༨. པ་རི་ཉྙཱ་ཏ་སུ་ཏྟཾ

༤༠༤. ‘‘ཙ་ཏྟཱ་རོ་མེ, བྷི་ཀྑ་ཝེ, ས་ཏི་པ་ཊྛཱ་ནཱ. ཀ་ཏ་མེ ཙ་ཏྟཱ་རོ? ཨི་དྷ, བྷི་ཀྑ་ཝེ, བྷི་ཀྑུ ཀཱ་ཡེ ཀཱ་ཡཱ་ནུ་པ་སྶཱི ཝི་ཧ་ར་ཏི ཨཱ་ཏཱ་པཱི ས་མྤ་ཛཱ་ནོ ས་ཏི་མཱ, ཝི་ནེ་ཡྻ ལོ་ཀེ ཨ་བྷི་ཛ྄ཛྷཱ་དོ་མ་ན་སྶཾ. ཏ་སྶ ཀཱ་ཡེ ཀཱ་ཡཱ་ནུ་པ་སྶི་ནོ ཝི་ཧ་ར་ཏོ ཀཱ་ཡོ པ་རི་ཉྙཱ་ཏོ ཧོ་ཏི. ཀཱ་ཡ་སྶ པ་རི་ཉྙཱ་ཏ་ཏྟཱ ཨ་མ་ཏཾ ས་ཙྪི་ཀ་ཏཾ ཧོ་ཏི.

‘‘ཝེ་ད་ནཱ་སུ ཝེ་ད་ནཱ་ནུ་པ་སྶཱི ཝི་ཧ་ར་ཏི ཨཱ་ཏཱ་པཱི ས་མྤ་ཛཱ་ནོ ས་ཏི་མཱ, ཝི་ནེ་ཡྻ ལོ་ཀེ ཨ་བྷི་ཛ྄ཛྷཱ་དོ་མ་ན་སྶཾ. ཏ་སྶ ཝེ་ད་ནཱ་སུ ཝེ་ད་ནཱ་ནུ་པ་སྶི་ནོ ཝི་ཧ་ར་ཏོ ཝེ་ད་ནཱ པ་རི་ཉྙཱ་ཏཱ ཧོ་ནྟི. ཝེ་ད་ནཱ་ནཾ པ་རི་ཉྙཱ་ཏ་ཏྟཱ ཨ་མ་ཏཾ ས་ཙྪི་ཀ་ཏཾ ཧོ་ཏི.

‘‘ཙི་ཏྟེ ཙི་ཏྟཱ་ནུ་པ་སྶཱི ཝི་ཧ་ར་ཏི ཨཱ་ཏཱ་པཱི ས་མྤ་ཛཱ་ནོ ས་ཏི་མཱ, ཝི་ནེ་ཡྻ ལོ་ཀེ ཨ་བྷི་ཛ྄ཛྷཱ་དོ་མ་ན་སྶཾ. ཏ་སྶ ཙི་ཏྟེ ཙི་ཏྟཱ་ནུ་པ་སྶི་ནོ ཝི་ཧ་ར་ཏོ ཙི་ཏྟཾ པ་རི་ཉྙཱ་ཏཾ ཧོ་ཏི. ཙི་ཏྟ་སྶ པ་རི་ཉྙཱ་ཏ་ཏྟཱ ཨ་མ་ཏཾ ས་ཙྪི་ཀ་ཏཾ ཧོ་ཏི.

‘‘དྷ་མྨེ་སུ དྷ་མྨཱ་ནུ་པ་སྶཱི ཝི་ཧ་ར་ཏི ཨཱ་ཏཱ་པཱི ས་མྤ་ཛཱ་ནོ ས་ཏི་མཱ, ཝི་ནེ་ཡྻ ལོ་ཀེ ཨ་བྷི་ཛ྄ཛྷཱ་དོ་མ་ན་སྶཾ. ཏ་སྶ དྷ་མྨེ་སུ དྷ་མྨཱ་ནུ་པ་སྶི་ནོ ཝི་ཧ་ར་ཏོ དྷ་མྨཱ པ་རི་ཉྙཱ་ཏཱ ཧོ་ནྟི. དྷ་མྨཱ་ནཾ པ་རི་ཉྙཱ་ཏ་ཏྟཱ ཨ་མ་ཏཾ ས་ཙྪི་ཀ་ཏཾ ཧོ་ཏཱི’’ཏི. ཨ་ཊྛ་མཾ.