༦. ཨ་རི་ཊྛ་སུ་ཏྟཾ

༩༨༢. སཱ་ཝ་ཏྠི་ནི་དཱ་ནཾ. ཏ་ཏྲ ཁོ བྷ་ག་ཝཱ…པེ… ཨེ་ཏ་ད་ཝོ་ཙ – ‘‘བྷཱ་ཝེ་ཐ ནོ ཏུ་མྷེ བྷི་ཀྑ་ཝེ, ཨཱ་ནཱ་པཱ་ན་སྶ་ཏི’’ནྟི? ཨེ་ཝཾ ཝུ་ཏྟེ ཨཱ་ཡ་སྨཱ ཨ་རི་ཊྛོ བྷ་ག་ཝ་ནྟཾ ཨེ་ཏ་ད་ཝོ་ཙ – ‘‘ཨ་ཧཾ ཁོ, བྷ་ནྟེ, བྷཱ་ཝེ་མི ཨཱ་ནཱ་པཱ་ན་སྶ་ཏི’’ནྟི. ‘‘ཡ་ཐཱ ཀ་ཐཾ པ་ན ཏྭཾ, ཨ་རི་ཊྛ, བྷཱ་ཝེ་སི ཨཱ་ནཱ་པཱ་ན་སྶ་ཏི’’ནྟི? ‘‘ཨ་ཏཱི་ཏེ་སུ མེ, བྷ་ནྟེ, ཀཱ་མེ་སུ ཀཱ་མ་ཙྪ་ནྡོ པ་ཧཱི་ནོ, ཨ་ནཱ་ག་ཏེ་སུ མེ ཀཱ་མེ་སུ ཀཱ་མ་ཙྪ་ནྡོ ཝི་ག་ཏོ, ཨ་ཛ྄ཛྷ་ཏྟ་བ་ཧི་དྡྷཱ [ཨ་ཛ྄ཛྷ་ཏྟཾ བ་ཧི་དྡྷཱ (སྱཱ. ཀཾ. པཱི. ཀ.)] ཙ མེ དྷ་མྨེ་སུ པ་ཊི་གྷ་ས་ཉྙཱ སུ་པྤ་ཊི་ཝི་ནཱི་ཏཱ. སོ [སོ་ཧཾ (?)] ས་ཏོ་ཝ ཨ་སྶ་སི་སྶཱ་མི, ས་ཏོ་ཝ པ་སྶ་སི་སྶཱ་མི. ཨེ་ཝཾ ཁྭཱ་ཧཾ, བྷ་ནྟེ, བྷཱ་ཝེ་མི ཨཱ་ནཱ་པཱ་ན་སྶ་ཏི’’ནྟི.

‘‘‘ཨ་ཏྠེ་སཱ, ཨ་རི་ཊྛ, ཨཱ་ནཱ་པཱ་ན་སྶ་ཏི, ནེ་སཱ ན་ཏྠཱི’ཏི ཝ་དཱ་མི. ཨ་པི ཙ, ཨ་རི་ཊྛ, ཡ་ཐཱ ཨཱ་ནཱ་པཱ་ན་སྶ་ཏི ཝི་ཏྠཱ་རེ་ན པ་རི་པུ་ཎྞཱ ཧོ་ཏི ཏཾ སུ་ཎཱ་ཧི, སཱ་དྷུ་ཀཾ མ་ན་སི ཀ་རོ་ཧི; བྷཱ་སི་སྶཱ་མཱི’’ཏི. ‘‘ཨེ་ཝཾ, བྷ་ནྟེ’’ཏི ཁོ ཨཱ་ཡ་སྨཱ ཨ་རི་ཊྛོ བྷ་ག་ཝ་ཏོ པ་ཙྩ་སྶོ་སི. བྷ་ག་ཝཱ ཨེ་ཏ་ད་ཝོ་ཙ –

‘‘ཀ་ཐ་ཉྩ, ཨ་རི་ཊྛ, ཨཱ་ནཱ་པཱ་ན་སྶ་ཏི ཝི་ཏྠཱ་རེ་ན པ་རི་པུ་ཎྞཱ ཧོ་ཏི? ཨི་དྷ, ཨ་རི་ཊྛ, བྷི་ཀྑུ ཨ་ར་ཉྙ་ག་ཏོ ཝཱ རུ་ཀྑ་མཱུ་ལ་ག་ཏོ ཝཱ སུ་ཉྙཱ་གཱ་ར་ག་ཏོ ཝཱ ནི་སཱི་ད་ཏི པ་ལླ་ངྐཾ ཨཱ་བྷུ་ཛི་ཏྭཱ ཨུ་ཛུཾ ཀཱ་ཡཾ པ་ཎི་དྷཱ་ཡ པ་རི་མུ་ཁཾ ས་ཏིཾ ཨུ་པ་ཊྛ་པེ་ཏྭཱ. སོ ས་ཏོ་ཝ ཨ་སྶ་ས་ཏི, ས་ཏོ་ཝ པ་སྶ་ས་ཏི. དཱི་གྷཾ ཝཱ ཨ་སྶ་ས་ནྟོ ‘དཱི་གྷཾ ཨ་སྶ་སཱ་མཱི’ཏི པ་ཛཱ་ནཱ་ཏི…པེ… ‘པ་ཊི་ནི་སྶ་གྒཱ་ནུ་པ་སྶཱི ཨ་སྶ་སི་སྶཱ་མཱི’ཏི སི་ཀྑ་ཏི, ‘པ་ཊི་ནི་སྶ་གྒཱ་ནུ་པ་སྶཱི པ་སྶ་སི་སྶཱ་མཱི’ཏི སི་ཀྑ་ཏི. ཨེ་ཝཾ ཁོ, ཨ་རི་ཊྛ, ཨཱ་ནཱ་པཱ་ན་སྶ་ཏི ཝི་ཏྠཱ་རེ་ན པ་རི་པུ་ཎྞཱ ཧོ་ཏཱི’’ཏི. ཚ་ཊྛཾ.