [ཙཱ་ཏུ་མྨ་ཧཱ་བྷཱུ་ཏི་ཀེ་ན (སཱི. སྱཱ. ཀཾ.)] ཀཱ་ཡེ་ན ཨི་དྡྷི་ཡཱ བྲ་ཧྨ་ལོ་ཀཾ ཨུ་པ་ས་ངྐ་མི་ཏཱ’’ཏི.

‘‘ཡ་ཉྩ ཁོ, ཨོ་མཱ་ཏི, བྷ་ནྟེ, བྷ་ག་ཝཱ ཨི་དྡྷི་ཡཱ མ་ནོ་མ་ཡེ་ན ཀཱ་ཡེ་ན བྲ་ཧྨ་ལོ་ཀཾ ཨུ་པ་ས་ངྐ་མི་ཏུཾ, ཡ་ཉྩ ཁོ ཨ་བྷི་ཛཱ་ནཱ་ཏི, བྷ་ནྟེ, བྷ་ག་ཝཱ ཨི་མི་ནཱ ཙཱ་ཏུ་མ་ཧཱ་བྷཱུ་ཏི་ཀེ་ན ཀཱ་ཡེ་ན ཨི་དྡྷི་ཡཱ བྲ་ཧྨ་ལོ་ཀཾ ཨུ་པ་ས་ངྐ་མི་ཏཱ, ཏ་ཡི་དཾ, བྷ་ནྟེ, བྷ་ག་ཝ་ཏོ ཨ་ཙྪ་རི་ཡ་ཉྩེ་ཝ ཨ་བྦྷུ་ཏ་ཉྩཱ’’ཏི. ‘‘ཨ་ཙྪ་རི་ཡཱ ཙེ་ཝ, ཨཱ་ན་ནྡ, ཏ་ཐཱ་ག་ཏཱ ཨ་ཙྪ་རི་ཡ་དྷ་མྨ་ས་མ་ནྣཱ་ག་ཏཱ ཙ, ཨ་བྦྷུ་ཏཱ ཙེ་ཝ, ཨཱ་ན་ནྡ, ཏ་ཐཱ་ག་ཏཱ ཨ་བྦྷུ་ཏ་དྷ་མྨ་ས་མ་ནྣཱ་ག་ཏཱ ཙ’’.

‘‘ཡ་སྨིཾ, ཨཱ་ན་ནྡ, ས་མ་ཡེ ཏ་ཐཱ་ག་ཏོ ཀཱ་ཡ་མྤི ཙི་ཏྟེ ས་མོ་ད་ཧ་ཏི [ས་མཱ་ད་ཧ་ཏི (སཱི. སྱཱ. པཱི.)] ཙི་ཏྟ་མྤི ཀཱ་ཡེ ས་མོ་ད་ཧ་ཏི, སུ་ཁ་ས་ཉྙ་ཉྩ ལ་ཧུ་ས་ཉྙ་ཉྩ ཀཱ་ཡེ ཨོ་ཀྐ་མི་ཏྭཱ ཝི་ཧ་ར་ཏི; ཏ་སྨིཾ, ཨཱ་ན་ནྡ, ས་མ་ཡེ ཏ་ཐཱ་ག་ཏ་སྶ ཀཱ་ཡོ ལ་ཧུ་ཏ་རོ ཙེ་ཝ ཧོ་ཏི མུ་དུ་ཏ་རོ ཙ ཀ་མྨ་ནི་ཡ་ཏ་རོ ཙ པ་བྷ་སྶ་ར་ཏ་རོ ཙ.

‘‘སེ་ཡྻ་ཐཱ་པི, ཨཱ་ན་ནྡ, ཨ་ཡོ་གུ་ལོ༹ དི་ཝ་སཾ ས་ནྟ་ཏྟོ ལ་ཧུ་ཏ་རོ ཙེ་ཝ ཧོ་ཏི མུ་དུ་ཏ་རོ ཙ ཀ་མྨ་ནི་ཡ་ཏ་རོ ཙ པ་བྷ་སྶ་ར་ཏ་རོ ཙ; ཨེ་ཝ་མེ་ཝ ཁོ, ཨཱ་ན་ནྡ, ཡ་སྨིཾ ས་མ་ཡེ ཏ་ཐཱ་ག་ཏོ ཀཱ་ཡ་མྤི ཙི་ཏྟེ ས་མོ་ད་ཧ་ཏི, ཙི་ཏྟ་མྤི ཀཱ་ཡེ ས་མོ་ད་ཧ་ཏི, སུ་ཁ་ས་ཉྙ་ཉྩ ལ་ཧུ་ས་ཉྙ་ཉྩ ཀཱ་ཡེ ཨོ་ཀྐ་མི་ཏྭཱ ཝི་ཧ་ར་ཏི; ཏ་སྨིཾ, ཨཱ་ན་ནྡ, ས་མ་ཡེ ཏ་ཐཱ་ག་ཏ་སྶ ཀཱ་ཡོ ལ་ཧུ་ཏ་རོ ཙེ་ཝ ཧོ་ཏི མུ་དུ་ཏ་རོ ཙ ཀ་མྨ་ནི་ཡ་ཏ་རོ ཙ པ་བྷ་སྶ་ར་ཏ་རོ ཙ.

‘‘ཡ་སྨིཾ, ཨཱ་ན་ནྡ, ས་མ་ཡེ ཏ་ཐཱ་ག་ཏོ ཀཱ་ཡ་མྤི ཙི་ཏྟེ ས་མོ་ད་ཧ་ཏི, ཙི་ཏྟ་མྤི ཀཱ་ཡེ ས་མོ་ད་ཧ་ཏི, སུ་ཁ་ས་ཉྙ་ཉྩ ལ་ཧུ་ས་ཉྙ་ཉྩ ཀཱ་ཡེ ཨོ་ཀྐ་མི་ཏྭཱ ཝི་ཧ་ར་ཏི; ཏ་སྨིཾ, ཨཱ་ན་ནྡ, ས་མ་ཡེ ཏ་ཐཱ་ག་ཏ་སྶ ཀཱ་ཡོ ཨ་པྤ་ཀ་སི་རེ་ནེ་ཝ པ་ཐ་ཝི་ཡཱ ཝེ་ཧཱ་སཾ ཨ་བྦྷུ་གྒ་ཙྪ་ཏི, སོ ཨ་ནེ་ཀ་ཝི་ཧི་ཏཾ ཨི་དྡྷི་ཝི་དྷཾ པ་ཙྩ་ནུ་བྷོ་ཏི – ཨེ་ཀོ་པི ཧུ་ཏྭཱ བ་ཧུ་དྷཱ ཧོ་ཏི, བ་ཧུ་དྷཱ་པི ཧུ་ཏྭཱ ཨེ་ཀོ ཧོ་ཏི…པེ… ཡཱ་ཝ བྲ་ཧྨ་ལོ་ཀཱ་པི ཀཱ་ཡེ་ན ཝ་སཾ ཝ་ཏྟེ་ཏི.

‘‘སེ་ཡྻ་ཐཱ་པི, ཨཱ་ན་ནྡ, ཏཱུ་ལ་པི་ཙུ ཝཱ ཀ་པྤཱ་ས་པི་ཙུ ཝཱ ལ་ཧུ་ཀོ ཝཱ་ཏཱུ་པཱ་དཱ་ནོ ཨ་པྤ་ཀ་སི་རེ་ནེ་ཝ པ་ཐ་ཝི་ཡཱ ཝེ་ཧཱ་སཾ ཨ་བྦྷུ་གྒ་ཙྪ་ཏི; ཨེ་ཝ་མེ་ཝ ཁོ, ཨཱ་ན་ནྡ, ཡ་སྨིཾ ས་མ་ཡེ ཏ་ཐཱ་ག་ཏོ ཀཱ་ཡ་མྤི ཙི་ཏྟེ ས་མོ་ད་ཧ་ཏི, ཙི་ཏྟ་མྤི ཀཱ་ཡེ ས་མོ་ད་ཧ་ཏི, སུ་ཁ་ས་ཉྙ་ཉྩ ལ་ཧུ་ས་ཉྙ་ཉྩ ཀཱ་ཡེ ཨོ་ཀྐ་མི་ཏྭཱ ཝི་ཧ་ར་ཏི; ཏ་སྨིཾ, ཨཱ་ན་ནྡ, ས་མ་ཡེ ཏ་ཐཱ་ག་ཏ་སྶ ཀཱ་ཡོ ཨ་པྤ་ཀ་སི་རེ་ནེ་ཝ པ་ཐ་ཝི་ཡཱ ཝེ་ཧཱ་སཾ ཨ་བྦྷུ་གྒ་ཙྪ་ཏི, སོ ཨ་ནེ་ཀ་ཝི་ཧི་ཏཾ ཨི་དྡྷི་ཝི་དྷཾ པ་ཙྩ་ནུ་བྷོ་ཏི – ཨེ་ཀོ་པི ཧུ་ཏྭཱ བ་ཧུ་དྷཱ ཧོ་ཏི…པེ… ཡཱ་ཝ བྲ་ཧྨ་ལོ་ཀཱ་པི ཀཱ་ཡེ་ན ཝ་སཾ ཝ་ཏྟེ་ཏཱི’’ཏི. དུ་ཏི་ཡཾ.

༣. བྷི་ཀྑུ་སུ་ཏྟཾ

༨༣༥. ‘‘ཙ་ཏྟཱ་རོ་མེ, བྷི་ཀྑ་ཝེ, ཨི་དྡྷི་པཱ་དཱ. ཀ་ཏ་མེ ཙ་ཏྟཱ་རོ? ཨི་དྷ, བྷི་ཀྑ་ཝེ, བྷི་ཀྑུ ཚ་ནྡ་ས་མཱ་དྷི་པྤ་དྷཱ་ན་ས་ངྑཱ་ར་ས་མ་ནྣཱ་ག་ཏཾ ཨི་དྡྷི་པཱ་དཾ བྷཱ་ཝེ་ཏི, ཝཱི་རི་ཡ་ས་མཱ་དྷི…པེ… ཙི་ཏྟ་ས་མཱ་དྷི …པེ… ཝཱི་མཾ་སཱ་ས་མཱ་དྷི་པྤ་དྷཱ་ན་ས་ངྑཱ་ར་ས་མ་ནྣཱ་ག་ཏཾ ཨི་དྡྷི་པཱ་དཾ བྷཱ་ཝེ་ཏི – ཨི་མེ ཁོ, བྷི་ཀྑ་ཝེ, ཙ་ཏྟཱ་རོ ཨི་དྡྷི་པཱ་དཱ. ཨི་མེ་སཾ ཁོ, བྷི་ཀྑ་ཝེ, ཙ་ཏུ་ནྣཾ ཨི་དྡྷི་པཱ་དཱ་ནཾ བྷཱ་ཝི་ཏ་ཏྟཱ བ་ཧུ་ལཱི་ཀ་ཏ་ཏྟཱ བྷི་ཀྑུ ཨཱ་ས་ཝཱ་ནཾ ཁ་ཡཱ ཨ་ནཱ་ས་ཝཾ ཙེ་ཏོ་ཝི་མུ་ཏྟིཾ པ་ཉྙཱ་ཝི་མུ་ཏྟིཾ དི་ཊྛེ་ཝ དྷ་མྨེ ས་ཡཾ ཨ་བྷི་ཉྙཱ ས་ཙྪི་ཀ་ཏྭཱ ཨུ་པ་ས་མྤ་ཛྫ ཝི་ཧ་ར་ཏཱི’’ཏི. ཏ་ཏི་ཡཾ.

༤. སུ་དྡྷི་ཀ་སུ་ཏྟཾ

༨༣༦. ‘‘ཙ་ཏྟཱ་རོ་མེ, བྷི་ཀྑ་ཝེ, ཨི་དྡྷི་པཱ་དཱ. ཀ་ཏ་མེ ཙ་ཏྟཱ་རོ? ཨི་དྷ, བྷི་ཀྑ་ཝེ, བྷི་ཀྑུ ཚ་ནྡ་ས་མཱ་དྷི་པྤ་དྷཱ་ན་ས་ངྑཱ་ར་ས་མ་ནྣཱ་ག་ཏཾ ཨི་དྡྷི་པཱ་དཾ བྷཱ་ཝེ་ཏི, ཝཱི་རི་ཡ་ས་མཱ་དྷི…པེ… ཙི་ཏྟ་ས་མཱ་དྷི…པེ… ཝཱི་མཾ་སཱ་ས་མཱ་དྷི་པྤ་དྷཱ་ན་ས་ངྑཱ་ར་ས་མ་ནྣཱ་ག་ཏཾ ཨི་དྡྷི་པཱ་དཾ བྷཱ་ཝེ་ཏི – ཨི་མེ ཁོ, བྷི་ཀྑ་ཝེ, ཙ་ཏྟཱ་རོ ཨི་དྡྷི་པཱ་དཱ’’ཏི. ཙ་ཏུ་ཏྠཾ.

༥. པ་ཋ་མ་ཕ་ལ་སུ་ཏྟཾ

༨༣༧. ‘‘ཙ་ཏྟཱ་རོ་མེ, བྷི་ཀྑ་ཝེ, ཨི་དྡྷི་པཱ་དཱ. ཀ་ཏ་མེ ཙ་ཏྟཱ་རོ? ཨི་དྷ, བྷི་ཀྑ་ཝེ, བྷི་ཀྑུ ཚ་ནྡ་ས་མཱ་དྷི་པྤ་དྷཱ་ན་ས་ངྑཱ་ར་ས་མ་ནྣཱ་ག་ཏཾ ཨི་དྡྷི་པཱ་དཾ བྷཱ་ཝེ་ཏི, ཝཱི་རི་ཡ་ས་མཱ་དྷི…པེ… ཙི་ཏྟ་ས་མཱ་དྷི …པེ… ཝཱི་མཾ་སཱ་ས་མཱ་དྷི་པྤ་དྷཱ་ན་ས་ངྑཱ་ར་ས་མ་ནྣཱ་ག་ཏཾ ཨི་དྡྷི་པཱ་དཾ བྷཱ་ཝེ་ཏི – ཨི་མེ ཁོ, བྷི་ཀྑ་ཝེ, ཙ་ཏྟཱ་རོ ཨི་དྡྷི་པཱ་དཱ. ཨི་མེ་སཾ ཁོ, བྷི་ཀྑ་ཝེ, ཙ་ཏུ་ནྣཾ ཨི་དྡྷི་པཱ་དཱ་ནཾ བྷཱ་ཝི་ཏ་ཏྟཱ བ་ཧུ་ལཱི་ཀ་ཏ་ཏྟཱ བྷི་ཀྑུ་ནཱ དྭི་ནྣཾ ཕ་ལཱ་ནཾ ཨ་ཉྙ་ཏ་རཾ ཕ་ལཾ པཱ་ཊི་ཀ་ངྑཾ – དི་ཊྛེ་ཝ དྷ་མྨེ ཨ་ཉྙཱ, ས་ཏི ཝཱ ཨུ་པཱ་དི་སེ་སེ ཨ་ནཱ་གཱ་མི་ཏཱ’’ཏི. པ་ཉྩ་མཾ.

༦. དུ་ཏི་ཡ་ཕ་ལ་སུ་ཏྟཾ

༨༣༨. ‘‘ཙ་ཏྟཱ་རོ་མེ, བྷི་ཀྑ་ཝེ, ཨི་དྡྷི་པཱ་དཱ. ཀ་ཏ་མེ ཙ་ཏྟཱ་རོ? ཨི་དྷ, བྷི་ཀྑ་ཝེ, བྷི་ཀྑུ ཚ་ནྡ་ས་མཱ་དྷི་པྤ་དྷཱ་ན་ས་ངྑཱ་ར་ས་མ་ནྣཱ་ག་ཏཾ ཨི་དྡྷི་པཱ་དཾ བྷཱ་ཝེ་ཏི, ཝཱི་རི་ཡ་ས་མཱ་དྷི…པེ… ཙི་ཏྟ་ས་མཱ་དྷི …པེ… ཝཱི་མཾ་སཱ་ས་མཱ་དྷི་པྤ་དྷཱ་ན་ས་ངྑཱ་ར་ས་མ་ནྣཱ་ག་ཏཾ ཨི་དྡྷི་པཱ་དཾ བྷཱ་ཝེ་ཏི – ཨི་མེ ཁོ, བྷི་ཀྑ་ཝེ, ཙ་ཏྟཱ་རོ ཨི་དྡྷི་པཱ་དཱ. ཨི་མེ་སཾ ཁོ, བྷི་ཀྑ་ཝེ, ཙ་ཏུ་ནྣཾ ཨི་དྡྷི་པཱ་དཱ་ནཾ བྷཱ་ཝི་ཏ་ཏྟཱ བ་ཧུ་ལཱི་ཀ་ཏ་ཏྟཱ ས་ཏྟ ཕ་ལཱ ས་ཏྟཱ་ནི་སཾ་སཱ པཱ་ཊི་ཀ་ངྑཱ.

‘‘ཀ་ཏ་མེ ས་ཏྟ ཕ་ལཱ ས་ཏྟཱ་ནི་སཾ་སཱ? དི་ཊྛེ་ཝ དྷ་མྨེ པ་ཊི་ཀ་ཙྩ [པ་ཊི་ག་ཙྩ (སཱི.), པ་ཊི་ཧ་ཙྩ (པཱི.)] ཨ་ཉྙཾ ཨཱ་རཱ་དྷེ་ཏི ནོ ཙེ དི་ཊྛེ་ཝ དྷ་མྨེ པ་ཊི་ཀ་ཙྩ ཨ་ཉྙཾ ཨཱ་རཱ་དྷེ་ཏི; ཨ་ཐ མ་ར་ཎ་ཀཱ་ལེ ཨ་ཉྙཾ ཨཱ་རཱ་དྷེ་ཏི, ནོ ཙེ དི་ཊྛེ་ཝ དྷ་མྨེ པ་ཊི་ཀ་ཙྩ ཨ་ཉྙཾ ཨཱ་རཱ་དྷེ་ཏི, ནོ ཙེ མ་ར་ཎ་ཀཱ་ལེ ཨ་ཉྙཾ ཨཱ་རཱ་དྷེ་ཏི; ཨ་ཐ པ་ཉྩ་ནྣཾ ཨོ་ར་མྦྷཱ་གི་ཡཱ་ནཾ སཾ་ཡོ་ཛ་ནཱ་ནཾ པ་རི་ཀྑ་ཡཱ ཨ་ནྟ་རཱ་པ་རི་ནི་བྦཱ་ཡཱི ཧོ་ཏི, ཨུ་པ་ཧ་ཙྩ་པ་རི་ནི་བྦཱ་ཡཱི ཧོ་ཏི, ཨ་ས་ངྑཱ་ར་པ་རི་ནི་བྦཱ་ཡཱི ཧོ་ཏི, ས་ས་ངྑཱ་ར་པ་རི་ནི་བྦཱ་ཡཱི ཧོ་ཏི, ཨུ་དྡྷཾ་སོ་ཏོ ཧོ་ཏི ཨ་ཀ་ནི་ཊྛ་གཱ་མཱི. ཨི་མེ་སཾ ཁོ, བྷི་ཀྑ་ཝེ, ཙ་ཏུ་ནྣཾ ཨི་དྡྷི་པཱ་དཱ་ནཾ བྷཱ་ཝི་ཏ་ཏྟཱ བ་ཧུ་ལཱི་ཀ་ཏ་ཏྟཱ ཨི་མེ ས་ཏྟ ཕ་ལཱ ས་ཏྟཱ་ནི་སཾ་སཱ པཱ་ཊི་ཀ་ངྑཱ’’ཏི. ཚ་ཊྛཾ.

༧. པ་ཋ་མ་ཨཱ་ན་ནྡ་སུ་ཏྟཾ

༨༣༩. སཱ་ཝ་ཏྠི་ནི་དཱ་ནཾ. ཨ་ཐ ཁོ ཨཱ་ཡ་སྨཱ ཨཱ་ན་ནྡོ ཡེ་ན བྷ་ག་ཝཱ ཏེ་ནུ་པ་ས་ངྐ་མི; ཨུ་པ་ས་ངྐ་མི་ཏྭཱ བྷ་ག་ཝ་ནྟཾ ཨ་བྷི་ཝཱ་དེ་ཏྭཱ ཨེ་ཀ་མ་ནྟཾ ནི་སཱི་དི. ཨེ་ཀ་མ་ནྟཾ ནི་སི་ནྣོ ཁོ ཨཱ་ཡ་སྨཱ ཨཱ་ན་ནྡོ བྷ་ག་ཝ་ནྟཾ ཨེ་ཏ་ད་ཝོ་ཙ –

‘‘ཀ་ཏ་མཱ ནུ ཁོ, བྷ་ནྟེ, ཨི་དྡྷི, ཀ་ཏ་མོ ཨི་དྡྷི་པཱ་དོ, ཀ་ཏ་མཱ ཨི་དྡྷི་པཱ་ད་བྷཱ་ཝ་ནཱ, ཀ་ཏ་མཱ ཨི་དྡྷི་པཱ་ད་བྷཱ་ཝ་ནཱ་གཱ་མི་ནཱི པ་ཊི་པ་དཱ’’ཏི? ‘‘ཨི་དྷཱ་ན་ནྡ, བྷི་ཀྑུ ཨ་ནེ་ཀ་ཝི་ཧི་ཏཾ ཨི་དྡྷི་ཝི་དྷཾ པ་ཙྩ་ནུ་བྷོ་ཏི – ཨེ་ཀོ་པི ཧུ་ཏྭཱ བ་ཧུ་དྷཱ ཧོ་ཏི, བ་ཧུ་དྷཱ་པི ཧུ་ཏྭཱ ཨེ་ཀོ ཧོ་ཏི…པེ… ཡཱ་ཝ བྲ་ཧྨ་ལོ་ཀཱ་པི ཀཱ་ཡེ་ན ཝ་སཾ ཝ་ཏྟེ་ཏི – ཨ་ཡཾ ཝུ་ཙྩ་ཏཱ་ན་ནྡ, ཨི་དྡྷི’’.

‘‘ཀ་ཏ་མོ ཙཱ་ན་ནྡ, ཨི་དྡྷི་པཱ་དོ? ཡོ, ཨཱ་ན་ནྡ, མ་གྒོ ཡཱ པ་ཊི་པ་དཱ ཨི་དྡྷི་ལཱ་བྷཱ་ཡ ཨི་དྡྷི་པ་ཊི་ལཱ་བྷཱ་ཡ སཾ་ཝ་ཏྟ་ཏི – ཨ་ཡཾ ཝུ་ཙྩ་ཏཱ་ན་ནྡ, ཨི་དྡྷི་པཱ་དོ.

‘‘ཀ་ཏ་མཱ ཙཱ་ན་ནྡ, ཨི་དྡྷི་པཱ་ད་བྷཱ་ཝ་ནཱ? ཨི་དྷཱ་ན་ནྡ, བྷི་ཀྑུ ཚ་ནྡ་ས་མཱ་དྷི་པྤ་དྷཱ་ན་ས་ངྑཱ་ར་ས་མ་ནྣཱ་ག་ཏཾ ཨི་དྡྷི་པཱ་དཾ བྷཱ་ཝེ་ཏི, ཝཱི་རི་ཡ་ས་མཱ་དྷི…པེ… ཙི་ཏྟ་ས་མཱ་དྷི…པེ… ཝཱི་མཾ་སཱ་ས་མཱ་དྷི་པྤ་དྷཱ་ན་ས་ངྑཱ་ར་ས་མ་ནྣཱ་ག་ཏཾ ཨི་དྡྷི་པཱ་དཾ བྷཱ་ཝེ་ཏི – ཨ་ཡཾ ཝུ་ཙྩ་ཏཱ་ན་ནྡ, ཨི་དྡྷི་པཱ་ད་བྷཱ་ཝ་ནཱ.

‘‘ཀ་ཏ་མཱ ཙཱ་ན་ནྡ, ཨི་དྡྷི་པཱ་ད་བྷཱ་ཝ་ནཱ་གཱ་མི་ནཱི པ་ཊི་པ་དཱ? ཨ་ཡ་མེ་ཝ ཨ་རི་ཡོ ཨ་ཊྛ་ངྒི་ཀོ མ་གྒོ, སེ་ཡྻ་ཐི་དཾ – ས་མྨཱ་དི་ཊྛི…པེ… ས་མྨཱ་ས་མཱ་དྷི – ཨ་ཡཾ ཝུ་ཙྩ་ཏཱ་ན་ནྡ, ཨི་དྡྷི་པཱ་ད་བྷཱ་ཝ་ནཱ་གཱ་མི་ནཱི པ་ཊི་པ་དཱ’’ཏི. ས་ཏྟ་མཾ.

༨. དུ་ཏི་ཡ་ཨཱ་ན་ནྡ་སུ་ཏྟཾ

༨༤༠. ཨེ་ཀ་མ་ནྟཾ ནི་སི་ནྣཾ ཁོ ཨཱ་ཡ་སྨ་ནྟཾ ཨཱ་ན་ནྡཾ བྷ་ག་ཝཱ ཨེ་ཏ་ད་ཝོ་ཙ – ‘‘ཀ་ཏ་མཱ ནུ ཁོ, ཨཱ་ན་ནྡ, ཨི་དྡྷི, ཀ་ཏ་མོ ཨི་དྡྷི་པཱ་དོ, ཀ་ཏ་མཱ ཨི་དྡྷི་པཱ་ད་བྷཱ་ཝ་ནཱ, ཀ་ཏ་མཱ ཨི་དྡྷི་པཱ་ད་བྷཱ་ཝ་ནཱ་གཱ་མི་ནཱི པ་ཊི་པ་དཱ’’ཏི? བྷ་ག་ཝཾ་མཱུ་ལ་ཀཱ ནོ, བྷ་ནྟེ, དྷ་མྨཱ བྷ་ག་ཝཾ་ནེ་ཏྟི་ཀཱ…པེ….

‘‘ཨི་དྷཱ་ན་ནྡ, བྷི་ཀྑུ ཨ་ནེ་ཀ་ཝི་ཧི་ཏཾ ཨི་དྡྷི་ཝི་དྷཾ པ་ཙྩ་ནུ་བྷོ་ཏི – ཨེ་ཀོ་པི ཧུ་ཏྭཱ བ་ཧུ་དྷཱ ཧོ་ཏི…པེ… ཡཱ་ཝ བྲ་ཧྨ་ལོ་ཀཱ་པི ཀཱ་ཡེ་ན ཝ་སཾ ཝ་ཏྟེ་ཏི – ཨ་ཡཾ ཝུ་ཙྩ་ཏཱ་ན་ནྡ, ཨི་དྡྷི.

༩. པ་ཋ་མ་བྷི་ཀྑུ་སུ་ཏྟཾ

༨༤༡. ཨ་ཐ ཁོ ས་མྦ་ཧུ་ལཱ བྷི་ཀྑཱུ ཡེ་ན བྷ་ག་ཝཱ ཏེ་ནུ་པ་ས་ངྐ་མིཾ་སུ; ཨུ་པ་ས་ངྐ་མི་ཏྭཱ བྷ་ག་ཝ་ནྟཾ ཨ་བྷི་ཝཱ་དེ་ཏྭཱ ཨེ་ཀ་མ་ནྟཾ ནི་སཱི་དིཾ་སུ. ཨེ་ཀ་མ་ནྟཾ ནི་སི་ནྣཱ ཁོ ཏེ བྷི་ཀྑཱུ བྷ་ག་ཝ་ནྟཾ ཨེ་ཏ་ད་ཝོ་ཙུཾ – ‘‘ཀ་ཏ་མཱ ནུ ཁོ, བྷ་ནྟེ, ཨི་དྡྷི, ཀ་ཏ་མོ ཨི་དྡྷི་པཱ་དོ, ཀ་ཏ་མཱ ཨི་དྡྷི་པཱ་ད་བྷཱ་ཝ་ནཱ, ཀ་ཏ་མཱ ཨི་དྡྷི་པཱ་ད་བྷཱ་ཝ་ནཱ་གཱ་མི་ནཱི པ་ཊི་པ་དཱ’’ཏི?

‘‘ཨི་དྷ, བྷི་ཀྑ་ཝེ, བྷི་ཀྑུ ཨ་ནེ་ཀ་ཝི་ཧི་ཏཾ ཨི་དྡྷི་ཝི་དྷཾ པ་ཙྩ་ནུ་བྷོ་ཏི – ཨེ་ཀོ་པི ཧུ་ཏྭཱ བ་ཧུ་དྷཱ ཧོ་ཏི…པེ… ཡཱ་ཝ བྲ་ཧྨ་ལོ་ཀཱ་པི ཀཱ་ཡེ་ན ཝ་སཾ ཝ་ཏྟེ་ཏི – ཨ་ཡཾ ཝུ་ཙྩ་ཏི, བྷི་ཀྑ་ཝེ, ཨི་དྡྷི.

‘‘ཀ་ཏ་མོ ཙ, བྷི་ཀྑ་ཝེ, ཨི་དྡྷི་པཱ་དོ? ཡོ, བྷི་ཀྑ་ཝེ, མ་གྒོ, ཡཱ པ་ཊི་པ་དཱ ཨི་དྡྷི་ལཱ་བྷཱ་ཡ ཨི་དྡྷི་པ་ཊི་ལཱ་བྷཱ་ཡ སཾ་ཝ་ཏྟ་ཏི – ཨ་ཡཾ ཝུ་ཙྩ་ཏི, བྷི་ཀྑ་ཝེ, ཨི་དྡྷི་པཱ་དོ.

‘‘ཀ་ཏ་མཱ ཙ, བྷི་ཀྑ་ཝེ, ཨི་དྡྷི་པཱ་ད་བྷཱ་ཝ་ནཱ? ཨི་དྷ, བྷི་ཀྑ་ཝེ, བྷི་ཀྑུ ཚ་ནྡ་ས་མཱ་དྷི་པྤ་དྷཱ་ན་ས་ངྑཱ་ར་ས་མ་ནྣཱ་ག་ཏཾ ཨི་དྡྷི་པཱ་དཾ བྷཱ་ཝེ་ཏི, ཝཱི་རི་ཡ་ས་མཱ་དྷི…པེ… ཙི་ཏྟ་ས་མཱ་དྷི…པེ… ཝཱི་མཾ་སཱ་ས་མཱ་དྷི་པྤ་དྷཱ་ན་ས་ངྑཱ་ར་ས་མ་ནྣཱ་ག་ཏཾ ཨི་དྡྷི་པཱ་དཾ བྷཱ་ཝེ་ཏི – ཨ་ཡཾ ཝུ་ཙྩ་ཏི, བྷི་ཀྑ་ཝེ, ཨི་དྡྷི་པཱ་ད་བྷཱ་ཝ་ནཱ.

‘‘ཀ་ཏ་མཱ ཙ, བྷི་ཀྑ་ཝེ, ཨི་དྡྷི་པཱ་ད་བྷཱ་ཝ་ནཱ་གཱ་མི་ནཱི པ་ཊི་པ་དཱ? ཨ་ཡ་མེ་ཝ ཨ་རི་ཡོ ཨ་ཊྛ་ངྒི་ཀོ མ་གྒོ, སེ་ཡྻ་ཐི་དཾ – ས་མྨཱ་དི་ཊྛི…པེ… ས་མྨཱ་ས་མཱ་དྷི – ཨ་ཡཾ ཝུ་ཙྩ་ཏི, བྷི་ཀྑ་ཝེ, ཨི་དྡྷི་པཱ་ད་བྷཱ་ཝ་ནཱ་གཱ་མི་ནཱི པ་ཊི་པ་དཱ’’ཏི. ན་ཝ་མཾ.

༡༠. དུ་ཏི་ཡ་བྷི་ཀྑུ་སུ་ཏྟཾ

༨༤༢. ཨ་ཐ ཁོ ས་མྦ་ཧུ་ལཱ བྷི་ཀྑཱུ ཡེ་ན བྷ་ག་ཝཱ ཏེ་ནུ་པ་ས་ངྐ་མིཾ་སུ…པེ… ཨེ་ཀ་མ་ནྟཾ ནི་སི་ནྣེ ཁོ ཏེ བྷི་ཀྑཱུ བྷ་ག་ཝཱ ཨེ་ཏ་ད་ཝོ་ཙ – ‘‘ཀ་ཏ་མཱ ནུ ཁོ, བྷི་ཀྑ་ཝེ, ཨི་དྡྷི, ཀ་ཏ་མོ ཨི་དྡྷི་པཱ་དོ, ཀ་ཏ་མཱ ཨི་དྡྷི་པཱ་ད་བྷཱ་ཝ་ནཱ, ཀ་ཏ་མཱ ཨི་དྡྷི་པཱ་ད་བྷཱ་ཝ་ནཱ་གཱ་མི་ནཱི པ་ཊི་པ་དཱ’’ཏི? བྷ་ག་ཝཾ་མཱུ་ལ་ཀཱ ནོ, བྷ་ནྟེ, དྷ་མྨཱ བྷ་ག་ཝཾ་ནེ་ཏྟི་ཀཱ…པེ….

‘‘ཀ་ཏ་མཱ ཙ, བྷི་ཀྑ་ཝེ, ཨི་དྡྷི? ཨི་དྷ, བྷི་ཀྑ་ཝེ, བྷི་ཀྑུ ཨ་ནེ་ཀ་ཝི་ཧི་ཏཾ ཨི་དྡྷི་ཝི་དྷཾ པ་ཙྩ་ནུ་བྷོ་ཏི – ཨེ་ཀོ་པི ཧུ་ཏྭཱ བ་ཧུ་དྷཱ ཧོ་ཏི…པེ… ཡཱ་ཝ བྲ་ཧྨ་ལོ་ཀཱ་པི ཀཱ་ཡེ་ན ཝ་སཾ ཝ་ཏྟེ་ཏི – ཨ་ཡཾ ཝུ་ཙྩ་ཏི, བྷི་ཀྑ་ཝེ, ཨི་དྡྷི.

‘‘ཀ་ཏ་མཱ ཙ, བྷི་ཀྑ་ཝེ, ཨི་དྡྷི་པཱ་ད་བྷཱ་ཝ་ནཱ་གཱ་མི་ནཱི པ་ཊི་པ་དཱ? ཨ་ཡ་མེ་ཝ ཨ་རི་ཡོ ཨ་ཊྛ་ངྒི་ཀོ མ་གྒོ, སེ་ཡྻ་ཐི་དཾ – ས་མྨཱ་དི་ཊྛི…པེ… ས་མྨཱ་ས་མཱ་དྷི. ཨ་ཡཾ ཝུ་ཙྩ་ཏི, བྷི་ཀྑ་ཝེ, ཨི་དྡྷི་པཱ་ད་བྷཱ་ཝ་ནཱ་གཱ་མི་ནཱི པ་ཊི་པ་དཱ’’ཏི. ད་ས་མཾ.

༡༡. མོ་གྒ་ལླཱ་ན་སུ་ཏྟཾ

༨༤༣. ཏ་ཏྲ ཁོ བྷ་ག་ཝཱ བྷི་ཀྑཱུ ཨཱ་མ་ནྟེ་སི – ‘‘ཏཾ ཀིཾ མ་ཉྙ་ཐ, བྷི་ཀྑ་ཝེ, ཀ་ཏ་མེ་སཾ དྷ་མྨཱ་ནཾ བྷཱ་ཝི་ཏ་ཏྟཱ བ་ཧུ་ལཱི་ཀ་ཏ་ཏྟཱ མོ་གྒ་ལླཱ་ནོ བྷི་ཀྑུ ཨེ་ཝཾ་མ་ཧི་དྡྷི་ཀོ ཨེ་ཝཾ་མ་ཧཱ་ནུ་བྷཱ་ཝོ’’ཏི? བྷ་ག་ཝཾ་མཱུ་ལ་ཀཱ ནོ, བྷ་ནྟེ, དྷ་མྨཱ བྷ་ག་ཝཾ་ནེ་ཏྟི་ཀཱ…པེ… ‘‘ཙ་ཏུ་ནྣཾ ཁོ, བྷི་ཀྑ་ཝེ, ཨི་དྡྷི་པཱ་དཱ་ནཾ བྷཱ་ཝི་ཏ་ཏྟཱ བ་ཧུ་ལཱི་ཀ་ཏ་ཏྟཱ མོ་གྒ་ལླཱ་ནོ བྷི་ཀྑུ ཨེ་ཝཾ་མ་ཧི་དྡྷི་ཀོ ཨེ་ཝཾ་མ་ཧཱ་ནུ་བྷཱ་ཝོ’’.

‘‘ཀ་ཏ་མེ་སཾ ཙ་ཏུ་ནྣཾ? ཨི་དྷ, བྷི་ཀྑ་ཝེ, མོ་གྒ་ལླཱ་ནོ བྷི་ཀྑུ ཚ་ནྡ་ས་མཱ་དྷི་པྤ་དྷཱ་ན་ས་ངྑཱ་ར་ས་མ་ནྣཱ་ག་ཏཾ ཨི་དྡྷི་པཱ་དཾ བྷཱ་ཝེ་ཏི – ‘ཨི་ཏི མེ ཚ་ནྡོ ན ཙ ཨ་ཏི་ལཱི་ནོ བྷ་ཝི་སྶ་ཏི, ན ཙ ཨ་ཏི་པྤ་གྒ་ཧི་ཏོ བྷ་ཝི་སྶ་ཏི, ན ཙ ཨ་ཛ྄ཛྷ་ཏྟཾ སཾ་ཁི་ཏྟོ བྷ་ཝི་སྶ་ཏི, ན ཙ བ་ཧི་དྡྷཱ ཝི་ཀྑི་ཏྟོ བྷ་ཝི་སྶ་ཏི’. པ་ཙྪཱ་པུ་རེ་ས་ཉྙཱི ཙ ཝི་ཧ་ར་ཏི – ‘ཡ་ཐཱ པུ་རེ ཏ་ཐཱ པ་ཙྪཱ, ཡ་ཐཱ པ་ཙྪཱ ཏ་ཐཱ པུ་རེ; ཡ་ཐཱ ཨ་དྷོ ཏ་ཐཱ ཨུ་དྡྷཾ, ཡ་ཐཱ ཨུ་དྡྷཾ ཏ་ཐཱ ཨ་དྷོ; ཡ་ཐཱ དི་ཝཱ ཏ་ཐཱ ར་ཏྟིཾ, ཡ་ཐཱ ར་ཏྟིཾ ཏ་ཐཱ དི་ཝཱ’. ཨི་ཏི ཝི་ཝ་ཊེ་ན ཙེ་ཏ་སཱ ཨ་པ་རི་ཡོ་ན་དྡྷེ་ན ས་པྤ་བྷཱ་སཾ ཙི་ཏྟཾ བྷཱ་ཝེ་ཏི. ཝཱི་རི་ཡ་ས་མཱ་དྷི…པེ… ཙི་ཏྟ་ས་མཱ་དྷི…པེ… ཝཱི་མཾ་སཱ་ས་མཱ་དྷི་པྤ་དྷཱ་ན་ས་ངྑཱ་ར་ས་མ་ནྣཱ་ག་ཏཾ ཨི་དྡྷི་པཱ་དཾ བྷཱ་ཝེ་ཏི – ‘ཨི་ཏི མེ ཝཱི་མཾ་སཱ ན ཙ ཨ་ཏི་ལཱི་ནཱ བྷ་ཝི་སྶ་ཏི, ན ཙ ཨ་ཏི་པྤ་གྒ་ཧི་ཏཱ བྷ་ཝི་སྶ་ཏི, ན ཙ ཨ་ཛ྄ཛྷ་ཏྟཾ སཾ་ཁི་ཏྟཱ བྷ་ཝི་སྶ་ཏི, ན ཙ བ་ཧི་དྡྷཱ ཝི་ཀྑི་ཏྟཱ བྷ་ཝི་སྶ་ཏི’…པེ… ཨི་ཏི ཝི་ཝ་ཊེ་ན ཙེ་ཏ་སཱ ཨ་པ་རི་ཡོ་ན་དྡྷེ་ན ས་པྤ་བྷཱ་སཾ ཙི་ཏྟཾ བྷཱ་ཝེ་ཏི. ཨི་མེ་སཾ ཁོ, བྷི་ཀྑ་ཝེ, ཙ་ཏུ་ནྣཾ ཨི་དྡྷི་པཱ་དཱ་ནཾ བྷཱ་ཝི་ཏ་ཏྟཱ བ་ཧུ་ལཱི་ཀ་ཏ་ཏྟཱ མོ་གྒ་ལླཱ་ནོ བྷི་ཀྑུ ཨེ་ཝཾ་མ་ཧི་དྡྷི་ཀོ ཨེ་ཝཾ་མ་ཧཱ་ནུ་བྷཱ་ཝོ.

‘‘ཨི་མེ་ས་ཉྩ པ་ན, བྷི་ཀྑ་ཝེ, ཙ་ཏུ་ནྣཾ ཨི་དྡྷི་པཱ་དཱ་ནཾ བྷཱ་ཝི་ཏ་ཏྟཱ བ་ཧུ་ལཱི་ཀ་ཏ་ཏྟཱ མོ་གྒ་ལཱ་ནོ བྷི་ཀྑུ ཨེ་ཝཾ ཨ་ནེ་ཀ་ཝི་ཧི་ཏཾ ཨི་དྡྷི་ཝི་དྷཾ པ་ཙྩ་ནུ་བྷོ་ཏི – ཨེ་ཀོ་པི ཧུ་ཏྭཱ བ་ཧུ་དྷཱ ཧོ་ཏི, བ་ཧུ་དྷཱ་པི ཧུ་ཏྭཱ ཨེ་ཀོ ཧོ་ཏི…པེ… ཡཱ་ཝ བྲ་ཧྨ་ལོ་ཀཱ་པི ཀཱ་ཡེ་ན ཝ་སཾ ཝ་ཏྟེ་ཏི. ཨི་མེ་ས་ཉྩ པ་ན, བྷི་ཀྑ་ཝེ, ཙ་ཏུ་ནྣཾ ཨི་དྡྷི་པཱ་དཱ་ནཾ བྷཱ་ཝི་ཏ་ཏྟཱ བ་ཧུ་ལཱི་ཀ་ཏ་ཏྟཱ མོ་གྒ་ལླཱ་ནོ བྷི་ཀྑུ ཨཱ་ས་ཝཱ་ནཾ ཁ་ཡཱ ཨ་ནཱ་ས་ཝཾ ཙེ་ཏོ་ཝི་མུ་ཏྟིཾ པ་ཉྙཱ་ཝི་མུ་ཏྟིཾ དི་ཊྛེ་ཝ དྷ་མྨེ ས་ཡཾ ཨ་བྷི་ཉྙཱ ས་ཙྪི་ཀ་ཏྭཱ ཨུ་པ་ས་མྤ་ཛྫ ཝི་ཧ་ར་ཏཱི’’ཏི. ཨེ་ཀཱ་ད་ས་མཾ.

༡༢. ཏ་ཐཱ་ག་ཏ་སུ་ཏྟཾ

༨༤༤. ཏ་ཏྲ ཁོ བྷ་ག་ཝཱ བྷི་ཀྑཱུ ཨཱ་མ་ནྟེ་སི – ‘‘ཏཾ ཀིཾ མ་ཉྙ་ཐ, བྷི་ཀྑ་ཝེ, ཀ་ཏ་མེ་སཾ དྷ་མྨཱ་ནཾ བྷཱ་ཝི་ཏ་ཏྟཱ བ་ཧུ་ལཱི་ཀ་ཏ་ཏྟཱ ཏ་ཐཱ་ག་ཏོ ཨེ་ཝཾ་མ་ཧི་དྡྷི་ཀོ ཨེ་ཝཾ་མ་ཧཱ་ནུ་བྷཱ་ཝོ’’ཏི? བྷ་ག་ཝཾ་མཱུ་ལ་ཀཱ ནོ, བྷ་ནྟེ, དྷ་མྨཱ…པེ… ‘‘ཙ་ཏུ་ནྣཾ ཁོ, བྷི་ཀྑ་ཝེ, ཨི་དྡྷི་པཱ་དཱ་ནཾ བྷཱ་ཝི་ཏ་ཏྟཱ བ་ཧུ་ལཱི་ཀ་ཏ་ཏྟཱ ཏ་ཐཱ་ག་ཏོ ཨེ་ཝཾ་མ་ཧི་དྡྷི་ཀོ ཨེ་ཝཾ་མ་ཧཱ་ནུ་བྷཱ་ཝོ’’.

‘‘ཀ་ཏ་མེ་སཾ ཙ་ཏུ་ནྣཾ? ཨི་དྷ, བྷི་ཀྑ་ཝེ, ཏ་ཐཱ་ག་ཏོ ཚ་ནྡ་ས་མཱ་དྷི་པྤ་དྷཱ་ན་ས་ངྑཱ་ར་ས་མ་ནྣཱ་ག་ཏཾ ཨི་དྡྷི་པཱ་དཾ བྷཱ་ཝེ་ཏི – ‘ཨི་ཏི མེ ཚ་ནྡོ ན ཙ ཨ་ཏི་ལཱི་ནོ བྷ་ཝི་སྶ་ཏི, ན ཙ ཨ་ཏི་པྤ་གྒ་ཧི་ཏོ བྷ་ཝི་སྶ་ཏི, ན ཙ ཨ་ཛ྄ཛྷ་ཏྟཾ སཾ་ཁི་ཏྟོ བྷ་ཝི་སྶ་ཏི, ན ཙ བ་ཧི་དྡྷཱ ཝི་ཀྑི་ཏྟོ བྷ་ཝི་སྶ་ཏི’. པ་ཙྪཱ་པུ་རེ་ས་ཉྙཱི ཙ ཝི་ཧ་ར་ཏི – ‘ཡ་ཐཱ པུ་རེ ཏ་ཐཱ པ་ཙྪཱ, ཡ་ཐཱ པ་ཙྪཱ ཏ་ཐཱ པུ་རེ; ཡ་ཐཱ ཨ་དྷོ ཏ་ཐཱ ཨུ་དྡྷཾ, ཡ་ཐཱ ཨུ་དྡྷཾ ཏ་ཐཱ ཨ་དྷོ; ཡ་ཐཱ དི་ཝཱ ཏ་ཐཱ ར་ཏྟིཾ, ཡ་ཐཱ ར་ཏྟིཾ ཏ་ཐཱ དི་ཝཱ’. ཨི་ཏི ཝི་ཝ་ཊེ་ན ཙེ་ཏ་སཱ ཨ་པ་རི་ཡོ་ན་དྡྷེ་ན ས་པྤ་བྷཱ་སཾ ཙི་ཏྟཾ བྷཱ་ཝེ་ཏི. ཝཱི་རི་ཡ་ས་མཱ་དྷི…པེ… ཙི་ཏྟ་ས་མཱ་དྷི…པེ… ཝཱི་མཾ་སཱ་ས་མཱ་དྷི་པྤ་དྷཱ་ན་ས་ངྑཱ་ར་ས་མ་ནྣཱ་ག་ཏཾ ཨི་དྡྷི་པཱ་དཾ བྷཱ་ཝེ་ཏི – ‘ཨི་ཏི མེ ཝཱི་མཾ་སཱ ན ཙ ཨ་ཏི་ལཱི་ནཱ བྷ་ཝི་སྶ་ཏི, ན ཙ ཨ་ཏི་པ་གྒ་ཧི་ཏཱ བྷ་ཝི་སྶ་ཏི, ན ཙ ཨ་ཛ྄ཛྷ་ཏྟཾ སཾ་ཁི་ཏྟཱ བྷ་ཝི་སྶ་ཏི, ན ཙ བ་ཧི་དྡྷཱ ཝི་ཀྑི་ཏྟཱ བྷ་ཝི་སྶ་ཏི’. པ་ཙྪཱ་པུ་རེ་ས་ཉྙཱི ཙ ཝི་ཧ་ར་ཏི – ‘ཡ་ཐཱ པུ་རེ ཏ་ཐཱ པ་ཙྪཱ, ཡ་ཐཱ པ་ཙྪཱ ཏ་ཐཱ པུ་རེ; ཡ་ཐཱ ཨ་དྷོ ཏ་ཐཱ ཨུ་དྡྷཾ, ཡ་ཐཱ ཨུ་དྡྷཾ ཏ་ཐཱ ཨ་དྷོ; ཡ་ཐཱ དི་ཝཱ ཏ་ཐཱ ར་ཏྟིཾ, ཡ་ཐཱ ར་ཏྟིཾ ཏ་ཐཱ དི་ཝཱ’. ཨི་ཏི ཝི་ཝ་ཊེ་ན ཙེ་ཏ་སཱ ཨ་པ་རི་ཡོ་ན་དྡྷེ་ན ས་པྤ་བྷཱ་སཾ ཙི་ཏྟཾ བྷཱ་ཝེ་ཏི. ཨི་མེ་སཾ ཁོ, བྷི་ཀྑ་ཝེ, ཙ་ཏུ་ནྣཾ ཨི་དྡྷི་པཱ་དཱ་ནཾ བྷཱ་ཝི་ཏ་ཏྟཱ བ་ཧུ་ལཱི་ཀ་ཏ་ཏྟཱ ཏ་ཐཱ་ག་ཏོ ཨེ་ཝཾ་མ་ཧི་དྡྷི་ཀོ ཨེ་ཝཾ་མ་ཧཱ་ནུ་བྷཱ་ཝོ.

‘‘ཨི་མེ་ས་ཉྩ པ་ན, བྷི་ཀྑ་ཝེ, ཙ་ཏུ་ནྣཾ ཨི་དྡྷི་པཱ་དཱ་ནཾ བྷཱ་ཝི་ཏ་ཏྟཱ བ་ཧུ་ལཱི་ཀ་ཏ་ཏྟཱ ཏ་ཐཱ་ག་ཏོ ཨ་ནེ་ཀ་ཝི་ཧི་ཏཾ ཨི་དྡྷི་ཝི་དྷཾ པ་ཙྩ་ནུ་བྷོ་ཏི – ཨེ་ཀོ་པི ཧུ་ཏྭཱ བ་ཧུ་དྷཱ ཧོ་ཏི…པེ… ཡཱ་ཝ བྲ་ཧྨ་ལོ་ཀཱ་པི ཀཱ་ཡེ་ན ཝ་སཾ ཝ་ཏྟེ་ཏི. ཨི་མེ་ས་ཉྩ པ་ན, བྷི་ཀྑ་ཝེ, ཙ་ཏུ་ནྣཾ ཨི་དྡྷི་པཱ་དཱ་ནཾ བྷཱ་ཝི་ཏ་ཏྟཱ བ་ཧུ་ལཱི་ཀ་ཏ་ཏྟཱ ཏ་ཐཱ་ག་ཏོ ཨཱ་ས་ཝཱ་ནཾ ཁ་ཡཱ ཨ་ནཱ་ས་ཝཾ ཙེ་ཏོ་ཝི་མུ་ཏྟིཾ པ་ཉྙཱ་ཝི་མུ་ཏྟིཾ དི་ཊྛེ་ཝ དྷ་མྨེ ས་ཡཾ ཨ་བྷི་ཉྙཱ ས་ཙྪི་ཀ་ཏྭཱ ཨུ་པ་ས་མྤ་ཛྫ ཝི་ཧ་ར་ཏཱི’’ཏི. དྭཱ་ད་ས་མཾ.

(ཚ་པི ཨ་བྷི་ཉྙཱ་ཡོ ཝི་ཏྠཱ་རེ་ཏ་བྦཱ).

ཨ་ཡོ་གུ་ལ༹་ཝ་གྒོ ཏ་ཏི་ཡོ.

ཏ་སྶུ་དྡཱ་ནཾ –

མ་གྒོ ཨ་ཡོ་གུ་ལོ༹ བྷི་ཀྑུ, སུ་དྡྷི་ཀ་ཉྩཱ་པི དྭེ ཕ་ལཱ;

དྭེ ཙཱ་ན་ནྡཱ དུ་ཝེ བྷི་ཀྑཱུ, མོ་གྒ་ལླཱ་ནོ ཏ་ཐཱ་ག་ཏོ་ཏི.