༥. སཱ་མ་ཎྜ་ཀ་སཾ་ཡུ་ཏྟཾ

༡. སཱ་མ་ཎྜ་ཀ་སུ་ཏྟཾ

༣༣༠. ཨེ་ཀཾ ས་མ་ཡཾ ཨཱ་ཡ་སྨཱ སཱ་རི་པུ་ཏྟོ ཝ་ཛྫཱི་སུ ཝི་ཧ་ར་ཏི ཨུ་ཀྐ་ཙེ་ལཱ་ཡཾ ག་ངྒཱ་ཡ ན་དི་ཡཱ ཏཱི་རེ. ཨ་ཐ ཁོ སཱ་མ་ཎྜ་ཀོ [སཱ་མ་ཎྜ་ཀཱ་ནི (སཱི.)] པ་རི་བྦཱ་ཛ་ཀོ ཡེ་ནཱ་ཡ་སྨཱ སཱ་རི་པུ་ཏྟོ ཏེ་ནུ་པ་ས་ངྐ་མི; ཨུ་པ་ས་ངྐ་མི་ཏྭཱ ཨཱ་ཡ་སྨ་ཏཱ སཱ་རི་པུ་ཏྟེ་ན ས་དྡྷིཾ ས་མྨོ་དི. ས་མྨོ་ད་ནཱི་ཡཾ ཀ་ཐཾ སཱ་ར་ཎཱི་ཡཾ ཝཱི་ཏི་སཱ་རེ་ཏྭཱ ཨེ་ཀ་མ་ནྟཾ ནི་སཱི་དི. ཨེ་ཀ་མ་ནྟཾ ནི་སི་ནྣོ ཁོ སཱ་མ་ཎྜ་ཀོ པ་རི་བྦཱ་ཛ་ཀོ ཨཱ་ཡ་སྨ་ནྟཾ སཱ་རི་པུ་ཏྟཾ ཨེ་ཏ་ད་ཝོ་ཙ –

‘‘‘ནི་བྦཱ་ནཾ, ནི་བྦཱ་ན’ནྟི, ཨཱ་ཝུ་སོ སཱ་རི་པུ་ཏྟ, ཝུ་ཙྩ་ཏི. ཀ་ཏ་མཾ ནུ ཁོ, ཨཱ་ཝུ་སོ, ནི་བྦཱ་ན’’ནྟི? ‘‘ཡོ ཁོ, ཨཱ་ཝུ་སོ, རཱ་ག་ཀྑ་ཡོ དོ་ས་ཀྑ་ཡོ མོ་ཧ་ཀྑ་ཡོ – ཨི་དཾ ཝུ་ཙྩ་ཏི ནི་བྦཱ་ན’’ནྟི. ‘‘ཨ་ཏྠི པ་ནཱ་ཝུ་སོ, མ་གྒོ ཨ་ཏྠི པ་ཊི་པ་དཱ, ཨེ་ཏ་སྶ ནི་བྦཱ་ན་སྶ ས་ཙྪི་ཀི་རི་ཡཱ་ཡཱ’’ཏི? ‘‘ཨ་ཏྠི ཁོ, ཨཱ་ཝུ་སོ, མ་གྒོ ཨ་ཏྠི པ་ཊི་པ་དཱ, ཨེ་ཏ་སྶ ནི་བྦཱ་ན་སྶ ས་ཙྪི་ཀི་རི་ཡཱ་ཡཱ’’ཏི.

‘‘ཀ་ཏ་མོ པ་ནཱ་ཝུ་སོ, མ་གྒོ ཀ་ཏ་མཱ པ་ཊི་པ་དཱ ཨེ་ཏ་སྶ ནི་བྦཱ་ན་སྶ ས་ཙྪི་ཀི་རི་ཡཱ་ཡཱ’’ཏི? ‘‘ཨ་ཡ་མེ་ཝ ཁོ, ཨཱ་ཝུ་སོ, ཨ་རི་ཡོ ཨ་ཊྛ་ངྒི་ཀོ མ་གྒོ, ཨེ་ཏ་སྶ ནི་བྦཱ་ན་སྶ ས་ཙྪི་ཀི་རི་ཡཱ་ཡ, སེ་ཡྻ་ཐི་དཾ – ས་མྨཱ་དི་ཊྛི ས་མྨཱ་ས་ངྐ་པྤོ ས་མྨཱ་ཝཱ་ཙཱ ས་མྨཱ་ཀ་མྨ་ནྟོ ས་མྨཱ་ཨཱ་ཛཱི་ཝོ ས་མྨཱ་ཝཱ་ཡཱ་མོ ས་མྨཱ་ས་ཏི ས་མྨཱ་ས་མཱ་དྷི. ཨ་ཡཾ ཁོ, ཨཱ་ཝུ་སོ, མ་གྒོ ཨ་ཡཾ པ་ཊི་པ་དཱ, ཨེ་ཏ་སྶ ནི་བྦཱ་ན་སྶ ས་ཙྪི་ཀི་རི་ཡཱ་ཡཱ’’ཏི. ‘‘བྷ་དྡ་ཀོ, ཨཱ་ཝུ་སོ, མ་གྒོ བྷ་དྡི་ཀཱ པ་ཊི་པ་དཱ, ཨེ་ཏ་སྶ ནི་བྦཱ་ན་སྶ ས་ཙྪི་ཀི་རི་ཡཱ་ཡ. ཨ་ལ་ཉྩ པ་ནཱ་ཝུ་སོ སཱ་རི་པུ་ཏྟ, ཨ་པྤ་མཱ་དཱ་ཡཱ’’ཏི. པ་ཋ་མཾ.

(ཡ་ཐཱ ཛ་མྦུ་ཁཱ་ད་ཀ་སཾ་ཡུ་ཏྟཾ, ཏ་ཐཱ ཝི་ཏྠཱ་རེ་ཏ་བྦཾ).

༢. དུ་ཀྐ་ར་སུ་ཏྟཾ

༣༣༡. ‘‘ཀིཾ ནུ ཁོ, ཨཱ་ཝུ་སོ སཱ་རི་པུ་ཏྟ, ཨི་མ་སྨིཾ དྷ་མྨ་ཝི་ན་ཡེ དུ་ཀྐ་ར’’ནྟི? ‘‘པ་བྦ་ཛྫཱ ཁོ, ཨཱ་ཝུ་སོ, ཨི་མ་སྨིཾ དྷ་མྨ་ཝི་ན་ཡེ དུ་ཀྐ་རཱ’’ཏི. ‘‘པ་བྦ་ཛི་ཏེ་ན པ་ནཱ་ཝུ་སོ, ཀིཾ དུ་ཀྐ་ར’’ནྟི? ‘‘པ་བྦ་ཛི་ཏེ་ན ཁོ, ཨཱ་ཝུ་སོ, ཨ་བྷི་ར་ཏི དུ་ཀྐ་རཱ’’ཏི. ‘‘ཨ་བྷི་ར་ཏེ་ན པ་ནཱ་ཝུ་སོ, ཀིཾ དུ་ཀྐ་ར’’ནྟི? ‘‘ཨ་བྷི་ར་ཏེ་ན ཁོ, ཨཱ་ཝུ་སོ, དྷ་མྨཱ་ནུ་དྷ་མྨ་པྤ་ཊི་པ་ཏྟི དུ་ཀྐ་རཱ’’ཏི. ‘‘ཀཱི་ཝ་ཙི་རཾ པ་ནཱ་ཝུ་སོ, དྷ་མྨཱ་ནུ་དྷ་མྨ་པྤ་ཊི་པ་ནྣོ བྷི་ཀྑུ ཨ་ར་ཧཾ ཨ་སྶཱ’’ཏི? ‘‘ན་ཙི་རཾ, ཨཱ་ཝུ་སོ’’ཏི. སོ་ལ༹་ས་མཾ.

(པུ་རི་མ་ཀ་ས་དི་སཾ ཨུ་དྡཱ་ནཾ.)

སཱ་མ་ཎྜ་ཀ་སཾ་ཡུ་ཏྟཾ ས་མ་ཏྟཾ.