༡༢. ལོ་ཀ་ཀཱ་མ་གུ་ཎ་ཝ་གྒོ

༡. པ་ཋ་མ་མཱ་ར་པཱ་ས་སུ་ཏྟཾ

༡༡༤. ‘‘ས་ནྟི, བྷི་ཀྑ་ཝེ, ཙ་ཀྑུ་ཝི་ཉྙེ་ཡྻཱ རཱུ་པཱ, ཨི་ཊྛཱ ཀ་ནྟཱ མ་ནཱ་པཱ པི་ཡ་རཱུ་པཱ ཀཱ་མཱུ་པ་སཾ་ཧི་ཏཱ ར་ཛ་ནཱི་ཡཱ. ཏ་ཉྩེ, བྷི་ཀྑུ, ཨ་བྷི་ན་ནྡ་ཏི ཨ་བྷི་ཝ་ད་ཏི ཨ་ཛ྄ཛྷོ་སཱ་ཡ ཏི་ཊྛ་ཏི – ཨ་ཡཾ ཝུ་ཙྩ་ཏི, བྷི་ཀྑ་ཝེ, བྷི་ཀྑུ ཨཱ་ཝཱ་ས་ག་ཏོ མཱ་ར་སྶ, མཱ་ར་སྶ ཝ་སཾ ག་ཏོ [ཝ་ས་ག་ཏོ (སཱི. ཨ་ཊྛ. སྱཱ. ཨ་ཊྛ.)], པ་ཊི་མུ་ཀྐ་སྶ མཱ་ར་པཱ་སོ. བ་དྡྷོ སོ མཱ་ར་བ་ནྡྷ་ནེ་ན ཡ་ཐཱ་ཀཱ་མ་ཀ་ར་ཎཱི་ཡོ པཱ་པི་མ་ཏོ…པེ….

‘‘ས་ནྟི, བྷི་ཀྑ་ཝེ, ཛི་ཝ྄ཧཱ་ཝི་ཉྙེ་ཡྻཱ ར་སཱ, ཨི་ཊྛཱ ཀ་ནྟཱ མ་ནཱ་པཱ པི་ཡ་རཱུ་པཱ ཀཱ་མཱུ་པ་སཾ་ཧི་ཏཱ ར་ཛ་ནཱི་ཡཱ. ཏ་ཉྩེ བྷི་ཀྑུ ཨ་བྷི་ན་ནྡ་ཏི ཨ་བྷི་ཝ་ད་ཏི ཨ་ཛ྄ཛྷོ་སཱ་ཡ ཏི་ཊྛ་ཏི – ཨ་ཡཾ ཝུ་ཙྩ་ཏི, བྷི་ཀྑ་ཝེ, བྷི་ཀྑུ ཨཱ་ཝཱ་ས་ག་ཏོ མཱ་ར་སྶ, མཱ་ར་སྶ ཝ་སཾ ག་ཏོ, པ་ཊི་མུ་ཀྐ་སྶ མཱ་ར་པཱ་སོ. བ་དྡྷོ སོ མཱ་ར་བ་ནྡྷ་ནེ་ན…པེ….

‘‘ས་ནྟི, བྷི་ཀྑ་ཝེ, མ་ནོ་ཝི་ཉྙེ་ཡྻཱ དྷ་མྨཱ, ཨི་ཊྛཱ ཀ་ནྟཱ མ་ནཱ་པཱ པི་ཡ་རཱུ་པཱ ཀཱ་མཱུ་པ་སཾ་ཧི་ཏཱ ར་ཛ་ནཱི་ཡཱ. ཏ་ཉྩེ བྷི་ཀྑུ ཨ་བྷི་ན་ནྡ་ཏི ཨ་བྷི་ཝ་ད་ཏི ཨ་ཛ྄ཛྷོ་སཱ་ཡ ཏི་ཊྛ་ཏི – ཨ་ཡཾ ཝུ་ཙྩ་ཏི, བྷི་ཀྑ་ཝེ, བྷི་ཀྑུ ཨཱ་ཝཱ་ས་ག་ཏོ མཱ་ར་སྶ, མཱ་ར་སྶ ཝ་སཾ ག་ཏོ, པ་ཊི་མུ་ཀྐ་སྶ མཱ་ར་པཱ་སོ. བ་དྡྷོ སོ མཱ་ར་བ་ནྡྷ་ནེ་ན ཡ་ཐཱ་ཀཱ་མ་ཀ་ར་ཎཱི་ཡོ པཱ་པི་མ་ཏོ.

‘‘ས་ནྟི ཙ ཁོ, བྷི་ཀྑ་ཝེ, ཙ་ཀྑུ་ཝི་ཉྙེ་ཡྻཱ རཱུ་པཱ, ཨི་ཊྛཱ ཀ་ནྟཱ མ་ནཱ་པཱ པི་ཡ་རཱུ་པཱ ཀཱ་མཱུ་པ་སཾ་ཧི་ཏཱ ར་ཛ་ནཱི་ཡཱ. ཏ་ཉྩེ བྷི་ཀྑུ ནཱ་བྷི་ན་ནྡ་ཏི ནཱ་བྷི་ཝ་ད་ཏི ནཱ་ཛ྄ཛྷོ་སཱ་ཡ ཏི་ཊྛ་ཏི – ཨ་ཡཾ ཝུ་ཙྩ་ཏི, བྷི་ཀྑ་ཝེ, བྷི་ཀྑུ ནཱ་ཝཱ་ས་ག་ཏོ མཱ་ར་སྶ, ན མཱ་ར་སྶ ཝ་སཾ ག་ཏོ, ཨུ་མྨུ་ཀྐ་སྶ མཱ་ར་པཱ་སོ. མུ་ཏྟོ སོ མཱ་ར་བ་ནྡྷ་ནེ་ན ན ཡ་ཐཱ་ཀཱ་མ་ཀ་ར་ཎཱི་ཡོ པཱ་པི་མ་ཏོ…པེ….

‘‘ས་ནྟི, བྷི་ཀྑ་ཝེ, ཛི་ཝ྄ཧཱ་ཝི་ཉྙེ་ཡྻཱ ར་སཱ, ཨི་ཊྛཱ ཀ་ནྟཱ མ་ནཱ་པཱ པི་ཡ་རཱུ་པཱ ཀཱ་མཱུ་པ་སཾ་ཧི་ཏཱ ར་ཛ་ནཱི་ཡཱ. ཏ་ཉྩེ བྷི་ཀྑུ ནཱ་བྷི་ན་ནྡ་ཏི ནཱ་བྷི་ཝ་ད་ཏི ནཱ་ཛ྄ཛྷོ་སཱ་ཡ ཏི་ཊྛ་ཏི – ཨ་ཡཾ ཝུ་ཙྩ་ཏི, བྷི་ཀྑ་ཝེ, བྷི་ཀྑུ ནཱ་ཝཱ་ས་ག་ཏོ མཱ་ར་སྶ, ན མཱ་ར་སྶ ཝ་སཾ ག་ཏོ, ཨུ་མྨུ་ཀྐ་སྶ མཱ་ར་པཱ་སོ. མུ་ཏྟོ སོ མཱ་ར་བ་ནྡྷ་ནེ་ན ན ཡ་ཐཱ་ཀཱ་མ་ཀ་ར་ཎཱི་ཡོ པཱ་པི་མ་ཏོ…པེ….

‘‘ས་ནྟི, བྷི་ཀྑ་ཝེ, མ་ནོ་ཝི་ཉྙེ་ཡྻཱ དྷ་མྨཱ, ཨི་ཊྛཱ ཀ་ནྟཱ མ་ནཱ་པཱ པི་ཡ་རཱུ་པཱ ཀཱ་མཱུ་པ་སཾ་ཧི་ཏཱ ར་ཛ་ནཱི་ཡཱ. ཏ་ཉྩེ བྷི་ཀྑུ ནཱ་བྷི་ན་ནྡ་ཏི ནཱ་བྷི་ཝ་ད་ཏི ནཱ་ཛ྄ཛྷོ་སཱ་ཡ ཏི་ཊྛ་ཏི – ཨ་ཡཾ ཝུ་ཙྩ་ཏི, བྷི་ཀྑ་ཝེ, བྷི་ཀྑུ ནཱ་ཝཱ་ས་ག་ཏོ མཱ་ར་སྶ, ན མཱ་ར་སྶ ཝ་སཾ ག་ཏོ, ཨུ་མྨུ་ཀྐ་སྶ མཱ་ར་པཱ་སོ. མུ་ཏྟོ སོ མཱ་ར་བ་ནྡྷ་ནེ་ན ན ཡ་ཐཱ་ཀཱ་མ་ཀ་ར་ཎཱི་ཡོ པཱ་པི་མ་ཏོ’’ཏི. པ་ཋ་མཾ.

༢. དུ་ཏི་ཡ་མཱ་ར་པཱ་ས་སུ་ཏྟཾ

༡༡༥. ‘‘ས་ནྟི, བྷི་ཀྑ་ཝེ, ཙ་ཀྑུ་ཝི་ཉྙེ་ཡྻཱ རཱུ་པཱ, ཨི་ཊྛཱ ཀ་ནྟཱ མ་ནཱ་པཱ པི་ཡ་རཱུ་པཱ ཀཱ་མཱུ་པ་སཾ་ཧི་ཏཱ ར་ཛ་ནཱི་ཡཱ. ཏ་ཉྩེ བྷི་ཀྑུ ཨ་བྷི་ན་ནྡ་ཏི ཨ་བྷི་ཝ་ད་ཏི ཨ་ཛ྄ཛྷོ་སཱ་ཡ ཏི་ཊྛ་ཏི – ཨ་ཡཾ ཝུ་ཙྩ་ཏི, བྷི་ཀྑ་ཝེ, བྷི་ཀྑུ བ་དྡྷོ ཙ་ཀྑུ་ཝི་ཉྙེ་ཡྻེ་སུ རཱུ་པེ་སུ, ཨཱ་ཝཱ་ས་ག་ཏོ མཱ་ར་སྶ, མཱ་ར་སྶ ཝ་སཾ ག་ཏོ, པ་ཊི་མུ་ཀྐ་སྶ མཱ་ར་པཱ་སོ. བ་དྡྷོ སོ མཱ་ར་བ་ནྡྷ་ནེ་ན ཡ་ཐཱ་ཀཱ་མ་ཀ་ར་ཎཱི་ཡོ པཱ་པི་མ་ཏོ…པེ….

‘‘ས་ནྟི, བྷི་ཀྑ་ཝེ, ཛི་ཝ྄ཧཱ་ཝི་ཉྙེ་ཡྻཱ ར་སཱ…པེ… ས་ནྟི, བྷི་ཀྑ་ཝེ, མ་ནོ་ཝི་ཉྙེ་ཡྻཱ དྷ་མྨཱ, ཨི་ཊྛཱ ཀ་ནྟཱ མ་ནཱ་པཱ པི་ཡ་རཱུ་པཱ ཀཱ་མཱུ་པ་སཾ་ཧི་ཏཱ ར་ཛ་ནཱི་ཡཱ. ཏ་ཉྩེ བྷི་ཀྑུ ཨ་བྷི་ན་ནྡ་ཏི ཨ་བྷི་ཝ་ད་ཏི ཨ་ཛ྄ཛྷོ་སཱ་ཡ ཏི་ཊྛ་ཏི – ཨ་ཡཾ ཝུ་ཙྩ་ཏི, བྷི་ཀྑ་ཝེ, བྷི་ཀྑུ བ་དྡྷོ མ་ནོ་ཝི་ཉྙེ་ཡྻེ་སུ དྷ་མྨེ་སུ, ཨཱ་ཝཱ་ས་ག་ཏོ མཱ་ར་སྶ, མཱ་ར་སྶ ཝ་སཾ ག་ཏོ, པ་ཊི་མུ་ཀྐ་སྶ མཱ་ར་པཱ་སོ. བ་དྡྷོ སོ མཱ་ར་བ་ནྡྷ་ནེ་ན ཡ་ཐཱ་ཀཱ་མ་ཀ་ར་ཎཱི་ཡོ པཱ་པི་མ་ཏོ…པེ….

‘‘ས་ནྟི ཙ ཁོ, བྷི་ཀྑ་ཝེ, ཙ་ཀྑུ་ཝི་ཉྙེ་ཡྻཱ རཱུ་པཱ, ཨི་ཊྛཱ ཀ་ནྟཱ མ་ནཱ་པཱ པི་ཡ་རཱུ་པཱ ཀཱ་མཱུ་པ་སཾ་ཧི་ཏཱ ར་ཛ་ནཱི་ཡཱ. ཏ་ཉྩེ བྷི་ཀྑུ ནཱ་བྷི་ན་ནྡ་ཏི ནཱ་བྷི་ཝ་ད་ཏི ནཱ་ཛ྄ཛྷོ་སཱ་ཡ ཏི་ཊྛ་ཏི – ཨ་ཡཾ ཝུ་ཙྩ་ཏི, བྷི་ཀྑ་ཝེ, བྷི་ཀྑུ མུ་ཏྟོ ཙ་ཀྑུ་ཝི་ཉྙེ་ཡྻེ་ཧི རཱུ་པེ་ཧི, ནཱ་ཝཱ་ས་ག་ཏོ མཱ་ར་སྶ, ན མཱ་ར་སྶ ཝ་སཾ ག་ཏོ, ཨུ་མྨུ་ཀྐ་སྶ མཱ་ར་པཱ་སོ. མུ་ཏྟོ སོ མཱ་ར་བ་ནྡྷ་ནེ་ན ན ཡ་ཐཱ་ཀཱ་མ་ཀ་ར་ཎཱི་ཡོ པཱ་པི་མ་ཏོ…པེ….

‘‘ས་ནྟི, བྷི་ཀྑ་ཝེ, ཛི་ཝ྄ཧཱ་ཝི་ཉྙེ་ཡྻཱ ར་སཱ…པེ… ས་ནྟི, བྷི་ཀྑ་ཝེ, མ་ནོ་ཝི་ཉྙེ་ཡྻཱ དྷ་མྨཱ, ཨི་ཊྛཱ ཀ་ནྟཱ མ་ནཱ་པཱ པི་ཡ་རཱུ་པཱ ཀཱ་མཱུ་པ་སཾ་ཧི་ཏཱ ར་ཛ་ནཱི་ཡཱ. ཏ་ཉྩེ བྷི་ཀྑུ ནཱ་བྷི་ན་ནྡ་ཏི ནཱ་བྷི་ཝ་ད་ཏི ནཱ་ཛ྄ཛྷོ་སཱ་ཡ ཏི་ཊྛ་ཏི – ཨ་ཡཾ ཝུ་ཙྩ་ཏི, བྷི་ཀྑ་ཝེ, བྷི་ཀྑུ མུ་ཏྟོ མ་ནོ་ཝི་ཉྙེ་ཡྻེ་ཧི དྷ་མྨེ་ཧི, ནཱ་ཝཱ་ས་ག་ཏོ མཱ་ར་སྶ, ན མཱ་ར་སྶ ཝ་སཾ ག་ཏོ, ཨུ་མྨུ་ཀྐ་སྶ མཱ་ར་པཱ་སོ. མུ་ཏྟོ སོ མཱ་ར་བ་ནྡྷ་ནེ་ན ན ཡ་ཐཱ་ཀཱ་མ་ཀ་ར་ཎཱི་ཡོ པཱ་པི་མ་ཏོ’’ཏི. དུ་ཏི་ཡཾ.

༣. ལོ་ཀ་ནྟ་ག་མ་ན་སུ་ཏྟཾ

༡༡༦. ‘‘ནཱ་ཧཾ, བྷི་ཀྑ་ཝེ, ག་མ་ནེ་ན ལོ་ཀ་སྶ ཨ་ནྟཾ ཉཱ་ཏེ་ཡྻཾ, ད་ཊྛེ་ཡྻཾ [དི་ཊྛེ་ཡྻཾ (སྱཱ. ཀཾ. ཀ.)], པ་ཏྟེ་ཡྻ་ནྟི ཝ་དཱ་མི. ན ཙ པ་ནཱ་ཧཾ, བྷི་ཀྑ་ཝེ, ཨ་པྤ་ཏྭཱ ལོ་ཀ་སྶ ཨ་ནྟཾ དུ་ཀྑ་སྶ ཨ་ནྟ་ཀི་རི་ཡཾ ཝ་དཱ་མཱི’’ཏི. ཨི་དཾ ཝ་ཏྭཱ བྷ་ག་ཝཱ ཨུ་ཊྛཱ་ཡཱ་ས་ནཱ ཝི་ཧཱ་རཾ པཱ་ཝི་སི. ཨ་ཐ ཁོ ཏེ་སཾ བྷི་ཀྑཱུ་ནཾ ཨ་ཙི་ར་པ་ཀྐ་ནྟ་སྶ བྷ་ག་ཝ་ཏོ ཨེ་ཏ་ད་ཧོ་སི – ‘‘ཨི་དཾ ཁོ ནོ, ཨཱ་ཝུ་སོ, བྷ་ག་ཝཱ སཾ་ཁི་ཏྟེ་ན ཨུ་དྡེ་སཾ ཨུ་དྡི་སི་ཏྭཱ ཝི་ཏྠཱ་རེ་ན ཨ་ཏྠཾ ཨ་ཝི་བྷ་ཛི་ཏྭཱ ཨུ་ཊྛཱ་ཡཱ་ས་ནཱ ཝི་ཧཱ་རཾ པ་ཝི་ཊྛོ – ‘ནཱ་ཧཾ, བྷི་ཀྑ་ཝེ, ག་མ་ནེ་ན ལོ་ཀ་སྶ ཨ་ནྟཾ ཉཱ་ཏེ་ཡྻཾ, ད་ཊྛེ་ཡྻཾ, པ་ཏྟེ་ཡྻ་ནྟི ཝ་དཱ་མི. ན ཙ པ་ནཱ་ཧཾ, བྷི་ཀྑ་ཝེ, ཨ་པྤ་ཏྭཱ ལོ་ཀ་སྶ ཨ་ནྟཾ དུ་ཀྑ་སྶ ཨ་ནྟ་ཀི་རི་ཡཾ ཝ་དཱ་མཱི’ཏི. ཀོ ནུ ཁོ ཨི་མ་སྶ བྷ་ག་ཝ་ཏཱ སཾ་ཁི་ཏྟེ་ན ཨུ་དྡེ་ས་སྶ ཨུ་དྡི་ཊྛ་སྶ ཝི་ཏྠཱ་རེ་ན ཨ་ཏྠཾ ཨ་ཝི་བྷ་ཏྟ་སྶ ཝི་ཏྠཱ་རེ་ན ཨ་ཏྠཾ ཝི་བྷ་ཛེ་ཡྻཱ’’ཏི?

ཨ་ཐ ཁོ ཏེ་སཾ བྷི་ཀྑཱུ་ནཾ ཨེ་ཏ་ད་ཧོ་སི – ‘‘ཨ་ཡཾ ཁོ ཨཱ་ཡ་སྨཱ ཨཱ་ན་ནྡོ ས་ཏྠུ ཙེ་ཝ སཾ་ཝ་ཎྞི་ཏོ, ས་མྦྷཱ་ཝི་ཏོ ཙ ཝི་ཉྙཱུ་ནཾ ས་བྲ་ཧྨ་ཙཱ་རཱི་ནཾ. པ་ཧོ་ཏི ཙཱ་ཡ་སྨཱ ཨཱ་ན་ནྡོ ཨི་མ་སྶ བྷ་ག་ཝ་ཏཱ སཾ་ཁི་ཏྟེ་ན ཨུ་དྡེ་ས་སྶ ཨུ་དྡི་ཊྛ་སྶ ཝི་ཏྠཱ་རེ་ན ཨ་ཏྠཾ ཨ་ཝི་བྷ་ཏྟ་སྶ ཝི་ཏྠཱ་རེ་ན ཨ་ཏྠཾ ཝི་བྷ་ཛི་ཏུཾ. ཡཾ་ནཱུ་ན མ་ཡཾ ཡེ་ནཱ་ཡ་སྨཱ ཨཱ་ན་ནྡོ ཏེ་ནུ་པ་ས་ངྐ་མེ་ཡྻཱ་མ; ཨུ་པ་ས་ངྐ་མི་ཏྭཱ ཨཱ་ཡ་སྨ་ནྟཾ ཨཱ་ན་ནྡཾ ཨེ་ཏ་མ་ཏྠཾ པ་ཊི་པུ་ཙྪེ་ཡྻཱ་མཱ’’ཏི.

ཨ་ཐ ཁོ ཏེ བྷི་ཀྑཱུ ཡེ་ནཱ་ཡ་སྨཱ ཨཱ་ན་ནྡོ ཏེ་ནུ་པ་ས་ངྐ་མིཾ་སུ; ཨུ་པ་ས་ངྐ་མི་ཏྭཱ ཨཱ་ཡ་སྨ་ཏཱ ཨཱ་ན་ནྡེ་ན ས་དྡྷིཾ ས་མྨོ་དིཾ་སུ. ས་མྨོ་ད་ནཱི་ཡཾ ཀ་ཐཾ སཱ་ར་ཎཱི་ཡཾ ཝཱི་ཏི་སཱ་རེ་ཏྭཱ ཨེ་ཀ་མ་ནྟཾ ནི་སཱི་དིཾ་སུ. ཨེ་ཀ་མ་ནྟཾ ནི་སི་ནྣཱ ཁོ ཏེ བྷི་ཀྑཱུ ཨཱ་ཡ་སྨ་ནྟཾ ཨཱ་ན་ནྡཾ ཨེ་ཏ་ད་ཝོ་ཙུཾ –

‘‘ཨི་དཾ ཁོ ནོ, ཨཱ་ཝུ་སོ ཨཱ་ན་ནྡ, བྷ་ག་ཝཱ སཾ་ཁི་ཏྟེ་ན ཨུ་དྡེ་སཾ ཨུ་དྡི་སི་ཏྭཱ ཝི་ཏྠཱ་རེ་ན ཨ་ཏྠཾ ཨ་ཝི་བྷ་ཛི་ཏྭཱ ཨུ་ཊྛཱ་ཡཱ་ས་ནཱ ཝི་ཧཱ་རཾ པ་ཝི་ཊྛོ – ‘ནཱ་ཧཾ, བྷི་ཀྑ་ཝེ, ག་མ་ནེ་ན ལོ་ཀ་སྶ ཨ་ནྟཾ ཉཱ་ཏེ་ཡྻཾ, ད་ཊྛེ་ཡྻཾ, པ་ཏྟེ་ཡྻ་ནྟི ཝ་དཱ་མི. ན ཙ པ་ནཱ་ཧཾ, བྷི་ཀྑ་ཝེ, ཨ་པྤ་ཏྭཱ ལོ་ཀ་སྶ ཨ་ནྟཾ དུ་ཀྑ་སྶ ཨ་ནྟ་ཀི་རི་ཡཾ ཝ་དཱ་མཱི’ཏི. ཏེ་སཾ ནོ, ཨཱ་ཝུ་སོ, ཨ་མྷཱ་ཀཾ ཨ་ཙི་ར་པ་ཀྐ་ནྟ་སྶ བྷ་ག་ཝ་ཏོ ཨེ་ཏ་ད་ཧོ་སི – ‘ཨི་དཾ ཁོ ནོ, ཨཱ་ཝུ་སོ, བྷ་ག་ཝཱ སཾ་ཁི་ཏྟེ་ན ཨུ་དྡེ་སཾ ཨུ་དྡི་སི་ཏྭཱ ཝི་ཏྠཱ་རེ་ན ཨ་ཏྠཾ ཨ་ཝི་བྷ་ཛི་ཏྭཱ ཨུ་ཊྛཱ་ཡཱ་ས་ནཱ ཝི་ཧཱ་རཾ པ་ཝི་ཊྛོ – ནཱ་ཧཾ, བྷི་ཀྑ་ཝེ, ག་མ་ནེ་ན ལོ་ཀ་སྶ ཨ་ནྟཾ ཉཱ་ཏེ་ཡྻཾ, ད་ཊྛེ་ཡྻཾ, པ་ཏྟེ་ཡྻ་ནྟི ཝ་དཱ་མི. ན ཙ པ་ནཱ་ཧཾ, བྷི་ཀྑ་ཝེ, ཨ་པྤ་ཏྭཱ ལོ་ཀ་སྶ ཨ་ནྟཾ དུ་ཀྑ་སྶ ཨ་ནྟ་ཀི་རི་ཡཾ ཝ་དཱ་མཱི་ཏི. ཀོ ནུ ཁོ ཨི་མ་སྶ བྷ་ག་ཝ་ཏཱ སཾ་ཁི་ཏྟེ་ན ཨུ་དྡེ་ས་སྶ ཨུ་དྡི་ཊྛ་སྶ ཝི་ཏྠཱ་རེ་ན ཨ་ཏྠཾ ཨ་ཝི་བྷ་ཏྟ་སྶ ཝི་ཏྠཱ་རེ་ན ཨ་ཏྠཾ ཝི་བྷ་ཛེ་ཡྻཱ’ཏི? ཏེ་སཾ ནོ, ཨཱ་ཝུ་སོ, ཨ་མྷཱ་ཀཾ ཨེ་ཏ་ད་ཧོ་སི – ‘ཨ་ཡཾ ཁོ, ཨཱ་ཝུ་སོ, ཨཱ་ཡ་སྨཱ ཨཱ་ན་ནྡོ ས་ཏྠུ ཙེ་ཝ སཾ་ཝ་ཎྞི་ཏོ, ས་མྦྷཱ་ཝི་ཏོ ཙ ཝི་ཉྙཱུ་ནཾ ས་བྲ་ཧྨ་ཙཱ་རཱི་ནཾ. པ་ཧོ་ཏི ཙཱ་ཡ་སྨཱ ཨཱ་ན་ནྡོ ཨི་མ་སྶ བྷ་ག་ཝ་ཏཱ སཾ་ཁི་ཏྟེ་ན ཨུ་དྡེ་ས་སྶ ཨུ་དྡི་ཊྛ་སྶ ཝི་ཏྠཱ་རེ་ན ཨ་ཏྠཾ ཨ་ཝི་བྷ་ཏྟ་སྶ ཝི་ཏྠཱ་རེ་ན ཨ་ཏྠཾ ཝི་བྷ་ཛི་ཏུཾ. ཡཾ་ནཱུ་ན མ་ཡཾ ཡེ་ནཱ་ཡ་སྨཱ ཨཱ་ན་ནྡོ ཏེ་ནུ་པ་ས་ངྐ་མེ་ཡྻཱ་མ; ཨུ་པ་ས་ངྐ་མི་ཏྭཱ ཨཱ་ཡ་སྨ་ནྟཾ ཨཱ་ན་ནྡཾ ཨེ་ཏ་མ་ཏྠཾ པ་ཊི་པུ་ཙྪེ་ཡྻཱ་མཱ’ཏི. ཝི་བྷ་ཛ་ཏཱ་ཡ་སྨཱ ཨཱ་ན་ནྡོ’’ཏི.

‘‘སེ་ཡྻ་ཐཱ་པི, ཨཱ་ཝུ་སོ, པུ་རི་སོ སཱ་ར་ཏྠི་ཀོ སཱ་ར་ག་ཝེ་སཱི སཱ་ར་པ་རི་ཡེ་ས་ནཾ ཙ་ར་མཱ་ནོ མ་ཧ་ཏོ རུ་ཀྑ་སྶ ཏི་ཊྛ་ཏོ སཱ་ར་ཝ་ཏོ ཨ་ཏི་ཀྐ་མྨེ་ཝ, མཱུ་ལཾ ཨ་ཏི་ཀྐ་མྨེ་ཝ, ཁ་ནྡྷཾ སཱ་ཁཱ་པ་ལཱ་སེ སཱ་རཾ པ་རི་ཡེ་སི་ཏ་བྦཾ མ་ཉྙེ་ཡྻ; ཨེ་ཝཾ ས་མྤ་ད་མི་དཾ ཨཱ་ཡ་སྨ་ནྟཱ་ནཾ ས་ཏྠ་རི ས་མྨུ་ཁཱི་བྷཱུ་ཏེ ཏཾ བྷ་ག་ཝ་ནྟཾ ཨ་ཏི་སི་ཏྭཱ ཨ་མྷེ ཨེ་ཏ་མ་ཏྠཾ པ་ཊི་པུ་ཙྪི་ཏ་བྦཾ མ་ཉྙ་ཐ [མ་ཉྙེ་ཐ (པཱི. ཀ.)]. སོ ཧཱ་ཝུ་སོ, བྷ་ག་ཝཱ ཛཱ་ནཾ ཛཱ་ནཱ་ཏི, པ་སྶཾ པ་སྶ་ཏི – ཙ་ཀྑུ་བྷཱུ་ཏོ, ཉཱ་ཎ་བྷཱུ་ཏོ, དྷ་མྨ་བྷཱུ་ཏོ, བྲ་ཧྨ་བྷཱུ་ཏོ, ཝ་ཏྟཱ, པ་ཝ་ཏྟཱ, ཨ་ཏྠ་སྶ ནི་ནྣེ་ཏཱ, ཨ་མ་ཏ་སྶ དཱ་ཏཱ, དྷ་མྨ་སྶཱ་མཱི, ཏ་ཐཱ་ག་ཏོ. སོ ཙེ་ཝ པ་ནེ་ཏ་སྶ ཀཱ་ལོ ཨ་ཧོ་སི ཡཾ བྷ་ག་ཝ་ནྟཾ་ཡེ་ཝ ཨེ་ཏ་མ་ཏྠཾ པ་ཊི་པུ་ཙྪེ་ཡྻཱ་ཐ. ཡ་ཐཱ ཝོ བྷ་ག་ཝཱ བྱཱ་ཀ་རེ་ཡྻ ཏ་ཐཱ ཝོ དྷཱ་རེ་ཡྻཱ་ཐཱ’’ཏི.

‘‘ཨ་དྡྷཱ་ཝུ་སོ ཨཱ་ན་ནྡ, བྷ་ག་ཝཱ ཛཱ་ནཾ ཛཱ་ནཱ་ཏི, པ་སྶཾ པ་སྶ་ཏི – ཙ་ཀྑུ་བྷཱུ་ཏོ, ཉཱ་ཎ་བྷཱུ་ཏོ, དྷ་མྨ་བྷཱུ་ཏོ, བྲ་ཧྨ་བྷཱུ་ཏོ, ཝ་ཏྟཱ, པ་ཝ་ཏྟཱ, ཨ་ཏྠ་སྶ ནི་ནྣེ་ཏཱ, ཨ་མ་ཏ་སྶ དཱ་ཏཱ, དྷ་མྨ་སྶཱ་མཱི, ཏ་ཐཱ་ག་ཏོ. སོ ཙེ་ཝ པ་ནེ་ཏ་སྶ ཀཱ་ལོ ཨ་ཧོ་སི ཡཾ བྷ་ག་ཝ་ནྟཾ་ཡེ་ཝ ཨེ་ཏ་མ་ཏྠཾ པ་ཊི་པུ་ཙྪེ་ཡྻཱ་མ. ཡ་ཐཱ ནོ བྷ་ག་ཝཱ བྱཱ་ཀ་རེ་ཡྻ ཏ་ཐཱ ནཾ དྷཱ་རེ་ཡྻཱ་མ. ཨ་པི ཙཱ་ཡ་སྨཱ ཨཱ་ན་ནྡོ ས་ཏྠུ ཙེ་ཝ སཾ་ཝ་ཎྞི་ཏོ, ས་མྦྷཱ་ཝི་ཏོ ཙ ཝི་ཉྙཱུ་ནཾ ས་བྲ་ཧྨ་ཙཱ་རཱི་ནཾ. པ་ཧོ་ཏི ཙཱ་ཡ་སྨཱ ཨཱ་ན་ནྡོ ཨི་མ་སྶ བྷ་ག་ཝ་ཏཱ སཾ་ཁི་ཏྟེ་ན ཨུ་དྡེ་ས་སྶ ཨུ་དྡི་ཊྛ་སྶ ཝི་ཏྠཱ་རེ་ན ཨ་ཏྠཾ ཨ་ཝི་བྷ་ཏྟ་སྶ ཝི་ཏྠཱ་རེ་ན ཨ་ཏྠཾ ཝི་བྷ་ཛི་ཏུཾ. ཝི་བྷ་ཛ་ཏཱ་ཡ་སྨཱ ཨཱ་ན་ནྡོ ཨ་ག་རུཾ ཀ་རི་ཏྭཱ’’ཏི.

‘‘ཏེ་ན་ཧཱ་ཝུ་སོ, སུ་ཎཱ་ཐ, སཱ་དྷུ་ཀཾ མ་ན་སི ཀ་རོ་ཐ; བྷཱ་སི་སྶཱ་མཱི’’ཏི. ‘‘ཨེ་ཝ་མཱ་ཝུ་སོ’’ཏི ཁོ ཏེ བྷི་ཀྑཱུ ཨཱ་ཡ་སྨ་ཏོ ཨཱ་ན་ནྡ་སྶ པ་ཙྩ་སྶོ་སུཾ. ཨཱ་ཡ་སྨཱ ཨཱ་ན་ནྡོ ཨེ་ཏ་ད་ཝོ་ཙ –

‘‘ཡཾ ཁོ ཝོ, ཨཱ་ཝུ་སོ, བྷ་ག་ཝཱ སཾ་ཁི་ཏྟེ་ན ཨུ་དྡེ་སཾ ཨུ་དྡི་སི་ཏྭཱ ཝི་ཏྠཱ་རེ་ན ཨ་ཏྠཾ ཨ་ཝི་བྷ་ཛི་ཏྭཱ ཨུ་ཊྛཱ་ཡཱ་ས་ནཱ ཝི་ཧཱ་རཾ པ་ཝི་ཊྛོ – ‘ནཱ་ཧཾ, བྷི་ཀྑ་ཝེ, ག་མ་ནེ་ན ལོ་ཀ་སྶ ཨ་ནྟཾ ཉཱ་ཏེ་ཡྻཾ, ད་ཊྛེ་ཡྻཾ, པ་ཏྟེ་ཡྻ་ནྟི ཝ་དཱ་མི. ན ཙ པ་ནཱ་ཧཾ, བྷི་ཀྑ་ཝེ, ཨ་པྤ་ཏྭཱ ལོ་ཀ་སྶ ཨ་ནྟཾ དུ་ཀྑ་སྶ ཨ་ནྟ་ཀི་རི་ཡཾ ཝ་དཱ་མཱི’ཏི, ཨི་མ་སྶ ཁྭཱ་ཧཾ, ཨཱ་ཝུ་སོ, བྷ་ག་ཝ་ཏཱ སཾ་ཁི་ཏྟེ་ན ཨུ་དྡེ་ས་སྶ ཨུ་དྡི་ཊྛ་སྶ ཝི་ཏྠཱ་རེ་ན ཨ་ཏྠཾ ཨ་ཝི་བྷ་ཏྟ་སྶ ཝི་ཏྠཱ་རེ་ན ཨ་ཏྠཾ ཨཱ་ཛཱ་ནཱ་མི. ཡེ་ན ཁོ, ཨཱ་ཝུ་སོ, ལོ་ཀ་སྨིཾ ལོ་ཀ་ས་ཉྙཱི ཧོ་ཏི ལོ་ཀ་མཱ་ནཱི – ཨ་ཡཾ ཝུ་ཙྩ་ཏི ཨ་རི་ཡ་སྶ ཝི་ན་ཡེ ལོ་ཀོ. ཀེ་ན ཙཱ་ཝུ་སོ, ལོ་ཀ་སྨིཾ ལོ་ཀ་ས་ཉྙཱི ཧོ་ཏི ལོ་ཀ་མཱ་ནཱི? ཙ་ཀྑུ་ནཱ ཁོ, ཨཱ་ཝུ་སོ, ལོ་ཀ་སྨིཾ ལོ་ཀ་ས་ཉྙཱི ཧོ་ཏི ལོ་ཀ་མཱ་ནཱི. སོ་ཏེ་ན ཁོ, ཨཱ་ཝུ་སོ… གྷཱ་ནེ་ན ཁོ, ཨཱ་ཝུ་སོ… ཛི་ཝ྄ཧཱ་ཡ ཁོ, ཨཱ་ཝུ་སོ, ལོ་ཀ་སྨིཾ ལོ་ཀ་ས་ཉྙཱི ཧོ་ཏི ལོ་ཀ་མཱ་ནཱི. ཀཱ་ཡེ་ན ཁོ, ཨཱ་ཝུ་སོ… མ་ནེ་ན ཁོ, ཨཱ་ཝུ་སོ, ལོ་ཀ་སྨིཾ ལོ་ཀ་ས་ཉྙཱི ཧོ་ཏི ལོ་ཀ་མཱ་ནཱི. ཡེ་ན ཁོ, ཨཱ་ཝུ་སོ, ལོ་ཀ་སྨིཾ ལོ་ཀ་ས་ཉྙཱི ཧོ་ཏི ལོ་ཀ་མཱ་ནཱི – ཨ་ཡཾ ཝུ་ཙྩ་ཏི ཨ་རི་ཡ་སྶ ཝི་ན་ཡེ ལོ་ཀོ. ཡཾ ཁོ ཝོ, ཨཱ་ཝུ་སོ, བྷ་ག་ཝཱ སཾ་ཁི་ཏྟེ་ན ཨུ་དྡེ་སཾ ཨུ་དྡི་སི་ཏྭཱ ཝི་ཏྠཱ་རེ་ན ཨ་ཏྠཾ ཨ་ཝི་བྷ་ཛི་ཏྭཱ ཨུ་ཊྛཱ་ཡཱ་ས་ནཱ ཝི་ཧཱ་རཾ པ་ཝི་ཊྛོ – ‘ནཱ་ཧཾ, བྷི་ཀྑ་ཝེ, ག་མ་ནེ་ན ལོ་ཀ་སྶ ཨ་ནྟཾ ཉཱ་ཏེ་ཡྻཾ, ད་ཊྛེ་ཡྻཾ, པ་ཏྟེ་ཡྻ་ནྟི ཝ་དཱ་མི. ན ཙ པ་ནཱ་ཧཾ, བྷི་ཀྑ་ཝེ, ཨ་པྤ་ཏྭཱ ལོ་ཀ་སྶ ཨ་ནྟཾ དུ་ཀྑ་སྶ ཨ་ནྟ་ཀི་རི་ཡཾ ཝ་དཱ་མཱི’ཏི, ཨི་མ་སྶ ཁྭཱ་ཧཾ, ཨཱ་ཝུ་སོ, བྷ་ག་ཝ་ཏཱ སཾ་ཁི་ཏྟེ་ན ཨུ་དྡེ་ས་སྶ ཨུ་དྡི་ཊྛ་སྶ ཝི་ཏྠཱ་རེ་ན ཨ་ཏྠཾ ཨ་ཝི་བྷ་ཏྟ་སྶ ཨེ་ཝཾ ཝི་ཏྠཱ་རེ་ན ཨ་ཏྠཾ ཨཱ་ཛཱ་ནཱ་མི. ཨཱ་ཀ་ངྑ་མཱ་ནཱ ཙ པ་ན ཏུ་མྷེ ཨཱ་ཡ་སྨ་ནྟོ བྷ་ག་ཝ་ནྟཾ་ཡེ་ཝ ཨུ་པ་ས་ངྐ་མི་ཏྭཱ ཨེ་ཏ་མ་ཏྠཾ པ་ཊི་པུ་ཙྪེ་ཡྻཱ་ཐ. ཡ་ཐཱ ཝོ བྷ་ག་ཝཱ བྱཱ་ཀ་རོ་ཏི ཏ་ཐཱ ནཾ དྷཱ་རེ་ཡྻཱ་ཐཱ’’ཏི.

‘‘ཨེ་ཝ་མཱ་ཝུ་སོ’’ཏི ཁོ ཏེ བྷི་ཀྑཱུ ཨཱ་ཡ་སྨ་ཏོ ཨཱ་ན་ནྡ་སྶ པ་ཊི་སྶུ་ཏྭཱ ཨུ་ཊྛཱ་ཡཱ་ས་ནཱ ཡེ་ན བྷ་ག་ཝཱ ཏེ་ནུ་པ་ས་ངྐ་མིཾ་སུ; ཨུ་པ་ས་ངྐ་མི་ཏྭཱ བྷ་ག་ཝ་ནྟཾ ཨ་བྷི་ཝཱ་དེ་ཏྭཱ ཨེ་ཀ་མ་ནྟཾ ནི་སཱི་དིཾ་སུ. ཨེ་ཀ་མ་ནྟཾ ནི་སི་ནྣཱ ཁོ ཏེ བྷི་ཀྑཱུ བྷ་ག་ཝ་ནྟཾ ཨེ་ཏ་ད་ཝོ་ཙུཾ –

‘‘ཡཾ ཁོ ནོ, བྷ་ནྟེ, བྷ་ག་ཝཱ སཾ་ཁི་ཏྟེ་ན ཨུ་དྡེ་སཾ ཨུ་དྡི་སི་ཏྭཱ ཝི་ཏྠཱ་རེ་ན ཨ་ཏྠཾ ཨ་ཝི་བྷ་ཛི་ཏྭཱ ཨུ་ཊྛཱ་ཡཱ་ས་ནཱ ཝི་ཧཱ་རཾ པ་ཝི་ཊྛོ – ‘ནཱ་ཧཾ, བྷི་ཀྑ་ཝེ, ག་མ་ནེ་ན ལོ་ཀ་སྶ ཨ་ནྟཾ ཉཱ་ཏེ་ཡྻཾ, ད་ཊྛེ་ཡྻཾ, པ་ཏྟེ་ཡྻ་ནྟི ཝ་དཱ་མི. ན ཙ པ་ནཱ་ཧཾ, བྷི་ཀྑ་ཝེ, ཨ་པྤ་ཏྭཱ ལོ་ཀ་སྶ ཨ་ནྟཾ དུ་ཀྑ་སྶ ཨ་ནྟ་ཀི་རི་ཡཾ ཝ་དཱ་མཱི’ཏི. ཏེ་སཾ ནོ, བྷ་ནྟེ, ཨ་མྷཱ་ཀཾ ཨ་ཙི་ར་པ་ཀྐ་ནྟ་སྶ བྷ་ག་ཝ་ཏོ ཨེ་ཏ་ད་ཧོ་སི – ‘ཨི་དཾ ཁོ ནོ, ཨཱ་ཝུ་སོ, བྷ་ག་ཝཱ སཾ་ཁི་ཏྟེ་ན ཨུ་དྡེ་སཾ ཨུ་དྡི་སི་ཏྭཱ ཝི་ཏྠཱ་རེ་ན ཨ་ཏྠཾ ཨ་ཝི་བྷ་ཛི་ཏྭཱ ཨུ་ཊྛཱ་ཡཱ་ས་ནཱ ཝི་ཧཱ་རཾ པ་ཝི་ཊྛོ – ནཱ་ཧཾ, བྷི་ཀྑ་ཝེ, ག་མ་ནེ་ན ལོ་ཀ་སྶ ཨ་ནྟཾ ཉཱ་ཏེ་ཡྻཾ, ད་ཊྛེ་ཡྻཾ, པ་ཏྟེ་ཡྻ་ནྟི ཝ་དཱ་མི. ན ཙ པ་ནཱ་ཧཾ, བྷི་ཀྑ་ཝེ, ཨ་པྤ་ཏྭཱ ལོ་ཀ་སྶ ཨ་ནྟཾ དུ་ཀྑ་སྶ ཨ་ནྟ་ཀི་རི་ཡཾ ཝ་དཱ་མཱི’ཏི. ཀོ ནུ ཁོ ཨི་མ་སྶ བྷ་ག་ཝ་ཏཱ སཾ་ཁི་ཏྟེ་ན ཨུ་དྡེ་ས་སྶ ཨུ་དྡི་ཊྛ་སྶ ཝི་ཏྠཱ་རེ་ན ཨ་ཏྠཾ ཨ་ཝི་བྷ་ཏྟ་སྶ ཝི་ཏྠཱ་རེ་ན ཨ་ཏྠཾ ཝི་བྷ་ཛེ་ཡྻཱ་ཏི? ཏེ་སཾ ནོ, བྷ་ནྟེ, ཨ་མྷཱ་ཀཾ ཨེ་ཏ་ད་ཧོ་སི – ‘ཨ་ཡཾ ཁོ ཨཱ་ཡ་སྨཱ ཨཱ་ན་ནྡོ ས་ཏྠུ ཙེ་ཝ སཾ་ཝ་ཎྞི་ཏོ, ས་མྦྷཱ་ཝི་ཏོ ཙ ཝི་ཉྙཱུ་ནཾ ས་བྲ་ཧྨ་ཙཱ་རཱི་ནཾ. པ་ཧོ་ཏི ཙཱ་ཡ་སྨཱ ཨཱ་ན་ནྡོ ཨི་མ་སྶ བྷ་ག་ཝ་ཏཱ སཾ་ཁི་ཏྟེ་ན ཨུ་དྡེ་ས་སྶ ཨུ་དྡི་ཊྛ་སྶ ཝི་ཏྠཱ་རེ་ན ཨ་ཏྠཾ ཨ་ཝི་བྷ་ཏྟ་སྶ ཝི་ཏྠཱ་རེ་ན ཨ་ཏྠཾ ཝི་བྷ་ཛི་ཏུཾ. ཡཾ་ནཱུ་ན མ་ཡཾ ཡེ་ནཱ་ཡ་སྨཱ ཨཱ་ན་ནྡོ ཏེ་ནུ་པ་ས་ངྐ་མེ་ཡྻཱ་མ; ཨུ་པ་ས་ངྐ་མི་ཏྭཱ ཨཱ་ཡ་སྨ་ནྟཾ ཨཱ་ན་ནྡཾ ཨེ་ཏ་མ་ཏྠཾ པ་ཊི་པུ་ཙྪེ་ཡྻཱ་མཱ’ཏི. ཨ་ཐ ཁོ མ་ཡཾ, བྷ་ནྟེ, ཡེ་ནཱ་ཡ་སྨཱ ཨཱ་ན་ནྡོ ཏེ་ནུ་པ་ས་ངྐ་མི་མྷ; ཨུ་པ་ས་ངྐ་མི་ཏྭཱ ཨཱ་ཡ་སྨ་ནྟཾ ཨཱ་ན་ནྡཾ ཨེ་ཏ་མ་ཏྠཾ པ་ཊི་པུ་ཙྪི་མྷ. ཏེ་སཾ ནོ, བྷ་ནྟེ, ཨཱ་ཡ་སྨ་ཏཱ ཨཱ་ན་ནྡེ་ན ཨི་མེ་ཧི ཨཱ་ཀཱ་རེ་ཧི ཨི་མེ་ཧི པ་དེ་ཧི ཨི་མེ་ཧི བྱ་ཉྫ་ནེ་ཧི ཨ་ཏྠོ ཝི་བྷ་ཏྟོ’’ཏི.

‘‘པ་ཎྜི་ཏོ, བྷི་ཀྑ་ཝེ, ཨཱ་ན་ནྡོ; མ་ཧཱ་པ་ཉྙོ, བྷི་ཀྑ་ཝེ, ཨཱ་ན་ནྡོ! མཾ ཙེ་པི ཏུ་མྷེ, བྷི་ཀྑ་ཝེ, ཨེ་ཏ་མ་ཏྠཾ པ་ཊི་པུ་ཙྪེ་ཡྻཱ་ཐ, ཨ་ཧ་མྤི ཏཾ ཨེ་ཝ་མེ་ཝཾ བྱཱ་ཀ་རེ་ཡྻཾ ཡ་ཐཱ ཏཾ ཨཱ་ན་ནྡེ་ན བྱཱ་ཀ་ཏཾ. ཨེ་སོ ཙེ་ཝེ་ཏ་སྶ ཨ་ཏྠོ, ཨེ་ཝ་ཉྩ ནཾ དྷཱ་རེ་ཡྻཱ་ཐཱ’’ཏི. ཏ་ཏི་ཡཾ.

༤. ཀཱ་མ་གུ་ཎ་སུ་ཏྟཾ

༡༡༧. ‘‘པུ་བྦེ་ཝ མེ, བྷི་ཀྑ་ཝེ, ས་མྦོ་དྷཱ ཨ་ན་བྷི་ས་མྦུ་དྡྷ་སྶ བོ་དྷི་ས་ཏྟ་སྶེ་ཝ ས་ཏོ ཨེ་ཏ་ད་ཧོ་སི – ‘ཡེ་མེ པ་ཉྩ ཀཱ་མ་གུ་ཎཱ ཙེ་ཏ་སོ ས་མྥུ་ཊྛ་པུ་བྦཱ ཨ་ཏཱི་ཏཱ ནི་རུ་དྡྷཱ ཝི་པ་རི་ཎ་ཏཱ, ཏ་ཏྲ མེ ཙི་ཏྟཾ བ་ཧུ་ལཾ ག་ཙྪ་མཱ་ནཾ ག་ཙྪེ་ཡྻ པ་ཙྩུ་པྤ་ནྣེ་སུ ཝཱ ཨ་པྤཾ ཝཱ ཨ་ནཱ་ག་ཏེ་སུ’. ཏ་སྶ མ་ཡ྄ཧཾ, བྷི་ཀྑ་ཝེ, ཨེ་ཏ་ད་ཧོ་སི – ‘ཡེ་མེ པ་ཉྩ ཀཱ་མ་གུ་ཎཱ ཙེ་ཏ་སོ ས་མྥུ་ཊྛ་པུ་བྦཱ ཨ་ཏཱི་ཏཱ ནི་རུ་དྡྷཱ ཝི་པ་རི་ཎ་ཏཱ, ཏ་ཏྲ མེ ཨ་ཏྟ་རཱུ་པེ་ན ཨ་པྤ་མཱ་དོ ས་ཏི ཙེ་ཏ་སོ ཨཱ་ར་ཀྑོ ཀ་ར་ཎཱི་ཡོ’. ཏ་སྨཱ་ཏི་ཧ, བྷི་ཀྑ་ཝེ, ཏུ་མྷཱ་ཀ་མྤི ཡེ ཏེ པ་ཉྩ ཀཱ་མ་གུ་ཎཱ ཙེ་ཏ་སོ ས་མྥུ་ཊྛ་པུ་བྦཱ ཨ་ཏཱི་ཏཱ ནི་རུ་དྡྷཱ ཝི་པ་རི་ཎ་ཏཱ, ཏ་ཏྲ ཝོ ཙི་ཏྟཾ བ་ཧུ་ལཾ ག་ཙྪ་མཱ་ནཾ ག་ཙྪེ་ཡྻ པ་ཙྩུ་པྤ་ནྣེ་སུ ཝཱ ཨ་པྤཾ ཝཱ ཨ་ནཱ་ག་ཏེ་སུ. ཏ་སྨཱ་ཏི་ཧ, བྷི་ཀྑ་ཝེ, ཏུ་མྷཱ་ཀ་མྤི ཡེ ཏེ པ་ཉྩ ཀཱ་མ་གུ་ཎཱ ཙེ་ཏ་སོ ས་མྥུ་ཊྛ་པུ་བྦཱ ཨ་ཏཱི་ཏཱ ནི་རུ་དྡྷཱ ཝི་པ་རི་ཎ་ཏཱ, ཏ་ཏྲ ཝོ ཨ་ཏྟ་རཱུ་པེ་ཧི ཨ་པྤ་མཱ་དོ ས་ཏི ཙེ་ཏ་སོ ཨཱ་ར་ཀྑོ ཀ་ར་ཎཱི་ཡོ. ཏ་སྨཱ་ཏི་ཧ, བྷི་ཀྑ་ཝེ, སེ ཨཱ་ཡ་ཏ་ནེ ཝེ་དི་ཏ་བྦེ ཡ་ཏྠ ཙ་ཀྑུ ཙ ནི་རུ་ཛ྄ཛྷ་ཏི, རཱུ་པ་ས་ཉྙཱ ཙ ནི་རུ་ཛ྄ཛྷ་ཏི, སེ ཨཱ་ཡ་ཏ་ནེ ཝེ་དི་ཏ་བྦེ…པེ… ཡ་ཏྠ ཛི་ཝ྄ཧཱ ཙ ནི་རུ་ཛ྄ཛྷ་ཏི, ར་ས་ས་ཉྙཱ ཙ ནི་རུ་ཛ྄ཛྷ་ཏི, སེ ཨཱ་ཡ་ཏ་ནེ ཝེ་དི་ཏ་བྦེ…པེ… ཡ་ཏྠ མ་ནོ ཙ ནི་རུ་ཛ྄ཛྷ་ཏི, དྷ་མྨ་ས་ཉྙཱ ཙ ནི་རུ་ཛ྄ཛྷ་ཏི, སེ ཨཱ་ཡ་ཏ་ནེ ཝེ་དི་ཏ་བྦེ’’ཏི. ཨི་དཾ ཝ་ཏྭཱ བྷ་ག་ཝཱ ཨུ་ཊྛཱ་ཡཱ་ས་ནཱ ཝི་ཧཱ་རཾ པཱ་ཝི་སི.

ཨ་ཐ ཁོ ཏེ་སཾ བྷི་ཀྑཱུ་ནཾ ཨ་ཙི་ར་པ་ཀྐ་ནྟ་སྶ བྷ་ག་ཝ་ཏོ ཨེ་ཏ་ད་ཧོ་སི – ‘‘ཨི་དཾ ཁོ ནོ, ཨཱ་ཝུ་སོ, བྷ་ག་ཝཱ སཾ་ཁི་ཏྟེ་ན ཨུ་དྡེ་སཾ ཨུ་དྡི་སི་ཏྭཱ ཝི་ཏྠཱ་རེ་ན ཨ་ཏྠཾ ཨ་ཝི་བྷ་ཛི་ཏྭཱ ཨུ་ཊྛཱ་ཡཱ་ས་ནཱ ཝི་ཧཱ་རཾ པ་ཝི་ཊྛོ – ‘ཏ་སྨཱ་ཏི་ཧ, བྷི་ཀྑ་ཝེ, སེ ཨཱ་ཡ་ཏ་ནེ ཝེ་དི་ཏ་བྦེ ཡ་ཏྠ ཙ་ཀྑུ ཙ ནི་རུ་ཛ྄ཛྷ་ཏི, རཱུ་པ་ས་ཉྙཱ ཙ ནི་རུ་ཛ྄ཛྷ་ཏི, སེ ཨཱ་ཡ་ཏ་ནེ ཝེ་དི་ཏ་བྦེ…པེ… ཡ་ཏྠ ཛི་ཝ྄ཧཱ ཙ ནི་རུ་ཛ྄ཛྷ་ཏི, ར་ས་ས་ཉྙཱ ཙ ནི་རུ་ཛ྄ཛྷ་ཏི, སེ ཨཱ་ཡ་ཏ་ནེ ཝེ་དི་ཏ་བྦེ…པེ… ཡ་ཏྠ མ་ནོ ཙ ནི་རུ་ཛ྄ཛྷ་ཏི, དྷ་མྨ་ས་ཉྙཱ ཙ ནི་རུ་ཛ྄ཛྷ་ཏི, སེ ཨཱ་ཡ་ཏ་ནེ ཝེ་དི་ཏ་བྦེ’ཏི. ཀོ ནུ ཁོ ཨི་མ་སྶ བྷ་ག་ཝ་ཏཱ སཾ་ཁི་ཏྟེ་ན ཨུ་དྡེ་ས་སྶ ཨུ་དྡི་ཊྛ་སྶ ཝི་ཏྠཱ་རེ་ན ཨ་ཏྠཾ ཨ་ཝི་བྷ་ཏྟ་སྶ ཝི་ཏྠཱ་རེ་ན ཨ་ཏྠཾ ཝི་བྷ་ཛེ་ཡྻཱ’’ཏི?

‘‘ཨི་དཾ ཁོ ནོ, ཨཱ་ཝུ་སོ ཨཱ་ན་ནྡ, བྷ་ག་ཝཱ སཾ་ཁི་ཏྟེ་ན ཨུ་དྡེ་སཾ ཨུ་དྡི་སི་ཏྭཱ ཝི་ཏྠཱ་རེ་ན ཨ་ཏྠཾ ཨ་ཝི་བྷ་ཛི་ཏྭཱ ཨུ་ཊྛཱ་ཡཱ་ས་ནཱ ཝི་ཧཱ་རཾ པ་ཝི་ཊྛོ – ‘ཏ་སྨཱ་ཏི་ཧ, བྷི་ཀྑ་ཝེ, སེ ཨཱ་ཡ་ཏ་ནེ ཝེ་དི་ཏ་བྦེ ཡ་ཏྠ ཙ་ཀྑུ ཙ ནི་རུ་ཛ྄ཛྷ་ཏི, རཱུ་པ་ས་ཉྙཱ ཙ ནི་རུ་ཛ྄ཛྷ་ཏི, སེ ཨཱ་ཡ་ཏ་ནེ ཝེ་དི་ཏ་བྦེ…པེ… ཡ་ཏྠ ཛི་ཝ྄ཧཱ ཙ ནི་རུ་ཛ྄ཛྷ་ཏི, ར་ས་ས་ཉྙཱ ཙ ནི་རུ་ཛ྄ཛྷ་ཏི, སེ ཨཱ་ཡ་ཏ་ནེ ཝེ་དི་ཏ་བྦེ…པེ… ཡ་ཏྠ མ་ནོ ཙ ནི་རུ་ཛ྄ཛྷ་ཏི, དྷ་མྨ་ས་ཉྙཱ ཙ ནི་རུ་ཛ྄ཛྷ་ཏི, སེ ཨཱ་ཡ་ཏ་ནེ ཝེ་དི་ཏ་བྦེ’ཏི. ཏེ་སཾ ནོ, ཨཱ་ཝུ་སོ, ཨ་མྷཱ་ཀཾ ཨ་ཙི་ར་པ་ཀྐ་ནྟ་སྶ བྷ་ག་ཝ་ཏོ ཨེ་ཏ་ད་ཧོ་སི – ‘ཨི་དཾ ཁོ ནོ, ཨཱ་ཝུ་སོ, བྷ་ག་ཝཱ སཾ་ཁི་ཏྟེ་ན ཨུ་དྡེ་སཾ ཨུ་དྡི་སི་ཏྭཱ ཝི་ཏྠཱ་རེ་ན ཨ་ཏྠཾ ཨ་ཝི་བྷ་ཛི་ཏྭཱ ཨུ་ཊྛཱ་ཡཱ་ས་ནཱ ཝི་ཧཱ་རཾ པ་ཝི་ཊྛོ – ཏ་སྨཱ་ཏི་ཧ, བྷི་ཀྑ་ཝེ, སེ ཨཱ་ཡ་ཏ་ནེ ཝེ་དི་ཏ་བྦེ ཡ་ཏྠ ཙ་ཀྑུ ཙ ནི་རུ་ཛ྄ཛྷ་ཏི, རཱུ་པ་ས་ཉྙཱ ཙ ནི་རུ་ཛ྄ཛྷ་ཏི, སེ ཨཱ་ཡ་ཏ་ནེ ཝེ་དི་ཏ་བྦེ…པེ… ཡ་ཏྠ ཛི་ཝ྄ཧཱ ཙ ནི་རུ་ཛ྄ཛྷ་ཏི, ར་ས་ས་ཉྙཱ ཙ ནི་རུ་ཛ྄ཛྷ་ཏི སེ ཨཱ་ཡ་ཏ་ནེ ཝེ་དི་ཏ་བྦེ…པེ… ཡ་ཏྠ མ་ནོ ཙ ནི་རུ་ཛ྄ཛྷ་ཏི, དྷ་མྨ་ས་ཉྙཱ ཙ ནི་རུ་ཛ྄ཛྷ་ཏི, སེ ཨཱ་ཡ་ཏ་ནེ ཝེ་དི་ཏ་བྦེ’ཏི. ཀོ ནུ ཁོ ཨི་མ་སྶ བྷ་ག་ཝ་ཏཱ སཾ་ཁི་ཏྟེ་ན ཨུ་དྡེ་ས་སྶ ཨུ་དྡི་ཊྛ་སྶ ཝི་ཏྠཱ་རེ་ན ཨ་ཏྠཾ ཨ་ཝི་བྷ་ཏྟ་སྶ ཝི་ཏྠཱ་རེ་ན ཨ་ཏྠཾ ཝི་བྷ་ཛེ་ཡྻཱ་ཏི? ཏེ་སཾ ནོ, ཨཱ་ཝུ་སོ, ཨ་མྷཱ་ཀཾ ཨེ་ཏ་ད་ཧོ་སི – ‘ཨ་ཡཾ ཁོ ཨཱ་ཡ་སྨཱ ཨཱ་ན་ནྡོ ས་ཏྠུ ཙེ་ཝ སཾ་ཝ་ཎྞི་ཏོ, ས་མྦྷཱ་ཝི་ཏོ ཙ ཝི་ཉྙཱུ་ནཾ ས་བྲ་ཧྨ་ཙཱ་རཱི་ནཾ. པ་ཧོ་ཏི ཙཱ་ཡ་སྨཱ ཨཱ་ན་ནྡོ ཨི་མ་སྶ བྷ་ག་ཝ་ཏཱ སཾ་ཁི་ཏྟེ་ན ཨུ་དྡེ་ས་སྶ ཨུ་དྡི་ཊྛ་སྶ ཝི་ཏྠཱ་རེ་ན ཨ་ཏྠཾ ཨ་ཝི་བྷ་ཏྟ་སྶ ཝི་ཏྠཱ་རེ་ན ཨ་ཏྠཾ ཝི་བྷ་ཛི་ཏུཾ. ཡཾ་ནཱུ་ན མ་ཡཾ ཡེ་ནཱ་ཡ་སྨཱ ཨཱ་ན་ནྡོ ཏེ་ནུ་པ་ས་ངྐ་མེ་ཡྻཱ་མ; ཨུ་པ་ས་ངྐ་མི་ཏྭཱ ཨཱ་ཡ་སྨ་ནྟཾ ཨཱ་ན་ནྡཾ ཨེ་ཏ་མ་ཏྠཾ པ་ཊི་པུ་ཙྪེ་ཡྻཱ་མཱ’ཏི. ཝི་བྷ་ཛ་ཏཱ་ཡ་སྨཱ ཨཱ་ན་ནྡོ’’ཏི.

‘‘སེ་ཡྻ་ཐཱ་པི, ཨཱ་ཝུ་སོ, པུ་རི་སོ སཱ་ར་ཏྠི་ཀོ སཱ་ར་ག་ཝེ་སཱི སཱ་ར་པ་རི་ཡེ་ས་ནཾ ཙ་ར་མཱ་ནོ མ་ཧ་ཏོ རུ་ཀྑ་སྶ…པེ… ཝི་བྷ་ཛ་ཏཱ་ཡ་སྨཱ ཨཱ་ན་ནྡོ ཨ་ག་རུཾ ཀ་རི་ཏྭཱ་ཏི.

‘‘ཡཾ ཁོ ཝོ, ཨཱ་ཝུ་སོ, བྷ་ག་ཝཱ སཾ་ཁི་ཏྟེ་ན ཨུ་དྡེ་སཾ ཨུ་དྡི་སི་ཏྭཱ ཝི་ཏྠཱ་རེ་ན ཨ་ཏྠཾ ཨ་ཝི་བྷ་ཛི་ཏྭཱ ཨུ་ཊྛཱ་ཡཱ་ས་ནཱ ཝི་ཧཱ་རཾ པ་ཝི་ཊྛོ – ‘ཏ་སྨཱ་ཏི་ཧ, བྷི་ཀྑ་ཝེ, སེ ཨཱ་ཡ་ཏ་ནེ ཝེ་དི་ཏ་བྦེ ཡ་ཏྠ ཙ་ཀྑུ ཙ ནི་རུ་ཛ྄ཛྷ་ཏི, རཱུ་པ་ས་ཉྙཱ ཙ ནི་རུ་ཛ྄ཛྷ་ཏི, སེ ཨཱ་ཡ་ཏ་ནེ ཝེ་དི་ཏ་བྦེ…པེ… ཡ་ཏྠ མ་ནོ ཙ ནི་རུ་ཛ྄ཛྷ་ཏི, དྷ་མྨ་ས་ཉྙཱ ཙ ནི་རུ་ཛ྄ཛྷ་ཏི, སེ ཨཱ་ཡ་ཏ་ནེ ཝེ་དི་ཏ་བྦེ’ཏི. ཨི་མ་སྶ ཁྭཱ་ཧཾ, ཨཱ་ཝུ་སོ, བྷ་ག་ཝ་ཏཱ སཾ་ཁི་ཏྟེ་ན ཨུ་དྡེ་ས་སྶ ཨུ་དྡི་ཊྛ་སྶ ཝི་ཏྠཱ་རེ་ན ཨ་ཏྠཾ ཨ་ཝི་བྷ་ཏྟ་སྶ ཝི་ཏྠཱ་རེ་ན ཨ་ཏྠཾ ཨཱ་ཛཱ་ནཱ་མི. ས་ལཱ༹་ཡ་ཏ་ན་ནི་རོ་དྷཾ ནོ ཨེ་ཏཾ, ཨཱ་ཝུ་སོ, བྷ་ག་ཝ་ཏཱ ས་ནྡྷཱ་ཡ བྷཱ་སི་ཏཾ – ‘ཏ་སྨཱ་ཏི་ཧ, བྷི་ཀྑ་ཝེ, སེ ཨཱ་ཡ་ཏ་ནེ ཝེ་དི་ཏ་བྦེ, ཡ་ཏྠ ཙ་ཀྑུ ཙ ནི་རུ་ཛ྄ཛྷ་ཏི, རཱུ་པ་ས་ཉྙཱ ཙ ནི་རུ་ཛ྄ཛྷ་ཏི, སེ ཨཱ་ཡ་ཏ་ནེ ཝེ་དི་ཏ་བྦེ…པེ… ཡ་ཏྠ མ་ནོ ཙ ནི་རུ་ཛ྄ཛྷ་ཏི, དྷ་མྨ་ས་ཉྙཱ ཙ ནི་རུ་ཛ྄ཛྷ་ཏི, སེ ཨཱ་ཡ་ཏ་ནེ ཝེ་དི་ཏ་བྦེ’ཏི. ཨ་ཡཾ ཁོ, ཨཱ་ཝུ་སོ, བྷ་ག་ཝཱ སཾ་ཁི་ཏྟེ་ན ཨུ་དྡེ་སཾ ཨུ་དྡི་སི་ཏྭཱ ཝི་ཏྠཱ་རེ་ན ཨ་ཏྠཾ ཨ་ཝི་བྷ་ཛི་ཏྭཱ ཨུ་ཊྛཱ་ཡཱ་ས་ནཱ ཝི་ཧཱ་རཾ པ་ཝི་ཊྛོ – ‘ཏ་སྨཱ་ཏི་ཧ, བྷི་ཀྑ་ཝེ, སེ ཨཱ་ཡ་ཏ་ནེ ཝེ་དི་ཏ་བྦེ ཡ་ཏྠ ཙ་ཀྑུ ཙ ནི་རུ་ཛ྄ཛྷ་ཏི, རཱུ་པ་ས་ཉྙཱ ཙ ནི་རུ་ཛ྄ཛྷ་ཏི, སེ ཨཱ་ཡ་ཏ་ནེ ཝེ་དི་ཏ་བྦེ…པེ… ཡ་ཏྠ མ་ནོ ཙ ནི་རུ་ཛ྄ཛྷ་ཏི, དྷ་མྨ་ས་ཉྙཱ ཙ ནི་རུ་ཛ྄ཛྷ་ཏི, སེ ཨཱ་ཡ་ཏ་ནེ ཝེ་དི་ཏ་བྦེ’ཏི. ཨི་མ་སྶ ཁྭཱ་ཧཾ, ཨཱ་ཝུ་སོ, བྷ་ག་ཝ་ཏཱ སཾ་ཁི་ཏྟེ་ན ཨུ་དྡེ་ས་སྶ ཨུ་དྡི་ཊྛ་སྶ ཝི་ཏྠཱ་རེ་ན ཨ་ཏྠཾ ཨ་ཝི་བྷ་ཏྟ་སྶ ཨེ་ཝཾ ཝི་ཏྠཱ་རེ་ན ཨ་ཏྠཾ ཨཱ་ཛཱ་ནཱ་མི. ཨཱ་ཀ་ངྑ་མཱ་ནཱ ཙ པ་ན ཏུ་མྷེ ཨཱ་ཡ་སྨ་ནྟོ བྷ་ག་ཝ་ནྟཾ་ཡེ་ཝ ཨུ་པ་ས་ངྐ་མ་ཐ; ཨུ་པ་ས་ངྐ་མི་ཏྭཱ ཨེ་ཏ་མ་ཏྠཾ པུ་ཙྪེ་ཡྻཱ་ཐ. ཡ་ཐཱ ཝོ བྷ་ག་ཝཱ བྱཱ་ཀ་རོ་ཏི ཏ་ཐཱ ནཾ དྷཱ་རེ་ཡྻཱ་ཐཱ’’ཏི.

‘‘ཡཾ ཁོ ནོ, བྷ་ནྟེ, བྷ་ག་ཝཱ སཾ་ཁི་ཏྟེ་ན ཨུ་དྡེ་སཾ ཨུ་དྡི་སི་ཏྭཱ ཝི་ཏྠཱ་རེ་ན ཨ་ཏྠཾ ཨ་ཝི་བྷ་ཛི་ཏྭཱ ཨུ་ཊྛཱ་ཡཱ་ས་ནཱ ཝི་ཧཱ་རཾ པ་ཝི་ཊྛོ – ‘ཏ་སྨཱ་ཏི་ཧ, བྷི་ཀྑ་ཝེ, སེ ཨཱ་ཡ་ཏ་ནེ ཝེ་དི་ཏ་བྦེ ཡ་ཏྠ ཙ་ཀྑུ ཙ ནི་རུ་ཛ྄ཛྷ་ཏི, རཱུ་པ་ས་ཉྙཱ ཙ ནི་རུ་ཛ྄ཛྷ་ཏི, སེ ཨཱ་ཡ་ཏ་ནེ ཝེ་དི་ཏ་བྦེ…པེ… ཡ་ཏྠ ཛི་ཝ྄ཧཱ ཙ ནི་རུ་ཛ྄ཛྷ་ཏི, ར་ས་ས་ཉྙཱ ཙ ནི་རུ་ཛ྄ཛྷ་ཏི, སེ ཨཱ་ཡ་ཏ་ནེ ཝེ་དི་ཏ་བྦེ…པེ… ཡ་ཏྠ མ་ནོ ཙ ནི་རུ་ཛ྄ཛྷ་ཏི, དྷ་མྨ་ས་ཉྙཱ ཙ ནི་རུ་ཛ྄ཛྷ་ཏི, སེ ཨཱ་ཡ་ཏ་ནེ ཝེ་དི་ཏ་བྦེ’ཏི, ཏེ་སཾ ནོ, བྷ་ནྟེ, ཨ་མྷཱ་ཀཾ ཨ་ཙི་ར་པ་ཀྐ་ནྟ་སྶ བྷ་ག་ཝ་ཏོ ཨེ་ཏ་ད་ཧོ་སི – ‘ཨི་དཾ ཁོ ནོ, ཨཱ་ཝུ་སོ, བྷ་ག་ཝཱ སཾ་ཁི་ཏྟེ་ན ཨུ་དྡེ་སཾ ཨུ་དྡི་སི་ཏྭཱ ཝི་ཏྠཱ་རེ་ན ཨ་ཏྠཾ ཨ་ཝི་བྷ་ཛི་ཏྭཱ ཨུ་ཊྛཱ་ཡཱ་ས་ནཱ ཝི་ཧཱ་རཾ པ་ཝི་ཊྛོ – ཏ་སྨཱ་ཏི་ཧ, བྷི་ཀྑ་ཝེ, སེ ཨཱ་ཡ་ཏ་ནེ ཝེ་དི་ཏ་བྦེ ཡ་ཏྠ ཙ་ཀྑུ ཙ ནི་རུ་ཛ྄ཛྷ་ཏི, རཱུ་པ་ས་ཉྙཱ ཙ ནི་རུ་ཛ྄ཛྷ་ཏི, སེ ཨཱ་ཡ་ཏ་ནེ ཝེ་དི་ཏ་བྦེ…པེ… ཡ་ཏྠ མ་ནོ ཙ ནི་རུ་ཛ྄ཛྷ་ཏི, དྷ་མྨ་ས་ཉྙཱ ཙ ནི་རུ་ཛ྄ཛྷ་ཏི, སེ ཨཱ་ཡ་ཏ་ནེ ཝེ་དི་ཏ་བྦེ’ཏི. ‘ཀོ ནུ ཁོ ཨི་མ་སྶ བྷ་ག་ཝ་ཏཱ སཾ་ཁི་ཏྟེ་ན ཨུ་དྡེ་ས་སྶ ཨུ་དྡི་ཊྛ་སྶ ཝི་ཏྠཱ་རེ་ན ཨ་ཏྠཾ ཨ་ཝི་བྷ་ཏྟ་སྶ ཝི་ཏྠཱ་རེ་ན ཨ་ཏྠཾ ཝི་བྷ་ཛེ་ཡྻཱ’ཏི? ཏེ་སཾ ནོ, བྷ་ནྟེ, ཨ་མྷཱ་ཀཾ ཨེ་ཏ་ད་ཧོ་སི – ‘ཨ་ཡཾ ཁོ ཨཱ་ཡ་སྨཱ ཨཱ་ན་ནྡོ ས་ཏྠུ ཙེ་ཝ སཾ་ཝ་ཎྞི་ཏོ, ས་མྦྷཱ་ཝི་ཏོ ཙ ཝི་ཉྙཱུ་ནཾ ས་བྲ་ཧྨ་ཙཱ་རཱི་ནཾ. པ་ཧོ་ཏི ཙཱ་ཡ་སྨཱ ཨཱ་ན་ནྡོ ཨི་མ་སྶ བྷ་ག་ཝ་ཏཱ སཾ་ཁི་ཏྟེ་ན ཨུ་དྡེ་ས་སྶ ཨུ་དྡི་ཊྛ་སྶ ཝི་ཏྠཱ་རེ་ན ཨ་ཏྠཾ ཨ་ཝི་བྷ་ཏྟ་སྶ ཝི་ཏྠཱ་རེ་ན ཨ་ཏྠཾ ཝི་བྷ་ཛི་ཏུཾ. ཡཾ་ནཱུ་ན མ་ཡཾ ཡེ་ནཱ་ཡ་སྨཱ ཨཱ་ན་ནྡོ ཏེ་ནུ་པ་ས་ངྐ་མེ་ཡྻཱ་མ; ཨུ་པ་ས་ངྐ་མི་ཏྭཱ ཨཱ་ཡ་སྨ་ནྟཾ ཨཱ་ན་ནྡཾ ཨེ་ཏ་མ་ཏྠཾ པ་ཊི་པུ་ཙྪེ་ཡྻཱ་མཱ’ཏི. ཨ་ཐ ཁོ མ་ཡཾ, བྷ་ནྟེ, ཡེ་ནཱ་ཡ་སྨཱ ཨཱ་ན་ནྡོ ཏེ་ནུ་པ་ས་ངྐ་མི་མྷ; ཨུ་པ་ས་ངྐ་མི་ཏྭཱ ཨཱ་ཡ་སྨ་ནྟཾ ཨཱ་ན་ནྡཾ ཨེ་ཏ་མ་ཏྠཾ པ་ཊི་པུ་ཙྪི་མྷ. ཏེ་སཾ ནོ, བྷ་ནྟེ, ཨཱ་ཡ་སྨ་ཏཱ ཨཱ་ན་ནྡེ་ན ཨི་མེ་ཧི ཨཱ་ཀཱ་རེ་ཧི, ཨི་མེ་ཧི པ་དེ་ཧི, ཨི་མེ་ཧི བྱ་ཉྫ་ནེ་ཧི ཨ་ཏྠོ ཝི་བྷ་ཏྟོ’’ཏི.

‘‘པ་ཎྜི་ཏོ, བྷི་ཀྑ་ཝེ, ཨཱ་ན་ནྡོ; མ་ཧཱ་པ་ཉྙོ, བྷི་ཀྑ་ཝེ, ཨཱ་ན་ནྡོ! མཾ ཙེ་པི ཏུ་མྷེ, བྷི་ཀྑ་ཝེ, ཨེ་ཏ་མ་ཏྠཾ པ་ཊི་པུ་ཙྪེ་ཡྻཱ་ཐ, ཨ་ཧ་མྤི ཏཾ ཨེ་ཝ་མེ་ཝཾ བྱཱ་ཀ་རེ་ཡྻཾ ཡ་ཐཱ ཏཾ ཨཱ་ན་ནྡེ་ན བྱཱ་ཀ་ཏཾ. ཨེ་སོ ཙེ་ཝེ་ཏ་སྶ ཨ་ཏྠོ. ཨེ་ཝ་ཉྩ ནཾ དྷཱ་རེ་ཡྻཱ་ཐཱ’’ཏི. ཙ་ཏུ་ཏྠཾ.

༥. ས་ཀྐ་པ་ཉྷ་སུ་ཏྟཾ

༡༡༨. ཨེ་ཀཾ ས་མ་ཡཾ བྷ་ག་ཝཱ རཱ་ཛ་ག་ཧེ ཝི་ཧ་ར་ཏི གི་ཛ྄ཛྷ་ཀཱུ་ཊེ པ་བྦ་ཏེ. ཨ་ཐ ཁོ ས་ཀྐོ དེ་ཝཱ་ན་མི་ནྡོ ཡེ་ན བྷ་ག་ཝཱ ཏེ་ནུ་པ་ས་ངྐ་མི; ཨུ་པ་ས་ངྐ་མི་ཏྭཱ བྷ་ག་ཝ་ནྟཾ ཨ་བྷི་ཝཱ་དེ་ཏྭཱ ཨེ་ཀ་མ་ནྟཾ ཨ་ཊྛཱ་སི. ཨེ་ཀ་མ་ནྟཾ ཋི་ཏོ ཁོ ས་ཀྐོ དེ་ཝཱ་ན་མི་ནྡོ བྷ་ག་ཝ་ནྟཾ ཨེ་ཏ་ད་ཝོ་ཙ – ‘‘ཀོ ནུ ཁོ, བྷ་ནྟེ, ཧེ་ཏུ, ཀོ པ་ཙྩ་ཡོ ཡེ་ན མི་དྷེ་ཀ་ཙྩེ ས་ཏྟཱ དི་ཊྛེ་ཝ དྷ་མྨེ ནོ པ་རི་ནི་བྦཱ་ཡ་ནྟི? ཀོ པ་ན, བྷ་ནྟེ, ཧེ་ཏུ, ཀོ པ་ཙྩ་ཡོ ཡེ་ན མི་དྷེ་ཀ་ཙྩེ ས་ཏྟཱ དི་ཊྛེ་ཝ དྷ་མྨེ པ་རི་ནི་བྦཱ་ཡ་ནྟཱི’’ཏི?

‘‘ས་ནྟི ཁོ, དེ་ཝཱ་ན་མི་ནྡ, ཙ་ཀྑུ་ཝི་ཉྙེ་ཡྻཱ རཱུ་པཱ, ཨི་ཊྛཱ ཀ་ནྟཱ མ་ནཱ་པཱ པི་ཡ་རཱུ་པཱ ཀཱ་མཱུ་པ་སཾ་ཧི་ཏཱ ར་ཛ་ནཱི་ཡཱ. ཏ་ཉྩེ བྷི་ཀྑུ ཨ་བྷི་ན་ནྡ་ཏི ཨ་བྷི་ཝ་ད་ཏི ཨ་ཛ྄ཛྷོ་སཱ་ཡ ཏི་ཊྛ་ཏི. ཏ་སྶ ཏཾ ཨ་བྷི་ན་ནྡ་ཏོ ཨ་བྷི་ཝ་ད་ཏོ ཨ་ཛ྄ཛྷོ་སཱ་ཡ ཏི་ཊྛ་ཏོ ཏ་ནྣི་སྶི་ཏཾ ཝི་ཉྙཱ་ཎཾ ཧོ་ཏི ཏ་དུ་པཱ་དཱ་ནཾ. ས་ཨུ་པཱ་དཱ་ནོ, དེ་ཝཱ་ན་མི་ནྡ, བྷི་ཀྑུ ནོ པ་རི་ནི་བྦཱ་ཡ་ཏི…པེ….

‘‘ས་ནྟི ཁོ, དེ་ཝཱ་ན་མི་ནྡ, ཛི་ཝ྄ཧཱ་ཝི་ཉྙེ་ཡྻཱ ར་སཱ…པེ… ས་ནྟི ཁོ, དེ་ཝཱ་ན་མི་ནྡ, མ་ནོ་ཝི་ཉྙེ་ཡྻཱ དྷ་མྨཱ, ཨི་ཊྛཱ ཀ་ནྟཱ མ་ནཱ་པཱ པི་ཡ་རཱུ་པཱ ཀཱ་མཱུ་པ་སཾ་ཧི་ཏཱ ར་ཛ་ནཱི་ཡཱ. ཏ་ཉྩེ བྷི་ཀྑུ ཨ་བྷི་ན་ནྡ་ཏི ཨ་བྷི་ཝ་ད་ཏི ཨ་ཛ྄ཛྷོ་སཱ་ཡ ཏི་ཊྛ་ཏི. ཏ་སྶ ཏཾ ཨ་བྷི་ན་ནྡ་ཏོ ཨ་བྷི་ཝ་ད་ཏོ ཨ་ཛ྄ཛྷོ་སཱ་ཡ ཏི་ཊྛ་ཏོ ཏ་ནྣི་སྶི་ཏཾ ཝི་ཉྙཱ་ཎཾ ཧོ་ཏི ཏ་དུ་པཱ་དཱ་ནཾ. ས་ཨུ་པཱ་དཱ་ནོ, དེ་ཝཱ་ན་མི་ནྡ, བྷི་ཀྑུ ནོ པ་རི་ནི་བྦཱ་ཡ་ཏི. ཨ་ཡཾ ཁོ, དེ་ཝཱ་ན་མི་ནྡ, ཧེ་ཏུ, ཨ་ཡཾ པ་ཙྩ་ཡོ ཡེ་ན མི་དྷེ་ཀ་ཙྩེ ས་ཏྟཱ དི་ཊྛེ་ཝ དྷ་མྨེ ནོ པ་རི་ནི་བྦཱ་ཡ་ནྟི.

‘‘ས་ནྟི ཙ ཁོ, དེ་ཝཱ་ན་མི་ནྡ, ཙ་ཀྑུ་ཝི་ཉྙེ་ཡྻཱ རཱུ་པཱ, ཨི་ཊྛཱ ཀ་ནྟཱ མ་ནཱ་པཱ པི་ཡ་རཱུ་པཱ ཀཱ་མཱུ་པ་སཾ་ཧི་ཏཱ ར་ཛ་ནཱི་ཡཱ. ཏ་ཉྩེ བྷི་ཀྑུ ནཱ་བྷི་ན་ནྡ་ཏི ནཱ་བྷི་ཝ་ད་ཏི ནཱ་ཛ྄ཛྷོ་སཱ་ཡ ཏི་ཊྛ་ཏི. ཏ་སྶ ཏཾ ཨ་ན་བྷི་ན་ནྡ་ཏོ ཨ་ན་བྷི་ཝ་ད་ཏོ ཨ་ན་ཛ྄ཛྷོ་སཱ་ཡ ཏི་ཊྛ་ཏོ ན ཏ་ནྣི་སྶི་ཏཾ ཝི་ཉྙཱ་ཎཾ ཧོ་ཏི, ན ཏ་དུ་པཱ་དཱ་ནཾ. ཨ་ནུ་པཱ་དཱ་ནོ, དེ་ཝཱ་ན་མི་ནྡ, བྷི་ཀྑུ པ་རི་ནི་བྦཱ་ཡ་ཏི…པེ….

‘‘ས་ནྟི ཁོ, དེ་ཝཱ་ན་མི་ནྡ, ཛི་ཝ྄ཧཱ་ཝི་ཉྙེ་ཡྻཱ ར་སཱ…པེ… ས་ནྟི ཁོ, དེ་ཝཱ་ན་མི་ནྡ, མ་ནོ་ཝི་ཉྙེ་ཡྻཱ དྷ་མྨཱ ཨི་ཊྛཱ ཀ་ནྟཱ མ་ནཱ་པཱ པི་ཡ་རཱུ་པཱ ཀཱ་མཱུ་པ་སཾ་ཧི་ཏཱ ར་ཛ་ནཱི་ཡཱ. ཏ་ཉྩེ བྷི་ཀྑུ ནཱ་བྷི་ན་ནྡ་ཏི ནཱ་བྷི་ཝ་ད་ཏི ནཱ་ཛ྄ཛྷོ་སཱ་ཡ ཏི་ཊྛ་ཏི. ཏ་སྶ ཏཾ ཨ་ན་བྷི་ན་ནྡ་ཏོ ཨ་ན་བྷི་ཝ་ད་ཏོ ཨ་ན་ཛ྄ཛྷོ་སཱ་ཡ ཏི་ཊྛ་ཏོ ན ཏ་ནྣི་སྶི་ཏཾ ཝི་ཉྙཱ་ཎཾ ཧོ་ཏི ན ཏ་དུ་པཱ་དཱ་ནཾ. ཨ་ནུ་པཱ་དཱ་ནོ, དེ་ཝཱ་ན་མི་ནྡ, བྷི་ཀྑུ པ་རི་ནི་བྦཱ་ཡ་ཏི. ཨ་ཡཾ ཁོ, དེ་ཝཱ་ན་མི་ནྡ, ཧེ་ཏུ, ཨ་ཡཾ པ་ཙྩ་ཡོ ཡེ་ན མི་དྷེ་ཀ་ཙྩེ ས་ཏྟཱ དི་ཊྛེ་ཝ དྷ་མྨེ པ་རི་ནི་བྦཱ་ཡ་ནྟཱི’’ཏི. པ་ཉྩ་མཾ.

༦. པ་ཉྩ་སི་ཁ་སུ་ཏྟཾ

༡༡༩. ཨེ་ཀཾ ས་མ་ཡཾ བྷ་ག་ཝཱ རཱ་ཛ་ག་ཧེ ཝི་ཧ་ར་ཏི གི་ཛ྄ཛྷ་ཀཱུ་ཊེ པ་བྦ་ཏེ. ཨ་ཐ ཁོ པ་ཉྩ་སི་ཁོ ག་ནྡྷ་བྦ་དེ་ཝ་པུ་ཏྟོ ཡེ་ན བྷ་ག་ཝཱ ཏེ་ནུ་པ་ས་ངྐ་མི; ཨུ་པ་ས་ངྐ་མི་ཏྭཱ བྷ་ག་ཝ་ནྟཾ ཨ་བྷི་ཝཱ་དེ་ཏྭཱ ཨེ་ཀ་མ་ནྟཾ ཨ་ཊྛཱ་སི. ཨེ་ཀ་མ་ནྟཾ ཋི་ཏོ ཁོ པ་ཉྩ་སི་ཁོ ག་ནྡྷ་བྦ་དེ་ཝ་པུ་ཏྟོ བྷ་ག་ཝ་ནྟཾ ཨེ་ཏ་ད་ཝོ་ཙ – ‘‘ཀོ ནུ ཁོ, བྷ་ནྟེ, ཧེ་ཏུ, ཀོ པ་ཙྩ་ཡོ ཡེ་ན མི་དྷེ་ཀ་ཙྩེ ས་ཏྟཱ དི་ཊྛེ་ཝ དྷ་མྨེ ནོ པ་རི་ནི་བྦཱ་ཡ་ནྟི? ཀོ པ་ན, བྷ་ནྟེ, ཧེ་ཏུ, ཀོ པ་ཙྩ་ཡོ ཡེ་ན མི་དྷེ་ཀ་ཙྩེ ས་ཏྟཱ དི་ཊྛེ་ཝ དྷ་མྨེ པ་རི་ནི་བྦཱ་ཡ་ནྟཱི’’ཏི? ‘‘ས་ནྟི ཁོ, པ་ཉྩ་སི་ཁ, ཙ་ཀྑུ་ཝི་ཉྙེ་ཡྻཱ རཱུ་པཱ…པེ… ས་ནྟི ཁོ, པ་ཉྩ་སི་ཁ, མ་ནོ་ཝི་ཉྙེ་ཡྻཱ དྷ་མྨཱ, ཨི་ཊྛཱ ཀ་ནྟཱ མ་ནཱ་པཱ པི་ཡ་རཱུ་པཱ ཀཱ་མཱུ་པ་སཾ་ཧི་ཏཱ ར་ཛ་ནཱི་ཡཱ. ཏ་ཉྩེ བྷི་ཀྑུ ཨ་བྷི་ན་ནྡ་ཏི ཨ་བྷི་ཝ་ད་ཏི ཨ་ཛ྄ཛྷོ་སཱ་ཡ ཏི་ཊྛ་ཏི. ཏ་སྶ ཏཾ ཨ་བྷི་ན་ནྡ་ཏོ ཨ་བྷི་ཝ་ད་ཏོ ཨ་ཛ྄ཛྷོ་སཱ་ཡ ཏི་ཊྛ་ཏོ ཏ་ནྣི་སྶི་ཏཾ ཝི་ཉྙཱ་ཎཾ ཧོ་ཏི ཏ་དུ་པཱ་དཱ་ནཾ. ས་ཨུ་པཱ་དཱ་ནོ, པ་ཉྩ་སི་ཁ, བྷི་ཀྑུ ནོ པ་རི་ནི་བྦཱ་ཡ་ཏི. ཨ་ཡཾ ཁོ, པ་ཉྩ་སི་ཁ, ཧེ་ཏུ, ཨ་ཡཾ པ་ཙྩ་ཡོ ཡེ་ན མི་དྷེ་ཀ་ཙྩེ ས་ཏྟཱ དི་ཊྛེ་ཝ དྷ་མྨེ ནོ པ་རི་ནི་བྦཱ་ཡ་ནྟི’’.

‘‘ས་ནྟི ཙ ཁོ, པ་ཉྩ་སི་ཁ, ཙ་ཀྑུ་ཝི་ཉྙེ་ཡྻཱ རཱུ་པཱ ཨི་ཊྛཱ ཀ་ནྟཱ མ་ནཱ་པཱ…པེ… ས་ནྟི ཁོ, པ་ཉྩ་སི་ཁ, མ་ནོ་ཝི་ཉྙེ་ཡྻཱ དྷ་མྨཱ ཨི་ཊྛཱ ཀ་ནྟཱ མ་ནཱ་པཱ པི་ཡ་རཱུ་པཱ ཀཱ་མཱུ་པ་སཾ་ཧི་ཏཱ ར་ཛ་ནཱི་ཡཱ. ཏ་ཉྩེ བྷི་ཀྑུ ནཱ་བྷི་ན་ནྡ་ཏི ནཱ་བྷི་ཝ་ད་ཏི ནཱ་ཛ྄ཛྷོ་སཱ་ཡ ཏི་ཊྛ་ཏི, ཏ་སྶ ཏཾ ཨ་ན་བྷི་ན་ནྡ་ཏོ ཨ་ན་བྷི་ཝ་ད་ཏོ ཨ་ན་ཛ྄ཛྷོ་སཱ་ཡ ཏི་ཊྛ་ཏོ ན ཏ་ནྣི་སྶི་ཏཾ ཝི་ཉྙཱ་ཎཾ ཧོ་ཏི, ན ཏ་དུ་པཱ་དཱ་ནཾ. ཨ་ནུ་པཱ་དཱ་ནོ, པ་ཉྩ་སི་ཁ, བྷི་ཀྑུ པ་རི་ནི་བྦཱ་ཡ་ཏི. ཨ་ཡཾ ཁོ, པ་ཉྩ་སི་ཁ, ཧེ་ཏུ, ཨ་ཡཾ པ་ཙྩ་ཡོ ཡེ་ན མི་དྷེ་ཀ་ཙྩེ ས་ཏྟཱ དི་ཊྛེ་ཝ དྷ་མྨེ པ་རི་ནི་བྦཱ་ཡ་ནྟཱི’’ཏི. ཚ་ཊྛཾ.

༧. སཱ་རི་པུ་ཏྟ་ས་དྡྷི་ཝི་ཧཱ་རི་ཀ་སུ་ཏྟཾ

༡༢༠. ཨེ་ཀཾ ས་མ་ཡཾ ཨཱ་ཡ་སྨཱ སཱ་རི་པུ་ཏྟོ སཱ་ཝ་ཏྠི་ཡཾ ཝི་ཧ་ར་ཏི ཛེ་ཏ་ཝ་ནེ ཨ་ནཱ་ཐ་པི་ཎྜི་ཀ་སྶ ཨཱ་རཱ་མེ. ཨ་ཐ ཁོ ཨ་ཉྙ་ཏ་རོ བྷི་ཀྑུ ཡེ་ནཱ་ཡ་སྨཱ སཱ་རི་པུ་ཏྟོ ཏེ་ནུ་པ་ས་ངྐ་མི; ཨུ་པ་ས་ངྐ་མི་ཏྭཱ ཨཱ་ཡ་སྨ་ཏཱ སཱ་རི་པུ་ཏྟེ་ན ས་དྡྷིཾ ས་མྨོ་དི. ས་མྨོ་ད་ནཱི་ཡཾ ཀ་ཐཾ སཱ་ར་ཎཱི་ཡཾ ཝཱི་ཏི་སཱ་རེ་ཏྭཱ ཨེ་ཀ་མ་ནྟཾ ནི་སཱི་དི. ཨེ་ཀ་མ་ནྟཾ ནི་སི་ནྣོ ཁོ སོ བྷི་ཀྑུ ཨཱ་ཡ་སྨ་ནྟཾ སཱ་རི་པུ་ཏྟཾ ཨེ་ཏ་ད་ཝོ་ཙ – ‘‘ས་དྡྷི་ཝི་ཧཱ་རི་ཀོ, ཨཱ་ཝུ་སོ སཱ་རི་པུ་ཏྟ, བྷི་ཀྑུ སི་ཀྑཾ པ་ཙྩ་ཀྑཱ་ཡ ཧཱི་ནཱ་ཡཱ་ཝ་ཏྟོ’’ཏི.

‘‘ཨེ་ཝ་མེ་ཏཾ, ཨཱ་ཝུ་སོ, ཧོ་ཏི ཨི་ནྡྲི་ཡེ་སུ ཨ་གུ་ཏྟ་དྭཱ་ར་སྶ, བྷོ་ཛ་ནེ ཨ་མ་ཏྟ་ཉྙུ་ནོ, ཛཱ་ག་རི་ཡཾ ཨ་ན་ནུ་ཡུ་ཏྟ་སྶ. ‘སོ ཝ་ཏཱ་ཝུ་སོ, བྷི་ཀྑུ ཨི་ནྡྲི་ཡེ་སུ ཨ་གུ་ཏྟ་དྭཱ་རོ བྷོ་ཛ་ནེ ཨ་མ་ཏྟ་ཉྙཱུ ཛཱ་ག་རི་ཡཾ ཨ་ན་ནུ་ཡུ་ཏྟོ ཡཱ་ཝ་ཛཱི་ཝཾ པ་རི་པུ་ཎྞཾ པ་རི་སུ་དྡྷཾ བྲ་ཧྨ་ཙ་རི་ཡཾ ས་ནྟཱ་ནེ་སྶ་ཏཱི’ཏི ནེ་ཏཾ ཋཱ་ནཾ ཝི་ཛྫ་ཏི. ‘སོ ཝ་ཏཱ་ཝུ་སོ, བྷི་ཀྑུ ཨི་ནྡྲི་ཡེ་སུ གུ་ཏྟ་དྭཱ་རོ, བྷོ་ཛ་ནེ མ་ཏྟ་ཉྙཱུ, ཛཱ་ག་རི་ཡཾ ཨ་ནུ་ཡུ་ཏྟོ ཡཱ་ཝ་ཛཱི་ཝཾ པ་རི་པུ་ཎྞཾ པ་རི་སུ་དྡྷཾ བྲ་ཧྨ་ཙ་རི་ཡཾ ས་ནྟཱ་ནེ་སྶ་ཏཱི’ཏི ཋཱ་ན་མེ་ཏཾ ཝི་ཛྫ་ཏི.

‘‘ཀ་ཐ་ཉྩཱ་ཝུ་སོ, ཨི་ནྡྲི་ཡེ་སུ གུ་ཏྟ་དྭཱ་རོ ཧོ་ཏི? ཨི་དྷཱ་ཝུ་སོ, བྷི་ཀྑུ ཙ་ཀྑུ་ནཱ རཱུ་པཾ དི་སྭཱ ན ནི་མི་ཏྟ་གྒཱ་ཧཱི ཧོ་ཏི ནཱ་ནུ་བྱ་ཉྫ་ན་གྒཱ་ཧཱི. ཡ་ཏྭཱ་དྷི་ཀ་ར་ཎ་མེ་ནཾ ཙ་ཀྑུ་ནྡྲི་ཡཾ ཨ་སཾ་ཝུ་ཏཾ ཝི་ཧ་ར་ནྟཾ ཨ་བྷི་ཛ྄ཛྷཱ་དོ་མ་ན་སྶཱ པཱ་པ་ཀཱ ཨ་ཀུ་ས་ལཱ དྷ་མྨཱ ཨ་ནྭཱ་སྶ་ཝེ་ཡྻུཾ ཏ་སྶ སཾ་ཝ་རཱ་ཡ པ་ཊི་པ་ཛྫ་ཏི, ར་ཀྑ་ཏི ཙ་ཀྑུ་ནྡྲི་ཡཾ, ཙ་ཀྑུ་ནྡྲི་ཡེ སཾ་ཝ་རཾ ཨཱ་པ་ཛྫ་ཏི. སོ་ཏེ་ན ས་དྡཾ སུ་ཏྭཱ… གྷཱ་ནེ་ན ག་ནྡྷཾ གྷཱ་ཡི་ཏྭཱ… ཛི་ཝ྄ཧཱ་ཡ ར་སཾ སཱ་ཡི་ཏྭཱ… ཀཱ་ཡེ་ན ཕོ་ཊྛ་བྦཾ ཕུ་སི་ཏྭཱ… མ་ན་སཱ དྷ་མྨཾ ཝི་ཉྙཱ་ཡ ན ནི་མི་ཏྟ་གྒཱ་ཧཱི ཧོ་ཏི ནཱ་ནུ་བྱ་ཉྫ་ན་གྒཱ་ཧཱི. ཡ་ཏྭཱ་དྷི་ཀ་ར་ཎ་མེ་ནཾ མ་ནི་ནྡྲི་ཡཾ ཨ་སཾ་ཝུ་ཏཾ ཝི་ཧ་ར་ནྟཾ ཨ་བྷི་ཛ྄ཛྷཱ་དོ་མ་ན་སྶཱ པཱ་པ་ཀཱ ཨ་ཀུ་ས་ལཱ དྷ་མྨཱ ཨ་ནྭཱ་སྶ་ཝེ་ཡྻུཾ, ཏ་སྶ སཾ་ཝ་རཱ་ཡ པ་ཊི་པ་ཛྫ་ཏི, ར་ཀྑ་ཏི མ་ནི་ནྡྲི་ཡཾ, མ་ནི་ནྡྲི་ཡེ སཾ་ཝ་རཾ ཨཱ་པ་ཛྫ་ཏི. ཨེ་ཝཾ ཁོ, ཨཱ་ཝུ་སོ, ཨི་ནྡྲི་ཡེ་སུ གུ་ཏྟ་དྭཱ་རོ ཧོ་ཏི.

‘‘ཀ་ཐ་ཉྩཱ་ཝུ་སོ, བྷོ་ཛ་ནེ མ་ཏྟ་ཉྙཱུ ཧོ་ཏི? ཨི་དྷཱ་ཝུ་སོ, བྷི་ཀྑུ པ་ཊི་ས་ངྑཱ ཡོ་ནི་སོ ཨཱ་ཧཱ་རཾ ཨཱ་ཧཱ་རེ་ཏི – ‘ནེ་ཝ ད་ཝཱ་ཡ, ན མ་དཱ་ཡ, ན མ་ཎྜ་ནཱ་ཡ, ན ཝི་བྷཱུ་ས་ནཱ་ཡ, ཡཱ་ཝ་དེ་ཝ ཨི་མ་སྶ ཀཱ་ཡ་སྶ ཋི་ཏི་ཡཱ ཡཱ་པ་ནཱ་ཡ, ཝི་ཧིཾ་སཱུ་པ་ར་ཏི་ཡཱ, བྲ་ཧྨ་ཙ་རི་ཡཱ་ནུ་གྒ་ཧཱ་ཡ. ཨི་ཏི པུ་རཱ་ཎ་ཉྩ ཝེ་ད་ནཾ པ་ཊི་ཧ་ངྑཱ་མི, ན་ཝ་ཉྩ ཝེ་ད་ནཾ ན ཨུ་པྤཱ་དེ་སྶཱ་མི, ཡཱ་ཏྲཱ ཙ མེ བྷ་ཝི་སྶ་ཏི, ཨ་ན་ཝ་ཛྫ་ཏཱ ཙ ཕཱ་སུ་ཝི་ཧཱ་རོ ཙཱ’ཏི. ཨེ་ཝཾ ཁོ, ཨཱ་ཝུ་སོ, བྷོ་ཛ་ནེ མ་ཏྟ་ཉྙཱུ ཧོ་ཏི.

‘‘ཀ་ཐ་ཉྩཱ་ཝུ་སོ, ཛཱ་ག་རི་ཡཾ ཨ་ནུ་ཡུ་ཏྟོ ཧོ་ཏི? ཨི་དྷཱ་ཝུ་སོ, བྷི་ཀྑུ དི་ཝ་སཾ ཙ་ངྐ་མེ་ན ནི་ས་ཛྫཱ་ཡ ཨཱ་ཝ་ར་ཎཱི་ཡེ་ཧི དྷ་མྨེ་ཧི ཙི་ཏྟཾ པ་རི་སོ་དྷེ་ཏི. ར་ཏྟི་ཡཱ པ་ཋ་མཾ ཡཱ་མཾ ཙ་ངྐ་མེ་ན ནི་ས་ཛྫཱ་ཡ ཨཱ་ཝ་ར་ཎཱི་ཡེ་ཧི དྷ་མྨེ་ཧི ཙི་ཏྟཾ པ་རི་སོ་དྷེ་ཏི. ར་ཏྟི་ཡཱ མ་ཛ྄ཛྷི་མཾ ཡཱ་མཾ ད་ཀྑི་ཎེ་ན པ་སྶེ་ན སཱི་ཧ་སེ་ཡྻཾ ཀ་པྤེ་ཏི པཱ་དེ པཱ་དཾ ཨ་ཙྩཱ་དྷཱ་ཡ ས་ཏོ ས་མྤ་ཛཱ་ནོ, ཨུ་ཊྛཱ་ན་ས་ཉྙཾ མ་ན་སི ཀ་རི་ཏྭཱ. ར་ཏྟི་ཡཱ པ་ཙྪི་མཾ ཡཱ་མཾ པ་ཙྩུ་ཊྛཱ་ཡ ཙ་ངྐ་མེ་ན ནི་ས་ཛྫཱ་ཡ ཨཱ་ཝ་ར་ཎཱི་ཡེ་ཧི དྷ་མྨེ་ཧི ཙི་ཏྟཾ པ་རི་སོ་དྷེ་ཏི. ཨེ་ཝཾ ཁོ, ཨཱ་ཝུ་སོ, ཛཱ་ག་རི་ཡཾ ཨ་ནུ་ཡུ་ཏྟོ ཧོ་ཏི. ཏ་སྨཱ་ཏི་ཧཱ་ཝུ་སོ, ཨེ་ཝཾ སི་ཀྑི་ཏ་བྦཾ – ‘ཨི་ནྡྲི་ཡེ་སུ གུ་ཏྟ་དྭཱ་རཱ བྷ་ཝི་སྶཱ་མ, བྷོ་ཛ་ནེ མ་ཏྟ་ཉྙུ་ནོ, ཛཱ་ག་རི་ཡཾ ཨ་ནུ་ཡུ་ཏྟཱ’ཏི. ཨེ་ཝ་ཉྷི ཝོ, ཨཱ་ཝུ་སོ, སི་ཀྑི་ཏ་བྦ’’ནྟི. ས་ཏྟ་མཾ.

༨. རཱ་ཧུ་ལོ་ཝཱ་ད་སུ་ཏྟཾ

༡༢༡. ཨེ་ཀཾ ས་མ་ཡཾ བྷ་ག་ཝཱ སཱ་ཝ་ཏྠི་ཡཾ ཝི་ཧ་ར་ཏི ཛེ་ཏ་ཝ་ནེ ཨ་ནཱ་ཐ་པི་ཎྜི་ཀ་སྶ ཨཱ་རཱ་མེ. ཨ་ཐ ཁོ བྷ་ག་ཝ་ཏོ ར་ཧོ་ག་ཏ་སྶ པ་ཊི་ས་ལླཱི་ན་སྶ ཨེ་ཝཾ ཙེ་ཏ་སོ པ་རི་ཝི་ཏ་ཀྐོ ཨུ་ད་པཱ་དི – ‘‘པ་རི་པ་ཀྐཱ ཁོ རཱ་ཧུ་ལ་སྶ ཝི་མུ་ཏྟི་པ་རི་པཱ་ཙ་ནི་ཡཱ དྷ་མྨཱ; ཡཾ་ནཱུ་ནཱ་ཧཾ རཱ་ཧུ་ལཾ ཨུ་ཏྟ་རིཾ ཨཱ་ས་ཝཱ་ནཾ ཁ་ཡེ ཝི་ནེ་ཡྻ’’ནྟི. ཨ་ཐ ཁོ བྷ་ག་ཝཱ པུ་བྦ་ཎྷ་ས་མ་ཡཾ ནི་ཝཱ་སེ་ཏྭཱ པ་ཏྟ་ཙཱི་ཝ་ར་མཱ་དཱ་ཡ སཱ་ཝ་ཏྠི་ཡཾ པི་ཎྜཱ་ཡ ཙ་རི་ཏྭཱ པ་ཙྪཱ་བྷ་ཏྟཾ པི་ཎྜ་པཱ་ཏ་པ་ཊི་ཀྐ་ནྟོ ཨཱ་ཡ་སྨ་ནྟཾ རཱ་ཧུ་ལཾ ཨཱ་མ་ནྟེ་སི – ‘‘ག་ཎྷཱ་ཧི, རཱ་ཧུ་ལ, ནི་སཱི་ད་ནཾ. ཡེ་ན ཨ་ནྡྷ་ཝ་ནཾ ཏེ་ནུ་པ་ས་ངྐ་མི་སྶཱ་མ དི་ཝཱ་ཝི་ཧཱ་རཱ་ཡཱ’’ཏི. ‘‘ཨེ་ཝཾ, བྷ་ནྟེ’’ཏི ཁོ ཨཱ་ཡ་སྨཱ རཱ་ཧུ་ལོ བྷ་ག་ཝ་ཏོ པ་ཊི་སྶུ་ཏྭཱ ནི་སཱི་ད་ནཾ ཨཱ་དཱ་ཡ བྷ་ག་ཝ་ནྟཾ པི་ཊྛི་ཏོ པི་ཊྛི་ཏོ ཨ་ནུ་བ་ནྡྷི.

ཏེ་ན ཁོ པ་ན ས་མ་ཡེ་ན ཨ་ནེ་ཀཱ་ནི དེ་ཝ་ཏཱ་ས་ཧ་སྶཱ་ནི བྷ་ག་ཝ་ནྟཾ ཨ་ནུ་བ་ནྡྷཱ་ནི ཧོ་ནྟི – ‘‘ཨ་ཛྫ བྷ་ག་ཝཱ ཨཱ་ཡ་སྨ་ནྟཾ རཱ་ཧུ་ལཾ ཨུ་ཏྟ་རིཾ ཨཱ་ས་ཝཱ་ནཾ ཁ་ཡེ ཝི་ནེ་སྶ་ཏཱི’’ཏི. ཨ་ཐ ཁོ བྷ་ག་ཝཱ ཨ་ནྡྷ་ཝ་ནཾ ཨ་ཛ྄ཛྷོ་གཱ་ཧེ་ཏྭཱ ཨ་ཉྙ་ཏ་ར་སྨིཾ རུ་ཀྑ་མཱུ་ལེ པ་ཉྙ་ཏྟེ ཨཱ་ས་ནེ ནི་སཱི་དི. ཨཱ་ཡ་སྨཱ་པི ཁོ རཱ་ཧུ་ལོ བྷ་ག་ཝ་ནྟཾ ཨ་བྷི་ཝཱ་དེ་ཏྭཱ ཨེ་ཀ་མ་ནྟཾ ནི་སཱི་དི. ཨེ་ཀ་མ་ནྟཾ ནི་སི་ནྣཾ ཁོ ཨཱ་ཡ་སྨ་ནྟཾ རཱ་ཧུ་ལཾ བྷ་ག་ཝཱ ཨེ་ཏ་ད་ཝོ་ཙ –

‘‘ཏཾ ཀིཾ མ་ཉྙ་སི, རཱ་ཧུ་ལ, ཙ་ཀྑུ ནི་ཙྩཾ ཝཱ ཨ་ནི་ཙྩཾ ཝཱ’’ཏི?

‘‘ཨ་ནི་ཙྩཾ, བྷ་ནྟེ’’.

‘‘ཡཾ པ་ནཱ་ནི་ཙྩཾ དུ་ཀྑཾ ཝཱ ཏཾ སུ་ཁཾ ཝཱ’’ཏི?

‘‘དུ་ཀྑཾ, བྷ་ནྟེ’’.

‘‘ཡཾ པ་ནཱ་ནི་ཙྩཾ དུ་ཀྑཾ ཝི་པ་རི་ཎཱ་མ་དྷ་མྨཾ, ཀ་ལླཾ ནུ ཏཾ ས་མ་ནུ་པ་སྶི་ཏུཾ – ‘ཨེ་ཏཾ མ་མ, ཨེ་སོ་ཧ་མ་སྨི, ཨེ་སོ མེ ཨ་ཏྟཱ’’’ཏི?

‘‘ནོ ཧེ་ཏཾ, བྷ་ནྟེ’’. ( ) [(ཏཾ ཀིཾ མ་ཉྙ་སི) ཨེ་ཝ་མི་ཏ་རེ་སུ་པི (མ. ནི. ༣.༤༡༦-༤༡༧)]

‘‘རཱུ་པཱ ནི་ཙྩཱ ཝཱ ཨ་ནི་ཙྩཱ ཝཱ’’ཏི?

‘‘ཨ་ནི་ཙྩཱ, བྷ་ནྟེ’’…པེ….

‘‘ཙ་ཀྑུ་ཝི་ཉྙཱ་ཎཾ ནི་ཙྩཾ ཝཱ ཨ་ནི་ཙྩཾ ཝཱ’’ཏི?

‘‘ཨ་ནི་ཙྩཾ, བྷ་ནྟེ’’…པེ….

‘‘ཙ་ཀྑུ་ས་མྥ་སྶོ ནི་ཙྩོ ཝཱ ཨ་ནི་ཙྩོ ཝཱ’’ཏི?

‘‘ཨ་ནི་ཙྩོ, བྷ་ནྟེ’’…པེ….

‘‘ཡ་མྤི་དཾ ཙ་ཀྑུ་ས་མྥ་སྶ་པ་ཙྩ་ཡཱ ཨུ་པྤ་ཛྫ་ཏི ཝེ་ད་ནཱ་ག་ཏཾ, ས་ཉྙཱ་ག་ཏཾ, ས་ངྑཱ་ར་ག་ཏཾ, ཝི་ཉྙཱ་ཎ་ག་ཏཾ, ཏ་མྤི ནི་ཙྩཾ ཝཱ ཨ་ནི་ཙྩཾ ཝཱ’’ཏི?

‘‘ཨ་ནི་ཙྩཾ, བྷ་ནྟེ’’.

‘‘ཡཾ པ་ནཱ་ནི་ཙྩཾ དུ་ཀྑཾ ཝཱ ཏཾ སུ་ཁཾ ཝཱ’’ཏི?

‘‘དུ་ཀྑཾ, བྷ་ནྟེ’’.

‘‘ནོ ཧེ་ཏཾ, བྷ་ནྟེ’’…པེ….

‘‘ཛི་ཝ྄ཧཱ ནི་ཙྩཱ ཝཱ ཨ་ནི་ཙྩཱ ཝཱ’’ཏི?

‘‘ཨ་ནི་ཙྩཱ, བྷ་ནྟེ’’…པེ….

‘‘ཛི་ཝ྄ཧཱ་ཝི་ཉྙཱ་ཎཾ ནི་ཙྩཾ ཝཱ ཨ་ནི་ཙྩཾ ཝཱ’’ཏི?

‘‘ཨ་ནི་ཙྩཾ, བྷ་ནྟེ’’…པེ….

‘‘ཛི་ཝ྄ཧཱ་ས་མྥ་སྶོ ནི་ཙྩོ ཝཱ ཨ་ནི་ཙྩོ ཝཱ’’ཏི?

‘‘ཨ་ནི་ཙྩོ, བྷ་ནྟེ’’…པེ….

‘‘ཡ་མྤི་དཾ ཛི་ཝ྄ཧཱ་ས་མྥ་སྶ་པ་ཙྩ་ཡཱ ཨུ་པྤ་ཛྫ་ཏི ཝེ་ད་ནཱ་ག་ཏཾ, ས་ཉྙཱ་ག་ཏཾ, ས་ངྑཱ་ར་ག་ཏཾ, ཝི་ཉྙཱ་ཎ་ག་ཏཾ, ཏ་མྤི ནི་ཙྩཾ ཝཱ ཨ་ནི་ཙྩཾ ཝཱ’’ཏི?

‘‘ཨ་ནི་ཙྩཾ, བྷ་ནྟེ’’.

‘‘ཡཾ པ་ནཱ་ནི་ཙྩཾ དུ་ཀྑཾ ཝཱ ཏཾ སུ་ཁཾ ཝཱ’’ཏི?

‘‘དུ་ཀྑཾ, བྷ་ནྟེ’’.

‘‘ནོ ཧེ་ཏཾ, བྷ་ནྟེ’’…པེ….

‘‘མ་ནོ ནི་ཙྩོ ཝཱ ཨ་ནི་ཙྩོ ཝཱ’’ཏི?

‘‘ཨ་ནི་ཙྩོ, བྷ་ནྟེ’’.

‘‘ཡཾ པ་ནཱ་ནི་ཙྩཾ དུ་ཀྑཾ ཝཱ ཏཾ སུ་ཁཾ ཝཱ་ཏི?

‘‘དུ་ཀྑཾ, བྷ་ནྟེ’’.

‘‘ཡཾ པ་ནཱ་ནི་ཙྩཾ དུ་ཀྑཾ ཝི་པ་རི་ཎཱ་མ་དྷ་མྨཾ, ཀ་ལླཾ ནུ ཏཾ ས་མ་ནུ་པ་སྶི་ཏུཾ ‘ཨེ་ཏཾ མ་མ, ཨེ་སོ་ཧ་མ་སྨི, ཨེ་སོ མེ ཨ་ཏྟཱ’’’ཏི?

‘‘ནོ ཧེ་ཏཾ, བྷ་ནྟེ’’.

‘‘དྷ་མྨཱ ནི་ཙྩཱ ཝཱ ཨ་ནི་ཙྩཱ ཝཱ’’ཏི?

‘‘ཨ་ནི་ཙྩཱ, བྷ་ནྟེ’’…པེ….

‘‘མ་ནོ་ཝི་ཉྙཱ་ཎཾ ནི་ཙྩཾ ཝཱ ཨ་ནི་ཙྩཾ ཝཱ’’ཏི?

‘‘ཨ་ནི་ཙྩཾ, བྷ་ནྟེ’’…པེ….

‘‘མ་ནོ་ས་མྥ་སྶོ ནི་ཙྩོ ཝཱ ཨ་ནི་ཙྩོ ཝཱ’’ཏི?

‘‘ཨ་ནི་ཙྩོ, བྷ་ནྟེ’’…པེ….

‘‘ཡ་མྤི་དཾ མ་ནོ་ས་མྥ་སྶ་པ་ཙྩ་ཡཱ ཨུ་པྤ་ཛྫ་ཏི ཝེ་ད་ནཱ་ག་ཏཾ, ས་ཉྙཱ་ག་ཏཾ, ས་ངྑཱ་ར་ག་ཏཾ, ཝི་ཉྙཱ་ཎ་ག་ཏཾ, ཏ་མྤི ནི་ཙྩཾ ཝཱ ཨ་ནི་ཙྩཾ ཝཱ’’ཏི?

‘‘ཨ་ནི་ཙྩཾ, བྷ་ནྟེ’’.

‘‘ཡཾ པ་ནཱ་ནི་ཙྩཾ དུ་ཀྑཾ ཝཱ ཏཾ སུ་ཁཾ ཝཱ’’ཏི?

‘‘དུ་ཀྑཾ, བྷ་ནྟེ’’.

‘‘ནོ ཧེ་ཏཾ, བྷ་ནྟེ’’.

‘‘ཨེ་ཝཾ པ་སྶཾ, རཱ་ཧུ་ལ, སུ་ཏ་ཝཱ ཨ་རི་ཡ་སཱ་ཝ་ཀོ ཙ་ཀྑུ་སྨི་མྤི ནི་བྦི་ནྡ་ཏི, རཱུ་པེ་སུ་པི ནི་བྦི་ནྡ་ཏི, ཙ་ཀྑུ་ཝི་ཉྙཱ་ཎེ་པི ནི་བྦི་ནྡ་ཏི, ཙ་ཀྑུ་ས་མྥ་སྶེ་པི ནི་བྦི་ནྡ་ཏི, ཡ་མྤི་དཾ ཙ་ཀྑུ་ས་མྥ་སྶ་པ་ཙྩ་ཡཱ ཨུ་པྤ་ཛྫ་ཏི ཝེ་ད་ནཱ་ག་ཏཾ ས་ཉྙཱ་ག་ཏཾ ས་ངྑཱ་ར་ག་ཏཾ ཝི་ཉྙཱ་ཎ་ག་ཏཾ ཏ་སྨི་མྤི ནི་བྦི་ནྡ་ཏི…པེ… ཛི་ཝ྄ཧཱ་ཡ་པི ནི་བྦི་ནྡ་ཏི, ར་སེ་སུ་པི ནི་བྦི་ནྡ་ཏི, ཛི་ཝ྄ཧཱ་ཝི་ཉྙཱ་ཎེ་པི ནི་བྦི་ནྡ་ཏི, ཛི་ཝ྄ཧཱ་ས་མྥ་སྶེ་པི ནི་བྦི་ནྡ་ཏི, ཡ་མྤི་དཾ ཛི་ཝ྄ཧཱ་ས་མྥ་སྶ་པ་ཙྩ་ཡཱ ཨུ་པྤ་ཛྫ་ཏི ཝེ་ད་ནཱ་ག་ཏཾ ས་ཉྙཱ་ག་ཏཾ ས་ངྑཱ་ར་ག་ཏཾ ཝི་ཉྙཱ་ཎ་ག་ཏཾ ཏ་སྨི་མྤི ནི་བྦི་ནྡ་ཏི…པེ….

‘‘མ་ན་སྨི་མྤི ནི་བྦི་ནྡ་ཏི, དྷ་མྨེ་སུ་པི ནི་བྦི་ནྡ་ཏི, མ་ནོ་ཝི་ཉྙཱ་ཎེ་པི ནི་བྦི་ནྡ་ཏི, མ་ནོ་ས་མྥ་སྶེ་པི ནི་བྦི་ནྡ་ཏི, ཡ་མྤི་དཾ མ་ནོ་ས་མྥ་སྶ་པ་ཙྩ་ཡཱ ཨུ་པྤ་ཛྫ་ཏི ཝེ་ད་ནཱ་ག་ཏཾ ས་ཉྙཱ་ག་ཏཾ ས་ངྑཱ་ར་ག་ཏཾ ཝི་ཉྙཱ་ཎ་ག་ཏཾ ཏ་སྨི་མྤི ནི་བྦི་ནྡ་ཏི. ནི་བྦི་ནྡཾ ཝི་ར་ཛྫ་ཏི; ཝི་རཱ་གཱ ཝི་མུ་ཙྩ་ཏི; ཝི་མུ་ཏྟ་སྨིཾ ཝི་མུ་ཏྟ་མི་ཏི ཉཱ་ཎཾ ཧོ་ཏི. ‘ཁཱི་ཎཱ ཛཱ་ཏི, ཝུ་སི་ཏཾ བྲ་ཧྨ་ཙ་རི་ཡཾ, ཀ་ཏཾ ཀ་ར་ཎཱི་ཡཾ, ནཱ་པ་རཾ ཨི་ཏྠ་ཏྟཱ་ཡཱ’ཏི པ་ཛཱ་ནཱ་ཏཱི’’ཏི.

ཨི་ད་མ་ཝོ་ཙ བྷ་ག་ཝཱ. ཨ་ཏྟ་མ་ནོ ཨཱ་ཡ་སྨཱ རཱ་ཧུ་ལོ བྷ་ག་ཝ་ཏོ བྷཱ་སི་ཏཾ ཨ་བྷི་ན་ནྡི. ཨི་མ་སྨི་ཉྩ པ་ན ཝེ་ཡྻཱ་ཀ་ར་ཎ་སྨིཾ བྷ་ཉྙ་མཱ་ནེ ཨཱ་ཡ་སྨ་ཏོ རཱ་ཧུ་ལ་སྶ ཨ་ནུ་པཱ་དཱ་ཡ ཨཱ་ས་ཝེ་ཧི ཙི་ཏྟཾ ཝི་མུ་ཙྩི. ཨ་ནེ་ཀཱ་ན་ཉྩ དེ་ཝ་ཏཱ་ས་ཧ་སྶཱ་ནཾ ཝི་ར་ཛཾ ཝཱི་ཏ་མ་ལཾ དྷ་མྨ་ཙ་ཀྑུཾ ཨུ་ད་པཱ་དི – ‘‘ཡཾ ཀི་ཉྩི ས་མུ་ད་ཡ་དྷ་མྨཾ, ས་བྦཾ ཏཾ ནི་རོ་དྷ་དྷ་མྨ’’ནྟི. ཨ་ཊྛ་མཾ.

༩. སཾ་ཡོ་ཛ་ནི་ཡ་དྷ་མྨ་སུ་ཏྟཾ

༡༢༢. ‘‘སཾ་ཡོ་ཛ་ནི་ཡེ ཙ, བྷི་ཀྑ་ཝེ, དྷ་མྨེ དེ་སེ་སྶཱ་མི སཾ་ཡོ་ཛ་ན་ཉྩ. ཏཾ སུ་ཎཱ་ཐ. ཀ་ཏ་མེ ཙ, བྷི་ཀྑ་ཝེ, སཾ་ཡོ་ཛ་ནི་ཡཱ དྷ་མྨཱ, ཀ་ཏ་མ་ཉྩ སཾ་ཡོ་ཛ་ནཾ? ས་ནྟི, བྷི་ཀྑ་ཝེ, ཙ་ཀྑུ་ཝི་ཉྙེ་ཡྻཱ རཱུ་པཱ ཨི་ཊྛཱ ཀ་ནྟཱ མ་ནཱ་པཱ པི་ཡ་རཱུ་པཱ ཀཱ་མཱུ་པ་སཾ་ཧི་ཏཱ ར་ཛ་ནཱི་ཡཱ. ཨི་མེ ཝུ་ཙྩ་ནྟི, བྷི་ཀྑ་ཝེ, སཾ་ཡོ་ཛ་ནི་ཡཱ དྷ་མྨཱ. ཡོ ཏ་ཏྠ ཚ་ནྡ་རཱ་གོ, ཏཾ ཏ་ཏྠ སཾ་ཡོ་ཛ་ནཾ…པེ… ས་ནྟི, བྷི་ཀྑ་ཝེ, ཛི་ཝ྄ཧཱ་ཝི་ཉྙེ་ཡྻཱ ར་སཱ…པེ… ས་ནྟི, བྷི་ཀྑ་ཝེ, མ་ནོ་ཝི་ཉྙེ་ཡྻཱ དྷ་མྨཱ ཨི་ཊྛཱ ཀ་ནྟཱ མ་ནཱ་པཱ པི་ཡ་རཱུ་པཱ ཀཱ་མཱུ་པ་སཾ་ཧི་ཏཱ ར་ཛ་ནཱི་ཡཱ. ཨི་མེ ཝུ་ཙྩ་ནྟི, བྷི་ཀྑ་ཝེ, སཾ་ཡོ་ཛ་ནི་ཡཱ དྷ་མྨཱ. ཡོ ཏ་ཏྠ ཚ་ནྡ་རཱ་གོ ཏཾ ཏ་ཏྠ སཾ་ཡོ་ཛ་ན’’ནྟི. ན་ཝ་མཾ.

༡༠. ཨུ་པཱ་དཱ་ནི་ཡ་དྷ་མྨ་སུ་ཏྟཾ

༡༢༣. ‘‘ཨུ་པཱ་དཱ་ནི་ཡེ ཙ, བྷི་ཀྑ་ཝེ, དྷ་མྨེ དེ་སེ་སྶཱ་མི ཨུ་པཱ་དཱ་ན་ཉྩ. ཏཾ སུ་ཎཱ་ཐ. ཀ་ཏ་མེ ཙ, བྷི་ཀྑ་ཝེ, ཨུ་པཱ་དཱ་ནི་ཡཱ དྷ་མྨཱ, ཀ་ཏ་མ་ཉྩ ཨུ་པཱ་དཱ་ནཾ? ས་ནྟི, བྷི་ཀྑ་ཝེ, ཙ་ཀྑུ་ཝི་ཉྙེ་ཡྻཱ རཱུ་པཱ ཨི་ཊྛཱ ཀ་ནྟཱ མ་ནཱ་པཱ པི་ཡ་རཱུ་པཱ ཀཱ་མཱུ་པ་སཾ་ཧི་ཏཱ ར་ཛ་ནཱི་ཡཱ. ཨི་མེ ཝུ་ཙྩ་ནྟི, བྷི་ཀྑ་ཝེ, ཨུ་པཱ་དཱ་ནི་ཡཱ དྷ་མྨཱ. ཡོ ཏ་ཏྠ ཚ་ནྡ་རཱ་གོ, ཏཾ ཏ་ཏྠ ཨུ་པཱ་དཱ་ནཾ…པེ… ས་ནྟི, བྷི་ཀྑ་ཝེ, ཛི་ཝ྄ཧཱ་ཝི་ཉྙེ་ཡྻཱ ར་སཱ…པེ… ས་ནྟི, བྷི་ཀྑ་ཝེ, མ་ནོ་ཝི་ཉྙེ་ཡྻཱ དྷ་མྨཱ ཨི་ཊྛཱ ཀ་ནྟཱ མ་ནཱ་པཱ པི་ཡ་རཱུ་པཱ ཀཱ་མཱུ་པ་སཾ་ཧི་ཏཱ ར་ཛ་ནཱི་ཡཱ. ཨི་མེ ཝུ་ཙྩ་ནྟི, བྷི་ཀྑ་ཝེ, ཨུ་པཱ་དཱ་ནི་ཡཱ དྷ་མྨཱ. ཡོ ཏ་ཏྠ ཚ་ནྡ་རཱ་གོ ཏཾ ཏ་ཏྠ ཨུ་པཱ་དཱ་ན’’ནྟི. ད་ས་མཾ.

ལོ་ཀ་ཀཱ་མ་གུ་ཎ་ཝ་གྒོ དྭཱ་ད་ས་མོ.

ཏ་སྶུ་དྡཱ་ནཾ –

མཱ་ར་པཱ་སེ་ན དྭེ ཝུ་ཏྟཱ, ལོ་ཀ་ཀཱ་མ་གུ་ཎེ་ན ཙ;

ས་ཀྐོ པ་ཉྩ་སི་ཁོ ཙེ་ཝ, སཱ་རི་པུ་ཏྟོ ཙ རཱ་ཧུ་ལོ;

སཾ་ཡོ་ཛ་ནཾ ཨུ་པཱ་དཱ་ནཾ, ཝ་གྒོ ཏེ་ན པ་ཝུ་ཙྩ་ཏཱི་ཏི.