༡. ཙ་ཎྜ་སུ་ཏྟཾ

༣༥༣. སཱ་ཝ་ཏྠི་ནི་དཱ་ནཾ. ཨ་ཐ ཁོ ཙ་ཎྜོ གཱ་མ་ཎི ཡེ་ན བྷ་ག་ཝཱ ཏེ་ནུ་པ་ས་ངྐ་མི; ཨུ་པ་ས་ངྐ་མི་ཏྭཱ བྷ་ག་ཝ་ནྟཾ ཨ་བྷི་ཝཱ་དེ་ཏྭཱ ཨེ་ཀ་མ་ནྟཾ ནི་སཱི་དི. ཨེ་ཀ་མ་ནྟཾ ནི་སི་ནྣོ ཁོ ཙ་ཎྜོ གཱ་མ་ཎི བྷ་ག་ཝ་ནྟཾ ཨེ་ཏ་ད་ཝོ་ཙ – ‘‘ཀོ ནུ ཁོ, བྷ་ནྟེ, ཧེ་ཏུ, ཀོ པ་ཙྩ་ཡོ ཡེ་ན མི་དྷེ་ཀ་ཙྩོ ཙ་ཎྜོ ཙ་ཎྜོ་ཏྭེ་ཝ [ཡེ་ན མི་དྷེ་ཀ་ཙྩོ ཙ་ཎྜོ་ཏེ་ཝ (སཱི. པཱི.)] ས་ངྑཾ ག་ཙྪ་ཏི. ཀོ པ་ན, བྷ་ནྟེ, ཧེ་ཏུ, ཀོ པ་ཙྩ་ཡོ ཡེ་ན མི་དྷེ་ཀ་ཙྩོ སོ་ར་ཏོ སོ་ར་ཏོ་ཏྭེ་ཝ [ཡེ་ན མི་དྷེ་ཀ་ཙྩོ སུ་ར་ཏོ་ཏེ་ཝ (སཱི. པཱི.)] ས་ངྑཾ ག་ཙྪ་ཏཱི’’ཏི? ‘‘ཨི་དྷ, གཱ་མ་ཎི, ཨེ་ཀ་ཙྩ་སྶ རཱ་གོ ཨ་པྤ་ཧཱི་ནོ ཧོ་ཏི. རཱ་ག་སྶ ཨ་པྤ་ཧཱི་ན་ཏྟཱ པ་རེ ཀོ་པེ་ནྟི, པ་རེ་ཧི ཀོ་པི་ཡ་མཱ་ནོ ཀོ་པཾ པཱ་ཏུ་ཀ་རོ་ཏི. སོ ཙ་ཎྜོ་ཏྭེ་ཝ ས་ངྑཾ ག་ཙྪ་ཏི. དོ་སོ ཨ་པྤ་ཧཱི་ནོ ཧོ་ཏི. དོ་ས་སྶ ཨ་པྤ་ཧཱི་ན་ཏྟཱ པ་རེ ཀོ་པེ་ནྟི, པ་རེ་ཧི ཀོ་པི་ཡ་མཱ་ནོ ཀོ་པཾ པཱ་ཏུ་ཀ་རོ་ཏི. སོ ཙ་ཎྜོ་ཏྭེ་ཝ ས་ངྑཾ ག་ཙྪ་ཏི. མོ་ཧོ ཨ་པྤ་ཧཱི་ནོ ཧོ་ཏི. མོ་ཧ་སྶ ཨ་པྤ་ཧཱི་ན་ཏྟཱ པ་རེ ཀོ་པེ་ནྟི, པ་རེ་ཧི ཀོ་པི་ཡ་མཱ་ནོ ཀོ་པཾ པཱ་ཏུ་ཀ་རོ་ཏི. སོ ཙ་ཎྜོ་ཏྭེ་ཝ ས་ངྑཾ ག་ཙྪ་ཏི. ཨ་ཡཾ ཁོ, གཱ་མ་ཎི, ཧེ་ཏུ, ཨ་ཡཾ པ་ཙྩ་ཡོ ཡེ་ན མི་དྷེ་ཀ་ཙྩོ ཙ་ཎྜོ ཙ་ཎྜོ་ཏྭེ་ཝ ས་ངྑཾ ག་ཙྪ་ཏི’’.

‘‘ཨི་དྷ པ་ན, གཱ་མ་ཎི, ཨེ་ཀ་ཙྩ་སྶ རཱ་གོ པ་ཧཱི་ནོ ཧོ་ཏི. རཱ་ག་སྶ པ་ཧཱི་ན་ཏྟཱ པ་རེ ན ཀོ་པེ་ནྟི, པ་རེ་ཧི ཀོ་པི་ཡ་མཱ་ནོ ཀོ་པཾ ན པཱ་ཏུ་ཀ་རོ་ཏི. སོ སོ་ར་ཏོ་ཏྭེ་ཝ ས་ངྑཾ ག་ཙྪ་ཏི. དོ་སོ པ་ཧཱི་ནོ ཧོ་ཏི. དོ་ས་སྶ པ་ཧཱི་ན་ཏྟཱ པ་རེ ན ཀོ་པེ་ནྟི, པ་རེ་ཧི ཀོ་པི་ཡ་མཱ་ནོ ཀོ་པཾ ན པཱ་ཏུ་ཀ་རོ་ཏི. སོ སོ་ར་ཏོ་ཏྭེ་ཝ ས་ངྑཾ ག་ཙྪ་ཏི. མོ་ཧོ པ་ཧཱི་ནོ ཧོ་ཏི. མོ་ཧ་སྶ པ་ཧཱི་ན་ཏྟཱ པ་རེ ན ཀོ་པེ་ནྟི, པ་རེ་ཧི ཀོ་པི་ཡ་མཱ་ནོ ཀོ་པཾ ན པཱ་ཏུ་ཀ་རོ་ཏི. སོ སོ་ར་ཏོ་ཏྭེ་ཝ ས་ངྑཾ ག་ཙྪ་ཏི. ཨ་ཡཾ ཁོ, གཱ་མ་ཎི, ཧེ་ཏུ ཨ་ཡཾ པ་ཙྩ་ཡོ ཡེ་ན མི་དྷེ་ཀ་ཙྩོ སོ་ར་ཏོ སོ་ར་ཏོ་ཏྭེ་ཝ ས་ངྑཾ ག་ཙྪ་ཏཱི’’ཏི.

ཨེ་ཝཾ ཝུ་ཏྟེ, ཙ་ཎྜོ གཱ་མ་ཎི བྷ་ག་ཝ་ནྟཾ ཨེ་ཏ་ད་ཝོ་ཙ – ‘‘ཨ་བྷི་ཀྐ་ནྟཾ, བྷ་ནྟེ, ཨ་བྷི་ཀྐ་ནྟཾ, བྷ་ནྟེ! སེ་ཡྻ་ཐཱ་པི, བྷ་ནྟེ, ནི་ཀྐུ་ཛྫི་ཏཾ ཝཱ ཨུ་ཀྐུ་ཛྫེ་ཡྻ, པ་ཊི་ཙྪ་ནྣཾ ཝཱ ཝི་ཝ་རེ་ཡྻ, མཱུ་ལ༹ྷ་སྶ ཝཱ མ་གྒཾ ཨཱ་ཙི་ཀྑེ་ཡྻ, ཨ་ནྡྷ་ཀཱ་རེ ཝཱ ཏེ་ལ་པ་ཛྫོ་ཏཾ དྷཱ་རེ་ཡྻ – ཙ་ཀྑུ་མ་ནྟོ རཱུ་པཱ་ནི ད་ཀྑ་ནྟཱི་ཏི; ཨེ་ཝ་མེ་ཝཾ བྷ་ག་ཝ་ཏཱ ཨ་ནེ་ཀ་པ་རི་ཡཱ་ཡེ་ན དྷ་མྨོ པ་ཀཱ་སི་ཏོ. ཨེ་སཱ་ཧཾ, བྷ་ནྟེ, བྷ་ག་ཝ་ནྟཾ ས་ར་ཎཾ ག་ཙྪཱ་མི དྷ་མྨ་ཉྩ བྷི་ཀྑུ་ས་ངྒྷ་ཉྩ. ཨུ་པཱ་ས་ཀཾ མཾ བྷ་ག་ཝཱ དྷཱ་རེ་ཏུ ཨ་ཛྫ་ཏ་གྒེ པཱ་ཎུ་པེ་ཏཾ ས་ར་ཎཾ ག་ཏ’’ནྟི. པ་ཋ་མཾ.