༡. པ་ཋ་མ་ས་མུ་དྡ་སུ་ཏྟཾ

༢༢༨. ‘‘‘ས་མུ་དྡོ, ས་མུ་དྡོ’ཏི, བྷི་ཀྑ་ཝེ, ཨ་སྶུ་ཏ་ཝཱ པུ་ཐུ་ཛྫ་ནོ བྷཱ་ས་ཏི. ནེ་སོ, བྷི་ཀྑ་ཝེ, ཨ་རི་ཡ་སྶ ཝི་ན་ཡེ ས་མུ་དྡོ. མ་ཧཱ ཨེ་སོ, བྷི་ཀྑ་ཝེ, ཨུ་ད་ཀ་རཱ་སི མ་ཧཱ་ཨུ་ད་ཀ་ཎྞ་ཝོ. ཙ་ཀྑུ, བྷི་ཀྑ་ཝེ, པུ་རི་ས་སྶ ས་མུ་དྡོ; ཏ་སྶ རཱུ་པ་མ་ཡོ ཝེ་གོ. ཡོ ཏཾ རཱུ་པ་མ་ཡཾ ཝེ་གཾ ས་ཧ་ཏི, ཨ་ཡཾ ཝུ་ཙྩ་ཏི, བྷི་ཀྑ་ཝེ, ཨ་ཏ་རི ཙ་ཀྑུ་ས་མུ་དྡཾ ས་ཨཱུ་མིཾ སཱ་ཝ་ཊྚཾ ས་གཱ་ཧཾ ས་ར་ཀྑ་སཾ; ཏི་ཎྞོ པཱ་ར་ངྒ་ཏོ ཐ་ལེ ཏི་ཊྛ་ཏི བྲཱ་ཧྨ་ཎོ…པེ… ཛི་ཝ྄ཧཱ, བྷི་ཀྑ་ཝེ, པུ་རི་ས་སྶ ས་མུ་དྡོ; ཏ་སྶ ར་ས་མ་ཡོ ཝེ་གོ. ཡོ ཏཾ ར་ས་མ་ཡཾ ཝེ་གཾ ས་ཧ་ཏི, ཨ་ཡཾ ཝུ་ཙྩ་ཏི, བྷི་ཀྑ་ཝེ, ཨ་ཏ་རི ཛི་ཝ྄ཧཱ་ས་མུ་དྡཾ ས་ཨཱུ་མིཾ སཱ་ཝ་ཊྚཾ ས་གཱ་ཧཾ ས་ར་ཀྑ་སཾ; ཏི་ཎྞོ པཱ་ར་ངྒ་ཏོ ཐ་ལེ ཏི་ཊྛ་ཏི བྲཱ་ཧྨ་ཎོ…པེ… མ་ནོ, བྷི་ཀྑ་ཝེ, པུ་རི་ས་སྶ ས་མུ་དྡོ; ཏ་སྶ དྷ་མྨ་མ་ཡོ ཝེ་གོ. ཡོ ཏཾ དྷ་མྨ་མ་ཡཾ ཝེ་གཾ ས་ཧ་ཏི, ཨ་ཡཾ ཝུ་ཙྩ་ཏི, བྷི་ཀྑ་ཝེ, ཨ་ཏ་རི མ་ནོ་ས་མུ་དྡཾ ས་ཨཱུ་མིཾ སཱ་ཝ་ཊྚཾ ས་གཱ་ཧཾ ས་ར་ཀྑ་སཾ; ཏི་ཎྞོ པཱ་ར་ངྒ་ཏོ ཐ་ལེ ཏི་ཊྛ་ཏི བྲཱ་ཧྨ་ཎོ’’ཏི. ཨི་ད་མ་ཝོ་ཙ…པེ… ས་ཏྠཱ –

‘‘ཡོ ཨི་མཾ ས་མུ་དྡཾ ས་གཱ་ཧཾ ས་ར་ཀྑ་སཾ,

ས་ཨཱུ་མིཾ སཱ་ཝ་ཊྚཾ ས་བྷ་ཡཾ དུ་ཏྟ་རཾ ཨ་ཙྩ་ཏ་རི;

ས ཝེ་ད་གཱུ ཝུ་སི་ཏ་བྲ་ཧྨ་ཙ་རི་ཡོ,

ལོ་ཀ་ནྟ་གཱུ པཱ་ར་ག་ཏོ་ཏི ཝུ་ཙྩ་ཏཱི’’ཏི. པ་ཋ་མཾ;