༤. པུ་ཉྙཱ་བྷི་ས་ནྡ་ཝ་གྒོ
༡. པ་ཋ་མ་པུ་ཉྙཱ་བྷི་ས་ནྡ་སུ་ཏྟཾ
༡༠༢༧. སཱ་ཝ་ཏྠི་ནི་དཱ་ནཾ. ‘‘ཙ་ཏྟཱ་རོ་མེ, བྷི་ཀྑ་ཝེ, པུ་ཉྙཱ་བྷི་ས་ནྡཱ ཀུ་ས་ལཱ་བྷི་ས་ནྡཱ སུ་ཁ་སྶཱ་ཧཱ་རཱ. ཀ་ཏ་མེ ཙ་ཏྟཱ་རོ? ཨི་དྷ, བྷི་ཀྑ་ཝེ, ཨ་རི་ཡ་སཱ་ཝ་ཀོ བུ་དྡྷེ ཨ་ཝེ་ཙྩ་པྤ་སཱ་དེ་ན ས་མ་ནྣཱ་ག་ཏོ ཧོ་ཏི – ཨི་ཏི་པི སོ བྷ་ག་ཝཱ…པེ… ས་ཏྠཱ དེ་ཝ་མ་ནུ་སྶཱ་ནཾ བུ་དྡྷོ བྷ་ག་ཝཱ་ཏི. ཨ་ཡཾ པ་ཋ་མོ པུ་ཉྙཱ་བྷི་ས་ནྡོ ཀུ་ས་ལཱ་བྷི་ས་ནྡོ སུ་ཁ་སྶཱ་ཧཱ་རོ.
‘‘པུ་ན ཙ་པ་རཾ, བྷི་ཀྑ་ཝེ, ཨ་རི་ཡ་སཱ་ཝ་ཀོ དྷ་མྨེ ཨ་ཝེ་ཙྩ་པྤ་སཱ་དེ་ན ས་མ་ནྣཱ་ག་ཏོ ཧོ་ཏི – སྭཱ་ཀྑཱ་ཏོ བྷ་ག་ཝ་ཏཱ དྷ་མྨོ…པེ… པ་ཙྩ་ཏྟཾ ཝེ་དི་ཏ་བྦོ ཝི་ཉྙཱུ་ཧཱི་ཏི. ཨ་ཡཾ དུ་ཏི་ཡོ པུ་ཉྙཱ་བྷི་ས་ནྡོ ཀུ་ས་ལཱ་བྷི་ས་ནྡོ སུ་ཁ་སྶཱ་ཧཱ་རོ.
‘‘པུ་ན ཙ་པ་རཾ, བྷི་ཀྑ་ཝེ, ཨ་རི་ཡ་སཱ་ཝ་ཀོ ས་ངྒྷེ ཨ་ཝེ་ཙྩ་པྤ་སཱ་དེ་ན ས་མ་ནྣཱ་ག་ཏོ ཧོ་ཏི – སུ་པྤ་ཊི་པ་ནྣོ བྷ་ག་ཝ་ཏོ སཱ་ཝ་ཀ་ས་ངྒྷོ…པེ… ཨ་ནུ་ཏྟ་རཾ པུ་ཉྙ་ཀྑེ་ཏྟཾ ལོ་ཀ་སྶཱ་ཏི. ཨ་ཡཾ ཏ་ཏི་ཡོ པུ་ཉྙཱ་བྷི་ས་ནྡོ ཀུ་ས་ལཱ་བྷི་ས་ནྡོ སུ་ཁ་སྶཱ་ཧཱ་རོ.
‘‘པུ་ན ཙ་པ་རཾ, བྷི་ཀྑ་ཝེ, ཨ་རི་ཡ་སཱ་ཝ་ཀོ ཨ་རི་ཡ་ཀ་ནྟེ་ཧི སཱི་ལེ་ཧི ས་མ་ནྣཱ་ག་ཏོ ཧོ་ཏི ཨ་ཁ་ཎྜེ་ཧི…པེ… ས་མཱ་དྷི་སཾ་ཝ་ཏྟ་ནི་ཀེ་ཧི. ཨ་ཡཾ ཙ་ཏུ་ཏྠོ པུ་ཉྙཱ་བྷི་ས་ནྡོ ཀུ་ས་ལཱ་བྷི་ས་ནྡོ སུ་ཁ་སྶཱ་ཧཱ་རོ. ཨི་མེ ཁོ, བྷི་ཀྑ་ཝེ, ཙ་ཏྟཱ་རོ པུ་ཉྙཱ་བྷི་ས་ནྡཱ ཀུ་ས་ལཱ་བྷི་ས་ནྡཱ སུ་ཁ་སྶཱ་ཧཱ་རཱ’’ཏི. པ་ཋ་མཾ.
༢. དུ་ཏི་ཡ་པུ་ཉྙཱ་བྷི་ས་ནྡ་སུ་ཏྟཾ
༡༠༢༨. ‘‘ཙ་ཏྟཱ་རོ་མེ, བྷི་ཀྑ་ཝེ, པུ་ཉྙཱ་བྷི་ས་ནྡཱ ཀུ་ས་ལཱ་བྷི་ས་ནྡཱ སུ་ཁ་སྶཱ་ཧཱ་རཱ. ཀ་ཏ་མེ ཙ་ཏྟཱ་རོ? ཨི་དྷ, བྷི་ཀྑ་ཝེ, ཨ་རི་ཡ་སཱ་ཝ་ཀོ བུ་དྡྷེ ཨ་ཝེ་ཙྩ་པྤ་སཱ་དེ་ན ས་མ་ནྣཱ་ག་ཏོ ཧོ་ཏི – ཨི་ཏི་པི སོ བྷ་ག་ཝཱ…པེ… ས་ཏྠཱ དེ་ཝ་མ་ནུ་སྶཱ་ནཾ བུ་དྡྷོ བྷ་ག་ཝཱ་ཏི. ཨ་ཡཾ པ་ཋ་མོ པུ་ཉྙཱ་བྷི་ས་ནྡོ ཀུ་ས་ལཱ་བྷི་ས་ནྡོ སུ་ཁ་སྶཱ་ཧཱ་རོ.
‘‘པུ་ན ཙ་པ་རཾ, བྷི་ཀྑ་ཝེ, ཨ་རི་ཡ་སཱ་ཝ་ཀོ དྷ་མྨེ…པེ… ས་ངྒྷེ…པེ….
‘‘པུ་ན ཙ་པ་རཾ, བྷི་ཀྑ་ཝེ, ཨ་རི་ཡ་སཱ་ཝ་ཀོ ཝི་ག་ཏ་མ་ལ་མ་ཙྪེ་རེ་ན ཙེ་ཏ་སཱ ཨ་གཱ་རཾ ཨ་ཛ྄ཛྷཱ་ཝ་ས་ཏི མུ་ཏྟ་ཙཱ་གོ པ་ཡ་ཏ་པཱ་ཎི ཝོ་སྶ་གྒ་ར་ཏོ ཡཱ་ཙ་ཡོ་གོ དཱ་ན་སཾ་ཝི་བྷཱ་ག་ར་ཏོ. ཨ་ཡཾ ཙ་ཏུ་ཏྠོ པུ་ཉྙཱ་བྷི་ས་ནྡོ ཀུ་ས་ལཱ་བྷི་ས་ནྡོ སུ་ཁ་སྶཱ་ཧཱ་རོ. ཨི་མེ ཁོ, བྷི་ཀྑ་ཝེ, ཙ་ཏྟཱ་རོ པུ་ཉྙཱ་བྷི་ས་ནྡཱ ཀུ་ས་ལཱ་བྷི་ས་ནྡཱ སུ་ཁ་སྶཱ་ཧཱ་རཱ’’ཏི. དུ་ཏི་ཡཾ.
༣. ཏ་ཏི་ཡ་པུ་ཉྙཱ་བྷི་ས་ནྡ་སུ་ཏྟཾ
༡༠༢༩. ‘‘ཙ་ཏྟཱ་རོ་མེ, བྷི་ཀྑ་ཝེ, པུ་ཉྙཱ་བྷི་ས་ནྡཱ ཀུ་ས་ལཱ་བྷི་ས་ནྡཱ སུ་ཁ་སྶཱ་ཧཱ་རཱ. ཀ་ཏ་མེ ཙ་ཏྟཱ་རོ? ཨི་དྷ, བྷི་ཀྑ་ཝེ, ཨ་རི་ཡ་སཱ་ཝ་ཀོ བུ་དྡྷེ ཨ་ཝེ་ཙྩ་པྤ་སཱ་དེ་ན ས་མ་ནྣཱ་ག་ཏོ ཧོ་ཏི – ཨི་ཏི་པི སོ བྷ་ག་ཝཱ…པེ… ས་ཏྠཱ དེ་ཝ་མ་ནུ་སྶཱ་ནཾ བུ་དྡྷོ བྷ་ག་ཝཱ་ཏི. ཨ་ཡཾ པ་ཋ་མོ པུ་ཉྙཱ་བྷི་ས་ནྡོ ཀུ་ས་ལཱ་བྷི་ས་ནྡོ སུ་ཁ་སྶཱ་ཧཱ་རོ.
‘‘པུ་ན ཙ་པ་རཾ, བྷི་ཀྑ་ཝེ, ཨ་རི་ཡ་སཱ་ཝ་ཀོ དྷ་མྨེ…པེ… ས་ངྒྷེ…པེ….
‘‘པུ་ན ཙ་པ་རཾ, བྷི་ཀྑ་ཝེ, ཨ་རི་ཡ་སཱ་ཝ་ཀོ པ་ཉྙ་ཝཱ ཧོ་ཏི ཨུ་ད་ཡ་ཏྠ་གཱ་མི་ནི་ཡཱ པ་ཉྙཱ་ཡ ས་མ་ནྣཱ་ག་ཏོ ཨ་རི་ཡཱ་ཡ ནི་བྦེ་དྷི་ཀཱ་ཡ ས་མྨཱ དུ་ཀྑ་ཀྑ་ཡ་གཱ་མི་ནི་ཡཱ. ཨ་ཡཾ ཙ་ཏུ་ཏྠོ པུ་ཉྙཱ་བྷི་ས་ནྡོ ཀུ་ས་ལཱ་བྷི་ས་ནྡོ སུ་ཁ་སྶཱ་ཧཱ་རོ. ཨི་མེ ཁོ, བྷི་ཀྑ་ཝེ, ཙ་ཏྟཱ་རོ པུ་ཉྙཱ་བྷི་ས་ནྡཱ ཀུ་ས་ལཱ་བྷི་ས་ནྡཱ སུ་ཁ་སྶཱ་ཧཱ་རཱ’’ཏི. ཏ་ཏི་ཡཾ.
༤. པ་ཋ་མ་དེ་ཝ་པ་ད་སུ་ཏྟཾ
༡༠༣༠. སཱ་ཝ་ཏྠི་ནི་དཱ་ནཾ. ཙ་ཏྟཱ་རི་མཱ་ནི, བྷི་ཀྑ་ཝེ, དེ་ཝཱ་ནཾ དེ་ཝ་པ་དཱ་ནི ཨ་ཝི་སུ་དྡྷཱ་ནཾ ས་ཏྟཱ་ནཾ ཝི་སུ་དྡྷི་ཡཱ ཨ་པ་རི་ཡོ་དཱ་ཏཱ་ནཾ ས་ཏྟཱ་ནཾ པ་རི་ཡོ་ད་པ་ནཱ་ཡ.
ཀ་ཏ་མཱ་ནི ཙ་ཏྟཱ་རི? ཨི་དྷ, བྷི་ཀྑ་ཝེ, ཨ་རི་ཡ་སཱ་ཝ་ཀོ བུ་དྡྷེ ཨ་ཝེ་ཙྩ་པྤ་སཱ་དེ་ན ས་མ་ནྣཱ་ག་ཏོ ཧོ་ཏི – ཨི་ཏི་པི སོ བྷ་ག་ཝཱ…པེ… ས་ཏྠཱ དེ་ཝ་མ་ནུ་སྶཱ་ནཾ བུ་དྡྷོ བྷ་ག་ཝཱ་ཏི. ཨི་དཾ པ་ཋ་མཾ དེ་ཝཱ་ནཾ དེ་ཝ་པ་དཾ ཨ་ཝི་སུ་དྡྷཱ་ནཾ ས་ཏྟཱ་ནཾ ཝི་སུ་དྡྷི་ཡཱ ཨ་པ་རི་ཡོ་དཱ་ཏཱ་ནཾ ས་ཏྟཱ་ནཾ པ་རི་ཡོ་ད་པ་ནཱ་ཡ.
‘‘པུ་ན ཙ་པ་རཾ, བྷི་ཀྑ་ཝེ, ཨ་རི་ཡ་སཱ་ཝ་ཀོ དྷ་མྨེ…པེ… ས་ངྒྷེ…པེ….
‘‘པུ་ན ཙ་པ་རཾ, བྷི་ཀྑ་ཝེ, ཨ་རི་ཡ་སཱ་ཝ་ཀོ ཨ་རི་ཡ་ཀ་ནྟེ་ཧི སཱི་ལེ་ཧི ས་མ་ནྣཱ་ག་ཏོ ཧོ་ཏི ཨ་ཁ་ཎྜེ་ཧི…པེ… ས་མཱ་དྷི་སཾ་ཝ་ཏྟ་ནི་ཀེ་ཧི. ཨི་དཾ ཙ་ཏུ་ཏྠཾ དེ་ཝཱ་ནཾ དེ་ཝ་པ་དཾ ཨ་ཝི་སུ་དྡྷཱ་ནཾ ས་ཏྟཱ་ནཾ ཝི་སུ་དྡྷི་ཡཱ ཨ་པ་རི་ཡོ་དཱ་ཏཱ་ནཾ ས་ཏྟཱ་ནཾ པ་རི་ཡོ་ད་པ་ནཱ་ཡ. ཨི་མཱ་ནི ཁོ, བྷི་ཀྑ་ཝེ, ཙ་ཏྟཱ་རི དེ་ཝཱ་ནཾ དེ་ཝ་པ་དཱ་ནི ཨ་ཝི་སུ་དྡྷཱ་ནཾ ས་ཏྟཱ་ནཾ ཝི་སུ་དྡྷི་ཡཱ ཨ་པ་རི་ཡོ་དཱ་ཏཱ་ནཾ ས་ཏྟཱ་ནཾ པ་རི་ཡོ་ད་པ་ནཱ་ཡཱ’’ཏི. ཙ་ཏུ་ཏྠཾ.
༥. དུ་ཏི་ཡ་དེ་ཝ་པ་ད་སུ་ཏྟཾ
༡༠༣༡. ‘‘ཙ་ཏྟཱ་རི་མཱ་ནི, བྷི་ཀྑ་ཝེ, དེ་ཝཱ་ནཾ དེ་ཝ་པ་དཱ་ནི ཨ་ཝི་སུ་དྡྷཱ་ནཾ ས་ཏྟཱ་ནཾ ཝི་སུ་དྡྷི་ཡཱ ཨ་པ་རི་ཡོ་དཱ་ཏཱ་ནཾ ས་ཏྟཱ་ནཾ པ་རི་ཡོ་ད་པ་ནཱ་ཡ.
‘‘ཀ་ཏ་མཱ་ནི ཙ་ཏྟཱ་རི? ཨི་དྷ, བྷི་ཀྑ་ཝེ, ཨ་རི་ཡ་སཱ་ཝ་ཀོ བུ་དྡྷེ ཨ་ཝེ་ཙྩ་པྤ་སཱ་དེ་ན ས་མ་ནྣཱ་ག་ཏོ ཧོ་ཏི – ཨི་ཏི་པི སོ བྷ་ག་ཝཱ…པེ… ས་ཏྠཱ དེ་ཝ་མ་ནུ་སྶཱ་ནཾ བུ་དྡྷོ བྷ་ག་ཝཱ་ཏི. སོ ཨི་ཏི པ་ཊི་ས་ཉྩི་ཀྑ་ཏི – ‘ཀིཾ ནུ ཁོ དེ་ཝཱ་ནཾ དེ་ཝ་པ་ད’ནྟི? སོ ཨེ་ཝཾ པ་ཛཱ་ནཱ་ཏི – ‘ཨ་བྱཱ་བ་ཛ྄ཛྷ་པ་ར་མེ ཁྭཱ་ཧཾ ཨེ་ཏ་ར་ཧི དེ་ཝེ སུ་ཎཱ་མི. ན ཙ ཁོ པ་ནཱ་ཧཾ ཀི་ཉྩི བྱཱ་བཱ་དྷེ་མི ཏ་སཾ ཝཱ ཐཱ་ཝ་རཾ ཝཱ. ཨ་དྡྷཱ་ཧཾ དེ་ཝ་པ་ད་དྷ་མྨ་ས་མ་ནྣཱ་ག་ཏོ ཝི་ཧ་རཱ་མཱི’’’ཏི. ཨི་དཾ པ་ཋ་མཾ དེ་ཝཱ་ནཾ དེ་ཝ་པ་དཾ ཨ་ཝི་སུ་དྡྷཱ་ནཾ ས་ཏྟཱ་ནཾ ཝི་སུ་དྡྷི་ཡཱ ཨ་པ་རི་ཡོ་དཱ་ཏཱ་ནཾ ས་ཏྟཱ་ནཾ པ་རི་ཡོ་ད་པ་ནཱ་ཡ.
‘‘པུ་ན ཙ་པ་རཾ, བྷི་ཀྑ་ཝེ, ཨ་རི་ཡ་སཱ་ཝ་ཀོ དྷ་མྨེ…པེ… ས་ངྒྷེ…པེ….
‘‘པུ་ན ཙ་པ་རཾ, བྷི་ཀྑ་ཝེ, ཨ་རི་ཡ་སཱ་ཝ་ཀོ ཨ་རི་ཡ་ཀ་ནྟེ་ཧི སཱི་ལེ་ཧི ས་མ་ནྣཱ་ག་ཏོ ཧོ་ཏི ཨ་ཁ་ཎྜེ་ཧི…པེ… ས་མཱ་དྷི་སཾ་ཝ་ཏྟ་ནི་ཀེ་ཧི. སོ ཨི་ཏི པ་ཊི་ས་ཉྩི་ཀྑ་ཏི – ‘ཀིཾ ནུ ཁོ དེ་ཝཱ་ནཾ དེ་ཝ་པ་ད’ནྟི? སོ ཨེ་ཝཾ པ་ཛཱ་ནཱ་ཏི – ‘ཨ་བྱཱ་བ་ཛ྄ཛྷ་པ་ར་མེ ཁྭཱ་ཧཾ ཨེ་ཏ་ར་ཧི དེ་ཝེ སུ་ཎཱ་མི. ན ཁོ པ་ནཱ་ཧཾ ཀི་ཉྩི བྱཱ་བཱ་དྷེ་མི ཏ་སཾ ཝཱ ཐཱ་ཝ་རཾ ཝཱ. ཨ་དྡྷཱ་ཧཾ དེ་ཝ་པ་ད་དྷ་མྨ་ས་མ་ནྣཱ་ག་ཏོ ཝི་ཧ་རཱ་མཱི’ཏི. ཨི་དཾ ཙ་ཏུ་ཏྠཾ དེ་ཝཱ་ནཾ དེ་ཝ་པ་དཾ ཨ་ཝི་སུ་དྡྷཱ་ནཾ ས་ཏྟཱ་ནཾ ཝི་སུ་དྡྷི་ཡཱ ཨ་པ་རི་ཡོ་དཱ་ཏཱ་ནཾ ས་ཏྟཱ་ནཾ པ་རི་ཡོ་ད་པ་ནཱ་ཡ. ཨི་མཱ་ནི ཁོ, བྷི་ཀྑ་ཝེ, ཙ་ཏྟཱ་རི དེ་ཝཱ་ནཾ དེ་ཝ་པ་དཱ་ནི ཨ་ཝི་སུ་དྡྷཱ་ནཾ ས་ཏྟཱ་ནཾ ཝི་སུ་དྡྷི་ཡཱ ཨ་པ་རི་ཡོ་དཱ་ཏཱ་ནཾ ས་ཏྟཱ་ནཾ པ་རི་ཡོ་ད་པ་ནཱ་ཡཱ’’ཏི. པ་ཉྩ་མཾ.
༦. དེ་ཝ་ས་བྷཱ་ག་སུ་ཏྟཾ
༡༠༣༢. ‘‘ཙ་ཏཱུ་ཧི, བྷི་ཀྑ་ཝེ, དྷ་མྨེ་ཧི ས་མ་ནྣཱ་ག་ཏཾ ཨ་ཏྟ་མ་ནཱ དེ་ཝཱ ས་བྷཱ་ག་ཏཾ ཀ་ཐེ་ནྟི. ཀ་ཏ་མེ་ཧི ཙ་ཏཱུ་ཧི? ཨི་དྷ, བྷི་ཀྑ་ཝེ, ཨ་རི་ཡ་སཱ་ཝ་ཀོ བུ་དྡྷེ ཨ་ཝེ་ཙྩ་པྤ་སཱ་དེ་ན ས་མ་ནྣཱ་ག་ཏོ ཧོ་ཏི – ཨི་ཏི་པི སོ བྷ་ག་ཝཱ…པེ… ས་ཏྠཱ དེ་ཝ་མ་ནུ་སྶཱ་ནཾ བུ་དྡྷོ བྷ་ག་ཝཱ་ཏི. ཡཱ ཏཱ དེ་ཝ་ཏཱ བུ་དྡྷེ ཨ་ཝེ་ཙྩ་པྤ་སཱ་དེ་ན ས་མ་ནྣཱ་ག་ཏཱ ཨི་ཏོ ཙུ་ཏཱ ཏ་ཏྲཱུ་པ་པ་ནྣཱ ཏཱ་སཾ ཨེ་ཝཾ ཧོ་ཏི – ‘ཡ་ཐཱ་རཱུ་པེ་ན ཁོ མ་ཡཾ བུ་དྡྷེ ཨ་ཝེ་ཙྩ་པྤ་སཱ་དེ་ན ས་མ་ནྣཱ་ག་ཏཱ ཏ་ཏོ ཙུ་ཏཱ ཨི་དྷཱུ་པ་པ་ནྣཱ, ཨ་རི་ཡ་སཱ་ཝ་ཀོ་པི ཏ་ཐཱ་རཱུ་པེ་ན བུ་དྡྷེ ཨ་ཝེ་ཙྩ་པྤ་སཱ་དེ་ན ས་མ་ནྣཱ་ག་ཏོ ཨེ་ཧཱི་ཏི དེ་ཝཱ་ནཾ ས་ནྟི་ཀེ’’’ཏི.
‘‘པུ་ན ཙ་པ་རཾ, བྷི་ཀྑ་ཝེ, ཨ་རི་ཡ་སཱ་ཝ་ཀོ དྷ་མྨེ…པེ… ས་ངྒྷེ…པེ… ཨ་རི་ཡ་ཀ་ནྟེ་ཧི སཱི་ལེ་ཧི ས་མ་ནྣཱ་ག་ཏོ ཧོ་ཏི ཨ་ཁ་ཎྜེ་ཧི…པེ… ས་མཱ་དྷི་སཾ་ཝ་ཏྟ་ནི་ཀེ་ཧི. ཡཱ ཏཱ དེ་ཝ་ཏཱ ཨ་རི་ཡ་ཀ་ནྟེ་ཧི སཱི་ལེ་ཧི ས་མ་ནྣཱ་ག་ཏཱ ཨི་ཏོ ཙུ་ཏཱ ཏ་ཏྲཱུ་པ་པ་ནྣཱ ཏཱ་སཾ ཨེ་ཝཾ ཧོ་ཏི – ‘ཡ་ཐཱ་རཱུ་པེ་ཧི ཁོ མ་ཡཾ ཨ་རི་ཡ་ཀ་ནྟེ་ཧི སཱི་ལེ་ཧི ས་མ་ནྣཱ་ག་ཏཱ ཏ་ཏོ ཙུ་ཏཱ ཨི་དྷཱུ་པ་པ་ནྣཱ, ཨ་རི་ཡ་སཱ་ཝ་ཀོ་པི ཏ་ཐཱ་རཱུ་པེ་ཧི ཨ་རི་ཡ་ཀ་ནྟེ་ཧི སཱི་ལེ་ཧི ས་མ་ནྣཱ་ག་ཏོ ཨེ་ཧཱི་ཏི དེ་ཝཱ་ནཾ ས་ནྟི་ཀེ’ཏི. ཨི་མེ་ཧི ཁོ, བྷི་ཀྑ་ཝེ, ཙ་ཏཱུ་ཧི དྷ་མྨེ་ཧི ས་མ་ནྣཱ་ག་ཏཾ ཨ་ཏྟ་མ་ནཱ དེ་ཝཱ ས་བྷཱ་ག་ཏཾ ཀ་ཐེ་ནྟཱི’’ཏི. ཚ་ཊྛཾ.
༧. མ་ཧཱ་ནཱ་མ་སུ་ཏྟཾ
༡༠༣༣. ཨེ་ཀཾ ས་མ་ཡཾ བྷ་ག་ཝཱ ས་ཀྐེ་སུ ཝི་ཧ་ར་ཏི ཀ་པི་ལ་ཝ་ཏྠུ་སྨིཾ ནི་གྲོ་དྷཱ་རཱ་མེ. ཨ་ཐ ཁོ མ་ཧཱ་ནཱ་མོ ས་ཀྐོ ཡེ་ན བྷ་ག་ཝཱ ཏེ་ནུ་པ་ས་ངྐ་མི; ཨུ་པ་ས་ངྐ་མི་ཏྭཱ བྷ་ག་ཝ་ནྟཾ ཨ་བྷི་ཝཱ་དེ་ཏྭཱ ཨེ་ཀ་མ་ནྟཾ ནི་སཱི་དི. ཨེ་ཀ་མ་ནྟཾ ནི་སི་ནྣོ ཁོ མ་ཧཱ་ནཱ་མོ ས་ཀྐོ བྷ་ག་ཝ་ནྟཾ ཨེ་ཏ་ད་ཝོ་ཙ –
‘‘ཀི་ཏྟཱ་ཝ་ཏཱ ནུ ཁོ, བྷ་ནྟེ, ཨུ་པཱ་ས་ཀོ ཧོ་ཏཱི’’ཏི? ‘‘ཡ་ཏོ ཁོ, མ་ཧཱ་ནཱ་མ, བུ་དྡྷཾ ས་ར་ཎཾ ག་ཏོ ཧོ་ཏི, དྷ་མྨཾ ས་ར་ཎཾ ག་ཏོ ཧོ་ཏི, ས་ངྒྷཾ ས་ར་ཎཾ ག་ཏོ ཧོ་ཏི – ཨེ་ཏྟཱ་ཝ་ཏཱ ཁོ, མ་ཧཱ་ནཱ་མ, ཨུ་པཱ་ས་ཀོ ཧོ་ཏཱི’’ཏི.
‘‘ཀི་ཏྟཱ་ཝ་ཏཱ པ་ན, བྷ་ནྟེ, ཨུ་པཱ་ས་ཀོ སཱི་ལ་ས་མྤ་ནྣོ ཧོ་ཏཱི’’ཏི? ‘‘ཡ་ཏོ ཁོ, མ་ཧཱ་ནཱ་མ, ཨུ་པཱ་ས་ཀོ པཱ་ཎཱ་ཏི་པཱ་ཏཱ པ་ཊི་ཝི་ར་ཏོ ཧོ་ཏི, ཨ་དི་ནྣཱ་དཱ་ནཱ པ་ཊི་ཝི་ར་ཏོ ཧོ་ཏི, ཀཱ་མེ་སུ་མི་ཙྪཱ་ཙཱ་རཱ པ་ཊི་ཝི་ར་ཏོ ཧོ་ཏི, མུ་སཱ་ཝཱ་དཱ པ་ཊི་ཝི་ར་ཏོ ཧོ་ཏི, སུ་རཱ་མེ་ར་ཡ་མ་ཛྫ་པྤ་མཱ་ད་ཊྛཱ་ནཱ པ་ཊི་ཝི་ར་ཏོ ཧོ་ཏི, – ཨེ་ཏྟཱ་ཝ་ཏཱ ཁོ, མ་ཧཱ་ནཱ་མ, ཨུ་པཱ་ས་ཀོ སཱི་ལ་ས་མྤ་ནྣོ ཧོ་ཏཱི’’ཏི.
‘‘ཀི་ཏྟཱ་ཝ་ཏཱ པ་ན, བྷ་ནྟེ, ཨུ་པཱ་ས་ཀོ ས་དྡྷཱ་ས་མྤ་ནྣོ ཧོ་ཏཱི’’ཏི? ‘‘ཨི་དྷ, མ་ཧཱ་ནཱ་མ, ཨུ་པཱ་ས་ཀོ ས་དྡྷོ ཧོ་ཏི, ས་དྡ་ཧ་ཏི ཏ་ཐཱ་ག་ཏ་སྶ བོ་དྷིཾ – ཨི་ཏི་པི སོ བྷ་ག་ཝཱ…པེ… ས་ཏྠཱ དེ་ཝ་མ་ནུ་སྶཱ་ནཾ བུ་དྡྷོ བྷ་ག་ཝཱ་ཏི. ཨེ་ཏྟཱ་ཝ་ཏཱ ཁོ, མ་ཧཱ་ནཱ་མ, ཨུ་པཱ་ས་ཀོ ས་དྡྷཱ་ས་མྤ་ནྣོ ཧོ་ཏཱི’’ཏི.
‘‘ཀི་ཏྟཱ་ཝ་ཏཱ པ་ན, བྷ་ནྟེ, ཨུ་པཱ་ས་ཀོ ཙཱ་ག་ས་མྤ་ནྣོ ཧོ་ཏཱི’’ཏི? ‘‘ཨི་དྷ, མ་ཧཱ་ནཱ་མ, ཨུ་པཱ་ས་ཀོ ཝི་ག་ཏ་མ་ལ་མ་ཙྪེ་རེ་ན ཙེ་ཏ་སཱ ཨ་གཱ་རཾ ཨ་ཛ྄ཛྷཱ་ཝ་ས་ཏི མུ་ཏྟ་ཙཱ་གོ པ་ཡ་ཏ་པཱ་ཎི ཝོ་སྶ་གྒ་ར་ཏོ ཡཱ་ཙ་ཡོ་གོ དཱ་ན་སཾ་ཝི་བྷཱ་ག་ར་ཏོ – ཨེ་ཏྟཱ་ཝ་ཏཱ ཁོ, མ་ཧཱ་ནཱ་མ, ཨུ་པཱ་ས་ཀོ ཙཱ་ག་ས་མྤ་ནྣོ ཧོ་ཏཱི’’ཏི.
‘‘ཀི་ཏྟཱ་ཝ་ཏཱ པ་ན, བྷ་ནྟེ, ཨུ་པཱ་ས་ཀོ པ་ཉྙཱ་ས་མྤ་ནྣོ ཧོ་ཏཱི’’ཏི? ‘‘ཨི་དྷ, མ་ཧཱ་ནཱ་མ, ཨུ་པཱ་ས་ཀོ པ་ཉྙ་ཝཱ ཧོ་ཏི ཨུ་ད་ཡ་ཏྠ་གཱ་མི་ནི་ཡཱ པ་ཉྙཱ་ཡ ས་མ་ནྣཱ་ག་ཏོ ཨ་རི་ཡཱ་ཡ ནི་བྦེ་དྷི་ཀཱ་ཡ ས་མྨཱ དུ་ཀྑ་ཀྑ་ཡ་གཱ་མི་ནི་ཡཱ – ཨེ་ཏྟཱ་ཝ་ཏཱ ཁོ, མ་ཧཱ་ནཱ་མ, ཨུ་པཱ་ས་ཀོ པ་ཉྙཱ་ས་མྤ་ནྣོ ཧོ་ཏཱི’’ཏི. ས་ཏྟ་མཾ.
༨. ཝ་སྶ་སུ་ཏྟཾ
༡༠༣༤. ‘‘སེ་ཡྻ་ཐཱ་པི, བྷི་ཀྑ་ཝེ, ཨུ་པ་རི་པ་བྦ་ཏེ ཐུ་ལླ་ཕུ་སི་ཏ་ཀེ དེ་ཝེ ཝ་སྶ་ནྟེ ཏཾ ཨུ་ད་ཀཾ ཡ་ཐཱ་ནི་ནྣཾ པ་ཝ་ཏྟ་མཱ་ནཾ པ་བྦ་ཏ་ཀ་ནྡ་ར་པ་ད་ར་སཱ་ཁཱ པ་རི་པཱུ་རེ་ཏི, པ་བྦ་ཏ་ཀ་ནྡ་ར་པ་ད་ར་སཱ་ཁཱ པ་རི་པཱུ་རཱ ཀུ་སོ་བྦྷེ པ་རི་པཱུ་རེ་ནྟི, ཀུ་སོ་བྦྷཱ པ་རི་པཱུ་རཱ མ་ཧཱ་སོ་བྦྷེ པ་རི་པཱུ་རེ་ནྟི, མ་ཧཱ་སོ་བྦྷཱ པ་རི་པཱུ་རཱ ཀུ་ནྣ་དི་ཡོ པ་རི་པཱུ་རེ་ནྟི, ཀུ་ནྣ་དི་ཡོ པ་རི་པཱུ་རཱ མ་ཧཱ་ན་དི་ཡོ པ་རི་པཱུ་རེ་ནྟི, མ་ཧཱ་ན་དི་ཡོ པ་རི་པཱུ་རཱ མ་ཧཱ་ས་མུ་དྡཾ [མ་ཧཱ་ས་མུ་དྡ་སཱ་ག་རཾ (ས་བྦ་ཏྠ) སཾ. ནི. ༤.༧༠] པ་རི་པཱུ་རེ་ནྟི; ཨེ་ཝ་མེ་ཝ ཁོ, བྷི་ཀྑ་ཝེ, ཨ་རི་ཡ་སཱ་ཝ་ཀ་སྶ ཡོ ཙ བུ་དྡྷེ ཨ་ཝེ་ཙྩ་པྤ་སཱ་དོ, ཡོ ཙ དྷ་མྨེ ཨ་ཝེ་ཙྩ་པྤ་སཱ་དོ, ཡོ ཙ ས་ངྒྷེ ཨ་ཝེ་ཙྩ་པྤ་སཱ་དོ, ཡཱ་ནི ཙ ཨ་རི་ཡ་ཀ་ནྟཱ་ནི སཱི་ལཱ་ནི – ཨི་མེ དྷ་མྨཱ ས་ནྡ་མཱ་ནཱ པཱ་རཾ ག་ནྟྭཱ ཨཱ་ས་ཝཱ་ནཾ ཁ་ཡཱ་ཡ སཾ་ཝ་ཏྟ་ནྟཱི’’ཏི. ཨ་ཊྛ་མཾ.
༩. ཀཱ་ལི༹་གོ་དྷ་སུ་ཏྟཾ
༡༠༣༥. ཨེ་ཀཾ ས་མ་ཡཾ བྷ་ག་ཝཱ ས་ཀྐེ་སུ ཝི་ཧ་ར་ཏི ཀ་པི་ལ་ཝ་ཏྠུ་སྨིཾ ནི་གྲོ་དྷཱ་རཱ་མེ. ཨ་ཐ ཁོ བྷ་ག་ཝཱ པུ་བྦ་ཎྷ་ས་མ་ཡཾ ནི་ཝཱ་སེ་ཏྭཱ པ་ཏྟ་ཙཱི་ཝ་ར་མཱ་དཱ་ཡ ཡེ་ན ཀཱ་ལི༹་གོ་དྷཱ་ཡ སཱ་ཀི་ཡཱ་ནི་ཡཱ ནི་ཝེ་ས་ནཾ ཏེ་ནུ་པ་ས་ངྐ་མི; ཨུ་པ་ས་ངྐ་མི་ཏྭཱ པ་ཉྙ་ཏྟེ ཨཱ་ས་ནེ ནི་སཱི་དི. ཨ་ཐ ཁོ ཀཱ་ལི༹་གོ་དྷཱ སཱ་ཀི་ཡཱ་ནཱི ཡེ་ན བྷ་ག་ཝཱ ཏེ་ནུ་པ་ས་ངྐ་མི; ཨུ་པ་ས་ངྐ་མི་ཏྭཱ བྷ་ག་ཝ་ནྟཾ ཨ་བྷི་ཝཱ་དེ་ཏྭཱ ཨེ་ཀ་མ་ནྟཾ ནི་སཱི་དི. ཨེ་ཀ་མ་ནྟཾ ནི་སི་ནྣཾ ཁོ ཀཱ་ལི༹་གོ་དྷཾ སཱ་ཀི་ཡཱ་ནིཾ བྷ་ག་ཝཱ ཨེ་ཏ་ད་ཝོ་ཙ –
‘‘ཙ་ཏཱུ་ཧི ཁོ, གོ་དྷེ, དྷ་མྨེ་ཧི ས་མ་ནྣཱ་ག་ཏཱ ཨ་རི་ཡ་སཱ་ཝི་ཀཱ སོ་ཏཱ་པ་ནྣཱ ཧོ་ཏི ཨ་ཝི་ནི་པཱ་ཏ་དྷ་མྨཱ ནི་ཡ་ཏཱ ས་མྦོ་དྷི་པ་རཱ་ཡ་ཎཱ. ཀ་ཏ་མེ་ཧི ཙ་ཏཱུ་ཧི? ཨི་དྷ, གོ་དྷེ, ཨ་རི་ཡ་སཱ་ཝི་ཀཱ བུ་དྡྷེ ཨ་ཝེ་ཙྩ་པྤ་སཱ་དེ་ན ས་མ་ནྣཱ་ག་ཏཱ ཧོ་ཏི – ཨི་ཏི་པི སོ བྷ་ག་ཝཱ…པེ… ས་ཏྠཱ དེ་ཝ་མ་ནུ་སྶཱ་ནཾ བུ་དྡྷོ བྷ་ག་ཝཱ་ཏི. དྷ་མྨེ…པེ… ས་ངྒྷེ…པེ… ཝི་ག་ཏ་མ་ལ་མ་ཙྪེ་རེ་ན ཙེ་ཏ་སཱ ཨ་གཱ་རཾ ཨ་ཛ྄ཛྷཱ་ཝ་ས་ཏི མུ་ཏྟ་ཙཱ་གཱ པ་ཡ་ཏ་པཱ་ཎི་ནཱི [པ་ཡ་ཏ་པཱ་ཎཱི (ས་བྦ་ཏྠ) ༣.༣༠ མོ་གྒ་ལླཱ་ན་སུ་ཏྟཾ ཨོ་ལོ་ཀེ་ཏ་བྦཾ] ཝོ་སྶ་གྒ་ར་ཏཱ ཡཱ་ཙ་ཡོ་གཱ དཱ་ན་སཾ་ཝི་བྷཱ་ག་ར་ཏཱ. ཨི་མེ་ཧི ཁོ, གོ་དྷེ, ཙ་ཏཱུ་ཧི དྷ་མྨེ་ཧི ས་མ་ནྣཱ་ག་ཏཱ ཨ་རི་ཡ་སཱ་ཝི་ཀཱ སོ་ཏཱ་པ་ནྣཱ ཧོ་ཏི ཨ་ཝི་ནི་པཱ་ཏ་དྷ་མྨཱ ནི་ཡ་ཏཱ ས་མྦོ་དྷི་པ་རཱ་ཡ་ཎཱ’’ཏི.
‘‘ཡཱ་ནི་མཱ་ནི, བྷ་ནྟེ, བྷ་ག་ཝ་ཏཱ ཙ་ཏྟཱ་རི སོ་ཏཱ་པ་ཏྟི་ཡ་ངྒཱ་ནི དེ་སི་ཏཱ་ནི, སཾ་ཝི་ཛྫ་ནྟེ ཏེ དྷ་མྨཱ མ་ཡི, ཨ་ཧ་ཉྩ ཏེ་སུ དྷ་མྨེ་སུ ས་ནྡི་སྶཱ་མི. ཨ་ཧ་ཉྷི, བྷ་ནྟེ, བུ་དྡྷེ ཨ་ཝེ་ཙྩ་པྤ་སཱ་དེ་ན ས་མ་ནྣཱ་ག་ཏཱ – ཨི་ཏི་པི སོ བྷ་ག་ཝཱ…པེ… ས་ཏྠཱ དེ་ཝ་མ་ནུ་སྶཱ་ནཾ བུ་དྡྷོ བྷ་ག་ཝཱ་ཏི. དྷ་མྨེ…པེ… ས་ངྒྷེ…པེ… ཡཾ ཁོ པ་ན ཀི་ཉྩི ཀུ་ལེ དེ་ཡྻ་དྷ་མྨཾ ས་བྦཾ ཏཾ ཨ་པྤ་ཊི་ཝི་བྷ་ཏྟཾ སཱི་ལ་ཝ་ནྟེ་ཧི ཀ་ལྱཱ་ཎ་དྷ་མྨེ་ཧཱི’’ཏི. ‘‘ལཱ་བྷཱ ཏེ, གོ་དྷེ, སུ་ལ་དྡྷཾ ཏེ, གོ་དྷེ! སོ་ཏཱ་པ་ཏྟི་ཕ་ལཾ ཏ་ཡཱ, གོ་དྷེ, བྱཱ་ཀ་ཏ’’ནྟི. ན་ཝ་མཾ.
༡༠. ན་ནྡི་ཡ་ས་ཀྐ་སུ་ཏྟཾ
༡༠༣༦. ཨེ་ཀཾ ས་མ་ཡཾ བྷ་ག་ཝཱ ས་ཀྐེ་སུ ཝི་ཧ་ར་ཏི ཀ་པི་ལ་ཝ་ཏྠུ་སྨིཾ ནི་གྲོ་དྷཱ་རཱ་མེ. ཨ་ཐ ཁོ ན་ནྡི་ཡོ ས་ཀྐོ ཡེ་ན བྷ་ག་ཝཱ ཏེ་ནུ་པ་ས་ངྐ་མི; ཨུ་པ་ས་ངྐ་མི་ཏྭཱ བྷ་ག་ཝ་ནྟཾ ཨ་བྷི་ཝཱ་དེ་ཏྭཱ ཨེ་ཀ་མ་ནྟཾ ནི་སཱི་དི. ཨེ་ཀ་མ་ནྟཾ ནི་སི་ནྣོ ཁོ ན་ནྡི་ཡོ ས་ཀྐོ བྷ་ག་ཝ་ནྟཾ ཨེ་ཏ་ད་ཝོ་ཙ – ‘‘ཡ་སྶེ་ཝ ནུ ཁོ, བྷ་ནྟེ, ཨ་རི་ཡ་སཱ་ཝ་ཀ་སྶ ཙ་ཏྟཱ་རི སོ་ཏཱ་པ་ཏྟི་ཡ་ངྒཱ་ནི ས་བྦེ་ན ས་བྦཾ ས་བྦ་ཐཱ ས་བྦཾ ན་ཏྠི སྭེ་ཝ ནུ ཁོ, བྷ་ནྟེ, ཨ་རི་ཡ་སཱ་ཝ་ཀོ པ་མཱ་ད་ཝི་ཧཱ་རཱི’’ཏི.
‘‘‘ཡ་སྶ ཁོ, ན་ནྡི་ཡ, ཙ་ཏྟཱ་རི སོ་ཏཱ་པ་ཏྟི་ཡ་ངྒཱ་ནི ས་བྦེ་ན ས་བྦཾ ས་བྦ་ཐཱ ས་བྦཾ ན་ཏྠི ཏ་མ་ཧཾ བཱ་ཧི་རོ པུ་ཐུ་ཛྫ་ན་པ་ཀྑེ ཋི་ཏོ’ཏི ཝ་དཱ་མི. ཨ་པི ཙ, ན་ནྡི་ཡ, ཡ་ཐཱ ཨ་རི་ཡ་སཱ་ཝ་ཀོ པ་མཱ་ད་ཝི་ཧཱ་རཱི ཙེ་ཝ ཧོ་ཏི, ཨ་པྤ་མཱ་ད་ཝི་ཧཱ་རཱི ཙ ཏཾ སུ་ཎཱ་ཧི, སཱ་དྷུ་ཀཾ མ་ན་སི ཀ་རོ་ཧི; བྷཱ་སི་སྶཱ་མཱི’’ཏི. ‘‘ཨེ་ཝཾ, བྷ་ནྟེ’’ཏི ཁོ ན་ནྡི་ཡོ ས་ཀྐོ བྷ་ག་ཝ་ཏོ པ་ཙྩ་སྶོ་སི. བྷ་ག་ཝཱ ཨེ་ཏ་ད་ཝོ་ཙ –
‘‘ཀ་ཐ་ཉྩ, ན་ནྡི་ཡ, ཨ་རི་ཡ་སཱ་ཝ་ཀོ པ་མཱ་ད་ཝི་ཧཱ་རཱི ཧོ་ཏི? ཨི་དྷ ན་ནྡི་ཡ, ཨ་རི་ཡ་སཱ་ཝ་ཀོ བུ་དྡྷེ ཨ་ཝེ་ཙྩ་པྤ་སཱ་དེ་ན ས་མ་ནྣཱ་ག་ཏོ ཧོ་ཏི – ཨི་ཏི་པི སོ བྷ་ག་ཝཱ…པེ… ས་ཏྠཱ དེ་ཝ་མ་ནུ་སྶཱ་ནཾ བུ་དྡྷོ བྷ་ག་ཝཱ་ཏི. སོ ཏེ་ན བུ་དྡྷེ ཨ་ཝེ་ཙྩ་པྤ་སཱ་དེ་ན ས་ནྟུ་ཊྛོ ན ཨུ་ཏྟ་རི ཝཱ་ཡ་མ་ཏི དི་ཝཱ པ་ཝི་ཝེ་ཀཱ་ཡ, ར་ཏྟིཾ པ་ཊི་ས་ལླཱ་ནཱ་ཡ. ཏ་སྶ ཨེ་ཝཾ པ་མ་ཏྟ་སྶ ཝི་ཧ་ར་ཏོ པཱ་མོ་ཛྫཾ ན ཧོ་ཏི. པཱ་མོ་ཛྫེ ཨ་ས་ཏི, པཱི་ཏི ན ཧོ་ཏི. པཱི་ཏི་ཡཱ ཨ་ས་ཏི, པ་སྶ་དྡྷི ན ཧོ་ཏི. པ་སྶ་དྡྷི་ཡཱ ཨ་ས་ཏི, དུ་ཀྑཾ ཝི་ཧ་ར་ཏི. དུ་ཀྑི་ནོ ཙི་ཏྟཾ ན ས་མཱ་དྷི་ཡ་ཏི. ཨ་ས་མཱ་ཧི་ཏེ ཙི་ཏྟེ དྷ་མྨཱ ན པཱ་ཏུ་བྷ་ཝ་ནྟི. དྷ་མྨཱ་ནཾ ཨ་པཱ་ཏུ་བྷཱ་ཝཱ པ་མཱ་ད་ཝི་ཧཱ་རཱི ཏྭེ་ཝ ས་ངྑྱཾ ག་ཙྪ་ཏི.
‘‘པུ་ན ཙ་པ་རཾ, ན་ནྡི་ཡ, ཨ་རི་ཡ་སཱ་ཝ་ཀོ དྷ་མྨེ…པེ… ས་ངྒྷེ…པེ… ཨ་རི་ཡ་ཀ་ནྟེ་ཧི སཱི་ལེ་ཧི ས་མ་ནྣཱ་ག་ཏོ ཧོ་ཏི ཨ་ཁ་ཎྜེ་ཧི…པེ… ས་མཱ་དྷི་སཾ་ཝ་ཏྟ་ནི་ཀེ་ཧི. སོ ཏེ་ཧི ཨ་རི་ཡ་ཀ་ནྟེ་ཧི སཱི་ལེ་ཧི ས་ནྟུ་ཊྛོ ན ཨུ་ཏྟ་རི ཝཱ་ཡ་མ་ཏི དི་ཝཱ པ་ཝི་ཝེ་ཀཱ་ཡ ར་ཏྟིཾ པ་ཊི་ས་ལླཱ་ནཱ་ཡ. ཏ་སྶ ཨེ་ཝཾ པ་མ་ཏྟ་སྶ ཝི་ཧ་ར་ཏོ པཱ་མོ་ཛྫཾ ན ཧོ་ཏི. པཱ་མོ་ཛྫེ ཨ་ས་ཏི, པཱི་ཏི ན ཧོ་ཏི. པཱི་ཏི་ཡཱ ཨ་ས་ཏི, པ་སྶ་དྡྷི ན ཧོ་ཏི. པ་སྶ་དྡྷི་ཡཱ ཨ་ས་ཏི, དུ་ཀྑཾ ཝི་ཧ་ར་ཏི. དུ་ཀྑི་ནོ ཙི་ཏྟཾ ན ས་མཱ་དྷི་ཡ་ཏི. ཨ་ས་མཱ་ཧི་ཏེ ཙི་ཏྟེ དྷ་མྨཱ ན པཱ་ཏུ་བྷ་ཝ་ནྟི. དྷ་མྨཱ་ནཾ ཨ་པཱ་ཏུ་བྷཱ་ཝཱ པ་མཱ་ད་ཝི་ཧཱ་རཱི ཏྭེ་ཝ ས་ངྑྱཾ ག་ཙྪ་ཏི. ཨེ་ཝཾ ཁོ, ན་ནྡི་ཡ, ཨ་རི་ཡ་སཱ་ཝ་ཀོ པ་མཱ་ད་ཝི་ཧཱ་རཱི ཧོ་ཏི.
‘‘ཀ་ཐ་ཉྩ, ན་ནྡི་ཡ, ཨ་རི་ཡ་སཱ་ཝ་ཀོ ཨ་པྤ་མཱ་ད་ཝི་ཧཱ་རཱི ཧོ་ཏི? ཨི་དྷ, ན་ནྡི་ཡ, ཨ་རི་ཡ་སཱ་ཝ་ཀོ བུ་དྡྷེ ཨ་ཝེ་ཙྩ་པྤ་སཱ་དེ་ན ས་མ་ནྣཱ་ག་ཏོ ཧོ་ཏི – ཨི་ཏི་པི སོ བྷ་ག་ཝཱ…པེ… ས་ཏྠཱ དེ་ཝ་མ་ནུ་སྶཱ་ནཾ བུ་དྡྷོ བྷ་ག་ཝཱ་ཏི. སོ ཏེ་ན བུ་དྡྷེ ཨ་ཝེ་ཙྩ་པྤ་སཱ་དེ་ན ཨ་ས་ནྟུ་ཊྛོ ཨུ་ཏྟ་རི ཝཱ་ཡ་མ་ཏི དི་ཝཱ པ་ཝི་ཝེ་ཀཱ་ཡ ར་ཏྟིཾ པ་ཊི་ས་ལླཱ་ནཱ་ཡ. ཏ་སྶ ཨེ་ཝཾ ཨ་པྤ་མ་ཏྟ་སྶ ཝི་ཧ་ར་ཏོ པཱ་མོ་ཛྫཾ ཛཱ་ཡ་ཏི. པ་མུ་དི་ཏ་སྶ པཱི་ཏི ཛཱ་ཡ་ཏི. པཱི་ཏི་མ་ན་སྶ ཀཱ་ཡོ པ་སྶ་མྦྷ་ཏི. པ་སྶ་དྡྷ་ཀཱ་ཡོ སུ་ཁཾ ཝེ་དི་ཡ་ཏི. སུ་ཁི་ནོ ཙི་ཏྟཾ ས་མཱ་དྷི་ཡ་ཏི. ས་མཱ་ཧི་ཏེ ཙི་ཏྟེ དྷ་མྨཱ པཱ་ཏུ་བྷ་ཝ་ནྟི. དྷ་མྨཱ་ནཾ པཱ་ཏུ་བྷཱ་ཝཱ ཨ་པྤ་མཱ་ད་ཝི་ཧཱ་རཱི ཏྭེ་ཝ ས་ངྑྱཾ ག་ཙྪ་ཏི.
‘‘པུ་ན ཙ་པ་རཾ, ན་ནྡི་ཡ, ཨ་རི་ཡ་སཱ་ཝ་ཀོ དྷ་མྨེ…པེ… ས་ངྒྷེ…པེ… ཨ་རི་ཡ་ཀ་ནྟེ་ཧི སཱི་ལེ་ཧི ས་མ་ནྣཱ་ག་ཏོ ཧོ་ཏི ཨ་ཁ་ཎྜེ་ཧི…པེ… ས་མཱ་དྷི་སཾ་ཝ་ཏྟ་ནི་ཀེ་ཧི. སོ ཏེ་ཧི ཨ་རི་ཡ་ཀ་ནྟེ་ཧི སཱི་ལེ་ཧི ཨ་ས་ནྟུ་ཊྛོ ཨུ་ཏྟ་རི ཝཱ་ཡ་མ་ཏི དི་ཝཱ པ་ཝི་ཝེ་ཀཱ་ཡ ར་ཏྟིཾ པ་ཊི་ས་ལླཱ་ནཱ་ཡ. ཏ་སྶ ཨེ་ཝཾ ཨ་པྤ་མ་ཏྟ་སྶ ཝི་ཧ་ར་ཏོ པཱ་མོ་ཛྫཾ ཛཱ་ཡ་ཏི. པ་མུ་དི་ཏ་སྶ པཱི་ཏི ཛཱ་ཡ་ཏི. པཱི་ཏི་མ་ན་སྶ ཀཱ་ཡོ པ་སྶ་མྦྷ་ཏི. པ་སྶ་དྡྷ་ཀཱ་ཡོ སུ་ཁཾ ཝེ་དི་ཡ་ཏི. སུ་ཁི་ནོ ཙི་ཏྟཾ ས་མཱ་དྷི་ཡ་ཏི. ས་མཱ་ཧི་ཏེ ཙི་ཏྟེ དྷ་མྨཱ པཱ་ཏུ་བྷ་ཝ་ནྟི. དྷ་མྨཱ་ནཾ པཱ་ཏུ་བྷཱ་ཝཱ ཨ་པྤ་མཱ་ད་ཝི་ཧཱ་རཱི ཏྭེ་ཝ ས་ངྑྱཾ ག་ཙྪ་ཏི. ཨེ་ཝཾ ཁོ, ན་ནྡི་ཡ, ཨ་རི་ཡ་སཱ་ཝ་ཀོ ཨ་པྤ་མཱ་ད་ཝི་ཧཱ་རཱི ཧོ་ཏཱི’’ཏི. ད་ས་མཾ.
པུ་ཉྙཱ་བྷི་ས་ནྡ་ཝ་གྒོ ཙ་ཏུ་ཏྠོ.
ཏ་སྶུ་དྡཱ་ནཾ –
ཨ་བྷི་ས་ནྡཱ ཏ་ཡོ ཝུ་ཏྟཱ, དུ་ཝེ དེ་ཝ་པ་དཱ་ནི ཙ;
ས་བྷཱ་ག་ཏཾ མ་ཧཱ་ནཱ་མོ, ཝ་སྶཾ ཀཱ་ལཱི༹ ཙ ན་ནྡི་ཡཱ་ཏི.