༢. ཨ་ཡོ་གུ་ལ༹་སུ་ཏྟཾ

༨༣༤. སཱ་ཝ་ཏྠི་ནི་དཱ་ནཾ. ཨ་ཐ ཁོ ཨཱ་ཡ་སྨཱ ཨཱ་ན་ནྡོ ཡེ་ན བྷ་ག་ཝཱ ཏེ་ནུ་པ་ས་ངྐ་མི; ཨུ་པ་ས་ངྐ་མི་ཏྭཱ བྷ་ག་ཝ་ནྟཾ ཨ་བྷི་ཝཱ་དེ་ཏྭཱ ཨེ་ཀ་མ་ནྟཾ ནི་སཱི་དི. ཨེ་ཀ་མ་ནྟཾ ནི་སི་ནྣོ ཁོ ཨཱ་ཡ་སྨཱ ཨཱ་ན་ནྡོ བྷ་ག་ཝ་ནྟཾ ཨེ་ཏ་ད་ཝོ་ཙ – ‘‘ཨ་བྷི་ཛཱ་ནཱ་ཏི ནུ ཁོ, བྷ་ནྟེ, བྷ་ག་ཝཱ ཨི་དྡྷི་ཡཱ མ་ནོ་མ་ཡེ་ན ཀཱ་ཡེ་ན བྲ་ཧྨ་ལོ་ཀཾ ཨུ་པ་ས་ངྐ་མི་ཏཱ’’ཏི? ‘‘ཨ་བྷི་ཛཱ་ནཱ་མི ཁྭཱ་ཧཾ, ཨཱ་ན་ནྡ, ཨི་དྡྷི་ཡཱ མ་ནོ་མ་ཡེ་ན ཀཱ་ཡེ་ན བྲ་ཧྨ་ལོ་ཀཾ ཨུ་པ་ས་ངྐ་མི་ཏཱ’’ཏི. ‘‘ཨ་བྷི་ཛཱ་ནཱ་ཏི པ་ན, བྷ་ནྟེ, བྷ་ག་ཝཱ ཨི་མི་ནཱ ཙཱ་ཏུ་མ་ཧཱ་བྷཱུ་ཏི་ཀེ་ན ཀཱ་ཡེ་ན ཨི་དྡྷི་ཡཱ བྲ་ཧྨ་ལོ་ཀཾ ཨུ་པ་ས་ངྐ་མི་ཏཱ’’ཏི? ‘‘ཨ་བྷི་ཛཱ་ནཱ་མི ཁྭཱ་ཧཾ, ཨཱ་ན་ནྡ, ཨི་མི་ནཱ ཙཱ་ཏུ་མ་ཧཱ་བྷཱུ་ཏི་ཀེ་ན [ཙཱ་ཏུ་མྨ་ཧཱ་བྷཱུ་ཏི་ཀེ་ན (སཱི. སྱཱ. ཀཾ.)] ཀཱ་ཡེ་ན ཨི་དྡྷི་ཡཱ བྲ་ཧྨ་ལོ་ཀཾ ཨུ་པ་ས་ངྐ་མི་ཏཱ’’ཏི.

‘‘ཡ་ཉྩ ཁོ, ཨོ་མཱ་ཏི, བྷ་ནྟེ, བྷ་ག་ཝཱ ཨི་དྡྷི་ཡཱ མ་ནོ་མ་ཡེ་ན ཀཱ་ཡེ་ན བྲ་ཧྨ་ལོ་ཀཾ ཨུ་པ་ས་ངྐ་མི་ཏུཾ, ཡ་ཉྩ ཁོ ཨ་བྷི་ཛཱ་ནཱ་ཏི, བྷ་ནྟེ, བྷ་ག་ཝཱ ཨི་མི་ནཱ ཙཱ་ཏུ་མ་ཧཱ་བྷཱུ་ཏི་ཀེ་ན ཀཱ་ཡེ་ན ཨི་དྡྷི་ཡཱ བྲ་ཧྨ་ལོ་ཀཾ ཨུ་པ་ས་ངྐ་མི་ཏཱ, ཏ་ཡི་དཾ, བྷ་ནྟེ, བྷ་ག་ཝ་ཏོ ཨ་ཙྪ་རི་ཡ་ཉྩེ་ཝ ཨ་བྦྷུ་ཏ་ཉྩཱ’’ཏི. ‘‘ཨ་ཙྪ་རི་ཡཱ ཙེ་ཝ, ཨཱ་ན་ནྡ, ཏ་ཐཱ་ག་ཏཱ ཨ་ཙྪ་རི་ཡ་དྷ་མྨ་ས་མ་ནྣཱ་ག་ཏཱ ཙ, ཨ་བྦྷུ་ཏཱ ཙེ་ཝ, ཨཱ་ན་ནྡ, ཏ་ཐཱ་ག་ཏཱ ཨ་བྦྷུ་ཏ་དྷ་མྨ་ས་མ་ནྣཱ་ག་ཏཱ ཙ’’.

‘‘ཡ་སྨིཾ, ཨཱ་ན་ནྡ, ས་མ་ཡེ ཏ་ཐཱ་ག་ཏོ ཀཱ་ཡ་མྤི ཙི་ཏྟེ ས་མོ་ད་ཧ་ཏི [ས་མཱ་ད་ཧ་ཏི (སཱི. སྱཱ. པཱི.)] ཙི་ཏྟ་མྤི ཀཱ་ཡེ ས་མོ་ད་ཧ་ཏི, སུ་ཁ་ས་ཉྙ་ཉྩ ལ་ཧུ་ས་ཉྙ་ཉྩ ཀཱ་ཡེ ཨོ་ཀྐ་མི་ཏྭཱ ཝི་ཧ་ར་ཏི; ཏ་སྨིཾ, ཨཱ་ན་ནྡ, ས་མ་ཡེ ཏ་ཐཱ་ག་ཏ་སྶ ཀཱ་ཡོ ལ་ཧུ་ཏ་རོ ཙེ་ཝ ཧོ་ཏི མུ་དུ་ཏ་རོ ཙ ཀ་མྨ་ནི་ཡ་ཏ་རོ ཙ པ་བྷ་སྶ་ར་ཏ་རོ ཙ.

‘‘སེ་ཡྻ་ཐཱ་པི, ཨཱ་ན་ནྡ, ཨ་ཡོ་གུ་ལོ༹ དི་ཝ་སཾ ས་ནྟ་ཏྟོ ལ་ཧུ་ཏ་རོ ཙེ་ཝ ཧོ་ཏི མུ་དུ་ཏ་རོ ཙ ཀ་མྨ་ནི་ཡ་ཏ་རོ ཙ པ་བྷ་སྶ་ར་ཏ་རོ ཙ; ཨེ་ཝ་མེ་ཝ ཁོ, ཨཱ་ན་ནྡ, ཡ་སྨིཾ ས་མ་ཡེ ཏ་ཐཱ་ག་ཏོ ཀཱ་ཡ་མྤི ཙི་ཏྟེ ས་མོ་ད་ཧ་ཏི, ཙི་ཏྟ་མྤི ཀཱ་ཡེ ས་མོ་ད་ཧ་ཏི, སུ་ཁ་ས་ཉྙ་ཉྩ ལ་ཧུ་ས་ཉྙ་ཉྩ ཀཱ་ཡེ ཨོ་ཀྐ་མི་ཏྭཱ ཝི་ཧ་ར་ཏི; ཏ་སྨིཾ, ཨཱ་ན་ནྡ, ས་མ་ཡེ ཏ་ཐཱ་ག་ཏ་སྶ ཀཱ་ཡོ ལ་ཧུ་ཏ་རོ ཙེ་ཝ ཧོ་ཏི མུ་དུ་ཏ་རོ ཙ ཀ་མྨ་ནི་ཡ་ཏ་རོ ཙ པ་བྷ་སྶ་ར་ཏ་རོ ཙ.

‘‘ཡ་སྨིཾ, ཨཱ་ན་ནྡ, ས་མ་ཡེ ཏ་ཐཱ་ག་ཏོ ཀཱ་ཡ་མྤི ཙི་ཏྟེ ས་མོ་ད་ཧ་ཏི, ཙི་ཏྟ་མྤི ཀཱ་ཡེ ས་མོ་ད་ཧ་ཏི, སུ་ཁ་ས་ཉྙ་ཉྩ ལ་ཧུ་ས་ཉྙ་ཉྩ ཀཱ་ཡེ ཨོ་ཀྐ་མི་ཏྭཱ ཝི་ཧ་ར་ཏི; ཏ་སྨིཾ, ཨཱ་ན་ནྡ, ས་མ་ཡེ ཏ་ཐཱ་ག་ཏ་སྶ ཀཱ་ཡོ ཨ་པྤ་ཀ་སི་རེ་ནེ་ཝ པ་ཐ་ཝི་ཡཱ ཝེ་ཧཱ་སཾ ཨ་བྦྷུ་གྒ་ཙྪ་ཏི, སོ ཨ་ནེ་ཀ་ཝི་ཧི་ཏཾ ཨི་དྡྷི་ཝི་དྷཾ པ་ཙྩ་ནུ་བྷོ་ཏི – ཨེ་ཀོ་པི ཧུ་ཏྭཱ བ་ཧུ་དྷཱ ཧོ་ཏི, བ་ཧུ་དྷཱ་པི ཧུ་ཏྭཱ ཨེ་ཀོ ཧོ་ཏི…པེ… ཡཱ་ཝ བྲ་ཧྨ་ལོ་ཀཱ་པི ཀཱ་ཡེ་ན ཝ་སཾ ཝ་ཏྟེ་ཏི.

‘‘སེ་ཡྻ་ཐཱ་པི, ཨཱ་ན་ནྡ, ཏཱུ་ལ་པི་ཙུ ཝཱ ཀ་པྤཱ་ས་པི་ཙུ ཝཱ ལ་ཧུ་ཀོ ཝཱ་ཏཱུ་པཱ་དཱ་ནོ ཨ་པྤ་ཀ་སི་རེ་ནེ་ཝ པ་ཐ་ཝི་ཡཱ ཝེ་ཧཱ་སཾ ཨ་བྦྷུ་གྒ་ཙྪ་ཏི; ཨེ་ཝ་མེ་ཝ ཁོ, ཨཱ་ན་ནྡ, ཡ་སྨིཾ ས་མ་ཡེ ཏ་ཐཱ་ག་ཏོ ཀཱ་ཡ་མྤི ཙི་ཏྟེ ས་མོ་ད་ཧ་ཏི, ཙི་ཏྟ་མྤི ཀཱ་ཡེ ས་མོ་ད་ཧ་ཏི, སུ་ཁ་ས་ཉྙ་ཉྩ ལ་ཧུ་ས་ཉྙ་ཉྩ ཀཱ་ཡེ ཨོ་ཀྐ་མི་ཏྭཱ ཝི་ཧ་ར་ཏི; ཏ་སྨིཾ, ཨཱ་ན་ནྡ, ས་མ་ཡེ ཏ་ཐཱ་ག་ཏ་སྶ ཀཱ་ཡོ ཨ་པྤ་ཀ་སི་རེ་ནེ་ཝ པ་ཐ་ཝི་ཡཱ ཝེ་ཧཱ་སཾ ཨ་བྦྷུ་གྒ་ཙྪ་ཏི, སོ ཨ་ནེ་ཀ་ཝི་ཧི་ཏཾ ཨི་དྡྷི་ཝི་དྷཾ པ་ཙྩ་ནུ་བྷོ་ཏི – ཨེ་ཀོ་པི ཧུ་ཏྭཱ བ་ཧུ་དྷཱ ཧོ་ཏི…པེ… ཡཱ་ཝ བྲ་ཧྨ་ལོ་ཀཱ་པི ཀཱ་ཡེ་ན ཝ་སཾ ཝ་ཏྟེ་ཏཱི’’ཏི. དུ་ཏི་ཡཾ.