༤. པ་ཋ་མ་མཱ་ར་པཱ་ས་སུ་ཏྟཾ

༡༤༠. ཨེ་ཝཾ མེ སུ་ཏཾ – ཨེ་ཀཾ ས་མ་ཡཾ བྷ་ག་ཝཱ བཱ་རཱ་ཎ་སི་ཡཾ ཝི་ཧ་ར་ཏི ཨི་སི་པ་ཏ་ནེ མི་ག་དཱ་ཡེ. ཏ་ཏྲ ཁོ བྷ་ག་ཝཱ བྷི་ཀྑཱུ ཨཱ་མ་ནྟེ་སི – ‘‘བྷི་ཀྑ་ཝོ’’ཏི. ‘‘བྷ་ད་ནྟེ’’ཏི ཏེ བྷི་ཀྑཱུ བྷ་ག་ཝ་ཏོ པ་ཙྩ་སྶོ་སུཾ. བྷ་ག་ཝཱ ཨེ་ཏ་ད་ཝོ་ཙ –

‘‘མ་ཡ྄ཧཾ ཁོ, བྷི་ཀྑ་ཝེ, ཡོ་ནི་སོ མ་ན་སི་ཀཱ་རཱ ཡོ་ནི་སོ ས་མྨ་པྤ་དྷཱ་ནཱ ཨ་ནུ་ཏྟ་རཱ ཝི་མུ་ཏྟི ཨ་ནུ་པྤ་ཏྟཱ, ཨ་ནུ་ཏྟ་རཱ ཝི་མུ་ཏྟི ས་ཙྪི་ཀ་ཏཱ. ཏུ་མྷེ་པི, བྷི་ཀྑ་ཝེ, ཡོ་ནི་སོ མ་ན་སི་ཀཱ་རཱ ཡོ་ནི་སོ ས་མྨ་པྤ་དྷཱ་ནཱ ཨ་ནུ་ཏྟ་རཾ ཝི་མུ་ཏྟིཾ ཨ་ནུ་པཱ་པུ་ཎཱ་ཐ, ཨ་ནུ་ཏྟ་རཾ ཝི་མུ་ཏྟིཾ ས་ཙྪི་ཀ་རོ་ཐཱ’’ཏི. ཨ་ཐ ཁོ མཱ་རོ པཱ་པི་མཱ ཡེ་ན བྷ་ག་ཝཱ ཏེ་ནུ་པ་ས་ངྐ་མི; ཨུ་པ་ས་ངྐ་མི་ཏྭཱ བྷ་ག་ཝ་ནྟཾ གཱ་ཐཱ་ཡ ཨ་ཛ྄ཛྷ་བྷཱ་སི –

‘‘བ་དྡྷོ་སི མཱ་ར་པཱ་སེ་ན, ཡེ དི་བྦཱ ཡེ ཙ མཱ་ནུ་སཱ;

མཱ་ར་བ་ནྡྷ་ན་བ་དྡྷོ་སི, ན མེ ས་མ་ཎ མོ་ཀྑ་སཱི’’ཏི.

‘‘མུ་ཏྟཱ་ཧཾ [མུ་ཏྟོ་ཧཾ (སཱི. སྱཱ. ཀཾ. པཱི.)] མཱ་ར་པཱ་སེ་ན, ཡེ དི་བྦཱ ཡེ ཙ མཱ་ནུ་སཱ;

མཱ་ར་བ་ནྡྷ་ན་མུ་ཏྟོ་མྷི, ནི་ཧ་ཏོ ཏྭ་མ་སི ཨ་ནྟ་ཀཱ’’ཏི.

ཨ་ཐ ཁོ མཱ་རོ པཱ་པི་མཱ…པེ… ཏ་ཏྠེ་ཝ་ནྟ་ར་དྷཱ་ཡཱི་ཏི.