༣. ཨ་ནི་ཙྩ་སུ་ཏྟཾ

༤༥. སཱ་ཝ་ཏྠི་ནི་དཱ་ནཾ. ‘‘རཱུ་པཾ, བྷི་ཀྑ་ཝེ, ཨ་ནི་ཙྩཾ. ཡ་ད་ནི་ཙྩཾ ཏཾ དུ་ཀྑཾ; ཡཾ དུ་ཀྑཾ ཏ་ད་ན་ཏྟཱ; ཡ་ད་ན་ཏྟཱ ཏཾ ‘ནེ་ཏཾ མ་མ, ནེ་སོ་ཧ་མ་སྨི, ན མེ་སོ ཨ་ཏྟཱ’ཏི ཨེ་ཝ་མེ་ཏཾ ཡ་ཐཱ་བྷཱུ་ཏཾ ས་མྨ་པྤ་ཉྙཱ་ཡ ད་ཊྛ་བྦཾ. ཨེ་ཝ་མེ་ཏཾ ཡ་ཐཱ་བྷཱུ་ཏཾ ས་མྨ་པྤ་ཉྙཱ་ཡ པ་སྶ་ཏོ ཙི་ཏྟཾ ཝི་ར་ཛྫ་ཏི ཝི་མུ་ཙྩ་ཏི ཨ་ནུ་པཱ་དཱ་ཡ ཨཱ་ས་ཝེ་ཧི. ཝེ་ད་ནཱ ཨ་ནི་ཙྩཱ… ས་ཉྙཱ… ས་ངྑཱ་རཱ… ཝི་ཉྙཱ་ཎཾ ཨ་ནི་ཙྩཾ. ཡ་ད་ནི་ཙྩཾ ཏཾ དུ་ཀྑཾ; ཡཾ དུ་ཀྑཾ ཏ་ད་ན་ཏྟཱ; ཡ་ད་ན་ཏྟཱ ཏཾ ‘ནེ་ཏཾ མ་མ, ནེ་སོ་ཧ་མ་སྨི, ན མེ་སོ ཨ་ཏྟཱ’ཏི ཨེ་ཝ་མེ་ཏཾ ཡ་ཐཱ་བྷཱུ་ཏཾ ས་མྨ་པྤ་ཉྙཱ་ཡ ད་ཊྛ་བྦཾ. ཨེ་ཝ་མེ་ཏཾ ཡ་ཐཱ་བྷཱུ་ཏཾ ས་མྨ་པྤ་ཉྙཱ་ཡ པ་སྶ་ཏོ ཙི་ཏྟཾ ཝི་ར་ཛྫ་ཏི ཝི་མུ་ཙྩ་ཏི ཨ་ནུ་པཱ་དཱ་ཡ ཨཱ་ས་ཝེ་ཧི. རཱུ་པ་དྷཱ་ཏུ་ཡཱ ཙེ, བྷི་ཀྑ་ཝེ, བྷི་ཀྑུ་ནོ ཙི་ཏྟཾ ཝི་ར་ཏྟཾ ཝི་མུ་ཏྟཾ ཧོ་ཏི ཨ་ནུ་པཱ་དཱ་ཡ ཨཱ་ས་ཝེ་ཧི, ཝེ་ད་ནཱ་དྷཱ་ཏུ་ཡཱ…པེ… ས་ཉྙཱ་དྷཱ་ཏུ་ཡཱ… ས་ངྑཱ་ར་དྷཱ་ཏུ་ཡཱ… ཝི་ཉྙཱ་ཎ་དྷཱ་ཏུ་ཡཱ ཙེ, བྷི་ཀྑ་ཝེ, བྷི་ཀྑུ་ནོ ཙི་ཏྟཾ ཝི་ར་ཏྟཾ ཝི་མུ་ཏྟཾ ཧོ་ཏི ཨ་ནུ་པཱ་དཱ་ཡ ཨཱ་ས་ཝེ་ཧི. ཝི་མུ་ཏྟ་ཏྟཱ ཋི་ཏཾ. ཋི་ཏ་ཏྟཱ ས་ནྟུ་སི་ཏཾ [ས་ནྟུ་སྶི་ཏཾ (ཀ. སཱི. པཱི. ཀ.)]. ས་ནྟུ་སི་ཏ་ཏྟཱ ན པ་རི་ཏ་སྶ་ཏི. ཨ་པ་རི་ཏ་སྶཾ པ་ཙྩ་ཏྟ་ཉྙེ་ཝ པ་རི་ནི་བྦཱ་ཡ་ཏི. ‘ཁཱི་ཎཱ ཛཱ་ཏི, ཝུ་སི་ཏཾ བྲ་ཧྨ་ཙ་རི་ཡཾ, ཀ་ཏཾ ཀ་ར་ཎཱི་ཡཾ, ནཱ་པ་རཾ ཨི་ཏྠ་ཏྟཱ་ཡཱ’ཏི པ་ཛཱ་ནཱ་ཏཱི’’ཏི. ཏ་ཏི་ཡཾ.