༤. ར་ཐ་ཝི་ནཱི་ཏ་སུ་ཏྟཾ

༢༥༢. ཨེ་ཝཾ མེ སུ་ཏཾ – ཨེ་ཀཾ ས་མ་ཡཾ བྷ་ག་ཝཱ རཱ་ཛ་ག་ཧེ ཝི་ཧ་ར་ཏི ཝེ་ལུ༹་ཝ་ནེ ཀ་ལ་ནྡ་ཀ་ནི་ཝཱ་པེ. ཨ་ཐ ཁོ ས་མྦ་ཧུ་ལཱ ཛཱ་ཏི་བྷཱུ་མ་ཀཱ བྷི་ཀྑཱུ ཛཱ་ཏི་བྷཱུ་མི་ཡཾ ཝ་སྶཾ་ཝུ་ཊྛཱ ཡེ་ན བྷ་ག་ཝཱ ཏེ་ནུ་པ་ས་ངྐ་མིཾ་སུ; ཨུ་པ་ས་ངྐ་མི་ཏྭཱ བྷ་ག་ཝ་ནྟཾ ཨ་བྷི་ཝཱ་དེ་ཏྭཱ ཨེ་ཀ་མ་ནྟཾ ནི་སཱི་དིཾ་སུ. ཨེ་ཀ་མ་ནྟཾ ནི་སི་ནྣེ ཁོ ཏེ བྷི་ཀྑཱུ བྷ་ག་ཝཱ ཨེ་ཏ་ད་ཝོ་ཙ –

‘‘ཀོ ནུ ཁོ, བྷི་ཀྑ་ཝེ, ཛཱ་ཏི་བྷཱུ་མི་ཡཾ ཛཱ་ཏི་བྷཱུ་མ་ཀཱ་ནཾ བྷི་ཀྑཱུ་ནཾ ས་བྲ་ཧྨ་ཙཱ་རཱི་ནཾ ཨེ་ཝཾ ས་མྦྷཱ་ཝི་ཏོ – ‘ཨ་ཏྟ་ནཱ ཙ ཨ་པྤི་ཙྪོ ཨ་པྤི་ཙྪ་ཀ་ཐ་ཉྩ བྷི་ཀྑཱུ་ནཾ ཀ་ཏྟཱ, ཨ་ཏྟ་ནཱ ཙ ས་ནྟུ་ཊྛོ ས་ནྟུ་ཊྛི་ཀ་ཐ་ཉྩ བྷི་ཀྑཱུ་ནཾ ཀ་ཏྟཱ, ཨ་ཏྟ་ནཱ ཙ པ་ཝི་ཝི་ཏྟོ པ་ཝི་ཝེ་ཀ་ཀ་ཐ་ཉྩ བྷི་ཀྑཱུ་ནཾ ཀ་ཏྟཱ, ཨ་ཏྟ་ནཱ ཙ ཨ་སཾ་ས་ཊྛོ ཨ་སཾ་ས་གྒ་ཀ་ཐ་ཉྩ བྷི་ཀྑཱུ་ནཾ ཀ་ཏྟཱ, ཨ་ཏྟ་ནཱ ཙ ཨཱ་ར་དྡྷ་ཝཱི་རི་ཡོ ཝཱི་རི་ཡཱ་ར་མྦྷ་ཀ་ཐ་ཉྩ བྷི་ཀྑཱུ་ནཾ ཀ་ཏྟཱ, ཨ་ཏྟ་ནཱ ཙ སཱི་ལ་ས་མྤ་ནྣོ སཱི་ལ་ས་མྤ་དཱ་ཀ་ཐ་ཉྩ བྷི་ཀྑཱུ་ནཾ ཀ་ཏྟཱ, ཨ་ཏྟ་ནཱ ཙ ས་མཱ་དྷི་ས་མྤ་ནྣོ ས་མཱ་དྷི་ས་མྤ་དཱ་ཀ་ཐ་ཉྩ བྷི་ཀྑཱུ་ནཾ ཀ་ཏྟཱ, ཨ་ཏྟ་ནཱ ཙ པ་ཉྙཱ་ས་མྤ་ནྣོ པ་ཉྙཱ་ས་མྤ་དཱ་ཀ་ཐ་ཉྩ བྷི་ཀྑཱུ་ནཾ ཀ་ཏྟཱ, ཨ་ཏྟ་ནཱ ཙ ཝི་མུ་ཏྟི་ས་མྤ་ནྣོ ཝི་མུ་ཏྟི་ས་མྤ་དཱ་ཀ་ཐ་ཉྩ བྷི་ཀྑཱུ་ནཾ ཀ་ཏྟཱ, ཨ་ཏྟ་ནཱ ཙ ཝི་མུ་ཏྟི་ཉཱ་ཎ་ད་སྶ་ན་ས་མྤ་ནྣོ ཝི་མུ་ཏྟི་ཉཱ་ཎ་ད་སྶ་ན་ས་མྤ་དཱ་ཀ་ཐ་ཉྩ བྷི་ཀྑཱུ་ནཾ ཀ་ཏྟཱ, ཨོ་ཝཱ་ད་ཀོ ཝི་ཉྙཱ་པ་ཀོ ས་ནྡ་སྶ་ཀོ ས་མཱ་ད་པ་ཀོ ས་མུ་ཏྟེ་ཛ་ཀོ ས་མྤ་ཧཾ་ས་ཀོ ས་བྲ་ཧྨ་ཙཱ་རཱི་ན’’’ནྟི? ‘‘པུ་ཎྞོ ནཱ་མ, བྷ་ནྟེ, ཨཱ་ཡ་སྨཱ མ་ནྟཱ་ཎི་པུ་ཏྟོ ཛཱ་ཏི་བྷཱུ་མི་ཡཾ ཛཱ་ཏི་བྷཱུ་མ་ཀཱ་ནཾ བྷི་ཀྑཱུ་ནཾ ས་བྲ་ཧྨ་ཙཱ་རཱི་ནཾ ཨེ་ཝཾ ས་མྦྷཱ་ཝི་ཏོ – ‘ཨ་ཏྟ་ནཱ ཙ ཨ་པྤི་ཙྪོ ཨ་པྤི་ཙྪ་ཀ་ཐ་ཉྩ བྷི་ཀྑཱུ་ནཾ ཀ་ཏྟཱ, ཨ་ཏྟ་ནཱ ཙ ས་ནྟུ་ཊྛོ…པེ… ཨོ་ཝཱ་ད་ཀོ ཝི་ཉྙཱ་པ་ཀོ ས་ནྡ་སྶ་ཀོ ས་མཱ་ད་པ་ཀོ ས་མུ་ཏྟེ་ཛ་ཀོ ས་མྤ་ཧཾ་ས་ཀོ ས་བྲ་ཧྨ་ཙཱ་རཱི་ན’’’ནྟི.

༢༥༣. ཏེ་ན ཁོ པ་ན ས་མ་ཡེ་ན ཨཱ་ཡ་སྨཱ སཱ་རི་པུ་ཏྟོ བྷ་ག་ཝ་ཏོ ཨ་ཝི་དཱུ་རེ ནི་སི་ནྣོ ཧོ་ཏི. ཨ་ཐ ཁོ ཨཱ་ཡ་སྨ་ཏོ སཱ་རི་པུ་ཏྟ་སྶ ཨེ་ཏ་ད་ཧོ་སི – ‘‘ལཱ་བྷཱ ཨཱ་ཡ་སྨ་ཏོ པུ་ཎྞ་སྶ མ་ནྟཱ་ཎི་པུ་ཏྟ་སྶ, སུ་ལ་དྡྷ་ལཱ་བྷཱ ཨཱ་ཡ་སྨ་ཏོ པུ་ཎྞ་སྶ མ་ནྟཱ་ཎི་པུ་ཏྟ་སྶ, ཡ་སྶ ཝི་ཉྙཱུ ས་བྲ་ཧྨ་ཙཱ་རཱི ས་ཏྠུ ས་མྨུ་ཁཱ ཨ་ནུ་མ་སྶ ཨ་ནུ་མ་སྶ ཝ་ཎྞཾ བྷཱ་ས་ནྟི, ཏ་ཉྩ ས་ཏྠཱ ཨ་བྦྷ་ནུ་མོ་ད་ཏི. ཨ་པྤེ་ཝ ནཱ་མ མ་ཡ་མྤི ཀ་དཱ་ཙི ཀ་ར་ཧ་ཙི ཨཱ་ཡ་སྨ་ཏཱ པུ་ཎྞེ་ན མ་ནྟཱ་ཎི་པུ་ཏྟེ་ན ས་དྡྷིཾ ས་མཱ་ག་ཙྪེ་ཡྻཱ་མ [ས་མཱ་ག་མཾ ག་ཙྪེ་ཡྻ (ཀ.)], ཨ་པྤེ་ཝ ནཱ་མ སི་ཡཱ ཀོ་ཙི་དེ་ཝ ཀ་ཐཱ་ས་ལླཱ་པོ’’ཏི.

༢༥༤. ཨ་ཐ ཁོ བྷ་ག་ཝཱ རཱ་ཛ་ག་ཧེ ཡ་ཐཱ་བྷི་ར་ནྟཾ ཝི་ཧ་རི་ཏྭཱ ཡེ་ན སཱ་ཝ་ཏྠི ཏེ་ན ཙཱ་རི་ཀཾ པ་ཀྐཱ་མི. ཨ་ནུ་པུ་བྦེ་ན ཙཱ་རི་ཀཾ ཙ་ར་མཱ་ནོ ཡེ་ན སཱ་ཝ་ཏྠི ཏ་ད་ཝ་ས་རི. ཏ་ཏྲ སུ་དཾ བྷ་ག་ཝཱ སཱ་ཝ་ཏྠི་ཡཾ ཝི་ཧ་ར་ཏི ཛེ་ཏ་ཝ་ནེ ཨ་ནཱ་ཐ་པི་ཎྜི་ཀ་སྶ ཨཱ་རཱ་མེ. ཨ་སྶོ་སི ཁོ ཨཱ་ཡ་སྨཱ པུ་ཎྞོ མ་ནྟཱ་ཎི་པུ་ཏྟོ – ‘‘བྷ་ག་ཝཱ ཀི་ར སཱ་ཝ་ཏྠིཾ ཨ་ནུ་པྤ་ཏྟོ; སཱ་ཝ་ཏྠི་ཡཾ ཝི་ཧ་ར་ཏི ཛེ་ཏ་ཝ་ནེ ཨ་ནཱ་ཐ་པི་ཎྜི་ཀ་སྶ ཨཱ་རཱ་མེ’’ཏི.

༢༥༥. ཨ་ཐ ཁོ ཨཱ་ཡ་སྨཱ པུ་ཎྞོ མ་ནྟཱ་ཎི་པུ་ཏྟོ སེ་ནཱ་ས་ནཾ སཾ་སཱ་མེ་ཏྭཱ པ་ཏྟ་ཙཱི་ཝ་ར་མཱ་དཱ་ཡ ཡེ་ན སཱ་ཝ་ཏྠི ཏེ་ན ཙཱ་རི་ཀཾ པ་ཀྐཱ་མི. ཨ་ནུ་པུ་བྦེ་ན ཙཱ་རི་ཀཾ ཙ་ར་མཱ་ནོ ཡེ་ན སཱ་ཝ་ཏྠི ཛེ་ཏ་ཝ་ནཾ ཨ་ནཱ་ཐ་པི་ཎྜི་ཀ་སྶ ཨཱ་རཱ་མོ ཡེ་ན བྷ་ག་ཝཱ ཏེ་ནུ་པ་ས་ངྐ་མི; ཨུ་པ་ས་ངྐ་མི་ཏྭཱ བྷ་ག་ཝ་ནྟཾ ཨ་བྷི་ཝཱ་དེ་ཏྭཱ ཨེ་ཀ་མ་ནྟཾ ནི་སཱི་དི. ཨེ་ཀ་མ་ནྟཾ ནི་སི་ནྣཾ ཁོ ཨཱ་ཡ་སྨ་ནྟཾ པུ་ཎྞཾ མ་ནྟཱ་ཎི་པུ་ཏྟཾ བྷ་ག་ཝཱ དྷ་མྨི་ཡཱ ཀ་ཐཱ་ཡ ས་ནྡ་སྶེ་སི ས་མཱ་ད་པེ་སི ས་མུ་ཏྟེ་ཛེ་སི ས་མྤ་ཧཾ་སེ་སི. ཨ་ཐ ཁོ ཨཱ་ཡ་སྨཱ པུ་ཎྞོ མ་ནྟཱ་ཎི་པུ་ཏྟོ བྷ་ག་ཝ་ཏཱ དྷ་མྨི་ཡཱ ཀ་ཐཱ་ཡ ས་ནྡ་སྶི་ཏོ ས་མཱ་ད་པི་ཏོ ས་མུ་ཏྟེ་ཛི་ཏོ ས་མྤ་ཧཾ་སི་ཏོ བྷ་ག་ཝ་ཏོ བྷཱ་སི་ཏཾ ཨ་བྷི་ན་ནྡི་ཏྭཱ ཨ་ནུ་མོ་དི་ཏྭཱ ཨུ་ཊྛཱ་ཡཱ་ས་ནཱ བྷ་ག་ཝ་ནྟཾ ཨ་བྷི་ཝཱ་དེ་ཏྭཱ པ་ད་ཀྑི་ཎཾ ཀ་ཏྭཱ ཡེ་ན ཨ་ནྡྷ་ཝ་ནཾ ཏེ་ནུ་པ་ས་ངྐ་མི དི་ཝཱ་ཝི་ཧཱ་རཱ་ཡ.

༢༥༦. ཨ་ཐ ཁོ ཨ་ཉྙ་ཏ་རོ བྷི་ཀྑུ ཡེ་ནཱ་ཡ་སྨཱ སཱ་རི་པུ་ཏྟོ ཏེ་ནུ་པ་ས་ངྐ་མི; ཨུ་པ་ས་ངྐ་མི་ཏྭཱ ཨཱ་ཡ་སྨ་ནྟཾ སཱ་རི་པུ་ཏྟཾ ཨེ་ཏ་ད་ཝོ་ཙ – ‘‘ཡ་སྶ ཁོ ཏྭཾ, ཨཱ་ཝུ་སོ སཱ་རི་པུ་ཏྟ, པུ་ཎྞ་སྶ ནཱ་མ བྷི་ཀྑུ་ནོ མ་ནྟཱ་ཎི་པུ་ཏྟ་སྶ ཨ་བྷི་ཎྷཾ ཀི་ཏྟ་ཡ་མཱ་ནོ ཨ་ཧོ་སི, སོ བྷ་ག་ཝ་ཏཱ དྷ་མྨི་ཡཱ ཀ་ཐཱ་ཡ ས་ནྡ་སྶི་ཏོ ས་མཱ་ད་པི་ཏོ ས་མུ་ཏྟེ་ཛི་ཏོ ས་མྤ་ཧཾ་སི་ཏོ བྷ་ག་ཝ་ཏོ བྷཱ་སི་ཏཾ ཨ་བྷི་ན་ནྡི་ཏྭཱ ཨ་ནུ་མོ་དི་ཏྭཱ ཨུ་ཊྛཱ་ཡཱ་ས་ནཱ བྷ་ག་ཝ་ནྟཾ ཨ་བྷི་ཝཱ་དེ་ཏྭཱ པ་ད་ཀྑི་ཎཾ ཀ་ཏྭཱ ཡེ་ན ཨ་ནྡྷ་ཝ་ནཾ ཏེ་ན པ་ཀྐ་ནྟོ དི་ཝཱ་ཝི་ཧཱ་རཱ་ཡཱ’’ཏི.

ཨ་ཐ ཁོ ཨཱ་ཡ་སྨཱ སཱ་རི་པུ་ཏྟོ ཏ་ར་མཱ་ན་རཱུ་པོ ནི་སཱི་ད་ནཾ ཨཱ་དཱ་ཡ ཨཱ་ཡ་སྨ་ནྟཾ པུ་ཎྞཾ མ་ནྟཱ་ཎི་པུ་ཏྟཾ པི་ཊྛི་ཏོ པི་ཊྛི་ཏོ ཨ་ནུ་བ་ནྡྷི སཱི་སཱ་ནུ་ལོ་ཀཱི. ཨ་ཐ ཁོ ཨཱ་ཡ་སྨཱ པུ་ཎྞོ མ་ནྟཱ་ཎི་པུ་ཏྟོ ཨ་ནྡྷ་ཝ་ནཾ ཨ་ཛ྄ཛྷོ་གཱ་ཧེ་ཏྭཱ ཨ་ཉྙ་ཏ་ར་སྨིཾ རུ་ཀྑ་མཱུ་ལེ དི་ཝཱ་ཝི་ཧཱ་རཾ ནི་སཱི་དི. ཨཱ་ཡ་སྨཱ་པི ཁོ སཱ་རི་པུ་ཏྟོ ཨ་ནྡྷ་ཝ་ནཾ ཨ་ཛ྄ཛྷོ་གཱ་ཧེ་ཏྭཱ ཨ་ཉྙ་ཏ་ར་སྨིཾ རུ་ཀྑ་མཱུ་ལེ དི་ཝཱ་ཝི་ཧཱ་རཾ ནི་སཱི་དི.

ཨ་ཐ ཁོ ཨཱ་ཡ་སྨཱ སཱ་རི་པུ་ཏྟོ སཱ་ཡ་ནྷ་ས་མ་ཡཾ པ་ཊི་ས་ལླཱ་ནཱ ཝུ་ཊྛི་ཏོ ཡེ་ནཱ་ཡ་སྨཱ པུ་ཎྞོ མ་ནྟཱ་ཎི་པུ་ཏྟོ ཏེ་ནུ་པ་ས་ངྐ་མི; ཨུ་པ་ས་ངྐ་མི་ཏྭཱ ཨཱ་ཡ་སྨ་ཏཱ པུ་ཎྞེ་ན མ་ནྟཱ་ཎི་པུ་ཏྟེ་ན ས་དྡྷིཾ ས་མྨོ་དི. ས་མྨོ་ད་ནཱི་ཡཾ ཀ་ཐཾ སཱ་ར་ཎཱི་ཡཾ ཝཱི་ཏི་སཱ་རེ་ཏྭཱ ཨེ་ཀ་མ་ནྟཾ ནི་སཱི་དི. ཨེ་ཀ་མ་ནྟཾ ནི་སི་ནྣོ ཁོ ཨཱ་ཡ་སྨཱ སཱ་རི་པུ་ཏྟོ ཨཱ་ཡ་སྨ་ནྟཾ པུ་ཎྞཾ མ་ནྟཱ་ཎི་པུ་ཏྟཾ ཨེ་ཏ་ད་ཝོ་ཙ –

༢༥༧. ‘‘བྷ་ག་ཝ་ཏི ནོ, ཨཱ་ཝུ་སོ, བྲ་ཧྨ་ཙ་རི་ཡཾ ཝུ་སྶ་ཏཱི’’ཏི?

‘‘ཨེ་ཝ་མཱ་ཝུ་སོ’’ཏི.

‘‘ཀིཾ ནུ ཁོ, ཨཱ་ཝུ་སོ, སཱི་ལ་ཝི་སུ་དྡྷ་ཏྠཾ བྷ་ག་ཝ་ཏི བྲ་ཧྨ་ཙ་རི་ཡཾ ཝུ་སྶ་ཏཱི’’ཏི?

‘‘ནོ ཧི་དཾ, ཨཱ་ཝུ་སོ’’.

‘‘ཀིཾ པ་ནཱ་ཝུ་སོ, ཙི་ཏྟ་ཝི་སུ་དྡྷ་ཏྠཾ བྷ་ག་ཝ་ཏི བྲ་ཧྨ་ཙ་རི་ཡཾ ཝུ་སྶ་ཏཱི’’ཏི?

‘‘ནོ ཧི་དཾ, ཨཱ་ཝུ་སོ’’.

‘‘ཀིཾ ནུ ཁོ, ཨཱ་ཝུ་སོ, དི་ཊྛི་ཝི་སུ་དྡྷ་ཏྠཾ བྷ་ག་ཝ་ཏི བྲ་ཧྨ་ཙ་རི་ཡཾ ཝུ་སྶ་ཏཱི’’ཏི?

‘‘ནོ ཧི་དཾ, ཨཱ་ཝུ་སོ’’.

‘‘ཀིཾ པ་ནཱ་ཝུ་སོ, ཀ་ངྑཱ་ཝི་ཏ་ར་ཎ་ཝི་སུ་དྡྷ་ཏྠཾ བྷ་ག་ཝ་ཏི བྲ་ཧྨ་ཙ་རི་ཡཾ ཝུ་སྶ་ཏཱི’’ཏི?

‘‘ནོ ཧི་དཾ, ཨཱ་ཝུ་སོ’’.

‘‘ཀིཾ ནུ ཁོ, ཨཱ་ཝུ་སོ, མ་གྒཱ་མ་གྒ་ཉཱ་ཎ་ད་སྶ་ན་ཝི་སུ་དྡྷ་ཏྠཾ བྷ་ག་ཝ་ཏི བྲ་ཧྨ་ཙ་རི་ཡཾ ཝུ་སྶ་ཏཱི’’ཏི?

‘‘ནོ ཧི་དཾ, ཨཱ་ཝུ་སོ’’.

‘‘ཀིཾ པ་ནཱ་ཝུ་སོ, པ་ཊི་པ་དཱ་ཉཱ་ཎ་ད་སྶ་ན་ཝི་སུ་དྡྷ་ཏྠཾ བྷ་ག་ཝ་ཏི བྲ་ཧྨ་ཙ་རི་ཡཾ ཝུ་སྶ་ཏཱི’’ཏི?

‘‘ནོ ཧི་དཾ, ཨཱ་ཝུ་སོ’’.

‘‘ཀིཾ ནུ ཁོ, ཨཱ་ཝུ་སོ, ཉཱ་ཎ་ད་སྶ་ན་ཝི་སུ་དྡྷ་ཏྠཾ བྷ་ག་ཝ་ཏི བྲ་ཧྨ་ཙ་རི་ཡཾ ཝུ་སྶ་ཏཱི’’ཏི?

‘‘ནོ ཧི་དཾ, ཨཱ་ཝུ་སོ’’.

‘‘‘ཀིཾ ནུ ཁོ, ཨཱ་ཝུ་སོ, སཱི་ལ་ཝི་སུ་དྡྷ་ཏྠཾ བྷ་ག་ཝ་ཏི བྲ་ཧྨ་ཙ་རི་ཡཾ ཝུ་སྶ་ཏཱི’ཏི ཨི་ཏི པུ་ཊྛོ ས་མཱ་ནོ ‘ནོ ཧི་དཾ, ཨཱ་ཝུ་སོ’ཏི ཝ་དེ་སི. ‘ཀིཾ པ་ནཱ་ཝུ་སོ, ཙི་ཏྟ་ཝི་སུ་དྡྷ་ཏྠཾ བྷ་ག་ཝ་ཏི བྲ་ཧྨ་ཙ་རི་ཡཾ ཝུ་སྶ་ཏཱི’ཏི ཨི་ཏི པུ་ཊྛོ ས་མཱ་ནོ ‘ནོ ཧི་དཾ, ཨཱ་ཝུ་སོ’ཏི ཝ་དེ་སི. ‘ཀིཾ ནུ ཁོ, ཨཱ་ཝུ་སོ, དི་ཊྛི་ཝི་སུ་དྡྷ་ཏྠཾ…པེ… ཀ་ངྑཱ་ཝི་ཏ་ར་ཎ་ཝི་སུ་དྡྷ་ཏྠཾ…པེ… མ་གྒཱ་མ་གྒ་ཉཱ་ཎ་ད་སྶ་ན་ཝི་སུ་དྡྷ་ཏྠཾ…པེ… པ་ཊི་པ་དཱ་ཉཱ་ཎ་ད་སྶ་ན་ཝི་སུ་དྡྷ་ཏྠཾ…པེ… ཀིཾ ནུ ཁོ, ཨཱ་ཝུ་སོ, ཉཱ་ཎ་ད་སྶ་ན་ཝི་སུ་དྡྷ་ཏྠཾ བྷ་ག་ཝ་ཏི བྲ་ཧྨ་ཙ་རི་ཡཾ ཝུ་སྶ་ཏཱི’ཏི ཨི་ཏི པུ་ཊྛོ ས་མཱ་ནོ ‘ནོ ཧི་དཾ ཨཱ་ཝུ་སོ’ཏི ཝ་དེ་སི. ཀི་མ་ཏྠཾ ཙ་ར་ཧཱ་ཝུ་སོ, བྷ་ག་ཝ་ཏི བྲ་ཧྨ་ཙ་རི་ཡཾ ཝུ་སྶ་ཏཱི’’ཏི? ‘‘ཨ་ནུ་པཱ་དཱ་པ་རི་ནི་བྦཱ་ན་ཏྠཾ ཁོ, ཨཱ་ཝུ་སོ, བྷ་ག་ཝ་ཏི བྲ་ཧྨ་ཙ་རི་ཡཾ ཝུ་སྶ་ཏཱི’’ཏི.

‘‘ཀིཾ ནུ ཁོ, ཨཱ་ཝུ་སོ, སཱི་ལ་ཝི་སུ་དྡྷི ཨ་ནུ་པཱ་དཱ་པ་རི་ནི་བྦཱ་ན’’ནྟི?

‘‘ནོ ཧི་དཾ, ཨཱ་ཝུ་སོ’’.

‘‘ཀིཾ པ་ནཱ་ཝུ་སོ, ཙི་ཏྟ་ཝི་སུ་དྡྷི ཨ་ནུ་པཱ་དཱ་པ་རི་ནི་བྦཱ་ན’’ནྟི?

‘‘ནོ ཧི་དཾ, ཨཱ་ཝུ་སོ’’.

‘‘ཀིཾ ནུ ཁོ, ཨཱ་ཝུ་སོ, དི་ཊྛི་ཝི་སུ་དྡྷི ཨ་ནུ་པཱ་དཱ་པ་རི་ནི་བྦཱ་ན’’ནྟི?

‘‘ནོ ཧི་དཾ, ཨཱ་ཝུ་སོ’’.

‘‘ཀིཾ པ་ནཱ་ཝུ་སོ ཀ་ངྑཱ་ཝི་ཏ་ར་ཎ་ཝི་སུ་དྡྷི ཨ་ནུ་པཱ་དཱ་པ་རི་ནི་བྦཱ་ན’’ནྟི?

‘‘ནོ ཧི་དཾ, ཨཱ་ཝུ་སོ’’.

‘‘ཀིཾ ནུ ཁོ, ཨཱ་ཝུ་སོ, མ་གྒཱ་མ་གྒ་ཉཱ་ཎ་ད་སྶ་ན་ཝི་སུ་དྡྷི ཨ་ནུ་པཱ་དཱ་པ་རི་ནི་བྦཱ་ན’’ནྟི?

‘‘ནོ ཧི་དཾ, ཨཱ་ཝུ་སོ’’.

‘‘ཀིཾ པ་ནཱ་ཝུ་སོ, པ་ཊི་པ་དཱ་ཉཱ་ཎ་ད་སྶ་ན་ཝི་སུ་དྡྷི ཨ་ནུ་པཱ་དཱ་པ་རི་ནི་བྦཱ་ན’’ནྟི?

‘‘ནོ ཧི་དཾ, ཨཱ་ཝུ་སོ’’.

‘‘ཀིཾ ནུ ཁོ, ཨཱ་ཝུ་སོ, ཉཱ་ཎ་ད་སྶ་ན་ཝི་སུ་དྡྷི ཨ་ནུ་པཱ་དཱ་པ་རི་ནི་བྦཱ་ན’’ནྟི?

‘‘ནོ ཧི་དཾ, ཨཱ་ཝུ་སོ’’.

‘‘ཀིཾ པ་ནཱ་ཝུ་སོ, ཨ་ཉྙ་ཏྲ ཨི་མེ་ཧི དྷ་མྨེ་ཧི ཨ་ནུ་པཱ་དཱ་པ་རི་ནི་བྦཱ་ན’’ནྟི?

‘‘ནོ ཧི་དཾ, ཨཱ་ཝུ་སོ’’.

‘‘‘ཀིཾ ནུ ཁོ, ཨཱ་ཝུ་སོ, སཱི་ལ་ཝི་སུ་དྡྷི ཨ་ནུ་པཱ་དཱ་པ་རི་ནི་བྦཱ་ན’ནྟི ཨི་ཏི པུ་ཊྛོ ས་མཱ་ནོ ‘ནོ ཧི་དཾ, ཨཱ་ཝུ་སོ’ཏི ཝ་དེ་སི. ‘ཀིཾ པ་ནཱ་ཝུ་སོ, ཙི་ཏྟ་ཝི་སུ་དྡྷི ཨ་ནུ་པཱ་དཱ་པ་རི་ནི་བྦཱ་ན’ནྟི ཨི་ཏི པུ་ཊྛོ ས་མཱ་ནོ ‘ནོ ཧི་དཾ, ཨཱ་ཝུ་སོ’ཏི ཝ་དེ་སི. ‘ཀིཾ ནུ ཁོ, ཨཱ་ཝུ་སོ, དི་ཊྛི་ཝི་སུ་དྡྷི ཨ་ནུ་པཱ་དཱ་པ་རི་ནི་བྦཱ་ན’ནྟི…པེ… ཀ་ངྑཱ་ཝི་ཏ་ར་ཎ་ཝི་སུ་དྡྷི… མ་གྒཱ་མ་གྒ་ཉཱ་ཎ་ད་སྶ་ན་ཝི་སུ་དྡྷི… པ་ཊི་པ་དཱ་ཉཱ་ཎ་ད་སྶ་ན་ཝི་སུ་དྡྷི… ‘ཀིཾ ནུ ཁོ, ཨཱ་ཝུ་སོ, ཉཱ་ཎ་ད་སྶ་ན་ཝི་སུ་དྡྷི ཨ་ནུ་པཱ་དཱ་པ་རི་ནི་བྦཱ་ན’ནྟི ཨི་ཏི པུ་ཊྛོ ས་མཱ་ནོ ‘ནོ ཧི་དཾ, ཨཱ་ཝུ་སོ’ཏི ཝ་དེ་སི. ‘ཀིཾ པ་ནཱ་ཝུ་སོ, ཨ་ཉྙ་ཏྲ ཨི་མེ་ཧི དྷ་མྨེ་ཧི ཨ་ནུ་པཱ་དཱ་པ་རི་ནི་བྦཱ་ན’ནྟི ཨི་ཏི པུ་ཊྛོ ས་མཱ་ནོ ‘ནོ ཧི་དཾ, ཨཱ་ཝུ་སོ’ཏི ཝ་དེ་སི. ཡ་ཐཱ་ཀ་ཐཾ པ་ནཱ་ཝུ་སོ, ཨི་མ་སྶ བྷཱ་སི་ཏ་སྶ ཨ་ཏྠོ ད་ཊྛ་བྦོ’’ཏི?

༢༥༨. ‘‘སཱི་ལ་ཝི་སུ་དྡྷིཾ ཙེ, ཨཱ་ཝུ་སོ, བྷ་ག་ཝཱ ཨ་ནུ་པཱ་དཱ་པ་རི་ནི་བྦཱ་ནཾ པ་ཉྙ་པེ་ཡྻ, ས་ཨུ་པཱ་དཱ་ནཾ་ཡེ་ཝ ས་མཱ་ནཾ ཨ་ནུ་པཱ་དཱ་པ་རི་ནི་བྦཱ་ནཾ པ་ཉྙ་པེ་ཡྻ [པ་ཉྙཱ་པེ་སྶ (སཱི. སྱཱ.) ཨེ་ཝ་མ་ཉྙ་ཏྠ་པི]. ཙི་ཏྟ་ཝི་སུ་དྡྷིཾ ཙེ, ཨཱ་ཝུ་སོ, བྷ་ག་ཝཱ ཨ་ནུ་པཱ་དཱ་པ་རི་ནི་བྦཱ་ནཾ པ་ཉྙ་པེ་ཡྻ, ས་ཨུ་པཱ་དཱ་ནཾ་ཡེ་ཝ ས་མཱ་ནཾ ཨ་ནུ་པཱ་དཱ་པ་རི་ནི་བྦཱ་ནཾ པ་ཉྙ་པེ་ཡྻ. དི་ཊྛི་ཝི་སུ་དྡྷིཾ ཙེ, ཨཱ་ཝུ་སོ, བྷ་ག་ཝཱ ཨ་ནུ་པཱ་དཱ་པ་རི་ནི་བྦཱ་ནཾ པ་ཉྙ་པེ་ཡྻ, ས་ཨུ་པཱ་དཱ་ནཾ་ཡེ་ཝ ས་མཱ་ནཾ ཨ་ནུ་པཱ་དཱ་པ་རི་ནི་བྦཱ་ནཾ པ་ཉྙ་པེ་ཡྻ. ཀ་ངྑཱ་ཝི་ཏ་ར་ཎ་ཝི་སུ་དྡྷིཾ ཙེ, ཨཱ་ཝུ་སོ, བྷ་ག་ཝཱ ཨ་ནུ་པཱ་དཱ་པ་རི་ནི་བྦཱ་ནཾ པ་ཉྙ་པེ་ཡྻ, ས་ཨུ་པཱ་དཱ་ནཾ་ཡེ་ཝ ས་མཱ་ནཾ ཨ་ནུ་པཱ་དཱ་པ་རི་ནི་བྦཱ་ནཾ པ་ཉྙ་པེ་ཡྻ. མ་གྒཱ་མ་གྒ་ཉཱ་ཎ་ད་སྶ་ན་ཝི་སུ་དྡྷིཾ ཙེ, ཨཱ་ཝུ་སོ, བྷ་ག་ཝཱ ཨ་ནུ་པཱ་དཱ་པ་རི་ནི་བྦཱ་ནཾ པ་ཉྙ་པེ་ཡྻ, ས་ཨུ་པཱ་དཱ་ནཾ་ཡེ་ཝ ས་མཱ་ནཾ ཨ་ནུ་པཱ་དཱ་པ་རི་ནི་བྦཱ་ནཾ པ་ཉྙ་པེ་ཡྻ. པ་ཊི་པ་དཱ་ཉཱ་ཎ་ད་སྶ་ན་ཝི་སུ་དྡྷིཾ ཙེ, ཨཱ་ཝུ་སོ, བྷ་ག་ཝཱ ཨ་ནུ་པཱ་དཱ་པ་རི་ནི་བྦཱ་ནཾ པ་ཉྙ་པེ་ཡྻ, ས་ཨུ་པཱ་དཱ་ནཾ་ཡེ་ཝ ས་མཱ་ནཾ ཨ་ནུ་པཱ་དཱ་པ་རི་ནི་བྦཱ་ནཾ པ་ཉྙ་པེ་ཡྻ. ཉཱ་ཎ་ད་སྶ་ན་ཝི་སུ་དྡྷིཾ ཙེ, ཨཱ་ཝུ་སོ, བྷ་ག་ཝཱ ཨ་ནུ་པཱ་དཱ་པ་རི་ནི་བྦཱ་ནཾ པ་ཉྙ་པེ་ཡྻ, ས་ཨུ་པཱ་དཱ་ནཾ་ཡེ་ཝ ས་མཱ་ནཾ ཨ་ནུ་པཱ་དཱ་པ་རི་ནི་བྦཱ་ནཾ པ་ཉྙ་པེ་ཡྻ. ཨ་ཉྙ་ཏྲ ཙེ, ཨཱ་ཝུ་སོ, ཨི་མེ་ཧི དྷ་མྨེ་ཧི ཨ་ནུ་པཱ་དཱ་པ་རི་ནི་བྦཱ་ནཾ ཨ་བྷ་ཝི་སྶ, པུ་ཐུ་ཛྫ་ནོ པ་རི་ནི་བྦཱ་ཡེ་ཡྻ. པུ་ཐུ་ཛྫ་ནོ ཧི, ཨཱ་ཝུ་སོ, ཨ་ཉྙ་ཏྲ ཨི་མེ་ཧི དྷ་མྨེ་ཧི. ཏེ་ན ཧཱ་ཝུ་སོ, ཨུ་པ་མཾ ཏེ ཀ་རི་སྶཱ་མི; ཨུ་པ་མཱ་ཡ་པི་དྷེ་ཀ་ཙྩེ ཝི་ཉྙཱུ པུ་རི་སཱ བྷཱ་སི་ཏ་སྶ ཨ་ཏྠཾ ཨཱ་ཛཱ་ན་ནྟི.

༢༥༩. ‘‘སེ་ཡྻ་ཐཱ་པི, ཨཱ་ཝུ་སོ, ར་ཉྙོ པ་སེ་ན་དི་སྶ ཀོ་ས་ལ་སྶ སཱ་ཝ་ཏྠི་ཡཾ པ་ཊི་ཝ་ས་ནྟ་སྶ སཱ་ཀེ་ཏེ ཀི་ཉྩི་དེ་ཝ ཨ་ཙྩཱ་ཡི་ཀཾ ཀ་ར་ཎཱི་ཡཾ ཨུ་པྤ་ཛྫེ་ཡྻ. ཏ་སྶ ཨ་ནྟ་རཱ ཙ སཱ་ཝ་ཏྠིཾ ཨ་ནྟ་རཱ ཙ སཱ་ཀེ་ཏཾ ས་ཏྟ ར་ཐ་ཝི་ནཱི་ཏཱ་ནི ཨུ་པ་ཊྛ་པེ་ཡྻུཾ. ཨ་ཐ ཁོ, ཨཱ་ཝུ་སོ, རཱ་ཛཱ པ་སེ་ན་དི ཀོ་ས་ལོ སཱ་ཝ་ཏྠི་ཡཱ ནི་ཀྑ་མི་ཏྭཱ ཨ་ནྟེ་པུ་ར་དྭཱ་རཱ པ་ཋ་མཾ ར་ཐ་ཝི་ནཱི་ཏཾ ཨ་བྷི་རུ་ཧེ་ཡྻ, པ་ཋ་མེ་ན ར་ཐ་ཝི་ནཱི་ཏེ་ན དུ་ཏི་ཡཾ ར་ཐ་ཝི་ནཱི་ཏཾ པཱ་པུ་ཎེ་ཡྻ, པ་ཋ་མཾ ར་ཐ་ཝི་ནཱི་ཏཾ ཝི་སྶ་ཛྫེ་ཡྻ དུ་ཏི་ཡཾ ར་ཐ་ཝི་ནཱི་ཏཾ ཨ་བྷི་རུ་ཧེ་ཡྻ. དུ་ཏི་ཡེ་ན ར་ཐ་ཝི་ནཱི་ཏེ་ན ཏ་ཏི་ཡཾ ར་ཐ་ཝི་ནཱི་ཏཾ པཱ་པུ་ཎེ་ཡྻ, དུ་ཏི་ཡཾ ར་ཐ་ཝི་ནཱི་ཏཾ ཝི་སྶ་ཛྫེ་ཡྻ, ཏ་ཏི་ཡཾ ར་ཐ་ཝི་ནཱི་ཏཾ ཨ་བྷི་རུ་ཧེ་ཡྻ. ཏ་ཏི་ཡེ་ན ར་ཐ་ཝི་ནཱི་ཏེ་ན ཙ་ཏུ་ཏྠཾ ར་ཐ་ཝི་ནཱི་ཏཾ པཱ་པུ་ཎེ་ཡྻ, ཏ་ཏི་ཡཾ ར་ཐ་ཝི་ནཱི་ཏཾ ཝི་སྶ་ཛྫེ་ཡྻ, ཙ་ཏུ་ཏྠཾ ར་ཐ་ཝི་ནཱི་ཏཾ ཨ་བྷི་རུ་ཧེ་ཡྻ. ཙ་ཏུ་ཏྠེ་ན ར་ཐ་ཝི་ནཱི་ཏེ་ན པ་ཉྩ་མཾ ར་ཐ་ཝི་ནཱི་ཏཾ པཱ་པུ་ཎེ་ཡྻ, ཙ་ཏུ་ཏྠཾ ར་ཐ་ཝི་ནཱི་ཏཾ ཝི་སྶ་ཛྫེ་ཡྻ, པ་ཉྩ་མཾ ར་ཐ་ཝི་ནཱི་ཏཾ ཨ་བྷི་རུ་ཧེ་ཡྻ. པ་ཉྩ་མེ་ན ར་ཐ་ཝི་ནཱི་ཏེ་ན ཚ་ཊྛཾ ར་ཐ་ཝི་ནཱི་ཏཾ པཱ་པུ་ཎེ་ཡྻ, པ་ཉྩ་མཾ ར་ཐ་ཝི་ནཱི་ཏཾ ཝི་སྶ་ཛྫེ་ཡྻ, ཚ་ཊྛཾ ར་ཐ་ཝི་ནཱི་ཏཾ ཨ་བྷི་རུ་ཧེ་ཡྻ. ཚ་ཊྛེ་ན ར་ཐ་ཝི་ནཱི་ཏེ་ན ས་ཏྟ་མཾ ར་ཐ་ཝི་ནཱི་ཏཾ པཱ་པུ་ཎེ་ཡྻ, ཚ་ཊྛཾ ར་ཐ་ཝི་ནཱི་ཏཾ ཝི་སྶ་ཛྫེ་ཡྻ, ས་ཏྟ་མཾ ར་ཐ་ཝི་ནཱི་ཏཾ ཨ་བྷི་རུ་ཧེ་ཡྻ. ས་ཏྟ་མེ་ན ར་ཐ་ཝི་ནཱི་ཏེ་ན སཱ་ཀེ་ཏཾ ཨ་ནུ་པཱ་པུ་ཎེ་ཡྻ ཨ་ནྟེ་པུ་ར་དྭཱ་རཾ. ཏ་མེ་ནཾ ཨ་ནྟེ་པུ་ར་དྭཱ་ར་ག་ཏཾ ས་མཱ་ནཾ མི་ཏྟཱ་མ་ཙྩཱ ཉཱ་ཏི་སཱ་ལོ་ཧི་ཏཱ ཨེ་ཝཾ པུ་ཙྪེ་ཡྻུཾ – ‘ཨི་མི་ནཱ ཏྭཾ, མ་ཧཱ་རཱ་ཛ, ར་ཐ་ཝི་ནཱི་ཏེ་ན སཱ་ཝ་ཏྠི་ཡཱ སཱ་ཀེ་ཏཾ ཨ་ནུ་པྤ་ཏྟོ ཨ་ནྟེ་པུ་ར་དྭཱ་ར’ནྟི? ཀ་ཐཾ བྱཱ་ཀ་ར་མཱ་ནོ ནུ ཁོ, ཨཱ་ཝུ་སོ, རཱ་ཛཱ པ་སེ་ན་དི ཀོ་ས་ལོ ས་མྨཱ བྱཱ་ཀ་ར་མཱ་ནོ བྱཱ་ཀ་རེ་ཡྻཱ’’ཏི?

‘‘ཨེ་ཝཾ བྱཱ་ཀ་ར་མཱ་ནོ ཁོ, ཨཱ་ཝུ་སོ, རཱ་ཛཱ པ་སེ་ན་དི ཀོ་ས་ལོ ས་མྨཱ བྱཱ་ཀ་ར་མཱ་ནོ བྱཱ་ཀ་རེ་ཡྻ – ‘ཨི་དྷ མེ སཱ་ཝ་ཏྠི་ཡཾ པ་ཊི་ཝ་ས་ནྟ་སྶ སཱ་ཀེ་ཏེ ཀི་ཉྩི་དེ་ཝ ཨ་ཙྩཱ་ཡི་ཀཾ ཀ་ར་ཎཱི་ཡཾ ཨུ་པྤ་ཛྫི [ཨུ་པྤ་ཛྫ་ཏི (ཀ.)]. ཏ་སྶ མེ ཨ་ནྟ་རཱ ཙ སཱ་ཝ་ཏྠིཾ ཨ་ནྟ་རཱ ཙ སཱ་ཀེ་ཏཾ ས་ཏྟ ར་ཐ་ཝི་ནཱི་ཏཱ་ནི ཨུ་པ་ཊྛ་པེ་སུཾ. ཨ་ཐ ཁྭཱ་ཧཾ སཱ་ཝ་ཏྠི་ཡཱ ནི་ཀྑ་མི་ཏྭཱ ཨ་ནྟེ་པུ་ར་དྭཱ་རཱ པ་ཋ་མཾ ར་ཐ་ཝི་ནཱི་ཏཾ ཨ་བྷི་རུ་ཧིཾ. པ་ཋ་མེ་ན ར་ཐ་ཝི་ནཱི་ཏེ་ན དུ་ཏི་ཡཾ ར་ཐ་ཝི་ནཱི་ཏཾ པཱ་པུ་ཎིཾ, པ་ཋ་མཾ ར་ཐ་ཝི་ནཱི་ཏཾ ཝི་སྶ་ཛྫིཾ དུ་ཏི་ཡཾ ར་ཐ་ཝི་ནཱི་ཏཾ ཨ་བྷི་རུ་ཧིཾ. དུ་ཏི་ཡེ་ན ར་ཐ་ཝི་ནཱི་ཏེ་ན ཏ་ཏི་ཡཾ ར་ཐ་ཝི་ནཱི་ཏཾ པཱ་པུ་ཎིཾ, དུ་ཏི་ཡཾ ར་ཐ་ཝི་ནཱི་ཏཾ ཝི་སྶ་ཛྫིཾ, ཏ་ཏི་ཡཾ ར་ཐ་ཝི་ནཱི་ཏཾ ཨ་བྷི་རུ་ཧིཾ. ཏ་ཏི་ཡེ་ན ར་ཐ་ཝི་ནཱི་ཏེ་ན ཙ་ཏུ་ཏྠཾ ར་ཐ་ཝི་ནཱི་ཏཾ པཱ་པུ་ཎིཾ, ཏ་ཏི་ཡཾ ར་ཐ་ཝི་ནཱི་ཏཾ ཝི་སྶ་ཛྫིཾ, ཙ་ཏུ་ཏྠཾ ར་ཐ་ཝི་ནཱི་ཏཾ ཨ་བྷི་རུ་ཧིཾ. ཙ་ཏུ་ཏྠེ་ན ར་ཐ་ཝི་ནཱི་ཏེ་ན པ་ཉྩ་མཾ ར་ཐ་ཝི་ནཱི་ཏཾ པཱ་པུ་ཎིཾ, ཙ་ཏུ་ཏྠཾ ར་ཐ་ཝི་ནཱི་ཏཾ ཝི་སྶ་ཛྫིཾ, པ་ཉྩ་མཾ ར་ཐ་ཝི་ནཱི་ཏཾ ཨ་བྷི་རུ་ཧིཾ. པ་ཉྩ་མེ་ན ར་ཐ་ཝི་ནཱི་ཏེ་ན ཚ་ཊྛཾ ར་ཐ་ཝི་ནཱི་ཏཾ པཱ་པུ་ཎིཾ, པ་ཉྩ་མཾ ར་ཐ་ཝི་ནཱི་ཏཾ ཝི་སྶ་ཛྫིཾ, ཚ་ཊྛཾ ར་ཐ་ཝི་ནཱི་ཏཾ ཨ་བྷི་རུ་ཧིཾ. ཚ་ཊྛེ་ན ར་ཐ་ཝི་ནཱི་ཏེ་ན ས་ཏྟ་མཾ ར་ཐ་ཝི་ནཱི་ཏཾ པཱ་པུ་ཎིཾ, ཚ་ཊྛཾ ར་ཐ་ཝི་ནཱི་ཏཾ ཝི་སྶ་ཛྫིཾ, ས་ཏྟ་མཾ ར་ཐ་ཝི་ནཱི་ཏཾ ཨ་བྷི་རུ་ཧིཾ. ས་ཏྟ་མེ་ན ར་ཐ་ཝི་ནཱི་ཏེ་ན སཱ་ཀེ་ཏཾ ཨ་ནུ་པྤ་ཏྟོ ཨ་ནྟེ་པུ་ར་དྭཱ་ར’ནྟི. ཨེ་ཝཾ བྱཱ་ཀ་ར་མཱ་ནོ ཁོ, ཨཱ་ཝུ་སོ, རཱ་ཛཱ པ་སེ་ན་དི ཀོ་ས་ལོ ས་མྨཱ བྱཱ་ཀ་ར་མཱ་ནོ བྱཱ་ཀ་རེ་ཡྻཱ’’ཏི.

‘‘ཨེ་ཝ་མེ་ཝ ཁོ, ཨཱ་ཝུ་སོ, སཱི་ལ་ཝི་སུ་དྡྷི ཡཱ་ཝ་དེ་ཝ ཙི་ཏྟ་ཝི་སུ་དྡྷ་ཏྠཱ, ཙི་ཏྟ་ཝི་སུ་དྡྷི ཡཱ་ཝ་དེ་ཝ དི་ཊྛི་ཝི་སུ་དྡྷ་ཏྠཱ, དི་ཊྛི་ཝི་སུ་དྡྷི ཡཱ་ཝ་དེ་ཝ ཀ་ངྑཱ་ཝི་ཏ་ར་ཎ་ཝི་སུ་དྡྷ་ཏྠཱ, ཀ་ངྑཱ་ཝི་ཏ་ར་ཎ་ཝི་སུ་དྡྷི ཡཱ་ཝ་དེ་ཝ མ་གྒཱ་མ་གྒ་ཉཱ་ཎ་ད་སྶ་ན་ཝི་སུ་དྡྷ་ཏྠཱ, མ་གྒཱ་མ་གྒ་ཉཱ་ཎ་ད་སྶ་ན་ཝི་སུ་དྡྷི ཡཱ་ཝ་དེ་ཝ པ་ཊི་པ་དཱ་ཉཱ་ཎ་ད་སྶ་ན་ཝི་སུ་དྡྷ་ཏྠཱ, པ་ཊི་པ་དཱ་ཉཱ་ཎ་ད་སྶ་ན་ཝི་སུ་དྡྷི ཡཱ་ཝ་དེ་ཝ ཉཱ་ཎ་ད་སྶ་ན་ཝི་སུ་དྡྷ་ཏྠཱ, ཉཱ་ཎ་ད་སྶ་ན་ཝི་སུ་དྡྷི ཡཱ་ཝ་དེ་ཝ ཨ་ནུ་པཱ་དཱ་པ་རི་ནི་བྦཱ་ན་ཏྠཱ. ཨ་ནུ་པཱ་དཱ་པ་རི་ནི་བྦཱ་ན་ཏྠཾ ཁོ, ཨཱ་ཝུ་སོ, བྷ་ག་ཝ་ཏི བྲ་ཧྨ་ཙ་རི་ཡཾ ཝུ་སྶ་ཏཱི’’ཏི.

༢༦༠. ཨེ་ཝཾ ཝུ་ཏྟེ, ཨཱ་ཡ་སྨཱ སཱ་རི་པུ་ཏྟོ ཨཱ་ཡ་སྨ་ནྟཾ པུ་ཎྞཾ མ་ནྟཱ་ཎི་པུ་ཏྟཾ ཨེ་ཏ་ད་ཝོ་ཙ – ‘‘ཀོ་ནཱ་མོ ཨཱ་ཡ་སྨཱ, ཀ་ཐ་ཉྩ པ་ནཱ་ཡ་སྨ་ནྟཾ ས་བྲ་ཧྨ་ཙཱ་རཱི ཛཱ་ན་ནྟཱི’’ཏི? ‘‘པུ་ཎྞོ་ཏི ཁོ མེ, ཨཱ་ཝུ་སོ, ནཱ་མཾ; མ་ནྟཱ་ཎི་པུ་ཏྟོ་ཏི ཙ པ་ན མཾ ས་བྲ་ཧྨ་ཙཱ་རཱི ཛཱ་ན་ནྟཱི’’ཏི. ‘‘ཨ་ཙྪ་རི་ཡཾ, ཨཱ་ཝུ་སོ, ཨ་བྦྷུ་ཏཾ, ཨཱ་ཝུ་སོ! ཡ་ཐཱ ཏཾ སུ་ཏ་ཝ་ཏཱ སཱ་ཝ་ཀེ་ན ས་མྨ་དེ་ཝ ས་ཏྠུ་སཱ་ས་ནཾ ཨཱ་ཛཱ་ན་ནྟེ་ན, ཨེ་ཝ་མེ་ཝ ཨཱ་ཡ་སྨ་ཏཱ པུ་ཎྞེ་ན མ་ནྟཱ་ཎི་པུ་ཏྟེ་ན ག་མྦྷཱི་རཱ ག་མྦྷཱི་ར་པ་ཉྷཱ ཨ་ནུ་མ་སྶ ཨ་ནུ་མ་སྶ བྱཱ་ཀ་ཏཱ. ལཱ་བྷཱ ས་བྲ་ཧྨ་ཙཱ་རཱི་ནཾ, སུ་ལ་དྡྷ་ལཱ་བྷཱ ས་བྲ་ཧྨ་ཙཱ་རཱི་ནཾ, ཡེ ཨཱ་ཡ་སྨ་ནྟཾ པུ་ཎྞཾ མ་ནྟཱ་ཎི་པུ་ཏྟཾ ལ་བྷ་ནྟི ད་སྶ་ནཱ་ཡ, ལ་བྷ་ནྟི པ་ཡི་རཱུ་པཱ་ས་ནཱ་ཡ. ཙེ་ལ་ཎྜུ་ཀེ་ན [ཙེ་ལ་ཎྜ་ཀེ་ན (ཀ.), ཙེ་ལ་ཎྜུ་པེ་ཀེ་ན (?)] ཙེ་པི ས་བྲ་ཧྨ་ཙཱ་རཱི ཨཱ་ཡ་སྨ་ནྟཾ པུ་ཎྞཾ མ་ནྟཱ་ཎི་པུ་ཏྟཾ མུ་དྡྷ་ནཱ པ་རི་ཧ་ར་ནྟཱ ལ་བྷེ་ཡྻུཾ ད་སྶ་ནཱ་ཡ, ལ་བྷེ་ཡྻུཾ པ་ཡི་རཱུ་པཱ་ས་ནཱ་ཡ, ཏེ་ས་མྤི ལཱ་བྷཱ ཏེ་ས་མྤི སུ་ལ་དྡྷཾ, ཨ་མྷཱ་ཀ་མྤི ལཱ་བྷཱ ཨ་མྷཱ་ཀ་མྤི སུ་ལ་དྡྷཾ, ཡེ མ་ཡཾ ཨཱ་ཡ་སྨ་ནྟཾ པུ་ཎྞཾ མ་ནྟཱ་ཎི་པུ་ཏྟཾ ལ་བྷཱ་མ ད་སྶ་ནཱ་ཡ, ལ་བྷཱ་མ པ་ཡི་རཱུ་པཱ་ས་ནཱ་ཡཱ’’ཏི.

ཨེ་ཝཾ ཝུ་ཏྟེ, ཨཱ་ཡ་སྨཱ པུ་ཎྞོ མ་ནྟཱ་ཎི་པུ་ཏྟོ ཨཱ་ཡ་སྨ་ནྟཾ སཱ་རི་པུ་ཏྟཾ ཨེ་ཏ་ད་ཝོ་ཙ – ‘‘ཀོ ནཱ་མོ ཨཱ་ཡ་སྨཱ, ཀ་ཐ་ཉྩ པ་ནཱ་ཡ་སྨ་ནྟཾ ས་བྲ་ཧྨ་ཙཱ་རཱི ཛཱ་ན་ནྟཱི’’ཏི? ‘‘ཨུ་པ་ཏི་སྶོ་ཏི ཁོ མེ, ཨཱ་ཝུ་སོ, ནཱ་མཾ; སཱ་རི་པུ་ཏྟོ་ཏི ཙ པ་ན མཾ ས་བྲ་ཧྨ་ཙཱ་རཱི ཛཱ་ན་ནྟཱི’’ཏི. ‘‘ས་ཏྠུ་ཀ་པྤེ་ན ཝ་ཏ ཀི་ར, བྷོ [ཁོ (ཀ.)], སཱ་ཝ་ཀེ་ན ས་དྡྷིཾ མ་ནྟ་ཡ་མཱ་ནཱ ན ཛཱ་ནི་མྷ – ‘ཨཱ་ཡ་སྨཱ སཱ་རི་པུ་ཏྟོ’ཏི. ས་ཙེ ཧི མ་ཡཾ ཛཱ་ནེ་ཡྻཱ་མ ‘ཨཱ་ཡ་སྨཱ སཱ་རི་པུ་ཏྟོ’ཏི, ཨེ་ཏྟ་ཀ་མྤི ནོ ན་པྤ་ཊི་བྷཱ་སེ་ཡྻ [ན་པྤ་ཊི་བྷེ་ཡྻ (?)]. ཨ་ཙྪ་རི་ཡཾ, ཨཱ་ཝུ་སོ, ཨ་བྦྷུ་ཏཾ, ཨཱ་ཝུ་སོ! ཡ་ཐཱ ཏཾ སུ་ཏ་ཝ་ཏཱ སཱ་ཝ་ཀེ་ན ས་མྨ་དེ་ཝ ས་ཏྠུ་སཱ་ས་ནཾ ཨཱ་ཛཱ་ན་ནྟེ་ན, ཨེ་ཝ་མེ་ཝ ཨཱ་ཡ་སྨ་ཏཱ སཱ་རི་པུ་ཏྟེ་ན ག་མྦྷཱི་རཱ ག་མྦྷཱི་ར་པ་ཉྷཱ ཨ་ནུ་མ་སྶ ཨ་ནུ་མ་སྶ པུ་ཙྪི་ཏཱ. ལཱ་བྷཱ ས་བྲ་ཧྨ་ཙཱ་རཱི་ནཾ སུ་ལ་དྡྷ་ལཱ་བྷཱ ས་བྲ་ཧྨ་ཙཱ་རཱི་ནཾ, ཡེ ཨཱ་ཡ་སྨ་ནྟཾ སཱ་རི་པུ་ཏྟཾ ལ་བྷ་ནྟི ད་སྶ་ནཱ་ཡ, ལ་བྷ་ནྟི པ་ཡི་རཱུ་པཱ་ས་ནཱ་ཡ. ཙེ་ལ་ཎྜུ་ཀེ་ན ཙེ་པི ས་བྲ་ཧྨ་ཙཱ་རཱི ཨཱ་ཡ་སྨ་ནྟཾ སཱ་རི་པུ་ཏྟཾ མུ་དྡྷ་ནཱ པ་རི་ཧ་ར་ནྟཱ ལ་བྷེ་ཡྻུཾ ད་སྶ་ནཱ་ཡ, ལ་བྷེ་ཡྻུཾ པ་ཡི་རཱུ་པཱ་ས་ནཱ་ཡ, ཏེ་ས་མྤི ལཱ་བྷཱ ཏེ་ས་མྤི སུ་ལ་དྡྷཾ, ཨ་མྷཱ་ཀ་མྤི ལཱ་བྷཱ ཨ་མྷཱ་ཀ་མྤི སུ་ལ་དྡྷཾ, ཡེ མ་ཡཾ ཨཱ་ཡ་སྨ་ནྟཾ སཱ་རི་པུ་ཏྟཾ ལ་བྷཱ་མ ད་སྶ་ནཱ་ཡ, ལ་བྷཱ་མ པ་ཡི་རཱུ་པཱ་ས་ནཱ་ཡཱ’’ཏི.

ཨི་ཏི་ཧ ཏེ ཨུ་བྷོ་པི མ་ཧཱ་ནཱ་གཱ ཨ་ཉྙ་མ་ཉྙ་སྶ སུ་བྷཱ་སི་ཏཾ ས་མ་ནུ་མོ་དིཾ་སཱུ་ཏི.

ར་ཐ་ཝི་ནཱི་ཏ་སུ་ཏྟཾ ནི་ཊྛི་ཏཾ ཙ་ཏུ་ཏྠཾ.