༨. ཏ་ཏི་ཡ་ཨོ་ཝཱ་ད་སུ་ཏྟཾ
༡༥༡. རཱ་ཛ་ག་ཧེ ཀ་ལ་ནྡ་ཀ་ནི་ཝཱ་པེ [སཱ་ཝ་ཏྠི, ཨཱ་རཱ་མེ (སཱི.)]. ཨ་ཐ ཁོ ཨཱ་ཡ་སྨཱ མ་ཧཱ་ཀ་སྶ་པོ ཡེ་ན བྷ་ག་ཝཱ ཏེ་ནུ་པ་ས་ངྐ་མི; ཨུ་པ་ས་ངྐ་མི་ཏྭཱ བྷ་ག་ཝ་ནྟཾ ཨ་བྷི་ཝཱ་དེ་ཏྭཱ ཨེ་ཀ་མ་ནྟཾ ནི་སཱི་དི. ཨེ་ཀ་མ་ནྟཾ ནི་སི་ནྣཾ ཁོ ཨཱ་ཡ་སྨ་ནྟཾ མ་ཧཱ་ཀ་སྶ་པཾ བྷ་ག་ཝཱ ཨེ་ཏ་ད་ཝོ་ཙ – ‘‘ཨོ་ཝ་ད, ཀ་སྶ་པ, བྷི་ཀྑཱུ; ཀ་རོ་ཧི, ཀ་སྶ་པ, བྷི་ཀྑཱུ་ནཾ དྷ་མྨིཾ ཀ་ཐཾ. ཨ་ཧཾ ཝཱ, ཀ་སྶ་པ, བྷི་ཀྑཱུ་ནཾ ཨོ་ཝ་དེ་ཡྻཾ ཏྭཾ ཝཱ; ཨ་ཧཾ ཝཱ བྷི་ཀྑཱུ་ནཾ དྷ་མྨིཾ ཀ་ཐཾ ཀ་རེ་ཡྻཾ ཏྭཾ ཝཱ’’ཏི.
‘‘དུ་བྦ་ཙཱ ཁོ, བྷ་ནྟེ, ཨེ་ཏ་ར་ཧི བྷི་ཀྑཱུ, དོ་ཝ་ཙ་སྶ་ཀ་ར་ཎེ་ཧི དྷ་མྨེ་ཧི ས་མ་ནྣཱ་ག་ཏཱ, ཨ་ཀྑ་མཱ, ཨ་པྤ་ད་ཀྑི་ཎ་གྒཱ་ཧི་ནོ ཨ་ནུ་སཱ་ས་ནཱི’’ནྟི. ‘‘ཏ་ཐཱ ཧི པ་ན, ཀ་སྶ་པ, པུ་བྦེ ཐེ་རཱ བྷི་ཀྑཱུ ཨཱ་ར་ཉྙི་ཀཱ ཙེ་ཝ ཨ་ཧེ་སུཾ ཨཱ་ར་ཉྙི་ཀ་ཏྟ་སྶ ཙ ཝ་ཎྞ་ཝཱ་དི་ནོ, པི་ཎྜ་པཱ་ཏི་ཀཱ ཙེ་ཝ ཨ་ཧེ་སུཾ པི་ཎྜ་པཱ་ཏི་ཀ་ཏྟ་སྶ ཙ ཝ་ཎྞ་ཝཱ་དི་ནོ, པཾ་སུ་ཀཱུ་ལི་ཀཱ ཙེ་ཝ ཨ་ཧེ་སུཾ པཾ་སུ་ཀཱུ་ལི་ཀ་ཏྟ་སྶ ཙ ཝ་ཎྞ་ཝཱ་དི་ནོ, ཏེ་ཙཱི་ཝ་རི་ཀཱ ཙེ་ཝ ཨ་ཧེ་སུཾ ཏེ་ཙཱི་ཝ་རི་ཀ་ཏྟ་སྶ ཙ ཝ་ཎྞ་ཝཱ་དི་ནོ, ཨ་པྤི་ཙྪཱ ཙེ་ཝ ཨ་ཧེ་སུཾ ཨ་པྤི་ཙྪ་ཏཱ་ཡ ཙ ཝ་ཎྞ་ཝཱ་དི་ནོ, ས་ནྟུ་ཊྛཱ ཙེ་ཝ ཨ་ཧེ་སུཾ ས་ནྟུ་ཊྛི་ཡཱ ཙ ཝ་ཎྞ་ཝཱ་དི་ནོ, པ་ཝི་ཝི་ཏྟཱ ཙེ་ཝ ཨ་ཧེ་སུཾ པ་ཝི་ཝེ་ཀ་སྶ ཙ ཝ་ཎྞ་ཝཱ་དི་ནོ, ཨ་སཾ་ས་ཊྛཱ ཙེ་ཝ ཨ་ཧེ་སུཾ ཨ་སཾ་ས་གྒ་སྶ ཙ ཝ་ཎྞ་ཝཱ་དི་ནོ, ཨཱ་ར་དྡྷ་ཝཱི་རི་ཡཱ ཙེ་ཝ ཨ་ཧེ་སུཾ ཝཱི་རི་ཡཱ་ར་མྦྷ་སྶ ཙ ཝ་ཎྞ་ཝཱ་དི་ནོ.
‘‘ཏ་ཏྲ ཡོ ཧོ་ཏི བྷི་ཀྑུ ཨཱ་ར་ཉྙི་ཀོ ཙེ་ཝ ཨཱ་ར་ཉྙི་ཀ་ཏྟ་སྶ ཙ ཝ་ཎྞ་ཝཱ་དཱི, པི་ཎྜ་པཱ་ཏི་ཀོ ཙེ་ཝ པི་ཎྜ་པཱ་ཏི་ཀ་ཏྟ་སྶ ཙ ཝ་ཎྞ་ཝཱ་དཱི, པཾ་སུ་ཀཱུ་ལི་ཀོ ཙེ་ཝ པཾ་སུ་ཀཱུ་ལི་ཀ་ཏྟ་སྶ ཙ ཝ་ཎྞ་ཝཱ་དཱི, ཏེ་ཙཱི་ཝ་རི་ཀོ ཙེ་ཝ ཏེ་ཙཱི་ཝ་རི་ཀ་ཏྟ་སྶ ཙ ཝ་ཎྞ་ཝཱ་དཱི, ཨ་པྤི་ཙྪོ ཙེ་ཝ ཨ་པྤི་ཙྪ་ཏཱ་ཡ ཙ ཝ་ཎྞ་ཝཱ་དཱི, ས་ནྟུ་ཊྛོ ཙེ་ཝ ས་ནྟུ་ཊྛི་ཡཱ ཙ ཝ་ཎྞ་ཝཱ་དཱི, པ་ཝི་ཝི་ཏྟོ ཙེ་ཝ པ་ཝི་ཝེ་ཀ་སྶ ཙ ཝ་ཎྞ་ཝཱ་དཱི, ཨ་སཾ་ས་ཊྛོ ཙེ་ཝ ཨ་སཾ་ས་གྒ་སྶ ཙ ཝ་ཎྞ་ཝཱ་དཱི, ཨཱ་ར་དྡྷ་ཝཱི་རི་ཡོ ཙེ་ཝ ཝཱི་རི་ཡཱ་ར་མྦྷ་སྶ ཙ ཝ་ཎྞ་ཝཱ་དཱི, ཏཾ ཐེ་རཱ བྷི་ཀྑཱུ ཨཱ་ས་ནེ་ན ནི་མ་ནྟེ་ནྟི – ‘ཨེ་ཧི, བྷི་ཀྑུ, ཀོ ནཱ་མཱ་ཡཾ བྷི་ཀྑུ, བྷ་དྡ་ཀོ ཝ་ཏཱ་ཡཾ བྷི་ཀྑུ, སི་ཀྑཱ་ཀཱ་མོ ཝ་ཏཱ་ཡཾ བྷི་ཀྑུ; ཨེ་ཧི, བྷི་ཀྑུ, ཨི་དཾ ཨཱ་ས་ནཾ ནི་སཱི་དཱ་ཧཱི’’’ཏི.
‘‘ཏ་ཏྲ, ཀ་སྶ་པ, ན་ཝཱ་ནཾ བྷི་ཀྑཱུ་ནཾ ཨེ་ཝཾ ཧོ་ཏི – ‘ཡོ ཀི་ར སོ ཧོ་ཏི བྷི་ཀྑུ ཨཱ་ར་ཉྙི་ཀོ ཙེ་ཝ ཨཱ་ར་ཉྙི་ཀ་ཏྟ་སྶ ཙ ཝ་ཎྞ་ཝཱ་དཱི, པི་ཎྜ་པཱ་ཏི་ཀོ ཙེ་ཝ…པེ… པཾ་སུ་ཀཱུ་ལི་ཀོ ཙེ་ཝ… ཏེ་ཙཱི་ཝ་རི་ཀོ ཙེ་ཝ… ཨ་པྤི་ཙྪོ ཙེ་ཝ… ས་ནྟུ་ཊྛོ ཙེ་ཝ… པ་ཝི་ཝི་ཏྟོ ཙེ་ཝ… ཨ་སཾ་ས་ཊྛོ ཙེ་ཝ… ཨཱ་ར་དྡྷ་ཝཱི་རི་ཡོ ཙེ་ཝ ཝཱི་རི་ཡཱ་ར་མྦྷ་སྶ ཙ ཝ་ཎྞ་ཝཱ་དཱི, ཏཾ ཐེ་རཱ བྷི་ཀྑཱུ ཨཱ་ས་ནེ་ན ནི་མ་ནྟེ་ནྟི – ཨེ་ཧི, བྷི་ཀྑུ, ཀོ ནཱ་མཱ་ཡཾ བྷི་ཀྑུ, བྷ་དྡ་ཀོ ཝ་ཏཱ་ཡཾ བྷི་ཀྑུ, སི་ཀྑཱ་ཀཱ་མོ ཝ་ཏཱ་ཡཾ བྷི་ཀྑུ; ཨེ་ཧི, བྷི་ཀྑུ, ཨི་དཾ ཨཱ་ས་ནཾ ནི་སཱི་དཱ་ཧཱི’ཏི. ཏེ ཏ་ཐ་ཏྟཱ་ཡ པ་ཊི་པ་ཛྫ་ནྟི; ཏེ་སཾ ཏཾ ཧོ་ཏི དཱི་གྷ་ར་ཏྟཾ ཧི་ཏཱ་ཡ སུ་ཁཱ་ཡ.
‘‘ཨེ་ཏ་ར་ཧི པ་ན, ཀ་སྶ་པ, ཐེ་རཱ བྷི་ཀྑཱུ ན ཙེ་ཝ ཨཱ་ར་ཉྙི་ཀཱ ན ཙ ཨཱ་ར་ཉྙི་ཀ་ཏྟ་སྶ ཝ་ཎྞ་ཝཱ་དི་ནོ, ན ཙེ་ཝ པི་ཎྜ་པཱ་ཏི་ཀཱ ན ཙ པི་ཎྜ་པཱ་ཏི་ཀ་ཏྟ་སྶ ཝ་ཎྞ་ཝཱ་དི་ནོ, ན ཙེ་ཝ པཾ་སུ་ཀཱུ་ལི་ཀཱ ན ཙ པཾ་སུ་ཀཱུ་ལི་ཀ་ཏྟ་སྶ ཝ་ཎྞ་ཝཱ་དི་ནོ, ན ཙེ་ཝ ཏེ་ཙཱི་ཝ་རི་ཀཱ ན ཙ ཏེ་ཙཱི་ཝ་རི་ཀ་ཏྟ་སྶ ཝ་ཎྞ་ཝཱ་དི་ནོ, ན ཙེ་ཝ ཨ་པྤི་ཙྪཱ ན ཙ ཨ་པྤི་ཙྪ་ཏཱ་ཡ ཝ་ཎྞ་ཝཱ་དི་ནོ, ན ཙེ་ཝ ས་ནྟུ་ཊྛཱ ན ཙ ས་ནྟུ་ཊྛི་ཡཱ ཝ་ཎྞ་ཝཱ་དི་ནོ, ན ཙེ་ཝ པ་ཝི་ཝི་ཏྟཱ ན ཙ པ་ཝི་ཝེ་ཀ་སྶ ཝ་ཎྞ་ཝཱ་དི་ནོ, ན ཙེ་ཝ ཨ་སཾ་ས་ཊྛཱ ན ཙ ཨ་སཾ་ས་གྒ་སྶ ཝ་ཎྞ་ཝཱ་དི་ནོ, ན ཙེ་ཝ ཨཱ་ར་དྡྷ་ཝཱི་རི་ཡཱ ན ཙ ཝཱི་རི་ཡཱ་ར་མྦྷ་སྶ ཝ་ཎྞ་ཝཱ་དི་ནོ.
‘‘ཏ་ཏྲ ཡོ ཧོ་ཏི བྷི་ཀྑུ ཉཱ་ཏོ ཡ་ས་སྶཱི ལཱ་བྷཱི ཙཱི་ཝ་ར-པི་ཎྜ་པཱ་ཏ-སེ་ནཱ་ས་ན་གི་ལཱ་ན་པྤ་ཙྩ་ཡ་བྷེ་ས་ཛྫ་པ་རི་ཀྑཱ་རཱ་ནཾ ཏཾ ཐེ་རཱ བྷི་ཀྑཱུ ཨཱ་ས་ནེ་ན ནི་མ་ནྟེ་ནྟི – ‘ཨེ་ཧི, བྷི་ཀྑུ, ཀོ ནཱ་མཱ་ཡཾ བྷི་ཀྑུ, བྷ་དྡ་ཀོ ཝ་ཏཱ་ཡཾ བྷི་ཀྑུ, ས་བྲ་ཧྨ་ཙཱ་རི་ཀཱ་མོ ཝ་ཏཱ་ཡཾ བྷི་ཀྑུ; ཨེ་ཧི, བྷི་ཀྑུ, ཨི་དཾ ཨཱ་ས་ནཾ ནི་སཱི་དཱ་ཧཱི’’’ཏི.
‘‘ཏ་ཏྲ, ཀ་སྶ་པ, ན་ཝཱ་ནཾ བྷི་ཀྑཱུ་ནཾ ཨེ་ཝཾ ཧོ་ཏི – ‘ཡོ ཀི་ར སོ ཧོ་ཏི བྷི་ཀྑུ ཉཱ་ཏོ ཡ་ས་སྶཱི ལཱ་བྷཱི ཙཱི་ཝ་ར-པི་ཎྜ་པཱ་ཏ-སེ་ནཱ་ས་ན-གི་ལཱ་ན་པྤ་ཙྩ་ཡ་བྷེ་ས་ཛྫ་པ་རི་ཀྑཱ་རཱ་ནཾ ཏཾ ཐེ་རཱ བྷི་ཀྑཱུ ཨཱ་ས་ནེ་ན ནི་མ་ནྟེ་ནྟི – ཨེ་ཧི, བྷི་ཀྑུ, ཀོ ནཱ་མཱ་ཡཾ བྷི་ཀྑུ, བྷ་དྡ་ཀོ ཝ་ཏཱ་ཡཾ བྷི་ཀྑུ, ས་བྲ་ཧྨ་ཙཱ་རི་ཀཱ་མོ ཝ་ཏཱ་ཡཾ བྷི་ཀྑུ; ཨེ་ཧི, བྷི་ཀྑུ, ཨི་དཾ ཨཱ་ས་ནཾ ནི་སཱི་དཱ་ཧཱི’ཏི. ཏེ ཏ་ཐ་ཏྟཱ་ཡ པ་ཊི་པ་ཛྫ་ནྟི. ཏེ་སཾ ཏཾ ཧོ་ཏི དཱི་གྷ་ར་ཏྟཾ ཨ་ཧི་ཏཱ་ཡ དུ་ཀྑཱ་ཡ. ཡ་ཉྷི ཏཾ, ཀ་སྶ་པ, ས་མྨཱ ཝ་ད་མཱ་ནོ ཝ་དེ་ཡྻ – ‘ཨུ་པ་དྡུ་ཏཱ བྲ་ཧྨ་ཙཱ་རཱི བྲ་ཧྨ་ཙཱ་རཱུ་པ་དྡ་ཝེ་ན ཨ་བྷི་པ་ཏྠ་ནཱ [ཨ་བྷི་བྷ་ཝ་ནཱ (སཱི.)] བྲ་ཧྨ་ཙཱ་རཱི བྲ་ཧྨ་ཙཱ་རི་ཨ་བྷི་པ་ཏྠ་ནེ་ནཱ’ཏི [བྲ་ཧྨ་ཙཱ་རི་ཨ་བྷི་བྷ་ཝ་ནེ་ནཱ་ཏི (སཱི.)], ཨེ་ཏ་ར་ཧི ཏཾ, ཀ་སྶ་པ, ས་མྨཱ ཝ་ད་མཱ་ནོ ཝ་དེ་ཡྻ – ‘ཨུ་པ་དྡུ་ཏཱ བྲ་ཧྨ་ཙཱ་རཱི བྲ་ཧྨ་ཙཱ་རཱུ་པ་དྡ་ཝེ་ན ཨ་བྷི་པ་ཏྠ་ནཱ བྲ་ཧྨ་ཙཱ་རཱི བྲ་ཧྨ་ཙཱ་རི་ཨ་བྷི་པ་ཏྠ་ནེ་ནཱ’’’ཏི. ཨ་ཊྛ་མཾ.