༣. བཱ་ལི༹་སི་ཀོ་པ་མ་སུ་ཏྟཾ

༢༣༠. ‘‘སེ་ཡྻ་ཐཱ་པི, བྷི་ཀྑ་ཝེ, བཱ་ལི༹་སི་ཀོ ཨཱ་མི་ས་ག་ཏ་བ་ལི༹་སཾ ག་མྦྷཱི་རེ ཨུ་ད་ཀ་ར་ཧ་དེ པ་ཀྑི་པེ་ཡྻ. ཏ་མེ་ནཾ ཨ་ཉྙ་ཏ་རོ ཨཱ་མི་ས་ཙ་ཀྑུ མ་ཙྪོ གི་ལེ་ཡྻ. ཨེ་ཝ་ཉྷི སོ, བྷི་ཀྑ་ཝེ, མ་ཙྪོ གི་ལི་ཏ་བ་ལི༹་སོ བཱ་ལི༹་སི་ཀ་སྶ ཨ་ན་ཡཾ ཨཱ་པ་ནྣོ བྱ་ས་ནཾ ཨཱ་པ་ནྣོ ཡ་ཐཱ་ཀཱ་མ་ཀ་ར་ཎཱི་ཡོ བཱ་ལི༹་སི་ཀ་སྶ.

ཨེ་ཝ་མེ་ཝ ཁོ, བྷི་ཀྑ་ཝེ, ཚ་ཡི་མེ བ་ལི༹་སཱ ལོ་ཀ་སྨིཾ ཨ་ན་ཡཱ་ཡ ས་ཏྟཱ་ནཾ ཝ་དྷཱ་ཡ [བྱཱ་བཱ་དྷཱ་ཡ (སཱི. པཱི.)] པཱ་ཎི་ནཾ. ཀ་ཏ་མེ ཚ? ས་ནྟི, བྷི་ཀྑ་ཝེ, ཙ་ཀྑུ་ཝི་ཉྙེ་ཡྻཱ རཱུ་པཱ ཨི་ཊྛཱ ཀ་ནྟཱ མ་ནཱ་པཱ པི་ཡ་རཱུ་པཱ ཀཱ་མཱུ་པ་སཾ་ཧི་ཏཱ ར་ཛ་ནཱི་ཡཱ. ཏ་ཉྩེ, བྷི་ཀྑུ, ཨ་བྷི་ན་ནྡ་ཏི ཨ་བྷི་ཝ་ད་ཏི ཨ་ཛ྄ཛྷོ་སཱ་ཡ ཏི་ཊྛ་ཏི. ཨ་ཡཾ ཝུ་ཙྩ་ཏི, བྷི་ཀྑ་ཝེ, བྷི་ཀྑུ གི་ལི་ཏ་བ་ལི༹་སོ, མཱ་ར་སྶ ཨ་ན་ཡཾ ཨཱ་པ་ནྣོ བྱ་ས་ནཾ ཨཱ་པ་ནྣོ ཡ་ཐཱ་ཀཱ་མ་ཀ་ར་ཎཱི་ཡོ པཱ་པི་མ་ཏོ…པེ… ས་ནྟི, བྷི་ཀྑ་ཝེ, ཛི་ཝ྄ཧཱ་ཝི་ཉྙེ་ཡྻཱ ར་སཱ…པེ….

ས་ནྟི, བྷི་ཀྑ་ཝེ, མ་ནོ་ཝི་ཉྙེ་ཡྻཱ དྷ་མྨཱ ཨི་ཊྛཱ ཀ་ནྟཱ མ་ནཱ་པཱ པི་ཡ་རཱུ་པཱ ཀཱ་མཱུ་པ་སཾ་ཧི་ཏཱ ར་ཛ་ནཱི་ཡཱ. ཏ་ཉྩེ, བྷི་ཀྑུ, ཨ་བྷི་ན་ནྡ་ཏི ཨ་བྷི་ཝ་ད་ཏི ཨ་ཛ྄ཛྷོ་སཱ་ཡ ཏི་ཊྛ་ཏི. ཨ་ཡཾ ཝུ་ཙྩ་ཏི, བྷི་ཀྑ་ཝེ, བྷི་ཀྑུ གི་ལི་ཏ་བ་ལི༹་སོ མཱ་ར་སྶ ཨ་ན་ཡཾ ཨཱ་པ་ནྣོ བྱ་ས་ནཾ ཨཱ་པ་ནྣོ ཡ་ཐཱ་ཀཱ་མ་ཀ་ར་ཎཱི་ཡོ པཱ་པི་མ་ཏོ.

‘‘ས་ནྟི ཙ, བྷི་ཀྑ་ཝེ, ཙ་ཀྑུ་ཝི་ཉྙེ་ཡྻཱ རཱུ་པཱ ཨི་ཊྛཱ ཀ་ནྟཱ མ་ནཱ་པཱ པི་ཡ་རཱུ་པཱ ཀཱ་མཱུ་པ་སཾ་ཧི་ཏཱ ར་ཛ་ནཱི་ཡཱ. ཏ་ཉྩེ བྷི་ཀྑུ ནཱ་བྷི་ན་ནྡ་ཏི ནཱ་བྷི་ཝ་ད་ཏི ནཱ་ཛ྄ཛྷོ་སཱ་ཡ ཏི་ཊྛ་ཏི. ཨ་ཡཾ ཝུ་ཙྩ་ཏི, བྷི་ཀྑ་ཝེ, བྷི་ཀྑུ ན གི་ལི་ཏ་བ་ལི༹་སོ མཱ་ར་སྶ ཨ་བྷེ་དི བ་ལི༹་སཾ པ་རི་བྷེ་དི བ་ལི༹་སཾ ན ཨ་ན་ཡཾ ཨཱ་པ་ནྣོ ན བྱ་ས་ནཾ ཨཱ་པ་ནྣོ ན ཡ་ཐཱ་ཀཱ་མ་ཀ་ར་ཎཱི་ཡོ པཱ་པི་མ་ཏོ…པེ….

‘‘ས་ནྟི, བྷི་ཀྑ་ཝེ, ཛི་ཝ྄ཧཱ་ཝི་ཉྙེ་ཡྻཱ ར་སཱ…པེ…. ས་ནྟི, བྷི་ཀྑ་ཝེ, མ་ནོ་ཝི་ཉྙེ་ཡྻཱ དྷ་མྨཱ ཨི་ཊྛཱ ཀ་ནྟཱ མ་ནཱ་པཱ པི་ཡ་རཱུ་པཱ ཀཱ་མཱུ་པ་སཾ་ཧི་ཏཱ ར་ཛ་ནཱི་ཡཱ. ཏ་ཉྩེ བྷི་ཀྑུ ནཱ་བྷི་ན་ནྡ་ཏི ནཱ་བྷི་ཝ་ད་ཏི ནཱ་ཛ྄ཛྷོ་སཱ་ཡ ཏི་ཊྛ་ཏི, ཨ་ཡཾ ཝུ་ཙྩ་ཏི, བྷི་ཀྑ་ཝེ, བྷི་ཀྑུ ན གི་ལི་ཏ་བ་ལི༹་སོ མཱ་ར་སྶ ཨ་བྷེ་དི བ་ལི༹་སཾ པ་རི་བྷེ་དི བ་ལི༹་སཾ ན ཨ་ན་ཡཾ ཨཱ་པ་ནྣོ ན བྱ་ས་ནཾ ཨཱ་པ་ནྣོ ན ཡ་ཐཱ་ཀཱ་མ་ཀ་ར་ཎཱི་ཡོ པཱ་པི་མ་ཏོ’’ཏི. ཏ་ཏི་ཡཾ.