༦. ལ་ཀུ་ཎྜ་ཀ་བྷ་དྡི་ཡ་སུ་ཏྟཾ

༢༤༠. སཱ་ཝ་ཏྠི་ཡཾ ཝི་ཧ་ར་ཏི. ཨ་ཐ ཁོ ཨཱ་ཡ་སྨཱ ལ་ཀུ་ཎྜ་ཀ་བྷ་དྡི་ཡོ ཡེ་ན བྷ་ག་ཝཱ ཏེ་ནུ་པ་ས་ངྐ་མི. ཨ་དྡ་སཱ ཁོ བྷ་ག་ཝཱ ཨཱ་ཡ་སྨ་ནྟཾ ལ་ཀུ་ཎྜ་ཀ་བྷ་དྡི་ཡཾ དཱུ་ར་ཏོ་ཝ ཨཱ་ག་ཙྪ་ནྟཾ. དི་སྭཱ་ན བྷི་ཀྑཱུ ཨཱ་མ་ནྟེ་སི – ‘‘པ་སྶ་ཐ ནོ ཏུ་མྷེ, བྷི་ཀྑ་ཝེ, ཨེ་ཏཾ བྷི་ཀྑུཾ ཨཱ་ག་ཙྪ་ནྟཾ དུ་བྦ་ཎྞཾ དུ་དྡ་སི་ཀཾ ཨོ་ཀོ་ཊི་མ་ཀཾ བྷི་ཀྑཱུ་ནཾ པ་རི་བྷཱུ་ཏ་རཱུ་པ’’ནྟི? ‘‘ཨེ་ཝཾ, བྷ་ནྟེ’’. ‘‘ཨེ་སོ ཁོ, བྷི་ཀྑ་ཝེ, བྷི་ཀྑུ མ་ཧི་དྡྷི་ཀོ མ་ཧཱ་ནུ་བྷཱ་ཝོ, ན ཙ སཱ ས་མཱ་པ་ཏྟི སུ་ལ་བྷ་རཱུ་པཱ ཡཱ ཏེ་ན བྷི་ཀྑུ་ནཱ ཨ་ས་མཱ་པ་ནྣ་པུ་བྦཱ. ཡ་སྶ ཙ་ཏྠཱ་ཡ ཀུ་ལ་པུ་ཏྟཱ ས་མྨ་དེ་ཝ ཨ་གཱ་ར་སྨཱ ཨ་ན་གཱ་རི་ཡཾ པ་བྦ་ཛ་ནྟི, ཏ་ད་ནུ་ཏྟ་རཾ བྲ་ཧྨ་ཙ་རི་ཡ་པ་རི་ཡོ་སཱ་ནཾ དི་ཊྛེ་ཝ དྷ་མྨེ ས་ཡཾ ཨ་བྷི་ཉྙཱ ས་ཙྪི་ཀ་ཏྭཱ ཨུ་པ་ས་མྤ་ཛྫ ཝི་ཧ་ར་ཏཱི’’ཏི. ཨི་ད་མ་ཝོ་ཙ བྷ་ག་ཝཱ…པེ… ས་ཏྠཱ –

‘‘ཧཾ་སཱ ཀོ་ཉྩཱ མ་ཡཱུ་རཱ ཙ, ཧ་ཏྠ་ཡོ པ་ས་དཱ མི་གཱ;

ས་བྦེ སཱི་ཧ་སྶ བྷཱ་ཡ་ནྟི, ན་ཏྠི ཀཱ་ཡ་སྨིཾ ཏུ་ལྱ་ཏཱ.

‘‘ཨེ་ཝ་མེ་ཝ མ་ནུ་སྶེ་སུ, ད་ཧ་རོ ཙེ་པི པ་ཉྙ་ཝཱ;

སོ ཧི ཏ་ཏྠ མ་ཧཱ ཧོ་ཏི, ནེ་ཝ བཱ་ལོ ས་རཱི་ར་ཝཱ’’ཏི. ཚ་ཊྛཾ;