༤. སུ་ཝ་ཎྞ་ཝི་མཱ་ན་ཝ་ཏྠུ
༡༡༣༤. ‘‘སོ་ཝ་ཎྞ་མ་ཡེ པ་བྦ་ཏ་སྨིཾ, ཝི་མཱ་ནཾ ས་བྦ་ཏོ་པ་བྷཾ;
ཧེ་མ་ཛཱ་ལ་པ་ཊི་ཙྪ་ནྣཾ [ཧེ་མ་ཛཱ་ལ་ཀ་པ་ཙྪ་ནྣཾ (སཱི.)], ཀི་ངྐི་ཎི [ཀི་ངྐ་ཎི་ཀ (སྱཱ. ཀ.), ཀི་ངྐི་ཎི་ཀ (པཱི.)] ཛཱ་ལ་ཀ་པྤི་ཏཾ.
༡༡༣༥. ‘‘ཨ་ཊྛཾ་སཱ སུ་ཀ་ཏཱ ཐ་མྦྷཱ, ས་བྦེ ཝེ་ལུ༹་རི་ཡཱ་མ་ཡཱ;
ཨེ་ཀ་མེ་ཀཱ་ཡ ཨཾ་སི་ཡཱ, ར་ཏ་ནཱ ས་ཏྟ ནི་མྨི་ཏཱ.
༡༡༣༦. ‘‘ཝེ་ལུ༹་རི་ཡ་སུ་ཝ་ཎྞ་སྶ, ཕ་ལི་ཀཱ རཱུ་པི་ཡ་སྶ ཙ;
མ་སཱ་ར་ག་ལླ་མུ་ཏྟཱ་ཧི, ལོ་ཧི་ཏ་ངྒ་མ་ཎཱི་ཧི ཙ.
༡༡༣༧. ‘‘ཙི་ཏྲཱ མ་ནོ་ར་མཱ བྷཱུ་མི, ན ཏ་ཏྠུ་དྡྷཾ་ས་ཏཱི ར་ཛོ;
གོ་པཱ་ཎ་སཱི་ག་ཎཱ པཱི་ཏཱ, ཀཱུ་ཊཾ དྷཱ་རེ་ནྟི ནི་མྨི་ཏཱ.
༡༡༣༨. ‘‘སོ་པཱ་ཎཱ་ནི ཙ ཙ་ཏྟཱ་རི, ནི་མྨི་ཏཱ ཙ་ཏུ་རོ དི་སཱ;
ནཱ་ནཱ་ར་ཏ་ན་ག་བྦྷེ་ཧི, ཨཱ་དི་ཙྩོ་ཝ ཝི་རོ་ཙ་ཏི.
༡༡༣༩. ‘‘ཝེ་དི་ཡཱ ཙ་ཏ་སྶོ ཏ་ཏྠ, ཝི་བྷ་ཏྟཱ བྷཱ་ག་སོ མི་ཏཱ;
ད་དྡ་ལླ་མཱ་ནཱ ཨཱ་བྷ་ནྟི, ས་མ་ནྟཱ ཙ་ཏུ་རོ དི་སཱ.
༡༡༤༠. ‘‘ཏ་སྨིཾ ཝི་མཱ་ནེ པ་ཝ་རེ, དེ་ཝ་པུ་ཏྟོ མ་ཧ་པྤ་བྷོ;
ཨ་ཏི་རོ་ཙ་སི ཝ་ཎྞེ་ན, ཨུ་ད་ཡ་ནྟོ་ཝ བྷཱ་ཎུ་མཱ.
༡༡༤༡. ‘‘དཱ་ན་སྶ ཏེ ཨི་དཾ ཕ་ལཾ, ཨ་ཐོ སཱི་ལ་སྶ ཝཱ པ་ན;
ཨ་ཐོ ཨ་ཉྫ་ལི་ཀ་མྨ་སྶ, ཏཾ མེ ཨ་ཀྑཱ་ཧི པུ་ཙྪི་ཏོ’’.
༡༡༤༢. སོ དེ་ཝ་པུ་ཏྟོ ཨ་ཏྟ་མ་ནོ…པེ… ཡ་སྶ ཀ་མྨ་སྶི་དཾ ཕ་ལཾ.
༡༡༤༣. ‘‘ཨ་ཧཾ ཨ་ནྡྷ་ཀ་ཝི་ནྡ་སྨིཾ, བུ་དྡྷ་སྶཱ་དི་ཙྩ་བ་ནྡྷུ་ནོ;
ཝི་ཧཱ་རཾ ས་ཏྠུ ཀཱ་རེ་སིཾ, པ་ས་ནྣོ སེ་ཧི པཱ་ཎི་བྷི.
༡༡༤༤. ‘‘ཏ་ཏྠ ག་ནྡྷ་ཉྩ མཱ་ལ་ཉྩ, པ་ཙྩ་ཡ་ཉྩ [པ་ཙྩ་གྒ་ཉྩ (སཱི.), པ་ཙྩ་གྒྷ་ཉྩ (?)] ཝི་ལེ་པ་ནཾ;
ཝི་ཧཱ་རཾ ས་ཏྠུ ཨ་དཱ་སིཾ, ཝི་པྤ་ས་ནྣེ་ན ཙེ་ཏ་སཱ;
ཏེ་ན མ་ཡ྄ཧཾ ཨི་དཾ ལ་དྡྷཾ, ཝ་སཾ ཝ་ཏྟེ་མི ན་ནྡ་ནེ.
༡༡༤༥. ‘‘ན་ནྡ་ནེ ཙ ཝ་ནེ [ན་ནྡ་ནེ པ་ཝ་ནེ (སཱི. སྱཱ.)] ར་མྨེ, ནཱ་ནཱ་དི་ཛ་ག་ཎཱ་ཡུ་ཏེ;
ར་མཱ་མི ན་ཙྩ་གཱི་ཏེ་ཧི, ཨ་ཙྪ་རཱ་ཧི པུ་ར་ཀྑ་ཏོ’’ཏི.
སུ་ཝ་ཎྞ་ཝི་མཱ་ནཾ ཙ་ཏུ་ཏྠཾ.