༡༡. ཨཱ་ག་ནྟུ་ཀ་སུ་ཏྟཾ

༡༥༩. ‘‘སེ་ཡྻ་ཐཱ་པི, བྷི་ཀྑ་ཝེ, ཨཱ་ག་ནྟུ་ཀཱ་གཱ་རཾ. ཏ་ཏྠ པུ་ར་ཏྠི་མཱ་ཡ་པི དི་སཱ་ཡ ཨཱ་ག་ནྟྭཱ ཝཱ་སཾ ཀ་པྤེ་ནྟི, པ་ཙྪི་མཱ་ཡ་པི དི་སཱ་ཡ ཨཱ་ག་ནྟྭཱ ཝཱ་སཾ ཀ་པྤེ་ནྟི, ཨུ་ཏྟ་རཱ་ཡ་པི དི་སཱ་ཡ ཨཱ་ག་ནྟྭཱ ཝཱ་སཾ ཀ་པྤེ་ནྟི, ད་ཀྑི་ཎཱ་ཡ་པི དི་སཱ་ཡ ཨཱ་ག་ནྟྭཱ ཝཱ་སཾ ཀ་པྤེ་ནྟི, ཁ་ཏྟི་ཡཱ་པི ཨཱ་ག་ནྟྭཱ ཝཱ་སཾ ཀ་པྤེ་ནྟི, བྲཱ་ཧྨ་ཎཱ་པི ཨཱ་ག་ནྟྭཱ ཝཱ་སཾ ཀ་པྤེ་ནྟི, ཝེ་སྶཱ་པི ཨཱ་ག་ནྟྭཱ ཝཱ་སཾ ཀ་པྤེ་ནྟི, སུ་དྡཱ་པི ཨཱ་ག་ནྟྭཱ ཝཱ་སཾ ཀ་པྤེ་ནྟི; ཨེ་ཝ་མེ་ཝ ཁོ, བྷི་ཀྑ་ཝེ, བྷི་ཀྑུ ཨ་རི་ཡཾ ཨ་ཊྛ་ངྒི་ཀཾ མ་གྒཾ བྷཱ་ཝེ་ནྟོ ཨ་རི་ཡཾ ཨ་ཊྛ་ངྒི་ཀཾ མ་གྒཾ བ་ཧུ་ལཱི་ཀ་རོ་ནྟོ ཡེ དྷ་མྨཱ ཨ་བྷི་ཉྙཱ པ་རི་ཉྙེ་ཡྻཱ, ཏེ དྷ་མྨེ ཨ་བྷི་ཉྙཱ པ་རི་ཛཱ་ནཱ་ཏི, ཡེ དྷ་མྨཱ ཨ་བྷི་ཉྙཱ པ་ཧཱ་ཏ་བྦཱ, ཏེ དྷ་མྨེ ཨ་བྷི་ཉྙཱ པ་ཛ་ཧ་ཏི, ཡེ དྷ་མྨཱ ཨ་བྷི་ཉྙཱ ས་ཙྪི་ཀཱ་ཏ་བྦཱ, ཏེ དྷ་མྨེ ཨ་བྷི་ཉྙཱ ས་ཙྪི་ཀ་རོ་ཏི, ཡེ དྷ་མྨཱ ཨ་བྷི་ཉྙཱ བྷཱ་ཝེ་ཏ་བྦཱ, ཏེ དྷ་མྨེ ཨ་བྷི་ཉྙཱ བྷཱ་ཝེ་ཏི.

‘‘ཀ་ཏ་མེ ཙ, བྷི་ཀྑ་ཝེ, དྷ་མྨཱ ཨ་བྷི་ཉྙཱ པ་རི་ཉྙེ་ཡྻཱ? པ་ཉྩུ་པཱ་དཱ་ན་ཀྑ་ནྡྷཱ་ཏི་སྶ ཝ་ཙ་ནཱི་ཡཾ. ཀ་ཏ་མེ པ་ཉྩ? སེ་ཡྻ་ཐི་དཾ – རཱུ་པུ་པཱ་དཱ་ན་ཀྑ་ནྡྷོ…པེ… ཝི་ཉྙཱ་ཎུ་པཱ་དཱ་ན་ཀྑ་ནྡྷོ. ཨི་མེ, བྷི་ཀྑ་ཝེ, དྷ་མྨཱ ཨ་བྷི་ཉྙཱ པ་རི་ཉྙེ་ཡྻཱ. ཀ་ཏ་མེ ཙ, བྷི་ཀྑ་ཝེ, དྷ་མྨཱ ཨ་བྷི་ཉྙཱ པ་ཧཱ་ཏ་བྦཱ? ཨ་ཝི་ཛྫཱ ཙ བྷ་ཝ་ཏ་ཎྷཱ ཙ – ཨི་མེ, བྷི་ཀྑ་ཝེ, དྷ་མྨཱ ཨ་བྷི་ཉྙཱ པ་ཧཱ་ཏ་བྦཱ. ཀ་ཏ་མེ ཙ, བྷི་ཀྑ་ཝེ, དྷ་མྨཱ ཨ་བྷི་ཉྙཱ ས་ཙྪི་ཀཱ་ཏ་བྦཱ? ཝི་ཛྫཱ ཙ ཝི་མུ་ཏྟི ཙ – ཨི་མེ, བྷི་ཀྑ་ཝེ, དྷ་མྨཱ ཨ་བྷི་ཉྙཱ ས་ཙྪི་ཀཱ་ཏ་བྦཱ. ཀ་ཏ་མེ ཙ, བྷི་ཀྑ་ཝེ, དྷ་མྨཱ ཨ་བྷི་ཉྙཱ བྷཱ་ཝེ་ཏ་བྦཱ? ས་མ་ཐོ ཙ ཝི་པ་སྶ་ནཱ ཙ – ཨི་མེ, བྷི་ཀྑ་ཝེ, དྷ་མྨཱ ཨ་བྷི་ཉྙཱ བྷཱ་ཝེ་ཏ་བྦཱ. ཀ་ཐ་ཉྩ, བྷི་ཀྑ་ཝེ, བྷི་ཀྑུ ཨ་རི་ཡཾ ཨ་ཊྛ་ངྒི་ཀཾ མ་གྒཾ བྷཱ་ཝེ་ནྟོ ཨ་རི་ཡཾ ཨ་ཊྛ་ངྒི་ཀཾ མ་གྒཾ བ་ཧུ་ལཱི་ཀ་རོ་ནྟོ, ཡེ དྷ་མྨཱ ཨ་བྷི་ཉྙཱ པ་རི་ཉྙེ་ཡྻཱ ཏེ དྷ་མྨེ ཨ་བྷི་ཉྙཱ པ་རི་ཛཱ་ནཱ་ཏི…པེ… ཡེ དྷ་མྨཱ ཨ་བྷི་ཉྙཱ བྷཱ་ཝེ་ཏ་བྦཱ, ཏེ དྷ་མྨེ ཨ་བྷི་ཉྙཱ བྷཱ་ཝེ་ཏི? ཨི་དྷ, བྷི་ཀྑ་ཝེ, བྷི་ཀྑུ ས་མྨཱ་དི་ཊྛིཾ བྷཱ་ཝེ་ཏི…པེ… ས་མྨཱ་ས་མཱ་དྷིཾ བྷཱ་ཝེ་ཏི ཝི་ཝེ་ཀ་ནི་སྶི་ཏཾ ཝི་རཱ་ག་ནི་སྶི་ཏཾ ནི་རོ་དྷ་ནི་སྶི་ཏཾ ཝོ་སྶ་གྒ་པ་རི་ཎཱ་མིཾ…པེ… ཨེ་ཝཾ ཁོ, བྷི་ཀྑ་ཝེ, བྷི་ཀྑུ ཨ་རི་ཡཾ ཨ་ཊྛ་ངྒི་ཀཾ མ་གྒཾ བྷཱ་ཝེ་ནྟོ ཨ་རི་ཡཾ ཨ་ཊྛ་ངྒི་ཀཾ མ་གྒཾ བ་ཧུ་ལཱི་ཀ་རོ་ནྟོ ཡེ དྷ་མྨཱ ཨ་བྷི་ཉྙཱ པ་རི་ཉྙེ་ཡྻཱ, ཏེ དྷ་མྨེ ཨ་བྷི་ཉྙཱ པ་རི་ཛཱ་ནཱ་ཏི, ཡེ དྷ་མྨཱ ཨ་བྷི་ཉྙཱ པ་ཧཱ་ཏ་བྦཱ, ཏེ དྷ་མྨེ ཨ་བྷི་ཉྙཱ པ་ཛ་ཧ་ཏི, ཡེ དྷ་མྨཱ ཨ་བྷི་ཉྙཱ ས་ཙྪི་ཀཱ་ཏ་བྦཱ, ཏེ དྷ་མྨེ ཨ་བྷི་ཉྙཱ ས་ཙྪི་ཀ་རོ་ཏི, ཡེ དྷ་མྨཱ ཨ་བྷི་ཉྙཱ བྷཱ་ཝེ་ཏ་བྦཱ, ཏེ དྷ་མྨེ ཨ་བྷི་ཉྙཱ བྷཱ་ཝེ་ཏཱི’’ཏི. ཨེ་ཀཱ་ད་ས་མཾ.