༧. དུ་ཏི་ཡ་ཨ་ཝི་ཛྫཱ་པ་ཧཱ་ན་སུ་ཏྟཾ

༨༠. ཨ་ཐ ཁོ ཨ་ཉྙ་ཏ་རོ བྷི་ཀྑུ…པེ… ཨེ་ཏ་ད་ཝོ་ཙ – ‘‘ཨ་ཏྠི ནུ ཁོ, བྷ་ནྟེ, ཨེ་ཀོ དྷ་མྨོ ཡ་སྶ པ་ཧཱ་ནཱ བྷི་ཀྑུ་ནོ ཨ་ཝི་ཛྫཱ པ་ཧཱི་ཡ་ཏི, ཝི་ཛྫཱ ཨུ་པྤ་ཛྫ་ཏཱི’’ཏི?

‘‘ཨ་ཏྠི ཁོ, བྷི་ཀྑུ, ཨེ་ཀོ དྷ་མྨོ ཡ་སྶ པ་ཧཱ་ནཱ བྷི་ཀྑུ་ནོ ཨ་ཝི་ཛྫཱ པ་ཧཱི་ཡ་ཏི, ཝི་ཛྫཱ ཨུ་པྤ་ཛྫ་ཏཱི’’ཏི.

‘‘ཀ་ཏ་མོ པ་ན, བྷ་ནྟེ, ཨེ་ཀོ དྷ་མྨོ ཡ་སྶ པ་ཧཱ་ནཱ བྷི་ཀྑུ་ནོ ཨ་ཝི་ཛྫཱ པ་ཧཱི་ཡ་ཏི, ཝི་ཛྫཱ ཨུ་པྤ་ཛྫ་ཏཱི’’ཏི?

‘‘ཨ་ཝི་ཛྫཱ ཁོ, བྷི་ཀྑུ, ཨེ་ཀོ དྷ་མྨོ ཡ་སྶ པ་ཧཱ་ནཱ བྷི་ཀྑུ་ནོ ཨ་ཝི་ཛྫཱ པ་ཧཱི་ཡ་ཏི, ཝི་ཛྫཱ ཨུ་པྤ་ཛྫ་ཏཱི’’ཏི.

‘‘ཀ་ཐཾ པ་ན, བྷ་ནྟེ, ཛཱ་ན་ཏོ, ཀ་ཐཾ པ་སྶ་ཏོ ཨ་ཝི་ཛྫཱ པ་ཧཱི་ཡ་ཏི, ཝི་ཛྫཱ ཨུ་པྤ་ཛྫ་ཏཱི’’ཏི?

‘‘ཨི་དྷ, བྷི་ཀྑུ, བྷི་ཀྑུ་ནོ སུ་ཏཾ ཧོ་ཏི – ‘ས་བྦེ དྷ་མྨཱ ནཱ་ལཾ ཨ་བྷི་ནི་ཝེ་སཱ་ཡཱ’ཏི. ཨེ་ཝ་ཉྩེ་ཏཾ, བྷི་ཀྑུ, བྷི་ཀྑུ་ནོ སུ་ཏཾ ཧོ་ཏི – ‘ས་བྦེ དྷ་མྨཱ ནཱ་ལཾ ཨ་བྷི་ནི་ཝེ་སཱ་ཡཱ’ཏི. སོ ས་བྦཾ དྷ་མྨཾ ཨ་བྷི་ཛཱ་ནཱ་ཏི, ས་བྦཾ དྷ་མྨཾ ཨ་བྷི་ཉྙཱ་ཡ ས་བྦཾ དྷ་མྨཾ པ་རི་ཛཱ་ནཱ་ཏི, ས་བྦཾ དྷ་མྨཾ པ་རི་ཉྙཱ་ཡ ས་བྦ་ནི་མི་ཏྟཱ་ནི ཨ་ཉྙ་ཏོ པ་སྶ་ཏི, ཙ་ཀྑུཾ ཨ་ཉྙ་ཏོ པ་སྶ་ཏི, རཱུ་པེ… ཙ་ཀྑུ་ཝི་ཉྙཱ་ཎཾ… ཙ་ཀྑུ་ས་མྥ་སྶཾ… ཡ་མྤི་དཾ ཙ་ཀྑུ་ས་མྥ་སྶ་པ་ཙྩ་ཡཱ ཨུ་པྤ་ཛྫ་ཏི ཝེ་ད་ཡི་ཏཾ སུ་ཁཾ ཝཱ དུ་ཀྑཾ ཝཱ ཨ་དུ་ཀྑ་མ་སུ་ཁཾ ཝཱ ཏ་མྤི ཨ་ཉྙ་ཏོ པ་སྶ་ཏི…པེ… མ་ནཾ ཨ་ཉྙ་ཏོ པ་སྶ་ཏི, དྷ་མྨེ… མ་ནོ་ཝི་ཉྙཱ་ཎཾ… མ་ནོ་ས་མྥ་སྶཾ… ཡ་མྤི་དཾ མ་ནོ་ས་མྥ་སྶ་པ་ཙྩ་ཡཱ ཨུ་པྤ་ཛྫ་ཏི ཝེ་ད་ཡི་ཏཾ སུ་ཁཾ ཝཱ དུ་ཀྑཾ ཝཱ ཨ་དུ་ཀྑ་མ་སུ་ཁཾ ཝཱ ཏ་མྤི ཨ་ཉྙ་ཏོ པ་སྶ་ཏི. ཨེ་ཝཾ ཁོ, བྷི་ཀྑུ, ཛཱ་ན་ཏོ ཨེ་ཝཾ པ་སྶ་ཏོ བྷི་ཀྑུ་ནོ ཨ་ཝི་ཛྫཱ པ་ཧཱི་ཡ་ཏི, ཝི་ཛྫཱ ཨུ་པྤ་ཛྫ་ཏཱི’’ཏི. ས་ཏྟ་མཾ.