༨. གི་ལཱ་ན་ཝ་གྒོ

༡. པ་ཋ་མ་གི་ལཱ་ན་སུ་ཏྟཾ

༧༤. སཱ་ཝ་ཏྠི་ནི་དཱ་ནཾ. ཨ་ཐ ཁོ ཨ་ཉྙ་ཏ་རོ བྷི་ཀྑུ ཡེ་ན བྷ་ག་ཝཱ ཏེ་ནུ་པ་ས་ངྐ་མི…པེ… ཨེ་ཀ་མ་ནྟཾ ནི་སི་ནྣོ ཁོ སོ བྷི་ཀྑུ བྷ་ག་ཝ་ནྟཾ ཨེ་ཏ་ད་ཝོ་ཙ – ‘‘ཨ་མུ་ཀ་སྨིཾ, བྷ་ནྟེ, ཝི་ཧཱ་རེ ཨ་ཉྙ་ཏ་རོ བྷི་ཀྑུ ན་ཝོ ཨ་པྤ་ཉྙཱ་ཏོ ཨཱ་བཱ་དྷི་ཀོ དུ་ཀྑི་ཏོ བཱ་ལ༹ྷ་གི་ལཱ་ནོ. སཱ་དྷུ, བྷ་ནྟེ, བྷ་ག་ཝཱ ཡེ་ན སོ བྷི་ཀྑུ ཏེ་ནུ་པ་ས་ངྐ་མ་ཏུ ཨ་ནུ་ཀ་མྤཾ ཨུ་པཱ་དཱ་ཡཱ’’ཏི.

ཨ་ཐ ཁོ བྷ་ག་ཝཱ ན་ཝ་ཝཱ་ད་ཉྩ སུ་ཏྭཱ གི་ལཱ་ན་ཝཱ་ད་ཉྩ, ‘‘ཨ་པྤ་ཉྙཱ་ཏོ བྷི་ཀྑཱུ’’ཏི ཨི་ཏི ཝི་དི་ཏྭཱ ཡེ་ན སོ བྷི་ཀྑུ ཏེ་ནུ་པ་ས་ངྐ་མི. ཨ་དྡ་སཱ ཁོ སོ བྷི་ཀྑུ བྷ་ག་ཝ་ནྟཾ དཱུ་ར་ཏོ་ཝ ཨཱ་ག་ཙྪ་ནྟཾ. དི་སྭཱ་ན མ་ཉྩ་ཀེ ས་མ་དྷོ་སི [ས་མ་ཉྩོ་སི (སཱི.), ས་མ་ཏེ་སི (སྱཱ. ཀཾ.), ས་མ་ཉྩོ་པི (པཱི.)]. ཨ་ཐ ཁོ བྷ་ག་ཝཱ ཏཾ བྷི་ཀྑུཾ ཨེ་ཏ་ད་ཝོ་ཙ – ‘‘ཨ་ལཾ, བྷི་ཀྑུ, མཱ ཏྭཾ མ་ཉྩ་ཀེ ས་མ་དྷོ་སི. ས་ནྟི་མཱ་ནི ཨཱ་ས་ནཱ་ནི པ་ཉྙ་ཏྟཱ་ནི, ཏ་ཏྠཱ་ཧཾ ནི་སཱི་དི་སྶཱ་མཱི’’ཏི. ནི་སཱི་དི བྷ་ག་ཝཱ པ་ཉྙ་ཏྟེ ཨཱ་ས་ནེ. ནི་ས་ཛྫ ཁོ བྷ་ག་ཝཱ ཏཾ བྷི་ཀྑུཾ ཨེ་ཏ་ད་ཝོ་ཙ – ‘‘ཀ་ཙྩི ཏེ, བྷི་ཀྑུ, ཁ་མ་ནཱི་ཡཾ, ཀ་ཙྩི ཡཱ་པ་ནཱི་ཡཾ, ཀ་ཙྩི དུ་ཀྑཱ ཝེ་ད་ནཱ པ་ཊི་ཀྐ་མ་ནྟི ནོ ཨ་བྷི་ཀྐ་མ་ནྟི, པ་ཊི་ཀྐ་མོ་སཱ་ནཾ པ་ཉྙཱ་ཡ་ཏི ནོ ཨ་བྷི་ཀྐ་མོ’’ཏི?

‘‘ན མེ, བྷ་ནྟེ, ཁ་མ་ནཱི་ཡཾ, ན ཡཱ་པ་ནཱི་ཡཾ, བཱ་ལ༹ྷཱ མེ དུ་ཀྑཱ ཝེ་ད་ནཱ ཨ་བྷི་ཀྐ་མ་ནྟི ནོ པ་ཊི་ཀྐ་མ་ནྟི, ཨ་བྷི་ཀྐ་མོ་སཱ་ནཾ པ་ཉྙཱ་ཡ་ཏི ནོ པ་ཊི་ཀྐ་མོ’’ཏི.

‘‘ཀ་ཙྩི ཏེ, བྷི་ཀྑུ, ན ཀི་ཉྩི ཀུ་ཀྐུ་ཙྩཾ, ན ཀོ་ཙི ཝི་པྤ་ཊི་སཱ་རོ’’ཏི?

‘‘ཏ་གྒྷ མེ, བྷ་ནྟེ, ཨ་ན་པྤ་ཀཾ ཀུ་ཀྐུ་ཙྩཾ, ཨ་ན་པྤ་ཀོ ཝི་པྤ་ཊི་སཱ་རོ’’ཏི.

‘‘ཀ་ཙྩི པ་ན ཏཾ [ཏྭཾ (སཱི.), ཏེ (སྱཱ. ཀཾ. ཀ.)], བྷི་ཀྑུ, ཨ་ཏྟཱ སཱི་ལ་ཏོ ཨུ་པ་ཝ་ད་ཏཱི’’ཏི?

‘‘ན ཁོ མཾ, བྷ་ནྟེ, ཨ་ཏྟཱ སཱི་ལ་ཏོ ཨུ་པ་ཝ་ད་ཏཱི’’ཏི [ནོ ཧེ་ཏཾ བྷ་ནྟེ (པཱི. ཀ.)].

‘‘ནོ ཙེ ཀི་ར ཏེ, བྷི་ཀྑུ, ཨ་ཏྟཱ སཱི་ལ་ཏོ ཨུ་པ་ཝ་ད་ཏི, ཨ་ཐ ཀི་ཉྩ [ཨ་ཐ ཀི་སྨི་ཉྩ (སཱི.), ཨ་ཐ བྷི་ཀྑུ ཀི་སྨི་ཉྩ (སྱཱ. ཀཾ. པཱི. ཀ.)] ཏེ ཀུ་ཀྐུ་ཙྩཾ ཀོ ཙ ཝི་པྤ་ཊི་སཱ་རོ’’ཏི?

‘‘ན ཁྭཱ་ཧཾ, བྷ་ནྟེ, སཱི་ལ་ཝི་སུ་དྡྷ་ཏྠཾ བྷ་ག་ཝ་ཏཱ དྷ་མྨཾ དེ་སི་ཏཾ ཨཱ་ཛཱ་ནཱ་མཱི’’ཏི.

‘‘ནོ ཙེ ཀི་ར ཏྭཾ, བྷི་ཀྑུ, སཱི་ལ་ཝི་སུ་དྡྷ་ཏྠཾ མ་ཡཱ དྷ་མྨཾ དེ་སི་ཏཾ ཨཱ་ཛཱ་ནཱ་སི, ཨ་ཐ ཀི་མ་ཏྠཾ ཙ་ར་ཧི ཏྭཾ, བྷི་ཀྑུ, མ་ཡཱ དྷ་མྨཾ དེ་སི་ཏཾ ཨཱ་ཛཱ་ནཱ་སཱི’’ཏི?

‘‘རཱ་ག་ཝི་རཱ་ག་ཏྠཾ ཁྭཱ་ཧཾ, བྷ་ནྟེ, བྷ་ག་ཝ་ཏཱ དྷ་མྨཾ དེ་སི་ཏཾ ཨཱ་ཛཱ་ནཱ་མཱི’’ཏི.

‘‘སཱ་དྷུ སཱ་དྷུ, བྷི་ཀྑུ! སཱ་དྷུ ཁོ ཏྭཾ, བྷི་ཀྑུ, རཱ་ག་ཝི་རཱ་ག་ཏྠཾ མ་ཡཱ དྷ་མྨཾ དེ་སི་ཏཾ ཨཱ་ཛཱ་ནཱ་སི. རཱ་ག་ཝི་རཱ་ག་ཏྠོ ཧི, བྷི་ཀྑུ, མ་ཡཱ དྷ་མྨོ དེ་སི་ཏོ. ཏཾ ཀིཾ མ་ཉྙ་སི བྷི་ཀྑུ, ཙ་ཀྑུ ནི་ཙྩཾ ཝཱ ཨ་ནི་ཙྩཾ ཝཱ’’ཏི?

‘‘ཨ་ནི་ཙྩཾ, བྷ་ནྟེ’’.

‘‘ཡཾ…པེ… སོ་ཏཾ… གྷཱ་ནཾ… ཛི་ཝ྄ཧཱ… ཀཱ་ཡོ… མ་ནོ ནི་ཙྩོ ཝཱ ཨ་ནི་ཙྩོ ཝཱ’’ཏི?

‘‘ཨ་ནི་ཙྩོ, བྷ་ནྟེ’’.

‘‘ཡཾ པ་ནཱ་ནི་ཙྩཾ དུ་ཀྑཾ ཝཱ ཏཾ སུ་ཁཾ ཝཱ’’ཏི?

‘‘དུ་ཀྑཾ, བྷ་ནྟེ’’.

‘‘ཡཾ པ་ནཱ་ནི་ཙྩཾ དུ་ཀྑཾ ཝི་པ་རི་ཎཱ་མ་དྷ་མྨཾ, ཀ་ལླཾ ནུ ཏཾ ས་མ་ནུ་པ་སྶི་ཏུཾ – ‘ཨེ་ཏཾ མ་མ, ཨེ་སོ་ཧ་མ་སྨི, ཨེ་སོ མེ ཨ་ཏྟཱ’’’ཏི?

‘‘ནོ ཧེ་ཏཾ, བྷ་ནྟེ’’.

‘‘ཨེ་ཝཾ པ་སྶཾ, བྷི་ཀྑུ, སུ་ཏ་ཝཱ ཨ་རི་ཡ་སཱ་ཝ་ཀོ ཙ་ཀྑུ་སྨི་མྤི ནི་བྦི་ནྡ་ཏི, སོ་ཏ་སྨི་མྤི ནི་བྦི་ནྡ་ཏི…པེ… མ་ན་སྨི་མྤི ནི་བྦི་ནྡ་ཏི. ནི་བྦི་ནྡཾ ཝི་ར་ཛྫ་ཏི; ཝི་རཱ་གཱ ཝི་མུ་ཙྩ་ཏི; ཝི་མུ་ཏྟ་སྨིཾ ཝི་མུ་ཏྟ་མི་ཏི ཉཱ་ཎཾ ཧོ་ཏི. ‘ཁཱི་ཎཱ ཛཱ་ཏི, ཝུ་སི་ཏཾ བྲ་ཧྨ་ཙ་རི་ཡཾ, ཀ་ཏཾ ཀ་ར་ཎཱི་ཡཾ ནཱ་པ་རཾ ཨི་ཏྠ་ཏྟཱ་ཡཱ’ཏི པ་ཛཱ་ནཱ་ཏཱི’’ཏི.

ཨི་ད་མ་ཝོ་ཙ བྷ་ག་ཝཱ. ཨ་ཏྟ་མ་ནོ སོ བྷི་ཀྑུ བྷ་ག་ཝ་ཏོ བྷཱ་སི་ཏཾ ཨ་བྷི་ན་ནྡི. ཨི་མ་སྨི་ཉྩ པ་ན ཝེ་ཡྻཱ་ཀ་ར་ཎ་སྨིཾ བྷ་ཉྙ་མཱ་ནེ ཏ་སྶ བྷི་ཀྑུ་ནོ ཝི་ར་ཛཾ ཝཱི་ཏ་མ་ལཾ དྷ་མྨ་ཙ་ཀྑུཾ ཨུ་ད་པཱ་དི – ‘‘ཡཾ ཀི་ཉྩི ས་མུ་ད་ཡ་དྷ་མྨཾ, ས་བྦཾ ཏཾ ནི་རོ་དྷ་དྷ་མྨ’’ནྟི. པ་ཋ་མཾ.

༢. དུ་ཏི་ཡ་གི་ལཱ་ན་སུ་ཏྟཾ

༧༥. ཨ་ཐ ཁོ ཨ་ཉྙ་ཏ་རོ བྷི་ཀྑུ…པེ… བྷ་ག་ཝ་ནྟཾ ཨེ་ཏ་ད་ཝོ་ཙ – ‘‘ཨ་མུ་ཀ་སྨིཾ, བྷ་ནྟེ, ཝི་ཧཱ་རེ ཨ་ཉྙ་ཏ་རོ བྷི་ཀྑུ ན་ཝོ ཨ་པྤ་ཉྙཱ་ཏོ ཨཱ་བཱ་དྷི་ཀོ དུ་ཀྑི་ཏོ བཱ་ལ༹ྷ་གི་ལཱ་ནོ. སཱ་དྷུ, བྷ་ནྟེ, བྷ་ག་ཝཱ ཡེ་ན སོ བྷི་ཀྑུ ཏེ་ནུ་པ་ས་ངྐ་མ་ཏུ ཨ་ནུ་ཀ་མྤཾ ཨུ་པཱ་དཱ་ཡཱ’’ཏི.

ཨ་ཐ ཁོ བྷ་ག་ཝཱ ན་ཝ་ཝཱ་ད་ཉྩ སུ་ཏྭཱ གི་ལཱ་ན་ཝཱ་ད་ཉྩ, ‘‘ཨ་པྤ་ཉྙཱ་ཏོ བྷི་ཀྑཱུ’’ཏི ཨི་ཏི ཝི་དི་ཏྭཱ ཡེ་ན སོ བྷི་ཀྑུ ཏེ་ནུ་པ་ས་ངྐ་མི. ཨ་དྡ་སཱ ཁོ སོ བྷི་ཀྑུ བྷ་ག་ཝ་ནྟཾ དཱུ་ར་ཏོ་ཝ ཨཱ་ག་ཙྪ་ནྟཾ. དི་སྭཱ་ན མ་ཉྩ་ཀེ ས་མ་དྷོ་སི. ཨ་ཐ ཁོ བྷ་ག་ཝཱ ཏཾ བྷི་ཀྑུཾ ཨེ་ཏ་ད་ཝོ་ཙ – ‘‘ཨ་ལཾ, བྷི་ཀྑུ, མཱ ཏྭཾ མ་ཉྩ་ཀེ ས་མ་དྷོ་སི. ས་ནྟི་མཱ་ནི ཨཱ་ས་ནཱ་ནི པ་ཉྙ་ཏྟཱ་ནི, ཏ་ཏྠཱ་ཧཾ ནི་སཱི་དི་སྶཱ་མཱི’’ཏི. ནི་སཱི་དི བྷ་ག་ཝཱ པ་ཉྙ་ཏྟེ ཨཱ་ས་ནེ. ནི་ས་ཛྫ ཁོ བྷ་ག་ཝཱ ཏཾ བྷི་ཀྑུཾ ཨེ་ཏ་ད་ཝོ་ཙ – ‘‘ཀ་ཙྩི ཏེ, བྷི་ཀྑུ, ཁ་མ་ནཱི་ཡཾ, ཀ་ཙྩི ཡཱ་པ་ནཱི་ཡཾ, ཀ་ཙྩི དུ་ཀྑཱ ཝེ་ད་ནཱ པ་ཊི་ཀྐ་མ་ནྟི ནོ ཨ་བྷི་ཀྐ་མ་ནྟི, པ་ཊི་ཀྐ་མོ་སཱ་ནཾ པ་ཉྙཱ་ཡ་ཏི ནོ ཨ་བྷི་ཀྐ་མོ’’ཏི?

‘‘ན མེ, བྷ་ནྟེ, ཁ་མ་ནཱི་ཡཾ, ན ཡཱ་པ་ནཱི་ཡཾ…པེ… ན ཁོ མཾ [མེ (ས་བྦ་ཏྠ)], བྷ་ནྟེ, ཨ་ཏྟཱ སཱི་ལ་ཏོ ཨུ་པ་ཝ་ད་ཏཱི’’ཏི.

‘‘ནོ ཙེ ཀི་ར ཏེ, བྷི་ཀྑུ, ཨ་ཏྟཱ སཱི་ལ་ཏོ ཨུ་པ་ཝ་ད་ཏི, ཨ་ཐ ཀི་ཉྩ ཏེ ཀུ་ཀྐུ་ཙྩཾ ཀོ ཙ ཝི་པྤ་ཊི་སཱ་རོ’’ཏི?

‘‘ཨ་ནུ་པཱ་དཱ་པ་རི་ནི་བྦཱ་ན་ཏྠཾ ཁྭཱ་ཧཾ, བྷ་ནྟེ, བྷ་ག་ཝ་ཏཱ དྷ་མྨཾ དེ་སི་ཏཾ ཨཱ་ཛཱ་ནཱ་མཱི’’ཏི.

‘‘སཱ་དྷུ སཱ་དྷུ, བྷི་ཀྑུ! སཱ་དྷུ ཁོ ཏྭཾ, བྷི་ཀྑུ, ཨ་ནུ་པཱ་དཱ་པ་རི་ནི་བྦཱ་ན་ཏྠཾ མ་ཡཱ དྷ་མྨཾ དེ་སི་ཏཾ ཨཱ་ཛཱ་ནཱ་སི. ཨ་ནུ་པཱ་དཱ་པ་རི་ནི་བྦཱ་ན་ཏྠོ ཧི, བྷི་ཀྑུ, མ་ཡཱ དྷ་མྨོ དེ་སི་ཏོ.

‘‘ཏཾ ཀིཾ མ་ཉྙ་སི, བྷི་ཀྑུ, ཙ་ཀྑུ ནི་ཙྩཾ ཝཱ ཨ་ནི་ཙྩཾ ཝཱ’’ཏི?

‘‘ཨ་ནི་ཙྩཾ, བྷ་ནྟེ’’.

‘‘ཡཾ…པེ… སོ་ཏཾ… གྷཱ་ནཾ… ཛི་ཝ྄ཧཱ… ཀཱ་ཡོ… མ་ནོ… མ་ནོ་ཝི་ཉྙཱ་ཎཾ… མ་ནོ་ས་མྥ་སྶོ… ཡ་མྤི་དཾ མ་ནོ་ས་མྥ་སྶ་པ་ཙྩ་ཡཱ ཨུ་པྤ་ཛྫ་ཏི ཝེ་ད་ཡི་ཏཾ སུ་ཁཾ ཝཱ དུ་ཀྑཾ ཝཱ ཨ་དུ་ཀྑ་མ་སུ་ཁཾ ཝཱ ཏ་མྤི ནི་ཙྩཾ ཝཱ ཨ་ནི་ཙྩཾ ཝཱ’’ཏི?

‘‘ཨ་ནི་ཙྩཾ, བྷ་ནྟེ’’.

‘‘ཡཾ པ་ནཱ་ནི་ཙྩཾ དུ་ཀྑཾ ཝཱ ཏཾ སུ་ཁཾ ཝཱ’’ཏི?

‘‘དུ་ཀྑཾ, བྷ་ནྟེ’’.

‘‘ནོ ཧེ་ཏཾ, བྷ་ནྟེ’’.

‘‘ཨེ་ཝཾ པ་སྶཾ, བྷི་ཀྑུ, སུ་ཏ་ཝཱ ཨ་རི་ཡ་སཱ་ཝ་ཀོ ཙ་ཀྑུ་སྨི་མྤི ནི་བྦི་ནྡ་ཏི…པེ… མ་ན་སྨི་མྤི… མ་ནོ་ཝི་ཉྙཱ་ཎེ་པི… མ་ནོ་ས་མྥ་སྶེ་པི ནི་བྦི་ནྡ་ཏི. ཡ་མྤི་དཾ མ་ནོ་ས་མྥ་སྶ་པ་ཙྩ་ཡཱ ཨུ་པྤ་ཛྫ་ཏི ཝེ་ད་ཡི་ཏཾ སུ་ཁཾ ཝཱ དུ་ཀྑཾ ཝཱ ཨ་དུ་ཀྑ་མ་སུ་ཁཾ ཝཱ ཏ་སྨི་མྤི ནི་བྦི་ནྡ་ཏི. ནི་བྦི་ནྡཾ ཝི་ར་ཛྫ་ཏི; ཝི་རཱ་གཱ ཝི་མུ་ཙྩ་ཏི; ཝི་མུ་ཏྟ་སྨིཾ ཝི་མུ་ཏྟ་མི་ཏི ཉཱ་ཎཾ ཧོ་ཏི. ‘ཁཱི་ཎཱ ཛཱ་ཏི, ཝུ་སི་ཏཾ བྲ་ཧྨ་ཙ་རི་ཡཾ, ཀ་ཏཾ ཀ་ར་ཎཱི་ཡཾ, ནཱ་པ་རཾ ཨི་ཏྠ་ཏྟཱ་ཡཱ’ཏི པ་ཛཱ་ནཱ་ཏཱི’’ཏི.

ཨི་ད་མ་ཝོ་ཙ བྷ་ག་ཝཱ. ཨ་ཏྟ་མ་ནོ སོ བྷི་ཀྑུ བྷ་ག་ཝ་ཏོ བྷཱ་སི་ཏཾ ཨ་བྷི་ན་ནྡི. ཨི་མ་སྨི་ཉྩ པ་ན ཝེ་ཡྻཱ་ཀ་ར་ཎ་སྨིཾ བྷ་ཉྙ་མཱ་ནེ ཏ་སྶ བྷི་ཀྑུ་སྶ ཨ་ནུ་པཱ་དཱ་ཡ ཨཱ་ས་ཝེ་ཧི ཙི་ཏྟཾ ཝི་མུ་ཙྩཱི་ཏི [ཝི་མུ་ཙྩ་ཏཱི་ཏི (ས་བྦ་ཏྠ)]. དུ་ཏི་ཡཾ.

༣. རཱ་དྷ་ཨ་ནི་ཙྩ་སུ་ཏྟཾ

༧༦. ཨ་ཐ ཁོ ཨཱ་ཡ་སྨཱ རཱ་དྷོ…པེ… ཨེ་ཀ་མ་ནྟཾ ནི་སི་ནྣོ ཁོ ཨཱ་ཡ་སྨཱ རཱ་དྷོ བྷ་ག་ཝ་ནྟཾ ཨེ་ཏ་ད་ཝོ་ཙ – ‘‘སཱ་དྷུ མེ, བྷ་ནྟེ, བྷ་ག་ཝཱ སཾ་ཁི་ཏྟེ་ན དྷ་མྨཾ དེ་སེ་ཏུ, ཡ་མ་ཧཾ བྷ་ག་ཝ་ཏོ དྷ་མྨཾ སུ་ཏྭཱ ཨེ་ཀོ ཝཱུ་པ་ཀ་ཊྛོ ཨ་པྤ་མ་ཏྟོ ཨཱ་ཏཱ་པཱི པ་ཧི་ཏ་ཏྟོ ཝི་ཧ་རེ་ཡྻ’’ནྟི. ‘‘ཡཾ ཁོ, རཱ་དྷ, ཨ་ནི་ཙྩཾ ཏ་ཏྲ ཏེ ཚ་ནྡོ པ་ཧཱ་ཏ་བྦོ. ཀི་ཉྩ, རཱ་དྷ, ཨ་ནི་ཙྩཾ ཏ་ཏྲ ཏེ ཚ་ནྡོ པ་ཧཱ་ཏ་བྦོ? ཙ་ཀྑུ ཨ་ནི་ཙྩཾ, རཱུ་པཱ ཨ་ནི་ཙྩཱ, ཙ་ཀྑུ་ཝི་ཉྙཱ་ཎཾ… ཙ་ཀྑུ་ས་མྥ་སྶོ… ཡ་མྤི་དཾ ཙ་ཀྑུ་ས་མྥ་སྶ་པ་ཙྩ་ཡཱ ཨུ་པྤ་ཛྫ་ཏི ཝེ་ད་ཡི་ཏཾ སུ་ཁཾ ཝཱ དུ་ཀྑཾ ཝཱ ཨ་དུ་ཀྑ་མ་སུ་ཁཾ ཝཱ ཏ་མྤི ཨ་ནི་ཙྩཾ. ཏ་ཏྲ ཏེ ཚ་ནྡོ པ་ཧཱ་ཏ་བྦོ…པེ… ཛི་ཝ྄ཧཱ… ཀཱ་ཡོ… མ་ནོ ཨ་ནི་ཙྩོ. ཏ་ཏྲ ཏེ ཚ་ནྡོ པ་ཧཱ་ཏ་བྦོ. དྷ་མྨཱ… མ་ནོ་ཝི་ཉྙཱ་ཎཾ… མ་ནོ་ས་མྥ་སྶོ… ཡ་མྤི་དཾ མ་ནོ་ས་མྥ་སྶ་པ་ཙྩ་ཡཱ ཨུ་པྤ་ཛྫ་ཏི ཝེ་ད་ཡི་ཏཾ སུ་ཁཾ ཝཱ དུ་ཀྑཾ ཝཱ ཨ་དུ་ཀྑ་མ་སུ་ཁཾ ཝཱ ཏ་མྤི ཨ་ནི་ཙྩཾ. ཏ་ཏྲ ཏེ ཚ་ནྡོ པ་ཧཱ་ཏ་བྦོ. ཡཾ ཁོ, རཱ་དྷ, ཨ་ནི་ཙྩཾ ཏ་ཏྲ ཏེ ཚ་ནྡོ པ་ཧཱ་ཏ་བྦོ’’ཏི. ཏ་ཏི་ཡཾ.

༤. རཱ་དྷ་དུ་ཀྑ་སུ་ཏྟཾ

༧༧. ‘‘ཡཾ ཁོ, རཱ་དྷ, དུ་ཀྑཾ ཏ་ཏྲ ཏེ ཚ་ནྡོ པ་ཧཱ་ཏ་བྦོ. ཀི་ཉྩ, རཱ་དྷ, དུ་ཀྑཾ? ཙ་ཀྑུ ཁོ, རཱ་དྷ, དུ་ཀྑཾ. ཏ་ཏྲ ཏེ ཚ་ནྡོ པ་ཧཱ་ཏ་བྦོ. རཱུ་པཱ… ཙ་ཀྑུ་ཝི་ཉྙཱ་ཎཾ… ཙ་ཀྑུ་ས་མྥ་སྶོ… ཡ་མྤི་དཾ ཙ་ཀྑུ་ས་མྥ་སྶ…པེ… ཨ་དུ་ཀྑ་མ་སུ་ཁཾ ཝཱ ཏ་མྤི དུ་ཀྑཾ. ཏ་ཏྲ ཏེ ཚ་ནྡོ པ་ཧཱ་ཏ་བྦོ…པེ… མ་ནོ དུ་ཀྑོ… དྷ་མྨཱ… མ་ནོ་ཝི་ཉྙཱ་ཎཾ… མ་ནོ་ས་མྥ་སྶོ… ཡ་མྤི་དཾ མ་ནོ་ས་མྥ་སྶ་པ་ཙྩ་ཡཱ ཨུ་པྤ་ཛྫ་ཏི ཝེ་ད་ཡི་ཏཾ སུ་ཁཾ ཝཱ དུ་ཀྑཾ ཝཱ ཨ་དུ་ཀྑ་མ་སུ་ཁཾ ཝཱ ཏ་མྤི དུ་ཀྑཾ. ཏ་ཏྲ ཏེ ཚ་ནྡོ པ་ཧཱ་ཏ་བྦོ. ཡཾ ཁོ, རཱ་དྷ, དུ་ཀྑཾ ཏ་ཏྲ ཏེ ཚ་ནྡོ པ་ཧཱ་ཏ་བྦོ’’ཏི. ཙ་ཏུ་ཏྠཾ.

༥. རཱ་དྷ་ཨ་ན་ཏྟ་སུ་ཏྟཾ

༧༨. ‘‘ཡོ ཁོ, རཱ་དྷ, ཨ་ན་ཏྟཱ ཏ་ཏྲ ཏེ ཚ་ནྡོ པ་ཧཱ་ཏ་བྦོ. ཀོ ཙ, རཱ་དྷ, ཨ་ན་ཏྟཱ? ཙ་ཀྑུ ཁོ, རཱ་དྷ, ཨ་ན་ཏྟཱ. ཏ་ཏྲ ཏེ ཚ་ནྡོ པ་ཧཱ་ཏ་བྦོ. རཱུ་པཱ… ཙ་ཀྑུ་ཝི་ཉྙཱ་ཎཾ… ཙ་ཀྑུ་ས་མྥ་སྶོ… ཡ་མྤི་དཾ ཙ་ཀྑུ་ས་མྥ་སྶ་པ་ཙྩ་ཡཱ…པེ… མ་ནོ ཨ་ན་ཏྟཱ… དྷ་མྨཱ… མ་ནོ་ཝི་ཉྙཱ་ཎཾ… མ་ནོ་ས་མྥ་སྶོ… ཡ་མྤི་དཾ མ་ནོ་ས་མྥ་སྶ་པ་ཙྩ་ཡཱ ཨུ་པྤ་ཛྫ་ཏི ཝེ་ད་ཡི་ཏཾ སུ་ཁཾ ཝཱ དུ་ཀྑཾ ཝཱ ཨ་དུ་ཀྑ་མ་སུ་ཁཾ ཝཱ ཏ་མྤི ཨ་ན་ཏྟཱ. ཏ་ཏྲ ཏེ ཚ་ནྡོ པ་ཧཱ་ཏ་བྦོ. ཡོ ཁོ, རཱ་དྷ, ཨ་ན་ཏྟཱ ཏ་ཏྲ ཏེ ཚ་ནྡོ པ་ཧཱ་ཏ་བྦོ’’ཏི. པ་ཉྩ་མཾ.

༦. པ་ཋ་མ་ཨ་ཝི་ཛྫཱ་པ་ཧཱ་ན་སུ་ཏྟཾ

༧༩. ཨ་ཐ ཁོ ཨ་ཉྙ་ཏ་རོ བྷི་ཀྑུ ཡེ་ན བྷ་ག་ཝཱ ཏེ་ནུ་པ་ས་ངྐ་མི…པེ… ཨེ་ཀ་མ་ནྟཾ ནི་སི་ནྣོ ཁོ སོ བྷི་ཀྑུ བྷ་ག་ཝ་ནྟཾ ཨེ་ཏ་ད་ཝོ་ཙ – ‘‘ཨ་ཏྠི ནུ ཁོ, བྷ་ནྟེ, ཨེ་ཀོ དྷ་མྨོ ཡ་སྶ པ་ཧཱ་ནཱ བྷི་ཀྑུ་ནོ ཨ་ཝི་ཛྫཱ པ་ཧཱི་ཡ་ཏི, ཝི་ཛྫཱ ཨུ་པྤ་ཛྫ་ཏཱི’’ཏི?

‘‘ཨ་ཏྠི ཁོ, བྷི་ཀྑུ, ཨེ་ཀོ དྷ་མྨོ ཡ་སྶ པ་ཧཱ་ནཱ བྷི་ཀྑུ་ནོ ཨ་ཝི་ཛྫཱ པ་ཧཱི་ཡ་ཏི, ཝི་ཛྫཱ ཨུ་པྤ་ཛྫ་ཏཱི’’ཏི.

‘‘ཀ་ཏ་མོ པ་ན, བྷ་ནྟེ, ཨེ་ཀོ དྷ་མྨོ ཡ་སྶ པ་ཧཱ་ནཱ བྷི་ཀྑུ་ནོ ཨ་ཝི་ཛྫཱ པ་ཧཱི་ཡ་ཏི, ཝི་ཛྫཱ ཨུ་པྤ་ཛྫ་ཏཱི’’ཏི?

‘‘ཨ་ཝི་ཛྫཱ ཁོ, བྷི་ཀྑུ, ཨེ་ཀོ དྷ་མྨོ ཡ་སྶ པ་ཧཱ་ནཱ བྷི་ཀྑུ་ནོ ཨ་ཝི་ཛྫཱ པ་ཧཱི་ཡ་ཏི, ཝི་ཛྫཱ ཨུ་པྤ་ཛྫ་ཏཱི’’ཏི.

‘‘ཀ་ཐཾ པ་ན, བྷ་ནྟེ, ཛཱ་ན་ཏོ, ཀ་ཐཾ པ་སྶ་ཏོ བྷི་ཀྑུ་ནོ ཨ་ཝི་ཛྫཱ པ་ཧཱི་ཡ་ཏི, ཝི་ཛྫཱ ཨུ་པྤ་ཛྫ་ཏཱི’’ཏི?

‘‘ཙ་ཀྑུཾ ཁོ, བྷི་ཀྑུ, ཨ་ནི་ཙྩ་ཏོ ཛཱ་ན་ཏོ པ་སྶ་ཏོ བྷི་ཀྑུ་ནོ ཨ་ཝི་ཛྫཱ པ་ཧཱི་ཡ་ཏི, ཝི་ཛྫཱ ཨུ་པྤ་ཛྫ་ཏི. རཱུ་པེ… ཙ་ཀྑུ་ཝི་ཉྙཱ་ཎཾ… ཙ་ཀྑུ་ས་མྥ་སྶཾ… ཡ་མྤི་དཾ, ཙ་ཀྑུ་ས་མྥ་སྶ་པ་ཙྩ་ཡཱ ཨུ་པྤ་ཛྫ་ཏི ཝེ་ད་ཡི་ཏཾ སུ་ཁཾ ཝཱ དུ་ཀྑཾ ཝཱ ཨ་དུ་ཀྑ་མ་སུ་ཁཾ ཝཱ ཏ་མྤི ཨ་ནི་ཙྩ་ཏོ ཛཱ་ན་ཏོ པ་སྶ་ཏོ བྷི་ཀྑུ་ནོ ཨ་ཝི་ཛྫཱ པ་ཧཱི་ཡ་ཏི, ཝི་ཛྫཱ ཨུ་པྤ་ཛྫ་ཏི…པེ… མ་ནཾ ཨ་ནི་ཙྩ་ཏོ ཛཱ་ན་ཏོ པ་སྶ་ཏོ བྷི་ཀྑུ་ནོ ཨ་ཝི་ཛྫཱ པ་ཧཱི་ཡ་ཏི, ཝི་ཛྫཱ ཨུ་པྤ་ཛྫ་ཏི. དྷ་མྨེ… མ་ནོ་ཝི་ཉྙཱ་ཎཾ… མ་ནོ་ས་མྥ་སྶཾ… ཡ་མྤི་དཾ མ་ནོ་ས་མྥ་སྶ་པ་ཙྩ་ཡཱ ཨུ་པྤ་ཛྫ་ཏི ཝེ་ད་ཡི་ཏཾ སུ་ཁཾ ཝཱ དུ་ཀྑཾ ཝཱ ཨ་དུ་ཀྑ་མ་སུ་ཁཾ ཝཱ ཏ་མྤི ཨ་ནི་ཙྩ་ཏོ ཛཱ་ན་ཏོ པ་སྶ་ཏོ བྷི་ཀྑུ་ནོ ཨ་ཝི་ཛྫཱ པ་ཧཱི་ཡ་ཏི, ཝི་ཛྫཱ ཨུ་པྤ་ཛྫ་ཏི. ཨེ་ཝཾ ཁོ, བྷི་ཀྑུ, ཛཱ་ན་ཏོ ཨེ་ཝཾ པ་སྶ་ཏོ བྷི་ཀྑུ་ནོ ཨ་ཝི་ཛྫཱ པ་ཧཱི་ཡ་ཏི, ཝི་ཛྫཱ ཨུ་པྤ་ཛྫ་ཏཱི’’ཏི. ཚ་ཊྛཾ.

༧. དུ་ཏི་ཡ་ཨ་ཝི་ཛྫཱ་པ་ཧཱ་ན་སུ་ཏྟཾ

༨༠. ཨ་ཐ ཁོ ཨ་ཉྙ་ཏ་རོ བྷི་ཀྑུ…པེ… ཨེ་ཏ་ད་ཝོ་ཙ – ‘‘ཨ་ཏྠི ནུ ཁོ, བྷ་ནྟེ, ཨེ་ཀོ དྷ་མྨོ ཡ་སྶ པ་ཧཱ་ནཱ བྷི་ཀྑུ་ནོ ཨ་ཝི་ཛྫཱ པ་ཧཱི་ཡ་ཏི, ཝི་ཛྫཱ ཨུ་པྤ་ཛྫ་ཏཱི’’ཏི?

‘‘ཀ་ཐཾ པ་ན, བྷ་ནྟེ, ཛཱ་ན་ཏོ, ཀ་ཐཾ པ་སྶ་ཏོ ཨ་ཝི་ཛྫཱ པ་ཧཱི་ཡ་ཏི, ཝི་ཛྫཱ ཨུ་པྤ་ཛྫ་ཏཱི’’ཏི?

‘‘ཨི་དྷ, བྷི་ཀྑུ, བྷི་ཀྑུ་ནོ སུ་ཏཾ ཧོ་ཏི – ‘ས་བྦེ དྷ་མྨཱ ནཱ་ལཾ ཨ་བྷི་ནི་ཝེ་སཱ་ཡཱ’ཏི. ཨེ་ཝ་ཉྩེ་ཏཾ, བྷི་ཀྑུ, བྷི་ཀྑུ་ནོ སུ་ཏཾ ཧོ་ཏི – ‘ས་བྦེ དྷ་མྨཱ ནཱ་ལཾ ཨ་བྷི་ནི་ཝེ་སཱ་ཡཱ’ཏི. སོ ས་བྦཾ དྷ་མྨཾ ཨ་བྷི་ཛཱ་ནཱ་ཏི, ས་བྦཾ དྷ་མྨཾ ཨ་བྷི་ཉྙཱ་ཡ ས་བྦཾ དྷ་མྨཾ པ་རི་ཛཱ་ནཱ་ཏི, ས་བྦཾ དྷ་མྨཾ པ་རི་ཉྙཱ་ཡ ས་བྦ་ནི་མི་ཏྟཱ་ནི ཨ་ཉྙ་ཏོ པ་སྶ་ཏི, ཙ་ཀྑུཾ ཨ་ཉྙ་ཏོ པ་སྶ་ཏི, རཱུ་པེ… ཙ་ཀྑུ་ཝི་ཉྙཱ་ཎཾ… ཙ་ཀྑུ་ས་མྥ་སྶཾ… ཡ་མྤི་དཾ ཙ་ཀྑུ་ས་མྥ་སྶ་པ་ཙྩ་ཡཱ ཨུ་པྤ་ཛྫ་ཏི ཝེ་ད་ཡི་ཏཾ སུ་ཁཾ ཝཱ དུ་ཀྑཾ ཝཱ ཨ་དུ་ཀྑ་མ་སུ་ཁཾ ཝཱ ཏ་མྤི ཨ་ཉྙ་ཏོ པ་སྶ་ཏི…པེ… མ་ནཾ ཨ་ཉྙ་ཏོ པ་སྶ་ཏི, དྷ་མྨེ… མ་ནོ་ཝི་ཉྙཱ་ཎཾ… མ་ནོ་ས་མྥ་སྶཾ… ཡ་མྤི་དཾ མ་ནོ་ས་མྥ་སྶ་པ་ཙྩ་ཡཱ ཨུ་པྤ་ཛྫ་ཏི ཝེ་ད་ཡི་ཏཾ སུ་ཁཾ ཝཱ དུ་ཀྑཾ ཝཱ ཨ་དུ་ཀྑ་མ་སུ་ཁཾ ཝཱ ཏ་མྤི ཨ་ཉྙ་ཏོ པ་སྶ་ཏི. ཨེ་ཝཾ ཁོ, བྷི་ཀྑུ, ཛཱ་ན་ཏོ ཨེ་ཝཾ པ་སྶ་ཏོ བྷི་ཀྑུ་ནོ ཨ་ཝི་ཛྫཱ པ་ཧཱི་ཡ་ཏི, ཝི་ཛྫཱ ཨུ་པྤ་ཛྫ་ཏཱི’’ཏི. ས་ཏྟ་མཾ.

༨. ས་མྦ་ཧུ་ལ་བྷི་ཀྑུ་སུ་ཏྟཾ

༨༡. ཨ་ཐ ཁོ ས་མྦ་ཧུ་ལཱ བྷི་ཀྑཱུ ཡེ་ན བྷ་ག་ཝཱ ཏེ་ནུ་པ་ས་ངྐ་མིཾ་སུ…པེ… ཨེ་ཀ་མ་ནྟཾ ནི་སི་ནྣཱ ཁོ ཏེ བྷི་ཀྑཱུ བྷ་ག་ཝ་ནྟཾ ཨེ་ཏ་ད་ཝོ་ཙུཾ – ‘‘ཨི་དྷ ནོ, བྷ་ནྟེ, ཨ་ཉྙ་ཏི་ཏྠི་ཡཱ པ་རི་བྦཱ་ཛ་ཀཱ ཨ་མྷེ ཨེ་ཝཾ པུ་ཙྪ་ནྟི – ‘ཀི་མ་ཏྠི་ཡཾ, ཨཱ་ཝུ་སོ, ས་མ་ཎེ གོ་ཏ་མེ བྲ་ཧྨ་ཙ་རི་ཡཾ ཝུ་སྶ་ཏཱི’ཏི? ཨེ་ཝཾ པུ་ཊྛཱ མ་ཡཾ, བྷ་ནྟེ, ཏེ་སཾ ཨ་ཉྙ་ཏི་ཏྠི་ཡཱ་ནཾ པ་རི་བྦཱ་ཛ་ཀཱ་ནཾ ཨེ་ཝཾ བྱཱ་ཀ་རོ་མ – ‘དུ་ཀྑ་སྶ ཁོ, ཨཱ་ཝུ་སོ, པ་རི་ཉྙ་ཏྠཾ བྷ་ག་ཝ་ཏི བྲ་ཧྨ་ཙ་རི་ཡཾ ཝུ་སྶ་ཏཱི’ཏི. ཀ་ཙྩི མ་ཡཾ, བྷ་ནྟེ, ཨེ་ཝཾ པུ་ཊྛཱ ཨེ་ཝཾ བྱཱ་ཀ་ར་མཱ་ནཱ ཝུ་ཏྟ་ཝཱ་དི་ནོ ཙེ་ཝ བྷ་ག་ཝ་ཏོ ཧོ་མ, ན ཙ བྷ་ག་ཝ་ནྟཾ ཨ་བྷཱུ་ཏེ་ན ཨ་བྦྷཱ་ཙི་ཀྑཱ་མ, དྷ་མྨ་སྶ ཙཱ་ནུ་དྷ་མྨཾ བྱཱ་ཀ་རོ་མ, ན ཙ ཀོ་ཙི ས་ཧ་དྷ་མྨི་ཀོ ཝཱ་དཱ་ནུ་ཝཱ་དོ གཱ་ར་ཡ྄ཧཾ ཋཱ་ནཾ ཨཱ་ག་ཙྪ་ཏཱི’’ཏི?

‘‘ཏ་གྒྷ ཏུ་མྷེ, བྷི་ཀྑ་ཝེ, ཨེ་ཝཾ པུ་ཊྛཱ ཨེ་ཝཾ བྱཱ་ཀ་ར་མཱ་ནཱ ཝུ་ཏྟ་ཝཱ་དི་ནོ ཙེ་ཝ མེ ཧོ་ཐ, ན ཙ མཾ ཨ་བྷཱུ་ཏེ་ན ཨ་བྦྷཱ་ཙི་ཀྑ་ཐ, དྷ་མྨ་སྶ ཙཱ་ནུ་དྷ་མྨཾ བྱཱ་ཀ་རོ་ཐ, ན ཙ ཀོ་ཙི ས་ཧ་དྷ་མྨི་ཀོ ཝཱ་དཱ་ནུ་ཝཱ་དོ གཱ་ར་ཡ྄ཧཾ ཋཱ་ནཾ ཨཱ་ག་ཙྪ་ཏི. དུ་ཀྑ་སྶ ཧི, བྷི་ཀྑ་ཝེ, པ་རི་ཉྙ་ཏྠཾ མ་ཡི བྲ་ཧྨ་ཙ་རི་ཡཾ ཝུ་སྶ་ཏི. ས་ཙེ པ་ན ཝོ, བྷི་ཀྑ་ཝེ, ཨ་ཉྙ་ཏི་ཏྠི་ཡཱ པ་རི་བྦཱ་ཛ་ཀཱ ཨེ་ཝཾ པུ་ཙྪེ་ཡྻུཾ – ‘ཀ་ཏ་མཾ པ་ན ཏཾ, ཨཱ་ཝུ་སོ, དུ་ཀྑཾ, ཡ་སྶ པ་རི་ཉྙཱ་ཡ ས་མ་ཎེ གོ་ཏ་མེ བྲ་ཧྨ་ཙ་རི་ཡཾ ཝུ་སྶ་ཏཱི’ཏི? ཨེ་ཝཾ པུ་ཊྛཱ ཏུ་མྷེ, བྷི་ཀྑ་ཝེ, ཏེ་སཾ ཨ་ཉྙ་ཏི་ཏྠི་ཡཱ་ནཾ པ་རི་བྦཱ་ཛ་ཀཱ་ནཾ ཨེ་ཝཾ བྱཱ་ཀ་རེ་ཡྻཱ་ཐ – ‘ཙ་ཀྑུ ཁོ, ཨཱ་ཝུ་སོ, དུ་ཀྑཾ, ཏ་སྶ པ་རི་ཉྙཱ་ཡ བྷ་ག་ཝ་ཏི བྲ་ཧྨ་ཙ་རི་ཡཾ ཝུ་སྶ་ཏི. རཱུ་པཱ…པེ… ཡ་མྤི་དཾ ཙ་ཀྑུ་ས་མྥ་སྶ་པ་ཙྩ་ཡཱ ཨུ་པྤ་ཛྫ་ཏི ཝེ་ད་ཡི་ཏཾ སུ་ཁཾ ཝཱ དུ་ཀྑཾ ཝཱ ཨ་དུ་ཀྑ་མ་སུ་ཁཾ ཝཱ ཏ་མྤི དུ་ཀྑཾ. ཏ་སྶ པ་རི་ཉྙཱ་ཡ བྷ་ག་ཝ་ཏི བྲ་ཧྨ་ཙ་རི་ཡཾ ཝུ་སྶ་ཏི…པེ… མ་ནོ དུ་ཀྑོ…པེ… ཡ་མྤི་དཾ མ་ནོ་ས་མྥ་སྶ་པ་ཙྩ་ཡཱ ཨུ་པྤ་ཛྫ་ཏི ཝེ་ད་ཡི་ཏཾ སུ་ཁཾ ཝཱ དུ་ཀྑཾ ཝཱ ཨ་དུ་ཀྑ་མ་སུ་ཁཾ ཝཱ ཏ་མྤི དུ་ཀྑཾ. ཏ་སྶ པ་རི་ཉྙཱ་ཡ བྷ་ག་ཝ་ཏི བྲ་ཧྨ་ཙ་རི་ཡཾ ཝུ་སྶ་ཏི. ཨི་དཾ ཁོ ཏཾ, ཨཱ་ཝུ་སོ, དུ་ཀྑཾ, ཏ་སྶ པ་རི་ཉྙཱ་ཡ བྷ་ག་ཝ་ཏི བྲ་ཧྨ་ཙ་རི་ཡཾ ཝུ་སྶ་ཏཱི’ཏི. ཨེ་ཝཾ པུ་ཊྛཱ ཏུ་མྷེ, བྷི་ཀྑ་ཝེ, ཏེ་སཾ ཨ་ཉྙ་ཏི་ཏྠི་ཡཱ་ནཾ པ་རི་བྦཱ་ཛ་ཀཱ་ནཾ ཨེ་ཝཾ བྱཱ་ཀ་རེ་ཡྻཱ་ཐཱ’’ཏི. ཨ་ཊྛ་མཾ.

༩. ལོ་ཀ་པ་ཉྷཱ་སུ་ཏྟཾ

༨༢. ཨ་ཐ ཁོ ཨ་ཉྙ་ཏ་རོ བྷི་ཀྑུ ཡེ་ན བྷ་ག་ཝཱ…པེ… ཨེ་ཀ་མ་ནྟཾ ནི་སི་ནྣོ ཁོ སོ བྷི་ཀྑུ བྷ་ག་ཝ་ནྟཾ ཨེ་ཏ་ད་ཝོ་ཙ –

‘‘‘ལོ་ཀོ, ལོ་ཀོ’ཏི, བྷ་ནྟེ, ཝུ་ཙྩ་ཏི. ཀི་ཏྟཱ་ཝ་ཏཱ ནུ ཁོ, བྷ་ནྟེ, ལོ་ཀོ་ཏི ཝུ་ཙྩ་ཏཱི’’ཏི? ‘‘‘ལུ་ཛྫ་ཏཱི’ཏི ཁོ, བྷི་ཀྑུ, ཏ་སྨཱ ལོ་ཀོ་ཏི ཝུ་ཙྩ་ཏི. ཀི་ཉྩ ལུ་ཛྫ་ཏི? ཙ་ཀྑུ ཁོ, བྷི་ཀྑུ, ལུ་ཛྫ་ཏི. རཱུ་པཱ ལུ་ཛྫ་ནྟི, ཙ་ཀྑུ་ཝི་ཉྙཱ་ཎཾ ལུ་ཛྫ་ཏི, ཙ་ཀྑུ་ས་མྥ་སྶོ ལུ་ཛྫ་ཏི, ཡ་མྤི་དཾ ཙ་ཀྑུ་ས་མྥ་སྶ་པ་ཙྩ་ཡཱ ཨུ་པྤ་ཛྫ་ཏི ཝེ་ད་ཡི་ཏཾ སུ་ཁཾ ཝཱ དུ་ཀྑཾ ཝཱ ཨ་དུ་ཀྑ་མ་སུ་ཁཾ ཝཱ ཏ་མྤི ལུ་ཛྫ་ཏི…པེ… ཛི་ཝ྄ཧཱ ལུ་ཛྫ་ཏི…པེ… མ་ནོ ལུ་ཛྫ་ཏི, དྷ་མྨཱ ལུ་ཛྫ་ནྟི, མ་ནོ་ཝི་ཉྙཱ་ཎཾ ལུ་ཛྫ་ཏི, མ་ནོ་ས་མྥ་སྶོ ལུ་ཛྫ་ཏི, ཡ་མྤི་དཾ མ་ནོ་ས་མྥ་སྶ་པ་ཙྩ་ཡཱ ཨུ་པྤ་ཛྫ་ཏི ཝེ་ད་ཡི་ཏཾ སུ་ཁཾ ཝཱ དུ་ཀྑཾ ཝཱ ཨ་དུ་ཀྑ་མ་སུ་ཁཾ ཝཱ ཏ་མྤི ལུ་ཛྫ་ཏི. ལུ་ཛྫ་ཏཱི་ཏི ཁོ, བྷི་ཀྑུ, ཏ་སྨཱ ལོ་ཀོ་ཏི ཝུ་ཙྩ་ཏཱི’’ཏི. ན་ཝ་མཾ.

༡༠. ཕ་གྒུ་ན་པ་ཉྷཱ་སུ་ཏྟཾ

༨༣. ཨ་ཐ ཁོ ཨཱ་ཡ་སྨཱ ཕ་གྒུ་ནོ…པེ… ཨེ་ཀ་མ་ནྟཾ ནི་སི་ནྣོ ཁོ ཨཱ་ཡ་སྨཱ ཕ་གྒུ་ནོ བྷ་ག་ཝ་ནྟཾ ཨེ་ཏ་ད་ཝོ་ཙ –

‘‘ཨ་ཏྠི ནུ ཁོ, བྷ་ནྟེ, ཏཾ ཙ་ཀྑུ, ཡེ་ན ཙ་ཀྑུ་ནཱ ཨ་ཏཱི་ཏེ བུ་དྡྷེ པ་རི་ནི་བྦུ་ཏེ ཚི་ནྣ་པ་པ་ཉྩེ ཚི་ནྣ་ཝ་ཊུ་མེ པ་རི་ཡཱ་དི་ནྣ་ཝ་ཊྚེ ས་བྦ་དུ་ཀྑ་ཝཱི་ཏི་ཝ་ཊྚེ པ་ཉྙཱ་པ་ཡ་མཱ་ནོ པ་ཉྙཱ་པེ་ཡྻ…པེ… ཨ་ཏྠི ནུ ཁོ, བྷ་ནྟེ, སཱ ཛི་ཝ྄ཧཱ, ཡཱ་ཡ ཛི་ཝ྄ཧཱ་ཡ ཨ་ཏཱི་ཏེ བུ་དྡྷེ པ་རི་ནི་བྦུ་ཏེ ཚི་ནྣ་པ་པ་ཉྩེ ཚི་ནྣ་ཝ་ཊུ་མེ པ་རི་ཡཱ་དི་ནྣ་ཝ་ཊྚེ ས་བྦ་དུ་ཀྑ་ཝཱི་ཏི་ཝ་ཊྚེ པ་ཉྙཱ་པ་ཡ་མཱ་ནོ པ་ཉྙཱ་པེ་ཡྻ…པེ… ཨ་ཏྠི ནུ ཁོ སོ, བྷ་ནྟེ, མ་ནོ, ཡེ་ན མ་ནེ་ན ཨ་ཏཱི་ཏེ བུ་དྡྷེ པ་རི་ནི་བྦུ་ཏེ ཚི་ནྣ་པ་པ་ཉྩེ ཚི་ནྣ་ཝ་ཊུ་མེ པ་རི་ཡཱ་དི་ནྣ་ཝ་ཊྚེ ས་བྦ་དུ་ཀྑ་ཝཱི་ཏི་ཝ་ཊྚེ པ་ཉྙཱ་པ་ཡ་མཱ་ནོ པ་ཉྙཱ་པེ་ཡྻཱ’’ཏི?

‘‘ན་ཏྠི ཁོ ཏཾ, ཕ་གྒུ་ན, ཙ་ཀྑུ, ཡེ་ན ཙ་ཀྑུ་ནཱ ཨ་ཏཱི་ཏེ བུ་དྡྷེ པ་རི་ནི་བྦུ་ཏེ ཚི་ནྣ་པ་པ་ཉྩེ ཚི་ནྣ་ཝ་ཊུ་མེ པ་རི་ཡཱ་དི་ནྣ་ཝ་ཊྚེ ས་བྦ་དུ་ཀྑ་ཝཱི་ཏི་ཝ་ཊྚེ པ་ཉྙཱ་པ་ཡ་མཱ་ནོ པ་ཉྙཱ་པེ་ཡྻ …པེ… ན་ཏྠི ཁོ སཱ, ཕ་གྒུ་ན, ཛི་ཝ྄ཧཱ, ཡཱ་ཡ ཛི་ཝ྄ཧཱ་ཡ ཨ་ཏཱི་ཏེ བུ་དྡྷེ པ་རི་ནི་བྦུ་ཏེ ཚི་ནྣ་པ་པ་ཉྩེ ཚི་ནྣ་ཝ་ཊུ་མེ པ་རི་ཡཱ་དི་ནྣ་ཝ་ཊྚེ ས་བྦ་དུ་ཀྑ་ཝཱི་ཏི་ཝ་ཊྚེ པ་ཉྙཱ་པ་ཡ་མཱ་ནོ པ་ཉྙཱ་པེ་ཡྻ…པེ… ན་ཏྠི ཁོ སོ, ཕ་གྒུ་ན, མ་ནོ, ཡེ་ན མ་ནེ་ན ཨ་ཏཱི་ཏེ བུ་དྡྷེ པ་རི་ནི་བྦུ་ཏེ ཚི་ནྣ་པ་པ་ཉྩེ ཚི་ནྣ་ཝ་ཊུ་མེ པ་རི་ཡཱ་དི་ནྣ་ཝ་ཊྚེ ས་བྦ་དུ་ཀྑ་ཝཱི་ཏི་ཝ་ཊྚེ པ་ཉྙཱ་པ་ཡ་མཱ་ནོ པ་ཉྙཱ་པེ་ཡྻཱ’’ཏི. ད་ས་མཾ.

གི་ལཱ་ན་ཝ་གྒོ ཨ་ཊྛ་མོ.

ཏ་སྶུ་དྡཱ་ནཾ –

གི་ལཱ་ནེ་ན དུ་ཝེ ཝུ་ཏྟཱ, རཱ་དྷེ་ན ཨ་པ་རེ ཏ་ཡོ;

ཨ་ཝི་ཛྫཱ་ཡ ཙ དྭེ ཝུ་ཏྟཱ, བྷི་ཀྑུ ལོ་ཀོ ཙ ཕ་གྒུ་ནོ་ཏི.