༧. ཝེ་ལུ༹་དྭཱ་རེ་ཡྻ་སུ་ཏྟཾ
༡༠༠༣. ཨེ་ཝཾ མེ སུ་ཏཾ – ཨེ་ཀཾ ས་མ་ཡཾ བྷ་ག་ཝཱ ཀོ་ས་ལེ་སུ ཙཱ་རི་ཀཾ ཙ་ར་མཱ་ནོ མ་ཧ་ཏཱ བྷི་ཀྑུ་ས་ངྒྷེ་ན ས་དྡྷིཾ ཡེ་ན ཝེ་ལུ༹་དྭཱ་རཾ ནཱ་མ ཀོ་ས་ལཱ་ནཾ བྲཱ་ཧྨ་ཎ་གཱ་མོ ཏ་ད་ཝ་ས་རི. ཨ་སྶོ་སུཾ ཁོ ཏེ ཝེ་ལུ༹་དྭཱ་རེ་ཡྻ་ཀཱ བྲཱ་ཧྨ་ཎ་ག་ཧ་པ་ཏི་ཀཱ – ‘‘ས་མ་ཎོ ཁ་ལུ, བྷོ, གོ་ཏ་མོ ས་ཀྱ་པུ་ཏྟོ ས་ཀྱ་ཀུ་ལཱ པ་བྦ་ཛི་ཏོ ཀོ་ས་ལེ་སུ ཙཱ་རི་ཀཾ ཙ་ར་མཱ་ནོ མ་ཧ་ཏཱ བྷི་ཀྑུ་ས་ངྒྷེ་ན ས་དྡྷིཾ ཝེ་ལུ༹་དྭཱ་རཾ ཨ་ནུ་པྤ་ཏྟོ. ཏཾ ཁོ པ་ན བྷ་ཝ་ནྟཾ གོ་ཏ་མཾ ཨེ་ཝཾ ཀ་ལྱཱ་ཎོ ཀི་ཏྟི་ས་དྡོ ཨ་བྦྷུ་གྒ་ཏོ – ‘ཨི་ཏི་པི སོ བྷ་ག་ཝཱ ཨ་ར་ཧཾ ས་མྨཱ་ས་མྦུ་དྡྷོ ཝི་ཛྫཱ་ཙ་ར་ཎ་ས་མྤ་ནྣོ སུ་ག་ཏོ ལོ་ཀ་ཝི་དཱུ ཨ་ནུ་ཏྟ་རོ པུ་རི་ས་ད་མྨ་སཱ་ར་ཐི ས་ཏྠཱ དེ་ཝ་མ་ནུ་སྶཱ་ནཾ བུ་དྡྷོ བྷ་ག་ཝཱ [བྷ་ག་ཝཱ་ཏི (སཱི. སྱཱ. ཀཾ. པཱི.)]. སོ ཨི་མཾ ལོ་ཀཾ ས་དེ་ཝ་ཀཾ ས་མཱ་ར་ཀཾ ས་བྲ་ཧྨ་ཀཾ ས་སྶ་མ་ཎ་བྲཱ་ཧྨ་ཎིཾ པ་ཛཾ ས་དེ་ཝ་མ་ནུ་སྶཾ ས་ཡཾ ཨ་བྷི་ཉྙཱ ས་ཙྪི་ཀ་ཏྭཱ པ་ཝེ་དེ་ཏི. སོ དྷ་མྨཾ དེ་སེ་ཏི ཨཱ་དི་ཀ་ལྱཱ་ཎཾ མ་ཛ྄ཛྷེ་ཀ་ལྱཱ་ཎཾ པ་རི་ཡོ་སཱ་ན་ཀ་ལྱཱ་ཎཾ སཱ་ཏྠཾ ས་བྱ་ཉྫ་ནཾ, ཀེ་ཝ་ལ་པ་རི་པུ་ཎྞཾ པ་རི་སུ་དྡྷཾ བྲ་ཧྨ་ཙ་རི་ཡཾ པ་ཀཱ་སེ་ཏི’. སཱ་དྷུ ཁོ པ་ན ཏ་ཐཱ་རཱུ་པཱ་ནཾ ཨ་ར་ཧ་ཏཾ ད་སྶ་ནཾ ཧོ་ཏཱི’’ཏི.
ཨ་ཐ ཁོ ཏེ ཝེ་ལུ༹་དྭཱ་རེ་ཡྻ་ཀཱ བྲཱ་ཧྨ་ཎ་ག་ཧ་པ་ཏི་ཀཱ ཡེ་ན བྷ་ག་ཝཱ ཏེ་ནུ་པ་ས་ངྐ་མིཾ་སུ; ཨུ་པ་ས་ངྐ་མི་ཏྭཱ ཨ་པྤེ་ཀ་ཙྩེ བྷ་ག་ཝ་ནྟཾ ཨ་བྷི་ཝཱ་དེ་ཏྭཱ ཨེ་ཀ་མ་ནྟཾ ནི་སཱི་དིཾ་སུ. ཨ་པྤེ་ཀ་ཙྩེ བྷ་ག་ཝ་ཏཱ ས་དྡྷིཾ ས་མྨོ་དིཾ་སུ; ས་མྨོ་ད་ནཱི་ཡཾ ཀ་ཐཾ སཱ་ར་ཎཱི་ཡཾ ཝཱི་ཏི་སཱ་རེ་ཏྭཱ ཨེ་ཀ་མ་ནྟཾ ནི་སཱི་དིཾ་སུ. ཨ་པྤེ་ཀ་ཙྩེ ཡེ་ན བྷ་ག་ཝཱ ཏེ་ན་ཉྫ་ལིཾ པ་ཎཱ་མེ་ཏྭཱ ཨེ་ཀ་མ་ནྟཾ ནི་སཱི་དིཾ་སུ. ཨ་པྤེ་ཀ་ཙྩེ བྷ་ག་ཝ་ཏོ ས་ནྟི་ཀེ ནཱ་མ་གོ་ཏྟཾ སཱ་ཝེ་ཏྭཱ ཨེ་ཀ་མ་ནྟཾ ནི་སཱི་དིཾ་སུ. ཨ་པྤེ་ཀ་ཙྩེ ཏུ་ཎྷཱི་བྷཱུ་ཏཱ ཨེ་ཀ་མ་ནྟཾ ནི་སཱི་དིཾ་སུ. ཨེ་ཀ་མ་ནྟཾ ནི་སི་ནྣཱ ཁོ ཏེ ཝེ་ལུ༹་དྭཱ་རེ་ཡྻ་ཀཱ བྲཱ་ཧྨ་ཎ་ག་ཧ་པ་ཏི་ཀཱ བྷ་ག་ཝ་ནྟཾ ཨེ་ཏ་ད་ཝོ་ཙུཾ – ‘‘མ་ཡཾ, བྷོ གོ་ཏ་མ, ཨེ་ཝཾ་ཀཱ་མཱ ཨེ་ཝཾ་ཚ་ནྡཱ ཨེ་ཝཾ་ཨ་དྷི་པྤཱ་ཡཱ – པུ་ཏྟ་ས་མྦཱ་དྷ་ས་ཡ་ནཾ ཨ་ཛ྄ཛྷཱ་ཝ་སེ་ཡྻཱ་མ, ཀཱ་སི་ཀ་ཙ་ནྡ་ནཾ པ་ཙྩ་ནུ་བྷ་ཝེ་ཡྻཱ་མ, མཱ་ལཱ་ག་ནྡྷ་ཝི་ལེ་པ་ནཾ དྷཱ་རེ་ཡྻཱ་མ, ཛཱ་ཏ་རཱུ་པ་ར་ཛ་ཏཾ སཱ་དི་ཡེ་ཡྻཱ་མ, ཀཱ་ཡ་སྶ བྷེ་དཱ པ་རཾ མ་ར་ཎཱ སུ་ག་ཏིཾ ས་གྒཾ ལོ་ཀཾ ཨུ་པ་པ་ཛྫེ་ཡྻཱ་མ. ཏེ་སཾ ནོ བྷ་ཝཾ གོ་ཏ་མོ ཨ་མྷཱ་ཀཾ ཨེ་ཝཾ་ཀཱ་མཱ་ནཾ ཨེ་ཝཾ་ཚ་ནྡཱ་ནཾ ཨེ་ཝཾ་ཨ་དྷི་པྤཱ་ཡཱ་ནཾ ཏ་ཐཱ དྷ་མྨཾ དེ་སེ་ཏུ ཡ་ཐཱ མ་ཡཾ པུ་ཏྟ་ས་མྦཱ་དྷ་ས་ཡ་ནཾ ཨ་ཛ྄ཛྷཱ་ཝ་སེ་ཡྻཱ་མ…པེ… སུ་ག་ཏིཾ ས་གྒཾ ལོ་ཀཾ ཨུ་པ་པ་ཛྫེ་ཡྻཱ་མཱ’’ཏི.
‘‘ཨ་ཏྟཱུ་པ་ནཱ་ཡི་ཀཾ ཝོ, ག་ཧ་པ་ཏ་ཡོ, དྷ་མྨ་པ་རི་ཡཱ་ཡཾ དེ་སེ་སྶཱ་མི. ཏཾ སུ་ཎཱ་ཐ, སཱ་དྷུ་ཀཾ མ་ན་སི ཀ་རོ་ཐ; བྷཱ་སི་སྶཱ་མཱི’’ཏི. ‘‘ཨེ་ཝཾ, བྷོ’’ཏི ཁོ ཏེ ཝེ་ལུ༹་དྭཱ་རེ་ཡྻ་ཀཱ བྲཱ་ཧྨ་ཎ་ག་ཧ་པ་ཏི་ཀཱ བྷ་ག་ཝ་ཏོ པ་ཙྩ་སྶོ་སུཾ. བྷ་ག་ཝཱ ཨེ་ཏ་ད་ཝོ་ཙ –
‘‘ཀ་ཏ་མོ ཙ, ག་ཧ་པ་ཏ་ཡོ, ཨ་ཏྟུ་པ་ནཱ་ཡི་ཀོ དྷ་མྨ་པ་རི་ཡཱ་ཡོ? ཨི་དྷ, ག་ཧ་པ་ཏ་ཡོ, ཨ་རི་ཡ་སཱ་ཝ་ཀོ ཨི་ཏི པ་ཊི་ས་ཉྩི་ཀྑ་ཏི – ‘ཨ་ཧཾ ཁོ་སྨི ཛཱི་ཝི་ཏུ་ཀཱ་མོ ཨ་མ་རི་ཏུ་ཀཱ་མོ སུ་ཁ་ཀཱ་མོ དུ་ཀྑ་པྤ་ཊི་ཀཱུ་ལོ. ཡོ ཁོ མཾ ཛཱི་ཝི་ཏུ་ཀཱ་མཾ ཨ་མ་རི་ཏུ་ཀཱ་མཾ སུ་ཁ་ཀཱ་མཾ དུ་ཀྑ་པྤ་ཊི་ཀཱུ་ལཾ ཛཱི་ཝི་ཏཱ ཝོ་རོ་པེ་ཡྻ, ན མེ་ཏཾ ཨ་སྶ པི་ཡཾ མ་ནཱ་པཾ. ཨ་ཧ་ཉྩེ་ཝ ཁོ པ་ན པ་རཾ ཛཱི་ཝི་ཏུ་ཀཱ་མཾ ཨ་མ་རི་ཏུ་ཀཱ་མཾ སུ་ཁ་ཀཱ་མཾ དུ་ཀྑ་པྤ་ཊི་ཀཱུ་ལཾ ཛཱི་ཝི་ཏཱ ཝོ་རོ་པེ་ཡྻཾ, པ་ར་སྶ་པི ཏཾ ཨ་སྶ ཨ་པྤི་ཡཾ ཨ་མ་ནཱ་པཾ. ཡོ ཁོ མྱཱ་ཡཾ དྷ་མྨོ ཨ་པྤི་ཡོ ཨ་མ་ནཱ་པོ, པ་ར་སྶ པེ་སོ དྷ་མྨོ ཨ་པྤི་ཡོ ཨ་མ་ནཱ་པོ. ཡོ ཁོ མྱཱ་ཡཾ དྷ་མྨོ ཨ་པྤི་ཡོ ཨ་མ་ནཱ་པོ, ཀ་ཐཱ་ཧཾ པ་རཾ ཏེ་ན སཾ་ཡོ་ཛེ་ཡྻ’ནྟི! སོ ཨི་ཏི པ་ཊི་ས་ངྑཱ་ཡ ཨ་ཏྟ་ནཱ ཙ པཱ་ཎཱ་ཏི་པཱ་ཏཱ པ་ཊི་ཝི་ར་ཏོ ཧོ་ཏི, པ་ར་ཉྩ པཱ་ཎཱ་ཏི་པཱ་ཏཱ ཝེ་ར་མ་ཎི་ཡཱ ས་མཱ་ད་པེ་ཏི, པཱ་ཎཱ་ཏི་པཱ་ཏཱ ཝེ་ར་མ་ཎི་ཡཱ ཙ ཝ་ཎྞཾ བྷཱ་ས་ཏི. ཨེ་ཝ་མ་སྶཱ་ཡཾ ཀཱ་ཡ་ས་མཱ་ཙཱ་རོ ཏི་ཀོ་ཊི་པ་རི་སུ་དྡྷོ ཧོ་ཏི.
‘‘པུ་ན ཙ་པ་རཾ, ག་ཧ་པ་ཏ་ཡོ, ཨ་རི་ཡ་སཱ་ཝ་ཀོ ཨི་ཏི པ་ཊི་ས་ཉྩི་ཀྑ་ཏི – ‘ཡོ ཁོ མེ ཨ་དི་ནྣཾ ཐེ་ཡྻ་ས་ངྑཱ་ཏཾ ཨཱ་དི་ཡེ་ཡྻ, ན མེ་ཏཾ ཨ་སྶ པི་ཡཾ མ་ནཱ་པཾ. ཨ་ཧ་ཉྩེ་ཝ ཁོ པ་ན པ་ར་སྶ ཨ་དི་ནྣཾ ཐེ་ཡྻ་ས་ངྑཱ་ཏཾ ཨཱ་དི་ཡེ་ཡྻཾ, པ་ར་སྶ་པི ཏཾ ཨ་སྶ ཨ་པྤི་ཡཾ ཨ་མ་ནཱ་པཾ. ཡོ ཁོ མྱཱ་ཡཾ དྷ་མྨོ ཨ་པྤི་ཡོ ཨ་མ་ནཱ་པོ, པ་ར་སྶ པེ་སོ དྷ་མྨོ ཨ་པྤི་ཡོ ཨ་མ་ནཱ་པོ. ཡོ ཁོ མྱཱ་ཡཾ དྷ་མྨོ ཨ་པྤི་ཡོ ཨ་མ་ནཱ་པོ, ཀ་ཐཱ་ཧཾ པ་རཾ ཏེ་ན སཾ་ཡོ་ཛེ་ཡྻ’ནྟི! སོ ཨི་ཏི པ་ཊི་ས་ངྑཱ་ཡ ཨ་ཏྟ་ནཱ ཙ ཨ་དི་ནྣཱ་དཱ་ནཱ པ་ཊི་ཝི་ར་ཏོ ཧོ་ཏི, པ་ར་ཉྩ ཨ་དི་ནྣཱ་དཱ་ནཱ ཝེ་ར་མ་ཎི་ཡཱ ས་མཱ་ད་པེ་ཏི, ཨ་དི་ནྣཱ་དཱ་ནཱ ཝེ་ར་མ་ཎི་ཡཱ ཙ ཝ་ཎྞཾ བྷཱ་ས་ཏི. ཨེ་ཝ་མ་སྶཱ་ཡཾ ཀཱ་ཡ་ས་མཱ་ཙཱ་རོ ཏི་ཀོ་ཊི་པ་རི་སུ་དྡྷོ ཧོ་ཏི.
‘‘པུ་ན ཙ་པ་རཾ, ག་ཧ་པ་ཏ་ཡོ, ཨ་རི་ཡ་སཱ་ཝ་ཀོ ཨི་ཏི པ་ཊི་ས་ཉྩི་ཀྑ་ཏི – ‘ཡོ ཁོ མེ དཱ་རེ་སུ ཙཱ་རི་ཏྟཾ ཨཱ་པ་ཛྫེ་ཡྻ, ན མེ་ཏཾ ཨ་སྶ པི་ཡཾ མ་ནཱ་པཾ. ཨ་ཧ་ཉྩེ་ཝ ཁོ པ་ན པ་ར་སྶ དཱ་རེ་སུ ཙཱ་རི་ཏྟཾ ཨཱ་པ་ཛྫེ་ཡྻཾ, པ་ར་སྶ་པི ཏཾ ཨ་སྶ ཨ་པྤི་ཡཾ ཨ་མ་ནཱ་པཾ. ཡོ ཁོ མྱཱ་ཡཾ དྷ་མྨོ ཨ་པྤི་ཡོ ཨ་མ་ནཱ་པོ, པ་ར་སྶ པེ་སོ དྷ་མྨོ ཨ་པྤི་ཡོ ཨ་མ་ནཱ་པོ. ཡོ ཁོ མྱཱ་ཡཾ དྷ་མྨོ ཨ་པྤི་ཡོ ཨ་མ་ནཱ་པོ, ཀ་ཐཱ་ཧཾ པ་རཾ ཏེ་ན སཾ་ཡོ་ཛེ་ཡྻ’ནྟི! སོ ཨི་ཏི པ་ཊི་ས་ངྑཱ་ཡ ཨ་ཏྟ་ནཱ ཙ ཀཱ་མེ་སུ་མི་ཙྪཱ་ཙཱ་རཱ པ་ཊི་ཝི་ར་ཏོ ཧོ་ཏི, པ་ར་ཉྩ ཀཱ་མེ་སུ་མི་ཙྪཱ་ཙཱ་རཱ ཝེ་ར་མ་ཎི་ཡཱ ས་མཱ་ད་པེ་ཏི, ཀཱ་མེ་སུ་མི་ཙྪཱ་ཙཱ་རཱ ཝེ་ར་མ་ཎི་ཡཱ ཙ ཝ་ཎྞཾ བྷཱ་ས་ཏི. ཨེ་ཝ་མ་སྶཱ་ཡཾ ཀཱ་ཡ་ས་མཱ་ཙཱ་རོ ཏི་ཀོ་ཊི་པ་རི་སུ་དྡྷོ ཧོ་ཏི.
‘‘པུ་ན ཙ་པ་རཾ, ག་ཧ་པ་ཏ་ཡོ, ཨ་རི་ཡ་སཱ་ཝ་ཀོ ཨི་ཏི པ་ཊི་ས་ཉྩི་ཀྑ་ཏི – ‘ཡོ ཁོ མེ མུ་སཱ་ཝཱ་དེ་ན ཨ་ཏྠཾ བྷ་ཉྫེ་ཡྻ, ན མེ་ཏཾ ཨ་སྶ པི་ཡཾ མ་ནཱ་པཾ. ཨ་ཧ་ཉྩེ་ཝ ཁོ པ་ན པ་ར་སྶ མུ་སཱ་ཝཱ་དེ་ན ཨ་ཏྠཾ བྷ་ཉྫེ་ཡྻཾ, པ་ར་སྶ་པི ཏཾ ཨ་སྶ ཨ་པྤི་ཡཾ ཨ་མ་ནཱ་པཾ. ཡོ ཁོ མྱཱ་ཡཾ དྷ་མྨོ ཨ་པྤི་ཡོ ཨ་མ་ནཱ་པོ, པ་ར་སྶ པེ་སོ དྷ་མྨོ ཨ་པྤི་ཡོ ཨ་མ་ནཱ་པོ. ཡོ ཁོ མྱཱ་ཡཾ དྷ་མྨོ ཨ་པྤི་ཡོ ཨ་མ་ནཱ་པོ, ཀ་ཐཱ་ཧཾ པ་རཾ ཏེ་ན སཾ་ཡོ་ཛེ་ཡྻ’ནྟི! སོ ཨི་ཏི པ་ཊི་ས་ངྑཱ་ཡ ཨ་ཏྟ་ནཱ ཙ མུ་སཱ་ཝཱ་དཱ པ་ཊི་ཝི་ར་ཏོ ཧོ་ཏི, པ་ར་ཉྩ མུ་སཱ་ཝཱ་དཱ ཝེ་ར་མ་ཎི་ཡཱ ས་མཱ་ད་པེ་ཏི, མུ་སཱ་ཝཱ་དཱ ཝེ་ར་མ་ཎི་ཡཱ ཙ ཝ་ཎྞཾ བྷཱ་ས་ཏི. ཨེ་ཝ་མ་སྶཱ་ཡཾ ཝ་ཙཱི་ས་མཱ་ཙཱ་རོ ཏི་ཀོ་ཊི་པ་རི་སུ་དྡྷོ ཧོ་ཏི.
‘‘པུ་ན ཙ་པ་རཾ, ག་ཧ་པ་ཏ་ཡོ, ཨ་རི་ཡ་སཱ་ཝ་ཀོ ཨི་ཏི པ་ཊི་ས་ཉྩི་ཀྑ་ཏི – ཡོ ཁོ མཾ པི་སུ་ཎཱ་ཡ ཝཱ་ཙཱ་ཡ མི་ཏྟེ བྷི་ནྡེ་ཡྻ [མི་ཏྟེ་ཧི བྷེ་དེ་ཡྻ (སྱཱ. ཀཾ. པཱི. ཀ.)], ན མེ་ཏཾ ཨ་སྶ པི་ཡཾ མ་ནཱ་པཾ. ཨ་ཧ་ཉྩེ་ཝ ཁོ པ་ན པ་རཾ པི་སུ་ཎཱ་ཡ ཝཱ་ཙཱ་ཡ མི་ཏྟེ བྷི་ནྡེ་ཡྻཾ, པ་ར་སྶ་པི ཏཾ ཨ་སྶ ཨ་པྤི་ཡཾ ཨ་མ་ནཱ་པཾ…པེ… ཨེ་ཝ་མ་སྶཱ་ཡཾ ཝ་ཙཱི་ས་མཱ་ཙཱ་རོ ཏི་ཀོ་ཊི་པ་རི་སུ་དྡྷོ ཧོ་ཏི.
‘‘པུ་ན ཙ་པ་རཾ, ག་ཧ་པ་ཏ་ཡོ, ཨ་རི་ཡ་སཱ་ཝ་ཀོ ཨི་ཏི པ་ཊི་ས་ཉྩི་ཀྑ་ཏི – ཡོ ཁོ མཾ ཕ་རུ་སཱ་ཡ ཝཱ་ཙཱ་ཡ ས་མུ་དཱ་ཙ་རེ་ཡྻ, ན མེ་ཏཾ ཨ་སྶ པི་ཡཾ མ་ནཱ་པཾ. ཨ་ཧ་ཉྩེ་ཝ ཁོ པ་ན པ་རཾ ཕ་རུ་སཱ་ཡ ཝཱ་ཙཱ་ཡ ས་མུ་དཱ་ཙ་རེ་ཡྻཾ, པ་ར་སྶ་པི ཏཾ ཨ་སྶ ཨ་པྤི་ཡཾ ཨ་མ་ནཱ་པཾ. ཡོ ཁོ མྱཱ་ཡཾ དྷ་མྨོ…པེ… ཨེ་ཝ་མ་སྶཱ་ཡཾ ཝ་ཙཱི་ས་མཱ་ཙཱ་རོ ཏི་ཀོ་ཊི་པ་རི་སུ་དྡྷོ ཧོ་ཏི.
‘‘པུ་ན ཙ་པ་རཾ, ག་ཧ་པ་ཏ་ཡོ, ཨ་རི་ཡ་སཱ་ཝ་ཀོ ཨི་ཏི པ་ཊི་ས་ཉྩི་ཀྑ་ཏི – ‘ཡོ ཁོ མཾ ས་མྥ་བྷཱ་སེ་ན ས་མྥ་པྤ་ལཱ་པ་བྷཱ་སེ་ན ས་མུ་དཱ་ཙ་རེ་ཡྻ, ན མེ་ཏཾ ཨ་སྶ པི་ཡཾ མ་ནཱ་པཾ. ཨ་ཧ་ཉྩེ་ཝ ཁོ པ་ན པ་རཾ ས་མྥ་བྷཱ་སེ་ན ས་མྥ་པྤ་ལཱ་པ་བྷཱ་སེ་ན ས་མུ་དཱ་ཙ་རེ་ཡྻཾ, པ་ར་སྶ་པི ཏཾ ཨ་སྶ ཨ་པྤི་ཡཾ ཨ་མ་ནཱ་པཾ. ཡོ ཁོ མྱཱ་ཡཾ དྷ་མྨོ ཨ་པྤི་ཡོ ཨ་མ་ནཱ་པོ, པ་ར་སྶ པེ་སོ དྷ་མྨོ ཨ་པྤི་ཡོ ཨ་མ་ནཱ་པོ. ཡོ ཁོ མྱཱ་ཡཾ དྷ་མྨོ ཨ་པྤི་ཡོ ཨ་མ་ནཱ་པོ, ཀ་ཐཱ་ཧཾ པ་རཾ ཏེ་ན སཾ་ཡོ་ཛེ་ཡྻ’ནྟི! སོ ཨི་ཏི པ་ཊི་ས་ངྑཱ་ཡ ཨ་ཏྟ་ནཱ ཙ ས་མྥ་པྤ་ལཱ་པཱ པ་ཊི་ཝི་ར་ཏོ ཧོ་ཏི, པ་ར་ཉྩ ས་མྥ་པྤ་ལཱ་པཱ ཝེ་ར་མ་ཎི་ཡཱ ས་མཱ་ད་པེ་ཏི, ས་མྥ་པྤ་ལཱ་པཱ ཝེ་ར་མ་ཎི་ཡཱ ཙ ཝ་ཎྞཾ བྷཱ་ས་ཏི. ཨེ་ཝ་མ་སྶཱ་ཡཾ ཝ་ཙཱི་ས་མཱ་ཙཱ་རོ ཏི་ཀོ་ཊི་པ་རི་སུ་དྡྷོ ཧོ་ཏི.
‘‘སོ བུ་དྡྷེ ཨ་ཝེ་ཙྩ་པྤ་སཱ་དེ་ན ས་མ་ནྣཱ་ག་ཏོ ཧོ་ཏི – ཨི་ཏི་པི སོ བྷ་ག་ཝཱ…པེ… ས་ཏྠཱ དེ་ཝ་མ་ནུ་སྶཱ་ནཾ བུ་དྡྷོ བྷ་ག་ཝཱ་ཏི; དྷ་མྨེ …པེ… ས་ངྒྷེ ཨ་ཝེ་ཙྩ་པྤ་སཱ་དེ་ན ས་མ་ནྣཱ་ག་ཏོ ཧོ་ཏི སུ་པྤ་ཊི་པ་ནྣོ བྷ་ག་ཝ་ཏོ སཱ་ཝ་ཀ་ས་ངྒྷོ…པེ… ཨ་ནུ་ཏྟ་རཾ པུ་ཉྙ་ཀྑེ་ཏྟཾ ལོ་ཀ་སྶཱ་ཏི. ཨ་རི་ཡ་ཀ་ནྟེ་ཧི སཱི་ལེ་ཧི ས་མ་ནྣཱ་ག་ཏོ ཧོ་ཏི ཨ་ཁ་ཎྜེ་ཧི…པེ… ས་མཱ་དྷི་སཾ་ཝ་ཏྟ་ནི་ཀེ་ཧི. ཡ་ཏོ ཁོ, ག་ཧ་པ་ཏ་ཡོ, ཨ་རི་ཡ་སཱ་ཝ་ཀོ ཨི་མེ་ཧི ས་ཏྟ་ཧི ས་དྡྷ་མྨེ་ཧི [དྷ་མྨེ་ཧི (སཱི.)] ས་མ་ནྣཱ་ག་ཏོ ཧོ་ཏི ཨི་མེ་ཧི ཙ་ཏཱུ་ཧི ཨཱ་ཀ་ངྑི་ཡེ་ཧི ཋཱ་ནེ་ཧི, སོ ཨཱ་ཀ་ངྑ་མཱ་ནོ ཨ་ཏྟ་ནཱ་ཝ ཨ་ཏྟཱ་ནཾ བྱཱ་ཀ་རེ་ཡྻ – ‘ཁཱི་ཎ་ནི་ར་ཡོ་མྷི ཁཱི་ཎ་ཏི་ར་ཙྪཱ་ན་ཡོ་ནི [ཁཱི་ཎ་ཏི་ར་ཙྪཱ་ན་ཡོ་ནི་ཡོ (སཱི. སྱཱ. ཀཾ. པཱི.), ཁཱི་ཎ་ཏི་ར་ཙྪཱ་ན་ཡོ་ནི་ཀོ (ཀ.)] ཁཱི་ཎ་པེ་ཏྟི་ཝི་ས་ཡོ ཁཱི་ཎཱ་པཱ་ཡ་དུ་གྒ་ཏི་ཝི་ནི་པཱ་ཏོ, སོ་ཏཱ་པ་ནྣོ་ཧ་མ་སྨི ཨ་ཝི་ནི་པཱ་ཏ་དྷ་མྨོ ནི་ཡ་ཏོ ས་མྦོ་དྷི་པ་རཱ་ཡ་ཎོ’’’ཏི.
ཨེ་ཝཾ ཝུ་ཏྟེ ཝེ་ལུ༹་དྭཱ་རེ་ཡྻ་ཀཱ བྲཱ་ཧྨ་ཎ་ག་ཧ་པ་ཏི་ཀཱ བྷ་ག་ཝ་ནྟཾ ཨེ་ཏ་ད་ཝོ་ཙུཾ – ‘‘ཨ་བྷི་ཀྐ་ནྟཾ, བྷོ གོ་ཏ་མ…པེ… ཨེ་ཏེ མ་ཡཾ བྷ་ཝ་ནྟཾ གོ་ཏ་མཾ ས་ར་ཎཾ ག་ཙྪཱ་མ དྷ་མྨ་ཉྩ བྷི་ཀྑུ་ས་ངྒྷ་ཉྩ. ཨུ་པཱ་ས་ཀེ ནོ བྷ་ཝཾ གོ་ཏ་མོ དྷཱ་རེ་ཏུ ཨ་ཛྫ་ཏ་གྒེ པཱ་ཎུ་པེ་ཏེ [པཱ་ཎུ་པེ་ཏཾ (ཀ.)] ས་ར་ཎཾ ག་ཏེ’’ཏི. ས་ཏྟ་མཾ.