༦. གོ་པཱ་ལ་ཝི་མཱ་ན་ཝ་ཏྠུ
༡༡༥༩. ‘‘དི་སྭཱ་ན དེ་ཝཾ པ་ཊི་པུ་ཙྪི བྷི་ཀྑུ, ཨུ་ཙྩེ ཝི་མཱ་ན་མྷི ཙི་ར་ཊྛི་ཏི་ཀེ;
ཨཱ་མུ་ཏྟ་ཧ་ཏྠཱ་བྷ་ར་ཎཾ ཡ་ས་སྶིཾ [ཨཱ་མུ་ཏྟ་ཧ་ཏྠཱ་བྷ་ར་ཎོ ཡ་ས་སྶཱི (སྱཱ. པཱི. ཀ.)], དི་བྦེ ཝི་མཱ་ན་མྷི ཡ་ཐཱ་པི ཙ་ནྡི་མཱ.
༡༡༦༠. ‘‘ཨ་ལ་ངྐ་ཏོ མ་ལྱ་དྷ་རོ [མཱ་ལ་བྷཱ་རཱི (སཱི.), མཱ་ལ་དྷ་རཱི (ཀ.)] སུ་ཝ་ཏྠོ, སུ་ཀུ་ཎྜ་ལཱི ཀ་པྤི་ཏ་ཀེ་ས་མ་སྶུ;
ཨཱ་མུ་ཏྟ་ཧ་ཏྠཱ་བྷ་ར་ཎོ ཡ་ས་སྶཱི, དི་བྦེ ཝི་མཱ་ན་མྷི ཡ་ཐཱ་པི ཙ་ནྡི་མཱ.
༡༡༦༡. ‘‘དི་བྦཱ ཙ ཝཱི་ཎཱ པ་ཝ་ད་ནྟི ཝ་གྒུཾ, ཨ་ཊྛ་ཊྛ་ཀཱ སི་ཀྑི་ཏཱ སཱ་དྷུ་རཱུ་པཱ;
དི་བྦཱ ཙ ཀ་ཉྙཱ ཏི་ད་ས་ཙ་རཱ ཨུ་ལཱ༹་རཱ, ན་ཙྩ་ནྟི གཱ་ཡ་ནྟི པ་མོ་ད་ཡ་ནྟི.
༡༡༦༢. ‘‘དེ་ཝི་དྡྷི་པ་ཏྟོ་སི མ་ཧཱ་ནུ་བྷཱ་ཝོ, མ་ནུ་སྶ་བྷཱུ་ཏོ ཀི་མ་ཀཱ་སི པུ་ཉྙཾ;
ཀེ་ནཱ་སི ཨེ་ཝཾ ཛ་ལི་ཏཱ་ནུ་བྷཱ་ཝོ, ཝ་ཎྞོ ཙ ཏེ ས་བྦ་དི་སཱ པ་བྷཱ་ས་ཏཱི’’ཏི.
༡༡༦༣. སོ དེ་ཝ་པུ་ཏྟོ ཨ་ཏྟ་མ་ནོ…པེ… ཡ་སྶ ཀ་མྨ་སྶི་དཾ ཕ་ལཾ.
༡༡༦༤. ‘‘ཨ་ཧཾ མ་ནུ་སྶེ་སུ མ་ནུ་སྶ་བྷཱུ་ཏོ, ས་ངྒ་མྨ ར་ཀྑི་སྶཾ པ་རེ་སཾ དྷེ་ནུ་ཡོ;
ཏ་ཏོ ཙ ཨཱ་གཱ ས་མ་ཎོ མ་མ་ནྟི་ཀེ གཱ་ཝོ ཙ མཱ་སེ ཨ་ག་མཾ་སུ ཁཱ་དི་ཏུཾ.
༡༡༦༥. ‘‘དྭ་ཡ་ཛྫ ཀི་ཙྩཾ ཨུ་བྷ་ཡ་ཉྩ ཀཱ་རི་ཡཾ, ཨི་ཙྩེ་ཝ་ཧཾ [ཨི་ཙྩེ་ཝཾ (ཀ.)] བྷ་ནྟེ ཏ་དཱ ཝི་ཙི་ནྟ་ཡིཾ;
ཏ་ཏོ ཙ ས་ཉྙཾ པ་ཊི་ལ་དྡྷ་ཡོ་ནི་སོ, ད་དཱ་མི བྷ་ནྟེ་ཏི ཁི་པིཾ ཨ་ན་ནྟ་ཀཾ.
༡༡༦༦. ‘‘སོ མཱ་ས་ཁེ་ཏྟཾ ཏུ་རི་ཏོ ཨ་ཝཱ་ས་རིཾ, པུ་རཱ ཨ་ཡཾ བྷ་ཉྫ་ཏི ཡ་སྶི་དཾ དྷ་ནཾ;
ཏ་ཏོ ཙ ཀ་ཎྷོ ཨུ་ར་གོ མ་ཧཱ་ཝི་སོ, ཨ་ཌཾ་སི པཱ་དེ ཏུ་རི་ཏ་སྶ མེ ས་ཏོ.
༡༡༦༧. ‘‘སྭཱ་ཧཾ ཨ་ཊྚོ་མྷི དུ་ཀྑེ་ན པཱི་ལི༹་ཏོ, བྷི་ཀྑུ ཙ ཏཾ སཱ་མཾ མུ་ཉྩི་ཏྭཱ་ན་ནྟ་ཀཾ [མུ་ཉྩི་ཏྭ ན་ནྟ་ཀཾ (སཱི.), མུ་ཉྩི་ཏྭཱ ཨ་ན་ནྟ་ཀཾ (སྱཱ.)];
ཨ་ཧཱ་སི ཀུ་མྨཱ་སཾ མ་མཱ་ནུ་ཀ་མྤ་ཡཱ [མ་མཱ་ནུ་ཀ་མྤི་ཡཱ (པཱི. ཀ.), མ་མཱ་ནུ་ཀ་མྤཱ་ཡ (སྱཱ.)], ཏ་ཏོ ཙུ་ཏོ ཀཱ་ལ་ཀ་ཏོ་མྷི དེ་ཝ་ཏཱ.
༡༡༦༨. ‘‘ཏ་དེ་ཝ ཀ་མྨཾ ཀུ་ས་ལཾ ཀ་ཏཾ མ་ཡཱ, སུ་ཁ་ཉྩ ཀ་མྨཾ ཨ་ནུ་བྷོ་མི ཨ་ཏྟ་ནཱ;
ཏ་ཡཱ ཧི བྷ་ནྟེ ཨ་ནུ་ཀ་མྤི་ཏོ བྷུ་སཾ, ཀ་ཏ་ཉྙུ་ཏཱ་ཡ ཨ་བྷི་པཱ་ད་ཡཱ་མི ཏཾ.
༡༡༦༩. ‘‘ས་དེ་ཝ་ཀེ ལོ་ཀེ ས་མཱ་ར་ཀེ ཙ, ཨ་ཉྙོ མུ་ནི ན་ཏྠི ཏ་ཡཱ་ནུ་ཀ་མྤ་ཀོ;
ཏ་ཡཱ ཧི བྷ་ནྟེ ཨ་ནུ་ཀ་མྤི་ཏོ བྷུ་སཾ, ཀ་ཏ་ཉྙུ་ཏཱ་ཡ ཨ་བྷི་ཝཱ་ད་ཡཱ་མི ཏཾ.
༡༡༧༠. ‘‘ཨི་མ་སྨིཾ ལོ་ཀེ པ་ར་སྨིཾ ཝཱ པ་ན, ཨ་ཉྙོ མུ་ནཱི ན་ཏྠི ཏ་ཡཱ་ནུ་ཀ་མྤ་ཀོ;
ཏ་ཡཱ ཧི བྷ་ནྟེ ཨ་ནུ་ཀ་མྤི་ཏོ བྷུ་སཾ, ཀ་ཏ་ཉྙུ་ཏཱ་ཡ ཨ་བྷི་ཝཱ་ད་ཡཱ་མི ཏ’’ནྟི.
གོ་པཱ་ལ་ཝི་མཱ་ནཾ ཚ་ཊྛཾ.