༡༢. ར་ཛྫུ་མཱ་ལཱ་ཝི་མཱ་ན་ཝ་ཏྠུ
༨༢༦. ‘‘ཨ་བྷི་ཀྐ་ནྟེ་ན ཝ་ཎྞེ་ན, ཡཱ ཏྭཾ ཏི་ཊྛ་སི དེ་ཝ་ཏེ;
ཧ་ཏྠ་པཱ་དེ ཙ ཝི་གྒ་ཡ྄ཧ, ན་ཙྩ་སི སུ་པྤ་ཝཱ་དི་ཏེ.
༨༢༧. ‘‘ཏ་སྶཱ ཏེ ན་ཙྩ་མཱ་ནཱ་ཡ, ཨ་ངྒ་མ་ངྒེ་ཧི ས་བྦ་སོ;
དི་བྦཱ ས་དྡཱ ནི་ཙྪ་ར་ནྟི, ས་ཝ་ནཱི་ཡཱ མ་ནོ་ར་མཱ.
༨༢༨. ‘‘ཏ་སྶཱ ཏེ ན་ཙྩ་མཱ་ནཱ་ཡ, ཨ་ངྒ་མ་ངྒེ་ཧི ས་བྦ་སོ;
དི་བྦཱ ག་ནྡྷཱ པ་ཝཱ་ཡ་ནྟི, སུ་ཙི་ག་ནྡྷཱ མ་ནོ་ར་མཱ.
༨༢༩. ‘‘ཝི་ཝ་ཏྟ་མཱ་ནཱ ཀཱ་ཡེ་ན, ཡཱ ཝེ་ཎཱི་སུ པི་ལ༹་ནྡྷ་ནཱ;
ཏེ་སཾ སུ་ཡྻ་ཏི ནི་གྒྷོ་སོ, ཏུ་རི་ཡེ པ་ཉྩ་ངྒི་ཀེ ཡ་ཐཱ.
༨༣༠. ‘‘ཝ་ཊཾ་ས་ཀཱ ཝཱ་ཏ་དྷུ་ཏཱ, ཝཱ་ཏེ་ན ས་མྤ་ཀ་མྤི་ཏཱ;
ཏེ་སཾ སུ་ཡྻ་ཏི ནི་གྒྷོ་སོ, ཏུ་རི་ཡེ པ་ཉྩ་ངྒི་ཀེ ཡ་ཐཱ.
༨༣༡. ‘‘ཡཱ་པི ཏེ སི་ར་སྨིཾ མཱ་ལཱ, སུ་ཙི་ག་ནྡྷཱ མ་ནོ་ར་མཱ;
ཝཱ་ཏི ག་ནྡྷོ དི་སཱ ས་བྦཱ, རུ་ཀྑོ མ་ཉྫཱུ་ས་ཀོ ཡ་ཐཱ.
༨༣༢. ‘‘གྷཱ་ཡ་སེ ཏཾ སུ་ཙི་ག་ནྡྷཾ, རཱུ་པཾ པ་སྶ་སི ཨ་མཱ་ནུ་སཾ;
དེ་ཝ་ཏེ པུ་ཙྪི་ཏཱ་ཙི་ཀྑ, ཀི་སྶ ཀ་མྨ་སྶི་དཾ ཕ་ལ’’ནྟི.
༨༣༣. ‘‘དཱ་སཱི ཨ་ཧཾ པུ་རེ ཨཱ་སིཾ, ག་ཡཱ་ཡཾ བྲཱ་ཧྨ་ཎ་སྶ་ཧཾ;
ཨ་པྤ་པུ་ཉྙཱ ཨ་ལ་ཀྑི་ཀཱ, ར་ཛྫུ་མཱ་ལཱ་ཏི མཾ ཝི་དུཾ [ཝི་དཱུ (སྱཱ. པཱི. ཀ.)].
༨༣༤. ‘‘ཨ་ཀྐོ་སཱ་ནཾ ཝ་དྷཱ་ན་ཉྩ, ཏ་ཛྫ་ནཱ་ཡ ཙ ཨུ་གྒ་ཏཱ [ཨུ་ཀྐ་ཏཱ (སཱི. སྱཱ.)];
ཀུ་ཊཾ ག་ཧེ་ཏྭཱ ནི་ཀྑ་མྨ, ཨ་ག་ཉྪིཾ [ཨཱ་ག་ཙྪིཾ (སྱཱ. ཀ.), ཨ་ག་ཙྪིཾ (པཱི.), ག་ཙྪིཾ (སཱི.)] ཨུ་ད་ཧཱ་རི་ཡཱ [ཨུ་ད་ཀ་ཧཱ་རི་ཡཱ (སཱི.)].
༨༣༥. ‘‘ཝི་པ་ཐེ ཀུ་ཊཾ ནི་ཀྑི་པི་ཏྭཱ, ཝ་ན་ས་ཎྜཾ ཨུ་པཱ་ག་མིཾ;
ཨི་དྷེ་ཝཱ་ཧཾ མ་རི་སྶཱ་མི, ཀོ ཨ་ཏྠོ [ཀྭ་ཏྠོ་སི (ཀ.), ཀཱི་ཝ་ཏྠོ་པི (སྱཱ.)] ཛཱི་ཝི་ཏེ་ན མེ.
༨༣༦. ‘‘ད་ལ༹ྷཾ པཱ་སཾ ཀ་རི་ཏྭཱ་ན, ཨཱ་སུ་མྦྷི་ཏྭཱ་ན པཱ་ད་པེ;
ཏ་ཏོ དི་སཱ ཝི་ལོ་ཀེ་སིཾ,ཀོ ནུ ཁོ ཝ་ན་མ་སྶི་ཏོ.
༨༣༧. ‘‘ཏ་ཏྠ་དྡ་སཱ་སིཾ ས་མྦུ་དྡྷཾ, ས་བྦ་ལོ་ཀ་ཧི་ཏཾ མུ་ནིཾ;
ནི་སི་ནྣཾ རུ་ཀྑ་མཱུ་ལ་སྨིཾ, ཛྷཱ་ཡ་ནྟཾ ཨ་ཀུ་ཏོ་བྷ་ཡཾ.
༨༣༨. ‘‘ཏ་སྶཱ མེ ཨ་ཧུ སཾ་ཝེ་གོ, ཨ་བྦྷུ་ཏོ ལོ་མ་ཧཾ་ས་ནོ;
ཀོ ནུ ཁོ ཝ་ན་མ་སྶི་ཏོ, མ་ནུ་སྶོ ཨུ་དཱ་ཧུ དེ་ཝ་ཏཱ.
༨༣༩. ‘‘པཱ་སཱ་དི་ཀཾ པ་སཱ་ད་ནཱི་ཡཾ, ཝ་ནཱ ནི་བྦ་ན་མཱ་ག་ཏཾ;
དི་སྭཱ མ་ནོ མེ པ་སཱི་དི, ནཱ་ཡཾ ཡཱ་དི་ས་ཀཱི་དི་སོ.
༨༤༠. ‘‘གུ་ཏྟི་ནྡྲི་ཡོ ཛྷཱ་ན་ར་ཏོ, ཨ་བ་ཧི་གྒ་ཏ་མཱ་ན་སོ;
ཧི་ཏོ ས་བྦ་སྶ ལོ་ཀ་སྶ, བུ་དྡྷོ ཨ་ཡཾ [སོ་ཡཾ (སཱི.)] བྷ་ཝི་སྶ་ཏི.
༨༤༡. ‘‘བྷ་ཡ་བྷེ་ར་ཝོ དུ་རཱ་ས་དོ, སཱི་ཧོ་ཝ གུ་ཧ་མ་སྶི་ཏོ;
དུ་ལླ་བྷཱ་ཡཾ ད་སྶ་ནཱ་ཡ, པུ་པྥཾ ཨོ་དུ་མྦ་རཾ ཡ་ཐཱ.
༨༤༢. ‘‘སོ མཾ མུ་དཱུ་ཧི ཝཱ་ཙཱ་ཧི, ཨཱ་ལ་པི་ཏྭཱ ཏ་ཐཱ་ག་ཏོ;
ར་ཛྫུ་མཱ་ལེ་ཏི མཾ་ཝོ་ཙ, ས་ར་ཎཾ ག་ཙྪ ཏ་ཐཱ་ག་ཏཾ.
༨༤༣. ‘‘ཏཱ་ཧཾ གི་རཾ སུ་ཎི་ཏྭཱ་ན, ནེ་ལཾ ཨ་ཏྠ་ཝ་ཏིཾ སུ་ཙིཾ;
ས་ཎྷཾ མུ་དུ་ཉྩ ཝ་གྒུ་ཉྩ, ས་བྦ་སོ་ཀཱ་པ་ནཱུ་ད་ནཾ.
༨༤༤. ‘‘ཀ་ལླ་ཙི་ཏྟ་ཉྩ མཾ ཉ་ཏྭཱ, པ་ས་ནྣཾ སུ་དྡྷ་མཱ་ན་སཾ;
ཧི་ཏོ ས་བྦ་སྶ ལོ་ཀ་སྶ, ཨ་ནུ་སཱ་སི ཏ་ཐཱ་ག་ཏོ.
༨༤༥. ‘‘ཨི་དཾ དུ་ཀྑ་ནྟི མཾ་ཝོ་ཙ, ཨ་ཡཾ དུ་ཀྑ་སྶ ས་མྦྷ་ཝོ;
དུ་ཀྑ [ཨ་ཡཾ (སཱི. སྱཱ. པཱི.)] ནི་རོ་དྷོ མ་གྒོ ཙ [དུ་ཀྑ་ནི་རོ་དྷོ ཙ (སྱཱ.)], ཨ་ཉྫ་སོ ཨ་མ་ཏོ་ག་དྷོ.
༨༤༦. ‘‘ཨ་ནུ་ཀ་མྤ་ཀ་སྶ ཀུ་ས་ལ་སྶ, ཨོ་ཝཱ་ད་མྷི ཨ་ཧཾ ཋི་ཏཱ;
ཨ་ཛ྄ཛྷ་གཱ ཨ་མ་ཏཾ ས་ནྟིཾ, ནི་བྦཱ་ནཾ པ་ད་མ་ཙྩུ་ཏཾ.
༨༤༧. ‘‘སཱ་ཧཾ ཨ་ཝ་ཊྛི་ཏཱ་པེ་མཱ, ད་སྶ་ནེ ཨ་ཝི་ཀ་མྤི་ནཱི;
མཱུ་ལ་ཛཱ་ཏཱ་ཡ ས་དྡྷཱ་ཡ, དྷཱི་ཏཱ བུ་དྡྷ་སྶ ཨོ་ར་སཱ.
༨༤༨. ‘‘སཱ་ཧཾ ར་མཱ་མི ཀཱི་ལཱ༹་མི, མོ་དཱ་མི ཨ་ཀུ་ཏོ་བྷ་ཡཱ;
དི་བྦ་མཱ་ལཾ དྷཱ་ར་ཡཱ་མི, པི་ཝཱ་མི མ་དྷུ་མ་དྡ་ཝཾ.
༨༤༩. ‘‘ས་ཊྛི་ཏུ་རི་ཡ་ས་ཧ་སྶཱ་ནི, པ་ཊི་བོ་དྷཾ ཀ་རོ་ནྟི མེ;
ཨཱ་ལ༹་མྦོ ག་གྒ་རོ བྷཱི་མོ, སཱ་དྷུ་ཝཱ་དཱི ཙ སཾ་ས་ཡོ.
༨༥༠. ‘‘པོ་ཀྑ་རོ ཙ སུ་ཕ་སྶོ ཙ, ཝཱི་ཎཱ་མོ་ཀྑཱ ཙ ནཱ་རི་ཡོ;
ན་ནྡཱ ཙེ་ཝ སུ་ན་ནྡཱ ཙ, སོ་ཎ་དི་ནྣཱ སུ་ཙི་མྷི་ཏཱ.
༨༥༡. ‘‘ཨ་ལ་མྦུ་སཱ མི་སྶ་ཀེ་སཱི ཙ, པུ་ཎྜ་རཱི་ཀཱ་ཏི་དཱ་རུ་ཎཱི [… ཏི་ཙཱ་རུ་ཎཱི (སཱི.)];
ཨེ་ཎཱི་ཕ་སྶཱ སུ་ཕ་སྶཱ [སུ་པ་སྶཱ (སྱཱ. པཱི. ཀ.)] ཙ, སུ་བྷ་དྡཱ [སཾ་བྷ་དྡཱ (ཀ.)] མུ་དུ་ཝཱ་དི་ནཱི.
༨༥༢. ‘‘ཨེ་ཏཱ ཙ་ཉྙཱ ཙ སེ་ཡྻཱ་སེ, ཨ་ཙྪ་རཱ་ནཾ པ་བོ་དྷི་ཀཱ;
ཏཱ མཾ ཀཱ་ལེ་ནུ་པཱ་ག་ནྟྭཱ, ཨ་བྷི་བྷཱ་ས་ནྟི དེ་ཝ་ཏཱ.
༨༥༣. ‘‘ཧ་ནྡ ན་ཙྩཱ་མ གཱ་ཡཱ་མ, ཧ་ནྡ ཏཾ ར་མ་ཡཱ་མ་སེ;
ན་ཡི་དཾ ཨ་ཀ་ཏ་པུ་ཉྙཱ་ནཾ, ཀ་ཏ་པུ་ཉྙཱ་ན་མེ་ཝི་དཾ.
༨༥༤. ‘‘ཨ་སོ་ཀཾ ན་ནྡ་ནཾ ར་མྨཾ, ཏི་ད་སཱ་ནཾ མ་ཧཱ་ཝ་ནཾ;
སུ་ཁཾ ཨ་ཀ་ཏ་པུ་ཉྙཱ་ནཾ, ཨི་དྷ ན་ཏྠི པ་ར་ཏྠ ཙ.
༨༥༥. ‘‘སུ་ཁ་ཉྩ ཀ་ཏ་པུ་ཉྙཱ་ནཾ, ཨི་དྷ ཙེ་ཝ པ་ར་ཏྠ ཙ;
ཏེ་སཾ ས་ཧ་བྱ་ཀཱ་མཱ་ནཾ, ཀ་ཏྟ་བྦཾ ཀུ་ས་ལཾ བ་ཧུཾ;
ཀ་ཏ་པུ་ཉྙཱ ཧི མོ་ད་ནྟི, ས་གྒེ བྷོ་ག་ས་མ་ངྒི་ནོ.
༨༥༦. ‘‘བ་ཧཱུ་ནཾ ཝ་ཏ ཨ་ཏྠཱ་ཡ, ཨུ་པྤ་ཛྫ་ནྟི ཏ་ཐཱ་ག་ཏཱ;
ད་ཀྑི་ཎེ་ཡྻཱ མ་ནུ་སྶཱ་ནཾ, པུ་ཉྙ་ཁེ་ཏྟཱ་ན་མཱ་ཀ་རཱ;
ཡ་ཏྠ ཀཱ་རཾ ཀ་རི་ཏྭཱ་ན, ས་གྒེ མོ་ད་ནྟི དཱ་ཡ་ཀཱ’’ཏི.
ར་ཛྫུ་མཱ་ལཱ་ཝི་མཱ་ནཾ དྭཱ་ད་ས་མཾ.
མ་ཉྫི་ཊྛ་ཀ་ཝ་གྒོ ཙ་ཏུ་ཏྠོ ནི་ཊྛི་ཏོ.
ཏ་སྶུ་དྡཱ་ནཾ –
མ་ཉྫི་ཊྛཱ པ་བྷ་སྶ་རཱ ནཱ་གཱ, ཨ་ལོ་མཱ་ཀ་ཉྫི་ཀ་དཱ་ཡི་ཀཱ;
ཝི་ཧཱ་ར་ཙ་ཏུ་རི་ཏྠ་མྦཱ, པཱི་ཏཱ ཨུ་ཙྪུ་ཝ་ནྡ་ན་ར་ཛྫུ་མཱ་ལཱ ཙ;
ཝ་གྒོ ཏེ་ན པ་ཝུ་ཙྩ་ཏཱི་ཏི.
ཨི་ཏྠི་ཝི་མཱ་ནཾ ས་མ་ཏྟཾ.