༥. ཛི་ཎྞ་སུ་ཏྟཾ
༡༤༨. ཨེ་ཝཾ མེ སུ་ཏཾ…པེ… རཱ་ཛ་ག་ཧེ ཝེ་ལུ༹་ཝ་ནེ. ཨ་ཐ ཁོ ཨཱ་ཡ་སྨཱ མ་ཧཱ་ཀ་སྶ་པོ ཡེ་ན བྷ་ག་ཝཱ ཏེ་ནུ་པ་ས་ངྐ་མི; ཨུ་པ་ས་ངྐ་མི་ཏྭཱ བྷ་ག་ཝ་ནྟཾ ཨ་བྷི་ཝཱ་དེ་ཏྭཱ ཨེ་ཀ་མ་ནྟཾ ནི་སཱི་དི. ཨེ་ཀ་མ་ནྟཾ ནི་སི་ནྣཾ ཁོ ཨཱ་ཡ་སྨ་ནྟཾ མ་ཧཱ་ཀ་སྶ་པཾ བྷ་ག་ཝཱ ཨེ་ཏ་ད་ཝོ་ཙ – ‘‘ཛི་ཎྞོ་སི དཱ་ནི ཏྭཾ, ཀ་སྶ་པ, ག་རུ་ཀཱ་ནི ཙ ཏེ ཨི་མཱ་ནི སཱ་ཎཱ་ནི པཾ་སུ་ཀཱུ་ལཱ་ནི ནི་བྦ་ས་ནཱ་ནི. ཏ་སྨཱ་ཏི་ཧ ཏྭཾ, ཀ་སྶ་པ, ག་ཧ་པ་ཏཱ་ནི [ག་ཧ་པ་ཏི་ཀཱ་ནི (སཱི.)] ཙེ་ཝ ཙཱི་ཝ་རཱ་ནི དྷཱ་རེ་ཧི, ནི་མ་ནྟ་ནཱ་ནི ཙ བྷུ་ཉྫཱ་ཧི, མ་མ ཙ ས་ནྟི་ཀེ ཝི་ཧ་རཱ་ཧཱི’’ཏི.
‘‘ཨ་ཧཾ ཁོ, བྷ་ནྟེ, དཱི་གྷ་ར་ཏྟཾ ཨཱ་ར་ཉྙི་ཀོ ཙེ་ཝ ཨཱ་ར་ཉྙི་ཀ་ཏྟ་སྶ ཙ ཝ་ཎྞ་ཝཱ་དཱི, པི་ཎྜ་པཱ་ཏི་ཀོ ཙེ་ཝ པི་ཎྜ་པཱ་ཏི་ཀ་ཏྟ་སྶ ཙ ཝ་ཎྞ་ཝཱ་དཱི, པཾ་སུ་ཀཱུ་ལི་ཀོ ཙེ་ཝ པཾ་སུ་ཀཱུ་ལི་ཀ་ཏྟ་སྶ ཙ ཝ་ཎྞ་ཝཱ་དཱི, ཏེ་ཙཱི་ཝ་རི་ཀོ ཙེ་ཝ ཏེ་ཙཱི་ཝ་རི་ཀ་ཏྟ་སྶ ཙ ཝ་ཎྞ་ཝཱ་དཱི, ཨ་པྤི་ཙྪོ ཙེ་ཝ ཨ་པྤི་ཙྪ་ཏཱ་ཡ ཙ ཝ་ཎྞ་ཝཱ་དཱི, ས་ནྟུ་ཊྛོ ཙེ་ཝ ས་ནྟུ་ཊྛི་ཡཱ ཙ ཝ་ཎྞ་ཝཱ་དཱི, པ་ཝི་ཝི་ཏྟོ ཙེ་ཝ པ་ཝི་ཝེ་ཀ་སྶ ཙ ཝ་ཎྞ་ཝཱ་དཱི, ཨ་སཾ་ས་ཊྛོ ཙེ་ཝ ཨ་སཾ་ས་གྒ་སྶ ཙ ཝ་ཎྞ་ཝཱ་དཱི, ཨཱ་ར་དྡྷ་ཝཱི་རི་ཡོ ཙེ་ཝ ཝཱི་རི་ཡཱ་ར་མྦྷ་སྶ [ཝཱི་རི་ཡཱ་ར་བྦྷ་སྶ (ཀ.)] ཙ ཝ་ཎྞ་ཝཱ་དཱི’’ཏི.
‘‘ཀིཾ [ཀཾ (ཀ.)] པ་ན ཏྭཾ, ཀ་སྶ་པ, ཨ་ཏྠ་ཝ་སཾ ས་མྤ་སྶ་མཱ་ནོ དཱི་གྷ་ར་ཏྟཾ ཨཱ་ར་ཉྙི་ཀོ ཙེ་ཝ ཨཱ་ར་ཉྙི་ཀ་ཏྟ་སྶ ཙ ཝ་ཎྞ་ཝཱ་དཱི, པི་ཎྜ་པཱ་ཏི་ཀོ ཙེ་ཝ…པེ… པཾ་སུ་ཀཱུ་ལི་ཀོ ཙེ་ཝ… ཏེ་ཙཱི་ཝ་རི་ཀོ ཙེ་ཝ… ཨ་པྤི་ཙྪོ ཙེ་ཝ… ས་ནྟུ་ཊྛོ ཙེ་ཝ… པ་ཝི་ཝི་ཏྟོ ཙེ་ཝ… ཨ་སཾ་ས་ཊྛོ ཙེ་ཝ… ཨཱ་ར་དྡྷ་ཝཱི་རི་ཡོ ཙེ་ཝ ཝཱི་རི་ཡཱ་ར་མྦྷ་སྶ ཙ ཝ་ཎྞ་ཝཱ་དཱི’’ཏི?
‘‘དྭེ ཁྭཱ་ཧཾ, བྷ་ནྟེ, ཨ་ཏྠ་ཝ་སེ ས་མྤ་སྶ་མཱ་ནོ དཱི་གྷ་ར་ཏྟཾ ཨཱ་ར་ཉྙི་ཀོ ཙེ་ཝ ཨཱ་ར་ཉྙི་ཀ་ཏྟ་སྶ ཙ ཝ་ཎྞ་ཝཱ་དཱི, པི་ཎྜ་པཱ་ཏི་ཀོ ཙེ་ཝ…པེ… པཾ་སུ་ཀཱུ་ལི་ཀོ ཙེ་ཝ… ཏེ་ཙཱི་ཝ་རི་ཀོ ཙེ་ཝ… ཨ་པྤི་ཙྪོ ཙེ་ཝ… ས་ནྟུ་ཊྛོ ཙེ་ཝ… པ་ཝི་ཝི་ཏྟོ ཙེ་ཝ… ཨ་སཾ་ས་ཊྛོ ཙེ་ཝ… ཨཱ་ར་དྡྷ་ཝཱི་རི་ཡོ ཙེ་ཝ ཝཱི་རི་ཡཱ་ར་མྦྷ་སྶ ཙ ཝ་ཎྞ་ཝཱ་དཱི. ཨ་ཏྟ་ནོ ཙ དི་ཊྛ་དྷ་མྨ་སུ་ཁ་ཝི་ཧཱ་རཾ ས་མྤ་སྶ་མཱ་ནོ, པ་ཙྪི་མ་ཉྩ ཛ་ན་ཏཾ ཨ་ནུ་ཀ་མྤ་མཱ་ནོ – ‘ཨ་པྤེ་ཝ ནཱ་མ པ་ཙྪི་མཱ ཛ་ན་ཏཱ དི་ཊྛཱ་ནུ་ག་ཏིཾ ཨཱ་པ་ཛྫེ་ཡྻུཾ’ [ཨཱ་པ་ཛྫེ་ཡྻ (སཱི. སྱཱ. ཀཾ.)]. ‘ཡེ ཀི་ར ཏེ ཨ་ཧེ་སུཾ བུ་དྡྷཱ་ནུ་བུ་དྡྷ་སཱ་ཝ་ཀཱ ཏེ དཱི་གྷ་ར་ཏྟཾ ཨཱ་ར་ཉྙི་ཀཱ ཙེ་ཝ ཨ་ཧེ་སུཾ ཨཱ་ར་ཉྙི་ཀ་ཏྟ་སྶ ཙ ཝ་ཎྞ་ཝཱ་དི་ནོ…པེ… པི་ཎྜ་པཱ་ཏི་ཀཱ ཙེ་ཝ ཨ་ཧེ་སུཾ …པེ… པཾ་སུ་ཀཱུ་ལི་ཀཱ ཙེ་ཝ ཨ་ཧེ་སུཾ… ཏེ་ཙཱི་ཝ་རི་ཀཱ ཙེ་ཝ ཨ་ཧེ་སུཾ… ཨ་པྤི་ཙྪཱ ཙེ་ཝ ཨ་ཧེ་སུཾ… ས་ནྟུ་ཊྛཱ ཙེ་ཝ ཨ་ཧེ་སུཾ… པ་ཝི་ཝི་ཏྟཱ ཙེ་ཝ ཨ་ཧེ་སུཾ… ཨ་སཾ་ས་ཊྛཱ ཙེ་ཝ ཨ་ཧེ་སུཾ… ཨཱ་ར་དྡྷ་ཝཱི་རི་ཡཱ ཙེ་ཝ ཨ་ཧེ་སུཾ ཝཱི་རི་ཡཱ་ར་མྦྷ་སྶ ཙ ཝ་ཎྞ་ཝཱ་དི་ནོ’ཏི. ཏེ ཏ་ཐ་ཏྟཱ་ཡ པ་ཊི་པ་ཛྫི་སྶ་ནྟི, ཏེ་སཾ ཏཾ བྷ་ཝི་སྶ་ཏི དཱི་གྷ་ར་ཏྟཾ ཧི་ཏཱ་ཡ སུ་ཁཱ་ཡ.
‘‘ཨི་མེ ཁྭཱ་ཧཾ, བྷ་ནྟེ, དྭེ ཨ་ཏྠ་ཝ་སེ ས་མྤ་སྶ་མཱ་ནོ དཱི་གྷ་ར་ཏྟཾ ཨཱ་ར་ཉྙི་ཀོ ཙེ་ཝ ཨཱ་ར་ཉྙི་ཀ་ཏྟ་སྶ ཙ ཝ་ཎྞ་ཝཱ་དཱི, པི་ཎྜ་པཱ་ཏི་ཀོ ཙེ་ཝ…པེ… པཾ་སུ་ཀཱུ་ལི་ཀོ ཙེ་ཝ… ཏེ་ཙཱི་ཝ་རི་ཀོ ཙེ་ཝ… ཨ་པྤི་ཙྪོ ཙེ་ཝ… ས་ནྟུ་ཊྛོ ཙེ་ཝ… པ་ཝི་ཝི་ཏྟོ ཙེ་ཝ… ཨ་སཾ་ས་ཊྛོ ཙེ་ཝ… ཨཱ་ར་དྡྷ་ཝཱི་རི་ཡོ ཙེ་ཝ ཝཱི་རི་ཡཱ་ར་མྦྷ་སྶ ཙ ཝ་ཎྞ་ཝཱ་དཱི’’ཏི.
‘‘སཱ་དྷུ སཱ་དྷུ, ཀ་སྶ་པ. བ་ཧུ་ཛ་ན་ཧི་ཏཱ་ཡ ཀི་ར ཏྭཾ, ཀ་སྶ་པ, པ་ཊི་པ་ནྣོ བ་ཧུ་ཛ་ན་སུ་ཁཱ་ཡ ལོ་ཀཱ་ནུ་ཀ་མྤཱ་ཡ ཨ་ཏྠཱ་ཡ ཧི་ཏཱ་ཡ སུ་ཁཱ་ཡ དེ་ཝ་མ་ནུ་སྶཱ་ནཾ. ཏ་སྨཱ་ཏི་ཧ ཏྭཾ, ཀ་སྶ་པ, སཱ་ཎཱ་ནི ཙེ་ཝ པཾ་སུ་ཀཱུ་ལཱ་ནི དྷཱ་རེ་ཧི ནི་བྦ་ས་ནཱ་ནི, པི་ཎྜཱ་ཡ ཙ ཙ་རཱ་ཧི, ཨ་ར་ཉྙེ ཙ ཝི་ཧ་རཱ་ཧཱི’’ཏི. པ་ཉྩ་མཾ.